رواية كريات الدم السوداء الفصل الرابع بقلم زحل
_طلع عمي وهو يسحب الباب بيده طبكه حيل كعدت كبالها وانه احجي ماتقشمر بعد ولازم اعرف كل شي .
وداد:اني امج وهذا
ابوج وخلص.
_هذا الشي متاكده منه لاتغيرين الموضوع؟
يمه بعد لاتكولين انتي املي بالدنيا اذا ماتحجيلي خليني افهم ؟
وداد:اووو اشكد تلحين شبيج شنو ضامه .
_يممه انه مو طفله
خلص عمري وانه اترجى منج صدك شي افهمه
احس عايشه بدوامه ولغز اخر مرة اسألج شنو
سر العداوه البينج وبين فاطمه وعمي وليش احس عمي يعرف السبب وساكت عنج ودوم يكولها .
وداد:يريد يبين كدامج ترى
متحملني لخاطرج.
_واعرف هاي نبرتها مال واحد يتشرد
باوعت الها بمعنى احجي ؟
وداد:قشمروني وتعبوني وعاملوني بذل زغيرة وماعندي اهل وفاطمه سوتني وصلة مسح طلعت روحي وكل هذا بكوم ومن ردت اطلك ماقبلو اخذج هسه عرفتي .
_هم مو عذر مقنع؟
وداد:بالنسبه الج الامر عادي لهيج ماقنعتي
لان ماجربتي ولا عشتي الي عشته .
_وماحصلت الاجابه المقنعه لسؤالي ،مالحيت عليها بوجهي للفراش ثاني يوم ،صبحت مريضه طلعت لكيت عمي كاعد بالمطبخ صبحت عليه .
فاروق:صباح الخير ها شو جنج مريضه ؟
_اي بلاعيمي .
فاروق:اذا ماعندج امتحان لا داومين؟.
_تفوتني الدروس ومرات يسوون
امتحان يومي هم يفيدني .
فاروق:تردين اوصلج ؟
_لا بعد وقت دوامي ب١٢.
فاروق:خير ان شاء الله .
_طلع عمي جبرت نفسي اكل اخذت علاج وهيه كل شويه تجي تباوعلي وتروح ادري بالها يمي واعرف ماكو احن منها عليه بس مهما كان يبقون اهلي
للضهر بدلت وطلعت للدوام رجعت لكيتها
منتضرتني بالحديقه .
وداد:شلون صرتي ؟
_رديت بثكل الحمد الله .
وداد:تالي تتحسرين عله هاي الحظه
الجاي احجي وياج بيها .
_ماعرف ليش نغزني كلبي من كلامها
دنكت بحزن يمه ترى رديت عليج .
وداد:نعم الله.
_يمه يعني فوك السويتي انوب انتي زعلانه ،دارت مطيتني ظهرها ودخلت كم يوم وانه زعلانه عليها وهيه وفاطمة مثل المد والجزر مايصفن ابد
كتابي بيدي وكل شويه اباوعله واحجي بصوت خافت لا تسمعني، شتكول مضبطه الماده لو لا زين تتوقع انجح من الخامس و اكدر اعبر السادس وبمعدل.
وداد:اليتعب يلعب .
_رغم فززتني بس ضحكت بالها يمي
رديت عليها يابه لو يصير يختبرونا شهر
وبعدها نتاهل للكليه وينلغي نظام السنوات يعني جريمه لازم ٦ سنوات يله تحصل عله شهادة الطب .
وداد:هاي منين جبيتها اشوف لو تخلين
افكارج الجهنميه عل صفحه وتدرسين.
_ شنو هل ظلم بحق الطالب يخلص
عمرة هو يتنقل بين الصفوف والمراحل .
وداد:عود من توصلين لمركز يتيح الج
الصلاحيه للتغير قدمي مقتراحاتج .
_صار عندي اصرار اول مااكعد ابلش بوالدي ونوب اتهيى للدوام صح النقال ساعدني هواي انقطع تواصلي ويه صديقاتي القديمات لأن نقلت للاهليه وهم ماردت انحرج اذا بيوم حاولن يزورني يومنا مايخلى من شكوات فاطمة وعدم رضاها عن طارق .
فاطمه:حاطه كل املي بيك تلم كبرتنا
شوكت تنتبهه وتكول اهلي تعبو؟
طارق:اخليج بعيوني شعندي غيرج .
فاروق:هذا دلالج غير انتي الي تصيحين
خلي يتونس .
طارق:اوو الي يكعد يمكم يموت ناقص عمر.
_وكالعاده يعوفهم يحجون ويطلع.
فاطمه:اي خو ماگتله دمر نفسك .
فاروق:ماعندي حل ثاني اشمرة بالمصح
افضل مايموت بسبب السم الي ادمنه .
فاطمة:وشنو فايدة المصح
نوب يتمرض مثل ذيج المرة عوفه بلكي الله
اشوف بت حلال الي اطلعه من هل مصيبه متاكده
اذا صارو عنده جهال راح يلتهي ويستقر .
_فز عمي بعصبيه ماقابل .
فاروق:كل عقلج يعني شنو ذنبها بنات
الناس ينحسب عليها زواج وتتطلك كافي
ترى مصختيها ولا تفكرين بالموضوع .
فاطمة:شنو يعني يبقى هيج؟
فاروق:كتلج سدي موضوع الزواج
خلي يتعالج.
_كام عمي وهو يستغفر
شكد تعبو بسببه وخالين كل املهم بي
بس هو مامهتم كمت وانه ادعي الله يهدي ونفس الوكفه ونضرتها الي كل مااكبر افسرها شكل خوف حيرة اشتياق بس المن ماعرف لان ولا مرة كالت حنيت لاهلي واكيد حست بعمق تفكيري وهيه تنضرلي بتركيز .
وداد:هااا ست قدر وين وصلتي بصفنتج ؟
_اكيد ماوصلت للي اريده او بالاحرى للي
خافيته بقلبج ياامي ؟
وداد:محد بقلبي غيرج وكل همي وتفكيري
بيج امنيتي اشوفج اجمل واحلى دكتورة.
_اول حلم جنت اسعى لتحقيقه الطب واختصاص جراحه مخ واعصاب اغمض عيوني واتخيل نفسي بمؤتمر صحفي ومواقع التواصل مخبوصه بيه الدكتورة الي عالجت والدها .
وداد: قدر نمتي كومي لفراشج .
_فتحت عيوني بأنزعاج
لا جنت احلم .
وداد:وليس كل مانحلم به يتحقق خلي
احلامج بسيطه حته اذا ماتحققت ماتنقهرين.
_شنو هل الاحباط يعني المفروض
نتوقع عدم تحقيق مانحلم بي ؟
وداد:مو هيج بس خلي توقعج
اقل مما تحلمين .
_قربت الامتحانات وبده الخوف
رغم تشجيع امي .
وداد: لعد شلون تردين اطبقين
قانون التسريع بسنه تحصلين شهاده طبيه .
_ترى طبيعي كل الطلاب هيج .
وداد:شدي حيلج .
_طلعت بهمه بعدني ماساده الباب
سمعته يصيح التفتت مستغربه.
طارق:شبيج عبالك شارده ؟
_امتحان وخاف اتاخر.
طارق:صعدي اذبج بطريقي.
_كول اوصلج شنو هل ذله.
طارق:مو صوجج انه مابيه حظ
مخليج رايحه تكسي قدم .
_نزل نضارته عله عيونه وصعد بقيت
محتارة هسه شنو اصعد لو لا .
طارق:فضيها ترى اعوفج و اروح يا جدر
اذا كلت ٣ وانتي بعدج ماصاعده ادعمج .
_اكو واحد يدلعونه جدر .
طارق:دغسلي وجهج ونوب
ادلعي واحد ٢ ٣.
_ومدري منين اجتني عزت النفس درت وجهي ومشيت بخطوات بطيئه كلت هسه يلحكني ماحس اله البطناش حرك الشارع لا ياحقير لحد ماوصلت مدرستي،،دخلت جهنم بسبب غلطي عليه امتحنت ورجعت .
وداد:ها بشري ؟
_اذا حسب توقعي ١٠٠.
وداد:يله تغدي وناميلج ساعه حته تراجعين .
_اريد اكعد هنا شويه .
وداد:تمام بس لاتبقين للمغرب.
_جنت محتاجه راحه مو نوم احس مضغوطه تعبانه متراكمه اي ياقدر جربي حظج وطلبي منه بلكي يوافق مانمت بقيت انتضره بس سمعت صوت السيارة ركضت دخل مبتسم .
فاروق:ها جاوبتي ؟
_ايي جانت سهله .
فاروق:الحمد لله وين امج فاطمة شو هدوء ؟
_هههه صرت تستغرب اذا ماسمعتهن يتعاركن عمو ترى هنه اكثر الاوقات حبايب رفع راسه باوعلي بعدم قناعه ماكدرت اخفي ضحكتي .
فاروق:الي مصبرني عليهن انتي وطارق
والا اخذهن للجول وادفنهن واخلص .
_لا مااقبل .
فاروق:اكيد لان امج ؟
_حته فاطمة مااكرها وداعت ابوي
والحق هيه مامأذيتني ترى .
فاروق:كون يصيرن مثلج عاقلات .
_شكد احبه واحترمه واتمنه اتقرب منه
بس من يسولف وياي اخجل حاولت اتجرء
وحجيت بسرعه عمو اريد اطلب منك طلب .
فاروق:انتي تأمرين.
_اريد انزل للسوك محتاجه شغلات .
فاروق:اي خلي فاطمه تاخذج .
_ اريد امي تروح وياي .
فاروق:ماراح اردج بس هم فاطمة
تروح وياكم وطارق ينتضركم .
_دفعت الكرسي وكمت قبل مااطلع دكنت بسته شكرا يا احله عم هز راسه بمعنى اي مااستغرب ولا انتضر منه ردت فعل واقتنعت هذا طبعه ركضت لامي كعدتها يمااا يمه يوم امي ماما .
وداد:شكول عليج وكفتي كلبي شبيج ؟
_كومي كومي مفاجئه مفاجئه .
وداد:ماتت فاطمة لو فاروق انشل .
_حرام عليج كافي ترى اهلي مااقبل تحجين
عليهم ليش تتمنين ينشل منو النا اذا صار بي
شي ترى المفروض ندعيله .
وداد:لا تخافين مايصير بي شي هم
شفتي نذل مات .
_عفتها وطلعت لكيته واكف باب غرفتهم
اكيد سمعها بس شافني دخل انوب متت قهر يله شكول شلون اتعذر رجعت يم ابوي اشكي تصرفها بدموع ليش خلفتوني انته متعذر بالمرض وهيه عذرها انظلمت زين انه شنو ذنبي .
وداد:اوو اليسمعج يكول
دعوتي طيحته من الدرج مو هذاك هل
مطمور بغرفته تلكين فاطمة ترش عليه ملح .
_لاعشت مثل البنات بين اب وام ولا انه يتيمه حددتو صداقاتي من الطفوله تدرين احس نفسي منبوذه رغم طبعكم بس اكو تفرقه شمعنى عمام ابوي متقبلين طارق .
وداد:و شمحصل طارق؟
شو اخس من حالي شاب تحطم ابو حقير وام رب العالمين عاقبها بشر اعمالها والا غيرة الوحيد لاهله هسه كون مكمل كليه واله اسمه ومتزوج زواجه
تسوى ومخلف هم انظلم .
_يعني تحبي ؟
وداد:ماكرهه لان مااذاني .
_خوش لخاطرة حبي اهله لاتحبينهم بس
لاتسوين مشاكل .
وداد:ولج شمسويتلهم ؟
_لاتحجين عليهم لا دعين لا تخلقين
مشاكل لاتغثينهم انه تعبت لخاطري .
وداد:بعد ست قدر بشنو تامريني ؟
_مارديت عليها ,توجهت لابوي اباوع لشوكت اصبر
عمري خلصته امنيات وكلهن مرهونات بيك وانته طولت وانه محتاجة التمس منك امان صعدت للجربايه سحبت أطراف الغطه خليت راسي عله رجليه وتمددت .
وداد:سنين وانتي تشوفين اذيتهم الي
وتعاملهم الحقير مايوم اعترضتي لو زعلتي عله
عمج ومن احجي كلمه تنتفضين وتعاركيني لو ابوج صاحي جان تبريتي مني .
_مسحت دموعي تعاتبيني وانتي الي رفضتي
تدخلي بينكم كل ماتصير مشكله تكولين معليج لاتحجين انه وياهم وثاني يوم ترجعون اعتيادي.
وداد:لأن تعودنا وصار امر طبيعي.
_وانه تقبلت الأمر ساكته بتوجيه منج
بس من كبرت رغم ماتخليني احجي
جنت اوكف وياج وازعل لزعلج .
وداد:كثر الله خيرج والله مسويه فضل .
_يمه يعني شترديييين مدام انتي
تكرهينهم لازم انه وياج نكول فاطمه مو خوش انسانه عله كولتج نسوان حمى ماتتصافن
زين عمي شنو اذيته ؟
وداد:خلص سدي الموضوع واذا
عليه بعد متسمعين مني كلمه .
_درت وجهي عنها ..
وداد::نزلي لفراشج .
_مانايمه شويه واطلع برا اريد اراجع .
وداد:شنو ردتي من كعدتني؟
_ماكو شي .
وداد:وتكولين عني حقوده ترى اتشاقه
خلص لاتصيرين حقيرة كومي انه جوعانه
بس عاجبني نطلب من برا.
_هسه اطلبلج شنو تردين؟
وداد:ماريد ماريد .
_عافتني وطلعت شويه وتبعتها
كلهم كاعدين بالصاله طارق سماعته بذانه ومندمج عمي وفاطمة مشغولين بالمحاضرة مال الوائلي وهاي عادتهم ،كل كلمه يكولها الشيخ همه يهزون روسهم مأيدين كلامه ويترحمون عليه وصلت للمطبخ ماموجوده اكيد بمكانها المفضل ونفس الوكفه،،حست بوجودي بدون ماتلتفت تمشت للحديقه،،دنكت عل كرسي عدلته وكعدت مستنده بالميز البلاستك وهذا جان مكانه انه وطارق عمي
جاب النه الميز والكراسي من انتقلنا لهذا البيت كعدت كبالها وحجيت بعبرة يمه شفتي العداوه البينكم بعدتنا انه وطارق .
وداد:هو الي بعد ابنه
وماعترضت لأن كلامه صحيح كبرتو وخاف عليكم وهسه انتي عليمن ضايجه من زين صحبته الدايخ مثل جان يدرسج شو وين السالفه العوجه جايبها.
_رغم حزني ضحكت ؟
وداد:عجيب هل ولد من زغرة هيلك ونوب
مايرافك اله السرسريه هههه اول شي تعلمه
الوشم عود خلاه مدرسه اهليه خايف عله اخلاقه.
_هيه تحجي وانه أتحسس الاثر بيدي بيومها شبعنا كفخ من عمي وهو بس يضحك ومن هذا الموقف بعدونه ابد مايطونه مجال ننفرد .
وداد:احبه رغم تصرفاته زباله
بس كلبه نضيف.
_وعمي هم رغم قسوته بس حنين وفاطمة
لسانها طويل بس ماتحقد والدليل طارق ابنهم
يعني لأن همه طيبين هو طلع هيج ايي ترى
جينات وراثيه.
وداد: ابد ماماخذ من طبعهم .
_كبرنا سوى ومايوم بدر منه شي من الي اسمعه بالمدرسه البنات تتفاخر ابن عمي يحبني وذيج تكول ابن عمي خطبني.
وداد:دكومي شوكت تخلصين امتحانات.
_ترى اليوم ثاني امتحان.
وداد:تخلص كلشي بالدنيا اله وقت .
_شايله هم السادس.
وداد:الي مخلي براسه هدف
يوصله ماكو شي بالساهل.
_يمه ليش ماكملتي تعليمج؟
وداد:ماجان عندي هدف.
_التفتنا عله صوت عمي .
فاروق:قدر باجر عندج امتحان.؟
_اي عمو .
فاروق:شو كاعده دكين سوالف ؟
_كمت من شفته تقدم بتجاهنه
وامي تباوعله بتحدي وجهه كلامه الها .
فاروق:فرغي الغرفه مال امي الله يرحمها.
وداد:ليش ؟
فاروق:حته تدرس بيها لأن جاي تنشغل
وياج بالسوالف .
وداد: قصدي امك ليش الله يرحمها ؟
_غمضت عيوني بقهر مستحيل يعني
لو شما يسوي هيه ماتتغير بكل فرصه تحاول تغثه اشرلي بمعنى ادخلي بس ماتحركت خفت تستفزة ويفقد أعصابه.
فاروق:روحي بويه اريد احجي
ويه امج بموضوع.
_ابتعدت عنهم بس مادخلت اطاها ظهرة ويحجي بصوت ماينسمع وهيه ولا اهتزت كامت تاركته يفور ماعرف شنو كالتله وصلت يمي باوعتلها بعتب لزمتني من ايدي ولا عبالك صاير شي دخلنه للغرفه التفتت عليها يمه ماضن جدتي ماذيتج لدرجة تستكثرين عليها الرحمه .
وداد:لو مني جان مانزلت عليها غير العذاب
بس الرحمه من رب العالمين
واذا ماعندج شي طفي الضوى لان نعست .
_وثاني يوم كعدت لكيتها مسويه
حمله عله غرفة بيبي وفاطمة ماراضيه.
فاطمة:بله وين اودي غراض عمتي؟
وداد:بيعيهن لابو العتيك.
_عفتهن يتناكرن مثل الديوجه وطلعت للدوام
رجعت امشي بفكر شارد اباوع للبيوت وتخيل حياة الناس الي تسكنها تلكتني امي .
وداد:سويتلج الغرفه تخبل حته
الملابس سفطتها .
_ ياعمري امي ليش تعبتي نفسج تقدمت عليها
بعدت يمه ليش هيج تسوين يعني واحد شلون يشكر
الشخص الي قدمله خدمه غير لازم ايبوسه ..
وداد:اذا واحد قدملج خدمه كولي شكرا ..
_ وهاي الحاله الي ماعرف شنو سببها
دخلت قبلي وهيه تحجي ..
وداد:يرادلج ميز وكرسي عود خلي
فاروق يجيبلج واحد يله تتغدين.
_لا ماشتهي خلي انام ساعه.
وداد:ماشي بس مو تبقين للمغرب .
_تمددت ماعرف ليش الانسان من ينفرد يحس بخصوصيه بعد العشى كملت مراجعه ردت بس اغفه ماكدرت شلت غطاي وطلعت متوجهه لغرفة اهلي دفعت الباب شمرت المخده بالكاع وامي تباوعلي مستغربه .
وداد:ها شو رجعتي ؟
ماكدرت انام ماحبيت الغرفه كلش
ماجاي ارتاح بيها.
وداد:من جنتي زغيرة اذا طلعتج للصاله ماتنامين وتخلصيها بجي لحد مارجعج للغرفه تغيير المكان مو سهل لان تعودتي يمنه.
_ادنيت عليها وانه مبتسمه .
وداد:ترى نعسانه لا تحاولين مو
شبعتي نوم وجايه تسولفين.
_اكلج ماكدرت اغفه بعد منين
شبعت نوم .
وداد:خوش دنامي .
_بروح اهلج احجيلي يعني شكد جان عمري و ابوي تمرض اقصد هم جان يشيلني يطلعني لان انه من كبرت وصرت افهم لكيته بهاي الحاله .
وداد: جان مريض بس احسن من
هذا وضعه
يعني يكدر يشيلج .
_ زين منو سماني
انتي لو هو ؟
وداد:فاروق هو الي اختار الاسم .
_انتي وابوي ماجنتو مخلين اسم معين ؟
وداد:اي بس جدتتج وفاروق ماقبلو .
_شنو جنتي حابه تسميني؟
وداد:ندم .
_فتحت عيوني متعجبه شنو هل الاسم يعني
متندمه لان حملتي بيه لو عله زواجج من ابوي
درات وجهه كعدت عله حيلي جريت الغطه منها لا تحاولين ماعوفج اله تحجين يممه .
وداد:يووو خل انام نعسانه .
_اذا تحبيني لخاطري يمه ماما يوم امي
شمرت الغطه وكعدت خافيه ابتسامتها
ومسويه نفسها معصبه..
وداد:ماتنطين وجه ليش ماسولف
وياج من هاي ملحتج .
_ندم يا ام ندم هو قدر وكوى متحملته
من ورا طارق صفنت يعني يصيحلي ندامه
نديمه . انديمه
لااا همزين عمي ماقبل لازم ابوسه بكل
خد عشر بوسات دارت وجهه
ماقابله.
وداد: من حلاته .
_اكيد حلو ولا تغيرين الموضوع
ياريت انه اشبهه بس هو دوم يكول انتي
ماخذه اطباعي .
وداد:لا دخيلج كافي عليه حقارته
ديله عوفيني انام .
_ كملي شلون اقتنعتي بعدين .
وداد:من كال يطلع مركب ويه اسم ابوج وهو ينطق الاسم ((قدر ايوب)شفته حلو وفعلا راهم
قبلت ويله كومي اذا طارت النومه اشعل جدج .
_صدك انه ماذكر من جدي شي
كلش شكد احاول استرجع ذاكرتي .
وداد:جنتي كلش زغيرة من توفه .
_بس عمه رحمه الله يرحمها جانت شكد
حلوة صح اخاف منها بس هيه ولا مرة اذتني ..
وداد:موتها بسبب الوهواس ..
_همزين انه وياج مو مثلهن يعني استغفر الله
بس حته فاطمة احسها مريضه يارب يشافيهم .
وداد:قدر كومي من يمي اريد انام
كلش طفيت .
_ردت احجي اشرت بتحذير بمعنى اسكتي
غفيت وانه مبتسمه اتخيل لو اسمي ندم ويقلدون
عليه ههههههه .
وداد: قدر قو قو .
_رفعت الغطه متفاجئه يمه دخيلج
لا ادلعيني حته معدتي وجعتني .
وداد:هاا بس من يدلعج الشفيه قدوة
ماتنزعجين.
_كعدت وانه اضحك غيرتج منه ابد
مو معقوله صح هو هم يغار منج بس
مو هيج.
وداد:عله جماله واغار منه عوع ..
_التفتت عليها فاتحه عيوني يمممه
عمي عوع لا واحد يحجي الحق غير
يخبل وشخصيه .
وداد:دكومي شنو هل طاري الي
يعكر المزاج مثل مفاركينه حته
نسولف بي .
_ احس بروحي تعبانه وهم عاجبني
اكعد وياج احس ماشبعانه منج .
وداد: مو بدت سوالفج انه احسب شوكت
تخلصين هل مرحله حته بالعطله تختمين
فد ماده او ٢ حته تسيطرين عل سادس ولو
تكليله يدخلج يم مدرس افضل .
_نضرتلها برجاء امل تعوفني اغيب ..
وداد:كوووومي ..
_لميت شعري وكمت وانه احجي ،مافشل
نفسي لان اعرف رده مستحيل يقبل وليش اسبق الاحداث خلي انجح واستمتع بالعطله والله كريم .
وداد:مابقه اله القليل .
_بوست ابوي ،وقبل ما ابدي يومي لازم اكمل احتياجاته عدلت نومته بعد ماشبع اليوم نضرتك تختلف هيج ورب العالمين يحقق امنيتي وبيوم الكاك واكف عله حيلك زين حته لو بس اسمع صوتك.
وداد:نضل نتمنى لو نتريك .
_حضرت نفسي
لان الساعه تركض صاح وراي طارق.
طارق:جدر الله يخلي ابوج ماتسويلي
بيض عيون وانه اوصلج .
_ متاخرة وادري بيك ماعندك كلمه ..
طارق:سهله الزمج بالحله .
_طلعت اضحك والايام تشبهه بعضها بالمدرسه
اكعد يم البنات اسمع سوالفهن بس من يسالوني عن حياتي اتهرب وبقت غرفتي ادخلها بس ادرس وابدل ملابسي فاطمة يوم بعد يوم تسوء حالتها وصارت منطويه حته لاهلها متروح اباوع ياربي حكمتك
التفتت عله صوته .
فاروق::ها تصفنين قدوة اكو شي ؟
_لا عمو سلامتك .
فاروق:اذا صاير وياج شي ياريت ماتضمين
عني اعرف كل البنات بهذا العمر تمر بفترة
تفكر بزواج او .
_قاطعته رغم كلامه كان غريب
لا عمو انه حاليا مابالي غير اكمل دراستي واحقق حلمي اذا ماشوف ابوي متعافي ولو ٥٠ بالميه
مستحيل اعوفه وبعدين اصلا هو منو شايفني ؟
فاروق:ليش مو جاي اداومين هاي المسافه
كلها لابد ماتصدف شخص يعجب بيج.
_حيل خجلني اول مرة يفتح وياي هيج موضوع رديت وانه اكوم متهربه وناهيه الحديث لا اصلا ولا منتبهه ردت اطلع استوقفني كلامه .
_اتمنى اذا تفكرين لو احد ابدى اعجابه
بيج بالصدفه او عن طريق صديقه
بالمدرسه تحجيلي .
_هزيت راسي اي. وتوجهت لغرفة اهلي
شنو هل حديث المحرج لا ويريدني اصارحه خو
احجي لامي صفنت صدك انه ولا مخليه ابالي زواج اذكر من كنت اول اعدادي وبالصدفه مريه شايفتي
وحسب كلامها ضاله تتبعني وبيومها صارت كارثه
عمي طردها وامي تعاركت ويا هزيت ايدي طاردة حته التفكير دخلت وعيوني دورعها نفس مكانها التفت من حست بوجودي ..
وداد:يريد يحنطج لو يستنسخج ويسوي منج اشباه شكد حقير هو انه جايتني قسمه بيها حظ ومنتضرة موافقته.
_باوعت الها ورديت اتفحص الغرفه بنضراتي
شلون سمعت حديثنا لان ماحسيت بوجود
اي شخص بالصاله واحنه كاعدين مقابيل باب
المطبخ وين جنتي واكفه وتتسمعين .
وداد:طلعت ادورج وسمعته بقيت واكفه
ردت اشوف نهايه كلامه .
_مستحيل لو كلامج صح جان سمعتج من
فتحتي باب غرفتنا يمه وين جنتي واكفه ؟
وداد: شبيج عبالك طفله يعني عندي
الكامرة الخفيه كتلج سمعتكم وخلص .
_سكتت لان شفتها عصبت.،ونفس روتين كل يوم بين دراسه وابوي ،خلص دوامي وطلعت وتفاجئه بطارق واكف حجيت وانه افتح باب السيارة هاا اكيد
تريد تتعرف.
طارق:لا بالصدفه صار طريقي منا وشفت
البنات عرفت انتهى الدوام كلت انتضرج .
_شمرت الجنطه وصعدت رديت عليه
مادام الله هاديك فرني شويه .
طارق:مخبل لو كافر حته
الله يهديني ؟
_لا انته العقل كله عفيه منا اكو موطه
احبها بالراشي باوعلي عاكد حواجبه.
طارق:بالراشي شنو هل تلعوس؟
_طيبه تخبل هسه من تجيبلي انطيك وشوف طعمها صف السيارة ونزل اجه من شفت الازبري بيده قبل مايوصل اشرتله اريد اجه وهو يمص بالكصبه .
طارق :شلون ازبري يسلم عل كلب .
_انطاني العلبه ويحنص
بيه عليك الله جيبلي واحد .
طارق :مو راشي وتخبل؟
يله كسرتي خاطري .
_رجع جايب ثنين نفس عادته مستحيل يكتفي
بواحد من جنه زغار قريب مايخلص الي بايده
ياخذ الثاني قدمهن بمعنى الزمي وصعد اول
مابلشت بالازبري يااااي يخبل .
طارق::عود ليش بقه طيب؟شكد اطلع ويا جماعتي ونروح ارقى الامكان الي بيها مرطبات ولا استطعم
اذا ما اكل ازبري .
_لان بوقتها ماكنا ذايقين طعم الدنيا اكبر امنياتنا
ناكل ازبري نشتري حب شمس وكل شيء منعونه منه نحسه مختلف هسه هواي امور صرنا مانحس بطعمها صار همنا نتذوق طعم الراحه منطلقه اسولف وعيني للطريق التفتت عليه يباوعلي ومبتسم اشرت براسي شكو ؟
طارق:صايرة متكلمه بس قنعتيني
وجهه نضر وتفسير جيد .
_قطع حديثا صوت تلفونه باوع للشاشه
ورفضه رجع يدك بس فتح خط عرفته عمي .
طارق:وياي جاي ناكل موطه جايين
راح نوصل شسالفه.
_شمر تلفونه واخذ الازبري مني واحنه
نتسابق
كون نخلصهن قبل مانوصل الباب .
طارق:ياريت ارجع لذاك العمر .
_ ايي وتلكه عمي لازم الباب اول ماندخل
يتفحص لسانك ويرجع عليه واكيد الون يثبت
الجريمه تذكر من لعوست قميصك وعود ردت
تغطي خليت الجنطه عله صدرك هههههه.
طارق:تدرين ماجنت احب المدرسه بس اداوم حته اطلع من البيت واتعمد ارسب واعيد السنه كل ضني اذا نجحت وكملت بعد مااكدر اطلع شكد اذونا وحرمونا من ابسط الامور .
_مو بيدهم ترى من حرصه وخوفه بالاخص
عليك لاتلومه تدري خايفه عله امك هاي الفترة
كلش ماعاجبتني .
طارق:هيه الخيط الوحيد الرابطني
بهذا البيت
اذا صار بيها شي يحلم يشوفني .
_ وماحسينا بالوقت ولا منتبهين الازبري
خلص اشرتله بالعلبه ضحك .
طارق:هههههه دنزلي ام الراشي .
_نزلت وماتوقعت رد فعله
من جنت زغيرة اعتبرة خوف
عله صحتنا لو لان نعبر مسافه
بس اليوم ماله مبرر ولا كدرت اتغاضه مثل
قبل جان عصبي حيل اول مرة اشوفه هيج .
فاروق:ولك انته ماتخجل شوكت تنعدل ؟.
طارق:ترى كتلك رحنا نشتري
ازبري ازبري مو حشيش؟
فاروق:ومنو سمحلك تاخذها وياك؟
طارق: دوم اوصلها وارجعها شنو الي استجد ليش احس بكلامك شك ترى زين اذا حاسبها اختي وهم ياريت حلوه بس لخاطر عمي ايوب جبرت بخاطرها.
_يحجي ويضحك وهاي عادته ابد ماينطي
لعمي مجال يغثه ودوم ياخذ الامور بشقى.
_امشي من كداميييي لا بارك الله بيك.
_دخل طارق وهو يغمزلي بمعنى فلتت
اجه دورج التفت عليه دنكت .
فاروق :رايحه ادرسين لو تفترين وليش
مابلغتنيني انكم طالعين؟
_ماجنت اعرف راح يجي عليه
ترى صدفه .
فاروق:حته لو صدفففففه جان كلتي ؟
_انته تدري مااخذ نقالي وياي.
فاروق:وهذا عذر يعني ماعرفتي تكليله
اتصل لو ماعنده رصيد؟
_مارديت لان شفته حيل بالغ عله صوته
طلعت امي .
وداد:شكو شكوو؟
فاروق: لا تدخلين .
وداد:خير مادخل شنو ترى بنتي
وليش تصيح ؟
_التفت عليها ،وهو يرفع اصبعه بتهديد.
فاروق:كتلج لاتدخلين مثل تتحديني لو شو؟
وداد:ليش خايف ؟
فاروق:لان اعرف الي براسج .
وداد:: ههههههاي لو اريد ماتكدر
تمنعني .
فاروق:وهيج انه ضعيف بنضرج وانتي تتحكمين بعائلتي الكل هنا تحت طوعي ومن ضمنهم انتي .
وداد:زودتها واشوفك عايش الدور
فاروووووق لا تخليني .
فاروق:لا بله راح اخليج
ومالزمج اريد اشوف شتسوين؟
وداد:لاتستعجل يجي يوم
وتشوف شراح اسوي.
فاروق:وداد ابعدي عن وجهي حاليا لان
اذا فقدت اعصابي اخليج تتندمين .
_ماردت يتصادمون بسببي اصلا علاقتهم عل حافه حاولت اتعذر عمو ماكو داعي تقلق ترى طارق هاي الفترة ماخلاني اكمل..
فاروق:اول واخر مرة اذا تكررت اعتبري
نفسج حته من الدوام كاعده .
_رفعت راسي متفاجئه اشر فوتي جوى عفتهم ودخلت صارت فاطمة بوجهي ،وبدون ماتفهم الموضوع استلمتني .
فاطمة:شوكت يموت ايوب واخلص شصخمتي؟
_حيل انقهرت شمرت الموطه،عل سنك وبوجهي لابوي جريت الكرسي،وكعدت ودموعي تنزل
بهضم ليش،هيج رابطين وجودنا وطلعتنه بموتك يعني يرضيك الي جاي،يصير المن خلفتوني من وعيت للدنيا وانه اعاني ،من قوانين هل بيت الي ماينفهم يابه لو بس ،ترد عليه ابجي واشكيله متامله اكسر خاطرة،وتصير عنده ردت فعل رفعت راسي
وانصدم بدموعه ركضت للباب صحت عليهم ورجعت ابوس بيده دخلت امي بخوف وهيه تسال؟
وداد:اسم الله اسم شبيج .
_بعدني ماراده عليها دخلو عمي
وفاطمه.
فاروق:شكو شكو .
_ومن فرحتي ماعرف شلون احجيلهم شوفو دموعه جنت احجي ويا واشكيله .تفاجئ عمي دفعني
و تقرب عله ابوي مامصدك ،صاح بفاطمه .
فاروق: تلفوني وين خل اتصل بالدكتور
قدر ضلي احجي ويا لاتخلينه يرجع لحالته .
_طلع عمي وهو مخبوص و فرحان
بنفس الوقت وفاطمة تدعي .
فاطمة:قادر على كل شيء بلكي نفخ بي
العافيه وينزاح منا عدنا هل مرض .
_ايي اي ان شاء الله بس ادعي ادعي
طلعت فاطمة ورا عمي وانه لازمه ايد ابوي واحجي بهستريه ماعرف شكول بس ردت يبقه منتبهلي امي واكفه بحيرة ،اشرت الها عكدت حواجبها مامفتهمه
شي جريتها يمه اريد اقرب ايدها حته
وداد:اترجاج البيه كافيني؟
_ تصرفها نرفزني صرخت ،هو شنو الكافيج يممممه جاي اكلج اكو رد فعل .
وداد:شبيج ماما يعني شسويله ايجوز شي
واكع بعينه لو فد امر جديد بحالته
_قطع حديثنا عمي وهو يكول.
فاروق :سوو مجال للدكتور
قدر لبسي حجابج عمو .
_التفت عله امي خزرها بمعنى البسي شي جرت احرام الصلاه لبسته دخل طارق والدكتور ورا لحظات قلق وتوتر واضحه عله الكل من بعد ماجيكه وجهه كلامه لعمي ..
الدكتور:هو مؤشر ايجابي وردت فعل تعتبر عاطفيه وهذا دليل انو اكو امل يستجيب للعلاج افضل لو ننقل المريض للمستشفى يكون الفحص اكثر دقه ..
_ باوعت لطارق ،ابتسم وهو يهز راسه مطمني
عمي مااخذ وقت للرد بسرعه ايد الفكرة ..
فاروق:حالا دكتور بس ياريت تتصلي
بسيارة الاسعاف واكون ممنون اذا
مستشفى اهلي ..
_عفتهم يتناقشون فتحت الكنتور
حضرت جرجف ومناشف وشكو شي
يحتاجه خليتهن بجنطه طلع الدكتور
وعمي لحكه توجهت لغرفتي لبست
صايتي اندفع الباب دخلت امي .
وداد: ترى ماياتخذونج لاتعبين نفسج
فاروق خابر عله عمه ولده .
_رديت وانه اعدل بحجابي مو من حقهم يمنعوني .
وداد:لا تعاندين ترى الدكتور
كال يفحصه ويتاكد من وضعه ويطلع
مايبقه بالمستشفى ..
_ كتلج اروح والمفروض انتي
وياي بس مراح افرض عليج .
وداد:مايقبلون.
_طلعت لكيتهم ملتمين بالغرفه باوعلي حجي احمد هو ولده الي يصير اخو جدي ماعبرتهم
ولا اهتميت حجيت وانه ادنك عله ابوي
عمو خلي اغير ملابسه ..
فاروق:تمام وحضري ملابس
خاف هناك يحتاجها ..
_اكيد عمو حضرت كل شي واذا احتاجيت
شي عود منو الي موجود يجيبلي بعدني
مامكمله كلامي وصوت حجي احمد ارتفع ..
احمد:شو تحجين وكانو انتي
الي راح ترافقينه ؟
_ مااعتقد بيها غلط انه احق شخص يرافقه رفعت راسي باوعتله انتضر رده وتمنيت يحجون حته اردهم بس عمي نقذ الموقف وهو ياخذ حجي احمد عله جهه يحجي ويا ،طلع وطارق اشر للبقيه بمعنى اطلعو .
فاروق:يله استعجلي ترى الاسعاف بالطريق .
_مسحت وجه بكلنس رطب وخليتله عطر
دخلت امي كتلها راح اروح ويا دنكت تخفي
عيونها الي تلالي بالدمع تقربت منها امشي
وياي يمه محد يفرض علينا .
وداد: خاف اعم عليج وحته انتي
يمنعوج .
_ مو كيفهم ولا يكدرون.
وداد:لخاطرج لان اعرف راح اواجهه منهم كلام .
_هزيت راسي بمعنى اي وانه احلف مااسكت للي يتجاوز عليها كافي سنين وهمه يعامولها بقسوى وعبالك هيه الي مرضته ،خليت الجنطه بيدها وطلعت تفاجئو من شافوها وقبل ماينطق حرف تقدمت عليه عمو امي وانه الي نبقه بالمستشفى .
طارق:ايي افضل روحي انتي وامج بسيارتي همه
يجون ورانا خو مو كلكم تصعدون بالاسعاف .
_طلعت وانه لازمه ايدها تحت نضرات
حجي احمد ولده الي ماقابلين.
_بقينا بالانتضار لحد ماسوو دخوليه وفتحوله طبله دخلنا طارق للغرفه ،وراح يمهم وكل شوي دكتور داخل مجيك حالته بدو اهل ابو يجون رغم اهتمامهم بي بس نضراتهم النا انه وامي جانت دل عله عدم رضاهم بوجودنا كالو يبقه تحت اشراف الطبيب افضل عمي بلغ عمامه يرحون اجه يمنا .
فاروق:اشوف لو ترحن وانه وطارق نبقه .
_يحجي وكأنؤ ماصاير شي نسى موقفه
وكلامه رديت بدون ماباوع ناحيته
مااتحرك اله وابوي وياي ..
فاروق: تمام بس امج ترجع للبيت .
وداد:ماعوف بنتي .
_هز ايده ماقابل وطلع لليل اجه
طارق جايب عشه
طارق:يله جدر تعاي اكلي.
_ياريت تكول للممرضه تنطيني
بعد بطانيه لان بردت ..
طارق:هسه اوصيها تعشي
عمه لو تردين اطعلج للحديقه يم ابوي .
وداد:ليش منو كلك اريد شي
يسد شهيتي ،دكعد اكل ويانه .
طارق:ترى انه ابنه يعني نفس العداء
شوكت تصفون انتي ويا ترى مللتونا ..
_ضحكت امي تعشينا وهو ترخص امي تمددت
بقيت مكابله الاجهزة اباوع وتمنيت لو اعرف
اقرء مؤشراتها دخل عمي بيده البطانيه ..
فاروق:نامي انه راح ابقه كاعد
مابقه شي للصلاه .
_يمكن من قهري لو تعب لو اثر الصار حسيت
حرارتي ارتفعت تلفلفت بالبطانيه وعيني لعمي
الي يتامل ابوي غافيه بس احس بلي حواليه
اسمع اطراف كلام مافمفهوم من كثر ماتعبانه ماركز .
وداد:ترى ماكو داعي تبقه
لو رايده اخذها واروح لاتتصور انته تكدر توكف بوجهي ان تحسنت حالته او لا ماتكدر تجبرني .
فاروق:لوقتها هو يقرر ولا تنسين .
_ماخلته يكمل .
وداد:لو اعيش الف سنه ماراح
انسى ولا ابريك الذمه .
_كطعت حته النفس في سبيل افهم شي
من كلامهم واكيد عمي
حس بيه كاعده راد يثبتلي انو يعرف بيه جاي
اتسمع حسيت بي تقرب عليه غمضت خله ايده
عله جبيني وهو يحجي.
فاروق:حرارتها عاليه راح اشوف بلكي
واحد من الاطباء خفر .
وداد:جايبه وياي بندول هسه اشربها .
فاروق:تمام .
_بس طلع درت وجهي عليها وقبل
مااسالها حجت .
وداد:بدون حجي زايد ادري راح تكولين احجيلي سمعتي هذا سبب خلافي ويا لازمني بيج قدر انه مو مجبرة اتحمل حبستهم ونوب همه الي مانين علينا بدال مايكون ممتن لان خادمين اخو .
_يجوز فضل منج ماطلكتي ،بس انه خدمتي لابوي
واجب وفكرت بس نشوف شنو راح يكول الدكتور نستقل وحدنا اني وياج وابوي نطلع من بيت عمي ونعيش براحتنا فززتني من كامت وهيه تباوع للباب بخوف .
وداد:ديري بالج ياقدر تحجين كدام
عمج ترى يحرم عليج باب البيت اريدج
تضهرين لعمج انو مستحيل تفكرين بالبعد
عنه حته لو ابوج مات هيج بيني كدامه فهمتي .
_يجي يوم واعرف وقتها
ماراح اسامحج ؟
شكرا لزيارتكم عالم روايات سكيرهوم
