رواية قصة وجدان الفصل الخامس 5 بقلم انين الليل

نجاة

الكل باوعلي وحتى انا اتفاجات من طلع اسمي هو اشرلي وگفت وكلي وهو جاي يباوع الاوراق گدامه

- انتي الي راح ارسمج تجيبيلي موافقة ولي امرج

هزيت راسي

باوع للطالبات // اعمالكم الفنيه جدا مستواها عالي وحتى انتي نجاة اعمالج الفنيه جيدات

ما اعرف بوقتها شنو شعوري وشكد فرحت بكلامه اكتفييت هزيت راسي وانا اشوف الطالبات شلون ايباعلي

الي نظرتها استهزاء والي نظرتها حسد سالته شذى // يعني استاذ وين ترسمها ويمته ،

رفع راسه ولملم حلگه جاوبها // وين اكيد اهنا بالمختبر ويمته بدرس الفنيه

- - ها يعني بعد ما تجينه ؟

ليش ما اجيبكم اكيد راح اجي وناخذ درس

باوع للبنات // احنه راح نسوي معرض ونشترك بي كلنه والي اريده منكم اي وحده تحب اتشارك بعمل فني خلي

تجيبه واكيد الي تشارك راح ترفع درجتها ومو بس هالشكل راح انطيها درجه بحيث تساعد الطالبه الشاطره بالاعفاء

وهسه خلي نبلش نتعلم شلون ندمج الالوان

وصار يعلمنا وانا احس بي هو مرتبك وما اعرف شنو السبب من دك الجرس اشر عليه وكلي

• تجيبين موافقة ولي امرج وتنطيها للمعاونه ست ليلى

هزيت راسي وبيومها اجه ابوي وانا مسولفه الغنيه الي گالت // احجي وانا اقنعه

وفعلا بعد ما اتعشا وجبت الجاي حجيت // بابا راح يسوون معرض بمدرستنا

• ايي وشتردين ؟

• لا بابا ما اريد شي بس اجت المديره وباوعت للبنات وبعدين وكفت وكالت ماما نجاة راح نرسم صورتج ونعلكها بالمعرض

ابوي فز وفتح عيونه ع الاخر غنيه سوت نفسها ما تدري // عليج الله هيج كالتلج المديره

هزيت راسي // ايي

• شنو الموناليزا

• لا بس هيه المديره تكول انتي اعقل وارتب بنيه

امي // عفيه السباعيه

ابوي // شنو يرسمج ويعرضج هم عوزي

غنيه // بابا شنو يعرضوها هذا معرض مدرسي يعني بس المدارس والتربيه بعدين تدري اذا فاز المعرض راح يدللونها

ابوي // بس ما اسمع ولا كلمه ما كو رسم انتي رايحه تدرسين مو يرسمونج ويعرضون صورتج

غنيه // بابا ما بيها شي يرسموها بملابس المدرسه قابل مجرده

ابوي // لا يعني لا وما اريد كلمه زايده واذا تسقطيين السنه ابطلج وتگعدين بالبيت

بيومها حيل انقهرت وما نمت وثاني يوم داومت وانا اشعر بالاحباط وحزينه ما حجيت ويه الطالبات وحتى من سالتني

قسمه صديقتي ها جبتي الموافقه ما جاوبتها ورحت للحانوت اشتريت وانزويت ابحدي اكل وقررت اروح الاستاذ صلاح

واكله بممانعة ابوي قبل لا يدز عليه ويسالني

وكفت قريب من الاداره شفته طالع ويه استاذ الي يجينه بالفيزيا من شافني اجه يمشي باتجاهي

• جبتي الموافقه مو

هزيت راسي وباوعتله والدمعه بعيني

• ابوج ما وافق

هزيت راسي

صار گدامي وجهه بوجهي سالني //نجاة ترديني ارسمج

هزيت. راسي بالايجاب

• تمام هذا هو

•بس ابوي

- اششش اي طالبه تسالج گليلها انطيت الموافقه

- بس خاف يدري

• منين يدري

•يعني يجي يسال عليه

• ليش هو ابوج يجي يسال

هزيت راسي //لا ولا مره اجه

• حتى لو اجه ولو عرف انا احلها ما عليج روحي الصفج

ام احسان // بذاك الوقت مو جازفتي

هزت راسها //. بس الي صار هو حلم كل طالبه بالمدرسه يعني استاذ يختارج من بين كل البنات حتى يرسمج هذا فد شي

ام احسان // انا بتصوري انو الاستاذ يحبج

ابتسمت بخجل بدون ما تجاوب // وشنو صار

انا بالصف لمن اجت العامله وطلبتني بالاسم وكالت // ست ليلي. رايده نجاة عبد الحميد

باوعتلي المدرسه وهزت راسها يعني اطلعي رحت للمعاونه دگيت الباب ودخلت شفت استاذ صلاح ومدرس الفيزيا

گاعد ين وست ليلى تباوع بورقه باوعتلي وگالت //. ماشي تسمعين كلام الاستاذ وما تغيبين مفهوم

•نعم ست مفهوم

- اشو باالله استداري

استداريت بخجل //. ماشي بهاي صدريتج مرتبه روحي على صفج

من طلعت اتعمدت امشي على كييف ست ليلى // شنو ما لگييت اله هاي ترسمها

ابو الفيزيا // صحيح صلاح اكو هواي احلى منها

جاوبهم // اي لان نظرتكم للجمال سطحيه

ما افتهمت شنو قصده ورحت للصف وبيومها البنات ايسالني ابوج قبل جبتي ورقه وحتى اجن طالبات من غير شعبه

وغير مرحله

ام احسان //. ورسمج

• اي بدا بدرس الفنيه يجي ويوكف مراقبه بعد ان يطلب منهن ايرسمن موضوع وانا اروح ويا واكعد خمسه واربعين دقيقه

لازم ما اتحرك وصار يدز عليه من يكون عدنا درس فيزيا رغم مهم بس يجي ياخذني وهو يضحك

وهم اذا كان عدنا درس رياضه

بيومها احس انو انا انسانه مميزه رغم مرات حتى بالفرصه ما اطلع يعني ياخذ درسه والفرصه ودرس الفيزيا

تكدرين تكولين رهم الجدول

ام احسان // حبيتي نجاة ؟

رفعت راسها واشوف بعيونها دموع وهيه تگول // طيش الشباب

ام احسان // لا مستحييل لو طيش شباب ما حچيتيها

هزت راسها // مو انا الي حبيته هوه

• المغرور معقوله ؟

• اي معقوله واكثر اعترفلي

• شلون ؟

• يوو خوله شي راح وانتهى خلي انغير الموضوع اگوم اسويلج چاي

• كول شي ما اريد اگعدي سولفيلي

• يمعوده شسولف شي انتهى بوكته

• مي خالف نجاة دا نتسلى هسه قابل راح تتزوجينه (ابتسمت وسالتها الامي ) اذا اجاج هسه تقبلين نجوى

• ههههه شتكولين

• هسه هو اجه بس اكول

• يمكن اي ويمكن لا

• دسولفي شصار

• صار يرسم باللوحه واشوفه ياخذها ويا ومن كملت گلي تعبتج

هزيت راسي // لا بالعكس

•شنو بالعكس

بلعت ريكي وسالته // استاذ

باوعلي بدون ما يحچي

سالته // عندي سؤالين مي خالف

• عشر اسئله ميه عادي كل وقتي الج بس ابقي بكعدتج

• ليش ؟

• احسن وهسه اسالي

• ليش انا من دون البنات رسمتني ومعقوله طلع اسمي بالقرعه

• هذني ال سؤالين مو وراح اجاوبج بس الكلام ما يطلع اتفقنا

• اي

• وعد

- - ابيش تريدني احلفلك ما احچي

• ...امممم ليش اختاريتج لان طلعتي بالقرعه ومعقوله اي معقوله

• لا عفيه استاذ جاوبني

• راح اسالج وجاوبيني شنو قصدج من دون البنات

• يعني اكو احلى مني

• مثل منوو

• بان بنت الظابط

حك ذقنه // البغداديه

- اي

• شنو الحلو الي بيها

- - لون شعرها وبيضه

• اكلج شي وما تزعلين

- لا ما ازعل

•شوفي بان مو ذاك الجمال انتي احلى بس انتي يرادلج ترتيب بلبسج ويراد الج ثقه بالنفس

• يعني استاذ انا احلى

- هذا ما راح اجاوبج عنه

•ليش ؟

•. بيوم المعرض راح تعرفين

•. ليش كلامك كله الغاز

- انا صار لازم اسالج

- اتفضل

وبدا يسالني شنو يشتغل ابوي واخواتي واخواني وانا اجاوبه وبعدها رجعنا للصف وثاني يوم اخذنا كلنه وطلعنه للساحه

وكصلنه صوره وبيومها وكف شكم بينه واخذ صوره انفراديه بحجة انو صورتنا مو واضحه وانا من ضمنهن ومن

رجع الصور للبنات صورتي كانت مغوشه وكلي ما استفاديت منها.

• ليش كص صوره جماعيه

هاي كانت مفاجاته رسم صورتنا وعرضها بالمعرض

ام احسان // وشنو صار

سوا المعرض واشتغلنه ويا وكلي تلبسين تنوره سوده وقميص ابيض مو بس انا لا وياي بنات وكل وحده انطاها

شغل خاص بيها الافتتاحيه العصر واعرف بابوي لو شيصير ما يقبل اروح لكن الحسن حظي ذاك اليوم عنده خفاره

وبيومها رحت الساعه ثنتين ومن شافني انطاني ركن اوكف بي وكلي // من ااشر الج تجيين

وافتتح المعرض والكل اثنى علي وكل واحد واگف يم صورتي وهو ينعجب بيها

كانو اكثرهم فنانيين واتذكر واحد كال // فعلا انت فنان استاذ لان اللوحه غايه بالابداع ياريت نشوف الطالبه

اشرلي واجيت واتذكر گالو //. اوووووو فعلا نفس الصوره وجمالها طبيعي مو مصطنع

جاوبهم وهو يباوعلي //. وحتى روحها طبيعيه مو مصطنعه

جاوبته احدى المدعوات // بعد انت فنان نهنيك استاذ معرضك من انجح المعارض انصحك كمل دراسه واخذ ماجستير

وحتى دكتورا

• حفزتيني ست

• احسن الك لاتدفن نفسك بالمدارس

• ان شاالله

وبيومها شفت الفرحه بعيونه وهو يباوعلي وبعدها رجعنا للبيت وثاني يوم داومت عادي وما حجييت ويه اي طالبه وبرفعة العلم طلعوني وصفكولي الطالبات انا والبنات الي وياي

بعدها باسبوع اجه وگلي اخر حصه تجيني الغرفة المدرسين

ورحت هو گلي تعالي وراي رحت للمختبر وهناك باوعلي وكلي

•عرفتي انتي شكد حلوه

جاوبته بعفويه // لا

•ها ومن اثنو على اللوحه اساتذه معروفين

•لا استاذ اثنو على رسمك

اتقرب مني // فتحي عقلج شويه انتي حلوه وجمالج اخاذ ومو اي واحد يستاهلج

بلعت ريكي وكتله شكرا استاذ

طلع علبه من جيبه وكلي هاج هاي هديه الج لان تعبتي وياي وهاي اللوحه اخذيها وخليها ذكرى

فرحت وجاوبته // طبعا استاذ راح اخليها بنص گلبي

•. متاكده ؟

هزيت راسي //. اي متاكده بس عبالي تبقى يمك او بالمعرض

منو كلج انا ما باقيه يمي لوحه

اتفاجات //. شلون يعني مو هاي اللوحه

  هز راسه //. اي بس انا جاي ارسم وحده ثانيه خاصه بيه وراح اعلگها بغرفتي وما اتخلى عنها وحتى هاي

اللوحه خليها الج ولا تتخلين عنها

بس اشلون ترسمني وانت ما تشوفني

لان انا حافظ كل تعابير وجهج وبعدين اكلج شي

هزيت راسي بالايجاب //. من صورتكم انا احتفظت بصورتج وجاي اباوع الها وارسمج

يعني انت انطيتني الي مو واضحه حتى تحتفظ بوحده واضحه

بالضبط

+

ومن ردت اطلع استوقفني // نجاة

•نعم استاذ

• الهديه ضميها لاتراوينها الاحد ولا تكولين انا انطيتها الج لاتنباك مثل ما انباكن اعمالج الفنيه

اتقربت منه وسالته // يعني انت تعرف انا جايبتهن وانباكن ؟

• اي اعرف

• ليش سكتت وحسستني انا چذابه

• لان خفت عليج

  • خفت عليه من شنو

جر نفس / / تدرين خلي اكلج سر

ما جاوبته هو گال // انا من جبت العلبه الي بيها اسماء الشعبه كتبت كل الاسماء اسمج

فتحت عيوني وانا احس بالزهو رجعت للشعبه وبوقتها دك الجرس ورجعت للبيت وانا گلبي يدك امي شافت اللوحه

كلش انعجبت بيها وگلتلي // ضميها لا يشوفها ابوج وشيخلصج

هزيت راسي ودخلت للغرفه باوعت وين ممكن اضم اللوحه وما يشوفها باوعت وشفت اامن مكان وره الكنتور

بعدها فتحت العلبه لكيتها ساعه ذهبيه ماركة (اورينت السويسريه ) كانت بوقتها غاليه

خوله // لحظه نجاة هاي الصوره الي بغرفتج

هزت راسها // اي

حييل وبعدج محتفظه بيها

اي

ام احسان // وين صار استاذ صلاح

- بسرعه مرت الاحداث

- شلون ؟

- انا المدرسات انطني درجات واول مره انعفي بدرس الفيزيا والاسلاميه والتاريخ والفنيه والرياضه

- بربج

- اي والله رغم بالفيزيا اعلى درجه اخذتها يمكن تلاثه وخمسين

ام احسان // اكيد هو

- - اي والمديره طلبت من المدرسين ينطوني درجات لان المعرض نجح بسبب صورتي او هو هيج فهمهم

ام احسان // هاي بنهاية السنه وقبلها

اتنفست بعمق // قبلها گلي معجب بيج وحبيتج واريد اخطبج

• وانتي ؟

- انا بوقتها الدنيا ما سايعتني فرحت ولاول مره احس بنفسي انا بنيه ومرغوبه

• وليش ما اتزوجتي ؟

- لان انسحب

- يعني طلع چذاب

هزت راسها // لا بس اهله جبرو يتركني

- بعده بالبصره

• لا كل الي اعرفه انو قدم دراسات وبعدها هاجر

ام احسان // منو كلج

- ما تصدگين

- اصدك كليلي منو كلج

- شذى

- بت صديقه

- اي

  ام احسان // يجوز تكذب رادتج تبعدين عنه

• لا گالتلي بعدين بعد ما اتزوجت وصارو عندي جهال

   • وين لگيتيها ؟

  • اتلاگينا بعيادة طبيب اطفال

  • بالبصره

• اي بالبصره رحت الاهلي ورامي كان عمره سنه وهناك اتخربط بسبب الجو واخذنا للطبيب

- بوكتها هيه صايره مدرسه ومتزوجه مدرس وانا ما مكمله ومتزوجه ضابط

  • ها

  • اي بوكتها كان حصار والمدرس يادوب عايش بالراتب وانا رجلي عنده رتبه وسياره وعايشه ابغداد

ام احسان //. بس وكت الحصار الكل تعب يعني حتى الضابط منين يجيب

• اله سعدي خوله عنده فلوس وما يهتم يصرف ويبذخ بدون وجع كلب وهواتعرفينه كان من يشوف احد

او يتعرف على احد يريد ايطلع نفسه بس هو وبس وانو هو الرجل المثالي

- سولفيلي نجاة شوقتيني

• شسولفلج خوله بيومها من شافتني هي عرفتني وانا حتى ما شبهت عليها يمكن من المفاجآت الي ما كنت متوقعتها

نسيت ااشكال الناس الي اعرفهم كان رقمها بعيد ورغم انا اجيت وراها لكن سعدي راح يم السكرتيره وما اعرف

شنو حچى وياها فهيه گلتله استاذ انتظر بس يطلع المريض وادخل هذا الطفل خطيه لان حالته صعبه اشرت

على طفل مريض كلش

هو هز راسه انا كعدت وهو اجه يمي كلي

  • طالع ادخن جكاره بره وارجع

هزيت راسي ومكعده رامي بحضني لمن ما اجت شذى وكعدت بصفي وسالتني

• انتي مو نجاة

اتفاجات بيها باوعت الها وانا ابتسم وهزيت راسي // اي انتي تعرفيني

• اي اعرفج كنا بنفس الصف انا وياج

باوعت الها وحاچيتها // وجهج مو غريب عليه بس ما اتذكرج

  • انا شذى شذى شريف

ضليت ارفع بعيوني ليفوك حتى اتذكرها ردت // احنه چنا بنفس الصف بوقت ما استاذ صلاح رسمج

اهنا اتذكرتها هيه باوستني وباوعت الرامي // ابنج

هزيت راسي وابتسمت // اي ابني وبعد هشومي خليته يم امي

- وين اتزوجتي ؟

• ابغداد

• هذا الي وياج ؟

- اي وانتي

• ذاك زوجي ( واشرت على رجال گاعد يم رياجيل ) سولفيلي كملتي

بعدني ما مجاوبتها اجه سعدي // شنو ما طلع المريض

هزيت راسي // لا

هو يباوع الشذى ويباوعلي انا ابتسمت وقدمتها اله // صديقتي شذى من ايام المدرسه

- اهلا وسهلا

هي ابتسمت // اهلا بيك (شفتها تباوع وتاشر بعيونها اجه زوجها عرفتنا علي )

• عبد الرزاق زوجي

ام احسان /. عبالي اتزوجت صلاح

ابتسمت // لا اجه زوجها واتسالم ويه سعدي وهيه تكله رزاق هاي نجاة اعز صديقه اليه لو تعرف شلون چانت علاقتنا

طبعا استغربت من يمته كنت انا وياها علاقتنا طيبه والرجال كال

• والله ياست نجاة دائما بسيرتج

اضطريت ارد علي // وانا ابد ما نسيتها كنا اكثر من الاخوات

هيه گالت // ايي الدنيا زغيره واكيد الحي ويه الحي يتلاكه

السكرتيره كالت السعدي اتفضل استاذ

هو ابتسم ورد عليها // شكرا الج ياالله يابه (باوع العبد الرزاق ) شگد رقمكم

  • بعد هواي گدامنا

دخلنه والطبيب شافه الرامي بعد ان اتسالم ويه سعدي وفحص رامي واعتنى بي خصوصا من كله سعدي

احنه جايين من بغداد

وكتبله علاج وابر اهنا سعدي كله // دكتور ممكن اتدخل صديقي حتى نروح سوا

الدكتور دك جرس وطلب من السكرتيره ان تدخل شذى ويه ابنها استغربت تصرف سعدي والطبيب فحص ابنهم

وهم كتب علاج ومن طلعنه سعدي گال اني والاستاذ راح نجيب العلاج انتو ابقو اهنا

وانا اشوف الحسد بعيون شذى الي كالت // دائما مجنصه

  ام احسان // يعني ما خجلت من حجتها

   • لا كالتها بوجهي سالتها شنو بيش مجنصه ؟

   جاوبتني // من دون البنات استاذ صلاح اختارج وهو ما يطخ راس الاكبر وحده وبعدين من عافج اتزوجتي ضابط

باوعت الها بخوف وترجي // يمعوده اسكتي شنو صلاح شنو مجنصه هاي شبيج لحد يسمع

اهنا جابو العلاج واجو دخلو اثنينهم وانا ويه شذى بقينه ساكتات انا ما اخفيج كنت خايفه لا تحچي گدام سعدي وبنفس الوقت

مستغربه من طريقة كلامها من اتكول عافج

فمن طلعو سعدي عرض عليهم ايوصلهم همه ما قبلو لكن هو اصر عليهم ركبو بالسياره وانا ركبت يم شذى

وبالطريق زوج شذى صار يدلي سعدي حتى ايوصلهم

گال السعدي // اهنا اطبك خلي انكسبك بااستكان جاي

سعدي ما وافق لكن عبد الرزاق گله // صدك ازعل مو كافي دخلتنه ع الدكتور ودفعت فلوس العلاج وجاي اتوصلنه

بسيارتك وحتى البنات من زمان ما متشاوفات

سعدي // ما نريد نكلفكم

• لا شتكلفونه الجو حلو اهنا نكعد شويه

سعدي // اي بس حدنا عصير وماي

• شنو عصير وماي ليش تشوفنه مو كدها

  سعدي // لا تزعل استاذ بس صدقا معزومين ابيت عديلي ولو ما رامي متمرض كان احنه هسه كاعدين ابيتهم

   • ها اذا هالشكل مي خالف

ونزلنه يم الكورنيش گعدنا رغم حرارة الجو لكن كان منظر شط العرب حلو كعدنا بكازينو ع الشط

وطلبنه عصير وصارو يدخنون وكانما يعرفون بعض من سنين طبعا سعدي كان هوه سيد الموقف ويريد يبين تفسه

انه انسان متفهم وحباب فگال الرزاق

• خلي نتمشى شويه وخليهن ياخذن راحتهن بالحديث لاتنسى من زمان وحده ما شايفه اللخ

رزاق // زين خلي نروح البيتنا تره مو بعيد

• خليها غير مره يعجبني اباوع للبحر

• تحبه استاذ ؟

• اي احبه هوااي

• شنو رايك اعزمك ونروح سفره للفاو كلنه وهناك ناكل صبور

  سعدي ابتسم // قصدك سمج

   • اي اهل الفاو يشوونه بطريقه حلوه

• ان شاء الله من نجي مره لخ

وراحو يتمشون وبقينه انا وشذى الي سالتني // زوجج اقاربج

هزيت راسي // ايي من بعيد

  • وين شافج واتزوجج

- بعرس ابن عمتي وانتي

• طبقت بالمدرسه الي هوه يداوم بيها واجه وخطبني

- مبين علي حباب

• اي حباب بس

•بس شنو ؟

  • نجاة بهذا الوكت الحباب والهادى ما يوكل خبز

  • گولي الحمد لله

  اتحسرت // الحمد لله كلمن وقسمته

حسيت بيها تحسدني لان ما تعرف شكد جاي اعاني ويه سعدي سالتني

  • هم تتذكرين صلاح

اتفاجات من كلامها سالتها // انتي منين تعرفين انو صلاح راد يخطبني وعافني

  ابتسمت // بوكتها حتى الاداره عرفت

غمضت عيوني لان اتذكرت شكد البنات اشرن عليه وانا بالساحه ويتداسرن ابيناتهن

جاوبتها // كلمن ياخذ نصيبه صلاح مو نصيبي تدرين من شفتج وعرفتيني بنفسج عبالي متزوجه صلاح

  • واذا شفتيني متزوجته شراح تسوين

ابتسمت // ولا شي شسوي يعني اكيد اتمنالكم السعاده

  • يعني ما تزعلين

  • شزعل يمعوده انا مره متزوجه شزعل

  • بس صلاح يحبج ويمكن ما حب وحده بكدج ومتاكده الهسه يحبج

   باوعت الها // شعرفج ؟

  - ادري نجاة ادري وهم اعرفه الهسه بدون زواج صدك هو اعترفلج بحبه

  - ليش جاي تفتحين دفاتر قديمه

- جاوبيني اعترفلج

بقيت لازمه رامي واهز بي برجلي // صلاح اعترفلي هو يحبني من اول يوم دخل للصف وشافني وكل هذا الي

سوا بس حتى يحجي وياي

• وانتي ؟

  - انا حسيت بيج ياشذى انتي تحبينه والكل يعرف بيج تحبينه

   فرت ايدها // شلون الكل يعرف بيه احبه

ابتسمت // من طريقة نظراتج ونقاشاتج ويا وحتى. تصرفاتج

    اتنفست بعمق // بس لا تنسيين هو بوقتها صديقه الابوي والكل يعرف هوه حبج الج

   • اعرف وكنت بوقتها اسعد وحده ياالله هيه قسمه

• صدك قسمه تدرين انا من عرفت بي يريد يتزوجج غرت هواي وردت اخرب الموضوع شلون ما كان

اتفاجات من كلامها الي كالته //. وداىما اتذكر الي سويته وصدكيني اتندم وجنت اتمنى اشوفج حتى اتسامح منج

وحتى اخلص من تانيب الضمير

جاوبتها باستغراب // • ليش انتي شسويتي

هي غمضت واتنفست حييل عبالك الهوى مكطوع عنها //. بيومها صلاح اجه الابوي وسولف ويا وابوي گله

بيها الخير اذا خوش ابنيه وصلاح ظل بس يحمد ويثني بااخلاقج وانا من سمعت اتخبلت لان احبه وجنت بانيه

احلام انو اتزوجه وهنا رحت الامي وصرت ابجي واعترفت الها بحبي الصلاح وكتلها اذا يتزوجج انتحر

وامي حجت ويه ابوي من اجه ياخذ الضيافه وكلتله صلاح اهله ما يقبلون على كل بنيه ولازم شويه يتروى

ويسال زين عن البنيه خصوصا وهمه توهم نزلو بالمنطقه ولازم يسال بالمنطقه الي جانو بيها ومن هالكلام

ولان صلاح مو من منطقتنه فناط هذا الشي الابوي وكله ياريت انت وزوجتك تسالون عنها وعن اهلها

وراحت امي وسالت ودلوها على بيت عمتج ورحت وياها البيت عمتج والي سولفت كل شي

وانا بدوري سولفت البت عمج اتذكر اسمها بيداء مو

• اي بيداء

شذى //. هي وامها سولفت على اختج الي انهزمت بيوم خطوبتها وانا سولفت البيداء على علاقتج بصلاح

هزيت راسي //. اي اتذكر وما اعرف انتي شنو حاچيه وياها وبيومها هيه وصلت الحجي الاخوي ايمن الي اجه

وكفر بيه

اتذكر ضربني وهو يگول الامي // بتج اليوم اذبحها دايحه ويه المدرس لوما امي وكفت بوجهه وگالت له

منو موصلك هذا الكلام بيداء مو بتي مو دايحه بس هو شافها حلوه ومؤدبه بعد بيداء شعدها وتحچي

وتعال فهمني هي عمتك النهار كله تحجي بالحلال والحرام وين شفتها البيداء وين سولفتلك

لو من يمنا شديد العقاب ومن يمها غفور رحيم

  ايمن وهو يتهدد عليه // اتدافعيلها مو

اي ادافع الها واذا ما تجوز هسه اروح البيت عمتك وهناك افضح بتها واخلي الما يشتري يتفرج

شذى بااعتذار // هذا الصار بيج كله انا السبب

حاچيتها // ايي واعرف بيج انتي الي او عن طريقج وصل الكلام الاهل صلاح الي ما وافقو يخطبوني

  سالتني باستغراب // ياكلام ؟

  •. الكلام الي وصل الصلاح واهله

  شذى // بت عمتج گالت هو لو يعرف شنو اختها چان ما اتقدم وخطب وانا وصلت الي سمعته من بيداء الابوي

• شنو سمعتي من بيداء

• انو اختج الجبيره شارده ويه صاحبها ومن عرفتو طريقها ابوج رايد يكتلها وداخله عد ساده وشيوخ

وبعدين انتو متوسلين باهل الولد حتى بس يجي يتزوجها وفتره وتتطلك

واهل صلاح اتخبلو من سمعو وجبرو ان يتزوج اي وحده وما يتزوجج

جاوبتها بتشفي // وانتي كل ظنج انو راح يتزوجج بعد ان يتركني

هزت راسها وحجت باستهزاء // اي ليش الجذب بس هو رفض هذا الشي وسافر البغداد وبعدها هاجر

صفنت وانا مغمضه عيوني واتذكر ذيج الايام واهنا شذى كلتلي // شو صفنتي

     اتحسرت وجاوبتها // ع الدنيا

   • صلاح من هاجر بقى متواصل ويه ابوي الي داىما يتوسل بي يرجع بس هوه رفض

  - اتزوج

  • لحد قبل سنتين ما متزوج

   - وليش قبل سنتين

  - من اتوفى ابوي خابرنه واخذ من خاطرنه وانا لا اراديا سالته

شذى دنكت وحاولت تخفي دمعه. سالتها // بعدج اتحبينه

  - كان عندي امل يرجع او حتى يخطبني وانا اسافر اله لكن ...(ابتسمت بحزن ) عاد من قطعت الامل اتقدم

الي عبد الرزاق وانا وافقت والحمد لله عايشين

   هزيت راسي // الحمد لله مبين ايحبج

  - بس مو مثل زوجج

  - شنو قصدج

- يعني زوجج مبين كلش يحبج وما شاء الله السياره اخر موديل والرتبه وهو حلو ما عايز

- هههههه

شذى بااعتذار // - صدكيني نجاة انا الي سمعته من بت عمج سولفته الابوي

- بس انتي بنيتج تخربين خطبتي

• ما اجذب عليج حسدتج وغرت منج بس ما فكرت اذيج

  • لو بوكتها سائلتني يمكن جاوبتج

  باوعتلي // اكلج نجاة جنج متندمه لان ما اتزوجتي صلاح

• لا ما متندمه بس هوه واهله اخذو فكره مو حلوه عني

- •. لا الي ما تعرفينه انو صلاح گال الابوي حتى لو اهلها (لملمت حلكها ) العفو منج نجاة بس هذا الي راح اكوله

كلامه

رفعت حواجبي //. شكال

• اتذكر اجه مقهور وگل الابوي حتى لو اهلها سمعتهم مو شي وشايلين بالمنطقه حتى الناس تنسى سالفة بتهم انا

اخذك واروح اخطبها واتزوجها وبعدين اخلي اهلي امام الامر الواقع انا مو زغير واگدر افتح بيت واعيش انا وياها

بوكتها اتفاجأت بكلامها على اصرار صلاح عليه لكن ما عندي تفسير التصرفه وكملت

والي انتي ما تدرين بي او ضمو عنج اهلج انو صلاح اخذ ابوي واجه على ابوج وخطبج لكن ابوج ما وافق وخله شرط

انو اله اهله وعمامه يجون يخطبوح وياهم شيخ عشيرتهم وصلاح حاول ويه اهله الي ما وافقو ورفضو رفض قاطع

بعدها هو نقل نفسه وبعدين هاجر وبيومها انا اسودت الدنيا بعيني لان هاجر لكن بقيت متواصله ويا ويوميه تقريبا

اخابره واقنعه يرجع لكن هو ما وافق

ما كدرنا نكمل كلامنا لان سعدي اجه يتمشى هو وزوجها وكال //. بس كون شبعتن سوالف

شذى // لا لو نكعد سنه ما نشبع من بعض

وصلناهم بالسياره وبالطريق تسالني بيا منطقه ساكنين وعيالج وين ساكنين ومن هاي الاسىله وانا اشوف الحسد بعيونها

اتذكرت شلون هي وشلتها جانت تتنمر عليه وداىما من امر اسمعها وهيه تقلد وهيه تضحك واتذكرت لمن ما صلاح

ما اجه خطبني او هذا الي فهمته جنت اشوف الشماته الي بوجهها وبيومها هيه وصديقاتها وهنه ايهلهلن ويسالنها

ها اجه المعرس وهيه تكول

اي هسه يجي منتظرته

وبعدها تتقرب مني وتكول وهي تقلد باديها مثل الطير // لا المعرس طار طار طار بالبيباي

من نزلت باوستني وكالت ابريني الذمه انا ما جاوبتها ولا فكرت بذاك الوكت حتى اخذ رقم تلفونها الارضي

بيومها رجعت وانا صافنه واباوع الاهلي الي ظلموني وظلمو صلاح وثاني يوم من كلي سعدي

خلي نروح رجعت ويا بدون ما اعارضه لو بكلمه رغم اهلي اتوسلو

نبقى بعد كم يوم لكن سعدي كال عنده دوام ويتاخر يمر عليه

ورجعنا للبيت وحاولت اغير سعدي لكن ما كدرت وكانما (اتحسرت )

ام احسان // شنو نجاة كأنما شنو

كأنما هو ماخذني عدوه مو زوجه

يعني نجاة سعدي من اول ما اتزوجتو هاي تصرفاته

•اي لكن جان شويه اهون هو عصبي ناار بس مو مثل

• مثل شنو نجاة

ابتسمت امي بحزن وهيه تحاول اتغير الموضوع // حييل خوله وين اخذتيني بذكريات دافنتهن

  ام احسان // اكلج سولفيلي شلون اتزوجتي سعدي

امي هزت ايدها //. شبيج خوله اليوم مخليتني براسج ما وراج غدا اتطبخينه الرجلج

ام احسان //. ما عليج طابخه ومكمله وهو راح ويه اخته عدها معامله يعني ما يرجع هسه

  - معاملة شنو

   رفعت اكتافها // ما ادري بيع وشرا اكلج سولفيلي شلون اتزوجتي سعدي الله يرحمه

  

- رحنا الزواج ابن عمتي الي ماخذه عم سعدي وهمه ساكنين بغداد وعمتي عزمتنا وكالت الابوي جيب البنات وتعال

وبوكتها ابوي گللها

  - اذا تجي غنيه ما اجي يقصد على عمتي ام حاتم

عمتي هديه جاوبته // يا ما الك شغل بيها تعالي خويه كدام الناس ترفع راسي شكلك اخوها اتعنى واجاها

- وراح ابوج

- اي وامي طلبت منه نروح كلنه وبالبدايه هو ما قبل بس امي قنعته وسمعتها وهيه تكله

• خلي ناخذ البنات بلكي احد يشوفهن ويخطبوهن

  ابوي // هيج صرت اعرض ابناتي رحم الله والديك تره عدي بنات البركه ابتج نظيمه

  امي // لا البركه باختك ام حاتم الي خلتنا حچايه ابين الناس

  - اي جا بعد عليش يرحن خاف بعدنا ما مفضوحين كدام نسابتنا

- لا ابو ناظم مو هالشكل الناس من يشوفوهن يسالون هذني منو راح يكولون بنات اخو ام كريم واكيد من يرحون

ويسالونها ما راح تطي لابيك ولا ابناتك هديه تحبك تصدك ذاك اليوم اجت مره حاجتني على رجال مدرس النجاة

ودني الخطبه وجيب الخطبه سالين بيداء بت اخوك كرايبهم وياها بالمدرسه عاد هيه واختك ما مخليات شي مستور

( اتحسرت امي وگالت ) حسبي الله ونعم الوكيل

ام احسان // ورحتو للعرس

  • اي رحنا لعد سعدي وين شافني لوما عرس ابن عمتي

ابتسمت ام احسان //هاالله هالله سولفيلي نجاة شوقتيني

• رغم جنت ضايجه على صلاح الي ما اجه او خلي نكول انسحب وبالگوه لان هذا الي عرفته او افتكرته عاد

امي قنعت ابوي نروح ويا للعرس

وابوي اخذنا بيوم العرس لان قبلها ما حصل اجازه چنه فرحانات لان راح نسافر لان ملينه من الغمته

طلعنه الضحى على ما قبطت المنشاه ولابسه تنوره وقميص وشعري شايلته

وغنيه هم نفس الشي وصلنه تقريبا الساعه تلاثه يردون يرحون للزفه واحنه بجنطنا وهوسه لان زوج عمتي

رجال معروف وهم اهله بالناصريه ناس معروفين فدخلنه والزفه تريد تطلع واحنه نركض بسرعه بس حتى نبدل

انا بوكتها زلكت لكن اتلكتني ايد

ام احسان // وكعتي على سعدي

• لا اصلا ما چان موجود صارت وكعتي على عاصف اخو چان بعده زغير بس همه عدهم وراثه جثليين والعمره

خمسطعش تگولين عشرين

ام احسان //. اي صدك ما شاء الله

• ما تعرفين مقدار الاحراج الي صرت بي وانا تقريبا بحضن الولد بعدها طفرت وركض البيت عمتي الي باوسناها

وهي تكول وين صرتو ليش. هلكد اتاخرتو

وامي تجاوبها // اخوج الصبح نطو اجازه وبالكوه لزينه ويا وجابنه

وانا ااشر الامي وهيه تكول // اكعدن

عمتي // شبيج يردن يرحن بالزفه مو

• يازفه ما تعرفين اخوج

فوتن عمه بدلن وانا اخذجن

امي // ما تلحگن ما تسمعين السيارات

  عمتي // فوتن ما عليجن

ركضنا الغرفة عمتي بسرعه بدلنه وانا حليت شعري وخليت طوك وغنيه شعرها على صفحه لان كلش سرح

وشويه مكياج وطلعنه عمتي كالت ياالله هسه يشوفولنه سياره ورجل عمتي اجه وكال بعد ما سلم علينه

  • هذا سعدي توه اجه اخذي البنات واركبو ويا

وفعلا عمتي راحت وامي ويانه ركبنا وره وعمتي يم سعدي الي سلمت علي وهو جاي برتبته حتى ما ملحك يبدل

امي ركبت بالسياره واحنه يمها وعمتي كلتله // اشلونك عمه

• الله يسلمج مبروك وشايفين كل الخير

• يوم ال الك

• لا اني بعده وكت

• شنو متاني تكبر

• ههههه خلينه نتونس شلي بالزواج

عمتي // صدك ما عرفتك هاي حماتي ام ناظم وبناتها غنيه ونجاة بنات اخوي اخوات ناظم

  - اهلا وسهلا

عمتي // هذا ابن حماي الجبير

امي سالتها // ابن حجي كاظم

• اي تعرفينه

اي شنو وين جنت عنهم غير جنه بالناصريه كلنه سلف واحد وناظم ابني ماخذ اخته سعاد بس انا ما شايفته من زمان

عمتي // اي حتى نسيت ناظم ماخذ سعاد چا هي غير التوم ويا

استغربنه يعني ماكو اي شبه امي ردت // هله بيك خاله كل الهلا

هو ابتسم وجاوب ابرود وتكبر // هلا بيج

ام احسان // ليش ابرود ؟

  لان سعدي يضوج من احد يجيب طاري السلف

وصلنه الاهل البنيه شويه متاخرات وبس شفنا يمشي هوه وياها وزفوهم بالسيارت واحنه انا وغنيه طايرات من الفرح

ما شايفات بغداد اقصد شوارع بغداد واخذوها يم الزوراء وبعدها رجعو للبيت وهناك نزلنه واكثر الناس الي بالعرس

اتباوع النه انا وغنيه الي كالت

• تعالي خلي نركص على عناد عمتج غنيه

- اسكتي ما بينه حييل للمشاكل

• يا مشاكل هاي ما تشوفينها نفاخه تريد تنفجر عاد خلي نركص على مود من تنفجر الها حق

وجرتني وصرنا نركص وعمتي ام كريم دخلت ويانه وهيه تهوس

بقينه يومين وعمتي ام كريم ما خلت مكان اله اخذتنا اله صدك اتونسنا ونفسيتنا ارتاحت

وبعدها رجعنه واشوف امي وابوي مبين على وجههم الفرح والراحه بالطريق سالت امي

- ماما ليش عمتي ما ذبت الاسود حتى بعرس ابنها

- لا يمه حزينه على ابن حماها وتستحي من رجلها واخو

ابوي سالها //. اكلج مرت حجي كاظم جايه للعرس

امي بحسره //. لا حميد وينها او وين الجيه الله يساعدها الراح الها مو شويه

  - اي والله الله يساعدهم حتى الحجي حزين ومهموم بس ما يبينها

  - الله يصبرهم

وصلنه البيتنا ودخلنه ورحنه انا وغنيه للغرفه بس غيرنا ملابسنا نمنا كعدنا بالليل فايت وكت وامي تكول اكعدن اتعشن

ابوچن جاب عشا كعدنا وبعدنا مغمضات عيونه من التعب صرنا ناكل وابوي كال الامي

• حجي كاظم گلي نريد نجي عليكم رايديلنه بنيه منكم

شكرا لزيارتكم عالم روايات سكيرهوم