رواية بنات الملا الفصل التاسع بقلم رغد الموالي
كبرنا مع الحياة ونقوى بدروسها كما تقوى وتشتد مع عودنا....
بنات الملا......
#رغد_الموالي...
صفنت حليمه لكلام نعيمه وهي تحجي
بعد ما كملت كلامهانعيمه
حليمه على نفس وضعها الي كان مصدومه بعدهالكلام ودموعها جاريه على خدها كالت
.. أني عمري متوقعت راح انحط بهيج موقف وتجين انتي تحجين وياي هالحجي
اني صح نزلت عليج ضره بس من بعد ما كالولي عبد الودود مطلك مرته
اهلي ماصدكو ينطوني وقبلت
اني ابد ماجانت نيتي أأذيج
نعيمه.. بس فعلج شنو؟ هاااااا فعلج شنوووو
ولو اني ليش اعتب عليج ليش احملج خطئه هو
هو الي هملني
وهو الي جرحني
خلاني منكسره وعيني مكسوره بين الناس مثيره للشفقه احملج خطئه ليش
بس اذا على الكاسه فأنتي ضكتي من نفس الكاسه الي اني شربت منها
هي هيج الحياة يوم لك ويوم عليك
مسحت حليمه دموعها وتكلمت بحركه بس اني مراح اقبل اكون مثلج اني طالعه
وباوعت لعبد الودود وتكلمت.. ودام انت اختاريتها بالعافيه عليك اخذها وربي جهال اخوووك وجهالك خل يربيهم الغريب
اخذت جهالها وطلعت
خليناها براحتها مرت الايام وعبد الودود عقد على جميله وجابها للبيت
لما سمعت حليمه تخبلت ونجن جنونها اجت للبيت عليهم صيحت وغلطت وضربتها لجميله
حليمه... ياماتستحين ياماتخافين الله
رجلج مات بحسرته مغدور وانتي تلفيلج رجال غيره
جميله... سدي حلكج اني عاجبني وين اروح بكوم جهال منو يعيشهم منو يصرف عليهم منين اجيبلهم
منو يفتحلنه بيته ويكللنه تعالو
حليمه... ومالكيتي الا رجلي
جميله... والله عاد سأليها لنفسج بالاول جوابها يمج اتصور
حليمه ماشوفها الا هجمت على جميله وضربتها حاولت ااخلصها ماكدرت على صراخ النسوان بالبيت اجو نسوان المنطقه يخلصونه بهذه الاثناء طلع عمي شعبان من الغرفه
بالفتره الاخيره عمي شعبان تعب اكثر وصار يمشي متكأ على عصاته محدب الظهر متعوب حيل
لما شافهم ماكدر يحجي شي يأشر بيده ويريد يحجي بس صوته راح مخنوك
مخلي ايده على رگبته ويريد بس يطلع الصوت لكن ماكو ماشفناه الا وكع من طوله مغمي عليه
صرخت ورحت اركض عليه وهم عافو المشكله وراحو عليه يكعدون بي وعبالهم مات نوب شتغلت صراخ النسوان وي الجيران
نقلناه للمستشفى ودخلو للانعاش بهذه الاثناء اجو الولد عليه
عبد المجيب... ها شبي ابويه ليش وكع
بسعاد... بأرتباك... ها أ أ أ مادري مشفناه الا وكع
عبد الودود.. شكلكم الدكتور
بسعاد... ضربته جلطه خفيفه
عبد المجيب... شنوووووو ابويه نجلط
والجلطه من شنو تجي
احجيلي شصاير
بقيت متوتره متردده بين اكله بين لا
بعدين كلت اكله مصيره حيعرف
بسعاد... بصراحه حليمه جتي للبيت منها كلمه من جميله كلمه تلاكو وحده ضربت الثانيه طلع عمي وشافهم ماشفناه الا وكع
عبد الودود... هاي الضاهر مالكت احد يخليلها حددد اني رايح واعرف شلون اوقفها عند حدها
داستوقفه واشرلي عبد المجيب بسبابة ايده خلاها على شفته وهمس شششششش
خل يروح على نسوانه ويحل المشكله قبل جية ابويه
بقينه بالمستشفى وطولنه هناك وبالي بقه يم جهالي
.. فدوه وجهالي
... نتر جهالج شكو عليهم هاي عمهم راح
سكتت وبقه هو متوتر يروح ويجي ويتأفف بإيده السبحه مخلي ايده وره ضهره ويسبح ويمسح على وجهه ويستغفر الله
مرت ساعات بعدها سمحلنه الدكتور نشوفه جانت حالته الصحيه تعبانه وايد وحده من ايديناته ميكدر يحركها فكه نعوج وكلامه صار ماواضح زين
باوع عبد المجيب لحالة عمي شعبان كال مستحيل نبقه بعد بهذا البيت من باجر اروح ادور على بيت واخذكم ونطلع
كتبلنه الدكتور خروج وطلعنه من المستشفى رجعنه للبيت جانو نسوان عبد الودود كل وحده بغرفتها وهو كاعد بالطرمه وعاقد حاجبه بغضب
الجهال يلعبون كباله لما شافنه فز
هلا يابه هلا بالغالي
فتنه للغرفه وخلينه عمي يتمدد على سريره
عبد المجيب مباشرة طلع من البيت واني رحت اسوي لعمي شعبان شوربه
يومين مرت اجه عبد المجيب كال..
بسعاد لكيت بيت للايجار وهنا قريب مو بعيد اسبوع ويفرغ البيت من الكاعدين بي ونروح نكعد وحدنه وابويه ويانه
بسعاد... اي يالله هذا خوش خبر
عبد المجيب... صفن وباوعلي سألني بتردد
هو انتي مستعده تدارين ابويه ياام جواهر
بسعاد... صدك جذب هذا الغالي
عبد المجيب... وي دره مو حمل حيكون عليج
بسعاد... النه اجرها وثوابها
عبد المجيب... قبلني من راسي وتكلم بشكر.. اشكرج والله اعرفج بنت اصول وماتطلع منج العيبه
بسعاد... تدلل ياابو جواهر انت وعمي شعبان
عبد المجيب... اريد كون من نروح هناك بيتنا نبدي حياة جديده
بسعاد... ان شاء الله
اسبوع مر وخلال هالاسبوع هذا جانو نسوان عبد الودود دوم عركات بيناتهم
على الشغل صارت مشكله
يجي عبد الودود يريد غده او عشاء يتعاركون وحده تذب على الثانيه مرتين طفرت روحه وعاف البيت وطلع بسبب هالمشاكل
وبيوم الي ماكو مشاكل بينهم تلكين الجهال بينهم يتعاركون وكل وحده تدافع عن طفلها وتكبر
صار تحدي وكل وحده منهم تريد تبين ان هي صح
ان هي واطفالها وحياتها صح
جنت اراقب مشاكلهم واتفرج من بعيد صار كل همي شلون اشيل بيت واخلص من هالهوسه هذه
بديت احضر اغراضنه وطلعت كم مره للسوك اشتري كم حاجه للبيت
ولما اجينه بيوم الي دانشيل عبد الودود كله لعبد المجيب...
خويه هذا البيت مو بيتي وحدي انه واخوتي وانت اثثت وجبت غراض تاخذ حالك من حالي
جان البيت بي اربع كرويتات اخذنه ثنين
وتلفزيونات ثنين اخذنه واحد
المطبخ ماجان عدنه بي غراض متكرره هي كلها طباخ واحد وسنك وكاونتر حديد جان من هذا الي يكون ملون بلونين تتوسطه جامه يسموها معرض حتى جانت النسوان قبل تخلي مواعينها الحلوه بيها ترتبها بشكل جاذب للنظر
اخذنه غرفة النوم وغرفة عمي وزوليتين وكم شغله بعد من البيت وطلعنه
رحنه للبيت الجديد جنت فرحانه بي كلش حسيته بيت الاحلام ياربي واخيرا خلصت واخيرا صار عندي بيت وحدي
جان البيت بناءه مرتب وحلو
يتكون من اربع غرف ثنين فوك وثنين جوه
مطبخ وصاله واستقبال حياطينه بياضها ناصع ارضية البيت كانت كونكريت ناعم مائل للون الازرق
كتايب الشبابيك كانت مزغرفه بشكل بسيط هادىء للنظر على يسار الطرمه الخارجيه للبيت كانت حديقه متوسطه الحجم لاكبيره ولاصغيره مزروعه بأشجار البرتقال وتتوسط الحديقه شجره كبيره من التين كانت تغطي على ارضية الحديقه وتحجبها من اشعة الشمس كانت الحديقه نظيفه كلش لدرجة اشعة الشمس الي متداخله من خلال اوراق اشجار التين مرسومه بالارض وكأنها لوحة فنيه
زقزقة العصافير ونسمة الهوى الطيبه لمن اشتميتها وغمضت عيوني وي صوت العصافير ازاحت كل حزن وكل كرب مني
وكأنه البيت يكلي من اليوم لازم تعيشين حياتج
قاطع تأمولاتي صوت عبد المجيب وهو يصيحلي
.. ام جواهر انتي هنا
.. باوعتله وتبسمت... اي البيت حلو كلش
.. ان شاء الله يكون عتبة خير علينه ياام جواهر
انه اروح اجهز للمطبخ اشتري طباخ وكاونتر ترحين وياي لو اني اجيب
... لا روح انت اني مااكدر البنات يبقون وحدهم وخطيه
... بين ماراح عبد المجيب بديت ارتب بالبيت
جانت الاخشاب مخليها بالغرفه بس باقي ارتب الملابس بيها
خليت الملابس وفرشت حصيره ودوشك وكعدو البنات عليه
ساعتين مرت واجه عبد المجيب صاح من يم الباب سويلنه طريق
... فتت جوه ربع ساعه وصاح تعالي ياام جواهر
اجيت وباوعت لجمالية المطبخ ندهشت وفرحت من كل گلبي
جان كاونتر نفس الكاونتر الي جان بيت عمي جانت كلها نفس الموديل تقريبا
وطباخ عشتار ابو اربع عيون
وسنك مسنود على بواري ونخليله شرشف حلو يحجب الفراغ الي جوه السنك وينطي جماليه للمكان
ثلاجه كانت كبيره
كلشي حسيته حلو ومميز حسيت المكان فرحان بيه اكثر من ما اني فرحانه بي
مر كم يوم نظمنه بيتنه اكثر وروتين البيت كذلك
بديت الاحظ خلال هذه ال كم يوم الي مرت الكل ارتاحت
صارو البنات يلعبون وحدهم بدون مااحد يجي ويخربلهم لعبهم او يكسر العابهم
صارو يطاردون ويلعبون ويضحكون وحدهم الا دره ياعين امها عليها جانت تباوعلهم لما يركضون ولضحكهم تضحك وتلعب وتفرح
حتى عمي نفسيته تغيرت حيل وارتاح هوايه بده يتحسن وي العلاج الطبيعي والتدليك المستمر
جانو جواهر وياقوت والماس وزمرد يكعدون لاساعه ولاساعتين يدلكون لعمي
شويه شويه لحد ماتحسن نوعا ما صار يكدر يتكلم احسن من الاول ورجله يحركها قليل وايده كذلك لكن صار يتكأ على الحجله ويمشي
خلال هذه الفتره بده دوام المدارس
هالسنه راح تدوام زمرد وي خواتها جواهر ودره
نسيت اذكرلكم معاناة دره وهي أول أبتدائي
لكن دام رب العالمين رزقها بأخت مثل جواهر حنونه عليها برأيي معاناتها تقل بهواي
جانت جواهر تعتني بأختها أكثر من نفسها حتى لما كان احد يباوعلها بشفقه هي ماتتقبل نهائيا احد ينظر لدره بالشفقه
او احد يتنمر عليها كانت ترد وماتقبل...
جواهر... دره لاتسكتين انتي رب العالمين اختبرج برجلج مو بلسانج هي رجلج المشلوله لو لسانج لاتقبلين احد يتجاوز حدوده وياج
دره... هم يحجون عليه مااعرف شكللهم
جواهر... كليلهم هسه اصيح اختي جواهر هي تعلمكم شلون تحجون عليه ابدا لاتقبلين دره اياااااااج
لهسبب كانت دره ماتنكسر نفسيتها ابد لان جواهر اختها صارتلها درع ورمح وشحده ليتجرأ يتنفس وي دره
زمرد هاي اول سنه الها بالمدرسه جنت حيل فرحانه بيهم
ليلة اول يوم دراسه نامو من وكت وحضرو صداريهم وقمصانهم وجنطهم وشرطانهم واحذيتهم وكلهم حب وشغف وينتظرون العام الدراسي الجديد
من دون الايام ثاني يوم الصبح كعدو قبلي وي صيحة الديك بالضبط
... شبيكم حبيباتي اليوم من وكت بعدها الساعه 6
جواهر... ماما مداكدر انام
... ميخالف حبيبي هاي لان اول يوم دراسه يله اكعدو هنا هسه احضرلكم الريوك
طلعت بره و ك العاده لكيت عمي شعبان كاعد على الكرويته بره قريب على شجرة التين
بسعاد... صباح الخير عمو
حجي شعبان... هله بنيتي صباح النور
بسعاد... اسويلك ريوك وي البنات
حجي شعبان... بكيفج ياب براحتج
بسعاد... لعد حسويلك ريوك على الواهس تتريك
رحت وسويت الريوك وجبته الهم فرشنه بالكاع وكعدنه يم عمي شعبان رغم هو خليتله صينيه وحد لان مايكدر يكعد على الكاع ويانه
جان احلى صباح لما كلنه كعدنه والتمينه اني وعبد المجيب وعمي والبنات بستثناء ياقوت وماس بقو نايمين
راحو للمدرسه وبدو بيومهم الاول
واني كمت لشغلي وروتيني
الايام والشهور صارت تروح وتجي خلال هذه الفتره ماكو شي جديد بالنسبه لعائلتنه
لكن بيوم سمعنه صوت صياح زلم بالمنطقه ركضت بسرعه اشوف شكو لكيت الجيران ملتمه والنسوان تحجي
... والله من بعد ابوهم صار محد بيهم ينجرع جان شيخ ذياب صاكرهم
بسعاد... شكو شصاير
... رحاب ابن حجي ذياب ضارب سعد ابن رجب الخياط
بسعاد... وهاي الهوسه عليهم
... اي لان هذاك جايب جماعته وجاي على رحاب واخوت رحاب هم طلعو فزعه لاخوهم
وهاي عركاتهم
شروق... داشوفين فهد اخو رحاب
بسعاد... اي شبي
شروق... شلون هجم على اخوة سعد ولد عمه يمه عبالك وحش
بسعاد... لج عيني هم واحدهم يخوف
شروق... جماله ولد النعمان طالعين على عمامهم ياكلون اوادم دباعي آسر سبحان الله عبالك شهاب عمه
بسعاد... اي والله شهاب ونعم الشهاب احسن كل اخوته كون هذا طالع على عمه
شروق... كوووون...
فتت للبيت وعفتهم مالي خلك للمشاكل
رجعت كعدت يم عمي وسولفتله على الي صار بره
حجي شعبان... الله يصلحهم الي صار من سنين مو قليله لهسبب صارو يريدون ياكلون بشر
بهل الاثناء ندكت الباب رحت فتحتها دخلت مره وجانت تبجي بدموع غزيره
بسعاد... عقدت حاجبي بأستغراب... تفضلي شرايده
... هذا بيت ملا مجيب
.. وصلتي كولي أمر خدمه
...وج عيني اروحلج فدوه وينه عبد المجيب
... طالع ميجي هسه
... شلون وين الكاه دليني فدوه واكعه بمشكله مايعلمها الا الله
... تعالي تفضلي هسه واحجيلنه مشكلتج هاي عمي هنا عسى ولعل يلكالج حل فوتي
.. فاتت وعلى نفس دموعها وبجيها مسحتها وصارت تحجي
اني تزوجت صارلي 7 سنين رب العالمين مارزقني بالذريه ماكدرت اجيبله الولد
اليوم وبالصدفه عرفت رجلي اهله خاطبيله
قصص وروايات عراقية كرار صلاح ويردون يزوجوه
وبجت وتكلمت.. حجي واني شنوووو نار واشتعلت بيه
حجي شعبان... حقج عمي... وهسه انتي بشنو جايته لعبد المجيب
... عمي اريده يسويلي فدشغله شي بحيث مايتزوج عليه عمي اموت والله ولاتاخذه وحده غيري
حجي شعبان... صلي على محمد وكولي يالله
عمي هالسوالف هاي بعيد عنها عبد المجيب احنا ناس تخاف الله
... الله يخليك عمي بيتي حينهجم
حجي شعبان... بس مو معناها تمشين بدروب الحرام بنتي
... هو وينه الملا
... طالع بنتي وصدكيني لاتحاولين وياه اعرف ابني مايقبل الا الامور الشيطانيه والعياذ بالله
... مال شكد ويجي
حجي شعبان... استغفر الله العظيم بنتي متفهميني شدااحجي اني اكلج وليدي وينه وين هالامور
... بس
... بلا بس بنتي كولي يالله
اني اعرفج هسه گلبج محروك ومقهوره وحقج ما ألومج بس ميخالف
هو هم حقه يريد ضنه شلون شيسوي
.. عمي الحجي يعني هو يكون عائله واني بيوم وليله اصير غريبه
حجي شعبان... وليش غريبه انتي تبقين مرته مثل ماانتي والج كل حقوقج بس هو هم حقه تكون عنده خلفه
... اموووووت عمي والله مو بيدي
حجي شعبان... هي المره من تكبر وتوعه على رجلها تتعلق بي حقج ماالومج مداتتقبلين فكرة تجي وحده تشاركج بي
بس بمرور الايام تتعودين
ابو المثل يكول.. سفينة ضراير مشت وسفينة نسوان الحمه بقت
.. يعني؟
حجي شعبان... يعني مثل ماكتلج بمرور الايام تتعودين وتكومين لجهاله تحبيهم وتربيهم وشمدريج ما الله سبحانه وتعالى يرزقج على وجهها
... مادري ياعمي يعني بعدين عادي اكدر اتعود
حجي شعبان.. اي.... بس انتي لايبقى الشيطان معشعش براسج ويخيلج شغلات تخليج تفكرين بأمور شيطانيه وحرام
من تشوفي وي مرته يكعد ياكل يشرب يروحون لغرفتهم لاتبقين تحركين بروحج تذكري انتي هم الج هاي الحقوق وهم داتأذيها مثل مداتتأذين منها
ويمكن هي اكثر
بتلكأ واستغراب... شلون يعني اكثر وهي نازله عليه ضره
حجي شعبان.. لان هي حتعتبر نفسها تزوجها علمود الجهال لاحبا بيها ولاهم يحزنون بس انتي اخذج علمودج انتي لان حليتي بعينه وشافج مميزه عن الكل
... مسحت دموعها وتكلمت.. الله عمي شكد ريحني هذا كلامك اني هوايه اشكرك
حجي شعبان... وحتى يرتاح گلبج اكثر
اقري قرآن هواي وصلي وسبحي واطلبي من الله عز وجل ان يرزقج الذريه الصالحه
دائما اندعي لاتترددين ولاتملين صفي نيتج لله وحده ولا تهتمين اذا تزوج او خلف ماعليج منه
... بس مو بيدي
... افهمج بنيتي عسى الله يريح گلبج ومايشمت بيج أحد
... أني اشكرك عمي هوايه
... ولو تددلليين
كان كلام عمي شعبان مثل مي بارد ونزل على قلبها بحيث طلعت من البيت وهي البسمه تارسه وجهها
مشت الايام والشهور وحياتنا حيل استقرت للافضل لكن عمي شعبان كانت صحته تتدهور يوم بعد يوم
عبد المجيب ماخله اي دكتور يسمع عنه زين اذا مايودي لعمي عليه
حجي شعبان.. ولك ياب والله مابيها داعي تودي بيه وتجيب هاي اني اخر ايامي بهاي الدنيا وراي الاخره يرادلها حييييل وقبله مفروشه بأتحاه الكعبه خليني هالساعات هاي الي داتروح مني يم الاطباء اكضيها بالعباده
عبد المجيب... واعوفك تموت كدام. عيني
شلون حجي هذا ياب
حجي شعبان... اروحلك فدوه يبويه ماقصرت جره وقبله من راسه جر حسر وتكلم... اييييييي وين رجعتني ياعبود وييييين
باوعله عبد المجيب من دون كلام وكمل عمي كلامه
لما امك تمرضت هم هيج حرت بيها وين اوديها شلون اعالجها شلون اخليها ترجعلي زهيه الي زاهيه حياتي لكن ماكدرت
اطباء جانو معدودين وبعيديييين وقبل ماكو سياره مثل هسه يعني الي جانو عدهم سيارات بس الملوك والوزراء والطبقه المخمليه الناس الي الله رازقهم كلش هواي تلكه عدهم سياره
اني جانت عندي عربانه وحمار ومااكدر اخليها بي وااخذها لان هي متتحمل طريق
شمس عليها طول الوكت زحمه
فمكدرت عالجتها طب عرب لكن مافاد جان مرضها يوم عن يوم يسوء
جنتو صغار بوقتها وهي كامت متكدر تداريكم اخوك رحيم جان حيل متعلق بيها
حتى وهي تتألم جانت تخلي يمها وتدوس على نفسها وتتصنع الابتسامه
مرينه بأيام مرّه صعبه حيل جانت نظراتخا تشرح خوفها عليكم شايله همكم شلون تعوفكم وانتو صغار بعدكم وتحتاجوها
مره من المرات تعبت حيل صارت ترفس مثل الحمامه كبالي حرت وين اروح شسوي
شلون
بقت تلوب گبالي نطيتها اعشاب تخفف الالم لحد. ما ارتاحت ثاني يوم صرت أسأل واشرح حالة مرتي صرت اسولف للناس الي مايعرفوني ومااعرفهم
لحد ما اجه واحد وهم سالفه منه سالفه مني جان يكلي على دكتور هو يجي للبيت بس شنو اجرته غاليه بوقتها مافكرت بأي شي ماصدكت يجي دكتور يشوفها
صحيح حرت بالفلوس شلون ادبرها بس جانت عندي بقره حطيتها وبعتها وتوجهت كبل للدكتور وجبته وجيت للبيت وشافها لزهيه كبل كال مستشفى هاي حاله طارئه
كتله دكتور شلون اوديها ماعندي سياره كال
بسيارة المستشفى
ثاني يوم وديت زهيه للمستشفى صدك بوكتها جانت عنايه واهتمام وكلشي يحتاج المريض يلكاه هناك
بقت زهيه بالمستشفى ايام حطيت كل الفلوس العندي على الاطباء حرت شلون بعد منين اجيب
من كتبولنه خروج من المستشفى كتبولنه وياها قائمة ادويه ولازم اجيبها
اخذته ورحت للصيدليه جان غالي كلش
واني بوقتها ماباقي عدنه غير جم فلس
اخذتها ورجعت للبيت بدون مااشتري الدواء منين اجيب
خليت زهيه ترتاح بفراشها وانه صرت افكر شلون جان عندي خاتم ابوي الله يرحمه هداه الي مره وعزيز عليه كلش
وفروه من هاي الغاليه حيل هم هداها الي صديقي مره لما راح لمكه
اخذتها ورحت بعتهم ثنينهم الفروه جابتلي سعر حلو كلش جانت غاليه وبس الناس الي حيل غنيه تلبسها
بعتها وطلعت بوجهي للمستشفى جبت العلاج ورجعت
وبقيت انطيها علاجها واداريها وادللها واهتم بيها بقينه على هذا الحال شهور لكن هي تعبت حيل لحد مابيوم كعدت الصبح كل ضني نايمه لكن للاسف لكيتها ميته
ارفع ايدها توكع احركها مترد گلبها مايدك
بين ليله وساعاتها انتهى كلشي
جانت أكثر مرّه يتوجع گلبي بيها وينعصر
تأذيت حيل تأذيت
لحضة ماعرفت موتها واباوعكم يمي اجيتو
احس جبل وكع على ضهري كعدت محني الراس ومخلي ايدي على راسي شسوي بهالمصيبه
صرتو تكعدون بأمكم لكن ماترد
موقف لحد هذا اليوم ماشفت اكثر منه مؤلم
جريت روحي جر حتى اقوم بواجب غسلها ودفنها اجت العالم وديناها وغسلناها وكفناها ودفناها
والله واني اشوف التراب شلون يرجعوه للحفره احس روحي داتنشمر وي كل شمرة تراب دفنوها ورجعنه للبيت
ولما رجعنه والبيت موحش ضاق بيه حيل والدنيا اكثر ضاقت
بليلتها لميتكم داير مدايري وكعدت بالغرفه الماتت بيها
رغم بيت جدكم موجودين بس فضلت نبقه وحدنه واعتزل بحزني ودموعي وحدي
مرت الايام والشهور جانت كفيله بأنها تلهيك
وتخليك تلهو عن وجعك
صرتو تكبرون كدام عيني وجانت كل ضحكه منكم تنسيلي حزني واتواسيني على مر هذه الحياة
جان عبد الرحيم اكثر واحد بيكم يعبر عن مشاعره وافتقاده لاامه جان يبجي ويريدها لهسبب صرت اهتم بي اكثر منكم لان هو صغير مايفهم معنى الفقدان
على عكسكم انتو جنتو تشتاقولها لاامكم لكن جنتو تكتمون هذا الشي بداخلكم
اعرف مكدرت اسد مكان الام
بالنهايه الام دنيا الام مدرسه ولام حب وحنان واحتواء
لكن على الاقل كدرت اخليكم تمشون حياتكم
كبرتو وصرتو مراهقين وبيكم الي تعبني
الي اعلم بي ليل نهار وماياخذ
جنت اعقل واحد بيهم انت عبد المجيب
طول عمري واني ادعيلك رب العالمين يوفقك بحياتك
گلبي راضي عليك ياابو جواهر
... ربت على كتفه بحب وتكلم.. ياابو البنات
رد باوعلي ومبتسم.. وكت الي دخلت بسعاد للبيت جانت اول مره بعد المرحومه تشيل مسؤولية البيت
عينها على هذا وعينها على هذاك
وكت الي حملت وجابتها لجواهر زادت فرحتي تعلقت بجواهر هواي تشبه امك ياعبد المجيب وراها نورت للدنيا دره وبعدها زمرد
ابد ماضجت فد يوم لان خلفتك بنات ياعبد المجيب
صحيح الولد مطلوب بس الله احكم واعلم ليش رزقك بالبنات ومارزقك بولد
اريدك انت ماتضوج ابد لان خلفتك بنات
يمكن الله ينطيك الولد بس ينطيه الك معوق
يمكن فاقد عقله يمكن مريض
يمكن يكون ولد عاق ويتعبك بالحياة لدرجة يخليك توصل مرحلة الكفر
يمكن يكون ولد طايعك ومابي شي مثل الورد وتربي ويصير شاب وبزهرة شبابه يموت
يذبحك على النص ياابني ويروح
يمكن تربي وتزوجه وبالتالي مايشيلك بكبرتك يذبك بالشارع
انت متعرف ليش الله ماعطاك
اكيد الله اعلم يعرف بقلبك مايتحمل هيج الم فبعدك عنه
الله سبحانه وتعالى لما خلق البشر وزع الارزاق على حسب مايستحق الانسان
او على حسب ماتتحمل طاقته
اكو الي الله رزقه بالبنات فقط
واكو الي رزقه بالولد فقط
واكو الي زرقهم الله بالاولاد وبالبنات
واكو الي رزقهم بالاموال
اكو الفقير واكو الغني
الانجاب هذا بأمر الله
اما الرزق المادي فهذا استحقاق الانسان
ياخذ على كد سعيه بالدنيا
بسم الله الرحمن الرحيم... وان ليس للانسان إلا ماسعى...
فعلى كد ماتسعى راح تنرزق
المتوكل على الله لازم يسعى حتى ينال الرزق
الرزق مو الاموال بس
راحة البال... الصحه... السمعه... وووالخ
واحيانا شغلات نستقتل عليها وماتصير
هي ماتصير لان الله سبحانه وتعالى اعرف ليش خلاها ماتصير
خليك ياابني متوكل على الله
وارضى بلي قسمه الك رب العالمين
اما الي تكدر تغيرها معناها انت تحتاج تسعى حتى تتغير
افهم ان الحياة هذه مثل ماتنطي تاخذ
ومثل متاخذ تنطي
اريدك تدير بالك على بناتك وامهم لاهم الهم غيرك ولاانت الك غيرهم
روحي اشتاقت لامك ياعبد المجيب
عبد المجيب... يعني؟
حجي شعبان.. حاسس هذه ايامي الاخيره وياكم ديربالك على نفسك وعلى اهلك
عبد المجيب... لا يابه كول يالله عمرك طويل ان شاء الله
حجي شعبان... خليك سند لااخوك وخلي اخوك يكون سند الك لاتفترقون ولايفرقوكم النسوان والخلفه
وانتبه لاابن اخوك روح
مرت عبد الرحمن نذرت نفسها لرجلها
وبقت تربي لهل الولد
اريدك تدير بالك عليه ولاتقصرون عليه بشي
اني كتبت ربع البيت بإسم روح لاتتقاسمون بالورث الا لما يكبر روح ويصير رجال
وان دار الوكت بمرت اخوك وابنها ساعتها بحصة عبد الرحمن وابنه اشترولهم بيت صغير وكعدوهم وساعدوهم ولاتقصرون عليهم بشي
عبد المجيب... كلامك خنكني يابه انت شداتكوووول عمرك طويل ان شاء الله
حجي شعبان... محد يدري بنفسه شوكت يموت لهسبب من واجبي اوصي لازم
عبد المجيب... ماادري شكلك يابه
حجي شعبان... لادكلي شي انتبه لنفسك ولاأهل بيتك انه بموتتي حرتاح
لما تشوفني ميت كول هسه ارتاح ابويه
اخوتك مو ماتو اني المتت وهم العاشو
لاتتوقع ان الي يروحله من اهله احد يبقى عايش
يموووووت بس فرقه عن الي بالقبر باقي يتحرك والاعصاب تتحرك وتألم بي
كانت نظراته وهو يوصي بينه مليانه حزن
كانت فعلا تشرح حجم الألم الي جان عايشه وكاتمه بداخله
مرت الايام وجان اكثر الاوقات يسعل ويتعب من كثر السعال
رغم كل تعبه لكن ابد ماشفته تهاون بالصلاة وعافها كان حتى وهو مدد بفراشه يسبح
لدرجة جواهر بنتي اجت كلمتني
جواهر... ماما هو من جدو هواي مؤمن ليش رب العالمين مايشافيه
بسعاد... لان ممكن جدو نادعى لنفسه
جواهر... لا اني شفته وهو يندعي وحتى هواي يسبح وتدرين شيكول بالتسبيح
بسعاد... شيكول
جواهر... مره يسبح ويكول بسم الله ولا إله الا الله اللهم لك الحمد على كل شيء
.. الحمد لله... والشكر لله
يعني يكول شكرا لرب العالمين وهو هاي حالته يعني ماما هو ليش يشكر الله وهو مريض
بسعاد... ماما حبيبتي احنا لازم نشكر الله بالسراء والضراء ميصير وكت منكون متعافين ومرتاحين نشكر الله وكت مانكون مو بخير نتذمر ونكفر بالله
الله سبحانه وتعالى خلق هذه الحياة وخله بيها الحلو والمر ولازم نصبر على هذه الحياة بكل تقلباتها
هذا اختبار من الله عز وجل للبشر
يشوفه شيسوي
الله لما ابتلى أيوب بالمرض كان اختبار
الله سبحانه وتعالى لما ابتلى ايوب مو فقط بالمرض لكن بأشياء اخرى
ا مات اولاده
وذهبت امواله صار فقير
وذهبت صحته صار جليس الفراش
من كثر مابقى بالفراش مريض بده يتعب جسمه ولحمه صار طري بحيث دود صار يجي وياكل من جسمه ومايأذيها النبي كان يكول الها
كلي مما رزقك الله
لما اشتد المرض اكثر دعى ايوب ربه ان يشفيه فرب العالمين استجاب دعاءه
تعرفين ليش؟
ليش..؟
لان وصفه رب العالمين بالقران
إِنَّا وَجَدْنَاهُ صَابِرًا نِعْمَ الْعَبْدُ إنه أواب
لما نقرأ القرآن لازم نتعض ونتعلم من القصص المذكوره بيه
كانت قصة نبي الله أيوب تتكلم عن الصبر والمعجزات الي تحققت بالصبر ثم الدعاء
جواهر.... يعني هسه جدو يكدر يندعي والله يشفيه
بسعاد... اي ممكن ليش لا
جواهر... ويصير اني ادعيله
بسعاد... اكيييد
تبسمت جواهر وراحت تركض لغرفتها اخذت سجادتها وايزارها وفرشتها وكعدت تندعيله
كانت كفوفها الصغيره وهي مقربتها وحده يم الثانيه بهيئة الدعاء ونظراتها البريئه نحو السماء وهي تتوسل برب العالمين ان يشفيه لجدها كانت تدخل بقلبي الطمأنينه
وكنت اكول ياربي تشفيه لخاطرها...
وقلبي الذي يحزن لمرضك ليس بوسعه أن يفعل شيئا إلا الدعاء لك جدي....
شكرا لزيارتكم عالم روايات سكيرهوم
