رواية بيت المطلقات الفصل الثامن بقلم جمانه السعيدي
دنيا اني من كد المشاكل الي شفته من الرجال الي دخلو حياتنا كرهة الزلم كلهم
وصارت عندي حاله نفسيه بسبب خواتي وامي
ام حازم مابطلت تجي وتشوف الجهال وجيبلهم مصرف وملابس
ودائما تصبر غفران
تنتضر اليوم الي حازم ينتبه النفسه ويرجع زوجته واطفاله
اماسميه نجحت والحمد لله وقدمت معهد تمريض
بس ابد مارجعت سميه القديمه
عبالك كبرت ١٠٠ سنه
اما ايمان قدمت سادس خارجي تريد شهاده بلكت تتعين وتكدر تعيش هي وابنه
مااخفي عليكم الحياة كانت صعبه علينا
صرنا عائله جبيره وراتب امي مايكفي ابد
وزوج ايمان شهر يدز النفقه وشهرين ماكوووو
بس الراتب الي تاخذه من الحضانه مساعده شويه
كنا اندبر نفسنا باي شي ولله ساتره ويانه من فوك
اغلب مسواكنا بلدين من صاحب الاسواق القريب علينا
يوصل دينا ٣٠٠ او ٤٠٠ نسده ونرجع ناخذ الرجال مقدر وضعنا
دنيا واخيرا اتخرجت والحمد لله
كان التعين بوقته بسرعه يطلع وخصوصا الدفعه الاولى
والثانيه الي تخرجت
حتى يشجعون البنات والولد يسجلون معهد تمريض
طلع تعييني
ماتصدكون الفرحه الي فرحته واخيرا راح استلم راتب واساعد امي
واخفف عنه الحمل شويه
بديت اداوم واني مقرره ابتعد عن الولد نهائبا
صارت ثقتي بلزلم مهزوزه
الحد الان ماصادفت رجال بي خير
ويكدر يشيل المسوليه
جمانه السعيدي
من اول ايام كان اكو ولد اسمه وليد
هذا خريج كلية تمريض مو معهد وهو الي مسول عنا
من اول ماداومت حسيته مركز وياي
مواصفاته حنطاوي شكله حلو طوله تقريبا ١٧٥
صاحب لحيه وشوارب جسمه حلو رشيق ومتناسق
شعره اسود اجعد
شكله مرتب
دائما عينه عليه ويحاول يختار مواضيع حتى يحجي وياي اني كنت الوحيده بين البنات الي اميزه نفسي ومبتعده عن الكل
يحاول مايحملني هواي شغل
ودائما يسئلني عن صحتي واحوالي
بس اني كنت اصده ومآ انطي مجال ابد
كتلكم بيه عقده من الزلم
جمانه السعيدي
المهم بلبدايه كنت محتاجه ملابس للدوام
امي صممت من اول راتب لازم اشتري ملابس واحذيه للدوام
وفعلا اشتريت ملابس حلوه ومحتشمه اداوم بيه
بعد فتره من دوامي بلمستشفى
ابن ايمان تخربط وكع بابو صفار
وجابته للمستشفى تسويله فحوصات
طلع بي ابو صفار ونسبته عاليه الدكتور سجله دخول
للمستشفى
طبعا وليد بس عرف ابن اختي لكاها فرصه ولزكلنا لزكه
كمل كل الاجرائات
وجهزله طبلة دخول ووصا الدكتور علي
وبقه ويانه منا لمن صار احسن وطلع للبيت
ولكاها حجه كل شويه ويسئلني شلون صار
وبيوم كنت طالعه يم صديقاتي بلولاده
راسا اتصل عليه وكال ارجعي المكانج اجانا تفتيش
فعلا نزلت جوه واجا التفتيش وعدت على خير والحمد لله
كل هذا واني ابد مامنطيته وجه
بس مجرد استلطاف
بعد اربع اشهر من كل محاولاته الفاشله يقرب مني واني اصده
قرر يعترفلي بحبه
دز عليه بغرفته دخلت وطبك الباب
دنيااا ليش طبكت الباب
وليد اريد احجي وياج
دنيا كمت فتحت الباب تكدر تحجي والباب مفتوح
وليد هاي شبيج مراح اكلج
دنيا اتفضل اسمعك
وليد اني راح اجيبه اللج من الاخير اني معجب بيج واريد اتقدملج شنو رائيج
دنيا اسفه اني ماناويه ازوج واضيع شبابي
وليد ليش هيج تكولين
دنيا هذا شي خاص بيه
وليد على العموم اني مراح اايئس ابد وراح انتضرج
دنيا على شنو تنتظرني شوف نفسك اني ماازوج
وليد ولو من حقج تفكرين
دنيا بكيفك اني كلت رائي وانت حر
وليد ممكن اسئلج سوال انتي ليش هيج هجوميه
وردة فعلاج سريعه ترا الدنيا مو عرك
دنيا بلنسبه الك مو عرك اما بلنسبه اليه كل يوم اكعد واستعد حتى اتعارك ويه هاي الدنيا حتى اكدر اعيش بيه
وليد صحيح اني مااعرف الضروف الي انتي عشتي بيه
بس انتي فاهمه الدنيا غلط
دنيا حقك ماعشت يوم من الايام الي اني عشته بحياتي
كمت من مكاني وكلت من رخصتك
وليد فكري زين واني انتضرج
جمانه السعيدي
طلعت من المكتب
بس دنيا الي دخلت قبل نص ساعه مو نفس دنيا الي طلعت هسه
يمكن اصراره غير شي بنفسي
يمكن لان اول واحد يحجي وياي بأسلوب حلووووو
هاي اني شبيه ياحب يابطيخ
انتبهي دنيا ماكو رجال يستاهل احبه ابد
رجعت للبيت واكذب اذا اكول ماافكر بكلامه كلامه ضل ينعاد بدماغي كل شويه
من هاي اللحظه بديت انتبه اكثر واركز بتصرفاته داخل المستشفى
واذا شفته بمكان اتعمد احجي او اسوي اي حركه حتى ينتبهلي
رجع فتح هذا الموضوع وياي مره ثانيه
وليد شلونج دنيااا
دنيا الحمد لله
...فكرتي
...سويت نفسي غبيه كتله بشنو
...بموضوعنا
...اي موضوع
....انتي ليش ماتنطيني مجال اريد فرصه
...فرصه
..اي فرصه نحجي سوا نقرب من بعض واحد يعرف شخصية الثاني
...مااكدر
...ليش تخافين
....لا من شنو اخاف كلت بكلبي هو انت تحجي وياي كلمتين خليتني افكر ببك
شلون لو يوميه نحجي سوا اكيد راح اتعلق بيك واحبك
...لعد ليش ماأخذ فرصه
...اني لا غيه فكرت الزواج من بالي نهائيا مااريد ازوج
...ليش انتي مو بنيه حالج حال باقي البنات
....لا اني مو مثل باقي البنات ضروفي تختلف عنهن
...هم راح ابقه وراج لازم تقتنعين اني ماطلب منج علاقه
اني طالب زواج على سنة الله ورسوله
دنيا من رخصتك
جمانه السعيدي
عفته ومشيت بس هلمره اني وكعت بلفخ وحبيته
بس خايفه خايفه من كل تجارب خواتي
رغم خواتي ازوجن غصب وماكو تعارف ابد بينهن وبين أزواجهن
يعني اني هلمره الي راح اختار شريك حياتي ولازم يكون خياري صحيح
لان ماكو واحد راح يتحمل أخطائي غيري
ومااريد اكون المطلقه رقم خمسه بلبيت
ابتعد عني فتره بس نضرات من بعيد بينا وبين بعض
بس اني اضوج من اشوفه يحجي ويه اي وحده
حتلو يحجي عن العمل
برائيكم اني حبيته لان اسلوبه حلو وياي
يمكن مصدومه اول واحد من فصيلة الثيران اقصد الزلم
يكون اسلوبه حلو وياي
هم بعدني خايفه خاف اتورط واحبه ويطلع مثلهم
اني ماعندي تجارب ومااعرف الزلم زين
ولو الناس كله اذا ماتعاشره ماتعرفه ابد
مثل زوج غفران الي يشوفه يكول هله هله
وهو من جوه انكس خلق الله
بعدين بدا نضام الخفر واني رحت علي
دنيا استاذ جايتك بشغله اني مااكدر ابقه خفر
وليد بس هذا النضام بي عطله اكثر اللج بمكان ماادومين يوميه تداومين بس اتلث ايام
دنيا مااكدر اداوم يوميه عادي بس مااريد ابقه خفر
وليد روحي اني راح احله اللج لا تخافين
دنيا شكرا استاذ الله يحفظك
وليد تدللين
فعلا حلي هاي المشكله وماصعدت خفر ابد
قررت اشتريله هديه لان تعب وياي وقدرني ونفذ طلبي ومافشلني ابد
رحت واشتريتله ساعه يدويه حلوه ومرتبه
ساعه ١٥ الف الصراحه ميزانيتي ماتنحمل هديه سعرها اكثر
اخذته اله الصبح
دنيا صباح الخير
...ياااصباح الخيرات كان متفاجئ لان اني ابد مااروحله للمكتب ولا اسلم علي اله شغله مهمه
...تفضل هاي هديه بسيطه لان تعبت وياي
...شكرا جزيلا فتحه وكال حلوه عاش الذوق الراقي
...تسلم
....ممكن تفكرين بموضوعنا
...اني مااكدر اطلع وادخل وياك بدون مايكون بينا شي رسمي
...اي واني اكلج اتقدملج
...خل اخذ رائي ماما بلموضوع وارجعلك خبر
....خير انشالله
شكرا لزيارتكم عالم روايات سكيرهوم
