رواية أرض الخناجر الفصل الواحد والخمسون بقلم ايلول
جــويريه:: عفت باب الكنتور ورجعت ليوره خايفه وايدي على گـــلبي الباب رجع انسد من وحده مسحت عيوني اتلفت بالغرفة واحجي بداخلي
" لا اشتبهت ملابس هذن واني شفت غلط"
رجعت اقتربت من الكنتور بخوف وكل شويه التفت ليوره مديت ايدي على يدة باب الكنتور فتحته على كيف واباوع لداخله بخوف وتردد الف فكرة براسي وكل افكاري ما تنعقل واجذب عيوني واكول الشفته مو صح.
القرين شيسوي بالكنتور عيوني بيهن شي هاي ملابس واني شفتهن مخالب لان افكر بالقرين.
احجي واقنع نفسي بهالحجي
مديت راسي من يم باب الكنتور بخوف وتردد ولمحت چف اسود بحافة أرضية الكنتور تمتد منه مخالب طوال ووراه شي اسود ضايع بظلام الكنتور ما مبين غير الچف قربت روحـــي اكثر فاتحة عيني بقوة اركز بالجاي اشوفه
مديت ايدي ارجف ودموعي على خدي گد ما خايفه وكل لحظة صارت بيها هالمخالب على راسي رجعتلي نفس الخوف نفس شهگة النفس، لامسن اصابعي المخالب جريته وعيني للكتله السوده الوراه اجه بأيدي بس الچف شمرته بالگاع گـــلبي يدك حيل مسحت دموعي اركز بيه واتذكر نفسهن والله نفسهن نفس المخالب اللي من الخوف حرمني نوم الليل.
درت للكنتور فتحت بابه الثاني وصار گدامي غطه اسود مثل العباية وچف ثاني، كعدت على حيلي گدام الكنتور اباوعلهن وعقلي من الصدمة ما مستوعب، أحس بلحظة وحدة تراكمت الحقيقة عليَّ، واربط شغلة بشغلة .
خليت ايديي على راسي مصدومة واحلف الروحي
-صــيهد والله صــيهد
ضميت وجهي بين ايديي ابجي واعض بأصابعي شلون ما انتبهت من زمان شكد غشيمة اني ونغشيت هيج كلشي گدامي بس عيوني ما شافت الحقيقة حب البومه الصيهد ووجودها بكل مره يجي بيها القرين، عرف عرف القرين بدون ما احجي عرف اني اخاف من القرين بدون ما احجي، صيحت بصوت اضرب ايدي بباب الكنتور روحـــي محترگة حرك.
عدت بالساعة واني على نفس الكعده والبچي استذكر كلشي لحظة بلحظة كمت على حيلي مسحت دموعي شلت الچفوف ووياهم القماش الاسود ضميتهن بكنتوري وقفلت كنتوره رجعت المفتاح المكانه طلعت من الغرفة غسلت وجهي ودخلت للمطبخ اسوي زلاطه وغصب عني دموعي كلساع ينزلن.
احتميت بحضنه منه.
رجعت غسلت وجهي ورحت اخذتلي ملابس سبحت وطلعت دخلت للغرفة مشطت شعري وخليت مكياج مثل ماجان يتمنى يرجع من الشغل يلكاني طابختله غداه ومنتظرته .
طلعت للهول ارش معطر ودخل هو وكفت اباوعله شافني وابتسم سد الباب واجه يمشي بأتجاهي قبل لا يوصلني گتله
-الله يساعدك.
مد أيده على خصري يجرني الحضنه باس خدي
-ويساعدج، شلونج.
ابتعدت اباوع لوجهه عگد حاجبه بشك وخر ايده من خصري وهز راسه يسأل
-شبيج؟
ابتسمت عيني بعينه
-مابيه شي، تصلي حتى اصب غده؟
سكت يباوعلي ما مقتنع دخل للغرفة واني بالباب عيني عليه اخذله ملابس ودخل للحمام عفته وفتت للمطبخ حضرت المواعين والصينية بين ما طلع توضى وصله صبيت الغده واخذته يمه عاف التلفون وباوع للصينية
شال راسه الي مبتسم واني واكفه گدامه
صــيهد:: الشمس منين طالعة اليوم؟
وكلشي يحجيه ابتسمله عكس البداخلي رجعت للمطبخ اجيبله ماي وهو ماياكل الحد ما اكعد اكل واني بس اگلب بالاكل معدتي نار
صــيهد:: ليش ما تاكلين؟
-شبعانه قبل شوية تريكت.
بقى يباوعلي ما مقتنع دفع الصينية من گدامه
-بيج شي انتِ واحد محاجيج؟
-لا والله محد.
-اهاه چا شبيج؟
ميلت راسي مبتسمه اباوع لعيونه
-شبيه؟ زوجه طبخت الزوجها الغده وانتظرت رجعته للبيت وتلكته بوجهه مبتسم شبيه بعد؟
هز راسه خوش يردد
-اي مبتسم مبتسم!
كام يغسل شلت الصينية غسلت المواعين واخذتله چاي كاعد على الچرباية يحجي وي طــروادة مديتله كوب الچاي لزم ايدي يأشر اكعدي، كعدت بصفة اخذ كوب الچاي وسد التلفون دار عليَّ مادلي الكلاص
-خوطي.
مديت ايدي للخاشوكه خطت الشكر شال الكوب يشرب ويباوعلي بطرف عينه لحد ما كضه الچاي اخذت الكوب منه وهوه گام يغسل نظفت المطبخ سديت الباب وكعدت مختنگه گوه جاي اتحمل اباوع لوجهه، شويه ورحت وراه للغرفة مطفي الضوه ومتمدد يباوع بتلفونه فتحت باب الكنتور اخذتلي ملابس نوم وطلعت للحمام بدلت ورجعت للغرفة لأول مره گـــلبي يدكّ بحقد وحقارة.
اشوف عيونه عليَّ من ضوه التلفون رشيت عطر سديت باب الكنتور ورحت يمه للجرباية وهو يباوعلي بصدمة شلت الغطا من جهتي وتمددت بصفه قفل التلفون عافه على الميز والتفتلي همس بصوت ناصي
-جوري.
-ها.
سكت يباوعلي ضوه الغرفة خافت مد أيده لزندي تلمس ملمس القميص الناعم وزفر نفس بحسره يعصر بزندي
صــيهد:: جاي تعذبيني؟
-لا.
-ما اعوفنج هالمره.
يحجي بصوت يرجف صافن بيه من بقّيت ساكته جراني من زندي جواه وشال راسه يباوع بوجهي دنك وجهه ملت على صفحة مد ايده لزم وجهي من فكي رجعه مقابيله
-لا تديرين وجهج.
باوعت لعيونه صوت نفسه مسموع قرب وجهه يبوس شفايفي ومن حس بيه مثل الجثة مجرد مباعده بين شفايفي ابتعد عاگد حاجبه يرجف وينتر بعصبية
-شبيييج؟
-مابيه شي
شلت ايدي مسحت شفايفي دفعها ورجع اتقرب يبوسني بعصبية عصر فكي بأيده يحجي بغضب
-سوووي مثلي.
ما سويت شي بس أرمش بعيوني وكل ما احرگ گلبه يضغط على فكّي بعصبية نزل وجهه الرگبتي يرجف
-شبيييج؟شبييج عاجبج تعذبيني لا تحرگين گـــلبي جوري تعبتيني چنتِ تشتعلين بأيدي شبيج هسه؟ شبيج؟
شال راسه مد ايده لشفايفي يمسحهن بأصابعه بقوة باوع لعيوني ودنك يبوسني ما بعد شفايفه لم شعري بأيده يجره برخاوة ويحجي من بيت اسنانه
-سوي مثلي
شال راسه يباوع لوجهي بغضب غلّط بحرگة
-حقيره خرب روحج.
شلت ايدي مديتها على رگبته سكت رافع نفسه يباوع لوجهي نزلت ايدي هز وجهي بأيده
-تردين تسوديني انتِ؟
-لاا.
مد ايده على صدر القميص جراه بقوة طكن الدكم ونزل وجهه الرگبتي يبوسني صوت نفسه عالي وايده تضغط علي بقوة، قربت شفايفي الأذنه اهمس
-صــيهد!
مديت ايدي ابعده رفع وجهه يباوع لوجهي
-اريد اشوفك شي.
هز راسه لا يتلمس برگبتي ويحجي بصوت خافت يرجف
-مو هسه.
-لازم هسه.
دفعته من عدي تمدد بمكانه يغلط لزمت القميص بأيدي وگمت للكنتور جريت شال خليته على اكتافي وبأطرافة أغطي جسمي شغلت الضوه اباوعله وجهه احمر وگوه فاتح عينه يباوعلي وصدره يصعد وينزّل بثكل مشيت للكنتور وعيونه تتبعني طلعت الچفوف ودرت عليه مبتسمه باوعلهن بأيدي بلع ريك وكعد على حيله مد أيده على الميز يجر باكيت الجكاير تقربت خليتهن على طرف الچرباية ورجعت للكنتور جبت الغطا الاسود خليته بصفهن ووگفت سانده ظهره على الكنتور وهو يباوعلهن ويدخن ساكت .
درت للكنتور طلعتلي دشداشة لبستها فوگ ملابسي اباوع عليه مكتفه ايدي منتظرة يحجي شال راسه اعصاب يزفر الدخان ومضيك عيونه حجه بنتر
-هسسه شتردين؟
ضحكت اباوعله
-هسه احجي وياك على انُ انت القرين لو صــيهد.
نتر يصيح
-لا تضلين تاكلين تببننن يلله سدي حلكج.
-ما أسدّ حلكي ولا تعلي صوتك بعد ما تخوفني!
فتح عينه على وسعها هز راسه خوش دار طفه الجكارة وشعل غيرها باوعلي بعصبية
صــيهد:: بله شني غايتج بهاللعبة كلها من انتِ لاكيتهن ليش ما حجيتي من اول ماطبيت للقندره البيت شغاااااايتج بالسويتيه.
نتر بصياح وشال تلفونه رگعه بالحايط واني بمكاني ثابته واباوعله ببرود مبتسمه ماخايفه منه مدري من الصدمة مدري من گد ما خفت قبل گمت احس ماكو شي يخوفني بعد حجيت بهدوء
-انتَ شغايتك من خوفتني؟ شكالك گلبك من اني محتميه بيكم وانتَ عيشتني برعب!
يحترك گـــلبي وما ابجي حتى لا يجيني القرين اختنك من البيت واطلع لبره الحوش بس حتى ابقى كم دقيقه وحدي وابجي براحتي وانتَ تجي بكل برود ترعبني وتخرعني، اشگلت الروحك وانتَ تمدّ مخالبك عليَّ وتحضني؟
يالمتدين گلبت الدنيا عليَّ من شفتني بلا حجاب وانتَ تحضني هههههه تحضني ومسوي روحك قرين مو طحت بين اديك مغمي عليَّ ما خفت اموت؟ ماخفت يوگف گـــلبي من الخوف؟
نترت بصياح بجيت مختنگه من تذكرت اللحظة المشت بيها المخالب على جسمي، وهو يباوعلي بغضب ولا چنه مسوي شي وينتر بصياح
-شترررردين هسه؟
باوعتله بحيره شحجي وياه
-ليش هيج سويت اقنعني اني استاهل تسوي بيه هيج اقلها گلي غلطت بحقج لا تصيييييح لا تصيح وتعلي صوتك وتبين انتَ الصح واني الغلط.
شال ايده خازرني يهدد
صــيهد:: نصيييي صوووتج؟ نصي صوتج لا اگوم افرك حلگج فرك.
هزيت راسي خوش ومشيت بساع اريد اطلع من الغرفة ركض وراي جرني من ايدي ودفعني على الچرباية وأكف كدامي بعصبيّة
صــيهد::ررردتج تخافين تطلعين.
-شنو؟
دار وجهه ومشه جر النفاضة طفه الجكارة وباوعلي يريد يحجي بهدوء مايگدر سكت شويه يله گال
-اول مره طلعتي بيها وگفتلج بين النخلات لا لابس جفوف ولا صخااام بوجهج وكفت ردتج تخافين وماتطلعين بعد بس انتِ وين اكو واحد يهمج اكو صلف مثلججج؟ رديتي طلعتي وكل مره اخوفج وما تهابين.
ساكته اباوعله بس دموعي تجري حتى لو برر ماتبرد نار گـــلبي. كمل كلامه بنتر
-النوب سمعتجن تسولفن على القرين وتذكريت مره وهـــب وبريا سووا مقلب بسليم لبسوا قناع اخذت منهم بس الچفوف ردتج تصدكين سالفة القرين وتبطلين تطلعين بره.
-ههههههه والله يعني عادي تموتني من الخوف المهم ما اطلع برا، جنت اخاف منك اكثر من القرين ليش مر احيت وكلت لا تطلعين.
-انجبييي يللله يلله سدي حلكج على اساس ما گااايل انا ما حاجي ووين انتِ تخافين تهابين احد صلفة.
يحجي وجر الجفوف بنتر شالهن يضمهم بالكنتور وكفت بساع مشيت يم الباب فتحته دار عليَّ خازرني
-تعااااي!
-لو تموت اقبل ابقى يم جده اشبع كتل ولا اشبع مذله
سد الكنتور طلعت بساع واحس بيه اجه وراي طلعت من المشتمل الف بالشال على راسي درت عليه يمشي وراي ويحجي بعصبية
-الا اكصصص السانج.
مشيت سررريع اذا اروح للمطبخ يلحكني دفعت باب الصاله ودخلت جدي متمدد وجده كاعده تباوع للتلفزون وسعاد وخالي وليد كاعدين يمها يشربون چاي مسحت دموعي وهم يباوعولي مستغربين اندفر الباب وراي ودخل صيهد بعصبية ركضت وجدي كعد على حيله صرت بظهره ابجي واباوع الصيهد عيونه تنكط غضب
-تعااااي.
شعلان:: شنييي شمالكم.
اجه بساع مد ايده يريد يجرني من وراه جلبت بظهره حييل كام خالي وليد جر صــيهد يصيح عليه
وليد:: وره ظهر جدك شلون تجرها.
وهوه عيونه عليَّ بغضب وجدّه تحجي وندى وبدور يباوعن مستغربات
-جدو ما اريد صــيهد اريد اريد اتطلك منه.
صاحت جده
-عاااين بت نضال شترريد حتى اكسر ظهرج كسر.
وجدي اهتز ظهره يضحك يباوع الصيهد الينفض غضب گال
شعلان:: ااي جدي ابشري.
وگف على حيله وانه وياه مشه گدام صــيهد واني مچلبه بظهره
-من عين باچر تطلگها.
ابتسم ببرود عيونه بعيون جدي شال راسه باوعلي ورجع يباوع لجدي
صــيهد:: تكتر ولا تحط روحك بيني وبين مرتي.
وجدي يضحك شال ايده يطبطب على جتفه گاله
-تطلگها ورجليك فوگ راسك لا أكسر ظهرك
فتح عينه بغضب ومد أيده من وره جدّي سحلني صرخت مچلبه بأيد جدي وابوه مچلب بيه وهو يسب ويغلط بحرگة وعصبية أحس ايدي انملخت بأيده جراني حييل ما گدروله واني بكل حيلي مچلبه بشعلان وجده تصيح
-ياااا يااا ولك صــيهد هلاه يااا خايب هدها.
جراه ابوه حيل ضربه راشدي وجدي جرني من ايده دفعني على جده وغلط على صيهد بعصبية
-چلب شلون تجرها من واااي
وليد:: امشي اطلع بررره.
وهو تخبل يدفر كلشي گدامه ويصيح بغضب
-خرررب روحكم انعل والديكم يشهد الحسين ما اطلكهااااا مالكم غرض، مكيييف مكيييف شعلان مكيييف .
يصيح ويهد على شعلان وابوه يجر بيه وجدي يصيح
-اطلللع بره يله ما اشوفنك امشي غاد للمعامل چلب امشيي.
صــيهد:: عاااايني حيوووانية عاينــي يشهد الحسين لو تمووووتين ويشيلونج جنازة من گدام عيني ما اطلگج بت القندره انعل ابوج لا ابو امج.
وجدي تخبل طلع وراه يغلط وجده بصفحة تغلط مدّت ايدها تضربني وسعاد تكلها
سعاد:: عابره سبع شطوط هاي.
اجت رغد جانت نايمه فوگ جرتني من ايد جده وهي تغلط وصوت جدّي وصيهد وخالي وليد بالحوش عالي وخاله ايمان تصيح عليَّ تعالي مسحت دموعي وصعدت فوك ما اريد اروح يمها ترزلني.
ضميت وجهي بالغطا ابجي واحجي وي روحـــي كل مره اني الغلط بس هالمره هوه والله هوه، الدنيا تنگلب اذا وحده زلت وياه بحجايه بس هو يختلف على راسه ريشه حتى اخطائه عنده صحيحه.
صعدن وراي رغد وبدور رغد جرت الغطا من وجهي
رغد:: اكعددي اكعدي بله شكو شني على كلشي وصحتي اتطلك هيج هيه جوري.
ابجي يصوت وخنك ادري لو شما احجي محد راح يشوف الموضوع مثل ما اني اشوفه وكلها راح تستهان بالسالفة ويشوفها عادية وما تستاهل كل هذا محد عاش العشته ومحد خاف گدي شلون اداري الدمعة بعييني واضم خنگتني ما ابجي حتى لا يجيني القرين.
جرت ايدي بــدور من وجهي نترتها منها وحجيت بحرگه
-عليج بداعت امج انتِ متفقه وي صــيهد هوه خلاج تحجين بالقرين وتخوفيني؟
وبدور تلفتت ليوره خايفه وشهكت
بــدور:: شفتي القرين؟
جريت المخده خليتها على وجهي اصرررخ وابجي جرتها رغد وبدور تصيح
-كتلجننن كتلجن القرين صدددكني شافته جــويريه .
ضربتها رغد تغلط عليها وجرتني من ايدي كعدتني
رغد:: كافي لا تضلين تشاهكين خل افهم شمالكم؟ شني حسدناكم.
-وووولج مسوي روحه قررين خارعني من اجيت للقرية الهسه يلبس جفوف ومخالب ويخرررع بيه.
ابجي بحرگه واثنينهن صافنات بوجهي مدت ايدها بــدور على ايدي وهي تگلي
بــدور:: لا جوري ترى القرين حقيقة.
رجعت رغد ضربتها خازرتها
-سددي حلكج.
سكتت بــدور واني مگطعه روحـــي من البجي مقهوره حييل كالت رغد
-انه ما أبرّر الصيهد وحقج غلط وياج بس مو تصيحين اريد اتطلك مو هيج جــويريه جان خليتي السالفة بينج وبينه ازعلي منه ليش تحرگين گلبه وانتِ تدرين بجدي يكيف بخرابكم حتى يتشمت بصيهد.
رغد:: احجي وهي دموعها تجري مهضومه حيل تمددت وغطت حتى وجها تبجي بصوت حرت وياها طردت بــدور وضليت يمها احاجيها بس اريدنها تسكت ماكو
-خاب هسه راحن عيــونج عليمن؟
جــويريه:: على حظي الخايس الخلاني بلا اهل وسند وخله صــيهد يتقوى عليَّ وفوگ ماهو غلطان يصيح ويغلط.
-يله كافي بچي كومي غسلي وجهج وانزلي يم امي تريدج.
-عوفيني رغد عوفيني انام.
مسحت دموعها وغمضت عيونها طفيت الضوه عليها ونزلت جوه جدي يتعارك وي ابوي لان صــيهد حلف ما يروح للمعامل وجده تحجي على جدي ما راضيه بسالفة الطلاك طبيت للغرفة يم امي ندى ورضا يمها، عاينت لندى ايدها على بطنها وتسولف الامي گالت امي
ايمان:: صيحيلي جــويريه .
-عوفيها يمه مو هسه ضايجه وماتدري بروحها شتحجي البنيه محترك گلبها بعدين حاجيها.
سكتت محترگ گلبها ما تدري تلوم منو بيهم بس تحلفت بصيهد وتخابر عليه ما يجاوبها، وي صلاة العشا صعدت لجويريه لگيتها تصلي عيونها مورمه بس كضت صلاة كتلها
-امي تريدج.
عاينتلي بقهر
جــويريه:: ترزلني بس اروحلها.
سكتت اعاينلها لفت السجادة وگامت وياي نزلنه سوه جده وجدي بالهول طبت جــويريه يم امي شبگتها امي وهي بچت تشكيلها على صــيهد وامي تگلها
-اطيحلج حظه والله شو عاينلي جوري يمه.
شالت وجه جوري من صدرها مسحت دموعها تحاجيها وهي تگلها
-تقبلين على سوالفه خاله تقبلين؟
ايمان:: لا ما ارضى واخذلج حگج من بين عيونه.
عفت جــويريه يمها وطلعت اسوي العشا اجن يمي ندى وبدور وحده فاهيه ووحده مريضة ورضا يفتر علي كلساع وصاح
-نمرشه.
سديت حلكه بأيدي اسب بندى
-لو بس اعارف وين سممع ولكفها.
ندى:: عوفيه شبيج خلي ابني يتعلم اي ماما اسمها نمرشه.
جر ايدي من حلكه يصفك گدامي ويصيح
-نمرشه نمرشه .
-احتركت امك.
رضا:: احترگت امج.
صحنه اثنينا انه وندى
-يااااا.
طب وهـــب وركضله رضا شارد شاله وهـــب وهو يضحك الخايس گالتله ندى
-تقبل يغلط؟
ووهب يضحك ورضا حاط ايده بحلكه ويعيب على امه
وهـــب:: عليمن غلطت.
شال أيده رضا يأشر عليَّ ويگله
-نمرشه.
عاينلي وهـــب بطرف عينه وانه درت وجهي للطباخ شارده من عيونه كالتله ندى
ندى:: يگلها احتركت امج.
وهـــب:: ايا خايس ووولك احتركت امك انتَ.
ندى:: باوعتله رافعه حاجبي ورضا بأيده يضحك، نزله وراح غسل وصله شكد افرح من وشوفه رجع للطريق الصح مرات كتلات صيهد يجيبن نتيجة .
ساعدت البنات بالعشا وهو بس تعشا طلع وي ســليم وبريا
بقيت للساعة ب١٢ بس اريد رضا ينام شل حاالي يله نام، كمت من يمه كعدت يم الكنتور اسفط الملابس ودخل وهـــب
-ها حبيبي شسوين؟
مد ايده الي استندت عليها ووگفت سديت الكنتور
-وين چنت تأخرت؟
مشه يخلي تلفونه على الشحن ويحجي وياي
وهـــب:: چنه متابعين لعبة وتأخرنا.
هزيت راسي خوش عبالي هاي هي راح يبدل ويجي ينام شفته لبس ملابس الشغل
-وين رايح.
-للگيعان نسگي اليوم.
-لا والله؟
هز راسه شكو مستغرب.
-يعني من تدرّي بروحك راح تخلص اليوم بالگيعان جان رجعت شويه من وكت اشو اشوفك بس وكت الاكل.
عاف الملابس ودار علي علگد حاجبه
وهـــب:: خير بطه؟ شني تحاسبيني طالع بطران غير اشتغل؟
-هسه طالع تشتغل بس جنت طالع تتونس.
هز راسه اي وجر ملابسه يحجي بهدوء غير قميصه ولف الچراوية على راسه وكف گدامي لم وجهي بين اديه
وهـــب:: صيري عاقله حبيبي وبطلي تحجين هيج هاي سالفة وين جنت وليش تأخرت انا ما احبنها.
دنك يبوسني وخرت من گدامه جراني من ايدي خازرتي
-ندى!!
جريت ايدي من عنده ما عافها فاتح عينه بخزر وأشر على المكان الچنت واكفه بيه گدامه
وهـــب:: ردي لمچانچ جاي ابوسنج شني توخرين؟
مديت ايدي افتح اصابعه من أيدي الثانيه وخرت منه وهو خازرني
-روح بوس بريا وسليم.
حجيتها وتمددت بمكاني وهو واكف كدامي وخازرني بغضب
- يصير خير بطه يصير خير.
طلع ورگع الباب وراه حيل فز رضا يبچي، كمت اسكته واحجي على وهـــب بداخلي تجي ايام ما اشوفه اذا مو بالشغل يگابل الولد، وتجيه ايام شحلاته.
اجت رغد اخذت رضا يمها واني گمت تمددت بفراشي مغثوثة من وهـــب وارجع اكول لا هو وين اكو منه اللي حاضن ابني جنه ابنه وما تخلى عني رغم كل الصار داراني اول ايام العمليه وحتى من اريد اسبح يدخّل وياي خايف عليَّ من كلشي، ابتسمت اتذكر مواقفة لحد ما غفيت شويه وحسيت بوجهه برگبتي
-بطااتي.
فتحت عيوني لازمه بأيده وهو يضم وجهه برگبتي يبوسني ويردد
-انعل ابو الگيعان لا أبو سليم وبريا يروحلج فـــدوه هالخياس.
ضحكت احضنه مغمضه عيني
وهـــب:: چا اكعدي لا تنامين.
-نعسانه.
وخر من عدي
وهـــب:: نامي نامي انا رايح لبريا اقلها من انامن يشبگني.
ضحكت اباوعله وهو نزل من الچرباية يبدل كتله
-روح يتخيلك رنـــه.
دار علي شايل حاجبه
-ما بيج صوج، انا قشمر وشردت من الگيعان اجيتج.
فتحتله ايديي
-تعال حبيبي تعال يا گـــلبي .
ضحك عاض شفته سد باب الكنتور واجه يمي دنك يبوسني بلهفة وحب
-مشتاگلج.
باوعت لعيونه ذبلانه
-مو گدي
قرب شفايفه يبوس وجهي وشفايفي، ايده تطوف على جسديّ برخاوة لمسة كافية تنسيني مرّ الايام ووجعها همست بصوت ذبلان انبهه
-بعدني موجوعة وهـــب.
شال راسه لم وجهي بين أديه نفسي يرجف وهو عينه ذبلانه مبتسم نص ابتسامه
-ادري يا عيون وهـــب ولا تظنّين انا من اجيج بس من اريدج؟ المج الحضني بكل وكت انومج على صدري ولو بيني وبينج شبر ما اتعداه اذا ما انتِ راضيه ومرتاحه .
نام على ظهره وجرني برخاوة حطيت خدي على گلبه وهو ايده تمسح ظهري بحنيه زفر نفس بحسره
-احبنج بطه
-اموتن عليك
ضحك من كل گلبه ولمني على صدره بأثنين اديه
-اروحلج فـــدوه .
شلت راسي من صدره اسأله على سالفة القناع الحجتها جــويريه گال
-خرب وانا اكولن وين ولن
-يعني صدك انتم جايبينهن؟
-اي بوكتها سوينه مقلب بسليم بس ما خاف وصدفة امي شافتني لابسهن چان وياهن قناع كامل مو بس چفوف اول ما شافتني صرخت نخرعت ولكفنه صــيهد الخايس گطع علينه حزام حتى ســليم فوك ما احنا غادرينه انكتل ويانه.
-بس خطيه جوري جانت حيل تخاف خارعها
-تكبر وتنسى.
-هااه ليش ما تگول اخوي غلطان.
ضحك
-ليش ما تكولن صــيهد صارلها كلشي حتى قرين ههههههه خرب حضي الا انصب عليه.
-لااا عيب النوب يگولون ندى تحجي كلشي لرجلها
ضحك شويه وغفيت وفزيت من خابروه الولد كام كوه على روحه راح للگيعان شويه وكعدني رضا كمت وياه لكيت رغد كاعده ومريگته گالت
-راح اخذ ريوگ واروحن اشوف سلطان
هزيت راسي خوش
-من اهلي يكعدون كعدي بــدور تسويلهم ريوك عفيه.
-اني اسوي مالج شغل روحـــي .
رغد:: غطيت الصينيه ورحت بدلت نزلت للمطبخ شلت الصينية وطلعت بعدني بباب المطبخ وصار بوجهي صــيهد توه راد وجهه ما يكصه السيف، يريد يمشي للمشتمل ومن شافني حجه بعصبية
-هاي بت الحيوان وين؟
-ياهي؟
-جورررري.
-احم نايمه!
شايل ايده يهدد
-گليلها گليلها لو تموتين صــيهد ما يطلگج لا تستقوي بشعلان اطيح حظها هيه وياه
-اي.
دار وجهه مشه للمشتمل وصل للباب ورد دار علي خزرني عاين للصينيه وصاح
-وين رايحه؟
-للهذا لسلطان.
سكت ورد اجه مشه لباب الحوش
-تعااي
مشيت وراه مرتبكه من عصبيته وصلني يم باب حوش بيت عمي شاكر دك الباب وعاينلي
-لا تبطين.
هزيت راسي اي وسمعت صوت ريـــمه گالت
ريـــمه:: هاا؟
صــيهد:: ووجعاه.
درت عليه مصدومه وهو حجاها. بصوت عالي التفتنا اثنينا على صوت طــروادة واكف يعاين علينه، هاسكي وراه توه راد من الگيعان
طــروادة:: الوجعتك يا خايسس.
التفت عليه صــيهد يريد يعارك حاجيت ريـــمه فتحتلي الباب طبيت وعيني عليهم صــيهد يگله
-تبيعني علمود بت شاكر؟
طــروادة:: غير مرتي!
-لا يا خايس يا سگاط.
نعاين عليهم من يم الباب انه وريمه طــروادة يضحك وصيهد صدك محترك گلبه، وريمه بس لمحت سيارة ســليم سدّت الباب درت عليها اسألها
-شلونج؟
-الحمدلله هيج هيه بعد ما بينتي؟
ابتسمت متحسره
-سلطان شلونه، كعد لو بعده؟
-توه كعد روحـــي يمه اهلي بعدهم نايمين.
مشيت للغرفة وهي وياي فتحتلي الباب شال راسه عباله ريمه عيونه بعدها ذبلانه، شعره ولحيته عاليات والضعف ماخذ حيله دخلت يمه وريمه من يم الباب تضحك وتكله
-ورد وجهه بسّ شافها.
ابتسملها بتعب وهي تضحك سدت الباب وطلعت باوعلي متحسر
-شلونج؟
كعدت مقابيله الصينية على الچرباية بيني وبينه
-اذا انتَ تصير زين انه بخير
تحسر يهز راسه لا يباوعلي كوه فاتح عينه
سلطان:: اريدن اصير زين لخاطرج انتِ واخواتي بس مهدود حيلي.
-ترجع شوي شوي ترجع سلطان، عوفك من هالحجي سويتلك ريوك غلبت ريـــمه.
ابتسم وريمه جابتلنه چاي توه اكل وما تحملت معدته لعبت روحه وانه وريمه حايرين بيه اجه ســليم وكعدت ميلاد بس شافتني صيحت
-شطيتيه؟ صارله يومين زين بس لفيتي تخربط.
وهو روحه رايحه صيح عليها سليم وهيه ما تحجي وياه ولا تهتم، رجعنه سلطان للغرفة مسحت عيوني مختنگه وهو يعاينلي عيونه حمر مد ايده ترجف يتلمس ايدي
سلطان:: روحـــي، روحـــي نمرشه روحـــي لبيتكم لا تجين هناه بعد.
اعاينله مصدومه غمض عيونه حيل ورد فتحهن
-ما اريدن تنغثين.
ســليم:: مالك غرض بأمي شني ما تجي هناه غير مرتك شنّي السآلفة؟
مسحت دموعي اخذت الصينية وطلعت لحكتني ريـــمه
-رغد عليج الله مو تزعلين من سلطان ترى هوه لان ينقهر من امي تضوجج ما يريدج تضلين هناه هوه حتى ما يحجي وياها
-لا والله عليمن ازعل منه هاي هيه المهم يصيّر بخير.
ريـــمه :: طلعت رغد ودموعها على خدها، طبيت للبيت امي تتعارك وي ســليم عفتهم وطبيت يم سلطان
-سلطان.
فتح عينه مديت ايدي ابعد شعره عن كصته
-لا تقهر روحك مو زين عليك
زفر نفس متحسر
-راحت رغد؟
-اي ومازعلانه منك تكول اتاني يصير زين ونروح لبيتنا.
سكت غمض عينه طلعت من يمه ابوي توه كاعد وطب عليه مرتضى يريد فلوس يكمل سگف البيت ماله صيح وتعارك
مرتضى:: صارررلي سنتين ما كاضيه وسلطان بشهرين بشهررررين كضيتوا المشتمل.
وكفت مصدومة بيه صيحت
-انتَ گلتها مشتمل هلكدوته مو بيت اكبر من بيت جددي وهسه شني سلطان بلعان بالبيت اشو هل تمرض وحتى ما تهنى بيه.
بنفس الثانية جرني يطكني بكل قوته عبالك زلمة گدامه صحت اريد ســليم يجيني ما ادري بيه طلع من المطبخ، وابوي صيح على مرتضى يريد يگوم على حيله وهو بكل قوته يطكني حط ايده ببلاعيمي خانگني يغلط ويصيح
جراه ابوي يغلط عليه
-هدهااا ولك مرتضى
ملخت ايده بس أريد اتنفس وامي وفرح يعاين علينه من باب المطبخ وابوي ما يگدر يجره من عدي ، لحظة انگطع بيها نفسي ونجريت من ايده شهگت كوه اتنفس
سلطان:: يا چلب شلون تمد إيدك عليها؟
شال ايده بساع طك سلطان بوكسي على وجهه وسلطان حيله مهدود طاح ونردم بباب غرفة اهلي صرخت متسودنه صارله ساعة يطك بيه ما نوجعت ولا صرخت طكت سلطان الوجعت كلبي سندته اكعده ارجف وأصيح اريد سجاد يكعد نايم يم عبود بالدوانيه ، ابوي جر مرتضى طكه يغلط عليه وهوه يصيح
مرتضى:: عااين سلطان خاف السحر ما موتك انا اموووتك انا احطلي چيله بگلبك.
سلطان:: نگس ما مرت بتربيتك ايدي عمي شامل وتضل طول عمرك نگس.
دنك بساع جر سلطان من ياخته يوكفه چلبت بأيده اصرخ، طلعوا سجاد وعبود من الدوانيه يركضون متسودنين واثنينهم ما طكوه بس دفعوه وهو يصيح ويغلط ويريد يطگهم اثنينهم وامي عافت العركه كلّها وغلطت على عبود طب ســليم يصيح
-خيررر.
ومرتضى وصياحه خبص الدنيا درت على ســليم مختنگه وكاضه سلطان گتله
-طك سلطان
وكف سليم گدام مرتضى يصيح بوجهه
-شبييييك.
وهوه مثل المسودن شال ايده طك ســليم وسليم بنفس اللحظة رجع طكه تلاگفوا وبينهم عبود وسجاد وامي تسودنت طبت بنصهم تجر بعبود وتصيح
-اطللللع اطللع مالك غرررض بولدي
وعبود بساع جر روحه من بينهم مبتعد ومرتضى يصيح عليه ويفشر
-انعل ابوك لا ابو امك.
عبود:: طالعلك صوووت
ميلاد:: اطلع برررره اطلع خايس بن الخايس.
وسجاد دفع مرتضى ودار على امي متسودن، عبود مشه طلع من بيتنا ومرتضى لحگه، وسليم كاض سجاد وهو يصيح
-شو ماتعارفين تحجييين انتِ ياهي مالته عبوووود شله غررض.
وسلطان جر روحه من ايدي يريد يطلع عرف مرتضى لحك عبود مشه بساع حاني ظهره ركضت وراه خايفه عليه ومالحكت اوصل گبت الهوسه بره واجوا وراي الولد يركضون.
مديت راسي من باب الحوش خايفه عليهم واشوفن عبود وجهه كله دم والولد يجرون بطرواده من مرتضى منومه بالگاع ويخنك بيه ســليم وسلطان يردون بس يجرونه منه وسجاد ركض العبود متسودن، ابوي طلع يغلط على طــروادة وجدي وولد اعمامي التموا جروا طــروادة وهوه واكف يتراجف
طــروادة:: وروح ابووووي يا مرتضى ما تطلع من جوه ايدي غير جنااازه ولك تمد ايددك على عبووود خايس چلب.
شعلان:: يللله يللله سد حلكك مد أيده على عبود شني كسر مجاديفه خبصتنه.
وهو تسودن طــروادة وحاجاه جدي غير كون يكدرون يكضونه بعّد صــيهد بينهم يغلط على هذا ويغلط على هذا وميثم بس يريد طــروادة يسكت، من بينهم اجه سجاد بصف سياج الحوش يمشي بساع ومدنك طبّ للبيت .
وامي حطت العباية على راسها وطلعت تغلط عليهم وتصيح
ميلاد:: يطب للبيييت يطب للبيت ابن شامل ياهي مالتك شعلها بين الاخوه وطلع.
وردوا تعاركوا ملاااخ مرتضى وطرواده وهم بس يردون يفاككونهم جروا كل واحد على صفحة مرتضى مدمه ويهدد ويحلف يسجن طــروادة وهوه يصيح عليه
-رووووح يله روح يا مركز يلفي شكولك الزفره
وجدي يغلط عليه وواكف ويَّ مرتضى، احس بأيد دفعتني من الباب جا طحت بين ما استندت اعاين لسجاد طلع من البيت شهگت وفتحت عيني على وسعها وانه اشوفن بأيده التفگه سحب اقسام ورمه طلقتين جوه رجلين مرتضى صرررخت وصرخت امي ركضت وراه خايفه عليه وسليم بساع شبگه ويجر بالتفكه منه وهوه يصيح بحرگه
سجاد:: يشهد عليَّ ابو فاضل وروووح عمي شامل يا مرتضى اكتلك وما يرفلييي جفن لو مديت ايدك على عبود النوووبه
جروه ســليم ووهب بس يردون ياخذون التفكه من ايدي وجدي يغلط عليه ما هد التفكه دار على جدي صاح بوجهه
سجاد:: الچان انتَ والچان ابوي ساعة التطكون عبود وروووح عمي شامل ذاك العزززيز اكتلكم وحرام بالحرم لو رفلي جفن، اناا حجيت والبيه زود يطكه.
جدي يريد يطك سجاد وعبود وطرواد تسودنوا جروه وعبود اخذ التفكه منه گاله جدي
شعلان:: تطلع من القرية ما تضل هناااه.
ميلاد:: يمممه يمه لا عمي زعطوط شلك غرض بحجيه ولك سجاااد سجاد.
وراحت على سجاد تريد تجره يدفعها وطرواده ما يسكت ويخلي السالفة تنحل يغلط ويهدد جروه الولد أخذوه لبيتهم هوه رسجاد وعبود، وجدي گال الابوي
-هذا ابنك انا اعيدن تربيته من جديد.
مسحت دموعي گـــلبي مفرفح واعاين لفرح واكفه بباب المطبخ مبتسمه
فرح:: يا ربي اكثر واكثر ونارهم تاكل حطبهم.
حجتها وطبت للمطبخ طبيت وراها غسلت وجهي ودرت على هاجر واكفه على صفحة وجها تعبان جنها مريضة، شويه وطبوا اهلي وصوتهم وعركتهم كملوها بالحوش، طب سلطان للغرفة وراحت وراه هاجر، ســليم يتعارك وي آمي ومرتضى، وهي طبت للمطبخ ترجف بس شافتني خزرتني ونترت من بين أسنانها
-اصعددي فوگ.
مسحت وجهي وصعدت للغرفة دقايق وفتحت الباب دخلت وراي قفلت الباب وحطت ايدها على حلكها
-صوتج ما اسمعنه.
مسحت دموعي اهزلها راسي اي اجت يمي ترجف منّ العصبية
-كل هالسالفة من وراج راح يودون سجاااد للمعامل من وراج.
مدت ايدها على شعري جلبت بأيدها لفت شعري على ايدها وجرته حيل
-بت الچلاب چم مره كتلج ما تحجييين ما ينسمع صوووتج بالبيت هاااه چم مره كتلج؟
چلبت بأيدها ساكته عصرت فكي حييل تنتر
-كتلج لووو لا.
هزيت راسي ااي شالت ايدها طكتني على عيوني
-چا ليششش تحجين ليش تحجييين
فركت حلكي بأيدها
-ما احجي بعد.
طيحتني بالگاع خانگتني بأثنين اديها تنتر
-بعدج تحجييين بعدج تحجين.
جرت اديها من وجهي حلكي وخشمي جريت نف اشهك عيوني مدمعه ثنت رجلها فوگ صدري وكضت فكي بأيدها عاصرته حيل
-تحجين بعدد
هزيت راسي لا عصرت رجلها على صدري حييل
-ترحين لهذا ابن الچلاب يروح يتعذر من جده ومايخلي سجاد يروح للمعامل سمعتيني؟
هزيت راسي اي
-لو سجاد راح للمعامل امرضج.
وكفت على حيلها دفرتني بخاصرتي ومشت اول ما فتحت باب الغرفة صارت بوجها هاجر دفعتها للغرفة وراحت وهاجر تعاين وراها ساكته، دارت علي عيونها متروسه دموع اجت يمي مدت ايدها تكعدني بطني وصدري يوجعني أشرتلي هاجر تسأل شنو اليوجعج قصص وروايات عراقية كرار صلاح ما حجيت أشرت على بطني مدت ايدها تمسح عليها ميته من القهر
ومر اليوم مثل السم كلساع يتعاركون جابو سجاد من بيت عمي شامل ابوي وامي يردون ياخذونه يعتذر من جدي وهوه ما يرضى يروح عاينتله اتوسل ما اريد يروح للمعامل يتعب وبعيد ما يوديه للمعامل اليمنه يوديه لغير محافظة
سجاد:: لا اعتذر ولا اروحن للمعامل وانتِ يمه وحگ الرضا لو غلطتي على عبود بوجهج بعد ما أعاين.
ميلاد:: ولك يمه يطيحك هل ردت تكتل اخوك من وررراه، ما يردولكم الخير ولد شامل يغارون منكم ويردون بس تتكاتلون بيناتكم.
شاكر:: اسكتي لا تتعبين روحج بعد الحجي ما يفيد هاي شامل لعب بعقولهم ومات من الله لا يرحمه.
گبوا بوجه سليم وسجاد يتعاركون وياه شال رآسه شافني كاعده على الدرج ها يابه چا مو كلت اخوي واحبنه هاا يابه چا مو كلت شامل عزيز عددي ها يابه چا ليش خليتني انه الاجيس گلبه واشارك بعذابه
ماشال عينه مني مسحت دموعي گالهم مرتبك
-عمكم غلط يدري بجدكم مايحب ولده وخلاكم تصفون وياهم حتى شيصير على ولده يصير عليكم.
وشال راسه يعاينلي
-تعاي ريـــمه تعاي بويه ادهني رجليَّ موتني
طب للدوانيه كمت اخذت زيت الزيتون وطبيت وراه للدوانيه ممدد رجليَّه حطيت زيت بايدي ومديتهن على رجليَّه امرغهن مدنگه والخنگه ذابحتني تدك بگلبي حچاية عمي طاحن دموعي وحده وره الثانية وابوي مد ايده على وجهي عاين لعيوني
-شبيج بويه ريـــمه.
هزيت راسي ماكو شي امسح عيوني ودنكت امرغ رجليَّه
-ولج بويه حاجيني عليمن تبجين يابعد رويحتي.
درت عليه ميته من القهر احجي وصوتي مختنك
-جذب جذذب انتَ تكره عمي شامل
-ولج اخوي شلون اكره.
صيحت ارجف ودموعي تجري
-كااافي جذب يابه ابوس ايدك كااافي لوعتوا گلبه وكلبي عوفوا ولده عوفوهم لا تلوعونهم مثله.
مد ايده على خدي وهو يگلي
-لا بويه شلج بهالحجي محد لوع گلبه هوه عاند جدج.
دفعت ايده من خدي ودرت للباب خايفه امي تسمعني رجعت عاينتله ارجف اريد احجي وخايفه گـــلبي يدك حيل جر رجليَّه
-كافي روحـــي وصيحيلي امج.
مسحت دموعي وگمت ادور عليها فتحت باب غرفتها عاينتلي بخزر
-يمه ابوي يريدج.
أشرت بايدها طبي، طبيت للغرفة سديت الباب وراي وهيه سدت الكنتور واجتني وكفت گدامي خازرتني
-چا انه عليمن كتلتج الصبح كتلج ما أسمع صوتج.
هزيت راسي اي
-أشريلي شتردين.
زفرت نفس ورفعت ايديي يرجفن حطيت اصبع بصف أصبع أشرحلها بالإشارة، عاينتلي مبتسمه وهزت راسها راضيه
-هيج اريدج.
عافتني وطلعت، احس جسمي كله يوجعني صاح عليَّ ســليم وطلع من يم سلطان
-ريـــمه عفيه سلطان ضال جوعان.
هزيت راسي اي وطبيت للمطبخ سويتله اكل رحت يمه ياكل شويه وعيونه علي مقهور، شلت الصينية من يمه غسلتله ورجعت أنطيه علاجه، اخذه من ايدي شربه وجرني الصدره ضميت وجهي بحضنه ابجي
سلطان:: ترجعلي عافيتي واكسر ايده اليطكج.
-تعبـــت .
ســليم:: ريـــمه !!
مسحت دموعي بساع ووخرت من حضن سلطان وسليم طب ميت قهر
-شبيج خويه!
سلطان:: مابيها شي اسمعني حاجي طــروادة وروحوا كملوا التحاليل وعقّد المحكمة انا صرت زين خل يسوي العرس.
عاينتله بقهر تطلعني من نار تذبني بنار أكبر منها انه عيني ما اگدر احطها بعيونهم انه كل ما. طبيت بيتهم يتراوالي عمي وحچايته ترن بأذني، عفتهم وطلعت صعدت فوك ما طبيت للغرفة كعدت يم الشباج أبجي جان يشبگني والله يشبگني ويگلي ما اگدر احجي عزيز الجاس گـــلبي.
سووده بوجهي وعساني ميته ولا واصله گراب خنجرك.
بجيت الحد ما تعبت ماحسيت بروحي
فزيت مرعوبه احس سمعت صوت هاجر تبجي وتصرخ تصيحني بأسمي وصوتها احسه بعده بأذني، عاينت لفراشها فارغ
-هاجر.
تلفتت أدورها دايخه حطيت ايدي على عيوني اريد اتذكر هي البارحة نامت يمي لو لا وانه ليمت نمت، گمت على حيلي دايخة حيل الگاع احسها ما ثابته جوه رجلي
طلعت من الغرفة البيت بعده اظلم محد گاعد دكيت باب الحمام
-هاجر
فتحته اعاين لداخله سديته ونزلت جوه ضوه الفجر الخافت طاب للبيت من الشبابيج، مشيت للدوانيه فتحت الباب متأمله الكاها بس عيوني ما لمحت غير سجاد وسليم نايمين بدون فراشات بس مخده وجرجف لافين روحهم بيه مشيت الغرفة ســليم سلطان متكور على روحه ونايم وهاجر ماهيه.
رحت لغرفة امي وابوي أريد افتحها مقفولة امسح عيوني بس اريد اركز طلعت للمطبخ احس روحـــي اشم ريحة حرگ اتلفت مسطوره وادور ، صارت عيني على الشباج فتحت عيني حيل وانه اشوف النار واجه بالحوش.
ركضت لباب المطبخ فتحته واشوفنها گدامي كاعده على اركبها بالحوش وماده أديها على رجليها وگدانها نار واجه ركضتلها بخوف جريتها ابعدها من النار
-هااجر هااجر
اكض بوجها وهي بس فاتحه عينونها الحمر ودموعها تجري چن عزيز المحترگ گدامها، درت عيوني للنار اشوفن اطراف الدفاتر والاقلام.
درت عليها مستغربة
-هاجر.
امسح دموعها اعاين لخدها احمر مطبع اصابع عاينت لعيوني وعيونها متروسه دموع بس رمشت طاحن على خدها جريتها الصدري ارجف شابگتها بكل حيلي
وخرتها من صدري امسح عيونها بين اصابعي عاينت لعيونها
-ياهو الحرگهن؟
رمشت بعينها وزفرت نفس يكسر الگلب
-حاجيني ياهو الحرك دفاترج مرتضى؟
وهيه ساكته بس تعاين لعيوني احتركت روحـــي حرك گامت من يمي كوه تمشي النار جانت عاليه وشوي شوي خفتت اكو اشياء ثانية وي الدفاتر صارت ملها رماد، گمت وره هاجر لكيتها متمدده بفراشها ومغمضه عينها تمددت بصفها وجريتها الصدري دفعتني وشالت ايدها تأشر تشرح "ريـــمه عوفيني وحدي"
وخرت من يمها وكفت اعاينلها بحسره احس بعده صوتها يتردد باذني مو مجرد حلم گـــلبي ضل يوجعني والخنگه ذبحتني حطيت راسي بين ايديي مسطوره صوت هاجر وصوت عمي شامل صدى بأذني گمت اشهك وخرت البرده فتحت الشباج گوه اجر نفس بس اريد صوتهم يروح من راسي راح اتسودن عذاب جاي آعيش عذاب
شلت راسي أمسح دموعي ولمحت طــروادة راد من الگيعان ملثم وهاسكي يمشي بصفه لگه دجاجات رنـــه صاعدات على السياج نشاهن ينزلن للحوش وراح للباب فتحه وضل واكف هاسكي طب گبله
دار وجهه بأتجاه بيتنا شال راسه شافني وخرت بساع دنكت جريت حجابي من يم هاجر لفيته على راسي ورجعت تقربت للشباج بعده وأكفّ بمچانه يعاينلي أشر براسه تعاي، هزيت راسي اي، سديت الشباج ونزلت البرده زفرت نفس بحسره اقوي روحـــي وانه ضعيفه ومو گد اي موقف انحط بيه.
لبست عبايتي ونزلت بعدهم محد گاعد فتحت الجراره مال الكاونتر اعاين بالسجاجين أخذت وحده منهن حاده حطيتها جوه ردن العباية وطلعت امشي بخوف ، بس دفعت باي الحوش صار گدامي واكف يم باب الهول مغسل أديه ووجهه ومشط شعره بين أصابعه نزل ايده من شافني
-ادخلي.
دخلت وسديت باب الحوش وراي تقرب يمي مد ايده قفل الباب ووخر يعاين لوجهي
-شلونج؟
سكتت اتلافه احط عيني بعينه ومن هو سكت عاينت لعيونه گال
-تكعدين هنا لو نطب جوه؟
شلت أيدي أشرتله على الحديقة
-تعاي.
مشيت گدامه للحديقة جوه الشجره كعدت على البلوكه وهوه جر بلوكه كعد گبالي ابتسم
-اكثر وكت اشوفنج بيه الفجر تطلعين ويَ الشمس.
دنكت ساكته تحسر وحجه بقهر
-شبيج ريـــمه؟
مد ايده يرفع وجهي مضيك عيونه
-احجي.
-جدي راح يودي سجاد للمعامل
احجي مرتبكه وأعاين لوجهه شال أيده لشعره بعده عن كصته وعاينلي
-الصوج بأهلج ابوج ليش ما يگله لا ابني ما يروح؟
حجه بغضب حاط اديه على اركبه مديت أيدي الايده دنك عاين الايدي وشال راسه يعاين لوجهي مستغرب همست متردد
-اعتذر احم اعتذر من جدي حتى ما يودي سجاد.
دنك عيونه الايدي الكاضه ايده عله شاربه مبتسم وبأيده الثانية طبطب فوگ ايدي
-انا ما اعتذر من أحد، ولا تخافين سهله سالفة سجاد تنحل ما يروح صــيهد يحلها هوه گال.
-صددك؟
ابتسم هز راسه اي وخصل شعره تتحرك على كصته وي هزت رأسه جريت ايدي من ايده مدنكه گـــلبي يدك حيل والسجينة بعدها بردن العبايه كاضتها بأطراف اصابعي.
حجه بهدوء
-باجر نروح نكضي التحاليل
بلعت ريك متوتره شلت راسي اعاينله من يعگد حاجبه تصير كسره بينهن ومن يرخن تروح، وكل ما شعره ينزل على كصته يشيل ايده السمره يرفعه ويمشطه بين اصابعه، نزل ايده يحطها على رجله كاف ردن القميص للنص
الهوه شوي عالي ياخذ طرف عبايتي واردها مد ايده كض طرف عبايتي يسدها مبتسم
-الهوه يعاندج.
عاينت لشعره نزلت الخصله الرفعها
-مثل ما يعاندك وينزل شعرك كا ما ترفعه.
ضحك بصوت بينت اسنانه من بين شواربه عاين لعيوني وقرب رأسه الي
-وخريهن انتِ.
دنك راسه يمي شلت ايدي متردده صوت دگة گـــلبي عالي أطراف اصابعي لمست كصته من يم الشعر ومشيت اصابعي بين خصل شعره المتجعده وخرته من كصته ونزلت ايدي ضل بنفس القرب وشال عينه لعيني
-وانا؟
عاينتله ساكته ما فاهمه مد ايده لم عبايتي من يم صدري يعدلها وحجه بدون ما يباوع لوجهي
طــروادة:: ليمت امشي اصابعي بين خصل شعرج؟
رجف جسمي زفرت نفس وحركت راسي لا
-ما يجي هاليوم
ابتسم
-يجي يجي هو هسه اگدر أحققه بس لان كاعدين بالحوش كاعد عاقل.
شلت ايدي مسحت وجهي وعاينت لعيونه المراقبتني بشك
-كهلان
ميل راسه على صفحة مضيك عيونه ويعاين لعيوني
-عاين انه ما أريد أتزوجك اذا طبيت بيتكم اموت والله اموت.
اختنگت گوه احجي عگد حاجبه هز راسه لا
-نسحرج شني؟
دنكت اهز راسي لا عيوني يحرگني وهو يحجي بضوجه
-بطلي هالسالفة شمسويلج احنا.
-انه انه الموزينه مو انتم.
هز راسه اي
-احنا نريدج حتى لو مو زينه.
نزلن دموعي وهو صافن بيه محتار، مديت ايدي اله عاين الايدي جريت ردن العبايه وطلعت السجينه عاينلها وشال رآسه يعاين لعيوني
مديت ايدي جريت ايده خليت السجينه بيها وشلتها الرگبتي جرن دموعي مختنگه صوتي گوه يطلع
-اذبحني.. اذبحني أهون عليَّ.
جر ايده من ايدي گلب السجينه يعاينلها شگد حاده شال راسه يعاين لدموعي
طــروادة:: الذبح أهون مني؟
ضميت وجهي بين ايديي
-مو منك، انه البيه محد يفهمه.
مديت ايدي الايده اتوسل
- كهلان انه شكد قهرتك گبل بس والله جيتي البيتكم تقهرني اضعاف.
-ليششش؟
نتر بعصبيه ودار وجهه منترفز مسح وجهه ورد عاينلي مسحت دموعي أتنفس بقوة وگلبي يدك سريع
-لان، لان انه استاهل انذبح.
-شمسويه؟
ملت براسي دموعي تجري مد ايده يتلمس خدي
-شمسويه ريـــمه؟
-لا تذكرني.
حطيت ايدي على اذاني اشهك وابجي روحـــي محترگه حرگ.
-انتِ ما ناسيه حتى ما اذكرج؟ احجيلي شمسويه؟
-ما اريد ما.. ما مسويه شي .
جر ايدي
-تردين اذبحج؟
تنفست بقوة وخوف حركت راسي اي وهوه هز راسه موافق جراني من أيدي وراه يمشي للبيت سريع جسمي يرجف فتح باب الهول وطب للبيت يجر بيه وراه الغرفه طببني ودار قفل الباب التفت عليَّ جسمي يرجف اباوع للسجينه بأيده اجه عليَّ يمشي خطوه خطوه
-شمسويه ريـــمه؟
هزيت راسي لا وكف گدامي
-احجيلي شمسويه.
مد ايده جرّ عبايتي عافها على طرف فراشه الممدود بصف الحايط
-تردين اذبحج؟
سكتت خايفه رد سأل يعاين لعيوني
-تردين اذبحج؟
هزيت راسي اي مد ايده جرّ حجابي دنكت عيوني ارجف عافه فوگ العبايه وجرني من ايدي لفراشه
-شاگول الاهلج من اذبحج.
-م.. ما ما ادري.
-نامي اكلهم هيه ذابحه روحها.
مسحت وجهي ايديي يرجفن تمددت بفراشة ثنه رجله وكعد بصفي شال السجينه يقربها يم رگبتي كضيت ايده ارجف
-تكضك تكضك الشرطه خاف.
-ميخالف، غيّر انتِ مسويه شي تستاهلين تنذبحين عليه؟
هزيت راسي اي گـــلبي يدك بأذني واحس جسمي كله يرجف مد ايده وخر ايدي منّ السجينة
-غمضي
غمضت عيوني حييل ما ببالي غير عمي شامل بالوكت الچانوا اهلي ما يردوني همه رادوني وربوني تالي انه خوش جازيته كسرت گلبه بگت گراب خنجره وخليت جدي يطرده ويظلمه.
جرت دموعي وانه مغمضه عيوني شهگت من حسيت بحروره انفاسه على رگبتي وشاربه ينغز جلدي چلبت بأيده ارجف واجر نفس بشهگه مشه شفايفه على طوّل رگبتي ويتنقل من جهة الجهه حط أصابعه بشعري وهمس بأذني
-رگبتج تنباس ما تنذبح
شال راسه عاين لعيوني ودموعي مد أيده مسح دموعي وجرني من ايدي كعدتيغ ذب السجينة وحضن وجهي بين اديه يمسح دموعي
-ادري ياهو الوداج وادري بأمج ما راضيه على هالزواج وهيه التوديج بكل مره حتى تخربينه بأي طريقة، ريـــمه انتِ ما مسويه شي لا تخلين امج تلعب بعقلج ولا تشلعين گـــلبي بعنادج .
-ما. والله ما اريد اشلع گلبك
بجيت بخنك، ابتسم يمسح دموعي
-چا لا تبجين وكافي ترفضين وعلي تعبتيني يوميه اگولن ياجر الله يهديها وانتِ يوم عن يوم تزيدين.
دنكت اعصر بأصابعي رفع وجهي يحجي بأبتسامه
-شبيه انا وما راضيه؟ ترى خوش زلمه والله.
دنكت دموعي تجري
-ادري.
-جا بعد شني؟ يله كافي بچي
جرني من ايدي الصدره وانه روحـــي محترگه بيا عين اكلهم وبيش ابرر بيا عذر، لمني على صدره الدافي حيل اذني على گلبه يدك بقوة باس راسي ووخرني جر حجابي يلفه على شعري
-لو بايدي ما اخليج ترحين، بس ما اريدن واحد يغثج بحجايه مثل ذاك اليوم.
هزيت راسي اي جريت عبايتي لبّستها ووگفت مهدود حيلي ما ادري شني الاسويه ما اگدر احجي الاحد انه كارهه روحـــي همّه شراح شلون راح يشوفوني، طلعنه للحوش سوه يحاجيني وانه امشي وبالي مو يمه الحد ما وصلني لباب حوشنه سألني
-فهمتيني؟
هزيت راسي اي وانه ما سامعه شي طبيت وسديت الباب.
رنـــه :: وكفتله بباب الهول مجتفه ايدي الصدري بس طب كتله
-ريـــمه شعدها هنا من الصبح؟
ما عبرني مدري مايريد يحجي مدري لان بعده زعلان، سد باب الحوش واجه طب للبيت مشيت وراه
-طــروادة جا ريـــمه شعدها هناه
تمدد بفراشه وانه واكفتله بالباب
-مو احاجيك؟
-روحـــي عني رنـــه روحـــي شوي ريوك وكعديني.
-صالحني حباب بروح ابوك.
جر الغطا فوك راسه كعدت يمه جريت الغطه من راسه
-طــروادة حبوبي بروك شامل
غمض عينه يشخر هزيته من جتفه
-اختنكت شبيك هسه لو ريـــمه تزعل منها.
فتح عيونه خازرني
طــروادة:: هسه هم تكليلي ولعباس ولحسين ما اعيدنها وتردين تعيدينها.
-اذا لكيتي النوب مخابره بريا وعلي احجي صدك اذبح دجاجاتي اذا لكيتني مخابرته.
-شبعت من هالحجي رنـــه شليتي حالي ترى يوميه تطلعين بسالفة.
سكتت مدنكه ومقهوره ادري بيه حقه بكل اليحجيه كعد على حيله
طــروادة:: ترى من احجي ويحترك دمي علمودج ادري بيج بعدج صغيره وطايشة وهاي تصرفاتج كلها تندمين عليها تالي انتِ شاطره خلي تفكيرج كله بدراستج وانا بظهرج والله اوصلج وين ما تردين بس لا تكسريني بهالتصرفات هاي تعبتوني انتِ وياه.
مسحت عيوني اهز راسي اي
-حتى التلفون بعد ما اريدنه.
-لا اخذيه كومي جيبيه تلكينه بالكنتور.
فتحت كنتوره طلعت التلفون وضليت واكفه اعاينله گال
-اخر مره اثقن بيج.
هزيت راسي اي
-والله ما اخابره بعد لو مدري شيصير
-يله روحـــي سوي ريوك انامن شويه وكعديني.
طلعت من يمه حظيت تلفوني على الشحن واحلف الروحي بعد ما اقهره ، تريك وطلعوا هوّ وعبود اخذوا سجاد وراحوا للگيعان.
ومت الغده خابرتني مــاسه گالت
-رنـــه صدك ما تحبين بريا؟
-جا جذب؟
-خوش مو ردت اتأكد لان هوه عاجبته بنيه
سكتت گـــلبي نعصر
-يا بنيه؟
-مانعارفها احنا بس هوه شايفها غاد بالحرب ومتسودن عليها گال الميثم بس اهلها يستقرون نروّح نخطبها وهسه تخابره كلساع تريده يروح يجوزه وره عرس كهلان يلتحق
-يرد للحرب علمودها؟
-اي
-مــاسه يعني هوه گالج يحبها؟
-اي
-كليلها طاحظك يا خايس يا دايح لو بيك خير ما تكضلي السياج وتصيح احبنج وتروح غاد للحرب تعشك.
سديته بوجهه مــاسه ايدي على گـــلبي كمت للمطبخ اكضي الغده مختنگه وجع بگلبي اشتغل وبس اريد انسى سالفته ولا گدرت بس دنكت جرن دموعي شلت ايدي مسحتها واغلط عليه وعلى روحـــي
-عليمن ابجي عليمن جا خل يحب ياهي مالتي بييه.
رد طرواده للبيت شافني مالي خلك صل يسأل واكله ماكو شي عباله ضايجه بسبب حجيه الصبح برر شكد ويحاول يصالحني بجيت احلفله
-والله ما ضايجه من عدك؟
-جا شبيج هسه عليمن تبجين؟
-هيج والله ماكو شي انه وحدي مقهوره.
سكت محتار طلع اخذله شويه ورد جايبلي بطوط بيض اربعة هداهن بالحوش ويعاينلي مبتسم
- اضحكي لا اكتلج ظلمت الدنيا بعيني من شفتج ضايگ خلگج.
بجست اشبگه وابوس ايده
-ولعباس احبنك اموتن عليك وماضايجه منك .
ضحك يبوس راسي، وانه الكاها فرصه ابجي وما ادري عليمن گـــلبي مفرفح ويوجعني الثاني يوم الصبح راحوا يسوون التحاليل ريـــمه وطرواده وانه مالي خلك حتى اشتغل دايخة وروحي ذبلانه.
"""
جــويريه:: ولا خليته يشوفني ما فتحت سالفة الطلاك سكتت بس ابتعدت اقلها يحس بروحه غلطان، الصبح سمعته يحجي وي جده بالهول يحرك بگلب جدي يگله
-رايح وي كهلان يكضون تحاليلهم علمود العقد.
ضحك جدي گاله
-اي علمود النوبه تجيبلك سيد وتطلك بت نضال.
صــيهد:: ههههههه اعدمك انتَ وبت بتك وما اطلگها
حجاها وطلع نزلت من الدرج دخلت للمطبخ وي رغد التهينه نظفت وياهن و للساعة بالعشرة كاعده يم خالتي ايمان واجت بــدور تركض كالت
-اجه ابوج جــويريه.
نعصر گـــلبي وفتحت عيني مصدومة وهي خايفه گالت
-يبجي بباب بالحوش يم جدي وابوي يتعارك وياه.
گمت بسرعة مرتبكه وگلبي معصور اروح للمطبخ وارجع لباب الصاله ما ادري منين اطلع وليش اطلع صاحت بــدور
-مناه جوري تعاي.
فتحتلي باب الصاله والمحه واكف كدامهم ضعفااان حيل بايده عوجيه حاني ظهره دموعه على خده ويگلهم
-انا اريد اموت اريد بنيتي من ساعة الظلمتها وانا ماشايف النوم بعيوني.
وليد:: ماعدك بت يمنه يللله مناااه يله.
خالي وليد يصيح عليه وجدي يعاينله ساكت وابوي يبچي بحرگه طلعت من الصاله ارجف
-بابا.
دار عليَّ بچيت گـــلبي يدك بسرعة فتح ايده يبجي
-بوويه جــويريه.
مشيت بساع ضميت روحـــي الحضنه حضني بقوة اشم ريحته حييل گـــلبي مفرفح ولا كأنه كل العشته بسببه بمجرد وصلت الحضنه رمعن احس بروحي عندي اهل مو ضايعه.
وخرني من حضنه يبوس راسي وايده ترجف
-بويه جــويريه بويه وحك عيــونج ردت اموتن بفراگج ظلمتج بويه ظلمتج الخاطر وادم ما تستاهل.
وانه ابجي بحضنه ساكته حرف ما يطلع من عدي
گاله جدي
-تريد تاخذها؟
حسن:: اي اي اطنياها خلني اعوضها على العاشته من وراي
ضحك جدي گاله اخذها وانه جسمي يرجف ونار تطلع من عيوني مو دموع جرني ابوي على صفحة لم وجهي بين اديه الترجف
حسن:: تمشين وياي جوري؟ بويه عفت الوادم كلها ما اريدن واحد غيرج شريت بيت بنفس المحافظة علمود مدرستج ما نروّح لبعيد خليني اعوضج خليني اموتن مرتاح وما اكولن ظلمت بتي.
يحجي ودموعه تجري واني روحـــي مفرفحه. هزيت راسي اي اروح وياك وجدي صاح
-تعاي لمي هدومج يله.
مشيت للبيت البنات متخبلات وخاله ايمان تصيح عليَّ ماقابله بست ايدها اتوسل
-عوفيني خاله ابوس ايدج اريد ابوي.
بجت نا راضيه گالت
-خل نخابر رجلج كليله
هزيت راسي لا ادري بسه ما يرضى واذا اجه لو اموت ما يخليني اروح بس هيه مارضت الا تخابره فاتحه السماعة وبس رد عليها گالتله من بين دموعها
-يمه ابو جــويريه اجه عليها يريد ياخذها.
سكت شويه وگالها بنتر
-خيولي بالعباس اذا اجيت الا حظه اطيحه يولي يمه لا تهتمين عباله جوري بعدها تريده.
شالت راسها عاينتلي بقهر كالتله
-يمه صــيهد جوري تريد تروح وي ابوها.
سكت سكتتت فترة طويلها وگالها بخفوت
-خل تروح.
شكرا لزيارتكم عالم روايات سكيرهوم
