رواية الرجل لاينسى حبه الأول الفصل التاسع بقلم سهير رائد
كام يضرب بالحايط بوكسيات بيدة بكل قوة حتى حسيت الحايط اتكسر ..
انقهر صار يضرب اي شي كدامه .
خفت لايضربني ماحجيت ..
طلع للتواليت ورجع .
كتله باجر اجازتك ..
اي .
خلينه نروح زيارة شعدنا احنه ابد مطالعين .
خضر . اي نروح مواقف
حضري روحج من الاربعه نطلع .
كمت سبحت وجهزت ركض جنطة النه ..
غفيت شوية وكعدني طلعنه للزيارة اني كتله اتمدد ورا انعس .
نمت ورا كعدت تقريبا قبل ساعه من كربلاء حجزنه فندق ..
بتعبي كتله اروح ازور هو نام بالفندق .
احس بيه هواي مبتعد عن الله والزيارة قبل جان يصلي ويصوم هسة ماكو !!
رحت زرت ودعيت وبجيت ونخيت بس كون ربي يبرد كلبي ويخليني اعيش سعيدة كلشي ماريد اريد اعيش انسانه طبيعية تكون عائله سعيدة وبس ..
رجعت للفندق صح بعيد بس كلش حلو يخبل .
غرفة جبيرة مريحة .دكيت الباب فتحه شابع نوم .
نزعت ودخلت اغسل واجيت تمددت يمه ليش مرحت تزور .
خضر . الله كريم .
جرني النه بقى يبوس بيه
يعني اريد اكول بهمجية وعنف عاملني يعني من كدر يتزوجني بسهولة كام يصرخ ويبجي
ويصيح كتلج اني انسااااان طبيعي اني رجال انب رجاااااال
احاول اسكته بس اسكت انت رجال ماكو ماعندة تعامل وسط لو ميت لو عنيف ..
حسيت باانوثتي حسيت برجولته حسيت بشي مختلف حسيت بوجع حسيت بيه هو شلون يحاول يثبتلي مابيه شي وهو طبيعي وطبيعي يمكن فرحتي اله ما وسعها المكان . .
احاول اخلي بس يتركني لحظه اكوم اخفف الالم العندي هو لا
الى اخليج تتندمين لان تكليلي انت مو بيك السبب
واخيرا كدر يتزوجني طبيعي ..
ودموعه جان تقهرني
دخل سبح
واني نمت فرحانه بالصار رغم الاذية .
راح جاب ريوك مدري غدة
سبحت وكعدت اكل
نطلع نروح نزور لو نفتر
خضر اي نطلع
طلعنه شويه افترينه صارت المغرب صليت برا بين الحرمين
شربنا عصير
كال يلا للفندق
مشتاقلج ؟؟؟
ورجع كمل بس يحاول يثبت هو رجال
كمت اصيح كافي هاي هيا احنه اثنينه طبيعين
يومين احنه بكربلاء هادئين ماكو مشاكل .
توتر خف ..
يمكن عشر مرات ثبت رجولته وياي
كلام العشق والحب البگلبه الية تخليني اتندم على كل لحظه نتعارك بيها لو راجعه اله من زمان
حبيته بسبب كلامه وياي
على كولته لو ماعندي دوام مارجع الا اسبوع رجعنه واحس هوا كله سعادة .
ماخله شي كدامي مااشتراه اليه مطاعم طلعات ..
ومن رجعنا للبيت ..
واجه الليل
مجرد دخلنه للبيت تعاركنا
رجعنه مثل قبل يومين ورجع وضعنا الصامت .
حيل توترت وهو هم اسبوع هو ميخلي عينه بعيني عبالك خايف مني او هو يعرف الخلل بالمكان العايشين بيه مو بيه بس هو يعاند .
ميريد يكول احنه مسويلنه شي بعذ المكان
اني كمت احس سحر ومرات اتعوذ من ابليس
ويعني شسوي غير الصلاة والقران
ماعندي غيرهن وسيلة يحصنني
مر شهر وشهرين واحنه من اخر زيارة رحنه اتقرب الية وسمعني كلام حلو
حتى كلام ميحجي وياي يمر يوم يومين اتمنى يفتح حلكه وياي اتمنى سلامه اتمنى حضن اتمنى شي بسيط ردة فعل تحسسني اني موجوده بحياته. أو هو زوجي ومهتم بيه هسه عوف النومه والفراش اني كمت اريد رجال يكعد يسولف وياي اي سوالف
حتى ميطلب مني شي ملابسه عطور
كمت اطلب منه جكاير
لايرفض ولا يعلق. يجيب
بليل اشرب جكارة او جكارتين .
هو يجيب ممقصر مسواك فاكهه حلويات كلشي الاريده واللي مااريدةكمت اسولف وياه
يسولف وياي قليل يخاف من الحديث خاف اكلة ليش منطلع من هذا البيت. او يحوز ساحرتله عن الكلام !!..
فد يوم اباوع من الشباك من ورا البردة مرات اباوع ع الشارع شفت وحدة بنية تطلع اكبر مني طبكت سيارتها بالبيوت المقابيل بيت عمي يمكن ناس جدد .
كتله خضر عدكم وحدة تسوق بنية حلوة وسيارتها حلوة.
ايي هاي مدربة سياقه .
شكد حلو هاي شجاعه .
خضر .دخلي عدها دوره .واجيبلج سيارة .
ضحكت هو مسواك كلما تجيب اسمع الجوا ينكلب الا تجيب سيارة؟
خضر . اني اذا اريد اجيب محد يمنعي! واذا اريد اسوي شي هم محد يمنعني
ايي صح والدليل انت كلت نص البيت بأسمج اسجلة ولهسة ههه .
اسجله لاتخافين .
مايحتاج اني اشوف ماكو مستقبل بعلاقتنه !!
خضر . تتمنين هل الشي ادري بيج بس مايتحقق ابد ..
خضر انت اتزوجتني ونهيت سرك خلينه كل واحد يروح بحال سبيله بدال هاي الحياة الجامدة .
فز وطفر طلع من المكان نزل للشارع
اباوع عليه بالشارع يشرب جكاره ويسولف وي ناس
....
ضحكت . ايي وشسوق بعير ..
خضر . البعير صعب عليج تسوقين سيارة حديثة اوتماتيك راح اجيبلج سيارة بيضه سبورت حلوة ان شاءالله .
عود من تجيب البيضه اتعلم هسة مالي خلك .
خضر:والبنيه
شعلية بيها اني هزيت ايدي وكعدت اباوع على التلفزيون
جنت احجي شقه وياه عبالي ديشاقه .
يومين واجه الصبح بعدني نايمه .
كعدني بشائر كعدي وباعي من الشباك شوفي شجبتلج ؟
شنو
خضر كومي
اجيت ترا اني بعدني بنومتي ممسوية غدا اذا تريد ؟
عوفي الغده اجيب من برا .
فاتحة عين وعين لا هسة انت مكعدني تضحك عليه
شبيج ماعندج ثقه ولاتصدكين بيه هااااي السيارة الج وهذا السويج والمدربة منتظرتج يعني شمنتظرة انزلي تشوفيها .
لاخاف عيب وابوي مايقبل ..
ولج شعليج باابوج غير على ذمتي اني موافق وهيا سيارة عربانه مابيها لاعيب ولاحرام . واني رجلج اني اللي اقبل بيه محد اله علاقه بيج غيري. يلا حبيبتي غسلي ونزلي انشوفه وتشوفين المدربة .
رحت غسلت صدك الصدك اني كلش فرحت بيها وفرحت بكلامه .
بدلت كال البسي عباتج فوك ملابس البيت المدربة تكول ب4ابدي اعلم بيها بس تريد تشوفج .
نزلنه اني وياااه ..
لاكتنه امه كلت صباح الخير جاوبتني .
ايي خل اتعلم وين ماردون اخذكم . ونضحك
طلعت شفته حلوة بيضه فتحها خضر كال هاي اوتماتيك سهل سياقتها تعلمج عليها البنية ويجوز اسبوعين تسوقيها وبالدوام ترحين بيها ..
صدك اني لهسة ممنقولة .
انقلج الاسبوع الجاي كالو وي الدوام التنقلات ..
مصطفى . خالو انت طفرة بالعشيرة
زهراء . راح تصير ازمه عند نسوان وزلم العشيرة خضر جاب سيارة لمرته وانتو لا
مصطفى تاليها خالو مفشخينه زلم العشيرة..
خضر يخسون . وهيا سيارة والله مابيها شي النسوان تسوق يعني احسن تصعد تكسي وي ناس ماتعرفهم لو نفرات . لو يهدي امكم تجيب وحدة تتعلم .
مصطفى اذا خالة بشائر تتعلم اني اخليها تشتري بس اني اسوقها وضحك..
اجت البنية المدربة تبارك النه وتكول حلوة وحديثة شرايدة بعد خضر يحبج هاااي غالية وزينه وثكيلة بالشارع ..
وانطتني موعد ب 4نطلع نتعلم ..
دخلنه للبيت
ام خضر . خضير هااي السيارة المن ؟
خضر جبتها لبشائر .
منو يسوقها انت لو تخليلك واحد .
لايمه ليش واحد هيا تتعلم وتسوقها وراها دوام .
وهيا يبوووووووي وادك على وجها طلعت دم منه وصدرها لزمها بقوة وشالها للغرفة.
ولك ركبتك ياحيف تربيتي بيك مرت خضر تسوق سيارة باجر تاخذها تكود كدامك وانت تسكت حاول يسكتها ماكدر
بس اسمع صوتها المزعج تصيح يبوووي وتكفر؟ وتدعي صوتها مزعج والله خطية خضر
قفل عليها باب الغرفه
زهراء . خالة ماعليج بيها هيا ترا والله مو بس عليج ترا حته احنه عايشين بجحيم اني وماما ومصطفى وشنسوي .
مصطفى . هاي بيبي مريضة ذاك اليوم لان لابس برمودة شسوت فشرت وغلطت عليه وكامت تطعن بشرفنا واني سكتت علمود ماما خطيه . وخطيه عيونه غوركن .
الله على الظاىم خالة الله على الظالم .
صعدت انقهرت على جهال عطور طلع مو بس اني وخضر هما همين اكول مرات اسمعها تحجي وعبالي عليه طلع عليهم .
حسبي الله ونعم الوكيل .
حاولت ماعكر مزاجي طلعت شعدنا اسوي غدة على السريع لكيت سلج ولحم وكمت اسوي دولمة اليه ولخضر يحب طبخي مرات ياكل وياي اذا موجود وامه ماتحجي يتغدى وياي او اكل الغدا يطلعه يكول اتعشى بيه يحاول يمشي الامور دائمأ ..
صعد الظهر . اني بالغرفة نام بالهول ..
كملت كلشي حتى سبحت . اني منتظرة يكول ماكو السيارة وكلت مااحجي ماريد مشاكل ودعاوي وتهم بالعرض .
صبيت الغدا . رحت . خضر تتغدا وياي لو جوه .
خضر . لا وياج حبيبتي !
جبت الصينية خليتها بالكاع يمه .
خضر . دولمة اليوم يالله اول مرة اكل دولمتج بله شلونها ؟
اكل لا طيبه والله عاشت ايدج ..
كملت وسويت جاي ورجعت تمددت .
خضر بشائر هاج السويج . ساعة اربعه موعدج وي البنية مو تتأخرين اني طالع رايح لفاتحة وي عمي بس نتأخر انتي عندج فلوس واخذي وياج لو مصطفى لو زهراء يتونسون ؟
هاا يعني مترجعها للسيارة .
لا ليش ارجعها هدية جايبها الج واني كتلج الشي اللي اسويه محد اله علاقه بيه .
وعمتي؟
خضر . بشائر اني بين نارين رحمه لموتاج طفي نارج وارحميني يابنت الناس وخلي نار امي كافي عليه ونار الوكت والزمن عليه .
اوووك محاجيه شي اني ..
خضر: بشائر ارحموني ترا مرات اليصير وياي احس كلبي يوكف واتشاهد من القهر اني الله منطيني صبر يهد جبال بس ارحمني لخاطر الكعبه
بكلبي شسويلك قابل اريد أذيتك من ايدك الله يزيدك
خابرت ابوي شو استثگلتها ماكله خاف مايقبل
بوية اريد اكلك شغله خاف ماتقبل عليها .
هااا بوية بس لا ذبحتي ام خضر .
هههه لابوية شايفني مجرمه .
جا شني بوية.
بوية خضر جابلي سيارة يكول وراج دوام وليش بين الخطوط والسواق انتي تعلمي وسوقي .
هااا بويةخضير طلع من العشيرة بويةخاف نسوانه تگلب علينه ..
بوية شتكول خاف انت ماتقبل .
ليش بوية ماقبل رجلج وجابلج بس اذا فشخوه عمامه مالي علاقه ههه .
لابوية مايفشخونه هو سبع مينخاف عليه ..
ابوي:هسه علمود جابلج سيارة صار سبع
هههه اي بوية جا منو جايبلي هيج هدية غيرة سبع ونص
ابوي:الله يديم سباعيته وسلم وراح
.. ساعه اربع نزلت لكيت زهراء ومصطفى كاشخين وكاعدين بالغرفة يأشرون يكولون لاتسوين حركه وياااج نروووح ضحكت .
عطور تكللنه اطلعوا بسرعه .
طلعنه نضحك وخايفين من ام خضر .
اجت المدربة كعدت هيا اول بداية تسوق واني بالصدر .
طلعنه نضحك وخايفين من ام خضر .
كعدت تسولفلي الفرق بين الكير والاوتماتيك واني مثل الاطرش بالزفه وتسولف هنا دوسي هنا سوي وهنا باوعي .
كالت يلا شارع فارغ اني ادرب بيه البنات .كتلهاوالله ولاسوق اخاف .
وشكد حاولوا واني ماقبل بحيث صعدت زهراء ساقت حفظت الخطوات واني لا ..
رجعنه بالسته يضحكون عليه ..
ورجع خضر بالتسعه مسولفليه صعد يضحك صدك ماسقتي ولامتر .
يا والله ماجازف من اول يوم شنو ماريد روحي .
خضرر اني سيارتي گير عادي جا علمتج
لاخلينه على هاي البنيه حبابه وبنات بيناتنا
ويومية نروح كوة تعلمت ارجف تعلمت بس مو جريئة زهراء ومصطفى تعلموا واني لا ..
رجعنة لكيت عمي غزاي واكف بالباب .
مخوصر نزلنه وراحت المدربة لبيتها عمي غزاي . ولكم من شوكت نسوانه تسوق .
من هسة عمي .
مرت ابني فشخت ابن عمج تريد سيارة مثل بشاير.
ههههه واني شعلية .
عمي . تعلمتي .
زهراء لاجدو تخاف وماتمشي ترجف .واليوم خلصنه الدورة وخالة كلشي ماكو
عمي غزاي . باجر اني اجي اخذج هيا شني جك بك وامشي .
باجر اروح لاهلي اجيب النقل مالتي .
اني اخذج بسيارتج اذا خضر مايكدر نشوف لابوج السيارة خبصني ولك الحك بشوره تسوق سيارة لاتدعم الها ناس وتعال افصل .استأذنت من خضر ورحنا
اخذني عمي لااهلي
بقيت يومين يم اهلي واجاني خضر ورجعنه
ومن يجي خضر متلهف اليشوف اللهفة البعينه والضحكه
بس والله بس نوصل للبيت كلشي يطفى فجاءة ..
رحنه للمدرسة اخذت اوراقي وباشرت جانت مباشرة للكوادر
مدرسة بعيدة وجبيرة بس اول مادخلت الها حبيتها وحبيت الكادر وراها بدا الدوام عمي يروح وياي يكعد بالصدر ويباوع منا ويرجع منا وينطي تعليمات بس مرتاحه لوجودة احس بأمن وهو يوصلني ياخذ السيارة ويرجع وبالدرس الاخير اخابرة يجيلي وهيج مشيه اموري.
ام خضر عافتني وگلبت على ابن عطوروسمعت صريخ فتحت الباب واستمع الهم بلكي ماتت العمه
اسمع خضرر يحجي وي مصطفى خالولاتحرك گلب امك وتقهرها
ومصطفى ما ابقى اني عندي اهل واروح مابقى وياكم دقيقه وامي تجي وياي ماخليها هنا تبقى عايشين بذلة
خضر : صوفي انت تعرف بيبتك مريضه ليش تزعل من انسان مريض فاقد عقله ماتشوف اني شلون اهمل كلامها وساكت ؟
اوووو هاي العجوز وي مصطفى والله خطية عطور وجهالها
خطيه حتى عطور تكسر الخاطر ابنها يريد يروح لااجداده اهل ابوه وخطيه ابتهال يومية تجي تحجي وي امها
بس اني ماعرف شنو مشكلتهم لان اني بس على كد الطبه والطلعه اشوفهم
شفت عطور وسألتها شنو شبيكم شبيه صوفي
سلامتج بس يريد اهله بعد كبر ماسيطر عليه. وميتحمل مني حجاية ولا من بيبته وشسويله
بس هيا وجهه مطعون من تحجي وياية
ابتهال من تصعد متسولف تكول يردون اهلهم
وماعرفت القصة شنو حتى بناتهم مرات يصعدن يمي عصريات محد كام تصعد
...
واني وخضر خوات هم ..من اخر مرة بكربلاء وهاي هيا
بس سوالف بينه هواي .
اخذ راحته ورجع شخصيته لان عرف بعد مافتح هذا الموضوع وياه ..
بس ميسولفلي على قصة ابن عطور شبيه عاف البيت ..
شما نسولف
بس تبقى قهرة بكلبي جبيرة اني كمت احب خضر بشكل مينوصف حبـة بگلبي اموت من القهر عليه دمعتي متنشف علية يومية بليل ابجي علية لان خضر خوش انسان وادري بيه يحبني بس شنسول لحظة
انقهر من اشوف رجال عايش وي عائلته ومتونس وي زوجته خصوصا من اللي وياي بالدوام يسولفن مغامراتهن الرومانسية الليلية لو يجن بعده شعرهن مبلل لان مملحكات يسبحن . كمت انقهر ليش اني وخضر شناقصنه حتى مانعيش حياة مثل البقية ..
شكد مرتاحة بدوامي والمدرسة الجديدة والكادر كله زين سبحان الله فد طاقه ايجابية ولطافه صح كل وحدها همها شكل بس من يحسن بيج ضايجة يضوجن وياج ومن فرحانه يفرحن وياج وبينهن تعاون كلش حلو .. اكو معلمة هيا متوسطة العمر بس ملتزمة التزام ديني كلش حلو وعدها معلومات كلش هوايه ومعرفه علمية وعقائدية وروحانية ..
كعدت يمها كتلها اني تعبانه حيل بالبيت وممرتاحه لا اني ولازوجي ..
اخذتني واخذت جنطتها ورحنه
لغير ادارة نكعد نسولف
طلبت اسم
امي واسم زوجي وامه .
اخذتلي خيرة او كشف ماعرف هيا مكالت شنو .
عبالك كاعده وياي بالبيت ..
اول شي .
كالت زوجج بعيد عن الله
اكو نفس شيطانية واكو عمل شيطاني قديم ويتجدد وميروح ابد من هذا البيت .لان مدفون باحد الزواية !!!
والعمل مشتغلاته اثنين وشاهدهن الثالث !!
نفور وابتعاد بينج وبين زوجج ابتعاد قوي وشكد تحاولون تتقربون متكدرون انتو مثل الاخوة والاعداء !
بس شيطان حولج واحد البقية كلها زينه .
وراح تعيشين ممرتاحة الا بتغير شي شنو الله اعلم لو روح تطلع لو تتركين زوجج تنفصلون وهذا اريح الكم ماطول الشيطان مسيطر على زوجج مايتخلص منه بسهولة وزوجج.
.. صدق الله وكذب المنجمون ..
خلتني صافنه ودمعتي بطرف عيني .
زين انتي بدون مااحجي عرفتي كلشي اني شسوي ؟
لاتاكلين ولاتشربين الا من ايدج .
اقري قران سورة البقرة يومية اقريها لو شنو تشوفين اقريها لو توكعين ويغمى عليج اقريها .
وهم اتسوي الاشياء اللي اطلع الطاقة السلبيه من اي بيت والمتعارفه عدنا من امهاتنا ؟
.. صدق الله وكذب المنجمون ..
وشنو هنا ؟
افتحي الشبابيك بوقت القران وبيتج مسحي بملح خشن وخل دايرة عليه السنه اللي نسمي حايل من راح تمسحينه المي ذبي بالسطح .
راح اول يوم وثاني يوم نفوسكم تتعب وراها ترتاحين جربي ذني لمدة شهر وراها كليلي شتحسين انتي وبس !
جابتلي الملح الخشن والخل وسويت مثل مكالتلي وخضر انكلب علية طنطل
حجيت الها
زوجي يدخل عصبي ويطلع عصبي حتى ميشوفني بعيونه
اني التزمت بالقران وسورة البقرة كمت احس واحد يخنك بية وارجف واعرك واخاف يوم بعد يوم
كمت احس واشوف اشخاص يمي تخطف
.. خضر نهائيا تركني
ورجعت من الدوام لكيت كنتوره فارغ وغراضه ماخذهن
نزلت وراه للشارع امشي خضر ليش اخذت غراض
خزرني كلي ارجعي لبيتج لا هسه هنا اكتلج ؟
رجعت ركض وقفلت الباب
واصيح والله مو طبيعي اكو شي موووووطبيعي ارررحموووووووووني
اروح للمعلمة تكول استمري بالقران وتمسكي بالله
وفعلا يمكن صارت عندي قابليه اقرا قران ساعتين تلاثه واصلي واستغفر ربي اتعوذ من الشيطان
والمعوذات متفاركني
اريد اعيش بسلللام وي نفسي
اني كمت اكعد وانام مرتاحة احس استعادييت بشائرالقديمة من شكل ونفسية جان عبالك جبل ع متني انزاح رغم اني شكد ملتزمة ..
احس ابتعاد خصر راحة تامه اليه . يوم عن يوم يخلص المسواك وخضر كلشي ماكو
اسمع عطور تتوسل بيه يصعد يجي گوة
يصعد ينام بالهول لو ماكو ..
كمت اجيب اكل على كدي اطلع من اسواق يم مدرستنا اجيب ريوك جبن اوصي العاملة على خبز اجيب بيض هيج طماطة وخيار بتيته يعني اللي اكدر اشيله بجنطتي المدرسية واي شي اسد جوعتي ..
ومحجيت ولاكلت ابد ابد .
لا اشكي لام ولا لاخت ولا حماة
بقيت محتفظه باسرار بيتي وساكته لحد ما الله يفرجها علية حاولت وبكل قوتي ما تطلع مني الاساءة لخضر ابدآ لان اني اعرف هو انسان مو بوعية ..
يصعد يمي دايخ عبالك سكران وهو مشارب انسان طبيعي .
يصعد احسه مجبور لان اسمع عطور تحجي عليه ..
رجعت من الدوام كاعد وي امه بيدي علاكتي مسواكي وعطور موجودة كلت السلام عليكم وصعدت خليت العلاكة ورحت ابدل دكت الباب رحت فتحته عطور .
ها شعجب اليوم ممداومة .
عطور اي والله تعبانه وماكدرت اداوم ..
اي والله الدوام متعب .
عطور . تعالي تغدي ويانه .
لا تسلمين جايبه وياي لفات ومتسوكه وخير من الله تعالي انتي اكلي وياي ونسيني حتى زهورة ماتصعد .
عطور عدها دراسة وهم متلحك
الله يوفقهم جهال مظلومين
كمت اطلع المسواك .
واعزل .عطور شنو هاي بشوره متسوكه ؟
اي والله كل اسبوع اجيب احتياجاتي ومرات اكل بالمدرسة واجيب وياي ماكدر انزل اتسووك اجيب اشياء بسيطة .
عطور . تقربت من الثلاجة فتحتها ليش خضر مايتسوك !
اوووو والله حتى نسيت شوكت اخر مرة خضر متسوك وصدك ضحكت لان السالفه ميته عندي .
عطور . صفنت . كالت بله عيدي كلامج.شنو ؟
عطور اني مامستوعبة اليصير بهذا البيت وحياتج انتي وخضر.
اكعدي لا تنصدمين ترا الشغله عادية والله اني تعودت اني وخضر زواجنه تقريبا منتهي منتظرة تخلص السنه الدراسية وارجع لبيت اهلي وارفع قضية طلاق !!
عطور . شنو البينكم بشائر ترا عقلي راح يوكف .
ماكو شي بينه حتى يصير شنو .
اني وخضر رجعتنا من اكبر الاخطأ اللي اني اتحملها واللي اعض اصبع الندامه الف مرة بس على شغلة وحدة على تشتتي وبعدي عن اهلي غير هذا ما متندمة عليه ابد خضر ورقته محتركة عندي . وحاليا شبه منفصلين بس بنزاكه ..
عطور . اني هسة مصدومة فوك قهري قهرج انتي وخضر .
اني كلبي حاس اكو شي احس خضر مو بعالمنه .
والله ياريت واتمنى تقنعنه يروح لطبيب نفسي او روحاني وتقنعي يرجع لقبل من جان يصلي ويصوم هسة عبالك ملحد .
عطور . اني هسة مصدومة فوك قهري قهرج انتي وخضر .
اني كلبي حاس اكو شي احس خضر مو بعالمنه .
عطور . اعوذ بالله اي والله اني هم اشوفه لاصوم لاصلاة ولا دين اشوفه واستحي احجي وياه رجال شطولة وشعرضة والرتبه واروح اعلمه ..
لا احجي وياه اخته الجبيرة يسمعلج اكيد .
عطور . الله كريم . تدرين اني راح ابجي من شفت لفاتج ومسواكج يعني لو عمي يدري يسكت ع هل الوضعيه .
لا احجي وياه اخته الجبيرة يسمعلج اكيد .
الحمد لله عندي راتب ما محتاجه احد اصرف واجيب والبس واسد جوعتي بزودي وبتعبي . وهيا ايام وتخلص عيب احجيها بصراحه لااهلي .بس اكيد هما حاسين بس ما يكدرون يحجون لان مجرد احساس !
عليج الله الحجيته يبقى بينه اني مرتاحه هيج وعوفي خضر براحته وتردين الصراحةهاي رادة امج وراحتها تعاسنه على حساب ابنها يمها والف عافيه ابنها رجع لحضنها ههه
عطور كامت من يمي وهيا تفرك بيدها .
قفلت بابي وتغديت صليت مسحت البيت رجعت توضيت قريت سورة البقرة احس اول اسبوع كمت اصارع روحي مصارعه رحت كتلها كالت استمري
يوم احس رجليه ترجف يوم احس عيوني تبوخ
يوم احس بطني توجعني يومية من اقراها بجرة وحدة تطلع عندي اهراض مختلفة . كمت انام من وكت واكعد بصلاة الفجر اقراء شوية قران جنت يم اهلي دائما نكعد بالصلاة الصبح واقراء قران والله جنت مدلله بزود امي وابوي واخواني هسة عبالك غريبة بوسط اهلها يمكن الناس تتحسد بيه على هيج رجال وبيت وسيارة يضنون السعادة البيها اني لاحدود الها .
يلاااااا صيت الغنى ولاصيت الفگر ..
اندك الباب .
فتحته خضر بيده مسواك ويدخل بيه ..
كال اني انسى اجيب انتي ليش متذكريني!
وكفت بالباب كتله اوكف نزل المسواك قبل لا اشمرة منا وتعرفني اسويها.
خضر . بشائر لا تستهرين .
اني مو مستهترة وتعرف كلش زين ولو استهتر هسة فاضحتك بين العالم رجع المسواك وارجع وين ما جنت قبل لا انزع ثوبي واستهتر بالشارع عليك !؟
رجع المسواك عافه بالباب ونزل على كيفه شلون بشر مسطور شلون واحد طالع من بنج شلون واحد بغير وعي حتى شكيت يشرب مخدرات !؟
او يتعاطى شي . لنقهرت عليه اكثر ما مقهورة على روحي لان اني قوية وطبيعية وعندي ايمان قوي بربي ومتمسكة بربي واقاوم هاي العيشة بدون تدخل الاخرين وبدون ما اشكي لاحد غير رب العالمين واحس رب العالمين جااااي ينطيني قوة وارادة اقاوم كلشي حولي ..
كمت ادعيله من كل گلبي ..
طبعا اهلي يخابروني باليوم مرتين تلاثه والامور كلها طبيعية عمي عزاي عمتي من يسألون كلشي طبيعي وياهم ..
نزلت قبل السبعة اداوم عادي بيدي عباتي وجنطتي قفلت الفوك ونزلت لابسة بنطرون كابوي ومانتو فوك الركبة وشال يعني معلمة بمدرسة بنات شألبس ؟
شفت ام خضر ماكلت صباح الخير بس اذا عطور وجهالها اسلم خضر وامه لا صارلي فوك الشهر لا سلام ولااباوع عليهم ابد ..
هزت ايده كالت لبس الكحاب شلون بعد يصير ..
استفزتني رجعت كتلها امرية جبيرة رجليج والگبربدال ما تدعين تصلين تذبين بلا على العالم عيب على شيباتج .
هيا صاحت خضير تعال لم هاااي الكحبة الهايجة علينه من الصبح الله اعلم وين تروح !
طلعت واني بالمطبخ لبست عباتي كلت لكبر لكل عار .
والراجدي اجاني من خضر مدري منين طلع راجديات وسحلني من عباتي ليفوك اصعدي ماكو دوام.
عوفني شبيك اسمع يلا تضرررب
خضر:اششششش صوتج ماسمعه
مصطفى واخته
بعدهم ممداومين
كوة نزلوه الباب وقفلته وجبت التخم خليته عليه خابرت المديرة ابجي اريد اجازة حتى لو تغيبني هيا من سمعتي ابجي كالت راح اسويلج اجازة اليوم وباجر اذا متكدرين .
قفلت بابي وابجي منهارة
بالعشرة ابتهال ادك بالباب
بشورة فتحي الباب عليج الله فتحي اني ابتهال خليني اشوفج شكو صاير افهم منج
مجاوبتها عطور دكت الباب
صحت عطور لتعبين روحج مراح افتح الباب
حتى موبايلي سديته ..
جان كلشي ماعندي تمن قليل ومعجون وشعرية سويتهن واتغدى واتعشى بيهن يومين على نفس الاكلة ..اكل خاشوكة واتذكر لمت اهلي واكلهم واتذكر جهاد شلون ينصب عليه شكد اكل وضعيفه وصدك جنت شكد اكل لزمت بطني اشتهيت اكلهم .. وجعت بالزايد من حركت كلبي كمت ابجي على الاكل .
من يوم اللي طلع خضر بحياتنا احس ماتهنيت ولايوم
شلون جنتت مرتاحه بيت ابوي ولاهم ولاغم ولادمعة نازلة من عيني
وهنا من يلتمن يلتمن اجتلي الدورة ماعندي حفاضات شكتت دشداشة واستخدمتها . مي ارو خلصت فورت مي البوري وترست الثلاجة وهيج خلصت الاربعاء والخميس والجمعة والسبت بعزلة
شكد يحجون يردون اني مااارد عليهم ..
بس الجوع كتلني كتل كمت مااشوف دورة وجوع لكيت محلبي سويته بلاشكر واكلته .
بيوم الجمعه شلكيت بالمجر جيس خبز اليابس جنت اجمع بيه الخبزات اليبقن
لزمته وكمت ابجي سويته تشريب محروك اصبعه اطيب شي ..
اتريكت بيهن اربعة ايام حسيت نفسي مقاومة وحسيت نفسي اكدر اعيش بأي ظروف ومااحتاج لااحد .
ابوي خطيه وامي شكد يحسون بيه يتصلون من افتح تلفوني
كالو ا راح نجيج كتلهم لا اني جايتكم بس تجون بعد خضر يكول قبل اسبوع اهلج يمج واريد اجيكم خميس جمعه وارجع السبت العصر ..
قررت انهزم لبيت عمي نزلت مبدلة . خليت بجنطتي فلوسي كلها ذهبي جنسيتي والشهادة والجواز .
خليت ملابس للدوام لباجر .ونزلت
مالكيت احد بالهول وبالمطبخ ماكو احد بالطرمه لكيت خضر يخابر عفته وطلعت اجه بسرعه وراي بشائر بشائر..
كمت اركض لبيت عمي ماباوع ليوره اخاف منه .
دخلت لبيت عمي الهث .
مرت عمي كاعده بالطرمة
هاااا شكو شبيج عمه .
لا مبيه اجيت مشي وجان جلب ينبح وراي وخفت .
دخلتني وجابتلي ماي
دخل خضر
مرت عمي انت شلون تعوف مرتك وحدها والجلب ينبح وراها ومخلوسه!!
خضر . لا اني امشي وراها ..
مرت عمي شبيج بشوره
لاعمه ماكو شي بس مختنكه من البيت كمت ابجي ويسكتون بيه
شنو بقيت للعشاء ميته جوووع واحس ريحة الاكل موتتني من اجه العشاء اكلت لمن مليت .
بنت عمي يمي كاعده وعمي ومرته ..
عمي شنو مماكلة بويه .
تريد الصدك اي مماكلة وبجيت .
مسحت دمعتي شمالني ابجي على الاكل لمونه .
مرت عمي . هو اليشوف ام خضر شياكل .
عمي . اسكتي انتي غير اعرف شكو ليش ماتاكلين شصاير .واجيتي ركض من رجلج ؟
عمي اني كلش تعبانه وماكدر اخابر اهلي واكلهم لان عندي دوام ويفصلوني اذا اروح زعلانه بس اني حيل تعبانه بعد ماكدر اعيش وي خضر وامه .
عمي . انعل ابهاتهم هل الكواويد وما تحجين شمالج . هسة اروح اجيب كل غراضج تكعدين هنا وعلي واذا وصل خضر وحجى الا بالعكال اطيح حظة وحظ امه اني اعرفهم واعرف هااااي امه مو ادميه بس ااااخ دخلت روحي وفشلت روحي وي اخوي .
مرت عمي . بهداي خويه بهداي خلينه نعرف شني السالفه ..
السالفه ياعمة ياكل ويشرب وينام يم امه واني بالطبه والطلعه تحجي عليه وتذب عليه حجي موزين ومن رديتها خضر ضربني واني صارلي جم يوم حابسه روحي بالغرفه هسه اجيت شاردة منهم .
خضر لا يريدني ولا يباوع بوجهي
لا يكول زوجتي شبيها مبيه
شتاكل شتشرب حسرة عليه المي النظيف افور مي عمووووو منو بقى يفور مي ويشرب تقبلوها
عمي :طيح حظهم عارات وانتي ليش ساكته
مرت عمي . عرفتج من دخلتي علينه وجهج اصفر وخايفه وخضر دخل وطلع ماحجة ابقي هنا عمه منا لمن ابوج يجي .
لا ماريد ابوي يدري بس اخلص الدوام واني اشرد الهم واطلب الطلاك لان اذا ابقى اموت والله اموت وانت عمي
كلشي لاتسوي عوفهم هما لايجون ولايوصلون ابد .
لليل صدك محد اجه . اجت عطور خطيه
دخلت عمي كام يحجي على امها وخضر وهيا مخليه ايدها على خدها .. كالت تعالي رجعي وياي يا بشائر لابوج يسمع وعيب .
كتلها ماروح واريد توديلي ملابسي مالت الدوام .والبيت .
ماحجت لان ماتعرف شتكول .
راح وياها عمي وابنه وديته وياه حتى يهدي خاف يتعارك وي خضر .طبعا خضر يعني امانة لله يحب عمامه وولد عمه وعمي شما يحجي عليه مايجاوبه ابد يحترمهم ..
ساعة وجابو غراضي بجنط وعلاليك ما مخلي شي عمي ماجايبه حتى كلاص مطبوع على اسمي يكلي خاف ام خضر تشرب بيه ههههه .
بقيت يمهم عمي ياخذني ويجيبني بسيارته سيارتي بقت باب عيالي والسويج والسنوية كلهن عندي ..
بس ارتاحيت راحه .
مرت عمي تسولفلي تكلي بين يوم ويوم اوديلج خبز مرات غدا ساعة12 بين يوم ويوم
كتلها كلشي ميوصلي واشتري من يم المدرسة اكل وخبز ..
كعدت تسولفي على كطعهن ام خضر وعجوزها شلون كطعن بيها وباامي وشلون جانن مايحجن وتقريبا كل الصار بيهن صار بية وسبحان الله موقف الرجولة مثل موقف خضر حاليا مخلوسين وخرسان ودايخين ومن عازلين يلا شايفين وجه الله وصاحين على عمرهم..
والله ايييي عمه اي هو خضر هيج عمه رجال خارج البيت طبيعي ويمي يكلب طنطل كلشي سويت قران وصلاة وادعية شسويله بعد عمه والله مليت .
اربعة ايام يمهم اليوم الخامس ساعه 2ونص ستوني نمت وكالوا اجه عمي ابوي!
بس لاعمي مخابرة كمت طلعت بوسته وحضنته وكلي بوية ليش عايفة بيتج وغالطه على مرت عمج؟
اني . ؟
ابوي:ايي انتي رحت لبيتج لكيت مرت عمج وحدها تكسر الخاطر وتبجي وتشكيلي تكلي غلطت عليه وتگول مكابلتها وكايله كبر الها موووووعيب وعلى خضر وتصيحين وحابسه روحج وبعدين وعافت البيت وراحت لبيت عمها .
بويه هيا داست بطني وجاوبتها وتعارك وياي خضر وزعلت .
وليش تجاوبيها مو حرام عليج ويلا كومي لمي ملابسج ترجعين لبيتج وتعتذرين من مرت عمج وتبوسين راسها وتعتذرين من رجلج غير خير وما خابرني يشكلي منج لان يحبج ويريد رضاتج .
عمي ادخل ومرت عمي جان ابوي مقتنع بكلام ام خضر لميت ملابسي ورجعت مكسورة ودخلت ام خضر كاعدة وخضر يتغدى بعده بملابسه الدوام شافنه كام لابوي يرحب بيه . ابوي كال بوسي راس عمتج دنكت بسته
كال بوسي ايد زوجج !!
هم بستها هو ماقبل خضر كاله لاعمي شصاير وضحك .
صعدت فوك واني يا الكسرة اللي مكسورتها .
اكدر احجي ومااجي بس هلمرة ماردت ارد ابوي واكسر كلمته واول مرة يتدخل لا كبرت عقلي زيادة .
صعدلي ابوي يكلي صيري سباعية وحافظي على بيتج ورجلج وانتي عازلة وخير من الله على شنو هل الطلايب ترا الطلايب ماتجيب الا الكرة والمرض .
اي ان شاءالله..
راح واني بقيت اعزل بس كلبي محترك ناار .
دخل خضر كعد على الجرباية ينزع بحذائة وجواريبة
اي بشائر حمد لله على السلامة ؟
شنو شايفني جنت مسافرة لو طالعه من العمليات.
لا مسافرة جنطج هواي ؟!ويضحك .. يستفزني .
نزع ملابسه وراح سبح ونام على الجرباية..
كمت اركع بالبيان تركع والمجرات وكمت انظف شغلت البنكة والجو بارد وفتحت الشبابيك.
فتحت التلفزيون على قناة المجد قران .
وهو نايم عبالك ميت ولايحس ..
كعد كال مشغلة بنكه تنتقمين مني بلاعيمي توجعني ليش بشائر حيوان اني نايم مشغلة بنكة فوكي .
رجع كال بلاعيمي يمكن التهبن .
يفتر ويكول اني تمرضت ..
صار المغرب هو صخن ومتغدي بلحاف وبطانيتين .
شوية وندك الباب صوت عمي فتحته .
شايل بيدة علاكه وجدورة
كال هاي عشاج وغداج باجر .
واجت بنته وياه وصعدولي مسواك كومة دخل شاف خضر نايم ومتغطي .
خضر . كله من بشائر شغلت البنكة واني سبحان
مايكدر يكوم ويوكف يرجف .
عمي تعالي ساعدي رجلج يلبس هدومة.
عندة ايدين ويلبس !وادي توجعني ماكدر؟ عمي يعضلي شفه عود تعاي اني انططيت الطرشة
وصدك عاندت ما للي علاقه ولبس وحدة ونزل وياهم ..
شافته امه صعد مابيه شي نزل منتهي .
واخذوة للمستشفى وكفت على الدرج تدعي عليه .
فتحت باب الدرج البينه سويتها بيده اشارة الحرگه وهزيت ايدي وسديت الباب ..
صح حركات تافهه بس تضوج المقابل واني روحي طالعه منهم بس شسوي هذا الكدرت عليه احسن مااحجي وتروح تتشكى واطلع اني الغلطانه .
اسمع راجعين ومعلكيلة مغذي
لكيت ملابسة معلكه مالت الدوام والداخليات لزمتهن وصحت زهراء خاله .
اجت هاا خالة .
هاج ملابس خالج اني مابيه حيل اغسلهن واريد انام انطيهن لبيبتج ..
كالت بيبي تخربطت وضغطها صاعد وهسة اخذوها للطوارى.
كتلها ذبيهن على الغساله مالي علاقه .
كالت انطيهن لماما محد مبتلي بهذا البيت غيرها
اييي عفيه نزليهن لامج .
احس حوبتي وكعتهم اثنينهم والله حرگوا كلبي من صدك وتحسبت عليهم . فتحت صدري ونشغت ناخية الله بخضر امه كون متكومون من الفراش حتى حاجتكم تقضوها جواكم.
حقدت عليهم من كل وگلبي
وحتى زعلت وي ابوي وخابرت امي وحجيت وعاتبتهم وكتلها اعتبروني ميته مالكم علاقه بيه بعد..
ثاني يوم الصبح البيت هدوء .
طلعت للدوام شغلت السيارة شوية لان واكفه صارلها جم يوم ..
بعد ما حسيتها مابيها شي رحت وداومت ورجعت . دخلت للمطبخ عطور تسوي الغداء
هلو شنو ممداومة
عطور: اي مجازة خضر مريض
مشيت عبالك مسمعتها
عطور وكفتني
بشورة زوجج مريض انسي كلشي وشوفي
كملت طريقي عفتها هيت محتارة بااخوها وامها .
شكد حلو من خالية من المسؤولية وعايشة وحدج غداي عمي جايبة ماعندي شي البيت نظيف انام براحتي اكعد براحتي اداوم براحتي ..
متزوجة مع وقف التنفيذ ..
شكرا لزيارتكم عالم روايات سكيرهوم
