رواية الرجل لاينسى حبه الأول الفصل الثامن بقلم سهير رائد
ماريدك خضر لازم ننفصل ..
خضر . يصير خير سد التلفون ؟؟
دزيتله رساله اني احجي جديات راح ابلغ ابوي وعمي وتعال اخذ الذهب وكلشي الك يمي ..
ابجي كاعده وحدي بالحديقة اجوا يمي الجهال وركضت فطومة جوا عمه بشائر تبجي . تبشر بالبيت .
اجت مرت اخوي وراها اختي شبيج شكو مخبوصات.
مابيه شي بس ورقه مدري دودة وكعت بعيني!
خضر . بس بعصبية شكوووووو لخاطر محمد شكوووو .
اكو مثل ما سمعت ولاتصيح عليه ..
خضر . حرام عليج والله حرام عليج يعني اني شلون ارضيج شنو اليعجبج بس فهميني .شنو هل المزاج المتقلب !
اششش لاتصيح واني بلغتك بقراري
. . وكل شي انتهى .
سديت التلفون قفلته ودخلت للبيت
كل اللي بالبيت يفترون وراي شبيج شكو حتى ابوي كعد من النوم يسألني وكاعد يمي خابرة خضر .
ابوي بس اي هاا لا والله اي فهمت .. سد التلفون شبيج بوية .
مابيه شي .
ليش مخابر خضر تطلكين تردين شنو صاير.
اجت امي كعدت يمنه .
كمت ابجي . ماريده اختنك منه ومن امه امه حتى حلم اتحلم بيها تريد تموتني ماكدر ماكدر ارجع اعيش وياها . ماتحمل منها حجايه اني تعبانه وكمت ابجي .
امي . والله صدك ام خضر ماتنجرع اليوم شسوت بيه كدام النسوان طلعت البكلبها كله علية اكلتني بگشوري وفشلتني .
ابوي . يعني ماتعرفنها ماتعرفن سوالفها وحجيها . يعني هيا مرة مسودنه شيسويلها ابنها هسة خابرني يكلي عمي اني شمسوي بشائر كلساع براي شنو الرادته وماسويته وهسة تريد تطلك . .
ايي بويه اريد اطلك ليش اموت بقهري واحتمال اسوي بنفسي شي واروح اعيش يمها ماكددددر
اذا تزوجت
عليك الله بويه الگيلي حل اني متندمه اني اعترف اني غلطانه لان وافقت وخليتكم تسون حفلة والناس كلها درت وهسة ارجع اطلك اني غلطانه واعترف اني ماريد ارجع اتزوجه وامه ويانه ماكدر اشوفها او اسمع صوتها مااااحبهاااااا .
امي . بس يمه هو فوك عازلج يعني انتي لاتگابليها على اكلها ولاتأمرج على شغله . مثل الجيران انتي بيت وهيا بيت ومثل ميكول ابو المثل ياجاري انت بحالك واني بحالي ..
1
ابوي . ماعرف شكلج يابوية اني ماريدج تنقهرين وهم خضر خطيه وحيد ويتيم وماعنده لا اخ ولااب ويريد يرجع لحضن اهله وعمامه ونكون اله سند .
الله يهديكم كومي ام جهاد جيبلها ماي بارد تشربه وخليها تنام على راحتها والله ييسر الامور.
سايروني وسكتوني بس محد يقبل على الطلاك
بس الامور كلها ضدي محد وافق انهي كلشي والكل يحجي عليه ويكولون شنكول للناس .
حتى خضر ابد ما حجة وياي عندة شي وي ابوي حتى بقينا على موعد العرس .
ويوم يوم كلبي ينعصر مشيت الامور وي الكل
حجزت بدلة وصالون للعرس . استسلمت للواقع وراح اتزوجة
اتوسلت امي اسوي حنه ماقبلت بس سون شي بسيط بليل .
بيوم العرس
من رجعت من الصالون للبيت باانتظار الزفه جنت منتظرة جنازة شلون اطلع من بيت اهلي وهاي ثاني مرة اطلع واني مو فرحانة ..
من اجت الزفه اريد ابجي .
دخل خضر وعمي وخواته . بس امبين تعبانين طريق بعيد وحارة ..
هنا فرحانات هو هم احس الفرح بوجهه .
اخذلهن هوسه هوست
ادلل خوية المال هواية
بنت عمنه واخته تصير جنتنا ومن نريد الغريب أدوس عتبتنا ؟!
اني وخضر واحد فاصل على الثاني اني وعبالك ماخذيني يكتلوني وخضر وهدوءه وخجلة المعروف
خضر حلو مرتب يعني شكله يحتلف جذريآ عن قبل .
دخل ابوي و گام خضر سلم علية
من ابوي كومني وبوسني ودعالي بالسعادة
بطرف لساني مارررروح بس انقهرت علية دمعته بعيونه تلالي
وطلعت من بيتهم اريد اصرخ ..
صعدوني بالسيارة
هاي مرتين اطلع من بيت اهلي لنفس الشخص اني ماردت عرس بس هو راد عرس وزفه يكول شنو بايك بوكه هذا كلامه لابوي .
ردت نروح لكربله نتزوج ونرجع عادي .
استحي اني عمري 27سنه واستحي ومتزوجه سابقا ومسوين عرس كلش جبير قبل بعد عليمن اشوفها كلها زايدة .. بس هو خضر قافل الا يسوي عرس وزفه !!
وطلعت من بيت ابوي للمرة الثاني لنفس الشخص ولنفس البيت
وحياة الله اعلم شنو صايبه لو خايبه لحياة مجهولة لحد الان لا ن اني حتة بتفكيري ماكدر اتقبلها .
دمعت عيني نزلت بدون محد ينتبه مستحتها
خضر يمي مد ايدة لزم جف ايدي احس بحرارة جسمه درت وجهي باوعتله
وجهه تعبان امبين عبالك منايم ابتسم وغمزلي وبقى لازم جف ايدي
السايق ابن عم ابوي يصير رجل ابتهال هو گرابتنه وبالصدر عمي خطيه فرحان .
ورانه سيارات اربعه مو هواي صغار خواته وبيت عمي وعمتي ..
خضر وعمي يسولفون وعمي ساعه يصفك ساعه يدعي .
خضر تقربلي انطاني بطل مي اشربي .
ماريد .
التبريد عالي .
ايي يوصلي عالي جنت مبرقعه كلشي متغطي مني .
خلة ايدة ورا ضهري وتقرب مني .
تعبتي . ماحجيت وياه بس هزيت راسي
يحاول يهديني او يخفف توتري واي وحدة تتوتر بالعرس والزفه . قلق كتلني كتل.
الطريق بعيد واني بس شي واحد خايفة منه ومرتبكة
شلون ادخل وام خضر گبالي تكعد اتحمل لو لا
بعد ساعتين او اكثر وصلنه للبيت هوسة وزفه دخلوني اجت اختي نزلتني اتفاجئت واصله قبلي؟
دخلت للكبر مو بيت الزوجية والمفروض اكون سريعه اختنكت رغم الفرحة بوجوه الكل الا اني وخضر اسمعه كلي راسي حيل يوجعني مدري شبية!؟
اسمه يسوي ايباه والله صداع قوي ضربني مفخني يمكن من الجو سموم برا ؟
هوسه دبج يمينا
شوية وطلع مسوي عرس بسيط ..
امه تفتر وبيدها عوجية وگالبه الخلقه .
شيماء يمي تبوس بيه . وتضحك . ام خضر بقت تفتر عليه تفتر يمنه يسررر وعاوجه كل وجها صفح
الكل انتبه عليها اخر شي خطت بعوجيتها بصفي وثبت العوجيه وكعدت يمي
شيماء طفرت اجت وكعدت بالنص بينه .
امهم خلت العوجية وخلت ايدها اثنينهن وخلت حنجها عليهن .
عبالك جنازة مو زواجه .
شيماء : فدوة شلون كبرانه ورجعتي عروستنا
ولج بشورة اقري المعوذات عليج الله خاف يحسدنج لان طالعه عبالك صغيرونه اقريهن عليج الله !!
اجيت اكوم امي كالت لا عوفنها بس غيرن مكان الكعده هنا حارة خلنها كبال السبلت .
واتعشت الناس واني صعدتني عطور فوك كعدت على كرسي مخليات نص تخم حلو مرتب بممر مثل الهول مسوياته
وصعدن الحبايب يرتب الملابس ويشوفن شكو ماكو ..
اني بكل مناسبة احب لمة كرايبنه بهوسة البنات وكثرة جهالهن احس هنا منطيات للاعراس حلاوتها ولمة بنت العم والعمه والخاله وهيج .
شوية وهلاهلهن زادت صعدوا خضر وخواته بسرعة نزلن الكل والكل نزل جوا كعد يمي وراح سد الباب .
كال مبروك واخير رجعنا سوية .
وجهه اسود شبيك .
راسي يوجعني حيل مدري شبية . اريد اذب من معدتي .
ماكل شي وغاثك ؟
خضر:لا والله من الصبح اني مامستقر والطريق ومن رجعت كلش تأذيت من راسي ومعدتي ماعرف شنو بيه
طفر بسرعه راح وكام يتقيء
بقيت بكعدتي هو ما حجى شي اندك الباب
كمت فتحته اني دخلت عطور العشاء
باوعت ها بعدج ممبدله جبت العشاء حتى بعد محد يصعد الكم اخذت الباب بيدها ونزلت قفلته وراه .. حاول يتمدد يرفع رجليه اني كمت للغرفة نزعت البدلة لبست اللي مخلياته اليه .ثوب نوم ابيض
بالي يم خضر
بقى يروح ويرجع للحمام ويذب من راسه اني غسلت بالمغسلة البرا .
طلع من الحمام
سألته محتاج شي .
لا لا
شبيك خضر هذا لبن بالعشاء اشرب منه بلكي معدتك تستقر .
خضر هسة اصير زين تعبان هاي الايام ومنايم وهيج متأذي .
زين اكل شي ونام اغفى .
ايي ايي راح انام قبل لااوكع ؟!
ليش متروح للمستشفى يجوز بيك شي ترا حالتك مو طبيعية
لا شنو اروح للمستشفى
رجع دخل للصحيات اسمعه احس معدته طلعت من مكانها خطيه ضجت عليه
طلع نازع ملابسه بس بالشورت تمدد على التخم ورفع رجليه اتذكرته قبل شلون جان جسمه. وهسه شلون صاير حلو صاير خضر من كل الجوانب
شو استحيت اباوعله وهو متمدد حيت على روحي وطفيت الاضوية .
رحت للغرفة
كلت تيتي تيتي مثل مارحتي اجيتي الماضي يعيد نفسة الظاهر هو نفسه خضر بس جسم وشكل متغير وفعل لاشي !
شوية واسمعه وخابر رجل اخته
اني راح اموت بس اتقيء وراسي راح ينفجر الحكلي جيب جهاز يقيس الضغط ونشوف .
رحت يمه خضر روح للمستشفى حالتك مو طبيعية
خضر: هسه اشوف شبيه
باوعلي وعيونه حمر وجهه اصفرررر
ترا اني اول مرة تصير بيه هيج امبين الفرح ما مقسوملي
لايمعود هسه انت شنو شفت هيا وجع راس يجوزضغطك مرتفع مرات امي هيج يصير بيها
دك موبايله باوعله
كوه كام لبس دشداشة و
نزل جوا ساعه ب12 اني بقيت متمددة ومحد صعد هو قفل الباب من برا .
نص ساعه وصعد كمت هاا خضر شنو شعندك .
كال ضغطي 17 صاعد واخذت مدرر.
ليش انت عندك ضغط ؟
لا والله هاي اول مرة انتي ليش متعشيتي ..
مااشتهي .
لا اكلي اني راح انام بلكي يستقر وماخذ علاج وضربوني ابرة
.
رجع تمدد على التخم .
گوم نام على الجرباية اريحلك .
لا ازعجج اني راح ابقى هنا خاف احتاج الحمام بكثرة بسبب المدرر..
على راحتك ..
من اول لحظة عرفته هو نفسه مايكدر يتقربلي ونفس الشي صار ويانه ونفس المكان ونفس البيت . من خليت راسي على المخد اتأكدت احنه موطبيعين ابد لان ماكو واحد حتى لومريض ما يتودد لزوجته بيوم عرسهم حتى اني ماريد هليلة تكمل على خير
يعني الاسمعه او الشفته منه بيتنه من اجه جان اكثر لهفة يعني كلة حب ورومانسيةوعنف ويمكن لو منطيته مجال وصل للمرحلة اللي يعاشرني بيها ..
بس بهذا البيت لا .
اوو هسة اني جعت ونعست وتعبت .. وشنو اتعب نفسي بالتفكير بشي اني المفروض اتجاوزنه لان اعرف شنو هوا وشبيه
ويجوز صدك الضغط مايخلي يشوف دربة ليش احكم عليه خليه خطية بوجه راسه الله يساعدة بس على الدبة من معدته خطيه شلون حظ
ااخ جعت وعيب اروح اكل وهو يريد يموت
شو خل اكوم اكل
كمت اكلت شبعت غسلت شفته نايم والمكان حار ؟
رجعت نمت كعدت بالسته ونص كمت رحت لكيته ماكو ؟!
دخلت تواليت لكين التواليت مغسوله هستوها وريحة طيبه بيها يمكن غاسلها هوا خطية
وطلعت غسلت توضيت شفت باب السطح مفتوح هوكاعد مخلي ايدة على وجهه باوعت عليه منظرة يخوف ويقهر بنفس اللحظة ورجعت للغرفة صليت اعرف القبله اتذكرها .
كملت رحت اتسحبت كاعد ومخلي ايده على راسه بالظل
شكلة يقهر
صباح الخير خضر شلون صرت
أشرلي بيده روحي
حتى ميكدر يحجي مدري شبية
رجعت للغرفه ماعرف شلون اتصرف مالكيت حل غير انام احسن شي
نمت وبثمانية سمعت صوت ابتهال .
كعدت لبست الروب وكمت الها .
وهيا وجهه حلو مبتسم وصلاوات وماشاء الله ومبروك وبالرفاة والبنين وتبوس بينه
وصعدت عطور الريوك صينية تخبل كيمر وعسل وكاهي وبيض ومعلاك .
وهم تبارك وتهلهل .
وهو ساكت ومدنك .
اني طبيت سبحت طلعت تريكت ..
خضر ما اكل كال ضغطي ماعرف شبية .
واني اسف لان خليتج البارحة بس حسيت راسي راح ينفجر وكلساع اطلع للتواليت وماحبيت ازعجج .
لا عادي واني اكل .
كتله شلونة راسك هسة
خضر بعده راح اشرب جاي واسبح وانزل جوا يجوني ولد خابروني وعدنا غدا .
1
بقيت كاعده ماعرف شنو اسوي
كمل وطلع وكف بالباب ورجع عليه
خضر:بشوره حبيبتي اني مريض اعوضج عن ليلة البارحة اكيد اني وسكتت فرك كصته باصابيعه وكام مختنك كلش فتح الباب ونزل !!
واني هم بدلت وتمكيجت
ونزلت احنه الاعراس عدنا هوستنا للسبعه يومية نفس الاهل يجون غدا وعشاء والخطار البعيد .
وامي واختي ونسوان اخوي راحن ورا الغدا .
تبجي امي شلون ارجع للبيت وما الكاج منو ينام يمنه بليل .
ايي غير انتي ماخليتي امام ولا سيد ولا كشاف مارحتيله حتى اتزوج .
امي انجبي مارايحة كشاف بس مرة شفت مسودن كتله بشاير هم تعرس كال اي تعرس .
وضحكنا طبعا احنه نتشاور مو كدام الكل .
بعد الغدا
عدلت روحي تمكيجت عطور لبست شي مغري
وماكو شي حتى ميباوع علية
..
بليل من صعد
كعدت يمه سكته وشنو هو مدنگ ومخلي ايدياته على راسه امبين من شكلة يحس بتقصير او فشلان
شبيك خضر : انت مو كتلت روحك على زواجنا
مابيه شي بشاير هم ضغطي مرتفع وحتى ماشوف بعيوني ؟.
خوش اني راح انام اذا تحتاج شي بلغني
ماكو اي ردة فعل تجاهي عبالك اني مموجودة ابد ميشوفني ولا يسمع صوتي
ثالث يوم اني لبست دشداشة ونمت .
واستمرينه كلمن نايم بمكان احس نفسي انتصرت عليه وتقويت لان نفس خضر اللي تزوجته قبل نفسه هسة ..
بيني وبين نفسي خل اسويها لله اني احاول وياه لبست شنو اكثر شي مغري من ثياب نوم خليت مكياج خليت عطور فتحت شعري كويته
يعني مناقصني اني من كد ما طلعت مغريه استحي من نفسي
رحت يمه ساعه 1بليل نايم كعدت على نفس القنفه .
حس بيه كعد .
ماعرف شيحجي جان ضوة خفيف كلش .
خضر . ها حبيبتي .
هاا خضر شلونك ؟
كلت خل اني اتقربلة كتله خليني انام بحضنك
خضر . ضغطي ممنطيني مجال وعايفج واخاف تضوجين مثل الخاف مني!!
لا عادي بس الضغط يعني ماله علاقه اذا واحد يكعد او يسولف وي مرته .وهم الضغط اكيد مايمنع واحد يادي واجباته الزوجية ؟
خضر باوعلي بس شوفي اني بشائر انت مو تريد بس شي حلو مني اني جايتك بدون اي قيود وراح اسهل عليك الآمر وشويه شوية يجوز نگدر نتزوج
خضر:نتر بيه اكلج ضغط راسي يوووووجعني متفتهمين
لاتخلي الضغط حجة خليك واضح وابتسمت بااستهزاء وكمت .
خضر . لا والله راسي ضغطي حتى ماكدر اشيل ايدي واني مابيه شي مابيه اني عندي هواي علاقات واثبتلج بس اصير زين ..
ايي على كيفك صوتك لحد يسمعك عيب . اني ادري مابيك شي .
نزعت ثوب النوم اللي لايقدم ولايأخر وي خضر مطفي فد مرة .ولبست دشداشة عريضة ونمت ..
خضر . بشائر كاعده .
غلست عليه اني مقهورة عليه شاب طول بعرض ومركز وهيج يصير بيه ليش ؟
خضر . بشائر حبيبتي صدكيني اني لان راسي يوجعني ماكدر اركز والله انتي يمي واني اتمناج لحظة بلحظة وانحرم منج .
1
عدلت نومي درت وجهي . ايي نام ارتاح حتى ضغطك ينزل
مجاي ينزل باجر اروح لدكتور اختصاص يشوفلي جارة .
اكلك خضر . انت هم مراجع طبيب ؟
مال شنو .
يعني طبيب خاص بحالتك .
خضر. لاباجر اروح اشوف بيه ضغطي.
ماقصد على الضغط اقصد على صحتك او قوتك الجنسية.
خضر . لزمني من بلعومي يخنك بيه كتلج مابيه شي مابيه شي اني رجال كامل بقيت اعت بيدة دفرته يلا انتبه على نفسه .
ايده ترجف ويكول ماعرف شبيه ليش خليتني اسويلج هيج ليش تستفزيني .
مااستفزك بس انت بعدك مريض نفسيا وجسديا . واني الغبية الوكعت بنفس الحفرة مرتين اطلع برا الغرفة احسلك .
طلع وهو احس بيه غير شخص حتى خفت على نفسي ليسوي بيه شي علمود هاي الشغلة
كمت ابجي رحت للمطبخ دورت سجينه جبتها خليتها جوا مخدتي كلت كلشي يصير يجوز يخنكني على الاقل ادافع عن نفسي ..
الليل صار شطولة اغفى واكعد اغفى واكعد خايفه وارجف من طلع الصبح كوة كمت من النعاس .
شلون اخابر ابوي يجي يطيح حظة واروح لو لا خطيه هو شبيدة والله صعبة صعبة كمت ابجي طبيت سبحت . وبدلت اجاني هو بشائر اني ماعرف ليش سويت وياج هيج بشائر اني والله مابيه شي شبيه راح اتخبل .
مابيك شي . بس اني سبق وكتلك مانرجع نعيش بهذا البيت اللي بيه لعنه اني وياك مصابين بيها بس انتي متفكر بعقلك .
انتي كل همج شلون تفرقيني عن امي لو تموتين يابشائر ماطلعين من هذا البيت اطلعج جنازة ولا اعزل واعوف امي .
بكيفك انت حر لعد ابقى هيج ترجف وتبجي وتكول ضغطي صاعد .
كام يصيح امي ماعوفها والبيت ماعوفه انتي كلة منج انتي اللي عقدتي الامور لان تكرهين امي
انتي الي خليتيني هيج يصير بية انتي السبب
هزيت ايدي على كلامة انسان بغير عالم .
شووف روح جيب مسواك بعد ماانزل جوا يلا اريد اسد بابي واكعد وروح انزل وابلغ الموجودين محد يصعدلي كااافي الهم اللي اني بيه .
اني نزلت لان اكو خطار وهو بقى كاعد وايدة مدخلهن بشعرة ومدنك .
شوية ونزل هم خطار يمه وراحوا واحنه يمنه عمتي .
شوية واجه هو وابن عطور اسمه مصطفى جايبن مسواك .
تلكته ام خضر شني هذا البارحة تسوكنه .
خضر لا ليفوك .
وهيا هجمت هجمة فجاءة تحولت المرية لانسانه ثانية حجت اشكال ويحاول يسكتها وتحاول عطور
شنو تصرف على بيتن غصبا عليها تاكل من جدرنا حتى لو ناكل خرا تاكل ويانه البرنسيسة بنت الشيوخ .
وحدها شايفه نفسها وانت مابيك حظ اهم شي بشيرة قبلت ترجعلك وتركبك !!
وملخت روحها نزعت شيلتها طلعت شيباتها والكلام هووواي ويمكن لو حجر هم رد عليها اني بقيت بين الصافنه بين المقهورة بين النددددددم اللي عضيت اصبعي من ورا
همزين عمتي موجود
گالت عمه مسواكج فوك واصعدي لبيتج وقفلي بابج هاي ماتنعدل ماينعاش وياه ولاتغثين روحج جلبه تنبح وتسكت .وذيل الجلب مايندل يا بعد عمتج
سمعت كلام عمتي وصعدت فوك . بقى المسواك بالكاع بس كعدت ابجي على حظي على نفسي الغبية والثولة
اللي رجعت لهنا بيدي محد جبرني
كمت ابجي من كل كلبي واتحسب على نفسي قبل لاتحسب عليهم .
اجه خضر . . اتعس مني حالته وجها اسود على اصفر عيونه مدري شبيهن عبالك غير انسان
بس گال بشاير تحملي
واني ماراعيت اللي هوا بيه
هجمت علية اني ثولة وغبية وحيوانه لان رجعت لهذا البيت اكو واحد يشتري الهم والقهر والمغثة لروحه اني هااااااي .
مسواكك ماريدة ومنكم شي ماريده فتحت الباب كمت اشمر بالمسواك على الدرج
صعدت عطور . صلي على نبيج نعمة الله بشورة .
ممحتاج شي منه ولا من امكم اني عندي راتب واكدر اصرف على روحي وماريد اي واحد يتقربلي ولا يحجي وياي بس باانهيار .
البنية نزلت بهدوء صاحت بتها يشيل المسواك .وينظفن الدرج
وهو كاعد يشرب جكاير ..
دخلت للغرفة بس ابجي .
دك عليه ابوي . عبالك حس بية
دكت امي .
رديت على ابوي هاابوية
ابوية . ها بوية شبيج تبجين .
ايي بوية مشتاقتلكم .
عليج بروح ابوج مشتاقه لو سامعه شي يغثج .
لابوية مشتاقة الكم هواي شوكت تجون اشوفكم .
بوية هو اني اريد اعزمج انتي وعيالج هلايام
اي ان شاءالله خابر خضر وگلة امي شلونها وغسان وجهاد ونسوانهم والجهال .
كال كلنه زينين يابوية البيت وحشه عليج يريد ياكلنه وهسة انتي تبجي سكت حسيته اختنك يريد يبجي .
يلا بوية اخذ راحتك ديربالك على امي لاتخليها تاكل هواي السكر لايتخربط وسديته لان ادري بيه كام يبجي على بجيي .
ماطلعت من الغرفة للظهر كلش دك الباب خضر
فتحت اله كال جبت غده تعاي اتغدي من المطعم .
ماريد اي شي منك ومن فلوسك خاف امك تموت .
عندي راتب وخير من الله اني اصرف على نفسي ..
خضر . كافي بشائر ترا البية مكفيني الله وكيلك اني بين نارين لا والله بين اكثر من نار
نار امي ونارج ونار نفسي كافي وحدة منجن ارحمني وماكو غيرج ترحمني ووتتساهل وياي قبل لا اطك واموت ..
موووووت وكلنه نموت . . اني ماتحمل احد وما اتحمل اي شي وسبق وكتلك وانت جذبت عليه رسمتلي الحياة الجديدة حياة وردية تخبل .
واني اعرف هيا اتعس مثل قبل .
المختصر عوفني وكلمن يبقى بمكانه .
واذا تريد تنزل جوا بعد احسن وجودك وعدمة بصراحة لاشي لامقدم ولامأخر .
خضر . رحمة الله والديج .
طلع من الغرفة ونزل جوا كمت افتر
لكيته جايب تمن ودجاج ومروكات .
وفتحت الثلاجة لكيت المخضر كلة مسفط بيها ولبن وبيبسي ومليانه يمكن عطور خطيه مرتبتها من اني دخلت للغرفة وسديتها
اكلت شوية ونمت ومااحس الا الباب اندك اسمع صوت ابوي
فتحت الباب وحضنته وابجي وخضر وراه
وابوي يابوية شكد مشتاقلج يبوس بية
يكلي ماكدرت بس سديت التلفون اجيت كبل حتى لاامج ماكلت .
شوية وراح ابوي ماطول نص ساعة
خضر مافاركنه بقى كاعد يمنه .
اجه المغرب خضر كال وين موبايلج ؟
شتسوي بية .
جررره من ايدي حيل كال اخذة حتى ما تخابرين اهلج بعد وتحجين الهم
شنو مو من حقك تاخذ موبايلي .
لا من حقي زوجج اني ادري بيج راح تحجين لابوج كلشي اليصير بينه وبيتنت
. ادري تحبين طلعيني اني صغير ومابيه حظ .
يعني انت لهدرجة مواثق من نفسك هسة اتاكدت انت لاشي بس نفخة كذابه .
رجع هم خنكني ووخر عني ..
اخذ الموبايل وماياكل ولايشرب وراح داوام واحنه حياتنا هيج هو كاعد بالسطح لاصلاة ولاشي لايحجي ولايسولف يطلع للدوام يرجع ينام شوية يطلع والليل يكضي بالسطح ينام بالهول
اني احس السواد جوا عيوني ظهر فجاءة بطني كبرت سمنت واني مااكل اي شي .. يرفض اي عزيمة حتى من اهلي بحجة الدوام . وعزايم الاخرين خواته .
عطور محتارة بينه تريد تعرف شبينه
ما احجي
تكلي من امي اهمليها احسبيها ميتة مالها وجود بس لاتتعاركون وانت عرسان مايصلح
اكلها احنه مانتحاجه
ابتهال هم تحاول تعرف ليش احنه نتعارك وكل ضنهم على امهم واللي سوته
..
اجونه اهلي بعد ما ملوا منه يومية مأجل العزيمة اجوني اهلي كلهم ..
اول مرة انزل من اسبوعين
اريد احجي شي لازم حلكي
كلها تكلي متغيرة كلش سمنانه سمرانه .
امي وابوي حاسين اني ممرتاحه كلش ..
مدري شنو لزم حلكي .
تلفوني اكلهم ماكو شبكة ضعيفة ..
...
من راحوا يلا احس القفل البحلكي انفتح اني ابد ما عندي نية اكمل وياه .
ومقررة هلمرة افضحة واكول هو مو رجال بس لان مد ايدة عليه ويحاول يخنكني ..
ما اكدر اطلع البداخلي
....
رجع للغرفة بليل ينام يمي على الجرباية بس اخوات .
اصفن عليه من ينام يعني حتى ميكدر يبوس او يسوي شي يحضني على الاقل يحسسني بربع رجولته مرايدة شي بس يحسسني اني فعلا متزوجة احس بيه حتة ماعرف احس بأنوثتي كلشي ماكو والله خطيه اشوف عندة دمعة بعيونة
انقهر علية اخاف ومااتجراء الزم وجها حتى اني احس رغبتي وياه كامت تقل وتقل يعني وحدة زوجها يمها حلالها ما تهتم ولاهو يهتم .
ياربي ليش هيج ويانه .
اقرا قران واصلي وادعي ربي بس شوية يباوع لحالنه
كلش صعبة كلش الرجال اذا مايكدر يقوم بوظيفة الجنسية تجاة مرته وهيا تبقى بنت بيوت .
المن متزوجه هذا حقها وحقه وشرع الله وحلاله ليش رب العالمين حلل الزواج والعلاقه بالزواج غير حتة مايكثر الفساد وكلمن يشبع رغباته وي حلاله ويكونون اسرة حلوة بالحب والحلال . زين اني شوكت اخلف يعني ماخلف ميصير عند ي طفل يصيحلي ماما .. كمت اركع بجف ايدي بكصتي .واكول كاافي كاافي .
خضر شبيج بشائر.
مابيه شي اريد اطلع الكلام والافكار من راسي ؟.
سكت جر جكارة وشربها
انطيني جكارة وياك .
ضحك وانطاني .
شربتها وماحسيت بيها .. تنطيني ثانية.
خضر. اخذج بس متباتين ظهرية نروح ونرجع .
لا اريد ابات شكم يوم .
لا ماكو مبيت اني منو اليه هنا !.
لاتضحكني خضر انت بس لاعبالك احنه اثنين متزوجين وعايشين طبيعي وتكول منو اليه صدك ضحكتني
ايي شبينه.
خضر كافي لاتضحك على روحك . احنه مو طبيعين احنه فقط اجساد لا روح ولاحب ولا الفه بينه .
خضر . بشائر . تردين أكدلج اني مابيه شي ..
يعني شلون واخيرا راح تزوجني ؟
لا اروح انام وي غيرج اخونج واصورلج شلون اني انسان طبيعي ..
لا صدك تحجي لو تستحي ماحجيت هل الكلام تروح تزني علمود اتاكد انت شنو خو اني مرتك حلالك .
خضر . بصراحة انتي البيج شي انتي اللي تصديني انتي اللي مريضة مو اني واثق من نفسي .
لعد اثبتلك اني لو انت .
كمت بدلت وتمكيجت واجيت ابوس بيه سويت كلشي
بلحظة حتى ايدة ما يكدر يرفعها
عينه مايكدر يفتحها
اني متأكدة من ريحة جسمي ومتأكدة من ريحة حلكي طيبات حسيت بيه هو مثل اللي تلعب روحه من اتقرب لخشمه ويشم نفسي
وبقيت احاول من وصلنه كلشي ماكو هو كام يصب عرك ويرجف وتوتر .
غمضت عيوني من القهر عليه وعلى نفسي ارخصها اكثر بعدت جسمي من يمه كتلك يلا ماريد شي لايوكف گلبك وتموت هم عيب شگول للعالم ..
كمت للحمام اركع بوجهي اتفل على روحي لان هيج نزلت نفسي اله حتى لو زوجي اذا هو ماله رغبة اني على شنو اجرب . اذا هو بالحلال ميريد ويحجي بكل صراحة اسوي علاقه وابين الج اني مابيه شي ..
معقولة السبب مني اذا السبب مني اروح للدكتورة ومابيها شي ..
كمت اشم بجسمي اباوع على روحي بالمرايه
وابجي والله مابيه ريحة
وجسمي حلو ونظيف وجني ورد
ليش هيج يصير بيه ويقرف مني
كملت و
طلعت من الحمام مالكيته ..
رجع ورا نص ساعه تقريبا .
بيده علاكة سودة . كال هاي نوعين جكاير نسائية منو اليعجبج!!
شنو تريد تعلمني اشرب جكاير.
خضر . لا تسلي بيهن هنا بليل مابيها شي من نكعد جكارة الج جكارة اليه .
خضر ترا اني زوجتك مرتك . لاكحبتك ولا صاحبتك ولاصاحبك .
حشااااج شبيج بشائر للتسلية بيني وبينج شجايبلج مخدرات هيا جكارة طب منا تطلع منا .
من نسولف على ضيمنه عود كلمن جكارته بيده وضحك .
هزيت ايدي وتمددت درت وجهي ودمعتي بخدي وابجي بس ماطلع صوت حسرة بكلبي جبيرة
طفى الضوة واجه يمي كال لاتبجين كلشي يتغير ؟!
ثاني يوم طلبت منه اروح للدكتورة وافق . حجزلي وطلعنه مجرد ماطلعت احس كلشي اختلف بيه احس جنت مسجونه سجن انفرادي .
بس وكف باب الشارع حتى النفس اللي جريته اختلف
خضر اني احس نفسي اتنفست هسه الهوا طيب؟
خضر: بس حارة سموم
لا والله اني احس روحي مرتاحه من طلعت من البيت
خضر:اكلج انت متمللين شبية بيتنا كلها تتمنى تعيش ابيت مثل بيتنا اني اعرف انتي شتردين من هلتصرفات
ماريد شي اني مجرد كلام وياك اللي اعرفه انت زوجي وافضفض وياك ؟!
وصلت ودخلت وانحرجت شحجي للدكتورة
انطتني علاج
ولخضر علاج .
اني اخذت العلاج علج جان
احس اكو شي داخلي يريد علاقه استحي ونفسي متتقبل اتقربله هو ماقبل ياخذ يكول مبيه شي انتي السبب
وبقيت الح عليه اخذه اخذه
اخذ صاح راسي حيل أذاني ..
كمت اتقرب ابوس بيه وابجي كمت اضرب بيه بقوة
شبيك متكلي شبيك انت جاي تحطمني انت
انسان مو طبيعي
خضر:والله طبيعي اانتي السبب انتي اللي بيج شي
انتي اللي تصديني
شلون اصدك متكلي دكافي ترا اني جاي اساعدك
اسمع ياخضر اني سويت اللي علية واكثر بعد كلشي انتهى
كعدت اقراء قران وابجي .
تركت كلشي ذبيت العلاج بالتواليت وذبيت فوكه كومة مي .
فجاءه بيومها
قرر يوديني لااهلي ويروح وياي عمي غزاي لان هو عدهم تفتيش ويجي وراي يرجعني .
وحذرني ما افتح حلكي بأي شي
رحت واحس انطلقت من عالم لعالم ثاني .
ماعرف اريد استمتع بكل لحظة يمهم ..
مالحكت اسولف وياهم او اشوفهم او اشبع اجة ورجعنه سوية جاي بدون سيارة رجعنه وي عمي .. طبعا اهلي يكلولي متغيرة سمنانه بطنج كبرانه ؟ وجهج شاحب . ماعرف شجاوبهم ..
مخلاني يوم كامل لانص يوم رجعت ميته تعب بس من الطريق وهو حلكه ميفتحه
ثاني يوم
عزمتنا ابتهال عيد ميلاد بتها وكالت محد يمنه بس حفلة بنات و زوجها مسافر
ولان اني عروسة وبعدني كلشي ممتهنيه بملابسي ولافستاني قررت الا اكشخ واتمكيج واعيش لروحي ليش هيج شكلي ووضعي
بدلت لبست ثوب قصير ومكيجت روحي وثوبي حلو بس ممتعودة على هيج لبس
فوكها لبست صاية سودة وعباتي يعني ضبطت امري ..
نزلت لعطور ورحنا
العيد ميلاد بيناتنه احنه البنات عطور وبتها عمت جهال ابتهال هيج .
ام خضر الحمدلله ما جابتها عطور الظاهر هنا متفقات بيناتهن ميجيبن امهن
علمودي
من خلص العيد ميلاد حلو بسيط بس غييرت جوا حلفت ابتهال دين يمين ماطلع الا اتعشى
و خابرت على خضر كلها جاي وعطور ماقبلت تبقى كالت بس بشوره تبقى .
اجه خضر لبيت ابتهال ما دخل بس سمعته يگلها اروح اغير ملابس الدوام واجيكم '
ابتهال : شبيكم انتو وخضر
مبينه شي
ابتهال : خضر متغير وانتي متغيرة
ولا جنكم ستوكم متزوجين
ضحكت لا احنه متزوجين من زماااااان واحد مال من الثاني
ابتهال : انتو لو تنسون الماضي تكدرون تعيشون مرتاحين
الماضي مينسي بسهولة
اجه خضر دخل للهول باوع عليه ابتسم كاال السلام عليكم
رديت السلام ودرت
شلت الصايه لبستها وكعد
خضر بشاير نروح ؟
ابتهال :والعشاء المن مسويته ! ها
خضر لا خل نروح بشاير يمكن تعبانه
لا مبية شي نتعشى يلا نروح
خضر: لعد استعجلي بعشاج
ابتهال :نص ساعه ويكمل عيوني علمين مستعجل تريد مريتك قابل لا راح ناكلها
كعدنا بالحديقة بعد ماخلصنه عشاء
جابت جاي وفاكهه وتسولف على زرعاتها وحديقتها
وخضر:متخلصين سوالف اريد اروح
ابتهال :روح وعوف بشورة تبات يمي تغيير جوا
خضر:لا مرتي ترجع وياي
احس شي بين ثيابي يمشي على جسمي . صرخت وكمت مدري شنو بملابسي . خضر خاف بريص
يبووووووي
دخلت ركض للصالة ونزعت صايتي وراي خضر ينكت بيه شنو شبيج .
ماعرف شنو شبيه مااعرف شي يمشي بجسمي ..
لكيتها صرصر طفار .. كتلها خضر .
حضني ويضحك جبانه .
اووو شكو جبانه والله العظيم اجيت اتصلخ برا غير عبالي حية لو ابو بريص وكف گلبي من الخووووف
خضر اسم الله على گلبج ياروحي
كام يبوس بيه يكلي شنو هل الجمال همزين وينطي عافية الصرصور شوفني هذا الجمال هنا!!!!!
لزمته من وجهه كتله خضر شنو اني منازعه كدامك ليش تكول هيج .
صفن كال اكلج عندي رغبة هسة اريدج .
كوة لزمته وكتله عيب خلينه نرجع للبيت .
خضر لا هنا والله اقفل الباب
عييب من ابتهال شبيج
خضر مالج علاج بابتهال اكلج اريدج هسه اخذج
كافي خضر وخرته عني بالقوة وكلش منحرجه لابتهال او بتها وجهالها يسمعون شي لو يشوفونه شيسوي
رجعنه بسرعه ..
واني ممصدكة بيه فرحانه اله
بس مجرد دخلنه هو تغيرر شرب جكاره وبقى بمكانه
وكلشي ماكو ..
اتاكدت مليون بالمية البيت هو السبب خصوصا النه احنة الاثنين .....
انت متفهم المكان هو السبب
كاااافي اسكتي
شكرا لزيارتكم عالم روايات سكيرهوم
