رواية بيوت الصفيح الفصل الخامس 5 بقلم زهراء السراي

.

.

سواد الليل يبقى 

وتطفى الألوان

وأعيد بذكرياتك والمشاهد

.

غِنى

_________________________

منتهى الضياع أن تعيش طول عمرك مهمش

بلا وجهة ولا طريق محدد

آني البنت الوسطى التعيسة

وسط هالعائلة

طفلة انولدت بمكان غير مكانهة

هذا احساسي من لحظات طفولتي المختصرة

اللي انتهت بعد وفاة أمي

وزواج ابويه من خالتي

بعمر السبع سنوات بديت اجمع

رصيدي من السخط والغضب تجاه وضعنا

عيشتنا

بيتنا

مجتمعنا

منطقتنا

سخط عظيم لكل ماحولي 

لكن سخطي الأعظم والأكبر هو

ابويه اللي عاش طول عمره مثل العلقةاللي تمتص دم وتعب غيره

وهذا اللي صار امتص آخر قطرات التعب

والحياة من فرقد

جانت الحياة ببيتنة تدور أشبه بحلقة مفرغة من العذابات

يشتغل فرقد يحصل فلوس

ابويه ياخذ نصهن النص الثاني نحاول

نعيش بي بتقتير وقلة حيلة ومعظم اكلنة معتمد

عالحصة التموينية بسبب ابويه

فرقد من جان يجيب فد شي النا

يعبره من الشباك من جهة الجدول

ووره مينام ابويه يطلع جزء منه لخالتي

والجزء الآخر ناكله احنه

طول العطلة نجمع ربع ربع وهذا اقتراح

صِبى حتى نگدر نشتري ملابس مدرسة

واغلب الوقت مستعملة صِبى طبعهة الخنوع

مااعرف ...... او يمكن القناعة

اما اني فلا وهالشي من حقي احلم وافرد جناحاتي

بس للأسف ارتطم بجدار الواقع اكثر من

مرة لذلك اتخذت العدوانية كوسيلة دفاع 

احمي بيهة نفسي من تنمر البعض

وكلامهم واتخذت الشطارة

وسيلة للتميز عن البنات حتى اكسر عينهم بالمدرسة

ولو بشي بسيط

المرحلة الابتدائية مرحلة ضبابية من التنمر

والقهر على وضعي بس انتهت نهيت وياهة

شخصيتي القديمة الدفاعية وقررت اتخذ شخصية

جديدة غِنى الوصولية

مو عيب اعترف بهالحقيقة اصبحت وصولية

متسلقة فالطبيعة البشرية تحب اللي

يمدحها ويبالغ بمدحها

استخدمت بنات المدرسات واخواتهن والمدرسات

نفسهن وسيلة للوصول

استخدمت اللسان الحلو والكلام المعسول

اضافة للتميز الدراسي

بديت استنفع من شطارتي برسم الدفاتر

كتابة الواجبات شرح الدروس وهواية امور

خلت عندي شبكة علاقات اجتماعية داخل

المدرسة تبدي من الادارة وتنتهي بعاملات المدرسة

صرت المفضلة عند المدرسات اللي بكل شي

يدزون عليه وهالشي ضاف نقطة لرصيدي

كطالبة درجاتي عالية واذا مازليت عن طريقي شويه

مدرساتي يساعدوني

وهيج استمريت محبوبة من الكل صديقة الكل

وزميلة الكل لحد الثالث متوسط شفتة

أخو ست سحر مدرسة الاحياء 

اختهم الصغيرة غفران وياية بنفس الصف

تصادقت وياهة على اساس المصلحة

لكن بمرور الوقت صارت صديقتي المقربة

رغم تعرف وضعي المادي تحت المتوسط

لكن مكان سكني ماخليت اي احد يعرفة 

شفت شجاع واني ببداية الثالث متوسط

يجي ينتظر اخواته يرجعهن للبيت فهو أخوهن الوحيد

كل يوم اصادفه يبتسم بوجهي ويطلب

من اخواتة أن يقنعوني حتى يوصلني بطريقة

واني مثل كل مرة اردة بطريقة

لبقة بأن بيتنا قريب شگول مثلا

اني روحي عريانة من كل شي وواقعي

نتن ريحته فايحة وبيتنا بأوصخ نقطة ببغداد

طول السنة جنت مثل اللي يكتم النفس ومايطلعه

وياخذ غيرة الا لمن يطل بطولة الحلو ووسامته

هو مهندس أساساً بس مبدع بالرياضيات معروف على مستوى ياخذ

دروس خصوصية للمراحل الاعدادية

تمنيت شي يوم الفت نظرة لكن مشفت بعيونه

طول السنة اللي جنة نلتقي بيها كل يوم لقاءات عابرة مشفت غير نظرة

حانية لطفلة كأنما يباوع لغفران نفس النظرة

هالشي هيج احزان گلبي الصغير المتعب بحب

من طرف واحد وبعد نجاحي وعبوري للرابع

وبعد رجوعي للمدرسة بعد اللي صار وغياب فرقد واحتياجي اله

تكورت داخل روحي وتقوقعت وگمت مااحجي

ولا ارد الهدوء اجتاحني وصرت من اطلع اعبر اذا موجود وماانتبه لحد مامرة غفران غايبة

وهو ينتظر سحر

طلعت وعبرت بلا روح حتى ممنتبهه فبالي وگلبي

يم صِبى اللي لازالت تگعد عالتلة تنتظر فرقد يجي

عبرت سيارته واجاني صوته

-بابا شنو هالغرور السلام لله

التفتت من صفگ ايد بأيد وكمل كلامة

-حتى احترام ماكو

التفتت صفنت بوجهه

رجعت ليورة استفسر

-العفو استاذ تقصدني

-العفو طبعا بس اني متصرف تصرف زاعجج

استغربت كلامه

-لا والله أستاذ بالعكس

-استغربت تصرفج تعرفين كم مرة مسلم

عليج طول الشهرين الفاتو

اشرت على نفسي بأستغراب

-آني يمتى استاذ

-جديات تحجين

-والله أستاذ ماادري

-يابة اللي ماخذ بالج يتهنى بي

ابتسمت بقهر ونزلت راسي

-والله ياريت ياخذني كلي يمه

مشيت خطوتين مودعته ومعتذرة

-اعذرني استاذ دماغي متشتت اسفة لعدم الرد

مشيت مسافة تعبانة من احساس الحزن

واحساس النبض اليشتد بگلبي كل مرة اشوفة بيها

ارجع للبيت حيث الحزن محتل الأجواء

صِبى اللي فاتحة البوفية وتسفط ملابس فرقد

واغنية فيروز ملازمتها تغنيها بهمس حزين

تعبر بيهة عن طفولتها هي وفرقد

وهي تدندن بحزن 

من زمان أنا وصغيرة

كان في صبي يجي من الأحراش

ألعب أنا وياه

كان اسمه شادي

أنا وشادي غنينا سوا

لعبنا على التلج، ركضنا بالهوا

كتبنا على الأحجار قصص صغار

ولوحنا الهوا

ويوم من الأيام ولعت الدني

ناس ضد ناس علقوا بهالدني

وصار القتال يقرب على التلال

والدني دني

وعلقت عأطراف الوادي

شادي ركض يتفرج

خفت وصرت انده له

وينك رايح يا شادي؟

انده له وما يسمعني

ويبعد، يبعد بالوادي

ومن يومتها ما عدت شفته

ضاع شادي

والتلج اجا وراح التلج

عشرين مرة اجا وراح التلج

وانا صرت اكبر وشادي بعده صغير

عم يلعب عالتلج

تنهيها وهي تدفن نفسهه بفراشه

وتغط بنوم مفتعل حتى متضطر تحجي ولا تتجاوب ويانا

هاليوم جان مفصلي بحياتي الجاية

بالليل بحدود الساعة ٩ دگ تلفوني برقم غفران

وهاي مو عادتها اكثر شي تراسلني

فتحت الخط مستغربة

-ها غفورة

-ها غناوي شلونج

-الحمد لله ليش غايبة اليوم شرحو درس جديد

بالرياضيات

-ميخالف شجاع يدرسني

اگلج منو يمج

-احم اخواتي موجودات

-دطلعي بمكان وحدج

-صاير شي

-دطلعي طلعي

حرت وين اروح

على كيف رحت فتحت الباب الخلفية

گعدت عالجذع عالجدول

-هاي صرت وحدي

مااجاني ردها بس اجاني صوته

-شلونج غِنى

-الحمد لله أستاذ

-اني مااعرف شلون أعبر عن أسفي بسبب سخافة موقفي تجاهج اليوم ماجنت أعرف عن وفاة اخوج

-الحمد لله على كل حال استاذ

الله يرحمه

-واضح تأثرج بغيابه تمشين بدون روح

-وحيدنه هو ماعدنه غيره وانقتل بدون ذنب

-ربي يصبركم على غيابه

اعتذر مرة ثانية

اختفى صوته ورجعت غفران تحجي ويايه

لحد ما دخلت للبيت

واستمرت لقاءاتنا القصيرة بباب المدرسة

وسلامه ولطفه وأسلوبه اللي زاد شعوري

نحوه وخلاني مثل المجنونة اتمنى ياخذني

ينتشلني من واقعي المؤلم

ومن انسدت بوجهي جميع الابواب اللي

ممكن تؤدي بية لگلب شجاع قررت قرار

رغم غباءة لكن يبدو ان انطى ثماره

بديت اضعف بمادة الرياضيات متعمدة

رغم شطارتي لحد مرسبت بالشهريات

وبدت غفران تأنبني

-تعاي للبيت يمي يقريج شجاع وياية

-لا اهلي ميخلوني اجي

-وتبقين هيج ضعيغة بالدرس

-ماااعرف مااعرف شسوي

درس خصوصي حالياً مااگدر آخذ

الوضع مادياً منهار بعد وفاة اخويه

-صدگ تحجين يافلوس يامادة

شجاع ياخذج

-لا لا مستحيل بدون فلوس شيگول

علية مجداية

-دنجبي حبابة انجبي وسكتي 

-مااااروح 

-اي عود ميخالف

وصار اللي صار ووافق شجاع ياخذني درس

وتمنعت رافضة لكنة اتصل من غفران

والح علية يلا انطيت موافقتي رغم

ممانعة صِبى 

ومنها بديت خطة للأيقاع بگلب شجاع

اروح للدرس قبل الكل

المعهد مقابيل بيتهم بمنطقة بعيدة شويه

بس امشي ومرات خالتي تنطيني الف اصعد

المعهد عبارة عن طابقين بي هو ومدرس انجليزي

هو الطابق الثاني قاعة جبيرة حيل

مصفوفة بالكراسي المنظمة

كل يوم البس لبسي البسيط

بنطرون أسود قماش علي قميص أسود

اشترتهن خالتي لأن ماعندي لبس اسود

امشط شعري أرفعة واغطي بحجاب اسود

واروح امشي اغلب الوقت احب امشي

اشوف المناطق السيارات المحلات

الناس شلون عايشة

ادخل قبل الكل لأن هو يجي يرتب كتبة

واوراقة واقلامة نحجي شويه عن الدروس 

ويسألني عن طموحي واحلامي بس صار مرة 

مرتين يدخل ورايه ويدخل كم طالب وطالبة ويا

بعدها گمت اجي بوقت ابكر

وهالمرة اجيت قبله بس تعبااانة مشي وعطش والجو بارد

دخلت وگعدت ليگدام اكو صوبة كهربائية مخليها

سحبتها شغلتها وخليتها گبال كرسيي

وسندت راسي عالستاند

غمضت تعبانة يادوب ارتاح من الدوام

واجي راكضة للدرس اغلب الوقت مااكل

اساساً

بعد ساعة الا ربع عالدرس

غمضت عيني مستشعرة الدفو حواليه

وغطيت بغفوة هادئة وساكنة

صحيت منهة على شي دافي يغطي

اكتافي رفعت نظري شجاع يمسح السبورات

ويجهز اوراقه

اباوع على اكتافي كوت صوف نيلي

عدلت گعدتي ونزلته من اكتافي

-آسفة أستاذ 

فز ملتفت ناحيتي ابتسم

-صح النوم

-اخذتني غفوة

-ليش تجين من وقت كل مرة 

-هرباً من الواقع

خله المساحة عالسبورة وتقدم عالكرسي

گبالي

-اي واقع، واقع المدرسة لو البيت

-المدرسة المكان الوحيد اللي ارتاح بي

-احجيلي انتِ مثل غفران ليش هيج

ذاوية ونبرتج كلهة تعب

-غياب اخوية مثل الجمر حرگ البيت كله

احس جاي نمشي اجساد بدون روح

-لهالدرجة متعلقين انتو البنات بي

-اختي الجبيرة تعرفها ست سحر جانت

من المتميزات بالمدرسة بوفاتة

تركت حتى الدراسة ارتباطها الروحي

بي خلاها قطعت الحياة بمجرد ماانقطعت انفاسه

من هالدنيا

-وانتِ

-اني شبيه

-شگد متعلقة بي

صفنت بوجه شجاع وكأني أول مرة انتبه لمدى تعلقي بفرقد وجاوبتة بتعب وحزن

-اكثر مما جنت أتوقع

-شلون يعني

-تعرف من تتعود على شي أو شخص وتعتبر وجوده

ثابت بحياتك فمن گد التعود تنسى شنو شعورك

ناحيته 

لأن تندمج بي وتنعجن ويا مشكلين شخص

واحد بس من بعيد تبين كأنك متملكلة مشاعر

هيج جنت يمكن اعتبرت وجوده بحياتي

من المسلمات وغيابة المفاجئ انطبع

على روحي وملامحي بسحنة حزينة وواضحة

-ليش مجنتي تعبريله عن احتياجج الة

-لا مجنت اعرف اعبر عكس صِبى اختي الجبيرة

هاية بكل ثانية ولحظة جانت تبوسه

تحظنه تنتظره تاكل ويا تهتم بي روحها مرتبطة بروحه

-وهسه

-هسة العن نفسي آلاف اللعنات بعد ماغابت عيونه الحلوة عن بيتنا وبعد ماحل الظلام بغيابه

اخذت اللي صار عبرة اليه كل يوم اعبر عن مشاعري للحواليه فالفقدان مررررر بمرار العلقم

اللي احبة اگلة احبك واللي اشتاقله اگلة اشتاقلك واللي زاعجني اگلة بوجهه ماكو مشاعر مؤجلة بعد

-احييج على هالفكرة

ابتسمت وهو يسحب الكوت من الكرسي بجانبي 

-تفضلي آنسة غِنى تقاسمي وياي

هالنستلاية والا اتخربط وتبتلين بيه

-هبوط

-اممم سكر بسبب الاجهاد

فتحتها وناديته

-استاذ تفضل

- نتقاسمها

عض جزء منها وبسرعة وهو يضحك دس الباقي

بين شفافي

-اكلي اليوم ورانا موضوع صعب بالرياضيات 

اكلتهة وبديت اجهز غراضي ويه توافد الطلاب

بدينه بشرح الموضوع وعيني منه يشرح بهدوء

وأسلوب سلس ساعة ونص خلص بدو يطلعون ولد وبنات اباوعلة يلم بأغراضه التفت

-اوصلج خاف صار مغرب وتأخر الوقت عليج

-لا أستاذ اني اروح ماعندي شي

-انتظري اوصلج لنهاية المنطقة

-لا أستاذ والله ماكو داعي

-لتدوخيني

اشر على شفافه بحركة الصمت سكتت

نزلنه ومشة گدامي للدرج نزلنه

خلاني واگفة وراح دخل جنطته بطارمتهم واجه

ناحيتي 

-يلة غنوة

ابتسمت

-غِنى أستاذ

-غنوة أحلى

مشينة بالشارع العام اللي كله مشاتل

وورد واشجار واقفاص حيوانات أليفة

صامتين كح هو يجلي صوته

-شعجب يخلوج تجين وحدج

-ماعندي احد يجيبني

-والدتج اختج الجبيرة

-امي متوفية

-لا حول الله ربي يعينج

التفتت على صوت بلبل معلگ بسياج واحد

من المشاتل

-شلون صوت حلو عجبج؟

ضحكت متذكرة موقفي القديم

-هاي بطفولتي جان عندي بلبل من جانت امي موجودة بيوم من الأيام عيد صادف امي

سبحتنه كلنا ورتبتنا نگعد بالباب نباوع عالرايح والجاي

-وشصار

-گلتلهة سبحي البلبل ماقبلت گالت يموت فآني خليتها تسولف ويا نسوان الجيران واخذت البلبل طلعته من القفص وجعصته بنجانة المي

فركتة فرك اباوع شو هذا گام ميطلع صوت والريش

مالتة طوف بالنجانة 

خفت وتركته شو نزل جسمه جوه بقاع النجانةطلعت اعيط

-مجرمة

-انكتلت بيومهة واذاني تشلعت وبعدني

لليوم نفسي ببلبل اربي حتى اكفر عن ذنبي

-لااااااا بس هايه 

-شنو أستاذ

-سهلة

سحب دفاتري وكتابي موجهني ويا وهو يرجع للمشتل

-استاذ والله اتشاقه بس جاي احجيلك

-شو اسكتي 

وگف بباب المشتل يحجي ويا الرجال

منظرة ويا اصفرار الجو واقتراب الشمس من الغروب

جان ساحر بشعره المرتب

والملابس الانيقة اللي يلبسها وسواد عيونة الفاحم

صفنت علي وهو يحاسب وياخذ القفص الصغير وبي البلبل

-وهاي تحقق الحلم

خلة القفص بيدي وكمل

-مو تسبحي وتخنگي

هزيت راسي مبتسمة

توقفت لحظات بنص الشارع

-استاذ بعد مااتعبك راح اخذ تكسي للبيت خاف اتأخر

-اوگفي اني اوگفلج تكسي

حرت شسووووي واني جيبي مابي بس الف للكيةبقة واگف ينتظر مني العنوان

انطيتة اسم المنطقة اللي قرب المدرسةوگفة انطا الكروة واشرلي

-صعدي بهاي الجهة لتصيرين وره السايق

ومن توصلين دزي رسالة لغفران او الية رقمي

موجود عالملزمة فهمتي

هزيت راسي موافقة مشت السيارة لحد الشارع العام اللي قبل منطقتنا وگفتة وكملت طريقي ماشية للبيت وبيدي قفص البلبل

اللي يزقزق واحلام وردية تداعب ذهني ممكن تتحقق

وهيج استمرت لقاءاتي اللذيذة بشجاع

صار يتوقع وجودي كل يوم فيجي

شايل ويا نساتل اثنين وعصير ويشغلي

الصوبة ونگعد نحجي بكل شي 

هو يحجي واني اووووگع بحبه ببساطة

وصار وامتحنت نصف السنةونجحت بأمتياز

وبالعطلة وقعت كارثة ابوية وهو يدخل علينة ايده بيدها وكارثة اعترافة اللي راح يغير حياتي للأبد

وواني اشوف منة رسالة جاية لخطي

تگول

( ماجنت أعتقد غياب اسبوع عن عيني راح يسبب هالألم القاتل لگلبي)

جنت أعتقد هاي بحياتي نقطة البداية

لكن للأأسف جانت تحمل بطياتها خاتمة النهاية

صِبى

_______________________

الصدمات جزء من واقعنا

جزء يفرض نفسة بقوة

.

على صوت غِنى المرتفع وصياحها

وهو تستنكر طلعنة راكضين اني وخالتي

وگفنة مذهولين

-وييييين ووووين مدخلها

-وخرررري من الباب بت الزمال

طلعنة بسرعة اني وخالتي قبل لا نوصل الطرمة

دخل ابويه وهي تمشي ورا

بهتنة بوجهه وهو داخل بيدة جنطة ملابسها

حجت خالتي بروح مخذولة

-شعدهة هاي هنا

حجت هي بوقاحة وهي ترفع حاجبهة

-زوجته اني عيووووووني

تعلگت عيوني عليها هي ماكو غيرهة أيمان

بت ام سلمان الخبازة اخت قاتل اخوي

اللي بسببها مات ريحانة گلبي

تقدمت ناحيتهم

-هااااايه متدخل للبيت

باوعلي ابوية وسكت مارد

رفعتلي حاجبها هي

وهي تخلي ايدها على بطنها

المنتفخة

- ليش دادة ماادخل حالي من حالكم واخوكم ببطني

تقدمت خالتي ناحية ابويه

-تزوجت اخت قاتل ابنك 

-وليش ميتزوجني واني حامل بالعوض

مااعرف شصارلي واني اركض بسرعة

ناحيتها اسحلها للگاع وانهار بالبكاء واللطم

-العوووووض قصدج تعوضين مكان فررررقد

بأبن الزنا اللي ببطنج موووووو

ضربتها وهي ضربتني وابويه يسحل

بية وخالتي بحجة تفاكك بينة تجر بشعر أيمان

ودخلت غِنى عالخط على اساس ترفعني منها

بس هي بالحقيقة تدفر بيهل و مُنى تجرجر بحجابها بحيث تملخت ومتنطي بنفسها

كفخنة ابوية كلنة وگفنة نباوعله توجهتنا اني

-شلووون اجاك گلب تجيبها يمنه للبيت

شلووووون

باوعلنة وحك جبينة يحجي

-الطفل اليه واخوها بالسجن گال لأمه زوجيها اله

وامهة تبرت منها بعد الصار وراحت لأهلها

بالناصرية وهي ظلت وحيدة بالبيت

-من يممممممممتى متزوجها

سكت شوية وخالتي عيونها منع منتظرة جوابة

-ورة اربعين فرقد

لطمت على خدي

وارتفع صوت خالتي بالرفض

-ورررررة اربعييييينه تتتزوج

هالناقصة اخت الناقص

عاطت خالتي بعد مانزل كف ابويه على وجهها

-لوووو بيج خير صيري مثل هالناقصة وخلي

بطنج تنترس بجاهل وووولد مو شلون ماكان

غمت خالتي بطنها وبصقت بجانبها

-الله يحبببببني وخلاني عاااااقر حتى مااخلف من جهرتك

-من اخذتج انت عووووجة

-انهجم بيتك يالعدل شو انت اعوج ودروبك عوووووجة والجبتها اخر***ااا منك

راد يضربها صارت غِنى گدامها

-مااتعب نفسي وياج اجت كسارة راسج

-خفيت وبليت انت وياها كسرو عظامكم ان شاء الله

مابقة بس هالزانية تكسر راسي 

سحبتنا خالتي ببرود مصطنع وهي طالعة

-امشن خالة ورانة درب بعيد

-وين موليات

جاوبتة خالة وهي ماشية بينا

-للنجف نروح ندعي الأمير بلكي يخلصنة من الجهر المصخمة

طلعنة وهي تمشي ويانة جانت أيدهة ترجف حيل

ومتسيطر عليها لزمتهة التفتتلي مبتسمة

-ولج ماهامني والله بس من اتعصب أگوم أرجف 

دفعت ايدي تضحك

-اگلجن شو زايدة الحنية هالأيام

باوعتلهة غِنى صفح

-خاف تردين تموتين

غمتهة خالتي وهي ماشية

مشت ملاصقة اليه وهي تحاجيني

-لا تبقين تفكرين ابوج طول عمره خسيس لا عبالج قهرته على فرقد تدوم هاي شفتي لحد الاربعين وتزوج هالبت الكلب

اخذتنة السيارة تطوي المسافة للحبيب

اللقاء جان مثل كل لقاء نحجي بكل

شي اناقشه واعاتبه ويجاوبني

بخيالي لحد ماتعبت رحنة للأمير

زرنا وارتاحينا خالتي جايها كم فلس زيادة

وفرحانة وحرام ننكر تعبها اخذتنا

مطعم بسيط غدتنة وشافتلنا فندق

سعرة مناسب حشرنه نفسنا بغرفة نفرين

حتى ماندفع هواية بعد مانامو تركتهم

وطلعت لصحن الأمير قابلت الضريح 

ابث حزني وشكواي لحضرته

رجعت وية صلاة الصبح لگيتهم

نايمين گعدت خالتي صلينا وطلعنا راجعين

للبيت منعرف مصير الزوجة الجديدة شنو

وصلنة ظهرية للبيت بعدنا بالباب وصوت

موسيقى عالي مرتفع من داخل البيت

دخلنة على صوت الصفگة العالي 

وانصدمنة بثلث رياجيل من ضمنهم ابوية

ناصبين گعدة شرب

اول مادخلنة خالتي توجهت للتلفزيون طفته

وگفت بالنص مصدومة وهي تشوف ايمان الزوجة

الجديدة شايلة صينية بيهة صحون بيهة

خيار وزيتون وكم حاجة من الثلاجة

-مسووووي البيت ملهى

وگفت خالتي متسائلة بصدمة

وگف ابوية يتطوطح

-طبيي جوووة انت وذني وخليني بمزاجي لا تخربي

التفتت خالتي اشرتلنا

-طبن جووووه وسدن الباب

دخلنة للغرفة وصوت خالتي ارتفع

-بالله ذولة سكارى وشرابة عرگ بالقندرة يشربووووو

انت المرة ماتخافين گاعدة بينهم

-اوووووي عيني خفت رجفت

رجلي احتاجني وگال سويلي مزة

شسوي ترديني ارفض

-امششششي طبي گتلج خلي هالربع الشربته

براسي

-ترررريد تشرب اشرب بره

البيت بي بنات شابات عيب عليكم

برررررة يلة انت وياهم بررررة

ارتفع صوت جماعة ابويه وابويه وايمان

بالنص ساعة عرك لحد ماهدأ الصوت طلعنة خالتي واگفة مگابلة ايمان تخزر بيها

-سمعي ولج خااااااف يم اخووووج الگ***د المجرم

تعلمتي عالشرب والكبسلة والزلم طابة طالعة

هنا تحترمين نفسج

-اگلج سمعي خاااااف عبالج اخاف تررررى اشگج

شگ انت وبنات رجلج

-بنات اختي رجلي سگطططط

ولو مو سگط مااخذ اخت كتال ابنه

-احترگت روووووووح ابنه شخبصتينة

من سمعت هالكلمة مااعرف شلون طلعت راكضة

اني واخواتي واحنة نهجم على ايمان جنت ابجي واضرب بيها وهي تدافع

سحبت نفسهة منة وتصيح

-والله ارررربيجن لا عبالجن تتقون بخالتجن

گ****ب بنات الشوارع دايحات 

صاحت بيهة غِنى 

-اي مووووو صرنة ايمان بت الخبازة ولج جان اليفوت من بابكم يتنگس بسبب سمعتكم الخايسة

وريحتج الفايحة

باوعت ايمان لغِنى

-والله لا ادفعج ثمن هالكلام غالي

-ايييييييي طي*****ط خووووفتيني

انصدمت هي برد غِنى

وراحت دخلت للغرفة مال خالتي

دخلت وراهة خالتي

-شعندج هنا دادة

-والله رجلي گال گعدي هنا وغراضج شمرهن بغرفة البرابيگ البره 

-ااااااياااا بنت الكلب

-دمشييييي ولي لج

اجت خالتي للغرفة.عينها على ملابسها بالگاع

گعدت تجمع بيهن جانت هادئة بالبداية

وبعدين ارتفع صوت شهگاتها

حضنتها مُنى و غِنى همت تطلع حتى تطرد

ايمان من الغرفة صاحتهة خالتي

-خل تولي هي غرفة جايفة

راح اگطع الهول ببردة وانام

اني ومناوي واخلي بوفيتي هناك

-هنا خالة تعاي يمنا

-غرفتجن حتى نفس مابيها

بالهول احسن

-خل تولي هي للهول وانت بالغرفة مالتج

-هم صدگ شو اني صايرة جبانة

هزت ايدهة غِنى وسحبت خالتي

-جيبي ملابسج وامشي وياي لو سوالف الدنغوزات مالتج بس علية 

اخذن الملابس رحت وراهن للغرفة

دخلت غِنى خلت الملابس بمكانهن وايمان

صافنة طشرت ملابسها بالگاع

-اخذي ملابسج وخلاگينج حبيبتي هنا ننام اني وخالتي يلة حبيبة مو الاجه خلاف ركب عالجتاف

-لج زعطوووووطة عبالج تخوفيني

اباوع لغِنى اكو بطل ببسي گزاز عالميز سحبتة كسرتع بالحايط وتقدمت ناحية ايمان

تأشر على وجها

-شتررررردينها بالطول بالعرض لو جروح يحتار بيهة الاطباء لووووووووو .........

جرت الكلمة وهي تشير لبطن ايمان

-لو تردين امررررررد ولي العهد ببطنج

گوووووووومي لج طلعي برة 

فزت ايمان واگفة سحبت غراضها وهي تبث

نضراتها النارية ناحية غِنى

-والله كل شي تسوي ارجعة الج اضعاف

-ايييييي حبي هاج شوفي رجفت خوووف يمه يمه خفت امشي لج ادبسز

طلعت ايمان هي وغراضها و غِنى تباوع لخالتي صفح

-خرب حظي انت لسانج وخباثتج ماتطلع بس على غِنى شو صرتي نملة مفروكة گبال هايه 

كفختها خالتي وهي تعدل بغراضها

-كبرت بعد مالي خلگ مشاكل

حضنتها مُنى تبوسها

-لا يمة بعدج تخبلين

مااستغرب تعلق مُنى بخالتي فهي الام الوحيدة

اللي تعرفهة

طلعت تاركتهم ورايحة للغرفة فرشت فراشه وغطيت بدفو حنيني وذكرياتي ناحيته

قاطعة مسافة الاشتياق باحتضاني لمخدته واني استنشق اخر ذرات من عطرة بيها

ومرت الاشهر مسرعة معلنة ولادة

أيمان لولد معاق مسكين بفتحة

بسقف اللهاة وعدة فتحات بالقلب ماامهلتةبالدنيا غير اسبوعين انولد بيهن وتوفى لرحمة الله

ومضت الايام بين صد ورد

وعطلن البنات بنجاح غنى للخامس الاعدادي

ونجاح مُنى للخامس الابتدائي

حياتي ماشية بنسق هادئ لازلت

بعد نوم العيون تسرق عيوني دقايق بجانب

الشباك بأنتظار رضا يطل علية مثل البدر

ابوس رموشه التعبانة وامسح عن وجهه

التراب فبعد سنين التعب اشتغل بمطعم بمنطقة

مرتبة يتأخر لآخر الليل ويجي على دراجته 

وغبار المنطقة يكحل رموشة الشگرة

امسحهن وهو مبتسم

-تدرين خلال هاليوم المتعب انتظر هاي اللحظات

وايدج الناعمة تمسح تعب اليوم من وجهي

وعيوني تتكحل بشوفتج

-واني ايامي فارغة مايمليها بس ذكرياتي

وية فرقد واللحضات التجيني بيها

مد ايدة لجيبه

-اليوم سوو صاج الشيف لبناني وجبتلج وحدة

والية وحدة طلعيلي خل ناكل سوه

وجيبي مي بارد

تركت الغرفة واني اتسحب اخذت

بطل مي بارد وگلاص وطلعت من الباب الخلفي

گعدنة عالجذع مد ايدة ينطيني لفة

-حبيبتي

-عيوني انت

-اذا اجتني فرصة سفر اروح

صفنت علي والضوه القليل الجاي من القمر يضرب علينة

-والله مااسافر اذا هاي نظرة عيونج واني بس اطرح

فكرتي اذا سافرت وتركتج شلون

هزيت راسي ابعد فكرته عن باله

-لا والله بس عبالي تركت الموضوع

-عمري ماتركتة بس الدنيا لهتني

مااجذب عليج جنت خايف عليكم

لمن اطمأنيت خالتج اشتغلت امنت

-واهلك

-حصلت لأمي شغل بدائرة بكشك مال مي وحلويات

مااجذب عليج تداينت حتى ارتب امورهم

-يعني انت ناوي ومخطط

-تدرين بية صار سنين

بس عيونج وگفت گدامي واجلتها

-يمتى

نزلت اللفة من ايدي واني انتظر الرد

-مو هسة والله

رفع ايدي مرجعني اكل من جديد

-حبيبتي بعد اريد الملي مبلغ زين اخذة وياي

-وين

-تركيا وبعدين مااعرف لأي بلد اوربي

-ركضت الأيام بينة وراح يتحقق حلمك بالسفر

امتدت ايدة لزم ايدي

-اريد نعيش اني وياج واهلي عيشة زينة

نطلع من هالمستنقع والمنطقة التعبانة

شحصلنة غير تعب الروح والجسد

والموت

رتبت امور اهلي بحيث يعيشون علما ارتب اموري

هناك وأبدي ادزلهم فلوس اريد نطلع

منا تخيلي نعيش ببيت طبيعي بي حديقة

وغرف تكفي الكل ومكان خاص بية وبيج 

ارتجفت نبرة صوته وهو يشرحلي اللي جاي من حياتنا

وايدة ممسكة بأيدي محاوطتها

-تخيلي غرفة يدخلها الضوة من كل مكان

وبيهة اني وانت وطفل صغير يحبي رايح الية

لو الج وضحكتج الحلوة مالية دنيتي

باوعتله مبتسمة

-خاف من تسافر تنسى الوعود وتعيش كل الحياة اللي رسمتها الية ويه غيري

-أطلع مو رجال اذا سويتها

طلع من جيبهة باكيت الجگاير مالتة وسحب قطعة

السلفون اللي بي لفهة وسحب ايدي خلاهة بأصبعي

-احلى حلقة

-تتزوجيني

صفنت بوجها

-هسة

-اي ننخطب ونعقد وأسافر علما تترتب اموري ارجعلج والدنيا كلهة بيدي واخطفج من تعبج لراحتج داخل حضني 

-وعد

-وعد وروح فرقد

لفيت اصابعي امسك بأصابعه وروحي تكلم نفسهه ربما بسعادة قادمة وهيج مرت الأيام 

تقدملي رضا تحت موافقة ابويه ورفض خالتي بسبب ضعف حالة والخطة المستقبلية اللي يسافر ويتركني بيها

لكن اني راضية فهو حب طفولتي واول نبضة وحب صباي ومراهقتي

خطوبة بسيطة بملابس سودة ابسط انعقدت سعادتنا بحلقتين وحدة ذهب ووحدة فضةتحت ابتسامات الاهل والاحباب

وامتدت الايام مطوية بسرعة مهولة تحت همسات الحب والوعود بسعادةأبدية من رضا 

ودخلنا سنة دراسية جديدة

تميزت بيهة غِنى و مُنى

وقطعو شوط جبير منهة وية دخولنا

سنة ٢٠١٣ وامتحان نصف السنة ونجاحهم وحانت لحضة الوداع بعد ما رضا حصل سفر

عن طريق منظمة كلاجئ لتركيا

أيام تجهيزة للسفر جانت ثقيلة

أدركت بيهة أن روحي صارت وحيدة

بشكل جاد بعد فقدان حبيب روحي

وسفر نصفي الثاني وبنهاية شهر

الرابع من هالسنة طار رضا نحو 

أحلامة وقبعت آني تحت واقعي وبقائي وانتظاري لحلم وردي بعودة رضا اليةحتى نبدي حياة جديدة

بعد وصولة بأسبوعين يلة تواصل وياناوقبل سفرة اشترالي تلفون حديث وعلمني

طريقة الاشتراك عالانترنت حتى نتواصل قِصٌصٌ مَآيِّ هِوِبَِّس

وفعلا صرنة نخلص ليلنة نتراسل

جنت افرح من أشوف نظرة السعادة بعيونه جان يتعب ويكدح حتى يحقق حلمة بالسفرلبلد أوروبي كل يوم نحجي بكل شي بأحلامنا بطموحاتنا باللي جاي

يشجعني يواسيني يغازلني يزعلني ويراضيني كل شي خليت بحسباني

الا الكسرة بكل خيلاتي وتوقعاتي

وبأعتى أفكاري ماجنت مخلية

ولا متوقعة ان كسرة عمري

راح تكون على ايدة

وأن الجاي من حياتي هو تأثير لفعلةرضا المشينة بحقي

وحق سنين عمري الضايعة

بسبب وعود طارت أدراج الريح............

الفصل السادس من هنا 

شكرا لزيارتكم عالم روايات سكيرهوم