رواية أرض الخناجر الفصل الخامس والخمسون بقلم ايلول
چا هيج الاهل عثرة
الاهل على الگلب راحه بال
اهلنه شبيهم ويانه
صارو على الگلب حسره
من شافونا مكسورين
ما جبرو كسرنة ولاحجو كلمة
ملح فوك الجرح وكعو
واجو فوك الكسرة كسرة .
══━━━━✥◈✥━━━━══
مــاسه:: كضيت بألباب متفاجئة بميثم، عين عليه وعين على التلفون دنكت مديت ايدي شلت تلفونه احاجيه وهو باهت اعاين الاصابع ايده يرجفن وعيونه ما انشالن من السيارة
فريت عيوني منه للسيارة من نزلت مره لابسه بشت وشال ونظارات شمسية بس نزلت وسدت باب السيارة وخرت النظارات من عيونها وعاينت الميثم وهو بصوت يرجف ومخنوك همس
مــيثم :: يـــمه.
شهكت بصدمة فاتحه عيني على وسعها اعاينله واعاينلها وهوه بساع سند ايده على السياج مابيه يوكف على حيله أعاين لرجليه يرجفن گوه شايلاته وهيه تمشي بأتجاهه تأشر عليه بأصبعها وتكله
:: تي موي سين، ميثم؟
وهوه يرجف يهز راسه اي وبس صارت گباله شبگها بكل حيله حاني ظهره عليها وضام وجهه بجتفها بچه بشهگه گـــلبي مرده واذني تصفر ما مستوعبة
وهيه تطبطب على ظهره مبتسمه عيونها متروسة دموع بس مانزلتهن.
مسحت عيوني على صوت سدة باب ثانية رالمح بنية نزلت لابسه بنطرون وقميص الحد ركبها صدت بوجها الشمس شعرها عسلي يلمع مفترح الحد ظهرها وحاطه شال على راسها مشمره أطرافة من الجهتين ، جرت ردن القميص تمسح بدموعها وتعاين بخوف تتلفت تمشي بأتجاهنا وتتعثر والرجال ابو السيارة نزل ذب الجنط بالگاع فر السيارة وراح
گـــلبي يدك بقوة اعاين للبنيه وارد اعاين لميثم وامه بعده شابگها ضام وجهه بعبايتها يبجي ويجر نفس بشهگه يشمها ويبوس بيها وهيه تحجي وياه وتطبطب على ظهره مبتسمه وخر وجهه منها يحجي ويرجف كاض اديها ويحاجيها بالعربي
مــيثم:: ليش اجيتي كتلج لا تجين ما يعوفونج بحالج والله ما يعوفونج.
يحجي بسرعة مرتبك وفجأه صارت عينه على البنيه الواكفه على صفحة وتجر برداناتها على اديها تمسح دموعها ويردن يجرن، بلع ريگ كوه يتنفس يعاين لوجهه امه ويرد يعاين للبنيه مستغرب دار وجّهه عليَّ ورد عاين الامه حجه مختنك
-ياهي هاي؟
وهيه تعاينله ساكته وتدنك عيونها، يريدها تحجي ولمح مرتضى راد من بيت غانم وواكف يعاين علينه، بس شافه بساع مسح عيونه ووهر من الباب يريدها تطب للبيت وهيه حرت البنيه وطبت وميثم يريد يطب وراهن كضيته من ايده احاجيه
-اغراضهم مــيثم اغراضهم.
التفت ليوره عاين للجنط جابهن واجه ذبهت بالحوش ومشه وراهن للهول، ركضت وراه عقلي يضرب اخماس بأسداس كلشي ما فاهمه، وكف بباب الهول يعاين عليهن وهيه كعدت على القنفة وكعدت البنيه بصفها تمسح بعيونها وتحاجيها بالروسي.
مشيت بساع للمطبخ اجيب ماي وفززني صياح مــيثم بعصبية ويحجي بالروسي بحرگة طلعت اركض اعاينله مفرفح وامه واكفه گدامه شايله اصبعها بوجهه خازرته وهم تحجي وياه بصياح وكل حجيهم ما افهمه، البنيه شالت رجليها من الگاع لمتهن الصدره حضنتهم بأديها تعاينلهم وتبچي واني روحـــي رايحه مصدومة بعصبية مــيثم وصياحة بوجهه امه .
درت للبنيه مصعوقة من وكفت وحجت بحرگة
- خلصصص خلص لا تلفي وتدوري لا تكزبي اكتر من هيك احكيلو الحكايه متل ما هيه لا تبرري أفعالكن وتجمليها
وامها دارت عليها بغضب صاحت بوجها خازرتها.
روزا:: مارياا
ضحك مــيثم وصفك أيد بأيد يگلها
مــيثم:: تحجي عربي بتج؟
روزا:: عاشت سنين طوال بلبنان، اهدأ وانا احكي كلشي صار بالتفصيل ماراح اكذب
مــيثم:: تزوجتي وخلفتي وعشتي حياتج ليش ردتيتي؟؟
والبنيه تبجي ومن يمها شالت أديها اليرجفن تحاجيه
ماريا:: لك وحياة الله مانها متجوزه انا بنتو لخليل اختك انا اختك من امك وبيك
وامها تسودنت بساع راحت عليها تسكتها تريد هيه تحجي وره ما مــيثم يستوعب ماتريده ينصدم بكلشي دفعة وحده وميثم واكف مصدوم ما مستوعب كعد على حيله ساند ظهره على الحايط كلشي ما فاهم ولا انه الفاهمه شي، وامها تتعارك وياها بالروسي والبنيه تبجي وترد عليها هم بالروسي انسطرت اريد افهم شي منهم عيني على مــيثم يعاين الامه مصدوم والبنيه جرت روحها من أيد امها لنص الهول تريد تحاچي مــيثم حط أيده الترجف على حلكه خازرها
مــيثم:: اشششش.
سكتت تبجي وهوه عيونه على امه يعاينلها بغضب فص عيّنه الابيض انترس دمارات حمر من الحرگه كالها
-فهميني البت منين خليل شجابه عليج يمممه؟ خليل شجاابه عليج؟
صبح بكل صوته وطك الباب بظهر ايده متسودن فزت البنيه مخروعة وردت وره ظهر امها تبجي، بعدها ما حاجيه واندك باب الحوش صوت جدي يصيح عليه
شعلان:: مــيثم هلااه.
مسح وجهه بحيره يعاينلهن ويعاين للباب روحه محترگه كالها بصوت مخنوك
-شأگللهم هسه؟ هاااه شحجي.
حاجته بالروسي وهو ضحك مايدري بروحه شيسوي هز راسه اي
مــيثم:: يكضهم قانون؟
روزا:: اتفقت مع السفارة الروسية اي خطر على حياتي انتم مسؤولين عنه.
حط ايده على گلبه يفركه مختنك وصوت جدي وعمي شاكر بالباب يدكونه ويصيحون على مــيثم وهو حيرة تاخذه وحيره تجيبه، مسح وجهه طلع وسد باب الهول وراه.
عاينت عليهم البنيه رجعت كعدت على القنفة تبجي وتكلها
ماريا:: بتخافي على حياتك وما تهتمي لحياتي؟
وامها خزرتها شايله ايدها وتحجي عليها مبين تغلط، وانه بالي كله يم مــيثم اكل بأظافري وايدي على بطني خفت مدري شبيه وبس سمعت صوت جدي يصيح عليه ركضت للتلفون ارجف بساع خابرت صــيهد
-الو.
-صــيهد وين انتَ؟
-خير؟
-بساع تعالوا البيتنا ام مــيثم رجعت ووياها بت وجدي وعمي شاكر اجوا راح تصير مصيبة تعااالوا.
سد التلفون بوجهي طلعت من الغرفة بساع البنيه على نفس الكعده والام تفتر بالهول وتعاين لتلفونها فزززيت ونز جسمي كله من اندفع باب الهول وطب جدي وميثم طب وراه يصيح بوجهه وكف بنص الهول بينه وبينهن وره جدي طبوا عمي شاكر وابوي.
اعاين بخوف وان مــيثم جتفت اديها الصدرها وتعاين الجدي ماخايفه يعاينلها بخزر وغضب كالها.
شعلان:: رديتي يالصفيره؟ انا تشردين من عدي وولج؟
يحاجيها وهيه مبتسمه لحس رجليَّ نملن من الخوف الا هيه ولا مهتمه وميثم ميت من القهر واكف بينها وبين جدي انتبهوا للبنيه وتسودنوا على مــيثم يردون يطكونه وهوه يدفع ايدهم ويحلفلهم هوه اساساً مافاهم السالفة وبنص عركتهم اسمع صوت ركضت الولد ورگعت باب الحوش طبوا للهول صــيهد ووهب وسليم وسجاد.
بساع مديت ايدي للبنيه جريتها وياي لباب المطبخ وانها ضلت واكفه بنص الهول بينها وبينهم مــيثم، وجدي گلب البيت بالحجي والغلط عليها وهيه كل التسويه تبتسم صيح صــيهد بوجهم يريدهم يسكتون ودار الجدي بعصبية شايل ايده ويحجي من وره خشمه
صــيهد:: عليمننن تصيح؟ تشوف ولدها وترد منين ما اجت لا تخبص الدنيا.
وجدي اعصاب عاصر السبحة بأيده الترجف وينتر بوجهم بحرگة
شعلان:: اكتلهاا وأدفنها هناه صخمت وجهيي شردت من نصنا
هوه يحجي وابوي وعمي شاكل يأيدونه وهوسه وصياح ولمن انتبهوا للبنيه تسودنوا يردون يگطعونها وجدي يصيح عليها
-مخلفه نغله وجايبتهاا؟
روزا:: ماريا بنت خليل
ووي حجايتها عاينولها كلهم مصدومين مافاهمين جدي ضال ايده كض مــيثم من ياخة القميص خازره
شعلان:: كونك مصدك هالنغلة من ابوك؟
مسح وجهه ساكت وكل ساع يحط ايده على گلبه حاجاه صــيهد وهوه گاله بصوت مخنوك
مــيثم:: والله انا المافهم شي ولا هم يطوني مجال افهم منها.
صيح جدي يغلط وصيهد تسودن نتر بوجهه يسكته ودار الميثم گاله
-حاجي امك وافهم منها لمن شردت جانت حبله؟
دار مــيثم الامه جرها من ايدها كعدها على القنفة ووكف كدامها يحجون بالروسي وكلهم يعاينولهم محد فاهم شي بس البنيه ضحكت من بين دموعها وصاحت على امها
ماريا:: احكيلوا دغري لا تلفوي وتدوري.
دارت عليها خازرتها وميثم مد ايده على وجهه امه يريدها ترد تعاينله ردت تحجي وياه كعد على حيله بالگاع گدامها يسمعلها بصدمة حط أديه على راسه ودنك ما مصدك إللي يسمعه، مدت ايدها تكض ايده وتحاجيه تبجي نترها منها بغضب وصاع بوجها
مــيثم:: وخرررررري.
حط ايده على الطبلة يريد يگوم يوكف ما يگدر كضه صــيهد روحـــي راحت خايفه عليه وهمه يحاجونه وهوه يجر بروحه بس يرد يطلع من يمهم صــيهد كاضه وهوه يدفعه يجر بروحه منه يشهك ويجر بالقميص من صدره
طلع للحوش متعثر كعد يم الحديقة فتح الدكم ويجر نفس صوت شهكته هز گـــلبي هز صــيهد جر دولكة الماي وطلعله غسل وجهه خايف عليه وهمه كلهم طلعوا وراه للحوش يحاجونه يردون يفهمون شبيه مسحت عيوني بأيدي ومشيت لباب الهول اعاينله خايفه عليه مسح وجهه صــيهد يحاجيه
صــيهد:: شني السالفة شجاج صدك جذب تريدها تضل يمك تضل وفنه اليفك حلكه ويحجي وياكم عليمن رايحه روحك؟
يحجي وجدي خازرهم وميثم عاين الصيهد بعيونه الذبلانه الدمعه بطرف رمشه گـــلبي انلچم شسمع وضاك النفس بصدره شسمع وهوه الدنيا كلها ما ترس ريته.
يريد يحاجي صــيهد ما يگدر مختنك يأشر بأيده الترجف وحجه بغصة
مــيثم :: چذابين صــيهد لعبوا علينه امي وابوي غدارين.
صفن صــيهد بوجهه ما فاهم وجدي غلط يصيح مشيت بساع رديت لمچاني بباب المطبخ يم البنيه وجدي طب للهول ووهب وسليم كاضينه طكهم يصيح على ام مــيثم
-شكتيله وولج الصفيره .
طبوا وراه مــيثم وصيهد مــيثم كضه من أيده
مــيثم:: انا اسولفك
عاين الامه عيونه دم ورد عاين الجدي كوه يحجي مبتسم بقهر
مــيثم:: ابنك، ابنك الشريف ما اختفى عن عبث خطه هااااي خطه بينها وبينه ابنك مو بشر الحيوان احن منه، ضحّى بضناااه عاااف ولده لان ما يجرع العيشه يمك ذبنه بجحيمك ونقذ روحه ضحى بينه المهم هوه يعيش حياااته، سوه روحه مختفي وهيه مده وراحتله ومشه كلشي مثل ما يردون راحتله وسافروا ابنك عاف ولده الخاطر روووحه عااااف ولده بأيد ابوووه عااافنه بأيدك نضوك المر واخذهاااا وشرد
بجيت ايدي على حلكي وهوه يصيح بلوعه كسر الغراض العلى الطبلة ورد على امه يصيح بغضب كضه صــيهد
مــيثم:: وووولج انتِ شني من اااام شلون ضحكتي عليَّ؟؟ شردتج اناااا شردتج شلون گدرتي تغشيني علمود ارواحكم عفتووونه ماكدرتوا تحملون العيشه يم جدي ضحيتوا بينااا؟ شكلتوا لرواحكممم ولج بريا جان صغير مايحمل فراگج ما ينام الا بحضنج عفتيه ضحيتي بينه لخاطر ررروحج؟ من مات خليل يله رديتي ؟ المن رديتي اللللمن اجيتي؟
يابه روحـــي راحت من صياحة ورجفته طك كلاص الكزاز كسره تطشر بالگاع ومن مدافع الولد وهمه يردون يكضونه طاح للگاع نبت جعب الكلاص بأيده جرها صــيهد بساع والدم ضل يفور وهـــب جر الخاولي من الباب حطه على ايده ركضت اجيبلهم اللفاف والمعقم ارجف اخذهن من ايدي وهب غسلوا ايده يتعاركون وياه وجدي روحه راحت كعد على حيله هم مصدوم صاح صــيهد على ابوي.
صــيهد::اخذه وردوا للبيت هسه مو وكتها عود تالي تكعدون وتسولفون وتفهمون.
رادوا ياخذون جدي ما يرضى حاجاه ابوي
وليد:: امشنه نجيك الضغط لا تطيح بويه تعال تصير زين وترد وغصبهن عليهم يسولفلوك.
گوموا جدي من الگاع وهوه يعاين الام مــيثم بحقد كالها
شعلان:: خليل مات؟
هزت راسها اي
روزا:: صار خمس سنوات من انقتل.
صفك ايد بأيد متحسف مــيثم دار عليه دايخ گوه يحجي وصيهد كاعد كدامه يلف بأيده
مــيثم:: يستاهل تصفك ايدك عليه بحسافه؟
اخذوا جدي يمشون وهوه يحجي
-اردن ما الكاها لا هي ولا هل نغله. تجذب علينه عدالها نصدك لو كالت هالبت بتكم.
طلعوا كلهم ضلوا بس صــيهد ووهب وبس انسد باب الهول وره جدي وعمامي مشيت بساع ابجي كعدت كدام مــيثم خايفه عليه واكض بأيده احجي وروحي رايحه
-انشگت حيل صــيهد ايده نشگت حيل.
جرني صــيهد الصدره
صــيهد:: اشش مابيها شي هسه اخذه اخيطها.
عيوني تجري واعاين الميثم مدنك رجليَّه ممدودات والدم بالگاع يم ايده درت عيوني للبنيه كعدت بباب المطبخ ناعمة وعمرها يجي لو بگد بــدور لو اصغر منها، وجها من البجي احمر، مــيثم عاين الامه وهيه ما مهتزه مسحت عيونها وحاجته بالروسي وهوه دار الصيهد يضحك ويگله
مــيثم:: هههه ولك تگلي اختك وصلتك وانا لازم اروحن.
عاينلها صــيهد متنرفز
صــيهد:: اكلج لا تضلين تشمرين شفهمنه هسه احنا وتردين تولين ياهو يگول البت بت عمي؟
طلعت اوراق وصور من جنطتها انطتهن الميثم فتحهن بيناتنا نعاين عليهن شهادة الوفاة مال عمي وصور الها هيه وياه والبنيه بنصهم بعمر العشر سنوات لو تسعه وصور بس هيه وابوها من وهيه طفلة الحد تقريباً العشر سنين وراها ماكو صور اشرت على وحده من الصور كالتله
روزا:: هي اخر صورة لماريا مع آبوها كانت صغيرة ويحبها كثير، بعدها رحنا على روسيا وتورط بمسائل مر قانونية تسببت بقتله
ضحكت البنيه مستهزئه عاينلها مــيثم كالها بالروسي
مــيثم:: ?Она врёт
(هي تكذب؟)
ماريا::
Она не врёт, но и всю правду не говорит.
(لا تكذب وايضاً لا تقول الحقيقة)
صــيهد طك مــيثم على جتفه خازره
صــيهد:: لا تضلون ترطنون ثلاثتكم تعرفون عربي مسلتوا عربي خل نفتهممم؟
يحجي وياه بنتر وميثم يعاين للبنيه كالها
مــيثم:: احجي انتِ
عاينت الامها وامها خازرتها ردت عاينت الميثم تحجيله ودموعها تجري حجت بالروسي وانه واخواني صافنين بيهم ومن صــيهد يحجي مــيثم يسكته يگله
-بس هل افهم وافهمنك.
وكل ما البنيه تحجي شي امها تعترض وميثم يصيح عليها يسكتها ويسمّع للبنيه كام صــيهد وكف يدخن ووهب كعد بباب الهول منطينه ظهره ما يعاينون عليها لان شعرها طالع .
وكفت امه تنتر شال ايده بوجها خازرها
مــيثم:: اسكتي اااالج عين تحجين؟
وكف على حيله يريد يطلع من الهول مختنك وهيه مشت للمطبخ تغسل وجها مسحت دموعي وكمت وره الولد من طلعوا بالحوش مــيثم حاط اديه على راسه وصيهد واكف يدخن يعاينله مضيك عيونه متاني ليمت مــيثم يحجي نتر بوجهه من مل منه وميثم حيره تجيبه وحيره توديه عاين لصيهد وگاله
مــيثم:: گبل مده راسلتني هيه على الفيسبوك كالت اريدن اجي اشوفنكم وانا مارضيت خفت عليها من جدي انا الغشيم مصدك ابوي مختفي وهيه من ظلم جدي شردت تالي طلع كلشي اتفاق بينهم كالها اطلع وتلحكيني وانا صدكتها ساعدتها تشرد من القرية لان هددتني تنتحر، وهمه حاسبين حساب الكلشي وكله اتفاق بينهم، عاشوا بالبنان اول سنة وصارت عدهم هاي البنيه هوه يضل بالبنان يم بته وست روزا تروح وترد عليهم بين روسيا ولبنان ونوبات يعوفونها وي مربيه ويرحون اثنينهم ههههه تگول اضل اشهر بأيد المربيات اتعنف وانكتل وهم يتونسون بروسيا.
ما استغرب تدري؟ مصدكها اللي عافونه سهله عدهم يعوفونها.
لحد ماصار عمر البنيه عشر سنوات استقروا بروسيا وراها خليل انكتل، ردن عاشن بالبنان چم سنة وهم جانت تعوفها وتروح لروسيا وهسه حضرت جنابها تگلي هاي اختك انا بعد ما اتحمل مسؤوليتها، ههههههه.
ضحك مدنك ميت من القهر صــيهد ذب الجگاره بالگاع داس عليها گله
صــيهد:: اعذرني اثنينهن ما مصدگهن، اختك مبين ماراضيه تجي وامك جايبتها غصباً عليها، هاه ومعلومه اختك جانت تگدر تشتكي على امك تعوفها وتعيش على حساب الدولة، يعني خويه امك جايبها كوه عليها والبنيه مجبوره تسكت. ليش؟
وحتى لو حچيهن صدك عدهن بعد شي ماحجن كلشي، مال تمسلت هيه يجيبنها مناه ويودنها مناه احجي السالفة كلها وفضت راحت.
يحجي وياه وميثم ساكت عيونه بالگاع حسيت ايد على ظهري. التفتت عليها ووخرت على صفحة طلعت يم مــيثم تحاجيه
روزا:: مــيثم ماما،
شال راسه يعاينلها كعدت يمه بالگاع ومديت ايدها على جتفه تمسح عليه وتحاجيه بين العربي المكسر وبين اللبناني ومرات حچايات عراقية، بتص كلامها
-وين اخوك بريا؟ خليني شوفه ومن بعدها روح.
مــيثم :: وخري ايدج ترحين فـــدوه لحچاية اليمه من عمتي رباب احن منج علينه حطتنا بعيونها سوتنه زلم ودارتنا لحد ما شواربنه ترست وجهنا بس الموت اخذها ريته اخذج گبل لا تردين وتحجيلي غدرتكم.
صــيهد:: ميثممم!
وهـــب:: لاا مــيثم مو هيج.
نتروا بوجهه ما راضين بحجابته وهيه تسمعله ساكته تهز راسه موافقة بكلامه
روزا:: انا صبرت لخاطرك انت واخوك صبرت وتحملت عيش هون مسجونه صبرت لخاطركن سنين لحد ما صرتوا قادرين تعيشوا بدون أب وام
مــيثم:: ووولج عفتونه بريا حتى ما واصل عشر سنين شلون شفتيه يگدر يعيش بدونكم شلووون؟
صــيهد:: صوووتك.
روزا:: عشتوا ولا لا؟ ليك عين الله تحرسك شب مشورب
دارت عينها الي وكملت حجيها
-وعندك زوجة وواضح طفلك على الطريق. لو بأيدي كنت رجعت عيش معكن بس ما اقدر اركع اندفن هون.
ضحك مــيثم عينه بعينها
-وعادي بنتج تدفنيها هناه؟ حالها حالنه مو مهمه عدج صح؟
-البنت كبرت وانا ما اقدر على المسؤوليه.
يحجون ودك تلفون صــيهد حاجاه ابوي بعصبية سد التلفون گال الميثم
صــيهد:: گوم جدك ببيت شاكر يريدك، امشنا.
وميثم عاينله متحسر مسح وجهه وگام اطراف اصابعه بيهن دم علينوا الوهب گاله مــيثم
-وهـــب ضلّ هناه.
وهـــب:: هاي هيه روح
همه طلعوا ووهب كعد بباب الحوش على بلوكه طبيت للبيت البنيه بعدها على كعدتها بباب للمطبخ وامها كعدت على القنفه بالهول حاطه ايدها على خدها، عبرت من يم البنيه للمطبخ خليت ماي بكلاص ومديته الها اخذته من ايدي تهمس
ماريا:: يسلمو دياتك.
شربت ماي وضلت كاعده بمچانها دارت امها علينه تسألني
روزا:: بريا وينو؟
اعاينلها ساكته ما ادري احجي لو لا وهيه متانيه ارد عليها
-بالجيش.
دارت وجها ضايجه وتحجي
روزا:: تمنيت شوفوا.
وبتها ضحكت تگلها
ماريا:: لشو بدك تشوفيه كرمال توجعي قلبه؟
وامها دارت عليها تحجي وياها بحرگة بالروسي والبنيه بهتت بخوف عاينتلي. مسحت وجها وامها بعدها خازرتها عبالك كاضه عليها شي، عفتهن وطلعت للحوش صحت لوهب طب يمي للحوش
-وهـــب خاف جدي يطك مــيثم.
عاينلي يهز بأيده
-شنّي السالفة غير يملص ارگبهم.
-شلون هسه شراح يصير؟
-ما ادري بس اتمنى بريا يرد ويشوف امه هاي امنيته شكد گال بعد ما اريدنها جنت جاهل واشتاگلها، بس جذاب صاحبي واعَرفه يتمنى يرد يشوفها ويشبگها.
سكتت مختنگه وبالي يم مــيثم اذن المغرب صلينا على محمد أثنينا، گال
وهـــب:: افرشيلي حصيرة هنا خل اصلي.
طبيت للبيت لكيتها شابگه بتها تحجي وياها والبنيه بس ساكته عيونها من گد ما بجت ورمن، اخذت حصيرو مديتها بالحوش يم الحديقة ورديت جبتله مصلايه وتربه فرشتها اله كعدت على صفحة ايدي على خدي وعيني لباب الحوش، شويه وسمعت صوت الولد طبيت جوه سديت باب الهول واعاين من الجامه طبوا للحوش وياهم حتى كهلان وسلطان، مــيثم اعصاب ومحترك گلبه وهمه يحاجونه بهدوء كهلان ماجان كاعد وياهم كوه فهم السالفة وگاله
كهلان:: يابه معليك بيه هوه يمسلت منااه لمن يمل ويسكت وحده.
كعدوا على الحصيرة مديت ايدي شغلتلهم گلوبات الحوش وهمه كل واحد يحجي بصفحة والفهمته من حجيهم جدي ما يرضى يصدك البنيه من عمي خليل ومن حاجيله بالصور ضال يحجي بشرفها وشرف امها وغالط عليهن اثنينهن، همه يحجون وياه وهو مدنك ساكت مايدري بروحه شيسوي لمن رادوا يرحون صــيهد وطرواده وكفوا سوا يحاجونه
طــروادة :: مــيثم ندري السالفة مو هينه وحگك تنقهر بس خل ببالك مايتغير شي لو شما قهرت بروحك، اكعد وفكر عدل واحنا وياك بالتريده ومالك غرض بجدك مايگدر يسوي شي.
وكف وياهم ساكت يهز راسه اي طلعوا وضل بس كهلان كاله على ايده يآخذه للمستشفى وميثم مارضى عافه وراح، اعاينله رد كعد بالحوش طلعت يمه گـــلبي يوجعني عليه، كعدت بصفه مديت ايدي على ايده
-مــيثم.
هز راسه متحسف وغطه وجهه بأيده يحجي والغصة خانگته
- ولج وين اكو هيج اهل؟ اهل يضحون بولدهم الخاطر يسافرون ويتونسون، جان من اول ما تزوجتوا مارديتوا للقرية.
ليش ضحيتوا بينه اذا هيه ما بگلبها رحّمه ابوي ليش صار اخس منها؟ شلون گدروا يخططون ويسافرون ويلوعونه عليهم، لهسه بواجي بريا تدك براسي من يبجي عليها ويصيح مشتاگ الامي اريدنها
واسكته اصبره لمن ينام ارد انا الابجي على فراگهم، مــاسه مو اهل هذول مووو اهل.
هو يحجي ودموي تجري ماعندي حجايه تصبره كضيت اديه اجرهن من وجهه واحاجيه مختنگه
-كل واحد يتجازه على افعاله، رب العالمين انطاهم نعمه وهمه ماقدروها،مــيثم فـــدوه اروحنلك لا تقهر روحك والله اموتن لو صار بيك شي.
شال راسه مسح وجهه وجرني الصدره باي راسي وخرت من حضنه اعاين لوجهه
مــيثم :: اخليها تاخذ بتها وتروح.
-اختك مبين مظلومة مثلكم واكثر اقلها انتم زلم وعمي شامل وعمتي رباب ماعافوكم بس هيه الله اليدري شعايشه من قهر مــيثم هذا انت الحنين لا تظلمها.
مــيثم:: اختي؟ بهالسهوله بت ما اعرفها ولا بعمري سامع بيها هيج بيوم وليله تعال هاي اختك! مــاسه مو كلشي سهل مثل الحجي، واذا ضلت هناه ما اگدر احميها شعلان يگلي اذا جانت صدك اختك غاسل ايدي من. شرفها دايحه وي امك من دولة الدولة، حرك روحـــي بحجيه گدام عمامي وولدهم من اولها تهمها بشرفها، أردّه وأدافع عنهن ويجوز كل حجيه صدك مــاسه .
مديت ايدي اسد حلكه البنيه واكفه بباب الهول تمسعنه ألتفت عليها وهيه بساع مسحت عيونها وطبت جوه دنك حاط ايده على راسه روحه محتركه حرك عفته وكمت وره البنيه، امها بعدها كاعده على القنفة التلفون بأيدها تسجل صوتيات ومدري المنو تودي، تلفتت ادور البنيه لمن سمعت صوت ماي المطبخ مفتوح مشيت وراها ذابها السال من راسها لافته كبايه وتغسل وجها ورگبتها تضيع دموعها بالماي، مديت ايدي على ظهرها
-حبيبتي اعذريه لان بعده مايعرفج، واهلنه يحجون وهوه صاير بالوجه لا تزعلين هسه كلشي ينحل.
هزّت راسها اي كوه كاضه دموعها مختنگه بعبرتها
ماريا:: في شي مطرح اقدر كون فيه لحالي شوي؟
-يعني وين هناه بالبيت مچان؟ غرفة ؟
ماريا:: يي أوضه.
-تعاي.
مشيت وهيه وراي فتحتلها غرفة بريا
-هاي غرفة بريا، اجيبلج غراضج خاف تردين تبدلين.
طبت للغرفه وكفت عاينت تعاين عليها چرباية بريا بينها وبين الشباج شويه كنتورة خانتين بصف الحايط خشب جوزي حيل قريب للأسود تميل للدفو وهيه تعاينلها بتركيز، ردت عاينتلي واكفتلها بالباب رديت اسألها
-اجيبلج غراضج؟
ماريا:: ما بديّك تتعبي!
-لا يمعوده شأتعب هسه اجيبهم.
سديت الباب وراي ومشيت للهول جنطهن على صفحة اثنين درت للأم اسألها
-منو منهم جنطتها؟
اشرتلي بأيدها اثنينهم.
شبت وحده منهن دكيت الباب عليها فتحته الي نازعه قميصها وباقيه بتشيرت تعلاكه اخذا الجنطه من أيدي البجي مبين بصوتها والدموع تلمع بعيونها
ماريا::يسلملي دياتك.
-حبيبتي.
طلعت من يمها اعاين الامها وكفت تعاين لبيبان الغرف بساع اشرتلها على غرفتها، طبت للغرفة طلعت الميثم عاينلي مقهور ويسأل
-سمعتني؟
-اي لكيتها تبجي بالمطبخ.
وكف على حيله ميت من القهر گال
-احجي وياها؟
هزيت راسي اي طبينه للهول سوه دك باب الغرفة عليها وفتحه كاعده بالگاع بصف الچربايه وبس لمحتنه مسحت عيونها، لبسها صلوخ ودنك مــيثم ساكت لمن كالتله
-تفضلوا.
حجتها ومدت ايدها على الچربايه جرت الشال خلته على اجتافها غطت بيه صدرها وادها وضلت على كعدتها سديت الباب ورانه مــيثم كعد كبالها يعاين لوجها وهيه عيونه متروسه دموعه وبؤبؤ عينها يفتر بين عيونه دنك متحسر ورد عاينلها
مــيثم:: ميخالف احجي وياج شويه؟
هزت راسها اي كعدت عدل وحجت گبله
ماريا:: خليني أنا احكيلك بالاول وحياة الله مافي شب عوجّ هالارض قدر يقرب صوب شعره من راسي! واذا بدك خدني على دكتورة فحص كرمال تتأكد من شرفي.
شال راسه داير عيونه منها مايدري شيحاجيها وهيه تبجي وتعاين لوجهه ردت گالتله بغصه
-ما انا بالاصل رضيت إجي لهون كرمال شرفي وكرمال ما اسمح يقربَّ عليَّ ويدنسني.
عاينلها بحيره مضيك عيونه وهيه حاطه عينها بعينه تعب وصوته احتقن كوه يحاجيها
-صاير وياج شي جبرج تجين هناه؟
بلعت ريگها تعاين لعيونه وبهتت بخوف دنكت بساع تهز راسها لا وجرت رجليها الصدرها ضل يعاينلها بشك ما مرتاح سكت شويه وگالها
-ترحين وياها؟
زادت بالبجي تهز راسها لا مختنگه كوه تحجي
ماريا:: هي مابدا ياني، وأخر سنتين عشتهم لحالي بلبنان، وكل مره كنت احكي معها وقولها قديش حاسه بالوحده والتعب لحتى اجت واخدتني معها عروسيا، وبرضوا تركتني لحالي، بيمروا ايان مابشوفها، ولا حتى بتسأل عني.
ميل راسه على صفحة بشك گالها
-مساع كلتن منّ توفى ابوي ضلينه عايشين بالبنان وهسه تگولين عافتني وحدي بالبنان وردت آخذتني لروسيا، تلعبن عليَّ انتن؟
مسحت وجها مرتبكه عاينتلي بحيرة وردت دنكت ساكته هز راسه خوش
مــيثم:: هاي هيه دام راح تضلين يجي يوم وتحجين شني الجابج هناه
عاينتله ساكته گالها
-حطب ببالج امج من تطلع من هالبيت بعد للموت ما تشوفينها ولا ارضى ترد تطب البيتنا خوش؟
هزت راسها خوض ساكته، گام طلع من الغرفة حطت رأسها على رجليها تبجي طلعت وراه لمحته طب الغرفة انه وسمعت صوته يحجي وياها بالروسي وهي تنتر بوجهه وهوه اعصاب اول مره اسمعه يصيح بهيج حرگه.
طبيت للمطبخ اسويلهن عشه وتلفوني انخبص بالرسائل والاتصالات جريته بس شفته الگروب رنـــه تسولف لجويريه وتكلها "انه هم ما فاهمه شي غير تجي مــاسه وتفهمنه"
عيني على الطباخ كتبتلهن اسكتن بعدين اسولفلجن.
اثنينهن غمني.
عفت التلفون التهيت بالمطبخ مــيثم وده عليه جدي وراح كلساع يحرگون گلبه، حطيت العشا كلمن وحدها وديت الامها ورديت ودّيت للبنيه وطلعت من يمهن ايدي على بطني موجوعه من كد ما اكلت صدمات اليوم، شويه واجه مــيثم متسودن عمي شاكر وجدي كايليله نزوج امك الشاكر وبعد ما تروح ومتسودن تعارك وياهم واجوا الولد وراه هوستهم ضلت بالحوش طلعت ام مــيثم وكفت بصفي تسمعلهم رمن فهمت طلعت عاينولها كلهم حاجت مــيثم بالروسي نتر بوجها
-ادررري ادري.
كالتله
روزا:: حتى يعرفون انا امنت على حياتي من قبل لا اجي لهون بكرا الصبح اروح على بغداد .
وهـــب:: مــيثم كلها لا تروح بس خل بريا يجي
يحجون وياه وهوه خازر امه جريتها من ايدها برخاوة طبت للهول سديت الباب واعاينلهم من الجامه، وهيه تحجي تدردم ما راضيه، درت عليها احاجيها
-لا ترحين لحد ما يجي بريا يشوفج.
-لازم اروح الصبح.
سكتت وهيه ردت طبت للغرفة والولد قنعوا مــيثم يخابر بريا حتى يجي يشوف امه بس ما يگلوله امك هناه خافوا عليه ينصدم ويصير بيه شي سليم كالهم
-نگله مــيثم مسوي حادث
كهلان:: حتى ينجلط.
وهـــب:: لا نگله طاح وانكسرت رجله يريدك.
صــيهد:: انتم شو هواي تمسلتون؟
سكتوا مختنگين اثنينهم وضلوا كل واحد ينطي اقتراح وميثم ساكت لمن شويه وكالهم
-صــيهد انتَ خابره كله جدي طرد مــيثم للمعامل، وشوف شلون. ترهمها مله ايده انشكت وباجر عمليته هيج حجي مو تخوفونه كلش بس كون يرضى يجي.
جر تلفونه صــيهد خابر على بريا مكالمتين مارد وميثم تسودن حر تلفونه يخابر هوه خاف عليه كل واحد اخذله صفحة يخابرون وماكو يدك يدك وراها صار مغلق تسودنوا وانه روحـــي انسحنت كعدت على حيلي يم الشباج خايفه .
بالساعتين يخابرون على بريا وماكو.
وبعدهم بخوفهم ورد جدي اجه هو وابوي وعني شاكر ومرتضى حاروا شيسووت وشيحجون ول٣ من الليل هوستهم فضت ماصار يوم علينه جحيم.
مــيثم ما طب للبيت ولا غمض عينه وانه اغفى وافز كلساع وامشي اعرين للبنيه نايمه بجرباية بريا وامها نامت بغرفتها للصبح طب مــيثم روحه رايحه والتعب ماكل وجهه جاي اسوي ريوك وكعدت امه كالتله وصلني على الكراج، حتى تروح لبغداد حاجاها تتاني بريا وهيه ماترضى تسودن يكلها بس خلي يجي يشوفج وماترضى تريد تروح صياح وهوسه يله كالتله بس اليوم ابقى وهمه يخابرون على بريا وماكو مايرد علي وأحد منهم يراسلونه ماعده نت وعلى الرصيد رهم مايرد
""""""""""""""
رنـــه :: طبيت للبيت هدوء، جنطة المدرسة بحتفي اتلفتت ادور على ريـــمه عاينت للمطبخ الشباج مفتوحه والجدر على النار، حسين وزهره ذبوا جنطهم بالهول ومددوا رجليهم عبالك جانوا بحرب، عفت جنطتي بصفهم ومشيت ادور على ريـــمه دكيت باب غرفتها وفتحته الغرفة نظيفة والشباج مفتوح البرده تروح وتجي وي الهوه.
سديت الباب ودرت اتلفت جا وين ريـــمه.
فتخت باب غرفتنا والدوانية ادورها وماكو مشت لغرفة اهلي بس غتخت الباب لمحتها نايمه بالگاع على لولة ريش ابوي چان ينام عليها ومتغطيه بجرجف قديم جان بنضيدة امي وي الفراشات، تدنيت يمها كعدت على اركبي ايدها بصف راسها على المخده مفتوحه وبنصها صورة صغيره ما مبينه المن جريتها من أيدها عاينت بيها
صورتها وهيه صغيرة بأيد امي وابوي، تحسرت مكسور گـــلبي عليها.
مديت ايدي على جتفها ادغها
-ريـــمه، ريـــمه
فزت بشهكه
-اسم الله الزهره.
كعدت على حيلها تتنفس بسرعة وتمسح بوجهه عاينت لوجهي
-شو نايمه هنا شني بيج شي؟
ريـــمه:: لاا هيج غفيت.
حجتها وكامت شالت المخده والجرجف ردتهن للنضده تسأل
-اجيتوا كلكم؟
وكفت وياها اعاينلها واحجي
-رجلج بعده ماجاي عده امتحان اليوم يتأخر، وعبود وصلانه وراح وي اخوج.
ريـــمه:: بدلوا وصلوا حتى اصبلكم غده.
-هسه عوفج من الغده كليلي شصار على الروسيه؟ هم سمعتي شي؟
طلعنه من الغرفة للمطبخ طفت الجدر وانه واكفتلها بالباب صبتلي ماي بكلاص اطتني اشرب وتحجي
ريـــمه:: والله هم مافاهمه شي بس مساع سألت سجاد يكول تريد تروح لبغداد حتى تسافر بس مــيثم مايخليها يريد بريا يجي حتى يشوفها وبريا من امس لليوم ما يحصلونه.
ووي حجايتها شركت بالماي مختنگه اكح وهيه اجت تركض تطك على ظهري وانه روحـــي راحت ماصدكت اتنفس
-شلون مايحصلونه؟ خابروه خابروه مغلق تلفونه؟
عاينتلي مستغربة وانه مدري شبيه احس كمت حتى ما اعرف شلون اتنفس روحـــي انطحنت بس اريدها تحجي
-ما ادري مرات مغلق مرات يدك ومايرد هيج گالولي.
حطيت ايدي على گـــلبي عفت ريـــمه ومشيت للغرفة بساع طلعت تلفوني من الكنتور وبس فتحته تذكرت حجاية طــروادة ومن حلفتله بعد ما اخابر بريا. ذبيت التلفون مختنگه
-يا رب كون كلشي مابيه بجاه الحسين.
مسحت وجهي وكمت بيه مابيه غسلت وصليت وضليت كاعده على السجادة گـــلبي يوجعني خايفة عليه، لمن اكت ريـــمه وكفت بباب الغرفه تعاينلي وحجت بابتسامة
-ها رنـــه؟
كمت لفيت السجادة احاجيها
-هاه
درت عليها مبتسمه رافعه حاجبها
ريـــمه:: راحت روحج على بريا؟
-شنّي السآلفة ؟
ضحكت وخرت من الباب تگلي
-تعاي تعاي تغدي.
طلعت وياها للهول حسين وزهره متانينه كعدنا تغدينه سوه كوه اكلت احس روحـــي معدتي معصوره من الخوف والتفكير، ووره الغده ولا گدرت اشيله من بالي كل تفكيري بيه، لمن اجه طــروادة من الكليه طب للبيت بأيده علاليك. مسواك، انه كاعده بباب غرفتنا وريمه طلعت من الحمام صارت بوجهه دنگت بساع رمشت للغرفة وانه اعاينله صافنه گال
-الله يساعدجم اخذ العلاليك منجن اعزللجن المسواك؟
يحجيها مبتسم كمت بساع اخذتهن للمطبخ وجبتله كلاص ماي كعد بالهول تعبان وآنه واكفه كدامه، طلعت ريـــمه لافه على راسها حجاب ماشيه للمطبخ وهي عابره كالتله
-الله يساعدج.
وخر الكلاص من حلكه يعاين وراها
-يساعد بختج،
طبت للمطبخ اخذت الكلاص منه وضلبت واكفه گدامه عاينلي وعگد حاجبه
-ها رنـــه؟
درت وجهي مرتبكه وكف وشال ملازمه وياه عاينلي وهز راسه يسأل
-هاه؟
عاينت لعيونه اعصر الكلاص بأيدي
-حصلتوا بريا؟
حجيتها صوتي يرجف والدموع بطرف رمشي صفن بوجهي ساكت، رفع حاجبه وهز راسه يسأل
-شعليج؟
ميلت راسي على صفحة طاحن دموعي مختنگه وخايفه منه خزرني بغضب شلت ايدي ابجي واحاجيه
-والله انه ماخابرته والعباس ماكسرت حجابتك وخابرت بس خفت من كالوا ما محصلينه مالي غرض بيه بس كلي حصلتوه؟
خازرني بغضب كوه كاض روحه من عدي دار من عدي مسح وجهه ورد عاينلي بحرگه
-وخرري من يمي رنـــه .
مشيت بساع طبيت للغرفة ضميت روحـــي بفراشي ابجي مدري شمالني لو گالوا ماحصلناه گـــلبي ينمرد
شويه واجتني ريـــمه حرت الغطا من وجهي تحاجيني
-هسه انتِ عليمن تبجين؟
-شكتله انه ريـــمه شكتله؟ بس نشدته اذا حصلوا الولد لو لا.
ريـــمه :: مسحت على ايدها محتاره وهيه تبجي ردت جرت الغطا فوك راسها، وانه اعاين ساكته ادري بريا يحبها بس ما جنت ادري هيه هم تحبه، كمت من يمها حسين وزهره نايمين بالهول وهوه طب يسبح، مشيت للمطبخ حميت غداه ومتانيه لمن طلع كعد بالهول اشوفنه كاض تلفونه اخذت صينية الغده حطيتها گدامه شال راسه عاين لوجهي ورد دنك ضايج والتلفون على رجله فاتح السماعة ويدك لمحت الاسم مــيثم رديت للمطبخ اجيبله ماي وسمعته يحاجي مــيثم بس سلم عليه گاله
-شني حصلت بريا؟ شني السالفة هسه يجوز تلفونه ضاع يجوز مايلحك يرد جا كبل حصت مات صلي على محمد.
مشيت يمه حطيت الماي سد التلفون من مــيثم رمسح وجهه محتار كعدت بباب الغرفه اعاينله اكل لگمتين وكام شال الصينية وياه عافها بالمطبخ مشيت وراه اريد اصبله چاي لكيته حاطله كوب ومتاني الچاي يحتر صب الروحه هوه وشال راسه يعاينلي
-ريـــمه ياهو گال الرنه ما محصلين بريا؟
دنكت عبرت من يمه اريد اغسل المواعين
-ما ادري.
التفت عليَّ ما عاينتله عزلت الصينية وهوه اخذ كوب الچاي وطلع، غسلت المواعين وكل شويه المحه واكف بباب غرفة رنـــه يريد يفتحها ويرد يوخر. رد اجه يمي للمطبخ وخرت من يم السنك سندت ظهري على الكاونتر اعاينله غسل الكوب وحجه بدون مايعاينلي.
-شوفي رنه خاف سكرها يهبط.
ضليت ساكته لمن التفت علي هزيت راسي خوش وبعدت عيوني عن عيونه احجي
-ليش تصيح عليها ماسوت شي هيه وحتى لو تحب بريا ليش خايف؟
شلت راسي اعاين لعيونه خازراتني تارسهن التعب وبياضهن احمر من النعاس ابتسمت مجتفه ايديي الصدري
-لو خايف عليها خاف يطلع بريا مثلك يخدع ويجذب؟
تدنى عليَّ حيل نزلت ايديي ووگفت عدل خازرته وهوه يعاينلي بحرگه قرب وجهه من وجهي تحركت اريد اوخر جرني من ايدي لنفس المچان عاينت لوجهه
-وخررر.
-أختي صغيرة
حجاها كاضني من زندي صوت نفسه عالي حطيت ايدي فوگ ايده اريد افكها منه احجي ولشتي ترجف
-خووش معليه بس وخرر.
تقدم خطوه ووياها جرني من زندي عليه نردمت بيه شايله راسي اعاينله بصدمه وحاطه ايدي على صدره، جسمي يرجف نزع عيونه من عيوني لشفايفي تنهد بلع ريك ورد عاين لعيوني بلل طرف شفته كوه يجر النفس حجه ذبلان
-ماخدعتج اناا؟
حطيت ايديي اثنينهن بصدرة اريد ادفعه جسمه نار جلبت بالقميص ادفعه وهوه كاضني من ايدي يجرني عليه احجي بحرگه من بين اسناني
-لاااا بعدك مقصر وخررر هدني.
بس اريد اوخر عنه واجر روحـــي منه جلب مايهدني
-ماخدعتج رلا چذبيت.
-ميخالف صدكتك وخرر جاي تقهرررني.
هد ايدي مبتعد يعاينلي عاگد حاجبه مسحت وجهي ارجف وجسمي يفور طلعت من يمه بساع طبيت للغرفة يم رنـــه جريت جهاز السكر وكعدتها قستلها السكر شويه صاعد اطيتها حباية وندك باب الغرفة فتحه وطب يعاين لرنه كعد كدامها بالفراش وهيه مدنكه ودموعها تجري جرها من أيدها الصدره يبوس راسها شبگته وبجت بصوت
طــروادة:: ما اريدن اصيح عليج والله العظيم بس تحركين گـــلبي ما اريد تخلين هالسوالف ببالج وتلهيج على دراستج، رنـــه عاينــي عليَّ
شال راسه من صدره كاضه بأثنين اديه مسح عيونها وباسها بيناتهن متحسر وخر يعاين لوجها ريحاجيها متردد ومحتار شلون يحجي
طــروادة:: لاحگه على كلشي كل الاريده منج تهتمين بدراستج وماتخلين هاي السوالف تشغل عقلج، وانا احلفلج بروح ابوي لو كبرتي وكضيتي دراستج وياج باختيارج لو شما جان ما احرك گلبج.
وهيه الدموع تجري مدنكه عينها رد شبگها باس راسها يحلفلها مايحرگ گلبها شهكت ومن بين دموعها گالتله
-لو مات بريا اموتن.
غمض عيونه وسد سن على سن بغضب بس مابينها وضل شابگها ساكت لمن دك تلفونه وخرها ووكف يطلع من الغرفه ورد
-ها مــيثم.
طلع وسد باب الغرفه وراه كعدت يم رنـــه احاجيها
-كافي بجي رنـــه والله مو زين عليج.
ضليت كاعده بمها لمن كامت تغسل اجوا صــيهد وسلطان يم طــروادة بالحوش واسمعهم يحجون وياه مــيثم كايله خل اختك تخابر بريا اذا خابرته ومارد عليها هاي هيه اخوي مات، وطرواده ما راضي وهذول يقنعون بيه من ما اقتنع، صــيهد كاله
-بعد احسن
عافهم وراح، وسلطان ضل وياه، طببه للدوانيه واجه طب للهول عاينلي وعاين الرنه واكفات بالمطبخ كال
-ريـــمه سلطان يريدج.
غسلت ايديي ومشيت للدوانيه اعاينله كاعد والمخده بحضنه شال راسه شافني وابتسم مشيت يمه سلمت عليه وهوه كاعد جرني من ايدي يكعدني بصفه مد ايده يحضن خدي
-شلونج؟
-الحمدلله شخابرك انتَ شلون صرت؟
هز راسه متحسر
سلطان:: ريـــمه اتمنى مره وحده بعمرج تصارحيني وتحجيلي البيج؟ ما مرتاح وبالي يمج سولفيلي شني القاهرج؟
دنكت ساكته رفع وجهي ضايج
-احجي خويه كليلي يابه هاي العله انتِ منين خايفه وانا اخوج؟
جريت اديه اثنينهن الوكهي ابوسهن
-فـــدوه اروحن الطولك ما خايفه من شي ومابيه شي يابعد روحـــي لا تضل تفكر بيه
-شلون ما افكر بيج وانتِ مرتين ردتي تكتلين روحج تردين تموتيني ريـــمه؟
-ماتنعاد.
دنك يهز راسه لا ورد عاينلي
-ما اصدكج بعد، عاينيلي عليج بروح عمي شامل
دنكت گـــلبي ينلچم حتى من يجيبون اسمه يمي جني اليوم غادرته
-اذا تعزينهم احجي وكليلي خويه هاي علتي وهذا القاهرني، ريـــمه كهلان يقهرج حاجيني ما تردينه؟ من عين باجر اطلگج منه بس لا تضلين مقهوره والله اموتن من القهر.
-اسم الله عليك والله مابيه شي وكهلان لا قاهرني ولا مضوجني لو اكو شي انه احيجلك، ماكتلي هاجر شلونها صارلها يومين ماجايتني.
-زينه امس اجت يمي للغرفة رسمنه سوه
-ها، وانت ليمت تردون ببيت واحد انت ونمرشتك؟
ابتسم عيونه ذبلانه
سلطان:: خل صحتي تردلي بعدني انا اكضي الليل فزات ما اريدن اروح يمها بهالوضع واوجع گلبها كافي عليها العاشته.
يعصر گـــلبي من يحجي بقهر ضل شويه يمي وراح، وطرواده التهه وي الاجوا ياخذون الحصاد للغروب يله كفوا شغل وراحوا طب طــروادة يغسل بالحوض الكهرباء طافية وي الاذان وكلنه كاعدين بالحوش رنـــه يم طيورها وانه وزهره وحسين على الحصيرة آكتب بيهم ، اندك باب الحوش مشه طــروادة فتح الباب واسمع مــيثم يحاجيه متوسل
مــيثم:: عل گـــلبي مايرد عليك بروح ابوك خلها تخابره مره وحده والله مره وحده اذا مارد عليها هاي هيه.
رنـــه:: تدنيت يمهم اسمع ايدي على گـــلبي طــروادة ما يرضى، اوجعني گـــلبي . والخوف اكلني من سمعت مــيثم يگله
-ولك من امس اخابر وماكو يبس گـــلبي خااف بيه شي.
دار طــروادة عاينلي بخزر دنكت امسح بعيوني سد باب الحوش وصلح علي ضايج وخايف على بريا
-جيبي تلفونج وتعاي.
طبيت للبيت ظلمة واتلمس تلمس واستغلها ابجي حتى يمه اكض دموعي وما ابجي، اخذت تلفوني ووگفت بباب الهول مسحت عيوني حيييل يله طلعت لكيته كاعد راد لباب الحوش يحجي وي مــيثم ورد سد الباب واجاني اخذ التلفون من ايدي كعدت على طرف الحصيرة وهوه ضل يگلب بالتلفون شال رقمه من الحضر خابره ومدلي التلفون اخذته كعد كبالي يعاين للتلفون متاني ليمت يدك وبس دك شال عينه لعيني ضايج بلعت ريك
گـــلبي يدك بخوف وي دگت التلفون وطرواده وجهه ما يكصه السيف يعاينلي ايده على كصته وبس انفتح الخط كال بصوت متعوب
بريا:: غزالي.
وطرواده جر التلفون من ايدي ووگف گاله
-بريا ليش ماترد موجاي نخابرك؟
وبريا كح مختنك شويه وگاله
بريا:: ها خويه والله جنا بمچان مابيه كهرباء وهاي تغطية هم ماكو ها گول.
- احم تعال رد للقرية
بريا:: سلامات صاير شي؟
سكت طــروادة يعاين لوجهي مسحت دموعي وبريا صاح بخوف
-كهلان بروح عمي شامل مــيثم بيه شي؟
-تگدر باجر تجي؟
-ميثمممم بيه شي؟؟
-طاح وانكسرت رجله
-يابويه لا عليك الحسين كهلان بروح ابوك اموتن بالحسين صدك تحجي منين طاح منين.
-من درج الكلية وصبيناها ورديناه للبيت بس هوّه يريدك
-جذابين بالحسين جذابين بيه شي مــيثم كهلان عليج بعزيزة كلبك عليك بداعت رنـــه حاجيني بيه شي نو بس رجله حاجيني.
روحـــي راحت ابجي وي صوته وخرفه، وطرواده اخذ التلفون وطلع بره الحوش يم مــيثم مشيت بساع اعاينلهم من الباب مــيثم حاجاه گاله بتعب
مــيثم:: رد عدي عملية عگب باجر واريدن اشوفنك.
سدوا السماعة ما اسمعه شيحجي وياهم حرگوا گـــلبي شويه وسدوا التلفون. مــيثم گال الطرواده
-يگول عگب باجر يله أوصل.
طــروادة:: وكلام الله بس يجي اكتله بالخيزرانه.
مــيثم:: شسوه؟
-يكلها غزالتي ترا صارت تمسلت اخوك حيل زودها شني السالفة مــيثم حتى البت من وراه ضاله بس تفكر بيه هيج هيه خويه؟
-لا لا والله اطيح حظه بس يجي والله انا اكضه الك وتكتله بس انتَ لا تبطل خوش؟ رنـــه اله.
وطرواده دار وجهه ضايج حتى من مــيثم وميثم مد أيده على لحيّة طــروادة ورد ايده لوجهه باسها يگله
مــيثم :: لا يصير بخاطرك كهلان بس خلني افك الطلابه العدي وشتريد انا حاضر.
طــروادة:: ما اريدن يلوح اختي حرام مــيثم، وكل الجاي يصير غلط وانا مليت ما ضل شي ما سويته.
وميثم مدنك محتار وضايج شال راسه گال الطرواده متردد
-نعقدلهم؟
هز راسه لا
طــروادة:: خويه والله انتم ماتعارفونها أختي عقلها صغير لا تشوفونها وصلت رابع ، وعدها مدرسة واختي شاطرة ما اريدن من هسه تيل هم الرجل والمسؤولية تلحك عليها.
-حقك هاي هييه شتفصل نلبس كلي شني التريده ورگبتي سداده بس اطني هالچم يوم تكضي هالسالفة. الاجتني وسهله.
هز راسه خوش. وخرت بساع من يم السياج كعدت بصف ريـــمه وطب طــروادة للحوش حضر رقم بريا وردلي التلفون، مشه شغل المولد، گـــلبي ارتاح من گالوا عگب باجر لو الوراه يرد للبيت امنت ورديت اضــحك واتشاقه وياهم، وثاني يوم كوه كضيته اريد الوكت يركض ويرد بساع
احجي وي ماسه ميته من القهر تكول امهم تريد تروح وميثم يوميه يتعارك وياها يريد بريا يلحك يشوفها متت من القهر وكرهتها حيل
طــروادة العصر يكرب الگيعان ول١٢ راح للشغل وانه وريمه لبسنه اسود وطلعت الرايات من اجه عبود صعد علگهن.
عاينت الريمه مستغربه فجأة الگاها تعاين المجان وصافنه بيه ومن احاجيها تفر هزيتها من جتفها فزت
-صارلي ساعة احجي وياج.
ريـــمه :: مسحت وجهي ودرت عليها
-احم ها گولي؟
هزت راسها ماكو شي طفت تلفزون الهول گالت
-راح انامن، كعديني الصبح من تكعدين
-عطله شعدج من الصبح؟
دنكت منحرجه كالت
رنـــه:: بريا يجي باجر.
ابتمست هزيت راسي خوش، طبت للغرفة يم اخوانها وانه كمت من الهول طبيت للغرفة تمددت وغمضت عيوني ارد احاول اتذكر هذا الضباب اللي على ذكرياتيي اضل افكر بييه واحاول اتذكر بوضوح، ومن اتعب واطول احس روحـــي اختنك. يكضي الليل وانه ما نايمه اطلع من الغرفة الغرفة عمتي رباب اكعد بالباب واعاين بتركيز لبطن الغرفة گـــلبي يضلّ يوجعني عندي ذكريات بس جنها مل ما اريدن اوصلها تشرد من عدي.
اختنكت طلعت من الغرفة للحوش الجو الفجر بارد كعدت بمچاني جوه الشجرة على البلوكه الشال على راسي مفتوح شامرته اطرافة من الجهتين، حطيت ايدي على خدي وسندت راسي على جذع الشجرة اعاين للحوش ابتسمت حضرتني ذكرى وضحكه اااي اي، غمضت عيوني حيل اريد. اتذكر مل التفاصيل فرحانة
هناه اجيتلهم ابجي لان طــروادة طيحني وزلغ ايدي وعمتي رباب كعدت على اركبها كدامي تمسح الدم من عكسي وعمي شامل كض طــروادة من أذنه يحاسبه
واخذتني عمه رباب للغرفة تلف عكسي وشبگتني تبوس بخدودي.
بأثنين ايديي حضنت روحـــي اريد احس بدفو حضنها محد لمني بحضنه مثلهم ومثل دفوهم، مغمضة عيوني قوي ما اريدن اطلع من هالشعور شكد ما قديم حسيت بحنيته، اكثر من نص ساعة مرت وانه ما يهلي افتح عيني احس بروحي بعيده عن الواقع الحد ماحسيت احد كعد كدامي ومافكيت عيني رايد دافيه انمدت على كصتي ضليت مغمضه عيني تنهدت گـــلبي يرجف ومركزه باطراف اصابعه الدافيه وصوت اشبهه بالهمَس يقرأ ايات.
بدون ما اتحرك فكيت عيني صارت بعينه مبتسم وايده على كصتي شفايفه تتحرك، وصوته يجبرني اتأمله أشبهه بقطرات مطر على جام شباج متصدي من سنين وماضللها غير قطرات هالمطر تحتضنها، يحسسني بحنية ودفو يربت على تعب روحـــي گبل جسمي
ضليت اعاين لعيونه وارمش بثگل وهوه ماشال ايده من كصتي ولا بعد عيونه عن عيوني يتأملني بتركيز ويقرأ قرآن، نزل أيده وغمضت عيني حييل من قرب شفايفه على كصتي داخلي يرجف من دفو شفايفه باسني ووخر فتحت عيني الذبلانه اعاين لوجهه .
نزل ايده كض آيدي يحرك ابهامه فوكها تحسر وعاين لعيوني مرتبك همس
-انا اعتذر ريـــمه.
بلع ريكه وزفر نفس بقهر مد ايده الثانيه حط وحده جوه ايدي وحده فوگها دار وجهه لبعيد شعره يروح ويجي برخاوة وي نسمة الهوه البارده ، نزلت ايدي من خدي دنكت مختنگه
-كتلك تعبانه وماعفتني كهلان!
دنك يهز راسه اي وجر ايدي لشفايفه دنك عليها يبوسها مايحط عينه بعيني مدنك ويحجي
طــروادة:: السمعته مو هين انحرگ گـــلبي رنـــه گمت ما اشوفن گدامي.
-كتلك والله ما حاجيه هيج وانتَ بعدّك مصدك.
عاين لوجهي ساكت محتار
-انتِ نسيتي بس السمعته أنا حقيقة.
جريت ايدي من ايده وهزيت راسي خوش
-هاي هيه خوش انتَ صح وانه حقيرة وغداره.
ووي حجايتي التفتنا اثنينا على دگة الباب.
"""""""""""""""
جــويريه:: يمكن الايام الجاي أعيشها احلى حتى من الايام العشتها وي امي وأبوي، مابيه حيل رجليَّه يوجعنه ويصعد الدرج بس حتى يكعدني ادرس، اكعد ابوسه واشاقيه متونسه نكعد سوه بالحديقة اسوي چاي وادرس يمه. وبس نتعشه يگلي
-بويه انا تعبان راح انام
ويكسر گـــلبي من اشوفه صدك تعبان امرغ رجليَّه وابقى يمه الحد ما ينام يله اصعد احضر ملابس واروح للتلفون أنتظر رسالة منه ماينطيني گـــلبي اتنازل واراسله اني شويه وكتبلي
-تداومين باجر؟
جريت التلفون اضــحك اباوع الرسالته مبتسمه ومحتاره شنو اكتب كتبتله
-طبعاً قابل بس نجمتك تداوم.
شافها ومارد تندمت وعضيت اصبعي هسه الا اكتب هيج، بقيت اتگلب محتاره شويه وكتبتله
-صــيهد؟
بساع شافها كتب
-جاي احجي وي نجمة لا تدوخيني شتردين؟
كعدت على حيلي گـــلبي انقبض مقهوره اكلت روحـــي اكل كتبتله
-بعدك ما مطلكني طلكني واحجي وي غيري.
-ما اطلكج.-تطلك غصباً ماعليك.
بس شافها اتصل رفضته دز
-غصباً عليمن ولج؟ انتِ ليش مو ادميه مو اجيج؟
-ضحكتني! تعال ابني غيرنه المفتاح. -بت النعال.
-أخلاقك تدرس لازم ينزلونها منهج.
ركع خابر مارديت عليه دزلي
-الا انعل والديج يا رعينه .
مارديت عليه محترك گـــلبي منه حيل، كوه نمت وثاني يوم حطيت حمره واخذت وياي وحده لون احمر حلفت بس اكضي محاضراتي احط منها واروحن القسمه.
داومت وكل فكري يمه احسه لازم ايد نجمة ويفتر بالكليه ويضحك ويسولف وياها بهدوء ويتوسل بيها مو مثلي كله صياح.
نزلت للحمامات خليت حمره حمره وطلعت مستحيه امشي واحس كلها تباوعلي اريد اغطي حلكي وامشي مدنكه لحد ماسمعت صوت وراي
-هوووب هوووب.
درت عليه گـــلبي يدك ببطني من الخوف بلعت ريك وي فتحة عينه من شاف حلكي وبدون ما يحجي ولا حرف بالكلنسه البأيدي مسحت شفايفي حسيت ايدي ترجف مو كدها شكو اسوي بروحي هيج.
تقرب وگف كدامي وانه مدنكه خايفه ارفع عيني واباوعله حجه من بين اسنانه بنتر
صــيهد:: يشهد الحسين اذا ما گطعت شفايفج أزين شاربي.
يابه الرجفه الكضتني خلتني ما اندل دربي درت ومشيت بسرعة كعدت بالقاعة وگلبي بعده يدك بقوة ماطلعت الأخر الدوام، رجعني أبويه للبيت وبالليل ابوي حتى من راد يطلع ماخليته خايفه من صــيهد يجي صدك وارجع اقنع نفسي غيرنه مفتاح البيت مايگدر يجي، بقيت گاعده للساعة بالوحده وكل شوي اوخر البرده من يم الشباك واباوع للشارع
تمددت افكر بيه الحد ما غفيت وفززني تلفوني يدك فركت عيوني بس تأكدت من اسمه كعدت على حيلي مرتبكه
-الو.
-نايمه؟
-احم احممم اي بس كعدت كول.
-شلونج؟
يحجي بصوت هادئ وناصي عبالك شخص نايم جر حسره
-قهرتج امس وعفتلج هديه بحوشكم مال صلح.
الضحكه شكت حلكي وكمت بسرعة ولا جني جنت نايمه فتحت باب الغرفة ونزلت التلفون على اذني واحاجيه
-اني هم اسفه لان خليت حمره حمره حتى اضوجك بيها.
-امممم.
احجي وياه وافتح بالبيبان فتحت باب الهول وخليت رجلي اطلع للطارمه وشهگت مخروعه من تخلت ايد على حلكي وايد على خصري وصوته بأذني
صــيهد:: صوووتج.
ارجف روحـــي راحت لازمني بقوة وصاد حلكي التلفون يرجف على اذني نزلته وبأيدي الثانيه لزمت ايده اريد انزلها من حلكي، ظهري بصدره شالني من خصري رجلي يتلولحن ساد حلكي طب للبيت ويمشي بيه للدرج دفرت بيه اصيح وصوتي مكتوم قوة لزمته الوجهي ينتر بأذني
-صوتج لا اذبحنج.
عضيت ايده حيييل بس حركها من حلكي صرخت ورجع سد حلكي بقوة صعد على اول بايات الدرج ودار على صوت فتحة باب غرفة ابويِّ
شكرا لزيارتكم عالم روايات سكيرهوم
