رواية الرجل لاينسى حبه الأول الفصل السابع بقلم سهير رائد
مر شهر بحالة تلاثين يوم حسبتهن
وخضر لاخابر ولاشي
. شروطي كانت قوية عليه .
وحقه شنو يتنازل عن بيته او يعوف امه علمود مرة يتزوجها ؟!
وامي هم خليتها تنسى الموضوع مو يومية ترزل بيه وتحجي .
شهر الرابع تقريبا شهر التعب لان درجات ونهاية السنة وبعد شهر للامتحانات آخير السنة
تعب والجو يكسر ادوخ واتعب بيه
رجعنا من الدوام بقمة التعب
لكيت طبخ ونفخ ؟!
سلمت على امي ومرت اخوي ها خير خطار؟ منـو ؟
امي . اي عمج ويكول وياي خطار !
بدلت وتمددت تعبانه وحتى اشرد من الحجي اللي راح اسمعه .
وامي تصيح تعالي ساعدينه !
شوية وامي تكعد بيه كعدي شو نمتي
ها يمه تعبانه والله همزين صليت بالمدرسة .
امي:كووومي ساعدي مرت اخوج ذابة الشغل كله عليها؟
شكو شبيج يمه شو ضايجة عمي اجه .
امي:ايي اجه عمج وياااه الهيبة ابن اخوة؟
منو؟
امي:ابن الكرطة شعدهم كليلي شعدهم!
واني شمعرفني يجوز جاين بشغلة وكالوا نمر على بيت اخوه وبيت عم ابن الگرطة جا اني شعلية
شبيج يمه شو ضايجة كلش مني .
امي:ها يعني ما تدرين
والله مادري جيبي القران احلفلج ما ادري بشي وهاي كايمة للمطبخ اكرب وياجن
شوية واجه ابوي
حجيه وينج تعاي سلمي يسأل عليج اخوي.
امي
ماكوم شعندة ابن الكرطة هنا .
وابوي طكت عيوووونه ولج شبيج شنو هذا الحجي اكول عايفه جنتنج تحوس وحدها بالمطبخ وانتي هنا كوووووومي لخطارج ؟
كامت امي من ابوي صار عصبي
بس امي بس تخزر بيه حتى كمت اشك بنفسي من ورا خزراتها
ابوي عصبي
اجه جهاد وسأل منو امي كالتله عمك وابن عمك خضر
هم خزرني !! حسيت بذنب
ام فطومة شنو شبيهم
والله مادري يردون يأكلوني !شنو اني عازمتهم وماادري بروحي
اجه ابوي زمخ بجهاد ادخل سلم وعصبي . جهاد دخل گوة سلم عليهم .بس غسان اريحي بالموضوع .
حتى بقيت بلا غده انسدت نفسي من رزايل امي ام المصايب انتي اللي انطيتي مجال .
اييي شكو يايمه اني شمسوية اجيت من الدوام لكيتكم عدكم خطار شمسوية.
تروح وترجع تكول صلفه متستحين .
انقهرت رحت للغرفة الثانية منا لمن خلصوا غده ونگلوا المواعين
وبديت اغسل بيهن وصرت عصبية كلت لمرت غسان اخذي جهالج وافلتي من غضبي لان ماكدر بس عليج ضحكت وصعدت .
اجه غسان صب جاي .
واني اغسل شوية واسمع صووووت جهاد ؟
رحت للهول واسمع جهاد يحجي
يكول شنو بشائر شنو ترجعلك الا انت تخبلت وترجع تخطب اختي شنو نسيت روحك .
عمي . جهاد ابن عمك اجاكم من الباب ويريد يعيد الماي لمجاريها وابوك ساكت انت ليش تحجي .
جهاد . ماعدنا مرة ولا نريد نزوجها نريدها تخدم امي وابوي ولو خضر يبقى اخر رجال ماننطيه ..
سمعت هيج رجعت للمطبخ بس سمعت أصوات ابوي وعمي وجهاد .
كملت كلشي ونظفت المطبخ وغسلت ايدي
والدنيا محتركه اخذتي اكل ورحت للغرفه الثانية سديت الباب .
كعدت اتغدى
دخلت امي تاكلين وتتغدين .
جا شلون اموت من الجوع اليوم شبيج وياي ؟
مابيه شي بس هذا مارجع اذا ما انتي منطيته عين ؟
لا والله منين منطيته عين شو عيوني اثنينهن براسي.
امي:تصنفين ام المصايب صايرة تشمرين نكت علية .
اوووي شسوي شعليه لاتحمليني شي مالي ذنب بيه عندج شي محد غريب بالصالة روحي ادخلي وفضي النقاش البينهم..
امي . حتى ابوج يدوس بطني
ايي جا لاتغثيني والله دايخة وتعبانه وحتى لان جعت وتاخرت بالاكل وانتي غثيتني احس معدتي گبت نار ..
تستاهلين .
اللهم مطولج ياروح ؟
كعدنه شوية اجه ابوي . كاال عمج يريد يشوفجن ؟!
امي . هلا بيك خوية جا انت غريب تعال .
دخل سلم علينه وبوسني شلت الاكل رحت للمطبخ صاااح تعاي بشوره بعد عمج
اي عمي جايه غسلت ايدي ووجهي ورجعت
دخلت امي كاعده وهو كاعد كال عمي الله بالخير عليجن
بويه إبن عمج
اليوم جابني وجاي يريدج على سنة الله ورسولة وهلمرة لاحكم ويصدر يجبركم تتزوجون بالجبر
ولا الأكبار بعد تحكم بكيفها .
هو الولد شاريج وموافق على كلشي التردينه .
امي . خويه هذا الزواج ما وراه بس الندامه .
عمي . رحمة لااهلج لاتحكمين من هسة قبل جان كلشي يختلف اهلنه وحكمهم ومعاملتهم
وين صفوا جوا التراب وراح الحكم والجبروت وماخذو وياهم بس اعمالهم والجفن لبسوه وهسة ولدنا محد حاكمهم هما كبار وفاهمين ويعرفون يعيشون حياتهم من جديد ..
وخضر ماكو منه والله وليدنا ومنه وبينه وماتزوج يريد بشوره يريدها ترجع مرته ويكمل حياته وهذا اذا يدل على شي يدل على انو هو يحبه
امي . بس امه ماتخليهم يعيشون مرتاحين .
عمي . هو منو بعد اله حكم على ولد ابنية بهذا الوكت وامه مره جبيره رجلها والكبر يجوز تموت قريبا وضحك .
امي . والله اني امها ومموافقه
عمي . ليش ياخوية والولد يكول اني الفوك كله اعزلة لبشورة ونعيش وحدنا اكلنه وشربنه ومالها بحد مستقله ويكول شتريد اني حاضر .لاتوكفين بقسمتهم وتحصلين ذنب ؟
جاوبته عمي بس اني ماريد اعيش بذاك البيت شرطي عزال بغير بيت وشرط الثاني هو يعرفه المهر اللي اريدة ؟
عمي . كولي يالله تقبلين غسان هسة يعوف امج وابوج وحدهم وهما كبار ويردون السند الهم بكبرتهم
تقبلين يتمرضون ومحد يمهم ؟
غسان ووضعه يختلف عن خضر وماريد مقارنه بأحد .
عمي . بويه صلي على محمد والكطع موزين وهسة اني كلت امه مريه رجلها والگبر والقوة والحيل والجبروت راااااح هسة هيا تريد العافيه والكومه والكعدة .
اني ممقتنعه عمي ماكدر الا بشروطي
امي ماقتنعت .
عمي يابة هسه مو وكت جواب اخذي وقت للتفكير وراها هم نكعد مرك ثانيه اروح للهول يمهم
طلع عمي وشوية واجه غسان كال يمه عمي يكول خل تجي يمنه .
راحت واني كلت هسة اني ليش موترة روحي شو خل انام
..
بقيت ماكدرت انام امي تأخرت بس ابوي وغسان يطبون ويطلعون .
صحت غسان جهاد وين ؟
كال راح زعل وطلع؟
ليش شصاير وزعل
غسان . شوية ثكل بالكلام وابوي زمخ بيه وهو زعل وطلع .!
لاخطيه ليش يزمخ بيه .
غسان هو هم مااحترم وجود ابوي نسه نفسه كلش
زين امي شعدها جوا تأخرت .
غسان والله مادري يقنعوها تقنعج
ياااااا عيوني محد يكدر يقنعني اني ..
انتن النسوان منو يكدر لعقولجن ..
اجت امي كالت يمه راح يطلع عمك وابن عمك وصلهم للباب ؟ وي ابوك ..
طلع غسان يوصلهم وي ابوي وامي سكته بس هادئه ..
شوية ورجع ابوي دخل للغرفة كال بوية ما طلعين ملابسي اسبح وانام تعبت من السوالف والطلايب.
امي . خضر خوش ولد وصاير منصب ورتبه وابن عمج والفات مات وهو وعدني يخليج بين عيونه ويعزلج فوك من اول ساعه تدخلين لبيتهم وكال اكتب نص البيت بأسمها واي شي يصير بيها لو واحد يغثها اني معتب الكم ؟.
وانتي صدكتي؟
امي . ابنج عمج خوش ولد ومؤدب وتردين الصدك اني ماحب امه واحكم عليه على كرة امه لايمة الولد مايتعيب
بس ابن عمج وخواتة
والله ماكو منهم عكس امهم تماما طالعين على عمج ابو خضر فقير ومن اهل الله جانت امه مشيتة ويخاف الله بيها بشكل مو طبيعي .
ايي وخضر هم امه مشيته وبعدين اني طلبت بيت منفصل وحدي بعيد عن امه
وهم طلبت البيت بيت جدي بأسمي مهري . من هسة كام يمشي الأمور بكيفه مااقبل ..
امي . هو حجى وياي والولد شاريج وخطيه كسر خاطري واني احبه والله خضر حباب وزين وليش احكم عليه من هسة وبعت بقت يمج اني موافقه وهاي هيا لا تشيلين همي اذا وافقتي عليه ،...
الكرة بقت بملعبي بقى بس جهاد اللي مااجه بعد لبيتنه زعلان
واني مموافقه لان ما راح ينفذ شروطي الامور جم يوم سكته ..
خابرني خضر بالدوام .
مجاوبته . دزيتله رساله مو كتلك كدام ابوي بعد لاتخابر؟.
رجع خابر مرة واثنين وتلاثه خليته يدك وسويته صااامت واباوع عليه هيج خباثه .
جاوبت بعد 12اتصال.
الو .
خضر . شدعوة ست بشائر اتصل ومتجاوبين .
خضر والله اني خطبتج واهلج الناس موافقين بس انتي بعدج ؟
واني احد گايلك موافقه ؟
اكيد محد گال بس اني تقريبا راح انفذ كل شروطج .
لا ممنفذ شرط العزال والمهر المقدم ؟
خضر . الله بالخير بشوره يعني اني حجيت وي عمي ومرت عمي اني رايدج ومااعوفج وهم لو تطلبين كلشي اسوي بس امي لا ماكدر اعوفها واعزل بيت وحدي .
احنه الفوك انتي شايفته قب سنه بيتنه كله رممته وسويته يخبل على الاساس تكعد بيه عطور بس هيا ماقبلت رادت الغرفة الجوا خذتها ويم امي تداري بيها .
واني بقت غرفتي فوك غرفتنا القديمة اني احبها
هسة بس اعزلة نهائيا عن الجوا الدرج باب مثل الشقه بس الج بس ادخلين من باب المطبخ وتصعدين وحياتج وحدج اكلج شربج وطلعاتج طباتج محد اله علاقه بيج .
الشرط الثاني المهر . اوعدج والله وروح ابوي اسجل بأسمج نص البيت شراكه اني وياج يعني اني هذا الاكدر عليه وهااا بس تبقى سر بيني وبينج سالفة البيت . شتكولين ياعمري .؟
لأ غير موافقه .
خضر . جر حسرة . سهلي امورنا بشائر خلينه نرجع نتزوج ونعيش حياتنا نلحك نسويلنه عائلة نطلع نسافر نتونس نعيش البقى من العمر شو لا انتي تزوجتي ولا اني تزوجت والله كاتب النه نرجع سوا اني اريدج اني احبج اني اريد بنت عمي غيرها الگلب ميريد .
عوفك من هذا الكلام . لان ابد ميهز مني شعره گتلك وافق على شروطي وافكر . ..
خضر .. بشائر والله العظيم اني الحياة حيل متعبتني لاتعبيني اكثر رحمة لموتاج .
وشنو علاقتي بحياتك المتعبه اذا تعبان ابتعد عني اني ماحب الطاقات السلبية بحياتي !.
خضر . خوش الله كريم اترخص منج ارجع لشغلي مع السلامة .
الله وياك ..
بيوم الخميس . وجان تدخل علينه ام خضر وعطور وجهالها وابتهال وجهالها ..
العصر ساعه بالاربعة؟
وياهن عمي غزاي ومرته جايبهن بستاركس وجاي .معروفه جاي يخطبون .
اني الفتحت الباب يعني السلام خلصت منه بقيت بالمطبخ اكيد يبقون على العشاء ابوي راح تسوك النواقص وبدينه اني ومرت غسان .
وامي تروح وترجع .
والبنات هم يجن يمنه كلساع وحدة .
ماعرف بهل اليوم الحلوك انخرست من طلبوني رسميآ رغم كلام ونظرات ام خضر المكروها بس الكل ساكت وحتة اني جنت حيل تعبانة يمهن ومو يمهن يعني بالي مشتت وراسي يوجعني تعب دوام وشغل .
ما صدكت طلعوا وراحوا ورحت نمت نومة اهل الكهف مثل ميكولون ثاني يوم اسأل امي وين لسانج وين كلامج .
امي . هما بعد اجو وطاحوا علينه واحنه اهل والدم عمرة ماصار ماي وعيب من عمج كلساع كايم بايس راسي وراس ابوج جا شسوي اطردهم وهم بنات عمج فرحانات وهنا حبيبات وبنياتنا وخضر وليدنا !!
الكلام كله تغيير يمكن
جنت منتظرة اشوف جهاد طلع جهاد موافق اذا اني اوافق يعني اني وبس الساكته .
وامي يومية تكلي هاااا مافكرتي .
لا مافكرت .. ..
اخر شي وافقت بس گلبي يوجعني .. بس على شروطنه اني وياه ..
بس ابوي بلغ عمي بالموافقه .. ثاني يوم عمي اجه العصر حدد يوم المشية ونفس اليوم المهر وجايب وياه فلوس؟
فلوس تشتري ذهب وفلوس التجهيزات على گولته ابوي اخذهن كله كلهن الها التجهيزات من عندي خطار واهلي جايين عليه واخذ فلوس تجهيزاتهم شمالني وهم تتعشون يمي يلا ترحون ..
اني الفلوس مالزمتهن بيدي كلت لامي مالي علاقه مالزمهن ولا اشتري كلش اجتلي الطنكورة والخنكة.
امي خطيه اخذتهن وراحت هيا وجهاد لبيت اختي وراحن جابلي ذهب من الكاظم .
وجهزن للمهر مناك جم حاجه .
ومن اجت امي هيا ومرت غسان اتفقن على صالون وبدلة طبعا اني ضايجة مختنكه ويوم عن يوم من يتقرب يوم الخطوبة كلبي يوجعني وابجي ليش رجعتله ليش ..
بيوم الخطوبة ماحس بشي رغم صالون وبدلة حلوة وشي تغيير جديد بحياتي والكل يتمنى النه الخير وحياة سعيدة وعودة مباركة .
من دخلن علينه يهلهن ويصفكن واجوا عمامي والمشية والهوسة بكفه ومن امه دخلت بكفه ثانية اجيت ابجي اجيت انهزم ماريدها انعاد عليه الشريط القديم . شلون دمعتي مانزلت ماعرف شلون سكتت ماعرف . .
يمكن الهوسة واحنه عائلة جبيرة بالاقارب والاهل بنات العمات والعمام يوووو والجهال يمكن خمسين قليل والله الهلاهل احس راسي انسطر بس من الهلاهل عندي بنت عمي غزاي مو هلهولة عبالك بيكيسي ترمي من كد ما صوتها قوي وحنجرتها رهيبه .
صنطة كلها سكتت دخل عمي كال الكل تطلع تبقى بس بشورة تعقد ..
ماطلعت ام خضر كبالي كلبي مقبوض منها .
بقت امي .. دخل ابوي والسيد اني لبسني برنص وبقيت .
احنه جان المتعارف المهر بين بنات عمامي سبعة بسبعة اني طلب الضعف خمسة احد شروطي
35مليون في35
بس ذكر المهر وام خضر نشغت الكل انتبه بس غلست ؟
وافقت على صيغة العقد وعقدت على خضر مرة ثانية
بس طلع السيد ام خضر جرت ايد عمي كالت شنهي 35مليون ناهبين ابني شني شفتو
كلها متفقين وابنج يدري واسكتي لاتخربين فرحتنه ولمتنه ..
دخلن بنات عمي طبعا جايات زينب وابتهال وعطور شيماء مجايه .
ابتهال بس سمعت امها كامت تصفك وتهلهل ودخلن بنات عمي .
اني اصبر بروحي مااحجي مااكوم اخيط واخربط ماخرب اليوم عيب من ابوي وعمي
..
شويةة واجه خضر وهلاهل كعد يمي والظاهر امبين عليه وجهي يطرد النعمة ههه .
همس ابتسمي بس علمود الصور؟ ..
مشتت بالي وانتباهي دخت من الهوسة من موقف ام خضر ماعرف شلون لبسونه الحلقات ..
بس حلقات وكلت كافي بعد ماريد البس الذهب .
اجت امه يمنه تكص صور
تحجي ولك 35شني ضحكوا عليك . شني اخر مرة بالدنيا .
كعدها يمه .
خضر يمة خل ناخذ صورة وابتهال وعطور يحاولن يشتتن انتباه الاهل عن كلامها بقت تحجي .
سمعته تكلة ماخذ بت الفريضة لو بنت بنت 17
شو جبيرة حتى خلفه مابيها !!!
تقربت منه كتله سكت عمتي لا والله هسة السيد الزوجنه يطلكنه مرة ثانية سمعتني .. !
بقى يمسح بعركة وحتى حجي ماحجة وياي ولاتقرب اني سيطرت على نفسي ضحكتني مرت عمي كالت خايبه الله ولحد دضحكني شني كدامج سعالوا صدك ابتسمت على كلامها هسة شيصير هيا هاي ام خضر ..
خضر اسمعه يكول لعطور خليني اطلع لان صرت بين نارين امي وبشائر . .
اللي محليه الحفلة مرت عمي غزاي وبناتها ..
الناس الغربة راحت وابوي كال خواتي وبيت اخواني مايرحون الا يتعشون ..
غيرت ملابسي لبست ثوب وبقيت بالغرفة .
اجتلي عطور تعتذر نيابة عن امها وكلامها وبررت ذالك بالكبر ..ماجاوبتها لان استحي منها
اتعشوا الاهل كلهم لمة حلوة بقيت بغرفتي اتجنب
الحلو الكثر بخلفة البنات بالمناسبات يشدنها بكلشي
يعني العشاء كمل المواعين نغسلت البيت تعزل وتنظف
امي تمشي وتكول لو عندي عشر بنات لمني لم!!
الكل راحوا وبقينا بس احنه
.. اجه ابوي باركلي ومن طلعت امي واختي كال وصلي الكلام الكالته ام خضر بوية هاي خرفانه وجاهلة اكو وحدة تخرب على ابنها وتضوجه بيوم خطوبته لو عرسه هاي مريضه معليج بيها تحجي وتنجب وتسكت وكلامها لايأخر ولايقدم ولاتخلينه بالج !
بس كلامها يسم البدن بوية اني هواي تندمت ومتندمه لان رجعت لخضر والها اني محد يقهرني ومااهتم بأي كلام مهما كان عليه بس منها مااطيق كلمه ماطيقها بوية اني مو تسرعت عليك الله مو تسرعت ورجعت بجيت ومسحت دموعي .
ابوي كعد يمي باسني .
عمت عيونها ان شاءالله تبجيج هاااي ولج والعباس اذا سمعت بيوم غاثتج اجيج بالعكال ابو 55 الا اطلع ضيم كلبي منها السنين الراحت .. حضني وضحك
بوية احنه اني وامج شفنه اشكال وضگنا المر الله وكيلج وهسة احنه من نصف نكول ربحنا احنه وهنا خسرن مرت ابوي ماتت اتعس موته وهاي الصفيرة ام خضر تنبح وحدها محد يريدها وابنها مسكين بار باامه وهذا البار بااهلة ماكو منه وهيه ميته جا قابل باقية ميتين سنه بالكي قبل لاتعرسين تموت وضحك ههههه..
يمكن ابوي شوية كلامه هداني ..
امي من عرفت كامت تدردم امداني تحجي هيج واني مادري غير العب فلك .. وادري بيها بس حجي يمي ..
خضر يتصل عليه ماجاوبته لان اني اذا اجاوبه يمكن راح ادوس بالكلام وعيب بعد صار زوجي ..
سبت ثاني يوم ارتاحيت وثالث يوم داومت مخطوبة فاجئت الكل طبعا بس المديرة جانت تدري انطتني اجازة بالخميس
..
رجعنه لكيت خضر؟؟
شجابه .
امي شنوشجابة بيت عمه واهل مرته ليش مايجي البيت بيته والولد منتظرج يريد يروح كوة ابوج عطله وتغدوا حتى ماكل ..
امي . شنو الجديد يومية دوام ويومية تعبانه بدلي ملابسج وغسلي وجهج خلي احمر اخضر وروحي سلمي وشوفي شيريد..
لبست دشداشة وغسلت وجهي وشمرت شال على راسي ..
امي يمه بعد لبسي عيايتج ودخلي سلمي عليه .
اي همزين كلتيلي راح البسه ..
امي . اول البارحة مصلخة بالبدلة وكاعد يمج هسة الاستشراف النزل منين .
طول عمري شريفة وبنت ابوي .
اي والنعم منج بس هذا زوجج ذني طبكيهن على صفحة ..
اجه ابوي كال بوية خضر يريد يروح ويريد يشوفج علمود العرس!!!!!
اي بوية جايه .
رحت للصاله دخلت لكيته بس هو ابوي طالع ؟
السلام عليكم شلونك خضر ..
شلونج .
زينه ..
خضر . ليش متجاوبين من اخابرج .
ماادري بالاتصال؟ .
خضر . شبيج ضايجة مني ..
اني هذا طبعي واعتقد تعرفه ..
خضر . شوكت نتزوج ..
بعد وكتت اني اشوف نفسي استعجلت هوااااي خلينه بفترة خطوبةطويله ؟.
ليش استعجلتي خو من البداية لاتوافقين ..
والله جنت اتمنى بس انت ماقصرت مانطيتني مجال الكل حشدتهم عليه ..
خضر .. بشائر انتي شنو اللي يرضيج ..
شنو جان اتفاقنه مو مقدمي بيت جدي؟
ليش اخليت بالاتفاق .
خضر واني كتلج اسجل نص البيت الج بس يبقى الموضوع بينه .
يي هم صح حقك على موقف الخطوبة وكلام عمتي .
خضرر . اشش بشائر امريه جبيرة ماتعرف الفلوس بهل الوكت العشرة والعشرين والتلاثين مالهن قيمة مايجيب قطعة صغيرة هيا من تسمع هيج مبلغ عبالها هذا المبلغ يبني محافظة مثل ايام الثمانينات العايشة بيهن ...
بس المفروض تسكت مو تعيرني بنت فريضة ابوي فريضة وتاج على رأس الكل اليعجبه والميعجبة واني هذا عمري يجوز صدك ماخلف بعد اذا ممقتنعه ليش تجي وتخطب وتحجي كدام الكل . من هسة كلام وتدخلات بحياتي يعني ماكو شي من شروطي اطبقت من البداية كذب بكذب ..
خضر . بشائر كلشي اسويلج والله بس انسي وخلينه انعيشة ايامنه بحلوها لانحقدين ولا تستفزج كلمة فدوة اروحلج . هاااج هاي فلوس جهزي نفسج وخلينه نتزوج ونعيش ايامنه ..
نتزوج مرة ثانية اكلك ليش مستعجل وهم ياخوفي اروح لهناك الكي نفسي متزوجه بغرفة جدي ولا اكو عزال ولا اكو غيرة ..
خضر . لا اطمأني الفوك كله عزلته عن الجو بس درج حاولت اطلع من برا مارهمت بقينا درج اللي علبيت .
اكلج شربج حياتج خاصة محد اله علاقه بيج ..
خطية عطور بدات تجهز وتشتري وتكلي اسألها شتريد شتحب تقبل اني اجهز الكم لو متقبل .. واجيت اسألج تقبلين عطور وابتهال يطلعن يشترن غراض واثاث للشقه لو الا انتي ..
عادي بكيفهن اني مفارغه لهيج شغلات وزواج بعد شهرين او تلاثه ..
لزم ايدي كال باوعيلي .
لا تبقين هيج وياي قاسية وانانية يمكن اني گلبي جبير ويتحمل منج ويرضا بكلشي منج بس هم احتاج كلمة حلوة ابتسامه اي شي يخليني شوية انتعش حبيني مثل ماحبج كلشي يتغير اليوم اني خضر وبشائر غير عن خضر وبشائر قبل 13
بس انتي نفس نعومتج وترافتج يتلمس بيدي قرب وجها يبوسني درت وجهي بغضب .
خضر . على راحتج ماجبرج بس اتمنيت هلبوسة بالعقد ابوسج بس انتي جنتي لابسه وجه الجينكو .
كمت على حيلي كتله اني لو بيدي اللي زوجنه يطلكنه بس استحيت من ابوي وعمي ..
خضر . يلا اترخص اني الظاهر ماكو فائدة بكثرة الكلام الگلب اسود بعده .
اييي اسود وحاقد .
اخذ سويجة وطلع بسرعه ضااااج كلش .
رجعت للغرفة .
امي اصبلج غدا؟
لا ماريد اتسمم اريد انهمد ؟
ابوي . شني وين خضر شو ماكو .
امي وين راح خضر بشورة ..
ايييي ولى لااهله شعندة باقي هنا ناطور ؟..
بقيت اتكلب بفراشي . المعاملة اللي عاملتها اله صح لو غلط وهو شعليه باامه وكلامها حسيت بتأنيب الضمير تجاهه ..
وارجع واكول لا يستاهل ..
امي اليوم كلة خبصتني شكو شبيكم شنو تعاركتوا.
اي تعاركنا وطلع زعلان ارتاحيتي ..
اي الغسل ولج شبيج تسودتني تتعاركين انجلبتي انتي منطينج عين زايدة ومحد يحاجيج باقية تهبشين هل الايام ..
اسمع ابوي يكلها على كيفج وياها بعدها خايفة متوترة تخاف من القديم لاتلحين وياها وهيا وياه يتفاهمون ..
خابرتني ابتهال . هم سلام وكلام .
بنص الحديث كالت بشورة عليج الله ديربالج على خضر ترا هو وحيدنا وتعبان ويركض منا ويرجع منا لاتحملينه فوك طاقته ؟
بس اني مطالبة شي منه ولا رايده شي وحتى الشقه كتله مالي علاقه شتأثثوها ..
ابتهال . لا شوفي انتي شفتهمتي اني اقصد كلام الاخرين لاتحملينه لخضر . هو خضر اذا غثج عاتبيه زعلي بس غيره لا هو شعليه قابل هو مايريد ينسعد ويعيش مرتاح يا بشورة وانتي ام العقل واكيد فهمتي كلامي مكسور خاطره كتله شلونها بشائر من رحت الها .
كلي طلعت مقهور وزعلان من يم بيت عمي ..
الله كريم وسلمت عليها سديت التلفون ؟
يعني شنو هذا اذا سالفه زعله بسيطة ماضمها راح سولفها ..
سمعت من مرت جهاد العجايز العدها ولد واحد تغار عليه من تزوجه وتضوج وعبالك الزوجه وحش تاكل ابنها ..
اخذت الامور على هذا المحمل وقررت اهدي نفسي واعيش طبيعية مو كلشي نتر وعرك ورد بسرعه لازم اضبط نفسي واحترمه واعاملة بالمثل لان هو كلش زين يعاملني ..
خابر ابوي علمود نعقد محكمة
رحت اول يوم اني وابوي . هو منتظرنه وجان عندة دوام حتى بالملابسة السود ..
نزلنه وسلمت عليه بكل هدوء وبكل احترام . هو متجبب ابد ما حجة وياي يخاف يمكن بس وي ابوي . ماكملنه كالو لباجر .
هذا الحجي ساعة11 ابوي كال نرجع هو عطلنه على الغدا مابقينا رجعنه
ثاني يوم هم رحنه .اني وابوي .
كملنه بسرعه ماتأخرنه العقد .
كال ابد مترحون اليوم غداكم بالبيت امي والبنات وعمي منتظريكم ابوي كال نروح شعدنا .
لا وياك
كلساع اجر استنشق هوا واذبه حتى ارتاح واكون طبيعية غير متوترة
يمه ياكلبي من وصلنه لبيت جدي ونزلت للطرمة اااااخ كلبي يرجف .
استقبلونه بحفاوة وترحيب حار ..
متغير البيت الترميم حديث الاثاث فخم . اهم شي الاضاءة قبل جانت كل الكلوبات صغر تقبض الكلب هسة لا بيضة واضوية بس تحسه بيه شي كأيب ماعرف الخلل بيه .
كلنه كاعدين بالهول وسوالفهم وضحكهم . .
اني الوحيدة ساكته ..
من كملنه غدا كمت اغسل هو اجه يمي ..
ليش مااكلتي !
لا الحمد لله شبعت ..
خضر تصعدين فوك تشوفين الشقه . اجيت اكول لا شفت امه تباوع علينه كتله اي اشوفه ابتسمت وياه ..
هو شاف ابتسامتي كيف . يلا نصعد .
شوفني المكان ماحبيتها رغم مرممها وتغير واضح
غرفه صغيرة جاي يشتغلون بيها مطبخ وغرفه ثاني صغيرة هم يشتغلون بيها كال نسويها كعدة الجبيرة اللي تزوجنه بيها كال هيا نعيش بيها وبيها غراضه .. اختنكت كلش كتله لا الغرفة الصغيرة اكعد بيها ودرت وجهي نزلت وهو وراي ..
ثوااني كاعده يمهم احس غفيت اختنكت اسمع صوت اطلعي لاتبقين هنا ! حلم اليقضة فزيت بسرعه مرعوبة .
شوية وكام ابوي وماصدكت طلعت تعبت من التمثيل والتصنع بالضحكة والراحة ..
.. بدت امي تجهزلي واني امتحانات اخير السنة
خضر بين اتصال وبين مسج يحجيلي تفاصيل المكان والتحضيرات ..
خلصت الامتحانات غبشت امي هيا وابوي لبغداد لااختي ويجيبوها وياهم ويزورون .
اني كاعده من الصبح كملت شغل ومرت غسان تطبخ للغدة طبيت للحمام وطلعت اندك الجرس طلعت مرت اخوي
رجعت كالت خضر ودخلته للهول !؟
لميت شعري وطلعتله .
كعدنا شعجب جاي ؟
جيت اشوفج مشتاقلج صار شهر ممتشاوفين وخابرت عمي كال اني ببغدااد والبيت بيتك واني ساعة ورايح ..
اجيت اسألج شوكت نتزوج ؟
خضر . ابوس شسوي حتى البوسة ناسيتها ؟
منطاني مجال احجي حركاته وحضنه وتصرفاته جانت تختلف عن قبل مليون بالمية حسيت رجولته طاغية حسيت بتغير بكلشي .. جنت ساكته وابادلة نفس الشعور
لحظات رومانسيه تحرك مشاعر غريبة عجيبه بداخلي
سمعنة حركة برا
ابتعد مني كال يمكن عمي؟
عدل نفسه وكعد مبتعد وهو مبتسم
واني هم لميت شعري وعدلت نفسي بس عيني مكسوره بالمستحه
لس مستحية منه ؟
وكام كال اروح اني عيب خاف عمي يطب علينه ويشوفنه مو طبيعين ههههه فكري بالعرس قريبا ونعيش وحدنا ونعيش لحظات حلوة
هزيت راسي
رفع راسي باسني
خضر:هاي بوسة من گلبي الج والله أحبج ..
متوترة كلبي يدك من السويناه .
حتى من طلع ورجعت مرت اخوي تضحك امبينه شابعه بوس من خجلج وخدودج الحمر .
انوب خجلتني بالزايد هيج مفضوحة همزين محد موجود ..
بعد ماا ادغدغت مشاعري البأسة
حددت يوم العرس 20/6
التحضيرات على هذا التاريخ ..
بعد ايام
اكو فاتحة من اقاربنه متوفية امي وابوي راحوا .
رجعت امي ساكته وضايجة .
طببعا هيا محجت الية بس تسولف وي اختي بالغرفه تكلها ذيل الجلب مايندل ام خضر شسوت بيه شنو ماشايفين هلكد هلكتوا ابني بالفلوس وبنتج على حورها وبنتج ساحرة لابني ما يشوف غيرة واني كتله يمه ازوجك بنت شيوخ هسة انت لازك ببشيرة الا تاخذة وترجع مرتك ..
متت من سمعتها تحجي هيج ..
جبت الموبايل وطلعت بالحديقة خابرت خضر
الو خضر
خضر . هلو حبي شلونج
خضر احنه لازم ننفصل اني ماريدك .....
شكرا لزيارتكم عالم روايات سكيرهوم
