رواية الرجل لاينسى حبه الأول الفصل السادس بقلم سهير رائد
يمكن صفنت لحظة من سد التلفون واخر كلمه زمخ بيها يلا روحي .
ايا حقير شلون صلف يسد التلفون بوجهي؟!
نسيت او ماعرفت شحجي لان اني نسيت السر لحظة استيعاب واعادة سريعة لذاكرتي !
شهكت وخليت ايدي على گصتي . استغفر الله شلون نسيت على شنو يحجي استغفر الله ربي وأتوب اليك .
دك الجرس كمزت واني بصفنات تاخذني وترجعني
بغير عالم بالدوام بالبيت ماعرف افكر تفكيري تشتت .
كعدت بيني وبين نفسي اني شلون ناسيه هل النسوة وسبحان الله رب العالمين ينسيني هل السالفه كلش . ولاافكر بيها ابد والله ولايوم حجيت ولاسريت سري لا لأخت ولا ام ولا لمرت اخ .
امي ما اضم عليها اي شي وتعرف كلشي عني بهل هل السر من يوم ما انتبهت على نفسي ويوم ما وعيت واتثقفت بهذا العالم وافتهمت حلفت مااحجي حتى بين وبين نفسي .
ومرة فكرت اذا اتزوج اكول اني اللي ماخليت ابن عمي يتقرب اليه ولهذا السبب اطلكت يعني اذا اتزوجت غريب صفنت كلت يمكن رب العالمين ما خلاني لانخطبت لحد دك بابي لهذا السبب كلشي يصير
تعبت من التفكير واسأل واجاوب نفسي.
بعد خضر مخابرني ابد ولا وصل لبيتنه ولا انفتح الموضوع .
انتظر يراسلني حتى اكله ما حاجيه ومحد يعرف بسالفتك ابد ولو هيا هاي سالفة احجي بيها وياة فشلة وزحمة
وجان كلام خضر صحيح
واجونه اقاربنا من بعيد
طلعوا خطابه والولد كلش زين وظيفه واخلاق وصلاة وصوم وشكلة مرتب وعمرة30سنه وشايفيني ومعجبين بيه بعرس بيت عمي وحتى هو شايفني واني ممنتبهه عليهم .
طبعا امي وابويه واخواني عجبهم وفرحوا بس اني يمكن جنت احلم بيوم التدك بابي الخطابه وافرح بس ماكدرت افرح خايفة من تهديد خضر خاف ينفذة .
اهلي مخبوصين والكرة بملعبي مثل ميكولون وامي من فتحت الموضوع اني غيرته وكل مرة اكوم من يمها .
الهم والتفكير كتلني كتل .
اجانه عمي غزاي تغده وكمل كال شنو مارديتوا على الجماعه.
امي والله بعد الشور مو بيدنا يا خويه يم أم الشأن .
كال خلوها على راحتها الها اسبوع بس الولد گرابتنا وخوش اوادم .
امي ندري خوية والله يقدم البيه الخير ..
يومين وابوي گال بوية اليوم الناس خابروني ويكول ابوهم شوكت يجون وشنو رأيج .
ابوي رجال يتقبل بسهولة وردة فعله عادية
وامي من سمعتني لعبت لعب وليش وشبيه وشتردين وزير لو امير
خوش ولد وكل المواصفات بيه وانتي عمرج26 انموت وتبقين منو الج وتبقين بلا زواج كاافي شمات ام خضر بيج .
اووو يمه كافي ماريد وخلاص عفية سدي الموضوع .
طبعا جنت مقهورة بس شسوي اتخيل خضر يكتله شتسوالي اتخبل والله .
بعد ما وصل رفضي للموضوع
اجاني مسج من خضر
كاتب عفية عليج تسمعين الكلام فكري بموضوع رجعونه لبعض ..؟
يومية يدزلي مسج . يحاول يقنعني بالكلام وياه والتفاهم والتعرفينه من جديد يكتب كلشي اختلاف بحياتنا من 13سنه . مو نفس خضر القديم حياتي كلشي تغير بيها خلينه نسولف نتخابر !
الصبح اكعد على مسج صباح الخير
وبليل على تصبحين على خير واحلام سعيدة.؟
يومية مسج ومسجين
واني ما اجاوب ابد
مرة وحدة كتبت انت شتريد بالضبط
كتب احبج واريد نرجع
كتبتله هههههههههه خوش نكته بايخة مثلكم ؟
مسج :ماسامعة الرجل لاينسى حبه الاول اول وحدة عرفتها بحياتي صعبة اشوف غيرج
ومن شفتج بعده هاي السنوات الراحت كلشي جذبني الج احبج والله ! احسج بداخلي وملك اليه انتي !! حسيت انت مكتوبة الية وحياتي وياج تكمل لان اعرفج وتعرفيني
قريت المسج اكثر من عشر مرات يلا جاوبته .
...
كتبت اتصل بك قريبا لوضع النقاط على الحروف نهائيآ ..
بس رجاءا لا ترسل رسائل ولا تحاول تتصل حاليآ
بالدوام مااخذ راحتي
بالبيت كلها موجودة واني ما اخابر وحدي حتى لو يجيلي اتصال من اختي مرت اخوي صديقه بالدوام كدام الكل احجي .
بصراحة ماعندي خصوصيه ابد بهيج شغلات حسب حكم اهلي وهم المسجات التجي منه واللي ادزها امسحها بلحظتها .
اهلي راح يطلعون زيارة مارحت وياهم بقينا اني وبيت غسان هما فوك واني جوا . زوجته واطفاله وهو طلع بشغلة.
كملت المطبخ إجيت لكيت مسج منه فارغ؟
تجراءت واتصلت وماعرف ليش خايفة من اتصل او هو يتصل
ومستحية رغم بالحقيقه اكدر اواجه . رفض الاتصال .
شوية ثواني رجع اتصل .
فتحت . الو
خضر . السلام عليكم .
وعليكم السلام .مايحتاج ترفض الاتصال وترجع تخابر عندي رصيد اولا وثانيا ماحب اي احد مهما كان يسوي نفسة سبورتي وصاحب جميل براسي هاي اول شي
ثاني شي .
شوف اني السر اللي انت حضرت جنابك خايف منه اني ناسيته واني لا انت ولا قبلك ولا وراك افكر بالزواج واذا ازوج هذا شي يخصني واكيد اني مراح اتزوج من اقارب لان كل اقاربي مخليه عليهم علامة اكس يعني اطمأن . هااي اذا قررت اتزوج واني ماريد اتزوج تجربة وحده فاشلة بكل نواحيها جانت كفيله دمر نفسيتي وتخليني اكرة هذا الموضوع انت لاتخاف وسرك ببير بس جفيني شرك وشوف حياتك الطبيعية واتزوج وكون عائلة واثبت لنفسك مابيك شي!!
خضر :اني مابيه شي .
اوك يلا هاي هيا انتهينه وعيش حياتك بعيد عني لاتطلع تتنطنط بحياتي ترا ماكو شي راح يتغير اني ماشوفك الا شي اسود بحياتي انت وامك .
وسديت التلفون ..رجع خابر مرة مرتين تلاثه رابع مرة جاوبت
شكو بعد .
خضر . اني ابقى بحياتج ما اطلع منها انتي مغرورة وانانية
يكولون الفات مات وصار13سنه مامات الماضي اللي بگلبج .
ايي ممات ومن اسمع صوتك او اشوفكم ماعرف شيصير بية .
خضر . كلبج اسووود كلش بشائر جنتي مو هيج .
الانسان بين ليله ويوم يتغير .
خضر . بشائر كلشي تغير الوقت والظرف والناس كلشي تغير اول تجربة زواج جنتي طفلة واني مراهق كلشي ماعرف بالحياة وانتي كلشي ماتفتهمين بزمنه مو واعين جيلنه يختلف اني اتزوجت بالسادس علمي والله ماعرف شنو الزواج وانتي ماتفتهمين حكم الاقوى فرض زواجنه واحنه بهيج عمر ومع هذا اني جنت احاول اكون كد المسؤولية وماحب احد يأذيج ودافعت عنج هواي. رغم ضعفي شخصيتي وكفت بوجة امي وجدتي وابوي
ومن طلكتج هم وكفت بوجهم و ضجت حيل لان اني تعودت عليج ووهم جنت بصراحة مو كد الزواج
ومن كبرت كلت احسن راحت لان اظلمها وياي
وحتى بالكليه ولاحاولت اتقرب لبنية جنت خايفة لا اطلع مو كد نفسي وحتى اثبت شخصيتي وقوتي لاهلي حتى محد يتحكم بيه دخلت دورة ضباط و مرت الايام وحاولت اجرب نفسي بالفراش واكتشفت اني انسان طبيعي ظلمت نفسي هوااي .
شي يخصك ما محتاجه اسمع قصة حياتك حتى تتصور اني راح اتعاطف وياك
اسمعني خضر خابرت حتى اخلي النقاط ع الحروف مثل ماكتلك واعيدها وأكررلك كلامي
شوف حياتك واني ما تزوج ابد حتى سرك ميطلع وهاي هيا ماريد اسمع شي عنك كااافي .
خضر :زمخ اوكفي لاتسمعين ونص . لاتعلي صوتك فاهم .
وسديت الخط .
ورا ساعه دزلي رسالة كاتب .
اسف لان زمخت .
بس لازم تعرفين اني شصار وياي
سويت علاقه وجنت طبيعي ودخلت علاقات لان جنت ممصدك اني طبيعي وانطيج معلومه ابوي مات بسببي بعد ماطلكوج مني غصب راد يزوجني ورا فترة طويله حتى عود يكسر شوكت عمي . بالعناد يزوجني
كتله اني ماتزوج وعمي مامسوي شي وكافي بنت عمي سترت عليه وماكالت اني مماخذها ولا كدرت اتزوجها وابوي من القهر عليه اني طلعت مو رجال واني وحيدة وهو متأمل بية
واجهت ابوي وكتلة ماكدر اتزوج وهم عمي مافضحنا
وهنا ابوي اتمرض حيل و مات من القهر واخر ايامه جان يكلي خضر عمك اريدة اريد اشوفه اريده يبريلي الذمة واحجي وياه .
جنت استحي اباوع بوجه عمي عبالي يدرون انت بعدج بنت بيوت
. ليش ماحجيتي ؟!..
ضحكت عليه ..
كلساع وكتب جاوبيني وريحيني عليج الله .خليته بدون جواب ..
بالدوام اتصل . عبالك يعرف وقتي وقت درس عندي استراحه .
محد يمي كاعدة ارتب سجلات الدرجات والمتابعه .
جاوبته نعم .صباح الخير .
اهلا . خضر . شلونج .
زينه شنو انت ماعندك شغل وعمل بس تراسل وتخابر اذا انت فاضي وبكيفك غيرك عدهم شغل وواجبات واهل ؟
عندي بس شسوي اشتاقيتلج والله .وانتي انانية متجاوبين ع مسجاتي .
ايي من ما اجاوب يعني جاي اكلك لاترسل تزعجني .
ايي ميخالف مزعج اني من زمان وشسوي ماطلع الا بحياتج ؟
ماطول الج خلك تحجين وياي
بشائر خليني اتقدملج مرة ثانية وخلينه نكعد كعدة عرب ونحجي بالحاضر اليفيدنه والماضي نعوفه .
حلم ابليس بالجنه .
خضر . بشائر اني رايدج والله ويا بنتي عمي گلبي يمج والله وروح ابوي ولج من يوم الشفتج لليوم اني ليل ونهار افكر بيج .
ادور على مكان بيه سالفة تخصج
ماتعرفين من يسولفن بيج خواتي واني اسمعهن شلون اكعد مثل الطالب الشطور يستمع درس حلو .
اووو خضر انت متمل
خضر:لا ليش أمل من الشي الحلو بحياتي
اسمعيني ولج ريحي گلبي والله راح اموت .
عندي درس
خضر:بعد وقت
بشائر اني اختلفت وصرت غير شي وانتي هم خلينه نرجع هاا وقبلها نخلي فترة خطوبة نتعرف على سلبياتنا وايجابياتنه وراها نقرر نكمل لو نبقى.
ايي واني يومية مطلكه مو مو لعبة اني عند حضرتك .
حضرتي يا بنت عمي قافل عليج .
انت قافل لشي ثانيا مو حبآ بيه ؟
لا لا والله حبآ بيج مو كتلج من شفتج من اجيتي على الجواز لليوم اني دايخ بيج اريدج مرة ثانيا وشكو تأمرين بيه يصير ويجرالج
بس فكري وكولي يالله .
دك الجرس يمي هو سمعه .
خضر:هسه دك الجرس وعندج درس
اكيد حتفكرين
وفكري والاهم من كل هذا تحجين وي عمي بقرارج وخلي شروطج وشروطكم يلا تخابروني . واخر مرة احلفج بالله فكري جديآ ووافقي خلينه نعيش الباقي من حياتنه سويه ونعوض الراح ونعيش ولد اليوم بدون اي مؤثرات او اجبار من الأخرين ماشي .
اوك يصير خير ؟
خضر: يالله واخيرا شي مفرح وكلام ناعم مو عصبيه . يلا اخذي راحتج مع السلامه ((حبيبتي)).
سد التلفون ابن الحية الصفرا عابت هل الشكولات بس اني الك .
بس بصراحة بقيت افكر بموضوعه ماعرف ليش .
بس تفكير ايجابي صافنه بكلامه وبشخصيته الجديدة طوله شكله هيبتة ماكو اي مقارنه عن السابق يعني شلون عبالك واحد ثاني يمكن. هو حلم هواي بنات ضابط وطويل وحلو يعني التفكير السطحي
مرات اضوج مرات ابتسم وحدي
ايام وامي تريد تعرف شبيه هواي صفناتي وهو هم بعد ما دزلي اي رساله وهيج اتذكر كلمه حبيبتي احس بيها غازلة مشاعري ؟.
قررت احجي وي ابوي . واتشجعت للكلام
طلبت منه نطلع بحجة اسوي هوية للدوام ؟
استغرب شكو كلي
كتله عندي موضوع وامي ماريدها تعرفه .
هو جاوبني كال راح تروح لبيت اختج يومين واحجي براحتج
..
شوية وامي لبست عبايتها كالت شو اريد اروح لبيت جهاد
ابوي اوصلج .
لا اريد احرك روحي منا اللهم مو الدكتور كلي اتمشي ..
ابوي . اوصلج مشي .
امي . لا وياي فطومه ونتمشى دعوفني اطلع وحدي اشعر بالحرية.
ابوي . دروحي يلا صوج .
لبست عبايتها وهيا وفطومة طلعن .
ابوي . شوفي نيتج صافية امج طلعت وحدة
تعالي بالحديقة نكعد وجيبي وياج دولكة ماي .
طلع قبلي واني جبتله ماي ورحت كعدت يمة وسكتت
ابوي شافني منحرجه . احجي بوية شعندج ؟
والله ماعرف شلون ابدي .
ابوي ابدي منين ماتردين شنو هيا السالفه احد مضوجج هنا اخوج مرته امج .
لابوية شنو سامع شي ؟
لاعود كلت اسهلج الامر .
لا مو بالبيت .ابوي .
تردين فلوس مريضه ؟ لا .
ابوي . واحد محاجيج مضوجج ذابلج حجايه بالمدرسة بدربج كولي لاتخافين .
ها هيا هيج وهيج .
ابوي . احجي وفضيها بعد
بصراحه بويه .
خضر يخابرني ويراسلني هواي؟
ابوي اييي بعده اني مو رزلته .
ايي بعده واني جاوبته مرتين وشكد يدز كلام يحجي عن حياته وعن الاختلاف .
ويكول خلونه نرجع مثل قبل .
ابوي ساكت ودنك .
انطاني مجال علمود احجي
حجيت كلشي لابوي .
من كملت . كال .
انتي شنو رائيج ؟!!!
بوية اني حجيتلك انت تنطيني النصيحة والراي؟
ابوي . شوفي اني حالف اي تدخل بحياتج بهذا الموضوع ما ادخل ابد ابد.
اللي يتقدملج اسأل عليه وعلى اخلاقه واعوف الامر متروك الج انتي يعجبج توافقين وافقي مايعجبج ماتوافقين لاتوافقين واني وي قرارج بأي شي . حتى ما اانطي راي وتكولين بعد يومين موزين ماعجبج تكولين انت جبرتني لابوية انتي صاحبة القرار وانتي اللي تتحملين قرارج لان انتي عمرج راح يطب27سنه عاقلة وفاهمة وواعيه وتكدرين اديرين حياتج مو صغيرة .
انتي لو ما مقتنعه بكلام خضر مااجيتي اليه وحجيتي
جا كلتي شلون ابن اخوك يخابرني واني اروح ارزلة واهينه بس انتي اجيتي باسلوب بين المقتنعه وبين المامقتنعه وتردين الشور مني .
ايي بوية اريد منك الشور .
يابوية انتي كعدي بينج وبين روحج وفكري زين بكلامه عجبج انت المسؤولة بااتخاذ القرار ماعجبج هم انتي المسؤولة برفض الموضوع وكان الله يحب المحسنين !.
خوش اني هم يومين واردلك جواب ...
قنعني ابوي بكلامه اني مو صغيرة واني افكر ..
وتفكيري جان يكول انطي فرصة ثانية وبلكي اعيش حياتنا حلوة بس لازم اضمن حقي من البداية وياهم بيت عمي
جبت ورقه وقلم كعدت اكتب شروطي وتخطيط لحياتي اذا وافقت وخليت عدة نقاط اذا وافق عليهن افكر بالزواج منه اذا موافق بعد اني سويت اللي عليه واليطلبه مني هاي الفترة وانطية فرصة ..
....
امي بهاي الايام
تريد تغيير جوا تروح يم اختي يومين تزور الكاظم عليه السلام وتشوفها وترجع .
اخذاها جهاد وراحوا .
اني شفت ابوي وحدة وهاي فرصتي احجي وياه بدون ما ارتبك
قدمت ورقتي لابوي والمكتوب بيها قراها ابتسم كال والله انتي صايرة تخوفين بس هذا حقج ..
جا بوية مرتين اطيح بنفس الحفر لازم اتشطر شوية
ابوي:كفوو
خليت الامر لابوي هو بعد يتصل يبلغه .
داومت وشي طبيعي
رجعت تغدينه غسلت المواعين تمددت غفيت كعدني ابوي كال بويه خضر يكول اجي اليوم ونكعد
واني كتله هلا بيك ماطول امج مو هنا وبس غسان واني حجيت لغسان اخوج
.
هاا اي انت الشروط اللي كاتبتها گولهن اله وشوف رده المهم يوافق عليهن كلهن .
كال لابويه لبسي ربطتج وجبتج وكعد يمنه وانتي بلسانج احجيهن اني مو كتلج الامر متروك الج يا بنيتي .
لا بوية ماكدر استحي !
هاي حياتج بشوره يلا الولد راح يجي من الدوام طالع والطريق ساعتين خطيه ويرجع لاهلة يريد كومي غسلي وجهج وسوي جاي علما يوصل .
هم غسلت وسويت جاي ولبست الجبة السودة وشالها الاسود .
وشوية ودك الجرس وطلع ابوي دخله واجه اخذ الماي والجاي اجه يمي غسان . كال بشائر ابوي هو ضاغط عليج بهاي السالفه؟
لا ليش
غسان . اي شنو التطورات السريعة هاااي انتي نسيتي قبل وشصار بيج ليش ترجعين لنقطة الصفر .
2
سكتت كتله هسة مجرد كعدة واكو شروط اذا وافق عليهن يصير خير ميوافق لا بعد مالهم حق بأي شي واكو امور ماكدر احجي بيها.
غسان . انتي جبيرة وعاقله . بس ياخوفي من ردة فعل جهاد؟
هااا اي والله شو اني هم نسيت جهاد .
اجه ابوي كال غسان تسلم لو تطلع .
لابويه اسلم ليش هلا بيه خضر .
راح دخل سلم .
وابوي يمي . بوية الج القرار تدخلين لو لا ؟
ايي بس مو هسة من يطلع غسان استحي
ابوي على راحتج .
شوية وطلع غسان كال تدخلين . كمت كال خليج قوية واني بظهرج .
دخلت سلمت وكعدت يم ابوي بصفه
كبال خضر ! بعده بملابسة السود وامبين تعبان الساعه راح تدخل على الاربعه ..
هو منزل عيونه وكاعد شامخ
من اشوفه ماارتبك يمكن لان اعرفه او يمكن باخر فترة حسيت هو يخاف من العندي عليه احس بالقوة كدامه .
خضر . عمي اني جاي حتى اسمع الكلام التردون تگولونه انت وبشائر
ابوي . اني ماعندي اي كلام هسة لان صاحبة الكلام والشأن كاعده هيا التحجي ..
فد انحرجت باوعت علة ابوي نسيت شحجي .
خضر . يجوز منحرجه عمي انت سهل علينه الامر .
ابوي . هم صح . شوف عمي انت خطبتها مرة ثانية وصارلك فترة وسطت عمك غزاي ووسطت ورجل عمتك واني بصراحة رافض الفكرة ورحت من وراي حجيت وياها واني كتلك بعد لاتوصل الها ويمها وتزعجها .
ومنعتك وهم رجعت بس هيا هسة انطتك مجال بس المجال اللي انطته الك محصور بشروط بينك وبينها .
اني ماعرفهن شنو بس اني بالاول والتالي اوكف وي بنتي وبس .
بوية بشائر ابنج عمج وطليقج اجاج من الباب وكاعد كبالج ويريد يتقدملج من جديد توافقين بيه وكدامه واني مالي علاقه.
خجلت وبح صوتي موافقتي مرهونه باللي اكولة
خضر كولي شنو التردينه يجرالج !بت عمي جان مايرفع عيونه ابد .
هو ثكيل طبعه ويحترم ابوي .
اول شي اني ما اترك دوامي ابد ولا احب يدخل بدوامي وبراتبي ابدآ
ومحد اله سلطة عليه ولايدخل بحياتي الزوجية او البيتيه غير اللي ازوجة وعلى ذمته
بيت وحدي فقط محد وياي .مايفرض عليه ازور احد او استقبل اي احد مهما كان بس اهلي!
مهري يكتب بيت جدي بأسمي !!
والمؤخر ضعف خمس مرات ما معروف بيه حاليا من المهور بين عشيرتنه وعمامنه ..
هاي هيه ماطالبه غير ضمان لنفسي ..
...
خضر . سكت كال يعني اعوف امي واطلع ؟
اييي حجيتها بثقه تامه .
خضر . عمي تقبلها اعوف امي واطلع واني وحيدها واعوف اختي ارملة شابة وعدها بنية وولد وحدهم بيت ..
ابوي . اني حاليا بس مستمع ما ادخل !
خضر . كلشي سهل بس مال اعزل لا ماكدر كلشي تردينه اسوي الج بيت جدج اللي هو بيتي حاليا وبأسمي مستعد اسجلة بأسمج بس ماكدر اعوف امي تموت اذا اعوفها ..الله شيگول عليه
العالم تاكل وجهي عاف امة وحيدة
كلشي تردينه اسوي بس امي ماكدر والله ما گدر .
براحتك انت اعرف بمصلحتك
انتهى الموضوع بالنسبة الية ورجاءآ وكدام عمك لاتبقى تلاحكني ولاتتصل بيه .
. كمت اترخص منكم
وطلعت .
رحت لكيت غسان واكف بالباب مبتسم .
اجه وراي للغرفه
خرب ابليسج شلون طلب بيت جدج بأسمج .
ايي هو حتى اخلص منه كتله سجله وعوف امك وتعرف مرت عمك راح تعوفه لو تخلي يسجل بيت بااسمي غير تموته .
غسان . نسوان منو يكدر الجن حتى ابوي الصم ..كال طلعوا
شوية واجه ابوي بدل كال شنو تردون مسواك ؟
غسان . طالع وياك حجي
كتله ممحتاجين شي وطلعوا ..
ومحد فتح الموضوع ابد بعد ولاخضر خابر .
من رجعت امي ماكدرت اضم عليها خطية وحرام عليه سولفت الها .
لعبت لعب بيه تكلي كلة هو وطاريه لااريدهم ولاتفكرين وعيب عليج تجيبنه لهنا وتسولفين .
يمه اني كلت اذا وافق نرجع هم انتي تخلصين مني واني محد داك بابي والحك اخلفي طفل طفلين قبل لااكبر
امي منو كلج اريدج تزوحين شعندج شناقص تبقين كاعدة يمي اداريني خاف اتمرض . تزووووجين وترجعين للكرطة ام سنون الصفر وابنها لا الى اني متت طميتني جوا التراب يلا تزوجين خضر ابن الكرطة ...
شكرا لزيارتكم عالم روايات سكيرهوم
