رواية أرض الخناجر الفصل السادس والخمسون بقلم ايلول
جــويريه:: بس لمح أبوي فتح باب الغرفه، عافني ومشه بسرعة الغرفتي دخل وسد الباب واني على الدرج جسمي يرجف مسحت حلكي ابوي يمشي وايده على حايط الهول يدور دگمة الاضوية شعلهن وشال راسه للدرج مضيك عيونه مستغرب
-ها بويه شكعدج؟
درت عيوني الباب الغرفه ورجعت باوع الابوي نزلت من الدرج جسمي بعده من الخرعه يرجف
-احم ها بابا ماكو شي نزلت أشرب ماي، انت ليش كعدت.
يباوعلي مد ايده يمسح على راسي
-روحـــي نامي بويه.
هزيت راسي اي مشيت للدرج گـــلبي يدك حييل وكفت يم اخر بايه باوعت الابوي طفه اضوية الهول ورجع الغرفته، مشيت بخطوات ترجف وكفت كدام غرفتي زفرت نفس اقوي روحـــي واني الخوف اكلني افكر شنو ابرر شنو احجي شأكول، ابجي گبل حتى مايحاجيني لو اعتذر لو اعترف لو اعوفه وانزل انام بغرفة ابوي لا خاف يجي يسحلني ويتعارك وي ابوي، اباوع من جوه الباب بس الضوه الاصفر الخافت مشتغل
مسحت وجهي احس اطراف اصابعي ترجف مديت ايدي على يدة الباب بس حركتها فتح الباب هوه ومد ايده بساع جرني للغرفة دفعني النصها ودار للباب قفلة
-صــيهد خل خل خل نتفاهم.
قفل الباب ودار عليَّ بغضب اريد احجي مالحگت جرني من ياخة ملابسي عليه وبأيده الثانية لزم فكي جلبت بأيده مصدومة وروحي رايحه احجي بصوت يرجف
-وخرر والله اذا ضربتني.
هز وجهي بأيده حيل ويشيل براسي عليه يحجي من بين اسنانه يفور
-شكتلج انااا؟ جايه تستعرضين انتِ؟؟؟؟؟
يحجي وياخذني ويجيبني بأيده واني لازمه بأديه ومجلبه بحجاية وحده
-وخر لا تضرب.
هزني بأيده حيييل خازرني
-عاجبج يعاينون لحلگج؟؟؟؟ رايحه تدرسين لو تستعرضين بت الحيوووان.
خله جف ايده الجنه كرك على حلكي وفرك شفايفي حيل روحـــي شاطت دفعت أيده ابجي
-لا تضرب كتلك وووخر وخر.
وخرت منه ابجي وامسح بحلكي وهوه دار ميت من القهر وده يگطعني، كعدت بالگاع سانده ظهري على الچربايه
لامه رجليَّ الصدري وابجي مو من وجع ابجي من الخوف واطلع روحـــي مظلومة حتى يكف عني ومايحاجيني، وهوه جنه مخبل يفتر بغضب ومايباوعلي فتح اول دكم من قميصه مختنك، ردن قميصة الدكم مفتوحه ولافهن النص الساعد.
مسحت شفايفي بظهر ايدي شفت صار على ايدي شوي دم مديتها اله ومن بين دموعي كتله
-شووف شسويت شوف .
وكف يباوعلي وجهه ما يكصه السيف هز راسه اي متشفي
صــيهد:: شايفه اذا ما سديتي حلگج هسه! الا اكصصهن واعلمج النوب شلون تحطين صخام وجهج، ما تسحين انتِ؟؟؟؟
نتر شايل أيده بوجهي
-رايحه العرس؟ حاطه حمره حمرررره المن؟؟؟ تردين الزلم تعاين لحلگجججج؟
ينتر بغضب واني امسح دموعي و بصوت يرجف احجي
-الك والله ردت انت تشوفني وتضوج مو الاحد انت غثيتني وردت أغثك.
د ار من عندي يمسح بوجهه ويغلط
-انعل ابوج لا ابو الحط رگبته بأيدج
دار وجهه عليَّ السبحه اللي بأيده شمرها على الميز نتر
-احترمتج ووگفت بظهرج حتى توصلين بدراستج تحرگين روحـــي ليشششش؟ شتردين؟ عبالج ما اگدر اسحلج واردج للقرية؟ احبسج بالمشتمل تخلفين وتشتغلين وغصباً عليج تنفذين الينگالج هذا الترديننننه؟
دنكت ابجي اهز راسي لا
- انت هم تحرگ گـــلبي. وما تحجي وياي زين تخليني انقهر كل ما تحاجيني.
ضحك مستهزئ يهز بأيده
-شمسويلج لللج شمسويلج عايفج على حل شعرج معلعلتني وشاعله روحـــي يوميه رايح راد وانتِ تضحكين مكييفه اخررر خايسه.
كعدت على اركبي ورفعت روحـــي ماده ايدي واحجي بحرگه
-وانتَ ماتحرك بگلبي؟ ما يوميه رايح للنسوان؟ ما عايفني وملتهي بنجمة؟؟؟؟
خزرني متسودن
-لجج احجي عدل ياهو الرايح للنسوان.
-انتَ جا ابوووي؟
فتح عينه حيل واجه بسرعة جرني من زنودي وكفني گدامه خازرني
-شتررردين انتِ؟
اباوع لوجهه ومخليه ايديي بيني وبينه عيونه كلها غضب اباوعلهن واتمنى لو اكو طريقة اگدر اتفاهم وياه بيها غير هالصياح والعصبية ميلت راسي واني بأيده ودموعي تجري
-اريد تحجي وياي بدون صياح وعصبية ماتحرگ گـــلبي ولا احرگ گلبك.
رخت العگده البين حواجبه يباوع الوجهي وبعده على نفس الغضب عيونه تركز ببطن عيني مستغرب ، نفسه بوجهي بلع ريگه يباوع لشفايفي، خله ايده بشعري من وره وجرني عليه دنك بين وجهي ووجهه اصبع نفسي ونفسه يرجفن بلعت ريك اباوع لشفته اللي محاوطها شاربه مشه ايده على ظهري غمضت عيني ارجف رفعني من خصري بتك أيد يوصلني الطوله باسني بشفايفي ويمشي بيه للچرباية .
نزلني للفراش وهو ماهاد شفايفي ايده تضغط على ايدي بخشونه يثبتني ويبوسني بلهفة وشوگ من شفايفي لخدودي الرگبتي ايد جوه راسي وايد تتلمس جسمي بخشونه جر ثوبي من كتفي بقوة جريته بأيدي الثانية ارجف
-صــيهد، صــيهد مو هيج
شال راسه وجهه احمر ويرجف يباوع الوجهي صدره يصعد وينزل بقوة، داخلي متقبله جسمي ينتظر لمسته حابه شعور اكون زوجته وكارهه خشونة تعامله وياي لمساته مابيها اي رقة وجهه متروس غضب حتى بهاللحظه
شلت ايدي اتلمس خده فوگ لحيته اصابعي بارده وهوه مثل الجمره، غمض عينه وزفر نفس وفتحها يباوع لعيوني احجي وصوتي يرجف متردده وگلبي يدك بقوة
-باوعلي باوع الأثر ايدك على ايدي اني مو من حديد حتى تلزمني بهالقوة صــيهد، اريد اريدك بس ما أحب هيج.
يرجف ومستعجل هز راسه اي يردد
-هاي هيه خوش خوش.
ذب قميصه ورجع دنك مديت ايدي اتلمس زنده بأطراف اصابعي قشعر بدنه انترسن اديه حب ناعم لحظات واختفى ،باوع لشفايفي قرب شفايفه وماباسني يتلامسن بهدوء يعاقبني على كلامي وياه جريت نفس مرتبكه باوع لعيني حاوط شفايفي بشفايفه يبوسني بدايتها حسيتها هادئه بوسه تترسني مشاعر ودفو مادامت غير ثواني ورجع لنفس الطريقة وبنفس القسوة اسنانه احسها تحوم حوالين شفايفي بدون أي رقه وايده تضغط على رگبتي بقوة مثبتني، خليت ايديي بصدره ادفعه عني ابتعد ينتر وايده ترجف
-شبيييج شبيج؟
-كتلك موو هيج
وخر من عندي بسرعة نزل رجليَّه من الچربايه وبقى كاعد على الطرف منطيني ظهره دنك وحط اديه على راسه يحجي بحرگه
-عاجبج تحركيني؟ اموت واصبر روحـــي عنج بس حتى ما اكضج وانتِ ما راضيه مووتيني كرهت روحـــي يوميه اشتعل وانطفي وحضرتج ولا مهتمه.
يحجي بغضب ومايباوعلي منطيني ظهره
-زوجج انا مو وحش كل ما كضيتج وصحتي اذيتني.
خرب روحج وخرب باليجي يمج.
همست واني متمدد وجاره الغطا عليَّ
-ما گتلك وحش كتلك لمستك تأذيني ما تحس بس تفرض.
- اي حيوان ما احس.
سكتت محتاره وگلبي يوجعني كعدت على حيلي تقربت متردده مديت ايدي على ظهره كش جسمه واباوع لزنوده رجع قشعر جسمه بمجرد طخن اصابعي بجلد ظهره، تنهد وجر نفس طويل قربت روحـــي اكثر مشيت ايدي من ظهره لرگبته مد أيده جراها ودار يباوعلي
-والله ما قصدي أقهرك صــيهد بس باوع والله جاي تلزمني بقوة بحيث بس افكر شوكت يعوف ايدي، باوع.
جريت ايدي منه وخرت الردن اراويه زندي واثر اصابعه كوه مبين الضوه خافت حيل واصفر، باوع الايدي ودنك عينه ساكت ومحتار لزمت أيده بين اصابعي باوع لوجهي متحسر
-صــيهد ما اريد احس بشعور الغصب ما أريد اتذكر شي يقهرني اني....
ماخلاني اكمل كلامي مد ايده على حلكي يسكتني
-اسكتي.
سكتت اباوع لعيونه وهوه ايده على حلكي وخرها من حلكي الخدي وخر كذلتي من وجهي ضماها وره اذني وبين اصابعه تلمس اذاني ملت براسي على أيده قرب وجهه لوجهي باس خدودي بهدوء وتقرب لشفايفي برقة باسهن وابتعد يباوع لوجهي ويوخر شعري من عيوني لم وجهي بين اديه
-عاينيلي جوري
فتحت عيوني الذبلانه اباوع لعيونه ابتسم جرني الصدره يحضني ويبوس براسي رجعني للفراش ناسي نفسه ومهتملي بكل حركه يباوع لوجهي خايف عليَّّ خاف متأذيه وماحابه لمسته، وكل شوي يسأل متوتر
-اوخر ماتحبين هيج؟
ذبلانه بأيده ساكته وينقهر ينتر
-شبيج؟
فتحت عيني اباوع لوجهه بدل ما احجي اتعلگ برگبته احضنه، كلشي يختلف مشاعري ومشاعره ناسين كلشي صار ويانه ماهمنه غير نفسنا، وخوفنه على مشاعر بعضنا
متمدد ساند راسه على تاج الچرباية نايمه على صدره مركزة وي دگات گلبه وهو يدخن وايده تصعد وتنزل على زندي لو يتملس شعري وطرف خدي، ساكتين اثنينا الحد ماخلص جكارته مشه اصابعه على زندي يتلمس ترافته ضحك وحجه بحيله
-مجهزه روحج وقهرتيني بس حتى اجي؟
ماشلت راسي مغمضه عيوني مبتسمه ما اريد ابتعد عن دفو صدره راسي يصعد وينزل وي جرة نفسه، لمني لحضنه بأثنين اديه يبوس شعري ويجر نفس بقوة يردد
-اووووف.
شلت راسي من صدره اباوع لوجهه
-انزل انام بالگاع وانت على الچرباية لان نتكسر ماتكفي اثنينا؟
ضحك مد ايده الوجهي يتلمسه بأبهامه
-هيه تكفي بس انا لازم اروحن.
-ليشش؟
تحسر مقهور مسح طرف شفتي
-مو مالّ أضل ما ترهم.
دنكت ساكته وخرت من حضنه وهوه كعد مبتسم وبس يباوع لوجهي يضحك يخجلني جريت الغطا فوگ راسي تمددت احجي
-لا تباوعلييي هيج.
-هههههههه
ضحك من كل گلبه واجه يمي جر الغطا من راسي دنك بسرعة يبوس شفايفي وابتعد
-گومي اريدن اسبح گبل لا اروح.
-وين تسبح بحمامنا؟
-لا زحمه شوفيلي حمام جوارينكم.
-ههههههه.
ضربني راشدي على كيف مبتسم نزلت جوه قبله اتأكدت ابوي رجع نام فتحت الحمام تأكدت منه نظيف، واخذتله دشداشة من ابوي ومنشفتي علگتهن آله بالحمام.
صعدت فوگ لكيته كاعد على الكرسي سبحته البگتها منه بأيده باوعلي حكيت راسي مبتسمه
-مختاره احلى واغلى سبحة.
-اخذها.
عافها على الميز وگام نزلنه سوه يضحك واني اسكت بيه استحي من ابوي لا يكعد بس دخل للحمام بقيت واكفتله بالباب اريد ينطيني ملابسه اغسلهن وأنشفهن وهوه لازم الباب ويباوعلي بمكر أشر برگبته
-تعاي تطبين!
جريت الباب منه سديته وهوه يضحك
-انطيني ملابسك اغلسهن.
مداهن الي من الباب وماد راسه مبتسم بخباثة
- مو هاي الغساله تعاي طبي اغسليهن.
-هاي عطلانه الجديدة حاطينها بالطارمة.
عض شفته متحلف عفته وطلعت بسرعة غسلتهن بأيدي على السريع وذبيتهن بالنشافة بقيت واكفه يمهن اضــحك واوزع ابتسامات وحدي شلت راسي على فتحة باب المطبخ صار بوجهي أبوي اباوعله ساكته بودي اخلي روحـــي وي الملابس بالنشافة گالي مستغرب
-شسوين؟
-اغلس مبالس
عكد حاجبه مافاهم مسحت وجهي
-اغسل ملابس.
ألتفت للبيت
-جا ياهو البالحمام؟
دنكت وجهي يبخ حراره گال
-رجلج هناه؟
باوعتله هزيت راسي اي سكت رجع الغرفته واني اخذت الملابس وركضت فوگ شغلت الاوتي اكويهن حتى ينشفن زين ودرت من انفتح باب الغرفة دخل صــيهد لاف بس المنشفة عليه
-يااا ياا مو عفتلك دشداشة من بابا بالحمام؟
جر الغطا لفاه فوگه بردان ويباوعلي يحجي
-تلعب روحـــي ما البس من واحد انا بس من طــروادة ونوبات ولد عمامي اذا عجبني شي.
-والله اني غاسلتها الدشداشة.
ضحك وكف وره ظهري لفني وياه بالغطا واني اكوي باس خدي
-حتى لو انا ما اريدن.
سكتت اكمل كوي وهوه وخر كعد على الكرسي يم ميز الدراسة يباوع بتلفونه كل شوي اباوعله اخاف لا يحجي وي نجمة واريد اجيب طاريها اريد اسأل واخلي حد الهالموضوع ومدري شيلزمني ومجرد فكرت بيها ضجت.
انطيته ملابسه ودرت وجهي منه جربت باكيت الجكاير والجداحة مالته خليتهن يم السويج باوعت الباكيت الجكاير فتحته توني اسحب منه جكاره جراه من ايدي بعده ما مدكم القميص درت عليه رافع حاجبه
-وحده!
-لا والله؟
حجه بدون ابتسامة عبالك يگلي مو نطيتج مجال لا تتمادين، دنك ضمهن بجيب البنطرون دكم قميصه وكف الردن الحد نص الساعد، وكفت گدامه مستنده على ميز الدراسه تقرب يمي جر سويج السيارة والجداحة وسبحته يباوع الوجهي هز راسه يسأل
-شبيج؟
-ماكو شي.
خله ايده وره ظهري وباسني براسي وخر وتلمس خدي بين اصابعه يباوع لعيوني
-حضري روحج وغراضج باجر بثمانية اجيج .
باوعت لوجهه ساكته وهو بس شاف نظرتي رفع حاجبه أحس نظرته تگلي فنج الرفضتي، بلعت ريك اهز راسي لا بسرعة لزم فكي بقوة وعيونه باوعلي بغضب دفعت أيده من وجهي
-مو هسه.
-شني المو هسه ؟شو تمسلتين انتِ باجر اجيج وهاي هيه لا تناقشين.
كعدت على طرف الچربايه اباوعله ساكته هستوه يضحك وشحلاته شبسرعه رجع الطبعه نتر
-سمعتييي؟
بقيت ساكته خزرني
-مو احاجيج؟
-تمام.
بقى يباوعله بغضب دار وجهه يريد يطلع گمت وراه وصل لباب الشارع ووكف دار علي واكفه بباب المطبخ اباوعله زفر نفس واجه يمي جرني عليه باسني من راسي ووخر يباوع لوجهي
- روحـــي نامي.
ماحاجيته بقيت ساكته طلع سد الباب وراه قفلت الباب وصعدت الغرفتي جريت التلفون كتبتله
-لا تجي ما ارجع، وهذا اسلوبك حاول تبطله من ردتني صرت شحلاتك ومن خلصت من عندي بقيت تنتر.
وديتله الرساله على الرصيد ثواني واتصل ماجاوبت رجع اتصل رفضته دزلي رسالة
-بت النعال ردي لا اشعل اهل اهلج.
اتصل مارديت دزلي رسالة
-خرب روح امج بت الحيوانه ردي لا اجيج ومحمد اگطعج.
بس اتصل فتحت خط اجاني صوته يصيح بحرگه
-حيوووانه مجدي عدج اناااا؟ ادبسزز ليش ماتعرفين تحجين للج.
-الف مره كتلك لا تغلط على امي؟
احجي ببرود بس هو نار متخبل نتر بصياح
-خرررررب روحج بتّ الحيوآن تحرگين روحـــي وصحتي لا تغلط، شتردين انتِ موووتيني شتررردين؟
-ما اريد هذا اسلوبك وصياحك.
ضحك ضحكه طويله كلها غضب وكل حجيه بنتر
-انتِ كلي ما ترديني تردين تشكليني على كيفج مثل خيالج، موووو؟
-هسه ليش تصيح؟
سد التلفون بوجهي عفته بحيره ما ادري الغلط منه لو مني.
"""
ريـــمه :: وكف طــروادة مستغرب مشه للباب وانه وراه واسمع صوت ســليم يصيح عليه
-خاب طــروادة.
فتحله الباب عباله صاير شي گاله
-سلامات؟
ســليم:: امشنا للكراج راح يوصل بريا وميثم مايرضى نروح بس انا ووهب يگول تجفصون گدامه.
يحجي وي طــروادة ولمحني واكفه وراه گاله
ســليم:: ليش مكعد اختي من الصباحيات.
دار عليَّ طــروادة مبتسم ورجع وكف بصفي مد أيده على جتفي باوعتله مرتبكه وهوه يباوع السليم بخباثة يگله
طــروادة:: شلك غرض مرتي وبكيفي.
مسح لحيته يباوعلي هز أيده
ســليم:: لا تحرك گـــلبي بريا صاحبي من ياخذ اختك اخليه يحرگ گلبك.
وطرواده بساع عافني وركض وره ســليم وهذاك مشه البيتنا يركض واسمع وهـــب يصيح عليهم
-هاااه هاااه.
سديت باب الحوش وهمه اخذوه وراحوا يتلگون بريا.
مــاسه:: من يوم الاجت امه هو الليل ما ينامه وكل يوم يتعارك وياها هي تريد تروح ماتقبل تنتظر بريا وهو روحه تحترك حرك من القهر، وحتى وجود اخته كارهه وما متقبلها حيره تاخذه وحيره تجيبه ساعة يگول اردها وياها ساعه يگول تضل، مكسور من أهّله حييل.
متمدده بفراشي واعاينله صله صلاة آلصبح وضل على السجاده يعاين للتربة ساكت، كام لف السجادة وكعد على طرف الچرباية. وكل ساع يخابر الولد يسألهم وين وصلوا لو يخابر بريا، سدّ التلفون وتمدد بصفي مقهور
-مــيثم.
مسح وجهه ودار علي مختنك
-ها حبيبي.
مديت ايدي على لحيته احير شلون اوسيه
-لا تنقهر فـــدوه راح يصير بيك شي صارلك شكد ما نايم.
دار يعاينلي مقهور ومتحسف
-نار تاكل بگلبي مــاسه والله وغلات بريا عدي وعيونج لو جايين بتوابيت أثنينهم امي وابوي اسهل عدي من غدرتهم.
-هسه يجي بريا يشوفها وتروح وجنها ما اجت انساهم.
زفر نفس متحسر ومد ايده على گلبه
-شنسى اريدن اموت.
-اسم الله، يمه لا تحجي هيج تموتني وعلي.
جرني الصدره يتحسر بقهر يحجيلي
مــيثم:: محد عاش الوجع العشناه انا وبريا، جانت عمتي رباب تگله كلي يمه انا امك ما يرضى يگلها امي ترد.
جنه لو عاندنه جدي ومارضينه نروح للمرعى نسرح يجرم بينا يكتلنه ويحبسنه بالبيت، عمي شامل الوحيد جان يدافعلنه ويتعارك وي جدي علمودنا، ومن جدي يريد يبطلنه عمي شامل مايرضى اذكر هوه جان ياخذني بأيده لأمتحانات اخر السنة من جنت اطلع دور ثاني لان جدي وي الامتحانات يوديني للسروح.
زفر نفس بغصه بلعومه محتقن اختنگت وي خنگته
-كمت ما اكسر حچاية جدي وامشي على مايه حتى لا يعاقبنه لو يطك بريا.
بعدها الايام السود مروسومه بعيوني
يجي الليل وانا وبريا كاعدين بالحوش الكهرباء طافية وكت عشه واحنا بيتنا مابيه حتى خبزة، جانت امج دوم متعاركه وياهم ويودونها الاهلها، ومرت شاكر ما توديلنه، وعمي شامل ممنوع من عدنا جدي ما يرضى يتدخل بينا.
يتاني لمن يجلجل الليل والوادم تطب لبيوتها يجينا من وره السياج يصيحلنا تعالوا عمي تعالوا مشونا نتعشا، وياخذنا وياه لبيتهم عمتي رباب تعشينا وتحطلنه اكل بجدوره نجيبه ويانه، مــاسه والله العشناه مررر ماينجرع من وراهم.
دموعي جرت وي سوالفه مديت ايدي اتلمس وجهه جراها ما مخليني وخرني من صدره وطلع من الغرفة شويه وگمت وراه شفته كاعد بالحديقة يدخن كعدت بصفه اثنينا ساكتين طفه الجكارة وحط ايده على جتفي يحضني ويمسح على زندي التفتنا اثنينا على فتحة باب الهول جر ايده ووكف مبتعد من شاف امه لابسه صايتها وجنطتها بأيدها كالتله
روزا:: توصلني او روح لحالي.
مسح وجهه بنفاذ صبر گوه على روحه يحاجيها
مــيثم:: راحوا يجيبون بريا خل يوصل ويشوفج وراها روحـــي وجعلج لا رديتي.
وكفت بينهم ما متعوده على عصبية مــيثم كمت اخاف من اشوفه اعصاب احسه راح يطكها، وهيه تعاينله بخزر ماراضيه نزلت البايتين ومشت تريد تطلع من الحوش جرها حيل وصيح بوجها
-وووووووين.
هزها من زنودها بقوة طاحت جنطتها من أيدها وصرخت موجوعة كضيت بأيده
-ميثمممم هدها مــيثم .
دفعها من ايده روحه شايطه افتر بغضب يصيح
-لج كتلج بس خل يجي بس خل يجي.
اندك باب الحوش دنكت شلت جنطتها وطببتها للهول البنيه كاعده تعاين من باب الغرفة بخوف، وامها أديها على زنودها مصدومة بميثم، مشيت بساع يم الشباج اعاين جدي وجده، جدي يگله خل تاخذ بتها وترد منين ما اجت، وهوه مدنك ساكت ، تدنى يمه جدي حط ايده على جتفه يگله
شعلان:: خلها ترد منين ما اجت تراها جذب مو بت خليل ولو هالبت ضلت يمكم باجر عگبه مثل امها تشرد وتنزل روسنه اكضها واذبحها جدام عيونكم.
مــيثم:: بته جدي بت ابنك شتريد أراويك الصور؟ بت ابنك يابه بت ابنككك.
واشيه:: صيحلها خلني اشوفنها ما اريدن اطب واشوفن هذيج النكسه الچلبه اخذته وكتلته غاد بالغرفه
طكت على رجليها تصيح
-يا خليل يا يمه
وميثم يعاينلها على اعصابة مشه من يمهم فتح باب الهول عاين الاخته وامه ورد عاينيلي
-مــاسه لبسيها شي مستور وجيبيها .
حجاها وطلع يمهم وهي تعاينلي ساكته مشيت يمها احاجيها
-جده تريد تشوفج
باوعت للبسها گالت
- لحظة بغير تيابي وبجي.
هزيت راسي اي وهيه تمسح بعيونها طلعت من يمها وكفت بباب الغرفة متانيتها شويه وطلعت لابسه بنطرون وقميص وخلت شال على راسها شمرت اطرافه من الجهتين سكتت مشيت وياها طلعنه للحوش وجده بس شافتها شهكت وشبگتها تبوس براسها والبنيه ماتنطي اي رد فعل حتى ما تشبگها وجده تبوس بيها وتردد
-يمه يا ريحته يمه يا خليل يمه ياعزيزي، بنية خليل يمه.
وجدي يعاينلها بغضب وخرت البنيه من حضن جده وكفت بصف مــيثم ايدها على زندها مرتبكه وهمه وي مــيثم جده تريدها تضل وجدي متاني حجاية مــيثم دار على ماريا گالها
-كونج مثل امج ولج؟
وهيه تعاين الجدي ساكته شال سبحته ومد ايده باتجاها خازرها وينتر بوجها شلون ماترد عليه وميثم بساع حط أيده ودفعها وره ظهره صار بينّها وبينهم
مــيثم :: مو مثل احد واذا بيها طبع غلط ومايوالم مچانه وعيشتنا انا مسؤول عنها وانا الاغيرة.
وجدي يعاينله بغضب گاله
شعلان::ناوي تخليها تضل هناه؟
-اي.
شعلان::هاي هيه تضل بس من هاليوم تغير اسمها ولبسها وحجيها ولو سمعتها تحجي بغير حجي اكصن لسانهاا.
ومد روحه يعاين لماريا وهيه مچلبه بظهر مــيثم گالها بخزر
شعلان:: من هاليوم اسمها ليلى والاسمعنه يصيحلها بغير هالاسم والله وروح العزاز كص اكصن لسانه.
عاين الميثم وهوه واكف ببرود گدام جدي
شعلان::علموها حتى تضلّ بالقريه والصفيره خل تطلع يللله لا اطردكم أنتم وياهاا.
كضته جده من ايده تحاجيه
-امشنا هل راح يرد بريا تشوفه وتولي مناه.
عاينت الماريا گالتلها
-جده ليلى ترحين ويانا؟
وهيه مجلبه بظهر مــيثم وحجت بصوت يرجف
ماريا:: أسمي ماريا.
وفزينه انه وياها من صوت جدي بس مــيثم ثابت گدامه.
شال أيده يهز السبحة بيها ويصيح
شعلان:: اسمج ليلى !
انا ما امشي بحجي وحده ماينعرف منين اصلها وفصلها تسمي بزرنه ونمشي على مايهاااا؟ اسمج ليليى عاجبج لو لاا عاجبج لو تردين ويَ امج .
وخرها مــيثم من ظهره حط ايده بظهرها مشاها لباب الهول وحجه بهدوء
مــيثم:: روحـــي جوه.... ليلى.
مسحت عيوني وهيه تعاين لوجهه مصدومة واديها يرجفن هزت راسها لا وجدي صاح
-اخذهااا اخذهاا واطلع من القرية.
مــيثم:: طبي للبيت گتلج.
رجعت هزت راسها لا تبجي نتر بوجها
مــيثم::ليلى..
شهكت وطبت للبيت تركض صارت أمها بوجها حجت وياها بصياح بالروسي وجدي بس سمع صوتها صاح عليها
-اطب اذبحج؟؟؟
مــيثم::رد البيتك يله هاي هيه مشيت حجايتك وخليتها تمشي بأوامراك حالها حال كل احفادك اكتفيت هسه مو؟ يله رد البيتك.
شال ايده يريد يطك مــيثم وكضته جده جرته گالتله
-هيه شنيه؟ بسك عوفهم امشنا!
طلعوا من الحوش وميثم كعد على حيله حاط اديه فوگ راسه، اريد اروح يمه واريد اروح يم ماريا متت من القهر، مشيتلها لغرفة بريا قافله الباب بس اسمع صوت بچيها، وامها ضلت كاعده على القنفه وتعاين للساعة بملل ما مهتمه الشي كل همها تطلع مناه.
وكفت تلف بالشال على راسها تفتر بالهول وكل شويه تراسل خفت منها حسيتها بلغت احد يجي ياخذها خفت حييل خفت تروح گبل لا يوصل بريا.
مشيت اعاين الميثم اريد اكله اظن راسلت واحد يجي ياخذها وسكتت من شفته يرجف كام للحوض غسل اديه ووجهه طلعت للحوش وسمعنه صوت الولد جايبين بريا رديت طبيت للهول بساع كتلها
-اجه بريا
روزا:: اخيراً.
حجتها وضلت واكفه يم الحايط، عاينت من الجامه بس فتحوا باب الحوش وطب بريا وجهه تعبان لابس بنطرون عسكري وتشيرت زيتوني خايف ومن صار مــيثم بوجه صفن يعاين لرجلين مــيثم دار للولد وبساع عاين لطرواده وكضه من ايده رجف كله گاله بصوت متروس خوف
بريا:: مــيثم مابيه شي جا رنـــه البيها شي.
طــروادة:: انچببب.
جره مــيثم من أيده شبگه وهوه خايف شابگ ميثم وكوه يحجي
بريا:: بيها شي رنـــه؟ جذبتوا عليَّ علمودها حاجيني؟
وطرواده من يمه ينتر
طــروادة:: لا تضل تاكل تبن لا اجنزك.
كضاه مــيثم من اديه كعده بصفه يم الحديقة والولد واكفين گدامه بالحوش وطبوا وراهم صــيهد وسلطان، وبريا يعاين بخوف يريدهم بس يحجون وكل شويه وگالهم
بريا:: شنيي؟ احجوا يله، طــروادة عليك الحسين احجي انتَ خاف زوجتوا رنـــه ؟؟
وطرواده ضل يفور يهد ويكضونه كاله مــيثم
مــيثم:: ماصاير شي انا كلشي مابيه ولا اخت طــروادة بيها شي ولا زوجها.
وطرواده فتح عينه بغضب كضه سلطان وهوه ماد ايده من فوگ سلطان ويصيح
طــروادة:: يييله شني بالحسين ارگع راس براس.
دار وجهه يريد يطلع من البيت وكامله مــيثم بساع كضه يتعذر منه وبريا ضال على كعدته كلشي ما فاهم رد مــيثم كعد بصفه يعاين للولد محتار شلون يگله حط ايده فوگ ايد بريا گاله
-بعدك تتمنى تشوف امنا؟
صفن بوجهه مــيثم بدون مايرمش التفت عاين للولد ورد عاين لوجهه مــيثم هز راسه لا وميثم دنك گاله
مــيثم:: اجت.
-لا تجذذب.
صوته رجف وكف مايدري بروحه شيسوي وكف وياه مــيثم گاله
-طب شوفها.
وبريا روحه رايحه اديه يرجفن ويعاين بصدمة بساع طفر البايتين وفتح باب الهول صارت گباله فاتح عينه على وسعها كاض يدة الباب يريد يطيح شهگ من نص گلبه
-يييمه.
طاحن دموعه اعاين لرجليه حسيته مشي بعد ماعرف يمشي مدري شلون وصلها شبگها بكل حيله يبجي بصوت عالي ضام وجهه بشيلتها وهيه مبتسمه تطبطب على ظهره، رجليَّه ماشالنه ماكدر يضل واكف على حيله وهوه شابگها كعدوا بالگاع، يابه البجي البجاه گـــلبي فجعه يبوس بوجها وبأديها يعاين لوجها ويرد يشبگها يبجي ويحاجيها بصوت مخنوك
-بطيتي يمه بطيتي هديتي حييلي.
وهيه تمسح على ظهره وتگله
-حبيبي ماما.. بكفي بكا كسرتلي قلبي.
طب مــيثم والولد ضلوا واكفين بالحوش خايفين من ردة فعل بريا، كعد مــيثم يمه جراه منها وبريا مايهدها كاض اديها اثنينهن يبوسهن ودموعه تطيح عليهن جره مــيثم حييل خلاه ينتبهله مسح دموعه وگاله
مــيثم:: ما تستاهل تبجي عليها.
مد ايده على حلگ مــيثم يسكته ورد جر امه الصدره شابگها ويحجي يرجف
بريا:: لا تحجي بعد لا تحجي ردت ردت يمنه فـــدوه الها كل الراح اسكت.
ودار وجهه الامه وهوه شابگها باس راسها ودنك يشمها من رگبتها ويشبگ بيها حيل وميثم حط أيده على عيونه محتار درت لباب غرفة بريا من فتحته ماريا عيونها مورمه من البجي تعاين عليهم ظهر بريا عليها مايشوفها، مايشوف احد غير امه، الحد ما هيه مسحت على ظهره وكالتله
-ماما بريا خلص انت شفتني وليك انا شفتك وكحلت عيوني صار لازم اروح.
وخر مستغرب يعاين لوجها وميثم ضحك وجر بريا من ايده حييل وبريا مايعاينلنه يعاين الامه كضه مــيثم من وجهه وداره على ماريا
مــيثم:: عاااين.
عاين بريا للبنيه مافاهم شي گاله مــيثم
-هاي اختك.
دفع ايد مــيثم من وجهه ورد يعاين لوجهه امه گاله مــيثم
- اسمعني بريا، ست روزا هيه وخليل اتفقوا هوه على اساس مختفي وهيه لحكته حتى يعيشون بالخارج مايتحملون مسؤوليتنا، عاشوا بالبنان وخلفوا هاي البنيه خليل ميت صارله خمس سنوات وهيه هسه يله اجت مو علمودنا بس علمود تذب بتها يمنه وتروح.
وبريا ما مستوعب ولا يعاين لشي غير وجهه امه وهيه مدنكه وتمسح على ايده كض بأيدها جذب مــيثم بس يريد يصدكها حاجاها وصوته من الرجفه منتهي بلعومه محتقن كوه يحجي
بريا:: جذب مو؟ يمه جذب.
عاينت لوجهه ومدت ايدها الخده كالتله
-كنا مجبورين ماقدرنا نتحمل العيش بالقرية.
صفن بوجها فاتح عينه على وسعها وهيه دارت عينها الميثم ما مهتمه لبريا گالتله
روزا:: يله وصلني.
وكف بريا متسودن افتر بالهول يمسح برگبته ويتنفس بقوة فزيت مبتعده من بأثنين ادية طك التلفزون صيح اول مره بعمري اسمعه يفشر بهيج حچايات مــيثم يريد يكضه ماكدرله تسودن يغلط ويسب ويكسر جامة الهول طكها أعاين الدم ترس الكاع وما ادري من مــيثم لو من بريا روحه فرفحت بمدافعهم دفعوني جرتني ماريا يمها تبجي وانه الوجع اللبطني موتني اعاينلهم وابجي على حالهم شسوت بيهم حركتهم حرك موتتهم .
طب صــيهد وي مــيثم جر بريا حيل يحاجيه وهوه مايشوف گدامه يتراجف ويصيح
-هدووووني هدوني وووولج كضيت عمــري ابجي على فراگج، المن اجييييتي المن لفيتي، اطلعييي اطلعييي بره.
من بين مــيثم وصيهد ما گدروله جرها من هدومها وهمه كاضينه يصيحون عليه يردونمه بس يهدها دفعها للحوش ورد طب للبيت يركض جلبت بأيد ماريا وهيه صرخت متسودنه جرها حيل كضه مــيثم يصيح بوجهه ويريد يفلتها من ايده
-هدهااااا مالها غرض هيه عوووفها.
شهكت ايدي على حلكي من طك مــيثم بوكسي على وجهه وجر ماريا دفعها للحوش على امها والولد كلّهم بالحوش مــيثم جر العباية وطلع بساع غطه ماريا، وطرواده وصيهد كضوا بريا مايحاجونه بتفاهم هوه فاقد وهمه يطكونه متسودنين شلون يصيح
-تاااخذ بتها وتررروح تاخذ بتهاا وتروح.
مــيثم لف ماريا بالعبايه وكاضها من زنودها يريد يطببها للبيت وبريا جر روحه من ايد صــيهد وطرواده وكف بوجهه مــيثم يصيح
بريا:: والله ماتضل خل تااااخذها وتروووح خل تاخذهاااا وتروح.
جره طــروادة زانگه من صدّر التشيرت وميثم دار على ســليم گاله
-اخذها انت ووهب ذبوها بالكراج وتعالوا.
حجاها ودفع ماريا يمي للهول ورد طلع البريا المتسودن، وسليم ووهب اخذوا روزا وطلعوا وماريا انتهت بأيدي تبجي وتعاين من باب الهول بس انسد باب الحوش وره امها صرخت تبجي دفعتني وكامت ركضت بلّا عباية ميثم ملتهي ببريا ما لحك يكضها وهيه بوجها طلعت بره الحوش تركض وميثم بساع ركض وراها اسمع صريخها وابجي گـــلبي متگطع عليها.
جابها مــيثم تدك روحها بالگاع تبجي بحرگه وخووف دفعها للهول وصاح بوجها
-كااااافي.
طاحت على اركبها تصرخ شبگتها ابجي وياها وهوه سد باب الهول وصوت بريا بعده عالي والولد يتعاركون وياه يردونه بس يهدئ ماكو
كومت ماريا غسلتلها انتهت من البجي، طبت الغرفة بريا وسدت. الباب، بريا طاح بأديهم ما مغمي عليه بس كوه فاتح عينه وكوه يتنفس، غسلوله الولد يحاجونه
طــروادة:: هالحرگت گلب عليمن؟ ردت منين ما اجت واختكم يمكم شبيك بعد؟
كعد على حيله مدنك واديه على راسه يحجي كوه يجر النفس
بريا:: ما اريدنها، ما اريدنها ما تضل.. ما تضل هناه
طــروادة:: لا تضل تمسلت بريا، اخت هااي اخت نعمه الله ينعّم بيها علينا شلون ما تريدها؟؟
صــيهد:: بطل هالمسلته البت ياهو الها غيّر آخوها،خايس شلون تدفعها بدون حجاب بنصنا احطلك گرن بنص كصتك على هاي سوايتك يا اغبر يا ناقص غيره.
حجه بهدوء النوب صار اعصاب جره طــروادة وأشر الميثم بدون ماينتبه صــيهد گاله راح اخذه واروح وصيهد بعده مافايخ گلبه طــروادة يجر بيه وصله للباب وهوه بعده يعاين لبريا ويحجي بحرگه
-مابيك حظ لو بيك حظ جا ماطلعتها بنصنا هيج يا اغبر يا خايس.
جره طــروادة حيل طلعوا وسلطان حاجه مــيثم على صفحة وراح وره الولد ضلوا بس مــيثم وبريا بالحوش
كومه مــيثم اخذه للدوانيه ضليت وحدي كعدت على حيلي بباب المطبخ ايدي على بطني موجوعة ساعة مرت واجه مــيثم عاينلي وسأل بخوف
-بيج شي؟
-لا هيج من الخوف صار عدي مغص.
هز راسه خوش، طب الغرفة أمه اخذ بطانيه وراح للدوانيه غطه بريا واجه يمي سألته
-نام؟
كعد كبالي متحسر هز راسه اي
-البنيه وين؟
-بغرفة بريا تبجي.
مسح وجهه بحيره
-صدك راح تسميها ليلى؟
دنك هز راسه اي يحجي بقهر
-اذا عاندت شعلان بيها راح يحط دوبه من دوبها وكل يوم يسويله سالفه يقهرني بيها.
سكتت ودك تلفونه بس شافه جدي مسح وجهه واستغفر كبل لا يجاوبه
-الو.
حجاها وضل ساكت يسمع لمن جدي كضه حجيه گاله
-خوش.
سد التلفون ووگف
مــيثم:: انا راح اروحن للمعامل اجيب فلوس شعلان، مــاسه ديربالج على بريا.
وانه كاعده عاينت لوجهه
-واختك؟
سكت دار وجهه طب للغرفة بدل وطلع سويتلي ريوك وكعدت بالمطبخ كوه اكلت بطني حيل توجعني مدري من القهر مدري من دفعة بريا، شويه وگمت اشوفن ماريا فتحت الباب عليها نايمه على چرباية بريا غايصه بالفراش ومتغطيه، عفتها وطلعت مشيت للدوانيه شفت بريا كاعد لام رجليَّه الصدره وصافن، رديت للمطبخ سويتله ريوك ورحت يمه دكيت الباب وطبيت صينية الريوك بأيدي بس لمحني دار مسح وجهه ورد لم البطانية وخرها على صفحة حطيت الصينية گدامه وكعدت حجه بصوت مبحوح
-ليش تعبتي روحج خويه.
اخذ كلاص الچاي يشرب وانه احير بروحي شلون اكعد
-اكل مو بس چاي.
-ما اريدن.
-بريا وعلي ازعل عليك.
مد ايده للصينية آكل شويه ودفعها عليَّ، ضل يشرب بس چاي حسره تجيبه وحسره تاخذه
-بريا.
عاينلي وحط الكلاص بالصينية.
-اختك معليها هم مظلومة مثلك.
-اسكتي خويه اسكتي رحّمه الاهلج، اختي منين اجتني اختي، لا اختي ولا هم يحزنون واذا تضل بالبيت أنا اطلع
-والله العظيم اختك صورها وي ابوك شكدد جايبتهن وياها وهيه هم متعذبه والله.
عافني وكام اخذ الصينية وياه كمت وراه عافها بالمطبخ غسل ومشه يريد يطب الغرفته گتله
-ليلى هناه.
كاض يدة الباب وصفن بوجهي
-اسمها ماريا بس جدي سماها ليلى.
دار وجهه ومشه للدوانيه ما مهتم، وهيه للظهر وماكعدت كل ما افتح الباب الكاها نايمه.
""""
رنـــه :: من الصبح كعدتني ريـــمه صافنه بوجها وصافنه بوجهي النوب تريد تعوفني وتنام ماخليتها كاعده يمها على الچربايه مالتهم بس تغفه ادفرها توها غفت ومديت رجلي دفترها
-ريـــمه.
فزت كوه فاتحه عينها
-فـــدوه رنـــه بسّ أغفى شويه والله شويه.
-بس تنامين وتعوفيني تلكيني رايحه لبيت عمي خليل اكتل الروسيه ضلي كاعده حتى تكضيني.
رفعت حاجبها وغمزت
-تكتلين الروسيه لو تتانين بريا.
-نجبي ريـــمه لا تكضينهن عليَّ ترى انه ما احبنه.
حطّت ايدها جوه خدها تعاينلي مبتسمه
-هذا كله وماتحبينه؟
-اي بس ينكسر خاطري عليه لان يتيم وماعده أم واخت
-صارت عده اخت بعد ماينكسر خاطرج عليه.
سكتت تمددت اعاين للسگف وافكر بيه شويه ودرت الريمه نايمه جريت الغطا عليَّّ ونمت انه هم.
شويه وحسيت ايد تدغني ويهمس بصوت ناصي
طــروادة:: رنـــه، خاب رنـــه.
فتحت عيني بفزه وهوه عاين لريمه وحط ايده على حلكه جرني من ايدي
طــروادة:: امشي لفراشج اريدن انام.
نزلت من الچرباية احجي
-جبتوا بريا؟
خزرني تمدد بمچانه يحجي بهمس
-امشي شوفي حسين وزهره سويلهم ريوك.
درت وجهي وعثرت بالمده طكيت بالميز وريمه بساع فزت وطرواده ودّه يسبني وهيه بس لمحته متمدد على الچرباية يمها نزلت بساع طلعت وعفتهم حسين وزهره كاعدين يصفنون، طلعت وراي ريـــمه، تريكنا وخابرت مــاسه سولفتلي، طــروادة شويه وكعد راح للگيعان والعصر مشه وي الولد للموكب، ضليت كاعده بالحوش ساعات احجي وي ريـــمه ساعات استغرب حالها فجأة الكاها صافنه ومن احاجيها تفز، لو الكاها كاعده بغرفتها فاتحه الشباج ومطفيه الاضويه لامه رجليها الصدرها وكاضه راسها بأديها، اخافن من منظرها اطلع بساع وأسد الباب لمن يجي طــروادة يله هيه تطلع تشتغل ساكته، وفجأة تصير طبيعيه نفسها ريمتنا تسولف وتضحك وتتعاند وياي.
بالليل الساعة بالتسعه طــروادة بعده ماراد من الموكب وماسه ودتلي رساله كاتبه
-بريا يمكم؟
-لا ليش.
-بله شوفيه كالي مختنك رايح يم بيت عمي شامل.
عفت التلفون وطلعت اركض صعدت على الدرام عاينت بصف الحايط مال الحوش مالكيته مشيت للباب الگبال بيت عمي شاكر فتحته واعاين مناه ومناه هم مالكيته.
ركضت للباب الثاني بس فتحته شفته گاعد بصف الباب منتجي على الحايط ويعاين لبعيد وحتى من فتحت الباب ما انتبهلي.
-بريا.
دار وجهه عليَّ فاز مسح وجهه كعدت بالگاع گباله انه ببطن الحوش وهوه بره الحوش
-ليش كاعد هناه.
عاين لوجهي ضوه الحوش علينه اثنينا، عيونه كوه فاتحهن وحسرته توجع الگلب حجه صوته مبحوح
بريا:: تعبان ما ادري وين اروحن.
اعاين لوجهه وعيونه الذبلانه
-اسم الله عليك.
دار وجهه يعاين للــبستان هوه عالي والصوت من يهز النخل تهتز هي وجذعها عبالك تريد تطيح تخوف، وهو ضل ساكت فترة وانه اعاينله بحيره ما ادري شحجي وياه.
-بريا
التفتلي مسحت وجهي اعاين لعيونه
-انا يمك.
ابتسم صافن بوجهي تحسر ودنك يحاجيني صوته مختنك
بريا:: صارلي اسنين اتأملها ترد رنـــه، اجذب على روحـــي وعلى الوادم من اگولن قصص وروايات عراقية كرار صلاح ما اريدنها بس والله جنت متاني البوم الترد بيه للقرية، انا لليوم ما انامن ليلة اذا ماعدت بذاكرتي اللحظة النمت بحضنها اخر مره كل يوم اذكرها واعيد حجيها بعقلي حتى ما انسى، يا ريتها ما ردت ياريت ضليت عمــري كله ماشايفها.
جر نفس مختنك مسح رگبته ودار وجهه يكح
-ختولي بريا همزين شفتها حتى بعد ما تضل متانيها وتتمنى ترجع.
ضحك مستهزئ
بريا:: ذبت بتها علينه وراحت.
-اريدن اغلط عليها بس خاف انتَ ما ترضى.
سكت وانه ما ادري شلون احاجيه واخليه ماينقهر اجت ببالي اخته كتله
-بجت وره امها؟
ما رد عليَّ ضل مدنك.
-بريا.
دار وجهه عليَّ مختنك كوه يحجي
-اريد اطبن للدوانيه انامن رنـــه ما اريدن اضل غاد بالبيت.
سكتت مرتبكه غير يموتني طــروادة إذا درى انه مطببته للبيت
-أخابر طرواده اكله واجيك.
-لا اوكفي.
عفته وطبيت للبيت اركض جريت تلفوني وخابرته شلع گـــلبي يله رد صوت دمام وصوت رادود وهوسه كوه يسمعني
-بريا كاعد ببابنا اطببه للبيت؟
نتر
-لاااا.
-خطيه اسمعنه يبجي بباب الحوش اظن على امه.
-طبي جوووه هسه انا اجي.
سد التلفون بوجهي مشيتله بساع كتله
-خابرت طــروادة راح يجي يطببك للبيت لا تضوج.
ضل ساكت قهرني گد ما هوه مقهور، ضليت مكابلته وكاعده لمن شفت ضوه سيارة اجه للقرية سديت الباب وطبيت بساع كعدت بالهول يم حسين وزهره نعاين للتلفزون، شويه وسمعت طــروادة طبب بريا للدوانيه واجه للهول عاينلي مضيك عيونه درت وجهي منه مرتبكه گال
-سويله عشا.
هزيت راسي اي ومشيت للمطبخ بساع طلعت البتيته مال عشانه الزادت حميتها وكصمت نص خبزه سطرت البتيته بيهن وحطيت وياها خضره وخيار رشيت عليها ملح لفيتها وصبيت چاي بكلاص طلعت الطرواده واكف بالهول يحجي وي حسين لان زعلان منه شلون ما اخذه وياه للموكب.
مديتله اللفه وكلاص الچاي
-هاك.
عاينلي عاگد حاجبه
-شنهاي؟
عاينتله بخوف ابلعم حسيت روحـــي سمعت غلط وهوه ماگالي سوي عشه البريا ضليت كاضتهن واعاين لوجهه ساكته گال
-كتلج عشه رنـــه مسويتلي لفّه زحمه.
تنفست براحة عاينت للفة وكلاص الچاي احجي
-لا لا عادي هوه يحبها.
عاينت لوجهه خازرني جر اللفه من ايدي بنتر هيه وكلاص الچاي اطاهن لحسين كاله
-اكلهن.
ومشه الغرفته فتحها وگال الريمه
-ريـــمه تگدرين تسوين عشه البريا.
وخرت على صفحة اعاينله مقهوره وطلعت ريـــمه من الغرفة عيونها حمر طبت للمطبخ وهوه ضل واكف داير عيونه من عدي عفتهم ومشيت للغرفة تمددت بفراشي تغطيت بس ردت اكض دموعي غلطت على روحـــي صايره على كلشي تبجين من امدااج.
شويه وغفيت حتى حسين وزهره ما ادري بيهم للصبح نريد نروح للمدرسة طــروادة نايم بالهول وريمه تسوي ريوك سألتها
-بريا بعده هنا؟
-لا رايح بس عبود وسجاد بالدوانيه.
هزيت راسي خوش كتلها
-كعدي طــروادة جا حتى يروح للكليه.
طفت الطباخ ودارت علي
-گبل لا ينام كال ما يداوم اليوم ايريد يكمل كراب الگيعان
هزيت راسي خوش، حسين كعد عبود تريكنا بدون صوت بالهول وهوه لافه روحه بالچرچف ستمية لفه ودانه عبود لمدارسنا وبس صارت فرصة رحت لصف السادس متانيه مــاسه لمن طلعت كضيتها صايره كوه تتحرك من بطنها
اشترينا وكعدنه بالممرات نسولف گالت
-قهروني اثنينهم بريا وميثم مايردونها وهيه بس حابسه روحها بالغرفة بالتواسيل يله تاكل شويه.
-والله العظيم الا اطيح حظ بريا شعليها البنيه.
-ما ادري رنـــه ما اگدر الومنهم هم حقهم بيوم وليله أجتهم اخت وتعالوا تقلبوها وهيه جانت عايشه بغير بلد وغير اطباع وغير لهجة ولج تحجي لبناني تخبل عبالك بلبل ويغرد.
-شمالج جيبيها وتعالي يمنه خل اشوفنها.
-خاب هيه من الغرفة ماتطلع كاضيها منعزله وتبجي، وهم السالفة بعدها تخوف هسه من ردت اجي للمدرسة مــيثم قفل عليها باب الهول خاف جدي لو جده يرحولها.
سكتت محتاره بالحله ما اجوني الولد رجعت وي مــاسه ومرينا المدرسة بــدور اخذناها ورحنا لحسين وزهره السايق مارضى ضل يحجي متت من القهر تمنيت ضاله مكابله المدرسه وما راجعه وياهم.
طبينا للبيت الجدوره على الطباخ مطفايه والبيت نظيف بس مشمش يفتر بيه ونت شافني اجاني يركض يفتر داير مدايري ويحك راسه برجلي شلته امسح على راسه ومشيت ادور ريـــمه افتريت البيت كله مالكيتها عرفتها ببيت اهلها، بس عبود لكيته نايم بالدوانيه كعدته اتعارك وياه لان ما اجانه
-خاب والله موقت التلفون ومادك.
-خوش خوش.
طلعت من يمه ضايجة بس صلينه صبيت الغده طــروادة بالگيعان عبود وره الغده أخذله غداه
للعصر وريمه ما اجت تعلمت عليها گمت اضوجن من أضلّ وحدي.
طلعت للحوش فتحت البيبان لحيواناتي طلعن يفترن والبطوط يرفرفن بجناحاتهن حطيتهلن الطشت الچبير وترسته ماي، كعدت على البلوكه اعاينلهن وهنه يفترن بالحوش الصخله صايره جنها مسودنه ضوجتني على ساعة تطلكها واحد وتموته اجت يمي طكيتها راشدي
-ارگددي.
دارت وجها ومشت من عدي تزاكط جنها هايشه، كمت لميت السعف الطايح امس من الهوه جبته يم حطب التنور والتفتت على صوته
-رنـــه .
مشيت بساع بصف السياج خشّنت صوتي
-تفضل، انه مو رنـــه انه ريـــمه.
-اصعدي رنـــه خلّ احاجيج.
جريت الدرام صعدت عليه ومديت راسي من السياج اعاينله لابس دشداشة سوده وبأيده سبحة زرگه يعاينلي ومضيك عيونه من صدت الشمس
-شلونج.
-زينه انت شلونك بعدك ضايج؟
تحسر هز راسه لا
-اختك شلونها؟
دار وجّهه ضايج ويحجي بنتر
-مو اختي!
-خاب اكلك لا تصير مدري شلونك، اذا ماكو جيبوها النه طــروادة يصير اخوها والحسين احسن منكم شمالكم وياها يكووون صخونه.
احجي وماده ايدي محترك گـــلبي منهم دار عليَّ خازرني
-عليمن الصخونه؟
-انتَ وأخوك شمالكم وياها خطيه والله.
ضل خازرني وأشر برگبته
-انزلي انززلي انا هم چلب ابن چلب واجيج.
نزلت من الدرام محترك گـــلبي اصعدله ويطردني من امداني اي والله وكف بصف السياج
-خاب اسمع بريا، يكون تصير عزيز مصر ما اخذك
-سدي حلگج اخذج غصباً ماعليج.
-يااا ياااا فـــدوه ال الله ياهي التاخذها غصباً ماعليها خاب انه غير رنـــه وحگ الحسين افشخك واخلي دمك بطولك.
نتر يصيح
-يلللله اسكتي.
-امشي منااااه يله امشي.
-ما امشي گــيعان جدي وبكيفي
-هسه صار جدددك؟ حفيد شعلان.
افتر يم السياج احجي بحرگه وهوه كام يحجي ببرود يقهر بيه
بريا:: وانتِ حفيدتمن؟ النوب حتى بالشكل تشبهين واشيه وشعلان.
غميت كصتي حيل انه اشبه واشيه؟ افتر بحرگه مقهوره واروحن الهاسكي فتحت السلسله منه وجريته للباب طلعته اهمسله همس
-شووه شووه.
وبريا بعده يحجي ركضت صعدت على الدرام عاينلي مبتسم وفز على نبحة هاسكي. بس شافه شال دشداشته وركض بكل حيله وهاسكي وراه، صعد على النخله وهاسكي ينبح عليه كعد جوه النخله عاينتله اضــحك
-بيك خير انزل.
-اكضج بت رباب.
-تعاال كضني فنك.
احترك گلبه وصعد لنهاية النخله كعد على السعف مكابلني بعد حتى لو انزل ببطن الحوش يشوفني يعاين مناه ومناه يله يحجي
-الخايسه.
-الوصخ.
-اكضج.
-فنكك تعال لو بيك خير.
هز راسه متحلف ضل يشلع السعف اليابس ويشمره على هاسكي
-صيحيله لا اموتنج.
ضحكت احرك بگلبه عفته على النخله ونزلت. طببت حيواناتي لبيوتهن وطبيت للبيت وهوه ضل معلك على النخله
شويه واجوا عبود وطرواده طلعت للحوش طببوا هاسكي ونزل بريا، عاينت لطرواده صاير املح من تراب الگيعان حتى رموشه متروسات تراب گالي
-جيبيلي هدوم خل اسبح ما اريد اطبن للبيت.
جبتله هدومه سبح وطلع ينشف بشعره عاينلي وعاين لحسين وزهره مطشرين كتبهم بالهول گال
-ريـــمه وين؟
رفعت اجتافي ما ادري
-اظن عد اهلها من اجينا مالكيناها.
عاينلي بفزة ذب الخاولي من ايده واجه يم تلفونه على الشحن خابر سلطان فاتح السماعة بس سلم عليه گاله
-وين انتَ سلطان؟
-وي ســليم بالمرعى نشوف الحلال.
-هاه اكلك اختك يمكم؟
-والله خويه ما ادري احنا من العشرة طالعين.
-هاه يله خوش اخذ راحتك.
سد التلفون وراح البيت عمي شاكر مديت راسي اعاينله دك الباب وطلعتله ميلاد مدري شحاجته اجه وجهه من الغضب ما يكصه السيف طب الحوشنه عاينلي
-البسي عباتج وتعاي.
-وين؟
مسح وجّهه بعصبيه
-مالج غرض رنـــه بساع.
طبيت جبت عبايتي وطلعت وياه نمشي لبيت عمي شاكر گال
-طبي شوفي ريـــمه وين غصباً على ميلاد خوش؟ وانه واكفلج بالباب.
هزيت راسي اي مرتبكه ، دفعت باب الحوش وطليت فروخ مرتضى يلعبون بالحوش مشيت للمطبخ فرح واكفه عاينتلي مستغربه
-خير؟
-شلج غرض شني جايه البيتج وخرري.
طبيت للمطبخ انتر بوجها اضوجن منها، صارت بوجهي ميلاد طالعه من غرفتها وبس شافتني شالت ايدها تصيح
-لفن لفننن مصايب شامل، خيررر يا طير شرايده.
حطيت ايدي على خصري
-والله رايده بتنا، ريـــمه وين؟
ضحكت ضحكه طويله وايدها تهتزّ بحرگه
ميلاد:: هلااا هلاا شوف ياهي الطلعلها صوووت النوب عليَّ الزعاطيط عليَّ بت رباااب.
ووي حجايتها طب سجاد للهول صاح عليها، مشيت بساع اركض على الدرج صعدت الغرفتهن فتحت الباب ريـــمه نايمه بفراشها وهاجر كاعده بصفها بأيدها قلم ودفتر رسم وبس شافتني شهكت فازه طبكت دفتر الرسم ووخرت السماعات من اذانها مشكلتهن على MP3 خلت دفتر الرسم وره المخده ضامته ووكفت درت عيني منها لريمه .
تدنيت يمها هزيتها من جتفها احاجيها
-ريـــمه، ريـــمه.
وماتفز گـــلبي راح درت الهاجر احاجيها
-شبيها؟؟؟
عاينت الريمه بخوف ماتدري شبيها رديت اهز ريـــمه حيل بس اريدنها تكعد طكيتها على خدها واحرك وجها بين ايديي
-رررريمه.
شهكت وفزت مخروعه ومجلبه بأيدي فاتحه عينها حيل عيونها حمر وتجر نفس عبالك واحد غركان وجروه من وسط الماي تتنفس بقوة وكاضه ايدي حييل تعاينلي ونظرتها تارسها الخوف دارت تتلفت عل حايطين الغرفة
-ريـــمه.
كعدت على حيلها تشهك وتمسح برگبتها مديت ايدي امسح وجها خايفه
-شبيج ريـــمه؟
بلتت شفايفها اليابسات وغمضت عيونها ايدها على صدرها تريد نفسها يستقر حجت بصوت مخنوك
ريـــمه::حلمت غرگت وعمه رباب جرتني.
عاينت لوجها ساكته كومتها من أيدها
-گومي طــروادة سوه فلك.
وكفت وياي لفت شالها ولبست عبايتها تسأل مرتبكه
-شبيه؟
-من مالكاج احترك گلبه.
باست هاجر ونزلنه سوه ميلاد واكفه يم غرفتها تعاين علينه بغضب وسجاد كاعدلها بالهول جريت ريـــمه من ايدها حتى ماخليتها تسلم على امها طلعنه لطرواده واكفلنه بباب الحوش.
ريـــمه:: عاينتله وهوه مايحط عينه بعيني مشيت وي رنـــه گدامه طبينا للبيت، مشيت للغرفة امسح بوجهي احس بعدني مختنگه ضميت عبايتي بالكنتور ودرت عليه من فتح الباب سده وسند ظهره عليه يعاينلي درت وجهي منه حجه بهدوء
-ليش رحتي ريـــمه؟
مشيت من يمه للشباج فتحتها منطيته ظهري گـــلبي يوجعني
-احاچيچ.
درت عليه تعبان كوه يعاينلي زفر نفس متحسر ومد ايده على شعره مشه اصابعه بين الخصل ورفعه من كصته، اجه يمشي ليمي بهدوء كعد على طرف الچرباية يعاينلي واكفه بصف الشباج، گدامه.
-ليش رحتي؟
دنكت ساكته احس روحـــي ماعدي اي جواب ليش رحت ليش ماكتلها لا ما اريدن أجي لبيتكم، ليش غصب عني ارضى بكلشي تريده وما اگللها لا.
درت عيوني منه للشباج منطيته ظهري كوه اجر النفس طفت الكهرباء درت عيوني عليه الضوه يطب للغرفة من الشباج والبرده تتحرك وي الهوه مضيك عيونه متاني جوابي رفعت اجتافي ودنكت عيني احجي واحس بصوتي يرجف
-ما ادري ليش رحت هيه كالتلي تعاي.
عاينتله مسح وجهه بأيده دنك ورد عاينلي نزلت عيني من عينه
-ليش ما كتيلها لا ما اجي رجلي مايرضى؟
عاينت لوجهه صافن بعيوني بلعت ريكي مرتبكه
-ما اگدر.
-ليش؟
-هيج ما ادري.
وكف واجه يمي سدّ الشباج وعدل البرده ضل ضوه الغرفه خفيف شلت راسي أعاين بوجهه مد أيده تلمس حنجي
-اخافن عليج منهم ريـــمه، كل ما ترحين يمهم ترديلي بلا روح.
نزلت ايده من وجهي رجعت ليوره طخ ظهري بالحايط
-مابيه.. مابيه شي ..كلشي ماصارلي لا تخاف اهلي مايسوولي شي.
-يسوون، حتى ذبحج سهل عدهم.
شلت راسي اعاينله محترك گلبه وكوه يحجي بهدوء تفاحة ادم تصعد وتنزل وعيونه ترمش بثگل
-وانتَ تشوف روحك احسن منهم؟
احجي واعاين لعيونه بلع ريگ يعاين لوجهي ساكت
-اذا تشوفهم اذيه الي انتَ ماتفرق عنهم بشيء لا تنسى شسويت بيه انه حافظة حجيك كله والشي الوحيد الخايفه عقلي يغدرني وانساه وارجع بيوم اشوفنك كهلان الصدگت حجيّة بيوم.
حط ايده على رگبته يمسحها ويدور عيونه من عدي مسح وجهه وعاينلي
-غلطت وتندمت واجيت اعتذرت.
-شسوالي اعتذارك؟نساني شعوري وانت تفرض روحك علي بدون ما تهتم التعبي ومرضي؟ نسيت شلون شمرتني على اخواتك وتصيح روحـــي الابوج؟ وتدري لو رايحه جدّي يذبحني.
دار وجهه مختنك
-كافي اسكتي.
-وخر عني كهلان عوفني بحاليّ ضاله هناه حتى ماتصير مشاكل بينك وبين اخواني وعسى ولعل عمي شامل وعمتي يسامحوني على السويته من چنت جاهل.
خنگتني الغصة درت وجهي منه ما اريدن دموعي تطبح گدامه مسحتهن ورديت اعاينله كعد على الچرباية منزل راسه بين أديه بقهر اختنكت احجي
-عبالك انه مرتاحه؟ يمر يومي بدون بچي انا لهالساعة حچاية ابوك ترن بأذني من اسأله ليش ماتحجي وليش خليت گراب الخنجر يضيع يگلي عزيز الجاس گلبي، يدري يدري بيه انه الماخذته وضل يگول عليَّ عزيزه وماخشن خاطري يوم بحجايه، ترى والله اموتن باليوم الف مررره.
شهكت ابجي روحـــي رايحه كعدت بالگاع لامه رجليَّ الصدري ابجي بحرگه، نزل من الچرباية كعد بصفي وجرني الصدره شابگني بأثنين أديه
-اشش ريـــمه يا روحـــي .
-تعبـــت والله وروح عمي شامل تعبـــت كل ما اغمض عيني اتمنى ما اكعد صرت احس روحـــي مسودنه ما مرتاحه مختنگه وحجي عمي يرنّ بأذني ، والله تعبـــت تعبـــت .
اضم وجهي بصدره حيل تعبانه وهوه لامني على گلبه يبوس راسي ويمسد على شعري
-فـــدوه اروحنلج كافي ريمي عاينيلي كافي.
شال راسي من صدره كاض وجهي بأثنين أديه يمسح دموعي
-انسيج العشتيه بسببي والله انسيج
هزيت راسي لا ابجي
-ما اريدن انسى .
جرني الصدره شابگني على گلبه محتار يبوس راسي متحسر ويمسح على ظهري فز وگام من سمع صوت عفراء مسحت عيوني بساع ودرت عليه
-لا تگلها لا تگلها چانت تبجي.
هز راسه خوش، طلعنه من الغرفة سوه توها طابه للبيت رنـــه شايله شمس تبوس بيها وتضحك، سلمنه عليها عاينت لوجهي وهيه تباوسني همست
-شبيج عليمن باجيه؟
وخرت ساكته طــروادة اخذ شمس باسها ويعاينلي ضل شويه يمنه وطلع وعفراء بس اجت غيرت جو البيت كله انترس ضحكه وشمس بتّها تخبل تبوسنه وتمشي تركض وحذائها ينوص وراها
سألتني شبيج ماحجيت شي ماكو شي ينحجي وهم لان حسيت روحـــي ما اريد ارجع ابجي وهيه من شافتني متونسه وياها واضحك مالحت.
سوينه عشه سوه الولد من الكيعان ويرحون للمجالس وجلبنالها انه ورنه نسولفلها على الروسية وبتها ورنه بساع صاحت
-والله اذا طلعتي تدرررين؟
عــفراء:: ياااا لا والله بس صفنت مكسور خاطري على ابوي جان شايل هم خليل وكل مايحجي يگول اظن انكتل مغدور وينقهر عليه حرامات.
ريـــمه:: همزين ما اجيتي ذيج الايام جانت صايره مذابح ننام على هوسه ونكعد على هوسه.
ضحكت كعدنا بالغرفة وفتحت جنطها جايبتلنه وياها هدوم المحرم اطت الرنه دشاديش واطتني اثنين وضلت بأيدها شي اسود ملفوف بأيدها فتحتها وفرشتها كدامي دشداشة نوم ستن ناعمه اسقيات على الكتف وچاكه بيها داينتيل الحد الركبه وصدرها دلع
رنـــه:: الله هاي مال متزوجات.
غمزتلها عفراء وشمرتها علي شلتها بسرعه شمرتها عليها رجعت شمرتها عليَّ
عــفراء:: كومي البسيهااا.
-امشيي.
-گوووومي.
-مااا.
-ريـــمه اعرينج والبسج كوه عليج كووومي.
غطيت وجهي بيها
-استحييي.
-نجبي خل نشوف.
رنـــه :: اي ريـــمه خل نشوف حتى اجيبلي وحده
درنه عليها انه وعفراء
عــفراء:: هااه المن؟ توج تگولين مال متزوجات.
وهيه تضحك طكتني عفراء وجرت دشداشتي وزهره تغطي عيونها تصيح
-عيب عيب.
جريت روحـــي من عفراء اضــحك
-هديني انه البس والله.
عــفراء:: بساع مستعجله اريدن اشوف شلون تطلع عليج.
اخذت الدشداشه وطبيت للغرفة لبستها ووگفت گبال المرايه اعدل بيها مخصرا على الجسم و رفعت الاسقيات مالتها حتى يتغطى صدري وافتريت اعاين الظهري نصه طالع فتحت شعري اضــحك غطيت بيه ظهري والنوب لميته على صفحة وحده فتحت الباب ردت اطلع وضحكت عفته ورديت مشيت للكنتور اطلع عبايتي البسها
هستوني اجرها وشهكت فازه وملتفته على صوته من گال
طــروادة:: اول مره اشوفن رصعات بالجتاف.
حطيت العبايه على صدري ايدي وزنودي كلهن طالعات ورجلي مبينات وهوه كاض الباب ويعاينلي ذبلان طب للغرفة وسد الباب وراه سند ظهره عليه ونزل عينه من فوك ليجوه مبتسم بمكر فتحت العبايه بساع لبستها ضحك طك قفل الباب واجه يمشي بخطوات هادئة بلعت ريكي وهزيت راسي
-هاا؟
وكف گدامي حط أيده على الكنتور بصف راسي عاينت لوجهه بدون اي ابتسامه اريده يخاف ويوخر وهوه كضته الضحكه مد ايده على ايدي الكاضه بيها العبايه يم صدري
-شني الجوه العبايه ريـــمه؟
-خالتك.
عاين لوجهي وضحك
-افتك من صــيهد تطلعيلي انتِ.
-وخر لا اصيح الاختك.
هز راسه لا ويبصبص على رگبتي عليت ايدي اسد العبايه زين
-خل اشوفن.
-والله ماتشوف.
عاين لوجهي وحجه بصوت ذبلان
- اجتافج بيهن رصعات اثنينهن كل ما تحركين ايدج يبين، اول مره اشوف رصعات بهالمچان.
حجه وقرب وجه لوجهي كوه يتنفس شال ايده يكض وجهي ويتلمس جوه شفتي توه يوصل وفز على دگت الباب وصوت شمس ترطن ماينفهم منها شي، وخر بساع وانه ابتعدت امسح بوجهي راح فتحلها الباب شالها وطلع سديت الباب وبدلت، طلعت العفراء وهوه شويه وراح لشغله.
""""
مــاسه:: تعبـــت من التوتر البالبيت ثلاثتهم يصفنون كلمن بهمه،
والبنيه ماتطلع من الغرفه حدها الحمام وترجع بساع تطب للغرفة حاجيتها گبل لا اطلع للمدرسة
ومشيت بحيرة صعدت بالسيارة وبدور مطنكره تحجي
-تأخررتي!
-بعد وكت شسالفة؟
دارت وجها ضايجة ومتوتره تعاين للساعة البأيدها كلساع وصلناها المدرستها خفت من شفتها تتلفت بس وصلني السايق المدرستي رديت بساع امشي المدرسة بــدور وايدي على بطني فرق مسافة قليلة بين مدرستي ومدرستها امشي وكلبي يدك بقوة
ماطبيت للمدرسة مشيت گبل للمحل المره كضيتها رايحتله وادعي كون ما الكاها، بعدني ما واصله واسمع ضحكها وي صاحباتها گـــلبي اوجعني طبيت وهيه تضحك بس لمحتني راحت ضحكتها جريتها من يم صاحباتها شمرت الغراض من ايدها وجريتها ارجف طلعتها من المحل تمشي بأيدي ساكته حتى ماتبرر وانه مدري شمالني من الكاها مسويه شي غلط دموعي تجري، نمشي بالشارع واسحل بيها من أيدها واحس سيارة مشت بصفته ودكت هورن
شلت راسي اعاينله وروحي راحت من نزل الجامه شفته ســليم ذب النظارات من عيونه خازرنه أشر برگبته اصعدن.
شكرا لزيارتكم عالم روايات سكيرهوم
