رواية أرض الخناجر الفصل الخمسون بقلم ايلول
زعلان لو مشتاقلچ بيش ابدي
بفراگ وجهچ لو معزتچ عندي .
══━━━━✥◈✥━━━━═
بريا:: غزاالتي.
رنـــه :: فتحت عيوني بساع گـــلبي يرجف مو يدك جريت التلفون اعاين بيه بس شفت عدد الثواني كعدت على حيلي ارجف وحطيت التلفون على اذني صوت نفسي عالي وما مصدكه سمعت صوته همست ارجف
-بريا.
بريا:: ها گـــلبي ها رناتي.
شهگت ابجي ما مصدگه حطيت ايدي على حلكي اكتم صوتي وگمت اتعثر ودموعي تجري طلعت من الغرفة للحوش اريد احاجيه ما اگدر بس ابجي ومختنگه وهو بس يريدني احجي
-مو احاجيج رنـــه لا تبچين فـــدوه اروحن لعيونج.
شلت راسي للسما جريت نفس بحسره ادعي بداخلي واحمد ربي واشكره
بريا:: بس لا تبچين رنـــه وعلي يبس گـــلبي حاجيني.
شهكت احجي بصوت مخنوك من البجي
-وين جنت عبالنه استشهدت؟
جر نفس طوويل متحسر
بريا:: اوووف يا صوتج تردلي روحـــي من اسمعنه
نترت ابجي
-وووين جنت؟
-غير بالحرب
-لا تجذذب لا تجذب جا واذا بالحرب ليش تلفونك مغلق صارلك شكد ردنه نموت من الخوف أنه وميثم.
احجي بحرگه گـــلبي مفرفح وهو يضحك
بريا:: فـــدوه اروحنلج وأروّح الميثم.
ووي حجايته كضه رصيدي وانگطع الخط عاينت للتلفون عفته بحضني وحطيت وجهي بين ايديي ابجي احس بعدني ما مصدگه هوه الحاجاني رد دك التلفون شلته مسحت عيوني ورديت عليه بنتر
-الو.
بريا:: شبيج اعصاب ؟ كليلي شلونك كليلي مشتاقتلك حاجيني بلطف مو بنتر بدويتي.
سكتت گـــلبي يدك بقوة كاعده بالحديقة بصف جذع النخله ظلمة والجو مابيه قطرة هوا يخنگ وحتى الهدوء يخوف ماكو غير صوت الشصر تلفتت خايفه انه هيج وكت اخافن اطلع بوحدي خاصة اذا چانت ليله ظلمه.
-رنـــه.
-هاه!
-مــيثم شلونه؟
يحجي اسمه متحسر وعبالك ذكرني بيه
-مو ززين روح روح خلي اكللهم بريا عدل.
-لاااا اوكفي أسمعيني.
-هاه؟ الو، الو بريا ما جاي أسمعك ، الوو
وشه بالتلفون وما اسمع شيحجي وكفت على البلوكه وشايله التلفون ليفوك عبالي من يمي ماكو تغطيه رديت التلفون الاذني
-الوو.
-ها رنـــه تسمعيني؟
-اي هسه اسمعنك.
-لا تحجين انا للصبح اخابر مــيثم
-ليش جا خطيه والله تسودن عليك الولد حتى ضعف.
بريا:: هسه اذا خابرته يتسودن بالزايد واذا درى شصاير بيه وانا وين، يجيني واخافن عليه الدرب خطر.
بلعت ريكي بخوف وگلبي نعصر
-شصاير وياك؟ وانتَ وين؟
سكت وانه كوه اجر النفس نار احس تطلع من عيوني مو دموع
-برياا.
حجه بخفوت
-مصوب انا!
شهگت ابجي وايدي على گـــلبي .
-يييمه.
-اشش رنـــه يا بعد روحـــي لا تبچين صرت زين ووكفت على رجليَّ ولج رنـــه راح يكضي الرصيد اسمعيني.
-وين وين انتَ هسه بالمستشفى؟
-لا يا مستشفى يم وأدم خيره
-خابر مــيثم خابرهم خل يجونك.
-لاا وين يجوني يموتون
مسحت دموعي بظهر أيدي ارجف
-انتَ وين هسه بس كلي ؟
-حتى لو كتلج ما تندلين
-ميخالف
- جنت بمنطقة اسمها آمرلي واليوم طلعوني منها لمچان أمن لا تخافين
-وين صايره هاي
-مو كتلج ما تندلين رنـــه اسمعيني، لا تحجين يم احد لا تكولين بريا خابرني راح أودي رسالة لميثم بس اطمنه انا عايش ومابيه شي بين ما اطلع مناه يله آكلهم لان اذا هسه كتلهم انا مصوب يجوني واخافن عليهم.
-لا لا ما احجي بس كلي ليمت ترجع.
-ما ابطي الوادم الچنت يمهم بآمرلي ما متيهيني وصلوني لمچان آمن وگالوا هاليومين يرتبولي طريقة اطلع بيها مناه
-بريا يعني عاين يعني أأمن ترجع ما تموت؟
حجيت مختنگه وخايفه سكت وانه گـــلبي يرجف، انسد الخط بوجهي كضه رصيده، مشيت للبيت اركض طبيت لغرفتنا اعاين لعفراء نايمه وزهره متدهربه مناه لمن واصلتها وحاطه رجليها فوكها، مشغلة ضوه تلفوني واعاين عليهم وادور تلفّون عفراء لگيته بصف مخدتها جريته وطلعت رديت كعدت بالحديقة ودكيت رقم بريا من تلفوني التلفونها خابرته ما يدك ولا يكلي مغلق يفصل تسودنت آكل بأظافري وأرجع اخابر لمن دك اول دكتين ورد عليَّ
-الو.
-بريا، انه هاي انه رنـــه.
-أعرف صوتج، روحـــي نامي رنـــه .
-بس كلي ترجع؟
-اذا الله راد
-انتَ ليش ماحاجيتنه من زمان ليش خليتنه نخاف؟
-تلفوني طاح مني انكسرت الشاشة النوب صارت سوده طفيته بعد ووره ما تصوبت انا مو بحالكم ما ادري بروحي هاليومين صرت شويه احسن والوادم اطوني تلفون وهم جان ماكو تغطيه اليوم ودوني على غير بيت وفتحت التلفون والله جاي اخابرج وانتِ خابرتي.
-شلون تخابرني انتَ ماعدك رقمي .
-عدي بايگه من طــروادة وحافظة على گـــلبي.
-ها.
تحمحمت ساكته ما اريدن اسد التلفون خايفه عليه
-رنـــه
ومالحكت اگله ها كضه رصيد عفراء متت من القهر طبيت للبيت عفت تلفونها يمها وتمددت بفراشي افكر بيه گـــلبي يوجعني وبعدني خايفه عليه شلت تلفوني على صوت رسالة على الرصيد موديلي كاتبلي
"خاف نوبات ماتحصليني مو دوم اكو تغطيه واگدر افتح التلفون"
قريت رسالته ورد وده جديده كاتب
"اذا صار شي وما رديت انتِ احجي الاهلنه كليلهم طاح والشالوه اهل آمرلي تفدوه برواحهم زلم ماشايف مثّل شجاعتهم.
كعدت على حيلي اقرأ رسايله حرف حرف مختنگه حييل وماعدي رصيد وارجع أراسله، ضليت الوب لا گدرت انام ولا كدرت اشيله من بالي للساعة ب٢ وانه كاعده واتگلب بفراشي شويه وسمعت باب الهول انفتح عرفته طــروادة رد من الگيعان جريت الغطا على وجهي وكل صوت اسمعه اعرفه شجاي يسوي من فتح باب الحمام سبح وطلع فتح الثلاجة ووره ما ياكل راح يروح للدوانيه يشوف عبود وسجاد ويرد يفتح باب غرفتنا.
سمعت صوت شمس وضليت مغطيه راسي وهي تريد تكعد امها شويه وانفتح باب الغرفة
طــروادة::هاي ياهي الگاعده،شمس خالي.
شغل الضوه يحاجيها وهيه بساع ضحكتله
طــروادة:: جوعانه ها خالي جوعانه، عفره عفرره خاب عفراء.
متغطيه بالجرجف وفتحت عيوني اشوفهم ضبابيين فزت عفراء مخروعه گالها
-خاب شمس جوعانه.
وعفراء ضايجه جنها انه اثنينا من نكعد مطنگرين كالها.
-وحمس شمالج؟
عــفراء::چا سويتلها ممه الا تكعدني.
طــروادة:: اهاه هاي البت شمالها؟ انا وين اعارف غير انتِ امها تكعدين تشوفينها شبيها جوعانه موجوعه؟
كعدت عفراء على حيلها جرت الحليب والمه وطرواده شال شمس يبوسها يحط راسه برگبتها وهيه تضحك بصوت
طــروادة:: يابعد روحـــي يا خالي يرحلج فـــدوه عفره ورنه وكل اهلنه.
اسمعهم ومحموسه ساكته عفراء كملت الممه شمرتها عليه كالته
-اخذ بت اختك وروحوا من عدي خلّوني انامن
ردت راسها للمخده وهوه يضحك عليها خله شمس بفراشها اطاها الممه وعاين للمبرده هواها حار كالها
-چا ليش ما تارسين المبرده ماي؟
عــفراء:: ترستها والله گبل لا انامن.
جرت الجرجف فوك راسها طفه الضوه وطلع شويه واجني ذبذبات ماي من المبرده وبردّ هواها، ترسها وراح نام، وشمس شبعت وردت نامت الا انه النوم جافه عيوني بالي يمه.
كمت من فراشي رحت لغرفة طــروادة نايم وتلفوه ضالّ على الشحن طبيت للغرفة خايفه فلتت التلفون من الشحن ايدي ترجف واعاينله خاف يفز طلعت من الغرفة گـــلبي يدك حييل كعدت بالحوش وأتلفت بخوف لا وأحد يشوفني
فتحت تلفون طــروادة شفت رصيده ورديت خابرت على بريا مغلّق ضليت كاعده بالحديقة وكل شويه اخابر من تلفون طــروادة ويطلع مغلق توه بدأ الفجر يطلع يله رجع يدك كضيت گـــلبي بأيدي فتح الخط
-الو
-الو هاي انه رنـــه.
-ليش بعدج كاعده رنـــه ؟وليش مخابرتني من تلفون طــروادة لا يكضج.
-ما گدرت انامن خايفه.
-يا بعد روحـــي نامي ولا تخافين رادلج بحيل الله
سكتت ما ادري شحجي وياه وبالوكت نفسه ما اريدن اسد التلفون گال
-خابرني مــيثم ورديت عليه ماگدرت بس ماكتله انا مصوب
-همزين رديت عليه خطيه هوه راد يموت علمودك.
-اعز اثنين عدي انتِ وهوه.
يحجيها بحسره وانه مدري شبيه ارجف جنت اعاركه من يحجي حجايه مو حلوه وهسه اسكت وگلبي احسه يدك ببلعومي شويه وكتله
-يعني هسه انتَ بآمرلي؟
تحسر كوه يحجي
-طلعت من آمرلي بس مو بعيد عنّها
-باجر تجي؟
-لا عاينــي رنـــه اذا الله راد هاليومين انا يمكم.
-هاه جا خوش.
سكتنا اثنينا گمت تمشيت يم قفص الطيور شويه وگال
-روحـــي نامي غزاله.
-انتَ راح تنام؟
-لا
-ليش
-ما اگدر من ارد اسولفلج .
سكتت لمن كضه رصيد طــروادة ونسد الخط خفت خاف ينتبهه لرصيده، طبيت للبيت سمعته يكح خفت اطب احط التلفون على الشحن ذبيته على التلفزون بالهول ومشيت لفراشي اركض ضميت روحـــي وسمعت طــروادة طلع من غرفته، لفيت راسي ونمت مطمئنة.
بعدني ما شبعانه نوم وكعدتني زهره جوه فتحت عيني گالت
-عفراء تكول خل تكعد لا اجيها.
فركت عيوني يوجعني كد ما نعسانه ريحة الچاي مهيل طكة بخشمي وصوت فرقعة الزيت من هي تگلي وريحة السياح، وصوت دعاء الصباح اللي مشغلة طــروادة بالهول ومعليه.
جرتني زهره من ايدي وتحجي عليَّ
زهره:: حتى ما مصليه تنامين لظهر.
جريت ايدي منها خازرتها عاينت للساعة بالسبعة وهيه متخوصرتي
-روحـــي مني لا ادفرج دفره احطج بحضن طــروادة .
فتحت عينها حيل وحطت ايدها على حلكها مصدومة ومتأثرة شمرت روحـــي على الفراش وجريت الغطا عليَّ توني ارد اغفى وصاح طــروادة بصوت عالي
-تگومييين لو اجيج.
عــفراء:: راح يذبون عليج ماي اكعدددي.
كعدت على حيلي مختنگه جيه نعسانه كمت طلعت للهول وجهي ما يكصه السيف، كلّهم كاعدين طروادة ماد رجليَّه وساند ظهره على الحايط وشمس بصفه تلعب بتلفونه وحسين مغمض عين وفاتح عين وعبود يحجي وي عفراء وهي من المظبخ ترد عليهم.
من شافوني ضليت واكفه گال طــروادة
-صباح النور هلا بيج.
رنـــه:: هسه غير منخمده وعفراء تسويلكم ريوك شتردون مني؟؟؟
طــروادة :: هيه عفراء كالت كعدوها!
طلعت من يمهم ادردم بين ما غسلت وصليت عفراء حطتلهم الريوك، عاينت للصينية مگليه بيتنجان صحن ومسويه مخلمة وحاطتلهم كاسة جبن وسياح وكلاصات چاي وانه كضيتها افتر عليهم بطرك البيضة، سوولي مچان وكعدا بين حسين وعبود شلت راسي لعفراء تحجي ويَّ زهره
عــفراء:: ليش ما تاكلين؟
وزهره كاعده بصف طــروادة مدنكه وتهز راسها لا گالها طــروادة
-شبيج زعلانه ياهو وياج؟
شالت راسها تعاينلي ومضبطه وجها ودارت عود ترى ماراح اكلهم اسمج
-هيوو لا احط راسج بالصينية شسويتلج انه؟
گبوا بوجهي كلهم ما راضين وزهره بجت متحسسه گمت من الصينية متحلفه بيها
-اكضج الخنيثه ام بيطه الكسولي الراسبة.
گاملي طــروادة متحلف مشيت بساع طبيت للغرفة وقفلتها لفيت رأسي ونمت، كعدت من دكت الباب عــفراء كمت فتحته الها تعاينلي بزعل گالت
-ليش هيج وي زهره؟
-هيه صايره تزعل على كلشي تحرك گـــلبي، بس وألله أنقهرت من ضوجتها هسه اروحن اصاحبها.
وعفراء تعاينلي وبيها شي گالت
-رنـــه بريا مخابر مــيثم وزين مابيه شي.
دنكت ساكته ارتبكت گتلها
-راح اشوفن زهره
طلعت غسلت وجهي ومشيت للحوش طــروادة وحسين يسوون بالحديقة ملوا من دجاجاتي يخربن الخضرة، عاينت لزهره كاعده على صفحة بفي النخلات وشمس يمها بالحجله مشيت مت وراها دنگت شبگتها وبستها بخدودها
-زهره.
دارت عليَّ شبگتني وطرواده يگلها
-امداج لا تصاحبينها.
ضحكت زهره رديت سويتلي لفة جبن وكلاص جاي كعدت يمهم اكل وهمه يشتغلون وعفراء ترش بالحوش، دار وجهه طــروادة ضايج عاين لعفراء مضيك عينه وهيه هزتله راسها اي سكت ورد يشتغل.
طب عبود وبس شافني صاح
-رنـــه داينيني دولارين ومن اعبي رصيذ اردهن الج تلاثة.
-ماعدي.
-وحگ علي فد جذابة انتِ مو اول امس حطيتي؟
-ما اطيي.
درت وجهي منه مرتبكه لا يكلولي وين كضه رصيدج كالتله عفراء اخذ من عدي وراحت زهره تركض جابت تلفون عفراء وانه ضليت كاعده بمچاني على البلوكه بأيدي عود واحفر بالگاع مرتبكه كالها
عبود::شنهاي ماعدج تضحكين عليّ؟
عــفراء:: ياا عدي ولك ما مخابره منهن بس منذر شويه.
-هذا صفر.
وعفراء حطّت ايدها على حلكها تحجي بحرگ
عــفراء:: يااا باكوهن الشركة نعلعله والديهم.
دار علي عبود محترك گلبه مدري شيريد بالرصيد
-خاب رررنه شمالج اردهن الج.
-ماا.
خررني محترك گلبه مني طلع طــروادة من الحديقة لام بيده حشيش منظف الحديقة والعرگ يقطر من كصته گال العبود ومضيك عيونه
طــروادة:: لا تخبصنه شلك بالرصيد؟
-اريد اخابر سجاد.
ذب الحشيش من ايده وطلع تلفونه فتحه وانطاه العبود وانه گمت احس نار تطلع من اذني
عبود اخذ التلفون وصار على صفحة وطرواده دنك وعفراء كاضتله الصونده غسل وجهه واديه دار عليه عبود گاله
عبود:: ماعدك رصيد.
طــروادة:: انچب امس مخلي.
-هاي يابه يكلي قم بتعبئة الرصيد.
حطيت راسي بالگاع گـــلبي يدك حيل وعفراء تكلهم
-شنّي السآلفة اليوم
شلت راسي اشوفنهم طــروادة اخذ التلفون من عبود شاف رصيده صدك كاضي تسودن يكلهم امس معبيه وعفراء تكله
-خابر الشركه جاي يبوكون بينه.
كلهم يحجون وانه كمت اريد اشرد للبيت توني اعبر من يمهم وكضني من ايدي درت وجهي عليه ابلعم وهوه يعاينلي فاتح عينه على وسعها
طــروادة:: مكالمة وي بريا مدة عشر دقايق.
روحـــي راحت اجر بأيدي من عده وهوه كاضها حيل وعبود جر تلفون عفراء وهم شاف المكالمات وگاله
عبود::ومن تلفون عفراء هم مخابرته ثمن دقايق
جريت ايدي منه ابجي
-والله ما اعيدنهاا.
جلبت بعفراء صارت بيني وبينهم وهمه متسودنين، جراني من وره عفراء حيل حتى هيه نهبتت وياي يعاينلي بغضب
طــروادة:: بريا وين؟
وانه مختنگه من البجي صيح بصوت عالي وعفراء ضامتني بظهرها
طــروادة:: ولج احجي ما اطكج بعدين احاسبنج على هاي بس احجي صخمان شكالج؟
حجيت اشهك ومن بين دموعي
- جان جان بآمرلي مصوب وهسه كال طلعت منها.
طــروادة:: وين صوابه؟
-ما ادري والله والله ما گالي.
دفعني من ايده حيل ومشه وعبود تبعه وگبل لا تحاجيني عفراء مشيت للغرفة شويه واجت وراي بأيدها جهاز السكر وتعاينلي بحيرة جرت ايدي تقيس السكر وتحجي
-ليش ما حجيتي ليش ماكلتي بريا حاجي وياج؟
ضليت مدنكه ساكته وهي تتحسر مقهوره
-رنـــه فكري بتصرفاتج جاي تغلطين هواي وطرواده يعديهن يخاف عليج لا تدوسين ببطنه.
-ما مسويه شي انه بس حجيت وياه لان كال مصوب.
هزت راسها خوش ضايجه من عدي اجه عبود اخذ تلفوني وراح وضلّوا للعصر يله اجوا طــروادة ما يريد يشوفني ماطلعت من الغرفة وميثم متسودن منّ درى بريا مصوب وضالين وياه على اتصال للفجر طمنهم طلع من كل المنطاق الخطره،
ومن الصبح الولد رايحين يتلگونه، طلعت للهول طــروادة نايم وعفراء بالمطبخ مشيت يمها اسألها
-طــروادة ليش ما راح وياهم؟
-جان بالگيعان مشغل المكاين.
هزيت راسي خوش ساكته كعدت بباب المبخ وعفراء تسوي ريوك اعاينله نايم حتى بدون غطا مشيت الغرفته جبت جرجف ورديت غطيته فز عاينلي جره من ايدي وكعد على حيله ابتعدت وهوه كام غسل ورد كعد كالـ العفراء
-ما كضيتي عفره اريدن اروح؟
جابتله الصينية بساع أكل شويه بدل وطلع درت عليها اسألها
-وين راح؟
-يبيع السيارة
-يا ليش؟
-علمود العرس شيخ حيدر يوميه يخابر يگله انتَ كلت عشرة ايام واعرس ليش يوميه مأجلها كاله علمود بريا وهسه بريا رد راح يحرگه حرگ.
هزيت راسي خوش ساكته، گبل الغده اجه طــروادة بايع السيارة انطه من الفلوس العفراء حتى تطيهن الريمه بس هيه ما رضت گالتله
- انه اجيبلها البنيه امها ماتخليها تطلع وخاف كلشي ما تجيبلها.
هز راسه خوش، خابر الولد گالوله راح نوصل وخرت من يمهم شفته يريد يحجي وي عفراء طلعت للحوش وهنه ضلوا بغرفة طــروادة افتريتهم من وره الحوش وكعدت يم الشباج كلشي ما سمعت منهم كمت بساع طبيت للبيت وكعدت يم باب الغرفة بس اريدن اسمع سوالفهم مادري شيحجون لمن هيه كالتله
-هيه بس تضوج عليه لا تكبر السالفة.
ضحك مستهزئ ويگلها
-اي چلبن بهاي انتن هيه تصيح ينكسر خاطري يتيم وانتِ تصيحين بس تضوج عليه چلبن بيها چلبن.
درت وجهي لباب الهول اسمع صوت اغاني گمت بساع وطلعوا طــروادة وعفراء وصوت الاغاني عالي حييل طلع طــروادة بره ولحكته اعاين من يم باب الحوش طبكن سيارات الولد ســليم ووهب وسجاد وعبود طالعين من الجامات يهوسون بالجفافي وي أغنية
يا گاع ترابج كافورِ
ياكاع ترابج كافورِ
عالساتر هلهل شاجوري
عالساتر كلنا تعلينا
رجعنا الراد يلاوينا مكسور ذراع
اي والله وعونج ياكاع
دار العدوان نساويها
ونخلي اسفلها بعاليها ذولة احنا سباع
اي والله وعونج ياكاع
نزلوا من السيارات يهوسون وانه عيوني تدوره فتحوله الباب هو نزل ودموعي جرت اعاينله شلون شكله متغير ضعفان وصاير اسمر ايده معلگه برگبته تلكاه طــروادة شبگه حييل اعاينله لامه بين أديه بقوة، واجوا جدي وعمامي وجدتي تهلهل وهوه يسلم عليهم واحد واحد وصوت الاغنية عالي حيل .
درت شاهكه على ايد عــفراء جرتني من ايدي عبالي راح تحاجيني بس هي جرتني الحضنها ضميت وجهي بحضنها ابجي
عــفراء:: اششش كافي هذا هالرد بالسلامة.
وخرتني من حضنها تمسح دموعي تضحك
عــفراء:: الخايسه بعدج هلكدوتج وينج وين العشك.
فتحت عيني كلها طكيتها على ايدها
-ما احبنه ترى بس اضوجن عليه .
-لان يتيم مو؟
هزيت راسي اي وهيه تضحك، رديت اعاين وهيه راحت للباب عدلت حجابها فتحت الباب وسلمت عليه وهوه مدنك ويردّ عليها، جدي مشه للبيت وكالهم تعالوا تغدوا وميثم تعذر من طــروادة وسلم عليه وبريا اجه يم بابنه يگلهم
بريا:: انا اريد اتغده يم بيت عمي شامل.
جراه طــروادة من ايده الثانية طبطب على ظهره وهو يگله
طــروادة:: بعدك عزيز ما اگدر اطكك اصبر مناه للعصر تعال وتدلل عساك على كتله.
ضحكوا كلهم وهوه يعاين لطرواده مبتسم يگله
-لا والله انا احبن بيتكم لان بيه ريحة عمي شامل.
وليد:: جا شني بيوتنه مو بعينك لو بيت همك شامل بيه حلاوه.
صــيهد:: سبحان الله مات وضل بيته احن من بيوت اهالينه.
يحجي وياهن من وره خشمه وعمي وليد خازره بريا گالهم
-خل اروحن اشوف سلطان.
مشه يم ســليم وعمي شاكر گاله
شاكر:: تعال تعال عمي احنا ما نطرد كاتلين رواحكم على بيت شامل وهالچلب من باب البيت ويطردكم.
ضحك طــروادة بصوت عالي وسليم يعاينله بقهر متعذر عن حجي ابوه، مشوا وطرواده طب البيتنا يضحك عاين لعفراء يهز ايده وهو يگلها
طــروادة:: ولج حتى وهوه بگبره حاقدين عليه.
وعفراء تعاينله مبتسمه ومفتخره
عــفراء:: حقهم چا ابونه شويه؟
دار وجهه عليَّ توني ماسحه دموعي ومبتسمه حتى ما يعرفني جنت ابجي هز ايده وطب للبيت غسلت وجهي اضــحك فرحانه برجعته.
""""""""""""""
مــاسه :: واكفه بباب الهول كاضه. علبة الجكليت بأيدي بطني ماغصتني وگلبي نار طولوا ببيت عمي شاكر يله اجه هوه وميثم بس فتحوا باي الحوش هلهلت ودموعي تجري طشيت الجكليت عليه وهوه وميثم يضحكون وعيونهم تلمع
وكف كدامي بريا وانه تمنيته اخوي واگدر اشبگه
-الحمدلله على سلامتك
حط ايده فوك رأسي وباسها
بريا:: بعد روحـــي خويه الله يسلمج
مــيثم:: داكه الجوع ترى راد يروح الرنه تغديه بس وكفله طــروادة هناااه.
أشر على بلاعيمه يضحك.
ضحكت طبينه للبيت مــيثم يگله
-خل اسبحنك.
بريا:: لا والله انا اسبح وحدي.
مــيثم:: ياهو الچان يسبحك.
بريا:: جذااب جنت تكض عليَّ صونده وتوكفلي بباب الحمام.
ضحكوا اخذله هدوم وطب للحمام اجاني مــيثم فرحان شبگني يضم وجهه برگبتي ضحكت مميلاه راسي على صفحة
-ميثمي
-يا روح ميثمج.
وخرت من حضنه مبتسمه باسني بخدودي وطبينه للمطبخ سوه نصب الغده وهوه يسولفلي
مــيثم:: مصوب بأطراف آمرلي ومساعدينه مصدوم بيهم هسه هوه يگول وين ما اطيح يصير بوجهي زلمه سبع يطلعني من الموت.
-الله يحميهم ويخلصهم من هالمصيبة هاي.
طلع بريا من الحمام وكعدنه بالهول نتغده اول ما. مصه الغده أجوه الولد إخواني وسليم، سلمت عليهم مــيثم راضي وصيهد يخزرني اطيتهم چاي وضليت كاعده بياب المطبخ يسولفلهم شلون تصوب وششاف من مصايب وخلاهم واحد يعاين بوجهه الثاني من گالهم
-بس يطيب صوابي ارد.
صــيهد:: اروحن وياك.
وهـــب:: جا انا رجلي على رجلكم.
ســليم:: والله ما تمشون خطوة بدوني.
وميثم صافن عليهم شويه وگالهم
مــيثم:: روحوا أستشهدوا انتم ترتاحون واليضل وراكم يتعذب، انتَ صــيهد من تروح هاي مرتك ياهو يرحمها جدي گبل لا تعدي اربعينك يزوجها.
فتح عينه خازره بغضب دار الوهب
مــيثم:: ومرتك وابنها؟ ياهو الهم انتَ يمهم والوادم تريد تاكلهم.
هز راسه وهـــب مقتنع بحجي مــيثم ســليم ضحك گاله
-انا ماعدي شي زلمه ما وراي شي واحبن العرك والسلاح شعدي ضال.
مــيثم:: روح روح وخل سلطان بظيمه واصل الموت ومحد بحاله.
صــيهد ما راضي بحجي مــيثم وضلوا شويه يتناقشون وصوتهم يعلى لمن بريا تمدد على القنفة يله راحوا، كام الغرفته ينام، وميثم ضل يمي شويه وراح للگيعان.
""""""""""""""
رنـــه :: كلساع أطّلع للحوش اعاين للشمس بعدها عاليه ليمت تصير غروب، رشيت الحوش وعفراء تلم بغراضها تريد تروح الاهلها حتى غاد يضل منذر ياخذها للسوك،كل ما تطلع تعاينلي مضيكه عيونه اخر مره طلعت كالت
-الظاهر طيورج اليوم ما ناويه تلفي.
-هاه؟
-الطيور الطيور اكولن هديهن طيريهن.
-اي هسه بس اكضي الحوش.
اخذت الهدوم من الحبل وطبت للبيت طفل الماطور لميت الصونده ورحت القفص الطيور فتحته الهن طارن ركضت لبيبان الحوش اثنينهن قفلتهن من حوه بالسرگي، ورديت يم السياج صعدت على الدرام اعاين لبيت عمي خليل، غلطت بگلبي ضايجه منه نزلت كعدت يم الحديقة واعاين للطيور نزلت على السطح كمت ذبيتلهن اكل بالگاع نزلن ياكلن يمي
درت وجهي فازه على صوته يهمس
-رنـــه.
ركضت بساع صعدت على الدرام جلبت بالسياج ورفعت روحـــي مديت راسي اشوفنه واكف وشايل راسه يعاينلي مبتسم وانه گـــلبي يدكّ حييل اعاين لوجهه ساكته ضحك
بريا:: حاجيني كليلي الحمدلله على السلامة
ضحكت امسح وجهي ايدي ترجف
-الحمدلله على السلامة
-الله يسلمج، شلونج؟
-زينه
عاينت الايده ورديت عاينت لوجهه وهوه مركز بعيوني مبتسم زفر نفس بحسره
بريا:: لو ما الحرام اشبگج الحد ما اسمع طكه ضلوعج بين ايديي.
راحت ابتسامتي وفتحت عيني خازرته گـــلبي يدك ووجهي احس صخن
-لا تخليني اغلط أحترم نفسك.
درت امسح وجهي حسيت جسمي يرجف
بريا:: يله ما احجي عاينيلي.
درت عليه اعاين بطرف عيني وهوه يضحك
بريا:: زعلتي؟
هزيت راسي اي ودرت على صوت زهره طلعت للحوش تركض طارن الحمامات فوگنه صوت خفگة جناحهن من يطيرن سوه مثل المسيقى احسها، عاينتلي زهره مصدومة حاطه اديها على حلكها وتضحك عرفت حاي احجي وياه سوتلي بأيدها انه رايحه ورديت للبيت تركض
درت وجهي البريا وفزيت من لكيته صاعد على بلوكه ووجهه قريب من وجهي يعاينلي وزفر نفس متحسر
بريا::رنـــه
سكتت اعاين لعيونه لونهن اللي يتغير وبشرته الصايره سمره الحد ياخة قميصه عاينت لرگبته شفت الخيط الاسود مال الحرز اللي انطيته اله ابتسمت وحجيت بساع
-لابسه؟
ابتسم مثلي هز راسه ايد ومد ايده فتح دكمه من قميصه وانه عيني وي ايده وخر القميص على جهه يراويني الحرز، عاينت للون رگبته الاسمر والبشرتة اللي جوه القميص لونها يختلف شلت راسي اله مضيك عيونه ويعاينلي مبتسم
-تگدر تطلع الحرز وتراويني مو اله تفتح دكم القميص شني؟
دار وجهه يضحك
-حقج هم صح.
-اي.
-والگلاده لابستها؟
-لا
راحت ابتسامته يعاينلي مقهور
-أسويلك لفة ؟
تحسر مسح وجهه وحجه بجدية
-رنـــه اريدن احاچيج انا تعبـــت كل ما اشوفج اتعارك وياج واضم الحجي الالج بگلبي.
-شكو؟
درت وجهي اعاين لبيتنا ورديت عاينت لبريا اسأل وانه ادري شنو البيه وشنو اللي يريد يحجيه خايفه اسمع وخايفه اروحن شعور بداخلي عاجبني اسمع حچاياته ومن جهه لا رافضه كلشي، وهو يعاينلي محتار حط ايده على بلوكات السياج بصف ايدي عاينلهن ورد رفع راسه يعاين لعيوني جر نفس بحسره
بريا:: احبنج رنـــه.
-انچب بريا.
حجيتها بساع فتح عينه حيل وانه مرتبكه درت وجهي منه اعاين للبيت ولبسبان الحوش جسمي يرجف وگلبي يدكّ بأذني.
بريا:: ليش تصيرين ادبسز وتغلطين؟
-اسكت يله اسكت روح نام انتَ نعسان روح روح.
طفرت من الدرام للگاع نلوت رجلي ورديت كمت بساع اعاين الايدي يرجفن وهوه بصف السياج يحجي بحرگه
-خرب روحج.
نكثت ايدي وطبيت للبيت عفراء تسفط بالنضده عفتها رمشيت للغرفه جريتلي مخده رجرجف تمددت متغطيه وگلبي بعده يددك بقوة غمضت عيوني اتذكر حجايته وغميت كصتي
-امددداني اطيته مجال انه خايسه بعدني زعطوطه بدال ما ادرين بالي على مدرستي صايره ادور حبّ وزواج طاحظي طااحظي
واغم بكصتي غمه وره غمه متحلفه بروحي
بالليل عفراء اجه عليها منذر راحت وطرواده بعده زعلان من يحاجيني بدون ابتسامه وبس من ينجبر يحجي وياي وتلفوني ما رجعه
""""""""""""""
رغد:: دكيت باب الدوانية على ســليم ابجي وارجف اجاني يركض
-تعااال تعال شوفه
ركض للغرفه وانه وياه روحـــي رايحه اجت ريـــمه على صوتي ذبلانه وجوه عيونها سواد وكوه تحجي
ريـــمه:: شكو؟
وسليم كعد سلطان يطكه على وجهه يريديه يحاجيه ماكو وبكل ثانية تمر گـــلبي يموت. كعدت على اركبي
-يييمه يمممه حاجيني ســليم حااااجيني مات سلطاااان مات.
صرخت متسودنه وريمه طلعت من الغرفة تصرخ ملخت روحـــي اشوفه بأيد ســليم جثه يوديه مناه ويجيبه مناه وهوه منتهي طب عمي وسجاد يركضون وعلى صريخنه إجو آهلي صــيهد ووهب جروا سلطان من ايد ســليم وشالوه يركضون بيه وسليم طاح على اركبه يريذ يگوم يلحكهم ما يگدر بس يردد بصوت مخنوك
-بيه نفس بيه نفس.
طلعت اركض وراهم روحـــي مفرفحه ضاكت الدنيا بعيني احس حتى صوت صريخي ما اسمعنه بره باب الحوش طحت أرجف واصرخ وهمه فروا السيارة بساع وشخطوها
وريمه طلعت تركض وره السيارة مفرفحه وترجع عليَّ تهزني منّ اجتافي تصرخ
-ما ميييت رغد والله اخوي عددل.
-يممممه الحگيني يمممه گـــلبي ييييمه.
ســليم:: اششش اششش صوتجن طبن جوووه.
جر ريـــمه من ايدها وريمه مچلبه بيه صاح عليه طــروادة وهو يفر السيارة وسليم بساع دفعنه للبيت وراح لطرواده جريت ايدي من ريـــمه وطلعت من بيتهم أرجف واستند على السياج بس اريد اوصل لبيتنه والحضن امي
طلعتلي جــويريه تركض بس فتحة باب الحوش كعدت على حيلي ابجي بحضنهن
جــويريه::اسم الله الرحمن اسم الله رغد گولي يالله كومي.
-ووولج مات بين ايددي ولجج يمه الحگيني يييمه.
اريد بس رجليَّ يعينيي واوصل آلامي مجلبه بأديهن رجليَّ يرجفن بس وصلت الحضن امي ضميت روحـــي الها ابجي بخوف وحرگه هذا روحـــي هذا اللي اتشارك وياه النفس لو مات اموتن.
مسحت عيوني تصبرني
ايمان:: گولي يا الله رغده يمه وادعيله يبعد امج.
مااگدر اسكت ما اگدر اصبر اكثر وهنه يخابرن على صــيهد وعلى وهـــب شويه وصيهد رد على امي.
-بالمستشفى بس خل شويه يصحه واشوفن وين اخذه!
كمت من يم امي رديت لريمه لگيتها بالحوش هيه وهاجر يبجن حجيتلها وطبينه للبيت
عمي وميلاد يتحسبون عليَّ عبالك انه المرضته كابلت ريمه وهاجر نلوب كلساع اخابر وهـــب للعصر يله ردوا ركضت للحوش خايفه اعاينله نزلوه طــروادة يگل السليم
-خله يمي ســليم.
اخذوه ومشوا البيت عمي شامل ركضت اجيبن عبايتي تلاكت وياي ريـــمه
-هاه؟
-اخذوه البيت عمي شامل راح اروحن يمه.
درنه اثنينه على صوت ســليم وسجاد طبوا للبيت مفرفحين صاحت عليهم امهم ماراضيه يخلون سلطان غاد وسليم متسودن صيح بوجها
-اششش يمه اشش بس عوفينه راح يموووت وانتِ كل همج ما يضل ببيت شامل
وهي تسودنت جرت دشداشتها تدعي عليه وريمه تجر بأيدها تلطم متخبله
ريـــمه:: لااا تدعين لا تدعين.
صاح علينه سليم مشينه وراه صعدوا فوك الغرفة سلطان وكفت بباب الغرفة وهوه وسجاد طبوا ويعاينولها گالتله ريـــمه
-صاير شي جديد؟
هز راسه اي
ســليم:: سحر سلطان مو بجثة غيث بالبيت، انبشلي الغرفة كلهاا.
طبيت وي ريـــمه ندور وهوه يفور محترك گلبه خابر وهـــب اجاه وتگابلوا ثلاثتهم نلزوا غرفة الاخشاب طلعوها بره الحوش وامه وابوه يتعاركون وياه وهوه ما مهتم متسودن رش الغرفة نفط وميلاد تسودنت طلعت تصيح
-ولك بتلث ملايين تريد تحررركها.
ولا اهتم شعلها ووخر على صفحة گبت الغرفه كلها دار علينه واكفين بباب الحوش صاح
-جيبن هدومها.
ووي حجايته طلع طــروادة من بيتهم شاف النار وتسودن طك ســليم راشدي يصيح بوجهه
-شسووويت ليش تتصرف بكيفك مو حل النار مو حل تضر سلطان وعايلتك كلهااا!
وسليم يعاينله ساكت عيونه حمر ومتروسه دموع گاله بصوت مخنوك
ســليم:: اخوي راح يموت.
وطرواده متسودن بساع افتر داير ماداير النار يقرأ سور من القرآن بصوت عالي وضل يردد
طــروادة ::حسبنا الله ونعم الوكيل اللهم اجعل بيننا وبين شرهم سوراً من نور.
يفتر داير ماداير النار يردد بيهن ميلاد طبت للبيت تغلط محترك گلبها وانه وريمه وهاجر فاتحين باب الحوش على كيف نعاين عليهم
ســليم كعد بالگاع مهدود حيله صــيهد تعارك وي وهـــب شلون طاره ســليم وحركوا الغرفه، اجه يمهم طــروادة جر ســليم من ايده ويحاجيه بهدوء
طــروادة:: ما يصير سليم والله النار مو حل تضر سلطان وروحك وأهلك اعذرني لان طكيتك.
ســليم:: كلي شنهي الاسويه اعاين الاخوي وهوه جاي يموت؟
طــروادة:: دوروا البيت كله لازم اكو مچان ما منتبهين عليه هدوم غيث؟ غرفكم كل مچان دوروه.
دفعتنه ميلاد بساع ومدت راسها تصيح عليه
ميلاد:: مااالك غرض انتَ مالك غرض بس وخررر من دربهم واحنه بخيرر.
شال راسه طــروادة عاين علينه ماحاجاه عاين الريمه وگالها
طــروادة:: ريـــمه جيبي مرت سلطان وتعالن يريدجن.
دارت ميلاد على ريـــمه تطكها واحه ســليم يركض جر ريـــمه من أيدها متسودن
ســليم:: انتِ شنهي من بشررر عليمن تطكينها كاتله ابوووج؟ شبيييج يمه شبيييج
شهكت ريـــمه وشالت ايدها بساع تسد حلّك سليم خايفه يغلط وهوه يرجف مايشوف جراه ابوه يطكه راشدي وصيح بوجهه
شاكر:: يا خااايس عليمن تصيح
وميلاد فاتحة عيونها بغضب متحلفه بيه دار عمي علينه صاح
شاكر:: امشن غاد شوفن سلطان.
طبت هاجر تركض جابت عبينه واجت طلعنه وي ســليم لبيت عمي شامل طــروادة وصيهد واكفين بباب الحوش طبينه للهول رنـــه تلكتنه گالت
-بالدوانية سلطان.
مسحت عيوني ومشيت والبنات وراي فتحت باب الدوانية اعاينله ضال جلّد وعظم كعدت يمه دموعي تجري وهاجر وريمه مكابلاتني مديت ايدي على كصته اوخر شعره حرگ جفن عينه وفتحه بتعب
-سلطان.
عاينلي رمش بثگل وحرك راسه ملتفت لريمه وهاجر ايده على بطنها فتحها ترجف ويعاين بيني وبينهن تلاثتنا تلمسنه ايده وهوه دموعه جرت شبگته هاجر تبجي بخنك وهوه بس دموع تجري مسحت دنوعي ومديت ايدي على عيونه امسحهن احجي والغصة خانگتني
-سلطان يا روحـــي انه وهنه نقوه بيك لا تضعف والله هسه تصير زين الله مايعوفنه.
جرت ايده ريـــمه تبوسها ودموعها تجري كالتله بصوت مخنوك
-راح نخليك هناه ببيت عمي شامل وهسه تصير زين.
دكوا الباب الولد ورنه فتحت الباب الداخلي گالت
-تعالن راح يجيبون سيد يرقيه من جديد.
طلعنه من يمه جابوله سيد رقاه ومارضى على حرگت الغرفة ضليت يم بيت عمي شامل صــيهد گال خل ناخذهم للمشتمل مالهم بس طــروادة مارضى يريد سلطان يمه، وره العشا طلع من الدوانيه مدنك گال
-خويه رغد روحـــي عشيه.
وشال راسه عاين الريمه گالها
-تعاي شويه!
حجاها وطلع وريمه اجت وراي للمطبخ ساكته منهد ما ضلت تصرخ ووراها تمرضت ريـــمه هادئة مره كاعدين بالمطبخ ونشدتها گدام امها
-شلون صرتي ريـــمه خومابعدج تحلمين؟
عاينتلي امها خازرتني وريمه تعاين بأبتسامه تسأل
-ما فهمت شأحلم؟
-ما تتذكرين؟
هزت راسها لا وامها گالت
ميلاد:: ليش ما تسدين حلكج لا اردج لحضن ايمان.
ما اهتميت احجي وي ريـــمه
-ريـــمه حلمتي تصيحين...
ضحكت ريمه وماخلتني اكمل عصرت ايدي بدون ما امها تشوف گالت
-من افلام الرعب النشوفها دوم أتحلم.
سكتت مركزه وي عصرت أيدها الايدي وميلاد عاينتلي بشماته، كل ما أذكر الموقف يقهرني ومن ذاك اليوم ريـــمه ابد مو بخير ما تمر ساعة اذا مالكيتها تبجي، فززتنا رنـــه من گالتلها
رنـــه:: طــروادة يريدج!
ريـــمه :: دنكت ساكته وجسمي يرجف خايفه منه لأول مره، مشيت اريد اطلع للحوش گالت رنـــه.
-هذا بغرفته.
اعاينلها ساكته وهي نظراتها تسألني شبيج دنكت ومشيت الغرفته فتحت الباب على كيف واكف يم الكنتور التفت بس لمحني گال
-تعاي ريـــمه .
طبيت وعفت الباب مفتوح مدلي بطل ماي تره يريد يحجي وسكت مركز بوجهي دنكت
-شبيج؟ شبيه وجهج؟
شلت ايديي اعدل حجابي
-ما مابيه شي.
زفر نفس متحسر ومدلي البطل اخذته من ايده گال
-رشي غرفة سلطان وشغلي بيها اية الكرسي ريـــمه دوري بكل مچان لازم تلكين شي يخص غيث.
هزيت راسي خوش مد ايده على حنجي يرفع راسي عاينت لعيونه حجه بصوت ناصي
-شبيج ذبلانه؟
سكتت صافنه بعيونه وخر ايده مبتعد يعاين للباب درت زهره تمد راسها تعاين وتشرد مسحت وجهي وطلعت صحت الهاجر طلع هوه گدامنه سليم والولد بالباب مشيت وياهم البيتنا صعدت الغرفة سلطان رشيتها بالماي وشغلت بيها قرآن بتلفون ســليم وهوه واكف بالباب يعاينلي بس كضيت جرني من ايدي الحضنه باس راسي
ســليم:: اعذريني ريـــمه، اعذريني يا احن گلب بينه.
جريت ايده من راسي ابوسنها
-لا تحجي هيج عاذرتك، بس عاين سليم ضل هناه انا راح ادور بلكن الكه شي وگبل لا تنام وديني غاد يم سلطان ورغد ترضى؟
هز راسه اي
ســليم:: هوه حتى انا راح اباتن يمهم.
ضل يمي وانه ادور هدوم غيث دورتهن وهدومها وعزلتهن على صفحة نذبهن بالشط شويه ودك تلفون ســليم رد هادئ وراها گب يغلط ويسب سد التلفون وعاينلي
ســليم :: الاء ماتت
-الله لا يرحمها
-شانقه روحها جهنم وبأس المصير من شر اعمالها ومن سحورتها تحجي وي شياطينها.
رد دك تلفونه آهل الاء يهددون بينه ويصيحون انتم السبب بموتها، عافني وطلع اجت يمي هاجر مرتبكه
-ها هجوره.
أشرتلي بمعنى خنجر
-خنجرنه المعلك؟
هزت راسها لا وتشرح
-خنجر ابوي الثاني؟ الذبحت بيه غيث؟
هزت راسها اي
-شبيه
تأشر وتشرح مافهمتها ركضت جابت ورقه وقلم تكتبلي انطتني الورقة كاتبه
"جنت كاضته حتى احفظ نقشه وارسمه من فتحته ورجعت سديته اكو شي ببطن الگراب ماكدرت اشوفنه حسيت بيه من ردت أسد الخنجر.
فتحت عيني مصدومة جريتها من أيدها ونزلت بساع ابوي ومرتضى وجدي وعمي وليد بالدوانيه دكيت الباب وفتحته عاينولي كلهم محترك گلبهم يحجون على اخل الاء ومن شافوني خازريني حجيت مرتبكه
-يابه وين خنجرك؟
مرتضى:: امشييي منااااه.
-يابه سحر سلطان بالخنجر.
كام مرتضى يريد يطكني صاح عليه ابوي وكام. بساع اجه وياي الغرفة امي وهيه تعاينلي بخزو جر الخنجر مداه الي فتحته من الگراب ارجف وهوه يعاين علينه درت على فتحة باب الغرفه وبس شفته ســليم حجيت بساع
-ســليم اكو شي بالگراب.
عگد حاجبه مافاهم مشيت يمه اخذ الخنجر من أيدي فتحه رد الخنجر الابوي وشعل الضوه يعاين ببطن الگراب اعاين الايده كزبر جلده ودار يتلفت
-اطيني اي شي ناعم عود، سيمه.
ريـــمه:: لا تفتحه خاف هم ما يصير روح الطرواده.
شاكر:: افتحه افتحه شنهي المايصير هذا يضحك عليكم.
هز راسه ســليم لا وعاين الأبوي
ســليم:: مايضحك علينه خايف على سلطان.
دار وجهه يريد يروح ركضت وراه
-خل اجي ويام سليم.
-لاا.
-حباب
دار عليَّ مقهور
-يله بساااع.
ركضت جبت عبايتي واجيته وهاجر ويانه مشينه البيت عمي شامل الولد كلهم بالدوانيه راحلهم سليم وانه طبيت يم البنات رغد ورنه كتلهن
- اظن لگينه السحر،
رغد:: ووين؟
-بگراب الخنجر، هسّه ســليم جابه يم الولد
رنـــه:: عاينن انه هيج احداث ما افوتها رايحه اعاين من الشباج.
حجتها وطلعت تركض للحوش وانه ورغد وحده تعاين بوجهه الثانية طلعنه وراها هاسكي مربوط نبح علينه صاحت عليه هيه سكتته مشينه يمها فتحه صغيره مرفوعه البرده من يم المكيف ونشوف منها كوه وحده فوگ الثانية صايرات.
الولد ملتمين بنص الدوانية هذا اللي يضوي بتلفونه وطرواده كاضله سيمه ناعمه مطببها بيطن الگراب يردون بس يگدرون يطلعون من داخله وكلساع واحد ياخذه من الثاني رد طــروادة اخذه منهم صــيهد يضويله وهوه بالسيمه شوي شوي وجر خيط من داخل الگراب اعاينله شفايفه تتحرك يقرأ واصابعه توصخن منّ الخيط جراه هواي الحد ماطاح من الخنجر شعر وورقه ملفوفات بخيط والخيط عليه دم يابس كزبر جسمي ايدي على گلبي وهمه يعاينون واحد بوجهه الثآني، بوسط الشعر ورقة وفوكهن خيط ملفوفات بيه هواي وعلى الخيط دم يابس دم غيوثي وشعره، كانوا الولد وبنص الليل اخذوا سلطان وراحوا للسيد الگالهم السحر مو بالجثة.
ضلينه كاعدات بالحوش هجوره نامت وديتها للغرفة يم زهره ورديت يم البنات اسأل رنـــه
-جا حسين وين؟
-نام بغرفة اهلي يكول زحمه من البنات
رغد:: فـــدوه للرجال.
ريـــمه:: كعدت بصف رغد سندت راسي على جتفها غفيت وفززتني من گالت
-اجوا ريـــمه.
كمنه بساع طبينه للهول ونعاينلهم ســليم وطرواده ساندين سلطان طببوا للدوانيه واحنه نلوب بالهول بس نريد واحد يطمنه دقايق وصيح طــروادة على سطل بين ما ركضت رنـــه تريد تجيبه مالحكت طلعوا سلطان للحمام روحـــي راحت وي روحه يتقيئ ونفسه ينگطع والولد حايرين بيه وخر طــروادة عاف ســليم وصيهد من شاف رغد اجت بخوف دموعها تجري، غسلوله وردوه للدوانيه واسنع صــيهد يحجي وي رغد يطمنها
صــيهد:: يصير زين بحيل الله
وهيه تبجي مسح دموعها وراح يمهم سلطان نام مــيثم وبريا راحوا وراهم بشويه صــيهد ووهب راحوا، اخواني تمدّدوا بالدوانية يم سلطان وطرواده هم حطله فراش يمهم ورنه فرشتلنه يمها
ماكدرنه ننام لا انه ولا رغد سلطان ساعة يصيح بوجع ساعة يتقيئ والولد حايرين بيه للاربعة الفجر يله رجعوا ناموا ورغد غفت، ضليت انه اتگلب ولا گدرت انام گمت فتحت باب الهول اريد اطلع اكعد بالحوش، وطرواده فتح باب الدوانيه الخارجي التفت لداخلها عاين للولد وطلع سد الباب وراه عاينلي وأشر ارجعي رجعت للهول عبالي ما يرضى اطلع بس هوه طب وراي مد ايدي يكض ايدي يمشي الغرفته.
دخلني وسد الباب اعاينله بخوف مد ايده على جف ايدي لم اصابعي بين اصابعه وجراني يم الشباج مده حمره مفروشة والبرده بيجي الغرفه بيها كنتور وزاوية ومراية مدگوگه بالحايط
-اكعدي!
ثنيت رجلي كعدت على المخده وهو كعد مقابيلي يعاين لوجهي دنكت اعصر بأصابعي وافكر بالحجي شلون ارتبه واحجيه مد ايده يرفع وجهي من حنجي عاين لعيونه هز راسه يسأل
-شبيج؟
-شبيه؟
احجي صوتي يرجف وعيني بعينه تحسر وشال أيده الشعره مشه اصابعه بين خصل شعره ونزلها يسأل
-ذبلانه شني يطكونج؟ احد محاچيج علمود السالفة الصارت مال شعلان؟
هزيت راسي لا مد أيده بظهرها تحسس خدي
طــروادة:: چا شبيج ضايجه من الخطبه؟
هزيت راسي اي وهو ماينزل عينه من عيوني فاتحهن على كيف ومن يرمش احس ما يسد جفنه للأخير ولو غمض احس رموشه الطوال رمش يحضن رمش ومن يفتح عينه ينفك تشابك رموشه.
يصفن بوجهي ساكت وتفاحة ادم تصعد وتنزل مد ايده يمسح رگبته عبالك شخص محتر رغم الغرفة بارده المكيف عالي دنك ورد عاينلي يحجي بهدوء
-ليش؟ بعدج عبالج خاطبج حتى اعذبج لو عناد بأبوج؟
-اممم.
ابتسم وي ابتسامته طفت الكهرباء وهو گاعد مد ايده لم البره وفتح الشباج صار بالغرفة ضوه خفيف توه يصير الفجر وتوها الطيور تصحى وتملي الصبح بصوتها، حط عكس ايده على حافة الشباج وسند راسه على جف ايده يعاينلي بنظرة غريبه گـــلبي يرجفلها گال بصوت ذبلان
طــروادة::ريمتي انتِ.
صوت نفسي احسه مسموع وصوت دگة گـــلبي بأذني
تحسر يحجي وعينه بعيني گوه مفتح عيونه مميل راسه على ايده وانه سانده راسي على الحايط گال
-انا رايدج مالي غرض بأبوج.
هزيت راسي لا ارجف وعيوني متروسه دموع دنكت انسح ومهي واحجي بصوت يرجف
-كهلان.
-هاه عيوني.
-عاين والله تتندم انه مو زينه عوفني طلكني اخذ بنيه فقيرة وحبابه وما تضركم ولا ضارتكم گبل انه كلي شر.
ابتسم يعاين لعيوني مد ايده لوجهي
-اريدنج انتِ وشرج، وانتِ هم ترديني.
-لاا.
-جذابه.
دنگت ارجف شجاي يسوي بيه وين يريد يوصل يبهذلني ويعذبني فوگ عذابي اضعاف جرّ ايدي بأيده
يعصر اصابعي بين اصابعه ويحركن على ايدي، نزل ايده الجان مستند عليها سند ظهره على باب الشباج المفتوح وغمض عينه عاف آيدي.
عاينت لملامح وجّهه بتركيز هوه خفيف يدخلنه من الشباج ويحرك خصل شعره بهدوء،بشرته سمره شامه جوزيه صغيره مغطيتها اللحيه، شاربه محدد وي شفايفه، شلت عيوني لعيونه من مغض رموشه طولهن يصير وأضح مديت أيّدي متردده وگلبي يدكّ بقوة بس وصلن اصابعي الخده تنهد وفتح عيونه الذبلانه يعاينلي
رفعت اصابعي من لحيته لرموشه تلمستهن وهو رمش مبتسم حجيت
-احس هاي مو اول مره اتلمس رموشك
-امم من جنتِ صغيره هم.
سكتت اعاين لرموشه اتلمسهم بأصبعي واحاول اتذكر احس عايشه هالشي بس ما اتذكره .
نزلت ايدي من رموشه للحيته الطرف شاربه كض ايدي وقربها لشفايفه بأسّ أصابعي دنكت ابلعم جسمي مقشعر واحس آذني صخنت
-ريـــمه
ضليت مدنكه ما اگدر اشيل عيني العينه وبس اريد يعوف ايدي
-ريـــمه احاجيج.
شلت عيني اله
-انا مقهور لان ماصار ملشي تردينه مثل آي بنيه عاد عيشي هالايام بدون خوف والله العظيم وروح ابوي ما ماخذج حتى اعذبج.
هزيت راسي لا
-تعوفني بعدين.
-شبيه مسودن اعوفنج؟
سكتت بحيره عيني بعينه وكفت ووكف وياي مشينه اثنينا للباب وهو وراي بعدني ما واصله باب الغرفه جراني بساع يسويلي
-اششش
وكفت وره الباب گـــلبي يدكّ حييل وهوه فتح الباب على كيف يعاين ودار عينه الي هزيت راسي شكو حط أيده على حلكي يتنصت فتحت عيني كلها من سمعت صوت ســليم ودك گـــلبي بخوف وراها صوت رغد تدور عليَّ
دفعني طــروادة لوره الباب حيل واجه بساع يمي مد ايده ساد حلكي انه روحـــي راحت من الخوف وهوه مبتسم، ثواني ورغد فتحت باي الغرفه كاضه اليده بأيدها وتعاين لداخل الغرفه من ماشافت لا فراش ولا شي بس البرده مفتوحه طلعت وسدت الباب وراها شلت راسي اعاينله گلبي راح يوكف وهوه مدنك يعاين لوجهي مبتسم وخر أيده من حلكي خازرته وهو عينه على شفتي.
حطيت ايدي بصدره ادفعه مايتحرك قرب روحه اكثر حجيت من بين اسناني ارجف مرتبكه
-كهلااان.
-اشش صوتج.
دفعته حيل يتقرب اكثر مبتسم بخباثة مد أيده حطاها على عيوني جريتها دنك يهمس باذني
-راح ابوسج.
رجف جسمي وگلبي يدك باذني ايدي الچانت تجر بأيده من عيوني رخت واحس بأيده الثانيه مداها على خصري وجراني الحضنه
حيل انفاسه بوجهي وصوت دگة گلبه اسمعه آحس شفايفه تقترب من شفاسفس وتبتعد مشه خده على خدي دفو بشرته ونغزات لحيته لوجهي، قرب شفايفه لشفايفي بيطئ بعدهن يطبع بوساته داير مداير شفايفي تنهد متحسر يهمس
- ريـــمه ريمتي .
وانه بأيده ذبلانه كل ثگلي بين أديه وعيوني مسدوده بأيده
ثواني نكتم بيهن نفسي وانه احس بشفايفه كل ما يتنفس ويحجي تلمس شفايفي زفر نفس ثگسل وقرب بهدوء وتردد يحتضن شفايفي بين شفايفه، متردد لا ارفضه وانه كل طاقة ماعندي روحـــي مسلوبه مديت ايدي الايده اتنفس بثگل ابتعد وجرني الصدره حاضني حيل مغمضه عيني ذبلانه ما مصدكة الجاي اعيشه اذني تصفر وصوت نفسي عالي
وخرني من صدره ومد ايده الوجهي يرفعه
-فتحي عينج ريـــمه.
وخرت ايده مدنكه ما اريدن اشوفه وجع لمني على صدره يبوس راسي ويحجي بهمس
-اذا يلگفنه ســليم يصير علينه شعلان.
فتحت عيني بساع وخرت منه وعاينت لوجهه خايفه
-يموتني.
-شحده
-اريد اريد اطلع.
مد ايده يمسح شفايفي
-ترحين لبيتكم؟ تطلعين من الشباج ساعة وتعاي هناه لان وجهج صار احمر وهذا ساقط يعارف كلشي گبل يلگفها!
-يممه يموتني
فتح عينه كلها ومد ايده الايدي جرني للباب يريد يطلع
-تعاي نطلع گدامه على شنو يموتج غير مرتي.
جريته وشلت ايدي اسد بحلكه
-اشش اششش صوتك
مشيت للشباك طلعت من عده بدون عبايه گال
-ضلي هناه خل اطلع اشوفنه وين واجيب عبايتج
هزيت راسي اي وكفت بصف الحايط خايفه وايدي على شفايفي مدري شيصير بحالي من اتذكر دفو شفايفه.
دقايق وفززني
-ريـــمه.
شلت راسي اعاينله يبتسم بشر عبايتي بأيده اخذتها منّه لبستها أشر براسه تعاي مشيت وره طلعنه من باي الحوش الثاني هوه راح للگيعان وانه رحت لبيتنا اركض
بس طبيت للحوش غسلت وجهي گـــلبي يدكّ بقوة صعدت للغرفة وجريت المواية أعاين لوجهي خدي مطكع
وشفايفي احسهن منفوخات
عفّت المراية افكر بيه وردت نفس الخوف الگلبي ضميت روحـــي بفراشي ابجي انه يا ظيم گـــلبي يحمل بعد.
ساعتين عدن ومشيت لبيت عمي گبل لا أمي تكعد سلطان متخربط واخذوه للمستشفى، ومن رد جابوه يمنه للبيت شوي شوي ويوم عن يوم نحس بيه يصير احسن ينتيه مرات يحاجينه بس من ياكل يتقيئ اخذه سليم چم مره للدكتور گاله لازم ياكل قليل وشوي شوي لبين ما جسمه يرجع يتقبل
""""""""""""""
جــويريه :: البنات من بدأ سلطان يتحسن بدن يتحصرن للعرس بس مــاسه ملتهيه تدرس ماضل شئً الأمتحاناتها واني حايره بمصيبتي اللي الحد هسه رافض اقدم وكل ما احاجيه يشيل حاجيه ويگلي
-مو عيب مرتي تفرفح بالكليات وانا متخلف.
عافني وراح للغرفة مشيت وراه كعد على الچرباية وكفت كدامه
-صــيهد اني المتخلفه.
شال راسه يباوعلي
صــيهد :: لا يابه انا المتخلف.
-لا اني متخلفه، صــيهد بداعت امك امك هاي مو عزيزه عدك؟
لم شفايفه راد يضم ضحكته وماگدر وكيفت من ضحك هاي هي ماعوفه اليوم الا يقبل يقدملي عاين لوجهي مضيك عيونه
-شتردين؟
-قدملي العالم كلها قدمت وإني بعدني.
-اقدملج حتى غاد ترحين تلكين فارس احلامج المثقف ابو الكتب.
دنكت اهز راسي لا وهو عصب
-آسفه اعتذر على كلشي كتبته ماتنعاد والله.
رفعت عيني اباوعله ضايج هز راسه خوش وحجه بهدوء
-باجر اقدملج.
ابتسمت بس هو ضايج تمدد بفراشه بعده زعلان بقيت واكفه بمكاني اباوعله
-بعدك زعلان؟
ماحاجاني
-صــيهد باوعلي انتَ هم غلطت وياي!
عاف تلفونه على صدره وشال راسه يباوعلي مضيك عيونه
-بيش غلطان وياج؟
-طردتني من فراشك المفروض هسه حتى ما احجي وياك.
ضحك حاط ايده وره راسه
صــيهد:: ليش انتِ اجيتيني محبه بيه؟ اجيتي تعذبيني وترحين وبلكن تقنعيني اقدملج كليه گولي جذب؟
دنكت ساكته مدري شلون يعرف تفكيري عفته ورحت لفراشي ما مرتاحه اباوعله مقهوره لان ضايج من عدي
-جوعان اسويلك اكل؟
ماحاجاني گمت على حيلي وكفت يمه
-مو احاجيك؟
باوعلي مبتسم ببرود
-هاه؟
-كافي زعل ترى مايصير.
كعد على حيله نزل رجليَّه من الجربايه ومد ايده يلزم ايدي كعدني بصفه مد ايده يتلمس خدي وباوع لعيوني
-اذا اكلج تعاي هسه تجين؟
نزلت ايده من وجهي مرتبكه ضحك مستهزئ
-روحـــي مني جــويريه لا اجرم بيج.
-انتَ ماجاي تفهمي
-كديش كدامج.
-لا بس هم افهمني شويه.
هز ايده
-لج صارلج أشهر معلعلتني وهسه تصيحين افهمني شويه شفهم اكثر من هيج.
-أنطيني صبر. -الله اكبر
صيح ودار وجهه يريذ ينام لزمته من ايده
-صــيهد خلي نتصالح بداعت امك العزيزه.
دار علي اعصاب يريد يحجي وصفن عله شاربه مبتسم بمكر حجه بهدوء
-خوش بشر. -شنو؟
عاين لعيوني مبتسم
-خل اشوفنج تركصين هجع.
صفنت بعيونه حركت راسي شويه شويه لا هز راسه خوش
-خوش حتى كليه ماكو وخري مني.
- لا اصبر الكليه معليها بعد انتَ قبلت.
-وخري ابد داومي بخيالج اجسبلجعدفتر جديد هلكده
خله ايد جوه وايد فوك يقيسلي حجم الدفتر بگد المخده وكمل حجيه
-وضلي يوميه اكتبي اليوم رحت للكليه لبست هيج وصادفت هيج بعد انتِ تعرفين شلون تكتبين.
-باوع والله استحي اني.
-ولج انا رجلج شني استحي؟
صيح متنرفز
-اي هو لان رجلي استحي منك
هز راسه خوش يريد يتمدد واني آجر بأيده. -اصورلك؟
-لااا گدامي وهسه تركصين لو انامن؟
-استحييييي. شبييج
صيحت بوجهه وضربته على ايده حيل فتح عينه كلها مصدوم بلعت ريك بخوف مصدومه من نفسي وكفت بسرعة اهز راسي
-اركص وين الخناجر ؟
-هاي طكيتيني وصيحتي؟
-اااني؟ لا وين الخناجر عندك خناجر؟
احجي وامشي للكنتور ادور اريد انسيه السالفة گام وراي فتح كنتوره عده هواي خناجر طلع اثنين مدهن الي
-البسي الاحمر اللبسته ذاك اليوم حتى تحرگين گـــلبي.
عاينت لوجهه واحس وجهي مصخن، اخذته وطلعت للحمام لطمت على خدودي اغلط على روحـــي لبسته وطلعت مغطيه زنودي بشعري وامشي على كيف حتى ما تنفتح الچاكه وتبين رجليَّ فتحت باب الغرفه كاعد على الچرباية يدخن باوعلي من فوگ ليجوه واشر على الميز
-هذن الخناجر.
مديت ايدي للميز ارجف جريتهن فتحتهن واباوعله أشر على التلفون يمي كتله
-جا مو ما تسمع اغاني؟
-مالج غرض بذنوبي حيري بذنوبج.
سكتت شغلت اغنيه ودرت عيني اله ما اگدر اركص من اشوف نظراته علي ميلت راسي على صفحة
-صــيهد والله من أشوفك كدامي كادع
-كاعد؟؟ -اي استحي.
وكف راح للكنتور مال جر شريط احمر من روب واكه يمي مد ايده شد الشريط على عيوني
-هسه ما تشوفيني تخيلي روحج وحدج انتِ شاطره بالخيال.
ابتعد من يمي تحركت گـــلبي يدك حيل ولا گدرت اتخيل روحـــي وحدي اركص واحس اشوف نظراته حتى واني عيوني مشدوده شويه وحسيت بيه وراي طفه الأغنية وجرني عليه يضم وجهه برگبتي باسني وجر الشريط من عيوني مبتسم مديت ايدي الصدري ارفع الروب اغطي جسمي وهو يباوعلي گال
- روحـــي بدلي البسي الترتاحين بيه ما راح اجبرج على شي انتِ من وحدج يجي يوم وتتقبلين.
حجاها وراح لفراشة بدلت ورجعت لفراشي افكر بيه وكل ما اتذكر ملمس شاربه على رگبتي ابتسم، ثاني يوم قدملي خيرني بين التربية وبين الإدارة والاقتصاد يكلي بكيفج بس اني اكول تربيه احسلج، قدمنه وننتظر القبولات،
اجت يمنه رغد بدأ الدم يرجع الوجها من سلطان بدأ يتحسن وجلب بيها صــيهد گالها بعد ماترحين خلي يصير زين وترحين لمشتملكم خاف عليها من ميلاد وهي تضحك ما مهتنه الشي المهم عدها سلطان بدأ يتحسن
ومن بقت يمنه نقذتني بشغل البيت لان مهدود حيلي كلها تحجي عليَّ يموتون من الجوع واني ما مكمله العشا يبقون يسبون بأمي ويحركون گـــلبي، وندى بدت شوي شوي تتحسن بس خايفه من سالفة الحمل ومل بالها يم هالموضوع.
كالتلها خاله
-الصار هلا بيه والماصار عدج رضا نعمه.
وندى تهز راسها ساكته عفتهن بالمطبخ ورحت للمشتمل انظف واظبخ گبل لا يجي، طبخت الغدا ومشيت للغرفة نظفتها سفطت ملابسي وردت ارتب ملابسه خانة وحده جانت مقفوله ومفتاحها ما موجود مشيت للجرارات ادور مالكيته رجعت للكنتور ادور بين اغراضه لكيت مفتاحين اخذتهن اثنينهن الاول ما فتح جريت الثاني صار فتحت الكنتور اباوع بين الملابسي مستغربة ليش قافله دنكت عيوني لارضيه الخانة وبمجرد عيوني لمحتها صيحت وفزيت مخروعة..
شكرا لزيارتكم عالم روايات سكيرهوم
