رواية بيوت الصفيح الفصل السادس 6 بقلم زهراء السراي

.

الخذلان أن تظن أنك لا تهون

فتهون

.

صِبى

___________________

مي بارد وريحة منظفات

وادية مثلجة احاول اسرع بشغلي واكمل المكاتب

حتى اعطر الحمامات وانظفهن

بنفس الوقت واطلع بسرعة لأن شتة وبسرعة تليل

أباوع للشركة شيخلص الشغل اروح منا واجي منا 

واني متلثمة وأفتر عالمكاتب بعد ماالكل

طلع وراحت حتى سيارة خط الموظفين اشتغل بهمة 

ارتب واعدل ارتب حياتهم

وحياتي مخربطة

انظف وراهم واني مالي حياتي غبار الهم 

عيوني مابطلت تبجي من يوم اللي رجلي حطت بهالمكان 

اباوع لأدية واتذكر ادين الموظفات نفسي وبعمري

بثيابهن الراقية واديهن المحملة بالذهب ومزينة بالاحجار والاظافر الملونة شنو الفرق صِبى شنو فرقج عنهنِ والجوع

-هذا الفرررق انتتتتتتبهي لشغلج

عطت بالكلمة الاخيرة بصوت مسموع

وضربت نفسي كف قووووي

سمعت صوت ورايه يهمس

-شنو هالعنف

التفتت للباب ووگعت من ايدي مواد التنظيف

-الله الله شصار

-العفووو العفو أستاذ فززتني

-الجو غيم وراح تمطر يمتى تخلصين خط الشركة راح

لا تظلم عليج وانت هنا

-دقايق بس

مااستغرق الموضوع دقايق حتى ضاق صدري وحسيت بروحي بدت تنسحب مني وعيوني بدت رؤيتها تصير ضبابيةبكل مامتبقي عندي من طاقة تحركت ناحية الباب

طالعة بمشية غير متزنة بعد ماطلعت الباب بخطوتين

شفتة جاي ناحيتي وبس خياله لاحلي

بسبب اغمائتي الجزئية بس صوته يصيح

ويا سقوطي للأرض الباردة واغماضتي 

-صِبى شصاااااار

أحس بي من يحركني وصوت صياحة للموظفة اللي باقية منتظرة زوجهة ياخذهة

احس وهمة رافعيني بينهم ومن تحركت السيارة

وبعدهة أختفيت وغاب نور الدنيا من عيني 

اصوات وهمسات ماعرف اني وين احس جسمي بخفة الغيم وبرودة اجتاحت اوصالي وهوا بارد يفتر

برئاتي تارك أثر هدوء وسكينة على أعصابي

ابتسمت بداخلي أدعي

-يارب هو هذا الموت مو؟

ياااارب أشوف فرقد

وامي ياررررب

هدأت وصوت متذبذب يحجي

-راح تصحى هاي جاي تبتسم وهي نايمة

يمكن تحلم ليظل بالكم اني اوصلها 

فرجت عن أجفاني الثگيلة

وبين طيف وجه الأستاذ

-شنوووو يابه منتحرة الأميرة النائمة

فزيت بثگل وگعدت ماسك اوكسجين على

وجهي ومغطاية بجرجف خفيف دفعت الماسك عن وجهي اباوعلة متسائلة فهم علية ورحم عاصفة

التساؤلات اللي تدور براسي

-خلطة المنظفات خلفت غاز سام وعلى اثرها

اختنگتي الحمد لله عالسلامة

-اهلييييي

فزيت منزلة رجليه من السرير للگاع

ترنحت بسبب قلة الاوكسجين بدمي

وسندتني ايدة مرجعتني للسرير

-اهدي خل احجي خابرت خالتج وبلغتها هاي ستوني

غلقت الخط وياها

-بيش الساعة

-ب١١

ضربت على خدي وهو تقدم ناحيتي

-على كيفج ويا نفسج اني ارجعج للبيت

-لا لا اني ارجع استاذ 

-اساساً ميخلونج تطلعين هسة فد ساعتين

يستعدل تنفسج ونروح رجعي الماسك 

-لا مااگدر اتأخر

خزرني محذرني بنبرة صوت حازمة

-گتلج كافي واهدددددي تمددي ورجعي الماسك

على هالنبرة المرتفعة خجلت رجعت الماسك

وتمددت

غمضت عيوني تعب وخجل وبرد

لفيت ادية حوالين نفسي واجاني صوتة

-اجيبلج بطانية

فتحت عيني ورفعت الماسك

-لا شكرا استاذ

رجعت غمضت عيني مبتعدة عن نظراته ثواني

وتغطيت بشي غطة بس صدري وادية للنص

فتحت عيني على جاكيته الصوف الثگيل

ساند نفسة عالكومدي بصفي يتصفح بتلفونه

غمرني قليل من الدفو اخذتني على اثره اغفاءة بسيطة صحيت منهة على صوته

-بس اريد افهم ليش هالفزة والخوف

حركت الماسك عن وجهي گعدت نزلت الجاكيت دخلت الكم شعرة اللي تمردن وطلعن من حجابي

عدلت نفسي نزلت رجليه للأرض واستقريت

اباوع لحذائي مسافة عني بعدني افكر اگوم البسها

انحنى الأستاذ گدامي مقدمها بجانب رجليه

سحبت رجلية خجل

ابتعد واگف مستقيم بطوله المرتب وملابسه الشتوية الأنيقة

لبست الحذاء ووگفت معتدلة

سحبت الجاگيت مالته بحركة لاارادية

نكتت اكتافة وطويته وقدمته اله

-تفضل أستاذ

رجع فتحة وصار بجانبي غطة بي اكتافي 

-الجو بارد والمطر خفيف من ساعات تمطر

يلة امشي

مشيت وراه صامتة والمستشفى تعج بالناس والفوضى بس دخلنه القاعة الرئيسية للطوارئ مشى بجانبي يتحرك يبعد الناس عن طريقنا

لحد ماطلعنا ونفحتني نسمة هوا باردة

وريحة المطر وهو يبلل الأرض والأشجار

استنشقتها بصدر يعتصره الم خفيف غمضت عيني

متوجعة

-تنفسج راح يكون ركيك هالكم يوم قصباتج الهوائية

احترگت بسبب الخلطة اللي مسويتها

بس لتخافين عالعلاج كل شي راح يكون تمام

انتظري هنا اجيب السيارة

گال الكلام دفعة وحدة وراح

ثواني ووگف گدامي فتح الباب الأمامية

صعدت غطيت بالكرسي السيارة عالية رياضية

تحركت السيارة وهو يحرك بأزرار داخل السيارة

ارتفع صوت موسيقى واغنية قديمة

الي وياهة ذكرى مؤلمة الهدوء ودفو السيارة وصوت المطرب الشجي وهو يغني

وبعيد صعب اوصلك

معقول قلبك ما قالك

جنيت كتير اشتاقتلك

ويدوب القلب شوق وحنين

ويهون عليكى حبيبك

عم بعيش بقلبى لهيبك

صليت شى نسمه تجيبك

تطفى بقلبى نار السنين

امتدت بينا المسافة تطويها اطارات السيارة

عالشوارع المبللة بهدوء والاغنية مرجعتني لماضي مؤلم المنطقة بعيدة عن المستشفى مسافة أقل الساعة يمشي ويدندن وية الأغنية

قطع الهدوء صوته وهو يسألني

-خالتج شلونها

-نفس وضعها

-ماحاولتو بالعلاج الطبيعي

-نفس الشي عضلاتها ضمرت لذلك ماكو أمل

-احممم صِبى

-نعم أستاذ

-ليش تتلثمين بالشغل

-أرتاح هيج

-اريد السبب

-أعتقد أستاذ أسبابي واضحة

اني شابة وبعمر كل الموظفات اللي بشركة حضرتك

يصعب علية هالشي شابة وبعمرهم عاملة خدمة

-بس العمل شرف

-الشعارات الرنانة تختلف عن التجربة الشخصية

-قصدج ؟

نطقها بتساؤل 

-قصدي أن حضرتك ممار بتجربة عمل صعب

يقلل من أنسانيتك لذلك تعتقد ان العمل شرف

رغم هو فعلا شرف لكن مستحيل تگدر تتجاوز

النظرة الدونية اللي يوجهة الك البعض

-آني بساعة اللي خالتج طلبت أشغلج ماجنت اعتقد

انت هيج صغيرة وبهالرقة 

كح وهو يخفي احراجة

- اني والرقة نقيضان أستاذ

-بالعكس

-أنت دارسة

ابتسمت ونزلت راسي

-انت شتشوف أستاذ

-مااعرف اني بأعتقادي لو دارسة ومكملة جان حصلتي

وظيفة افضل يمكن

-تعتقد اني أمية

-لا العفو بس بحكم البيئة ............

توقف عن الكلام بعد ماادرك أن هو تجاوز حدوده الأنسانية ويايه وكملت اني عنه اخفف عنة عناء التفكير

-بحكم بيوت التنك والمنطقة القذرة اللي عايشة بيها

ففكرت أن عاملة الخدمة اللي اجت بديلة عن خالتها

أمية او عالغالب ممكملة ابتدائية

-لا ليش أستاذ هذا الأقصده من اللثام اللي ألبسه

الحكم عالشخص من خلال بيئته والمكان اللي عايش بي يخليني اتقوقع داخل نفسي وأبتعد عن الكل

-ماعرفت شمخلصة

-للأسف ممخلصة

ابتسم بتحفظ كأنما يگلي ها شحجيت

رديت بهدوء

-نجحت للخامس ومگدرت أكمل 

-جيد يعني تقرين وتكتبين

-مااعتقد عبرت المراحل بأمتياز لحد الخامس الأعدادي بدون مااعرف اقرأ وأكتب

كح وسكت لحظات

-خامس أعدادي يعني واصلة تقريباً ليش مكملتي

-ظروف خاصة

-أعتذر عالحكم المسبق

-لا عادي أستاذ

تركته بهدوءة وهو يسوق واني عيني عالشارع والعمارات والبنايات والبيوت

الحلوة تتناقص وتقل واحنا داخلين للمناطق القريبة

لبيتنا شويه شويه بينت ملامح تلال النفايات العملاقة

گدامي اشرتلة بيدي

-هنا توقف أستاذ

-لا مستحيل اخليج تعبرين لوحدج بهالوقت

-ماكو داعي أستاذ والسيارة اذا دخلت بعد متطلع

من الطين

-العلاج كلة مأشري التزمي واحسبي نفسج بأجازة للأيام الجاية لحد متتحسنين

-لا أستاذ ماعندي شي

-اسمعي الكلام ولتتعبيني

گالها بتحذير وهو يأشرلي حتى نمشي

مشينة والطين يلتصق بالاحذية لحد ماوصلنه باب البيت اتصل بخالتي اسمع صوت مُنى وصوت خالتي تحثها تفتح الباب انفتحت الباب وخالتي بالكرسي على جهة من الباب منتظرةّ

-تعبناك أستاذ 

-ماكو تعب بس بالكم عليها لأن كلش تعبانة

وهالكم يوم اجازة الها وراحة واني ابلغ الحسابات ميقتطعوهن من راتبها

-شكرا استاذ

باوعلي

-الشكر لله يلا من رخصتكم

تركنة ومشى و مُنى مدتلي ايدها تسندني دخلت للبيت ظلام وهدوء دخلت لغرفتنا دخلت خالتي وراي بالكرسي

-شصار ولج شكم مرة حذرتج من الفلاش گتلج يسمم

-مستعجلة جنت خالة

-همزين السگط ابوج مو هنا ومرته العار راحت لبت خالتها باتت روحي ارتاحي ونامي 

-مابية شي باجر اطلع للشغل

-هسه الرجال وگالج ارتاحي انت شبيج شامرة روحج

عالتعب 

تنفست أمنع حسرتي من أن تظهر

-الشغل ينسيني خالة فدوة لا تضغطين عليه

اجاني صوت غِنى وهي داخلة

-بس الج خلگ تگلبين بحساباته وتتحسرين على حياة

جانت المفروض تكون الج

رفعت المخدة اللي بفراشي وشمرتها ناحيتها

-طلعييييييي برة حقيرة

-لو بيج خير جان طلعتي عضلاتج على الفگررر

-اني جبانة يلة ارتاحي خلصيني منج وطلعي اريد أنام

هاي سوالف غِنى اني أعرفها تناكفني حتى اتعصب عليها واطلع طاقة حزني بسبب اللي صارلي 

جرتها خالتي وياها وهي طالعة بكرسيها

شمرت نفسي للفراش بعد ما طويت جاگيت الأستاذ

اللي نسيتة على اكتافي من وصلني

غطيت وجهي بلحاف فرقد اللي مرافقني

من سنين وجرفتني الذكريات بأمواجهة العاتية

مرجعتني لذيج الأيام

.

٢٠١٤

مگابلة التلفون وفاتحة الحاكية

واظفر بشعري ورضا يدندن يحاول يراضيني

-رضا والله وراضيناك

دلع حتى ودلعناك

كافي لا لتزودها لو ندري مازعلناك

-حبيبتي

مارديت بقة يلح

-عمري

عيوني دنيتي

صبيتي

جزع من الدلع وصاح

-حيوانتي

-هاااااااااااااا

-اي هيج ياحلو جاوبني ودلعني

-احلف مو وياك هايه غمزة مدري گمزة مدري شسمها

-مااگدر احلف جذب نشتغل بنفس المطعم

-وشبعانين بوس خطبت وعقدت ومتزوووج بموجب العقد بالعرك والكتل يلا حصلت بوسة قبل السفر

ابتسمت على كلامه وسكتت

-فكيها كافي زعل والله مشتعل گلبي نار واتمنى

اطيرلكم هنا واتطوع ويا اللي تطوعو يحاربون د*عش

بس اتورط اذا رجعت بعد مااگدر ارجع اسافر

واني اوراقي باليو ان مابقالهن شي ويمشن واسافر

-شترجع رضا هم ترجع وافقدك مثل فرقد

خليك هناك لا ترجع لابد أن تخلص هالازمة وتفض هالغمامة السودة

-بالي يمكم كلكم

-والله زينين

-امي تجيج انت ترحيلها

-راح اگلج شي

-گول عيوني

-امي لگت بيت صغير بمنطقة قريبة عالدائرة اللي بيها الكشك راح تأجره

صمتت لدقايق

-يعني هم راح تفارگني هي والبنات

-المنطقة ذيج آمنة أكثر للبنات من تروح امي للشغل

-مااگدر امنعهم ولا الي اي قرار بموضوعهم

مهناين يارب

-اريد اگلج اقتراحي وسمعي

-شنو

-ليش متروحين تگعدين ويا اهلي امي تگول

مااگدر افارگها وانت هيج هيج زوجتي شگلتي

-مستحيل اترك اخواتي وحتى خالتي

اللي هي صارت تكد وتتعب لخاطرنا

-بس اني اريد راحتج

-راحتي بوجودك من ترجع راح تلگاني انتظرك

سواء ببيتنا او ببيت اهلك

-تمام

-لا تزعل بس هم من اروح اگعد الناس متگول شعدها گاعدة ورجلها مو هنا وبعدين ليش حتى احمل خالة مسؤوليتي

-لأن انت جنتها زوجة ابنها الوحيد

-آمنت بالله بس مو هسه خليها خطيه هسه يلا

جرت نفس

-فلوسج وصلنج

-ليش هالگد داز

-لا خليتهن يم فاطمة لأن هنا ينصرفن

-ايييييي اني ليش دازهن

-لا هذني تعبك قررنا اني وخالة نلمهن

احسن

-شنسوي بيهن

-اسافرلك بيهن او اشتري بيهن ذهب يفيدن

او اجهز بيهن بيتنا للمستقبل

-اصرفي واشتري حبيبتي اني ادزلج غيرهن

باجر اگل لأمي تجيبهن الج

-مااريد والله كل شي عندي

-ميخالف اخذي جزء منهن اذا مترديهن

-تعبك تريد اصرفه عالتفاهات

-وصية فرقد انتِ شترديني اگله اذا تواجهنا بيوم

-عمرررك ماقصرت لا بوجود فرقد ولا هسه

خالتي ماتتحمل أيجار ومصرف لوحدها اللي تگول عليهن مصرف الية انطيهن لخالة للآجار

-مكفيهم وزايد

اخذتنا السوالف ونساني الزعل غصبا عني

وراح 

الأيام تمر ثقيلة وغياب الكل سبب فجوة بصدري

شالو بيت خالة ام رضا لمنطقة بعيدة نسبياً وبعد أستقرارهم بكم يوم رحنالهم ماخذين هدية بسيطة

البيت مرتب وخالة متعرفة على موظفة زوجها عنده

مجمع اثاث وماخذة عالقسط اثاث مرتب وبسيط

جرتني فاطمة مصعدتني لغرفة بالطابق الثاني

-شوفي صباوي اني تخيلت هالغرفة الكم

باوعت غرفة متوسطة ومصبوغة أبيض

اتصلت فاطمة برضا وحجت

-رضيوووو مرتك يمنه وشوفتها الغرفة

اخذت التلفون احجي

-ها عيوني

-انت عيوني شلونج شفتي البيت

-يخبل بالعافية

-ربي يجمعنا بي على خير

اووو يجوز علما ارجع نگدر نشتري بيت

-يارب يفتحها بوجهك من كل اتجاه ويرزقك من حيث لا تحتسب

-صِبى رجعي للدوام السنة

-ليش صوتج هيج بسرعة نبرة الحزن ارتفعت بي

-اتفقت ويا نداوم سوه يمتحن ويلحگني للخامس

ونداوم سويه

-تعتقدين فرقد يقبل بتصرفج

-محد راح يعرف شعوري ومدى حزني

هسسسه اترك الموووضوع وگلي بقجة شلونها

-ولج غمزة اسمها عالأسبوع الجاي عرسهة تنتقل لغازي عنتاب

-الله وياااااااها

-ههههههههههههههههه فرحتي ام عيون الحوووولة 

-تحبني اني وعيوني الحولة غصباً عنك

-اييييييييه ايييييه يااخت فريقد احبج

تجي ساعات أگول شلون صبرت سنة بدون

مااشوفها واني الجنت ابوگ الفرص بوگ

من الدنيا حتى اشوفج واتمتع بشوفة هالعيون

الغبيييية

-غزل معوق ذني موووو عيون عوج ذني عيون كبار بيهن حور حسن هيج فرقد جان يگول وبعدين محد يلاحظهن الا يركز يلة 

هو يحجي صاحو تركني وراح

واني وفاطمة نزلنا جوه

وبين سالفة وضحكة رجعنا للبيت

لگينا الهوسة ببابنا وأيمان تعيط

بثوبها المشعمط وكفشتها الصفرة

-امشيييي لج قرج ماالج فلوس يمي

-بت الكلب مو گلتي اريد اول اسم بالسلفة

علمود عملية لزوجي

وييييينه زوجج السگط خل نتفاهم ويا

-اثبتي حبببببي اثبتي اني ماخذة منج

فلوس

-باوعي ولج لا عبالج اني هادئة

والله والله سحلتج تصير مضرب مثل بهاي المزبلة

العايشين بيها طلعي الفلوس لا اشگج شگ

-عوووووع عوووووع مابقى عليه الا وصخ رجليه

هي گالت هيج والمرة هجمت عليها سحلتها سحل من كفشتها

ردت اروح اجرهم منها وخالتي سحبتني من كتافي

-گعدي يالعوبة سينما وببلاش ليش نوقف العرض

ضحكت غِنى وراحت دفعتهن وفاتت للبيت

دقايق والناس فاككتهن

دخلنة وهي تمسح الدم من حلگها وتباوعلنا

-أكبر عارات ومتستحن 

جاوبتها مُنى

-ليش بالله

-يعني تشوفني اتعارك ومتساعدني

ردت خالتي بضحك

-تستاهلين خية بايگة فلوسها

-لا بايگتها ولا هم يحزنون كل ماهنالك اخذت

اول اسم بالسلفة بس مااگدر ادفع بعد

-ههههههههههههههه يعني اشتركتي مرة وحدة

بالله شسويتي بالفلوس

رفعت حاجبها وعدلت شعرها

خالتي غمت نفسها

-بس لا تگليلي سويتي حواجبج المصخمات

وشعرج

-ليش لا مو عندي رجال اريد ادلعه

هزت ايدها خالتي ومشت فهذا هو أسلوب أيمان

غير مبالية معظم وقتها مدلعة وممكيجة وفاتحة الباب تتفرج عالرايح والجاي

تاخذلها ايام تطلع للمناطق المرتبة تحف وتصبغ

وتاخذلها أيام تعيش عالة علينا

إما البنات داخلات على نهاية سنة مصيرية

اثنينهن ينجحن من الخامس للسادس 

واني جاي اشجعهن وأساعدهن بكل شي

رغم ممانعة غِنى ورفضها لمساعدتي

اللي تقضي معظم وقتها يم قفص البلبل

اللي أشترته

تگعد يمة تقرأ واجباتها ومراجعتها ولازال

اخو صديقتها ياخذها بدرس الرياضيات

ومعظم وقتها على التلفون تراجع ويا غفران

هدأت نفسها ودائماً مبتسمة ومرتاحة

وهالشي انعكس علينة كلنا ماكو توتر ماعدا

وجود ابويه وأيمان اللي متجاهليهم وتاركيهم

ولا زلت اني كل يوم صبحية ياخذني الحنين

لمكانا القديم البس واطلع متسللة الفجر من الباب

الخلفية 

وأگعد عالتل ادور علي بين الشباب اللي يتدافعون

عالشغل وسيارات البلدية اللي تجي تذب حمولتها

وتروح

من ايأس أرجع للبيت وأرجع أحاول أعيش بغيابه

افتر واشغل نفسي بين التنظيف والطبخ

والمسؤولية اللي متحملتها بغياب خالتي

بشغلها وتمر أيامي الطويلة بروتينها

وية امتحان البنات وتميزهن وانتقالهن

لمرحلة السادس بين ابتدائية واعدادية

وتعطيلهن للأستراحة غِنى ودرس الرياضيات

الخصوصي المجاني

و مُنى وطلباتها ودلعها على خالتي واني مستمرة بأنتظاري لرضا عسى أن يرجع وياخذني لعالمة وأرتاح 

ورجعت الشتوية بعد ماداومو البنات

وفرحة غِنى بوصولها للسنة اللي تفصلها

عن الجامعة جانو البنات بأنتظار أمتحانات

نصف السنة والتوتر مالي الأجواء

وطيلة فترة شهر تغيرت نفسية غِنى

من الراحة للتوتر

ومن الهدوء للأنفجار بكل شخص يسألها شبيج

لتگعد ويانه ولا تاكل ولا تحجي

اتقرب منها تبتعد ومتريد تحجيلي

سبب حزنها وتعبها بهالفترة

كل يوم من تروح للدرس ترجع ذبلانة أكثر 

امتحنت اول درسين بتوتر وقلق

وصلت لأمتحان الرياضيات قبله بيوم

راحت لدرس الرياضيات يم اخو صديقتها

بس تأخرت 

اتصلت بيهة اربع مرات خمسة وماكو

خالتي جانت هي و مُنى يم دكتور الاسنان

وأيمان كالعادة تفتر وأبوية ويا جماعة السوء

من القلق طلعت للشارع بسرعة لأن قرب الغروب

وگفت انتظرها من يأست مشيت بسرعة قريب المدرسة حتى اخذ طريقي للمعهد اللي هي دلتني علي

بنص الشارع بعدني 

لاگتني سيارة توقفت بسرعة من شدهتي ماشفت السايق وما اخذ گلبي وجذب نظري غير منظر غِنى وحجابها المخربط ووجها المنفجر بالدموع والحمار اللي يستولي

على خدودها وهي تنزل من السيارة مسرعة 

ركضت ناحيتها بعد ماالسيارة شخطت

بس شافتني مشتلي بتعب شمرت نفسهة لحظني

سألتهة بفزغ وخوف

-شبييييج شصايرلج

تمتمت بصوت مرتجف

-ظلموني وكسروني صِبى أذوني وكسرو گلبي 

ماجنت أعرف أن هاية اللحظة بالذات

راح تكون بداية النهاية لشخصية غِنى

الشغوفة وبداية شخصيتها الجديدة

المليئة بالأندفاع والتحدي 

غِنى

_____________________

وعلى قدر الألم يكون الأنتقام

متقابلين عالكراسي بعد نهاية عطلة نصف السنة ممتدة ايده

ممسكة بأطراف أصابعي

بعد الأعتراف الضمني اللي أرسله برسالة

وهو يگول

( ماجنت أعتقد غياب اسبوع عن عيني راح يسبب هالألم القاتل لگلبي)

عينة بعيني مبتسم بهدوء

-غنوة

-هممم

-واضح على ملامحي شعور الغرام

صامتة وعيني بعينه

-أحبج غِنى 

ابتسم وهو يكمل كلامة ومنطلق يشرح

مشاعره

-ادري من راح تسمعين كلامي راح تگولين شگد كلامه

تقليدي

قاطعتة اجاوبه

-اني مسامعة هالكلام من قبل لذلك مااعرف اذا هالكلام

تقليدي او لا

-يعني شعورج وياي هو اول شعور

-امممممم

-واني كذلك مشاعري ناحيتج هي الأولى ولأول مرة

أحسها بسبب مسؤولية أخواتي ووالدتي

ودراستي اللي لا زالت مستمرة نسيت نفسي

وركنت مشاعري عالجانب لحد ما اكتفيت

-خلصت دراسة

-اللي گدامج معيد بالجامعة ......قسم الهندسة المدني

-الأستاذ المهندس شجاع ......... شلون صرت أستاذ

مبدع بالرياضيات وانت مهندس 

-لأن عندي ولع بالرياضيات طبقته على أرض الواقع

وبديت بالتدريس

امتدت ايدة ينقر على خشمي

-مثل ولعج بالرياضيات بالضبط

بهتت بوجهة وابتسمت ببلاهة

-اني

-ياآنستي الصغيرة جنت من البداية أعرف مدى شطارتج بالرياضيات اتابعج وانت تكتبين الحل الصح وترجعين تغلطين نفسج عن قصد حتى اشرحلج

نزلت راسي هرباً من كلامة فرغم جرأتي 

هالكلام دغدغ مشاعري وأصابني بحرارة الخجل

-أعترفي ياجميلة

رفعت راسي مبتسمة

انقطع حبل افكارنا واعترافنا مع دخول

الطلاب للقاعة وبداية الشرح يتحرك بخفة بين

الأربع سبورات اللي محاوط بيهن القاعة

ويشرح وبين كلمة والثانية يسترق

النظرات المحاظرة تطول ساعتين فبنص المحاظرة

ينطينا ربع ساعة نرتاح

وهالشي خلانا نتعرف على بعض ونشكل مجموعات

اني وغفران وويانا بنات اثنين من غير مدرسة

زهراء وماسة وشباب اثنين واحد مصطفى

والثاني ضرغام يصير أبن خال غفران ومصطفى يصير صديقة 

سوينه مجموعة نتبادل المعلومات بالأستراحة

وبالتلفون اللي هدتنيا غفران هو تلفونهة القديم جددتة وحبت تهديني هذا فمرات اسوي نت عالرصيد من المصروف اللي أجمعة من خالتي 

ومسوين مجموعة عالماسنجر نتراسل

ونسولف

وهالشي قوة علاقتنة ضرغام ضحوكي مرح

ومنطلق ومصطفى هادئ وشاطر

من تخلص الاستراحة نرجع من بره ماكلين او شاربين شي ونگعد بكراسينا وبوقت الطلعة

صارو اغلب وقتهم يتمشون ويايه للسيارات

وهكذا تعودت عليهم

أماحب شجاع الية صار واقع نتبادل الرسائل

ونسولف طول الليل ونظرات الحب والوله

اثناء الدروس

وهيج استمريت الى أن نجحت للخامس

وطول العطلة اداوم بالمعهد اغلب الوقت

ماكو دروس نگعد لوحدنا بالقاعة نحجي عن كل شي

أحلامي وأحلامه نتبادل الافكار

يقويني ويشجعني الموضوع بالبداية جان

مجرد محاولة للهرب من الواقع

حاولت اهرب من واقعي لعالم شجاع لكن

الواقع يختلف أنغمست بحبه لدرجة

الوله وصرت انتظر الليل يمضي حتى التقي بي

بطريقة للجامعة يمر ينزل اخواته للمدرسة

ونلتقي لمدة ثواني يغمز بمرح ويطلع واحيانا

يسلم عليه ومن ارجع للبيت يلازمني بالرسائل

مثل ظلي

صار وقت الدروس يغافلني ومن اطلع الگه بجنطتي

مصرف ورصيد وحلويات

وصار ميوصلني للسيارات يخلي اصدقائي وصديقاتي

يوصلوني حتى محد يحس بشي

تخليت عن فكرة الطمع ومحاولة التسلق وبگلب

صغير يدگ للمرة الأولى حبيتة حب صادق

متفائلة لعل الأيام تجيب ويا دورانها خير وتسعدني

ويا

الى نهاية السنة وهمسات شجاع الية ووعده

بأن يخطفني لگلبة بس ادخل جامعة

عطلت براحة بعد تفوقي بالخامس 

اخذت استراحة عشرين يوم وبديت وراها

اروح لدرس الرياضيات بس هالمرة صح شويه

اواجه صعوبة بي

برجعتي لاحظت تغير نظرات ضرغام ناحيتي

ومحاولاتة للأنفراد بالحديث ويايه بس

وحتى ماسة اللي هي اقرب وحدة اليه

اقرب حتى من غفران لاحظت هالشي 

على ضرغام

واني اتحاشى الكلام ويا لوحدنة لأني كبنية ميزت

نظراته وكلامه وفسرتة لأعجاب

وداومنا بس خلال الدوام غفران تغيرت هوووايه

علية وأبتعدت

صارت قليل متحاجيني والا للضرورة

لحد قبل أمتحانات نصف السنة بشهرين

أجتني وجهة مشتعل نار سحبتني للساحة

بعيد عن عيون البنات

-شبيييج غفران

-أنت تحبين ضرغاااام

صفنت بوجهه

-لا والله ولا مفكرة بي اصلا

-ليش يحوم حواليج

-انتِ شفتيني انطيته وجه لو حاجيته

-شمدريني بيج انت تخلين احد يعرف عنج شي

مسوية نفسج غامضة

-اني مسويتلج شي

-اييييييي مسويتلي اني اللي احبه من صغري وانت اجيتي بسنة ونص خليتي حبج

-والله مامعترفة بي ولا يمه وسألي واني

أواجهة اقسم بالله مالي علاقة بي

-ابتعدي عنه اني يتيمة وعشت بين بيت خالي واهلي

واحبة من واني صغيرة

-فهمت والله بس وروح اخويه ماادري

عن كلامج شي

نقرت على كتفي وطلعت

-حذرتج بعد

ومنها انقطع كلامنة اروح للدرس وأحاول اتحاشاهم كلهم اشوف غفران وزهراء يبسبسن بينهن

وضرغام بكل مرة يحاول يحاجيني

ومصطفى باقي صافن عالوضع مستغرب

اللي صاير وسبب زعلي اني وغفران

بس اللي مهون عليه هو شجاع وهمساته

الرقيقة وتشجيعه اليه

وبدون اي نقاش خرجت من گروب ماسنجر

وغيرت الحساب ولغيت

القديم وماانطيت حسابي فقط لماسة

البقية مابلغتهم اساساً

استمرينا هيج لفترة الى أن تواجهنا آني

وضرغام بنهاية الطريق للسيارات

بعد ماالكل صعد لأهله وهو مگابلني

-لتغلسين مبين علية احبج

-حبتك العافية اني هم احبك مثل اخويه

واكثر والله

-مو اخوج احبج احبج

-خلينة اصدقاء ضرغام وانتبه لدراستك مباقيلنه

شي للجامعة ملحگين عالحب وخرابيطه

-ليش رافضتني مفكرة بأحد ثاني

-ممفكرة وحتى لو فكرت هم هالشي ميخصك

-اندمج والله على هذا كلامج 

ابتسمت مستهزأة ومشيت وصارت بوجهي زهراء رافعتلي حاجبها وهي تصعد لسيارة ابوها

صعدت بالكيا منطلقة لمنطقتنا

متناسية هالحدث بعدهة بدت غفران تأذيني

بكلامها بالدرس وحتى بالمدرسة لكن اني تحاشيتها

رغم حزني على صداقتنا اللي تدمرت 

وضرغام ابتعد بشكل كامل وصار يبادلني

نظرات غضب نارية من بعدهة ترك الدرس

نهائياً وصار ميجي بس بقى يلاحقني عالخط ويرسل 

رسائل غاضبة قابلتها اني بالأهمال وعدم الأجابة 

وبعدهة رديت حتى انهي المهزلة 

ألى أن حظرته

وهيج أستمرت الأيام ماشية بنسق رقيق

بسبب وجود شجاع بس أثار أستغرابي وحيرتي

بيوم وجود ضرغام بالدرس قبل الكل دخل لگاني گاعدة ابتسم بوجهي بعذوبة أستغربت هالأبتسامة

تقرب بسرعة همس

-يتمنعن وهن الراغبات ماادري بيج هيج نار

لتخافين سرج ببير 

شمر كلامه علية وطلع اني موفاهية ولا غبية

بس گعدت احلل كلامه وأستنتجت أن هو عرف عن علاقتي بشجاع وحسيت بالأرتياح معناها راح يرتدع عني وهيج خلصت منه

الى أن أمتحنت اول درسين كل شي طبيعي

الدرس الثالث جان رياضيات قبلها بالليل اراسل

بشجاع ميرد اتصلت يرن بدون جواب انطيتة الف

عذر وانطلقت العصر للمعهد انتظره قبل جية الطلاب

بساعة الا شويه

گعدت بالقاعة اتصلت بي رد بس صوتة جان تعبان

-ها عيوني وين صرت منتظرتك

-انزليلي

-ليش غير هنا نگعد

-لا اليوم مااخذهم گلتلهم مريض 

-بيك شي

-تعبان

نزلت على أمل أن اشوفة ونصعد نگعد بالقاعة يدرسني وأرجع للبيت لگيت سيارته واگفة فتح الباب مبتسم

-تعاي صعدي باردة عليج

-وين صاعدة تعال نگعد بالقاعة

باوعلي بحيرة نزل قفل السيارة وصعدنا

دخلنة القاعة قفلها من الداخل استغربت تصرفه

بس هنا جان غلطي انطيته گلبي وأماني

وعشت ويا الحب بكل جوارحي

دخل غلق بردات القاعة

گعدت على الكرسي اللي دائماً أگعد علي وهو يجيب كرسي مقابيلي ونگعد بس فجأة حل الظلام بالقاعة 

وگفت متسائلة

-هاي ليش طفيت الأضاءة

-عندي صداع قوي

ضوة قليل جاي من اطراف البردات

گعد عالكرسي مقابيلي

-ليش مارديت علية البارحة

-تعبان جنت هووووايه

صمت للحظات وأستأنف كلامه متسائل

-حبيبتي؟

-عيوني

-هم تفكرين ساعات تگولين شعندي بشجاع اكبر مني

بهواية اخذ واحد بعمري

-عمري مافكرت آني من أختاريتك 

أختاريتك بكل جوارحي وفرق السنين اللي تشوفه

اني أكبرهن وياك ولخاطرك

-او آني أصغرلج

-لا انت هيج مثالي بعيني وجبير هووووايه جبير

يمكن يجي يوم احجيلك كل شي عني

حتى تعرف مدى تأثيرك على روحي

صفن بوجهي وسكت سند راسه عالكرسي

ويتابع نظراتي اللي تتوزع على وجهة 

سندت راسي مثله واستمر الصمت لوقت

طويل امتدت بيها ايدة تمسح على رموشي

-تعرفين اول مرة شفتج شفت حواليج طاقة

تلمع مثل كرستالات نااااعمة صغيرة منثورة حواليج

منطيتج منظر غريب

-شنو هالكرستالات

-طاقتج تفيضين طاقة حتى مشيتج غريبة

وصوتج وكلامج واندفاعج

-وشصار

-عجبتيني

-وبعدهة

-دخلتي هالدماغ وهالگلب

بس .........

رص عالكلمة وهو يگولها ووگف معتدل ساحبني

ويا

وگفت مستغربة دفعت نفسي ليوره لأن اول مرة

نكون بهالقرب سحبني بقوة ممسك بأيدية بقوة 

-شنووو شجاع شبيييك 

-عجبج صغير وشاب وطاگ موووو

-منووووووو

ضربني على حلگي بظهر أيده ارتديت ليوره

وارتطمت بالكراسي مصدومة

تقدملي

-صووووتج مااسمعة اشششششش

تحركت اريد اطلع واني ابجي وكلماتي گوة تطلع من بين شفافي

-والله بعد متشوفني أقسم بالله تنسى وجودي للأبد

سحبني بسرعة اجت ايدة على حجابي وگع

مالحگت اسوي ردة فعل تحت نسياني ان الباب اساساً مقفول

-والج عين تحجين

بعد هالكلمة ماعرفت اللي صار

ضربات متتالية على وجهي وكف ايدة

الثگيل ينزل على جسمي بألم وهو يحجي بحرگة

-لعبتيها صح سنتيييين لج سنتين شلووون گدرتي

تضحكين عليه

دفعتة بقوة احاول أستعيد انفاسي

بصوت رايح

-أقسم بالله بعد متشوف حتى ظلي

بس هسة اشرحلي السبب ليييييييش 

تقرب وهو يدفعني على كرسي ويگعد بالگاع يم رجليه

يطلعلي محادثات من حسابي القديم اسمي وصورتي وحسابي واني احجي ويا ضرغام واكو كم صورة

لصدر بنية ظاهر وشعر وكم صورة خليعة ممبين منها

شي 

-بينما آني محافظ عليج وايدج استحسف ألزمها

بايعة نفسج بررررررصيد لأبن خاااااااالي

يبست شفافي وماعدت أگدر أتنفس وگعت ادية اللي

جنت امسح بيهة دموعي بالگوة طلعت الحروف من لساني

-آني 

-هذا مووووو حسابج

-ايييي بس والله لاغيتة صار أشهر وتعرف انت حسابي الجديد

فتح تلفونه والنت وبحث اسم الحساب

طلعلة الحساب موجود

بلعت ريگي أستغراب

-شجاع

-اسمي لتجيبي على لسانج النجس شگد صارلج تتواصلين ويا

-وروح أخووووويه مو اني

-احترگت روح...............

توقف عن الكلام من سمع شهگتي واني أسمعه

يريد يسب فرقد

-لتحجي شيييييي لتحجي مو اني ماأسويها

لتشوفني جريئة بالتعامل وياك لتشوفني اتعارك 

وادافع عن نفسي لتشوف لساني ماخذ حقي بكل

وقت رغم هالصفات اللي البعض يشوفها عيوب

لكن اني ماعندي الا هالشرف ساترة

بي نفسي عمر هالكف ملمسة احد

وعمر هالجسد ماشافة واحد ولا تفرج علي

-شررررريفة وستتتتتر وانت تدزين صور جسمج لضرررررغام

گالهة بغضب واجة بسرعة ناحيتي رفعني من الكرسي

يبوسني بقوة ويحجي 

-جاااان گلتيلي اريد علاقة كاملة جان حجيتي

حتى اسد حاجتج الجسدية

دفعتة حيل رجع حظني وايده تسللت تحت قميصي واخذت شفافة مسارهة على رگبتي

عطت ودفعتة وبكل مااملك من قوة ضربته على صدرة

وصوتي والرجفة البي يشرح مدى أنهياري

-اني هيييييج تعاملني 

شلت الجنطة مالتي ضربته بيها اجت بوجهه وقطرات دم سالت على جبينة وهو يباوعلي 

-مااااانساها الك والله

عمررررري ماانساها وروح اخووووويه راح تندم 

تقدم ناحيتي ضربني حيل والتلفون بيدة شخط خدي

والم صاب وجهي

-هذاااااااا مو جسمج مو صدرج اللي طالع

مو رگبتج مبينة يتفرج عليها ضرغام ويشوفها لجماعتة

شنوووو اني بيش اختلف عنهم 

حسرات متتالية لزمت صدري ودموعي رفضت

أن تجف وكلماتي طلعت متقطعة

تقدمت بسرعة ناحية نقط الكهرباء شغلت الأضاءة

واني افتح دگم قميصي بسرعة

باوعلي وكأنة استوعب شسوه

تقدملي وهو يلزم ايدي بغضب يسد القميص 

دفعتة حيل تراجع وهو ينضرب بكرسي ورا

انفتح القميص وطلعت من تحته الفانيلة المفتوحة

فتحة عميقة شوية

ضربت على صدري حيل

-تشوووووووف باااااوع وقارررررن

شوف الشامات اللي مالية صدر البنية بالصووووور

مووووو اني هاي مو اني

لفيت القميص بسرعة اسدة وايدي

رفضت أن تتوقف عن الرجفة

احجي بصوت مرتجف مالي الخذلان

-شگددد حاول ابن خالك واني اصده وحتى قطعت

حديثي ويا شگددددد توسل وانت واگف بعيني

حجة وصوته تحول لنبرة مستفسرة

تحاول تلگة الحقيقة وتبحث عنها بكوم

الخراب اللي أحتل روحي

-بس فهميني

-شفهمك شنوووو

بدة يسردلي اللي صار واللي سمعه

وما كسر گلبي ولا حول روحي لأشلاء متطايرة

وية ريح الغدر غير هالجملة

-غفران گالت

اختفى صوتي العالي وحلت محله نبرة خذلان

-شگالت

-گالت أن بينكم شي

-بيني اني ومنو

-ضرغام

-بسس فهمني شلون عرفت

گعدت ساندة راسي على كفوفي بتعب

گام يدور حول نفسة ويحجي

-قبل يومين اتصل بية خالي عصبي

اول شي گاله

-شجاااااااع خالي أنت فاتحلك ملهى لو معهد

-شنووو خالي شهالكلام

-تجيني هسسسه ضروري

-جايك

لبست وتوجهتلهم جانت غفران هناك تقريها

مرت خالي وياضرغام تدرسم فيزياء

دخلت لگيت وجوهم مگلوبة وغفران عيونها

ناطة بجي وضرغام عصبي يفتر بدون مااسلم

سألت غفران 

-شصاير

ركضتلي تبجي وخالي طلع من الحمام للهول واجهني

-اگعد

گعدت وغفران بصفي

-شكو خالي

-شوف شجاع انتم اولاد اختي وكلكم نفس المعزة

بس غفران هاي بنتي اني الربيتها

شلووون تسمح لنفسك تخليها تختلط بهالعاهرة

اللي وياهم بالمعهد

صرخ ضرغام

-كاااااافي يابة لتجيب اسمها بالموضوع

صرخ خالي

-لسااااانك لااجي اسكتك بطلقة ياساقط

-غييييير افتهم شكووووو

نطت غفران من يمها

-غِنى على علاقة بضرغام وخالو شاف سوالفها

ويا

-شنوووو علاقات شنو غِنى 

-البنية اللي أسمها غِنى على علاقة بضرغام

الأفندي گاعد مسوي نفسة يقرأ بغرفته

وغفران تفتر يم خالتك بالمطبخ دخلت علي

شو شمر التلفون جوة المخدة

سحبتة منة وشوف شلگيت 

مد خالي ايدة لجيبه طلع تلفون ضرغام اللي انتفض

-ممنوع تفتحون تلفوني هاي خصوصيات

-تسكتتتتتت لا اطيح حظك

باوع شوووووف السوالف والسخافات اللي تدور بين طالبة عندك وبين ابني المصون

شووووف هاي اللي ابني يگول صديقة غفران المفضلة

ربحنة اذا انت مخلي هيج نموذج عندك بالمعهد

مااتذكر اللي صار بس صورت المحادثات

ورجعت للبيت وياي غفران اللي اكدتلي انكم على علاقة ببعض

-غفران حكمت وضرغام نفذ وانت صدگت

-شترررردين اسوي حسااااااابج هذا حسابج لووووو لا 

-والله لغيته

-لييييييش

-بسبب ضرغام والله ماردت اسوي مشكلة

واسأل ماسة

سحبت تلفوني اتصل بيها فتحت خط وفتحت السبيكر

-ها غنيووة متذكرتني اليوم السجاجة

جاوبت بأستغراب بس كأنها فهمت الموضوع وبدت ترد وتحجي اللي صار 

-حذفتي الحساب وسويتي غيره وحتى گروب الدرس اللي نقره بي تركتي

-ومن شوكت ضرغام يلاحگني

-من شهوور وحتى اني ومصطفى حاجينا علمودج

حتى يبطل يهددج عالخط

بسرعة أستوعبت الموضوع وطخت ببالي الرسائل

غلقت الخط من ماسة وسلمته التلفون بيدة

-التلفون يمك شوفه

تركتة وگعدت على كرسي وغمضت عيني واني اخفي وجهي بكفوفي

اخفف ثورة الغضب اللي اجتاحتني والدموع اللي رفضت تتوقف

لمدة ربع ساعة مغمضة عيني اتمنى بيهة

كل شي حلم 

انمدت ايدة وخر ايدي من وجهي

-أكو لعبة بالموضوع

-تمام

-جاوبيني فهميني لتخليني حاير

-ياررررب دائماً تبقى حاير ويبقى السهر ملازمك

وذنبك بحقي ياكلك أكل

سحبت التلفون والجنطة الصغيرة مالتي

والكتب اشرتلة عالباب يفتحه

-متررررحين لحد مااعرف

-أعمى من يغطي الشمس بغربال

الحق واضح بس عقلك رافضه لأن اختك

شهدتلك علية زور وبهتان

بهالعلاقة جنت مخليتلك مقام عاااالي

واني الطول عمري مخليه أبويه مثال گدامي

وكارهة حتى طاري الرياجيل فضلتك وخليتك

بگلبي مثل شعلة نور نورت عتمة سنيني الأثنين

الفاتن

بس يلة كل شي الة حل والحل هسة أن اختفي

من نطاق وجودك

-هسة أتصل بغفران وحتى بضرغام

-شي خاص بيكم معليه انتم عائلة حلو مشاكلكم

لوحدكم

جرني من ايدي گعدني بالقوة وگعد مقابيلي بالگاع

ممسك ايديه اللي تدفع بي بمحاولة للخروج

من القاعة ومن حياته

فتح السبيكر يحاجيها

-غفران الج للعشرة اذا جذبتي هالسنة تنسين الدراسة

ابطلج وحظج أطيحة

بجت وهي ترد

-شمسويه اني شجاع

-انجبي وردي انت شايفة ضرغام وغِنى يتراسلون

او حاجين لو بس سمعتي 

-اني اسمعني ............

-لتجرجرين فضيها

-زهراء گالتلي

-راح اخابر ابو زهراء حتى حظجن انتن الأثنين يطيح

-لا لااااا شجاع والله اووووگف مو هي گلتلي

-فضييييييني

-اني سمعت خالة وخالو من تعاركو ويا ضرغام وگلت

-يعني مشايفتهم

-لا 

-ولا سامعة

-لا

-سهلة حسابج يمي

غلق التلفون وهي تبجي

-افتح الباب الدنيا راح تليل واختي تتخبل اذا تأخرت

عنها

-بس فهميني حقييييي أتخبل شلوووون والحساب يمه

-ادخل بگروب الماسنجر وشوف من يمتة اني طالعة الأشعار تلگا موجود بهاليوم نفسة غلقت الحساب والله

والله ما فتحته بعد وأساساً حذفته مستحيل ينفتح من جديد

سحبت التلفون من ايده دخلت عالحساب

المعلومات اللي بي كلها ظاهرة

وصلت رقم التلفون حسيت ببرد حلو اجتاح

أوصالي دفعت التلفون ناحية وجهه

-هذا رقم صاحب الحساب

بعد الموضوع صار يخصك

حقي وحق سمعتي اللي تمرمطت يم أهلك

رب العالمين ياخذة افتحلي الباب رجاءاً

يباوع للتلفون واليه مو مستوعب

فتح الباب ونزلت بسرعة الوقت غروب

على نهاية الدرج لزمني من ساعد ايدي

واخذني ناحية السيارة 

-ابعد ايدك اني ارررروح وخر

-اووووصلج ليلت الدنيا

صعدت دايرة وجهي للشارع

شنو من سنتين عجيبات غريبات صعدت بيهن بحبي لشجاع

لسابع سما ونزلت بيهن لسابع أرض

امتدت ايده يدير وجهي عطت بكل مااملك من أنفاس

-ايددددك لتنمد ناحيتي أبدااااااااااا ممنوع

-بس ديري وجهج أحجي وياج

-انتهينا ماكو بينة أي كلام

لزم التلفون مالته اسمعه يدگ أرقام

توقفت السيارة بسرعة وانضربت بالجام الامامي

اباوع وجهه باهت والتلفون موجه ناحيتي

كاتب نص الرقم وظاهر اسم

الوالدة ٢

هدأت عاصفة روحي بعد ما انطعن بنفس السجين

اللي وجهه ناحية گلبي

گوة نطق وكأنة أستوعب

-شلووون

-الجواب يم اختك 

گلتهة واني 

امسح دموعي اللي اول مرة ترخص وتنزل تحرك

ماشي وهو وعواصف أفكاره كاد ان يدعمنة مرتين 

لحد ماوصلنه شارع المدرسة وگفته واني أشوف

وجه صِبى الحاير وهي تتلفت تدور علية

نزلت تاركتة وهو ينادي بأسمي بتعب بمحاولة

لأصلاح خطأه

شمرت نفسي لحظنهه واني أوعد نفسي

-الكل راح ياخذ جزاءه وأولهم شجاع

وأختة

واني متذكرة مقولة جنت متخذتها

السبيل لحياتي

-قابل الأفعال بأفعال مثلها

لا تعاتب

الفصل السابع من هنا 

شكرا لزيارتكم عالم روايات سكيرهوم