رواية أرض الخناجر الفصل الرابع والخمسون بقلم ايلول
ظرفـك سهـل ماينـقاس ويّ ظـرفيَ
جرحك عـيـن الأبره وجرحـي عـين ألبـوم
مفتـش ليلـه كـله ومارضـه يغفي..
══━━━━✥◈✥━━━━══
ريـــمه :: بكل مچان غريبة، حتى البيت الچنت احسه احن عليَّ من بيت اهلي ضعت بيه، مذنبه خجلانه من نظراتهم ومن نفسي ومستحقرتها بدون ما اعرف شنو هيه جريمتي.
مستثگله كعدتي يمهم وتحز بگلبي نظراتهم الي.
عــفراء تطبخ الغده ورنه تكنس بالهول اليوم ما مداومه وانه كاعده بباب الغرفة اعاين عليهن ما ادري شني الاسويه
صاحت عفراء على رنـــه
عــفراء:: رنـــه يله حتى ترشين الحوش.
رنـــه :: بالحسين هم ارشنه انه مره عدي سكر مو زين علي التعب باوعي دخت دخت.
ذبت المكناسة من أيدها وحطت أصابعها على راسها وعفراء وكفتلها بباب المطبخ بأيها السجينة وتضحك عليها ابتسمت على سوالف رنـــه وهيه بس شافتني مبتسمه گلبت عيونها بزعل وگامت اخذت المكناسه وطلعت للحوش
عاينتلي عــفراء تضحك
عــفراء:: اريد اتعبها حتى بعد ما تغيب .
سكتت گـــلبي يوجعني وهيه رجّعت للمطبخ شويه واجت بأيدها معجنه صغيرة وصحن وسجينة وزلاطه حطتهن گدامي
عــفراء:: سويلنه الزلاطه راح يجي رجلج مانلحك.
مسحت وجهي اهز راسي اي
-بس اغسل ايدي.
گمت غسلت ورجعت كعدت بمچاني اثرم الزلاطه وطبت رنـــه تدردم على عفراء
-واحد يغيب يرتاح يطلعوله شغل من جوه الگاع.
غسلت وجها واجت للهول گابلت شمس بوستها حييل بخدودها الحد ما بجتها وعفراء تصيح عليها متحلفه بيها، وهيه كامت تركض فتحت باب الحوش طبوا حسين وزهره جابهم عبود، همه يحجون على المدرسة وعبود يدردم على طــروادة لان باع السيارة وضلوا لو رادوا شي يرحون بسيارات الولد وينحرجون بالاخص من سيارة ســليم لان گبل اندعم بيها بريا باعوها بخسارة ورد اشترى جديدة وغالية من يطلعون بيها الولد ما مرتاحين خاف يصير بيها شي رغم هوه ابد ما يحجي ودوم يگلهم فـــدوه الكم السيارة وراعيها.
اثرم واعاين عليهم شمروا الجنط بالهول والاحذية وحسين ذب قميصه فوك الجنطة وزهره طلعت دفترها وتراوي الرنه الدرس الكاتبته وكلمن يحجي بصفحة وحسين متحمس وصوته عالي لمن صاح عليه عبود
عبود:: يييله تعااال شيل هدومك وامشي غسل وصلي خبصتنا.
دنك بساع شال الجنطه وقميصه وراح للغرفة، عبود دار الزهره حاجاها على كيف
-يله زهوه شيلي جنطتج وامشي غسلي وصلي.
ركضت زهره تضحك اخذتهن وطبت للغرفة وهوه برجله دفر أحذيتهم طلعهن بره البيت ودار علينه غم رنـــه وعاينلي يضحك
-ها مرت آخوي شلونج ؟
-الحمدلله.
اخذت الزلاطه ورحت للمطبخ يم عفراء تحاول تحسسني إني ببيتي حطي هيج وسوي هيج وصاحت على عبود
-خابر طــروادة شوفه شني نتغده لو يجي.
خابره وطرواده يرفضه ما يرد كالها
عبود::يجوز اجه هل ما يرد.
حضرت مواعين الغده وي عفراء مرتبكه ومتقيده بعدنا بالمطبخ واجه طــروادة مشه. عبود فتحله الباب وانه وره عفراء اصب الزلاطه التفتت لباب المطبخ من طب بأيده علاليك
-السلام عليكم
عــفراء:: عليكم السلام، الله يساعدك.
اجه يمها للمطبخ حط العلاليك بالباب يمشي ويحجي وياها وجن انه اساساً ما موجوده، من شافت وجهه معصور وعيونه متعوبه. گالته
-شني شبيك؟
حجتها ومدتله كلاص ماي اخذه منها وگبل لا يشرب گالها
طــروادة:: راسي حيل يوجعني.
شرب الماي وعفراء گالتله
-بس تغده واطيك براسيتول.
طلع من المطبخ غسل وصله كملنه الصينية واجه عبود اخذها للهول التموا داير ما داير الصينية وبس انه وعفراء بعدنا بالمطبخ هيه اخذت سلة الخضره وگالت
-ريـــمه بس جيبي الماي.
خليت ماي بدولكه واخذت كلاصات رحت وراهم للهول عفراء كاعده بصف طــروادة سوتلي مچان بينها وبينه
-تعاي ريـــمه.
وهوه هم ثنه رجله يسويلي مچان بصفه، كعدت منحرجة هو مدنك ياكل ساكت وعبود ياكل ويصيح
-هسه يله اكلنه شي طيب عمي مظلومين وي رنـــه احنا.
رنـــه شمرت الخاشوگة من أيدها وتعاين لطرواده
رنـــه :: سمعته شگال؟
شال راسه يگلها
-خيولي مالج غرض بيه.
ومد أيده جاب خاشوكه خلاها گدامي ساكت طكتني عــفراء تحجي
-آكلي شبيج ؟
دنگت اگلب الاكل بالخاشوگة دار وجهه علي ومد أيده بصفي يريد يشرب ماي همس
طــروادة:: ما بيه سحر لا تخافين.
شلّت عيني لعينه شال الكلاص يشرب ماي وعينه بعيني كلّهم سكتوا لان سمعوه شحجه گام يغسل وعبود گال العفراء بنتر
عبود::هذا شماله؟
وعفراء ساكته گمت بدون ما اكل ولا لگمه طبيت للمطبخ مختنگه عيوني يحركني ما اريد ابجي، مسحت وجهي نصيت النار على قوري الچاي وحضرت الكوابة اجت وراي عفراء وشمس بأيدها حلكها متلف وكفت يم السنك تغسللها وتحجي وياي
-ليش ما اكلتي ريـــمه؟
-شبعانة!
-والله ولا شبعانه شني تستحين؟ جا انتِ غريبه يا ما اكلنا سوه يا ماكعدنه شجاج؟
دنكت ساكته وهيه اخذت شمس وطلعت طــروادة كاعد بالهول على صفحة يعاين بتلفونه حطت شمس بحضنه عاف التلفون وكضها يبوس بيها ويشاقيها، ضليت واكفه يم الطباخ صافنه على النار لمن جابوا الصينية ورنه وكفت تعزل المواعين تريد تغسلهن وحجت بهدوء بدون ما تعاينلي رغم زعلها گلبها بعده حنين
رنـــه :: اصبلج تاكلين هناه خاف استحيتي يمهم؟
-لا لا ما أريد شبعانه.
هزت راسها خوش ساكته زهره اخذت المكناسه وراحت كنست المچان، درت الرنه احاجيها
-توديلهم الچاي وانه اغسل المواعين.
-لا مواعين العشا عليج ومواعين الغدا عليَّ، الچاي ودي الصينية والقوري اطيهن العفراء هيه تصب.
سكتت وهيه من تحاجيني ما تعاين الوجهي اخذت الصينية وقوري الچاي وهمه كاعدين بالهول يضحكون على شمس مديت الصينية العفراء گالتلهم
عــفراء:: يمه الچاي الچاي كضوها لا تحترك.
اخذها طــروادة بحضنه بعدني واكفه گالت عفراء
-ريـــمه تلكين براسيتول على الميز بغرفتنه جيبي وحده لكهلان وكلاص ماي.
مشيت للغرفة ساكته اخذت حبايه ورجعت للمطبخ اخذت كلاص ماي ومشيت وكفت وره عفراء ومديتهن اله اخذهن من ايدي ويحجي وي عفراء
طــروادة:: موتني الزرزور سلس السنابل تسلس
عــفراء:: ليمت تحصدون
-بلكن للهدعش نحصد.
شربت الحباية جرتني عفراء بصفها صابتلي چاي اخذته منها مدنكه واسمع لسوالفهم هوه بس كضه چايه وكف وجر الچفية من الباب حطاها على راسه وتوه يريد يلفها على وجهه صاحت عليه عفراء
-وين رايح؟
طكطك رگبته تعبان وكوه يحجي
-للگيعان.
عــفراء:: لنعل ابو الگيعان صارلك چم يوم ما تنام غير ساعة ساعتين وتلوع من راسك شني تريد تموووت روحك؟
تحجي بحرگة وهوه ابتسم لف الچفية على وجهه يضحك ويگلها
-من البارحة ما شايفها
-ما تروح طب نام للعصر واكعد روحلها.
عبود:: ضل انا اخذ سجاد واروح.
هز راسه لا جر تلفونه من الميز حطّه بجيبه گالتله عفراء
-ساعة ورد لا احرگهن.
وبس جابت طاري الحرگ شال راسه عاينلي دنكت عيني گالها
-ميخالف احرگيها تعودت.
دار وجهه وطلع اخذ هاسكي ومشه للگيعان وعفراء تحجي عليه عبود گالها
-رايح وراه .
شرب چاية وطلع بساع لحگه درت العفراء احاجيها
-عفراء راح اروح البيت اهلي شويه!
سكتت تعاين لوجهي شويه وگالت
-لا خيه مايصير اقلها خل يمر اسبوع والنوب ترحين.
سكتت وهيه رجعت تحجّي بضحك
عــفراء:: المن رايحه بعد ما ننطيج بتنه رجعتيلنه.
-اشوف ابوي وهاجر.
-بالليل نوديلج على هاجر هيه هم تتونس هنا.
سكتت طفوا الاضوية تمدّدوا بالهول ينامون، حسين وزهره غفوا، وعفراء متمدده ورافعه راسها على ايدها تعاين للتلفزون ورنه تعاين بتلفونها، گمت من يمهن طبيت للغرفة طفيت الضوه وتمددت على الچرباية بالطرف ايدي جوه خدي وافكاري متشتته شي بداخلي غريب وشعوري متناقض احس روحـــي مريضة بس ماكو عله بجسمي ما ادري شنو اليوجعني وهلكد تعبانه،غمضت عيني وجريت نفس بشهگه ادعي
"ربي لو ترحم بحالي واتذكر كلشي لو تنسيني حتى اسمي "
مسحت دموعي لامه رجليَّ الصدري اريد احط غلط بأهلي ما اگدر اغلط روحـــي ومشاعري وهمه صح وحتى لو مره اقتنعت هالتصرف منهم غلط ومن اريد أحجي الگه روحـــي صافه وياهم بدون شعور ومطلعتهم صح بنص الخطأ.
غمضت عيوني گـــلبي يوجعني اريد أغفى بس كل اللي يصير وياي جسمي يسكن وروحي تتلوع
بين النوم والصحوه عالم يخنگ روحـــي تتهجول هناه لا انه الصاحيه ولا أنه النايمه.
حركت أيدي اجر البطانية على جسمي اتلفلف بيها رغم ما بردانه حيل بس اريد شي يلمني يلمّ ضياعي اريد احس روحـــي بمچان يحس بيه يدليني ويطلعني من كلشي انه بيه.
وكت عده وانه بعدني اتلوع بعالم ما ينوصف روحـــي تلوب، دقايق وسمعت باب الغرفة انفتح ضليت مغمضة عيني وحجي بعقلي ما نايمه انتِ لو نايمه ما تسمعين فتحة الباب، حرب احس بعقلي، خطوات خفيفة مشت بالغرفة، صوت باب الكنتور انفتح وانسد، گـــلبي تضاعفت دكاته وگمت اسمع صوت النبض يدك بأذني، ثواني ومشن اصابعه الباردات والرطبات على كصتي ومن كصتي نزلهن الخدي يتحسس حرارتي، صوت نفسه متحسر، فتحت عيني بعينه بساع جر أيده مبتعد ودار انطاني ظهره راح للميز عاف تلفونه عليه، جابله غطا من الكنتور واجه للچرباية اخذ مخده عافها بالگاع على المده وتمدد لف روحه بالچرچف حييل.
كمت من مچاني مسحت وجهي وكعدت يمه دغيته بچتفه وخر الغطا من راسه وعاينلي
-نام على الچرباية انه راح اروح الاهلي.
كعد على حيله مدنك يمسح بوجهه ودار عليَّ گوه يحجي
-وين ترحين؟
-لبيت اهلي بالليل اجي.
-لا.
سكتت اعاين عليه مستغربة رجع تمدد حط ايده جوه راسه يعاينلي گوه فاتح عينه شعره مغطي كصته وانه كاعده بصفه على اركبي همست
-اهلي!
-احنا اهلج.
درت عيني منه امسح وجهي گـــلبي يوجعني رجعت اعاين لعيونه
-ما تگدر تحرمني من اهلي احجي انه احجي الاخوني ســليم وسلطان والله.
إبتسم يعاين الوجهي يحجي بهدوء
طــروادة:: احجيلهم وانا هم اسولفلهم ابوج بيوم عرسنه شعلمج تحجين واخوتج يعارفوني ما اچذب اذا ماخليتهم يكتلون ابوج انا مو أبن شامل.
فاتحه عيني حييل وگلبي يدكّ بقوة خازرته وهوه مبتسم
-ارووح والله اروح.
-فنچ.
درت وجهي منه اريد اگوم جرني من أيدي بقوة صيحت موجوعه واريد أفلت ايدي من ايده نترت
-بس هد ايدي جاي توجعني.
عاف إيدي وگام لباب الغرفة قفلها وجر المفتاح رجع لفراشة وانه واكفه اعاينله
-تحرمني من اااهلي؟
حط المفتاح جوه راسه وتغطه ما مهتم، مسحت عيوني بس اريد احجي بهدوء
-كهلان؟
-اريد انامن أسكتي.
-يعني تحرمني من اهلي؟ هذول همه يعني حتى لو قفلت الباب هسه اگدر اروحلهم من تطلع.
طلع راسه من الغطا وشال ايده يهدد بغضب
- اطلعي بدون علمي وشوفيني شسوي وكلام الله ابچيچ.
-شتسوي تطكني؟
جر الغطا فوگ راسه ودار منطيني ظهره يحجي
-اسكتي ريـــمه اسكتي.
-أروّح كهلان گلي مو هسه مو اليوم بس لا تگلي ما ترحين دوم آهليّ هذول.
وهوه مغطي راسه يحجي
-ما ترحين ما توصلينهم لا هسه ولا بعدين، اخوتج همه يجونج وتشوفينهم وحتى اهلج لو رادوا يجونج لهناه انتِ ما ترحين.
-هههههه شنو ماخذني فصلية؟
نتر الغطا من راسه يحجي بقلة صبر
طــروادة:: يا علي يا ابا الحسن، هسه غير تسدّ حلگها.
سكتت اهز بأيدي رد غطه راسه كعدت بصف الكنتور اعاين عليه شويه وعله صوت نفسه من نام، فتحت الكنتور اخذت عبايتي وطلعت من الشباج صار بوجهي هاسكي عاينتله مربوط وبس شم ريحتي ضل يزير يعاينلي بعيونه التخوف تعديت من الطرف عبرت ومشيت باستعجال طلعت من الحوش البيت آهلي طبيت واول ما دفعت باب الحوش صارت بوجهي هاجر تغسل مواعين فتحت عينها حيل والضحكة شگت حلكها غسلت اديها واجتي بساع شبگتها ابوس بيها
-شلونج هجوره ؟
وخرت من حضني تأشرلي زينه
-ليش انتِ تغسلين المواعين امي وفرح وين؟
شالت ايدها تأشر أصبع بصف أصبع مبتسمه وتشرح
-انتِ صبيتي غده السليم؟
هزت راسها اي بستها بين عيونها
-اروح فـــدوه للنادره.
احجي وياها واجه ســليم للمطبخ بأيده كلاص بس شافني ضحك
-شجابج ولج.
-هههه شني السالفة وين انه بالمريخ حتى شجابني.
مد ايده الي يضحك سلمت عليه
ســليم:: شلونج شخبارج؟
-الحمدلله، شني اهلي نايمين شو سكته.
-والله ما ادري انه توني اجيت جنت بالگيعان
مشينا ثلاثتنا طبينه الغرفة ســليم يم سلطان كعد على حيله من شافني ابتسم سلم عليَّ يبوسني ومايعوف ايدي كعدت على الچربايه بصفه وسليم وهاجر كعدوا گبالنه كال سلطان
سلطان:: شعجب اجيتي
-ليش؟
-بعدج عروس خويه ليش طلعتي من بيت رجلج.
-اشتاقيت الهاجر.
حجيتها ودنكت ساكته ســليم صاح
ســليم:: اكلك انتَ ليمت تطلع من غرفتي مليت ترى من نومت الدوانيه
ضحك سلطان بعده تعبان گاله
سلطان:: هسه اروحن البيتي
ضحكوا اثنينهم وگامت هاجر من مچانها اجت السلطان باسته بخده وشبگته ساكته وهوه يطبطب على ظهرها مبتسم ويحاجيها
-هجوره حبيبتي.
ووي حجايته صاحت امي
-هاااجر هاجر وينج ولج تعاي سوي چاي الابوج.
وخرت هاجر من حضن سلطان وهوه يحجي
-كوم ســليم انت حميه وصب چاي الابوك.
عاينت بينهم عفت عبايتي على الچرباية وگمت
-انه گايمه.
طلعت من الغرفة صاروا بوجهي ابوي ومرتضى كاعدين بالهول سلمت عليهم مرتضى گالب وجهه وابوي گال
-هلا بيج بويه هلا
مشيت للمطبخ يم امي سلمت عليها گالت
-شني شلونهم هالچلاب وياج.
درت للطباخ ساكته وهيه تغلط عليهم صبيت چاي اثنين وطلعت لكيت بس مرتضى بالهول اطيته استكان احاجيه
-چا ابوي وين؟
-بالدوانيه.
اخذت الچاي ورحتله للدوانيه مادر رجليَّه ويمسح على اركبه موجوع اطيته الچاي وكعدت يمه مديت ايدي على رجليَّه امرغهن
-ما تروح للدكتور على رجليك يابه؟
-وين يا بويه انا ملحك هل تشوفين حالنه منا وهيج حصاد لوره الحصاد اروح.
-اي فـــدوه روح.
-انا لو ما هالچلب كاسرها چا مابيهن شي رجليَّ
دنكت امرغ رجليَّه ساكته وهوه بس كضه چاي كضني من ايدي يعاين لوجهي وسأل متردد
-ريـــمه بويه چا انا شوصيتج؟
عگدت حاجبي اعاين لوجهه بأستغراب حركت راسي اسأل
-شوصيتني؟
صفن بوجهي ساكت بلع ريگه وشال ايده يمسح على لحيته منزل عيونه وانه گـــلبي دك بخوف
-يابه شوصيتني؟
شال راسه يعاينلي
-مو كتلج انا .. كتلج لا تطلعين من بيت رجلج گبل لا تهل سابعتج ما يصير يابه
سكتت اعاين لوجهه ما مرتاحه وهوه يبتسملي درنه على فتحة الباب
ميلاد:: ريـــمه تعاي.
اخذت الاستكان وكمت وراها عفته بالمطبخ ورحت الغرفتها
-ها يمه؟
اجت يمي سدت الباب وجرتني من ايدي لنص الغرفة دنكت عيني ما اگدر أخليها بعينها احس داخلي يرجف من اعاين لعيونها غصب عني إهابها واخاف.
ميلاد:: بياضج وين؟
بلعت ريگي ورفعت عيني اشوفن وجها
-ما.. ما ادري عده عد طــروادة.
-جيبيه اريده.
هزيت راسي اي
ميلاد:: لا ترحين ضلي لوره العشه يله ترحين.
-اي.
سكتت وجرتني من ايدي الحضنها غمضت عيني گـــلبي يدك حيل جنت افرح واحس بروحي مالكه الدنيا من تشبگتي بس هسه كل مشاعري خووف ، وخرتني من صدرها مسحت وجهي بين اديها
-تعاي.
جرتني من ايدي طلعنه من غرفتها هاجر كاعده على الدرج وبس طلعنه وكفت ومدّت ايدها الي جرتني من ايد امي وتعاينلها بخوف صعدت وياها فوگ طبينه للغرفة طلعتلي دفاتر رسم جديدة واللوان هواي وانواع ولوحات صغار بعدهن ما مرسوم عليها فتحت واحد من الدفاتر تريد تراويني رسمه وانه اكلها
-الله شكد حلوات ياهو جابهن الج؟
عگدت حاجبها مستغربه وأشرت عليَّ بأصبعها
-انه؟
هزيت راسها اي سكتت اعاين لعيونها
-ليمت جبتهن هاجر؟
اشرتلي وما فهمتها احس روحـــي صخنت وعيوني يحركني
-ما مافهمت ليمت جبتهن الج؟
جرت دفترها تكتب ودارته الي
-گبل لا تعرسين رحتي وي ابوي للدكتور وجبتيهن.
صفنت احاول اتذكر اي شي من حجيها مسحت رگبتي مختنگه والغصه تصعد وتنزل ببلعومي ما اتذكر شي، انفتح باب الغرفة وهاجر بساع سدت الدفتر وضمته طبت آمي بايدها كلاصات عصاير خلت الصينية بيناتنا وكعدت يمنه تسأل
-اكلج شني عفره ما تمشي شو صارلها شكد هناه.
-لا تروح بس ضاله علمودي انه اضوجن من يرحون كلهم للمدرسه.
-تعاي هنه من يولون لدواماتهم
هزيت راسي اي اخذت العصير اشرب وهيه دارت الهاجر خازرتها وتهدد
-لو لگيتج راسمه مو خوش رسمات امووتج.
وهاجر گلبت عيونها ودارت وجها منها ضلت كاعده يمنه تسولف وتحجي على فرح تمددت على فراش هاجر واحجي وياها
-ليمت يشيلون لبيتهم.
-آندري بيهم هاي فرح صايره ما تنجرع وانه مليت.
سكتت اسمعلها وماحسيت بروحي من غفيت، غفيت بتعب مو براحة احس كأنما انه انام وروحي تضل تحارب حتى تعيش.
فززتني ايد هاجر تدغ بيه كعدت على حيلي اتلفت وراسي يوجعني عبالك فاقدة الذاكرة وشوي شوي يرجع كلشي لعقلي عاينت للساعة بالتسعة وهاجر تأشرلي بأيدها يردوني گمت وياها مخلوبه روحـــي مدري شبيه درت أعاين للغرفة عقلي مشوش، سلطان واكف يم الدرج
-تعاي خويه رجلج يريدج انا عبالي رديتي.
كاض عباتي بأيده طلعت امي من غرفتها تحجي
ميلاد:: شني السالفة اجه عليها بعدها ما متعشيه.
سلطان:: تتعشه وياه.
خزرته ضايجة جرني من أيدي للحوش طلعنه طــروادة واكف بره الحوش يم الباب ومن طلعنه عاين السلطان وهوه گاله
-چانت نايمه.
طــروادة:: اي اجيت عليها مساع وامك گالت نايمه.
سلطان:: شني مشغلينها عماله ؟
-ههههه يله خويه منّ رخصتك.
أشر براسه امشي، مشيت گدامه آريد اصحى دكات گـــلبي عاليه وعقلي مو صافي، اول ما طبينه للحوش رنـــه وعفراء واكفات بخوف يعاينن وهو بس طب وراي رگع الباب حيل درت عليه وعفراء صارت بيني وبينه شال ايده اعصاب ينتر
طــروادة:: شگتلج اناا؟
عــفراء:: بس اوكف خل احاجيها.
وهوه ولا مهتم شايل راسه بغضب من فوك عفراء يتهدد
-كتلج ما ترحين لو لاااا؟
-اي.
جرتني رنـــه من ايدي للبيت طبيت للغرفة عاينت لوجها درت ورجعت اعاينلها گـــلبي يوجعني ومدري شلون جاي اشوفهم وهيه بساع صاحت
-يممه شبيج؟
حطيت ايدي على عيوني گوه اتنفس كعدت على طرف الچرباية واندفع باب الغرفة حيل طب طــروادة وعفراء مچلبه بيه عاينلي بخزر وكفت كدامي رنـــه وهوه يأشر بأيده محترك گلبه
-اطلعن.
عــفراء :: كتلك على كيفك مو بالصياح اكعد وتفاهم بهدوء.
افتر گدامهن يلوب ويهز راسه آي وعفراء تعاين بينه وبينيّ بحيره، طلعن من الغرفة سدن الباب وراهن دار يعاينلي.
-تعانديني ريـــمه؟
يحجي وانه ساكته بس أرمش بعيني احس اكو شي براسي تزاحم بين ماضي وحاضر شي ما ينوصف.
مسح وجهه وجر نفس بحسره ورد عاينلي
-كتلج ما ترحين لو لا؟
مسحت عيوني اهز راسي اي
-جا ليش رحتي؟
-اهلي وانتَ تريد تحرمني منهم.
ضحك وهز راسه اي، عيونه حمر وايده من العصبية ترجف
- لو اهلج اوادم ما حرمتج منهم، يا أهل هذول الخلو طفلة تبوك گراب خنجر من عمها؟
فاتحه عيني حييل حجايته سجين بنص گـــلبي هز راسه خوش وتدنه يمي وكف گدامي شلت راسي اعاينله واحس عيوني انترست دموع
-فتحي عينج ريـــمه وعايني زين اندلي اهلج وين، الذبوج من عمر يوم وردوج يمهم بس علمود مصلحتهم هذول مو اهل.
درت وجهي منه گوه اجر التفس ودموعي جمر يحرگ خدي وهوه ما ناوي يسكت بكل لحظة يغرس سجينة بگلبي
طــروادة:: اريدن آنسى غدراتج لا تچملينهن، منين ما اجيج انصد.
شهگت گوه اجر النفس دار وجهه وطلع رگع الباب وراه حيل كعدت بالگاع ايديي على راسي وابجي بحرگه واعصر راسي حييل كارهه روحـــي اريد عقلي يوكف ومايفكر حرب براسي ، گمت بساع قفلت باب الغرفة وحتى من البنات دكنه ما فتحته تمددت بالگاع فاتحة عيني ودموعي تطيح سكته، وبس غمضت عيني شهگت وفتحتها خايفه من افكاري من عقلي وشره اريد افهم روحـــي وذكرياتي اللي فجأة تتزاحم براسي وحچاياته التدك بنص گـــلبي
اي اي صح انه غدرت عمي وهسه بكل صلافة جايه لبيته اعيش ولا چني مسويه شي.
جريت نفس طويل مختنگه، واذا عدتها؟ واذا رجعت سويت شي مو زين واذا غدرت طــروادة مثل ما غدرت عمي شامل، غطيت وجهي بأثنين ايدي احس بداخلي شيطان وكل فكري تمحور عليه.
صح حجيه صح هسه ما ادري بروحي واسوي شي مثل من ردت ارجع احرگ گاعه هسه اسوي شي هسه.
بجيت الحد ما تعبـــت اريد شي اتمسك بيه شي يگلي لا انتِ مو شر ما تضرين احد والموت مو حل، لميت رجليَّ الصدري مغمضه عيني بس أريد اغفى
""
رغد:: ياهي هذيج سلطان؟
عاين وياي وإنه مركزه عدل ما اشوفن بوضوح بس وحده متلفلفه بعباية ورايحه للشط گام سلطان وكف مستغرب عبرنه من الساگيه اثنينا وهيه تمشي وتنود تروح مناه وتجي مناه گـــلبي يدك حييل كاضه بأيد سلطان وهو كل ظنه امه هاي، يمشي بهدوء ما يريدها تنتبهله يريد يشوف وين رايحه، شعدها يم الشط، التفتنا اثنينا على صوت خطوات تركض، وسلطان بس استوعب هذا كهلان دفعني يم الشجرة مسكتني وانه بكل حيلي مركزه وياهم يركض وراها وهيه بس حست بيه وراها سرعت خطواتها ومالحكت جرها من ايدها الصدره صيحت تبجي بصوت عالي وهوه يكتم صوتها بصدره ويحاجيها بصوت مرعوب
كهلان:: وووين رايحه وووين ريـــمه وووين رايحه؟
صوت شهكتها هز گـــلبي هز تريد تطيح للگاع وهوه كاضها بكل حيله ويجر بيها الصدره، وسلطان يعاين ويتلفت يركز بيهم ظلمة كوه نشوفهم، صوت شهگات ريمه يتراوح وي صوت حركت السعف، صيحت بحضنه متلوعة
ريـــمه :: تعبـــت والله تعبـــت خلوني أروح خلوني ارتاااااح.
تجر روحها منه ويجرها الصدره حييل يشبگها يردد
طــروادة:: اعتذر والله اعتذر ما قصدي اقهرج، ريـــمه عاينــي علي ريـــمه وروح امي ما قصدي اقهرج.
وهيه تطيح بأيده شهگتها من نص گلبها تاخذ الروح تجر روحها منه تتوسل
ريـــمه:: والله بس اموت ارتاح ابوس ايدددك كهلان ابوس ايدددك، انه شررر كتلك كتلك من الاول انه كلي شررر عوفني عوووفني ما عفتني انتَ ما عفتني.
مشهّ سلطان بساع عليهم وانه تبعته التفتوا اثنينهم فازين وريمه كتمت صوتها تمسح عيونها وكفت بصف سلطان
-شبيج ريـــمه ؟
دنكت ريـــمه ساكته وطرواده دار وجهه رد سلطان گاله
-شبيها اختي؟
عاين السلطان توه يريد يحجي وريمه بصوت يرجف مبحوح كالتله
-مابيه ماابيه شي.
سلطان:: رايحه تذبين روحج بالشط؟
يحاجيها وهيه تشهك مدنگه عينها كضاها كهلان من أيدها عاين السلطان گاله
-زعلت من عدي اتشاقه وياها وانغثت.
ضحك سلطان يهز راسه اي ميت من آلقهر
-كتلك آمانه اختي برگبتك متعوبه لا تتعبها تالي من اول ايام تريدها ترد تنتحر.
مد ايده الريمه يجرها وياه
سلطان:: تعاي.
جرت ايدها منه وشالت راسها تمسح دموعها تهمس
-لاا
وطرواده جراها اله اكثر راسها يوصل لجوه جتفه عبر ايده عليها يحجي وي سلطان وخجلان منه
طــروادة:: ساعة التشوفني مو گد الامانه تاخذها.
ودار وجهه يمشي بأتجاه بيتهم ويمشي ريـــمه وياه وسلطان ميت من آلقهر وصلني البيتنا وراح.
""
ريـــمه:: جسمي يرجف امشي وخطواتي ما ثابته بس وصلنه للحوش جريت روحـــي من عده مبتعده فتحت باب غرفة البنات ومشيت اتلمس لمن وصلت الرنه فزت ومن بين شهكاتي گتلها
-خليني يمج رنـــه.
-اسم الله الرحمن شبيج ياهو وياج؟
ضميت روحـــي بحضنها ساكته، بس اريد اغفى وهي لامتني الحضنها تردد بأيات قرآن سديت اذني منها احس شي متكرر شي مار علي حتى دفو حضنها يشبهه احد والايات التقراهن قاريهن علي وانه ماره بنفس الرجفه والخوف، تعبت من افكاري وعقلي الحد ما نمت
""
جــويريه :: صــيهد!
ماحاجاني يعاينلي مضيك عيونه وراخي ظهره على الكرسي، گـــلبي يرجف مو يدك، نزلت من الچرباية على كيف وبس حطيت رجليَّ على الگاع ركضت للباب شارده اجر باليده والباب ما ينفتح مديت ايدي للمفتاح مالكيته روحـــي راحت درت عليه همست
-مقفول!
أديه مادهن على يدات الكرسي من الجهتين، أشر بأصابعه ارجعي تقربت بخوف رجعت للچرباية كعدت على أركبي مغطيه رجليَّ واعاين عليه روحـــي رايحه وهوه يعاينلي ساكت مدري ليش اجه ببالي مشهد من فيلم جان المجرم يباوع هيج لحد ما كعدت وذبحها، مسحت رگبتي اتحمحم
-احم ابوي فتحلك الباب؟
حرك راسه لا.
-ها احم شلون.. دخلت ؟
ما اهتملي جر باكيت الجكاير والجداحة شعل جكارة رجع راسه ليوره اكثر جر منها نفس زفره وعاينلي يسأل
-منين نبدي؟
-منين؟
-ياهو اخوج الكريم؟
دنكت اعصر بأصابعي واحجي على روحـــي تماديت ابد ما توقعته يجي جنت احجي براحتي
-احجيي؟
شلت راسي اله
-احم.
-ياهو اخوج الكريم.
شلت ايدي لزمت اصبعي الصغير اعددله
-مــيثم، كهلان، وهـــب كلهم اخواني الكرماء.
رفع حاجبه جر نفس زفره ونزل رجله كعد عدل يباوعلي
-نعديها، نجي للثانيه ليش حطيتي مكياج؟
سكتت اباوعله اريد الكه عذر ماكو كلهن حاجيتهن
وكف على حيله واني عيوني تابعته وين ما يروح اباوع وراه وصل يم الباب يباوع بالغرفه ورجع يمي باوع للچرباية جر تلفوني وخر الكفر من عده وداس كل الدكم سوه اباوع ساكته واحجي وي روحـــي لو يطحنه طحن اسكتي ميخالف يروح يله تحجين.
گلب بيه شويه وعافه على الميز باوعت للتلفون عرفته فرمته
-گتلج ما تركصين؟
-بعد ما أعيدها.
-اهاه؟
-صــيهد باوع بداعت امك العزيزة جاي تخوفني.
مد ايده على حلكي يسكتني
صــيهد:: اشش برعه انتِ وينج وين الخوف؟ أخوف زلم وانتِ ما گدرتلج.
-لا والله خفت باوع جاي ارجف
شلت ايدي اراويه ما يرجفن باوع الوجهي
-گتلج ما تركصين؟
-اي
-ليش ركصتي وتصورين روحج مو؟ ما فكرتي بله واحد من الولد طب لصور وحده من البنات وشاف صخام وجهج.
يحجي بحرگه واني ساكته خاف اكله لا اني وديته بس الك وجذبت عليك من كتلك دزيته للبنات خاف النوب ينفجر بالزايد ويكلي تجذبين،رجع كعد على الكرسي مقابيلي يدخن ويباوعلي رجعت سألته بصوت ناصي
-شلون دخلت للبيت؟
-مالج غرض.
-ابوي فتحلك الباب؟
-لا
-جا شلون دخلت؟
-مالج غرض.
سكتت اباوع عليه أشر بأيده اللي بيها الجكارة
-نامي.
باوعت للمخده ورجعت باوعتله هزيت راسي لا
-بعد مانعسانه.
ميل راسه على صفحة مضيك عيونه اكثر، تمددت بفراشي واباوع عليه ادعي يخابرونه يكلوله كاعكم احترگت جوارينكم مات بس كون يعوفني ويروح
طفه الجكارة ووگف يم الچرباية شال أيده يفتح دكم القميص فتحت عيني حيل
-هاه صــيهد ؟؟
هز راسه هاا وانه مدري شبيه لزمتني الرجفه شلت ايدي أشر على قميصه واحجي
-ليش ليش تقمص الفتيح؟
عله شاربه ابتسم وبساع خفه ابتسامته شمر قميصه على الكرسي ودفعني من أيدي وهي الچرباية ام نفر
-ديري وجهج ونامي نفس ما اسمعلج.
-بس خلي احاجيج.
-اشش سدي حلكج.
دفعني للحافة وتمدد وره ظهري جرني الحضنه ظهري بصدرة جسمي يرجف وصوت دگت گـــلبي عالي
ضم وجهه برگبتي يحجي بحرگه
-احقر بشر انتِ.
تحركت اريد التفت عليه ماخلاني يضغط على إيدي بقوة ينتر يم اذني
-ارگدي لا ارتكب بيج جريمة.
فاتحه عيني حييل روحـــي رايحه وهوه حاضني بقوة وبأثنين اديه سكت مثبت شفايفه على رگبتي هدأت عايفته روحـــي ذبلانه بين أديه ومن حسيته رجع يبوسني حركت جتفي احاجيه
-صــيهد.
باسني برگبتي حيل ساكت ما مهتم جريت روحـــي من عنده مقهوره ماعافني
-مو احاجيك؟؟
رجعني المكاني يحجي بصوت ثگيل
-شتردين؟
-ليش اجيت؟
-حتى اطيح حظج وتبطلين تعانديني.
-لا تبوسني
ووي حجايتي مشه شفايفه على طول رگبتي الجتفي ونتر من بين اسنانه
-ليش هيه بكيفج؟
شال راسه يباوع الوجهي بخزر انگلبت على ظهري اباوعله
-مو راح نتطلك؟
غمض عيونه بقلة صبر
-تسكتين لو لااا؟ عوفيني انخمد لا بهالساعة اردج للقرية.
ومن جتفي دفعني ورجع نام لامني على صدره سكتت هادئة فترة مد ايده أخذ ايدي الوجهه وحسيت شواربه على اصابعي دك گـــلبي حييل عبالي راح يبوس ايدي
شهكت وفتحت عيني على وسعها من عض اصابعي صرخت وهوه بسرعة مد ايده يسد حلكي واني بس اريد اجر ايدي من حلكه بجيت موجوعة يله عافها يصيح
-جيبي الثانية
دفعت ايده من حلكي ابجي واباوع الايدي اسنانه تطبعت بأصابعي
-وخررر وخررر.
-عليمن تبجين شني كطعتهن؟
شلت اصابعي اباوعلهن وابجي وادفع بيه اريده ينزل من الچربايه
-بقتتت عليهن كطعهن كطعهن، اااخ يمه.
-والله بيج راشدي يشهد الحسين شسويتلج هسسه؟ عليمن تبجين؟
تخبلت كعدت على حيلي اريد الطم
-ماتشووف بالضوه الاصفر خلي اشغل الگلوب وشوف اسناااانك وصلن للعظم.
احجي بحرگه وهوه اخذ الچرباية كلها نام على ظهره وخله ايده وره راسه يباوعلي ببرود
-حلفت اعضهن، خل اشوفن بعد شلون تكتبين اخي الكريم.
مسحت عيوني بظهر ايدي اباوعله بحيره هسه هذا صــيهد؟ جر آيدي مسح اصابعي وقربهن لشفايفه باسهن فوك اثر اسنانه قشعر بدني وهو يحجي
-هسه يطيبن.
-خل أعضك اني وهم ابوسهن وعود گول هسه يطيبن.
عله شاربه مبتسم واني بعدني محترك گـــلبي اصابعي من العضه صخنن جريت ايده أريد اعضها ماسحبها عضيتها بالمكان الترف من يم اصبعه الصغير عاضتها حييل واباوعله ساكت موتني من القهر حسيت عضتي ما اوجعته نفس الوجع وسديت أسناني بقوة واباوع لوجهه صافن بيه ساكت شويه وگال
-كافي.
عفتها واباوع للمكان بسرعة تغير لونهن واسناني مطبعات بقوة الجلد يريد ينزلغ دك گـــلبي بخوف من شفتها وحطيت ايد بأيد ضميتهن جوه الغطا خايفه لا يرجع يعضني.
باوع الايده مقهور وباوعلي يسأل
-هيج هيه؟
-ما قصدي
-لا قصدج قصدج، كلبج تارسه الحقد ضليتي تنكثين.
-شبيك هسه مو انتَ عضيتني؟
رفع راسه سنده على تاج الجربايه ومد روحه جر باكيت الجكاير يدخن مقهور شعل الجكاره وباوعلي
-هيج عضيتج انا؟
-مو اني انوجعت وانتَ لا.
-اي ماعدي احساس وحد ما انوجع.
-هسه هيه عضه.
عاينلي بطرف عينه وايده شوي شوي حسيتها ورمت عبالك عاضته حيه خفت مديت آيدي الايده وهوه لازم بيها الجكارة بين اصابعه قربتها لشفايفي بست مكان العضه
-هسّه تطيب.
ضحك وجرني من شعري الحضنه خله راسي على رجليَّه تمددت ساكته گـــلبي يلعب أحس فجأة يعصب ويطير راسي، مشه اصابعه بخصل شعري واني احسه يهلس بيه والجكاره البين اصابعه احس على ساعة تفلت منّه وتطيح بشعري حجيت بهدوء مرتبكه
-على كيف صــيهد جاي تگطع شعري
شال أيده من راسي ساكت يدخن مديت ايدي بدون ما اباوعله لزمت ايده خليتها على شعري مسح عليه بهدوء يطفي الجكارة ويرجع يشعل جديدة من حسرته عرفته مقهور غمضت عيني ذبلانه لان ضل يحرك ايده بين خصل شعري بهدوء حتى لو شبعانة نوم انعس.
همس بهدوء
-جوري.
-هممم.
-ليمت تردين ؟
سكتت گـــلبي يدك حيل نزل ايده من شعري الوجهي تلمس خدي وحضن وجهي بجف ايده من فكي بقيت ساكته، وببالي اكله تغير إسلوبك وياي تبطل تصيح عليَّ وتتعصب وتبطل تستغل خوفي وما تتزوج غيري بس اتردد كل ما اتذكر يعرف نجمة قبل ما يتزوجني.
هوه هم سكت لحد ما طفه جكارته رفع راسي بأيده تمدد وجرني الصدره متحسر وروحه راحت من عبرت ايدي حضنته حار شيسوي يبوس براسي وصوت حسرته يقشعر بدني
الحد ما نام يله نمت .
فزيت قبله باوعت للساعة بالخمسه ايدي خدرانه لان الجرباية صغيرة واثنينا متكسرين عليها ، شلت راسي من صدره اباوع الوجهه مبتسمه مايهلي اوخر من دفو حضنه، رموشه سود وثخان وحتى وهوه نايم مبين اعصاب، قربت روحـــي بست خده على كيف ووخرت بدون ما يحس عليَّ
گمت من يمه جريت قميصه من الكرسي وتلفتت ادور على مفتاح الغرفة جريت سويج السيارة من الميز لكيت المفتاح جواه اريد ارجع السويج والمفاتيح للميز طاحن بالگاع فز بخرعة وفززني، باوعلي ومسح وجهه عيونه حمر وعصبي وكفت على صفحة جر تلفونه باوع للساعة وكام اخذ قميصة لبسه
-راح تروح؟
هز راسه اي خله تلفونه بجيبه مدري شبيه عصبي جر المفاتيح احس روحـــي لمحت وياهن مفتاح باب الهول مالتنا باوعلي
-الج يومين اكضيهن وي ابوج وتردين خوش؟
ضليت ساكته نتر
-خوووش؟
فزيت اعاينله
-لا
فتح عينه كلها روحه بخشمه
-متأكده ؟
دنكت ساكته وهوه يحجي بحرگة
-خووش سهله يصير خير.
-شتسوي تتزوج عليَّ؟
-سدددي حلكج.
جر مفتاح الغرفة من ايدي ومشه يفتح الباب طلعت وراه فتح باب الهول بواحد من المفاتيح المعلگات وي السويج طلعت وراه للطارمه هستوه يريد يطلع صحت عليه
-تزوّج نجمة.
افتر بسرعة راجعلي دخلت للبيت اركض سديت الباب محترك گـــلبي منه صعدت للغرفة احجي عليه بحرگه ساعة شحلاته وساعة وجهه السيف ما يكصه، ضليت كاعده سويت تلفوني شويه ودك صوت رسالة فتحتها كاتب
-بكيفج تردين تضلين عد ابوج ضلي.
خلاني افرفح من القهر متحلفه بيه تمنيتها مو جمعة حتى اداوم واقهره.
"""
رنـــه :: كلساع اروحن للغرفة اعاين الريمه واطلع وعفراء تشتغل ببيتنا حتى العصر تروح لان عيالها عدّهم اضحيه يذبحونها مصباح عيد الاضحى،مشيت وراها اسأل
-اكلج احنا ليش مانذبح؟
-كملناهن احنا سبع أضحيات.
سكتت صارت الساعة بالعشرة وريمه بعدها نايمه حتى لو سالفة الگراب قاهرتني بس ما اگدر ما اخافن عليها مشيت فتحت باب الغرفة اشوفنها بعدها نايمه وحتى صوت نفسها عالي
طلعت يم عفراء بالحوش وهيه تحجي عليَّ البطوط والدجاجات موصخات الحوش كتلها
-والله لو منج انه ولا اشتغل ببيت اهلي شني جايه ارتاح لو اشتغل.
ذبت الصونده بالگاع تحجي
عــفراء:: هم صدك كومي انتِ اشتغلي.
ضحكت جريت الصونده واندك الباب فتحته عفراء اعاين للباب طبت ميلاد كالبه وجها كالت العفراء
-صيحيلي ريـــمه.
عــفراء:: خير شتردين منها؟
ذبيت الصونده سديت الماي وجريت التوثية من يم الماطور كضيتها بأيدي خاطر بس تتعارك وي عفراء افشخها واحط بيها الحمس.
عاينت العفراء تضحك وتخوصرت تگلها
ميلاد:: ياهي مالتج بتي واريدنها.
عــفراء:: نايمه تعاي العصر.
خزرت عفراء واجت تريد تطب للبيت جرتها عفراء دفعتها على الباب خازرتها وشالت ايدها تهدد
عــفراء:: خاف عبالج لان اخذنا ريـــمه تردين تطبين البيتنا؟ لا غلطااانه لا امي گبل رضتلج تطبين ولا انه هسه ارضالج.
ميلاد:: اوووع بووويه عفيره انتِ تحاجيني هيج مالج رداد انتِ ولجج شنهي ياهي قصص وروايات عراقية كرار صلاح انتِ وشايفه روحج علينه شنهي ولج بيت بتي اطبن ليمت ماردت واطلع ليمت ماردت.
تهد تريد تطب للبيت وانه اكض بالتوثية حيل بس توصل افشخها، وعفراء كاضتها من ايدها ردت دفعتها للباب وصاحت بوجها
عــفراء:: عوووفي ريـــمه بحالهااا، سحورتج التارسه بطنها اطلعن منها لو اخر يوم بعمري .
شالت أيدها تريد تطك عفراء وهيه تدفعها ماتخليها صحت على عفراء
-هااا اهد؟
وهيه ماتحاجيني ملتهيه تعارك ميلاد تهدد وعفراء تهدد وانه ما فاهمه شي منهن وعفراء دفعت ميلاد حييل خازرتها وشالت ايدها بوجها تهددها
عــفراء:: والله اسولفلها عمايلكم المشيتوهن براسها وشسوت من ظيم بسببكم اخليها تحرگكم وانتم عدلين!
تهدد وميلاد خازرتها بغضب ضحكت وطبطبت على جتف عفراء
-سهله عفره سهله بت رباب.
عــفراء :: يله حبيبتي يله اطيني عرض اجتافج.
دفعتها وسدت الباب وراها رگع تغلط عليها محترك گلبها اريد اسألها شنو معنى تهديدها وخفت منها لان اعصاب فتحت باب الهول لكينه ريـــمه واكفه بالباب دموعها على خدها وحسين وزهره يعاينولها ساكتين ارتبكت عفراء تحاجيها
-ها ريمه كعدتي، شبيج؟
كضتها من ايدها وريمه تشهك مجلبه بأيد عفراء وتردد بصوت يرجف
ريـــمه::شمسويه انه شمسويه عفراء شمسويه.
جرتها عفراء الصدرها شابگتها
-اسم الله الرحمن ريـــمه شبيج عاينــي كلشي ماكو لان نايمه ماردت اكعدج.
بس ريـــمه منتهيه طاحت بأيد عفراء تبجي بصريخ عبالك كالتلها انتِ شمسويه، عفراء كعدت على حيلها بالگاع شابگتها بخوف بس تريدها تسكت، مسحت دموعي گـــلبي موجوع على حالها، ضلت بس تشهك وعفراء تبوس بيها تتوسل تسكت
-فـــدوه اروحلج كافي هسه عليمن تبجين ولج ريـــمه.
درت عيوني لباب الحوش اعاين من الجامه طب طــروادة ذب الكرك يريد يغسل وسمع صوت ريـــمه اجه بساع دفع باب الهول وعاينلها مستغرب بحضن عفراء حجه بساع خايف عليها
-شبيهاا؟
وعفراء لامه وجهه ريـــمه بين أديها ودارت الطرواده تگله
-سمعتني احاجي امها.
عگد حاجبه مافاهم ودنك مد اديه اثنينهن الريمه گومها من الگاع جلبت بأيده تبجي وتتوسل
ريـــمه:: بس خليها تگلي بس خليها تگلي انه شمسويه بعد شمسووويه شمسويه؟
طــروادة:: ما مسويه شي شنّي السآلفة ؟
مسح دموعها بأثنين اديه يعاين العفراء ما فاهم شي وهيه مدنكه فشلانه ريمه ترجف تريد تطيح ويكضونها اثنينهم اخذوها للغرفة مشيت وراهم مدري شبيه بس اشوفن واحد يبجي ابجي وياه.
كعدتها عــفراء على الچربايه وطرواده يحاجيها بس يريد يفهم شبيها وهي من بين دموعها شايله ايدها الترجف وتگله
-بس كلولي شمسويه انه شمسويه وناسيه والله گـــلبي ممرود وحجيكم يمووتني، عفره بيش تهددين امي عفره حااااجيني.
عــفراء:: ووولج ما مسويه شي بس امج تسحرج وهددتها قصدي يعني اكلج امج تسحر بيج حتى تعوفج وما تسويلج شي.
تحجي مرتبكه وتعاين بينها وبين طــروادة وريمه ميته من البجي، وكف طــروادة كدامها وهيه وعفراء كاعدات على طرف الچرباية، عاين لوجها
طــروادة:: كافي على كلشي تبجين؟
جرتها عفراء الصدرها وهيه دموعها تجري تنود
عــفراء:: كافي بچي من عرسج الهسه بس تبجين ريـــمه فـــدوه لعيونج كافي والله مردتي گـــلبي.
عفتهم وطلعت للمطبخ اسويلها ريوك اجت وراي عــفراء جابت بطل وردي بيه ماي من اغراضها واجت حطته بكلاص اخذته وراحت الريمه، بين ما كملت ريوكها اخذته الها للغرفة طــروادة طلع من يمها ضايج وهيه بالتواسيل يله اكلت شويه
عفناها بالغرفة وطلعنه طــروادة صاح العفراء مشوا الغرفة اهلي ضليت افتر الا اسمع شيحجون كعدت بباب الغرفة وهوه يعاتبها
طــروادة:: اذا اكو شي سولفيلي ترى گـــلبي صار هلكده ماضلي شي من ريـــمه الاعارفها ردوها الي بس بالأسم ريـــمه .
عــفراء:: يابه ماكو شي ياحچايه ردي المچانج ردتها توخر عن ريـــمه اهدد وانه ماعدي شي .
وهوه يتحسر ميت من آلقهر گالها
طــروادة:: والله يا عفره اذا طلعتي ضامه عليَّ سالفة
عــفراء:: يبووي عمي احملوني للعصر ورايحه الرجلي وحتى بعد ما اجي.
ضحك كوه على روحه يگلها
-لا تجين بس وديلنه شمسنا.
-والله هيه هاي العايزه صارت شمس اعز من امها.
كمت من الباب شارده للمطبخ طلعوا اثنينهم عفراء كالتله
-دام باجر عيد اضحيه اخذهم الليله وأطلع للزيارة .
طــروادة:: بيش اخذهن بهاسكي؟
عــفراء:: من سيارات الولد مو هل تروح بيهن للكليه
طــروادة:: لا خويه درب طويل وكلشي يصير
سكتت عفراء وهوه مره وحده طبب للغرفة وسمعت ريـــمه صاحت بوجهه
-كلشي ما اريدن منك بس وخر عني كارهتك ما اريد اعاين لوجهك.
وطلع من يمها وجهه مگلوب راح للگيعان والعصر عفراء لبست وحضرت غراضها سلمت على ريمه ووصتها علينه وردت وصتنه عليها، اجه عليها مازن وهيه خايفه لا تصير مشكله بس لان منذر بالشغل مالحك يجيها، طلعت وراها انه وحسين وزهره للحوش شايله شمس وأبوس بيها حسين اخذ الجنطة منها وفتح باب الحوش وهيه تعاين وراه دارت علي ومدت ايدها الي تريد تاخذ شمس حجت وياي همس
-ســليم ووهب وبريا بالباب مو تتعاركين وياهم رنـــه اموتج.
-شعدهم ببابنا.
-اندري.
اخذت شمس باستني وطلعت سلمت على الولد سليم ووهب مشوا وياها وبريا ضل واكف يم باب حوشنه، اعاين عليها اطت شمس المازن وباست حسين وزهره توصيهم صعدت بالسيارة شلت عيني البريا مكتف اديه يعاين المازن صوفرتله
-هيووو
وبدون ما يدور وجهه علي نتر
-وهرش طبي جوه.
-الهرشك شعدك واكف ببابنا؟
دار وجهه عليَّ ركزت عيني بعينه يريد يحجي وسكت يعاين لوجهي هزيت راسي مضيكه عيني مسح وجهه
بريا:: هنيال گلبج شكد بارد.
-حاطتله ثلج.
-رنـــه راح تجلطيني.
حجاها متحسر وانه گـــلبي يدك حيل بس اضمها وابين روحـــي ولا مهتمه
-اريد اشمر هداياك بوجهك.
هز راسه خوش سكتت ضايجة من حسيته ماله خلك، شفت الولد رجعوا وحسين وزهره اجو يركضون وخرت لوره الباب حجيت بهدوء
-بريا شبيك ليش ضايج ؟
-مابيه شي.
-لا بيك حسيتك مقهور ياهو محاچيك؟
تحسر ساكت طبوا زهره وحسين للبيت وحسين بس شافني واكفه وره الباب صاح
حسين:: طبي جوه.
-خاااب گم امشي طبب جوه لا اموتنك.
سوالي بأيده سهله وراح للبيت يركض ادري بيه راح يتاني طــروادة يجي حتى ينافق عليَّ گال بريا
-روحـــي رنـــه.
-اوكف خل احاجيك
-هاه؟
-ليش ضايج ياهو وياك؟
سكت وصوت الولد يقترب يمه همس
-انتِ.
وحاجوه الولد ضحك وراح وياهم خلّاني الوب وافكر ليش گالي انتِ ، شمسويتله انه حتى عرك ما متعاركة وياه،
اخذتلي نص ساعة وفتحت قفص الطيور طيرتهن وضليت واكفه يم السياج واحجي وي روحـــي اذا صدك يحبني راح يجي شكد مر وكت وهوه ماكو وبكل لحظة تعدي گـــلبي يوجعني شويه وسمعت صوته
-رنـــه .
سكتت مبتسمه وي روحـــي جر نفس بحسره
بريا:: رنـــه باجر التحق.
راحت ضحكتي ووجعني گـــلبي صعدت على الدرام اعاينله شال راسه يعاين لوجهي حجيت بساع مرتبكه
-باجر عيد وين رايح؟
صافن بعيوني مبتسم يرمش بثگل
بريا:: كضت اجازتي وصرت زين.
-بريا بطل فـــدوه .
ضحك يهز راسه لا
بريا:: للموت ما ابطل.
-حتى لو انه اتزوجك ما تبطل؟
سهى يعاين لوجهي بدون اي أبتسامه وانه احس بگلبي يدك حيل ومرتبكه خايفه يروح وهالمره صدك ما يرجع، دنك مسح وجهه ورد شال راسه يعاينلي يحجي بهدوء
بريا:: حتى لو رضيتي تتزوجيني هم اروحن.
-بله استشهدت ؟
-نعمة فضيلة هاي.
-انتَ شبيييك؟
ضحك قاهرني
-رنـــه انا جان حلمي الكليه العسكرية وما گدرت هسه لگيت المچان الانتميله ما اريد ابطل
-جا والكليه والقانون مو حرامات صرت مرحلة ثانية وتعوفها؟
-يجي يوم واكملها بس مو هسه.
دنكت ساكته مقهوره ما مرتاحه همس
-غزالي.
شلت راسي اعاين لوجهه كوه كاضه دموعي
-بريا خاف صدك تحب بنيه غاد؟
غمض عينه جر نفس طويل مبتسم وفتح عيونه الذبلانه يحجي
بريا::وغلات امي غيرج ما احبن، اكص گـــلبي لو رف الغيرج.
درت وجهي لحوشنه مدنكه رجليَّ يرجفن گال
-رناتي عاينــي عليَّ انا ما اريد اغثن طــروادة اريد امشي مثل ما يريد حتى لا اقهره ويقهرني بس اريدن منج حچايه.
-شنهيه؟
-ما ترضين بغيري.
درت عيوني منه اعاين للنخل وللطيور واتلفت هيج وهيج هوه يضحك وانه ارجف واحس وجهي مصخن گال
-عاينــي لعيوني وحاجيني.
دنكت عيّني العينه لحيته وشاربه جوزيات ومن تصد الشمس بوجهه يبين بنص الشعر اكو شعر اشگر، يضيك عيونه من الشمس ورغم كوه فاتحهن يضل لونهن الحلو مبين.
بريا:: ما تاخذين غيري؟
-ترى انه والله بعدني صغيرة وحتى اتعارك وي حسين على اللفة.
-ميخالف عود تتعاركين وياي.
-لا جا مو بس اتعارك ونوبات ما اشتغل بالبيت لان مالي خلك.
-اي نخلي مــاسه تشتغل وانتِ تكعدين.
-نوبات اتسودن.
بريا:: احبن المسودنين.
-هاه جا عاين انه نوبات اغلط وانعل.
-ميخالف نعلي.
رنه :: لا عيب هاي مو تربيتي.
-صح.
سكتنا اثنينا گال
-من تكضين سادس نتزوج.
-انا ما اتزوج حفيد شعلان.
بريا:: ترى جدتي جانت مصاحبه على جدي وخلفت ابوي انا مو حفيد شعلان.
-هههههههههه والله لو يسمعونك
-هههههه يله رناتي ديربالج على روحج.
راحت ضحكتي أعاين بوجهه
-مو تبطي بريا.
-ان شاءالله.
-بيش الساعة تروح؟
-اطلع من القرية بالأربعة العصر وعگبه الصبح نلتحق.
هزيت راسي خوش دنك بصف السياج شال ورده حمره مدها الي مبتسم
-گطعتها الج من حديقتنه العزيرة.
اخذتها من ايده امسح بعيوني اخاف لا دموعي تجري
-جم مره كلت الماسه اريد ورده مت حديقتهم مارضت تگطعلي
-ختولي مالج غرض بيها انا اگطعلج الحديقة كلها
ضحكت وهوه يعاينلي مبتسم أشرلي يله انزلي نزلت ايدي على گـــلبي بعدني خايفه عليه، طبيت للبيت ضميت الورده وي اغراضي وطلعت من الغرفة ، ما مرتاحه افتر وحدي ريـــمه كضتها نوم.
الثاني يوم كعدت من الصبح لان عيد لكيت ريـــمه كاعده كدامي بالحوش حاطه راسها على أيدها ومغمضة عينها فزت تعاينلي
-صباح الخير عيدج مبارك.
ريـــمه :: صباح النور عيد المبارك عليج.
درنه اثنينا على فتحة باب الحوش طب طــروادة كوه فاتح عيونه سلمت عليه اعايده وريمه ضلت على كعدتها ساكته وماتعاين عليه طبّ للبيت
-رنـــه راح انام للتسعه وكعديني.
هزيت راسي خوش، كامت ريـــمه وياي اشتغلنه اثنينا ساكتين تريكنا سوه للتسعه كعدت طــروادة وهيه طبت للمطبخ سوت ريوك اله واعاينلها اشرت لحسين خلته اخذه اله.
تقهرني علاقتهم هوه من يجي من الشغل اذا هيه بالغرفه ينام بغرفة اهلي واذا هيه كاعده ينام بغرفتهم، تريك وراح للگيعان وانه الوب للأربعة العصر التموا الولد يم حوشنه بريا سلم عليهم واحد واحد وعيونه البيتنا، اخذوه وهـــب وميثم وصلوه للگراج وردوا.
ردت بس التهي عنه وتكضي عطلة العيد حتى التهي بالمدرسة روحـــي طلعت يله كضت العطلة وردينه داومنه من ارجع الكه ريـــمه منظفة وطابخه الغده تشتغل وهيه ساكته نوبات الكه هاجر يمها، انام شويه الظهر واكعد اسوي العشا واغسل مواعين واراقب بيهم هيه وطرواده حتى حجي ما يحجون سوه هيه بمچان وهوه بمچان.
وميلاد ابد ما اجتنه بعد الحدّ الحصاد طــروادة انتهى ماينام من الشغل للگيعان للكليه وجهه اصفر وعيونه حمر وحتى بوجهه زهره نتر صاير نار مدوا نايلون هوه وعبود حتى يحطون عليه الشلب نزلوا عربانتين وجدي اجاهم يصيح عليهم
-انا اريد احطن حصادنه هناه شيلهن.
طــروادة:: ما اشيلهن كل دهري احط حصادي بهالمچان وانتَ تحطهن يم شاكر.
اعاين من فتحات السياج خايفه على اخواني وجدي شال ايده يهدد
شعلان:: الا تشيلهن حتى من البيت اطلعلكم واخليكم تاخذون الشوارع.
وليد:: انتَ تتشرط علينه هيه كاعك شني؟ زين منه ابوي وساكتلك تزرع بگيعانه وتحصد ومعيش عايلتك وانتَ احترام ما محترمه.
وطرواده روحه بخشمه نار ويصيح وعبود كاضه
طــروادة:: بعدكم على هالرطينه انا وانتم ندري بيهن گيعان ابوي عليمن جاي تضحكون انتم؟
شعلان:: انعل ابوك لا ابو امك يا خايس يا ابن الخايس ياهو اليرطن.
هد طــروادة على جدي متسودن كضوه عبود وسجاد واجوا الولد يتراكضون جدي يصيح عليهم
-هدووه بله هدوه خل اشوفنه شيسوي هالخايس لفصم ظهره واهجوله بالشوارع.
طــروادة:: والله وروح شامل اكتلك وما اطلع من گيعان ابوي، وروح الحسين بخنجرك اذبحك.
صياح وغلط هوه يتراجف بينهم يحركون گلبه بكل سنة بيها حصاد يخلونه يفرفح من القهر، ريـــمه تفتر يمي تلوب خايفه وتردد
-يا رب ابوي ما يتدخل يا رب ابوي ما يتدخل
وركضت للباب من سمعت ابوها يصيح على طــروادة
-انچب ما الك ترابه بالگيعان لو ما زحمه من الوادم ويگولون طردوا أبن اخوهم جا ما لفيناك.
وهوه من بينهم جر روحه بحرگه بس يريد يكضه ســليم يتعارك وي ابوه وصيهد وميثم كاضين طــروادة ويحاجونه وريمه تعاين عليهم من الباب روحـــي راحت الولد جروا طــروادة للحوش اخذت ريـــمه طبينه للهول وهوه يرجف بين اديهم شهكت اصرخ من شفته طاح منهم للگاع طلعت اركض متسودنه ادفعهم منه اصيح بكل صوتي روحـــي رايحه وهمه ملتمين عليه يغسلون بوجهه بماي الحوض ويحاجونه يردونه بس يفك عينه
صــيهد:: كهلان كهلاااان.
لطمت على رجليَّ مفرفحه واصرخ
-يمممه اخوووي يممممه
والمح ريـــمه اجت تركض جابتلهم ماي بارد اخذه سلطان من أيدها وهيه بساع اجت علي تكضني روحـــي راحت وي روحه غسلوا وجهه بماي بارد وبس فتح عينه يعاين لوجهم ساكت وانه اشهك خفت عليه حييل خفت مسح وجهه صــيهد يگله
صــيهد:: شني السالفة شبيك؟
جره من ايده كعده على حيله يحاجونه وهوه مدنك ساكت
سلطان:: راح تمرض روحك بالحسين ياخي عوف الشغل شني ميت من الجوع؟
غطيت وجهي ابجي واحجي بحرگه
-مايلحك ينااام مايلحك ينام.
صــيهد :: شغل الحراسه باجر تعوفه لا انعل سلفه سلفاك شنيي ما رايد روحك؟
سند ايده على الگاع وكام من بينهم عاين علي وعلى ريـــمه كاعدين على حيلنه يم باب الهول حجه بهدوء
-اشش كومي مابيه شي.
عبود:: تعال خل نروح للدكتور.
هز راسه لا طب للبيت واحنا وراه غسل وجهه واديه بالسنگ كعدت بالهول اعاينله روحـــي مخلوبه وريمه مشت يمه تحاجيه
ريـــمه:: اسويلك شي تاكله؟
-لا لا ما اريد.
ريـــمه:: ليش ما رحت يقيسولك الضغط؟
عاينلها ساكت دنك وطلع من المطبخ يعاين عليَّ وكف كدامي ودنك منحني باسني براسي
-اشش كافي.
-بطل من الشغل فـــدوه .
سكت كعد يم التلفزون ماد رجل وجار رجل الصدره صاح على حسين راح جابله باكيت جكاير من الولد يدخن صافن وريمه سوتله چاي جابته اله اخذه منها كوه يحجي
-مشكوره
-بالعافيه.
ريـــمه:: عاينت لرنه روحها ممروده وهوه وجهه آصفر شرب الچاي وضل يعاين للحوش ويدخن، سمعت هوسة الولد بره شالوا الحصاد غيروا مچانه لان جدي عاند وحلف يطرد طــروادة من القرية كلها، زفر نفس متحسر طفه الجكاره وكام طبّ للغرفة.
قست سكر رنـــه احاجيها
-رنـــه كافي لا تتخربطين.
دارت علي تبجي
-شفتيهم شفتيهم شلون يقهرون بيه حتى ابوج هاي كل حصاد هيج يسوون بيه.
-ينقهرون لان گاعكم احسن، معليج منهم.
-ابوج يغاار.
-امم.
مسحت عيونها دايره وجها كمت من يمها افتر يم الغرفة محتاره اذا اطب للغرفة شحجي، اخاف لا گبل يسبني ويسب ابوي.
ضليت واكفه بباب الغرفه حسين وزهره يعاينولي فتحت الباب وطبيت كاعد على طرف الچرباية گبال الشباچ ظهره عليَّ، التفت شافني وطفه الجكاره.
سديت الباب ومشيت متردده كعدت بنفس الجهة على الطرف دنك متحسر وانه حايره شحجي
-احم.. ليش مارحت للدكتور انتَ صارلك چم يوم تشكي من راسك .
عاينلي ورد دنك كوه يحجي
طــروادة:: مابيه شي .
سكتت فترة وهوه بسّ يتحسر، همست متردده
-كهلان.
ضل مدنك تدنيت يمه شلت ايدي متردده حطيتها على جتفه رفع راسه يعاينلي عيونه حمر وذبلانه احجي متردده
-لا تنقهر ميخالف هسه تسوّق الحصاد قابل راح يضل دوم بالگاع وضايج.
هز راسه لا
-انا القاهرني ابوي ريـــمه! يدري بيهم مو خوش اوادم شلون دفع حگ الگيعان وعافها بأسمهم شلون ما دارها بأسمه.
يحجي ميت من القهر
-شدراه جدي يسوي هيج.
-يدري يدري بيهم والله يدري بس شلون ثق بيهم هاي المحيرتني.
سكتت مدنكه خاف احجي اكثر خاف يجيب طاري ابوي صاحوا عليه الولد وطلع بعد مارد ضل من الحصاد ويجي الصبح يبدل بساع ويروح للكليه.
"""
مــاسه :: حسيت روحـــي زوج من رديت بس خابرني الفجر وضل يكلي
-هذا ولد وياي بالدوام لزمته مصور بنيه وضليت اتعارك وياه.
ورغم ما مصدكته رجعت وعلمني على رمز تلفونه ويعوفه يمي ويطلع افتشه انه وبريا گبل لا يلتحق جان يفتش وياي مانلگه شي .
وقهرني من راد يلتحق يوصيني على مــيثم خاف ازعل واقهره، ومن راح احس بيتنا يفرغ اول اسبوع انه وميثم اثنينا ضايجن وكلساع نخابر بريا لمن ضل يصيح
-شني اعاررك اخابر كفوا عني موتوني.
ضحك مــيثم يعاينلي گاله
-ديربالك على روحك خويه.
سلم عليه وسدّ التلفون عاينت لوجهه مبتسمه
-لا تخاف والله انه گـــلبي مرتاح احس يرد بخير وسلامه .
جرني الحضنه يبوس خدودي ويردد
مــيثم:: ان شاءالله سمسم ان شاءالله.
حط ايده على بطني مبتسم
مــيثم:: ابن اللذين شوكت ينور.
-تحجي بصيغة المذكر يجوز بت.
-نعمه شيجي نعمه.
مشيت وياه اضــحك يريد يروح للگيعان عاين للحديقة عاف ايدي وراحلها يريد يگطع منها
-لااا لااا
دار علي فاز
مــيثم:: اريد احطها بحافة حجاج يم خدج واشوفن ياهو الاحلى.
-ههههه حجاياتك الحلوه عوف الورده.
عافها يضحك
مــيثم:: ديربالج على روحج حبيبتي .
مشيت وراه لباب الحوش طلع وانه كاضتله الباب تلفونه بأيده التفت على صوت سيارة عاينت وياه مستغربه ياهو اليجي هناه اذا خطار يوكف گدام بيوت بيت عمي شامل وشاكر، وبس سيارة مــيثم يطببها لهناه.
وبمجرد صارت السيارة گبال مــيثم طاح التلفون من أيده
دنكت عاينت للتلفون مستغربه وهوه على نفس الوكفه ايده رجفت وعيونه على السيارة الطبگت ببابنا
شكرا لزيارتكم عالم روايات سكيرهوم
