رواية أرض الخناجر الفصل التاسع والأربعون بقلم ايلول
شفتك بالحلم فزيت مرعوب
ما لحگت اشوفك مسرع اجدام
نذر لو ملتفتلي چا تحنيت
من اطراف جدمي الشعرة الهام
══━━━━✥◈✥━━━━══
رنـــه :: مشه طــروادة للباب بساع فتحه وطب مــيثم مفرفح جر طــروادة من ياخة القميص بعصبيه ويصيح بوجهه
مــيثم :: ارتاااحيت اخوي راح اخوي محد يدري بيه وينه ميت عددل محد يدررري
وطرواده عايفه حتى ما كاض أديه لمن طبوا الولد صــيهد جر مــيثم حيل يغلط عليه ويصيح بوجهه
صــيهد:: كاااافي ياهي مالته طــروادة كض عليه عصى وجبره يررروح؟
وميثم يتراجف بيناتهم ســليم ووهب يحاجونه وهوه عينه بعين طــروادة گوه يجر النفس شال ايده گاله
-توسلت بيك خايب توسلت بيك بس اطيه حچايه ولا تخليه يروح ولك توووسلت بيك اخوي اذا راح ما يردلي اطيه حچايه كهلان موتتني انتَ.
وكعد على حيله بباب الحوش اديه على راسه والولد يحجون وي طــروادة ووي حجايتهم دموعي جرت،
بريا ما يدرون بيه وينه وما يعرفون ميت لو عدل محد يطيهم حچاية.
الولد واكفين وميثم كاعد بالگاع من بينهم عاينلي عيونه كلها لوم اللي مسحت دموعي اعاينله هز رأسه بحسره وما انتبهت الطرواده من حاجاه وهو وكف بعصبيه شايل اصبعه بوجهه طــروادة وينتر بغضب
مــيثم:: اسسسكت بريا لو صار عليه شي انتَ وأختك السبب.
دفعه صــيهد يصيح بوجهه وطرواده جر صــيهد يحجي بهدوء
-عوفه.
وميثم جر روحه من بين اديهم طلع من بيتنا حاني ظهره والولد يحجون وي طــروادة ميتين من القهر جن فاتحه عدنا الچفافي لافينها على وجوهم والعيون حمر والصوت مبحوح طلعوا همه وره مــيثم وضل بس صــيهد يحجي بعصبية
صــيهد::ضل يخيط ويخربط مــيثم يشهد الحسين اطكه على عيونه اعميهن.
وطرواده ميت من القهر يحجي گوه على روحه گاله
-عوفه لا تحاچيه شتريده يسوي غير محترك گلبه على بريا.
صاح بعصبيه شايل ايده بوجهه طــروادة
صــيهد:: محترگ گلبه على روحه كلنه محترك گلبنه بس محد جبر بريا يروح لا يضل يصيح كله من طــروادة لا أشك حلگه.
سد ايده وطك باب الحوش حييل عاف طــروادة وطلع من بيتنا، وانه من بين دموعي اعاين لطرواده كعد على حيله يم حوض الماي حط اديه على راسه بحيره ميت من آلقهر، مسح وجهه وگام على حيله لمحني دنكت مسحت دموعي ودرت وجهي اجه يمي اخذ من عدي السيم شمرهن على صفحة يحجي بهدوء
طــروادة:: عوفيهن يولن بعدين انا وعبود نسويهن.
هزيت راسي خوش مدنكه ودموعي وي هزت راسي تطيح زفر نفس بحسره وحجه من بين أسنانه بعصبية
-انتِ شنيي رايدته لبريا؟؟؟؟
شلت راسي اعايلنه اشهك وايديي رجفن صوتي مختنك وگوه احجي
-بس كلي يعني صدك ماات؟
شال راسه ليفوك ورد عاينلي جر الجفيه من جتفه مسح بيها دموعي
طــروادة:: مابيه شي يجوز ضلوا بمچان مابيه تغطيه لو ماكو كهرباء.
-واذاا واذا طلع ميت؟
كض وجهي بأيده شلت راسي اعاين لعيونه خازرني
طــروادة:: كتلج مابيه شي كااافي بالحسين اذا الگاج تبچين.
دفع وجهي من ايده ومشه على هاسكي فتح السلسله من عده اخذه وراح للگيعان غسلت وجهي وطبيت للبيت گـــلبي يوجعني خابرت مــاسه ردت علي صوتها مختنك
-ها رنـــه
-مــاسه عليج الحسين كليلي الصدك بريا مات؟
-ما ندري رنـــه الموت صاير يمهم بالجمله والحد هسه محد منطينه حچايه ادعيله رنـــه ادعيلي يردلنه سالم.
سديته من عدها مختنگه ايدي على خرزه الگلاده كاعده بالغرفة ودموعي تجري حسين وزهره واكفين بباب الغرفة يعاينولي شويه شويه يجون يمي لمن كابلوني مد ايده حسين لوجهي يمسح دموعي
حسين:: لا تبجين رنـــه هسه تتمرضين.
وزهره گامت على حيلها وكفت يمي وجرت راسي لحضنها بجيت بصوت وهمه حايرين بيه يردوني بس أسكت، مسحت دموعي من أجه عبود يعاينلي مستغرب وحسين يأشرله اسكت، عفتهم وطلعت للحوش شكد ما ابجي بس احس راح ارجع احجي وياه من امر بصف سياج الحوش اتذكر كل مره اجه بيها هنا اعرف على يا بلوكه جنت احطله كلاص الچاي وياخذه وبيا صفحة اصعد وانطيه لفة وكل هذن حاستهن راح ينعادن ومن بين خوفي عليه احاول اطمن نفسي بهالاحساس.
صاح عليَّ عبود ورحت يمه جايب الشبچ مال الصيد جانوا مادينهن بالشط گال
عبود:: تعاي خل نطلع السمچ.
كضيت طرف الشبچ وعبود ينظفه من العوادين ويطلع منه السمج وانه بس اسفط الجزء النظيف، لمن كضينه اخذت المعجنه البيها سمج وكعدت يم الحوض انظفهن وبالي مو يم الشغل، واخواني مستغربين شلون اشتغل وآنه ساكته يفترون وراي يخافون عليَّّ عبود خابره سجاد وما راح ضل وين ما اروح يفتر وراي.
مشيت احط الحطب بالتنور وهوه راح القفص الطيور اطاهن اكل وكعد يمهن عيونه عليَّ شعلت التنور ومشيت للمطبخ ادولچ العجين اخذته ورحت يم التنور متلثمة واخبز، طب طــروادة وهاسكي سابقه كعد على صفحة يعاينلي دنكت للطبك الحاطه بيه الخبز شلت وحده اطيتها اله ورديت اخبز، وطرواده غسل واجه يمنه حاره ظهريه وتسمط سمط، عاين لعيوني متروسات دموع ودار العبود گاله
طــروادة:: هسه واحد وي بريا راد على مــيثم هذا مصوب گاله گبل لا انا اتصوب بريا ويانه مابيه شي بس تلفونه انكسر وهل ما تحصلونه.
حجه ودار عيونه الي وانه عايفه الخبز ومركزه وياه زفرت نفس براحة مطمنه وعبود يگله
-گتلهم والله مابيه شي لا تخافون بس مــيثم شيقنعه.
درت على عبود اهز راسي
-جا غير اخوه ويخاف عليه.
طــروادة:: احترك الخبز احترك.
دنكت للتنور بساع طلعت الخبزة محتركه وهوه طب يسبح ويصلي وعبود ضلّ مكابلني لمن كضيت خبز طبينه للبيت الكهرباء طافيه وطرواده بس كضه صلاة صاح على عبود يشغل المولد.
غسلت وجهي وكعدت بالهول اريد بس ابرد وطرواده على السجادة يعاينلي ويسأل
-نمردت روحج من الحر؟
وانه اهفي على وجهي بطرف الشال
-ااي گـــلبي راح
-كتلج الظهر لا تخبزين.
عاينتله أهز بأيدي
-اي لا تخبزين ومن تجي عفراء تكلولها اموتتنه من الجوع.
ضحك وطب عبود گاله
-ترا جلكان البانزين كاضي هاي اخر شي حطيتهن وشغلته.
هز راسه خوش ساكت ادري بيه ماعده فلوس وحتى مسواكنه قليل المخضر من البستان والسمج يصيده هوه وآنه تعلمت ما احجي مو مثل گبل على كلشي اعيب ودوم اصيح ماكو مسواك هسه شني الموجود اسويه لان شفّته ينقهر من نريد شي وما يگدر يجيبه.
گليت السمج وزهره يمي تصعد على الدبه وتساعدني غسلت الخضره وتحضرلي صحونه صبينه الغدا، وطرواده بس كضه شرب چاي ورد للگيعان والساعة بالاربعة اجه اخذوا سلطان لسيد هوه وصيهد وسليم.
خابرت مــاسه أسألها من جديد گالت
-رنـــه والله العظيم لو اعارف شي اكلج بس والله حتى هوه مــيثم ما يدري بس هذا ولد گبل لا يتصوب چان وي بريا گاله من جنت وياه مابيه شي بس تلفونه انكسر وبعد متانين بلكن يخابرنه ويطمنه.
سديته منها وكعدت بالحوش جوه ظل الشجر حاطه ايدي على خدي وأعاين لبيتنا حسين وزهره طلعوا يلعبون يم باب الحوش وگدامي يفترن الدجاجات والصخله بمچانها تاكل.
الهوه يهب حار يلهب بس كله ريحة زرع، ورگ النبك يتناثر بالحوش يجبرني كل يوم اكنس، ضليت على فد كعده اراقب كلشي وبالي يمه، بدت الشمس تميل للون البرتقالي قريب على وكت الغروب جريت نفس بحسره چم مره بمره شفته بهيج وكت وبشرته لونها يميل للبرتقالي وعيونه من تصد بيهن الشمس ما يگدر يفتحهن.
شلت راسي للسما على خفگة جنح الطيور وكفت بساع اعاين للطيور شهكت موجعني گـــلبي من عرفتهن هذن طيوره هدوهن، مسحت دموعي وركضت لقفص طيوري فتحته الهن طيرتهن ووگفت بنص الحوش رافعه راسي للسما صارن وي طيور بريا يفترن داير ما داير بيتنا ركضت لسطل الاكل مالهن نثرت منه بالحوش ووكفت اعاين عليهن گلبن بالسماء ونزلن وحده وره الثآنية للحوش ياكلن
كعدت على صفحة اعاينلهم ياكلن من الگاع يطيرن من مچان المچان،اخذت اكل بأيدي و تدنيت يم طيوره البيض مديتلهن ايدي طارن من الگاع الأيدي ياكلن ويشيلن راسهن يعاين ويردن يدنكن، مديت ايدي الثانية تلمست ريشهن بأطراف اصابعي ودموعي على خدي همست بصوت مخنوگ
-انه وياجن فاگدينه
-رنـــه
شلت راسي اتلفت على صوت مــيثم رد صاح
-رنـــه
-هاا؟
-خليهن عدج ولو رد بريا انتِ وياه تتصافون ولو اخوي ما رد حلال عليج.
حجايته مردت گـــلبي مرد كعدت بنص الحوش لامه رجليَّ الصدري وابجي بحرگه وخوف فرفحت روحـــي والحمامات داير ما دايري يطيرن من الگاع ويجن عليَّ جنهن يواسني ويواسن روحهن بيه، مسحت عيوني دايخه وحلكي ناشف اعاين الايدي ترجف ردت بس اگدر اكوم على حيلي واواصل البيت اخذ علاج ماكو انهديت هد عيوني غوشن وگلبي ممرود كوه فاتحه عيني، ثواني ما حسيت بيهن ومن انتبهت لكيت روحـــي ممدده بالحوش أريد اكعد ما اگدر غصب عني اغمض احس بروحي اسمع صوت حسين وزهره ويرد يختفي.
وفززني راشدي على وجهي وصوت ريـــمه
-رنـــه رنـــه.
ريـــمه :: قستلها السكر ايدي ترجف وحسين يركض يجيبلي العلاج وجابلها عصير وهي ذبلانه وكوه فاتحه عينها وزهره تبجي كعدناها انه وحسين شربت عصير وكومتها ترجف أخذتها للغرفة تمددت بفراشها
-رنـــه اخابرهم يجون ناخذج للمستشفى؟
شالت ايدها تأشرلي لا حطت راسها على المخده وجها اصفر ودموعها تجري مديت ايدي على خدها
-رنـــه ياهو وياج؟
ضلت ساكته زهره غطتها وتعصر برجليها وحسين واكف بالباب يعاين خايف عليها ضليت يمها كاضه گـــلبي بأيدي نص ساعة ورديت قستلها السكر بعدها منخفض بس اهون من الاول،
طلع حسين من يمنه شالت راسها تحاجيني بصوت مبحوح
رنـــه :: ريـــمه اظن بريا مات!
تحجي بغصه مختنگه هزيت راسي لا
-لا نشدت ســليم لان هم خايف عليه ان شاءالله يرد رنـــه لا تفكرين هيج وتفاولين عليه ما يصير.
سكتت انگلبت على ظهرها تعاين للسگف ودموعها تنزل بلا صوت ضليت يمها محتاره ساعة اواسيها ساعة اشكيلها وهي التواسيني
الغروب كلش رديت قست السكر زين
-يله رنـــه خل اروحن انه.
هزت راسها خوش وكفت وياي امشي واوصيها تدير بالها على روحها، طلعنه للحوش وي الاذان وصيت حسين وزهره عليها وفتحت باب الحوش والولد توهم ردوا نزلوا من السيارة ســليم خزرني وصيهد وطرواده نزلوا سلطان، دنكت ومشيت عيوني لسلطان اذا يهدونه ويمشي وحده يطيح ما يگدر يسندونه اثنين يله يمشي، طبيت گبلهم، وفتحت الباب كاضته الهم اجه سليم بمچان طــروادة وجابوا سلطان هو وصيهد طببوه للبيت
رغد جانت يمنه ومن تشوف حاله هيج تنتهي طبيت للمطبخ وهيه واكفه تسويله شوربه وامي تدعي عليها صاح صــيهد وهو بالهول
-رغددد.
راحتله رغد تركض مشيت وراها اعاين من يم ياب المطبخ ابوي ومرتضى بالهول گالها
صــيهد:: كون واحد مضيگ خلگج هناه؟
شاكر:: شني السالفة ياهو المحاجيها هسه
ورغد تآشرله لا محد وياي باسها براسها وطلع وامي يمي تفتر بالمطبخ وتدعي على رغد دعاوي تقشعر الجسم، ردت رغد طبت للمطبخ تكمل الشوربه جنها ما تسمع امي اجه ســليم للمطبخ عاينلي وعاين الرغد گالها
ســليم:: انتِ وريمه تگدرن تكعدنه وتوكلنه؟
دارت عليه ساكته ماتدري كتله
-اي نگدر بس انتَ وين رايح راح نصب عشه!
مشه متحسر وهو يگول
-رايحين على هذا الولد الجان وي بريا نشوفه.
وامي تعاين وراه بس شافته طلع جرت دشداشتها من صدرها تدعي
ميلاد:: جعله لا رد بجاه هاي المغربية
فتحت عيني حييل مصدومه جربت أيدها
-يمممه.
جرتني من أيدي حييل كارصتني روحـــي مفرفحه بآيدها وهيه لامه جلد زندي بين أصابعها وتفركه
ميلاد:: وغمه التاخذج وتفكني منج الدايحه موش كتلج لو رحتي لبيت شامل اكسر رجلج شووودااج
- ما ارروح ما اروح بعد
شايطه روحـــي من الوجع جرتني رغد من ايدها كوه تحجي من گد ما مختنگه
رغد:: عوفيهاا
عافتني وضحكت الرغد متحلفه ورغد ما مهتمه ردت للطباخ وامي طلعت من المطبخ صبينه عشه الهم وديناه واخذنه عشا سلطان انه ورغد طبينه للغرفة لكينه هجوره يمه مسحت عيونها من شافتنه كعدنه سلطان انه ورغد سندنه ظهره على الچرباية وكعدت رغد كدامه توكله شال عينه الها صفن بعيونها وجرن دموعه.
اديه يرجفن يريد يمدهن على أيدها ما يگدر وهي وخرت الصينيه عافتها على صفحة وتدنت يمه لمت اديه بين أديها باستهن تبجي واخوي دموعه تجري على خده اخذت هاجر وطلعت من يمهم روحـــي مفرفحه عليهم
شويه وطلعت رغد اخذت ماي غسلتله ورجعت يمه لمن رد ســليم وهم ماعرفوا شي جديد على بريا ل12 وندك بابه راح ســليم يشوفه شوي واجاني
ســليم ::صيحي الرغد صــيهد يريدها.
هزيت راسي خوش ومشيت للغرفة فتحت الباب على كيف اعاينلهم سلطان نايم ورغد بالگاع جواها مخده وسانده راسها على طرف الچربايه غافيه وايدها بأيد سلطان سديت الباب وطلعت وسليم متانيني بباب المطبخ كتله
-نايمه ما گدرت اكعدها.
ســليم:: اهووه هسه هذا الحقنه شيقنعه اخته نايمه وما ذابحينها.
مشه للباب حاجه صــيهد واجه تعبان يريد يلحك ينام گبل لا يودونه للگيعان وصاني اكعده ب٢، كضيت شغلي وصعدت فوگ غطيت هاجر واخذت هدومي طبيت اسبح راسي مسطور احس جاي اعيش اشياء عايشتها قبل ومرات فجأه اتذكر موضوع جنت ناسيته اتذكره بتفاصيل دقيقه ومرات احس اللي اتذكره هو مجرد حلم مو حقيقه.
كعدت بفراشي ايدي على راسي وافكر احس بلا سبب ترددت براسي حچاية عمي شامل
-عزيز الجاس گـــلبي "
تنعاد بعقلي بكل ثانية وكلبي يوجعني وياها أريد اشيلها من بالي ما گدرت للوحده وانه على نفس الكعده وما براسي غير هاي الحجايه، فززني من ندك باب الغرفة وصوت سجاد يسأل
-ريـــمه، ريـــمه كاعده؟
گمت فتحتله الباب جايبين بيض هو وعبود ويردوني اگليلهم، نزلت وياه ضل يمي بالمطبخ سويت الچاي وتانيت لمن يفور يله اسوي البيض درت عليه اسأله
-وين چنتوا ســليم تحلف بيك يكول دايح اربعه وعشرين ساعة.
سجاد::وين دايحين العصر چنه بالگيعان والنوب رحت للطوبه وعبود وياي يشجعني.
درت على الطباخ واحجي وياه
-والله خبصتنه بعبود
-لااا ريـــمه هنا ونخرب وعلي حدج لعبود.
درت عليه مبتسمه
-لا والله؟ شني تحبه اكثر من عندي؟
هز راسه اي
-يااا وتحجيها بوجهي؟
ضحك ووكف يجرني الحضنه
سجاد:: جا اجذب عليكم؟ عبود اعز من اهلي واخوتي واعز من روحـــي وصية عمي شامل هذا.
وخرت منه حضرت كوابة الچاي وانشده
-شلون هيج صارت صحبتكم قوية.
تحسر
سجاد:: من چنه جهال انا چنت حقير وياه ما احبنه ونتعارك دوم لان ما يلعب وياي ومن يلعب يطيح گلبه يضل يوجعه وانه ما جنت ادري بيه مريض اذكر مره كتله بعد ما العب وياك وعبود تسودن گال لعمي شامل وعمي جر ايد عبود حطها بأيدي گال لا تهد عبود للموت وحجالي ليش عبود ما يلعب وياي وعلى مرضه، وضل عمي كل ما يشوفني يگلي مو تهد عبود ومن ساعتها انا ما هاد عبود.
-ههههه تقريباً نفس الشي انه ورنه هم جنت ما العب وياها وعمي وصّاني عليها ما اتذكر بالضبط بس هيج.
حطيت الصينية بأيده عاينلها وعاينلي
-حالياً احبنج اكثر من عبود من اشبع ارد احب عبود اكثر.
ضحك اخذ الصينية وراح طفيت ضوه المطبخ ومشيت اريد اصعد تلاكت وياي امي على الدرج نازله من غرفتنه
-ها يمه؟
-وغمه
عافتني ومشت طبت الغرفتها صعدت تمددت بفراشي وعيني على هاجر متكشفه جريت الغطا عليها غطيتها ولمحت دفتر الرسم مالتها وقلم الرصاص جوه المخده جريتهن بفضول فتحت الدفتر ومشيت يم الباب اعاين لرسمتها الجديدة محاوله ترسم غيث وما مكمله الرسمه ملامحه مو كامله سديت الدفتر ورحت لخانتها اريد اضمه صارت عيني على الدفتر القديم اللي ابد ما تخليني اشوفه.
درت عيوني عليها نايمه، اخذته وطلعت من الغرفة شغلت الضوه البالهول ووگفت يم الشباج فتحت الدفتر اول ورقة چانت هوسه ما مفهومه گلبتها الورقه الثانية هم هوسه مجرد شخابيط كأنما محاوله ترسم شجر، گلبت الصفحة الثالثة تأكدت هي محاوله ترسم شجرة وهم مشخبطه عليها اگلب الصفحات وكل ما اعبر صفحة تتوضح الرسمه اكثر وبكلّ صفحة تشخبط عليها بدون ما تكملها.
گلبت هواي بيها وصلت للنص اركز برسمتها عايفه الشجره وبدت تركز على الشط وعلى الجرف شجر هواي(زور) ومشخبطه على الرسمه بعشوائية گلبت الصفحة الرسمه الثانية نفسها كأنما طابعتها مركزه بيها من حسيت اكو شي يختلف دكيت بأصبعي على البومه المرسومه على الشجرة ورجعت للصفحة القبلها واحجي وي نفسي
-الإختلاف البومه
شهكت فازه من جرت الدفتر من ايدي درّت عليها خازرتني وشايله أصبعها بوجهي
-شنو بيه ليش ضامته وما تخليني اشوفنه؟
دارت وجها تمشي للغرفة مشيت وراها حطت الدفتر بالخانه قفلتها وشالت مفتاحها رجعت لفراشها مطيتني ظهرها وانه عيوني على الخانه شنو تكملة الرسمه وليش هيج خايفه وضامتها هاجر ترسم كلشي يأثر بيها وكلشي يضلّ بعقلها حاولت أربط الرسمه بغيث ما گدرت الرسم قديم والشط الراسمته ما يشبه الشط اليمنه لو راسمه الشط اللي بقريتنا جان رسمت على الجرف نخل مو زور .
تمددت والافكار تآكل بعقلي ويا خوفي انسى گبل ما افهم ليش ولشنو رسمت هيج رسمه، توني غفيت وفزيت على صوت دگة الساعة مسحت وجهي وكعدت على حيلي هاجر فراشها فارغ، وخرت الغطا من عدي وطلعت من الغرفة عاينتلها فاتحه الشباج وواكفه تعاين
-هجوره!
التفتت عليَّ
-ليش كاعده؟
هزت راسها ماكو شي واجت للغرفه نزلت جوه اريد اكعد ســليم لكيته كاعد وكاض سجاد بالمطبخ يرزل بيه وما خلاه ينام گاله تروح وياي للگيعان وسجاد يعاينلي بقهر ويأشرلي حاجيه سكتت شحجي، دك تلفون سليم صوت رساله فتحها صوتيه من وهـــب يغلط متحلف لان وحده بالگيعان وتعب يريد يرجع ينام.
سجاد:: اليوم نعسان خلني وباجر اروحن وياك.
ســليم:: گوم والله ما اعوفنك.
مشيت وراهم حتى اسد باب الحوش واجاهم عبود گال
-بس خل تجي ريـــمه تشوف رنـــه ما أدري شبيها.
مديت راسي من باب الحوش بساع اعاينله وحجيت بخوف
-قست السكر؟
هز راسه اي
عبود:: شويه نازل بس هيه فد نوب بالفراش وترجف ما اعرف شسويلها تعاي شوفيها.
دار علي سليم ضايج
-البسي عباتج وتعاي، وانتَ ستاذ سجاد ضل ضل وخل اشوفنك باجر تطلعلي عذر منا منا
عافنه وراح طبيت للبيت لبست عبايتي وطلعت وياهم وسجاد يگل العبود
-الف رحمه على والديج رنـــه يوم التمرضتي.
عبود:: انچب ولك.
طبيت للبيت سجاد ضل بالحوش وعبود وراي وخرت الغطا من رنه مصخنه ووجها احمر وعبود مسويلها كمادات بس من شافها ماصارت زينه خاف عليها، واكف بباب الغرفة ويحاجيني
-ردت اخابر عفراء بس خاف نايمه وخطيّه تخاف.
-لا عليمن تخابرها هسه هسه تصير زينه.
كعدت رنـــه واخذتها للحمام غسلت اديها ورجليها بماي بارد وهيه تسب بأهلي جريتها من ايدها للغرفه
-رنـــه نجبي.
رنـــه:: ترا صاحيه انه بس تقصدت اغلط
-أيا ادبسز.
كحت وتمددت بفراشها رجعت الكمادات على كصتها وكمت للثلاجة طلعت شراب خافض للحرارة مشيت لباب الهول احاجي عبود
-هذا جديد قديم؟
عبود::اظن صارله سنه.
سجاد:: راح يموتون البت.
عبود:: ديربالج مرت اخوي كلشي ولا رنـــه.
عفتهم يتعاركون ورديت يم رنـــه كعدتها ضلت تصيح
-ووجع عاينــي هذا الشراب قديم لو جديد
رنـــه:: خرب حظي امددداني امددداني
تحجي من كل گلبها وتجر بالغطا عليها تريد تنام وانه اجره منها عاينت تريد تبجي وتصيح
-شبييييج ريـــمه شبيييج؟
وانه ساكته ادري بيها من الصخونه تمسلت
-هذا الشراب عاينــي قديم لو جديد
كعدت على حيلها جرته من ايدي شربت من عده قبق ورجعت تمددت تحجي
رنـــه:: اذا صرت زينه يعني جديد واذا متت يعني قديم.
-ماشاءالله على ذكائج طالعه على اخوج.
جريت الكماده أحطها على كصتها فتحت عينها شايطه روحها من عدي
رنـــه:: استغفر الله يا ربي شتردين من عدي انتِ ياهو موديج عليَّ؟
-نخمدي رنـــه ترا اطيج ابره.
حجيتها وتذكرت عدنه ابر جابوهن الهاجر من صخنت، طلعت للحوش حاجيت سجاد راح جابها الي گال عبود
-جا ياهو يضربها؟
سجاد:: ريـــمه تعارف!
عبود:: صدك؟ جا طلعنا ماخذين خوش چنه دكتوره.
سجاد:: انچب.
عفتهم ومشيت مسطوره منهم شكد يحجون مايملون طبيت للغرفه رنـــه شايله الكمادات من راسها حاطتهن على راس حسين ونايمه.
كسرت الابره خلطتها وسحبتها، دغيتها بجتفها
-رنـــه اكعدي.
فتحت عينها بس شافتني گدامها صاحت
-اهوووه هم اجتني اجتني.
-انگلبي خل اضربج ابره حيل مصخنه هسّه تشمرين.
كعدت على حيلها وعاينت للابره البأيدي
-ريـــمه لا تسودنيني هاي روحـــي اطيها الشعلان.
ضحكت اعاينلها وهي مسترعنه من وره الصخونه
-يله نامي بس يجي اخوج ويلكاج مصخنه ياخذج للمستشفى النوب ممرضين اليضربونج ابره عاد انه ريـــمه استرلج منهم.
هزت راسها صح وتمددت تهدد
رنـــه:: بت ميلاد لا توجعيني وعلي اهدن هاسكي على اخوتج.
شلت أيدي امسح على المچان وهيه بعدها تهدد
-كضيت ترا.
-اااخ يا ييييمه.
-شكد جذابه
-الدوه يحرك.
-هسه يروح.
رجعت لكمادات على راسها وهيه منتهيه نعست ضليت كوه فاتحه عيني گمت للحوش مالكيت عبود وسجاد طابين للدوانيه نايمين وضال الباب مفتوح مشيت مديت ايدي اريد اسده وصفنت اعاين للدوانيه وجع غريب يصيب گـــلبي وكل اليجي ببالي عمي شامل طوله وضحكته وحچاياته وياي وچم مره چنت اطب لغرفتهم چفت واشوفنه لو نايم على رجلين عمه رباب لو توه يريد يبوسها،ابتسمت واعاين لكل زواية الدوانية ويجي العقلي مشهد مو واضح صوت خطوات بدله لونها احمر
غمضت عيوني احس اشوف روحـــي من جنت العب هناه شعري مشدود ذيل حصان وبدلتي حمره عبالك هسه جاي اشوف روحـــي وانه أركض بالدوانيه حطيت ايدي على گـــلبي ووخرت مبتعده گـــلبي يوجعني شعوري ابد مو حلو عكس قبل شويه.
رجعت للغرفة يم رنـــه جددت الكمادات وأحاول اتذكر شمعنى اجه ببالي هالمشهد من طفولتي كلها شمعنى تذكرت هذا حطيت ايدي على راسي احاول اتذكره كامل حتى گـــلبي يرتاح بس ابد كلشي مؤذي وكل ما احاول اتذكر گـــلبي يوجعني اكثر.
رنـــه شويه صحت من نزلت الصخونه عاينتلي تسأل
رنـــه:: افرشلج لو تنامين بفراش طــروادة؟
دنكت اهز راسي لا
-هسه اروحن بس يجي سليم.
هزت راسها خوش وغمضت عيونها، اخذت الماي وطلعت للمطبخ وكفت بباب المطبخ مستغربه شعوري شمعنى اليوم بالتحديد اتذكر احس شفت روحـــي من جنت اجي يمهم واخاف من امي وعمه رباب تمشط شعري وتطيني حلويات لو تسويلنه كيكه اعاين للمطبخ وعبالك هسه اشوفها گدامي.
غسلت وحهي طفيت ضوه المطبخ وطلعت للحوش كل زاويه اعاينلها اشوف روحـــي مناه طلعت اركض وباب الحوش نرد وراي وضل يروح ويجي بالهوا، درت عيوني للحوش ومشيت بخطوات ثگيله راسي يوجعني كعدت بالزاويه يم الحديقة واعاين للحوش وجني اشوف طفولتي گدام عيوني.
سندت راسي على جذع الشجرة وغمضت عيوني انجر من الواقع لبعيد غفيت
"-ريـــمه، علمتج شتسوين مو؟
-اي يابه.
-ومو تحجين خوش؟
ميلاد:: ما تحجي تالي تنسى بس كون انتَ ما تبطي.
-تعاي بويه يله امشينا لبيّت عمج."
طــروادة :: ريـــمه
شهكت فازه وهو گاعد گدامي تلفتت اعاين للحوش ايدي على گلبي درت عيوني اله جر الچفيه من جتفه مسح بيها وجهه وعافها على رجليَّه عيونه حمر من النعاس، صاير الفجر وصارلي هواي من نايمه، شال راسه عاينلي گال
-ليش نايمه هناه؟
مديت ايدي لحجابي اتأكد شعري ما طالع دنگت
-ما ادري چنت يم رنـــه لان جانت مصخنه وبعد ما اتذكر ليش اجيت للحوش.
هز راسه اي
-شفتها رنـــه زينه هسه ما مصخنه
-اي
سكت يعاين لوجهي درت من عده اعاين للحديقة للخضره
وابعد نظراتي عنه رديت درت عليه صارت عيني بعينه بعدهن عاين لبعيد
-احم عرفتوا شي على بريا؟
تحسر يهز راسه لا
-بعد بس ان شاءالله يرد سالم.
-ان شاءالله.
-بله عاينيلي.
شلت راسي اعاينله مرتبكه مضيك عيونه ومركز بعيوني حجه بهدوء
-بيج شي انتِ؟
هزيت راسي لا دنك لف ردن القميص الحد العكس وشال راسه يحاجيني
-شمسويه ريـــمه؟
بلعت ريك مرتبكه وهو يسأل وعبالك محضرلي تهمه هزيت راسي لا ما مسويه شي
شال ايده رجعت وجهي ليوره واعاين عليه گبل ما توصل ايده لوجهي تفاحة ادم صعدت ونزلت وعيونه تتبع اصابعه وصلهن لرموشي بطرف إصبعه تلمس رمشي حطيت ايدي فوك ايده نزلتها وبعدت ايدي حجه وعيونه بعيوني
-شمسويه الابوي؟
عگدت حاجبي ما فاهمه وگلبي يدك بقوة گلب مجرم مكشوف، سألت بصوت يرجف
-شمسويه؟
نظراته تاهمتني تحسر وشبك اصابع اديه ببعض
طــروادة:: صارلي ساعة گاعد گبالج شمسويه الابوي وحتى وانتِ نايمه تتعذرين منه!
اعاين لعيونه والخنگه ذبحتني اريد اتذكر الحلم الاتذكره يختلف عن الجاي يحجيه اعاين لشفايفه يتحركن بعده يحاجيني وانه احس صار صدى بأذني گمت ما اسمع شي واشوفنه احسه يمييل گدامي يروح ويجي، مسحت دموعي ووگفت أريد اروح
سمعته من صاح
-ريـــمه.
ومشيت ما مهتمه درت عليه من جرّ آيدي موگفني فاتحه عيني كلها واجر بايدي من عنده وهو يحجي وياي اعاين لشفايفه تتحرك حچايه اسمعها وحچايه لا. حطيت ايدي على راسي دايخة
-عوفني.
انخلبت روحـــي واحس بيه شالني من الگاع بين أديه ما فاقده وعيي وما صاحيه فتحت عيني من نزلني بالفراش وطلع حطيت ايدي بالگاع وكعدت على حيلي حاطه راسي بين ايديي اريد بس اصحى واطلع شغل ضوه الغرفة عاينتله گوه اركز بأيده كلاص مداه الي
-اشربي لبن مالح.
اخذته من أيده شربت وعفت الكلاص وهو وأكف بالباب يعاينلي ضايج
-عباتج وين؟
شلت ايدي أشرتله باتجاه غرفة رنـــه طلع جابها واجه شمرها على الفراش يم رجليَّ
-تردين ترحين؟
-اي.
-كومي.
وكفت والدوخه بعدها بيه مد ايده يكضني من عكس ايدي
-هدني اگدر.
عاف ايدي ودار وجهه يستغفر لبسيت عبايتي عاينلي وطلع مشيت وراه اعاين بباب الهول وهوه مشه لباب الحوش ودار عليَّ يسأل
-ها؟
-نعالي ماهو
طب للبيت جابه من غرفته شمره گدامي يحجي
طــروادة:: بنعالها على فراشي.
عافني وراح لباب الحوش لبست ومشيت وراه احجي
-انتَ اخذتني لفراشك انه ما رايحه.
دار وجهه عليَّ شلت راسي اعاين لعيونه لحيته مخففها وضال بس الشارب عالي ابتسم بطرف شفته وعله شاربه مال براسه وعينه بعيني
طــروادة:: على اساس انتِ مقصره ما نايمه بيه.
درت عيوني من عده احجي بسرعة
-ما واصلته مرّه وحده وماجنت ادري بروحي.
تقرب خطوه وگف گدامي وانه مدنكه
-مره وحده؟ وريحتج التارسه الغطا والمخده؟
شلت راسي اله خازرته وفززني صوت جدي من صاح
شعلان:: يااهي هاي بت شاكر ووولج هلااااه
درت عليه بخوف اجانه بساع بطرك دشداشته جرني طــروادة وره ظهره وهو وصل يمنه روحـــي راحت سب طــروادة يصيح
شعلان:: شعدددك وياها من غبشة
طــروادة:: شعليك هاي العايزه تدخل بيني وبين مرتي؟
شال ايده جدي يريد يطكه دفعها طــروادة ما يخليه وصوت جدي عله وانه روحـــي رايحه جدي يغلط ويسب وطرواده شوي شوي يصير اعصاب ويرد على جدي بصياح شال أيده يهدد
شعلان:: كاض البت ومن غبشة ووحدكم شسويتوا؟ ووولج صخمتي وجوهنه
فاتحه عيني بصدمة وطرواده صاح بصوت عالي
طــروادة:: سددددد حلگك، ثمن حچااايتك
طلع ابوي وطلعوا سجاد وعبود وأنه أتلفت بينهم وصوت جدي وطرواده شما جاله يعلى ســليم وصيهد توهم راجعين من الگيعان مشيت بساع للبيت وامي طلعت يمهم تصيح
-شسوووويت ببتي شسوويتلها.
ايدي على گـــلبي مختنگة مرتضى كعد من نومه ما فاهم شي وهد على طــروادة يريد يطكه جره طــروادة طكه حيل يغلط ويسب بيهم وجدي يهدد وسليم تسودن صاح بوجهم
ســليم:: چان ويانه بالگيعاااان، وريمه اناااا بأيدي وديتها يم رنـــه ابتلينااااا ادري عليمن هالهوووسه كضيته ناااايم بصفهاااا كضيتهم فد فررررراش وووولك عليييمن هالهوسه عليييمن.
روحه فرفحت يصيح ويتراجف طكه ابوي يغلط عليه وهوه متسودن وردوا على طــروادة وهو بس يريد يمد ايده على ابوي جراه صــيهد لبيتهم مشيت اركض صعدت فوك واسمع هوستهم من طبوا للبيت عركتهم وي ســليم وهوه روحه مفرفحه دقايق واسمع صوت ركض على الدرج دفر باب. الغرفه وطب، وكفت بساع امسح بدموعي وجهه احمر وهاجر تعاينله بخوف
مد ايده بغضب على راسي يجر شعري هوه والحجاب اديه ترجف ويحجي من بين اسنانه
-ليش الهسه غاااااد ليش ما رديتي.
بچيت مچلبه بأيده
-انتَ ما اجيتني بطيت وانه من التعب غفييت.
جر شعري قوي
ســليم:: ووولج المن عفت سجاد يمج انااااا المن؟
دفعني من أيده يرجف ويغلط ويسب بجدي دار عينه علي وشال ايده يهدد
-النوبه لو وصلتيهم اكسر رجليج مناه لمنّ تعرسين.
عافنه ونزل ويا ريت لو ضاله عليه اقلها طكته بدون حقد ما توجعني بس امي طكتها توجع المچان التطگني بيه لازم يصيّر آزرك طكت هاجر وطلعتها من الغرفه اغمض عيوني ما اشوفنها من تطكني وحرف ما يطلع من عدي ما ينسمعلي صوت فتحت عيني من راحت اعاين لرجليها من طلعت والباب انسد وراها ورد انفتح بساع جرتني هاجر الحضنها تبجي، جريت روحـــي منّها لفراشي بنص الوجع غفيت
"-يله ريـــمه.
ركضت بدلتي حمره شعري ذيل حصان طبيت لبيت عمي شامل ومثل كل مره بدون ما ادكن الباب الكل يلعب بالحوش وانه من دونهم رحت للدوانيه عمي شامل كاعد يعاين للتلفزون خنجره بصفه وعمتي رباب يمه مسويتله كليجه وچاي عاينولي اثنينهم وصاحوني اركض الحضنهم حضن ام واب ما حاسه بيه ببيتنا عاينت لعمي متذكره
-عمي أبوي يريدك.
-شيريد؟
رفعت اجتافي ما ادري ومدنكه اكل كليجة اغمسها باستكان الچاي واكلها وعمه توخر بدلتي الحمره حتى ما أتلفها، كام رأح الأبوي وانه غسلت ورحت للحوش العب وي البنات شوي وتذكرت حچاية ابوي مشيت للدوانية اتختل الخنجر يم مخدة عمي الچان كاعد عليها أخذته بأيدي فتحت الگراب عن الخنجر مثل ما امي وابوي علموني شمرت الخنجر على الگراب ومشيت اركض ضامه الگراب وره بدلتي
صار عمي شامل بوجهي يم باب الحوش شهكت بخوف واضم ايدي وره البدله زين عاين وشاف الگراب هز راسه متحسر يحاجيني
-روحـــي عمي.
مشيت لبيتنا اركض اطيته الأمي وابوي وامي تجرني على صفحة تشربني ماي وجرتني للغرفة تصيح عليًّ نامي وآنه ابجي ما نعسانه ما اريد أنام انجبرت نمت "
فزيت اشهك واتلفت بالغرفة مثل المسودنه فاتحه عيني حييل وهاجر تعاينلي بأستغراب
-ه هااجر هااجر عمي عمي شامل چان هنااا.
وهي تهز راسها لا مستغربه حالي كعدت بنصّ الغرفه ايديي على راسي جنت احلم لو چنت اتذكرررر جنت احلم لو اتذكرررر
صرخت الطم على صدري
-جان يقصدني جان يقصدني انه العزيز الجاس گلبه
جلبت هاجر بأيدي دفعتها متسودنه روحـــي احتركت حرك لطمت على راسي وعلى وجهي
-انه العزززيز الجست گلب عميييي انه العزيز الجاس گلبه.
واحس بأيديي انجرن چلبت بأيد رغد اصررخ
-رغددد ولج رغد انه انه الجست گلب عمي انه يقصدددني يقصدددني
رغد:: مهدود حييلي وهي يأثنين اديها تلطم على وجها اريد بس اكضها ما اگدرلها متسودنه عيونها دم وهيه تلطم عليهن وتصرخ بكلّ صوتها صعدوا امها وآبوها دفعتني ووگفت بوجهم كلها غضب تعاين الابوها وتحجي ترجف
ريـــمه::انتَ انتَ مو عزززيز عده يقصددددني چان انه العزيز الجاس گلبه، انه الجست گلب عمي شامل
فتحوا عينهم بصدمة جرّاها آبوها الصدره شابكها وساد حلكها وهيه تصرخ وتجر بروحها من عده دفعتني ميلاد تطلعني من الغرفة ودفعت هاجر وراي
-البنيه راح تموووت وخري شبيج؟
ميلاد:: مااالج غرض انزلي وخررري.
واسمعهم اثنينهم يسكتون بريمه وهاجر بأيدي تبجي صاحت عليَّ فرح نزلت أركض سلطان طايح يم الجربايه ركضتله متسودنه بچيت اريد بس اعينه وارجعه للچرباية
وهوه صوته گوه يطلع
-ر.. ريـــمه .
رجعته على الچربايه مسحت دموعي
-هسه تجيك.
وخرت شعره من وجهه امسح بكصته وهوه كوه فاتح عينه
رجع راسه ليوره وغمض عيونه اعاينله وروحي تنمرد هذآ سلطاني هذا الچان لو يمشي من بعيد اسمع صوت خطواته هسه ما يگدر يخطي وحده،بجيت ادعي ربي يشافيه غطيت رجليَّه وطلعت من يمه بالي يم ريـــمه، ابوها شوي ونزل اجه يمي للمطبخ
-عمي رغد موش تحجين بسالفة ريـــمه هيه مريضة تتحلم وتفز مخروعه ولو واحد دره بيها يگولون عليها مسودنه بس بعد انتِ منه وبينه بعد ابوج مو تحجين.
هزيت راسي اي اعاينله من طلع واحجي بگلبي اكص ايدي اذا مو انتم الراح تسودنونها. وحتى بالغدا ميلاد ما نزلت من يم ريـــمه، وهاجر كاعده على الدرج دموعها تجري والولد ولا واحد بين، للعصر يله نزلت ميلاد تخزرني وتخزر فرح عفتها طبيت يم سلطان للغرفة .
بالليل وره العشا نزلت ريـــمه ميلاد تمشيها ذبلانه عيونها حمر اخذتها للحمام وطب ســليم عاينلها متسودن
-شبيها ريـــمه.
ميلاد:: صخنت من طلايب جدك.
تحجي وتمشي بريمه تريد تصعدها فوك جراها من عدها ســليم يتلمس وجها وريمه دفعت أيده ورجعت الايد امها اخذتها ومشت تردها الغرفتها وسليم يعاين وراها بأستغراب دار علي ينشدني
ســليم:: خويه امي وابوي محاجينها؟
عاينت للباب مناه ومناه محد موجود گتله
رغد:: الصبح الساعة بالعشرة سمعت ريـــمه تصرخ صعدت وهيه متسودنه تلطم على وجها وتصيح انه العزيز الجاس گلب عمي شامل وامك وابوك طردوني من يمها وضلوا همه يمها.
يعاينلي مستغرب عشيت سلطان وخابرت صــيهد
-الو اطيني جــويريه أريد اوصيها
-مو يمي شتردين؟
-اريدنها شني السالفه.
جــويريه :: طب للمطبخ ومدلي التلفون اخذته من ايده اعاين للأسم كاتب امي ورقم واحد حطيت التلفون على اذني وهيه تصيح
-خاب الو.
-الو ها رغد.
-جــويريه فدوه شوفي ندى رادت تسبح اليوم وما گدرت اروحلها.
-ولج سبحها وهـــب.
-ها خوش جا يله ديربالج عليهم باجر الصبح اجي يمكم شويه.
سديت التلفون منها وطلعت للغرفه اطيته اله جراه من ايدي ما مهتم، رجعت للمطبخ اسوي. اعشاب لخاله ايمان صبيت وفتحت باب الغرفه احاجيه
-راح اروح انطي الخاله واجي.
ما اهتم لا شال راسه ولا حاجاني رحت لبيتهم لكيتها توها تريد تنام
-جبتلج أعشاب.
ضحكت كعدت على حيلها زين كامت تگدر تعين روحها وتكعد وحدها اخذته من ايدي وهي تگلي
-گلت كضها صــيهد بعد ما تجيني.
-لا لا تخافين انه ويآه حالياً شلون هوه ووهب
لزمتني من ايدي خاف اشرد شربت الاعشاب وگالت
-ليش خايبه؟
واني ابد ما اطلع الصوج من عندي لازم أخليها براسه
-هو من عركتنه هذيج الهسه ما يحجي وياي وما مهتم حتى من طلعت النتائج ماكلف نفسه يباركلي يدخل للبيت وين الغدا وين العشه چااي ماي ليش هذا ما مكوي ليش هذا ما ممسوح.
ايمان:: كونج خوش مره وتسمعين من عدي.
ضحكت اهز راسي
-يله اسمع
-لا تخلينه يصيح على شي اكضي غرضج كله خليه من يطب للبيت ما يلگه شغله يحاچيج عليها كون يضل يتحركن عليمن يصيح، ولو اجه الليل اسبح والبس هالصلوخ والمشلح وانامن بفراشي اخليه ياكل بروحه.
فاتحه عيني على سوالفها
-خاله هو اني من ساسي خبيثة وانتِ تعلمين بيه، بس هذا ابنج ما تمشي وياه الخباثة يطلعها من عيوني.
ضربتني على ايدي ما راضيه
-كل خير مابيج.
ضحكت وطلعت من يمها دكيت الباب على ندى ودخلت اشوفها خاف محتاجه شي رضا نايم وهي گالت
-لا والله ما اريد شي هسه شويه ويجي وهـــب .
طلعت رجعت للمشتمل وافكر بحجي خاله ايمان حتى لو حاولت اخبث وي صــيهد هو اخبث من عدي واقوه نظفت المطبخ زين وطبيت للغرفة اعاينله بعده يگلب بتلفونه ركزت وي اصابعه يراسل درت وجهي مبين يحجي وي نجمته.
فرشت فراشي وكلساع اعاينله بعده يراسل گام طفه ضوه الغرفة ورجع للچرباية اعاين لوجهه من ضوه التلفون كل شويه وشاربه مرتفع من يبتسم، گمت شغلت الضوه باوعلي مضيك عيونه ما حاجيته فتحت الكنتور طلعت دشاديشه الما مكويات، وجريت الاوتي فرشت البطانية بالگاع وكعدت اكوي واغلط عليه بس بگلبي
يا دشداشه اكويها اشيلها احطها بالتعلاكه وافرها مناه ومناه وهوه يباوعلها وما يحجي اعلگها بالكنتور وأرجّع للبقيه
اخر دشداشة كويتها وشلت راسي احاجيه
-صــيهد، برأيك معدلي شنو احسن شي يوديني ؟
بقى ساكت شلت راسي مركز بالتلفون
-اني مو احااجيك
دار علي خازرني رجعت حجيت على كيف
-احجي وياك وما تسمعني!
بقى يباوعلي مضيك عيونه هز راسه يسأل شتردين
-برأيك شنو اقدم؟
ابتسم بطرف شفته وكعد عدل
صــيهد:: شتقدمين؟
-ما ادري شنو انقبل اذا قدمت؟
ضحك مسح لحيته ورجع باوعلي عينه بعيني هز راسه لا
صــيهد:: المتخلف ما يخلي مرته تدرس وتفرفر بالكليات، حدها ثالث متوسط بس انا نغشيت نسيت روحي متخلف وخليتج توصلين سادس هذا حدج
سكتت اباوعله واتذكر حجي امه من گالت لا تكليله اداوم ابقي مغلسه بس المشكلة التقديم ما بقاله شي لشوكت ابقى مغلسه، ثاني يوم بيتنا هوسه نص حايره بسالفة بريا اللي الحد هسه ما مبين ونص بسالفة طــروادة هد على جدي يهدد تاهمينه لازم ريـــمه قبل الزواج وخلوا سيرة البنيه على كل لسان وهي تمرضت رغد تجي يمنه شويه وتسولفلنه ريـــمه حيل مريضة، وهي رغد حالها بعد اتعس ضعفانه ووجها ذبلان ولو واحد جاب اسم سلطان تبجي تگلها يمه گدامي يوم عن يوم يذبل وينتهي
خليت الهوسه تخلص وسولفتلها على صــيهد گالت
-صالحيه لو تصالحتوا يخليج تداومين
-خاله انتِ حاجيه.
-يا حاجيته سوه بيه فلك ضل يصيح مالج غرض بعد يمه انه ياهي مالتي بس اعلمج سوي الگتلج عليه البارحه اذا هو ما تنازل انتِ صالحيه
سكتت محتاره كلت امشي بحجيها تالي من اول ما رد للبيت لگاني يم اهله وطابختلهم غده وهوه يريد اطبخ بالمشتمل غده بس الي واله، من شافني اريد ابجي سكت وطب للهول يمهم صبيتلهم توه ياكل وتعارك وي جده شمر الخاشوكه من ايده وطلع بعد ما رجع الحد الليل.
طب للغرفه عبالك ما يشوفني انه من يمي گلت
-وعليكم السلام.
عاف تلفونه على الشحن اخذ ملابس وراح يسبح گمت سويتله چاي وبس طلع من الحمام انطيته اله ما اخذه من ايدي حجه بهدوء
-جوعان.
-شسويلك؟
شال راسه يخزرني
-لا يعني شنو تريد أسويلك تاكل.
-اي شي حتى لو خبز وجبن.
سويتله صينيه بساع اكل وشلت المواعين غسلتهن اباوعله يغسل ويباوعلي بطرف عينه، رجع للغرفة غسلت ورحت وراه فتحت الكنتور اباوع للملابس لا والله استحي ختولي الكليه ، رجعت لفراشي وهوه رجع يراسل يضحك وياها واني وياي وجهه ما يكصه السيف شلت راسي احاجيه
-تحجي وي نجمه؟
مال براسه من التلفون مبتسم بخبث
-اي
-اني كاعده ترى ما يصير احترمني على الاقل.
ضحك بصوت وكعد على حيله
-ما احترمتيني انتِ من كتبتي عن خيالج الخايس!
اباوعله ساكته وضايجه رجع راسه للمخده كعدت على حيلي وخليت المخده مالتي جواي حتى اصير عاليه واشوفه، بعده يراسل ويبتسم، سهله اذا ماحرگت گلبك.
مشيت للكنتور اخذت ملابس نوم روب احمر طويل ستن داينتيل من الصدر، واسقيات رفيعه وچاكه طويله اخذته وطبيت للحمام فتحت الماي وغلطت عليه بصوت حقير من اني كتبت عن خيالي گلب الدنيا وهو يحاجي نجمة گدامي، عادي عده .
كملت سبح غميت روحـــي ماجايبه منشفتي ردت اتفل على روحـــي نشفت بدشداشتي النرعتها، لبست الروب وسبيت روحـــي دشداشتي متبلله وهذا ما اطلع بيه هيج تندمت ! وتذكرت شلون يحرك بگلبي ويحجي وياها وكل ما احاجيه على الكليه لو على شي يگلي لا انا متخلف ما يصير
حتى تلفزون كتله اضوج ابقى وحدي اقلها خلي تلفزون بالهول گال انا متخلف مرتي ما تباوع تلفزون.
شجعت روحـــي وطلعت من الحمام گـــلبي يدك حيل فتحت باب الغرفه مدنكه ما اباوعله نشّفت شعري وابد ما التفتت لجهته منطيته ظهري وواكفه يم الكنتور مرتبكه وگد الارتباك المنشفة النشفت بيها شعريّ رجعتها للكنتور صاح
-طلعيهاااا تخمخم.
جريتها
-ادري هوه جاي آخذها اشرها.
احجي وما اباوعله طلعت من الغرفه شريتها ورجعت توه شاد مراية الميز وكفت يمها امشط شعري درت عليه من شميت ريحة دخان عايف التلفون على صدره حاط ايد وره راسه وايد كاض بيها الجكاره مضيك عيونه ويباوعلي
درت وجهي من عنده اهمس بگلبي "يارب امنتك نفسي"
امشط شعري والرجفه لزمتني احرك راسي على كيف اباوعله من الگه عينه علي أوخر عيوني من عنده ، لميت شعري ضميت المشط ومشيت اريد اروح لفراشي صاح يغلط
-خرب اهلج
تمددت بفراشي واغطي بروحي زين وهو كعد على حيله نزل رجليَّه من الچرباية ويدخن ويحجي وي روحه
-لخيالها لابسته احرگج انتِ وياه.
دار وجهه عليَّ غمضت عيوني صاح بغضب
-فتحييي فتحيي عينج شجاي تتخيلين.
فتحت عيوني بسرعة خايفه
-ما اتخيل شي والله.
وهو يباوعلي بغضب خازرني طفه الجكاره بالنفاضه ورجع تمدد على الچرباية دك تلفونه اتصال رد بعصبيه واني كل تركيزي وياه
-الووو، هلاا، اي خوش يله.
شلت راسي اباوعله ودنكت بسرعة من شافني سكت شويه ورجع گال بهدوء
-انتِ شلونج شلون صرتي؟ اي حتى انا افكر بيج.
اسمع وادعي عليهم أثنينهم شلت راسي من المخده اباوعله متمدد لازم التلفون بأيد وايد مخليها على عيونه ويحجي مندمج وهي مدري شنو تحاجيه يبقى فترة ساكت ويتبسم ويهمس "اممم"
كعدت على حيلي اباوعله بتركيز صدره يصعد وينزل وكل شويه يجرله حسره مبين تحجي وياه سخيف مغطي عيونه بأيده وبلل شفته بطرف لسانه ابتسم وهو يگلها
-اذب حج حتى بتفكيرج وبخيالج لا تفكّرين بغيري.
هزيت ايدي من وراي گام يشك حتى بالنجمه مالته التلفون على اذنه ويسمعلها ساكت متت من الفضول شجاي تحجي وياه اني
اذا احجي كلمة يردها بعشر رزايل وهاي صارلها ساعة تحجي وهو بس يتبسلمها واذا كلف روحه يحجي يگلها "ااي"
وكفت بخوف متردده امشي على روس اصابعي التلفون من جهتي تقربت يمه صوت گلبي يدك حيل وهوه مخلي ايده على عيونه
دنكت اقرب اذني الاذنه اريد
اسمع شتحاجيه
بعدني ما سامعه ولا حچايه وجرني من ايدي بقوة للچرباية عبرني من فوگه فتحت عيني مصدومه وانه متمدده بصفه وهو رافع وجه وساند روحه على عكس ايده يباوع لوجهي بلعت ريك خايفه اباوع لعيونه همست
-احم شلونك؟
مد ايده وبظهر اصابعه تحسس ايدي من اصابعي لزندي
-آلمن لابسه أحمر ومطلعه الزنود؟ شكاعد تتخيلين انتِ؟
يحجي من بين اسنانه كاتم صوته گوه على روحه رجف جسمي بخوف
-والله ما تخيلت شي
نتر ولزمني من زندي
-المننن لابسته.
لزمت بأيده
-اضجوك بيه اضوجك بيه والله ما أتخيل شي.
رخت ايده على زندي وانه من الهبطله الدمعه چلبت برمشي دنك عيونه يباوع الصدري أتنفس بقوة ورجع باوع لرگبتي وايديي مد اصابعه يتلمسهن وجسميّ يقشعر
-ياهو طاكج؟
درت عيوني وي ايده على الزراك الخفيف اللي بزنودي اذا اكله انتَ من تلزمني ومو بس اني حتى اخوته اذا لزم وحده بينهن من زندها تلكاها زركه يلزمنه بقوة عبالك زلم گدامه، دار عيونه الايدي الثانية هم لكه بيها نفس الزراك
-شبيهن اديج؟
-مابيهن شي هنه وحدهن يصيرن هيج.
شال راسه يباوع لوجهي بحيره
-من لبستيه تضوجيني بيه ما خفتي على روحج؟
-خفت!
رفع حاجبه يهز راسه أي ويتلمس حنجي بأصابعه
-والله خفتي؟ خفتي ولبستيه.
-ليش تحاجي نجمه؟
صفن بعيوني وحرك وجهي بأيده اللازم بيها حنجي
-شلج غرض؟
-ما ارضى.
-اها؟ ليش ما ترضين؟
سكتت اباوعله نزل ايده من حنجي الرگبتي غمضت عيوني جسمي مقشعر وهو يباوع شلون جسمي تأثر بلمسته وقشعر ويبتسم بطرف شفته لزمت أيده جربتها من صدري مرتبكه، باوع لوجهي عدلت روحـــي اريد اكعد دفعني من جتفي يرجعني المكاني باوعت لوجهه لامه ايديي الصدري وهوه يبتسم بشر ومكر
-وين؟
-احم اريد اريد انام.
-هيج بهاي السهوله؟ عبالج من تحركيني اعوفنج ما اجرج وياي النفس النار؟
ووي حجايته نزل وجهه يبوسني بوجهي بطرف شفتي چلبت بأيده گـــلبي يدك بقوة لمسته هادئه ومو بجبر وقوة غمضت عيوني ذبلانه واحس بدفو شفايفه ينزل من وجهي لرگبتي الحد ما حسيت نغزات شواربه على دك النجمه باسها وابتعد كعد عدل يباوعلي بالگوه فاتحه عيني ضحك عينيه بعيني
-وخري من فراشي
مسحت وجهي ونزلت من الچربايه بسرعة رجعت لفراشي گـــلبي يدك بقوة لميت الغطا على روحـــي جسمي يرجف ، درت عيوني عليه طلع من الغرفه جكارته بأيده شرب ماي ورجع كض تلفونه يراسل غطيت راسي وبجيت بلا صوّت مختنگه شيريد مو جاي اسوي اي شي يگول عليه وفهمت غلطي من كتبت عليه وهو هم غلطان بس ما يعترف بغلطه
"""""""""""""
رنـــه :: احير على منو انقهر على اخوي اللي يوميه يفرفح گلبه من وراهم يتهمونه متقرب لريمه وهو متسودن
لو بريا اللي مــيثم يوميه يروح المچان بس يريد يعرف خبر عن اخوه هاي صار عشرة ايام بريا ماكو جدي يگله خلنه نسوي فاتحة والولد يتسودنون.
اضم روحـــي بالغرفة وابجي بحرگه اعاين لذكرياته وحده وحده
مشمش وكرة الثلج
طوك الورد مخليته بعلبه وما اطلعه حتى لا يتكسروالفروه مسفطتها وي هدومي والخرزة اللي من سبحته برگبتي احس كلهن يگللي لا تبجين والله يرجع بريا يرجع وترجعين تسويله چاي ولفات وتتعاركين وياه لحدما تملين، ما يمر يوم اذا مايخابرون عليه اكثر من خمسين مكالمةوكله مغلق، بگت رقمه من تلفون طــروادةدزيتله رسايل على الوتساب. "بريا انه رنـــه"
بريا وينك
فـــدوه رد علينه جدي يريد يسوي فاتحه
رد بريا انه راح اموتن.
وما يوصلنه واودي على الرصيد كل يوم اودي رسالة واتأمل يرد وكل يوم اخابر الحد ما امل من اكعد الحد ما انام يطلعلي مغلق.
اجت عــفراء ومن شافت حالي خافت
-رنـــه تحبينه؟
بجيت اهز راسي لا وهي حايره بيه وتحلفلي
-والله ما ميت
-جا وووينه ووينه صار شكد وهوه ماكو منه خبر يگدر يخابر من اي واحد من اي جندي وياه ويكول انا مابيه شي.
ابجي بحرگه جرتني الصدرها متحسره تدعيله شويه ووخرت منها جريت تلفوني من الشحن ورجعت اخابر عليه وهم مغلق للساعة ب١٢ وانه بس اخابر وكل
ما يگلي مغلق ارجع اتصل تمددت بفراشي كلهم نايمين وانه نعست بس ما اريد انام اريد اضل اخابر عليه لمن يحاجيني وهيج اقنع روحـــي اكولن هسه يرد
حاطه التلفون على المخده بصفي وكل ما يگول مغلق ارجع اضغط على الشاشة اتصال وعيوني على الفراغ اتاني يگلي مغلق وارجع اخابر گمت اغفي دست اخر اتصال وغمضت عيني مال گالي مغلق ولا دك انفصل شلت راسي من المخده عاينت للتلفون عددد المكالمات
(٣٢٤)رجعت دست اتصال لأخر مره وحطيت راسي على المخده مغمضة عيني .
توني اغفى وما مستوعبه التلفون جاي يدك قريب على اذني وفززني صوته
بريا:: غزالتي.
شكرا لزيارتكم عالم روايات سكيرهوم
