رواية عشك أل فراس الفصل الثامن بقلم زينب نور
علي: من بعد ذاك اليوم صرت شخص ثاني تمامًا شخص لا يبالي شخص قاسي بشكل مو طبيعي ما يهمني احد أبدًا ما اهتم لشخص أبدأ
بعد ماخلصت الدورة وبعد ما خلصت التدريب التحقت اول التحاق كان للفلوجة ماكانت صعبة عليه ابد ومرت الايام ورا مانزلت رحت للزيارة للامام الكاظم علية السلام
وهنا رجعت التقيت بنفس البنية الشفتها بس كبرانة وحليانة اكثر عرفتها من عيونها لهسة مرسومة براسي راحت عيني وراها كانت تمشي ويَ امها يمكن لان مراة متوسطة العمر وبنية تطلع بكدها ما اعرفها منو
ضليت اباوع وراها فززني صوت ولد كان وياي اسمه مهيمن انا ويا نفس الدورة
مهيمن :علي محمد لو انا غلطان
علي: لا عزيزي ماغلطان حياك الله
سلمت عليَ ويا اخوانة ثنين غيث ومهيب عرفني عليهم وراحوا من طلعت شفتهم واكفين كلهم سوا بعدين طخت عندي ذول اخوانها!!
زرت ورجعت للبيت اول ما وصلت اتصل عليه رقم غريب جاوبتة
علي:الو
ابو فهد :شلونك بوية
علي:من الله بنص الخير
ابو فهد : مبروك على التخرج ان شاء الله اشوفك مهيب
علي:قصدك تسمع بيه مو تشوفني
ابو فهد :ارجع بوية ارجع وتريدة يجرالك اذا مو لخاطري لخاطر امك خليها اشوفك صارلك هواي مبتعد عنها واذا تريد بس شوفها وارجع لو انطينا مكانك تجي تشوفك وترجع
علي: عدها اربعة غيري خلي ادير بالها عليهم وانا خل تنساني
ابو فهد :الام ما تنسى ضناها لو شيصير
علي:شعندك متصل عليه ؟ومنين جبت رقمي
ابو فهد : اخذتة من امك اتصلت حتى اكلك ارجع
علي: وانتَ متوقع انُ بس ادكلي ارجع ارجعلك ركض مثلًا ؟ بعد لا تتصل لو ادري انتَ چا فلا رديت بس عبالي فد شخص مهم
ابو فهد :يعني هسة انا مو مهم عندك
علي:ليش منو انتَ حتى تكون مهم عندي ؟
ابو فهد :خوش بوية خوش في امان الله
سديت التيلفون وكمت تعبت ياربي والله تعبت من الوحدة من عيشتي من غربتي عن اهلي لا تكمل فرحتي ولا اكدر افرح وكلشي ضدي
كرامتي وعزة نفسي وكبريائي تعبني التفكير يتعب صارلي 5 سنوات انا ماشايف امي
طلعت دفتري كمت اكتب واشخبط بيَ بالاخير طلعت وياي قلب وبيَ سهمين وكتبت بنصهن اماه ماعرف ليش هيج رسمت بس العرفتة جنت محتاج امي واكو شي يمنعني انُ احجي وياها
التهيت بدوامي المتعب ويومي صار يخلص بالدوام واذا انزل من الدوام ما اطلع قليل اخلصها بالبيت
بيوم من الايام صادف صيف وحارة والكهرباء طفت الساعه بـ2بليل فجاة انقطعت بهاي الدقيقة وبهاي اللحظة بالضبط اندك الباب لكن مو الباب الخارجي
باب الصالة الداخلي دكة خفيفة وبنفس الوقت اندك باب السطح بنفس الدكة انا كنت نايم بالغرفة الجوا وسلاحي يمي شغلت ضوء التيلفون وشلت سلاحي وطلعت من الغرفة بالضبط مثل خطوات المداهمة بس اندليت الدرب طفيت الضوء
ودكت الباب كل شوية يندك اكو باب ثاني اكدر اطلع منا للترك الورا تكدر من خلالة تطلع اذا افتح باب الصالة ممكن اكون ضحية سهلة ممكن سلاح شايلين كنت اشوف بس الخيال واكثر من شخص والباب الفوك مستمر يندك أبدًا ما توقف بنفس الدكة
طلعت من الباب الورا وسلاحي متوجهه عليهم صرت وراهم كانُ ثنين
علي :سلاحك بالكاع وايدك على راسك اييي حركة افجر روسكم
_ههههه راسك الراح يتفجر
علي:نزل سلاحك وايدك على راسك اقسم بالله اكصبكم كصب
نزلوا سلاحهم بالكاع ورفعوا ايدهم صار ورا ضهري حايط خاف لا يجيني احد تقدمت عليهم والسلاح بيدي ومتوجهه عليهم اقل غلطة اكون ضحية الهم بسهولة
علي:افتر وخلي ايدك على الحايط وانزع الساعة وشكو شي عندك طلعة
_ ماجايين نسوي شي جايين نبوك
علي:وبس انتم من تبوكون ادكون الباب حرامية محترمين
واحد كان عند مسدس فقط والثاني كلشي ماكو وهنا صارت حيرتي شلون اكدر اسيطر عليهم
وطبعًا كل هذا الضرب على الباب الفوك مستمر بس صار اقوى
اخذت سلاحهم ومشيتهم كدامي والسلاح متوجهه عليهم هيج شغلة وانت شخص وحدك وضملة وكوه تشوف والباب الفوك سطرني سطر دخلتهم لغرفة وقفلت الباب الغرفة كانت فارغه تماماً
بعد ما تخرجت من الكلية العسكرية طلعت من بيت عمي اشتريت بيت بأسمي الغرفة كانت فارغة كلشي مابيها قفلت الباب عليهم وصعدت لفوك
كد ما الدك دوخني فتحت الباب بدون تفكير صار بوجهي شخص ما اعرفة
_دخيل عندك
علي:منو انتَ
_شارد من ناس يردون يكتلوني واني دخيل عندك
شكيت بسالفتة وما ارتاحيتلهه جاي يبيع علينا ماي واحنه اهل الثلج
علي:ادخل اوكف هنا ودير بالك تتحرك وايدك لفوك اذا نزلتها اكسرها الك
سوا بالضبط مثل. ما كلت دفعتة على الحايط صار ضهرة عليه رفعت التشيريت مسدس وسجينة وبجيبهه حبوب كرستال اللي هيَ مخدرات
علي:دخيل مو ؟
_همَ ورطوني
علي:منو همَ
_الحاج سامر احنه من طرفة
علي:هههههه انتّ ومنو
_بعد ثنين وياي
علي:بس انتَ محد وياك
صفن بوجهي وطلعهن كلهن شمرتهه يمهم بالغرفة الحاج سامر يفتر على روحهه
اتصلت على جهة مختصة بهذا الشي اجوني اتفاهمت وياهم وشرحتلهم الموضوع سلمتهم الحبوب مع دلائل عندي كامرات بالبيت كلها خارج وداخل وتيلفوني يسجل صوت سحلوهم وراحوا الكهرباء همَ فاصليها فقط عن بيتي شغلتها ورجعت باوعت لساعه بـ5وربع طارت خوما طارت
راسي انسطر فلم هندي والحاج سامر شيريد ومامعقولة يدزلي ذول اصغاار وناعمين عمرهم مايجاوز العشرين سنة !
الحاج سامر نفسه الخطفني قبل ويا بعد شكم شخص لكن الحاج سامر هوَّ قائدهم
اتصلت علية امي بـ8 الصبح ما جاوبتها بدلت ملابسي وطلعت افتر بالسيارة مليت من البيت وماعندي دوام
رحت لابو الورد اللي تعارك ويَ عمر مكبر المحل حتى بنات تشتغل بيَ
علي:السلام عليكم
صاحب المحل :وعليكم السلام
علي:تذكرني ؟
صاحب المحل:مو انت الي كنت تبيع مي يم السيطرة
علي:جيد ذاكرتك قوية تذكر من تعاركت وي الولد الكتلك شغلة عندك وطردتة شكتلك بالضبط
صاحب المحل: شتريد مني
علي: انتَ كول شتريد اسوي بيك
صاحب المحل:اطلع برا ما عايزني زبايل
علي:هههههه ضحكتني والله
صاحب المحل: جاي اكلك اطلع برا لا اقسم بالله اخابر عليك الدولة يسحلوك سحل
علي:اذا انتَ خوش زلمة خابر انوب دولة بكبرها
طلع تيلفونة خابر انا كاعد اقلب بالورد
بنيه : تشتري ؟
علي: لا مو حلو
رحتلة لكيتة واكف بالباب خليت ايدي على كتفة ووكفت يمه
علي:ها شو ما اجو اتصل مره ثانية كلهم راح يشرد لو تلحكون لو لا خل يجون بسرعة
خزرني ودار وجهة شوية واجو على حظة مدري على حظي الولد اعرفة
اول ما نزل الضابط شافني ابتسم
علي:اهلًا وسهًلا
صاحب المحل:اني المشتكي على هذا
الضابط:ليش شمسوي
صاحب المحل:يهدد وهوَ كله خلك زبال
الضابط:زبال؟ اخي هذا ضابط شتحجي انتَ
صاحب المحل: يجذب عليكم
علي:اعتقلوني، انا منتحل صفة ضابط برتبة لواء ومخلي صورت م.اول واكول أنا ضباط بوزارة الدفاع وانشر صور رتبة ملازم يتبع الى وزارة الداخلية
صاحب المحل:شتقصد
علي:ياحبيبي انا كبل سنوات كتلك انا ما اتعارك انا اللعب سكتاوي فـ من تجي حضرتك تنتحل صفة شخص هاي ما تعبر عليه والكلام اللي كلتهه الك انفذه وما انسى ابد لا تتوقع واحد يحط راسهه براسي ويهيين صاحبي واسكتلة وانتَ هواي رفعت خشمك ومثل ما يكولون الدنيا دواره ودرات الدنيا .
وهيج مرت الايام التقيت براهب وعمر ونمر اكثر من مرة امي جانت تتصل ومرة اجاوب وعشرة لا
اكتفيت بنفسي ودوامي وعزلت نفسي عن الكُل فقط دفتري وياي بيَ كل تفاصيل حياتي وتفاصيل يومي ابسط التفاصيل اكتبهم
قبل دخول داعش الى الموصل اجت الترقية وترقيت
وبعدهي تم التحاق الى الموصل صادف بداية دخول داعش كان الوضع غير أمن والاوضاع متخربطة بشكل ناس خايفة وناس تركت المناطق وطلعت بس قليل
ايام منين ما تباوعلها صعبة وانطلق انذار بكل العراق وتأزمت الاوضاع بشكل
بدينا نقاتل داعش بكل قوتنا بدايةً كانت صعبة داعش كان الطرف المسيطر اكثر لان دخولة مفاجى وبشكل قوي
تاريخ 2014/6/10 سقوط الموصل بيد داعش الارهابي
المشكلة مو هنا المشكلة البعض خلوا ايدهم بيد داعش وصاروا ضد الجيش وضد القوات الامنية بالكامل كانوا فرحانين بشكل !هاي التكتلك
ضلينا اشهر على هذا الحال نقاتل لكن كانوا يكثرون ما يقلون اجانة أمر من بغداد انسحاب لبغداد بعض من الضباط لدراسة الوضع الامني طلعنا من ضمنهم انا وراهب ونمر بصعوبة كدرنا نطلع من الموصل
دخلنا بغداد كان الخوف على الكل وانتشار امني مكثف
بعد خطط ودراسات هواي أجانة امر انُ ندخل ويَّ داعش ! لازم نتحضر ونصير وياهم كذلك ادربنا
ومن بعدهي التحقنا
علي:نمر السانك مو تجفص
نمر:ابد ولا يهمك
راهب:نمر انت هواي تحلف مو تكابلهم وادكلهم وحك غيرة ابو فاضل
نمر: وحك غيرة ابو فاضل ما احجي عمي شبيكم شني السالفة
توجهنا احنه وبعد ويانة كم واحد هناك ينتظرنا حسام هو صاحب الخطة احد قيادات داعش وصلنا واستقبلونا
نشوف البعض فرحان بيهم ضلينا يمهم يوم وبعدهي التحقنا بغير مكان اللي هوَ بي تدريب ومن عنده يتم القصف والهجومات استقبلنا حسام
حسام :ديرون بالكم كلش زين اقل غلطة بالرجلين ترحون اول شي راح تتدربون اسون نفسكم ما تعرفون شي ارموا غلط بعدين راح يخلونكم تحت المراقبة لفترة من الزمن وبعدين راح يسولكم اختبارات يعني يخلونكم تفجرون تقتلون مع مراقبة يلا يثقون بيكم فـ ديروا بالكم كلش زين ،وادري بيكم سباع
نمر :ولا يهمك نسحكهم بالقندرة
حسام :انتَ اكثر واحد خايف منك
نمر:والله عيب عليكم
بدينا بالتدريب ونمر يمي كل ساعه خازرة
نمر:عيونك تخبل
علي:سد حلكك واسكت لا ننفضح
اكثر من مره نرمي على الهدف خطأ عود ما نعرف خامس مره نمر جابها صح
داعشي :ما شاء الله
نمر:الله ياخذك بجاه محمد
علي:كعدتنا هنا ما مطولة لو عدام لو عدام من وراك
استمر التدريب أسبوع كامل وحسام مخلي ايدة على كلبة من نمر لان مايسكت بعدين اجانه بليل خنك نمر
حسام :ولك حلكك سده راح تموتني بسوالفك
نمر :وخر خنكتني من خنكك البين شتريد مني وجهك جنه جوب
حسام :ولك بابا شغلة صعبة هاي مو مال ضحك وتحشيش ارواح الناس بيدنا المعلومات بيدنا سد حلكك وشكلك سوي من كتلك اضرب غلط تروح تجيبها صح من خامس مره مطي انت مطي
نمر :چا خامس مره هواي واسكت عني لا افضحكم فضيحة
راهب:يابه لا تخاف شبيك والله سبع ماينخاف عليَ بس هو ملكوف
نمر:عود ابن عمي حزام بنطروني ما اخليك مو حزام ضهري
ورا فترة بدوا يثقون بينا صرنا نطلع وياهم نشوف شنو يسون بس احنه جنه نحاول قدر الامكان انُ ما نوصل او نشارك كان القصف والذبح بفلس
وبدوا يأسرون الناس من ضمنهم صديقنا محمد ضابط من الموصل
راهب:هذا محمد
علي:اسكت يمعود
دخلوا النساء لجوا وبقى محمد ويا ثنين طلبوا منا لو ينطي معلومات كاملة عن القوات الامنية والمداخل والمخارج لو يقتلوا هو وعائلته محمد رفض رفضًا قاطع
محمد :والله لو شتسون لو تقطعوني ما انطي معلومة وحدها
اجه حسام كلهم دخلوهم جوا ولحد يوصلهم
نمر :اكلكم اريد اسبح
علي:انت المن اجيت ويانة المن لك بوية سد حلكك واسكت اسكت ماكو سبح حرام ضل بوصخك
نمر:زين عطر
علي:اذا ما انعدم اموت من وراك اسكتت لا تخليني اصيح وافضح الاول والتالي جايين سياحة احنه
نمر:بس اللحيه تلوك عليك حبيتك
سكتت لان من صدك نرفزني واذا احجي يحجي كلام يخليني اموتهه استمرت الايام واحنه ويَ تنضيم داعش اجهه حسام
حسام :سرور زوجت محمد هيَ وبنتها جوا والبنية حامل ومحمد وصاني عليهم لازم نطلعهم
علي:محمد وين
حسام :راح انطي امر يطلعونة بغير مكان كتلة صير ويانة ونطلعك ماقبل
علي:وشلون نطلعهم
حسام :مو هسه بس فترة يراد شغل هواي
واحد من قيادات الدولة القندرية كان شاك بينا وكان يكرة حسام يفتر علينا كل شويه
حسام:طشوا شباب هذا ما ناوي على خير
طبعًا كل كعداتنا كانت بالخفية او نوكف بعيد عنهم ونحجي
وهيج استمرت ايامنا ويَ داعش نشوف كلشي بعيونا وتعبنا كلش هواي بسبب الوضع عوائل تهجرت وجهال ونساء ورجال انقتلت ونساء اغتصبت ونسبت ورجال وكعت غيرتهم وصاروا وياهم وشهداء التوكع انواع واشكال وقصف البيوت وتهجير العوائل شيء متعب ومخيف بنسبه الهم
داعش كان قذر بشكل مو طبيعي
اجه حسام كال اكو بيت قريب روحوا ارتاحوا بي صلوا وناموا وارتاحوا وتعالوا بليل عدنا مهمة من اليوم راح يبدي شغلكم
انطانا المفتاح ورحنا احنه ستة انا وراهب ونمر ويانه بعد تلاث ضباط
دخلنا للبيت وصوت الرصاص مستمر
نمر:رااح اسبح وأخيرًا
علي:الله يطيح حظك لك اسكتتت ولي اسبح والله موتتني
سبحنا وصلينا ونمنا كلنا كعدت بـ5العصر على صوت قصف قريب كلش كمزنا كلنا وكان صوت تكبيرهم قريب على البيت لبسنا ملابسنا بسرعة ولكفنا سلاحنا وطلعنا نمر طلع شعرة مبلل ما نشفه دفعتة لجوا بسرعة وسديت الباب
شوية وطلع
نمر:شبيك لزكتني بالحايط
راهب :وزغنبوت الكص بلعومك طالع شعرة مبلل
ضحك وسكت رجعنا لحسام وانتظرنا اليل
حسام :زوجة محمد اليوم لازم تطلع مو بس هي اللي نكدر عليهم نطلعهم اليوم اذا ما طلعن خلص بعد انتهت
نمر:احنه جاهزين بس شلون
حسام : هاي يمي انا راح افرغلكم المكان ونمر انت تاخذها وتطلع خارج الموصل وعلي وراهب وكرار اطلعون وياهم نمر انت تاخذ زوجة محمد حسن وحيدر تاخذون البقية وترحون بعد ويَ القوات الامنية راح ينتضروكم على طريق هاي شغلات يمي انا اكملهن علي راهب كرار بـ2عدهم هجوم تتحضرون بس قبل هذا تساعدونا حتى نطلعهم
ممكن الكلام الخطة كانت سهلة بس التنفيذ كان صعب حسام كدر يفرغ المكان منهم صار هجوم مكثف من القوات الامنية همَ طلعوا واحنه دخلنا لجوا لكينا حراس ستة
سحبهم حسام وهناك استلموهم راهب ونمروحيدر دخلنا لجوا فتحنا السجون
حسام :سرور كومي
سرور :وين ماخذينا
حسام :كومي كتلججج
لزمت بنتها وكامت تبجي
طلعت هيَ وياها بعد اربعه بنات فقط الموجودات
سرور:وين ماخذينا
حسام :اخذوا البنات ذني لسيارة حيدر وحسن واجبكم ايييي سيطرة تلكونها لا توكفون اخذوا طريق بساتين ديالى
علي راهب كرار حضروا نفسكم وابقوا هنا على ما ارجعلكم
نمر وسرور وراي
سرور :غيررر افهم وين وين اخذتوا البنات حرام عليكم
حسام : خويه احنه قوات امنيه وياكم نريد نطلعكم بس اطلعي لا يرجعون البنات طريقهم أمن يلا نمر
نمر شال البنية الصغيرة وهيَ تصرخ
علي:نمر وين راح تاخذهم
نمر :صدك وين
حسام :لازم نطلعهم من الموصل
علي:اخذهم لبغداد
سرور :بس اني ماعندي احد ببغداد
علي:هاك مفتاح الشقه مالتي توصلها الها وادك الباب على ام ادم يم شقتي بالضبط وتكلها هاي امانة من علي والباقي يمها توكلوا على الله
حسام :يالله يلا
راحوا همَ واحنه بدينا نشتغل مثل ما كال حسام طلعنا من المكان حتى لا يشكون ورحنا بنفس المكان بس من جهةة صرنا نرمي عليهم من ورا ومن رادوا ينسحبون انسحبنا وياهم
راهب :الله يكون وياهم بس كون يطلعون
كرار :الطريق خطر خوفي على حيدر وحسن طريق البستان بيَ خطورة
علي:كولوا يالله سباع ماينخاف عليهم خل نروح لا يشكون بينا
رجعنا لنفس المكان وحسام ماكو ذول تخبلوا وهذا مباشرةً أشر علينا
_أين ذهبوا
احنه سكتنا واحد منهم كال
_لقد ذهبوا معنا واتوا معنا لا يعرفون عن ماذا تتحدث
_اين ابا حنيفة
باوعت لكرار وراهب يردون يضحكون بس كوه لازمين نفسهم اخلص من نمر يجون ذول
بعد تلاث ساعات ونص بالضبط اجه حسام مصوب
كرار : وين شصارلك
حسام :انا صوبت نفسي حتى ما يشكون وخروا وخروا خل اطيح
كرار :طيح بحضني
راهب :لا بحضني احسن
كرار :نتقاسمة بنص
حسام :شني ولكم جلب انا وخروا لا يشكون ويسونا قوزي
علي:وعلي عفطية انتم صوجي اجيت وياكم
حسام :انجب لك
علي:وين صار نمر
حسام :لا كلش عيب تسئل هيج سؤال صار بنص بغداد
مرت الايام وبيوم صار هجوم همَ ركضوا على ساترهم وانا طلعت لبناية عالية ماعرف اذا كانت مدرسة او بيت عالي المهم صعدت السطح ثبتت السلاح صار الرمي عليهم من ورا ومن كدام من ورا انا ومن كدام ابطالنا
راهب وكرار وحسام مادري بيهم وين راحوا بعد ماشفت الوضع بدأ يهدأ وبدوا بالانسحاب طلعت مخلي سلاحي على كتفي واردد بالقصيده
كربلاء فأشْهَدي للحُسَينِ نَفْتَدي حُسَيْنا
صدَحتْ أصواتُنا رَفرَفت راياتُنا حُسَيْنا
نحنُ أنصارُ حُسَينٍ نَشتَري المَوت شراءْ
دَمُنـا الحُرٌ يُلَـبّي فِي المُلمَاتِ النّداءْ
گيَفَٰ نَخْشى مِنْ عَدوً كَيَفٰ نَخْشى الجُبَناءْ
نَحْنَ من جئْنا لاَرضِ المَوتِ كي نُهدِي الدّماءْ
قَرُبتْ ساعاتنُا حَلِيَتْ طعْناتُنا. حُسَيْنا
لا ينامُ المُعتدي كربلاء فأشْهَدي حُسَينْا
راهب:ها ولك
علي:وين جنت كرار وحسام وين
راهب:انا وكرار وصلنا معلومات كرار رجع ويَ الشباب وحسام مدري
علي:ابطال امشي يلا لا يجونا
ردنا نمشي والسلاح نحط براسنا
.......................................
محمد: كعدت الصبح صادف يوم جمعة كل جمعة احنه يم بيت جدي ننجمع كعدت بـ11 البيت فارغ
سويت ريوك ودخل عليه ايمن اخوي عبالك واحد يركض ورا
محمد:شبيك
ما جاوبني شرب ماي ويباوعلي وكوه يجر النفس من الركض
محمد:مضيع شي بوجهي شبيك ماتحجي
ايمن :انت شعندك ويَ غفران
محمد:نعم!
ايمن : ونعامة الترفس ضلوع العدو شعندك وياهاا
محمد:احجي عدل لا اطيح حظك شعندي وياها وانتَ وين تعرفها
ايمن :انت الي وين تعرفها مو انا !
محمد :ايمن لا تنرفزني من الصبح سوالفك بطلها انت منين تعرف البنية
دخلوا ورا اسيل وامير وياسر وازل
امير :ايمن اهداء بلا خبال زايد
ايمن :معليكم خوش وانت احجي منين تعرفها
محمد :لك شعرف شبيك انت
ازل :انت تحب غفران
محمد :حبيشش
ازل :ايمن يحبها
محمد :والحسن جذابين وهاي جذبة من يمكم وخططكم الفاشلة مثلكم عود تردوني اعترف احبها او لا اطلعوا برا
ايمن : كشفنا يلا اطلعوا بس هاااا روح صارحها ترا راح يشيلون
محمد:اجيكم انعل يومكم امشوا اطلعوا وانتِ اسيلوو يصير خير
اسيل :اني معلية همَ سمعونا من نحجي
امير: على حورك هسه انتَ ازرك وجنك نخلة
كال هيج وطفروا طايحين الحظ حرام واحد يحب بهذا البيت اذا ما ينفضح فضيحة الله كملت ريوك وطلعت اليوم ماكو دوام
كعدت بالباب كان بصف السيارة وانا كاعد شفتت الباب انفتح سويت روحي اخابر طلعت هي واختها هيَ بيدها صينية واختها شايلهه صينية ثانية
سلمنا رديت السلام
غفران :هذا ثواب
محمد :هاي كلها النا ؟
غفران :ها اي مو شسمة انتم هواي الله يحفظكم فـ كلنا خاف ميكفي
فرقان : اي فـ ياريت تاخذ الصينية لان ايدي وكعت
اخذت الصينية خليتها على السيارة ورجعت اخذت الثانية من غفران
محمد:المواعين هسه تردونها
غفران :لا على راحتكم
اختها راحت كدامها
محمد:اوكفي تعالي
غفران :كول
صفنت بوجها بعدين كتلهه
محمد:الجمعة نجيكم خطابة
غفران :هااا
حجتهه بصوت عالي والصدمة على وجها
محمد: قبلتي او لا اول وتالي تقبلين
ماحجت شي راحت باوعت للاكل والله فشلة فراس شكد مخلف مودين صواني ثنين
شلت وحدها ورحتلهم الباب مسدود دفرتهه برجلي بس دفرته انفتح
صهُيب:هاااا مو مداهمة هيَ
محمد:انت الثاني سد حلكك هاك ثواب واكو صينية ثانية على سيارة شاهين روحوا جيبوها
دخلت سلمت وراح مهند جابها
الجد :هواي هذا
محمد:غير انتَ مخلف فريق ويكولون خاف مايكفي
كعدوا تغدوا ورا ما خلصنا الشيخ دك تيلفونة وكام اجتني فرصة طفرت ورا خليتهه يكمل
محمد:عندي موضوع وياك
الشيخ :عد عيناك كول
محمد:شوف جيرانة ذول الحطوا جدد تعرفهم
الشيخ :اي شبيهم
محمد :حبيت بتهم واريدها تروح تحاجي جدي وابوي الجمعة الجاية نروحلهم
الشيخ : محمد الناس ماصارلهم سنه شوكت لحكت تحب
محمد:حب من اول نضرة هسه شنو تحاجيهم لو اروح اخطب وحدي
الشيخ :بويه متبرين منك صار احاجيهم ولا يهمك
دخلنا لجوا وجان الكل موجود فتح الموضوع وحجة وياهم كال جدي
الجد :
...........................................
ازل :راح امير حتى يفتح الباب ماسمعنا غير صوت الرصاص كان كلش قريب
طلعت امي وراها بيبي ثواني وسمعنا صرختهم طلعنا وراهن امير كان واكع والدم تارس الارض وهوَ لا ايد ولا رجل امي ضلت تلطم على وجها على صريخنا التمت الناس كلها
الخوف والرعب والدم والمنضر يخوف امير كان واكع بالكاع والدم مغطي حتى وجهه ودم على الباب
ام فهد :يمه سودة بوجهي راح ابني يمه دخيلك ياربي لا تفجعني بيَ كلبي مايحمل اخذ عمري كبل عمرة
ام اسيد :خيه اذكري الله ان شاء الله مابيَ شي ويطلع سالم
ننتظر يجي واحد يكول شنو وضعة ماكو بـ3 اجهه اسد صعد كبل لفوك بدون كلام كان عبارة عن نار ورا اجوا ادم وجسار وشاهين
نزل سلاحه بيدة
اسد :اقسم بالله اذا واحد لزمني افرغ الشاجور براسة وخروا عني
شاهين :انت شمدريك بيهم همَ
اسد :چا ياهو غيرهم ياخذ هيج غدر
جسار :اهداء مو هيج تنحل الامور خل يطلع سالم واحنه وياك بتريد تسوي
مارد عليهم طلع وهمَ ورا ما سمعنا غير شخطت السيارات
غزل :عزاا بعيني الله يستر
شهد :هسه وقت ثار وتفك غير يجون يكولون شلونة شنو حالتة
رسُل:اول مره تحجين شي براسة خير
ازل:اشششش لا تردين اذا تحجين بعد ماتسكتين
عشنا خوف مو طبيعي بعدين سمعنا صوت برا دفعنا شهد تروح تشوف شكو لان هاي مهمتها
شهد:اجوا زلم هوااي دخلوا لديوان
وراها اجهه جاسر واسيد واسر وابوي
ابو فهد :اسد وين
الجدة:اخذ سلاحة وطلع
ابو فهد : من الله يطيح حظه راح يموتوني
ام فهد :واحد منكم يكلي امير شلونة
جاسر:زين عمه زين
الجدة:تضحكون علينا شنهي الولد دمة بطولة وادكلي زين
اسيد:طلقة بصدرة وحالتة زينة لا تخافون
ابوي طلع وامي خلصتها بچي رجع اسد عبارة عن نار يمه
غزل:شسويت
اسد :اخذي السلاح خلي بغرفتي
غزل:جاي اكلك شسوويت
اسد:كلشي ما سويت
لزمت ايده
غزل:شنو هذا الدم
نتر ايدة مني وصاح بيه
اسد :معليج كتلج اخذي السلاح ضمي بدون لغوة زايدة
غزل :يا لغوة هاي انت شمصخم
بهاي الاثناء دخل اسر
اسر : اطلع لا اضل هنا
اسد:وخر عني وانتِ شكو واكفة يلا
غزل:اسر هذا شمسوي ايدة ليش كلها دم
اسر: هم مصوب واحد وايدة هاي من امير
سحبة اسر وطلعوا صعدت السلاح فوك وضلت الناس رايحة جاية لـ١٢ بليل ناس رايحة وناس جاية التعب والخوف والقلق والتوترر الي عشنا بذاك اليوم ما اتمناه للعدو
كانت ايام صعبة ضل سبوعين تمامًا بالمستشفى يلا طلع
الجده :سودة بوجهي يايمه
امير :الله ام الزوز تبچي عليه طلعت غالي
الجده :كلكم غاليين
امير :ياسر شبي وجهك اصفر ولكم شني هاي شصاير بيكم ولا ادري بيكم هيج تحبوني واسد شني هاي كالوا ماخذ ثاري بنفس اليوم بوياي هيج طلعت غالي
ياسر :غير روحي طلعت خرا بيومهم
امير :غدروني
اسيد:اي غدروك من ورا الباب
امير :بس انتَ حتى سمنان ولا متأثر
اسيد :عليمن اتأثر انت تموت ويجينا فصل معدل يعيش احفادنا وبالفاتحة نشبع اكل
ياسر :اي وياهوَ راد يموت من الدكتور غلط بالاسم وكال مات
اسيد:مو انا اسر هذا متأثر بالمسلسلات
اسر :اي انتَ صرخ واشمرهن براسي
الشيخ : السلام عليكم
الكل :وعليكم السلام
الشيخ كان مموجود طالع بس وصل امير وطلع مدري وين
الشيخ : الفصل طاح من الطرفين وكلشي أنتهى بعد لا يوصلونا ولا نوصلهم لا يطونا مراة ولا نطيهم مراة ولا نسلم عليهم ولا يسلمون علينا لا نسوان ولا زلم لا شباب ولا بنات ابد السالفة انتهت بصواب امير وصواب ابن عمهم ونفس ما عشنا الخوف على امير عاشوا اكثر من عدنا لهنا وتسدون الموضوع واذا همَ حاولوا الاعتداء يتحاسبون قانونيًا واحنه كذلك
الكل كله صار اترخص وصعد فوك
امير : يمه شبيج تبچين ميت شني
ام فهد :انجب لا اكوملك اسم الله عليك
امير :شو من تبچين تصيرين حلوة ابجي بعد ابجي
باوع علينا واحد واحد اخير شي صفن على ابوي
ابو فهد :ها بوية شبيك
امير :صاير صاك شتحط لوجهك
الجده:خايبين ماكو نعال
محمد:شبيك سولك عملية شالوا الطلقة لو شالوا عقلك
امير :شبيك عيني شبيك
ضلوا يسولفون ومرت الايام وامير رجع وضعة طبيعي ومابيَ شي
اجهه محمد فتح موضوع الزواج صدمنا جدو من كال
الجد : سد الموضوع وانسى البنية هاي
محمد:ليش
الجد :انت شتعرف عنها حتى تزوجها
محمد:كلشي اعرف عنها
الجد:سد الموضوع مو وكتة
محمد :جدي الجمعه ترحون تحجون ويَ ابوها واذا ما رحتوا يصير شي محد يتوقعة
ابو شاهين :اكعد وتأدب امس حطوا شوكت لحكت تحبها وتريد تخطبها
محمد:اي حبيتها واريدها الجمعة ترحون يعني ترحون
الشيخ :محمددد مو هيج تنحل اكضب مجانك واستريح
الجد : انا ماعندي مانع بس موش وكت الخطوبة
محمد:كتلكم روحواا احجوا ويَ ابوها كبل لا يشيلوون
الجد:عود الله كريم
محمد:والله اذا ما رحتوا
اسيد:لا تضل تهددد اكعد واسكت واذا ما راحوا شسوي بلا
محمد:كلشي اسوي مخبل وطكوا بحجارة
ابو شاهين :اكعد والله كريم
اجت الجمعة المنتظرها محمد وراحوا حتى يخطبون لكن من رجعوا انصدمنا الوجوه كلها مكلبه
ام فهد :ها شصار
الجد :ابوها يكول ما انطيها هسه صغيرة ولا انطيها حتى من تكبر لان ابنكم حياتة خطرة وانا ما مستعد انطي بنتي وتترمل على صغر
حرفيًا كلنا انصدمنا ومحمد شوية وينجلط كد العصبية انسد الموضوع
وراها دخل داعش للموصل واشتد الوضع خوف الولد التحقوا وصارت مجزرة سبايكر وراها الفتوى انطلقت بيوم انطلاق الفتوى
امير ويأسر بكربلاء هنا الخوف اشتد بينا يارب دخيلك اخواني ولد عمي كلهم التحقوا وذول ماكو
بعدين اجوا كالوا نروح نجاهد
الجدة:يعععع خايبين وحك هوَ الحسين ما ترحون شني يمه بايعين روحكم اخوانكم كلها هناك وانتم انوب
امير :اخوانا هذا واجبهم احنه بالفتوى ماعلينا
الجده :وحك داحي الباب ما ترحون
ياسر :يابه ترا عيب علينا الاكبر والاصغر منا راحوا احنه شنو ضلتنا
ام فهد:الراحوا مو مثلكم احنه ماعدنا احد غيركم بعد اخوانكم راحوا ومانعرف وين ارضهم بالضبط وشنو صار بيهم لا تشلعون كلوبنا اكثر
ايمن : عليمن نشلع كلوبكم حالكم حال هاي الناس الراحت ولدها واحنه احسن من الراحوا بسبايكر نروح والكاتبة الله يصير
الجدة : على جثتي يلا اطلعون
كامت بيبي للباب اخذت المفتاح وراحت للباب الثاني اخذت المفتاح وضمتهم ويومين هي تنام بـ3بليل وتكعد بـ5 الفجر خاف يرحون ولازمه الباب
لحد ما حلفوا انُ مايرحون يلا ارتاحت
ورا فتره سمعنا صوت رمي وهلاهل عرفنا شهيد !
وبين فترة وفترة نسمع بشهيد ونشوف الوضع شلون صار والشهداء اللي وكعت شباب بعمر الورد والعوائل اللي تهجرت فرغنا بيوتنا وكعدنا ببيت جدي فرغنا تسع بيوت للنازحين الي طلعوا من الموصل وكعدنا كلنا ببيت واحد بيت جدي جان جبير
داعش عيشنا خوف مو طبيعي
بيوم وليله ضلمه صارت ويانه شغلة...
..................................
غلسوا على السحكات
شكرا لزيارتكم عالم روايات سكيرهوم
