رواية نقش بارد الفصل الخامس 5 بقلم فدك فاطمه

.

.

داويني ترى معلعل 

بَس بشوفتَك هالروح تتعدل .

غــنوة 

گعدت على حافة الجرباية عيوني متوسعة اباوعلة نظراتة جانت حازمة مابيهة تردد شكيت بالسمعتة

گمت متوجهة الة لزمت الباب واكفة گبالة حجيت اشكك بروحي : افتح الباب

رد هو يلبس بالترواكة:اي افتحي 

غنوة:انتة وين رايح 

مد ايدة لزم زندي بهدوء وگفني گبالة حجة : طالع اخذ فرة بالمنطقة و ارجع هو شويـ..

ماخليتة يكمل رفعت ايدي ضربتة كف سكت مصدوم رخت ايدة الازمني بيهة دفعتة من صدرة برة الغرفة لزمت الباب اريد اسدة

دفرة برجلة عطت راجعة ليورة جراني قوي لازم رگبتي من ورة دنگت متوجعة و خايفة ايدي ترجف 

دلهم:هاي عليمن رفعتي ايدج

دفعتة من جتفة مقهورة ابجي:وخرر لاتصير زلمة براسييي وانتتة تريد تساوم بمرتك

نفضتي قوي من زندي يحجي و يدفع بية:منوو لمساومج بيج منيلج هاي الافكار خليني اكمل و تفتهمين لأريدة يصير، بت الگ***" ايدجج اكسرهة 

و حملهة الج منعولة الوالدين 

زاد بجي هالمرة خايفة من عصبيتة و نترة خليت ايدي فوك ايدة احاول ارخي لزمتة عني الوجع وصل لجتافي هو مايحس بروحة 

غنوة:ايي وخر وخر ايددي توجعني وخر عني والله افتح الباب بس يجي افتحلة بس عوفني

دفعني حيل طحت على الجرباية طلع صفگ الباب وراه مسحت دموعي اهدي رجفتي رفعت الردن 

اشوف ايدي صارت زرگة طبع اصابعة عليهة مسحتهة متوجعة صعدت رجلية ارتكيت على تاج 

الجرباية مخلية راسي عليهن گلبي يرجف من الرهبة 

اول مرة اكدر اطلع القهر لحاسة بي كل مرة اكتم 

مسحت على صدري متضايقة افكر و احرك رجلي بقلق اني بس اضل وحدي بالبيت كلشي يصير 

يخوفني حتى البردة من تتحرك تخمش گلبي 

مو نوب اروح افتح الباب بالله مارجع لو تأخر شيصير 

بحالي استصعبتهة ادخل رجال غريب لمكان بي راحتي و مأمنة بيه و اني لوحدي حتى لو هو گالي 

رجعت بذكرياتي لذاك اليوم الي مايفارق عقلي ولا اكدر انساه خوفي و رجفتي الرعب العشتة بلحظة 

جان بيني و بين الموت شعرة شلون ضميت روحي بين التانكيات لهسة بعدني احس بطكطكة عظامي

جنت متأملة بي توسلتة بنظراتي بس ما ثناه اي شي 

عن حجايتة بذاك اليوم من گال لسالم اني بهذة 

                                            

              

                    

المكان من سلط علية الخوف خلاه يجرني من نص المخبئ لأحتميت بي بس حتى يحقق شي براسة 

وكدر يخصلني بأقل خساير لهسة ما فاهمة هو شنو 

يريد مني ليش دخل روحة بينة اني و اخوي و اخذني

خليت راسيبين ادية تايهة بأفكاري اروح افتهم منة خاف يجذب علية يروح ما يرجع يسوي لگالة صفوان

رفعت راسي من حسيتة واگف كدامي وجهة ينگط ماي و شعرة درت عيوني عنة بضوجة و خوف نظرات الشك ما فارگتني عصرت ايدي اشتت افكاري

دلهم:رايح يجوز لليل يالله يجي ال***" لاتخافين صفوان قريب مراقبة و اريد الزمة هنا حتى ماينكر انتي كل العليج تسوينة تفتحين الباب بس حاولي تماطلين شوية حتى ما يشك

هزيت راسي بدون ما اباوعلة مد ايدة رفع وجهي حجة يحركة بيدة:احجي وياج باوعيلي

غنوة:ها

دلهم:افتهمتي لحجيتة 

غنوة: اي 

دلهم:بعد لاتفسرين من راسج اني ما مجبور اشرحلج كل حركة اسويهة لگلج عليه تنفذينة بدون اعتراض 

غنوة:واذا تريد تبليني بسوالفك

دلهم:لو اريد ما جان هسة انتي هنا 

سكتت درت وجهي حجة يأشر بحواجبة:هاي اول

و اخر مرة اعديهة لو تكررت العب بيج لعب 

حجاهة بحدة وخر عايفني مدري هو ينرفز مدري اني صايرة ما اتحمل كل الضغوطات و الخوف 

طلعتهن هسة صرت ماكدر اخفي نظراتي الماراضية ولا اكدر اسكت الساني بدون وعي اصير احجي 

جنت مخططة ما افتح الباب الة اشوف دلهم بالبيت 

مر الوقت واني افترمثل الخبلة كل شوية راي شكل

أذن العشة و صليت ماكدرت اكل اي شي بطني توجعني من كد ما خايفة و متوترة و هو مارجع ولا 

بين طلع الساعة بالتسعة الصبح سمعتة يحجي بالموبايل على شغلة ماعرف شنو بس گال يبات

مسحت وجهي بضوجة من طفت الكهرباء حتى ماكو مولد سحب لازم اضل متانية ساعة ساعتين يالله 

تشتغل البيت اظلم و يخوف الضوة يجي من البيوت بالشارع قليل الة اكعد بصف باب المطبخ لو لشباك

خليت المخدة وراي ارتكيت على الحايط أسبح بالتسبيحات الاعرفهن اعدد على أصابعي كل ما اخلص اعيد بداخلي ادعي كون كل الافكر بي مايصير

فزيت على دگة الباب نهضت خايفة اتحسس شالي بالظلمة لبستة لفيتة عدل و الـعباة على امـتوني 

حاولت اهدي رجفة ايدي و انفعالي بس ماكدر اسيطر اباوع من الشباك ماكو صوت دك الباب 

مرتين وبعدها سكت خليت ايدي على گلبي بلكي أيس و استحة على دمة و مشة واحد قليل مروة

شهگت بدون وعي توسعت عيوني برعب و اصتكيت بمكاني من صار الضـوة بوجـهي هو واكف گـبالي

صار وجه بوجه وياي ماكو بينة غير جام الشباك اريد 

اتحرك اوخر ماكدر ادية تصلبن من الخوف طلع 

            

              

                    

گدامي فجأة جاي من ورة البيت يمكن عبر الحايط من ورة صدري علة و نصى من انفاسي و أنفاعلي

رجعت خطوة ليورة حركت ايدي برجفة سديت البردة ماكو غير ثواني و دك الباب مال المطبخ 

الباب الخارجي كعدت وراه مستندة عليه حجة بصوت ناصي :افتحي الباب ليش تبيعين شرفيات براسي دلهم مايرجع للصبح لاتخافين 

عگدت حواجبي هالمرة حجة بدون ما يجذب لو يدور حجة مثل ذاك اليوم مسحت ايدي بملابسي متوترة ونفسي تخربط

جَبر:لاتخافين ما اگلة عليج ليش ماتردين ادري بيج موجودة 

رفعت راسي برجفة عيوني توسعت دموعي طاحت من شفت صفوان واگف باب الغرفة مال دلهم يأشر

بأصبعة على شفتة يگلي اسكتي اشرلي افتح الباب گمت و الخوف كلة راح مني كل الشكوك صارت سراب و اتبخرت من عقلي 

غمضت عيوني فتحت الباب رجعت بخطواتي ليورة 

فتحة صار گبالي هو يتقدم اني ارجع التفت اشوف 

صفوان ما لگيتة من رجعت عيوني الة تقدم بخطوات سريعة ناحيتي حبست الشهگة بگلبي 

صرت بنص الصالة هو ببداية الممر عصرت عباتي بين ادية حجة بخبث: وجهج مافارگ عيوني شلون وصلت حورية مثلج هنا 

غنوة:شـ..شتريد

تنهد و رد مغمض عيونة:صوتج مثل ماتخيلتة عذب

بدون وعي ضحكت بفرحة من شفت دلهم وراه هو ضحك كل ابالة فرحت من حجة هيج علية ما اتهنى

قطع عليه استمتاعة ايد دلهم الي بيهة واير الشاحنة لفة على رگبة خنگة بي لحظات استوعب بيهة الصار

وجهة احتقن رفع اديه يريد يوصل لدلهم مايكدر وخرت عن الطريق ركضت للغرفة رديت الباب اباوع

من الفتحة الصغيرة عليهم كعدوا بالگاع صفوان لازم اديه قوي مقيدة دلهم يفتر فوك منة هو وجهة محتقن بغضب و خوف 

شهگت مخلية ايدي على حلگي من رفسة دلهم على وجهة و خلة رجلة فوك راسة و صفوان لازمة الة 

حجة يدوسة برجلة: هي هاي صحبتك تطب لبيتي بنص الليل 

رد عليه بغضب و أنفعال:هيي صاحتني جنت جاي افهمهة لتسوي حرام و غلـ..

سكت من صفوان كفخة على راسة و دلهم سلگة بالواير على وجهة كم مرة هو يتلوى يريد بي يوخرة

دلهم:عوفة خلي اشوف ضرباتة توجع 

ضحك صفوان رفع ايدة ذاك ما گال باطل هجم على دلهم صارو واحد يضرب بالثاني كم مرة ضربة بقوة

وية كل ضربة گلبي ينخمش عصرت ايدي على السرگي بلعت ريگي برهبة من شدة ضرباتهم 

دفعة دلهم بعيد عنة هو يتنفس بقوة و لهاث قيد اديه صفوان طكة وحدة منة على رگبتة خلت رجلي

            

              

                    

تخمل و يطيح لزمة گبل لايوصل الگاع ابتعدت عن الباب من اجة دلهم يمسح الدم من حلگة بتشيرتة

دخل للغرفة سد الباب تقربت خطوة منة گلبي رجف

من حضني مخلي راسي على صدرة و ايدة على زندي

حجة بجدية: لاتخافين بعد اخر مرة تشوفين هيج موقف و تعيشينة انتي بأسمي كلشي يصير بأسمي أحمي ما افرط بي للموت 

غمضت عيوني ارجف رافعة ادية حتى ما ألمسة بعدني خلة ايدة على حنكي رفع راسي عيوني بعيونة مشاعري متخربطة ماعرف شسوي 

دلهم: رايح نص ساعة بس و ارجع لاتخافين ما اطول 

هزيت راسي لاول مرة ابتسملي بكل هدوء مو سخرية ولا خباثة حرك اصبعة يضم شعري جوة الحجاب دنگت خجلانة اعصر بصابعي 

ابتعد سديت الباب وراه سمعتهم يحجون بس صوت بعيد وراهة صار هدوء مشيت بالغرفة ايدي على صدري مرتاحة الحمدلله خلصت منة 

عدلت المخدة تمددت متغطية اتگلب ماكدر انام من ارتاحيت انفتحت شهيتي للاكل انتظرت لحد 

ما اشتغلت الكهرباء طلعت للمطبخ حتى الباب شفتة مفتوح ما سديتة حسيت بعد ماكو داعي الة 

طلعت الصمون سويتة صغار و خليت جدرية خليت بيهة فرگاعة لحد ما ذبل البصل خليت ماي و بهار

من فارت فرغت الصمون فوگهة تحسرت هسة لو گرصة خبز حارة من ايد صفية شكد جانت تغثني 

بس الخبز مالتهة يفتح الشهية كل كرصة اكبر من المخبازة و تخليهة بالتنور الطين غمضت عيوني 

اتخيل الخبزة شلون ترد الروح

كعدت بالگاع نزلت الجدرية يمي و گلاص ماي طلعت خاشوگتين بديت اكل عفت نص منهة غطيتهة خليتهة على الطباخ 

رجعت للغرفة اتبختر ذني لشكم يوم اخذن روحي كل ما اتذكر شلون دخل للبيت بدون خوف ارجف

احنة ماعدنة واحد هيج يسوي حتى ولد عمي من يجونة يدكون الباب اذا ما طلعلهم واحد من اخواني يرجعون بس أعمامي جانو يدخلون و نسلم عليهم

عدلت المخدة حليت الكتر من شعري حركت اصابعي بي ادلك بفروة راسي غمضت عيوني 

مسترخية تمددت شلت الغطة على جتفي خليت الباب مفتوح و الضوة حاولت انام ماكدرت بس 

ضليت مغمضة سمعت صوت باب المطبخ نسد عرفتة اجة تطمنت غطيت راسي بلكي و لعل اغفى

بين فكرة تجيبني و فكرة توديني فزيت على صوت 

الموبايل فتحت عيوني جان ناصي و يرن هزاز 

حسيتة قريب علية گلبت مستغربة توسعت عيوني اشوف دلهم نايم بصفي جمدت بمكاني بس ارمش

نايم على وجهة بدون غطة و بدون قميص مخلي ايد جوة راسة و الثانية بصفة و الموبايل بجيبة يدك

            

              

                    

گمت ابالع من تحرك طلع الموبايل بسرعة غمضت امثل النوم سداه حسيت بي تحرك من طكطكة 

الجرباية كل ابالي گام بس خاب ضني و گلبي رجف من حسيت بملمس ايدة فوك خدي يسحب بشعري

انفاسة صارت قريبة ضليت على حالتي متعودة اسوي روحي نايمة لو تطك قنبلة يمي ما اتحرك

بس هالمرة القنبلة ارحم بهواي تخربط نفسي واني احس بخشونة لحيتة بفكي و ملمس شفتة فوك 

رگبتي جسمي كلة تشنج الحرارة صارت تطلع وية أنفاسي غمضت عيوني قوي من بوسني بهدوء 

عصرت البطانية حيل بين ادية احس بسنونة تجر جلد رگبتي رجع بوسني بهدوء من دك جهاز وخر

ضليت بمكاني لحد ما تأكدت منة طلع شهگت كعدت على حيلي العرك ينضح من گصتي

احس بقطراتة تنزل جوة ملابسي رفعت ايدي برجفة اتلمس رگبتي رعشة صارت بكل جسمي

مشاعر ماعرف اوصفهة خلت عقلي يصير قطعة بيضة دموعي تجمعت بعيني خايفة من الاحسة 

انتظرتة طلع و سمعت صوت الدراجة يالله گمت رحت غسلت وجهي بس وضعي كلة تخربط و نگلب

مر اليوم كلة و راسي طك من التفكير تغديت ضليت افتر ادخل بالغرف و اطلع لمحت المفتاح فوك 

الباب سحبت المخاد خليتهن وحدة فوك الثانية صعدت اخذتة فتحت الغرفة ليسوي بيها وشم 

توني حركت السرگي و تذكرت التصوير الشفتة هسة اذا اطب للغرفة يشوفني لو مايشوفني بالنهار 

فتحتهة من الملل شغلت الگلوب فاكة حلگي اباوع بفهاوة على الرسوم كل مرة اشوفهن احسن احلة

بس حلوات همة هيج من اشوفهن على ايدة تلعب روحي مديت ايدي بتردد لزمت المكينة خفت نوب

اخربهة و ابتلي على روحي عفتهة بمكانهة ماكدرت اغلس على الهوسة و الوصخ لهنا لگيت روحي بدون

وعي ابدي انظف لميت الاوراق و رتبت الميز كنست الكاشي و مسحتة رجعت فرشت السجادة لمخليهة

ارتسمت براحة من شفت المكان نظيف دخلت لغرفتة الثانية هم نظفتهة و اخذت الهدوم غسلتهن 

صارت الساعة بالثنتين هو ماكو كعدت اباوع من الباب ما افتحة اشوف وين الفتحة الزينة اشوف 

منهة ناس تمر و جهال يلعبون طوبة الجو مو حار 

يركضون حفاي كل شوية يرگعون الطوبة بالباي

فزيت من سمعت صوت دراجتة دخلت ركض للبيت 

سويت روحي اشتغل بالمطبخ من فتح الباب و دخل

شفتة و تخربطت احوالي تذكرت لصار الصبح ضليت مدنكة مارفعت راسي ولا حاجيتة حميت 

الغدة و حضرت المواعين خليتهن بصينية رجعت للغرفة گلت هو يصب و ياكل ماتحمل اضل يمة 

طلعت هدومي عدلتهن جنت مجمعتهن بكارتونة مال موز جبيرة مغطيتهن بقماش من التراب عبست

            

              

                    

هنة نفسهن اسفط بيهن و افل المهم اشغل روحي بشي باوعت للتراكات هزيت راسي برفض مستحيل

مالبس هيج مو ثوبي هنة حلوات بس عيب مايصير 

عضيت شفتي اطلع البجامة الحمرة قماشهة ناعم 

قديفة بس ملمسهة حلو هزيت راسي للمرة ثانية رجعتهة بس جنت اتمنى البس هيج حلوات كلش 

دلهم:مو اصيح عليج

نزيت متفاجئة التفت الة شلت هدومي كومتهة شي فوك شي دفعت الكارتونة بعيد عني گمت متوترة 

غنوة:مـ..ما ماسمعتك

كتف اديه ارتكة بجتفة على الحايط حجة:فاتحة الغرفة مال الوشم

رديت أشر على روحي :أنييي

دلهم: لا أني اكو غيرج هنا المن فاتحتهة

غنوة:سويت نظفتها 

دلهم:ياهو العاتب عليج تنظفينهة

حجيت بهمس و ضوجة:مو صوجك

دلهم:شگلتي

غنوة:بعد ما افتحهة اخر مرة

باوعلي بنظرات متفحصة مقلص عيونة بدون وعي شلت ايدي غطيت رگبتي بجفي وين ما بوسني 

رخت ايدة و نظراتة احتدت رفع حاجبة شلتهة بسرعة درت وجهي بعيد عنة الوم روحي على 

الفهاوة مالتي زفرت انفاسي براحة من طلع يمة ماحب اوكف وياه بنفس المكان بس ساكت و يباوع

جنة لازم علية لزمة يوترني لاكدر احجي وياه ولا هو يحجي لو يرد من احاجي ماكو بينة اي شي نسولفة

مديت راسي من الباب اباوعلة قافل الغرفة بيدة موبايلة مخلي ايد فوك اطار الباب و ايد لازمة بيهة

يباوع للشاشة رجعت راسي من حس بية سديت الباب سرگيتة ضليت بالغرفة لحد الليل ما طلعت 

حتى عشة ما سويت توني گمت اجة سد الباب و قفلة

طگيت رجلي بضوجة ورة فترة سمعت صوت زلم 

تمنيت اكدر اطلع المفتاح من القفل و اباوع بس هو قفلة من برة گعدت اتصنت لسوالفهم ما فاهمة

جزعت من كعدتي و بطني صارت تطلع اصوات جوعانة اول ما فتح الباب طلعت بوجهي للمطبخ 

سويت عشة كعدت اكل هو يمر مني ساعة يطلع برة ساعة يخابر اخر شي وگف على للمغسلة ليم الدرج 

بيدة المكينة و يحلق بلحيتة اكل و عيني عليه اباوع لجتفة جان لابس فانيلة تعلاگة بيضة مبين منهة 

متنة و اديه مايبين الي شنو راسم بس اشوف خطوط بحبر لسود من بداية جتفة و ذراعة كلهة لحد جفة

عگدت حواجبي مركزة اريد اشوف شنو راسم برگبتة

دلهم:لگمتج بردت

فززني صوتة حسيت وجهي گب من الفشلة شمرت اللفة بالصينية شلت المواعين وطبيت للمطبخ 

خليتهن فوك السنك اهفي على وجهي غسلت ادية اغم بروحي شكد عيب هسة شيگول هاي فاهية 

طلعت صار بوجهي عيوني بعيونة رفع اديه لازم اطار الباب من فوك بلعت ريگي رجعت خطوة ليورة 

            

              

                    

ماكدر اطلع ساد الباب علية شلت ايدي اوخر شعري

من التوتر ماعرف شسوي ساعة ادنك ساعة اباوعلة

حجة بتساؤل: اليوم يمتة گعدتي

رديت بسرعة من التوتر: العصر الصبح الظهـ..

غمضت عيوني بندم لو ساكتة حجة بحدة فززني:يمتـــة

غنوة:مادري كعدت ماشفت الساعة 

دلهم: شفتيني من رحت

هزيت راسي بنفي من اجذب حتى اني ادري بوجهي ينخطف لونة و اتوتر وجهي يصير حار احس حرارة تطلع منة احوالي كلهة تتخربط مبين علية جذابة

دلهم: شفتيني

غنوة:اي شفتك من طلعت فزيت على صوت الدراجة كعدت 

دلهم: گتيلي الدراجة

هزيت راسي اكدلة السمعتلة همهم يباوعلي بتفحص وخر اديه من الباب دنگت ماريد اشوفة

دلهم:نظفي المغسلة جيبلي هدوم

غنوة:يمك برة ع الحبل 

مر مني طلع برة تنهدت براحة وگف گلبي بسوالفة

رحت نظفت المغسلة براسي اتذكر فترة الصبح 

اريد اتأكد اني هم سمعت صوت الدراجة لو لا اخر شي سمعتة صوت باب المطبخ من نطبگ هزيت

راسي اطرد افكاري اكيد راح بالدراجة جا بشنو يروح

حتى لو ما سمعت صوتها ما اطلع جذابة كدامة 

رجعت للغرفة اتصفن بالحياطين التفت للباب من شفتة دخل بيدة تشيرت ابيض يمسح بي شعرة 

دلهم: لبسي عباتج تعاي نروح للمحل

رمشت مستغربة عبالي سمعت غلط اشرلي بيدة حجة يدخل للغرفة: وياي سمعتيني

هزيت راسي ببطئ حجيت اشر على روحي:اني اروح للمحل 

دلهم: اي ترحين للمحل شنو معضلة

غنوة:هسة

دلهم: فهاوتج تشگ الگلب

حجاهة و طلع گمت بسرعة بدون تفكير لبست الشال رتبة و العباة طلعت حذاء فلات اشتراهة من زمان من جنت اراجع بالمستشفى اخذتهة بيدي

طلعت لگيتة منتظرني بالباب لبستهة وگفت ادگم بالطباقات مال العباة قفل باب المطبخ اشرلي اطلع

مشيت فرحانة مامصدگة طلعت من خنگة البيت سد الباب البرة ارتبكت من خلة ايدة على جتفي بهدوء

حركني گدامة مشينة بالشارع جان الجو بي برودة و الهوة مو قوي الشارع هدوء و ظلمة مشينة لحد

ما طلعنة على شارع رئيسي كلة محلات و اضوية وصوت لطم و قصايد واكو هواي ناس تمشي 

باوعت على الافتات لمعلگينهة رفعت عيوني الة حجيت مستغربة:شكو ليش يلطمون

رد بدون مايباوعلي:الليالي الفاطمية 

هزيت راسي بفهم ماكو تلفزيون واعرف شنو المناسبة لتصير تنهدت بضوجة هيج وكت يطلعن 

صفية و غفران للمجالس لو يسون بيتنة و تجيتة الملاية شكد احب من تجينة لان ماكدر اطلع للبيوت

            

              

                    

مشينة على الرصيف جان بنص الشارع موكب مسوين تشيع رمزي صوت السماعات عالي وياهم رادود و شباب هواي يلكون و اكو ناس تصور 

حسيت بأيدة على حتفي يمشيني كدامة محاوطني 

لحط ما طلعنة من الزحمة فتنة بشارع مابي هوسة

دخلنة للمحل جان حيل جبير وانواع و اشكال بي ضليت بالباب التفت الي لزم جف ايدي يمشي 

افتر على الرفوف كلهن اني اباوع مثل الماشايفة و صدك ما شايفة اول مرة بحياتي ادخل محل حلويات 

دلهم: اخذني لتردينة

رفعت راسي الة مافاهمة:شگلت

دلهم:كلشي ما گلت رجعي لصفنتج

تجاهلتة اريد املي عيني و استمتع اشوف انواع الجبس و الحلويات سحبني وگفني گبال البراد

طلع منة باكيتين عصير و قوطية ببسي و قوطية ثانية ماعرفتهة شنو وراهة اشترة ريوكات وراح دفع

طلعت امشي بصفة عيني تتأمل كلشي نزيت من عصر زندي بيدة حجة بهمس:نزلي عينج 

عبست بضوجة ضليت مدنگة لحد ما رجعنة للبيت دخلت گبلة وكفت بالباب اجة خلة العلاكة بيدي

فتح الباب دخل شغل الگلوبات نزعت عباتي شلت الحذاء دخلتهة خليتهة جوة الدرج و علگت العباة 

رجعت طلعت الريوگات خليتهن بالثلاجة وكف بصفي مد ايدة اخذ القوطية و رجع تمدد بالهول

كدامة حاسبة و طابگ المخدة مرتكي عليهة حجة يرفع عيونة الي:طفي الگلوب 

رحت طفيتة خليت العلاگة بصفة مشيت للغرفة طكطكت اصابعي مترددة اسمع صوت مبين يتابع 

فلم اخذت مخدتي و الغطة رجعت جانت عيونة على الباب من طلعت نزل نظراتة للشاشة كعدت بصفة 

فتح الجبس خلاه بينة اخذ قوطية الببسي فتحهة خلاهة گبالي و رجع يشرب من القوطية لبيدة 

رفعت عيوني متحمسة اشوف الفلم الطالع و شاشة اكبر من الموبايل تبين المشاهد واضحة و حلوة

ضليت اتابع هو يشرحلي شنو يصير بكل لقطة مبين يعرف الاحداث واني كاشة روحي من القصة 

غنوة:شلون هذة يقتلهم مايدرون ماعدهم گرايب يعرفنة 

دلهم:يتبع اثر اشخاص ما يلتقون بأهلهم تواصل قليل بينهم و بين القريبيين هو يتقمص هيئتهم يعيش بيت الضحية و ياخذ كل ممتلكاتة

لميت البطانية علية جسمي مقشعر منة رديت اباوع للشاشة بضوجة:ماحبيتة شلون ينام مرتاح هو كاتلة واحد ما يخاف من الشرطة

دلهم: ليعيش طول عمرة بخوف يتعود هو عدة سلوكيات مجرمين شلون ما انتي تحبين التنظيف هو يحبل يجرم بالناس و يدفنهم 

غنوة:هاي البنية شرطية 

رد يحك رگبتة:امم محققة 

غنوة:جا ماتلزمة اشو بس تفتر جنهة سعفة

            

              

                    

نزل عينة علية حجة رافع حاجبة:ياهي جنهة سعفة

غنوة:هاي لتفتر وياه 

دلهم:انجينا جولي جنهة سعفة

هزيت راسي رديت مستغربة:اي شوفهة ضعيفة

و طويلة حتى وجهة مو حلو عجوز 

دلهم:اسكتي اسكتي ماكو ممثلة مميزة مثلهة

غنوة:معصعصة

دلهم:تابعي و اسكتي

هزيت ايدي مدري شبي نفعل رجعت اتابع اغمض عيوني كل ما يطلع مشهد واحد يموت لو يندفن

حجيت اغطي وجهي :شوف شلون گتلة يمة مايخاف لو اني بمكانة گلبي يوگف

دلهم:انتي تموتين گبل لايموت ضحيتج

لفيت البطانية علية تمددت اكل بالنستلة فتح العصير خلاه يمي عدل مخدتة نزع التشيرت گلبي طاح ببطني بسرعة رجعت عيوني للشاشة اباوع

جان مشهد هي واكفة تعلگ بصور و ندك الباب مالتهة و اجة خذة المجرم فتحتة الباب و دخل 

حجيت فازة بخوف:راح يكتلهة هاي المعصعصة مو گتلك ثولة تدور عليهة هو وياهة

رفع عينة الي يضحك باوعتلة ما فاهمة حجة يسحب باكيت الجكاير من وراه : اي خوش راح تموت موتة 

غنوة:راح اشوفهة و اتشفة لان ضوجتني 

دلهم:وينج و وينهة ونغثيتي منهة

غنوة:مافتهمت

نفخ الدخان ما رد رجع يباوع ماكو لحظات حسيت بشي غلط ذولة الي بالفلم يسون اشياء كلهة عيب 

خو ايدة ايدة الدكم و يضغط و تطلع وحدة اسوء من الثانية حسيت بخنگة و گلبي صار يدك حيل درت

وجهي للحايط قصص وروايات عراقية كرار صلاح تغطيت حتى وجهي غطيتة تمنيت ارجع لبطن امي ولا شفت لشفتة غمصت حيل 

صرت اسمع صوت رمي و حركة قوية مبين رجعو يركضون ورة هذة ضليت اسب بهاي المعصعصة

غمضت عيوني منعسة لحظات اسمع الصوت لحظات يروح بين غفوتي و الصحوة حسيت 

الغطة نرفع عني صار على جتفي وراهة غفيت ماكعدت الة على صوت المطر و هوة عالي يحرك 

الباب مال الشباك الضالة مفتوح حسيت بأيدي نرفعت فتحت عيوني شفت بس ظهرة من گام

المخدة ثانية بصف مخدتي و فراش جواي ما جان موجود من نمت جنت نايمة على المدة و متغطية

بسرعة صحصحت شفت ضلة بالحايط من رجع جان الهول ظلمة بس صوت الهوة برة البيت هدوء

شال البطانية مدد بصفي عيوني عليه بس هو مامنتبه مبين كعد على صوت باب الشباك راح سداه

رجع نام غطة راسة حجيت بهمس:ولا تستحي هاي كلهة من وراك العاصفة الله غضب علينة الناس بالليل تستغفر انتة تشوف وحدة مالابسة حجاب يجوز حتى من نمت رجعت شفتهة لوحدك 

غمضت عيوني ادردم عليهة بصوت ناصي لحد ما فززني من گال بحدة:تسكتين لا الطمج على عينج

سكتت مغمضة عيوني حيل فترة وتحسيت بي خلة راسة على مخدتي سحب الغطة تغطة صار وياي 

            

              

                    

بلعت ريگي اتنفس بثگل غمضت عيوني ارجف احس بحرارة جسمة قريبة علية صرت صخرة جمدت ماحرك لا ايد و لا رجل 

اني شنو الجابرني انام بصفة لو اضل نفضت الغطة بضيق ما باوعتلة گمت للغرفة سديت الباب علية

الصبح من كعدت لگيتة ما موجود بس البيت يگول مفجورة بي قنبلة وين جان بالليل وين صار هسة 

الجياس مال الحلويات مطشرة بالهول المخاد بكل مكان و هدومة مشمرة حتى الاحذية جوة الدرج 

صايرة بنص البيت باوعت معبسة دگيت رجلي بالگاع متعاجزة ماحب اكعد بمكان وصخ و هوسة

نظفت كلشي المطبخ كلة كوابة الجاي مسوي وتارس الطباخ بثل و مسوي بيض شامر الگشور فوك السنك و ريحة الزفرة واصلة للسگف

نظفتة رجعت سويتلي ريوك تريكت اخذت الهدوم غسلتهن و عدي كم قطعة هم شريتهن برة رجعت

كل ما امر من الحاسبة اتذكر الفلم اغمض عيوني قوي اريد انسى لشفتة ضليت استغفر روحة و رجعة

صليت ركعتين گبل صلاة الظهر حلفت بعد ما اشوف وياه اي فلم اني شجايبني على ذولة الكفار

سالم جان حتى المسلسل الهندي مايخليني اشوفة لان بطونهم طالعة اذا الممثل بدون فانيلة حتى 

يتعارك وية صفية و تصير بالنعل مرة شاف لقطة بجودا و اكبر گلب علينة الدنيا و شلع الفيش شمرهن

هزيت راسي اصفي افكاري هاي هي خل اتوب حرام

سويت الغدة متأخرة حتى ما اضل كل شوية احميه 

اجة و ريحة البانزين تنشم من بعيد گلبت معدتي 

مديتلة هدومة من الباب اخذهن و فات للحمام 

همزين هدوم الشغل هو يغسلهن اني بس اشم ريحة البانزين اضل اتقيء حتى السيارات تلعب روحي منهن و من ريحتهن 

صبيت الغدة خليتة بالصينية اخذتهة للهول جنت مسوية مركة عدس و تمن وياهن ماعون خيار و خبز

دخل ينشف بشعرة و التشيرت مخلي على جتفة تأففت بضوجة دنگت اكل كعد گبالي شال كاسة المرگة بدل مكانهة خلة التمن بالجهة الثانية

غنوة:احمم ءء البـ البس

دلهم: غضي بصر مو تستحرمين

غنوة:خاف تتمرض الجو بارد

دلهم:لاتصيرين لوتية مايمشن يمي ذني السوالف

هزيت ايدي لزمهة سحبتهة بسرعة ما عاجبة اهز ايدي كدامة طلعت صمون اخذت وحدة خليت 

بطنهة خيار و خبطت تمن و مركة ترستهة سويتهة لفة و كعدت اكل عيني على الشباك التهي بكلشي

دلهم:گومي جيبي ماي

اخذت السطل گمت ترستة من القارورة رجعت نطيتة الة اخذتلي صفنة اريد افرزن هاي عگرب لو عنكبوت لراسمهة على زندة

            

              

                    

جر ثوبي انتبهت كعدت خلصت لفتي سويت وحدة ثانية منتظرتة يگوم حتى اكل براحتي و بشهيتي

دلهم: اليوم تجي اسراء لاتطلعين گبالهة

غنوة:اختك

هز راسة حجيت الف بالصمونة: والله بس تجي تلگاني بالباب كاعدتلهة شنو ماعندي كرامة اضم راسي مامسوية حرام اكللهة انة مرتة

عوج راسة يباوعلي بتفحص حجة رافع حاجبة:انتي شو صايرة تخرمشين و لسانج شطولة

تحمحمت عدلت گعدتي رديت بهدوء:مو اخرمش بس انتة خلي روحك بمكاني ترضة وحدة تضمك ببيتهة 

رد ببتسامة:اي ليش لا

عبست من جوابة حجيت افهمة: شلون اي اني مو مخطوفة ولا بايگني ليش ماتگول لاختك علية

دلهم: ماريد وجع راس من أسراء من ترجعين لهلج تضل تسأل و تستفسر مالي خلگهة

بلعت ريگي احس وجهي صوفر من السمعتة عبالي نسة سالفة الرجعة لهلي لان بعد ما ذكرهة ولا گال

غنوة:ارجع 

هز راسة رد: امم ترجعين جا شعدج يمي

غنوة:تطلگني

دلهم:شي اكيد

نزلت اللفة بالصينية حتى اللگمة وكفت ببلعومي دمعتي حسيتهة راح تطيح صارت بطرف عيني

گمت رايحة للغرفة صاح وراي ما رديت رجع صاحلي بحدة التفت الة گلبي يضرب بصدري الخوف ملاني

دلهم:تعـــاي

غنوة:شتريد مني 

دلهم:بعدنة نحجي خل اكمل 

غنوة: ماريد اسمعك 

حجيتهة بغصة ماكدرت أضم حزني و خوفي دخلت للغرفة سديت الباب ارتكيت عليهة اعض بصابعي

شلون ارجع شگللهم مايصدگون نوب ارجع مطلگة ماعدنة مرة تتطلگ عمتي من تطلگت كتلـوهة 

شبعت قهر الناس كلهة تحجي عليهة كعدت اعصر بأدية ماريد اصير مثلهة لو اموت ولا هيج اعيش 

لليل واني سالفة توديني و سالفة تجيبني ضليت اخطط شسوي اذا صدك طلگني و رجعني لهلي

كفشت شعري بضوجة اجر بي سمعت صوت الاذان استغفرت گمت توضيت و صليت لفيت شعري 

دخلت للمطبخ اخلي الكماشة فوك راسي حتى تلزمة

شكد اكرهة كفشة و صاير جنة سبرنگ حلقات 

تذكرت حجايتة من گال شعدج ضالة يمي طلعت خيارة و طماطمة ثربتهن اخذت الماعون للغرفة 

تعشيت وحدي وراهة طلعت لميت الهدوم هو كل شوية يباوع بالمطبخ منتظر العشة ماكو ماسويت

لميت بس هدومي عفت هدومة على الحبل بالبرد

رجعت للغرفة طفيت الضوة مددت اتگلب ملانة

حسيت بي من وكف وراي حجة يحرك جتفي:غنوة نمتي ؟

گلبي صار يرجف من سمعت اسمي بصوتة شعور غريب بس تحملت مشاعري سكتت غمضت عيوني 

            

              

                    

عافني راح دقايق وسمعت صوت المواعين عرفتة سوة عشة لروحة ثاني يوم هم گالب البيت گلاب

تحملت الهوسة رتبت بس غرفتي مر اليوم كلة متجاهلتة كلشي ما اسوي بس كاعدة ارسم بالاوراق لبگتهن من عرفتة و الاقلام 

جنت بس اشوف شي بسرعة اتعلمة و ارسمة ونستني السالفة ضليت ارسم لو باب لو شجرة هيج

للظهر اجة بس هالمرة مبين كلش تعبان و روحة طاگة جاي مشي اديه كلهن دهن اسود ريحتة بانزين

من خوف طلعت هدوم حضرتهن بالحمام هو بالحديقة يم الدراجة مبينة عطلانة و جاي هيج بيهة

ساحلاهة سحل 

على ما دخل للحمام رحت گليت طماطمة حضرت غدة شلون ما جان رجعت لغرفتي العصر يالله طلعت الطاوة على حطتهة هو نايم بالغرفة 

استغربت عفتة نايم شسويلة مرن يومين نجبر هو يلم هوستة و يغسل هدومة رجع مايحجي اي كلمة

اني بس اطبخ و اكل و أنام لو بالليل اتصنت للافلام

ليتابعهة مافهم شي كلة انگليزي بس اسمع اصوات

اختنگت البيت فارغ علية محد اسولف وياه لا اعرف شي و التهي بي جزعت رجعت ارتب و انظف بس هم 

طگت روحي ورة اربع أيام من الحرب الباردة سحلت مخدتي كعدت بصفة اتابع فلم مطلعة بالمحاسبة 

باوعلي بطرف عينة غلست مد ايدة بيهة حب كرزات

اخذت منهة كعدت اكرز مافهم على شنو القصة

كرامتي ماتسمحلي اسأل بس جان بي لقطات تخوف كل شوية اگمز بنية صغيرة واكفة ببيت و كلشي 

يتحرك البيبان تتراگع هي تصرخ و تجي وحدة تحضنهة و تشيلهة وصوت موسيقى و ضحك

يخمش الگلب احس روحي تنسلب منة 

التفت ليورة اتخايل لشفتة تندمت لفيت روحي بالبطانية اريد اروح للغرفة يالله هذة فلم همة يجذبون اني اصلي يعني مايصيرلي شي مثلهم

شلت البطانية و المخدة رحت لغرفتي و الصوت بعدة واضح و الموسيقى توترني و تخوفني

طلعت حجيت متضايقة:نقص الصوت 

رفع راسة فجأة حجة بسرعة:ورااج

عطت اتلفت انفض بروحي :شكوو شنووو 

رد برود:وراج موبايلي على الشحن جيبي 

خليت ايدي على گلبي روحي راحت هذة يتملعب

اخذت الموبايل نطيتة الة مادة ايدي هو يتابع 

درت وجهي ماريد اباوع حجيت:هذة الموبايل

رد بنبرة استغراب:شسوي بي

غنوة:غير انتة گتلي جيبي

حجة ياخذ الموبايل من وراه:هذة موبايلي منيلج هذة البيدج وين جان

بلعت ريگي رفعت راسي اباوع بالبيت رجعت اباوعلة بيدة موبايل لونة ازرگ من ورة اعرفة 

موبايلة گلبت الي بيدي اول مرة اشوفة من ورة ابيض تيهتة خايفة رجعت خطوة ليورة طگيتهة 

بجية مرعوبة اباوعلة بسرعة نهض واني شردت

لزمني يم الباب روحي راحت گلبي صار يدك بقوة 

            

              

                    

معقولة مو دلهم اني سمعتة كالي جيبي الموبايل 

بس هذة مو الة ، احجي هو كبالي ماسمعة شيگول

حضني يمسح على شعري حجة متوتر:اسف شبيج اتشاقة وياج عليمن تبجين

رديت صوتي يرجف :ءء انتة انتة والله گتلي وراج الموبايل على الشحن 

دلهم: اي گتلج موبايلي الثاني هذة اتشاقة وياج

دفعتة بقهر لان يضحك علية و مايقدر خوفي مسحت دموعي مد ايدة يريد يلزمني وخرت عنة

غنوة:عوفني مو تريد ترجعني لهلي يالله رجعنييي ماريدد اضل يمك عبالك مشاعر الناس لعبة بمزاجك

يمتة ما تريد تضحك و تصير حباب نوب تضوجني وخر من باجر ترحعني لهلي ولا اريدك ولا اريد بيتك

دلهم: شكد تلغين شسويتلج هسة مايصير الواحد يتشاقة منين تخافين هو بس اني وياج هنا

غنوة:كون يركبك جنييي

دلهم: لا والله هاي اقوة شي عدج

دفعتة رحت كعدت گبال الحاسبة بعنادة الة اكمل الفلم عبالة اني خوافة احنة بالقرية عدنة شكد 

طناطل مرة واحد طلع لسالم و ضحك عليه عبالة علوان ضل يمشي وراه من رجع لگة علوان نايم 

اتابع عيني كل شوية تزيغ لمكان بخوف بس صمدت تمددت متغطية حالفة اكملة هو يراقبني منتظر 

افلت نزيت من اصوات الفلم لميت الغطة علية

سمعت طكة صوت دراجة مر خمش گلبي وياه

نعست مادري شبي احس الاحداث تكرر صار شكد مامخلص اغفى و اكعد هو بعدة مشتغل و همة يركضون وهذة الجني يركض وراهم يخوف بيهم

حسيت بي قرب تغطة وياي سحب راسي لصدرة غمضت عيوني اريد ادفعة بس مادري شصار غفيت

هم گعدت و الصوت مشتغل و دلهم غافي ماعرف اطفي ندستة اكثر من مرة بجتفة طگت روحي كلش

حجة بنعاس:ايدج وخري مني

غنوة:بس طغي الفلم گلبي مات من صوت صريخهم

مد ايدة من فوگي يدوس بدون مايشوف من تعب نهض يباوع للحاسبة طلع من الفلم ردت روحي 

طفاه رجع يخوف بية مايخليني ارتاح حضني بثنين اديه دفعتة بضوجة حجيت:وخر فدوة عوفني 

حجة بنعاس:شش نطمري

غنوة:بس خل اتنفس شوية اختنگت

رخة لزمتة دفعتة بسرعة گمت حجة بنتر فاجئني:تعاااي ارجعي

غنوة: مااا 

رفع راسة ركضت للغرفة دخلت قفلت الباب صح خايفة بس اقرة قرءان و أدعية لهيت روحي بيهن

لحد الصبح كعدت على ضوة الشمس البردة مفتوحة گمت منعسة بعدني طلعت اتثاوب البيت فارغ هزيت ايدي على الهوسة لمخليهة

تريكت نظفت البيت كعدت بالمطبخ اقلم بانية كملتهة طلعت تمن لگطتة خاف بي شي غسلتهن

سويت غدة رحت للحمام تنازلت عن عنادي و غسلت هدومة و شريتهن بعدني واكفة يم الحبل 

            

              

                    

انفتح الباب على حيلة نجر السيم مالتة و انفتح دخلت اخت دلهم بيدهة جنطة و جهة معبس 

وابنها يبجي و رجال وراها يسولف ماتسمعة

حتى اني ما شافتني دخلت للبيت شمرت غراضهة لمحني الولد ركضت جنت بدون حجاب ضل فاك حلگة هي من انتبهت علية هم نصدمت 

عصرت اصابعي سوة بخوف تقدمت حجت بنتر:ياهييي انتيي

رديت برجفة:مـ..مرت مرت دلهم والله سألي ما اجذب 

توسعت عيونهة حجت مامستوعبة:دلهم اخوي 

هزيت راسي گبل لا ارد حجة الرجال:أسراء مني هاي 

التفت الة معصبة:معليك اطلع ماريد اشوفك

وگف بالباب يحجي بنبرة توسل:بس اسمعيني لاتكبرين المشكلة هي مامستاهلة

ردت تدفع ايدة :مستاهلة امك تطعن بية و بشرفي تگلي مامستاهلة تدري لو دلهم عرف والله يجنزكم

 عصام:لاتكبرين المشكلة تعاي واني ارد حگج 

أسراء:كل مرة نفس الحجي و ماتسوي اي شي امك ماتعوفني وصلت حدهة هالمرة بعد مابينة تفاهم تعال لدلهم و احجي وياه حتى تعرف وراي أهل

مسح على وجهة بضيق هي التفتت ذبت عباتهة بالباب داخت اجت تطيح لزمتهة بسرعة كعدتهة

حجت ايدهة على راسهة:امشي عصام ماريد اشوفك موتوني انتة و امك ليمتة اتحملهة بس فهمني 

استغفر دنگ على الوليد الصغير بوسة ماعرف شنو حجة وياه بعدهة طلع اخذت ماي نطيتهة شربت

وگفت اعصر بصابعي ماعرف شگول حجت تنزل الكلاص بالگاع: انتي شني منين ما منين

غنوة:منا يعني من الديوانية 

مسحت راسهة بضيق:يمتة تزوجج 

غنوة:صار هواي ما حاسبة اكثر من شهرين

اشو حجيت هيج هي بجت ضمت راسهة بين رجليهة توترت كعدت بصفهة ماعرف شسوي 

حجيت مرتبكة: ليش تبجين ترة مايحبني يريد يطلگني حتى ارجع لهلي

ردت تعصر براسهة: ليش ما گالــي

غنوة:مـ..مادري والله لان يريد يطلگ يمكن هو هيج حجة لاتضوجين مخبل مايدري شيريد

مسحت دموعهة گعدت منهارة حجت بدون وعي:شسوي خايفة منة خايفة يكتل عصام كل مرة يسكت واضمهن عنة ياربي دخيلك دلهم ما يسكت 

غنوة: على كيفج اهدي مايسوي شي بس بس يجوز يخنگة 

التفت مصدومة:يخنگ شيخنگ

غنوة:محد بس بس انتي اهدي وجهج صار اصفر كركم ايدج ترجف

ردت تخلي راسهة على الباب:هاي من الشقيقة طگت براسي من ضيمهم و مصايبهم 

گمت جبتلهة مخدة تمددت بالهول صاحت ابنهة نطتة موبايل بس ماراداه ضل حاضن رجلي لصدرة

باوعت لأيدهة كلهة زرگة و عيونهة صايرات بنگرة داير مدايرهن ازرگ شفتهة مشگوگة مبين ضاربهة

حتى اني خفت هي تتگلب كل ما سمعت صوت دراجة تفز خايفة حجيت وياهة شوية من قلقهة 

مارجعت فتحت الموضوع ولا سألت عن الزواج ولا علية كدرت اكعدهة دايخة كلش اخذتهة غسلت 

صبيتلهة اگل شوية اكلت هي و أبنهة عيونهة مورمة من البجي تحجي وية روحهة كل شوية تدك على رجلهة و تتحسب على نجاة مدري منو

فترة ضلت تتگلب وراسهة يوجعهة كعدت بصفهة حجيت مترددة:ادلك راسج شوية بلكي يخف

ردت بصوت مبحوح:شقيقة ماتهيد 

غنوة:ميخالف ايدج تعبت خلي اني اسوي

خلت راسهة فوك رجلي كعدت ادلك بي غمضت عيونهة وجهة حار يمكن مصخنة حتى نفسهة مخربط استخطيتهة كلش

التفت لصوت الباب من انفتح جان دلهم واكف مدنگ ينزع ببوتينة بيدة علاليك لازم السرگي

دخل رفع راسة توسعت عيونة مصدوم يشوفهة متمددة بالهول و راسهة على رجلية ادلك بي

ضل يتلافت بينة طاحت العلاليك من ايدة و تطشر التفاح بالگاع هو مثل التمثال جامد من صدمتة 

الفصل السادس من هنا 

شكرا لزيارتكم عالم روايات سكيرهوم