رواية أرض الخناجر الفصل الثامن والأربعون بقلم ايلول
صابرله عُمر والعلَيّ سويته
شلت منه الحزن وببيتي خليته
غَمضت الگلب ، اعمى امشي گتله وياه
وسعف فوگ الجمر بهداي مشيته
══━━━━✥◈✥━━━━══
بــدور ::اعصاااب بأيده دفتر مذكراتج.
جــويريه:: تردد صوت بدور بأذني اعيد بحجايتها ما مستوعبة وهي مكابلتني وترجف من الخوف شهكت حاطه ايدي على حلكي فتحت عيني على وسعها مصدومة بسرعة كعدت على حيلي بنص المطبخ ورغد وندى يودن بالغدا ويرجعن يمي يحاجني
رغد:: شكاااتبة؟
ندى:: صخام الصخمني شكااتبة جوري
بــدور:: غيررر تكوم ولج جــويريه والله يموتني اااانه.
شلت راسي اباوعلهن بخوف ارجف واهز راسي لا
-يموتني وألله يموتني.
جرتني بــدور من ايدي تريدني اوكف خايفه وتردد
بــدور:: ميخالف ميخالف ما يموتج كلش.
مسحت عيوني بأيديي اليرجفن اباوع لرغد گالت
رغد:: گليله قديم من جنت عد اهلي.
-كا... كاتبه كاتبه التاريخ.
حجيتها وشهكت ابجي أغطي وجهي بالشال وفزينه على صوته العالي هزني هز من صاح
-جويرررررريه.
طلعت اركض امسح دموعي ورجلي يرجفن من الخوف مشيت حافي نسيت ألبس نعالي رجليَّ احترگن من الصبه، وهو جان بباب المشتمل وجهه مغضب ومايكصه السيف بس شافني طلعت من المطبخ سد الباب ومشه فتحت باب المشتمل صوت دگة گـــلبي عاالي وايدي تهتز كلها سديته ومشيت بخطوات ترجف ابلعم
فتحت باب الغرفة الاواق بكل مكان مشككه وهو واكف يم الميز والدفتر بأيده بعده يقرأ بيه وبس شال راسه ولمحني اجه بسرعة وعصبية جرني من زندي بقووة صرخت موجوعة وهو بلا ما ينطي مجال شمرني على الچرباية حييل وجهه بوجهي وثگل جسمه احس طحن جسمي مدّ ايده على وجهي لزم فكي يعصره بغضب عيونه حمر ويتراجف
-بت الحيوووان على ذمتي انتِ على ذمتي شلون تحلمين بغيرررري، شلون يجي لفكرج غيررري
ويعصر فكي بقوة يهز راسي واني روحـــي رايحه ابجي وارجف مچلبه بأيد هبتني من ايدي بقوة يوكفني دفعني على الحايط ودنك للگاع شال وحده من الاوراق ووكف گدامي يهزها بأيده الترجف ويصيح
-يمممممي يممي وتتخيلين روحج وي غيررري
مد ايده على صدر دشداشتي لماها بين اديه يهزّني منها بعصبيه ويرگع بالورقه على صدري دفعني من ايده حييل ودار يدور بباقي الاوراق مثل الخبل يفتر كعدت بزاوية الغرفة لامه رجليَّ الصدري ارجف ودموعي على خدي لزم الدفتر شكه بالنص وشمره عليَّ يصييح ويغلط غطيت وجهي بأيدي حرف ما يطلع من عندي وهو متخبل .
كل شوي يفقد يشيل ايده يريد يضربني، راشدي واحد يلطشني بالحايط جر نص الدفتر الثاني قرأ الصفحة وفتح عيونه على وسعهن بصدمة يباوعلي ويقرأ بصوت عالي
-بعد ان اكمل دراستي اذهب إلى بلد بعيد لا قيود لذلك المتخلف عليَّ، آعيش بمفردي واذ لم أجد عملاً في أحد الشركات افتتح لي مشروعي الخاص قد يكون دكانن لبيعع التحفيات الأثرية او مكتبة صغيرة لبيع الروايات، وفي أحد ليالي الشتاء الماطرة وانا أعود إلى البيت يصادفني شخصاً بلبسه القاتم يحمل بيده مظلة نقف وجهاً لوجه عند الرصيف بقرب اضاءة الشارع الصفراء، عينانا تبوح ونحن صامتون.
هو يقرأ بصدمة واني بأيدي الترجف امسح دموعي شال راسه باوعلي شمر الدفتر عليَّ بقوة ضربني بخشمي صيحت ولزمت مكان الضربه بأثنين ايديي بس هو ما يشوف شي من گد عصبيته هاي هي راح يموتني، جرني من ايديي حييل ابجي مجلبه بيه وهو يسحلني فرني بحهة الكنتور فتح باب الكنتور دفعني بداخله وسداه كعدت على حيلي ارجف لامه رجلي الصدري واسمع صوته وهو يغلط وصوت مراية الميز وهي تتكسر
سديت اذاني بأثنين ايدي جسمي يرجف شويه وسمعت صوت رغد يمه تسودن عليها
صــيهد::الللمن اجيتي اطلعيييي اطلعيييي.
رغد::اميييي تريدك امي تكول والله اذا طك جوري اسوي فلك.
صــيهد::اطلعيييييي اطلعي انعل ابوووج لا ابو امج لا ابو جوري يا چلاب يا ولّد الچلاب.
واسمع رگعه باب الغرفة وراها قفل الباب ورجع كوه يجر النفس يغلط
-الحيوانه بت القندره اناا متخلف ولج ؟؟؟ انا الناويه تدرسين براسه وتالي تشردين هيج شايفتني زوج وقشمر ؟
بت الچلب عايفج على مايج اكولن وضعها صعب وحقها بس اگرب صوبج وصرختي تالي صامتلي خوش غدره.
اسمعي انا بعمري ما صرت وياج متخلف بس هاي هيه من هاليوم لاراويج انجوم السما بعز الظهر، جامعة ماكو تلفون ماكو باب المشتمل بعد ما تطلعينه من باب الغرفة اذا طلعتي تخنگين روحج بالحجاب خنك واريد من الله تسوين شي غلط يشهد الحسين اعدمج، خل اراويج المتخلف شلون يصير.
وخاف عبالج تگدرين تشردين يشهد الحسين لو تطيرين الحكج خاف عبالج الدنيا هيته وهيج بكيفج تگدرين تشردين وتسافرين لو ترحين لأخر الدنيا الگاج وما اردنج وياي لا يشهد الحسين وكفيل اخته بمچانج اكتلج .
يحجي بصياح ويدفر بالكنتور، شويه وسمعت قفل باب الغرفة انفتح وصوته اختفى بالربع ساعة ضليت كاعده بالكنتور خايفه اطلع خايفه أفتح الباب والكاه بوجهي، مسحت عيوني وعدلت كعدتي يم باب الكنتور فتحته على كيف اباوع للغرفة اتأكد ما موجود، طلعت من الكنتور اتلفت بالغرفة وابجي كزاز المراية متطشر على الميز وعلى الگاع وبكل بمكان ورقة من الدفتر الم بيهن ودموعي تجري عفت الاوراق وفتحت باب الغرفة بسرعة طلعت لباب المشتمل لكيته مقفول، افتر وافكر بكلامه وكل ما تجي ببالي حجايته جامعه ماكو اتخبل.
للعصر يله اندك باب المشتمل طلعت من الغرفة اركض صوت رغد وامها بچيت بس سمعتها
-خاله، قافل الباب عليَّ.
ايمان:: جــويريه يمه كون طگج؟
-لاا لا بس حبسني.
احجي وبس اريد اشوفها رحت على الشباك ولان ما يفتحه دائماً جلبت بيها بأثنين ايدي يله كدرت افتحها، واشوفنها گدام بالعربانه رغد جايبتها ووياهن بدور بچيت اباوعلها ورغد قربتها يم الشباك تحاجيني
ايمان:: شكاتبه ولج وسودنتيه؟
-ما كاتبه شي خاله فـــدوه يگلي بعد ما تداومين والله اموت.
احجي وامسح بعيوني وهي تباوعلي بحيره گالت
ايمان:: مالج غرض بيه هسه لا تحاجينه محترك گلبه عود مناه لمن يبدي الدوام الحديد يلين، بس كليلي شمصخمه شني الكاتبته وسودنه.
دنكت احجي وما اخلي عيني بعينها
-ما كاتبه شي هيج مذكرات وهو قراهم.
حطت ايدها على خدها محتاره
ايمان:: تشوفين روحج انتِ الغلط لو هوه؟
درت وجهي ساكته ودموعي تنزل على خدي گـــلبي يوجعني وهي تحجي عليَّ ما قابله وواضح وضوح الشمس اني الغلطانه گالت
ايمان:: شلون ما اعاين تطلعين مسويتلج سالفة سوده ومصخمه آم المصايب.
درت عليها ابجي
-بسرعة وگفتي وي ابنج.
خلّت اصبعها بين سنونها تعضه بحرگه
ايمان:: انجبي الخويسه آم خنيس انه ليمت واكفه وياه؟ حگ باطل واكفه وياجن انتِ وهذن الفاهيات والنهار كله اتزعل عليه حتى لا يخشن خاطر وحده بيجن.
رغد:: يمه ما تعارفينه انتِ اقل شي يگلب الدنيا، جــويريه انتِ غالطه عليه بالدفتر؟
باوعت الرغد وخاله ايمان متعصبه جنها صــيهد هم بسرعة تعصب هزيت راسي اي
رغد:: اعتذري منه كليله جنت اشوفنك غير شي عبالي بس عصبيّة وصياح ومن عشت وياك وعاشرتك فهمتك وفهمت شخصيتك.
بــدور:: جــويريه وعلي لا تسمعينهن تعاي اشردي هسه يرد محمل حچي جديد يضل يفكر بالسالفة ويعيدها براسه حتى كلساع يحاسبج اشردي ولج بس روحـــي يم مــاسه مو يمي يكتلني وياج انه.
وام صــيهد مدات ايدها طكت بــدور تغلط عليها وتحجي وياي گتلها
-اريد اجي يمكم يگلي بعد ما الج طلعه من المشتمل.
ايمان:: حيل وياج حييل
-خااااله!
-وخلخاله عاينــي ولج جــويريه النوبه لو حطيتي روحج بمصيبه ولا اوكف وياج اخليج انتِ تحلين مصايبج خوش؟
-اي بس هالمره حاجيه كليله خليها تداوم كليه البنيه المن درست وتعبت وقبلت تتزوجك وتظلم نفسها غير علمود تداوم.
-يااا يااا خايبات تسمعنها شلون تحجي.
تحجي بحرگه وتلطم على رجلها بــدور تضحك ورغد تعضلي بشفتها وإني محتاره ابرر لخاله لو الابنها حجت عليَّ ومن شافتني بقيت ساكته رجعت تحجي بحنينه
ايمان:: تداومين مالج غرض بيه يحجي هيج هسه لان محترگ گلبه چم يوم ويلين وكونج انتِ سباعية تصالحينه لا تخلين الزعل بينكم يطول.
-يكلي ما تطلعين من المشتنل وتلفون ماكو ولو طلعتي من الغرفة تخنكين روحج بالحجاب انتِ قابله بحجيه يعني؟
-انتِ مرته وانتِ التگدرين تغيرين حچيه اعرفي شلون تتصرفين وياه، لا تكليله لا والله الا اداوم والا اطلع من المشتمل دام انتِ غلطانه صححي غلطج وهو شويه شويه يتنازل بعد انتِ وشطارتج.
حجتها وخلت رغد تاخذها ضلت بس بــدور واكفه گالت
بــدور:: شكاتبه؟ وهيج صــيهد تسودن صعد ضغطه صار بيه فلك.
-ما كاتبه شي بــدور جيبي تلفوني.
-اخذه والله حط بلوكه جواه وبلوكه فوگه كسره.
حجتها والتفتت على صوت السيارات بسرعة راحت تركض واني سديت الشباك ورجعت للغرفة امسح عيوني شلّت الاوراق اللي لميتهن خليتهن بالميز وسديته كعدت بصف الكنتور مقابيل باب الغرفه، لميت رجليَّ الصدري ونزلت راسي عليهن وسمعت من فتح باب المشتمل واسمع صوت علاليك دقايق وانفتح باب الغرفة بسرعة نتر
-گووومي.
شلت راسي اباوعله وجهه على نفس العصبية ونفس الخزره وكفت مرتبكه
-تعااااي.
حجاها ودار طلعت وراه اباوع بالهول يم الباب علاليك هواي مال مسواك، دار علي ونتر
-عزلي المسواك .
حجاها وشال العلاكه الچبيره مشه بيها للمطبخ مسحت وجهي گـــلبي يدك حيل اخذت من العلاليك ومشيت وراه للمطبخ خليتهن بالگاع يم الثلاجة واباوعله رجع جاب باقي العلاليك عافهن ودار وجهه راح للغرفة بچيت كارهته وكاره روحـــي، فتحت العلاليك وجبت سلال اخذ شغله شغله واحط بالسله وهو كلساع يطلع يباوعلي ويرجع
اخر مره طلع بيها شافني اشيل كلّ طماطه وحدها اباوع بيها يله اخليها بالسله اجاني بساع لزم العلاكه فرغها بالسله بعصبيه
-هيييج هيج اشتغلي بطلي فهاوه.
وشال السله شمرها بالسنك وفتح عليها الماي
-فضيهااا.
شلت راسي اباوعله خازرني درت وجهي منه اكمل باقي المسواك وكل شويه يجر علاكه من ايدي ويحجي بعصبيّة
شهكت روحـــي محترگه حرك من عنده غلط عليَّ وعلى روحه وطلع من المطبخ، واني بقيت بالساعة أرتب الثلاجة واغراض المطبخ الجايبهم، بس خلصت مشيت للغرفة اول ما فتحت الباب صاح
-لمي الگزاز
رجعت للمطبخ جيت المكناسه والمكرافه ودخلت للغرفه اجمع القطع الكبار بأيدي وهوه كاعد على الچربايه ويباوعلي بطرف عينه ويحجي
-مثل ما لميتي صخام وجهج الورق جا لميتي الكزاز لو الا انا احجي يله تفطنين.
مارديت عليه اخذت القطع الكبار ذبيتهن بالسطل ورجعت كنست الباقي لميتهن مشيت هستوني اطلع من باب الغرفة صاح
-سووي عشه.
درت عليه ساكته شال راسه خازرني مشيت للمطبخ شمرت الزباله وغسلت وجهي احس بروحي نار شفته گام يتوضى وبس رجع للغرفه قبل ما يصلي رحت وراه
-شسوي عشا؟
مد السجاده وشال راسه يباوعلي ويحجي من وره خشمه
-ما ادري مسواك وعدج.
-اي بس يعني شسوي؟
دار وجهه اللي ابتسم بحقاره
-مشكلتج نص ساعة اريدن العشه گدامي خل تكضي النص ساعة وبعدج تجرولين الا اگلب المطبخ على راسج.
-ما عدنه خبز.
-اطلعييي من يمي.
اجه علي بسرعة دفعني وسد باب الغرفة بوجهي درت وجهي للمطبخ ابجي وادعي جعل صلاة ما تنقبل يحرك گـــلبي ورايح يصلي، فتحت الثلاجة اباوعلها بحيره ما احب اقرر اني شنو الاسويه احب احد يگلي هذا العشا سويه، طلعت بصل وطماطه خليتهن بشيش وشعلت الطباخ خليهن عليه ينشون، وبين ما نظفت الخضره خلصت النص ساعة، طلع باوعلي من باب المطبخ ودار وجهه راح البيت اهله دقايق ورجّع بأيده جدر الخبز مال اهله خلاه على الكاونتر وباوع للطباخ هز أيده
-ساعة صارلج.
بقيت مدنكه انظف الخضره بس ارفع راسي يشوف دموعي طلع من المطبخ شلت راسي ومسحت عيوني بردني احس بروحي زعلانه حتى من خاله ايمان بهاللحظه، نگعت الخضره بالماي ورحت للطباخ طفيت كشرتهن وخليتهن بصحن كصصت زلاطه خليتهن بالصينية وياهن صحن خضره، شلت الصينية ورحت للغرفة، خليتها بالگاع گدامه ووكفت باوع للصينيه وشال راسه باوعلي
-جيبي ماي وتعاي.
رجعت للمطبخ اخذت دولكه ماي خليتها يمه
-اكعدي اكلي
-ما اريد. -اكعدددي.
زفرت نفس الخنگه تصعد وتنزل ببلعومي كعدت مقابيله دفع الصحن علي وهوه اكل بس خضره وزلاطه شال راسه شافني ما اكل
-اكليي.
-ما احبهن.
هز راسه خوش شويه اكل وگام يغسل شلّت الصينية واجه وراي للمطبخ
-وين الچاي.
باوعتله ساكته احس بهالساعة حييل تعبـــت گد ما يتأمر حجيت بهدوء
-بعدني ما مسويه.
باوع للساعة البالهول ودار علي
-ربع ساعة واريدن الچاي.
دار وجهه وراح عفت الصينية وركضت للقوري خليت بيه شويه ماي وشعلت الطباخ محترك گـــلبي وكل شويه ادعي عليه الربع ساعة صارت نص ساعة صبيتله بكوب واخذته اله عفته على الميز وهوه واكف ياخذ قياسات المراية مال الميز اباوعله ساكته دار وجهه كتب القياسات بتلفونه اخذ محفظته وباكيت الجكاير وطلع بدون ما يشرّب الچاي وهم قفل باب المشتمل وراه.
كعدت بالغرفة شربت الچاي وكل شويه امسح دموعي ساعة الوم روحـــي على الكتبته ساعة اگول حالي حاله هو يحبّ نجمة اقلها اني مجرد احلام ماكو شي حقيقي، ساعة افكر اسمع كلام خاله ايمان واعتذر منه، مرات احس گـــلبي يدك بقوة من تجي ببالي امشي حياتي وياه طبيعيه وتجي الفكري نجمة ورأساً أتراجع وانتظر شوكت تفرج عليَّ وانفصل، للساعة ب١١ اني مكابله الحياطين وگاعده فتحت الميز اريد اخذ الاوراق والدفتر اشمرهن بالزباله خاف يرجع يقرأ البقيه، مالكيتهن دورت الغرفة كلها خاف غلطانه ومخليتهن بغير مكان ابد ولا لكيتهن.
ورجع نفس الخوف الگلبي واحاول اتذكر اخر صفحات شكاتبه شمستله شمصخمة ماكو راح كلشي من عقلي
تمددت بفراشي افكر وبكل فكرة تجي لبالي اطلع ان الغلطانه اني الماشيه خطأ وياه اتذكر كلام عفراء من گالتلي انتِ اللي مخربه حياتج بأيدج انتِ الماراضيه تشوفين صــيهد زوج وحبيب معتبرته مجرد شخص يحميج من ظلم جدي، هو يمشي صح وياج بس انتِ غلط لان ولا مره حاولتي تشوفينه دوم دايره عيــونج عنه لبعيد، وجنها تدري بأفكاري الخياليه.
مسحت دموعي مختنگه الوم بروحي وين اريد اوصل بهالافكار ليش اكتبها اساساً، قهرته واني لو ما هو الله اليعلم شصاير بحالي دائماً هو اللي يساعد ويحميني ويطلعني من نص المشكلة واني اللي اخليه اعصاب واقهره، زفرت نفس بحسره اوعد نفسي أعدل تصرفاتي وانتبهه للبسه واكله اتذكرت من مــاسه مره اجتنا ومابقت غير ربع ساعة ورجعت بسرعة بس لانها ناسه تكوي دشداشة مــيثم، واني شارده من اي شي يخص صيهد لو هو يكوي لو البنات، اعدد لروحي اخطائي واوعد نفسي اغيرهن.
شلت راسي من المخده من سمعت باب المشتمل انفتح، كعدت على حيلي والغطا على رجليَّ فتح باب الغرفة ودخل بدون ما يباوعلي خله تلفونه على الشحن وراح لكنتوره طلعله ملابس اباوعله ساكته اخذ ملابسه وراح يسبح رجعت تمددت افكر اعتذر هسه لو باجر هسه هو بعده محترك گلبه من عندي، افكر بحيره ما ادري شنو الاسويه، رجّع للغرفه لابس تراك اسود سد الباب قفله وراه يريد يباوع بالمراية نسى هيه مكسوره.
باوع بالجرارات ورجع يم نقاط الكهرباء طفاهن توهن طفن وحسيت بيه جراني من أيدي وكفني واني مجلبه بأيده مرتبكه
-ها.
احجي وياه ولازمته من ايده وهو ما مهتم جرني من ايدي للچرباية دفعني عليها سكتت عبالي مثل كل مره من يريدني أنام يمه، تمددت بجهتي ساكته بس صوت دكات گـــلبي عالي، وهو بس تمدد بصفي جرني من أيدي جواه شهكت الزم بأيده وما لحكت احاجيه نزل نفسه يبوسني بشفتي ويجر بملابسي واني اجر بيهن ارجف واحجي بسرعة
-صــيهد حبااب صــيهد .
وهو ما مهتم ينتر الملابس من جتفي بغضب ينزلهن وارجع أجرهن أيده لمستها الجسمي كلها حقد وقوة يضغط على ايدي بعصبيه ويجر بملابسي من عندي بقوة بچيت اصرخ مختنگه ما اريد اعيش الموقف مرتين
-عووووفني عوووفني
جر ايده يرفع ملابسي على كتفي مبتعد عني جرني من ايدي نزلني من الچرباية مشيت بسرعة مبتعده جسمي يرجف ودموعي على خدي وهو رجع للجربايه يدخن.
لميت الغطا عليَّ اشهك نتر بصياح
-سدددي حلگج.
ما سكتت ما گدرت اسكت ايدي من لزمت ايده توجعني واللحظة اللي عاملني بيها بهالطريقة حفرت گـــلبي حفر اباوعله بس جمرة الجكارة مبينه حجيت من بين شهكاتي
-لا تعيدها لا تسوي وياي هيج مثل المغتصبين.
-سدي حلگج.
-لا تخليني اكرهك صــيهد.
-سددي حلگج ونخمدي لا احرك جد جدج بهالساعة.
جريت الغطا على راسي اضم صوت بچيي وهو شويه وطلع من الغرفة ما رجع، مدري شلون غفيت والثاني يوم من الصبح كعدني اسويله ريوك تريك وطلع واني رجعت نمت تغير أسلوبه وياي ما يباوعلي ومن يجي كأنما اني ما موجوده، خلاني ارجع لبيت اهله علمود خاله ايمان وتمارين ايدها ورجلها
""""""""""""""
رنـــه :: كتلها العفراء حماج لو يموووت لو ينجلط ويموت ما اتزوجه باوعتلي تهزّ ايدها
عــفراء:: ترى انه وطرواده رافضين مازن الحد البارحة من منذر خابر طــروادة يعايده كاله خويه هاي السالفة شيلوها من بالكم ما الكم مره يمنه.
درت وجهي منها اكمل الچاي اجه عبود اخذه للدوانيه شيخ حيدر يمنه يتفق وي كهلان على المشيه مالته، گالت عفراء
-شويه واروحن اخذ ريـــمه للصالون تحف وتختار بدله.
-اروحن وياجن انه هم اريدن بدله.
-معرسه بت شامل تريد بدله
عافتني ومشت تضحك وانه حطيت الفكره براسي شويه وشيخ حيدر راح وعفراء تحجي وي طــروادة علمود تاخذ ريـــمه للصالون گالها
-خاف امها ما ترضى.
عــفراء:: عروستنا شني ما ترضى حتى لو هيه تروح ويانه.
اعاينله ضايج هز راسه متحسر
طــروادة:: وسلطان؟ انا ما بالع السالفة كلها يا خطبه يا عقد وهوه بهالحاله حاجيت شيخ حيدر يكلي مالك غرض هو سلطان خابرني.
عــفراء:: بلكي هيج ويصير زين اشوفن هالايام وضعه احسن.
ضل ساكت مدنك عينه بالتلفون اجت عــفراء تغسل الستكاين كالت
-طــروادة يريد حباية راس.
اخذتله حبايه ومشيت بهدوء حتى احاجيه واكله اريد اروح وي عفراء وريمه، وكفت وراه اباوع التلفونه وهو كاعد بالگاع داخل عل رقم بريا ومحتار يخابر لو لا، وبس انتبهلي قفل التلفون، اخذ الحباية من عندي ورضى اروحن وي عفراء وريمه للصالون. وهو بس شرب الحباية اخذ حسين وراح للگيعان. وحاجه ســليم حتى هو يوصلنه،بدلنه وطلعنه ســليم متانينه يم السيارة اخذ شمس من عفراء باسها وزهره تعيب عليه بس ما يشوفهل مدنك ويحجي وي عفراء
-شلونج خويه أم شمس.
-الحمدلله بخير.
ضلينه واكفين يمه متانين ريـــمه، شويه وطلع سلطان گـــلبي اوجعني من شفته شلون ضعفان ويمشي حاني ظهره عبالك شخص عمره ثمانين سنه اعاين الاديه يرجفن سلم علينه حاجاه ســليم خايف عليه وهو هز راسه لا كوه يحجي
سلطان:: مابيه شي زين زين.
ضلينه واكفين يمهم وريمه ماجايتنه طولت طبت عفراء تشوفها مشيت وراها شفنه ريمه تبجي بالمطبخ وبس لمحتنه مشت للسنك تغسل وجها، وكفت عفراء بباب المطبخ سلمت وميلاد ما ردت بس فرح ردت وريمه بصوت مبحوح من البجي ردت وهي تمسح بوجها
ميلاد عاينت العفراء ضحكت وكالتلها
ميلاد:: تعضين اصابعج ندم.
ضحكت عفراء وهي تگلها
عــفراء:: لا لا تشلين همنه ما نتندم شيلي هم روحج ههههه.
وريمه بساع راحت الامها كضتها من ايدها تتوسل
ريـــمه:: يمه فـــدوه كافي ابوس ايدج كااافي ما اروحن هاي هيه ما اروحن.
وجرت ايد امها تبوسها تتوسل بيها وامها تعاين لعفراء بشماته جنها تگلها شوفي وعفراء مبتسمه ساكته اعاينلها بتركيز مبتسمه الميلاد وميلاد شوي شوي تلاشت ابتسامتها وعفراء اشرتلها بحاجبها تعاي.
خزرتها ميلاد وجرت ايدها من ايد ريـــمه بنترطلعت من المطبخ للحوش وعفراء مشتّ وراها رادتني اطب يم ريـــمه بس ما اهتميت اريدن اسمع شيحجن، مركزه وياهن بس هن حجيهن همس ما اسمع منه شي الحد ما عفراء ضحكت وهي تگل الميلاد
عــفراء:: اخذتها من عيــونج.
وميلاد نترت بغضب
ميلاد:: بأرادتي رضيت ولو ما الي بيها مصلحه لو اگطعها وصل ما اطيها.
عــفراء:: مصلحتج تنتهي من اول يوم لريمه ببيتنا.
-خوش انشوف حچايتمن التمشي تالي.
وعفراء تضحك عافت ميلاد واجت وميلاد تعاينلها بغضب وكفت عفراء بصفي عاينت لريمه گالتلها
-يله ريـــمه.
طلعت ريـــمه يمنه وتعاين الامها جرتها عفراء من أيدها وطلعنه صعدنا وي ســليم ومشينه للصالون ريـــمه مالها خلك شي ومن حاجتها عــفراء كالتلها
ريـــمه:: خايفه على سلطان
للغروب يله ردينه للقرية وعفراء ملتهيه تعدل وترتب رحت اطي اكل للطيور وببالي بريا هسه ياهو يدير باله على طيوره، تحسرت مقهوره كل ما اذكره گـــلبي يوجعني، رجعت جوه ساعدت عفراء بالعشا لمن اجو الولد وصبينه طــروادة ياكل مستعجل يريد يروح يصالح مــيثم صبيتله چاي افتر عليه كلساع وگتله
-طــروادة .
-خااااب هاااه هااااه سطرتيني.
-بعدك ماخطبت وصيحت عليَّ.
شرب الچاي وگام صحت وراه
-هااا شو گمت.
-ياااا علي يا ابو الحسنين
-ها راح تدعي عليَّ؟
عبود:: لطشت بعد ما تسكت لو اهلي يعوفون گبورهم ويجونه.
طلع من يمنه وكف بباب الحوش متاني الولد وانه اعاينله افتر وراه لمن اجوه صــيهد ووهب وسليم سلم عليهم وسأل
طــروادة::ها ســليم شلونه سلطان.
ســليم:: والله چنه هالأيام احسن.
-يا الله
وهـــب:: مشينه على مــيثم حتى طــروادة يصالحه واول ما وصلنه لبيتهم سلم علينه وما سلم على طــروادة لمن صاح عليه صــيهد
صــيهد :: لا تضل تاكل تبن الزلمه دايس بيتك.
دار على طــروادة گاله
مــيثم:: هلا بيك بيتك هذا.
طبوا يكعدون وانا ابو بيت بعد عفتهم وگمت الاختي
-ها عمي الناسينه
مــاسه:: ههههه هلا يابعد روحـــي شلونك؟
-اسأل عليج شلونج الخايس مــيثم شلونه وياج؟
حجيت وياها بين ما كضت الچاي اخذته ورحت لكيتهم يسألون على بريا گالهم مــيثم
مــيثم:: لا زين الحد هسه ما يمهم شي همه.
حجاها وعاين لطرواده گاله
طــروادة:: مــيثم لا تضل زعلان مني انتَ تدري ماجنت رافض بريا وجان بيني وبينك اتفاق بس اخوك غلط لا تلومني!
هز راسه مــيثم مأيد ويدري بتصرف بريا غلط بس أنا وسليم لازم نوكف بظهره وما نخليهم يحجون عليه گتله
وهـــب:: حتى لو جان تصرفه علط انتم هم غلطتوا وياه.
ســليم:: اي وعلي شني تطكونه لو انا بمچانه اكسر اديكم بس هوه مؤدب من اكله ليش تخليهم يطكونك وتسكت يكلي أخوتي الكبار همه انتم مال احترام.
وهـــب:: جريت سليم عليه اسد حلكه وهمه ثلاثتهم يردون ياكلونه
صــيهد:: يعني هسه من اكومن واكسر ظهرك تردها الي.
ســليم:: لا اخوي الچبير اسكتلك.
-عبالي.
وهـــب:: جريت ســليم وطلعنه من يمهم بس نضل بعد شويه تعلك، مشينه نفتر ضايجين بدون بريا حتى سوالف ما نسولف ل١٢ ردينه ومشينه على الگيعان شفنه جمرية يم صريفة الگصب مشينه على كيفنه نشوف ياهو من الولد هناه المكاين مطفينهن شعدهم ضالين.
ســليم :: خاب هسه يطلعون مــيثم وصيهد.
-بس اسكت انتَ.
عبرنه من السده وكفنه وره الصريفه نسمعهم يسولفون صــيهد وطرواده يحجون بسلطان ويتفقون ياخذونه للزياره وره خطبة طــروادة شفنه سوالفهم خوش سوالفهم ضلينه نتصنت عليهم لمن طــروادة ضل يلح على صــيهد ليش ضايج وهوه ما يرضى يحجي لمن لح عليه حيل جرله حسره اخوي وگاله
صــيهد:: البنيه ما تريدني،دمرت اعصابي اخافن لا على ساعة اطكها واموتها.
-جا والرضا غير اموتنك وراها.
يحجون واخوي يجر حسرات، عفت سليم بجهه ورحت للجهه الثانية مديت واسي اعاينلهم اللعب حاطليهم قوري چاي بالجمر يشربون ويجذبون واحد على الثاني وكل حجايه يجرولهم حسره من هاي الچبيرة وطرواده صار استاذ براس صــيهد يعلم بيه ويگله
-انتَ هم مدري شلونك لا بيك حجايه حلوه لا صخام بوجهك هي البنيه شتريد اهتمام وحجايات حبوه ومدري شني وعلي تضل تحبك.
ضحك صــيهد يهز راسه لا الجكاره بأيد والاستكان بأسد ويجر حسرات يتنفس حسرات
صــيهد:: شگللها؟؟ انتَ هم لا تضل تمسلت براسي
طــروادة:: كلها يابه يبت الناس انا احبنج ومدري شني.
صــيهد:: ما اعارف
وهـــب::يحجيها مست من المستحى كضتني الضحكه هذا ياهو المايعارف، وطرواده يعلم بيه گاله صــيهد
-لنفرض هسه انتَ مرتي.
-انچب.
صــيهد:: الخايس خل اجرب اعترفلك علمني اثاري انتَ خبره.
ضحك طــروادة وگال الصيهد
-كض ايدي
وصيهد كابل طــروادة وكض چف ايده بأثنين اديه وطرواده جراها موجوع وصاح
طــروادة:: اااخ الغسل هاي انا زلمه وايدي اوجعتني من ايدك كض عدل كضه ناعمه بيها هيّج لمسة مدري شلون تحسس بالحب يعني.
دار علي ســليم مصدوم حطيت ايدي على حلكي اسكته وفتحت تلفوني أصورهم رغم موكلش تبين ملامحهم صــيهد گاله
صــيهد:: ها يله يله
ورد كض ايد طــروادة على كيف وطرواده اخذه الواهس مال راسه على صفحة وصيهد بس صافن ويتحمحم يريد يعترف بحبه
صــيهد:: احم
-كمل.
-احم احم.
طــروادة :: اعترف حبيبي.
صيهد::انا احبنج.
وضحكوا اثنينهم وانا وسليم كوه ضامين ضحكتنه
صــيهد:: بيك مجال اكثر منها انتَ.
دفعه طــروادة يغلط عليه
طــروادة:: والله تمسلت انتَ وكل خير مابيك حجايه حلوه ومدري شني والبنيه تضل تحبك وفضت راحت
جاي نسمعهم وسليم عثر گامولنه يركضون يابه بعد شيفضها، عود ردت اهدده حتى يعوفنه كتله صورتكم النوب زاد جرله كصبه كسرها عليَّ وسليم الچلب باعني شرد وخلاني انكتل وحدي حتى نعالي اخذوه رديت للقرية حافي
"""""""""""""
رنـــه :: بيوم العقد كعدت بالخمسه الفجر لكيت عــفراء كاعده گبلي كانسه الحوش وترش بيه ومحضره اهدوم طــروادة مال المشيه، عاينتلي وسألت
-شبيج؟
رفعت اكتافي ما ادري ضايجة
-حلمت ببريا ما اتذكر الحلم بس كعدت ضايجه مدري ليش.
عاينتلي مستغربة وسمعنه صوت هاسكي ينبح اجوا من الگيعان هوه وطرواده طب للبيت يضحك ولكانه كاعدين گدامه حجت عليه عفراء لان الهسه مانايم اطاني تلفونه حطيته على الشحن وطبيت للمطبخ اسويله ريوك وهوه غسل وضل يم عفراء بالحوش اتقصد اعووفنهم وحدهم النوب اردن اتصنت عليهم لان ادري بيهم يحجون حطيت القوري على النار ورحت يم شباج الهول حطيت اذني يحجّون ببريا وهوه يحلف ويگلها
طــروادة:: امس خابرته مرتين يدك بس ما يرد عليَّ.
-خاف ما يدري بتلفونه.
-لا جا مو الولد يخابرونه جاي يحجي وياهم بس من انه خابرته مارد.
عفتهم يحجون ورجعت للمطبخ مقهوره من اتخيله هيج راح بعيد ومو يوميه اشوفنه مدري شيصير بيه، حطيت طماطه على الطباخ ورجعت اتصنتلهم يحجون بالمشيه كملت الريوك واخذته يمهم كعدوا بالحديقة طــروادة ياكل ويعاينلي
-شبيج ضايجه.
-مابيه شي.
عاين لعفراء متحسر عباله ضايجه علمود خطبته، گمت اجيبن الملح وسمعت تلفونه يدك رحت اركض الغرفته وضحكت بس شفت المتصل بريا اخذت التلفون وطلعت اركض
-بريا.
مدلي ايده اطيته التلفون رد عليه وانه وعفراء اثنينا مگبابلينه سلم عليه ويسأل على مچانه وين واذا يمهم خطر گالتله عفراء
-افتح السماعة خل احاجيه.
شال راسه طــروادة عاينلي. مخليه اضفري بحلكي ورد دنك فتح السماعة وخله التلفون على رجله وهو يگلي
-وين الملح.
طبيت للمطبخ اركض جبته ورجعت اطيته ألّه عفراء تحجي وي بريا
عــفراء:: بريا خويه كونك زعلان من طــروادة؟
بريا:: لا يابه اخوي لو شما يسوي ما ازعل منه.
طــروادة:: انا المفروض ازعل خطبتي اليوم وانتَ عايفنه.
ضحك بريا وهو يگله
بريا:: مــيثم يسد بمچاني وانا ن شاءالله بعرسك حاضر ببس لا تستعجل بالعرس تانيني يجوز ارد.
طــروادة:: هاي هيه وهلي ما اعرش مناه بمن ترد.
يحجي وياه وبريا يضحك گالتله عفراء
عــفراء:: ديربالك على روحك فـــدوه بعد اختك.
بريا:: ان شاءالله خويه ام شمس لا يضل بالج.
اعاين بوجهم اثنينهم يحجون وياه وكضت سوالفهم بس سكتوا حجيت مرتبكه
رنـــه:: شلونك بريا.
عاينت لطرواده خزرني وعفراء تأشرلي بأيدها، وبريا سكت شويه وگال.
بريا::هسه صرت زين.
سد التلفون طــروادة بوجهه وصاح علي بنتر
-حيوووانه شو تحجين من وحدج انتِ.؟
عفت الخبزه من ايدي وكمت بلا ريوك رديت للغرفة شويه واجت وراي عفراء تعاينلي بطرف عينه
-رنـــه الماتريد ابن عمها ما تحاجيه لا تضلين تلعبين.
ماحاجيتها سكتت وانخبصنه بالهوسه، رحنه انه وماسه وي ريـــمه للصالون وهيه كلساع متخربطه تتقيئ ورأسها يوجعها الصيدلية قريبة علينه بس اثنينا انه وماسه نخاف نطلع نجيبلها حبوب بس هيه صارت سباعة گالت
مــاسه:: تعاي نمشي نغطي وجوهنه بالعبايه ياهو يعارفنه.
عاينت لريمه يمكيجون بيها ماراضيه نروح بس من مــاسه تشجعت لبست عبايتي وطلعت وياها عبرنه للصيدليه جبنالها حبوب راس وحبوب معده ومشينه نريد نرد للصالون وحده مچلبه بالثانية تونه نعبر وعرضت گدامنه السيارة
نعاينلهم وهـــب وميثم چانوا يتسوكون بساع مــاسه بررتلهم ومشينه للصالون نركض همه ولا طــروادة وصيهد هذولاك اثنينهم يشلعون گلبنه، شربت ريـــمه الحبوب تلوب ما مرتاحه ساعه تحط ايدها على معدتها ساعة على راسها، كضوا مكياجاها واخذناها انه وماسه لبسناها الفستان لونه سمائي كصته من يم الصدر قلب مخصر الحد الخصر تبدي بيه نفشه خفيفه، وبيه تول منفوشمن يم الزنود وهي تغطي بيه زراكات اديها لزمت ايدها واحنه نحطلها كريم اسألها
-شبيها ايدج زركه.
ريـــمه:: شسمه من الشيره مو فرح سوتلي.
سكتت وماسه تعاينلي ما مقتنعه وريمه ولا الها واهس بشي ومن شفتها ضايجه كتلها
-والله اخوي يدللج
وهي حتى هاللحجايه ما همتها ضلت ساكته سرحن شعرها من شفته راد طويل گتلها
-زين طولان شعرج وره ما كصيته.
شالت راسها الي وتندمت بساع لان حجيت والبنيه التسرح بشعرها گالت مستغربه
-ليش كصيتيه.
ريـــمه:: چان محترك صار حادث واحترك وهيه كصته الي حتى يرد يطول عدل.
سكتت فشلانه وافتر يمها عاجبتني طلعت حيل حلوه مــاسه صورتها بتلفونها، لمن كضينه اجه علينه ســليم، ردنه للقرية نزلنه ريـــمه انه وماسه طببناها للهول بيتهم هوسه اخوالها كلهم موجودين وجهال تتطافر، عفناها وطلعنه مــاسه راحت الاهلها وإنه لبيتنا هم خبصه بس عفراء كلساع تصيح على واحد صوتك لان سلطان نايم عدنا گتلها
-جا وين طــروادة؟
-راح البيت شيخ حيدر چا المشيه من عدهم تجي.
هزيت راسي خوش ومشيت ابدل وعفراء حطتلي مكياج وتأخرنه عود ردنه نروح لبيت عمي شاكر گبل لا الوادم تجي مالحكنه، حسين حرك گـــلبي أأمر عليه ما يرضى يروحلي كضيت حذائة شمرته فوك البيت غلط عليَّ وصعد يجيبه بس صعد صاح
حسين:: اجوووا، بووويه شكد سيارات اوووع.
نزل بساع وانه ركضت كلّت العفراء وطلعت اعاين من يم باب الحوش الثاني صفت السيارات ترست الساحة الگدام بيوتنه ونزلوا الوادم وانه عيوني تدور اخوي لمن لمحته ببدلته السوده نزل وي شيخ حيدر ومشوا لديوان جدي، وشيخ حيدر جايب حتى نسوانهم راحن البيت عمي شاكر، واحنا بساع لبسنه عبينه ومشينه البيت عمي شاكر لكيناها كلها يمهم بس جــويريه وندى ماجايات ضالات غاد ببيت جدي علمود الوادم، سلمنه على جده وهيه كضت عــفراء من ايدها تحاجيها
-شني ولج جبتي حلقات يو لا.
عــفراء:: اي جده جبت حلقات وهديه.
سكتت أعاين لعفراء وآنه ادري بيها باعت گلادتها وجابت الريمه كلاده هديه بدون ما طــروادة يدري حتى تخلي يلبسها الها وره ما يعقدون، فرح ما مقصره مرتبه الميز عاينت لريمه ابتسمتلها وهي كوه ترد الابتسامه ضايجه شفت هاجر كاعده على صفحة وصافنه صحتلها اجت يمي وصفن ويانه مــاسه وبدور وكعدنه نحجي على ميلاد وسعاد واخواتهن .
عــفراء بعناد ميلاد عرفت نسوان بيت شيخ حيدر على ريـــمه وضلت تضحك وتسولف وياهن وهذيج اعاينلها بس تخزر النوب ضلت تصور بريمه منا لمن اجوا الولد علمود العقد راحوا الديوان بيت عمي شاكر وريمه حطوها يم الباب وفتحوه على كيف حتى يعقدولها، اعاينلها ترجف عفراء واكفه يمها تهدي بيها وانه عيوني لداخل الديوان اعاين لطرواده الگاعد يم الشيخ مدنك عيونه، وساعة اعاينله ساعة اعاين لريمه وي العقد كلها صارت اعصاب وياهي التكض جهالها تكتلهم وميلاد سوتلها عركه وي فرح طلعلهن ســليم مثل المسودن يصيح
ســليم:: والله اليطلعععع حسها الا احطها واحركهاا وانعل اهلهااا.
ورد يمهم للديوان وصار صوت الشيخ واضح من گالها
-اذا قبلتي فقولي نعم وانتَ وكيلي.
شالت راسها ريـــمه الدمعه تفتر بعينها تدور على امها وأمها واكفه بباب الغرفة تعاينلها بغضب عفراء بساع حطت ايدها على جتف ريـــمه تحاجيها مبتسمه ورد السيد عاد عليها السؤال غمضت عيونها وزفرت نفس طويل گالت
ريـــمه::نعم وانتَ وكيلي .
جانوا محذرينه نهلهل رمحد من عدنا هلهلت بس السنوان الاجن من بيت شيخ حيدر هلهلن ويجرن الهلوله من وحده لوحده وردحن. بالنص بعبيهن جرن عفراء وياهن يهوسن
-فرررح گـــلبي من دكت طبوله وفرح گـــلبي من دكن طبوله.
جرتني عفراء وياها تهوسله
-واخونه خووش اخو يستاهل الهوووسه واخونه خوش اخوو يستاهل الهوسه.
النوب زوحة شيخ حيدر من يمها شالت عبايتها تهوس
-هوه الشافها وهو انعجب بيها
هوه الگال لاخته روحـــي اخطبيها.
واخذن الوسط كله يهوسن بعبيهن حتى انه وعفراء صرنه على صفحة بس نصفكلهن وريمه الفاهيه تصفك ويانه كضت ايدها مــاسه كالتلها
-بس وزعي ابتسامات لا تصفگين.
صاحت ميلاد على عفراء گدام النسوان
-اخوج حتى ما اجه لبسها الحلقه شني خاف ما جايبين ههههه.
وتضحك تسوي روحها خوش مره عفراء
-يجيها بجيها لا تستعجلين راح يسلم على الوادم حتى يضل يمها براحته
ام خالد:: ام مرتضى انتِ شارين زلمه لو ذهب؟
ميلاد:: لا شارين زلمه ولا ذهب اجه گوه علينه
ومرت شيخ حيدر لبست عبايته لمتها بأيدها وبدت تحجي
ام خالد:: يااا هم مناسبه ابن شامل وهم الج عين تحجين؟ولج يتمنونه ياخذ من سلفنه على صيت ابوه.
ووحده ترد الثانية وصوتهن عله وبيبي صيحت على ميلاد تريدها تسكت ما تحب تتفشل گدام النسوان بس ميلاد شيسكتها چلبت للمره
ميلاد:: كونج هيج كاتله روحج عليه ما اطيتيه من بناااتج.
والمره ضحكتلها
ام خالد:: والله النه الشرف نناسب ابن شامل لو داك بابنه ما نرده وياهي الليأشر عليها من السلف ياخذها
حجتها ودارت عيونها الريمه مبتسمه وكملت حچايتها
-بس النصيب الهالحلوه لان الله يحبها
ومالحكت ميلاد ترد من اجه طــروادة تلكته عــفراء وام خالد بعناد ميلاد جابتها هوسات من طب لحد ما گعد بصف ريـــمه وهو مدنك عينه مبتسم جده سلمت عليه باس راسها وهي توصي وقهرته من گالته
-مو تصير مثل ابوك.
عاينلها ساكت وام خالد گالتلها
-يااا هنيالج لو مثل ابوه صير خاله صير مثل ابوك.
انتهى بعد انگلب وجهه رغم طب يضحك بس بحچاية جده غيرت ملامحه كلهن، عفراء حطّت الحلقات گدامه اخذت تلفونها اصور بيهم وماسه هم تصور واجن ندى وجويريه من كضت هوسة الزلم، اعاين لريمه اديها يرجفن وهو عيونه صارت على أيدها البصفه شافها مخليتها على رجليها وترجف وايدها الثانية كاضه بيها المسكه مد أيده عليها لماها بين اصابعه وهي تباوعله مرتبكه.
ريـــمه :: يحرك اصابعه على ايدي وانه احس ملمس اصابعه يتحرك بگلبي عفت المسكه على الميز وشلت ايدي الثانيه الم صدّر البدله جسمي مقشعر رغم ما يعاين هوه گالت مــاسه
-نزلي أيدج ريـــمه.
رفع عينه يشوفني وين حاطه أيدي ودار بسرعة من لمح فتحة صدر البدله قوية هد ايدي من راد يلبسني الحلقة ضايج وعفراء وام خالد يحجن وياه گوه يبتسم وكفنه علمود الحلقات والصور كض الحلقة بأيد وشال عيونه يباوعلي تحمحم يهمس
-شبيج؟
دنكت ساكته اخذ أيدي بأيده لبسني الحلقه وعفراء انطتني حلقته مدلي أيده كضيت اصابعه لبسته الحلقة وعفراء انطته گلاده حتى يلبسها الي فتحها وهي اجت يمنه تريد تبعد شعري من جتفي هزيت راسي لا مغطيه بيه أثر الحرك سكتت مبتعه تقري وكف گذامي دنكت وجهي قريب من صدره رفّع أديه طخن برگبتي اصابعه بارده وجسمي حار، عبر ايده على رگبتي من جوه شعري وقربني الصدره اكثر غمضت عييني حيل عطره بخشمي واصابعه تتحرك على ظهري ترجف كل ذرة بجسمي وهو يحاول يسد قفل الگلاده.
ومابعد ايده راساً جراها من ظهري لجتفس احس اصابعه تحسسن اثر الحرگ بحركة سريعه ونزل ايده عاينتله وهو عيونه لعفراء على الصور وام خالد حطت علبه مال ذهب گدامي تسودن ما يرضى وهيه تخدد بشيخ حيدر نزل ايده جوه الميز سادها بغضب وامي من بعيد ضحكتله وتأشرله على مرت شيخ حيدر راد يگوم وعفراء گالتله لا اوكفوا نصوركم بعد
جرتني من ايدي وكفت وهو يخزر بعفراء ويأشرلها على النسوان كافي وهيه ما مهتمه فرحانه وتكضه من اديه تعلمه شلون يكضني فتحت عيني حيل خازرتها من خلته يوكف وراي وحده من اديه على خصري والثانية بجيب البنطرون، شالت ايدي تحطها فوك أيده الكاضني بيها حسيته جراني برخاوه عليه اكثر الحد ما طخ ظهري بصدره وبس عفراء صورت جر ايده من خصري الظهري مسح وابتعد يريد يطلع والولد صاحوا عليه.
رديت كعدت جسمي يرجف وخالاتي يصورن وياي ويحجن علي لان ما ابتسم نسوان بيت شيخ حيدر يردن يطلعن بس الزلم بالساحة يهوسون الطرواده گالت عفراء
-اصعدي البسي فستانج وتعاي.
ميلت راسي ما اريدن جرتني من ايدي ودفعتني اصعد فوك واجن وراي البنات عبالي يردن يساعدني ركضن للشباج يعاينن للزلم وهوساتهم، طبيت للغرفة اجتني رنـــه ساعدتني غيرت فساتني ورحت وياها يم البنات نعاين من الشباج هواي زلم ساده وشيوخ الزلم تهوس لكهلان گالت مــاسه
مــاسه:: والله العظيم من بينهم كلهم ميثمي يلمع.
رنـــه:: خاب روحـــي ليغاد امشي عاينــي اخوي اطول واحد بكل الموجودين وشلون واكف چنه هلال العيد واحلى زلمه بالسلف.
طكتهن هاجر على رجليهن وتأشرلهن على سليم ضحكت
-تگلجن احلى واحد أخوي سليم.
ودرنه كلنه على جــويريه مصدومات بيها من گالت
جــويريه:: اشوفن بس صــيهد من بينهم، حلو عليه البشت.
تحجي وعيونه على الشباج ومن سكتنه كلمه دارت علينخ لكتنه فاتحين عيونه عليها شردت ونزلت بساع وبدور صاحت
بــدور:: ام اخنيس الجذابه تصيح اكرهنه.
صحكن البنات ونزلنه جوه شويه وكلمن راحله عفراء حطت بأيدي فلوس وانه أدفعهن بأيدها ما راضيه ولا هي راضيه تردهن، عافتني ومشت صحت وراها
-فـــدوه بس گولوا السلطان يرد هناه اريد اشوفنه.
جده ضلت كاعده وخالاتي وانه وهجوره لمينه الهوسه وكلساع عيوني تروح على الحلقة بأيدي وگلبي يدك حييل
ما غسلت وجهي لمن اجه سلطان وراساً طب الغرفة ســليم كضيت البأيدي ورحت عليه فتحت الباب توه يتمدد وبس لمحني كعد على حيله يبتسم وعيونه ذبلانه كعدت بصفه حط ايده وره راسي وجرني عليه يبوسني يهمس بصوت متعوب
سلطان:: الله يسعدج ويهنيج.
-انسعد من تردلك عافيتك.
يبتسم گوه على روحه حاضن خدي بأيده ويعاين لوجهي رد اتمدد غطيته وطلعت كل همي سلطان ناسيه امي وابوي وافكارهم والحيله الصارت بأيدهم.
وره عقّدنا بيومين عرفنه الاء متأثرة بالأعمال التسويها ماجانت متقنتهن وأثرن على نفسيتها وعقلها وخلنها تذبح ابنها حولوها من السجن لمستشفى المجانين ســليم تسودن ماخله سلطان يسمع بالسالفة ووكل محامي جديد وحلف اذا اهلها طلعوها من المستشفى يكتلها بس محد راح يگدر يطلعها لان تعتبر خطر على المجتمع اهلها ما گدروا يطلعونها.
وهوه رغم ما سمع بالخبر يوم وره يوم بدأ يذبل تسودنت انتهى گام ما يحجي ويانه اخذوه طرواده وصــيهد وسليم للزياره وانه روحـــي تلوب اكضي الليل ابجي خايفه عليه حيل، ويزيد كسر گـــلبي من تجي رغد غاديه تراب هذيج الجان وجها شلون المراية صاير جوه عيونها سواد وضعفانه حييل كعدت يمي بالحوش تبجي وتحجي بخنك
رغد:: ما يخلوني اجي يمه.
-يخافون عليج رغده لا تنقهرين يخافون لا سلطان يكرهج ويقهرج بحجيه.
مسحت دموعها مختنگه وتهزّ راسها
-ميخالف انه راضيه بكل حچايه تطلع منه المهم اضلن يمه وما اعوفنه ولج ريـــمه اريد امووت جاي اعاينله يوم يوم ينتهي.
شهكت تبجي من كل گلبها طب ابوي شافها وسكت مشه للبيت وهيه ضلت يمي شويه وردت لبيتهم كمت غسلت وكهي وطبيت اريد اصعد يم هاجر ووگفت من سمعت ابوي يتعارك وي امي تدنيت يم الباب اسمعهم وهيه تحلف براس سجاد وتكله
-بطلته بطلته من اول ما كرهه رغد رحت وبطلته .
-هيج انتِ نصبه جا ما بطلتي سحر هالچلبه هاااي سلطان راح يموت.
واسمع امي تلطم على رجليها وتكله
-جا انه كاااعده مو هل افتر ما خليت واحد ما رحتله.
عفتهم وصعدت اركض للحمام لعبانه روحـــي لسلت رمشيت يم هاجر دفتر الرسم بأيدها وبس شافتني مدتلي ورقه اخذتها منها اقرأ كاتبه
-بالبداية امي جانت مسويه عمل يكره سلطان برغد ومن صارت سالفة غيث امي بطلت السحر
والاء العمل المسويته يموت سلطان.
شلت راسي الها فازه شگگت الورقه واحس راسي يريد ينفجر من الوجع، ثاني يوم جايوا سلطان وهو نفس الوضع منتهي ابوي وامي راحوا البيت عمي شاكر بكلن يرضون يخلون رغد تجي يمه بلكن يتحسن وضعه شويه وهم صــيهد ما راضي
""""""""""""""
رغد:: اعاينله بقهر ادري بيه من خوفه عليَّ ما يرضى اروحن بس هو انه شضال بيه انه منتهيه وياه روحـــي جاي تذبل وي روحه، وهـــب يصبرني محتار حاجه صــيهد وهوه قافل ابد ما رضى اروحن.
بالليل روحـــي اختنگت گمت ما احرن النفس كلت الامي وطلعت رحت يم شجرة التين كعدت على الساگيه وبچيت بلوعه كل ما اكولن كضت وراح نرتاح اتعذب اكثر من الراح.
مسحت دموعي ودرت على صوت طكطكه وراي لمحته صــيهد حاط اديه وره ظهره اجه كعد بصفي كال
-سألت امي عليج وگالت تلكاها غاد.
سندت راسي على ايدي ساكته وهوه هم سكت فترة يله گال
-اخافن عليج رغده .
درت وجهي اله مديت ايديي اكض بأيده احجي وصوتي مختنك
-صــيهد اذا بهاي الشده انه عايفته ليمت اوكف وياه؟ عبالك من ضاله هنا انه زينه؟ ترا والله روحـــي رايحه من الخوف عليه ابوس ايدك ارضى اروحن يمه صــيهد فـــدوه اروحنلك ارضى.
شهكت ابجي جرني من ايدي الصدره يبوس راسي ويحجي
-ولو مرت عمج سوتلج شي انا شني اعاينلها؟
-ما تسوي شي خايفه على أبنها.
-هاي هيه باجر روحـــي يمهم.
-ما اگدر باجر عملية ندى.
سكت متحسر گمت وياه ردينه للبيت وهوه بعده على زعله من جــويريه مره سمعته يشكي آلامي منها مقهور وامي ما تطي بيها تطلع الغلط بيه وتسكته،
ثاني يوم جانت عملية ندى وهي تبجي وتوصي برضا ووهب يضحك عليها ويكلها
وهـــب:: شبيج خايفه هسه بساع يطلعونج.
تعاينله ودموعه تجري جرت ايده تبوسها
ندى:: اذا متت لا تعوف ابني فدووه.
-اشش شلج بهالحجي شنّي السالفة.
اخذوها من عدنا وهوه بساع عيونه ضلت تلمع ومختنك ولا جنه جان يضحك عليها، يفتر بقلق وخوف ويدعي، اجونه صــيهد وميثم وكلنه مكابلين صالة العمليات وكاعدين شوية وصاحوا علينه گمت بساع اخذناها منهم للردهة بعدها بالبنج توه بدأ يفكها وضلت تون و
-رضاا مامااا.
ووهب كاض ايدها عاينلي
-اذا ما تصيح بأسمي وهيه بالبنج الا اطلكها.
مسحت عيوني اضــحك والممرضه تكله
-گول اريد اطلكها وفضها.
دار وجهه منها يگلها
-لو احجي وي نسوان چا رديت عليج بس مرتي ما ترضى.
وهي تهز ايدها عليه طلعت من يمنه وندى فتحت عيونها وتحجي بصوت مبحوح
-رضا رضا ماما.
ووهب صافن بوجها متاني ليمت تجيب اسمه شويه وگالت
-ووهب
-ها يا روح وهـــب ها گـــلبي .
-وهـــب مامااا.
وهـــب:: شني هاي گامت تخبط دخيلك يا علي.
وفتح تلفونه يصور بيها ويگلها
-ياهو ربج
-الله
-ياهو نبيج؟
-محمد
-ياهو امامج.
-علي.
-عفيه عفيه دخلتي الجنه.
وندى تنود براسها مناه ومناه رد گالها
-انتِ بشر لو طنطل؟
ويحط الكامره بوجهه گالتله بلسان ثگيل
-طنطل.
ضحك ضحكة طويله يگلها
-من البداية عرفتج طنطل.
ندى::بلقيس اسمي
عاينت لوهب اسأل
-صدك اسمها الحقيقي بلقيس؟
ضحك يهز راسه لا
-اول ما عرفتها جذبت علي كلساع تطيني اسم وهذا واحد منهن.
بتت انه يمها الثاني يوم طلعونه اجه وهـــب اخذنه گال
-خاي طلعن نتائج جــويريه
-صددك شكد معدلها
-٦٩ گلبت الدنيا تبجي ما راضيه
ندى:: ليش جا زين معدلها.
-ما يفيدها خيه شويه.
وصلنه للبيت لگيت جــويريه عيونها مورمه من البجي كلش انقهرت ما كذرت اعوفن ندى وامي ضليت اروح لبيت عني شاكر اضل ساعة يمهم وارد لبيتنه.
""""
رنـــه :: وره الخطبة بيومين عفراء راحت، وطرواده التهه بالگاع وبسلطان حيل مكسور على حاله وكلساع يخابربه واحد ينشده على سيد زين حتى ياخذه اله وكل ما ياخذونه نفس الحجي لازم يلكون الشي المعگود لو بدم لو بشعر غيث وجثة غيث ابد ما لكوها.
طلعت للحوش ارشه وسمعت صوته يسولف وس صــيهد احس گـــلبي وكف من سمعتهم من صــيهد گاله
-لا بريا ولا واحد من ربعه.
طــروادة:: من ليمت؟ انا اول امس حجيت وياه امس خابرته مغلق.
صــيهد:: هوه من أمس اليوم مــيثم يخابر وماكو، خابر على الولد اللوي بريا هم ماكو مغلق.
سمعتهم وركضت طبيت جوه ايدي على گـــلبي ودموعي تجري، مسحتهن بساع من سمعت صوت طــروادة يصيحلي طلعت اعاينله ضايج حييل گال
-اطيني چاي.
مشيت للمطبخ وبس اصيرن وحدي دموعي تجري واكض خرزة السبحة البرگبتي ادعي كون يرد سالم ومابيه شيء
صبيت چاي اخذته اله حاط التلفون على رجله يدوس اتصال كل ما يطلع مغلق يرد يتصل، دنكت شويه اطيته الچاي اخذه من أيدي عافه بالگاع وانه درت وجهي اريد امشي للغرفة صاح وراي
-تعاي بله.
رديت ومفت گدامي أشر اكعدي عاينوله حسين وزهره من سمعوا نبرة صوته خافوا يطكني مد ايده على السلسله البرگبتي كض الخرزه يگلي بيها وعاينلي شايل حاجبه يسأل
-هاي من سبحة بريا؟
رجفن شفايفي اعاين لوجهه ودموعي جرن هزيت راسي اي وغطيت وجهي بأيدي ابجي بصوت مختنگه وهو عافني وطلع، خابرت مــاسه وهيه صوتها من البچي رايح
مــاسه:: ولج من امس لليوم ماكو لا هوه ولا أي واحد وياه گـــلبي راح يوكف من آلخوف.
هي تحجي وانه بس ابجي سديته منها ادعي والثاني يوم واكفين بالحوش انه وياه نسوي بالشركه.وسألته
- طــروادة حصلتوا بريا؟
هز راسه لا متحسر توه يريد يحاجيني وشهكت فازه على صياح مــيثم ودگت بابنه القوية...
شكرا لزيارتكم عالم روايات سكيرهوم
