رواية بنات الملا الفصل الثامن بقلم رغد الموالي
عبد المجيب... بويه احنه لازم نشيل منا
نروح لغير ديره ناسها غير ناس يابه والله اباوع بوجوه الناس احسها تاكلنه بنظراتها
باوع عمي شعبان لعبد المجيب وطول بنظرته عليه تلكأنه نظراته جانت توحي وكأنه شريط ذكرياته يمر عليه بهذه اللحضات
باوع وهمس بخيبة امل وتكلم...
لو جانت طلعتي من هالديره حتلم جرحي جان طلعت
ولو جانت طلعتي راح تسكت هالناس هم جان طلعت
طلعتنه مو محلها ابد يابو جواهر
طلعتنه راح تثبت ان احنه فعلا جتلنه شهاب وان عبد اللطيف بنظر الناس كلها يبقه غدار صاحبه والناس تبقه تذكرها جيل وره جيل وتقيس عليه الامثال
رفع ايده مأشر بالسبابه بالرفض التام... لا يابو جواهر مو اني الي ادير ظهري ولروح واشتري راحة بالي واعوف الناس تجيب طاري عبد اللطيف بالعايل لازم ابقه لحد مايجي اليوم الي اثبت بي براءة ابني واخلي ينام بگبره مرتاح
عبد المجيب... يابه والله علمودك اني اباوع لحالك مو نفس الاول كاعد وايدك كلها ترجف وحسبه تودي وحسبه تجيب واني ادري كل ركن بهذا البيت يذكرك بي والا اني مو هين عليه اعوف منطقتي وشغلي وماادري هناك شلون تكضي بس اكول الله كريم
حجي شعبان... عفيه وليدي نكول الله كريم... عينه بعين رب العالمين عسى الله يظهر الحقيقه ولايخلينه متفشلين بين الناس
بسعاد... جان عمي شعبان رافض رفض تام لما حجه اقنعني بعض الشيء
مرت الايام لحد يوم الاربعينيه بعدها اجو اهل شيماء زوجة عبد الرحمن جان اخوها وراد ياخذها
... عمي احنه من بعد اذنك كلنه لازم ناخذ اختنه شيماء نردها للبيت بعد ضلتها هنا مالها داعي
حجي شعبان... والله ياابني اني مااعرف شكلك بعد بنتكم عروس وترملت وهذا قدرها وقسمتها من الله اني مااجبرها على شي الي هي تريده ويرضيها يرضيني
.. رحم الله والديك عمي شعبان والله يرحم ولدك وبالخصوص عبد الرحمن والله طيب وماشفنه منه الا كل طيب
حجي شعبان... بويه مو ولدي وااحمد بيهم بس والله فقره وماعدهم أذيه على احد اني ادري منين طلعتلي هالبلوه هاي وخلت ولدي ينجتلون تاليتي ولدي ولد نعمان جوه التراب
... هاهيه عمي گوي حيلك هم السابقون ونحن اللاحقون مصيرنه وراهم
... رفع ايده اليمنى وباوع للسماء... الحمد لله والله هذا الي مصبرني اكول يجي يوم ورب العالمين يجمعني بيهم بضله وبرحمته
... الحمد لله على كل حال
حجي شعبان... صاح على جواهر... بويه جواهر شوفي عمتج شيماء ترد لااهلها كليلها اخوتج جون ويردونج.
راحت جواهر تركض وتصيح... عمه شيماء... عمه شيماء اهلج يردون ياخذوج لبيتهم يكلون امشي ويانه
... همست... لا جواهر كليلهم ماتطلع من غرفة رجلها ابد
اجت جواهر تركض وكالت... ماتقبل دكول مااطلع من غرفة رجلها ابد
رد اخوها... ميصير ضلتها مالها كل داعي
لاعدها ضنه داتكعد ولا رجلها بالوجود عمي احنه مو كد تهايم الناس
حجي شعبان... فتح ايده الاثنين وتكلم واحنه منو ضل عدنه حتى تخاف من حجي الناس هو بس عبد المجيب وليل نهار طالع
... عمي لاتاخذ بخاطرك من كلامنه بس الناس ياعمي مترحم
... هز راسه بقبول وتكلم.. افهمك وليدي والحك وياكم اني هسه اروح احجي وياها
كام متكأ على عصاته ومحني الظهر دك الباب وتكلم ونبرة صوته تغيرت اختنك اول مره يوكف باب غرفة عبد الرحمن بعد موتته
.. بويه شيماء امشي وي اهلج ضلتج هنا مو لصالحج بنتي
... ردت من وره الباب... عمي مااكدر والله مايهون عليه اعوف مكان عبد الرحمن واروح ماعندي شي يذكرني بي غير هالحياطين والصور تريدني اتركهن
... بويه اني ادري بولدي بگلبج مايحتاج اله شي يذكرج بي ادعيله بالرحمه ادعيله الله سبحانه وتعالى يرزقه جنة الفردوس يابنتي مااله غير هالشي ينفعه الذكريات والصور شيون غير يحرگن بالگلب حرك
... تمنيت ياعمي عندي طفل من ريحته اشمه واكول عبود مو جود
... هاهيه بنتي شبدينه الحمدلله على كل حال هسه امشي بنيتي اخوتج بره ينتظروج
وعافها ومشى
وهي وره بشويه طلعت مبوشه ولابسه عبايه وجواريب ثخينه كلش
مغطيه نفسها بحيث مينشاف منها الا السواد كلشي مامبين وراحت وي اخوتها
نظرات الحسره بعيون عمي شعبان وهو يباوعلها وهي تطلع من بيت زوجها فسرت كل ألم يمر بي وي كل خطوه تخطيها
جر حسره وفات لغرفته
بهذه الاثناء ندكت الباب فتحتها جانت شروق اول ماشافتني لزمتني من ايدي
... عندي حجي وياج لازم نكعد وحدنه
بخرعه... شكووو شصاير
... طبطبت على خدها الايسر وهي تحجي بهمس... ولج بلوه بلووووووه ياااااكبرهااااا
بسعاد... احجي مو وكعتي گلبي
شروق... بنت شيخ ذياب
بسعاد.... بخرعه... اي شبيها
شروق... باوعت يمنه ويسره بسرعه وقربت وجهها وهمست اخوتها قاتليها!!
بسعاد... دكيت على صدري بشهكه... شنووووو شتحجييييين.... ليييش
شروق... من شافوها حجت وتقريبا دافعت عن لطيف كالوو حجي الناس صح واحنه لازم نغسل عارنا حتى نرفع راسنه بينه الناس
اتهموها ان هي عدها علاقه بلطيف وانو هم ثنينهم اتفقو على كتلة شهاب علساس شهاب لكففهم بالبيت وداري بعلاقتهم وكتلوه هم
بسعاد... ولج شتحجييييييين هذا الكلام باااطل ولج لطيف جانت روحه من الدنيا شهاب شتحجيييين
ششروق... الكلام هذا حتى اهلها يحجون بي غير هم اعرف
بسعاد... وشمدريج قتلوها
شروق... بنت عمتي جنت بيت اخوه لحجي ذياب وهي عرفت لان العائله كلها تدري وهم هسه ضامين موضوعها حتى لاتعرف الشرطه وسين وجيم وسجون
بسعاد... احس صاعقه وكعت على راسي ياربي شداسمع شدايصيييييير
رجعتني من صفنتي وكالت بتوسل
شروق... الله يخليج لاتحجين الي حجيتلج بي اسمعيني داده استري على نفسج وعلى بناتج وخل ياخذكم ابو جواهر وشردو من ا يعوف عمي شعبان وعمي شعبان ميقيل يشيل ويروح من المنطقه
شروق... خيه ديربالج على بيتج وبناتج بعد اني الي عليه سويته الباقي يمج
يلا اروح اني
بسعاد... الله وياج عيوني
وره مراحت بقيت متبهته شلون وشنو أسوي وعبد المجيب رافض نشيل زين شلون لازم اقنعه لو حتى بالقوه
بالليل فاتحت عبد المجيب... ياابو جواهر احنه بعد الي صار ضلتنه هاي شلها داعي
عبد المجيب... وين نروح برأيج
بسعاد ... لغير منطقه والله گلبي مامرتاح لهاي الكعده
بعدين المسؤوليه كبرت وانت داشوفك داتتعب يعني شنو ذنينا احنه
عبد المجيب... سمعي بسعاد هالحجي حجيتي هسه بعد مينعاد افتهمتي لو لا
حجينه وي ابويه وسمعتي شنو جان رده لهنا والموضوع ينسد
بسعاد... بس والله خايفه
عبد المجيب... خوفج هذا ماله داعي لطيف ونكتل وعبد الرحمن ونكتل يعني اخذو ثارهم
بسعاد... هم همينه راحو الهم ولد وخاف يكلون بعد ثار
عبد المجيب... لا... ثنين منههم راحو وثنين من عدنه راحو بعد كلبي هاهيه
بسعاد... اكلك منو منهم متزوج نعمان لو إيهاب
عبد المجيب... إيهاب متزوج وعنده ولد ويمكن بنات عنده مااعرف
بسعاد... خاف ولده باجر عكبه يكبرون وياخذون يثار ابوهم
عبد المجيب.. كولي يالله وصلي على النبي خليها على الله
بسعاد.. ونعم بالله
جنت اترقب كلشي بحذر وبخوف وخايفه على بناتي هواي شلت همهم لدرجة من كثر مااوهس واخاف خفت من احفاد ذياب خاف باجر عكبه يكبرون وينتقمون من عبد المجيب او من بناتي
دكيت على صدري بخوف.. شنو بناتي عزززه لااااا إلابناتي يمه
تمسكت ببناتي جان دائما مثل الصوت يجي براسي ان نشيل منا مانبقه بس كلها رافضه
مرت الايام والشهور جانت تمشي الحياة بصوره طبيعيه ممله تسودها الكئابه
جنه كوم نسوان وجهال وعلى جتف واحد عيشتنه
عبد المجيب صرنه منشوفه غير بس بالليل ومرات حتى بالليل منشوفه هلك روحه بالشغل حتى مايقصر علينه بشي
خصوصا بعد ماعرفت نفسي حامل ببنتي الخامسه
والصدفه شائت بعد عدتها لشيماء اجت لعدنه وجان عمي شعبان بالطرمه كاعد وكلنه يمه فارشين حصيره وكاعدين
اجت والابتسامه بوجهها
شيماء... عمي اني اجيت ابشرك..
حجي شعبان... رد بملل... بشاره هه امنيتي يبقه شس يدهشني بعد بالحياة كولي بنتي شنو بشارتج
شيماء... عمي أني حامل عبد الرحمن راح يبقه ذكره بالحياة
وكف على حيله منصدم... شنوو شتحجين عمي
شيماء... اي والله ياعمي اني حامل بأبن عبد الرحمن حبيبي راح يبقاله ذكر بالدنيه
غوركت عينه بالدمع وتكلم بصوت مخنوك... سوده عليه ياوليدي بعد حتى ضناك ماشفته
شيماء... والله ياعمي ماصدكت من سمعت اني كلش فرحانه
... مسح على راسها بحب وتكلم... الله يحفظج ويستر عليج بنيتي
شيماء... عمي اجي اكعد يمكم بالبيت دام اني حامل باابن عبد الرحمن
... لايابنتي اني مااقبل تدفنين نفسج بالحياة حتى لو تجييين هالولد خلي يمنه احنه نربي
وانتي شوفي حياتج بعدج صغيره عروس وترملتي شذنبج يابنتي تربين يتيم وتدفنين روحج بالحياة
شيماء...بخرعه.. عمي انت شتحجي أاأأاني ماصدكت حملت بابن عبدو عمو اني احبه لعبد الرحمن ومستحيل اكون زوجه لغير عبد الرحمن..خلت ايدها الاثنين على بطنها وتكلمت.. وابني وابنه أربي
أربي وأخلي يطلع رجال مثل ابو وهو فرحتي
لزمت ايد عمي شعبان وضمتها بإيديها وكالت بتوسل... أني بس اريدك تدعيلي يطلع الي ببطني ولد ويشيل اسمه واسند ظهري بي للزمن بعدها كلشي ماريد من هالحياة
عمي شعبان... روحي يابنتي والله ينطيج شما تتمنين الي مثلج قليلات ويمكن ماكو يابنتي عروس انتي والله شوفتج وانتي ارمله مردت گلبي
شيماء... قدري هذا ياعمي والحمد لله على الاقدار الي يكتبها النه رب العالمين
مرت الشهور مابين حمل متعب ومسؤوليه واولاد وكلها بكف ودره الي اشيلها احيانا من مكان لمكان او اسبحها جانت تتعبني خصوصا هي داتكبر واني حامل صرت احس بتعب مفرط ومو كل الاحيان عبد المجيب موجود حتى يساعدني
ولدت شيماء بأبنها روح.. سمته روح
واسمه الكامل صار روح عبد الرحمن شعبان...
اكو الي عارض على اسمه واكو الي حبه لااسمه
وبعد شهرين ولدت بنتي ماس كانت جميله مثل خواتها الاربعه...
بيوم فزيت منتصف الليل وسمعت عمي يحجي وي عبد المجيب...
حجي شعبان... انت بس تعقد عليهم يعني مو حالهم حال بسعاد
عبدالمجيب... الله يخليك يابه مااكدر والله شوف عبد الودود
حجي شعبان.. عبد الودود متزوج ثنتين ويادوب جان ملحك عليهم
اخذها لجميله
جميله عدها كوم جهال وانت اولى بتربيتهم من الغريب البنيه هم بعدها صغيره تروح تتزوج هذول وين يرحون
عبد المجيب... ياب والله مايهون عليه اكسر بخاطر بسعاد
حجي شعبان... اني افهمها لبسعاد اني احجي وياها هي عقلها جبير وحتتفهم
عبد المجيب... كللها عقد بس ماكو زواج رسمي
حجي شعبان... بارك الله بيك وليدي دومك مريحني
عبد المجيب... يله ياب اني اطلع لان تأخرت على الحجي
حجي شعبان .. الله وياك وليدي
جمدت كل اطرافي شدااسمع اني شدايحجي عمي شداشوووووف وعبد المجيب موافق
موافق بس علمودي شايل هممممم
رجعت لغرفتي بخيبه وحسره ودموعي نزلت لوحدها ضليت ابجي وابجي
حسيت بإيد صغيره صارت على كتفي التفتت شفتها جواهر
تكلمت.. ماما ليش تبجين
بسعاد.. ماكو شي حبيبتي ليش كعدتي
جواهر... سمعتج تبجين وكعدت بابا وين؟
بسعاد.. يالشغل
يله يوم روحي نامي وارتاحي حبيبتي
قبلتها وراحت نامت
واني حتى النوم طار من عيني
يعني صدك ويسويها عبد المجيب ويتزوج لا ومنووو جميله الي هي أخت ألي
شسوي ياربي شلون شسوي
صبح الصبح جان الكل متعود عليه اول وحده اكعد واحضر الريوك خصوصا لعمي شعبان لكن هالمره ثكل خاطري وزعلت حيل زعلت
بقيت بغرفتي مرت ساعتين والهوسه اسمعها بره صارت الجهال كعدو وجميله ونعيمه وحليمه واني بقيت اني وبناتي بالغرفه رغم كعدو بس حذرتهم مايكومون
شويه وندكت الباب ونعصر گلبي لما إجه صوت جميله بإذني..
.. بسعاد وينج وتدك بالباب
كمت بتعب ورحت فتحتلها الباب جانت عيوني ذبلانه من البجي وتعبانه كلش
همست.. كولي شنو
جميله... شبيج اشو مو على بعضج صاير شي
ابتسمت بخيبه واشرتلها بيدي وتكلمت ماكو شي
جميله.. خاف مريضه مو عوايدج تبقين لهيج وقت نايمه
بسعاد... جميله روحي هسه جايه
عافتني وراحت واني كمت اتكطع لاول مره انتبه على جميله حلوه واحلى مني واصغر مني اشتعلت بگلبي الغيره للحضات كرهتها رغم اني ماعرفت رأيها حول هذا الموضوع
اخذت بناتي الخمسه وطلعت من الغرفه جانو محضرين الريوك واول مااجيت كلها تسأل
خو مابيج شي بسعاد اليوم مضحيه
مارديت على احد وكعدت اوكل بناتي الصغار
كملو اكل اخذت بناتي واترخصت منهم تعذرت إن أني تعبانه اليوم ومريضه
حجي شعبان... بسسس يسعاد يعني ماكو شي ثاني
بسعاد.. شي ثاني مثل شنو عمي
حجي شعبان.. ولاشي روحي ارتاحي
جميله.. حسويلج برتقال اعصرلج هسه تصيرين مثل الورد
يسعاد.. بضوجه.. خلي ألج مشكوره وعفتها ومشيت
بقيت بغرفتي لحد مااجه عبد المجيب جان متلهف ونظرة الخوف بعيونه عليه
دخل وتكلم بخرعه.. كالو مريضه وبغرفتج شبيج
باوعتله بقهر ودرت وجهي عنه مارديت
اجه يمي وتكلم... شبيج مريضه شيوجعج كليلي
بسعاد... مابيه شي
عبد المجيب.. من يمته هيج تضمين عني ومتحجيلي
بسعاد... من يوم الي انت بديت تخطط انت وعمي على زواجك
فتح عيونه بصدمه وتكلم.. حبر على ورق صدكيني مو مره اليه علمود جهال اخويه
بسعاد.. روح سولفها لغيري
شوف اني مراح امانع اذا تتزوج بس يوم الي تتزوج حيكون اخر يوم اليه بي وياك
يعني انت مخير هسه يابناتك ياجهال اخوك
عبد المجيب... كولي يالله يامره وافهمي مني تره الموضوع مو مثل ماانتي متوقعه والله حبر على ورق ماكو شي
انتي ام العقل الواعيه معقوله تتصرفين هيج
... ام العقل؟ واعيه؟ ولان واعيه وعقلي جبير لازم تدمرووونييي تجيبلي ضره بحجة اني واعيه واتفهممممم
عبد المجيب... اسمعيني جميله اذا راحت تزوجت ولد اخويه يصفون بالشوارع
بسعاد.. لا ليش بالشوارع اني اربيهم جيبهم اني اربيهم وخل تروح هي تتزوج طالما مو هامها جهالها
عبد المجيب.. جر نفس وتكلم.. على كيفج ياام جواهر بالنهايه مايصير الا الي يرضيج
بسعاد.. واني الي يرضيني بيت وحد تطلعني عيشه مالي هنا بعد
عبد المجيب.. باوعلي بوسعة عينه وتكلم
وأهلي؟
بسعاد.. شبيهم اهلك هااا هم ابقه اصرف عليهم وعيشهم واني وبناتي بيت لوحدنه
جواهر حتصير بطولي وهي تنام ويانه بنفس الغرفه
عبد المجيب... حقج والله بس انتي تدرين بالحال وبالضرف
بسعاد.. ومقدره.. وعايشه.. وساكته غير تعوفوني بحاليييييييى غير تكلون هالمره محترمه نفسها مالنه دخل بيهاااااا تكوم تتزوج عليه
عبد المجيب.. كافي بالنهايه كتلج مراح يصير الا الي يرضيج
وعافني وطلع وسد الباب بقوه وراه
جان لازم اتكلم بعد هذا صمتي بعد هذا كل سكوتي دوم اكتم واجمع بداخلي واكول يلا يابسعاد مشيها ميخالف
عيشيها بساطتها ولاتتبطرين على نعمة ربج
وكوم اسمع حجي واعبر
وامشي ومااحجي كلشي بس توصل لهنا لاااااا كافي كافي
هاي هم دره الي بقو يسوولي مابيها شي ووديها للجده والتهيت اخدمهم وتالي بنتي نشلت هاي هم بنتي سوده عليه يادره جان المفروض من الاول افهم ان اني لبناتي وبناتي الي جان المفروض تكون درس واعرف احتويهم وما ابقه ميته نفسي واخدم لصغير والجبير بالتالي عمي الي داريته يحرض رجلي حتى يتزوج عليه ونسوان حمايه الي معتبرتهم خواتي تصير ضرتي
ااااااااااااااااخ ياوجع گلبي
شويه وندكت الباب.. رديت ب تفضل
اجاني صوته المتعوب من وره الباب.. تعالي ياام جواهر رايدج بجلمتين
بحكم عمره واحترامي الشديد اله مارديت بكلمه كمت خليت ربطه على راسي شمرتها شمر ورحت
بسعاد.. تفضل عمي
حجي شعبان.. واني عبالي مريضه فعلا تاليتج زعلانه وداخله لغرفتج من الي سامعته من حجي مابيني وبين عبد المجيب
اني مراح اكلج انتي ليش توكفين تسنطين علينه بس
بسعاد.. بس ياعمي جنت ماره بالصدفه والله واجه بإذني الكلام وانقهرت
حجي شعبان.. حقج تنقهرين وكل مره تنقهر ماتقبل رجلها يتزوج غيرها
بس أحيانا الامور والاقدار هي تفرض نفسها
مثل ماشافت عينج ولدي تجتلو وعافو نسوانهم وهم بعدهم شابات حديثات والوكت يابنتي مابي امان ولهسبب اني خايف لاوحده بيهم تتزوج ويصفه ضنها يوم هنا ويوم هناك
بسعاد.. ومالكيت الا عبد المجيب ياعمي لو لان شفت خلفته بنات كلت اضرب عصفورين بحجر
حجي شعبان.. اني حعتبر نفسي مسمعت هالجلمات هاي وحعذرج لان انتي هسه مقهوره بس الي بالج غلط
واني كتلج نسوانهم صغار ممكن جدا يتزوجون وجهالهم يسيعون
بسعاد.. اني اربيهم اني اتكفل بيهم
حجي شعبان.. عندج بنات وجميله عدها 3 ولد باجر عكبه يكبرون ولدها مراح تتوفقين بتربيتهم
بسعاد.. يعني انتو حاسمين الموضوع من لى جميله شعجب ما جبتو طاري شيماء
حجي شعبان.. كلت اقنع عبد الودود منا لما يطلع من السجن هي البنيه رافضه تتزوج غير عبد الرحمن
بسعاد.. يعني افهم من كلامكم جميله موافقه
حجي شعبان.. البنيه لحد هسه متعرف بهذا الموضوع اساسا
بسعاد.. والمطلوب مني عمي هسه شنو؟ تردوني اوافق يعني؟
حجي شعبان.. ردت افهمج حتى لاتنقهرين
بسعاد.. حتى لاانقهر يعني ترضين او مترضين جميله تتزوج عبد المجيب
ماشي براحتكم مثل متحبون
فتت لغرفتي ولميت ملابسي وملابس بناتي واخذتهم حتى اطلع صار بوجهي عبد المجيب
.. هاي وين رايحه
بسعاد.. من اليوم مالي عيشه وياك بعد
عبد المجيب.. كولي يالله استهدي بالرحمن
بسعاد... يااني ياقرار ابوك
عبد المجيب.. هسه صار ابوك
. بسعاد... مامتوقعه من عمي تطلع منه هالشي ويشجعك على الزواج ابدا مامتوقعتها منه
... هو شرحلج وحجالج علمود شنو وليش واني كتلج حبر على ورق يابنت الناس
... واني كتلك ياهذا الزواج يااني
... خلص ادخلي وارجعي لبيتج ومايصير خاطرج الا طيب
هسه تحل الموضوع
... يعني شلون؟
بسعاد... يعني تواجه جميله وتخليها تبطل املها الي بانيته عليك
عبد المجيب... هي متدري بشي
بسعاد... مصيرها حتعرف وهسه تواجهها كدامي
عبد المجيب... وعيونج مايصير الا الي يرضيج خلص اعتبري السالفه مانحجت
بسعاد... دنشوف
فتت للبيت ارتاحيت نوعا ما لكن بعدني قلقه وخايفه
خايفه لايكون كلامه جرعة مخدر وبالتالي يخليني بالامر الواقع
الايام صارت تعدي وهدوء تام ماكو غير كل شخص ملتهي بنفسه
والايام تتبعها اسابيع واشهور
سالفة القتل والثارات وبنت حجي ذياب بقت الناس تحجي بيها فتره بعدها الناس تناست ومشت الحياة
خلال هذه السنوات توفه حجي ذياب بعد مرضه الي صار بي اثر موتة ولده بدت تتراجع صحته لحد مااودت بي للجلطه وبعدها انتهى من القهر والسّكر الي دووووووم مرتفع القهر والمرض انهى حياة شيخ جان سطوة زمانه وكلها تهابه
الناس تحبهم لبيت شيخ ذياب مثل ماتحبنه هم وكلها تأسفت على الي صار بين العائلتين
تشييع جنازة حجي ذياب جان مهيب حتى عمي شعبان تمنى يروح بجنازته لكن منعه عبد المجيب
بأيام التسعينات جان العراق يمر بحصار وجنه عايشي على الله وعلى شغل عبد المجيب
عبد المجيب ذب روحه بالشغل بالفترات القبلها لحد ماصار ملا معروف بالمنطقه وحتى على بقية المحافضات الناس كامت تجي منين ومنين حتى تحجيلها مشكلتها ويشوفلها حل
شفت حالااااات جانت تصعب على اي انسان
ناس مأذيها السحر لدرجة الجنون
وجان عبد المجيب يتعب كلش يتعب حتى يكدر يعالجهم
جان كل شغله بالعطاره لكن احيانا الشغلات الصعبه وتاخذ وقت وخصوصا اذا جايين من طريق طويل عبد المجيب يحيبهم للبيت ويعالجهم
السنوات صارت تتعقب وحده وره الثانيه وطلع عبد الودود من السجن شهكة عمي شعبان وفرحته بوليده متنوصف فرحانين ويصفكون وذبحو الكبش جوه رجله ويهوسون....
حجي شعبان... بويه والله ماصدكت اطول بهالدنيه ويجي اليوم الي اشوفك وانت طالع من السجن
عبد الودود... وهاي اني طلعت يابه الحمد لله والله مامصدك
حجي شعبان... الحمد لله الي جمعني بيك ياب والي قر عيني بشوفتك وليدي
عبد الودود.. الحمد لله
جان رجعة عبد الودود وطلعته من السجن فرحه جبيره النه لكن هو مبين عليه التعب والحزن على ابنه
جانت نعيمه الي داهمها الحزن والصمت الدائم كاعده تباوع لكل الي دايصير مقرفصه بزاوية البيت وتباوع بصمت
جانت هاي حالتها ووضعها حتى عبد المجيب عالجها وخلصها من الي هي بي لكن صدمتها بأبنها خلتها تصير هيج
اجه عبد الودود يمها وكلها واستقبلته الا هي مقرفصه وكاعده وكأنه خايفه من شي كعد مقابيلها واخذ راسها ضمه اله وصار يبجي على الي صار بيهم
عبد الودود.. سامحيني نعيمه اني ضلمتج ويايه اني هملتج اني متفهمتج جان المفروض افهمج اعالجج اشوفج شبيج بس اني لاااا
شافها ماترد باوعلنه كال.. شبيها شو مترد
عبد المجيب... ليش حتى متردلك اجه يمها وكلمها نعيمه هذا عبد الودود شبيج شنو معرفتي
باوعتله لعبد المجيب ورجعت باوعت لزوجها ودنكت بأسف
عبد المجيب.. شبيج نعيمه افرحي بطلعة رجلج من السجن
نعيمه... رجلها.. وأشرت على حليمه... شجابه عليه
عبد الودود... تحجين وكأني مو رجلج اني بس رجل حليمه
نعيمه... من يوم الي تزوجت اني مااعتبرت نفسي مرتك انت رجلها هي وبس والي جامعني بيك جهالييييي
عبد الودود... اني اعرف قصرت بحقج واهملتج
نعيمه... وبعديششش هااااا
بعديييششششش بعد مااني انتهيت وبقيت جسد بلا روح.
عبد الودود... كولي يالله وصلي على محمد والله العظيم الي صار عن جهل عن قلة معرفه
اني يا نعيمه اشوفج تعصبين تصيحين ومتحترمين وهامله جهالج شترديني اتصرف
شترديني اسوي
تزوجت حتى ترجعين لبيتج ولزوجج تالي بقى نفس الحال
نعيمه... ومن كالك عمي شعبان مرتك تعبانه ومن حجالك عن وضعي ليش ماقدررررت
بس فكرت بنفسك بأنانيتك
عبد المجيب... كولو يالله كافي هذه المشاكل تره مايصيررر
عبد الودود... وهاي راسج جيبي ابقبله عمي اني اعتذر
نعيمه... بقت ساكته
عبد المجيب استغل الفرصه وصالحهم وماخلاهم زعلانين
مرت الايام ومشت الحياة طبيعيه رغم جنه كلنه خايفين من ولد حجي نعمان لكن على مايبدو انو الدم وگف بيناتنا لكن الحقد والكره والخصام ماتوقف
ولايمكن العمر كله يتوقف....!
تحديدا بنفس هذه الفتره جميله رادت تطلع من البيت وتروح بيت اهلها....
جميله... عمي اني بعد مالي مكان هنا واريد اروح لبيت اهلي
حجي شعبان... ليش بويه سامعه شي
جميله... لا عمي بس اني مترهم بعد ابقه جنت مستحيه من عبد المجيب ولان انت ردت ابقه كاعده بقيت بس هسه مترهم بعد اعيش وي حمويني الناس هم تاكل وجهي
حجي شعبان... باوعلي بعتب وجر نفس وتكلم.. بهاي حقج بويه اني ماالومج والله كريم ان شاء الله اشوف حل ومااخلي الناس تجيبج بالعاطل
راحت ميله لبيت اهلها واني مباشرة فتت للغرفه ونااااار تشتعل بصدري
واول مااجه عبد المجيب سولفتله
... بسعاد... هم رجع لنفس المنوال عمي ابو جواهر هاي مو عيشه
عبد المجيب... اطمني السالفه مو يمي هالمره يم عبد الودود
بسعاد... شلون يعني
عبد المجيب... يعني ابويه فاتح عبد الودود بموضوع زواجه من جميله واخوي ماجذب خبر كله موافق وشوفها شدكول واني اولى من الغريب بولد اخوي
بسعاد... عزززه وحليمه شحيسكتها
عبد المجيب... غصبن ماعليها مثل ماقبلت تنزل على ضره تتحمل تنزل ضره عليها
بسعاد... اويلي الله يعينها
عبد المجيب... هاهيه هي لازم تتقبل
تدرين بعد من شنو خايف
بسعاد... اي
عبد المجيب... خايف لا ابوي يكله اخطب شيماء
ويكملها ب4 نسوان
بسعاد... ويمكن يكلك الك
عبد المجيب... دام هالشي مايرضيج اني مايرضيني
بسعاد... يعني انت عادي تتزوج مو
عبد المجيب... علمود ولد اخوتي اني مو عاجبني
بسعاد... كلها تتحجج هيج بالبدايه بعدين يصير الكلام غير
عبد المجيب.. ام جواهر معزتج ومحبتج بگلبي مايعلمها الا الله صدكيني بعيوني انتي اربع نسوان
بسعاد... بدلع... بس اربع نسوان
عبد المجيب... بعيوني انتي كل النسوان واغاتهم ولج والله كل ضحكه اشوفها بخدودج مرسومه اني من يمي افرح واطير اموت ولااشوف دمعه طايحه على عيونج لو من الهوى نوب مني اموت ولاانزل دمعتج على خدج
بسعاد... لا اسم الله
عبد المجيب . خلص بعد هذا الموضوع تنهي ولاتفتحي مره ثانيه
بعد مرور يومين.... ماسمعنه الا حليمه تتعارك وي عبد الودود
.... انت تريد تجيبلييييي ضره على راسي
ولاااااااا مو اي ضره مرت حمايه گرت عيننننننج ياحليمه
ردت باوعت لنعيمه... ولج انتي متحجيييييين رجلج يريد يتزوج وانتي ساااااكته عاااادييييي قااااااابله
ردت نعيمه ببرود... جان حجيت لما اخذج دجربي لـ احساسي واشربي من نفس الگلاص الي شربتيني منه
حليمه... دتعيريييينيييييي ولج احنه بيا حال وجايه تصفين حسسسساااااب
والتفتت لعبد الودود بعصبيه وتتكلم وتأشر بالسبابه
والله ثم والله اذا تزوجت لااكعدك عشاير
عبد الودود... تكعديني عشاير علمود شنوووو
جرها من زيك دشداشتها وعتها بنتره... سمعي اني ماكو مره تهددني واني اخضعلها اني الي براسي اسوي وكتلج حتزوج يعني اتزووووج مو بكيفج ميعجبج الباب توسع جمل
حليمه... والله اذا تزوجتها لااذب على روحي نفط وابليك بموتي
عبد الودود... اجه عليها ولزمها من رگبتها بقوه مثل الي يخنگها واجينه عليه نركض
عبد المجيب... كول يالله عبد الودود شبيك تخبلت
وخرررررر
ونتر ايده بقوه عنها
وهي صارت تسعل من قبضة ايده على رگبتها
عبد الودود... وخروها عني لاابتلي بيهااااااا منو هي وتجي تتحكم هذا يصير وهذاك لااااا
من قبلت تنزل ضره عادي بس تنزل عليها ضره لااااا
عبد المجيب... غيرة النسووووااااان
ياعمي مرتك وحقها عليك تغااااااار مو بكيفهااااا
عبد الودود... لاتدافع الله يخليك
هي من تزوجتني تدري بيه متزوج قبلتها على نفسها تصير زوجه ثانيه متغار هسه جايه تغار من جميله وبس حبر على ورق علمود الجهال
عبد المجيب... ميخالف بالهداوه على كيفك
عبد الودود... طبها طب ماعليك منها هي تزعل وبالتالي ترضى
حليمه جانت بيومها منهاره كلش تبجي وتحجي عليه بصياح جانت نعيمه تباوعلها برووووووود
ونظرات الشماته بعيونها واضحه بس ماتحجي اي شي
رغم نعيمه فقدت ابنها من فتره قصيره لكن بديت احس الدنيا بدت تنصفها
رغم واسيت حليمه لكن فرحت لنعيمه
فزز صوت الكلام الي جان يدور بيني وبين نفسي
كلام حليمه وهي تحاجي نعيمه وهي گلبها محروك ومنهاره
حليمه... ولج شلووون سكتي شلووووون
نعيمه... باوعتلها ببرود وطولت بنظرها عليها وبعدين جاوبت برود اكثر
تعرفين شي
هاي الدنيا متبقه دايمه لأحد غداره
دوااااره
قاعدتها بالحياة يوم لك ويوم عليك
من تصير الج تطيرج فووووووووووك
حيل حيل فوووووك بحيث تكلين اني وبس
لكن وانتي طايره فوك تكصكصلج جناحاتج
وتعرفين ليش تكصكصلج جناحاتج
لان نغريتي بلي انتي بي وصرتي تشوفين الناس صغار والبعض متشوفيهم اصلا
لهسبب تكص جنحج حتى تشوفيهم بخشم مكسور وانتي بحاجة من يكومج على حيلج
الحياة تضوكج المرررر تسقيج من نفس الكاسه الي سقيتي بيها غيرج
اني اعرفج شكلتي عليه بداية ما تزوجتي عبد الودود
كلتي ان اني الصوج بيه
اني السبب اني ماكدرت اسعد زوجي
من جان يضربني كلتي مايضربها بدون سبب
من يهجرني كلتي من اهمالها
من ماأهتم لمشاعري كلتي هي بأفعالها
حسيتي انتي ناجحه بحياتج وكدرتي تسعدي
وكدرتي تغيري
وكدرتي كلشي بنفسج تسوي
بس ماباوعتي اني من شنو عانيت
شلون عشت وياه بداية زواجنه
شلون تحملت فقر وصبر وكلام يجرح في سبيل اعيش لخاطر جهالي
صرت اطلع كتماني وصبري على ناس مالهم ذنب بكل الي دايصير
صرت انكره بسبب اذية اهلي وزوجي الي صرت اطلعها على شكل اعصار من غضب على غيرهم
صارت عندي عقد بحيث اتعمد اتصنع المشاكل في سبيل افرغ طاقه من الكتمان والخوف من اهلي ومن رجلي
تعرفين شكم مره ردت اقتل نفسي ومرتين منها جهالي يطبون فجأه لغرفتي ويوكفون بعيني
تعرفين يوميه عبد الودود يمج بينما اني بوحدي واشبع بجي يلا انام
مخدتي جانت شاهده على كل دموعي وحزني ووجعي
كدام عينه ( وأشرت عليه) جنت اتصرف بلا وعي
احيانا اتخبل ولو ماعبد المجيب وعمي يعالجوني اني هسه الله اعلم شنو حالتي
جان صرت مضحكه لامة محمد كلها.....
أحيانا لايكون بوسعنا فعل أي شي من قلة حيلتنا
لكن الله عادل وجميلة هي الحياة حينما تدور على بني البشر تترك في النفوس دروساً لاتنسى.
شكرا لزيارتكم عالم روايات سكيرهوم
