رواية لا أعرف الطريق الفصل الخامس بقلم جمانه السعيدي
احب اوضحلكم ايمان ماتعرف شيخه سبب طلاكه
اصلا مستغربه ليش اختفت من حياته فجاءه وكامت ماتعرف اخباره ولا تتصل عليه
ايمان...حددنا يوم العرس واهلي مامصدكين راح يخلصون
مني يعتبروني عار ولازم يخلصون منه
المهم بااجواء بسيطه كان العرس
يعني بس عمته وجنته وبته اجن يكولون عندا خاله بغير
محافظه
المهم اني اجرت بدلة عرس حلوه وبسيطه واكو يمنا بنيه تعرف تمكيج اجت مكيجتني بلبيت
جابو سيارتين زغار سياره صعدنا اني وياا وامي
والثانيه عمته وجنته وبته وزوجت اخوي الجبير
طلعنا على بيته كبل دخلنا بلبيت
عمته كامت تهلل شويه كعدنا بلغرفه اني وياا بعدين طلع
عمته اتصلت على بيته كالت جيبو العشى
قبل المغرب وصل العشى
جدر بي دجاج وجدر تمن علي شعريه وعلاكه خضره
وخبز
الاذان ياذن مدو السفره والكل كعد يتعشى اله اني
ماقبلت اكل مااحس نفسي جوعانه
كملو العشى البنات لمن السفره بعدين جابن جاي
من خلصن اجا زوج عمته كال انريد انزف العريس
اطلعن برا
سلمت عليه امي وزوجت اخوي وطلعن
شويه سمعت صوت الهلاهل اجا العريس دخل وسد الباب
مرتضى...شلونج
ايمان...الحمد لله
مرتضى...انشاء الله مرتاحه
ايمان...الحمد لله
كعد بصفي على الجربايه
مرتضى...اني صح على كد حالي بس راح اشتغل ليل نهار حتى اسعدج ومااخلي ناقصج شي ابد
ايمان..انشاء الله
مرتضى...تعشيتي
ايمان..مااشتهي
مرتضى...هسه نتعشى اني وياج
طلع من الغرفه وحتى البركع مانزعه جمانه السعيدي اني ضجت من البركع ونزعته
رجع عليه شايل صينيه بيه اكل تمن وعلى دجاج وخبز وروبه وخضره
مرتضى...يله تعاي نتعشى هاا نزعتي البركع اعذريني مااعرف شلون انزعه
ايمان..ميخالف خل انزع البدله بلاول
وابدل لان البدله ضايقتني
هو بقه كاعد يم صينية الاكل واني اخذت دشداشه مال نوم
طويله وبيه فتحه صفح صدرها وردنه تول
رحت للحمام نزعت البدله غسلت جسمي وبدلت ورجعت علي
كاعد بنفس مكانه
علكت البدله وكعدت كباله اكل
مرتضى...انتي حلوه
ايمان...شكرا
مرتضى....لا صدك احجي انت كلش حلوه
ايمان...شكرا من ذوقك
كملنا اكل شال الصينيه وطلع
رجع اخذ دسداشه بيضه وطلع بدل ورجع
اجا كعد بصفي
مرتضى...تعرفين اني ابد مااقرب على البنات وبعمري
مااحجي وياا اي وحده
حتى هاي فكرت الزواج جنت شايله من بالي
بس عمتي تلح عليه ازوج ازوج صرت جبير لازم تزوج
ايمان...ليش شايل فكرت الزواج من بالك
مرتضى...الزواج مسوليه واخاف مااكدر ادبرها
ايمان...ليش مازوجت من بنات عمتك
مرتضى..ليش اجذب مايقبلن بيه
ايمان.. ليش شنو ناقصك
مرتضى...ماناقصني شي بس هنا مايردني
ايمان...انشاء الله ماناقصك شي
كان خجول لدرجه يخاف يقرب عليه أو مايعرف شلون يبدي وياي يعني خام بمعنى العباره كلشي مايعرف
من اهل الله
بعد عدت محاولات فاشله يله كدر يقرب عليه
هو رجال وكلشي تمام بس خجول
ماكان مصدك نفسه طار من الفرحه نام على وجه هلكد ماتعب
بس اني ماكدرت انام مامقنعه بي كلش ضجت
جواد رغم جان جبير بلعمر بس رجال
شخصيته حلوه اله هيبه
بس هذا احسه طفل مو رجال
خلاص هو هذا حضي ونصيبي
ثاني يوم كعدنا بلعشره عمته جابت الريوك
اني دخلت سبحت وكعدته حتى يدخل للحمام
بعدين خدرت جاي وكعدنا نتربك
عمته جايبه كيمر عرب وخبز حار وجبن
تريكنا وكملنا اني شلت الصينيه
وهو بقه كاعد يسولف وياا عمته
امي اتصلت كالت راح اجيبلكم غدا
اني دخلت للحمام غسلت ملابسنا وشريتهن
جابو الغدا عمته راحت واني وياا تغدينا وشربنا جاي
ورجعنا نمنا
العصر اجن كرايبه يباركلنا
بعدها مشت الأمور طيبه بينا
راح الخجل منه تعود عليه واني تعودت علي
بس مجرد تعود لا اكثر
اربع ايام وطلع للشغل جمانه السعيدي يجي تعبان يسبح وينام كبل
ماكدر يملي الفراغ الي بداخلي
يعاملني وكانما امه مو زوجته
يحبني ومايستغني عني
بس حبه اليه مو حب زوج الزوجته
حب ابن الامه يمكن هو جان محتاج ام اكثر مامحتاج زوجه
يمكن لان انحرم من امه وهو زغير
العلاقه بينا تمام
بس اني احسه ماكامل بعيني
اول مايدخل ينطيني الفلوس الي محصلهن كلهن
كلشي ماياخذ منهن
ولا يسئلني وين الفلوس
لو شنو اشتريت بيهن
واي شي مايسوي اله يسئلني
شلون طفل زغير ويتأكد امه راضيه عنه
وين اخلي هذا منيبن اجيب فلان شي هاي الحاجه اخذها
بلبدايه كلش ضجت
بعدين حمدت ربي وشكرته من ذكرت وضعي بيت اهلي
على الاقل رجال نفسيته حلوه مو بخيل مو اناني
كلبه طيب حنيين
ومامقصر وياي
هاي هي يمكن اني حضي بلزلم موزين هي كوه
هو اني حضي وياا اهلي شلونه
اله وياا الزلم
بديت اتعود علي وهو يتعود عليه بس رب العالمين مارزقنا بااطفال راجعت كلشي مابيه
هو راح سوا تحليل هم كلشي ماكوو
راجعت يم اكثر من دكتوره
وسويت مجموعة تحاليل كلشي تمام
الدكتوره سجلت فيتانينات للتقويه بلكت يصير طفل
رجعت اشغل وقت فراغي بلنت حتى اشرد من الواقع
الي عايشه بي
دخلت على كروب نسائي جمانه السعيدي اكو بنيه ناشره منشور تسئل
على دكتوره نسائيه زينه تريد تراجع يمه على موضوع الاطفال
اني علقتله كتبت اي ولله اني هم اريد دكتوره زينه
راسا اجتني رساله على الخاص
شيخه...هلو ايمان شلونج عاش من شافج وين هاي الغيبه
الطويله
ايمان..منو انتي
شيخه..هاي شبيج اني شيخه
ايمان..هله شيخه شلونج مشتاقتلج وين جنتي
شيخه..شوية ضروف
ايمان...شكد اتصلت عليج وماتردين
شيخه...اي مو قفلت الصفحه فتره يمعوده فوك مااحل مشاكلهن يردن يورطني وياهن
ايمان...كلش مشتاقتلج
شيخه..هاا ادورين حمل
ايمان..اي ولله اريد طفل
شيخه..شلون جواد وياج
( طبعا تعرف جواد نفصل عنه بس حبت أجره بلكلام)
ايمان...وين جواد زوجته كشفتنا وانفصلنا من زمان صار اكثر من سنه
شيخه...ياا شلون كشفتكم
ايمان...مااعرف ولله بس اجت كلبت الدنيا علينا وهو بس شافه كبل طلكني وانطاني حضر
شيخه..ياا الله لا يوفقه ليش
ايمان...يخاف منه
شيخه...شلون ادورين حمل اذا انفصلتو
ايمان...اني ازوجت
شيخه..بلعافيه يمته ازوجتي وشلون احجيلي مشتاقه السوالفج
ايمان...قسمه اجا تقدملي وقبلت
شيخه..هم زوجه ثانيه
ايمان..لا اني الأولى ولد اعزب لا عندا ام ولا اب ولا اهل
شيخه...شلون محضوضه بس انتي ويااا . اي شنو يشتغل
ايمان...عامل بناء
شيخه..عاد مرتاحه ويااا
ابمان..اي ولله انسان بسيط وطيب وحنيبن وعلى هواي
يتمنالي الرضا ارضا
شيخه...بعد شتريدين
ايمان..الحمد لله انتي ماتدرين اهلي شسوي بيه من انفصلت شبعت ضيم
مرتضى اجاني رحمه من رب العالمين
شيخه..هاا هو اسمه مرتضى
ايمان..اي
كلامي نزل سم على شيخه شلون ازوجت
ووين لكيت ولد اعزب واني منفصله
شلون الولد زين وطيب وحنيين
هاي الزواجه لازم تتنتهي باي طريقه
رجعت حجيت كلشي عن حياتي الها كنت كتاب مفتوح كدامه ورجعت اتكيد اليه بس هلمره كانت القاضيه
ضربتني ضربه بعد ماكمت وراها ابد
