رواية من القاتل الفصل الرابع بقلم جمانه السعيدي
ام معتصم ....وصلت ايه للسادس هلمره التحدي صار حقيقي راح يبين مستواها
ذبحت نفسها ذبح على القرايه
ليل نهار مدنكه وتقرا تبقى يومين ما تسبح تكول اريد الحك اقرا
عبالك اني عندي الامتحان موعدها واكفه وكفه علمودها
اسويلها اكلات وعصاير
حتى اشجعها تقرا بليل ابقى سهرانه علمودها خاف اضوج وحدها
بهاي الفتره ابد ماشفنا عمار ولا اجانا
مااعرف عن اخباره اي شي ولا سئلت عنه حايره باايه
بس افكر بيها
البنيه ضعفت وصارت شحالها من كد القرايه
المهم عدت هاي الفتره بصعوبه علينا منا لمن خلصت امتحانات اني وكعت مريضه هلكد ما قلقه عليها
السكر والضغط كل يوم صاعدات
مرتين اخذتني للمستشفى يلكون السكر ٥٠٠ لو ٤٥٠
طبعا هاي بعد الامتحانات لان اني من تمتحن ايه
شكد مريضه بس مااحجي اخاف عليها
طلعت النتائج وكانت شي مفرح فعلا
ايه كانت الأولى على دفعتها
ومعدلها يدخلها طب عام
جمانه السعيدي
بيومها كمت ابجي مامصدكه بنتي راح اصير دكتوره وتعبي وياها ابد ماضاع
كمت ابجي بجي الفرح
اني وياها متكابلات ثنيبنه ونبجي الفرحه ما تنوصف ابد
شعور الفرح غير
اني حتى من نجح معتصم مافرحت هيج فرحه
اجن الحبايب يبارك بس من وره خشمهن
ماهان عليهن ايه تصير دكتور
لان ماعدنا بلعائله احد صار دكتور من قبل
كل الاولاد والبنات بلكوه يحصلون النجاح
اما عمار من سمع ايه ناحجه اجا يباركلنا بس ما مبين فرحان لان هو يحس هيج ضاعت منه للابد
ومستحيل اذا اتقدملها راح تقبل بي
المفاجئه جايبلها سوار ذهب حلو بسيط زنجيل وبي عين
كلش نازك
عمار..مبروك الف مبروك
ايه...الله يبارك بيك
عمار.. جبت هديه بس كون تعجبج
ايه.. هديه لا طبعا ماأخذ منك هديه انت شغلك على كدك
عمار...اني بعد جبتها بلكت اجازي خالتي ولو شي بسيط من تعبها وياي
ام معتصم...لا تكول هيج انت وليدي اني مااربد منك مقابل
عمار...اني جبت سوار بسيط
ام معتصم...انطاني العلبه فتحتها لكيت سوار حلو
ام معتصم... بستغراب هذا ذهب
عمار.. اي ذهب لو عندي جانت جبت شي احسن
ايه تستاهل الذهب
ايه...لا طبعا مااخذه شنو سوار ذهب وانت تشتغل عامل باجر يوميه
عمار... ازعل بعد ماادخل بيتكم
ام معتصم...ليش تكلف على نفسك خاله
عمار...ماكو اي تكلفه
ام معتصم ...شكر يارب يرزقك اكثر واكثر
شكد جان سعيد عمار لان ايه اخذت الهديه طاير من الفرح
بقا بيومها عدنا لليل اتعشى ونام عدنا
بس طبعا ايه ابد ماكعدت يمه كاعده بغرفتها
جمانه السعيدي
خلال سنتين ايه خلصت مرحله ثانيه كليه
ومعتصم وصل للمرحله الاخيره ويتخرج
بفترة العطله ايه كانت اجيب كتب وتكعد تدرس
تدخل على مواضيع بلنت
اما عمار اشترا سياره حديثه
كل يوم يجينا بلسياره يبقى شويه ويطلع
مرات نص ساعه مرات اقل مرات اكثر
ام معتصم...بلعافيه السياره
عمار...الله يبارك بيج انشاء الله اخذكم للزياره لو للشمال
تردون بكيغكم
ام معتصم...ما تقصر انشاء الله تشوف خيرها ويكفيك شرها
عمار...الف رحمه على والديك خاله
بيوم دخل علينا بيده صندوق حديد
ام معتصم . .شنو هذا
عمار....هذا بي شغلات تخص السياره مااكدر اخلي بلسياره
ممكن اخلي بلترك هنا ومن احتاج شي للسياره اجي اخذه
ام معتصم....اي عوفه تريد ادخله جوه الدرج
عمار.. لا هنا حتى يمتى مااجي اخذ منه غراض واطلع بدون ماازعجكم
الصندوق جان حديد لونه اخضر وبي قفل ومفتاح من برا
حجمه جبير
اكو بصف التواليت ترك ورا البيت
ترك زغير هو خله الصندوق بلترك وطلع
كل يوم اواتلاثه يجي يفتح الصندوق ياخذ منه شغلات ويروح
اني اخيط ملتهيه وايه تقرا
لا نطلع ورا ولا نشوف شنو ياخذ لو يدخل
اكيد شغلات تخص سيارته ليش ادقق ورا
استمر هذا الوضع اكثر من شهر نزل معتصم مجاز
وكعدو هو وياا وسولفو بعدين طلعو برا بلباب
ابد مافتح الصندوق كدام معتصم
معتصم...شنو هذا الصندوق
عمار...شغلات تخص السياره
معتصم...وليش مخليها هنا ايجوز يصير عندك عطل
بلطريق وتحتاجهن
عمار...الضروريات منهن شايلهن وياي
صندوق شكبره عليمن شايله وافتر بي
معتصم....حلوه سيارتك بلعافيه مبينه غاليه
عمار...يمعود مادام اكو قسط لا تخاف ماكو شي غالي
معتصم...انت غيرت شغلك
عمار...اي فتحت مشروع وحدي ملابس رجاليه
عود تعال اختار ملابس على حسابي
معتصم....كلما اشوفك اكول اني ليش تعبان وادرس
اروح اشتغل ويا عمار احسن
عمار...تعال مكانك محفوض
معتصم....بعد سنه واخلص بعد فات الوقت
لو امي تسمعني هيج احجي تموت
امي اهم شي عدها الدراسه
عمار...يمعود الناس الي عدها فلوس تشتري اي شهاده تعجبها
اني هسه اكدر اشتري اي شهاده اريدها
حتلو اريد وضيفه هم احصل
امك قديمه الناس والدنيا كلها تغيرت
معتصم....الله يزيد الخير عليك أكثر واكثر هم تشوف ابوك
عمار...الصدك لا هو لا يسئل عني واني مااسئل عنه
بس يشوفني نتعارك اني ويااا
معتصم..على شنو العرك ياستار
عمار...تعال جيب فلوس اصرف علينا بشرفك من جنت
زغير شمرني وماسئل عني لو ما امك جان ضعت
وهسه تعال اصرف علينا مايستاهل حتى اسمي ابوي
معتصم....الله يهديك
جمانه السعيدي
ام معتصم....خلصت اجازته معتصم ورجع للدوام
واني كنت محتاجه شغلات خياطه وكم حاجه من السوك
ام معتصم...ايه اني راح اطلع للسوك تجين وياي
ايه...لا شعندي رايحه روحي انتي
ام معتصم...هسه اروح وارجع بسرعه مادام بعد وكت
الدنيا حاره مراح تجي نسوان هسه ودوخج
ايه...روحي الله وياج
ام معتصم رحت للسوك اشتريت الشغلات الي محتاجتهن
بس اتاخرت لان هذا المحل الي اشتري منه مزدحم وهم علما اختاريت الموديلات الي محتاجتهن
ورجعت جبت مخضر ولحم
اجرت سياره ورجعت للبيت
الباب الخارجي كان مسدود دكيت دكيت محد فتحلي
طلعت المفتاح وفتحت الباب
دخلت للمطبخ
بس دخلت انصدمت يبست بمكاني
اباوع ايه واكعه بلكاع ولا حس ولانفس
دنكت حضنتها
يمه ايه يمه ايه احجي وياي يمه شبيج ايه احجي وياي
اكلبها ما تتحرك
خليت راسي على صدرها ما تننفس
عطت بصوت عالي وبعد مادري شنو الي صار
شكرا لزيارتكم عالم روايات سكيرهوم
