رواية قصة وجدان الفصل السابع 7 بقلم انين الليل

نجاة

حسيت اكو شي صاير وسعاد ما تقبل تكلي بيني وبين نفسي گلت اكيد ناظم بي شي

لكن الي معجبني برود سعاد وانا الطريق كله اسالها

سعاد شكو شصاير

وهيه ترد عليه // ما صاير شي نجاة هسه نوصل وتعرفين شصاير

وصلنه وانا اشوف سيارات اباب بيتهم ومن ضمنهن سيارة سعدي ودخلنه وياي الجهال واتفاجات بالي شفته

ام احسان // شنو شفتي ؟

امي جرت نفس وردت //شفت سعدي واخوانه دايرين داير مداير ناظم واكعين بي ضرب مدمى من جميع النواحي

اتفاجات من الي شفته واتقرب عليها اخوها عاصف وكللها بعتب :: هذا الي كتلتي نفسج علي ومن نسالج رجلج وين

تجاوبينه يشتغل

سعاد بعصبيه // وانا شمدريني من دريت خبرتكم

رجع على ناظم لزمه من ياخته :: هسه اتطلكها وتتنازل الها على كل شي وابنك اخذه ما نريد شكول زفره

  سعاد صارت تعيط //. ما انطي ابني لو يموت ما انطي اكتلو اهنا وادفنو وما انطي ابني شنو يربي وهو ما متربي

     عاصف خزرها ورجع گله :: وحتى ابنك تتنازل عنه وتنسى عندك ولد يمنه لو مره اصلا تنسانه خير شر افتهمت

هو بس يهز براسه وهمه ما تاركينه يضربون بي اسنانه كسروهن وجهه كله دم

چان عمي ابو السعدي گاعد وهو يدخن وساكت ويمد بالسانه يبلل ريكه وكف وكال السعدي بدون ما يباوع بوجهه وياشر عليه

  • طلك اخت هذا العار واخذ فروخك ما يشرفنه نسبهم

الكل اتفاجأ من كلامه سعدي هز راسه بالموافقه بقيت متفاجئه ما اعرف شكول ولا ادري شبي اخوي وليش

هالشكل سوو بي

انا بلا وعي اجيت احامي الناظم واكول بصوت وبعصبيه // ايي شبيكم ويا عوفو

اتقرب مني سعدي ولزمني من ايدي وكلي // صيري على صفحه ونصي صوتج

عتيت ايده بعصبيه وحچيت وانا ارجف // ما انصي صوتي شتردون تسوون سوو

هو لزمني كدامهم وصار يضرب بيه بوحشيه ويكلي // اليوم اموتج انتي وهذا العار

وصار يضرب بيه وهشام ورامي يبچون وجدان لازمتها بايدي واحامي بايدي الثانيه وهو يضرب ويسب ويحجي

ويغلط لمن ما اجه عاصف وكله :: كافي عوفها راح تموت ابين اديك

ما سمع العاصف باوعله ورجع زاد بضربه وتعنيفه الى ان عاصف دفعه عني ولزمني من ايدي دخلني للغرفه

وهو ايكلي گدامهم وهو رافع اصبعه :: تسكتين وتنجبين الي سوا اخوج محد مسوي

اساله وانا كوه اجر نفسي // شسوا اخوي فهموني

ام احسان // اي صدوك نجاة اخوج شمسوي

امي بارتباك // يمكن مدخل بنات مشبوهات ويشرب ويسكر بالبيت

ام احسان // بس هذا مو مبرر سعاد تجيب اهلها

  • عدهم هذا مبرر والي يسوي هالشكل هذا ما عنده غيره

تستمر القصة أدناه

  ام احسان // وبعدين

• بعدين سد عاصف عليه الباب وبقيت كاعده وهمه بره واسمع يتصايحون ابيناتهم والمفاجأه من اندك الباب وسمعت

صوت ابوي وعمي اسماعيل وامي واخوي ايمن

   ام احسان //. اجو من البصره !

  - اي اجو وعمي اجه من الناصريه واجت وياهم عمتي هديه وزوجها وابنها كريم

• ومن شافو اخوج شكالو

• بذيج اللحظه هذا الي فاجاني اكثر لان شفت ابوي وعمي يعتذرون منهم ويگللولهم وشتردون انتم احنه حاضرين

وما يصير خاطركم اله طيب نمشي عليكم نفصلكم وهذا مو ابنه يقصدون على ناظم هسه نطرده ونتبره منه ونكتب بي

بروه ونطرده المهم انتو ما تزعلون علينه احنه اخوانكم وما نريد نخسركم

ام احسان باستغراب // بربج ؟

هزت راسها // اي وبعدها سمعت طلعوجماعه چانو قافلين عليهم الغرفه وصار حجي ومهادد وابوي يعتذر

واسمعه ايكل الابو سعدي حجي انطيني ايدك ابوسها وهذا النذل وين ما تشوفونه دمه مهدور وانا عتبي على عاصف وسعدي

ليش ما خلو بكلبه رصاصه الهلعار

  ام احسان // وناظم ؟

- ساكت ما فك حلكه

• وشصار ؟

   اتحسرت // ناظم طلك سعاد بساعتها راح كريم جاب شيخ وطلكها واتنازل عن كل شي بدون ما يفك حلكه

وابوي طرده وكله ما الك كعده ابيتي وانا رجعت ويه اهلي على اساس سعدي يطلكني

  ام احسان // وجهالج ؟

  - اخذتهم وياي وشرطو بس يطلك اتنازل عنهم وبوكتها كلت بيني وبين نفسي لو اموت ما انطيهم جهالي

    ام احسان //. ومن رجعتي ويه اهلج شصار

    - ما اسولفلج ع الذله الي عيشني بيها ابوي وشنو راح تحجي عمتي ام حاتم عليه وشلون راح تتقول عبالك

انا الغلطانه مو ناظم

ام احسان // يعني نجاة لو كل وحده اخوها يسكر ويدخل بنات يطلكوها محد بقت ابيت رجلها

- همه هيج ناس متزمثيين

- لعد شلون رجعتي

   - بقيت شهرين عد اهلي محد اجه ولا سالو ع الجهال وبيوم ما حسيت اله سعدي اجه البيت اهلي كلنه اتفاجانه ولو

تشوفين فرحة اهلي ما عوزهم يجيبون موسيقى والاهم من هذا كله سعدي شلون اتصرف وياهم

- شلون نجاة ؟

• اتصوري ما گعد على فراش اهلي ولا سلم عليهم بقى واگف بالباب وكالهم بالحرف الواحد

اني جاي اريد ارجع بتكم حتى اسمي ما يهتز بالقياده والحزب اني رجال الي اسمي ومركزي

ومو حلوه بحقي مطلك مرتي ومحتار بجهالي

ابوي بسرعه رد // هذا هو عمي الي تشوفه احنه حاضرين

دار ابوي على اخوي حسين // بسرعه خلي اختك تجي تروح ويه رجلها

ام احسان // ورجعتي بهالطريقه

هزت راسها // مو اكلج هاي غلطة عمري رجعت للذله والتحقير زين ليش ما اتحملت كلام ابوي وهو يعرف انا

ما الي ذنب بدل ما اتحملت تصرفات سعدي الحقيره وياي

ام احسان // ومن رجعتي

- من رجعت الطريق كله ساكت ركبت وره انا وجهالي وهو يسوق الى ان وصلنه نزل يم محل جاب نساتل للجهاز

وماي وانا ولا چني موجوده بعدها وصلنه للبيت ومن دخلت حتى ما خلاني اكعد راسا حجى وياي

- - اسمعيني زين بت عبد الحميد بدون اي مقدمات تعتبرين نفسج بهذا البيت انتي اهنا مجرد خدامه ومربيه صوتج

ما اسمعه تذمر وشكوى الاي احد اخلص عليج وادفنج بالحديقه وحتى اهلج ما يطالبون بشي

تعيشين وياي بلكمتج وكدام الناس انتي ما راح لا تطلعين الهم ولا تشوفيهم اذا صادف وشافوج ف انتي مرتي

وغير هذا الشي اخذ الجهال وتحلمين حلم اتشوفيهم وطلاك ما اطلك

صار هذا تصرفه وياي وحقارته واذلاله الي بعد انتي شفتي وسمعتي

تستمر القصة أدناه

ام احسان // اي والله دادا حتى مرات اسال نفسي اكول شبيها نجاة ليش هالشكل شخصيتها ضعيفه

  - - لان كل الظروف چانت ضدي

- - يعني انتي اثرتي على نفسج مو على احد ثاني وحتى محد وكف وياج وساندج

هزت راسها // اي اختي غنيه ورا ما اتخرجت. واشتغلت بمستشفى صار التقول والكلام الفاضي عليها.

وهذا جنت اسمعه من سعدي

وحتى مرات عمتي هديه اتسولفلي تكول كرايبنا ما قابلين. تبات بره وتلزم خفاره وبعدها بمده اتزوجت واحد وياها

وهسه هي عايشه ويا اولادها وبناتها وتشوفيهم دووم طلعه وسفر وزيارات وراحه وعيشه حلوه

ونظيمه صار عدها زهير وميار ويمكن بعد تلاثه حتى ما اعرف اسماءهم ورغم حالتهم شويه ضعيفه بس شوفي

السعاده والفرح عبالك متزوجه مدير عام وتبين ازغر مني

• اي والله ما شاء الله يتمم عليهم

- لا وخلي اصدمج اتصوري بعد الي صار ويه ابوي وعمتي عمتي ام حاتم رجعت العلاقه ويه. ابوي

بس حتى ايمن ياخذ بتها بيداء

- واتزوجها ؟

• اي وعزل عن اهلي

- واهلج ولا اشوفهم يجولج

- اي مو گتلج منعهم يجون يزوروني

• شلون منعهم ؟

• عن طريق عمتي ام كريم اتصوري وره ما رجعت بتلث تشهر اجه ابوي وامي البيت عمتي وابوي خابر كله نريد نجي

نشوف بتنه هو رد علي وهو يزمخ وكله من بيت اختك وارجع عود يمته ما دل بعقلي اجيب الكم هاي الحيوانه الي بليتوني بيها

•. وابوج شنو رد

ابوي كله //. عمي مرتك وبكيفك سلم النه عليها

ام احسان //. الهلدرجه ؟

- واكثر خوله وصرت ما اروح ولا اشوف اهلي وحتى عمتي ام كريم قاطعتني وما صارت تجي يعني. بين قوسين سجني

وحتى التلفون الارضي خله بي كاشف ما يقبل احاچي اهلي بس انا بوكتها قررت بااي فرصه اتطلك وبعد ما ارجع

حتى لو ياخذ جهالي

• هاا

• اي اتذكر اجه وكلي عمج اسماعيل اتوفه وهذا عمي رجال خيير وطيب. ودووم سعدي يجي ايصنف ويكلي

عمج ودالج سلام وصاني ادير بالي عليج يعني ايكلي

حيوانه اعلفها و... (اتحسرت ) ولو تشوفين شلون يحاچيني وهو لازمني من شعري ويحركه

فمن اتوفه كلي اروح ويه عمتي ام كريم يمكن لان يم اهله ما اعرف ورحت للناصريه اخذت جهالي وياي

وطول الطريق ما حجيت ويه عمتي الي اخذت الطريق كله وهيه تبجي وتعيط على اخوها الى ان وصلنه

وبالليل دزيت على ابوي الي اجه هو وايمن وحسين وبس شفته فقدت وما اتحملت حضنته وابوس بي واشمه وحاچيته وانا ابچي

• بابا الله يخليك بعد كافي ما الي قابليه ابقى ويا الله يخليك طلكني حتى لو تريدني اعوف جهالي اعوفهم بس لا تخلوني

ويا ابوس رجلك والله انا متعذبه حالي حال الخدامه لا ليش الچذب الخدامه احسن مني

اهنا ابوي واكف ما بدر منه اي تجاوب صدمني هو واخوي ايمن كال // شنو شحچينه اول وتالي يعدل اسلوبه وياج

• بس انا ما اريده خلصوني منه

ابوي لزم ايدي من زندي حييل وكلي //. ما تردينه وتتطلكيين وراح الناس تسال ليش اتطلكت وهي عدها تلث. جهال

تستمر القصة أدناه

ايمن // اسمعي. لج تنسين هذا الكلام احنه ياالله ياالله سدينه عملت اخوج الهرفه انوب انتي

جاوبتهم بعصبيه // خلصوني مزعت روحي خلصوني لا اكتل نفسي

ايمن بنتر // طبج طووب (اهنا ابوي لزمني حييل من اجتافاتي حييل وهزني وهو يحجي. بعصبيه )

• اكتلي نفسج عنده ابيته اصلا راح يسويلج شهادة وفاة مزوره وما يكول انتحرت ويسويلج فاتحه واحنه. ما نطالبه بشي

ابوي صك اسنانه // اسمعيني زين كافي عليه سالفة ناظم الي هسه ذايه ما ادري وين

تسمعين الكلام وتحطين بحلكج نعال وتعيشين ويه الزلمه تره من تتطلكيين راح تتعذبين اكثر من عذابج هذا

وانتي تدرين بيه وشايفتني هذا نصيبج ترضيين بي مالي خلك القال والقيل

عافوني وراحو وانا بقيت ابجي حتى ما كلفو نفسهم يكلولي لا تبجيين وامي يمي تكلي // اسمعي الكلام نجاة من تتطلكيين

ايمن يلعب بيج جووله ويخليج خدامه المرته تعرفينها بت عمتج الي اتقولت اشكال عليج عاد ظلي خدامه الجهالج

واكلي لكمتج واسكتي احسن الج كدام الناس بيت ورجل وجهال بعد شتردين

رجعت وانا مخذوله مهزومه ومن يومها ساده بابي ما اطلع ولا اجي ولا اجامل ومن اتوفه. زوج عمتي ابو كريم الله يرحمه

رحت للفاتحه وهناك حتى على امي سلامي بارد لا. كعدت ولا سولفت وياها ولا حتى دزيت على ابوي وسلمت علي

وهو دز عليه گال اريد اشوفها لكن انا ما رحت ولا شفته ولا سلمت علي وعمتي حاجتني گدام امي

عمه ابوج دز عليج روحيله

جاوبتها //. عمه انا يتيمه وحيده لا عدي ابو ولا ام ولا اخوان وابوي هذا ما مبري الذمه على ظليمتي

وبعدها بفتره سمعت ب ابوي اتمرض واتوفه وانا ما شفته

ام احسان // هواي اتحملتي نجاة

• اي فوك ما تتصورين ويمكن قله اتحملن مثلي وكله الخاطر جهالي

ام احسان // بس ما معقوله هالشكل يسوي لان اخوج مدخل بنات البيته لعد ما يباوع النفسه مو مسمي بته على اسم

وحده استغفر الله (نكتت ثوبها)

  • ضايقتج خوله بسوالفي

- شضايقتيني ما اگول الا الله يساعدج

  - انوب ربا اولاده ما يحترموني ولا يشوفوني بعينهم ام الهم

ام احسان // اي صحيح بس راح اكلج شي وحتى لو تزعلين عليه بعد هو راح الدار حقه تره الي يسوي هالشكل

صدكي هذا ...

  - ليش سكتي انا اعرف شقصدج ما يحبني

بقت ساكته ام احسان امي هزت راسها // شتكولين صحيح واعرف هذا الشي ومتندمه لان خليته يستغلني ويستغل

ضعفي وحبي الجهالي الي كل شي ما حصلت منه

- لاتكولين هالشكل نجاة تره هشام خوش ولد واحسان وابو دووم يحجون ويا وينصحونه

• اعرف والله وما ناسيه فضلكم

• يافضل هذا احنه اهل وما بيناتنا هاي الرسميات وكافي نجاة انتبهي النفسج

عشتي كل عمرج تنطيين الغيرج وما انطيتي شي النفسج آن الاوان تنتبهين وتعيشين حياتج

بقت امي ساكته وخاله ام احسان غيرت الموضوع وصارت تسولف وياها بغير مواضيع ومشت حياتنا هشام

سادس ذاب نفسه ع الدراسه وهو كايم بمستلزمات البيت. المسواك والاشياء البسيطه الي نحتاجها

ورامي يروح للمدرسه وامي بالبيت ولازمه عده ومحد يسال ولا يتصل بس بيت ام احسان

تستمر القصة أدناه

وكملت امي عدتها وصار لازم تراجع على تقاعد ابوي لان صارت تصرف من الي لكوهن بالقاصه مالته

وبكل الاحوال اذا مو راتب كل شهر ما راح تمشي امورنا. واجه هشام وكال الامي لازم كلنه نحضر يم القاضي

حتى يسوولنه قسام شرعي وهناك من حضرنه مشو المعامله وقسمو راتب ابوي وبعدها القاضي كال روجو معامله

ثانيه لان ابوي اعتبرو شهيد واله مكافإه ومميزات اخرى

ورجعنه للبيت وامي كالت // هشام انت ورامي تحولون راتبكم الي

  هشام // ليش ؟

• شنو ليش غير حتى نعيش منه

رامي // قصدج ناكل ونشرب

  هزت راسها // اي وتلبسون والواجبات وهواي امور

رامي // بالنسبه الي هذني الافلاس ما يكفني لفات

  • هااا

• اي

  • وانت هشام ؟

- ماما عندي التزام وبانزين للسياره ودورات

- يعني راح تعيشون بحصتي من راتب ابوكم

هشام // يعني ما يصير كلساع اگلج انطيني رايد فلان شي

• هذا هو بس لحد يجي ويكلي رايد ملابس اريد شغلات لان الي احصله من. الراتب يادوب ايكفي

الكل سكت وراها بيومين اجه هشام وحجى ويه امي // سالت محامي وكلي تكدرون تسحبون من راتب وجدان وعلوش

امي هزت راسها //شلون يعني

يعني عادي يصير تاخذين نسبة طعام وملابس

الله كريم

هشام // وسالته للمحامي وكال لازم تروجين معامله وابدى استعداده بس مقابل فلوس

امي // اعرف خو ما يشتغل ابلاش

• يعني نروحله انا وياج

• لا انا امشي بالمعامله ذوله المحامين يطولون بالسالفه انا ما عندي شي انا. اراجع

هشام // زين لعد بس بالاول خلي نساله ع الاجراءات

- تمام اساله والله كريم

امي كملت المعامله وحصلت على مكافأه وهنا استغربت من رامي وهشام الي طالبوها بتقسيم المكافأه

وصار راتب ابوي بينها وبين هشام ورامي وانا وعلووش وياها باعتبارنا قاصرين اما الي بالقاصرين بااسمي

وبااسم علاوي فهذني من المكافأه الي انطوها الابوي وبيوم احنه گاعدين وامي چانت تراجع ما اعرف على شنو

لمن ما اجت وگالت

اليوم رحت على مود قطعة ارض ولازم اروح للتسجيل العقاري وهناك عرفت شي

هشام // شنو عرفتي

امي وهي تتنفس بسرعه // هذا البيت مو بيتنا

  هشام وكف على حيله وحجى بعصبيه // شنو شنو مو بيتنا

  امي هزت راسها // اي مثل ما سمعتو هذا البيت مسجل باسم عاصف

هشام // انتي شتحچيين

- اي البيت بالعقاري بااسم عاصف

- ماما انتي متاكده

- انا شمدريني الطابو بااسم عاصف

- انتي ما عندج نسخه من الطابو

- ولا منتبهه الاوراق ابوك

وراح هشام هو وامي وصار يدور بمكتب ابوي وفعلا ما لكى ورقه تثبت البيت بااسمه

باوع الامي وكلها //. يجوز ابوي سجله بااسم عاصف حتى يضمن الدوله تنطي بيت قطعة ارض

امي رفعت اچتافاتها وكالت ///يجوز

  هشام // هسه شنو نروح نستفسر من عاصف لو شنو

امي// شتستفسر منه هو اول وتالي بجي ونفهم منه

هشام // شنو يعني ؟

  امي// يعني اجدادك مو ناس تاكل حرام يجي ونعرف منه قصة البيت شنو وليش ابوك كاتبه باسمه بعدين الي عرفته

انو بيبيتك متنازله عن حقها براتب ابوك النه

  هشام // اي هذا الشي اعرف بي بس خلي نروح ونستفسر منهم احسن

امي // وليش نفتح على نفسنا باب

هشام // باب شنو خاف تشاركنه بشي من حقوق الشهيد

امي //. شبيك هشام بيبيتك اتنازلت عن كل شي بس اگول خلي همه يجون ويفتحون الموضوع

هشام // ماما انتي تدرين هذا البيت شكد يسوى تدرين لو لا

امي // شتقصد هشام

  - يعني مو بعيده عاصف يطمع بي

- انت شبيك جاي اكلك البيت باسم عاصف وانا شفت الطابو بعيني

- اي مي خالف نروح ونستفسر

  امي // الجمعه انطيهم خبر وگللهم جايينكم

رامي // انا بالنسبه الي ما اروح

  امي // خوش ابقى بالبيت ودير بالك على اخوك واختك

  رامي // لا ما عليه بيهم اني متواعد ويه اصدقائي اطلع وياهم عوفيهم وخاله ام احسان تدير بالها عليهم

امي هزت راسها // لا ماما زحمه يجوز يردون يطلعون يجوز يجيهم احد

هشام // خلص ناخذهم ويانه

رامي // شنو ترحون بالسياره لو تاجرون

هشام // طبعا بالسياره ليش تسال

شنو هيه بس سيارتك

شتقصد

  رامي // اني هم اريد اركب بيها واسوقها لاتنسى هيه سيارة بابا واحنه كلياتنا النه حق بيها

هشام //. واني شنو قابل اريد ابيعها ما تشوفني جاي اكضي كل مشاوير البيت

  رامي // اي تاخذها تتفيك بيها كدام البنات

هشام اتقرب من رامي وهو يخزره // شقصدك

رامي // قصدي اني هم اريد اسوقها للسياره

اتقربت امي لان عرفت راح يتعاركون وهي ماده اديها بيناتهم // رامي بس تطلع اجازه اشتريلك سياره

  رامي // اني اعرف اسوق

  امي // بس ما عندك اجازه ماكو داعي تتعاركون

  رامي // منا الى ان اطلع اجازه حضرة ابنج مكسرها للسياره

  امي // انت انجح من السادس وطلع اجازه وذاك الوكت انا اشتريلك سياره

جاوبها باستهزاء // انتي تشتريلي سياره والله وكت

امي // شنو قصدك

   رامي هز راسه // ما قصدي شي بس اكول لو سع... اقصد ابويه موجود ما تتجرئيين هالشكل تحجيين

هشام دفعه // لك احترم نفسك

  رامي بنفس نبرته مالت الاستهزاء // منو هذا اليحجي ليش قبل ما چنت اتحاميلها لو اكيد رايد شي منها

امي // كافي اگلكم كافي السياره وكل شي موجود الكم اربعتكم خلي نشوف شنوو داعية البيت وبعدين احچو وتهاددو

اسمع هشام ناخذ وجد وعلي ويانه احنه ما نطول نرجع بيومنا خابرهم گللهم الجمعه نجييكم

اي هسه اخابر اهنا اجه الهشام اتصال

الو

هلو

اي جاي

دقايق

ياالله بااي

اخذ السويج رامي گله // هاي وين لازم موعد ما يتقبل التاجيل

هشام // معليك

  رامي // اوكف وصلني وياك

  هشام // وين وين عندي شغل

تستمر القصة أدناه

رامي // اكيد ما اعطلك عن صفقة القرن نزلني يم الكوفي وانت رووح للحو... اقصد للشغل

امي //. هشام مو تتاخر وانت رامي ساعه وارجع

طلع هشام ورامي وامي بقت صافنه بعدها اتقربت من صورة بابا صارت تباعله اتهيا الي نظرتها اله بكره وهي تكله

• هاا سعدي وين انت البيت هذا الي دووم تعايرني بي وتگلي انتي مجرد خدامه طلع مو بيتك وانا حتى من اريد افرض

شخصيتي على اولادك ما يحترموني لان انت علمتهم

ذليتني وتعبتني حتى وانت ميت تعبتني وما اعرف شسوي وشلون اتصرف (اتنفست وهزت راسها ) استغفر الله الله يرحمك

ثاني يوم كان خميس داومت ورجعت الظهر متعودين نتغدا بتلاثه على ما نلتم كلنه بين ما يكمل الغدا امي

تنطيني انا وعلووش اي شي ناكله كيك لفه فواكه وهاي طبعها دووم

اجه رامي وبوجهه الغرفته وبعده اجه هشام وگعدنا نتغدا امي سالته

البارحه حييل اتاخرت

عندي شغل

شغل شنو ؟

رامي / / مو دا يگلج شغل بعد على شنو هاي الملحه

  هشام خزر رامي وامي وگفت ودارت على رامي ولزمت اذانه وهيه تكله وهي صاكه على اسنانها

هاي اخر مره هالشكل تنتر عليه افتهمت

رامي باستهزاء // اااخ هدي من يمته

هشام // كافي بس

امي // لا مو بس لازم كل واحد بهذا البيت يعرف حدوده ولاتنسوون انا امكم

مبين عليهم ما قبلو بكلامها هيه سالت هشام // خابرت بيت جدك

هشام //. اهوو نسييت هسه اخابرهم

- اي بلغهم راح نجيهم باچر

راح هشام وانا دخلت الغرفتي ويه علووش وامي بالمطبخ نمت وگعدت المغرب صليت وامي مسويه العشا

نزل هشام كل الامي خابرت بيت جدي ما حصلت عمي عاصف خابرت عمي مهدي گلي عاصف بالگاع

وماكو تغطيه هو راح يبلغه

امي // انت وين هسه طالع

شويه يم اصدقائي

عود لاتتاخر لان ورانه سفر

  هشام // ماما انتي ليش ما تبقيين واني اروح استفسر منهم

  امي هزت راسها // لا نروح كلنه ونشوف احسن

   هشام // بكيفج بس مو نتاخر

امي //. لا شعدنا كلمتين ورد غطاهم على كولة المصري

وبيوم الجمعه تريگنا وطلعنه الساعه بالتسعه ورحنه البيت جدي وهاي ثاني مره اروح

اما علي فااول مره يروح الهم ورامي ما قبل يجي ويانه وصلنه تقريبا الساعه بلثنتين ونص

لان بيت جدي ساكنين بكاعهم الي تكون داخل يعني حسب كلامهم مو بالولايه مشت هواي السياره واحنه نشوف الزرع

بكل مكان والنخل والسياره تمشي وهشام ايكل الامي //شوفي هاي بحيرة اسماك الهم

وصار اياشر عليها وانوب گال // شوفي هاي حقول يربون بيها عجول

اباوع اشوف عبالك مخازن وهشام اياشر ويگول // وهاي حقول دواجن

  ما اوصف الكم السياره شكد مشت بطريق ما مبلط الى ان شفت بيوت بعيده مسيجه بسياج نخل البيت الي نزلنه يمه فخم كلش

وگدامه سيارتين اخر موديل وحده منهن دبل قماره بيك اب والثانيه من هاي الحديثات واباوع اكو ديوان كبير براني

  واكو بيت ثاني نفس بناء البيت الي نزلنه يمه بس يمكن ازغر ومناك اكو بيوت ما اعرف المن

تستمر القصة أدناه

  نزلنه وگفنه لمن ما طلع عمي الي اجانه من الديوان البراني الكبير وسلم على هشام وحضنه وامي بقت واكفه

سلمت وكللها

:: هلا ام هشام فوتي فوتي للديوان ماكو احد غريب امي موجوده اهنا هلا بيكم زارتنا البركه

هو لزم ايد هشام ودخله وامي دخلت شفنا بيبي گاعده امي كالت السلام عليكم ودنكت على بيبي وباستها وباست ايدها

وتكلها // اشلونج عمه

بيبي ردت ابرود // طاب لونج

اتعجبت من رد بيبي امي قربتني وكالت // وجدان سلمي على حبوبتج

اتقربت منها گتلها = اشلونج بيبي

هيه بدون اي ردة فعل ردت ابرود //. هله هله

امي اشرتلي اخذ ايدها وابوسها بس هيه رفعت ايدها وكالت //لا حبوبه واصله

هشام گللها // اشلونج جده

هله بيك الله يسلمك

كعد وعمي عاصف گله :: الله بالخير وهشام رد // الله بالخير

اشلونك اتداوم مو

هشام // اي عمي اداوم

:: شد حيلك وان شاالله تجيب معدل وترفع راسنا

ان شاالله

::رامي شعجب ما اجه وياكم

عنده دراسه

باوعلي وابتسم ::وانتي عمو بيا صف

ثاني

عاد شلونج

هزيت راسي بدون ما اجاوب

امي باوعت البيبي //. خلي اكوم اسلم ع البنات

بيبي بدون ما تباوع // مو هنا

امي باستغراب // هاا

عاصف :: من امس راحن الاهلهن ما عدنا علم تجون مهدي توه خابرني وهل اجيت

بيبي // اي حتى انا يم سعده واجه وجابني

عمي عاصف قدم ماي :: ام هشام البيت بيتج اذا تردين تدخلين انتي وبنيتج ترتاحين

امي هزت راسها // لا ورانه رجعه عامر البيت واهله

بيبي // شعجب شذكركم بينه

• عمه دووم ع البال بس مسؤولية البيت والاولاد

بيبي بنبرة استهزاء //. عاد اليسمعج يگول عدها عشره

عرفت بيبي تكره امي وتكرهنا من خلال طريقة كلامها

عاصف :: هلا بيكم باي وكت

( امي. باوعت العمي عاصف ) الله يسلمك جاي اراجع بالمعامله وبالطابو عرفت البيت الي احنه كاعدين بي بااسمك

بيبي هزت ايدها //. انا اكول انتي اول تالي تجيين ثاري على مود البيت

عاصف :: يمه

هشام //. عمو جايين نعرف ليش البيت باسمك مو باسم ابويه

  عاصف دخن جگاره وجاوب بكل برود :: اي عمي لان البيت بيتي

هشام باستغراب // شلون ؟

  هز راسه :: القطعه مالت ابوي وانا بنيتها وجدك سجلها باسمي وابوك طلب يكعد بالبيت لان يعرف انا ما اعوف شغلي

بيبي // هسه انتي جايه مناك لهنا حتى تعرفين البيت المن شني رجلج ما كايلج

امي هزت راسها عمي كال :: انا من اجيتكم ذيج المره لان ردت البيت وهو طلب مني مهله وتالي (اتحسر ) اتوفى

  امي // ما عدي علم بهذا الشي كل ظني البيت اله

بيبي // لا مو اله البيت العاصف

هشام // واحنه كل شي ما النه

بيبي //. منين

  هشام // من ورث جدي ليش ابوي ما اله بورث ابو

  بيبي // ابوك اخذ اكثر من ذوله كلهم ولو عدل چان كالك اخذت هوااي وهواي كلش

  هشام // بس بيبي كل شي ما عنده

بيبي // بعد هذا الشي احنه ما ندري بي ابوك لا يجينه ولا نشوفه (باوعت الامي ) انشد امك

امي // والله انا كل علم ما عندي حالي من حاال اولادي كلت عده تقاعد وبيت نعيش بي على ما يكبرون ويشتغلون

تستمر القصة أدناه

هشام سأل عمي // انت تدري البيت شكد يسوى

  عاصف :: شنو جان بنيتك تبيعه

هشام هز راسه // اي عمي ابيعه وناخذ بيت زغير والباقي اشتغل بي اني ورامي

  عمو عاصف :: چا هم زين البيت مو باسم ابوك

  هشام // ليش ؟

  عاصف :: جان جهولت امك واختك واخوك

هشام // شنو عمي هلكد تشوفني زعطوط ومو كد المسؤوليه

عمي نهض على ركبه ورد بعصبيه :: واكبر زعطوط ياغبي البيت ستر الامك واختك الفلوس بلحظه يضيعن ينباكن تخسرهن بمشروعك بس البيت هو الي يسترك وما يطلع خسارتك وجوعك وضيمك

بيبي بعصبيه //. خلي وحد من ابو مشى بكيفه وهذوله هم يمشوون بكيفهم شني عبالك ينكضون بزرة سعدي

  عاصف :: يمه على كيفج

بيبي بنتر // لا مو على كيفي شني ولك جاي اتطالب بورث جدك جا ما نشدت ابوك ليش ما اجه وطالب

وخلي اكلك جدك كبل ما يموت سوا كل حلاله بيع وشرا واي شي باسمه ما خلا ( باوعت الامي )

وانتي بدال ما جايبته وجايه تدورين ورث چان دورتيللج بيت اتكعدين بي وتلمين افروخج

امي //. حجيه اجيت استفسر على شغلة البيت ما جايه اريد ورث وصدكي هشام فاجأني من سال على املاك جده

بيبي عوجت حلگها وعمي عاصف كال :: ام 

 هشام تكعدين بالبيت منا لمن ما انتي تشيلين منه ولا ابن مره يجي ويگلج

نريد البيت

  امي بخجل // كثر الله خيرك الله يطول عمرك همه راح ينطونه قطعه وراح نبنيها ان شاالله

بيبي //. بيش تبنينها مو تكولين ما خله شي

امي هزت راسها // اي والله عمه ما خله اي شي بس شكم فلس صرفناهن على ما طلع راتبه واذا على البناء

اسحب سلفه من المصرف على راتبه

بيبي //. لدالي اهلج اخوج الچبير يبنيها وتكعدين انتي وفروخج بيها

عاصف :: يممه

بيبي //. انا شكلت غير افهمها

  امي // هذا هو عمه افتهمت

بيبي // خوش جا هم ياالله تردون دربكم بعيد

اتفاجانه لان بيبي طردتنا بس باادب عاصف :: لا وين يرحون تباتون

هشام //. لا عمي هم ياالله نروح

:: زين ابقو اتغدو

  بيبي // منين يتغدون محد بالبيت شني نسيت

  :: لا ما نسيت هسه اوصي من المطعم

بيبي // ياا على ما يوصل صاير ليل

امي وكفت //. ياالله يمه هشام نروح هم ياالله نوصل

عاصف :: جاي وياكم

هشام // لا عمي نندل نرجع

  :: ادري بس اغديكم بالمطعم

  هشام بابتسامه حزينه // شلقصه نوكف بااي مطعم وناكل ياالله فيمان الله

امي دنكت على بيبي //. عمه مع السلامه وسلمي ع البنات

بيبي بنفس برودها // الله يسلمج

طلعنا وعمي عاصف ويانه من ردنا نركب گال :: ام هشام اعيدها واكررها البيت بيتكم منا الى ان تملون منه وتشيلون

امي جاوبت بحزن // مشكور

  ركبنه والخذلان بوجه هشام وامي وعمي عاصف كال :: تانوني هسه جاي

دخل للبيت وهشام بقى ما ركب السياره لمن ما اجه وانطى الهشام فلوس گله :: هذا مصرف الك والاخوك

وانا انطاني خمسه وعشرين وانطى العلوش هم خمسه وعشرين وبعدها شال الامي وكلها هاج ام هشام مصرف للبيت

امي ردت ايده بدون ما تلمسها // لا خويه عدنا الحمد لله

  :: ادري بس اخذيهن

   • مشكور خويه ورحم الله والديك الله ساترنه

  :: ام هشام لا تاخذين بكلام امي مره چبيره ومقهوره فلا تزعلين منها

   امي // لا على شنو ازعل منها ما مسويتلي شي بيتكم وحقكم

  :: اذا ما زعلانه اخذي المصرف انا عم الولد ومسؤول عنهم

  امي اخذت الفلوس باوع الهشام

  :: وانت عمي هشام صدكني لو ابوك اله يمنه ربع دينار ما ناكلها علي بس هو اخذ حقه مقدما وكله موجود

بيع وشرا مو ورث

هشام //. اعرف عمي انت ما تاكل حق احد

:: ما اوصيك تدير بالك على امك واخوانك واختك انت رجال واريدك رفعة راس

تسالمو وهشام ساق السياره والكل ساكت الى ان وصلنه للشارع العام امي گلتله // انتبه سيارات سريعه

صار يحچي بعصبيه // عساني بالموت شنو الي حصلته ابقائي (باوع الامي ) خو رجلج ما شاء الله حتى البيت

طلع مو اله همبله ع الفاضي لافلوس ولابيت خلصهن ع الگ.... وهسه شكم يووم ويكلونه اطلعو

لا وعجوز النار تكول ما اله شي من الورث

امي بهدوء // هشام احنه اجينه نستفسر على شغلة البيت مو ع الورث

هشام // ما شفتي الگاع شكبرها لو القصر الكاعد بي لو القصر الثاني مال مهدي لو البيوت المرينه بيهن كلهن الهم

بحيرات اللاسماك وحقول العجول والدواجن ما شفتي بيوت الفلاليح العدهم شكد لو سيارات عاصف اثنينهن اله اخر موديل

  امي // ماما بتعبهم محد منطيهم الله يرزقهم

هشام هز راسه // لا فلوس حجي غازي هيه الخلتهم هالشكل ورجلج مات وكل شي ما اله زين اذا ماخذ الورث ليكدام

وينه شسوى بي

باوع الامي وجر نفس وكال // انتي ما تدرين البيت الي احنه كاعدين بي شكد يسوى ما تدرين

الفصل الثامن من هنا