رواية فصلية الضابط الفصل السابع 7 بقلم زينب نور

............ دخلت للمطبخ خجلانه كلش من عنده هسه شيكول عليه شبيها هاي ركضت الغرفة الحجيه انتبهتلي شافت گصتي معنجره وزركه سئلتني بأهتمام شبيه گصتج معنجره منو ضاربج! 

 اتلعثمت ما اعرف شكول الها جاوبتها 

:- لا بيبي محد.ضربني اني الوحدي انضربت بالباب 

:- شمالج انحولتي شجاج دروحي خلي هليها ثلج حتىيخف لون الزراك ولورم 

ما اهتميت للموضوع طلعت خلصت شغلي بس اتختل من عنده ما اريده ايشوفني اخجل من عنده وارتبك كدامه اصير ثوله 

رحت للحجيه اريد البس من ملابسها لان ما عندي 

وهي عرفت وارث مرجع ملابسي 

   گالتلي:- البسي من دهاديشي ابين ما هناء تجيبلج ملابس من السوك اني خابرتها بس هي متلحك لان موضفه ورجلها شويه صعب موبكلشي يقبل وتطلع لسوك بكيفها عرفت هناء اتصير حماتي اخت وارث بس بعدني ما شايفتها 

نمت ذيج اليله افكر وبعدني الوم بنفسي على موقفي اليوم كلما اتذكر اغم نفسي من جديد مشت الايام صار الي 12 يوم من اجيت لهنا بس دااحس باحساس غريب وشعور جديد اتجاه وارث 

بهاي الفتره رغم التعب الي اشوفه كل يوم من غير الغلط ولاهانه من وفاء ونورس وحتى زها تريد تاكلني من تشوفني تتخبل عبالك اني اجيت هنا بأرادتي لو ماخذه ابوها عن حب رغم هذا من يجي اليل اضل افكر بي واسئل نفسي ليش صايره هيج ما اعرف ليش هيج انعجبت بي جوز لان صار زوجي ما اعرف بس سبحان من انزل هذا الاعجاب والانتما اله كلش عجبتني شخصيته وهيبته وفارض شخصيته على الكل وماكو كلمه بالبيت تمشي فوك كلمته

حتى الحجيه اسمعها اتخوف البنات بي اذا يتوكحن لو ميسمعن الكلمه 

الصراحه اني كلش تعجبني هيج شخصيه حسيت انو هو هذا الشخص الجنت راسمته بمخيلتي وفارس احلامي جنت اتمنى اتزوج واحد اكبر من عندي بالعمر بهوايه واهم شي يكون اسمر وعنده عضلات واطول من عندي 

وهاا كون عصبي نارر ما اعرف شجنت احس من اتمنى هيج رجال اتزوجه وكون فارض شخصيه يعني مثل وارث هسه وثكيل مو مراهق هذا اهم شي ولهذا السبب جنت ما اقبل اتزوج تقي ولا حبيته بيوم كـ حبيب او زوج الي ابد ما شفت بي المواصاف الاريدها هو تقي صح حلو كـ مضهر وشكله حلو مرتب وانيق يعني الكل تنعجب بي حتى من جان يجيني ويا حسام للثانويه البنات ينعجبن بي ويتوسلن بيه اصير الهن واسطه حتى يتواصلن ويا بس ما غير شي بداخلي اله هلشي واعرف بي كلش يحبني من اني طفله بالابتدائيه جنت الاحظ علي بس استغبي ما انطي مجال ابد 

و ما حسيت ابد احبه لو بيوم اصير زوجه اله عكس هسه حسيت بشي غريب احساس جديد عليه وشعور حلو لا ارادياً عيوني ادور وارث ومن اسمع بأسمه بسرعه يلفت نضري وحتى صوت سيارته اميزه واركض اشوفه من بعيد ابد ما بينت هلشي بس بداخلي 

                                            

              

                    

فزيت الصبح على صوت وفاء وهي تعيطلي وينج يلعروس :- اكعدي يله كعدت ومثل كل يوم ابدي يومي بالعجين ولخبز و بعدها اخلص شغل البيت وتنظيفه  

رحت اخذت من ملابس الحجيه دهداشه البسيه ورحت للحمام اريد اسبح منعتني وفاء كالت اطلعي للحمام الي بلكراج اسبحي هناك تكش نفسي من عندج 

ما جادلتها مالي حيل هلكانه من التعب بس اريد اسبح رحت للحمام الخارجي سبحت ورجعت مشطت شعري كوه مشطته جان مهوس من اجيت من اهلي ماامشطته زين لان لا شامبو عندي ولا بلسم اسبح بصابون لوتايت كوه كدرت امشطه و بسرعه خاف يدخل احد منهم خلصت بسرعه وكمت طلعت بوجهي للمطبخ اريد اكل فدشي الجوع گطعني اشتغل بلا ريوك بس لحكت شربت چاي وكعكه اخذت من عدها شويه جانت وفاء واكفه فوك راسي وتلح عليه يله ما يله 

فتحت الثلاجه اريد أكل فدشي منها دخلت وفاء شافتني لو تخبلت شنو اكل براحتي وطلعتني بت شوارع بحجيها 

 شفت وارث دخل للبيت وسمع صوت وفاء اجه باتجاهنه وكف بالباب صاح 

:- شكو شنو هل صوت شصاير هنا 

جان تكوله:- ماا صاير بس هاي تربية متستحي ولا تحترم بكيفها تفتح الكدوره وتصب وتاكل بدون مستحه ما تنتظركم لما تجون واني صحت عليها اعلمها 

اباوعله رافع حاجبه ومركز وياها من كملت حجيها بدون ما كلشي راح للكدوره رفع كدر المرگه وطشره بالمطبخ ورجع على التمن طشره 

 وباوعلي ورجع باوع الوفاء گال

:- وهسه فضيت المشكله الجن بعد اكو شي غير هاي حتى بعد ما اسمع اصواتجن تلعلع

ضليت مصدومه من تصرفه عافانه بصدمتنه وطلع صعد الغرفته 

 لليل بعد ما نزل ولا شفته لما قبل لا انام جنت مغطيه راسي سمعته دخل يم الحجيه كعد يسولف وياها وبناته ويا اسمع هوستهم وضحكهم 

بس مسويه نفسي نايمه اسمع 

 الحجيه تكوله علمود الملابس يشتريلي

 جاوبها:- باجر ان شاءلله امر على هناء انطيها افلوس تشتريلها ليش ما ذكرتيني يمه من قبل ناسيها 

:- هو اني شايفتك شو صاير جنك خطار حتى ما تجي للبيت واذا اجيت تختل بغرفتك لو ترعد فوك روسنه بدون معنى

اسمعه يكولها:- ها هاي اني هيج معقوله شو ما ادري بنفسي ويضحك وياها نص ساعه وحسيته كام واخذ بناته وطلعو ضليت اتكلب بفراشي اشتاقيت لهلي ولغرفتي بجيت لحد مانمت 

الثاني يوم كعدتني الحجيه كالت اليوم طلعي ملابس وارث واغسليهن وبدلاته العسكريه اكويهن وصاني الصبح قبل لا يطلع كمت طلعتهن كل بدلاته العسكريه وغسلتهن وكويتهن وملابسه مال البيت همين ونظفت غرفته وبناته كذالك اني قايمه بواجبهم ملابسهم وتنظيف غرفتهم ومستقره بغرفة الحجيه انام بغرفتها ومرتاحتلها احسها غير عنهم تعاملني بطيبه وحنيه مو مثل البقيه الي بلبيت عبالك خدامه ويردون بس حجه عليه حتى يرزلوني ويهينوني بس وارث تغيرت معاملته الي مو مثل قبل جان بس يخوزر بيه صار يحاجيني طبيعي واجت اخته الي اسمها هناء وجايبتلي ملابس كل الي احتاجه جايبتليا فرحت همزين من جنت البس من دشاديش الحجيه عبالك خراعة خضره سلمت عليها وكعدت يمها اشوفها مثل امها الحجيه هم محبوبه وارتاحيتلها كالتلي:- كومي بسرعه روحي قيسي الملابس عليج خلي اشوفهم على قياسج لو اكبر 

 وارث انطاني قياسج وجبتلج

رحت للمخزن قستهن كلهن جايات فيت عليه بس ليش كولهن لون اسود

هيه عرفتني من نضرتي 

            

              

                    

 كالتلي وارث وصاني اجييلج عريضات ولون اسود غير ويانه حزينه على ابن حماج 

هزيتلها راسي وتشكرت من عدها 

 حبيت سوالفها حلوه مرحه باوعتلي وكالت:- شو طلعتي احلى من ما وصلني وصفج

 ابتسمتلها رجعت كالتلي

:- كون اشوف وجه سهام هسه شلونه يابه تنجلط ماتتحمل تجيها شريجه وين تقيوه خلي تجي تصنفها وضحكت ضحكت على ضحكتها اني ولحجيه تسكت بيها لا يسمعنها البنات ويزعلن 

 دخلت وفاء شافتني لابسه ملابس جديده عوجت حلكها ودارت وجها سلمت على هناء دخل امير ومحمد هذوله عبالك توأم علطول سوه 

امير شاف هناء صاح بصوت فرحان 

:- لك هلااا بعمتي العزيزه صاحبة اكبر عاصمه 

 سلم عليها حاضنها ويگرص بيها وهيه خربانه من الضحك وتضرب بي تبعده عنها 

ومحمد دخل علخط وياهم يشاقون كالها

:- وين جنتي هلفتره لا تجين لا تمرين عمي اذا زعلانه كولي حتى ندزلج مشيه تراضيج ترا لجلب العضج كتلنا

 كالتله :- خايب اسكت وخليها ملتهيه بالضيم العندي تقصد زوجها ودوامي وجهالي ماالحك احك راسي كل يوم اكول اليوم اجيكم وما تصير

رجعت باوعت عليه وكالتلي:- شو كومي وياي للمطبخ خلي نسوي العشا اني وياج تره جوعانه ما ملحكه اكل ابيتي وهذوله راح يعلسون گلبي خلي نشرد منهم 

رحنه سوه دخلنه اني وياها للمطبخ سوينه عشا وتسولف عليه ونستني بسوالفها عرفت منها كاظم ابو ضرغام واخو اسمه ناظم ابو حبيبة حسام واختهم سناء من ام ثانيه مو من الحجيه بس هيه مربيتهم من همه صغار امهم متوفيه وابوهم جابر متزوج الحجيه ومخلفه منه ثائر ابو امير و وارث وهناء وتقى اختها هم مزوجه بعدني مشايفتها كالت تجي باربعين ضرغام لان بغير محافظه 

 خلصنه العشا ودخل وارث جايب ويا علاليك حلويات لجهال وانطانه منها

بس اباوع الهناء تباوعله وتغمز وتضحك وهو يضحك وياها ويتهامسون ما اعرف على شنو ويقصدون منو بس نضرات وارث الي وترني 

 شويه واجه زوج هناء اخذها وكلمن راح الغرفته واني تعودت كل يوم وارث يجيب حلويات البناته وهم يحسب احسابي وياهن يخلي يم راسي علاكه افرح بيها لان متعوده هيج يم اهلي ابويه لوحسام يجيبولي حلويات كل يوم فـ ابقى كاعده منتظرته كل ليله بس اسوي نفسي نايمه جوه الغطى هوه احسه من يفوت يم الحجيه مرات يشوفها كاعده يبقى شويه يمها يسولف ويضحك وياها ويسولفلها عن مشاكله ويومه بس اشوفه عينه عليه اشوفه من جوه الغطى 

 ومرات من يلكاها نايمه بس يفوت يوكف يم راسي ويخلي الحلويات ويبقى واكف شويه ويروح تعودت على هل شي وحبيته لما بيوم جنت اغسل بالكراج العصر الساعه 4ـ اندك الباب وماكو احد من الرياجيل موجود بلبيت رحت صحت من ورا الباب منو صوت رجال جبير

 كال اني ابو وليد افتحي الباب بابا 

جاوبته:- العفو حجي بس ماكو احد موجود من الرياجيل 

            

              

                    

 صاح عليه:- واني غريب شنو افتحي الباب بويه خلي اشوف الحجيه 

احتاريت افتحه لو لا سمعت صوت مره ويا صاحت- دفتحي الباب وفضيها عرفتها هاي سهام مرت وارث عدلت حجابي وفتحته دخل رجال جبير ويا ولد شاب بكد وارث تقريباً وسهام تمشي وراهم سلم عليه الحجي وسئلني اذا الحجيه موجوده 

جاوبته:- اي موجوده تفضل 

 فاتو من يمي وهي تمشي وراهم خزرتني وكالتلي :- احسبي احسابج رجعت اشوفج انجوم الضهر واشوفج العذاب على اصوله

 وفاتت وراهم خفت من عدها ومن حجيها ونبرة صوتها تخوف 

رحت دخلت وراهم 

اسمع الحجيه رحبت بيهم وخابرت وارث كالتله تعال اجوك خطار

و زها وزهراء فرحانات برجعت امهن وحتى وفاء اسمعها تكولها 

:-زين من رجعتي احسن ما الدايحات بنات الشارع ياخذن رجلج منج 

وتباوع عليه وتبتسم بخباثه 

درت وجهي و كلت بگلبي هاي شبيها وياي عبالك هي شريجتي وماخذه زوجها منها ودور هي جبيره ياريت لو بعمري شجاها وياي شاده احرابها واني على اساس كاتله نفسي حتى اخذ مكان سهام والله يا الله نسوان شافطه عفتهن واكفات يتهامسن عليه

 ورحت سويت الچاي وحضرت الماي الهم وبقيت بالمطبخ كاعده سمعت صوت سيارت وارث رحت شفته هو وثائر فاتو من باب الاستقبال دخلو يم ابو سهام واخوها شوبه وراحت سهام دخلت عليهم 

 دقايق وارتفع صوتهم واسمع ابو سهام يكول الوارث شنو ابو زها جنك استغنيت عن مرتك ام بناتك لا اجيت وراها لا اخذت من خاطرها ورجعتها شنو بعد متريدها صار عندك بديل غيرها

 جاوبه وارث ابرود كاله 

:- اني ما مزعلها ولا طاردها هي الوحدها طلعت من البيت زعلانه واجتكم ولمره الطلعت من البيت الوحدها ترجع الوحدها ما ارجعها زين انت سئلتها ليش زعلت وعلى شنو ؟

 اني اكولك ليش علمود المره الفصليه وشلون عقدت علبها ترا

خلي اكولكم اني من حقي اتزوج مو ثانيه لا حتى ثالثه و رابعه ما تنمعني لا سهام ولا غيرها اذا اريد وهذا الشي راجعلي 

 اما ليش ازوجت الفصليه ترا

 ما رحت وخطبتها وجبتها

 جنت مجبور هذا حكم العشائر وتدخل الشيوخ حتى يوكفون الدم ولثارات

وانت يا حجي بعد اعرف

 گالتله سهام:- وليش اله انت تزوجها مازوجتها الامير الثامر ابن ناظم لو گلبك ما انطاك خطيه ما تضيع فرصه ابد 

صاح بيها ابوها سكتها ورزلها ورجع گال الوارث

:- هاي اني رجعتها الك بيدي لان اعرفك وثاني شي هذا حقك اذا تزوج محد يمنعك وهسه تصالحو الخاطر بناتكم ولا تخلون الشيطان يفوت ابيناتكم ويخربكم 

 شربو چايهم شويه يسولفون شويه وترخصو ما قبل وارث ايطلعون قبل العشا بس ما قبلو طلعو 

 ولحجيه دخلت اتصلي وثائر دخل الغرفته 

بس وارث بقى بالاستقبال ما طلع وسهام يمه بقت شفت الباب مفتوح اخذني الفضول اشوفهم 

 رحت وكفت بالمغاسل مقابيل الباب اباوع الهم شفت سهام واكفه يمه وتتوسل بي وتبوس براسه

الجو هدوء اسمعها تكوله 

 اعذرني اني جنت بحاله عصبيه واني احبك واريدك بس آلي ما تشاركني بيك وحده ثانيه وانت شمتت بيه عدواتي ومن هاي السوالف

اشوفه هو ولا مهتم الها يتعامل وياها ابرود ولاحتى يباوعلها 

لو اني بمكانها جان انجلطت  

شخصيته ما اعرف شلون اوصفها عصبي بس بنفس الوقت يتعامل ويا الغاثه ابروود قاتل ويعاقبه بالتجاهل بحيث يجلطه

 هو طبعه ما يحجي هوايه بس اذا حجه يكوم يرعد و يسكت الكل واشوف عنده نضرات يعجز الواحد يفسرها

            

              

                    

 اباوع عليهم من بعيد ومقهوره كاعده احس بشي نوع من الغيره 

اجت عينه بعيني تعمدت ابقى اباوع علي ما اعرف ليش خازرته وهو هم خازرني وعاكد حواجبه مركز بيه عبالك نتعارك بالعيون ونضراتنه شرار اول مره اتجرء وابقى اباوعله بهيج نضره مال اعناد اختنكت ما اعرف شسوي 

 طلعت للحديقه اتنفس افتر بيها بردت وردت ادخل للمطبخ لاكاني وجه بوجه بلباب طخاني بكتفي مثل الدفعني ليوره اتعمد ايسوي هالحركه رفعت راسي باوعتله بخزره

 هو هم رجعلياها وشال ايده عصر فكي

 گالي:- مره ثانيه من تخزريني بهذني عيونج افكزهن الج اطلعهن ترا بأيدي 

 يا حيوانه منو انتي اصلاً وتباوعيلي بهل طريقه ادب سز

 ضليت خازرته ما نزلت عيوني عناد بي شال ايده ضربني بكفه ايده على عيوني بطرف اصابعه وهو يكالي

:- نزلي عيونج 

وضاغط على اسنانه يحجي بعصبيه

احسه يريد ياكلني بس ضليت معانده مانزلت عيوني واحرك بنفسي اريد ابتعد من عنده 

:- لج نزلييي عيونج لا تخزرين 

و دفعني ليوره بقوه ضربني على الحايط بضهري وعافني وطلع من البيت

 اجت سهام تخوصرت وكفت كدامي 

 كالت:- تحلمين يباوع عليج ولو بنضره واوعدج ما تشوفين من عنده غير الاهاين ولضرب يا زباله ابتعدي عنه احسلج لا اخليج تمشين وتتلفتين

 خزرتني ودخلت جوه احس اعصاب راسي مشنجه من وراهم ولعبره خانكتني بس اريد مكان ابجي بي براحتي اتذكرت اني عاجنه رحت اخذت العجين اريد اخبز بالترك وكفت اخبز وابجي ودموعي يمنعني اشوف زين عيوني ميقبلن ايسكتن كاعده احس بخنكه عجيبه وحنيت لهلي اشتاقيتلهم اريد اشوفهم مديت ايدي اطلع الخبزه بدون ما انتبه طخت ايدي بالتنور المعصم احتركت شاغت روحي همزين جانت اخر خبزايه كعدت وعاصرتها الالم يموووت فرفحت روحي بجيت من كل گلبي شويه ومسحت عيوني واخذت الخبز ودخلت 

رحت اغسلها اخلي عليها ماي بارد بالكي تبرد بس من الوجع كمت اعض بايدي الثانيه 

 دخل امير للمطبخ شافني ابجي باوع الايدي عرف ايدي محتركه

 كالي :- لج خرب شنو هاي شحركج

 جاوبته واني اناشغ :- احتركت بالتنور من خبزت

 كال :- انتظريني هسه ارجعلج ابعديها عن الماي توجعج اكثر 

شفته صعد الدرج شويه ونزل جايبلي عصاره بيده 

 كالي:- اتقربي خلي ادهنها الج 

ابتعدت من عنده ما قبلت 

كتله:- لا شكراً اني ادهنها 

بعده امير واكف يمي 

ونفتح الباب دخلت سيارة وارث جنت مقابيل الباب وشفته من باب المطبخ 

هو هم شافني ورجع باوع الامير

 نزل واجه باتجاهنه

 اني درت وجهي عنه سويت نفسي اغسل مواعين حسيته واكف ورايه 

ويسئل بأمير بدون سلام گاله 

:- شتسوي انت بالمطبخ تطبخ شنو؟ 

مبين ما عاجبه الوضع ولا طايقله ايشوفله بشر

 جاوبه أمير :- لا عمو بس شفت ندى ايدها محتركه وجبتلها هاي العصاره تدهن ايدها

اتقرب عليه انتبهلي ابجي وايدي محتركه

 كالي:- شو بله شوفيني ايدج درت وجهي علي بس ما اباوعله جر ايدي شافها 

كالي :- شحركج جاوبته ابرود عكس النار البداخلي 

كتله:- بالتنور 

جريت ايدي من عنده ورجعت درت وجهي اكمل هو عافني وصعد وامير انطاني العصاره

 كالي:- ادهنيها هسه تبرد عليج

 اخذتها من عنده ضل واكف ايباوعلي مستعطفني شويه وعافني وطلع

اني هم طلعت للحديقه احس بلعومي يوجعني من العبره البصدري تمنيت اعيط بصوت عالي افرغ البداخلي وارتاح 

الهوى جان بارد ثلج بس بقيت كاعده بالحديقه شويه وسمعت وفاء اتصيح باسمي نديوووا وينج تعالي 

سمعتها وكلت بگلبي كون ماتت نديوا وماسمعت صوتج الله ياخذج وياخذني وياج على هل عيشه 

هستوني گمت اريد افوت وطلع وارث من باب الاستقبال شفته ومشيت ضل واكف يباوعلي الحد ما دخلت تلكتني وفاء جنها عريف شلتاغ واكفتلي ماعدها غير ندى صاحت عليه:- يله بسرعه صبي العشا ونقلي للصاله 

كلتلها:- ما اكدر ايدي محترك

 كالت:- كلشي مبيج بلا هل عياره لا عبالج يعبرن عليه سوالفج يله استعجلي 

 وكفت هي تصب واني انقل الاكل شافني امير ضاج عليه وصاح على نورس واستبرق

:- تعالن ساعدن امي بالعشا وينجن 

 اجت بس استبرق ذيج ختلت ما طلعت 

 كملنه العشا اني متعوده اكل بالمطبخ بس هلمره حتى ما اشتهي من وجع ايدي دخلت الغرفة الحجيه وتمددت بمكاني مغمضه عيوني ابجي بس ما اعرف من شنو هاي الدموع المن للوجع لو من وارث لو اشتياق الاهلي 

حسيت بحركه فتحت عيوني شفت خيال فوك راسي رفعت راسي اشوف منو

شكرا لزيارتكم عالم روايات سكيرهوم