رواية أرض الخناجر الفصل الثاني والخمسون بقلم ايلول
چا هي بديه حته اعوفك!.
لْـۆ بيدي عيني تحب تشوفك;
سوده بوجه الفراك
چي خلانه نشتاك ' هذا الينام اليل خالي مو مثليـّي رايح منه غـِْاليّ
══━━━━✥◈✥━━━━══
صــيهد:: خل تروح.
جــويريه:: شلت راسي بصدمة اباوع الخالة وهي فاتحة عيونها حيل مصدوم بحچايته جر حسره وهو يگلها
-خل تروح يمه خل تروح.
اباوع للتلفون ودموعي على خدي شلت ايدي امسح عيوني وامه تگله
-ترتاح مده وترد.
گالها بتعب
صــيهد:: وينها هيه؟ كليلها صــيهد يريد يوصيج.
باوعتلي خاله ايمان ما تريد تجبرني احاجيه منتظرة ردي، مسحت عيوني بأثنين ايدي شلت التلفون من رجليها طفيت السماعة وطلعت من الغرفة التلفون بأيدي صعدت أمشي على بايات الدرج بسرعة وگلبي يدك حييل دخلت الغرفة البنات كعدت بزاويه الغرفه حطيت التلفون على أذني ساكته بس صوت شهكتي مبين
غمضت عيوني ودموعي تجري اتذكرت نفس الموقف هم ابوي اجه ياخذني وخابرت صيهد ينقذني نفس الكعده ونفس وجع الگلب والخوف.
صوت حسرته وصلني وحجه بغصه
-اطلعج من النار وترديلها؟
بجيت بصوت مخنوگ كوه الحجايه تطلع من عدي
-بس اني وياه راح نعيش ع..عافهم عافهم علمودي.
-مو هوه نفسه الحطج بأيد ذاك النگس؟؟
نار بصياح واني ساكته بس دموعي تجري رجع گال
-ما ميته على ابوج انتِ بس تردين تعوفيني عادي عدج تذبين روحج وين ما چان المهم مو يمي مو؟
يحجي بحرگه شلت راسي اعاين لباب الغرفة بــدور واكفه وتبجي شفايفها يرجفن صاح صــيهد
-روحـــي جــويريه ردّي الابوج ان شاءالله بأقرب وكت اطلك.
انعصر گـــلبي حيل اريد احجي ما اگدر همست مخنوگه
-تمام.
-خل اكلج كبل لا ترحين لان اعارفج عليمن تدكين وشنهي التردينه، تردين تندميني وانا من زمان ندمان من اول مره خوفتج بيها ندمت وما گدرت ابطل جنت رايد بس اخوفنج وتالي صار همي ما اخليج تبجين بوحدج وماجنت اگدر اجي يمج وانا صــيهد، خل يرتاح كلبج ميت من الندم وعاض اصبعي.
وما حجيتلج حتى تضلين لا وروح عمي شامل احجيها ومن كل گـــلبي روحـــي وي ابوج هاي هيه دام اطلعج منهم وانتِ بأرادتج ترديلهم هاي هيه ردي.
حجاها وسد التلفون بوجهي صميت وجهي بين ايدي ابجي وبدور اجتني بساع جرت ايدي تتوسل
بــدور:: عليج لعباس جــويريه احنا تعلمنه عليج لا ترحين تطلكي وضلي عدنه.
هزيت راسي لا ابجي
-مو على الطلاك اني!!
بــدور باوعي ما اريد أعيّش آليتم مرّ هالشعور من ماعندك أحد محد منكم قصر وياي لا انتن ولا خاله ولا صــيهد اني ما انسى مواقفه وشكد دافعلي وحماني بس بعدني احس روحـــي بينكم ضايعه ودوم افكر اذا هم هم مارادوني وين اروح لا امي ولا أبوي وياي.
شبگتني نبجي اثنينا ودخلت مــاسه تصيح
مــاسه:: وووين رايحه وووين جوري وين؟
وكفت بياب الغرفة تباوعلي وتصيح
مــاسه:: ما ترحين والله ما ترحين هسه يجي صــيهد ما يرضى.
دارت عليها بــدور تبجي تأشر بأديها وتحجي مفرفحة
بــدور:: خابرته امي يگلها خل ترروح جا بكيفه هوه شنيي تروح ؟؟
وكفت على حيلي مشيت الماسه حضنتها حييل مودعتها بجت وعبرت أيدها تحضني
مــاسه:: لي وولج ليش جوري ترحين جا واحنا؟
وخرت من حضنها امسح بدموعي ومديت ايديي اليرجفن امسح عيونها
-ما رايحه بعيد ما راجعين لبغداد ابوي يگول اشتريت بيت هنا بالمدينه يعني قريبة عليجن نتشاوف وتجن يمي.
تهز راسها لا ميته من القهر، نزلنه جوه من صاحوا علينا مشيت بسرعة للمشتمل الم ملابسي واغراضي فتحت كنتور صــيهد ادور على الفايل مالتي، اخذته حطيته بالجنطة نص ملابسي بقت تلفتت ادور شنو الضروري الناسيته.
باوعت للميز مسحت عيوني ومشيت بم الجرارات فتحتهن اباوع للسبح مالاته گـــلبي يوجعني وكل ما اتذكر موقف دموعي تجري مديت ايدي بينهم اخذت وحده منهن لونها ماروني خرزها دائرية وتلمع مثل الزجاج وبنهايتها خرزه طويله وضعيفه بنفس اللون تدلى منها شراشيب من فضة ثلاثة وكل وحده بنهايتها خرزة
سديت الجراره ودرت ضميت السبحة بالجنطة لبست عبايتي وطلعت جنطتي بأيدي ابوي واكف يم باب الحوش لمحت يمه بريا وميثم عفت الجنطة يم الباب ودخلت للبيت جده تباوعلي بحقد والبنات عيونهن حمر دخلت الغرفة خاله ايمان دايره وجها من عدي للشباك
-خاله.
حاجيتها صوتي يرجف وهي ما تباوعلي
كعدت يمها ومديت ايدي الاديها جريتهن ودنكت ابوسهن دموعي تجري عليهنّ
-لا تزعلين من عدي خاله، ابوس ايدج افهميني اني ما اريد ابقى يتيمه اني طول عمري جنت خايفه من هالشعور اريد اطلع منه خاله ما اريد ابقى يتيمه وابوي عايش.
خلت ايدها على راسي ودنكت تبوسني وتبجي
ايمان::روحـــي مودعه بالله.
صاحت جده من الباب تنتر
-كووومي يله امشي ولي
ودارت وجهه تحجي على جدي
-يلعب بكيفه شعلان.
مسحت دموعي بست خاله ايمان وگمت اسلم على البنات وحده وحده دنكت ابوس رضا يباوعلي مستغرب مچلب بطرف دشداشة امه.
مشيت مطيتهم ظهري ما اريد ألتفت وأشوف دموعهن وراي اخذت جنطتي ووگفت بصف الباب گال مــيثم
-عوفيها خويه.
خليتها بالگاع وشالها هوه اخذها للسيارة ابوي تشكر من جدي ودار علي
-يله بويه امشينا.
مشيت وياه گـــلبي يوجعني السايق وجهه ما يكصه السيف اول ما وصل يمه ابوي گاله
-هيج هيه حجي صارلك شكد.
وابوي ساكت مــيثم خله الجنطة وره ووكفوا هو وبريا على صفحة سلم عليهم ابوي وصعد بالسيارة يم السايق فر السيارة وطلع من القرية طول الطريق ابوي يتحسر مقهور واني مدري على شنو ابجي دموعي ما نشفت
بعده بأذني صدى صوت صــيهد من گال خل تروح .
بعد عن القرية ساعتين الا ربع ابوي يدلي السايق مناه لمن وصلنه دربونه قديمة شارعها نظيف حييل وكل بيت راش بابه وكفنه گدام بيت سياجه ناصي وبابه ابيض بيه شجره طالعه للشارع ونازله على الباب
وكفت على جهه منتظرة ابوي حاسب السايق واجه يمي يحجي بصوت متعوب
-يله بويه مفتوح هذا الباب مفتوح.
حجاها ومد ايده بجيبه يدور باب البيت الداخلي ، شزت الحديدة فتحت الباب الخارجي ودخلت حوش صغير الكاشي مالته ابيض وأسود منقط، وعلى صفحة حديقة صغيرة الشتلات البيها ميتات باقيه بس الشجرة الچبيرة
انتظرت ابوي فتح الباب الداخلي دخلت أتلفت بالبيت صغير وقديم بس فرحانة بيه گد الدنيا اباوع لكل جهه مبتسمه وابوي واكف بالباب يباوعلي وعيونه متروسه دموع غطه رجهه بأيده وبجه
-ابريني الذمه جــويريه بويه.
عفت الجنطة بالگاع ورحت يمه جريت أيده من وجهه
-ليش تبجي؟
مسح عيونه متحسف ويحجي بقهر يهز راسه
-ظلمتج يا بويه ظلمتج.
سكتت محتاره وهوه وخر گال
-حطيتلج غرفة فوك.
باوعتله مبتسمه
-شدراك راح يقبلون اجي وياك؟
ابتسملي
-كلت الاجت خير على خير ولما اجت اطيها مفاتح البيت واروحن.
مسحت عيوني اضــحك البيت الجوه من اول ماندخل يصير مطبخ وراه صاله صغيرة وصحيات وغرفة باوعت للدرج اخذت الجنطة وصعدت فوك بابين يصيرن بوجهي باب للسطح وباب غرفة فتحته ودخلت مبتسمه الغرفة صغيرة بيها غرفة اخشاب وچرباية حديد ام النفر، ضحكت من كل گـــلبي امسح بدموعي جنت اتمناها هالغرفة بس زوجة ابوي حرمتني من كلشي.
اجيت وي ابوي واني خايفه بس من شفت دموعه وندمه اطمنت وعرفت نفسي سويت الصح.
"""
رنـــه :: شديت راسي بالشال ونمت كلشي ما مسويه عفتهم بدون غده شويه وكعدني حسيت يربد ويصيح عبالك مدري شصار
-خاااب ما تدرين شصااار؟
كعدت عدل اعاينله كعد بباب الغرفة وجهه احمر يشرب ماي ويهز ايده
-شكو.
-اجه ابو جــويريه اخذها
-صدك؟
-وعلي
-ليش شلون راحت وياه ؟
وكف يمسح وجهه بعبايتي المعلكه بالتعلاكه وراه الباب ويصيح
-شدراني شلون راحت چا انا شني وياهم؟
خزرته روحـــي بخشمي گال
-خاب كومي انتِ شمالج اليوم؟
-وخر عني لا اكوم الزكك بالگاع وحگ الحسين.
-الغسل الغسلج.
يحجي وواكف بباب الغرفة رجعت تمددت متغطيه حلكي ناشف احس راسي يريد ينفجر من الوجع واطراف اصابعي احس بيهن خدر، وما تروح من بالي سالفة بريا يرد للحرب علمود يحبَّ بنيه وهوه يجذب عليَّ ويگلي احبج.
مسحت عيوني بساع من رد طب حسيت للغرفة يحجي على كيف.
حسين:: خاب رنـــه شمالج؟
درت عليه
-شتريد؟
-شني جاي تبجين؟
-لاا شتريد؟
-راح يصير الغده واحنا ضالين مسيسين اليوم الحوش وصخ المطبخ وصخ كوومي لا يجي طــروادة ويضل يحجي عليج.
كعدت على حيلي جريت رجلي الصدري اهز راسي لا وبجيت
-مابيه حييل.
اجه يمي دنك يبوس راسي
حسين:: عليج لعباس ياهو وياج كليلي وعلي اسوي بيه دهر .
-محد هيج انه وحدي.
ابجي گـــلبي يوجعني وهوه كاعد گدامي على اركبه يباوعلي بقهر مد ايده يمسح عيوني
-ضلي انا وزهره نكنس الحوش ونرشه.
حجاها وطلع مسحت عيوني وگمت وراهم زهره مشغلة الماطور وتارسه الطشت وتفتر وره البطوط تريدهن يسبحن بيه وهنه يشردن منها وتركض وراهن وحسين كاضله مكناسه ويصيح عليها
حسين:: تعااي اكنسي وانا أرشن.
اخذت المكناسه منه وصحت الزهره
-شمسويه بهدومج روحـــي اسبحي.
ركضت للحمام، كنست الحوش وحسيت يرش وراي ومن كضيت اخذت الصونده منه وهوه راح يم النخلات لم السعف الطايح كسره وجابه خلاه بالزاويه يم حطب التنور.
افتر بالحوش وعيوني مغوشه اطي اكل للطيور وللدجاجات والبطوط وحسين يوكل بالصخلة صاح علي
-الارانب اليوم مدري شمالهن مالهن خلك ضايجات وياج.
يحجيها مبتسم يريدني بس اضــحك، ومشمش يفتر على قفص الطيور، اخذه حسين للبيت طفيت الماطور ومشيت وراهم حسين كاض مشمش بالحمام يسبح بيه وزهره كاضه المشط ومتانيتني امشطها حسين صاح عليه
حسين:: اناا اناا امشطج اعارف عوفي رنـــه ملتهيه.
اعاينلهم ساكته اخواني ما يدرون شني اللبيه ويردون بس يواسوني، طبيت للمطبخ اشتغل وابجي واليقهرني ماراضيه اقتنع عليمن جاي ابجي. كضيت تنظيف واسمع زهره كلساع صارخه من حسين هلس شعرها، غسلت ايديي وطلعت لكيته ممشط شعرها بالفرشة مال الولد وملتفه على شعرها روحـــي طلعت يله فلتتها من شعرها مشطتها دارت عليَّ تسأل
زهره:: ليمت نجيب هدوم مدرسه؟
رفعت اجتافي ما ادري كمت من يمها طبخت الغده مسطوره عبالي مثل كل مره السكر نازل سويتلي عصر ترسته شكر وشربته تعاجزت أقيسه، گمت كوه اجر النفس طلعت للحوش مختنكه وارجف كوه اشوفن كعدت يم الحوض غسلت وجهي اقنع بروحي انه ما ضايجة علموده ضايجة لان مشتاقه الاهلي سندت ظهره على حايط البيت لميت رجلي الصدري أبجي بحرگه ممرود گـــلبي وحلكي ناشف ماشلت راسي الا على فتحت باب الحوش مسحت عيوني بظهر ايدي وهوه فاتح عينه بصدمة ذب العلاليك من ايده وطب بساع
طــروادة:: رنـــه شمااالج.
جرني من ايدي يريد يوكفني وانه مدري شمالني بدل ما اسمت زدت ابجي بصوت وهوه متسودن
-ياااهو وياج حاااحيني ياهو وياج
عاف ايدي ودار لباب الهول يصيح
-حسسسين.
طلع حسين يركض صاح عليه
-ياهو. وياهاا؟
حسين:: محد هيه ما ادري شمالها من الصبح الهسه تبجي.
اريد بس اسكت واكوم جني مفجوعه على البجي واول طيحته جرني من ايدي حيل وكفني خازرني
طــروادة:: عليمن تبجين؟
چلبت بأيده اشهك وعيوني مغوشه، حجيت من بين دنوعي صوتي مبحوح ومختنگه اناشغ
-مــاسه مــاسه تگول بريا يحب بنيه شايفها غاد بالحرب.
فتح عينه حيل مصدوم وصاح
-وعليمن تبجين؟ ياهي مالتج بيييه؟
دفع ايدي حييل وافتر بحرگه لا بيه ويطكني ولا بيه ويسكت شال ايده يصيح
-بالعباااس اذا ما كلت الصيهد على مــاسه وخليته يطيح حظهاا الخايسه تمشي بحجي هالسكط اناا اله.
ووي حجايته اندك باب الحوش حيل وصوت صــيهد يصيح بعصبيه
-شبيهااا مــاسه.
وطرواده خازرني أشر طبي جوه مشيت مستنده على الحايط دايخه حييل وهوه فتح الباب الصيهد وكفت اعاين من شباج الهول واعض باصبعي شلون حجيت يم طــروادة هيج هسه شيسكته راح يطيح حظي، طب صــيهد اعصاب يدخن وجهه مايكصه السيف يعاين لطرواده مضيك عيونه هز راسه يسأل
صــيهد::شبيها اختي؟
وطرواده مسح وجهه بحيره كوه كاض روحه گاله بهدوء
-ماكو شي .
-سولفلي شمسويه؟
-ماكو شي يابه امشي روح قيس ضغطك هسه مو وكتها.
فزيت من دفع ايد طــروادة وصاح بوجهه حيل
صــيهد:: سمسوووويه؟
خزره طــروادة وحط اصبعه على حلكه
طــروادة:: نصي صووتك.
ارجف من الخوف واعاينلهم واحد خازر الثاني عيوني كلساع يغوشن رد صــيهد گاله
-گلب اختي شمسويه؟ لا تخليني اگلب البيت بهالساعة هي واصله حدهاا لا تزيدها عليَّ.
طــروادة:: ما مسويه شي هذا الحيوان بريا اذا ما مووته معتب هوه يعلم بيها ويخليها تگل الرنه بريا يحب وحده، حچي هذا؟ وهمه هم مابيهم صوج انااا السكتت على سوالف بريا اطيته مجال لمن لعب بعقلهاا.
اسمعه يحجي واحس بروحي اروحن ليوره وارجع لمن طحت دايخة فاتحه عيني حيل بس اريدن اشوف الگدامي ماكو حسيته جر ايدي يقيس السكر متمدده واشوفنه مثل الصباب يركض مناه ومناه سربني الحبايه متسودن السكر صاعد هواي.
مــاسه :: واكفين بالمطبخ ببيت اهلي ايدي على بطني موجوعة الصبح جنت خايفه من النتائج النوب اجتني سالفة جــويريه وروحتها ضلت بطني توجعني احجي وي البنات وصاحت بــدور
-يمه يممه اجه صــيهد.
وبس لمحناه من باب المطبخ وشفنه مشيته واعصابه تراكضنه شاردين طشينه كلنه حتى ندى طبت الغرفتها واحنا رحنه يم امي گنالها
-اجه صــيهد.
نعاين لباب الغرفه دفع الباب حيل وتلفت بيني وبين البنات يدور ورد عاينلي خازرني صاح بنتر
-تعااااي.
رجفن رجليَّ بخوف وبطني خبطت كالتله امي
-شبيك يمه؟
وهو عيونه عليَّ گمت بخوف وكفت گدامه ابلعم كضني من أيدي نتر
-شني هاي التصرفات؟
-ما مسويه شي بالعباس أسأل امي وحتى بالامتحانات جاوبت وعلي اسأل مــيثم.
نتر وكض ايدي حيل
-انچبييي.
ايمان:: ولك صــيهد شماالك؟
ولا يعاين الامي ولا مهتم عينه بعيني خازرني بغضب دفع ايدي يصيح
-حطي عباتج على راسج وتعاااي بساع.
تبريدن رجليَّ خايفه وادور على عبايتي ما ادري شمسويه ومل الاحه ببالي هسه عباله انه قنعت جوري تروح وي ابوها، لبست العبايه مسحت عيوني امي تحجي وياه گالها
-بروووح ابوج اسكتي يمه.
مد ايده جرني يمشي حييل طلعني للحوش ايدي على بطني واركض وياه حجيت بصوت يرجف
-انه حامل صــيهد بطني بطني.
ما التفتلي بس خفف مشيته يسحل بيه وراه البيت عمي شامل صار بوجهه مــيثم وبساع صاح عليه
مــيثم :: ها سالمين شصاير.
وصيهد ما مهتم عاينت لميثم اتوسل مد ايده جر ايدي من صــيهد وهو تسودن دفع مــيثم حييل يصيح بوجهه
-وخررررر.
وميثم حاطني بظهره ويحجي بهدوء
مــيثم:: شبيك؟
نتر بوجهه خازره
صــيهد::انت ليش ما تربي اخوك السگط؟
دار عيونه عليَّ
-وانتِ مــاسه شني هااي اللعبه هاه؟ هيج انا ربيتج؟
مــيثم:: هسه غير تحاجيني شصاير؟
مد ايده صــيهد جرني وميثم ما فاهم شي ركض ورانه كض ايدي يگله
مــيثم:: تمشي وياك بس لا تجرها رجليها يوجعنها.
هد ايدي بدون ما يتلفتت مشه دك باب حوش بيت عمي شامل وميثم يمشي بصفي مايدري شني السالفة وانه الخوف اكل گـــلبي فتحلنه الباب طــروادة اعصاب وبس شافني وياهم دار لميثم خازره.
صــيهد ::صيح لرنه.
-ما تگدر سكرها صاعد وتخربطت.
مــيثم:: شنّي السآلفة طــروادة شصاير؟
طــروادة :: خويه من الاخير اذا انتَ ما تگدر البريا گلي.
انا ليش ضال ساكت لخاطرك وانتَ كلشي ما گادر تسوي احجي كلي يابه اخوي ما اگدرله حتى انا اعارف شلون اكسر رجليَّه وفنه الوصلها
دار وجهه علي وانه مجلبه بالعبايه وخاتله بظهر مــيثم گال
طــروادة:: وانتِ خويه؟ هاي صاحبتج وتدرين بيها مريضه بدل ما تنصحينها وتبعدينها تلعبين بعقلها وتضحكين عليها ؟ ما مرجيه منج هاي .
هو يحجي وميثم وصيهد اثنينهم خازريني دنكت ميييته من الفشله وخرت من باب الحوش من حسيته جاي يندفع وعاينت عليه دفعه برير مستغرب هز راسه يسأل
-شبيها رنـــه؟
ووي حجايته طــروادة مد ايده من بين صــيهد وميثم جر بريا منّ قميصه شگگه عليه سحله للحوش صــيهد يعاينلهم وميثم كاض ايد طــروادة ويحاجيه وهو متسودن
طــروادة :: شتررريد منها شتريد منها؟ گتلك وخررر عنها لو لااا؟ ارتاح گلبك هسه من لعبت بعقلهاااا ارتاحيت؟
خانگه على الحايط مــيثم يجر بيه ويحاجيه وبريا بس يعاين لطرواده ساكت
مــيثم:: حاجيني انا طــروادة عاينلي
جر طــروادة حيل ووگف بينه وبين بريا كاض اديه اثنينهن وطرواده خازر بريا بغضب متحلف بيه وميثم بس يريده يحاجيه
مــيثم:: أخوي غلط وكل تصرفاته غلط ادري والله ادري، وحگك عليَّ كل ما اكلك هاي هيه وبعد ما يمر على اختك، يدوس على حجايتي ويردلها، اذا انتَ مليت من هالسالفة انا ميت ومتفشل منك اربعة وعشرين ساعة.
شال ايده طــروادة خازر بريا ويهدد ما مهتم لميثم
طــروادة:: وروح ابوي اكسر رجليك بريا.
بريا:: ميخالف كسرهن فـــدوه الك بس همّ اجيها امللك مناه لمن تطينياها.
وطرواده دفع مــيثم بحرگه طك بريا على وجهه جلبت بصيهد ارجف اتوسل بيه يكض طــروادة خزرني واكف بصفي يدخن، رد مــيثم جر طــروادة دفعه حيل صاح بوجهه
مــيثم:: يريددهااا وهي تريده حط شرطك واطلب مهرها لو تطلب عيوني اطيهن بس خلها تصير خلها بس عقد والعرس لمن تكضي سادس.
طــروادة فتح عينه حيل تلفت بين مــيثم وصيهد يگله
-انتَ صدك تحجي؟
مــيثم:: بروح ابوك ارضى خل نفضّ هالسالفه إسأل آختك اذا ما تريده وروح عمي انا الاكسر رجله اذا وصلها وحاجاها.
ضحك طــروادة يهز أيده
طــروادة::انا وووين احجي وهذا وين يحجي، والله وروح ابوي يا بريا ما تاخذ...
صيح بريا بحرگه ما يخليه يكمل حجايته
بريا:: لاااا تحلف لا تحلف شترريد اوخر ما تشوفني بعد؟ اوخر بس لا تگلي ما تاخذها، هاي هيه ما احاجيها بعد والله ما احاجيها.
طــروادة:: اطلع بررره اطلع خااايس
جر بريا من ياخته دفعه على الباب ودار الميثم يگله
-من راح للحرب مو كتلي اذا مات خطيته برگبتي؟ خويه چا اسمعني اختي اذا صار بيها شي من وره اخوك انا اكتله گدام عيونك.
بريا:: هاي هيه مــيثم گلت ميخال.
هد عليه طــروادة وكضه صيه وهو يصيح وماد ايده يريد يجر بريا
طــروادة:: انتَ شني تضحك على عقلييي؟
وميثم دفع بريا طلعه بره ودار علي يأشر امشي طلعت بساع مشيت بصف بريا وميثم ورانه اعصاب احجي وي بريا همس
-شكتلك انه كتلك لا مو خوش سالفه هاي مارضيت.
وهوه يمشي ساكت محترك گلبه طبينه للبيت بس ذبيت عبايتي طب ورانه مــيثم اعصاب وكفت بينه وبين بريا وهو يصيح عليه
مــيثم:: ما تستحي انتَ؟ ولك شلون الك عين تحاجي البت ما تستحي من طــروادة؟ ما تگول زحمه وتااالي وي سوالفك؟
بريا:: اسودنه اذا ما يطينياها.
دفعني مــيثم يريد يوصله وانه اكله
-بطني بطنيي.
مــيثم:: بريا اذا الي خاطر يمك بطل من رنـــه ماضلتلي كرامه يم الولد يوميه ينداس عليَّ من وراك كضيت عمر وياهم ما يوم واحد غلط عليَّ ومن وراك انا يوميه مهيوون.
وبريا يعاينله مختنك گاله
-ما عاش اللي يهينك هاي هيه والله هاي هيه بس احلف بروح عمي شامل ما تخليها تصير الغيري.
مــيثم:: ما تصير اذا الله راد ما تصير لغيرك بس انتَ كف عنها وخل كلشي بوكته.
هز راسه خوش وراح الغرفته وميثم عبالك تذكر انه مشاركه بالسالفة عاينلي بقهر
-ليش تمشين بحجيه مــاسه؟
-ماتنعاد والله.
عافني وراح يغسل مقهور، وبس تغده طبّ للغرفة صبيتلهم چاي بريا كعد بالهول يلعب بلي وانه اخذت كلاص مــيثم وطبيت للغرفة كعد على حيله اخذه من عدي يشرب ساكت مهموم
-مــيثم اسفه وهلي ما اعيدها.
هز راسه خوش سكتت وهو بالساعة مرت بس حاط ايده وره راسه يفكر حتى ما يگلب بتلفونه تمددت يمه التفت عليَّ نزل راسه للمخده ومد أيده جوه راسي خليت راسي على صدره احاجيه
-شبيك ليش بعدك ضايج؟
زفر نفس متحسر
مــيثم:: تعبني بريا النوب صلف يوكف گدام طــروادة يكله اخذها ولك شني تسودنت؟
-غير يحبها انت المفروض تحس بيه تتذكر شسويت من حبيتني هم اعذره!
مــيثم:: شمسوي انا سنتين عاشگج محد يدري بيه، هوه خل كل القريه تدري بيه يريدها، انا أستحي احط عيني بعين صــيهد واكله عاشگ اختك وهذا لا يكله اريدها اعشگها ويعاند طــروادة.
شلت راسي من صدره مبتسمه
-جا وتهديد الصور؟
ضحك مسح وجهه وباسني من راسي
-لمن انجبرت عليهن يله سويت هيج
ضحكت وكمت اطفي الضوه عاين لرجلي
-خلخال البرجلج هوه الخلاني اشوفنج؟
عگدت حاجبي
-شلون؟
فتح ايده الي طفيت الضوه ورحت الحضنه يسولفلي
مــيثم:: مره من المرات جنت مريض وجدي ما يرضى نضل لازم كلنه نروح للگيعان حتى المريض يروح، مسيت وي الولد بس تعبان بالليل رديت للبيت بدون ما جدي يدري، طبيت للحوش سديت الباب ومشيت باب الهول ضال مفتوح واسمع صوت يرن.
وخرت مستغرب افتريت للشباج عاينت واشوفنج تلمين بالزوالي تنظفين ترحين مناه وتجين مناه والحجل البرجلج وي كل حركه يرن.
بوكتها والله ما عاينتلج رديت للگيعان بس ما كدرت اشيلج من بالي دوم افكر بيج واتقصد ارد للبيت بغير وكتي بلكن هم اشوفنج وماكو صليت آظن شهرين لمن رديتي اجيتي وهالمره مارحت ضليت اعاينلج حطيتي خبز بالجدر ولكيتي البلي مشتغل دستي دگمه باليده وفزيتي من طلع صوته طفيتي التلفزون وطلعتي ابيتكم تركضين وصوت حجلج يدك بگلبي.
كمت اتقصد اعوفن البلي مشتغل گبل لا اطلع لان ادري بيج يا يوم تجين ويا وكت، من نرد للبيت بريا يلگه البلي ملعوب بيه طوبه يتخبل ويحجي عليَّ عباله انا مخربه، اضــحك ادري بيج انتِ، لوكتها انا جنت اشوفنج هيج نظره سريعه واروحن اخاف لا تنزعين حجابج لو يبين شي من جسمج بساع بس المح وجهج واشرد.
-ههههههه والله شريف.
ضحك يهز راسه اي
-واخذتلي شهر ما احجي وي اخوانج لان اعاين الاختهم وهمه عبالهم زعلان منهم، النوب مره جبتي بــدور وياج حتى تتعلمن للبلي سوه بوكتها غلطتن علينه كلنه احفاد شعلان سبيتنه.
-ما اتذكر.
-انا اتذكر هاليوم بكل تفاصيله لان جانت اول مره تلعبين بلي لعبة كامله وراها بچم يوم جانت صايره مشكله وجدي راد يودينه للمعامل دعيت من الله تجين بس حتى اخذلج صوره حتى تضل يمي اشوفنها كل ما اشتاگلج، وكعدت بالساعة خاتل يم الشباج بالظلمة لمن اجيتي صورتج ومشيت
وضليت ساكت لا بينت الاحد ولا جبت طاريج يم احد لان ادري بعدج صغيره.
اسمعله مبتسمه وجدي مايعوفنه بحالنه خابره راح للگيعان هوه وبريا للغروب رد بريا ماله خلك سويتله چاي وطلعت يمه بالحوش كاعد يم الورد مدنك
-احد محاجيك؟
هز راسه لا متحسر عاينلي
-مــاسه خابريها شوفيها شلونها؟
طبيت جبت تلفوني وكعدت بالباب اخابرها ينفصل بدون ما يگول مغلق وما يدك رحتلها على الوتساب حاضرتني عاينت لبريا مصدومه
-يااا حاضرتني!
غمض عينه بقهر مسح وجهه متت من القهر محتاره منين اراسلها وترد عليَّ.
بريا خابر على ســليم طلع وانه الوب اريد اروحلها بس اخافن لا بعدها مقهوره مني وما تحاجيني، ضليت محتاره ل١١ بالليل لمن اجه مــيثم سولفتله گال باجر بالليل نروحلهم سكتت اريد بس انام الصبح النتائج مالاتي وافكر بيهن وبرنه وجوري الحد ما نمت.
ما فزيت الا على صوت تلفون مــيثم يدك اتصال ماسنجر ضليت متغطيه توقعته واحد من الولد،جر ايده من جوه راسي واسمع جرت التلفون من الميز نزل من الجربايه ، فتحت عيني مستغربه من اخذ التلفون وطلع منّ الغرفة رغم هو يجاوب حتى اللي ويآه بالدوام يمي.
كعدت على حيلي افكر اكوم وراه لو مالها داعي ما گدرت گمت وراه الساعة بالخمسه ونص الصبح تلفتت ادور عليه بالبيت مالكيته، مشيت يم باب الهول وخرت البرده من الشباج واعاينله بالحديقة يحجي بحرگه عيونه حمر وما اسمع صوته مديت ايدي توني افتح الشباج والتفت شافني بساع نزل التلفون سد المكالمه واجاني.
وخرت من الشباج لمن طب للهول وعاينلي يحجي بهدوء
-صباح الخير حبيبتي .
-ويامن جنت تحجي؟
دار وجهه متلافي يعاين لعيوني ومد أيده على رگبته يمسحها دنك عينه للتلفون
مــيثم:: هيج علمود الدوام عدي دوام اليوم.
-ليش ماحجيت يمي؟
رفع عينه يباوعلي
-ماردت تفزين.
سكتت ما مرتاحه، شويه وطبيت للمطبخ وهو بس صله راح للميز يدور باكيت الجكاير رغم صارله شكد عايف الجكاير، اخذهن وكعد بالهول، يدخن وحده وره الثانيه متوتر وكل شوي يمسح وجهه اخذت الريوك حطيته يمه جان يخلص هالوكت غــزل وهسه صفنه تاخذه وصفنه تجيبه وما اكل غير لگمه وحده وشرب چاي.
-مــيثم شبيك؟ ياهو الخابرك؟
عاينلي ابتسم ومد ايده الخدي
مــيثم:: مابيه شي حوريتي.
كام غسل اخذ اغراضه وراح للدوام ابد ما ارتاحيت افكر ياهو الخابره كلت بس يركع ادور بتلفونه اعرف الرمز، لمن رد الظهر واكفه بالهول يم الحايط وهوه عبرني وراه للمطبخ يدور علي، ومن مالكاني فتح باب الغرفه يدور
-سمسم.
-هاي أنه كدامك.
دار عليَّ هز راسه يستغفر
مــيثم:: ما شفتج والله دايخ.
باسني يسأل
-شلونج ؟
-الحمدلله شنو شبيك دايخ؟
عاف العلاليك مال المسواك بالگاع ومشه للغرفه وهو يحجي وياي
-الجامعة هوسه تسطر .
اخذله هدوم وطب للحمام ركضت لتلفونه وهو على الشحن اريد افتحه ماكو مغير الرمز تسودنت حاولت لمن انقغل عفته ورحت للمطبخ اكل بروحي اكل وميته من آلقهر بعده بالحمام ودك تلفونه هم اتصال ماسنجر مشيت بساع واشوفنها صورة غروب شمس وبحر واسم ماعرفت اقراه ما ادري يا لغة.
طلع من الحمام شافني يم التلفون والاتصال بعده اجه بساع جر التلفون وطفه النت عافه على الميز مگلوب عل شاشته
-ياهي هاي التخابرك؟
-ولد وياي بالدوام
يحجي وينشف براسه منطيني ظهره
جنها بنيه شو مغير رمز تلفونك؟
مسح وجهه ودار علي وكف گدامي ومد اديه يلم وكهي بينهن
-شبيج عبالج احاجي بنات واصاحب عليج؟
هزيت راسي اي ضحك
-لا وروح عمي شامل لا اعاين الغيرج ولا احاجي بت واخونج.
سكتت ما گدرت اصدكه وضعه يحير لمن اجه بريا وصبينه الغده وي الغده هم اجاه اتصال عاف الامل اخذ التلفون وطلع گمت وراه عاينتله من باب الحوش مشه ليم بيت اهلي يحجي وايده يأشر بيها بحرگه متت من آلقهر
ومن رد للبيت يحاجيني ما ارد عليه والزاد قهري سكت من شافني زعلانه عافني، وكضاها كاعد بالهول يدخن ويراسل، ومن يجيه اتصال يله من البيت يله يجاوبه، راح للگيعان مارد الا بالوحده غمضت عيوني مسويه روحـــي نايمه بلكن يحجي يمي وهو سبح واجه باسني براسي وتمدد بمچانه
غفه وانه النوم جافه عيوني والحيره تدك بگلبي صارت بتلاثة ودم تلفونه فز وانه بساع غمضت عيني وخر ايده مني اخذ التلفون وطلع من الغرفه وسمعت باب الهول انفتح وانسد.
وخرت الغطا من عدي وكمت بساع جريت عبايتي لبستها وطلعت وراه سديت باب الحوش على كيف گـــلبي يدك بقوة .
الدنيا ظلمة والهوه عالي وصوت الاشجار وهي تهتز من جذورها يرجف الگلب، مشيت بصف السياج اتلفت وادور وين راح لمحت ضوه تلفونه يمشي بإتجاه البستان
تبعته بخطوات ترجف أمشّي وأتختل، وهوه يمشي حاني ظهره وكلساع يشعل تلفونه يعاين للشاشه ويرد يطفيه خطواته سريعه
لمن وصل بستان النخل يمشّي بينهن وانه وراه لحظة وحسيت روحـــي گمت ما اشوفنه مشيت بساع واتلفت ماهوه الظلام يخنك واصوات السعف التهتز بالهوه ترن بأذني وصوت چلاب تنبح بعيده .
اتلف خايفه وصوت دگة گـــلبي عالي شهكت بساع والتفتت ليوره ايدي على كلبي ، واكف گدامي تلفونه بأيده يدك
-شجابج؟
مسحت وجهي ايدي يرجفن حرگه وخوف
-ويامن تحجي؟ صارلك يومين كل ما يجيك اتصال تطلع بره؟
-امشي للبيت.
جرني من ايدي نترتها منه
-وخررر مــيثم لو هسه تگلي ياهو الجاي يخابرك لو توديني الاهلي.
مــيثم:: بس امشي هسه للبيت شجااابج وراي شجابج بهالليل بله عثرتي.
شغل ضوه تلفونه يمشي وكاضني من ايدي يحجي بحرگه
-گتلج محد لو لا؟ ليش تشكين انتِ؟
مشيت وياه دموعي تجري واحجي بحرگه
-مال جذب هيه مصاحب مبين مصاحب زلم ما تتأمنون شمسويتلك انه شبيه وتخوني؟ والله اروحن الاهلي بالحسين ولا اضل.
وهوه ساكت لمن وصلنه للحوش جريت ايدي منه ابجي
-هسه توديني الاهلي
مسح وجهه بأثنين اديه
مــيثم:: خل هالليله تكضي على خير يرحم امج وابوج لا تعلين گـــلبي.
لطمت على رجليَّ ابجي
-تخوووني؟
-يا علي يا ابو الحسنين.
شايل أديه اثنينهن بحرگه يحجي طلع. بريا النوم بعيونه
بريا:: شبيكم؟
-بريا وديني الاهلي.
بريا:: دخيلك يا علي ها خويه سالمين؟
مــيثم:: روحـــي نامي مــاسه، روحـــي والصبح نحجي.
حجاها ودار وجهه طلع من البيت بجيت ميته من القهر وبريا مافاهم شي الا ل مكابلني محتار، للصبح وانه ما نايمه بريا الفجر راح للگيعان وميثم مارد للسبعه الصبح ندك باب الحوش بس لمحته صــيهد دك گـــلبي بخوف مسحت عيوني بساع وطلعتله مبتسم فتحتله الباب
-يا هلااا جنك تدري بيه مسويتلك چاي
صد عينه بعيني عاگد حاجبه طب للحوش سد الباب وهز راسه يسأل
-شبيج؟ عليمن باجيه؟
-هههههه ماباجيه توني كعدت من النوم.
وشلت ايدي أمسح عيوني جر آيدي
-لا تجذبين عليَّ ياهو وياج؟ مــيثم محاجيج؟ واحد قاهرررج؟
دنكت بس اريد اضم الغصه وهو تسودن كتله
-متعاركين
-عليمن؟
-عاين اظن جاي يخابر بنات!
-نجبيي.
درت وجهي ما اريد دموعي تنزل ومن شافني صدك محروك گـــلبي صاح
-جيبي عباتج وتعاي.
مــيثم:: ووين؟
درت عيوني اله طب للحوش مبتسم ويگل الصيهد
-وين تريد تاخذها؟
صــيهد:: يشهد الحسين اذا الكفك مصاحب عليها اخليك تشوفها بي باحلامك هي واللي ببطنها.
مــيثم:: ههههه شنّي السآلفة ما صاحبت گبل اصاحب من تزوجت؟
يحجي بهدوء بس صــيهد خازره طبيت للبيت اجه وراي مــيثم للغرفه يحجي بحرگه
-انتِ كلشي تسووولفين؟
-كلي ويامن تحجييي راويني المحادثة.
دار وجهه من عدي يمسح بوجهه
-مــيثم اروحن وي صــيهد.
ضل ساكت هزيت راسي خوش مسحت عيوني اخذت عبايتي وتلفوني وطزعت الصيهد وميثم يعاين وراي ساكت گـــلبي معصور عصر، وصيهد ما اطاني مجال حتى ابجي ربع ساعة وگال تعاي نروح لمدرستج، مشيت وياه جبت النتيجة ورجعنه، ماسولفت لا الامي ولا الوحده من اخواتي، وبس اصيرن وحدي ابجي محترك گـــلبي منه .
"""
رنـــه :: بس صرت زينه طــروادة سكت ماحاجاني التهه، الدوام بدأ والعرس بعده وصال يركض مناه ومناه وعود عفراء ماعايفتنه شكد شغلات كالتله يمي مالك غرض بيهن بس ضل مشغول كوه فرغ روحه اخذني للدكتور علمود السكر لان وصل مرحله يخوف مره انخفاض ومره ارتفاع گال الدكتور سكرها متذبذب وهيه شخص مهمل لهذا السبب ما يستقر.
طلعنه من الدكتور للسوك اخذنه هدوم للمدرسة وللعرس من يعجبني شي واشوفنه غالي اعوفه ما يرضى يرد يگلي اخذيه لمن كضينه من السوك طبك يم محل تلفونات راح جاب تلفون واجه جلبتله اغمزله
-هاا عيوني المن هذا.
يسوق متحسر دار وجهه علي
-الريمه بس بالحسين هالايام كلساع اريد ابطل چز گـــلبي ولعبانه روحـــي حيل.
-يااا شني السالفة شبيك.
هز راسه متحسف
-اسكتي هيه لعبت روحـــي كلساع وصاحت عوفني جنت اكول بسبب امها تحجّي برأسها بس هاي اخر خمسة ايام لا هيه ريمه نفس نظراتها المتروسه سم وحقد عبالك كاتل اهلها
ماخليت درب ما اجيتها منه تغثني واسكت تمسلت شكد واعبرهن
تالي بعقّد المحكمة تضحك تگلي تعض اصابعك ندم!
اشوفن صدك اعص أصابعي ندم واكرهه الساعة الردتها بيها.
سكتت مستغربه يحجي بحرگه ميت من آلقهر خابره صــيهد گاله فول السيارة اريدنها طبكنه على المحطه حط بانزين ورد صعد ناله خلك روحه كتله
-لا تفكر وتقهر روحك هسه تتزوجون وكلشي يتعدل.
هز راسه اي ما مرتاح، لكينه عفراء جايه كيفت بيها وبشمس وشلون تمشي وحذائها ينوص ويشتعل گلوبات شالها طــروادة قصص وروايات عراقية كرار صلاح يبوسها ويضحك مكيّف بيها
طلعت الهدوم اراويها وحسين وزهره يلبسون هدومهم صار الهول هوسه وكله علاليك، طــروادة گال العفراء
-لگيت شغل.
عــفراء:: شغليش؟
طــروادة:: حراسات من ١٢ بالليل للخمسة الصبح وراتب اربعمية وخمسين.
عــفراء:: جا خويه شني تريد تموت روحك؟ ليمت تنام؟ الصبح بالكليه العصر بالگيعان وبالليل تشتغل شني يمه ما نريدك؟
ضحك باسها براسها وشمس بأيده
-تدبر اناملي ساعتين الصبح والظهر ساعتين كافي.
سكتت عفراء بس ما راضيه عليه حجوا بالعرس وعرفته ضايج عزلنه الهول وهيه متسوگه هواي وجايبه هدوم الريمه، طبوا الغرفة اهلي بساع طششت حسين وزهره اطيت تلفوني لحسين وديته يكنك يم السياج، وحطيت شمس بالحجله طلعتها بالحوش وكلت الزهره فتري وياها لا تنگلب، ومشت اركض كعدت بباب الغرفه اتصنت عليهم، ميت ميت من آلقهر.
طــروادة:: مليت بالحسين مليت منين ما اجيبها ما تجي، يبت الناس انا رايدج انا ميت عليج ولج دستي بگلبي وحرگتي تعبي كلهن نسيتهن لخاطر نظره من عيــونج، تقتنع؟ ترضى ؟ لا وين بت ميلاد شيقنعها؟
عــفراء :: خل اشوفنها الا اطيح حظها جا مو حاجيتها وگالت هاي هيه واقتنعت شني يوميه برأي ؟
تحسر مقهور يگلها
-عبالي اگدر اردها نفسها ريمتي هذيج الضحكتها ترن بأذني، بس الظاهر حقد ميلاد وشاكر تارس گلبها.
-لا تحجي هيج ترد والله ترد بس خل تفتك من بيتهم وتجي يمك وشوف شلون تتحسن وعلي.
-انتِ ماتدرين شجاي يصير بيه من وراها بالحسين عيوني ما تغفه حجاياتها تدكّ بگلبي
اول ايام جانت شحلاتها وبس احاجيها تقتنع من يوم سوينه التحاليل الهسه موتتني بحجيها، شلون ماجان تريد تخربها وتشرد هسه تكليلي امها تترس راسها لا خويه مو امها.
رنـــه :: گمت اركض من سمعت صوت شمس تبجي مگلوبه بيها الحجله ومتعور حلكها اجوا اثنينهم عفراء يطير گلبها من تتعور شمس تضل ترجف وطرواده اخذها غسل وجها ودار العفراء
-شبيج هاي مابيها شي.
عاف شمس عدها واخذ هاسكي راح للگيعان وعفراء شويه وودت حسين على ريـــمه راح ورجع يركض گالها
-تگول بالليل اجي.
سكتت عفراء متحلفه بريمه دارت عليَّ بس خزرتني سولفتلها كلشي
-چذبوا علي اثنينهم مــاسه وبريا.
-الخايسه جا انتِ ياهي مالتج اذا ماتردينه عليمن انقهرتي؟
دنكت ساكته
-تردينه رنـــه ؟
هزيت راسي لا
-عاينــي انه بعدني صغيره ترى من اگولن خل اتزوج والله جذب اتشاقه، وبعد اصلاً زعلت منه بريا انتهت وياه اريدن بس اشوفه اشمر عليه هداياه ولا احاجيه بعد ولا يحاجيني.
هزت ايده
-اندري بيج تحيرين انتِ.
-طــروادة گال اخر مره اثق بيج وانه بعد ما اريد اقهره جاي اسولفله كلشي.
-مو ترحين زايد ويجيبج براشدي
-هههههههه.
كمت اعاين من ندك باب الحوش واشوفن غرفة اخشاب بسيارة واكفه ببابنا، حسين فتحلهم الباب صــيهد وميثم واكفين بالباب حاجوا حسين واجه يركض
-طبن للغرفه.
كمنه انه وعفراء طبينه لغرفتنا وهمه وولد طببوا الغرفه گالت عفراء
-همزين طلعنه الغراض منها.
-هاي طــروادة موصيها؟
-والله ما ادري ما گالي.
كضوا شدّ وطلعوا ضلوا بس مــيثم وصيهد بالحوش طلعتلهم عــفراء سلمت عليهم وسألتهم كالها صــيهد
-انا وميثم جبناها، ما گناله لان يضل يمسلت ما يرضى.
تشكرت منهم ومن رادوا يطلعون گالت الصيهد
-بس احاجيك شويه.
مــيثم راح وهوه صل واكف يم الباب مدنك يدخن لمن گالتله
-خويه الزعل يصير بين كلّ اثنين روح وره مريتك طيب خاطرها بحجايه حجايتين وردها.
ذب الجكاره بالگاع داس عليها وشال راسه لعفراء يگلها
صــيهد::الله كريم
-تندل بيتهم وين؟ نروح آنّه وكهلان نردها ؟
-لاا يابه وين ترحين.
-مابيها شي نجيبها تسمع مني هيه.
-اي تسمع منج مثل ما گتيلها صــيهد ابو الحلوات وصدگتج!
سكتت عفراء متفشله كالها
-اتشاقه وياج، مشكوره خويه ولا تفكرين تنحل ان شاءالله.
ترخص وطلع وعفراء من فشلتها بس طبت للهول طكتني تگلي
-مو كتلج ما احاجيه ؟
-انه ياهي مااالتي؟
ضلت كلساع تعض ايدها مقهوره من الفشله، التهينه بالغرفه والبيت صارت بثمانيه ونص واحنه ما مسويه عشه لمن أجه عبود ساعدنه شويه وگال جوعان خابر طرواده واجه يآكل سريع يريد يلحك ينام ساعة گبل لا تصير ب١٢ ويروح للشغل الجديد، بس فتح باب غرفته انصدم دار علينه مستغرب كالتله عفراء الولد جابوها.
خابرهم ماردوا عليه راحلهم نص ساعة واجه مدله فراش بغرفة اهلي ونام گلت العفراء
-انه هم راح انام مو تنسين ماتكعدين طــروادة بهدعش ونص.
عــفراء:: نامي انه متانيه ريـــمه.
ريـــمه::دك الباب سلطان وانه واكفه بصفه صافنه اريد اتذكر صح هيه ودت عليَّ حسين لو إنه متوهمه كضيت ايد سلطان
-تعال امشينا اظن ما موديه عليَّ يجوز جنت احلم.
جر ايده مني مستغرب وكعد بالباب مابيه حيل يضل واكف هواي كح وحجه بصوت ناصي احس حتى صوته شوي شوي يرجع
-شبيج؟ غير انا الحاجبت حسين.
-ها
هزيت راسي خوش ساكته وأنفتح الباب طبيت سلمت عليها كالت
-بطيتي.
وكف سلطان سلمت عليه راح وهي جرتني من أيدي مطفيه أضويت البيت طبينه الغرفة كهلان الساعة ب١١ سألتها
-رنـــه نايمه؟
-اي تعبـــت ونامت
فرشت مده بالگاع كعدت وهي بصفي تسأل عني وان هاجر احاجيها مدنگه گـــلبي مقبوض مدري شبيه
عــفراء:: شني ريـــمه شبيج وي طــروادة مو حجينه واتفقنا
شلت راسي اعاين لعيونها ساكته وهي تعاينلي بحيره طاحن دموعي اسألها
-عفراء انتِ الوحيده تعرفين انه شمسويه ؟
دارت وجها بساع مديت ايدي
-لا تديرين وجهج عفره انه تذكريت انتِ الوحيده التدرين بيه انه البگت گراب الخنجر انه العذبت عمي شامل تدرين مووو تدرين عفره؟ تدرين ورضيتي طــروادة يخطبني شلون اعاينله ولج شلون احط عيني بعين رنـــه واعيشن بينهمم؟
بجيت بحرگه وهيه وياي دموعها تجري گالت
-اذا ابوي چان يدري وماحاسبج ولا لام عليج احنه شنو ونحملج مسؤولية الصار؟ أمي وابوي عذروج وماشافونج صاحبة ذنب احنا مالنه حگ نلومج وانتِ لا تلومين روحج جنتِ جاهل.
لطمت على رجلي
-يا جاااهل فاهمه فاهمه چبيره واعرف الصح من الغلط شلون مديت ايددي وبگت ولج اذكر شلون لموني بحضنهم اثنينهم وانه غافلتهم وبگت گراب الخنجر.
جرتني الصدرها وانه روحـــي محترگه حرك چلبت بيها ابجي
-عمي چان يگلي عزيز الجاس گـــلبي وطزع يقصدني يقصد انه العزيز الكسر گلبه وعذبه اريد اموت عفره اريد اموووت ليلي ماجاي انامه كل ليلة اكضيها بجي.
-اشش كافي هالسالفة ماتحجين بيها يم احد ريـــمه اخواني مالازم يدرون اخافن لا يقهرونج.
وخرت من صدرها امسح عيوني ايديي يرجفن
-سولفي الطرواده انتِ احجيله ما اگدر احط عيني بعينه عفراء من يحاجيني اموووت من القهر شلون إنه مسويه هيج ذنب وضامته عنه.
-اشش مو وكته هسه ريـــمه اعارف ليمت احجي مالج غرض بالسالفة انتِ ومافي تشلعين گلب طــروادة وتدوسين ببطنه ترى والله اطيح حظج ميت من القهر من وره حجيج.
دنكت امسح بعيوني
-بس ردته يعوفني .
-نجبي احنا ماصدكنا صارت نريدج يابه بتنا انتِ مو بتهم خل نحقق امنية امي وابوي ونرجعج يمنه.
تحجيها تضحك وجرتني تشبگني
-طــروادة ما يدري بهالسالفه بس انه لان جنت اتصنت على امي وابوي من امي جانت تبجي عليج ابوي يگلها خل يكبرون وازوجها لطــروادة اردها يمج هسه راح تتحقق امنيتهم.
تحجي وياي تريد بس تنسيني السالفة بس انه القهر ماكل گـــلبي، حجت على الحنه والعرس كتلها
-هاي هيه بكيفج اي شي تسوينه عادي.
-انتِ بنفسج شي خاف رايده شي احجي واجيبه.
-لا والله ماكو شي.
درنه اثنينه على الباب طب مشمش بزونة رنـــه ضحكت عفراء وهي تكلي
-هبط ضغطي عبالي طــروادة.
-يله انه خل اروحن امي تضل تحجي.
كامت وياي طلعت من بيتهم امشي مدنكه وافمر بحجيها بس فتحت باب الحوش صارت بوجهي امي
-ها يمه.
""""
جــويريه :: حييل مفتقده بيتهم وافكر بالكل خاه والبنات وصيهد صياحه وعصبيته وسوالفه الغلط ويسويهن صح كوه، كمت بساع من صاحلي ابوي مديت راسي من الدرج اعاينله بالهول على السجاده
-تعاي بويه شوفي الجدر لا يحترك.
اخذت تلفوني ونزلت للمطبخ متندمه على شغله وحده ماحافظة ولا رقم من ارقام البنات من ابوي جابلي تلفون خليت بيه بس رقمه .
صبيت الشوربه وسويت زلاطه اخذت الصينية وكعدت يمه بس كملنه العشا كال
-تعاي مشينه نطلع للحديقة.
لبست عبايتي وطلعت وياه وكل ما يبجي ابجي وياه ما مر يوم اذا ما سألني سامحته لو لا يريد يعوضني عن كلشي مايدري شيسوي.
ثاني يوم رحنا للكليه علمود التسجيل، هوسه حييل التفتنا على صوت
طــروادة:: السلام عليكم.
-وعليكم السلام
سلم على ابوي ودار علي يسألني
-شلونج خويه عساج بخير؟
-الحمدلله الله يسلمك رنـــه شلونها.
-الحمدلله.
اخذ الاوراق هوه يفتر ويانه شويه واجه مــيثم بقيت اتلفت وگلبي يدك حييل ردت اشوفه ابوي يحجي وي مــيثم وطرواده واكف كدامي منطيني ظهره گال
طــروادة:: لا تتلفتين ما مداوم!
دنكت ساكته وهمه ما عافونه الحد ما كملنه قبل لا اطلع گتله
-خويه اريد رقم رنـــه .
-صار.
طلع تلفونه من جيبه مديتله تلفوني يسجل الرقم ويحجي وياي
-اي شي تحتاجينه انا اخوج ومو بعيد.
اطاني تلفوني وابوي تشكر منه طلعنه من الكليه ابوي مر حابلنه سمجه شوي وخبز بس تعشيت ونمت كعدت العصر نزلت يمه بالحوش جايبلي شتلات جديدات زرعناهن سوه نضحك صورت ايدي وانه كاضه الصونده وارش طبينه للبيت دخلت للأرقام اريد اخابر رنـــه لگيت الارقام ثلاثه ابوي رنـــه وصيهد مجرد شفت اسمه تغيرت دگت گـــلبي خابرت رنـــه ما ترد تطيني رفض وديتلها على الوتساب
-اني جــويريه.
رجعت خابرتي تغلط
-خبيث حقيره حيوانه ياهو كالج ترحين.
-هههه شلونج مشتاقتلج ولج.
-جذابه جذابه ام الهجع الشارده جا ياهو يركص بعرس اخوي؟
-ليمت العرس؟
-بعد ثلث ايام
حجيت وياها هوواي وكتلها وديلي رقم مــاسه، وياهي الاحاجيها تغلط النوب سولفت مــاسه مقهوره من مــيثم ومن ابررله تصيح
-خل انه هم ابرر الاخوي.
سكتت منها وبساع سون گروب اي ورنه وندئ وماسه ورغد. خلصت حجي وياهن ودخلت الرقم صــيهد مخلي صوره طلقة وداير مادايرها سبحه.
طلعت من رقمه ورحت للحاله حطيت الفيديو الصورته وانه ارش بالحديقة بس ايدي مبينه، وكل شوي ادخل اشوف الستوري البنات كلهن شافنه وانه متانيه هوه يشوفه غميت مصتي من تذكرت هوه ماعده رقمي شلون يشوف ستوري طلعت من الوتساب ضايجة
ضليت يم ابوي يسولفلي على اعمامي ومرته واخواني شلون عافهم كلهم ومقهور منهم، لمن راد ينام يله صعدت فوگ گلبت بتلفوني شويه طبيت للوتساب لكيته شايف الحاله دك گـــلبي بخوف شافها ومارد بشي وديت رساله بالگروب
-منو انطت رقمي الصيهد؟
محد منهن ردت بقيت كل شوي ادخل الرقمه واطلع الحد ما نمت
"""
رنـــه :: تعب طــروادة حيل من اشتعل بالحراسات مايلحك ينام دوم عيونه حمر ويشكي من وجع راسه واحنا تعبنه من سالفة العرس مشينا بيوم الحنه الصبح البيت عمي شاكر علمود ريـــمه نتفق وياها نسويلها حنه كالت ميلاد
-لا ما نسوي حنه.
درت عيوني لريمه واكفه على صفحة ساكته حتى ما سلمت علينه جوه عيونها سواد وشفايفها بيض دارت عليها عفراء كالتلها
-احنا اتفقنا ريـــمه؟
ريـــمه هزت راسها لا وميلاد تضحك بشماته وهاجر تأشر بأيدها من وره امها روحن.
طلعنه من بيتهم بس عبرنه باب حوشهم عفراء بجت
-انه الها اذا ما ندمت ميلاد بالحسين اذا ماطلعت مل عذاب ريـــمه من عيونها.
طبينه الحوشنه ترجف بعصبيه كتلها
-شني طاكتها هيه؟
مسحت عيونها ساكته وخابرت منذر احاجيها اكلها وين رايحه تكلي مالج غرض عافت شمس عدي وراحت ساعتين واجت، جهزنه لحنة الولد الولد التموا مبدلين وكاشخين وطرواده بعده بالگيعان مناه لمن احه عــفراء تلطم طب يبح بساع واحنا كاوين دشداشته لبسها مشط وطلع حاطين كراسي بره الحوش وملتمين ولدنا وزلم من السلف، وعفراء ماتخليني اعاين كلساع ساحلتني لمن ضلوا يهوسون ركضت اعاين لو مو تسحلني احبن هوساتهم هوه واكف سبحته بأيده مبتسم وهمه يهوسوله النوب شغلوا مولود يصفگون وياه وبيهن يركصون.
شيخ حيدر يريد يحني كهلان وهوه ما يرضى مايحب الحنه تالي خلاله شويه بأصبعه الصغير، بعد ما گدرت اعاين سحلتني عــفراء من جديد التهينه ل٢ يله نمت وكعدتني من الصبح لكيتها ضاله كاعده كانسه حتى البره الحوش لو ماكاضينها واصله الشارع.
كلها تركض وانه وماسه اخذنه ريـــمه للصالون ودانه وهب استغربت حتى من صعدت ريـــمه ما سلمت علينه حاجيتها بالصالون تعاينلي ساكته حاجته مــاسه كالتلها
-شبيج مريضه؟
هزت راسها لاا
وضلت ساكته مناه لمن كملن مكياجها وانه بس اخافن تضل ايدي ترجف لبسناها البدله نلغي وهي حرف ما نطقت من كضت وكفناها نصورها عبالك تمثال
-ريـــمه اضحكي شني السالفة.
حركت شفايفها ابتسمت ببرود صورناها شويه واجت الزفه طلعنه للحوش انه وماسه متوترين وريمه بس صافنه نسمع الهورنات وهوسات الولد يم باب الصالون
فتحت الباب مــاسه طبوا طــروادة اعصاب وراه ســليم وعمي شاكر وجدي
عاينت لطرواده بدّلته السوده البروشات يلمّعن بالردن شايل لحيته ومخلي بس الشارب وكف كدام ريـــمه ودار على عمي شاكر البست بأيده جره منه غطه ريـــمه بيه وهي ساكته مدنكه احنه حطينه ايدها بأيده ومشينه وراها شايلين البدله صعدت بالسيارة واحنا مشينا وي صــيهد صعدنا ليوره وصعد بالصدر بريا خزرته بس ما عاينلي.
سيارات الزفة هوووواي وسيارات تروح مناه وتجب مناه وصيهد بس يسب بيهم والهورنات حاركه الشارع
لمن وصلنه للقرية حاطين كلبنه بشيشه نزلنه وراهم طببوا ريـــمه البيتنا كعدوا هي. وطرواده على الكراسي وهوه وخر منها البشت وعفراء تساعده وخرت الكبوس منها والنسوان يهوسن بعبيهن گدامه بس عرفتهن نسوان بيت شيخ حيدر ضحكت احبهن يقهرن ميلاد، سلمت على نسوان اخوالي وشهكت اضــحك من شفت عنه ايمان بعربانتها جايتنه شبگتها كرصتني تگلي
ايمان:: جا مو كلتي من يفرخن دجاجتج توديلي شو ما وديتي؟
-نسيييت.
ضحكت وعافتني ذبيت عبايتي وطلعت طــروادة طالع وانه ادور ميلاد بس شفتها تعاين شديت الشال جوه خصري وجريت عفراء للنص نركص واجن ويانه بــدور ورغد ووحده من بنات شيخ حيدر وامها ركصنه الحد ما تعبنه صبينه العشا للنسوان وريمه بعدها تعاين بنفس النظرات والنسوان يحجن عليها يتهامسن وحده تكل للثانيه جنها مريضه والثانيه تكلها لو مريضه لو مجبوره.
النوب يشوفنه يمهن ونسمعهن ما يهتمن ولا يسكتن اثنين على صفحة كاعدات تكلها يوميه عرس شني هالفلك هذا واحنا فواتحنه تجر صارلنه سنتين من فاتحه الفاتحة.
حطيت قواطي الببسي كدامها كاش وجهي كتلها
-برد حيلج جا عرسي ياهو كاضج.
عاينتلي بخزر كمت من يمها وهنه كل ساع وصايحين عليهن مرت فلان يردونها بنات فلان يردونهن وملساع تطزع مجموعة لمن بيتنا فرغ ضلت بس بناتنا، اجه عمي شاكر راد يسلم على ريمه طلعتله للحوش نعاين عليه من الجامه مسوا كلش بصف السياج يحجي وياها وهي تهز راسها مدنكه باسها بين عيونها واجت طببناها. وعفراء كالت للبنات
-روحن روحن انه انظف.
وهنه حسن بيها طردتهن ضاجن وراحن، أعاين لعفراء تطكطك باصابعها بخوف ومشت لريمه للغرفه كاعده على طرف الچربايه مدنكه شالت راسها من دخلنه عليها وعفراء بساع فتحت الكنتور. طلعت دشداشة كالت الريمه
-خل ابدلج طــروادة يبطي يم شيخ حيدر وسيد عباس.
وهيه ساكته. اشرتلي اطلعي طلعت لمن بدلتلها يله رديت طبيت للغرفه عفراء علكت البدله على صفحة ومشت الغرفتنا وإنه وأكفه بباب غرفة كهلان اعتين الريمه وهدوئها مستغربة
-ريـــمه شبيج؟
عاينلي عيونها ذبلانه حتى المكياج ماگدر يضم حزنها هزت راسها ماكو شي وطبت عفراء تتلفت بأيدها كلاص لا هو ماي ولا هو عصير عافه على الميز ومسحت وجه ريمه من المكياج شالت الكلاص وكعدت يم ريـــمه شالت الكلاص تشربها شربت ساكته نص الكلاص شربته، تعاين عليها عفراء بخوف وريمه على نفس الكعده تخوف
طلعت عفراء من يمها مشيت وراها وهيه تفتر ترجف وتصيح
-دخيلك يا ربي دخيلك يا علي
-يمه عفراء شكو؟
وهيه تعصر باديها وتدعي ترجف والولد بعدهم بره هوسه سمعنه ريـــمه تكح ركضت عفراء وآنه وراها واشوفنها كاعده بالگاع تتقيئ شي اسود مثل الخيس، ضليت واكفه بالباب خايفه وعفراء تدك على ظهرها. وتصيح عليَّ
-جيبيلي مااااي بساع.
ركضت جبتلها الماي ارجف واكلها
-ما ماكله شي هيه.
غسلتلها عفراءس وريمه روحها رايحه ردّت تتقيئ خيس اسود، كومتها عــفراء للحمام صاحت. علي
-تعاي غسليلها.
طبيت وي ريـــمه اغسللها وهيه راحت تنظف الغرفه وردت اجتنا للحمام تركض طلعنه ريـــمه من الحمام ترجف بأدينا بس وصلنه الهول طاحت صرخت وعفراء صاحت
-اشششش اشششش صوتج.
حطت راس ريـــمه بحضنها ترجف وتحاجيها
-ريـــمه، ريـــمه.
هزتها حييل. وجها اصفر وشفايفها صارن بييض ركضت جبت ماييي بارد غسلت وجها بيه شهكت ريـــمه فتحت عيونها مجلبه بأيد عفراء. بس ركزت بوجها بجت حييل وعفراء جرتها الصدرها حاضنتها وتبجي وياها، وخرتها من حضنها حطّت راسها على رجليها تمسح دموعها
-اششش ريـــمه عاينــي عليَّ.
ريـــمه :: درت عيوني منّها اتلفت احجي صوتي مايطلع
-امي .. امي وينها امي رباب.
شفتها جرتني الحضنها شفتها، مسحت عيوني عفراء تبجي وانه صافنه بيها
- عفراء.
-ها گـــلبي هاه.
سكتت استوعب عقلي هوسه مثل الضباب كعدت على حيلي اتفلفت بالبيت استوعب الصوت بأذني ما ينفهم ومن اتذكر شي احس مغوش ما واضح بس اتذكر من عفراء بدلتلي البدله
كومتني من إيدي للغرفه غمضت عيوني اريد استوعب كبل لا ادخل للغرفه شجان صاير ما اتذكر شي ما اتذكر ويامن رحت وشلون رجعت ما اتذكر اي شي
أعاين العفراء احس معدتي خفيفة شي ثگيل مثل الصلبوخ جان ببطني احس هسه ماكو
-عفراء انه جوعانه.
-يابعد عيوني راح عنج الجووع هسّه اصبلج.
طلعت تركض عصرت راسي بين ايديي اريد اتذكر عرسي هذا؟ انه ليش ناسيته اليوم صار ليمت لحگت انساه، هوسه حيل براسي اريد استوعب ما اگدر اجت عــفراء بساع جايبتلي صينية كعدت يمي توكلني لگمة ولعبت روحـــي طلعت بساع اتقيئ رايحه روحـــي غسلت ورجعت للغرفة عفراء ما عايفتني وانه بعده روحـــي ممروده اريد افهم شي من الجاي يصير بيه بدلتلي عفراء ووكفتني گدام المرايه عاينت لروحي ملبستني روب الابيض وتحطلي حمره وخرت ايدها
-عفره انه مو زينه
هزت راسها اي
-وهسه تصيرين زين من طلع هالسم من بطنج تصيرين زينه.
-ما اتذكر شي
-شوي شوي تتذكرين.
عافتني وطلعت من سمعت صوت الولد وانه ايدي على راسي يوجعني حييل شلت راسي على فتحة الباب من طب طــروادة وكفت ايدي ترجف جريت الروب أغطي صدري عاينلي ودار وجهه ذب الستره ومصح وجهه بأثنين اديه دكت الباب عــفراء فتحته تحاجيه وانه كوه فاتحه عيني صافنه بيهم كالتله
-ريـــمه مريضه مصخنه ملس ديربالك عليهها خاف تشمر.
دار وجهه عاينلي ودار عليها هز راسه اي كالتله
-هسه اجيبن عشاكم.
طــروادة:: ما اريدن انا اكلت وي الولد شويه.
-هاه جا ريـــمه ما كدرت تاكل لعبانه روحها.
-ما.. ما اريد انه.
عاينتلي ساكته وهوه سد البآب قفلت ودار علي صافنه بوجهه اريد اتذكر موقف وياه بالعرس وكف كدامي ومد أيده لوجهي يتلمس كصتي
-ما مصخنه زينه.
وخر أيده وراح للكنتور يبدل رجعت كعدت على طرف الجربايه منطيته ظهري بس احاول اتذكر هاليوم والگبله شصار وين جنت
شلت راسي فازه من طفه الاضويه همست صوتي يرجف
-كهلان.
-هاه عيوني.
شغل ضوه خفيف بلعت ريكلي گـــلبي يدك حييل
-انه.. أنه تعبانه.
هز راسه اي واجه يمي تمدد وجرني من ايدي الحضنه جسمي يرجف
-كهلان
مارد مد أيده للروب يوخره عني، اخر محطة خلص بيها حيلي جسمي التعبان ولمساته اللي بدون آي شعور مجرد شي يريد ياخذه غمضت عيني ماعندي طاقة الشي ابتعد عني مغطيني مسحت عيوني لبس دشداشته وشغل الضوه يعاينلي جريت الغطه علي زين عيونه حمر ابتسم وحجه بهدوء
طــروادة:: ريـــمه !
اللبسي هدومج وگومي امشي الاهلج.
شكرا لزيارتكم عالم روايات سكيرهوم
