رواية بنات الملا الفصل السابع بقلم رغد الموالي
شيخ ذياب .... اجانه طارش هلايلكم عبن سمعنه وليدكم طلعته الحكومه براءه
والله ثم والله مايغمضلي جفن ولا تنصب فاتحة شهاب الا على جثة جتال وليدي
حجي شعبان... اجه متكأ على عصاته استهدي بالرحمن وكول يالله شيخ انت شيخ وكعدتك بالداوين وتعرف العيبه من تطلع من صاحبها
ولد حجي شعبان عمرهم ماسوو العيبه وغدرو بصاحبهم
شيخ ذياب ... لا غدرووو انه تاليتي مااكدر ارفع عيني بعين الوادم من وره ابنك الناس تكول بنت شيخ ذياب جايبه ابن حجي شعبان للبيت وكبسهم اخوها وكتلوه انه تاليتي ينحجي بعرضي من وره ابنك
وصااااح بعلو صوته... ااااااااانه
حجي شعبان... همس بخرعه شنو شتحجي انت
ابن حجي ذياب... يسوي نفسه ميدري بالحچي الطاش بالمحله
عبد اللطيف... ااااااش انت لتتجاوز على ابوي
إيهاب ابن شيخ ذياب ... ااااااااااشششش انت بالذااااات ولاكلمممممممه لك نذذذذل تكتل صوحيبك يالنذل
عبد اللطيف... انه ماكاتل صاحبي ولا دايس عرضكم والله شاهد على كلامي ويدري بحقيقة الي صار
شيخ ذياب ... ضرب بعصاته بغضب بالكاع وتكلم بحديه... وشنهو الحقيقه ياجتال ابني
ياصوحيبه الي جان معتبره اخ تاليتك ذيييييب أحمر غدااااار
عبد اللطيف... وحك روحه لشهاب
استوقفه شيخ ذياب برفع ايده ومدنك بااسف متكلم... لاتحلف بروح شهاب.
عبد اللطيف... عمي بشنواحلفلك ماكاتله وروح امي زهيه ماكاتله
إيهاااب... سدحلكك لــــــك تعبرها علينه هالدرامااااا انه اختي تنطعن بشرفها وانت تبقى عايش وبسببكم شهاب يمووووت والله شاربي مو عليه اذا مو اخليك جوه التراب الليله ورفع سلاحه مباشرة وضرب رصاصه بأتجاه عبد اللطيف
ماشفنه الا الدم تناثر وكع عبد اللطيف سابح بدمه بالكاع
مثل الحلم جان شي مستوعبه عقلي ولاصدكته عيني
بقيت بمكاني متصنمه شداشووووووووف
فززني صوت صراخ جميله يبوووووووووووو
طلعت تركض وتصرخ وناثره شعرها جان عبد المجيب يكعد بخوه واخوه مايرد
لما شافها عمي شعبان لجميله ضمها وكلهافوتي يابه
مارضى الزلم تشوفها رغم هي طلعت كدامهم
جميله.... قتلووووووووه عبود نقتلللل وتلطم على وجهها وتصرخ وتكمز لايبه روحها
جرها وطببها جوه وصاح عليه تعالي لزميها لاتخليها تطلع
بقيت واكفه شابجه ايد بإيد وارجف وبس عيني تترقب الي دايصير احس رجليه صارت بيها طابوك من الثكل
وصوت جميله عله صراخ گلبته للبيت گلاب بالصراخ
ماسمعت الا صوت رصاصه ثانيه لما التفتت اباوع إيهاب ابن حجي ذياب بدمه غركان والي كتله عبد الرحمن الناس صارت تدك بالباب
يابه فتحووووها شصاير رررر شكووووو
حجي ذياب جان منحني على ابنه يكعد بي ومايرد
ولد حجي ذياب طلعو من البيت بحذر فتحوالباب ورمو طلق بالجو حتى يبعدون الناس جرو ابوهم
وصارو يرمون عشوائي على البيت كلهم وتصدو عبد الرحمن وعبد الودود وعمي الحجي طببوه جوه
اصوات صراخ الجهال والبجي ماشوف الا ابن عبد الودود طلع بنص هاي الهوسه وطاحت بي طلقه
وكع بدمه غركان صراخ عله اكثر بعد رمي مكثف
سمعت مرت عبد الودود الثانيه تكلمني..
يسعاد بنتج روحي عليها دره فرفحت روحها من البجي روحي على بناتج
ماجنت ارد بعدني على نفس حالتي
ماشفت الا كف اجاني منها خلاني استوعب الي دايصير
جانت تكلمني بدموع غزيره وتهز بيها من كتفي
بنااااتج روحي الهن
انتبهت وباوعت جانت نعيمه وجميله يصرخون ومرت عبد الرحمن تهدأ بيهم
همست مأشره على مرت عبد الودود... شبيها
ابنها مات كتلوه
هناك وسمعنه صوت صرخه يابويه ياعبد الرحمن
يابويه ياعبد اويلي لطيف اويلي ولدي ماتو اويلي ابن عبد الودود مات راحو ولدي ياناس ياعالم
كعد ويدك على راسه بيده الاثنين فاقد عبد المجيب جان اكثر واحد بأخوته عقلاني ويجيد التحكم بهيج ضروف بكل هدوءكلم الحجي
يابه بس اهدأ على كيفك لايصير بيك شي
هدأ الرصاص والناس التمت اكثر وصياحات بره زلم وداخل البيت هم طبو
شالو جثث عبد الرحمن وعبد اللطيف وإيهاب من داخل البيت وجان نعمان ابن حجي ذياب هم مكتول بره وحجي ذياب على اثرها ضربته جلطه ونقلوه للمستشفى
كلهم شالوهم ودوهم للمستشفى والناس الي راحو وياهم والي راحت لبيوتها ولشغلها
وكأنو جان مثل فلم واقعي يعرض وبعدها كلشي رجع لمكانه بالنسبه للناس
فرغ البيت كلهم راحو بقينه احنه النسوان نلطم ونبجي والجهال يتصارخون ويبجون على بجينه
كمت رحت لغرفتي اشوف البنات
فتحت الباب ماكو ولاوحده صرخت بعلو صوتي من فزعي
ييييييييمه بنااااااااااتييييييي
فتحت باب الكنتور ومدت راسها جواهر
يمه احنه هنا
اجيت بلهفه وذعر خو مابيكم شي يوم طلعتهم من الكنتور
لا يمه مابينه شي خفنه من صوت الطلقات الي بره ردت اطلع اصيحلج بس خفت ودره كامت تبجي متكدر تمشي طببتهم لخواتي للكنتور وسديت الباب علينه خفت
اي اي بنتي عفيه بالسباعيه يمه
ابقو انتو هنا بيت جدكم عدهم مشكله ولازم تبقون بمكانكم هنا لاتطلعون اخاف عليكم
جواهر... ماما شكو شنو هذا الطلق
بسعاد... ماكو شي انتي ابقي هنا وديربالج على خواتج
طلعت بره شفت الباب مركنه سديتها خفت لايجون ولد حجي ذياب يصفون علينه
بقينه وحده تصبر بالثانيه ليل الليل واحنه لااكل ولا نعرف اي شي عن عمي الحجي والولد
اهل جميله واهل مرت عبد الرحمن واهلي واهل نسوان عبد الودود اجو يحاولون يهدؤوهم لكن منهارين وخصوصا جميله جانت تحب عبد اللطيف بشكل جنوني
مر الوقت والليل اكثر ليل بساعاته المتأخره واحنه عيونه ماتقبل تشوف النوم وهم لاحس ولاخبر منهم
راحو اخوة نعيمه يشوفون شنو صار وياهم او وين هم وطلعو كلهم بالسجن والجثث بالثلاجات وحجي ذياب بالانعاش
جانت اصعب ليله تمر علينه ونعيشها
ليله عيشتنه المرّ وتجرعناه غصب
دموعنه تصب مانشفت
وكاعدين والرعب متملكنه
ليش؟ شنو صار؟ وشلون هيج؟
معقوله من تصرف مامدروس يوصل لهدرجه
هم يخطر على بال بشرر إن ممكن اصدقاء ثنين كاعدين ويصير قدر وتتحول الى قضيتين موت وقتل و شرف هم
هيج الناس صارت متخاف الله وتتهم باطل بأعراض الناس وتظن سوء
بساعتها جنت عاذره شيخ ذياب بعض الشيء لان ابنه نكتل وبنته نطعنت بشرفها وكل اصابع الاتهام على عبد اللطيف بوقتها توجهت
بس فكرت هم بحال عمي شعبان شلون حاله ولده صفو للمكابر شلون فرغ عليه البيت
الله يعين گلبك ياعمي
بعد يومين شيعوهم بوجود الشرطه لان الكل على ذمة التحقيق لهسبب خلوهم يحضرون جنايزهم وتشييعهم
جابو عبد اللطيف وعبد الرحمن وابن عبد الودود بتوابيت ونسوانهم صارت تلطم وتصرخ جهال عبد اللطيف صغار التمو يم ابوهم ييكعدون بي والناس على المنظر زادت ببجيها
عمي شعبان اباوعله محني الظهر وصوته مبحوح وكوه يحجي
كلت ولا راح يطول عمي وراهم نكسر ظهره
اخذوهم حتى يدفنوهم وراحو الجنّازّه والنسوان دخلت تعزي والمنطقه تباوعها مابين ليله وضحاها نكلبت لحزن حتى الجوارين لبست الاسود
وضمو التلفزيون وجرو حزن ويانه
بقى التحقيق مفتوح على عبد الودود اما عمي الحجي وعبد المجيب طلعو من السجن
ولد حجي شعبان كلهم طلعو على اساس إيهاب هو جتال ولد حجي شعبان ماادري واسطات ماادري شلون طلعو
مرت الايام حزينه حتى النهار صرنه نشوفه اسود الي نايم بالمكبره والي بالسجن العيله صارت عيشتها كلها على جتاف عبد المجيب لدرجة ان عبد المجيب وره الفاتحه مباشرة فتح العطاره وكف يشتغل
مرت الايام وعمي شعبان ماكو صار ينام بالنهار ويكضي الليل كاعد مايحجي ومنعزل عن الكل
طول لحيته وبياضها جان يفسر كل الحزن الي يعيشه
اكثر من مره اكعد بالليل والكاه فارش سجادته وماد ايده بالدعاء ويبجي ويتوسل بالله عز وجل
حجي شعبان... إلهي استغفرك على كثرة بكائي سامحني لان ابجي هواي
وأستغفرك اكون ماراضي بقدري لكن ياربي هم ولدي وروحي من الدنيا ومدااكدر اتخطى هالشي واعيش
اني تعبت يارب ماضلت عندي طاقة اتحمل بعد
كان محني الظهر ويدعي ويبجي اكثر شي كنت احبه بعمي شعبان هو كثرة دعاءه وايمانه القوي وتعبده في منتصف الليل وكثرة مناجاته الانسان القوي والمؤمن بالله عز وجل يكون بمثل هيج مصاعب تمر على البشر قريب من الله عز وجل
على عكس نعيمه الي شبه تخبلت وتبجي على ابنها
لما اباوع لحال نعيمه ينكسر خاطري عليها هواي
ابدا مو بخير
من جهة حالتها النفسيه الي جانت عايشتها ولاتزال
ومن جهة فقدت ابنها
قبلها اكو من شاركتها حياتها بزوجها
وزوجها هاجرها وبس على الورق زوجته
ياترى الي صار عليها اختبار من رب العالمين لو قدر لو عقوبه على معاملتها وي زوجها سابقاً!
قبل كانت امي تحجيلنه وكت كنت طفله صغيره لما وعيت على هذه الدنيا وبديت اعرف الناس وشنو يعني بيت وشنو يعني اهل بديت اتسائل منو خلقنا ماما احنه شلون اجينه للدنيا ماما؟
كانت تجاوبني على أسألتي بدون ملل وكأنه كانت تتحمس لأسألتي وتتحمس حتى تجاوب
... يابنتي احنه نجي للدنيا لما الام تحمل بطفل ببطنها والي خلق هذا الطفل هو الله سبحانه وتعالى
.... ومنو هو الله امي
... الله الرب هو خلق البشر زخلق هذه السماء الجبيره وخلق الارض
... يعني هذه الكاع الجبيره الله خلقها زين شلون هيج يكدر منين جاب الطين والتراب
... ماما الله سبحانه وتعالى مو بشر هو مو مثلنه هو قوي ويكدر على كل شي اي شي يكدر عليه رب العالمين الله عظيم ماما
.... ماما اذا هو مو مثلنه يعني مايشبهلنه زين هو شنو يشبه يعني الله شلون يكون شكله
... ياأمي الله محد شافه الله لاتدركه الابصار البشر مايكدر يشوف الله
لما موسى عليه السلام طلب من رب العالمين ان يشوفه الله كله ياموسى باوع للجبل اذا بقه مستقر الجبل بمكانه فراح تكدر ان تشوفني
كان جبل ضخم وجبير كلش كلش فلما باوع للجبل موسى الجبل برمش العين صار لاشيء يعني الجبل نهار وصار تراب بالكاع لما شاف هول المنظر موسى اغمى عليه من شدة عظمة الله عز وجل
.... يعني هو الله يكلمنه ياماما؟
... الله يكلمنه بالقران لما تردين تحجين وي الله ادعي ولما تردين هو يكلمج اقري قرآن
... هو رب العالمين ليش خلقنه ماما؟
... خلقنه حتى نعبده
خلقنه بهذه الدنيا حتى يختبرنا وبعد هذا الاختبار يانروح للجنه يا للنار
... يعني لون يختبرنا
... مثلا لما نمر بمصاعب بالحياة هو اختبار من رب العالمين يشوفنه نصبر ونتحمل لو نكفر
... يعني رب العالمين يخلينه نمر بتعب بالحياة حتى يختبرنا
... تلكأت بعدين جاوبت... يعني مو هيج بس يعني لما نتمرض او نمر بأزمه اكيد اختبار ورب العالمين حيجزينا خير وبعدين ا يدخلنه الجنه
بهذه الاثناء ندكت الباب وكانت فقيره رادت مساعده وساعدتها امي
بلحضتها سألتها...
... ماما هو رب العالمين خلاها تكون فقيره
... لا بس رزقها هيج قليل يعني اكيد حيجزيها الجنه
... وليش حتى يكون ناس اغنياء وناس فقراء يعني الاغنياء يروحون للنار والفقراء للجنه
... لا يابنتي مو هيج بس اكيد لان هي صبرت حيجزيها الجنه
... زين هي اذا تشتغل تجيها فلوس
... اكيد
... معناها هي فقيره مو الله خلاها بالفقر
... تلكأت... اي بس يعني اكو ميكدرون يشتغلون دايعيشون اكو مرضى
.. بس هذه كلشي مابيها
... بسعاد هواي تسألين حيرتني بجواب
ادركت وكتها لما كنت طفله الله سبحانه وتعالى اكبر من ان يخلينه بالمصاعب ومايلتفت النه مستحيل يعذبنا حتى يدخلنه الجنه
بالعكس الله ارحم الراحمين واحيانا لما تمر بمصاعب وانت عاجز عجز تام عن معالجتها حيكون الك اجر صبرك لكن لما تكون قادر على معالجتها وماتعالجها الله راح يحاسبك على تقصيرك تجاه نفسك
ابسط الامور الفقر انت لما رب العالمين ناطيك صحه معناها يكلك أشتغل وعيش ودك باب الرزق لاتدك ابواب الناس او تثير شفقاتهم عليك
صح اكو البعض الدنيا عاكسه ويا بس مستحيل تبقه طول العمر
اكو من كان عنده وبعدين صار فقير واكو من نولد فقير وصار غني ماكو شي يبقه على حاله دام انت متوكل على الله
بالنهايه الله..
خلالنه هذه الحياة مثل لعبه وبيها اختيارات واحنه لازم نختار الله ماجبرنا على شي حتى الدين ماجبرنا عليه فكيف يجبرنا على الحياة ومرها؟!
اما الموت فهي مصيبه جببره والصبر على هذه المصيبه نعمه من الله والها اجر كبير عند الله لان الموت وحده رب العالمين القادر على ارجاع الروح للي فقدناهم...!
تنفست بعمق حزين ورجعت لغرفتي لكيت عبد المجيب كاعد دايلبس
بسعاد... ابو جواهر. ! هاي وين بهذه الفجريه
عبد المجيب... طالع عندي شغل
بسعاد... ياشغل هذا الي بنص الليل
عبد المجيب... الملا الي اشتغل وياه عنده شغل ولازم الفجر اروح دااساعده وهو دايداريني باليوميه من اساعده يدري بضرفي
بسعاد... بس
عبد المجيب... ابويه ك العاده بالطرمه مو؟
بسعاد... اي
عبد المجيب..... اوف يالله أبويه خايف لا على هذا حزنه يصير بي شي
بسعاد.... الله يساعده ويعين گلبه
طلع عبد المجيب وجان عمي توه كايم من سجادته وصادفه عبد المجيب
حجي شعبان... ها بويه وين طالع
عبد المجيب... للشغل عندي شغل ولازم اطلع هسه
هز براسه وعافه ومشى احسه استسلم لكل شي ومابي حيل قصص وروايات عراقية كرار صلاح يكول لااحد سوي هذا ولاتسوي هذاك
رغم الجرح بعده جديد وگلوبنه كلنه متجمره بس لازم نمثل الحياة
جان كلشي يصير فاهي وماله طعم وخايفين لايثورون علينه ولد حجي شعبان وره ميصير ابوهم زين كل الي سمعناه من المنطقه ان حجي نعمان طلع من المستشفى وهم مانصبو فاتحه لحد ماابوهم يكوم على حيله او يمكن حيجددون الثارات
الغريب ان بنت حجي نعمان الي جانت موجوده بيوم كتلة شهاب محد شافها بهوسة الي صار
بعد ايام من الحادث جانت صديقتي وجارتي شروق على طول تمر النه للبيت وهي الي جانت تحجيلي بكل الي يدور من كلام بالمنطقه
شروق... ولد حجي نعمان حادين سنونهم عليكم ديربالكم
بسعاد... شندير بالنه فدوه لعينج اشو صفو بالمكابر وعبد الودود يالسجن ماضل غير عبد المجيب وعاين هالعيله الجبيره
شروق... لج عيني رحنه لبيت شيخ نعمان النسوان كلها تلطم وتصرخ وبنتهم ماكو بس هاي المتزوجه جايه ابد ولاشفناها
بسعاد... يمكن مالها عين تطلع بعد الي صار انتي تعرفين شطلع كلام بالمنطقه
شروق... خطيه بالله بيها عليها ناس متخاف الله طعنت بشرفهم
بسعاد... سوده عليه عبد اللطيف لعد يتهموه كاتل شهاب والله لو تعرفين شلون يحب شهاب شلون وكفله يوم الي ابوه ماقبل يزوجه الي حبها دم بچه عليها وماقبل ابوه يخطبها اله تالي تزوجت وهو بقه مثل طير مذبوح يرفس وعاف البيت وطلع وعبد اللطيف بوكتها صارله اخ واهل وتحمل تقلبات عمي عليه جان مايقبل كاله لاتفشلني وي شيخ نعمان تالي تذابحو من وره هالصداقه هاي
شروق... يمعوده قابل انتو مامعروفين احنه نعرفكم ماتطلع منكم العايله ولا منهم العيبه والله هم نعرف بيت شيخ نعمان خوش اودام والهم مكانتهم بين الناس
بسعاد... هاهيه شبدينه قدر ومكتوب
شروق.... الا شيخ نعمان ماكو ياهو الي يجي غليهم للبيت ويسأل عن الشيخ يكولوله نايم معقوله مات؟
بسعاد... وليش دايخفون هالشي عن الناس برأيج
شروق... يمكن لان النار شابه وميريدون يخسرون مكانتهم بين الناس اذا مات حجي نعمان عودتهم تنكسر بعدها وراح محد يباوع بوجههم على بنتكم مو شريفه وصارت سبب بكتلة اخوتها
بسعاد... لا ياالله معقوله شتحجين؟!!!
شروق.... كلشي توقعي
بقيت افكر بعد ماراحت شروق معقوله الي تحجي صح يمكن بعد هالشي ناوين على نيه مو زينه ولد حجي نعمان ياربي احنه لازم نشيل من هذه المنطقه مانبقه راح يبقه الدم يسيل دام احنه ناس قريبه على ناس
خلال هذه الفتره نفسها لاحضت نعيمه تصرفاتها صارت ملفته للنظر نوعا ما مثيره للتساؤولات
مراات تكعد تحجي وي نفسها وتضحك ومرات تبجي على طول شعرها مفلول ومامسرحته منكوش ودشداشتها السوده العريضه تسحل وياها وجهها شاحب وجوه عيونها سواد وجفونها نازلات على عيونها من السهر والتعب والبجي
جانت مرت عبد الودود الثانيه تكعد يمها وتحاول تواسيها بعد الاعصار الي جان بينهم تحول كلشي الى هدوء
لكن نعيمه ابداً ماكانت تسمع لكلامنه ولا لمواستنه تبجي وهامله نفسها ويقية جهالها بشكل فضيع بحيث ملابسها وسخه وريحتها صارت مو طيبه وجهالها صرنه نهتم بيهماني وضرتها
اما زوجة عبد الرحمن شيماء ... جانت على طول بغرفتها
بيوم بالليل جانت طافيه الكهرباء وكلها نامت الا دره جانت مصخنه وبيومها جنت اسويلها كمادات وره ما فكتها الصخونه رحت متوجها للمطبخ حتى اودي طاسة الماي والخاولي سمعت صوت كلام من غرفة عبد الرحمن
تقربت سمعت شيماء تحجي... حبيبي اشتاقيتلك هواي عقدت حاجبي شيماء وي منو تحجي بهذا الليل باوعتها من شباك جانت البرده شويه مبينه منها الغرفه شفتها شيماء كاعده بغرفتها على دوشك سريرهم شالته وخلت بس دوشك ومخده تنام عليها جانت لابسه الاسود ومعصبه راسها بالاسود
ودموعها ماتنشف جانت تباوع لصوره وتتكلم بدنوع منهمره....
حبيبي بعد مالحكنه نعيش سوه حلوه ومره
بعدنه عرسان وماتهنينه بعضنا
بعد مالحكت اجيبلك طفل وافرحك بي
ياعمري انت ياروحي انت
عبدو حبيبي تسمعني؟
شلون اني هسه نايمه على فراش الناعم وبغرفتي وانت بالتراب
شلون وهسه انت بالضلمه وبين الدود واني هنا
بس اني هم وحدي وخايفه
تقبل بالصوره وتضمها بكل حب وتبجي
بعدها خلت الصوره يم راسها وحضنتها وكأنه تتخيل عبد الرحمن يمها
تذكرتها لما طلبت يشلون سريرها من غرفتها وطلعه بوقتها عبد المجيب وجابت دوشك وفرشته وصارت تنام عليه لما سألتها ليش كالت حرمت عليه نومة سرير العرس اني شسوي بسرير ابو نفرين واني نفر واحد وحبيبي اختارله سرير التراب اني هم على الكاع انام وحتى لا رب العالمين يحاسبني بأذية نفسي هاي اني جبت دوشك وانام عليه
بعدها لزمت العده هي وجميله وميطلعون من غرفهم ابد جانو قبل شيكلولنه نسوي
لاتطلعين لاتحفين لا تطلعين جوه سما
لا تحاجين رجال لايشوفج طفل كلشي لا ناقص بس يكولون الماي لاتشربوه لان مذكر اسمه
وهي ياحسرتي عليها كلشي سمعته طبقته ولازمت الغرفه ودموعها
وجميله كذلك جميله جانت اصعب جانت عدها جهال وطلبات وكل شويه طابين طالعين من الغرفه وهي نهضمت حيل اكثر من هضيمتها وشالت هم لجهالها شلون حيربون شلون حيعيشون
اباوع للبيت اجواء الحزن مغيم عليه ومابينه احد مرتاح
نبديها ب عمي شعبان الي يون على ولده
وعبد المجيب الي فارك كل اخوته وصار هو المسؤول عن عوائلهم
وعبد الودود الي نسجن ونسوانه الي وحده منهم شبه تخبلت وابنها راح منها
واني الي ملجوم گلبي بنتي دره
وجميله الي نلجم گلبها بزوجها
وشيماء العروس الي هم نلجم كلبها
حتى الصغار الجهال صارو ايتام ويامن يرعاهم
بهذه الفتره... نصبو فاتحة ولد حجي نعمان
فاتحة شهاب وإيهاب وذياب
بعد ماتصدر بالفاتحه شيخ نعمان
وولده يمه
جانت الفاتحه رسالة اطمئنان حسيتها كلت معناها بعد ماكو ثارات ويمكن كالو هاهيه يمكن اكيد بعد شيردون من عدنه وكلمت عبد المجيب بهذا الموضوع بعد مارجع بوقت متأخر بالليل
بسعاد.... اليوم جانو ناصبين فاتحة ولد حجي نعمان برأيك يعني معناها وكف الدم مو؟
عبد المجيب... باوعلي بحده وصفن صفنه طويله وكأنه يتذكر شي بعدها دنط راسه باسف وتكلم
يمكن..... يمكن كلشي وارد
هم راحو منهم ثنين واحنه ثنين الثالث مشكوك يامنتحر ياكاتله لطيف بنظرهم ويمكن كالو الثالث منهم نسجن وهيج تصافينه يمكن اعتقد هيج تحللت
بسعاد... احنه لازم نشيل من المنطقه لازم مانبقه
عبد المجيب... اني هم فكرت وناوي افاتح ابوي بهذا الموضوع لازم نروح لغير ديره ولغير ناس
بسعاد.... تعبنه ياابو جواهر ومو ناقصنه دم بعد
عبد المجيب... واني الي نكسر ظهري بخوتي ونسوانهم وجهالهم الي عافوهم برگبتي
اشر على غرفة عبد الرحمن بحركه وخيبه
يله هاي عافها عروس وترملت بعد حتى ماخلف مافرح لابمرته لا بأبنه
بسعاد... شتسوي قسمتها من الله هذه
عبد المجيب... جر نفس بحسره وبعدها مدد على سرير همس راح انام هم عندي كعده ب 6 لازم اروح
بسعاد... الله يرزقك وينطيك الصحه والعافيه هاي سالب راحتك علمود تعيشنه
عبد المجيب... شسوي لعد لازم وانوب الحجي صار يعتمد عليه اكثر يكلي انت زين وراح ياما تساعد ناس وتكسب اجر
هذه الشغله الي علمتك اياها لازم تخليها بما يرضي الله علمود تحصل اجر بالدنيه
بسعاد... قصده انك ماتتعلم السحر مو
عبد المجيب... لا اعوذ بالله الله يبعدنه عنه رغم اني عرفتله بس والله حد الله مابيني وبينه
بسعاد... واني عندي كل الثقه بيك ابو جواهر
عبد المجيب... اشر على غرفة عمي شعبان وكال... ابويه علمنه الحلال من الحرام جان دوم يكللنه لاعبالكم ماعدكم ام تعلمكم انه امكم بالبيت وابوكم بكل وقت
راح بذاكرته لما باوع للسكف وارتسمت ابتسامه بسيطه اول مره اشوف يبتسم بعد الي صار
تكلم...
جنه صغار جان شتاء والدنيا تزخ مطر قووووي كلش قوي واحنه ملتمين بغرفه وحده ابوي فارشلنه ومتغطين بالبطانيه جان عالك النه بالمنقله نار وعلى دفوها نتدفه على ضوه الفانوس واني واخوتي واحد بسد الثاني نايمين وابوي يسولفلنه جان شكد يحجيلنه على امي
كال... حجي شعبان... امكم عاشت وياي على البساطه يوم ناكل ويوم لا جنت رجال فقير وعلى كد حالي
بيوم جنت راجع للبيت ضهريه وحاره الدنيه والله ومالي عين اخليها بعين زهيه امكم لان رجعت ولافلس ولا حبة مسواك الشغل وكف وياي فد وكفه يعني كل يومين تلاثه دااطلع حك مسواك ومرات حتى مال كيلو ماكو
حاير ياربي شسوي لمن داامشي واشوف فلوس بالكاع واكعه هم هن مو هواي قليلات بس لكيتها
شلتها وكلت اشتري بيها هسه وبعدين لمن اشتغل اخلي بدالها واشوفها مال منو بس شفت روحي قريب على البيت كلت اطب اشوفها شسوت ماسوت
فتت تلكتني بالابتسامه مالتها الي تعودت عليها وكالت هلا بأبو بيتي گواك الله
حجي شعبان... يعد گلبي يم ولدي شلونج
زهيه... بخير دامك انت بخير شلونك خو ماتعبان
حجي شعبان... شوفتج توكع كل تعبي
زهيه... تعال اكعد ارتاح شلون باميه ركبت اليوم تلوك لهل الحلك وياها خبز حار توني خبزت وخليت القوري بتنور الطين كلت يفور على الجمر بين ماتجي وهم لبن يخبل
حجي شعبان... بأندهاش... منيلج زهيه اني طلعت ماعدنه كلشي
زهيه... مرني اليوم اخويه سعدون وطعمنه حيش بانيه تازه وطماطه ولبن كال هاي من البستان واللبن ناطي من العرب
حجي شعبان... كون سالم عاشت ايده
زهيه... باوعت للفلوس الي بإيدي هاي منيلك؟
حجي شعبان... زهيه هاي وسكت...
لكيتها
زهيه... دكت على صدرها بخرعه لكيتها؟ وليش جايبها للحوش
حجي شعبان... كلت اجيبلكم بيها مسواك كلت هسه الجهال جوعانين واحنه من البارحه مامتعشين
زهيه... ونهون عليك توكلنه من مال مانعرف مصدره يابو عبد ليش هيج
حجي شعبان... ارجعها والله بس الله يرزقني
زهيه... لا ياابو عبد مو انت شعبان الي تزوجته والي يخاف الله بكل كعدته وكومته لا انت واحد ثاني مستحيل مااصدك
حجي شعبان... على كيفج واالله ماهنتو عليه
زهيه.. اعوذ بالله من الشيطان الرجيم احنه طول عمرنه ناكل من عرك جبينه وعمرنه مااخذنه شي مو من حقنه ولا النه
وهاي الفلوس رب العالمين خلاها بطريقك جانت اختبار إلك يابو عبد وانت فشلت هالمره بالاختبار
حجي شعبان... اعوذ بالله من الشيطان الرجيم صحيح والله كلامج فعلا اني غرتني هل كم فلس استغفر الله العلي العظيم واتوب اليه سامحني يارب دنت نفسي
راح اروح انطيها لشيخ الجامع يصيح بيها يشوفها مال منو هذه
حجي شعبان... جانت تنبهني على كل شي واني هم انبهها على كل شي واحد علم الثاني واحد ربى الثاني
ذكرياتي وي امكم اجمل ايام حياتي قضيتها وياها جانت زوجه صالحه ونعم الزوجه
والحمد لله على النعمه
بنت اصول ومتربيه صحيح صبرت وياي حلوه ومره لاوالله بالمره صبرت اكثر من الحلوه وخلفتكم بس ماكدرت تكمل طريقها وياي بتربيتكم
جر حسره وباوع والمطر جان يدك اختنك وكال
اول ايام موتها جان مثل هيج برد وجنت اكول زهيه هسه بردانه واخلي نفسي مثلها بردان مااتغطه وابجي عليها
بقيت فتره هيج وحلمت بيها كالتلي گوي روحك ولاتبقه مكسور وربيهم لولدي وخليني انام مرتاحه
جان هذا الحلم مو حلم حسيته رساله من عالم الاخره لعالمالدنيا مابيني وبينها واخذته على انو هو رساله وعن طريق الحلم تواصلت وياها وكالتلي
وراها بديت اقوه وصرت احسها ويايه وتدري بينه وصرت حتى لمن اصبلكم اخلي خاشوكه زايده
رد باوعلي عبد المجيب تبسم.. انتي مامنتبها على ابويه لحد الان يكول جيبو خاشوكه بعد وتبقه دوم على السفره خاشوكه زايده ماتسائلتي ليش؟
عقدت حاجبي مستغربه... ولاانتبهت ابد
جر حسره وتكلم... من بعد اخوتي ابوي انعزل وبعد لا يتأقلم ولا يكول جيبو خواشيك لمنو ولمنو ولمنو يجيب
الله يعينك يابويه شتحملت من ضيم
ثاني يوم جان عمي شعبان كاعد على الكرويته ومتكأ على عصاته عيونه ذبلانات وجهها مغيم عليه الحزن ذبلان كلش ذبلان
وصفنات صار يكضيها
بهذه الاثناء دخل عبد المجيب سلم على عمي وكعد يمه... شلونك بويه
حجي شعبان... الحمد لله
عبد المجيب... اريد احجي وياك بموضوع بويه
حجي شعبان... كول
عبد المجيب... يابه احنه شنو ضلتنه هنا بهذه المنطقه بويه احنه لازم نشيل لازم نروح غير ديره وغير ناس
ناسها غير ودنيتها غير بويه الناس اكلت وجوهنه بنظراتها والله مدااطيق روحي
باوعله عمي وبقه صافن عليه واني وعبد المجيب واحد باوع للثاني تحيرنه من نظرته النه......
وتركت لنا المصائب نُدبةً لايمكن شفائها لا بالتخلي ولابالهجران ولا بتغيير الاوطان
شكرا لزيارتكم عالم روايات سكيرهوم
