رواية بيوت الصفيح الفصل السابع بقلم زهراء السراي
مع الوقت قد نتحول الى كتلة من حنين
أتفه أغنية عن الفراق قد تدخلنا في نوبة بكاء
وتسحبنا خيالاتنا الى مكان قد غادرناه منذ سنوات
وما زلنا بين الحين والآخر نغافل السنوات
ونعود أليه
هدوء الليل
وصوت الضفادع
وصراصر المستنقع بجانب
البيت تصم الأذن
واگفة بجانب الشباك
او مايسمى شباك
فتحة بالحايط بيهة جامة مكسورة
عيني على جدول المي
وعالعبرة الخشب اللي مخلينها نعبر منهة
على بيتنا وخياله يلوحلي يوقد بصدري النار
حيطان رثة وأثاث مستهلك وروح متعبة
أسمع بالراديو اغنية كاظم
تتردد
لم يعد صدر الحبيب موطني
لا ولا أرض الهوى المذبوح أرضي
لم يعد يمكن أن أبقى
هنا
فهنا
يبكي على بعضي بعضي
نزلت دموعي مسحتهة
عقلي يحثني ويشجعني
-شبيييييج صِبى
شبيييج انسسسسي طلعي من راسج
يرجع گلبي يحاججني
-ليش تنسين وسنين طفولتج ومراهقتج
وشبابج ويا
يرجع عقلي يرد بغضب
-هووو گال انتظريني هوووو سبب دموعج
وهاي أنتِ منتظرته من خمس سنين
بس هوووو
ااااااااخ ياهوووو
قاطع أفكاري دخول غِنى للغرفة
غِنى اللي انضمتلي بالأرق وصارت متنام
مثلي تجي توگف بالشباك بصفي بدون متحجي
لأن اذا حجت معناها نتعارك
انسابت دموعي وعيني عالجذع
وذكرياتي ويا رضا وهو ينتظرني هنا
حامل بأيده شي بسيط بعد متنام العيون
رجعتلي الذكريات مثل زخة مطر استقبلتها الأرض
الجافة بشغف
بهدوء تسللت أيد غِنى ناحية أيدي ممسكة
بيهة بقوة تبث مواساة خفية بمحاولة
لتهدئتي
ابتسمت همستلها
-گلب البشة
-دماغ الدينصور
ضحكنا ودارت وجهة ناحيتي
-غبية لو ميتة بعملتج هاي فلاش وقااااصر خبط
متنتبهين لنفسج شامرة نفسج للهلاك
-شسوي وأنسى
-لتسوين شي لأن مراح تنسين بس تناسي
-مااعرف
-لأن گلبج فاهي قوي نفسج الدنيا
هايه ماانخلقت للضعيف فهمتيني
-وانت
-شبية آني
-احجيلي سبب أرقج
-المواد صعبة والسنة ثالثة بيها هوووايه
مشاريع ومواد احتاجها الها
-أحاول ادبرلج التردي بس شوفة عينج خالتي
خطية تحتاج علاجات وجاي احاول قدر الأمكان
امشي الأمور
-لذلك اسمعيني اول شي خل اوضحلج
-شتوضحين
- اني جاي ابلغج مو خوف منج بس من باب
العلم بالشيء
-هذا هم حظي مااخوف
-اني مو اخاف منج اني أحترمج
-هم انعم الله
-دسمعي وتركي سوالف العجايز
-شكوووو دطلعيها للدرة واحجي
-جاي اشتغل
-انتِ وييييين
-سمعيني المواد هووووايه وكل شي
احتاج تعرفين كم سيارة اصعد لحد مااوصل
الجامعة
-افتهم
-ترة صار شهرين اني أشتغل
-صخام بعينج وووووين
-محل حلويات ومعجنات تقريباً كافيه لأن يقدم
حلويات وعصائر ومشروبات
ضربت على صدري بخوف
-مشروبات كحولية
كفختني وهي تهز بيدها
-ابونا العزيز خله عدنا رعب من كلمة مشروب
عبالنة الشرب بس كحول
-لعد شنو
-مشروبات عصائر طبيعية وهالسوالف
-تمام كملي
-متشوفيني مجاي اخذ منج بس الكراوي ميتعدن الخمسين الف هاي صار شهرين
-وشلون مرهمتها وية دوامج
-الأيام اللي مو ضروري ادخل محاظرات اروح
ومتفقة وياهم اساساً بس هسه حبيت ابلغج
لأن راح اشتغل جمعة وسبت بعد
-والمغفلة صِبى متدري
-خالتي تدري
-صلوات صايرات سر بعض انت وياهة
-تردين الصدگ
-گولي
-انت وخالتي الكبار بهالبيت ولازم ابلغكم
-اخاف عليج
-بعد كفخات الدنيا وصگعاتها لتخافين
تعودنة وجسمنا تدبغ وعموماً أيام الدوام اشتغل
عالساعات بس جمعة وسبت لا دوام كامل
من ٨ الصبح ل٨ بالليل
-هووووووايه
-اهووووو كبرت راسج وبلغتج هاي صار
عندج علم مُنى بالثالث ويرادلها دورات
وانت متسيطرين عالمصرف عاد اساعدج بيها
مديت ايدي حضنتها
حضنتني شوية وبعدين دفعتني
-عووووع شنو هالمشاعر المعاقة
-تف ضيعتي اللحظة الحلوة
-ولي روحي فكري برضا الفگر واني اروح
انام باجر جمعة ورايه دوام من ٨
-وابويه
-ضحكتيني يااابو لج ابويه لو اغيب اسبوع
وارجع بيدي فلوس راح يبوس ايدي
تركتني وطلعت سديت فتحة الجامة المكسورة
بجرجف ورحت تمددت بفراشي
وفتحت المحادثة القديمة بيني وبين رضا
ورجعت بسنين عمري ليوره لسنة
٢٠١٥
واگفة يم الشباك والتلفون بيدي
وفاتحة الكاميرا أحجي ويا مبتسم
وعيونة تجدح اعجاب
-يخبل عليج الشعر الگصير
-حاااااارة وگلت أغير
-لتطولي بعد هيج يخبل مطلع وجهج
مسح بأصبعه عالشاشة
-لو تعرفين شگد روحي مشتهية حضنج
عيني منه وموتني قهر البعد نزلت دموعي
وسد الأتصال
ربع ساعة عيوني مابطلت دموع
وكأن غيم حزني قرر يمطر بهاللحظات
أشتد حزني بعد مارجع اتصل صوته مختلف
وحزين
-ها ام دميعة بعد مااتصل
-أتمنى أگلك أرجع بس گلبي ميطاوعني
أدري حلمك السفر أتمنى ترجع بس اشوفك
-وروح فرقد عيونج ممفاركتني من سفري
لليوم گدام عيني تتخطفين متمر شغلة حلوة
مااذكرج بيها بس قربت سفرتي لأوروبا
خاف ارجع ويدگولي منع سفر
-لا لا لترجع هاياني شبية أخبل
-ااااااخ صدگ تخبلين حوووولة ورموشج مكناسة
-للأسف متعرفون قيمة حور الحسن
ياجهلة
-هو ششالع گلبي غير حور الحسن
تنفس بعمق وحسرة
-لاتظل تفكر والله مرتاحة ومنتظرتك شوكت
متجي حضني ياخذك بدفو
غلقت الأتصال وطلعت برة الغرفة
لگيت غِنى گاعدة تقره راسها بالملزمة
وتودود وية نفسها جانت مرحلة أولى
رحت للمطبخ طلعت تفاحة وبرتقالة
قطعتهن بماعون وگعدت يمها
-اكلي شوية
-مااريد ماالحگ اكمل
-اكلي واني أساعدج وأراجعلج
-وانتِ شتعرفين
نفضت ايدي من شيف البرتقال اللي گشرته
الها
وگمت وصلت باب الغرفة وسمعت صوت شهگتها
هاي غِنى من يوم اللي لگيتها راجعة بالطريق قبل
سنة من گالت تعاركت ويا صديقاتي والمدرس
وصلها لليوم تغيرت تغير جذري تحجي وتندم
تجرح الكل وترجع تطبطب على جروحهم هدأت
وتهذبت روحها ورغم ذلك بعدها لسانها يرش
وكاحة عند الحاجة بس أغلب وقتهة أرق
وسهر وقراية جاهدت بالقراية والمراجعة
حتى بوقت مشكلتها ويا صديقاتها قرت
الرياضيات لوحدها ونجحت بتفوق مطلعة
معدل ممكن يدخلهة اي جامعة تحب
لكنها بكل أصرار أختارت الهندسة بالجامعة ال.........
وفعلا حققت اللي تريده ودخلتها
طول فترة العطلة بعد نجاحها صارت
تدرس بعض اطفال المنطقة بألفين وثلاثة
الراسبين والمكملين واللي تنطي
الها خالتي صح بسيط جمعتلها
مبلغ والمبلغ اللي دزتة خالة ام رضا من رضا
انطيتة الها ولمنى جهزن بي لدوامهن
اشترت قطع أساسية بألوان اسود نيلي
جوزي ووياهن كم قميص وكم حذاء
وحجابات وجنطتين طبيعتها حلوة ونازكة
ونظيفة متخرب الحاجة ولا تستحي ان تكرر الحاجة
وكلمتهة الجديدة اللي خلتني أطمأن انها تغيرت
اني مداومة لأجل هدف
جنت أعتقد ان هدفها النجاح فقط
لكن اهدافها كانت أعمق وأكبر
ورة شوية اني واگفة عالشباك
دغدغتني
-صبيوة
-ها غنيوة
-زعلتي مني
-علمود شنو
-لأن گلت شتعرفين
-انجبي بالله سوالف زعاطيط هايه شنو
ازعل
-والله اني مو قصدي هيج احجي
تفهميني
-لا فهميني أنتِ
-گلبي ميريد هيج يحجي
بس لساني يسبق مشاعري
-يعني لسانج الة عقل خاص بي
-يمكن او يمكن راكبة جن
-كافي سوالف روحي اقري ولج
وراج امتحان
-هالمادة بالذات لازم انجح بيها
-ليش
-اثبات ذات لأن اغلب الطلاب يگولون صعبة
-يلة ولي خل أنام
-تنامين لو تحاجين رضيو الفگر
-طاح حظج يامعفنة حاجيته قبل شويه
-اروح اقره جاووووو
-غناوي
-ها صبيوة
-مو محترمتج وجاي ادلعج
-گولي زوجة رضا افندي
-الله عليج هم تحتاجين شي ومتگولين
-لا والله اني اهم شي عندي الكروة اوصل بيها
للجامعة والباقي سهل اكل جاي اخذ منا
-خاف يعيبن عليج البنات
-طلعت من عقدة النقص بعد هذا وضعي عادي يعني
مو شي عجيب
-جديات يعرفون بوضعنا
-لا بس يعني عادي الاف مثلي بالجامعة حالتهم
المادية ضعيفة وعادية وحتى تحت الصفر
وعايشين وبعدين شبيه لبسي مرتب نظيفة شاطرة
وهاي اهم المقومات
طلعت تاركتني بحيرة مرجعتنني لقبل
سنة مذكرتني بموقفها ووضعها بعد مارجعت مضروبة من البنات الوياها قبل امتحانها وتغيرها وتغير نغمة حديثها وتذكرت اللي
صار بعد شهر من امتحاناتها بالسادس
جانت ناقمة وساخطة على كل شي
گعدت وياهة بس ردت اعرف شتريد وشبيها
طلعت بيها بالليل ورة البيت بعد ماالكل نام
گعدنة عالجذع
-احجيلي شبيج شغيرج
-هاياني مثل مااني ماتغيرت
-لا تغيرتي اكثر واكثر حتى كلامج تغير
ونبرتج تغيرت
-الناس تريد هيج تريد قليلة الأدب
اللي مو شريفة
-شرررف شجاب الشرف بالنص
-ههههههههههههههه اكتشفت أن البنية الشريفة تنداس
بالرجلين
-من منووووو منو يدوسها
-صديقاتها الناس الرياجيل الكل
-بس فهميني حتى اعرف احجي وياج
-ماكو شي بس مشاكل بين صديقاتي وشغلة بيها
شباب وشمروها براسي ومحد صدگني
-ولييييييش ماحجيتيلي من اول مرة اطيح حظهم
-ماااااريد اني ثبتت براءتي بلحظتها بس النتيجة جانت كسرة گلبي
-انطيني ارقامهم وعناوينهم
-مستحيل اني محيتهم من حياتي
-احجيلي تفاصيل
-مااحجي شي دافعت عن نفسي وخلص
-احد سوالج شي
-لا منو يتجرأ أصلاً
بس تعرفين شقررت بعد ماشفت هالعالم شلون
ماشي
-شقررتي
تقربت مني تهمس
-قررت اصير عااااااهرة
ضربتها على وجها ضحكت ضحك هستيري ووگفت
-العالم اللي عايشتة ميطلعني منه غير
العهر
وگفت ودخلت للبيت
رجعت وراها اتتبع خطواتها كل يوم
جهازها بيدها تحوس وتراسل وتضحك
الجهاز مينزل من أيدها أبددددد
ومتخلي اي احد يمد ايدة علي
هاي شهرين من العطلة على نفس الحالة
شكيت وأيقنت أنها تحجي ويه شخص
عالنت بقيت بأيامها وين تگعد الحگها وأتابعها
گامت تضوج مني وتتضجور
بعدها بأيام لاحظتها رتبت نفسها شعرها
سرحتة وخلت مكياج خفيف
نام الكل بس اني عيني مااخذت نوم أبد
هي تنام يم خالتي بالغرفة
مو حباً بخالتي بس خالتي تفقد
من تنام واكيد هالشي يفيدها
تراسل تخابر متجي يمي
بالغرفة تدري الأرق لازمني
ماانام اتصل بيه رضا نسولف بحدود
ال١٢ودعته وطلعت احساس مو حلو
صابني حسيت اكو شي الحقيقة
خفت تكون مواعدة أحد وتطلعله بالباب
بس اللي صار أكبر من مجرد موعد
رحت للغرفة ماكو يم خالتي
بالحمام بالمطبخ اختفت گعدت مُنى
وطلعنا برة آني وياهة ندور
من أيست گعدت بالطرمة أنتظر
تعبت من التفكير شسوت ووين راحت
منتظرة وأفتر بالطرمة المكركبة
وعيني عالباب
ومُنى گاعدة على جهة ترجف خوف
متقبل تدخل ماحسينا بيها
شلووون طلعت ويمتى
ساعتين منتظرة وايدي على گلبي
لا خالتي تگعد لو ابويه يحس اندفعت الباب ودخلت هي
تتسحب
بيدهة علاگتين كبار وبيها ريحة ميزتها وعررررفتها ريحة شررررب واضحة اللي يعيش بمدينة بيوتها
تحوي كل من هب ودب واشكال والوان من البشر
يميز ويعرف الريحة شررررب كحول
مُنى فزت واگفة واني سحلتها من شعرهة التفتت متفاجئة
شافتني دفعت ايدي ونفخت بضجر
-خييييير متابعتني شنو
جانت تحجي وعيونها مليانة دمع ووارمة من البجي
-عزززززززة بعين اهلج لج غِنى وووووين جنتي
بهالليل
باوعتلي رافعة حاجبها ورفعت العلاليگ
-طااااالعة
-وييييين طالعة ولج ترديييين تموتيني
-ميحتاج افسرلج طالعة وبالليل واضحة مووو
-ووووووويامن
لطمت على خدي وهي ضحكت بقهر
ابتسمت بوجهي وتقربت وحجت بهمس وصوت متلاعب
وعيونها مطرت دمع
-ويه رررررررجال
سحلتهة من شعرها لغرفتنا مُنى تمشي ورانا وتبجي
سديت الباب ودفعتها لنهاية الغرفة
ضربتها على وجهة وگفت ولا كأني ضربتها
مبتسمة بس عيونها لازالت مستمرة تدمع
-ويامن جنتي
-ويا واحد
-منين تعرفي
تقدمتلهة اگلب بجسمها فتحت قميصهة
وجها رگبتها اباوعلها
ساكتة ودموعة تتابع بسقوطها
-تبجين ندمانة ولج حيوووووووانة
منوووو هذا احجي
غطت وجهة بأيدها وبجت
-جنت عبالي انتقم منهم بهيج سوالف
طلعت انتقم من نفسي
العالم التهموني بدخولة والعلاقات والسوالف
الحقيرة اللي تهموني بيها
ماگدرت أسويها هاي مو آني
ولا شخصيتي ولا طبعي
لطمت على وجهي اعاتبها
-لعد شعندج وووووين رحتي شتسوين
وشنو هاي ريحة الشرب
باوعتلي مستغربة
-والله مو بيه منين الشرب
رجعت عليهة اشمشم بيها
-من فتحت الباب ودخلتي هبت ريحة الشرب
-والله بطالة ابوية مشمورة بالباب مو مني
باوعت لمنى
-مناوي روحي نامي يم خالة
طلعت وهي تمسح بدموعها فهذا طبعها رقيقة
ماتتحمل شي
سحبت غِنى وگعدت
-احجيلي الصار بالضبط
-والله وروح فرقد ماصار شي صديقي
عالفيس صار فترة طويلة من الشمال جاي
لبغداد وگال اشوفج بغباء مني
وافقت عبالي من اسوي هيج
احقق فد غاية بس الطبع يغلب التطبع
اني مو هذا طبعي
-سوالج شي احجي
-لا والله مسوه شي
تقربت منها بمحاولة لمعرفة سرها
-اني مو اختج مو سرج احجيلي بروح امي
-ماصار شي وهاي جانت تجربة وعمرررري مااعيدها
والله
-حيرتيني اقسم بالله حيرتيني وتعبتيني
-اعتبريها اخر مرة اتعبج بيها والله مااعيدها بعد
وروح فرقد
وگفت وهي تسحب العلاليگ اللي بيدها
شمرتهن بالبوفية
نزعت ملابسهة بدلت ونامت
او تظاهرت بالنوم حتى تخلص من شعورها
اللي لحد الآن مفاهمته
هاي غِنى تخوض معاركها وتواجه
بدون متشارك احساسها ويا أحد
.
.
.
طلعت من هالذكرى بالوقت الحاضر على صوتها الساعة بالسبعة وهي لابسة ومتحضرة
-ها صبيوة راح أروح
-بعد وقت ولج وين رايحة
-علما أوصل من كيا لكيا يادوب الحگ
باوعت بيدها علاگة
-شنو هاي
-الزي مال الكافيه
فتحته قميص بنفسجي وبنطرون
بيجي وشفقة
-ولج ليكون نازعة حجابج هناك ولابسة
شفقة
هزت ايدها وهي طالعة
-شگالولج ابيع مبادئي علمود شغل
البس الشفقة فوگ الحجاب
طلعت تاركتني وراها
هاي غِنى الشخصية الغريبة خليط
من العنفوان الذكاء والكثير من القهر
والحزن المكبوت
غِنى
_______
تعرفون أحساس السقوط من مكان عااااالي شاهق الأرتفاع
مكان تعرف أذا سقطت منة راح تلگه وقتها كل جزء بيك مكسور ومنفصل عن الثاني
هذا احساس السقوط الجسدي
أما السقوط الروحي فأذيته أكبر
لأن ببساطة الروح حسية غير ملموسة
لا تنجبر ولا تتعالج
هذا هو التفسير الوحيد للي صارلي
بعد اللي سوو بية شجاع وأخته
وأبن خاله
كسرو روحي وحطمو گلبي لأشلاء
ماهمني غيره هو
هو اللي حبيته وخليت أمل گلبي بي
كلامة الجارح تصرفاته اذيته اليه
ابداً ماغابت عن بالي أيام واني اطحن
بروحي مثل طحن الرحى ألوم نفسي
وأرجع ألومه وألوم أخته وأبن خاله
لعبة لعبوها بينهم ووگعت بيها آني
ورة أيام من اللي صار أجاني أتصال من
رقم غريب بعد ماحظرت أرقامهم كلهة
جنت متوقعة هو او هي او حتى ضرغام
أبن خالهم ردت اغلق هالباب للأبد
فتحت الخط وأجاني صوته
-الووو غنوة تسمعيني
-تفضل
-بس سمعي غفران
اجاني صوتها الباكي
-الو غِنى آني آسفة غلطت بحقج والله زهراء
گلتلي اسوي هيج
-اممممم تمام
-الله عليج سامحيني
-الله يسامحج مع السلامة
قبل لا أغلق الخط أجاني صوته
-غِنى انتظري احجي وياج
-مابينة كلام أن شاء الله هسه يكون
ضميرك مرتاح بعد أعتذار اختك ودموع
التماسيح اللي ذرفتها
-عاقبتها أقسم بالله ماخليتها امتحنت
تعاقبت بسبب فعلتها
-عموماً مالي علاقة
-سمعيني
-سمعتكم بما فيه الكفاية
صفعاتك وتجاوزك بالكلام الجارح
وكلامك المسموم بحق سمعتي كلها
محفورة وندبهة مراح تختفي من روحي
طول عمري
شكراااااا هووووايه ألك
ولأختك لأن صرتولي درس خلاني
أيقن أن مااكو صداقة ولا أكو حب
بالنهاية خليتني اكتشفت أن كل
الرجال قذرين ونفس التفكير
-انطيني مجال اشرحلج
-مع السلامة
غلقت الأتصال وغطيت بنوبة بكاء مريرة
عادتلي صياغة تفكيري من جديد
الشرف ماسوالي شي وطلعت خالية الوفاض
من قصة حبي
اذا اجرب الأتجاه المعاكس للشرف
ابتسمت بسري وكلمة عهررررر
تتردد ببالي
من يومهة غيرت الحساب بحساب جديد
دخلت بي گروبات عامة ومختلطة ترفيهية
وثقافية كونت صداقات افتراضية ومن بين كل هالصداقات كلها شخص واحد صمد ويا جنوني
ومزاجي المتقلب شخص صاحب شركة سياحية
بغدادي بس شركتة بالشمال
كل يوم نحجي بكل شي لحد التعب جربت اكون لعوب بدون مااجرح كرامتي نسولف بكل شي كذبت علي
بخصوص حياتي وهو تماشى ويايه اتشرط واتزعل
نتعارك ونتصاحب شهرين من الضحك
والزعل والدلال الى
أن طلب مني يشوفني وبگلب مطعون قررت
المغامرة بليلتها انتظرت الكل ينام
العصر سرحت شعري خليت مكياج خفيف
لمن نامو لبست قميصي وبنطروني وشمرت
الشال وتسحبت من الهول بما أن ابوية سكران
طينة وأيمان مطمورة طلعت راكضة لحد الشارع
العام تمشيت لشارع مدرستي
واتصلت بي هو يفتر بالمنطقة ميندل بيتنا
ماانطيته اي دليل على منطقتي
دگ التلفون
-ها غناوي وينج
-انت وينك اني بظهر الأسواق ركن المدرسة
-انتظريني دقايق استدير وارجعلج
دقايق وارتفع صوت الهورن
طلعت وتمشيت ناحية السيارة
طول الشهرين هو مشايف اظفري
صعدت صفن بوجهي
-لج زعطوطة
فتحت الباب حتى أنزل سحبني من ايدي
-ووووووين تعاي غبية لتزعلين
-لتغلط
-بت الكلب تخبلين
رفعتلة حاجبي
-رجعنة للغلط
-كافي خل اشوفج سكتي شويه لسانج
بالحقيقة وعالنت يرش رش
شعل الاضاءة فوگ راسي أبتسم
-والله لأن رافضة تدزيلي صورة گلت هسه
تجيني تشبه القرد وانصدم
بس لا صدمتيني شهالجمال
-لتلح كافي
-طايحة الحظ تگليلي عمري ٢٥ شگد عمرج الحقيقي
-راح انزل والله كافي
-ردي عالسؤال لج
-١٨ عمري
- وين تردين ترحين
-مااعرف بس مااتأخر لأن اختي تدري بيه يم
بنت عمي يعني اذا أتأخر تطيح حظي
-خاف تتصل ببنت عمج
-اكيد تتصل بس اني اتفقت ويه بنت عمي
راح تغطي عني
وبديت اسرد علي سلسلة متواصلة من الكذب
تحرك بالسيارة منطلق نسولف بكل شي
بعد ساعة توقف راجع بية لشارع
المدرسة المظلم
-يلا اني رايحة
قفل السيارة
-وين شويه وروحي ماشفتج
امتدت أيدة لازم ايدي
-شتگولين نروح لغرفتي بالفندق ناخذلنا نص
ساعة
سحبت ايدي منه
-وشسوي بالفندق
-نتونس شوية شبيج
-نزلني ماتوقعت هيج تطلب مني
صفن بوجهي ضحك
-اصلا توقعت انت تطلبين مني هيج
-مسويتها قبل
-لا
-حاجية وياك شي موزين
-لا بس دلال وعرك
ضحك وحك جبينه
-شو طلعتي متنجرعين حتى بالواقع
-الناس تريد اللي لسانه طويل ومينرد
-حددي غِنى شنو علاقتنا مافهمت
-انت شتشوف
تقرب حيل مني يباوع لشفافي
واني احجي دفعت نفسي للباب
-اشوف علاقة مامعروف مصيرها لا احنه
اصدقاء ولا احنة أحباب
شبيج مااسوي شي رجعي لمكانج
رجعت لمكاني امتدت بسرعة ايده ناحيتي
راد يبوسني تشنجت وغطيت وجهي بأيدي
انصدم وتراجع
نزلت راسي وتفكيري رجع لشجاع
شنووووو سويت من هالعلاقة شستفاديت
من الاختلاط والمزاح والكلام بالگروبات
شنو انتقمت من شجاع لا انتقمت من نفسي
وحل محل الأنتقام والمغامرة
السخيفة شعور الندم والأحتقار
احتقرت نفسي وسالت دموعي مغطية
وجهي وارتفع صوت نحيبي
امتدت ايده رفع وجهي وملامحة متغيرة
-آسف والله بسسس يعني فهميني
عبالي حالج حالهن
-منووووو
-البنات اللي عالنت
صفنت بوجهه وأستوعبت مدى غلطتي
فتحت الباب ماانفتح لزم ايدي
-باوعيلي احجي ويايه شويه
رفعت عيوني ووگعت دموعي
معلنة نهاية هاللقاء
-ارجعج للبيت
-تگدر
-اي مو هنا گلتي ورة المدارس
سكتت لدقايق معدودة وردت احجي
السر اللي خفيته بالمدرسة وعن شجاع وعن
صديقاتي
-اگلك الحقيقة
ابتسم وهو يقدملي كلينكس
-احجيلي الحقيقة
بديت احجيلة اني وين عايشة وشلون
وكأني قررت القي فواجع صدري وهموم
سنيني الماضية بحضن هاالشخص
الغريب وهو يتابع كلامي ويرد عليه ويناقشني
بحذر خوفاً من جرح احساسي بكلمة
خلصت كلامي بجملة
-هاي آني حقيقتي المجردة وحقيقة وضعي
آسفة لأن جذبت عليك
-وعلى أساس آني ابن شهبندر التجار
خل احجيلج عني آني بالأساس ابيع علاليگ
ابتسمت ودمعة اخيرة سقطت من عيني
ضحك وهو يغمني
-امداج طلعتي بس لسان
يابة الحياة هايه بيها اشكال وألوان
شوفي بيت التنك التحجين عنه عالأقل آويج
تحت سقف اني جنت أبات اغلب أيامي
بالشوارع وجوة الجسور وبين المكبسلجية
وشرابين العرگ وتالي شصرررررررت
-شصرت
-تف تسوين نفسج متعرفين صرت صاحب شركة
نجمة الشمال للسياحة
-شلون
-الشلون يرادلها حجي هووووووايه
بس خلي ببالج شغلة
الطريق مووووو مهم المهم الوجهة الأخيرة
هذا البيت التحجين عنة مأواج الى حين
تحقيق غايتج
-وگلبي اللي يحزن من يشوف بقية
الناس شلون عايشة
-كتمي الحزن وعيشي على گد اللي عندج
وباللي عندج واصلي وصيري لج معدلج
أعلى من طووووولج المعفنة هم حلوة هم
شاطرة وأحلى معدل عندج شتردين بعد
خلقي من الماكوووو أكو
-مااكدر احس خلصت طاقتي عالمواجهة ويا هالدنيا
التعبانة
-راح توصلين والله شوفي لحد الآن وين صرتي
وراح تصيرين أحسن وأكبر اني واثق لأن مريت
باللي مريتي بي وقساوة الدنيا
صنعت مني شخص ثاني
ويلة امشي اوصلج للبيت بما انج طلعتي
جذابة ومحد يدري بيج طالعة
-آني آسفة
-على شنو
-التلاعب بمشاعرك
-دنزلي نزلي ياتلاعب اني مخليج
اتونس على سوالفج عمري ٣٦ شايف وعايف
أشكال وألوان
يلة كافي لعبتي نفسي تمسحين خشمج بالكشن
-والله ممسويه هيج شبيك
لزمني من كتف القميص سحلني
-جنت ساكت عبالي جبيرة طلعتي بطول زري
وزعطوطة اسحلج سحل منا وجاي
خزرته وعدلت قميصي
ونزلت فتح جنطة السيارة طلع علاگتين
كبار
-هاي جبتلج شغلات من الشمال وياي
كرزات وحبشكلات البنات
باوع لتلفوني بيدي
-هذا تلفونج
-اي شبي
-اجيبلج باجر واحد غيره
ابتسمت بحرج
-لا شكرا مأدي الغرض والله
تمشى ويايه لحد ماوصلنه گبال بيتنا
باوعلي
-الف مرة اعتذر عالصار بس خليها ببالج
اني آدمي وحباب وخلوق وأخبل
باوعتلة صفح رفعلي حاجبه
-عندج اعتراض
ابتسمتله
-لا ماعندي
-سمعيني جديات اني آدمي
وماسويت شي لو واحد ثاني غيري طالعة وياه
بنية صغيرة وحلوة ومحد يدري بيها
جان الموضوع يختلف وممكن يوصل
لما لا يحمد عقباه بالج على نفسج
بعدج طفلة الدنيا جبيرة وراح تواجهين
اشكال البشر خلي هالنفس عزيزة
وهالروح لا تسخين بيها الا للي يستاهل
مدلي ايدة مصافحني
همسلي
-تردين نصير اصدقاء
هزيت راسي وصافحته باوعلي لحد ماوصلت بابنا واختفى بظلام
المنطقة
دخلت بعد مواجهة صِبى و مُنى
وقررت بعد أشهر من العذاب أرجع
لشخصيتي الحقيقية
غِنى ام لسان لكن مؤدبة
اللي تاخذ حقها من عين اللي ظلمها
لكن بالحق
قررت اصير مرنة ويا واقعي
وأتجاوز عقدة النقص وأكون
مثل ما گال صديقي أيمن الصديق
اللي هدتنيا الدنيا بعد غلطة غلطتها
واني أحاول انتقم من نفسي بسبب
حبي الضايع وصداقتي الخاطئة
وحان وقت التقديم وبهيج معدل عالي
حصلت وبكل سهولة على مقعد بالهندسة
بالجامعة ال...... بكل سهولة
وخلال عطلتي رتبت أموري وتجهزت لمواجهة
الحياة الجامعية ببساطتي وشطارتي
وفعلا جهزتني صِبى بالفلوس اللي
آني جمعتهن واللي اجنها من رضا
جهزت لبس نازك وبسيط ومرتب
وقررت أتميز بدراستي حتى احقق
هدفي وأواجه هالدنيا بشجاعة
أيمن وبعد هاليوم جان الصديق الحقيقي
الداعم بكل خطوة بأول أسبوع جامعي أتصل
بيه واني داخل المحاظرة اعتذرت وطلعت ارد
-ها الغبية
-ايييييمن
-وين انتِ
-غييييير دوووووام
-طاح حظج وحظ الجامعة اللي ملفيتج
طلعي برررره منتظرج
ضحكت وطلعت
اتلفت شفته واگف بكامل اناقته
تقدم ناحيتي مبتسم
-سنة دراسية سعيدة
-ليييش تعبت نفسك واجيت كل هالمسافة
مدلي ايدة بيهة علاگة صغيرة
-هدية السنة الجديدة وماجاي علمود صماخج
-مااتقبلها والله
-تمام
اخذ العلاگة ومشة طالع
سرعت خطواتي ورا لحد ماتوقف
-زعلت
-انت شتشوفين
-مااگدر اقبلها شتگول هاي مستغلتني
-انت طلبتي مني
-لا
-جبرتيني
-لا
-دنجبي وفتحي العلاگة شوفيها
تمشينة على مصطبة گعدنا
فتحتها تلفون حديث
رفعت راسي وهو يضحك
-تلفونج العاوي ميفيدج محاظرات واستنساخات
يرادلج تلفون زين
-والله هوووايه
-مو هوايه هاج شوفي جبتلي واحد نفسه
لأن تلفوني هم عاوي
-تعرف شي
-عرفيني الشي
-أجيت أنت عوض بمكان فرقد
-الله يرحمه كافي لتشغلين المعزوفة الحزينة
عندي شغل وراجع هسة اجيت لخاطرج
تمشيت ويا قبل البوابة التفتلي
-خلي الدنيا كلها ورة ظهرج
وشي واحد خلي گدام عينج
-شنو
-التفوووق
غمزلي وطلع البوابة
أيقنت بوجود أيمن أن هناك بعض
الرجال المحترمين وأن الحياة
تخليك أحياناً بمواقف حتى تتعرف
على جواهر خفية من الناس وهذا أيمن
جوهرة مخفية على شكل رجل أعمال
حضنت التلفون لصدري واني مبتسمة
ودخلت المحاضرة الثانية
گعدت عالكرسي ساندة راسي بما أن
الكل طالع
وخلص وقت الأستراحة وبدو
الطلاب يدخلون وأرتفعت الهمسات بينهم
ويا دخول الأستاذ جنت انزل العلاگة مال
الهدية اخليهة بجانب الكرسي
رفعت راسي وأجت عيني بعينه
أعلن گلبي النفير وماسيطرت على
مشاعر القهر أللي أحملهه يرتب بالأوراق
گدامة ويحجي
-وياكم الأستاذ شجاع ......... راح اكون وياكم
هالسنة بمادة التصميم المعماري اتمنالكم سنة
دراسية مليئة بالنجاح والتفوق
لبس نظاراته
وأجت عينة بعيني نزلت أيده
والقلم وگع عالمكتب اللي گدامه
نزلت راسي جهزت اوراقي وقلمي
وبدة يلقي المحاضرة تعاملت ويا وجوده
بكل برود وهدوء رغم العواصف اللي تسحق گلبي
وأضلاعي انتهت المحاضرة وطلعت اول
وحدة مريت من گدامة متجاهلة وجوده
دقايق وصار يمشي بصفي وحجه بهدوء
-امشي لمكتبي احجي وياج
-لتسويلي مشهد وفضيحة گدام زملائي
واحنه ببداية سنة
-امشي جاي أگول
تركتة وراية ضاربة كلامه عرض الحايط
گعدت برة حولت خطي بالجهاز الجديد
وأتصلت على أيمن
-ها يمناي
-ها ولج بشري شغلتي الجهاز
-شلون أرجعلك كل افضالك عليه
-انجبي شمسسويلج بس ألغي براسج
وأدردم وأنصح وأتعارك
-وانت تشوف هالشي شويه
انت متعرف وجودك بهالسنة بحياتي
شگد غيرني
-المعفنة هم عدهة مشاعر
-تعرف اني صوجي اعبرلك عن احاسيسي
-احاسيسج معوقة مثلج
سكت شوية وهمس بخجل وتردد
- غِنى تردين ارجعلج نطلع تشترين سوالف للجامعة
-مثل شنو
-ملابس اكسسوارات قرطاسية
-لبسي مو حلو
-احلى لبس
-لعد ليش اقترحت هالأقتراح
-البنات بالجامعات ميكررن اللبسة
ويدورن مظاهر
-ذني البطرانات عيوني اني مو بطرانة
-دكافي لسانج گام يرش خل أروح
للفرع مال الكرادة اخذ الوارد وأرجع احاجيج
قبل لا أطلع لأربيل
-للمرة الألف أشكرك يمناي
-عيوني الج
ودعته ورجعت للقاعة المحاضرة الأخيرة
دخلت ولاگتني ماسة
عطت وهي عاطت وحظنتني
-غيييير تگولين جايتني
-ردت أسويلج مفاجئة
-مشتاقتلج ولج
دخلو الطلاب گالو الدكتور ميحظ واغلبهم طلعو من الجامعة
طلعنة اني وماسة برة گعدنة نشرب عصير وانطلقت
تحجيلي أشياء جانت غايبة عني
ماسة الوحيدة اللي أمنتها على سري بحب
شجاع والوحيدة اللي عرفت بمشكلتنة
لزمت ايدي تحجي بهدوء
-اريد احجيلج شغلة
-صاير شي
-لا شغلة قديمة بس اسمعي انتِ مو أعتذرلج
شجاع وغفران
-اي
-وگالتلج غفران زهراء گلتلي سوي هيج
-اي صح
-سمعي زهراء سجلت مكالمتنا وسولفتلي
الموضوع كامل بس لا تتعصبين
ابتسمت مقهورة واني اتذكر شعور الغبن بذيج
الفترة
-شتحجين وشراح أسمع مراح يهز مني شعرة
گولي
فتحت التسجيل
سلام وقشب منا ومنا لحد مابدت ماسة تسأل زهراء
بالموضوع
-شفتي غفران شسوت ذبت المصيبة المسويتها
براسي
-وانت ليش سكتي
-ماسكتت گلت لأختها الجبيرة بس اختها
طمطمت الموضوع واعتذرتلي وتوسلت بيه مااوصل الموضوع وهي قنعت أستاذ شجاع
حتى ميوصل الكلام لأبويه لأن ابوية مراح
يصدگني
-شحصلت من سوت هيج
-گعدهة أخوها مخلاها امتحنت بس لو يعرف
هاي صور جسمها والله يموتها
-يعني هي مو حتى تخبث على غِنى سوت هيج
-اي هي ضربت عصفورين بحجر واحد كرهت أخوها
بغنى وشوهت سمعتها گدام ضرغام
-بس الاعرفه هي تحب ضرغام ليش معترفتله وخلته
صرف نظر عن غِنى
-هههههههه شعبالج ليش هيج سوت وانتقمت
غير عرضت مشاعرها على ضرغام وگاللهة انت مثل
اختي وتربيتي ويايه رادت تنتقم من غِنى وهم تسد
جوعهة العاطفي بكلامها ويا ضرغام بصفتها
غِنى
مديت ايدي غلقت التسجيل
-عادي
-شلووون عادي ليش ماحاسبتيهم
-كافي تعاقبت سنة ضاعت من عمرها
-وشجاع
-هو الخسران
كمت بعد ماودعتني وطلعت
االكل بده يطلع تحركت اجيب ملازمي
من القاعة هدوء بالممر اللي يودي لقاعتنا
دخلت وشفتة گاعد بكرسيي وادي تحرك
ألاوراق يمين ويسار والقلم بيده يخط
بين الصفحات التفتت شافني تقدمت ناحيته
-ممكن آخذ كتبي وأوراقي أستاذ
-أكيد ممكن وگف والكتب والملازم
بيدة مشى وصل للباب التفتلي
-تلگيهن بمكتبي
طلع وخلاني بحيرة بس خلال
دقائق أضمحلت هالحيرة وحل محلهة
التحدي والعنفوان
-اني الصح وهو الغلط
اني المظلومة وهو الظالم
مشيت ناحية مكاتب الأساتذة
وگفت بباب المكتب دخلت بدون
ماادگ الباب أمتدت ايدة ساحبتني
بقوة لحضنه والباب أنقفلت
تحت صدمتي وراسي اللي مستند
على صدره ودگات گلبه القوية
دفعت نفسي عنه بقوة مبتعدة
-شلووووون تتجرأ
تقرب رافع ايدة يهديني
-انطي مجال للكلام خل نتفاهم
-مابينة تفاهم نهائياً
تقرب أكثر ابتعدت متراجعة وگعت عالقنفة
واعتدلت بگعدتي
-شتريد بالضبط
-أريد أرجع بگلبج
-حقك مو گلبي لعبة حقك تبيع وتشتري
بي
-تعاقبو كلهم
-وانتَ
-بعدج عني جان عقابي
-مو كافي قليل بحقك
تقرب گعد بجانبي
-حقج بكل شي تگولي بس هاي
غلطتي الوحيدة وياج ميصير الأنسان
يتخلى عن اللي يحبه من أول غلطة
-وگلبي ومشاعري مو حقل تجارب
وأعطاء الفرص مو أسلوبي
العضو اللي يأذيني أفضل أبتره
بدل مااعاني من أذيته
-بترتيني من حياتج
-من امتدت أيدك تصفعني جسدياً
وأمتد لسانك يصفعني شعورياً أنتهيت
عندي وبترت حبك من گلبي وكأنك لم تكن
صفن بوجهي ونظرات الحيرة والندم
بادية على وجهه
-انت گدرتي بس آني مااگدر ولا گدرت
باوعت ملازمي عالمكتب گمت اخذتهن
-ارجو أن وجودك كأستاذ لوحدة من أهم المواد
بقسمي ميسببلي حرج وأذى
وگف وتقدملي
-مستحيل أكون فد يوم حجر عثرة بطريقج
وآني اللي جنت أنتظر على نار نجاحج
وتفوقج
-عن أذنك
-غِنى
-نعم أستاذ
مدلي أيدة مبتسم أبتسامة أسى
-عالأقل نكون أستاذ وطالبته بدون متتقيدين
من وجودي
مديت أيدي مصافحته
-تمام أستاذ
-أحبج
گالهة وتغير صوته لبحة عميقة تحمل كل
مشاعرة اللي كبتها طول ذيج الفترة
باوعت لعينة ورديت
-مشاعرك أنت مسؤول عنها واني
غير مجبرة أن أبادلك ذات المشاعر
الشي الوحيد اللي مسؤولة عنه
هو كراااامتي
رخت أيدة من أيدي وطلعت
تاركتة ورايه ورذاذ بارد من الراحة
انثر حوالين گلبي خلى گلبي باااارد
وهادئ وكأني أخذت ثار تعب ذيج
الأشهر بلحظات
توالت بعدهة الأيام نلتقي بعد المحاضرات
بالممرات نحجي بشكل عادي يسألني
عن دراستي ويدس بين النقاش كلمات
الحب المفقود مابينة بدون صدور
اي رد فعل مني الى نهاية العام ونجاحي
من السنة الأولى بأمتياز والحمد لله
طوال السنة الدراسية جان أيمن هو الداعم
من بعد رب العالمين و صِبى كلماتها وتشجيعها
ولو يرزلني هوايه ويغلط هوايه بس
على گلبي مثل العسل لأن يشبهني
بذات الروح القتالية وذات اللسان اللي
مثل البكته
كالعادة گاعدة اراسله وأكل راسي أكل
-بس فهميني راسج متمدد بي مطي
-اااااااخ لو مااكبر مني
-شتسوين بالله
-مااااسوي انجبيت يلا
-احسنتي انجبي
وسمعي الكلام هو رصيد شبيج تعاندين
-عنديييي والله
-راح يخلص اشتراكج الشهري
-مو گتلك اكنك على النت بتلفون صِبى
-البنية تحاجي خطيبها تخلصين
اشتراكها ليش جاي اكلج عبي الرصيد
وسكتي
-ماااااريده والله أيمن لا تخلي صداقتنا
وأخوتنا قائمة على المصلحة
-أستغفر الله أگلج انتِ ميفيد وياج كلام
اني جاي باجر ونتفاهم
-ويييين نتفاهم
-نطلع لمكان هسه سدي الموضوع
-زعلت مو
-مراح تفهميني
ودعني وهوضايج وغلق الأتصال أجتني
صِبى شافت وجهي مغيم
-شسويتيله
-زعل
گعدت گبالي تحجي وعيونها تلمع
-تدرين من اشوفج محادثتكم يتخيلي فرقد
نفس الأسلوب والشقة
-الله يرحمة دائما اگلة انت تشبه فرقد بسوالفه
عندي سؤال صِبى
-گولي
-ليش وافقتي على صداقتي بأيمن
-كلامة مابي لمحة شهوة ولا نغزات وسوالف
العلاقات اللحظية اللي عالنت وهاي صارلكم
سنة وفوگها مثل ماگلتي أمنت بي لأن بالحقيقة
انت احسن مني بتقييمج ومعرفتج للبشر
وادري بيج لو شفتي واحد بالمية من دناءة
النفس لوالافعال الموزينة عندة جان لغيتي
من حياتج
سندت راسي على كتفها وضحكت
-شفتي كعدتنا بهالمنطقة العشوائية وأختلاطنا
بأنواع البشر ووجود ابويه بحياتنا جاب نفع وفائدة
خلة اختج رادار مال بشر تميز الزين من الموزين
-أحسن صفة بيج هايه
-تف يعني باقي صفاتي مو حلوة
-من التف وانت قيسي شگد خايسة
وأسلوبج معفن
-شكراً اختي الجبيرة
-تتدللين
گالتهة وهي طالعة من الغرفة
ثاني يوم الصبح أتصل بيه حتى
بدون صباح الخير
-أگلج اني جاي مباقي شي وأوصل بغداد
-هلا بيك هلا وبجيتك هلا
-انجبي يلا عبالج انسى
-دتعال واسويلك احلى أستقبال
-بس اكمل شغلي وجاي لمنطقتكم بالليل
مااريدج تطلعين خاف يصير
عليج حجي
-لا لتجي يمعود
-اي مو جنت عايش ببرج خليفة خليني
ساكت رحمة لموتاج
-اخاف عليك يمعود المنطقة مخربطة
-مالج علاقة وولي بعدني شايل بخاطري
وگلي لأختج اذا مگلتيلها مااجي ولا اشوف وجهج المخربط
سد الخط وبالليل بحدود الوحدة اتصل بيه
-طلعيلي المعفنة
-طالعتلللللك
طلعت من الباب الأمامية لابسة عباية الصلاة
المنطقة ظلام
باوعتلة واگف بجانب الباب
-الله يساعدك
باوعلي صفح وهو يضوي بتلفونه
اشرتله
-امشي ويايه
استدارينة وگعدنة عالجذع ورة الجذع فراغ مساحة ممتدة للبعيد فارغة ماكو بيوت
اسمع صوت صِبى تحجي ويا رضا
بلغتها ان أيمن راح يجي
گعدت مسافة عنة وبيدي بطل عصير
-تفضل
-شكرا
اخذة فتحه وشربه مرة وحدة وشمره
باوعتلة
-بالله الله عليك هذا مكان استقبلك بي
-اي فرشيلي الريد كاربت منا وجاي
غير تستقر الأميرة ديانا
باوعي اني مااعرف اخفي ضوجتي
والبارحة حيل غثيتيني
-افهمني أيمن
-فهميني أنتِ شبيج هيج تتحسسين
يابة حسبيهن دين من تتخرجين سددي
-أكره أحساس الشفقة والله لا تزعل مني
-ولج ياشقفة اني احس بيج
لأن عشت اللي انت عايشته وبعدين
هاي عطلة وبدون نت وين تولين
-جبت مواد المرحلة الثانية وجاي اقرأ
-مو شغلي هذا هاج
مدلي ايده بيها علاگة
-أيممممممن
-وسم اخذيها خل أروح سيارتي عالشارع
لا تروح تنخمط
وگف عدل قميصه وطلع گدامي
مشيت مسافة عنة
باوعلي وضحك
-أول مرة أشوف قرد لابس ثوب
صلاة
-شكررررا ياذوق
-غصباً عليج ذوق ونص
ضوالي الطريق وهو يدردم
-اكرره شعور الشفقة عود هي هم
تشعر
-كااااافي اعتذر اسفة
باوعلي وضحك
-قبلت اعتذارج دخلي يلة خل اروح
لا يطلعلي سكير يسلبني من وراج
-ديلة بالله مو گتلك لا تجي
-انجبي يلة غصباً على خشمج اجي
ودعني وراح
دخل لگيت صِبى بالطرمة منتظرة
-ها الخوافة منتظرتني
-اصلا غلقت الأتصال من رضا وگعدت أتسمعلكم
-عفيه بالحبابة
-دنجبي ودخلي جوه حتى لو مأمنة بي يبقى
گلبي يلعب
دخلت جوه يمها فتحت العلاگة
بيهة كارتونة صغيرة فتحتها بيها ضبة
كارتات ضاربهة لاستيك
ضربت جبيني وگعدت أحسبهن
يسوون مبلغ مو قليل اتصلت بي رد
علية
-لا تبدين بسوالفج اخذيهن وانت ساكتة
-هوووايه والله
-مو هواية عليج حسبت حساب العطلة
اشتراكات العطلة كلهة تونسي ولتقرين ملحگة
عالقراية
-هيج تشوف
-أكيد بعدج طفلة بابا تونسي
-شتگول اجيب سنارة صيد واصيد سمج
من البحيرة مالتنه ورة البيت
-اكبر سخيفة
-ربي يخليك اليه انت ولسانك البكته
-اني باقي هنا يومين محتاجة شي
-ابد والله بس كلامك كافي
-يلة روحي ريحي عيونج من السهر
واستغلي العطلة أبشع أستغلال
-تصبح على خير يمناي
-أجمعين غنيوة
غلق الخط وراح تمددت بالفراش
وتفكيري راح لفرقد وعلاقته القوية
بصِبى تمنيت لو جانت علاقتي قوية بي مثل علاقتي
هسة بأيمن
بس هيهات ماينفع الندم نزلت دموعي حزن واني اتذكر
عركاتنا ودائما مختلفة ويا بالرأي
فلتت من بين أضلاعي شهگة
على أثرهة أمتدت ايد صِبى تمسح
على شعري
-ليش هالدموع
-فرقد جان يحبني مو
-والله يحبج وأصلا هو جان يسميج گلب البشة
لأن تتعصبين وترجعين بسرعة تعتذرين
-تدرين جاي أعوض اخوتي
الضايعة ويا فرقد بأيمن
هيج أشوفه فرقد من يمشي
من يحجي من يزعل
-ربي يحفظه لشبابه
گالت هالكلمة صِبى وغطت راسها بلحاف
فرقد اللي يرافقها من سنين وفاته
لازلت كل يوم اشوفها وهي مادة
راسهة بالخانة مالت فرقد تسفط
الملابس وتبجي شويه وترجع تعيش
حياتهة طبيعي صِبى جزء من شخصيتها
وگلبها أنهدم بغيابة كلنه غيرنه الأسود
الا هي لازالت لابسته ولازالت بكل حركة
وأكلة وسالفة تتذكرة
امتدت العطلة ماخذتني بأستراحة طويلة
موطدة بيهة علاقتي بأخواتي وأيمن
مرتاحة بيهة من التعب لحد ماانتهت
وتجهزت للسنة الثانية وأنطلقت للدوام
بهمة ونشاط على أمل التفوق بهالسنة
كذلك
اول ماخطت رجلي الجامعة أجاني أتصال
أيمن
-ها ولج داومتي
-اكييييد
-السجاجة
-شاطرة قصدك
-الذكية البطلة شيخة البنات
-دلعني بعدددددد ايوووووة كدا
-انتبهي لنفسج والتحتاجي ماكو حاجة أگلج
اتصلي بيه
-أيمن
-نعم يا غبية
-خلف الله عليك
اگلك شو اكو أحساس مو حلو لازم معدتي
من أول مدخلت
-مريضة تعبانة
-لا والله بس مااعرف شبيه
-رجعي للبيت اذا ممرتاحة
-لا تفوتني محاضراتي حرامات
-شو لعبتي گلبي من تطلعين من المحاضرة
الأولى أتصلي بيه
-تمام عيوني
-طاح حظج وحظ عيونج
-فدوة لگلبك
غلقة وهو يضحك عليه
تمشيت حوالين الجامعة زملائي
وزميلاتي مشفت منهم أحد
اتصلت بماسة دردشنا شوية غلقته
واني متجهة للقاعات التقت عيني بعين
غفران ووياها بنية شابة يمشي وراهم
شجاع
ابتسمت غفران بتحفظ وتقدمت
وهي تسحب البنية من أيدها ناحيتي
ونظرات شجاع اللي اختلفت وبينت عليها
العصبية من رفعة حاجبة لگزة أسنانه وضغطه
عليهم
وگفت بتحدي وعيني بعينها
تقربت حضنتني ببرود
-شلونج حبيبتي غِنى
-الحمد لله اشوفج بالجامعة اليوم
غيم وجهة وأبتسمت بخبث
-اي جاي أداوم هنا بالقسم اللي تداوم
بي لارا خطيبة شجاع
بهاللحظة بالذات سمعت صوت حطام
گلبي وتحوله لأجزاء وتبعثرها ويا ريح
ذكريات حب السنتين وعذاب ذيج السنة
رفعت عيني ناحيته نظرة الشفقة تجاهي
جانت واضحة بعيونه بلعت غصات گلبي
واني أمد أيدي وأصافحها
-آنسة لارا مبروك
ابتسمت وهي تصافحني
تقدمت ناحيته
-ألف مبروك أستاذ خطوبة مباركة
عجز عن الرد مشيت خطوة وأحس مماخذة
حقي بعدني
رجعت واني اصيح بأسم غفران
التفتت هو حس عليه ويعرف طبعي مااسكت
تقدم بسرعة يسبق غفران
خطيبته اجت ورا وغفران رفعتلي حاجبها
ابتسمت وحركتلها رموشي ببراءة
-غفورة أذا تحتاجين شي آني موووجودة
أدري بيج ذيج السنة جانت صعبة عليج
لأن تأخرتي سنة عن زملائج
بس يلة ملحوگة حبيبتي بأعتباري
طاااالبة سنة ثانية ارحب بيج اذا تحبين
اصيرلج دليل سياحي بالجامعة
بهت وجهها ونزل عليهة السكون
باوعتله يحك بحاجبه يحاول يخفي أبتسامته
استداريت واني اودعهم
ورحت للقاعة بعد لقائي بزملائي
وبدت المحاضرات تهل ولا كأنه أول يوم
بس بقة گلبي يدگ بغرابة وحزن
الى أن فاض بية القهر
طلعت برة تاركة المحاضرة
بهدوء الصباحية اتصلت بأيمن
قبل لا احجي سألني بقلق
-بيج شي
-لا بس تعبانة
-انت متتعبين بسهولة احجي الصدگ شصارلج
-بنية ضوجتني
-بخصوص شنوووو
سكتت ماعرفت شگول اگله گلبي أنكسر
واني هالشي محاجيته لأحد
كذبت كذبة بيضة ماجنت أعرف
هالكذبة راح تكون بداية لعالم جديد
راح ادخله بأرادتي
-بنية جانت ويايه بالمدرسة تعرف
وضعي وحجت هالشي گدام الكل
-شگالت
-أن وضعي مادياً صفر واني گاعدة ببيت
تنك وهواية كلام يجرح
-عگب باجر آني يمج
-شنووو
-جايج للجامعة
-لا والله ولا تجي شنو ضاربلك مسافة طريق
علمود مشاعري انجرحت
-طاح حظج وحظ مشاعرج گلبج مكسور هالمرة
ولد الكلب بسيطة
-خل تولي والله ماسكتت عنها
-اگلج لتلحين جاي
-اذا اجيت ازعل منك والله
سكت شوية واكو وحدة تحجي ويا كمل كلامه
ورجعلي
-هممم اليوم يمك فتيات
-اختي هاي ياعوبة
-منو منهن
-رهام
-گللها زعلانة منها اذا اني انشغل هي متسأل عني
-اني مااقبل اگلها خليها مركزة بدراستها
-شبيك دجيبها فد مرة وياك
-متقبل تكره بغداد من وقت الحادث
-الله يعينها
ودعني وراح كملت الدوام
وقريب مااطلع اجت بنية صاحتني
لمكتب شجاع
تحديت نفسي ورحت أختم هالمهزلة ختام
يليق بجرح گلبي
اسـتأذنت ودخلت
وگف وتقدم ناحيتي بسرعة قفل الباب
باوعتلة بدون اهتمام وگعدت
-طالبني أستاذ
-الوالدة خطبتلي بنت عمتي
-اي أستاذ مبروك شفتها ربي يخليكم لبعض
تقرب گعد عالكرسي مقابيلي
-افسخ والله
-لا ليش مبينة خوش بنية حرامات
-لتتدعين البرود افسخ بس انطيني أشارة
ان ترجعيلي
-اذا جان گلبك رافض ينطيك أشارة تريدني آني
اعرض مشاعري عليك واحطم گلب بنية مثلي
بالنهاية هي مو غريمتي
-اني غريمج مو
-لا غريمي گلبك أنت آني هنت عليك بأحلك أوقاتي
-أحبج أول دگة لگلبي أنتِ رجعيلي أقسم بالله
مااگدر حتى أباوع بوجها
-راح تگدر لأنها بنت عمتك وحرام تكسر
خاطرها وأساساً واضح انكم قاطعين شوط بهالخطوبة
مو مجرد كلام لابس حلقتها بيدك
فر الحلقة حتى ينزعها من أيده
لزمت ايدة مرجعتها
-أستوعب أستاذ ان گلبي تحطم من لحظة اللي
أتهمتني وماانكر ان اليوم كانت القاضية اللي
نهت كل مشاعري ناحيتك
عيش واني راح اعيش بالنهاية الحياة متوگف
على احد
-بس حياتي وگفت عليج
-لا موگفت والدليل كفك احتضن غير كفي
وصار أسمهة على أسمك
ابتسمت واني گايمة
-الصراحة لايقة لشخصيتك وجميلة بشكل
مبالغ بي
وگف عينة بعيني
-الخسارة الوحيدة اللي بحياتي أنتِ عمري مراح
اگدر أعوضج
جاوبتة بتحدي
-قانون الحياة هذا بعض الخسارات
غير قابلة للتعويض واني اولهم
فتح الباب يمسح جبينه المتعرق
-لازلتي مثل ماانتِ تفحميني بأجوبتج
وتاخذين ثارج من حلگ السبع
غمزتله
-مثل مسويت ويه اختك اليوم
صفگ بأيده واني اطلع ناحية الباب
-اخذ الحق حرفة واني أحييج محترفة
بحيث اني الأستاذ العاقل البالغ گدرتي
تاخذين حقج مني مربع
-اللي ينام عن حقة جبان
-واني أشهد انج مقااااتلة ومحاربة
ودعنا بعض وطلعت بالممرات
أنفض بقايا المشاعر والقهر
واني أمشي اوعد نفسي ان الأيام
يمكن تحملي الأحسن والأفضل في
القادم منها
طلعت من الدوام للبيت خالة بعدها
مراجعة و مُنى تفتر تقره
أيمان مخلية جدرية الشيرة وتسوي
برجليهة بنص الهول
وأبوية غايب عن البيت من يومين
لگيت صِبى وجهة مشتعل نار
وعيونهة وارمة من البجي والتلفون
القديم بيدهة تگلب بفيديوات فرقد
ركضتلهة گعدت بصفها
-شبيج صِبى شصار
-فاطمة أنخطبت
گالتهة وأنفجرت تبجي
-ليييش تبجين شبيج صِبى خليها
البنية الله يوفقها
-فرقد يحبها
حضنتهة وسندت راسها على كتفي
-جان يجمع حتى يبني البيت من جديد يحبها
وتحبة شلون گدرت
-تگدر لازم تگدر بنية ومصيرها تتزوج
بس لا كسرتي گلبها بهالكلام
-لا والله خابرتني تبجي وتعتذر
-ليش خطيه
سحبت تلفوني وفتحت سبيكر واني أتصل بيها
فتحت خط وشهگتها عالية
-العروووووس كلوووووووولوووويش
ها بربوگ تزوجتي قبلنا
-آسفة آني والله
-أنجبي قابل عنسنا بعدنة شباب اني واختي الجميلة
بجت ورجعت اشاقيها
-افرحي ياقردة ولج ممصدگين اكو حفلة ونكشخ
-وين صِبى
سحبت صِبى التلفون مسحت عيونهة
-ها فطم حبيبتي
-كسرت گلبج مو
-فرحتي گلبي والله بالعكس
سولفيلي ولج ماگلتي منو
-جيرانة موظف ويا امي بالدائرة البيها
المحل تعرفنا عليهم وهو هالواحد لأمة
-مباركين فطوم حبيبتي ربي يهنيكم
بس شو رضا مگلي
-اليوم امي تحاجي بالليل تدرين بية
مااضم عنج شي لذلك خابرتج
تركتهن يحجن وطلعت اكلت وغيرت ملابسي
وتمددت نمت أخذ استراحة
وجرت الأيام ومر شهر كامل نداوم وبيني وبين غفران
نظرات نارية نوجها لبعض كل ماالتقينا
وبيوم داومت بس جنت تعبانة وحرارة
تدگ بعظامي بسبب اني أسبح وأنام
جوة المبردة
ماشية بتعب حتى مابيه حيل أحجي
دخلت وگعدت بكرسيي ساندة راسي علي
أجتمعو زملائي وزميلاتي بين اللي يعرض عليه
يرجعني للبيت
وبين اللي جابتلي مي غسلت وجهي
وبعز هوستهم وياية دخلت بنيه
بيدهة علاگة سودة توجتهلي
ونطقت الكلام دفعة وحدة كأنها تعرفني
-تفضلي غِنى هاي الملابس اللي وصيتي
غفران عليهن تگول اذا تحب راح اعزل الجنط
والاحذية والزايد أدزه الها ولأخواتها
بهتت بوجهة وأنظار الكل توجهتلي
صمت صابني وهي تتركني وتطلع
خارج القاعة أحس عظامي طگطگت بقهر
وگفت بيدي العلاگة سحبتها من الكرسي
وطلعت ماشية نحو مكتب شجاع
فتحت الباب بدون أستئذان
لگيتة گاعد على مكتبه
وگفت گباله تحت دهشته شمرت العلاگة عالمكتب
شگگتهة وطشرت الملابس عالمكتب
واني أرجف من القهر والعصبية
-شتررررريد مني غفررررران
ارتفع صوتي گام بسرعة يسد الباب وتوجهلي سحبني
يگعدني دفعت أيدة والنار أشتعلت بوجهي
أحس أريد انفجر
-شنوووو شسوووت
-شووووف شجاع نسيان اللي سوته بية أختك
أخذ مني سنتيييين من حياتي
سنتين راحن بتعب وقهر وحزن ودموع
كل يوم أبجي لأني فقدت جزء من گلبي
انكسرت نظرات عيونه بحزن ولزم أيدي
يخفف رجفتها
-انت ترجفين بس اهدي وفهميني
-مااهدأ شوووف شجاع اللي متعرفه
عني او اني ماخليتك تعرفه لأن اكره
نضرات الاستحقار بسبب ضعف
الحال من أحد اني بيتنا .........
قاطعني وكمل
-يم المقالع ببيوت التنك
نزلت دموعي وبسرعة مسحتها
-وحبيتني بوضعي ذاك
-ليش الحب يحدده مكان
- اني ضعف حالي عمري ماعرضته على احد
ولا مكان اقامتي وفي يوم ما جانت غفران صديقتي
واختي شاركتها سر وضعي المادي فقط ماحجيتلها
عن مكاني وبيتي ورغم هالشي ماطلبت منها
شي بس اليوم وبعد اذيتها اليه دزتلي هالخرگ
بيد وحدة وفضحتني گدام كل القاعة
اني مو لأن گالت وضعي المادي ضعيف
بس الأهانة وهي دازتلي خرگ بكيس زبل
گدام زملائي كسر گلبي وحطمته
-والله تعتذر واني بيدي اخذ
حقج منها گوووومي ويايه
-حقي آني اخذه ولهنا وكافي
اللي اجاني منكم كاااااافي
-مانسيتي لحد الآن غنوة
ضغط على ايدي بمحاولة لمواساتي
-ماگدرت أتخطى من سنتين أحاول أبين ثابتة
وميظهر على ملامحي أثر غضب أو خيبة
ادرس أبتسم اضحك وأحاول أعيش
بس ماگدرت اللي گلت علي اتخطيته
رجع حطمني من واجهتكم مرة ثانية
هنا بجيت من اللي شفته وسمعته من اختك
عنك وكأني هسة انخدعت من صديقتي
وهسة انضربت وانطعن بشرفي من الانسان اللي أحبه
لگيت نفسي أسترجع كل شي
نفس الغصة ونفس أنقباضة الگلب
ونفس الكلمات المحشورة باللسان
بجيت شجاع هوووايه بجيت
واكتشفت اني بعدني واگفة بذات الزمان
والمكان من سنتين
سحبت ايدي ووگفت
مسحت وجهي وطلعت بره
وصوت خطواته ملاحقني
بس سمعت صاحه احد الطلاب وتوقف
مشيت لقسمها ودخلت لقاعتها
جانت گاعدة وبصفها البنية اللي أجتني
وگفت مقابيلها رفعت راسها ابتسمت بحقارة
وگالت
-خاف محتاجة بعد شي حبي
رفعت أيدي بكف نزل على وجها
تمسمرت بمكانها ويا دخول شجاع
-أحذرج تندگين بية مرة لخ
التفتت لصديقتها
رفعت ايدي واخذت ذات الكف
سحبني شجاع مخليني ورا واخته عاطت
-ضربتني شجاع
طلعت من ورة شجاع
-سمعو انتو الأثنين اقسم بالله اوصل موضوعكم
للعمادة اخليهم يعيدون تربيتكم من جديد
حجت صديقتها بغضب
-الا أشوفج العمادة شتسوي
-نشوف ياعربانة دفعتج غفران
واجيتي مثل الغبية نفذتي
انتو الاثنين حذرتكم وانتهى الموضوع
طول مااحنه نحجي شجاع يحاول يلم
الموضوع
طلعت خطوات وارتفع صوت غفران
-المجداية الحقييييرة جانت تكتبلي بفلوس
اخووووويه درسها شفقة منه لوضعهة المزري
ارتفع صوت شجاع يأنبها
طلعت وزادت الرجفة بضلوعي
گعدت على جهة تحت ظل شجرة بمكان معزول
وفاض القهر بروحي
اتصلت بأيمن واجاني صوتة المرح
-السجاجة ذاكرتني بنص الدووووام
-تعاااااالي أيمن كسرو گلبي
هدأ صوته يسألني بتأني
-منووو وليش
-تعال
بجيت بحرگة تحت ردة
-اسكتتتتتتي وفهميني
-بنات اثنين اتفقو علية وفضحوني گدام
زملائي اني مااستحي من فقري بس الموقف
مخززززي وجارح
-والله لا اشعل اهلهم گومي رجعي للبيت
هسة وباجر الصبح تلگيني مزروع بالجامعة
يمج
صوت شهگاتي غطة على صوته
-اذا ماشعلت والديهم اطلع ناقص روحي
غسلي ومن تطلعين للبيت خابريني يلا
سديت التلفون وطلعت بره بالكم فلس
العندي اخذت تكسي وصلت ومحجيت
ويا أحد هربت من واقعي للنوم
راسلني أيمن رديت علي بتعب وحجيتله الموقف بالكامل
اختفى لثاني يوم بالطريق أتصل بية
-وينج
-بالطريق
-ساعة الا شوية تلگيني يمج
ودعني وسد الخط
دخلت أول محاضرة واجاني أستدعاء
من العمادة توجهت الهم بنص الطريق وصارت عيني على
أيمن ماشي ناحيتي بسرعة
غرغرت عيوني واني أشوف وجهه الحاير
شلون يواسيني
طبطب على كتفي مماشيني
-وين رايحة
-للعمادة طلبوني
همسلي
-اكيد الگ***ب اشتكن
مشينة ودخلت للمكتب
جانت غفران وصديقتها واگفات
دخلت وأيمن گال دخلي اني بره اريد اسمع
شيردون
حجة رجال انيق جبير بالعمر بعد ماصديقة
غفران حاجته
-بابا بدون سبب ضربتني كف لمجرد
خلاف بسيط بينها وبين غفران
غفران گالتله
-اني كذلك استاذ اهانتني گدام
زملائي وضربتني
صاح العميد
-شنووووو بابا داخلة محل گصابة تكفخين
وتغلطين وين الأخلاق الجامعية وين
الخلق والتربية
رديت علي
-انت سامع من طرف واحد أستاذ
الكلام اللي سمعته عار عن الصحة همة
اللي غلطو بحقي
اشرله الاستاذ ابو صديقة غفران
براسة وهو طلع قلمه من جيبه. وكتب
-راح تنفصلين لمدة أسبوع
وتعتبرين نفسج راسبة بكل المواد
للفصل الأول
اختنگت واندگت الباب ودخل أيمن يسلم
اشروله يگعد
سحب ايدي واخذني ويا عالقنفة گعدنة
-تفضل حضرتك شنو صفتك ويا الطالبة غِنى .........
-قريبها أبن عمها
-تمنيت والدها او والدتها يجون نتفاهم وياهة
-والدها مريض ووالدتها متوفية
اني أنوب عنهم وهسه نحجي بالوقائع
بعدة يحجي ودخل شجاع وجهه محتقن
ويخزر بغفران
التفت باوعلي ووجهة ذبل وتغير وهو يشوف
أيمن يمي
-تفضل أستاذ شجاع
اشر للبنات گعدن وبدة أيمن يحجي
-حضرتكم أستدعيتو غِنى بدون وجه حق
الطلاب بقاعتها شهود على سوء الموقف اللي
سببو الها زميلاتها
دافعت صديقة غفران بعصبية
-مسوينة شي مجرد مساعدة
ضرب شجاع عالكرسي حيل وهو يباوع
لغفران
-اختي غلطانة حضراتكم وهسه تعتذر
رفع أيمن ايدة مقاطع شجاع
-العفو من حضرتك قبل الأعتذار اللي احنه
واثقين تمام الثقة انو مو حقيقي
خل احجيلكم شي
شوفو هالشابة الصغيرة عمررررها مازيفت
حقيقة أن وضعها المادي ضعيف
وهالشي عادي الدنيا مو كلها نفس الوضع
بس بنفس الوقت عمررررها ماطلبت من بناتكم
شي ولا بينت ولا وضحت سوء حالة حتى
البنات الله يحفظهم يقللون أدبهم
ويحتقرون آدميتها ويدزولها ملابس بكيس
الزبالة بنتنا غاااااالية وعزيزة عدنا رغم
وضعها تميزت وطلعت من الاوائل على مدرستها
وحتى بسنتها الجامعية الاولى كذلك
اذا جان ضعف الوضع المادي واليتم
والفقر مدعاة للأستهزاء فقلة الأدب
وتجاوز الحدود مدعاة لأعادة النظر بالتربية
ضرب ابو البنية عالمكتب ووگف
-مااسمح لأي شخص يهين تربية بنتي
-اني راح اسكت حضرتك وخلي
غِنى تصوغلكم الموقف الصار وشوفو
اذا كان يستحق او لا
ندسني وبديت اشرح الموقف وسبب ردة
فعلي
شجاع وگف وجاب غفران گدامي
-اني عن نفسي وعن أختي أعتذر
بالگوة نطقت غفران وگالت آسفة
صديقتها ابوها منزل راسه
وگف ووگف أيمن ويا صافحه
-اعتذر عن سوء الفهم
سحب بنته تبجي اعتذرت
راد يطلع صاح أيمن
-ممكن حضراتكم تتوقفون لحظات
دارو وجههم
-حضرتك أستاذ انطيتها فصل هالشي مجحف بحقها
وهي المظلومة بهالقصة
ارجو ان ماتكون معايير الجامعة مزدوجة
العميد شگگ ورقة الفصل ووجه كلامة لغفران
وصديقتها
-فصل أسبوع
بجو اثنينهم وكمل أيمن
-أمام أهلكم وأمام العميد
تتعهدون أن متتعرضون لغِنى
لا بخير ولا بشر وهي كذلك متتعرضلكم
كلنا وقعنا تعهد وطلعنا ماشين
ادية رغم ادعائي للقوة جانت ترجف
انسابت أيد أيمن ممسكة بيدي بقوة
التفتلي يهمس
-طلعتي جبانة
مشينة خطوات توقفنه بعد ماشجاع صار گدامنا
ايدي بيد أيمن ماتركها
-اعتذر للمرة الثانية بس ماعرفت حضرتك
شتصير من الآنسة غِنى
نزلت نظرات عينة لأدينا
وجاوبته بشكل متسرع وانتقامي
-خطيبي
عصرت أصابع أيمن اصابعي وأبتسم
-أبن عمهة وخطيبها
نعتذر احنه كذلك عن سوء الفهم وأن شاء الله
مصار شي
وجه شجاع باهت من الصدمة
مشينة خطوات وبهدوء سحبت ايدي من أيد
أيمن
حجة بصوت متلاعب
-ها خطيبتي شو وخرتي ايدج
ضحكت بفشلة
-حتى يخافووون وبعد ميحاجوني
-حتى لو مگايلة وحتى لو ماكو اي صفة بينه
فتأكدي اني بكل وقت وياج وبظهرج
ضحك وسحبني ويا
-ويييين مولية
-للمحاضرات
-اسبج واسب المحاضرات امشي نطلع
-هاااا
-ووجعا استاذج بعده ورانا يمشي خلينا خطيبين حقيقين
وأمشي
ضحكت وطلعنا بره الجامعة
وصلنة السيارة
باوعت هاي اختة رهام وبحضنها
طفل تقريبا عمرة أربع سنوات متلازمة داون
فتحت الباب ونزلت ونزل الطفل
مشتلي بسرعة حظنتني هي
تعرفني ودائما نحجي
-يا گاطعة من يجي الدوام متسألين
بوستهة بفرح جانت مفاجئة حلوة
باوعت للطفل شعرة سرح نازل على عيونه
ركض ناحية أيمن وحجة بلهجة وصورة متقطعة
-باباااا بابا
رفعة أيمن لحضنه وهو يبوسه تحت صدمتي
-يابعد أبووووووك وأهله
ذكريات الماضي وحب طفولتها ومراهقاتها شبابها مازالت تحوم حولها
رضا اي خذلان خذلها واي كسرة كسرتها حتى متكدر تنسى وتتاقلم ويه دكته
حرصها وخوفها على غنى من شافتها بهيج حالة اجت بالليل بس لا انجرفت بس الحمدلله اكدتلها انه تجربة وتهورت والحمدلله اتعٌضت واخذت منها العبرة والحمدلله خلال كلامهن مبين فعلا نضجت وعت بعدها
#غنى
لفترة محددة كانت مثل الفراشة حلقت بخفتها وظنت لكت فارس احلامها
وعاشت فترة مؤقتة وياه بمشاعر متبادلة
لكن الحب وحدة مو كافي اذا مكانت هناك ثقة فماله اي اساس
وهذا الصار شجاع رغم كان يحبها لكن
اللعبة الي انعلبت عليه وقعت ضحيتها غنى وصارت موضع الشك وانخذلت وانكسرت للاسف
الحمدلله كدرت تكشف اللعبة وتثبت برائتها ومحتهم من حياتها ولا كانما موجودين
بلحظة تهور واندفاع لجأت لطريقة الغلط وكادت تنجرف لكن الحمدلله بالاخير مستحيل واحد يمحي اخلاقه وتربيته
وطلع الي تعرفت عليه هم ابن اودِام سبحان الله طلع شهم ومااستغلها ابد لان عرف الكدامه شنو وكشف حقيقيتها الي حاولت تخفي
الضربة مكسرتها لكن قوتها
وحققت حلمها بالهندسة مثل شجاع وصارت طالبة وياه
وغفران رجعت هم تحارشت بيها لكن عرفت شلون توكفها عد حدها
لكن للاسف الفصل الناقص الي سوته غفران وصديقتها حتى يهيِّنوها
استنجداها بإيمن وكفته وياها ميوكفها الا رجال الشهم الغيور صاحب وكفات واخو خيته
وفعلا مقصر وياهم لكن كدر يقلب الطاولة عليهم وانقلب السحر على الساحر من بعد تعاقبت وفصلوها
اندارت العقوبة الهن
بصفة ابن عمَها
