رواية نقطة تحول الفصل الثامن بقلم جمانه السعيدي
بقينا اني و مويد هاي الفتره مثل المد والجزر
يوميه نتعارك ونتصالح لا اني كادره اتعلم علي ولاهو متقبلني يريدني اكون منفتحه ويااا
واحنا بعدنا على البر
اني ما انكر تعلمت علي وبديت اتقبله بحياتي
بس ما اكدر اتقبل تصرفاته
خلصت اجازته وسافر واتفقنا نبقى على تواصل اني ويااا
ويحاول نص السنه يجي اجازه للعراق
حتى انجهز كل ترتيبات العرس و من اخلص سادس
تبقى عدنا شغلات بسيطه
وفعلا سافر حسيت بفراغ لان تعلمت يوميه أشوفه
بدا الدوام وكنت احاول افرغ نفسي قدر الامكان للقرايه
اول اسبوع خلص
سمعت عمتي تحجي بلتليفون وحسب ما افتهمت ابوي محمد مسوي عمليه
طالع عندا وحدا من الكليتين تعبانه ومقرر الدكتور يشيلها
ويبقى عايش على كلى وحده
عمتي اجتني كالت باجر اروح اشوف ابوج بلمستشفى ترحين وياي
عبير......يا ابو اني عندي اب ما اذكر عندي اب ابد
بشرى ابوج تعبان على الاقل نروح تسلمين علي
عبير ولله ضحكتيني امي من جانت مريضه شمرها
واني من اجيته هم شمرني ومآ استقبلني
تعتقدين يستاهل اتحمل تعب السفر واكعد بلسياره ٣ ساعات علمود اطمن علي
واني صارلي عدكم ٦ سنوات ما كلف نفسه يرفع التليفون ويسئل عني
بشرى كل واحد يعمل ب اصله لازم انعامل الناس مثل اطباعنا مو مثل ماهم يعاملونه
عبير ما اروح وكليله اذا يموت مراح احضر عزا ابد
اني ابوي مات من زمان
بشرى بكيفج انتي حره
طلعت عمتي واني ضليت ادعي علي اريد الله يشوفه المرار الي شافته امي وا القهر الي عيشني بي
اتمددت وماكدرت انام حيل مقهوره منه
بعدين فكرت اكشخ كل قوتي واروح أشوفه واشوفه
الشماته بعيوني
واريد اشوف بعيونهم العجب وهمه يشوفوني بهذا وضعي الجديد
ضبطت المنبه حتى اكعد من وكت واستعد زين
ودزيت رساله الرنا كتلها اطلبيلي اجازه يومين
كعدت بلسته الصبح دخلت سبحت وطلعت سرحت شعري
وكصيت كذله قصيره وسحبتها على عيوني
لبست عدسات يخبلن رصاصي على زيتوني وخليت رموش
و مكياج
لبست بدي تور اسود جوا بطانه بس الكتف والردن مكشوفات
وبنطرون ثلجي حذاء وجنطه تركوازي فاتح
نضاراتي حضرتهن
لبست ذهبي كله اربع بتوت بهاي الايد
وسوارات اثنيين بهاي ايدي الثانيه
كلاده طويله على شكل شمس ووحده زغيره بيها شذره
زركه تراجي على شكل زناجيل طويلات
محابس ذهب ٣
وطلعت أقوى عطر عندي وخليت
وطلعت العمتي لكيتها شايله جنطتها وتريد تطلع
عبير هلووو عمتوووو
بشرى ضليت فاكه حلكي هاااي عبير لو غيرها
عبير اي عبير اخذتلي فره شنو رائيج
بشرى هاي وين رايحه هيج
عبير رايحه وياج اشوف بابا
بشرى تحجين صدك واني اسمع الصوت اكول تحضر للمدرسه
عبير لا اريد اروح اشوف بابا حبيبي
بشرى كولي غيره شنو حلمانه البارحه
عبير لا مو حلمانه بلعكس صاحيه ومصحصحه
بشرى وشدعوه هاي الشياكه كلها ولابس الذهب والعدسات
عبير ليش ترديني اروح مبهذله
بشرى لا بس هيج عبالك رايحه حفله
عبير لا مو هسه الحفله الحفله الجبير من يموت محمد
بشرى ليش تكولين هيج هذا اخوي ومآ اقبل علي ترا
عبير اخوج حبي براحتج بس اني ما اكدر احبه ابد
بشرى وليش رايحه لعد
عبير اتفرج مايصير اتفرج
بشرى بكيفج يله اتاخرنا السايق منتضرنا جوه
عبير يله اني مستعده تفضلي
عبير طول الطريق واني افكر اني ليش اجيت
جايه اتشمت بس الشماته حرام
اكرها واكره كلشي يخصه
بس اريد هم يشوفون عبير الجديده
عبير الي بس شافوها اول مره كالو مجديه وبيها أمراض راح تعدي جهالنا الي مهان عليهم ينطوها خبزه تاكل
اريدهم يشوفون كرم رب العالمين وين وصلها
وصلنا وعمتي خابرت وعرفت رقم الغرفه كتلها روحي كدامي هسه اجا وراج
دخلت للحمام عدلت نفسي وخليت عطر ونزلت نضاراتي على عيوني
وصعدت بالمصعد وصلت للغرفه
عمتي جانت مدنكه تبجي على اخوها وزوجت ابوي واكفه ويمها ابنها الجبير وبعد واحد واكف ما عرفته عمرا تقرببا ٣٥ لابس قاط ونافخ نفسه
عبير صباح الخير الكل رفع راسه وباوع عليه
مهند اخوي كال
...دكتوره همزين اجيتي الصوندا جاي اتاذي حيل ايصير نغيرها
زوجت ابوي اي دكتور صار مرتين اروح ويكولون الدكتوره بعدها مجايه
نزعت النظاره وابتسمت وكتلهم بس اني مو الدكتوره
باوعولي لاستغراب
عبير هاي شبيكم مستغربين اني عبير محمد خضير
زوجت بابا طكن عيونها وكالت شلون انتي عبير
التفتت العمتي وكالت صدك هاي عبير
عمتي اي عبير تعاي عمه سلمي على ابوج
قربت وكتله بدون اهتمام
شلونك ابو مهند الحمد لله على السلامه
محمد الله يسلمج
زوجت بابا من الصدمه كعدت وبعد ما حجت ابد
وهذا الشخص الي اني ما عرفته طلع اخوها
قرب عليها وكال يعني هاي بت محمد
هي بس هزت راسها وبقت مصدومه
سحبت كرسي وكعدت وخليت رجل على رجل واباوع عليهم من ورا خشمي
سلام اخو زوجت بابا جاب ماي كاسه وقدملي
عبير ما اشرب هذا المي شكرا
ضلو واحد يباوع بوجه الثاني ومتعجبين
من الصدمه السكوت عم المكان
هنا خابرني مؤيد طلعت برا احجي ويااااا
وسلئني عن وضع بابا وشكد راح نبقى
أثناء هذا الحديث
سلام سحب اخته برا
ولج هاي الصاروخ بت محمد
...اتصدك اي اني مصدومه
...انتي مو كلتي جنها مجديه ومرعبله وخفتي على الجهال منهاوطردته من البيت
...وللك ما جانت هيج حالها كله تبدل شفت شكد ذهب لابسه
والعطر ترس الغرفه ترس
ولله اني اشك هاي بت محمد شكلها كله متغير
سلام ما دام طلعت بت محمد مانخطبينها اليه وولج
تخبل تهوس
....ومرتك
...شني مرتي الشرع حلل اربعه
...بس محمد يصير زين تعال اخطبها منه واني أقنعه اللك
...عفيه أخيتي الحلوووه
عبير كملت مكالمتي ورحت اشتريت بطل مي ورجعت للغرفه
بس كعدت وخليت رجل على رجل
ام مهند زوجت بابا اي يامغير الأحوال غير حالنا مثل ما غيرت حال ذولاك الناس
عبير ضحكت بصوت عالي ماكدرت الزم نفسي
وكتلها تصدقين الزباله تبقى زباله ومآ يتغير حالها ابد
حتلو تشيلها البلديه يبقى المكان كله ريحه مطيبه
ام مهند هاي قصدج عليه
عبير ليش اخذتي على نفسج قابل انتي زباله
ام مهند صدك ماتستحين وقليلة تربيه
عبير ياسبحان الله اني قليلة تربيه لو الي تخلي الابو يتخلى عن بنته وهي طفله ويشمرها بلشارع
قليلة اصل وماعدها تربيه
ام مهند انجبي لج كومي اطلعي برا عبالي اطورتي
كاشخه من برا وضامه الخياس جوه
بشرى ما اسمحلج تغلطين عليها انتي الي بديتي
عبير عوفيها عمه ماتكدر تنسى أصلها الزباله وماراح تتغير تبقى زباله
اني انتضرج برا عمتي لا تتاخرين
ام مهند ماغيرج زباله وقليلة تربيه المن اجيتي حتى تحركين دمي صعدت ضغطي الله لا يرضا عليج
جايه كاشخه ولاعبالك ابوها مسوي عمليه تكول جايه عرس
عبير طلعت واني فرحانه لان سويت بيها هيج
جان يلحكني سالم اخوها
سالم عبير اني اسف واعتذر هي عصبيه بسبب حالة زوجها واعذريها وامسحي كلشي بوجهي
عبير لا عادي اني متعلمه على الهمج مثلها واعرف اتصرف وياهم
سالم ممكن اخذ رقم تليفونج حتى اتواصل وياج
عبير اسفه اني مخطوبه واحب خطيبي وحتى لو ما مخطوبه انت مو من النوع الي يعجبني
عفته ومشيت وهو وجه صار احمر من الفشله
