رواية بيوت الصفيح الفصل الثامن بقلم زهراء السراي
.
الجميلات تعليق بين الفقرات وتصويت دعماً للقصة
متابعة الحساب دعماً للكاتبة لطفاً 💙
أرجو من كل شخص يقرأ أن يصوت حتى تصعد
القصة وتنال أستحقاقها 💙
.
.
بارتين طبگ ياحلووووات تعويض
للغياب مال البارحة انطوني رأيكم الحلووو
وعلقو بين الفقرات والتصووووويت مهم حتى تصعد القصة
.
وأن ليس للأنسان الا ماسعى
صِبى
_______
الرزق موكل بالسعي
وهذا اللي جاي أسوي
الغرفة اللي تخصني بالشركة
مخلية بيهة غلاية كهربائية
وبراد مي وهالشي يشكل دخل
أضافي للبيت مُنى ثالث متوسط
وأغلب دروسها دورات خصوصية
ولأن الغرفة بالأساس جانت غرفة
مثل المطبخ يسوون بيها جاي وگهوة
وهالأشياء أستأذنت من الأستاذ أن
اقدم مشروبات بيها وافق بلا تفكير
أساساً قبل لا أتخربط بفترة
بعد ما اختنگت بالحمام بسبب الخلطة
اللي سويتها بقيت يومين بالبيت
وباليوم الثالث داومت جان يوم نص
دوام لأن سبت وأغلب الموظفين مجايين
الهدوء يعم المكان
مغطية وجهي طول مااشتغل من كملت
دخلت الغرفة من الباب نزعت اللثام
صار بوجهي الأستاذ گاعد يسوي
جاي بأيده
عدلت حجابي وتقدمت
-تفضل أستاذ اني أسوي
-صداااع صِبى مااريد جاي أكياس
اريد جاي مخدر وثخين يعدل راسي
-تمام تتدلل
-ليش داومتي مو گتلج أرتاحي
-الحمد لله صرت أحسن أستاذ
الباب مفتوح ورايه تحرك عبالي طلع
فتحت خمس اكياس جاي وخليت مي قليل
بالغلاية وضفتله الجاي انتظرته يغلي
واگفة أعدل بالميز وهفني الحنين لذكرياتي
الماضية شغلت فيروز بالتلفون ودندنت وياها
-بتذكر آخر مرّة شفتك سنتا
بتذكر وقتا آخر كلمة قلتا
وما عدت شفتك وهلّق شفتك
كيفك إنتَ مَلّا إنتَ
كيفك قال عم بيقولو صار عندك ولاد
أنا والله كنت مفكرتك برات البلاد
اجاني صوتة الهامس
-شوووو بدي بالبلاد الله يخلي
الأولاد
وگع الكوب من أيدي
وانسرعت واني ألتفت وأشوفه گاعد ومغمض عينه وهو
ساند راسة عالحايط
-العفوووو أستاذ
-كملي أحب فيروز واغاني فيروز
-آسفة عبالي لوحدي ماادري بيك گاعد
قبل ليرد فارت الغلاية طفيتها
وصبيتله كوب سكر قليل
-تفضل أستاذ
فتح عيونه
وخلة الكوب بين ادي يشرب
-شويه سكر زيدي
خليتلة حرك الخاشوگة يذوب السكر
اباوع للجاكيت مالتة معلگته بالتعلاگة
مطبگته بعناية وراشتلة عطر
ردت انطي الة اجا أتصال رفع التلفون
والكوب بأيده الثانية أشرلي أن شكرا عالجاي
طلع واني صبيتلي كوب شربت منه شويه
ودگ جرس الخدمة اللي بالغرفة
رفعت اللثام وتمشيت للمكاتب صاحلي
واحد من المتدربين
-بس لو سمحتي كوب نسكافيه
-حاضر
باوعتلي وحدة من البنات جانت اسمهة نسرين
وكحة ولسان ودائماً نقاشها ويا
البقية بصوت عالي واكثر من مرة تشمر كلام واتجاوزها حتى مااقطع رزقي
بعدني ستوني تخطيت الباب حجت
بصوت شبه عالي
-وشدعوة لو سمحتي بعد اكتبلها
عريضة حتى تسويلك خدمة
تراجعت للخلف وهو رد عليها
-گلتيها انتِ تسويلنة خدمة وهالشي مو
بلاش يعني جاي تقدملنا شي من صنع ايدها
ولازم نطلب بأدب لأن متشتغل عدنا
-تشغل عدنة فعلا هي ليش اسمها
موظفة خدمة
ردت اطلع بس بعد كلمتها هايه
دخلت من الباب
-العفو مااشتغل عندج شغلي هنا بالشركة
وانتِ مجرد متدربة مو موظفة ولا الج ادنى
سلطة حتى تهينيني
ضربت المكتب ووگفت
-تتسمعين علينه حيوانة
بعد هالكلمة أحس گلبي راح ينفجر
-الحيووووان اللي يفكر تفكير
متدني ومنحدر مثل تفكيرج
للعلم هاي مو اول مرة تقللين من شأني
-امشي لج اقلل من شأنها
مسويتلنا نفسج غامضة بهاللثام والملابس
القذرة شما صعدتي ولا نزلتي كلج خلگ
خدامة خريجة أبتدائية
-قليلة أدب وغير محترمة والظاهر الشهادة
الجامعية مقدمتلج بس الأسم
العلمي واللقب محامية أما الحقيقة
فأنت غيييير محترمة أنسانياً
بكل سرعتها رفعت بطل المي اللي
يمهة طشته بوجهي
والولد اللي وياها گام يصيح
-نسررررررين تجاوزتي حدودج
بهتت ماعرفت شسوي على ارتفاع صوتها
وصوت اللي وياها دخل الأستاذ
-شنوووووو اطفال شركة قانونية محترمة هيج
يرتفع صوتكم
اباوع الموظفين القليلين اللي مداومين
كلهم عالصوت صارو بالباب تخليت
بموقف محرج لا احسد عليه
جاوبت نسرين
-أستاذ صِبى قللت أدبها وتجاوزت بحقي
وهذا زميلي شاهد
باوعلي رفع حاجبه
-شصار صِبى
باوع لملابسي المبللة ووجهي اللي يقطر مي
وباوع لنسرين وزميلها
-منين تنگعت صِبى
جاوبة الولد
-نسرين شمرت المي بوجها
-انييييييي مغلطانة
التفتلي أشرلي أطلع من الباب
-تفضلي لمكانج
طلعت ووگعت كل هموم الدنيا على راسي
دخلت للغرفة نزعت اللثام نشفت وجهي
وغطيت بالبجي نص ساعة ودز علية الأستاذ
مسحت عيوني ورحت
دخلت نسرين واگفة وزميلها والأستاذ
الشاشات گبالة رجع التصوير
بهتت واني أشوف اللي صار صوت وصورة
ممنتبهة أبدا للكاميرات
-شوفي آنسة نسرين اللي نسوي الكم
أحنة خدمة نجيبكم ندربكم بشكل مجاني
عدنا حتى تعرفون شلون تاخذون حق الأنسان
الضعيف
وهنا أنت بينتي أنو ماعندج أي شي من
أخلاقيات المهنة تجاوزتي حدودج الأنسانية
ويا صِبى وهي تكفلت بأخذ حقها بكل موضوعية
وكل كلمة گالتها بحقج فهي صحيحة
وهسه تاخذين اوراقج وتتفضلين فترة تدريبج
خلصت يمنا
باوعتلي بغضب وطلعت تاركة المكان
وزميلها وياها
-شكراً أستاذ
باوع لعيوني بتمعن واضح باجية لحد متعبانة هز راسة مكمل
-ليش ترجفين وانت تدافعين عن نفسج
صفنت بوجهة ورجفت ايدي
باوعلي واشر على ايدي
-مثل هسه ليش هالرجفة أنتِ صاحبة الحق
خلي گلبج وقدمج ثابتة لتخافين وترتعدين
-آسفة عاللي صار
-هي اللي ضنت الضنون بأن قرابتها مني
راح تشفعلها فعلتها
بلعت ريگ
-العفو أستاذ هي أقربائك
-اي بنت أختي
كحيت ووگف هو يقدملي گلاص
المي اللي گدامه
-شربي
شربت شوية ورجعته عالميز
-اعتذر أستاذ ماجنت أعرف
-واذا جنتي تعرفين ومرديتي عليها نفس هذا
ردج جان نزلتي من نظري
ابتسمت ورفعت اللثام لوجهي
-شكرا أستاذ
-صِبى
-نعم أستاذ
-يمج عالميز كمامات سود بكارتونة
استخدميهن اريحلج بدل اللثام اللي مغطي عيونج
ومأذيهن
خجلت اروح
-لا شكرا أستاذ
-اخذيهن ولبسي وحدة هسة بدون
عناد يلة بابا ورانا شغل
توجهت للميز اللي علي اوراقه وملفاته
اخذت وحدة دسيتها داخل الحجاب
والتفتت اطلع
-اخذي الكارتونة كلها گلت
-حاضر شكرا أستاذ
-تتدللين
قبل لا أطلع سمعت صوته الهامس
- صارت العن وألعن
طلعت هاربة من كلامه الغير مفهوم ومن تفكيري
رجعت لمكاني بلشو يطلعون الموظفين
بسرعة رتبت المكان ونظفته
سديت باب الغرفة وطلعت قبل لا اوصل للباب
رجعت راكضة تذكرت الجاكيت
بكل سرعتي انلطخت بالأستاذ
وگعت جنطته وتطشرت الأوراق
ضرب جبينه بتعب
-ضاع ترتيب اسبوع
شبيج مستعجلة صِبى
نزلت ويا للگاع المهن
-العفوووو العفو أستاذ والله راجعة
اجيبلك الجاكيت مالتك ومنتبهت
لميناهن باوعلهن صارن هوسة
وجهة تعبان واعصاب جبينه ناطة
-ارتبهن الك
باوعلي
-يمكن اتعبج
اخذتهن من أيده ومشيت لمكتب الأستقبال
اشرلي بأن لا مشى لمكتبة فتح الباب
ودخلت ويا فتح التدفئة
وگعد مقابيلي عالكراسي
-أستاذ الهن نمط معين او أرقام
-اي كل قضية الها رقم خاص
مد ايده يرتبهن وياية سحبتهن
-أرتاح أستاذ سهلة
بديت ارتب حسب الأرقام وأجمع
كل قضية على جهة
مقابيلي اغلفة شفافة
جبت مجموعة كل قضية بملف شفاف
اكو ستك نوت عالمكتب سحبت العلبة
وكل قضية عنونت رقمها ولصقتها بالملف
ساعة ونص الوقت شويه عصرية بس بعد
وقت رفعت راسي
اجت عيني بعينه
-هذا شغل أسطوات
ابتسمت
-أحنة البنات ميالات للترتيب
-أخرتج راح اتصلج بالسايق يرجعلج
-اني أروح
-عبرية
-نعم أستاذ
-گومي لتخليني اتعصب
وگفت وطلعت گدامه
مشيت للغرفة جبت الجاگيت
-أستاذ هذا جاگيتك
-قابل طاير
-آسفة لأن أخرته
شگ العلاگة وفتحة لبسه لأن باردة
-عاشت ايدج
طلعت ويا للباب وصل وأشرلي على سيارته
-لا أستاذ مو گلت يجي السايق
-ماجاوبني السايق تفضلي أوصلج
-لا أستاذ والله .........
قاطعني وهو يفتح الباب
-اني مريض صِبى مااتحمل جدال
صعدت وتحرك بالسيارة بعد ماشغل التدفئة
دقايق صمت وهدوء التفتلي
-العطر اللي معطرة بي الجاگيت كلش هادئ
شسمه
-هاڤن أستاذ
-من أي ماركة
ابتسمت وحكيت جبيني بخجل
-مو ماركة أستاذ معطر بسيط
-اي منين مثلا من أي محل
-قصدك من أي عربانة او بسطية
-مستحيل
-والله أستاذ
-بيش بالله
-بألف ونص
-رااااااقي بشكل مستحيل
-تووووقف يم أي بسطة راح تلگا
-هادئ مثلج
صمت ساد لدقايق وهو كسر هالصمت بسؤاله
-ولو سؤال شخصي انت مخطوبة
باوعتلة وهالسؤال وگع على جرحي
فكرت بيني وبين نفسي
ليش بعدني لابسة حلقة رضا
سحبت الحلقة من أصابعي وعيني اجت بعينه
-جنت مخطوبة أستاذ بس مصار نصيب
-ليش محتفظة بالحلقة
-بحكم العادة صار خمس سنوات لابستها
لذلك صارت جزء من جلدي شكرا لأن نبهتني
باوعلي بأستغراب فتحت الجامة والسيارة ماشية
لفحتني نسمة الهوا البارد فتحت كف ايدي
للهوا ووگعت الحلقة ووگعت وياها كل
ذكرياتي الماضية ويا رضا
نسيت الجامة والهوا البارد نعش روحي
حجة بصوت هامس
-اذا تگدرين تسدين الجامة الهوا جاي يحطمني
حرارتي فولت
باوعتله يتعرق ويادوب يحجي
سديتهة واني احاجي
-أستاذ بعد مسافة يلا نوصل نزلني وروح أرتاح
والله اني اخذ سيارة
-اي مو قليل غيرة آني
-حشاك أستاذ بس مبين تعبان
-بس فتحي الجكمجة انطيني علاجي من يمج
فتحتها هواي علاج جان موجود
وكأنة فهم حيرتي
-شريط أحمر شفاف ومن وره أسود
بحثت بالعلاجات لگيته
-طلعيلي حبايتين
گالها بتعب ووگف السيارة وايدي ترتجف
بقوة
بسرعة فتحتهن مديت ايدي أله
ملحگ يلزمهن فجأة أنتفض جسمه وتشنج
گز على أسنانه وأنحنى بقوة على كتافي
عطت خوف وآني أشوفه ينتفض بسرعة
تذكرت شمرة مُنى من تتمرض او تخاف
خالتي تخلي خاولي بحلگها حتى متعض
لسانها
ماكو شي گدامي غير طرف حجابي
سحبتة وفتحت فگه بقوة مخليته بين
أسنانة قبض على أصابعي الأثنين
بقوة منتفض بشدة بجيت من قوة
الألم ولدقايق جانت مثل دهر من الزمن
هدأ وأرتخى فكة محرر أصابعي وطرف حجابي
وشخر بتعب وسالت دموع من عينه وهو يتنفس
بسرعة مرة اثنين وثلاثة الى أن هدأ
لمدة ربع ساعة هدوء اباوع لصدره يرتفع
ويهبط ويتنفس بأنتظام الطريق باقي منه
مسافة ربع ساعة واحنة بطريق فارغ مابي
بس سيارات تمر مسرعة
فتح عيونه واني ممسكة بأصابعي افتهم
بكلنكس اثنينهم يجرون دم والأزرقاق ملاهم
ملي
همس بضعف
-الحبايات صِبى
طلعتلة اثنين غير اللي وگعن
خليتهن بيده ماگدر يرفعها
سحبتهن خليتهن قريب شفافه
فتحت بطل المي اللي يمه قربته
الة شربهن وغمض لدقايق
-أستاذ انت بخير
-بس دقايق
استمر منزل راسة عالستيرن
رفع راسة بالگوة باوعلي
بتعب
-رمز تلفوني ١٩٩٠ مرتين فتحي .........
ماگدر يكمل تنفس بتعب مكمل كلامة
-فتحي وأتصلي على رقم مكتوب علي حمزة
سحبت التلفون من يمه مخلي بجانب الگير
فتحته واتصلت اجاني صوت شاب
-ها أبو قسور وينك شو تأخرت
دفعت التلفون ناحيته اشرلي افتح السبيكر ميگدر يلزم التلفون فتحته الة وقربته وهمس بصوت
يكاد ينسمع
-حمزة تعالي
-شصاااااير وينك
-على طريق المقالع بال.........
-يامقالع مااندلها
-جيب تكسي وهو يجيبك اني واگف عالطريق
-اجتك النوبة
غمض عينة بأسف ورد
-اي
-جايك
اشرلي غلقت الأتصال وهدوء وسكون
صابنة احنة الأثنين لازال ساند راسة
عالستيرن شوية ورفعلي راسه
-منين اجة الدم لأصابعج
خفيتهن تحت أكمام العباية الأسلامية
-ماكو شي استاذ
بتعب سحب أيدي فتح الكلينكس
-حاولتي تفتحين فكي مو
هزيت راسي بهدوء
تنهد بقهر ساكت
امتدت ايده ناحية ايدي
-طلعي لصقات جروح يمج
طلعتهن حرك نفسه مسنود عالكشن
اخذهن من ايدي اشرلي براسه
على ايدي جان تعبان وحتى نطق الكلمات
صعب عنده
فتح اللصقات ثبتهن على أصابعي
معتذر
-آسف
رجع سند راسه عالستيرن لمدة نص ساعة
ووگفت تكسي يمنا نزل منهة شاب باوعتله
راح فتح باب السايق وصوته مرتجف خوف
-شجابك هالمسافة بس فهمني
باوع لوجهي بسرعة عرفتة هووو
نفسه وكأن السنين رجعت بيه ليوره
ورجعتني لذيج اللحظات
رفع حاجبه وهمس بأذن الأستاذ
-علمود هاي جاي بهالمكان المنگطع
فتحت الباب بسرعة نزلت وسحبت كمامتي
رافعتها لوجهي
استدار صعد الأستاذ ليگدام
اجاني صوت الأستاذ
-صِبى صعدي يلا
-لا أستاذ روحو اشوفلي تكسي منا
-مااگدر اتناقش صِبى صعدي
فتحت الباب الخلفية صعدت
عدل حمزة المرايا وباوعلي صفح وحجة
بنتر
-ويييين بيتكم
-امشي معليك بالبنية اني ادليك
سند راسه الأستاذ عالكشن
وتحركت السيارة لحد مدخل منطقتنا
عالشارع العام باوعلي واشر بقرف باصبعه
-هنا ساكنة
ماسمعت صوت الأستاذ باوعتله جان نايم
-شكرا أستاذ اي هنا ساكنة
نزلت بسرعة هرباً من نظراته النارية
ناحيتي تحرك وشخط السيارة
دخلت البيت هدوء ماادري شعجب
كل يوم أيمان تلعلع بالباب لو تسولف
وية وحدة لو تتعارك
دخلت لغرفة خالتي نايمة
مُنى بالدرس تمر غِنى ترجعها وياها
أكيد و غِنى بشغلها
باوعت أبويه ماكو البيت هادئ
غيرت ملابسي ودخلت بالفراش اغفالي
فد نص ساعة ولو راح تصير غروب
ستوني ردت أغمض وأجة أشعار لحسابي
المزيف اللي متابعتها بي جانت واگفة
لازمة بيدهة بالونة بيضة وصوت هوسة
حواليها مافهمت شي من الفوضى عبالي عيد ميلاد
أمتدت أيد تحضنها وعرفتها من وشم
حرفي بيها بالعربي هوووو مسكت بأيده
ورفعتها للبالون وابتدأ العد التنازل
بالانجليزي
10
9
8
7
6
5
4
3
2
1
وأخيراً صدمني الواقع بجدار عنيف
جدرانة من قهر وخذلان وفهم گلبي التعبان
أن هي حامل أرتفع صوتهم
بالصياح وية فرقعة البالون باللون الأزرق
وأجاني صوته يحجي بلغة انجليزية
مدموجة بلهجة عراقية وهو يصيح
-Here comes Farqad
-أجة فررررقد
فزيت بعد كلمته
-فرررررقد حامل زوجته وبولد
وراح تسمي فرقد
جبال من نار وسلاسل من سكاكين
وخناجر حطت بگلبي وآني اتذكر
كلامه
-نسمي اول طفل فرقد
بكل مابگلبي من حزن وقهر
دخلت من حسابها لحسابه
واتصلت بي بعد ٩أشهر كاملة من جريمته
بحق گلبي وخيانته لكل وعد وعهد بينا
فتح الأتصال وهو يحجي ويا رجال
بالانجليزي واضح بشغل المكوى اللي يشتغل
بي بالليل اجاني صوته
-Hi
مرديت علي رجع كرر كلامه
-Hiiiiiiii
-مبروك
صمت رهيب أصابه بعد ماسمع صوتي
من آخر مرة واجهته بيهه بسبب خيانته لگلبي
-صِبى
-مبروك رضا ولد مو
-بس اسمعيني
-سامعتك احجيلي بالله تحقق حلمك
سكنت دولة أجنبية وحققت حلمك
بالبيت والأستقرار والعائلة اسألك بالله
بالليل تنام مرتاح وتغمض بهنا وراحة
لو مثلي كل يوم مخدتك تتبلل دموع
وحسرة على حلمك الضايع
-مايوم غبتي عن بالي والله وروح أخوج
-لتحلف بي جذب سويتها قبل وحلفت بروحه
راح ترجعلي وتجبر كسرة گلبي
بعد فقدان فرقد وبعدك بالسفر
-ردت اثبت قدم هنا تزوجتها حتى اخذ
الجنسية والله
-وحامل بمعجزة وتزوجتها عبر البلوتوث
هههههه تصدگ مرات ادخل أشوف حسابها
تجهزلك طبخات تاكلها وتصورك بدون علمك وانت نايم أگول يمكن شاف بيها
اللي ماشافه عندي الجمال الدراسة الجنسية
-بكل شي انت تتفوقين عليها بكل شي
بس ظرفي صِبى والله اتمنى تسمعيلي
اني رجال ووياي بنية بنفس المكان وجنت احتاجج
جسدياً
-لا لا لا ممنوع تبرر انت مسوي وياها
علاقة قبل الزواج هذا النظام هناك علاقات
مفتوحة وزنا
سكت وكأن كل كلامي جان صح
غصيت بحسرتي
-ماصرت گدام عينك وأنت تغازلني وتروح
تنام بحضنها تراسلني وهي بين اديك
-لتظنين آني مرتاح اتمنى ارجع هسه
واخذج بحضني لاعن كل مسافة بعد فرقتنا
-تدري لسخرية الأقدار أن الناس تلوم المسافات
عالفراق
بس لا اني واعية المسافة مو هي اللي فرقتنا
اللي صار حاجز بيني وبينك هو گلبك
-تظنين مااحبج صِبى
-مو اظن واثقة تمام الثقة بوقت الشدة
والضيق گدامك بنية بسيطة فگر بنت فگر
-لتگولين هيج
-لا هذا الواقع بنية ماتملك من مقومات الحياة
كلهة غير أنفاسها اللي انگطعت بعد غياب أخوها
وگتلك رضا لا تفجعني بغيابك مثل مافجعني فرقد
بس سويتها رغم جنت تگول أنتِ أمانة فرقد يمي
غلبتني أحاسيسي وشهگت باجية
-شلون ماحسيت بيك من أول ماخطت رجلك كندا
أنت رافقتها لزوجتك الجميلة
اسألك فرقد ليش متصورلي البيت مو جنت تصور
تگلي سكنو ويايه شباب غربة عيب اخابرج
گدامهم بس كل هذا مقهرني اللي قهرني
طلاقك الغيابي اليه حتى متتحاسب قانونياً هناك
ومع ذلك تتصل بيه من شغلك محملني الأثم والحرام
واني افتح وياك فيديو بشعري وملابس البيت واحنة مطلقين بدون علمي
شووووف لأي درجة هنت عليك
-كل أعتذارات الدنيا مراح تكفي دموعج
والله مااستاهل تسامحيني
-متستاهل انت شخصياً متستاهل دموعي
بس قهري وسهري واني ادعيلك بصلاتي
أن يوفقك وأنتظاري ألك كل هالسنين يستاهل
أعلن حدادي على مشاعري الثمينة اللي بذلتها
بغير محلها
-بعدني والله بعدني اريدج
-وزوجتك والطفل الجاي هم جزء من خطة الجنسية
والأقامة رضا أنت لگيت البديل الأفضل والأنسب
صِبى الفقيرة ماعادت تناسب طموحك
-والله أعوضج
-مادياً
-اي شي تردي
-طلب واحد وأذا باقيلي معزة بگلبك
سوي اليه
-والله اشلعلج عيوني طلبي
من الربع للملايين والله مااقصر
-شي أثمن من الفلوس
-ذهب مجوهرات شنو اي شي تردي تم
-لتكسر الباقي من گلبي وتسمي فرقد
صمت للحظات وحجة بخفوت
-بس ......
-خلي شويه من معزتك ووگفاتك وياي داخل گلبي
ولا تكسرني وتضيع حلمي بأن اسمي طفلي الاول فرقد
لاتكسر گلبي وگلب فرقد ثق بالله فرقد شاف وسمع
اللي سويته بيه اذا تحبه لتسمي فرقد
-مااسمي
-وعد
-وعد وروحه هو
-في أمان الله رضا
-صِبى ............
قبل ليكمل كلامه غلقت الأتصال وحضرته
هو وزوجته قافلة بوجه ذكرياتي كل باب ممكن
يجيب لگلبي ريح الحنين لماضي فات
رجعت للفراش مغطية وجهي باللحاف اشكيله
اللي صارلي
-شفت صديقك فرقد خان العهد
وما رحم ضعف گلبي
شفت أهله كلهم يدرون وخالة گعدت تبررله
واخواته كذلك حقهم طلعهم رضا من دائرة
الفقر والماكو اني بيش الكيلو
غطيت بنوبات حزن متتالية متناسية
اللي حوالية مسترجعة السنين الفاتت
وشصار بيهة وشلون اكتشفت اللي
سوا
:
:
:
:
:
٢٠١٦
سنة أكتشاف الوقائع
بليلة رأس السنة أجتمعنا ويا
بيت خالة أم رضا بعد مااتصل بيه
رضا وگال روحو هناك تونسو اخذتني
خالتي اني والبنات ورحنا جان رضا
مسافر لكندا من خمس أشهر وفرحان
بمكان سكنه وشغله ومرتاح وجاي يضبط
اللغة لأنه طول فترة سكنه بتركيا ياخذ كورسات
انجليزي الكل فرحان والبنات متونسات
اخذت تلفوني وطلعت أتصل بي بره
اتصلت مرة مرتين ماكو
ورة نص ساعة أتصل بيه
-ها حبيبتي
-وينك
-بالبيت
-أفتح كاميرا
-وياي ولد غربة
-منين اجو
-السكن غالي وتقاسمت وياهم
السكن حتى نصرف سويه
-محجيتلي
-صارت بعد اييييي ياحلو احجيلي
شلابس
-هههههههههههه رضا متعتقد احنه تعدينه هالمرحلة
-راح اطلع برة البيت وافتح وياكم كاميرا تمام
-تمام
-أنتظريني شويه حبيبتي
دقايق وفتح الكاميرا عينة بعيني
-طولان الشعر ياحلووووو
-شتگول اگصه لو ارجع أطوله
-كل شي عليج حلو
-بعد مااستقريت ماناوي تجي نشوفك
والله طگ گلبي
صفن عالكاميرا مسح على ملامحي
-مااگدر لازم أتجنس يلا
ذاب گلبي حزن وادعيت السعادة
-ميخالف تهون اعتبر نفسك بعطلة
ومسافر
-مااستاهل كل هاالأنتظار
گالها متأسف حك جبينه وصاحله واحد
-روحي حبيبتي الجماعة يردوني
شوية واجة صوت بنية عالي
-Hey R
the movie is on come inside
-منو هايه
-الشقة اللي بصفنه
-شو صوتها قريب
فر الكاميرا ماكو احد
-تغار ياحلو هاي طلعت من الباب صاحت ودخلت
-صارت عندي خوووفة من غمزة الله ليردها
-هههههههههههه ذاك اليوم خابرتني صاير عدهة ولد
-اي عالخير خليها تخلف بعيد عني
-يلة ياحلوووو اروح اني
سد الأتصال وراح رجعت للداخل
الكل محتفل وفاطمة اللي تزوجت بنفس منطقتهم
جانت جايه والكل فرحان
بعدهة توالت الأيام بس رضا صار يختفي ليوم
يومين يلة يتصل ومن أعاتب يگول جاي اشتغل
اكثر من شغلة
صارت اغلب اتصالاتنا بالشغل لأن بالبيت
ويا شباب وينحرج وهيج مرت سنة كاملة
لقبل ٩ أشهر أتصلت بية فاطمة صوتهة متغير
وتعبانة
-ها فطم
-حبيبتي صباوي جايتج آني
-سودة عليه شبي صوتج
بجت واعتذرت وهي تغلق الأتصال
ورة ساعة ونص اندگت الباب تركها زوجها
وتواعدو بعد ساعتين يرجعلها
گعدنة نسولف جان وجها حزين وعينهة بعيني
كل شوية واگعة دموعها
-بس اريد اعرف شبيج
هم رجعت عمتج لسوالفها وياج
-لا لا خطيه تعودت عليه وتعودت عليها
-شبي وجهج متغير لعد
-صِبى
-عيوني
-اذا رضا غلط بحقج تسامحي
-اذا غلط بسيط مايمس كرامتي اي أسامحه
تقربت مني لزمت ايديه حيل وكأنها تحظرني
لأستقبال خبر راح يبث الرعب بأوصالي ويحطمني
لأشلاء
دگ گلبي بقوة وعيني على شفافها حتى اسمع
الخبر
-رضا بي شي
هزتلي راسها وبجت
-رضا تزوج
-ههههههههههههه ادري
خفت لزمة ايدها اليه ووگفت ووگفت هي ويايه
-طبعاً متزوج ولج اني شنو قابل خراعة خضرة
گلبي جان يرتجف من الداخل واني أحاول أحول
اللي سمعته لمزحة على أمل أن تنفي فاطمة
-صِبى
وگعت عيني بعينها وانهاريت بالعياط
-متزوووووووج
هزت راسها باجية
-بس اگعدي وجهج صار اصفر فدوووة
على صوت نحيبي اجتمعت خالتي ومُنى
و غِنى اللي طلعت من الحمام راكضة
-شكووووو شبيج
-متزووووج
-منوووو فاطمة شبيييها اختي
-رضا متزوج هناك
گلتها وانفجرت ضاحكة
-شفتو هاي مجازات تعبي وانتظاري
گعدت بالگاع واخذتني الصفنة وفاطمة واخواتي
وخالتي محاوطيني
-احجي فااااااطمة شصار
-غِنى بس انطي مجال
لزمتني من ايديه
-باوعيلي والله ماردت اخليج تبقين على عمى عيونج
صوتج وانتِ تحجين ويايه وتشهگين قهر على
غيابه مافارگني
همستلها بصوت متعب اخذ منه الخذلان
مأخذ
-تعرفين من زمان
-والله صار يومين محد گلي
-يدرون
بجيت وكملت كلامي
-خالة والبنات يدرون
هزت راسها ووگعت دموعها
-من يمتى بروح فرقد احجي
-ورة دخولة لكندا بثلث أشهر
شهگت وغصيت بنسمة الهوا وكحيت
الكل التم يحاول يخليني أتنفس
احس گلبي أنفجر وألم عميق صاب صدري
على أثره غمضت عيوني مستسلمة
يارب بهاي الثواني اخذني من هالعالم الظالم
ياالهي
حسيت بنسمة هوا عبرت ورجعت انفاسي
تتلاحق بسرعة ويا شهگات وبكاء اخواتي
من الخوف فتحت عيوني عليهم
-سووووووودة بوجهي لو مگايلتلج
-احجيلي
گلتها وحضنت كف غِنى
-مااگدر گلبي والله يگطعني عليج
بس رحت لبيت أهلي وسمعت مكالمة أمي
ويا وعرفت عاركتهم وطلعت وهاي اليومين
مشتعل صدري نار بين اگلج وبين
لا
تعصبت غِنى
-والأفندي منو متزوج
-مااعرف ولا سألتهم تعاركت والبارحة خابرت
البنات ودزولي الصور
تكسرت نظرات عيني ورموشي ثگلو
بالدموع متحضرات لسيل الدموع المذروفة
على گلبي المكسور
-صور .........
فتحت فاطمة التلفون وسحبته غِنى منها
خلتة بيدي
جانت شگرة بعيون ملونة وشورت وردي قصير
وية توب أبيض مورد هو واگف وادي ملتفة حوالين خصرها
وشعرها الطويل واگع بجانب كتفها
ومبتسمين اثنينهم للكاميرا
عيني عالشاشة أباوع
ريگي نااااشف
رفعت عيوني حواليه اطلب نظرة وحدة منهم تنفي اللي جاي اشوفه
بس خالتي ونظرة التأنيب الواضحة
بعيونها ودموع اخواتي جانت تعلن عن نهاية قصتي
واخته الحزينة بعيونهة الدامعة تبررلي
واقع اللي صار
-ميستاهل اظفرج والله
اني لخاطر هاي دموعج جبت الصور
مااااريدج تنخدعين اكثر
جامدة عيوني عالشاشة
هذا هوووو
هاي عيونة الأحبها
اللي جنت امسح الغبار عنها
من يجيني بعد متنام الناس
وابوس رموشها التسهر لخاطري
وهاي ايده الترجف برد وادفيها
بين ادية حتى نبوگ من العمر لحظات
نطلع بيها خارج حدود مدينتنا وبيوتنا
التعبانة
دقايق نسولف بيها
قبل ليروح للبيت
بس كل شي اختلف
عيونة محاوطة شگار شعرها وتايهة بيها
وادية ملتفة بتملك حوالين خصرها
ونظراته ولهانة
واني
منو
شنو
ليش
شمرت التلفون بالگاع وتركتهم
وسحبت لحاف فرقد غطيت نفسي بي
وغطيت راسي غارقة بالظلام اللي يخليني
مأمنة ويصنعلي حصن من سواد الفعل اللي
سواه رضا
سحبت فاطمة اللحاف بس غِنى وقفتها
وطلبت منهم ان يطلعون
غمضت اريد أمان ماكو شي يأمني غيرك
انت أستحضرت كل مواقفنا سويه
ورجعت لطفولتي وهو حاضني جوة نفس
البطانية لأن باردة مخلين الغطة لمُنى و غِنى
واجتني أبتسامتة الدافية
-اگلك فرقد اني هم بردانة
-ندفى بالسوالف
-هي السوالف تدفي
-اي جانت سوالف امي تدفيني من ابرد
وتشبعني من أجوع
-شلون
-جنت اسألها مثلج تگلي من الگلب للگلب ينبث شعاع يدفي دمك
-ليش
-تگول من تگعد يم الانسان التحبه ويودك
حجاياته تدفيك لو جنت بعز الثلج
الروح تدفي الروح
وأستمر يحجي وبديت أدفى وغفيت وراسي على كتفه
واكتشفت أن بغيابه احتل روحي البردوهسة آني بعازته يدفي أوصالي اللي يبسهاالبرد والحزن
غفيت على ذكرياتي ويا ونمت لساعات
فززتني أيد غِنى
-گومي لبسي
-شتردين
-لبسييييييي لا اطيح حظج
وگفت وياها باوعتلي
-راح نروح لبيت أم رضا
وكأن النسيان حط على ذاكرتي بسبب الصدمة
-شعدنا
-نشوف ابنهم الشريف ليش هيج سوه
واحنة نحجي اجاني أتصاله ورن التلفون
بأسمه
تركت الجهاز يرن عدة مرات خلت غِنى عباية أسلامية
على اكتافي وطلعت بية للطرمة خالتي منتظرة
مشيت وياهم اخذو سيارة انطوت المسافة واني مو
حاسة وگفت گبال بيتهم نزلنا
فتحو الباب بعد مادگت غِنى الجرس
فتحتهة ام رضا حضنت خالتي وسلمت على
غِنى
وصلتلي تراجعت ليوره صفنت بوجهي
وكأنها عرفت اسبابي اشرتلنا ندخل وبدت
خالتي تحجي غِنى تحاول تتدخل بس اني
منعتها ولزمت ايدها حتى تسكت سكتت خالتي
وام رضا تحاول تنفي الخبر باوعتلها
-خالة آني مو مثل بناتج
مو ربيت على أيدج احجيلي
بروح أمي اذا تحبيها مثل متگولين
ليش تزوج عليه
هزت راسهة بأسف
تبرر
-علمود الجنسية
-شگد صارله
-هواي
-واني خالة ليش كسرتي گلبي وسكتي ومحجيتيلي
-هم اريد مصلحتكم من يتجنس راح يسحبج وراه
-وتظنين اني اقبل اروح وهو متزوج عليه
دخلت اختة الصغيرة اللي بعمر غِنى
-لتكبرين الموضوع صِبى هذا يسمونه
زواج سوري يعني لا داخل عليها لا شي علمود
الجنسية
باوعتلهة وابتسمت
-حتى أنت تبررين
-ممسوي خطأ
عاطت بيهة غِنى
-غلطاااااااان من ساسه لراسه
ردت عليهة ام رضا
-خالة لا تشعلين النار هو يحب أختج
گولي ياالله
وگفت واني اشيل تلفوني
تركتهم ورحت للصالة فتحت الشبكة واتصلت
بي
-ها حبيبتي شو اتصلت وماكو
-شسمها زوجتك
سكت وطال سكوته لدقايق
-بس حلوة تدري تناسب شكلك عكس صِبى البنية
العادية مو
-سمعيني
-اسمعك يلا
-زواج على ورق بس حتى اتجنس
-من يمتى
-ورة ثلث أشهر من وصولي
-وين عايشة
-ببيتها
-أحلف بالقرآن
-بس افهمج
-افهمك بس احلف
-مااگدر احلف عايشة يمي بالشقة لازم تعيش وياي لأن اكو لجان تجي تتأكد من زواجنا خاف زواج علمود الجنسية
-تمام فهمتك
-والله گلت مااحجيلج ادري تنقهرين
-لا تمام مدام فهمتني هسه الحمد لله فهمت
بس اريد شغلة وحدة تسويها هاليومين
-عيوني الج
-تطلگني
غلقت الأتصال وطلعت صار يتصل وأرفض المكالمة
وگفت بباب الهول غِنى تتجادل ويا اهله
صحت بصوت مسموع
-يلة غِنى خالة يلة گومي
وگفت امه وتقدمت ناحيتي
-تفاهمتو
-اي خالة تفاهمنا يلا امشي خالة
وگفت خالتي و غِنى تتجادل بعدها
سحبتهة من ايدها گدامهم
-ليش تقللين من قيمتي
لزمتني امه
-لا خالة مقامج محفوظ
-اي خالة والدليل جاي تدافعون عن غلط رضا
نطت اخته
-حقه وحقنا احنة هم رضا طلعنا من الفگر
ونقلنه من الموت للحياة المهم نعيش مثل البشر مهما كان الثمن
-حتى لو الثمن كسرتي وخراب حياتي
-مسوينالج شي صار سنين مسافر ويزق بيج فلوس
غصيت بالكلمة وباوعت لأمها
-خالة اني ماخذة فلوس من رضا
راحتلهة امها ضربتها كف طلعت هي راكضة
من الهول
-حشاج والله اطيح حظها بس ياخالة هو ماقصر صار
عمر ومن مات المرحوم .........
خليتها توقفت عن الكلام واني أقاطعها
-لتكملين خالة اني مو ناكرة للمعروف
وبعد اللي صار أن شاء الله انطوني وقت المهن
فلس فلس وأرجعهن وهيج نكون خالصين سد
بسد
طلعت ماشية وصوتها وهي تصيح
-مو هيج قصدي ياخالة بس قصدي هم هالشغلة
تشفعله يمج
اشرت بيدي واني ماشية ومشيت للشارع
خالتي و غِنى اعصابهن نار
واني سكون العالم كلة نزل بگلبي
رجعت للبيت ورجع يتصل والرفض كان سبيلي
الوحيد للرد
الى ثاني يوم اتصل وقررت أرد
-شنوووو هالكلام يافلوس اللي ترجعيها
-كل فلس صرفته علينة بغياب فرقد
-تنجبيييييين وتتركين هالسخافات
-مو موضوعنا هذا هسه
-اي موضوعنا الطلاق
-بالضبط
-مااطلگ
-عادي اني اشوفلي طريقة
-لج زوووووووواج مصلحة فهميني
-لا ماافهمك مستحييييل مستحيل تكون
وية بنية ببيت واحد والموضوع يعدي هيج
وصوركم سوييييييه وحضنك الها
-مجرد كڤر وتمثيل حتى يصدگون زواجنا
-ههههههههه هالأمور گولها لوحدة غبية
ماتفهم لو هسة أستغبيتني من تزوجت الأجنبية
المثقفة
-بس اصبري علية ولج والله أحبج
-لا متحبني تعودت على وجودي وهناك اكتشفت
ان اكو الأحسن والأفضل والأحلى
خنت ثقتي بيك وبعتني واني اللي بعت سنوات
عمري نذر لحلمك بالسفر
تطلگني رضا وننتهي
-ماننتهي اني وياج
يحجي وصوته عالي ومتعصب
-أساساً أحنا منتهين من زمان من لحظة
اللي فكرت تسوي اللي سويته
كل ماهنالك اني اكتشفت اللي صار
وصار لازم نفترق حتى گلبي المكسور
يلتأم ودموعي تتوقف فهمتني اذا بقيت
على ذمتك أمووووت
-حتى لوووووو تموتيييين تبقين على ذمتي
غلقت الخط ورسائله على كل البرامج ماتوقفت
يعتذر ويبرر ويتوسل
من نام الكل رحت لخالتي أحاجيها
-تعاي وجهج بهاليومين ذبل والله دنعل ابو رضا
لا ابو الفگر مالته
-سأليلي خالة مو الشركة كلها محامين سأليلي
شلون اخلي يطلگني
بقينا نحجي وفهمتها ورجعت للشباك
مگابلته واتذكر ايام ماضية جنت بيهة سعيدة
حتى لو سعادة نصفها مفقود بعد وفاة فرقد
بس أسمها سعادة
ثاني يوم خالتي داومت ورجعت العصر وجهة ينطي
ألوان اخذتني وگعدت بيه بغرفتها
-ها خالة شگالولج
-تسمعيني بس بروح أخوج تخليني وراها اني
ابرد گلبي بيهم
حسيت بريگي يبس من اللي راح أسمعة
وانطلقت خالتي تطلق لگلبي رصاصة الرحمة
بعد شوفتها لگلبي وهو يلفظ أنفاسه الأخيرة
-سألت الأستاذ المدير مال الشركة
گال اساساً ميگدر يتزوج هناك وعلى ذمته وحدة
ثانية فتأكدو يجوز مطلگها غيابي
غطيت وجهي بيدي مغمضة عيني متمنية اللي جاي أسمعه حلم واللي جاي أعيشه ضرب من الخيال
-طلگني
-ممتأكدين بس الأكيد اي
طلعت راكضة للهول تلفوني يم التلفزيون يشحن
سحبته واتصلت بي اجاني صوته
-هديتي حتى نحجي
-مطلگني رضا أساساً موووو
-شمطلگ منيلج هالحجي صِبى لتتخبلين خل نحجي
-بس گلي شلون خلوك تتزوجها واني على ذمتك
-بس اسمعيني برووووح اخوج بدون عصبية
-لا لا مااسمع اي شي غير الجووووواب
انت مطلگني
-بس عالورق
گعدت بالگاع وخالتي گعدت بصفي تسحب التلفون
اخذته منها واني اكمل فصول مسرحية الخيانة
حتى نختمهة عالأخير
-شلون يعني عالورق
-والله بس عالورق القانوني
-ياورق مااجاني شي
-عند امي
سكتت وصفنت عالتلفون
ثواني هو يصيح بأسمي
- صِبى صِبى ردي بس احاجيج افهمج على كل شي
والله
-يعني اوراق طلاگي عند امك
مطلگنييييي رضا من يمتى
-والله من تزوجتها جان لازم هيج اسوي
لأن يندگلي منع بسبب الجمع بين زوجتين ممنوع
هناك
-وتخليت عني بهالسهولة
بعتني بهالرخص
-والله ردت يهدأ الوضع وأرجعج والله
-كل اتصالاتك وشوفتك الية حرام
-بس فهمي شرعاً لا
-ماااااكو هالكلام اطلقت صيغة الطلاق لو لااااااااا
سكت يحاول يلگه كلمات تبرر اللي سوا
-بس انتظريني والله بس خمس أشهر أتجنس وأرجع
نتزوج والله
-وتعتقد بعد اللي سويته استقبلك بگلبي وبحضني
-أحبج والله صِبى بس خل نتفاهم والله حبيبة
عمري أنتِ
-شعورك العظيم اللي تكنه اليه مايعنيلي شي
مدام تصرفت عكسه
-شسووووووي فهميني شسووووي واني حلمي
الأستقرار برة وحلمي فرصة
احسن بيها مستوانا ومستوى أهلي
-مستواك أنتَ ومستوى أهلك أنتَ
-احنننننه صِبى احنه
-كاااااااافي رضا اني مطالبتك بشي
بس گلي جنت حمل عليك جنت مثقلة بطلباتي
اخذت منك اكثر مما أنطيت
-لا لا مووووو هيج تنقاس الأمور
-هيج ونص رضا مثل مادخلت هالعلاقة وياك
واني فقيرة وصفر اليدين كذلك راح أطلع منهت
صفر اليدين
-والله أرجعلج بروح أخوج لتخربين اللي بينا
-مايحقلك أستعادة الأشياء اللي
حسيت بقيمتها بعد فوات الأوان
نصيبك من صحوة الضمير المتأخرة هو
بس النظر الها وهي ترحل عنك
-تتركييييني بعد قصتنا وحبنا
-حقي وهذا أبسط شي أسوي
-بعدج شرعياً زوجتي
-لا تتخيل
سديت التلفون وهو متعصب ويصيح
يحاول يحل الموضوع
ثاني يوم بلغت خالتي وانطيتها رقمة يحجون
ويا من الشركة بلكي يخوفو
للعصر اتصل بية وبراكين غضبه جانت متفجرة
-صِبى لييييييش كبرتي الموضوع
راح تخربين كل شي علييييييه
-وبما أنك مشتري كل شي وبايعني طلگني
والا يتصلون الشركة باليو أن ويبلغوهم انك
جامع بين زوجتين ويندگلك منع من كل الدول
-صِبى ولج والله مشتريج وبايع الدنيا
-هههههههههههههههه قصدك بايعني ومشتري
الدنيا اللي قهرني سنين أنتظاري الك وانت
مخطط من البداية تخون
طلگني رضا والا والله والله أوصل زوجتك واحجي
كل شي ونشوف شيصير
-صِبى بس اهدي ليش يضيع اللي بينا بلحظة
غضب
-اللي بينا ضاع بلحظة خيانة طلگني
لفظياً حتى نكون خالصين
-صِبى
-ندائك بأسمي ماعاد يزيد نبضاتي ولا يحيي
روحي التعبانة طلگني اذا باقي عالعشرة والجورة
والأخوة ويا صاحب عمرك طلگني ومااريد منك شي
-واذا گلت لا
-باجر تجهز نفسك للمسائلة القانونية
وهيج اكون سويت اللي عليه وزايد
صمت لحضات وأطلق سهام كلامة لروحي
-صِبى أنتِ طالق
حجة الصيغة بالكامل
ضحكت بشهگة قهر واختلطت عليه المشاعر
-لهنا وأنتهت قصتنا أنت لغيري واني لنفسي
هنيئاً للي سكنت گلبك من بعد صِبى
وقبل لينطق أسمي ويرد
غلقت الجهاز وحضرته
وهيج انتهت سنين الحب والعشرة
وراهة بيومين خالتي جابت الأوراق من أهله
كل شي جان قانوني بجيت بيومها
هوووووايه تركوني لوحدي اهدأ وأحاول
ألملم جروحي بعد الفجر لبست عباتي وطلعت
گعدت عالتل العالي واني اغمض بقوة وأفتح متمنية كل شي يرجع وكل عذابات حياتي جانت حلم
فتحت عيوني هاي سيارات البلدية اجت
ذبت حمولتها وهاي اجيال جديدة من المراهقين
والأطفال والشباب التمت تفرز اللي يفيد واللي
ميفيد هاي الشمس لاحت وجوهم الحلوة وقطرات
العرگ تتساقط على جبينهم الندي
وهاي آني گاعدة بنفس مكاني كل شي جان
موجود الا فرقد ورضا
فرقد غاب عن عيني غيبة الموت
ورضا غاب بأرادته
غمضت عيني من الشمس وأرتفع صوت
رجفة گلبي بقوة
-صبااااوي خوش غراض اليوم غنيوة ترگص چوبي على هالغراض
اخذيهن وروحي
فتحت عيني ذات النداء ينادي جيرانه
حسن لأخته بس عقلي وخيالي سرحو
بية لأيامي السعيدة وتخيلت النداء الية
وگفت نكتت أيدي وملابسي من التراب
باوعت للمرة الأخيرة عالمقلع
-انتهيتو من حياتي واني أنتهيت
رجعت للبيت لگيت غِنى واگفة منتظرتني
ولأول مرة تفتحلي أيدها تحضني بقوة وصوت
شهگاتها المكتومة يعلن انهيارها
-راح فرقد لتظنين بعدة يجي واحد حنين مثله
گتلج صِبى ماكو واحد عيونه خضر يجي منة خير
ضحگت واني اشد عليهت
-حضنيني غِنى اني تعبانة
شدت ايدها حواليه للحظات
وتنفسهة العالي يوضح مدى تأثرها
رخت ايدهة وباوعتلي
-من هاللحظة ماتت ذيج العائلة بالنسبة ألنه
ورضا ماعاد ينذكر أسمه بحياتنا فاااااااهمة
جرت أذني تمازحني وسحبتني وياها للغرفة
وهيج انتهت قصة حب بدت من الطفولة للمراهقة وانتهت بالشباب
.
.
.
فزيت على أيد غِنى تصحيني من ذكرياتي الماضية وبعدها بملابس الشغل
-أگعدي صباوي دنيا ليل حبيبتي
-ها غناوي ولج اخذتني النومة
-گولي اخذتج الذكريات صحصحي وشوفي
شجبت وياية اليوم تضوگون السموذي اللي اسووووي بالكافييييه
-ياالله خل نحضر رقم الطوارئ
غمتني ومشت تصيحهم
جايبة وياها اربع گلاصات مغلقة
گعدنة خالتي وشربناهن
باوعتلهة وشمرتلها بوسة بالهوا
-شنو النكهة الشربتها
-كلهن نكهة سولتد كراميل وعسل
-والله عاشت أيدج طيب
-الگلاص بخمسة
ضربت على صدري
-ولج ليش صرفتي فلوسج حرامات
-بالعافية انجبي هذا طلب راجع وانطونيا ب١٠ آلاف
-هم هوايه
-اووووووي سوالف فگور
گالتهة وضحكت وهي گايمة
-رااااح اناملي ساعة فدوة گعديني وراي دراسة
ماالحگ
اخذت خالتي للمطبخ أدفعها بالعربانة
غسلت ورجعتها سألتني بأستهزاء
-أگلج صِبى وين مرت أبوج المصووون
-مااعرف خالة غير يم بت خالتها ماكو غير مكان تروحله
-شو ولا هدمة من هدومها بالسلة مالتها بالهول
وحتى جنطتها الجبيرة التضم بيها الشتوي ماكو
-من يمتى طالعة هي
-ماادري اني جنت نايمة يجوز طالعة وراج
-زين ابوية وين
-طلع يدور شرب تدرين اخذ الخمسين منج يكظيهن شرب يلا يرجع
طلعتها للهول گعدنا مشغلين التلفزيون
نتابع خالتي بقت تحوس مااعرف شبيهة
-خالة من الأخير گليلي شبيج
-تعاي تقربي
قربت اذني يمها وشمرت قنبلة شكوكها بحضني
-ولج هاي أيمان طلعتها مو خالية دگيت عليهة ماكو
-وانت من يمتى تتصلين بيها
-شسوي انفرضت علينة وصارت وحدة من البيت رغم بربگتها وهذا ابوج اذا رجع وما لگاها يگلبها علينه طلابة
-خالة اكو بحلگج غير هالكلام احجيلي
-ولج صايرة تتختل بالحمام وتحجي
شو خفت خاف عدها شي
-مثليش
-علمي علمج بس مامرتاحتلها
اخذت كلام خالتي كنوع من الكره لأيمان
بس اللي صار ثاني يوم بعد المغرب جان
تحول كبير بحياتنا اللي نعرفها ومنعطف
راح يلعب دور بمستقبلنا
گاعدين اني وخالتي بعد رجعتي من الدوام
وهي تلوب لأن أيمان مارجعت وخطها لازال
مغلق وأبوية كذلك مختفي
واحنة نسولف تفاجئنا بدگة الباب وصوت صياح
حسن أبن الجيران وصراخة العالي
-خالة ام فرررررررقد فتحي الباب
ركضت مُنى فتحت الباب ودخل
حسن يلهث وياهة
-خااااااااالة لحگي
-ولك شكووووو حسون
-ابووووكم خالة ميييت
صفنة بوجهه وكأن على رؤوسنا الطير
هدوء عم الهول وخالتي بلعت ريگها بصعوبة
-منووو ولك منو الميت
-أبوكم والله خالة ميت ببيت طنان
ركضت لبست عبايتي وحجابي واني اكذب
الخبر مووو معقولة يمووووت هالموتة المخزية
المشينة ببيت الدعارة وبيع الكحوووول
ركضت وخالتي تصيح ورايه
تركتهة وركضت والناس بمنطقتنا ملتمين
جماعات جماعات لاگتني جيرانة ام حسن
هي وابنهة الجبير
-يااااااخالة ابوكم ميت ومحد يدري بي
دخلت راكضة لبيت طنان
وهوسة الناس گايمة بالباب وطنان يصيح
-يااااااابة لا تبلووووني بمووووته
ركضت داخلة هالمكان القذر
والناس مجتمعة ومغطي وهو بالگاع
گعدت يمة رفعت الغطة عن وجهه جان
مطعون ازرگ وعيونه مفتوحة عطت مفزوعة
ورجعت غطيته الناس تصيح ومحد يشيله
ركضت طالعة لخالتي والبنات اللي لگيتهن بالطرمة
جنت متبلدة المشاعر وجامدة ماخسرت بس كم
كلمة
-مات صدگ
عاطت خالتي وصاحت بيه
-ولجججججج شموته
-ماادري
لبستها عباتها وطلعت بيها بالعربانة
والناس تترحم علي وصلنة والزلم مرتفع
صوتهم يتناقشون
-يابة اكرام الميت دفنة والرجال ماعنده
زلمة بالبيت كلهن حريم
صار هذا يصد وذاك يرد خالتي دخلت
شافتة وجان رد فعلها مثلي جمدت بس
عاطت من شافت منظر وجهة صاير مخيف وازرگ
تبرعو كم واحد من الجيران جابو سيارة شالو ورحنة اني
وخالتي وياهم للمستشفى وهناك عرفت وأيقنت أن
عامر اختفى من حياتنا وتلاشى
ساعات الليل مرت واحنه هناك لحد ماالدكتور
گال ان وفاتة طبيعية اثر عدة جلطات ضاربته بدماغه
مسببة نزف هو اللي مسبب ازرقاق وجهة
للفجر يلة طلعو خلو بالثلاجة
خالتي احتارت بأمرها بالدفن
سحبتني من ايدي
-تلفوني بجزداني طلعي
طلعتة الها قبل لتتصل وجهتني شسوي
-راح اتصل بالأستاذ فهمتيني
أتصل بي وانتِ احجيله اللي صار
-مااگدر خالة
-اسمعيني اني لازم ابين حزينة على
ابوج زحمة يگول زوجها مات وتخابر
-شگله
-هسة دتصلي والحجي راح يجي من وحدة
دست أتصال رن مرتين واجاني صوته
-ألووو حجية أم صِبى خير صايرلكم شي
-صباح الخير أستاذ اني صِبى
-سلامات صِبى
-أستاذ والدي توفى واحنه بالمستشفى وحدنا
-اجيكم دقايق بس گولي يامستشفى
-منريد نتعبك أستاذ بس خالتي تگول اذا يگدر
ينطيني قرض علمود الدفن لأن خالين المرحوم
بالثلاجة وماجوة ايدها مبلغ تنطي للرياجيل يرحون
للدفن
-انطيني العنووووان
انطيتة عنوان المستشفى ورجعت لخالتي
حجيتلها اللي صار
-عاشت ايدج سبعة
گعدت على حافة الرصيف واني
أحاول أستحظر ولو شي واحد زين
قدمة الية أبويه بس للأسف ماكو
بس دموع الجوع بطفولتي ودموع
الخوف بمراهقتي والحزن بشبابي
جان السبب بموت فرقد وسوا اللي
مسوا بشر بعد وفاته باع تعبه وخرب
كل ذكرى باقية منه
ساعة ونص ووگفت سيارة الأستاذ
الرياضية بباب الطب العدلي ونزل
بكل هيبتة وأناقتة بكوت أسود طويل
وملابس كاملة باللون الأسود صار مقابيلي
وگف مد أيدة مگومني
-البقاء لله صِبى عظم الله أجركم
-حياتك الباقية أستاذ
-وين الحجية
-هناك خليتها على جهة الجو برد اخاف عليها
دخلنة جان اكو گرفان تفتيش گعدتها بي
دخل وياية وانطلقت خالتي تبجي وتنوح
اخذ من خاطرها وگعد يسأل حجيناله ان
توفى بالبيت فجأة استأذن من خالتي وصرنه
اني ويا على جهة فتح الكوت مالته طلع جنطة
صغيرة
-لزمي صِبى أنتِ سبعة وراح تعرفين تتصرفين
اني جدااااا أعتذر لأن مراح اگدر اروح وياكم
للدفن تعرفين اليوم قضيتنا اللي جاي نحظرلها
من شهرين واني محامي الدفاع الأول
هنا مبلغ للدفن وبقية أمور العزاء تصرفي بي
بمعرفتج ويارب اكون ماقصرت واعتذر مرة
ثانية
-صدگ استاذ ان وگفتك هاية مراح أنساها
مقصرت كافي حضورك وانت متجمعك بينا
اي صلة قرابة سويت اللي ميسوو الأهل
-بينة صلة صِبى وصلة عميقة هم
گالهة وتحرك ماشي يم الرياجيل
بقى وياهم لحد ماخلو ابويه بالتابوت
عالسيارة سلمهم فلوس أجرة السيارة
وساعدهم برفع التابوب وتوجهلي اني وخالتي
الساعة صارت بحدود السبعة الصبح
-البقاء لله آخرالأحزان أن شاء الله بعد
اني اترخص منكم وكلش اعتذر عالتقصير
بس المرافعة تبدي بالتسعة ويادوب مسافة
الطريق بين بيتي والمحكمة
شكرته خالتي وتوجهلي بالكلام
-لا تتردين ثانية وحدة بالأتصال بيه اذا احتاجيتي
شي
-متقصر أستاذ
توجه لسيارته وتحرك واني وخالتي صعدنا
السيارة وتحركت بينة نحو مثوى أبوية الأخير
وبين اجراءات وغسل توجهنا بي للمقبرة
بعد اتفاق احد الجيران ويا الدفان عالحفر
انطيت لخالتي مبلغ الدفن وهي سلمته
للرجال وتوجهنا للبيت راجعين بتعب
وأجهاد دخلنة البيت ام حسن جيرانه
وكم وحدة ثانية باقيات يم أخواتي
الغريب ان البيت صابة صمت وهدوء
عكس البيوت اللي بيها عزة وحزن
ماعدى خالتي اللي الجيران لطمو وياها
شوية البنات قدمن جاي وانفضت الهوسة
للمغرب وانتهى كل شي
اللي أثار أستغرابنا هو وگفة طنان ببابنا
وهو يطلب يشوف خالتي
طلعت خالتي بالعربانة تحاجي واحنة وگفنة
ورة الباب
-سمعي ام فرقد اني شراب عرگ وبياع عرگ
وكل سوالف مكسرة تلگيها يمي بس اني مااجذب
ولا أبوگ
-شصاير خويه منو تاهمك أصلاً
-لا لا فهمتيني غلط محد تاهمني
بس ابوكم جان يمي يدور شرب
وانطيته شرب وگعدنا نسولف جان مستغرب
بغياب فلاح اتصل بي كم مرة
مارد آخر شي انفتح الخط واجا صوت
مرة هو سمع الصوت وهو شال روحة
ورگعها بالگاع
-سترك ربي يامرة
-مرته الثانية بت ام سليمان
لطمت خالتي على وجها
-شووووداها يم فلاح
-جايج بالحجي هو گعد يحجي وياها
ويفتر ويصيح والفهمته من كلامه هي منهزمة ويا
فلاح
شهگت خالتي ولطمت خدها
-والله هذا العرفته تعارك وياها ولعب لعب
وگاللها ولج سويت المامسوي لخاطرج
حتى ترحين تسوين طفل واخذتي الفلوس وتالي
طلعتي منهزمة ويا فلاح العار
وفلاح اخذ التلفون وكملو العركة
وغلقو التلفون دگ دگ ماكو غلقو الخط
گعد يلوب شو ربع ساعة ولزم
گلبة وراسه وطاح وهي طيحة هي
موتة
مد ايدة لجيبة طلع تلفون وشدة فلوس
-هذا تلفونة وهاي الفلوس البجيبه
مااخذت منهن ربع الله شاهد
-ماقصرت خويه
سلم وراح ودخلت خالتي عينها مني
ومن البنات وجهة مغيم قهر مو حزن
باوعتلنة مقهورة وصدمتنة بكلامها
-اني جوعانة وانتن وجوهجن صفر
سحبتلها ٥٠ ألف من الفلوس خلتهن بيد
غِنى
-هاج دزيلنا على اكل دسم خل ناكل على روح
المرحوم
گالتهة وبشكل غريب كلنة أنفجرنا ضاحكين
جانت لحظات جنونية امتزج بيها الخوف
والحيرة والندم
الخوف من عدم وجود رجال بحياتنا صح ابويه
مجان ساد حاجة بس اسمة رجال بالبيت
والندم من خالتي على حياتها الفاتت ويا
والحيرة بهروب أيمان ويه صديقه فلاح
اللي حطمله حياته بالشرب وتالي اخذ
زوجته وانهزم بيها وسرق الباقي من عمره
ومات بالحسرة والندم
دخلنة وطلبنا الأكل وتعشينا وبيومها
نمنة مااعرف بأمان أكثر يمكن
وجود أبويه جان مسبب توتر لأن كل يوم
ديان داگ الباب وكل يوم مصيبة
مجنة نعرف ان بعد وفاته
راح ندخل تحديات وصراعات
ثانية ويا هالحياة وان أبويه
قبل وفاته وجهلنة الضربة الأخيرة
حتى يختم حياته بأذى جسيم
راح يأثر على حياتنا للأبد
غِنى
_____
صوت موسيقى واغنية
رقيقة بالخلفية وصوت
مروان خوري وهو يغني
برقة
-هودي الأغاني غرام سنين
هودي دموع وسهر وحنين
هودي أيامي معك
قلبي اللي بيوجعك
انا لولا الهوا أنا مين
أدندن وياها واني أرتب الطاولات
اللي گامو منهن الزبائن
واوزع منيو المشروبات
على كل طاولة قبل لا أتحرك للثانية
صاحلي واحد من العمال
-غِنى روحي للقاعة الvip
بيهة حفلة بس بنات هسة راح تبدي
ومحد يگدر يشوف شيردون غيرج
-تمام رايحة بس ثواني
كملت بسرعة اخذت منيو حلويات ومشروبات
بيدي والنوت بوك الصغير وقلمي وتوجهت للقاعة
دخلت ومتفاجأت ولا انصدمت فطبيعي غفران
بحقارتها من عرفت بية أشتغل هنا لليوم تجي
وياها صديقتها التافهة واحياناً خطيبة شجاع
وتجي تتأمر وتطلب فعادي مو شي مهم انه أشوفها
باوعت وشفتها مبتسمة باوعت للارا خطيبة شجاع صار عندي
سابق معرفة بيهة نلقي السلام على بعض ونمشي عادي
سلمت علية ووگفت مبتسمة
-تفضلي ويانه الله عليج
-حبيبتي ياريت بس داتشوفين عدنة لود اليوم
وگفت غفران وعلى وجهة ابتسامة حقيرة
-اليوم حفلة توديع العزوبية مال لارا
اذا تحبين تتفضلين
تقدمت بست لارا
-الف الف الف مبروك ياحلوووة زواجة الدهر
يارب يلا ياجميلات طلباتكم
انكبست غفران وگعدت وبديت اخذ الطلبات
وطلعت وصلت الطلبات للشيف ودخلت للحمام
وحان وقت الأنهيار فرغم كل شي رغم القوة
والنسيان والتجاوز
لازلت أنثى يأذيني جنح الفراشة اذا مر على
جفني وجرحه
باوعت لنفسي بالمرايا اعاتبها غسلت وجهي
وطلعت بالباب أجاني اتصاله اللي يحلي يومي
ويخليني اتجاوز اصعب مشكلة جاوبتة بجملته
المفضلة
-الوووو حبي
-الووو ننة أجيك
-حبيبي حمادة تجيني أنت اني مااگدر اجي
-بابا لاااااااا نروح لا
-ميخليك موووو انطينيا اصيح علي
-تكتل
-اي طبعا أكتله جيبه وينه
اجاني صوتة عصبي
-طاح حظج وحظه اكل گلببببي لج لتطمعينه بالجية
-دجيبه شبيييييك هاي شهرين ماكو اشتاقيتله
-ولج التزااااامات موسم الشتا والسفرات والهوسة
لازم انظم امووووري الشغل فوووگ راسي غِنى
بس اوووگفي صوتج شبي
-مابي شي
-علية هالحجي احجي شكو
-ماكو شي وداعة حمادة بس تعب وضغط الشغل
-احد مضايقج
-لا والله
-مو گتلج بلاها هالشغلة وشتردين حاظر
-يعني شتعرف انت
-متقبلين شي من احد حفظتها عالغيب بس اني مو اي احد
ضحكت واني اغير الموضوع
-جيبه طيران وتعال اذا تتعب من السيارة
-يخاف من الطيران
-قصدك انت تخاف
-انجبي
-احلف متخاف
-مااخاف
-وداعتي
ضحك وهو يلعن خباثتي
-شكد كلبة اخاف يلة شتردين
-شتسوي لزوجتك اذا رادت تسافر
-ماكو سفر بطيارة كلة سفر محلي
-اوووووي فگووووور
-ولي كملي شغلج يلا وراج رجعة للبيت
غلقت التلفون اخذت طلبات الحفلة
وطلعت قفلت الحسابات مالتي وودعتهم
منتظرة الحجي ابو مسلم يرجعني للبيت
هالحجي يشتغل تكسي بشارع الجامعة ومرات
احتاج ارجع بسرعة بتكسي للأمان اخذه
وهسة بشغل المطعم جمعة وسبت لأن اتأخر لليل
هو ياخذني ويرجعني طلعتله بره سلمت علي
وصعدت بالسيارة اجتني رسالة صوتية من حمادة
يبجي علية وأيمن يحاول يسكته
ابتسمت واني اشوف الصورة الدازها
أيمن حاضن حمادة ويسكته
رجعت بذاكرتي لليوم اللي تعرفت بي
على أجمل وأحن وأحلى روح طفل
شفتهة بحياتي
.
.
.
بعد ماطلعنة من الجامعة وبعد ماأيمن اخذلي
حقي
شفت رهام اختة بالسيارة وبحضنها طفل صغير متلازمة داون
نزلت حضنتني تعاتب
-يا گاطعة من يجي الدوام متسألين
بوستهة بفرح جانت مفاجئة حلوة
باوعت للطفل شعرة سرح نازل على عيونة
ركض ناحية أيمن وحجة بلهجة وصورة متقطعة
-باباااا بابا
رفعة أيمن لحضنه وهو يبوسه تحت صدمتي
-يابعد أبووووووك وأهله
صفنت بوجهم وكأن أيمن فهم حيرتي تقرب
ومدلي الطفل اللي فتح ادي وشمر نفسة أليه
-أقدملج وليدي الحلو ولي العهد ووريث
الأملاك والعقارات
كفش شعره يمازحه
-هذا ابني حمادة
حضني الطفل مديت ايدي محاوطته
بسته بخده
-شنو هاي حمادة تعاكسني
شمر نفسه لأبو اللي مبتسم بحرج
-هذا الحلو محاجيلج عنه
-وهسة عرفته
لزمت أيده وصعدت وياهم بالسيارة
گعد بحضني كأنة يعرفني أنطلقنا نسولف
وهو يلعب بأصابعي اللي مصبغة أضافرهن بلون
بسيط
وصل لمطعم وتوقف
-خل اغديكم
-قصدك تريگنت
ردت علي رهام
-من وره هالگطمة هاي من البارحة مماكل شي
فعذراً يعني راح اطلب غدة
نزلنة وگعدنة بجلسة عربية ونزلو اصناف
الأكل عالواهس ناكل وحمادة ترك ابو وگعد بصفي
وبلهجة مكسرة
-اسمج
-أسمي غِنى
-ننة
-شوف الذووووق احلى دلع والله
شوف هذا ابوك المجعمر يسميني غنيوة
باوعلي أيمن صفح وهو يضرب العظم بالصحن
وياكل النخاع
باوعتله
-عظاااااام درجة أولى
فلس اللحم خلاه گدامي اني ورهام
-لتصيرن نازوكيات اكلن دافعين فلوووووس
-اووووي لتضايقنا احنة أناث رقيقات
غمزلي وحمادة قلدة
جعصته وبست خدوده تركنا أيمن يشرب جاي
بواجهة المطعم
رفعو الأكل غسلنا ورجعنا
وأيمن بعدة مجاي نسولف آني ورهام
وحمادة يحوس يمنا
-محاجيلج عنة صار ببالج مو
-لا والله أبد بس أستغربت تعرفين بأيمن
يمكن نصي الثاني لو احنة اخوة يمكن نكون
توأم بس اببببد محاجيلي
نزلت راسهة مبتسمة
وامتدت ايدها على خدها اللي اثر الغرز
لازال بي واضح رغم العمليات والليزر
-بيوم الأنفجار مجنت بس اني
وخطيبي وأخوتي الصغار
جان ويانه أعراف زوجة أيمن
صفنت بوجها مستغربة
-هم متدرين متزوج مو
-لا والله بس احجيلي
-بيومهة طلعنا من الأمام بعد مازرنا
ومشينا الشارع طالعين اني وامي وابن عمي اللي هو
خطيبي وأعراف جان أيمن ويانه بس
لأن حمادة صغير ويختنگ من الحر طلع أيمن للسيارة
اخذة للگراج يشغل التبريد ويگعد بي علما نكمل زيارة
اخوتي الصغار حسين وعلي ويانه
مشينة مسافة أمي گالت
-ولجن شو گلبي مقبوض خابرن أيمن
وگفنا گلنا يم محل مال عصير
أعراف اتصلت بأيمن واني تركتهم
ودخلت للحمامات غسلت وجهي من الحر
وطلعت بعدني ستوني خطيت بره الحمامات
وصوت الأنفجار المدوي والريح الناتجة
عنه شمرتني ليورة بس صاحية جسمي تضعضع
ووجهي يجري دم والناس تعيط
بية مابية مديت ايدي لجهازي من سمعتة يرن
وصياح أيمن
-رهاااااااام ويييينكم محد يجاوبني بس احجي
صارلكم شي
بصوت رايح رديت
-كلنا داخل الأنفجار تعال أيمن
بعدها تعرفين الصار أمي وخطيبي وأخوتي
ومرت أيمن جانت حامل من يومها هالطفل صار
حياة أيمن واني ملتزمة بي لأن أخواتي
كلهن متزوجات الغريب أن أيمن قفل ميقبل
يتزوج
-ماخذها عن حب
-زواج تقليدي بس خوش بنية جانت
حبابة وتحب أيمن بحيث من ولدت
حمادة ورا بأشهر حملت خاف أيمن مقهور
لأن حمادة داون
بس هو خطيه مقبل وگاللها خل يكبر وانت ترتاحين
بس أمر رب العالمين نفذ الحمد لله
هدأ صوت حمادة التفتنا غافي عالجلسة
دخل علينة أيمن
-ها الآفات قضيتن عالصينية
-عاااافيات على گلبنا عيني
-شعليج غنييييوة انت علفي واني أدفع
-وتشربني جاي هم شعبالك
طلعنة بعد مأايمن شال حمادة للسيارة
طول الطريق عينه مني حسيته متوتر نزلت
على شارعنا وصلت وشمرت نفسي للنوم بعد
جهد هاليوم النفسي
باليل التلفون صامت يم راسي
يرج فتحت خط وطلعت بره بالطرمة
-ها غنيوة
-ها أيمن
-أيمن ......مو يمناي معناها زعلانة
-هوووووايه
-على منو منهن
-على كلهن اللي صار يعني انت ماعندك ثقة بية حتى
تحجيلي
بالمقابل كل تفاصيل حياتي أنت تعرفها
-مااگدر احجي بيها والله
-حقك زوجتك وأم أبنك وحامل وشابة والله حقك
بس لو ذاكرلي الموضوع
-مو بس هاية الندم يموتني كل يوووم
وكل ليلة غِنى
سكت لدقايق وارتفع صوت جداحتة يعلن
عن أشعالة لجگارة وهاي عادته من يضوج ويتعب
-شبيك ساكت كل مرة تحجي كل شي
تذب همومك يمي ويخف حملك
-راحت غنى راحت وما ظل غير طيفها يطگ براسي كل ليلة
- أيمن الله يرحمها بس مو ذنبك هذا يومها
-والله أعرف غِنى اعرف هذا يومها
بيومها واحنة داخل الأمام اختلفنا بالرأي لأن لحيت عليهم بالطلعة جنت بوقتها ستوني فاتح فرع الشركة بالشمال ومستعجل عالرجعة للبيت حتى
اسافر للشمال وهي جانت حامل وهرموناتها مخبلتها
بجت بداخل الأمام وگالتلي
اتمنى ربي ياخذ عمري حتى تحس بقيمتي
طلعت تاركها واخذت حمادة وصيت عليهة امي
ورهام وانطيتهم فلوس يشترولها جهاز للطفل
اني انتظرتها بوقتها حتى اصالحها
بس الوقت ما انتظرني
-والله وجعت گلبي بس اني واثقة هي جانت تحبك ومتريدك تعيش عمرك بالندم
-الندم صار صاحبي ويرافقني كل ليلة
آني مو ندمان غير على عيونها اللي دمعت بقهر داخل صحن الأمام وهي مقهورة مني
ندمان لأني خليتها ورا ظهري ندمان لأني چنت أفكر بالمستقبل ونسيت الحاضر
-الحاضر عندك بس انت متشوفه
-شلون
-حمادة
-هذا عمري الراح والاجة والباقي
-اگلك أيمن
-گولي غنيوة
-لعد وصاحباتك عالفيس ابو الندم
طگها ضحكة متواصلة لحد ماگام يكح
استعاد أنفاسه ورجعلي
-أكبر سرسرية بالدنيا أنتِ مو حزين وجاي اشكيلج
-غير احجي الواقع
-ولج والله سوالف عادية ماعندي
شي جدي بس من الملل هيج اسوي
-تزوج واستقر
-مااگدر اخاف على حمادة ووضعه شفتي شلون
خاص محد يعرفلة غير رهام حتى اخواتي
المتزوجات من يجن ميعرفن يتفاهمن ويا
-هونها وتهون يمناي
-اي هيج احجي مو رافعتلي خشمج
وتگليلي ها أيمن
-فووووووگاه هو ابو الراهي
-غصباً عليج وعلى خشمج يلة تدعبلي
نعسان وتعبان والفندق لعبان نفس مو مريح
ودعته وراح ومن هاليوم انطلقت صداقتي
اني وحمادة صار يتصل بية أكثر من أيمن
ناخذ ساعات سوالف وضحك
حمادة واعي وفاهم ويتحاور وذكي
أستفسرت عن هالشيء من أيمن
گال هالدرجة من المتلازمة يسموهة الفسيفسائية
اخف نوع داون بالأعراض يگدر الشخص
المصاب بيها ينخرط بالحياة الأعتيادية
ويعيش حياة شبه طبيعية
.
.
طلعت من هالذكرى على صوت أبو مسلم
وهو يوگف براس الشارع حتى أنزل
جبتلهم سموذي يجربو ورحت غاطة بالنوم
لأن ثاني يوم احد دوام
رحت للجامعة والتقيت بشجاع داخل ممرات
القسم
صبح عليه وهو ماشي توقف يحاجيني
-شلونج غنوة
-الحمد لله أستاذ الف مبروك
گالو زواجكم هالأسبوع
-أن شاء الله جنت مأخر هالموضوع عسى وأن
نار انتقامج تبرد ونرجع
ضحكت
-أنتقامي مو شعلة نار وتتحول لرماد وتنتهي
أنتقامي بركان من حمم ونار يتجدد كل يوم
-فعلاً فعلاً وهالحمم ماحرگت أحد غيري
ابتسمت
-بعيداً عن كل شي الف مبروك احب ادز سلامي
لوالدتك فعلا احسنت الأختيار لارا انسانة هادئة
وعقلانية وصدگني راح تكون سعيد وياها
-واني واثق لأنج حللتي شخصيتها
-مباركين أن شاء الله وصل مباركتي للارا
استأذن منك ورايه طن محاضرات
تركته ومشيت وهنا أيقنت اني وصلت لنهاية
القصة
رجعت للبيت وبين دروس وروتين البيت المعتاد
صار اللي صار وصلنة خبر وفاة أبوية
وبعد أجراءات ودفن داومت والكل عرف من
لبسي للأسود أيمن يتصل كل يوم
ويتأكد خاف محتاجة شي
أيمان بالفعل أختفت وكل شي
ماخذته وياها أسبوعين بالضبط مرو
وحلت الكارثة بعد ماتوجهتلنا الضربة القاضية
من ابوية بعد موته يوم جمعة
وگاعدين نتغده مخلين الاكل لخالتي على طبلة
صغيرة حتى تاخذ راحتها جاي اخليلهة گلاص مي
يمهة سمعت صوت دگة الباب
سحبتلي حجاب وركضت طالعة ادردم بيني
وبين نفسي
-هسة الواحد ميتهنى بأكلة كل شوية
دگ ودگ
فتحت الباب طلعت بوجهي مرية
الحواجب تاتو أسود والشامة مرسومة بصف الحلگ
ومشخلعة من جوة العباية ووياها واحد
اصلع بس شواربه ينحلف بيها
-تفضلي
-بيت حجي عامر
استغفرت بگلبي وحجيت
حجي ابو البطل
-اي عيوني گولي
-اذا موجود صيحي
-طالع بشغلة ويرجع ههه شنو عيوني متعرفون
هو متوفي
-ياااااااا صخام
التفتت للرجال تحاجي
-ربك كتبنا العقد يم المختار جان تعزينة وتصخمنا
-عقد شنو عيوني
-دروحي حبيبة صيحي جبير البيت منو
من بعد المرحوم
تركتها وطلعت خالتي والبنات هم ويانة
-هلا حبيبة أؤمريني
-عيوني انتِ زوجة الحجي
-اي عيوني أمر خدمة
-حبيبة الحجي الله يرحمه قبل شهر
باعلنا البيت ولو هو شظال بي بيتيش
اقصد قطعة الأرض
-ياأرض حبيبة
-هاية الواگفين بيها
-شنووووو شنوو
-اي والله عيوني حتى اجينا وشفنا المكان ودخلنا
بس محد جان موجود بس زوجته ذيج وهو
ومختار المنطقة
جمدنا من هول الصدمة وصفنا بوجهه
جانت صِبى هي الاكثر صلابة وردت
-شنو دليلكم
-هاي اوراقنا من مكتب الدلالية اللي عالشارع العام
ومن مختار المنطقة
لطمت خالتي على وجها
-صخااااااام بعيوووونك عااااامر هجولتني اني وبناتك
-ياااا يا عيوني حرام مو ميت
-احترگ وين ماااااااراح
المرة دزت الرجال للمختار نص ساعة
وجابة والمختار صدقهم القول وگال صح
گدامي أستلم منهم ١١ مليون
عاطت خالتي وكامت تولول
راح المختار والمرة انطتنا الأوراق
-عيوني ولو الموضوع مفاجئ بس ياريت تفرغولنا
البيت بنهاية الأسبوع نريد نهده ونبني
گالت كلامها وهي تخلي بيد خالتي رقمها
وتطلب رقم خالتي
كتبتة الهم مُنى وراحو
گعدنة كل وحدة من عدنا بمكان صِبى دست
راسها بخانة فرقد حتى منشوفها تبجي
مُنى طلعت الكتب وگعدت تقرأ وهاي طريقتها
للهرب وخالتي لزمت السبحة تسبح ودموعها
متوقفت
واني اخذتني الحيرة وبقيت أحوم من مكان لمكان
صح بيت تنك وصح يادوب ثابت بالگاع
بس آوانه تحت سقفه وين نروح وشلون
نزلت دموعي بخوف من المجهول واخذتني
ايدي للتلفون باوعت لرقمه
الوحيد اللي ساندني
الوحيد اللي ممكن يفهم حيرتي
دست أتصال رن مرتين ومثل عادته
مترن الثالثة يفتح خط
-ها غنيييييوة اليوم من وكت
ونطقت كلمة من سنين فاقدتها
وجبل القهر اللي حط على كتافي خلاني
اتذكرها لاحلتي صورة فرقد وهو يلمنة تحت جناحه
من نبجي على أمي ونحتاجها
-فرقد محتاجتك
انطلقت دموعي تعلن قلة حيلتي
وكأن روحة متصلة بروحي وفهم
عليه
-جايج والله احرگ الكون لعيونج
____
ومع الأيام نمضي
