رواية الحب اختيار الفصل الرابع
كان باين عليه التردد لكن في الاخر قال:
اننا نبعد عنهم كلهم نروح في أي مكان تاني ونتجوز.
اتصدمت من كلامه وحسيت اني مش مستوعبه معنى اللي بيقوله فسألته:
- يعني ايه؟ نروح نتجوز من وراهم! انتَ عاوزنا نحطهم قدام الأمر الواقع! نتجوز وبعدين نواجههم؟
ووقتها لقيته بيقولي اللي عمري ما توقعت انه يقوله:
- لا انا ما اقصدش كده, احنا بعد ما نتجوز مش هنرجع لهم اصلاً, هو انتي فاكره لو احنا رحنا اتجوزنا وجينا قلنالهم احنا اتجوزنا كده هنحطهم قدام الأمر الواقع وهيستسلموا! احنا لو عملنا ده هتقوم حرب ما بين اهلي واهلك مش هتخلص غير بموتنا كلنا.
-فالحل اننا نهرب؟؟؟!
- مين قالك اننا هنهرب؟
ضحكت بوجع وفي نفس الوقت استهزاء بكلامه:
- يا سلام امال اللي انت قلته ده معنى ايه؟
مشي خطوتين لقدام وهو بيقول:
- معناه اننا كبار كفايه عشان نقرر حياتنا تكون عامله ازاي, وعشان نختار احنا هنتجوز مين, انتي مش قاصر عشان اهلك يختاروا لكي عريس ويرفضوا اللي انتي عاوزاه, وكفايه تقولي انهم خايفين على مصلحتك عشان هم مش خايفين على مصلحتك ولا يهمهم ان الشخص اللي تتجوزيه ده يبقى كويس ولا يبقى وحش, هم كل اللي يهمهم ان الناس هتقول ازاي عيلة عزام تناسب واحد كلهم شايفينه ماشي فرد دراعاته على الناس وواخد الدنيا بصدره, وعوطلي كمان ومش نافع في شغلانه, مش هو ده الكلام اللي اهلك اقنعوكي بيه انهم رافضني عشانه؟ انهم خايفين على مصلحتك على اساس انك عيله ومش عارفه مصلحتك فين, مش واحده واعيه عندها 25 سنه وعارفه هي بتعمل ايه كويس, واراهنك ان العريس بتاع امبارح ده كان شخص يتشرفوا بيه قدام الناس.
بصيتله ورديت:
-عريس امبارح كان ابن صاحب بابا, معاه كليه تجاره وشغال محاسب في مكتب بيقولوا ان مرتبه كويس, عنده شقه واهله باين عليهم ناس محترمين.
بصلي بغضب وهو بيصرخ فيا:
- هو انتي قعدتي واستفسرتي واخدتي واديتي في الكلام! انا قلتلك ايه؟ مش قايلك تطفشيه و تكرهيه فيكي وتبيني انك شخصيه ما يقبلش بيكي!
- وانا عملت كده بس هو حاسس ان في حاجه غلط مش شخصيتي, وطلع ذوق وقالي انه مش هياخد مني كلام دلوقتي, وقراري الأخير هنبلغه بيه اخر الأسبوع.
رفع حاجبه بسخريه وهو بيقول:
- شخص ذوق! اه وايه كمان اشجيني, شكله كان حلو؟ عجبك يعني؟ وطبعا شغلانته حلوه ولها مستقبل ومستقر ماديا وأهله تعرفوهم كويس وابوه صاحب ابوكي و معاه كليه محترمة و...
قاطعته وانا بصرخ فيه بنفس الغضب اللي كان عليه قبل دقايق:
- انت قصدك ايه؟ ايه اللي انت بتقوله ده؟
رد عليا بغضب مماثل:
- قصدي ان يكون عقلك زقزق ولا حاجه وفكر وخد وادى مع نفسه وقالك يا بت العريس اللي متقدملك ده احسن مليون مره من اهل نبيل كلهم.
هزيت رجلي بعصبيه وانا بقوله:
- نبيل انا لو مش عاوزاك ما كنتش عملت كل ده من الأول, ومكنتش قبلت اني اقابلك من ورا اهلي, ولا كنت قبلت اني ارفض ميت عريس قبل كده عشان مستنياك, ده مش اول عريس يتقدملي يكون كويس ومناسب جدا ليا, بس انا كل مره برفض عشانك, برفض لحد ما هم خلاص ما بقاش عندهم طاقه يستحملوا رفضي اكتر من كده, ورغم ده ورغم ان بابا قالي ان المره دي هو هيوافق حتى لو انا ما وافقتش لكن هو سابلي حرية الاختيار, وقالي مش هغصبك على حاجه واداني فرصة افكر وارد عليه, بس كمان قالها ليا صريحه انك لو متخيله في يوم من الايام نبيل ده يكون جوزك تبقي بتحلمي.
قرب مني وهو بيقول بلهفه:
- شفتي اهو ما جبتش حاجه من عندي, هم عمرهم ما هيقبلوا بيا يبقى الحل ايه! مفيش حل غيراللي قولته.
كان مسك ايدي وقتها فشديت ايدي منه بعصبيه وقلتله بصوت عالي:
- وانا عمري ما هوطي راس اهلي ولا هكسرهم, عمري ما ههرب معاك حتى لو اضطريت اوافق على العريس اللي جالي و اتجوز حد غيرك, انا صحيح بحبك وصحيح عاوزاك جوزي بس انا ابقى قليلة الأصل وحقيره لو مقابل اني اكسبك اخسر اهلي... ابويا ولا اخويا ولا امي ولا اي حد في عيلتي ما يستاهلش مني اني اخليهم ماشيين موطيين راسهم واكسر نفسهم قدام الناس, نهاية القول يا نبيل لو ما كنتش هتتصرف وتكون راجل بجد يعتمد عليك وتغير فكرة الناس كلها عنك وتبطل دور الشبح والبلطجي اللي انتَ عايش فيه ده يبقى كل واحد من طريق.
رفع حاجبه وهو بيسألني باستهزاء:
- اه ولو عملت اللي بتقولي عليه ده, وبقيت راجل يعتمد عليه وبطلت اكون بلطجي زي ما بتقولي ايه اللي هيحصل؟ ايه اللي هيتغير يعني؟
ابتسمت له بوجع وكأني عارفه ان ده مستحيل يحصل وانا بقول:
- لو اشتغلت شغلانه والتزمت فيها وحسنت طريقتك مع الناس وبقيت شخص كويس بجد, ساعتها هقف قدام اهلي كلهم وهتجوزك... هتجوزك حتى لو كلهم رفضوا هعند واعمل المستحيل عشان يقبلوا بيك, واصلا هم ساعتها مش هيكون عندهم حجج لرفضك , ومش هيقدروا يرفضوك.
هز راسه وواضح جدا ان الكلام مش على هواه وقالي:
- اه طب اسمعي بقى ... انا مش هستنى كل ده هيحصل عشان ابقى راجل يعتمد عليه والناس تغير فكرتها عني وابقى كويس مع الناس وكل الهري ده انا عاوزلي سنتين ولا تلاته عشان اثبت كل اللي بتقوليه ده, وانا بقى ما عنديش خُلق ولا روح اني استنى كل ده ومن الاخر انا اللي عندي قلته لكي والحل اللي عندي اننا نروح .... نهرب زي ما بتقولي وساعتها اقدر اوعدك انك لو عملتي ده معايا عمرك ما هتندمي وهعيشك عيشه ما تحلميش بيها وكفايه انك هتبقي مع الشخص اللي بتحبيه.
-وهتتغير؟
بصلي وابتسم وهو حاسس اني قربت أوافق:
- هتغير وهكون الشخص اللي انتي عوزاه.
