رواية قصة وجدان الفصل التاسع 9 بقلم انين الليل

من حجت امي وانا اشوف كسرتها ما اتحملت صرت اصرخ حيييل وبهستريا الكل استغرب اجه علاوي حضني

شفته بچييت بعبره اهنا الكل بچى ما اعرف على امي. لو عليه انا وعلاوي لو على اخواني الي ضاعو اثنينهم

بقينه فتره واحنه حاضنين امنه الي فصلت عن الكل حتى عنه وفجأه سمعنا سيارت وكفت وناس تكول لا آله إلا الله

ودخلو جنازة رامي للبيت الكل وگف. ساكت بس اصوات قليله تبچي على امي وعليه

امي الي شمرت روحها ع التابوت. وهي مره تصرخ مره تلطم مره تريد تفتحه بعدها گالو لازم ناخذ ندفنه

عمي عاصف. كالها :: ياالله ام هشام امشي

جابت الها ام احسان عبايه عمي عاصف گل الام احسان خويه انتي وام كرار امشن ويانه

امي انتبهت حاچتها // خوله جيبي وجد وعلي

عمو عاصف حجى ويه بيبي :: يمه ترحين ولو ادري بيج تتخربطين

بيبي وهي تبجي وتضرب على رجلها // شني روحتي ياابني شحصل

عمو عاصف كال :: ياالله ياهي التريد تروح

سعاد //. ما بيه ارتفع ضغطي

عاصف :: ام غانم تعاي

ركبونا بسياره وخلو التابوت داخلها واشوف عمي طلع فلوس وانطاها العمي مهدي وصار يحجي وياهم

امي حاضنه التابوت وتبچي وتكله //. يمه رامي اكعد انا مو كد الفركه

واجه عمي عاصف هو والسايق الي جان نفسه الولد الي اجه ويا وهو يسوق واثنينهم متنگبين

ركبنا وره ما اعرف شلون خلو الكراسي. وعمو عاصف گال للولد :: ياالله حرك

مشت السياره وامي حاضنه التابوت وهيه تكول // يمه هشام يمه رامي يمه ليش هالشكل ليش شسويتو بيه

تعالو يمه ارجعو ولكم انا ما اتحمل الفركه

رامي اكعد حبيبي اكعد الامك تره انا مو مال هالشكل تعذبوني

اريدكم سند يمه اريدكم لاترحون ما. بيه حييل

يمه هشام ياچبير البيت يافكة عيني رامي. يالمدلل. اكعد وك يمه

ام احسان لازمه امي وانا بس اشهك ولازمه علي وعمه امل تنعى وتبجي

مرت السياره يخلولها بانزين وشفت عمو يحجي ويه ابو احسان واحسان. وابو كرار واحد رابع وياهم ما اعرفه

طلعو جايين ورانه بسيارة ابو. احسان

  مشت السياره وامي على فد صرخه. وبجيه وتملخ بروحها ام كرار وام احسان وحتى ام غانم يحاولن

ايصبرنها لكن هنه. ينهارن بالبجي على حالتها

وصلنه ومن نزلنه كان الموقف جدا حزين لان امي ما قبلت ينزلون رامي وصارت تعيط وهي تكول

• ادفنوني قبله وصارت امام الحفره وهي تكول ابوس ايدكم خلو ابني لا تاخذونه

عمي عاصف احتار بينها وبين الجنازه وبعدها اجو احسان وابو وعمو كريم ساعدو بشيلة الجنازه وعمي

ما يكدر يلزم امي من ناحية الحلال والحرام اتقرب منها وهو يكللها

:: ام هشام لازم ندفن اكرام الميت دفنه

هزت راسها // لا خويه ما اكدر اشوفكم تدفنون ابني انتو دفنتو وليداتي اثنينهم بيوم واحد

عمي عاصف صار يبجي وام احسان لازمه امي الي كانت متهستره وعبالك طير مذبوح

ام احسان // نجاة كافي حماج وابنه اتاذو استهدي بالرحمن وسلمي امرج ال الله

امي رفعت راسها للسما وهي تكول //. ربي ربي بس ما اخليهم ياخذون. ابني اله اندفن ويا

ام غانم اتقربت عليه //. عمه روحي احچي ويه امج الرجاجيل اتاذو

باوعت الها شفتها تبچي بحركه وخدها طالع منه دم

رحت. يم امي وانا ابجي ولازمه علاوي بايدي كتلها =. يووم خلي يدفنو الرامي

انتبهت الكلامي وصارت تبجي لكن هالمره بعبره وصارت تضربني راشديات وانا ما احجي ولا ابتعدت عنها 

وتحجي بهستريا // — ترديهم ايدفنونه وارجع خاليه ولج اثنين راحو مو واحد

بعدها نزلت للكاع وردت عليه بصوت ناصي ومكسور //. وچ يمه راحو راحو اخوتج ما بقالنه احد

اهنا لزمتها وياي ام احسان وسوينه مجال ورجعنه بعد ان امي راحت وعاتبت ابوي

- سعدي شوف شصار بينه من رحت سعدي عذبتنه وانت عدل واتعذبت وانت ميت شلون شكول شحجي الولد راحو

اولادك ضناك واحد اجه يمك والثاني بالسجن شلون بيه سعدي شلون الجاره وين انطي وجهي وشكول

سعدي هاي حوبة ابوك دعاءه عليك من اجانه للبيت ورد مكسور خاطر هاي حوبته بس طاحت براسي

من هالو علي التراب امي صارت تهادد تشمر روحها وره رامي وهي تگول // ادفنوني ويا شبقالي

لزمنها النسوان لكن هي عافتنا وصارت تهيل التراب عليها

مرت عمي ام كرار اتكللها كافي نجاة راح اتموتين

- - انا انا اريد اموت شبقالي

اجتها ام غانم وهي تخرط بخدها ولزمتها من ايدها

- - لا نجاة وهاي المسكينه شوفيها شلون انصكت هي واخوها خافو ما يحجون باعيلهم خطيه عدمن تخلينهم ومنو يرحم

گومي خيه سلمي امرج ال الله بعد ابنج راح ولو شما تسوين ما يرجع ما رجعو ذوله الگبله

صارت على صفحه وبس صوت شهكاتها وتحجي // يمه لا تعوفني رامي ارجع يابعد روحي

لكن رامي ما رجع واحنه الي رجعنه وكلنه هموم وقهر وبچي رجعنه ولكينه البيت مليان ناس اكثرها ما نعرفها

بعدين عرفت بان هذوله اقاربنا وجايين وهالمره اجوي اكثر مما اجو على ابويه وشفت خالاتي جايات ولزمن امي

الي كانت فاقده وما منتبهه الاي شي وبنفس الوقت كنا نسمع كلمات العتب واللوم خصوصا من النساء الكبيرات

وين چنتي ما ضميتي السلاح وعلى شنو تعاركو وامي فاصله ومن يسالني كنت بس ارفع اچتافي وما اجاوب

على اي شي لان احس بنفسي شايله فد شي ثگيل كلش ما بيه اتحرك ولا اجاوب

وثالث يوم اجه عمي عاصف وكلي البسي وتعاي

باوعتله باستغراب هو رد :: طالبينج يردون ياخذون اقوالج

جابتلي منار عبايه اسلاميه سوده ولبست شالي وعمي كلي :: فوتي البسي جواريب

لبست ورحت ويه عمو عاصف وعمو كريم والمحقق سالني ع الحادثه واني جاوبته

ما طولت ورجعت ومن سالني النساء حجيت بكلام مقتضب بدون تفاصيل

وخلصت الفاتحه وكلمن راح البيته بس بيبي وعمي بقو للسابعه وتقريبا. بيومها اجو كل اقارب ابوي وبعد ان كمل القاري

وصبو العشا واكثر الناس المتواجده راحو وبقو بس اقاربنا صار نقاش على الحادثه وكل واحد ينطي راي

بيومها بيبي راحت بالليل وقبلها اجت على امي وكلت الها.

• شدي حيلج الصار صار وما بيدنا شي ولا نكدر نرجع شي

امي ما جاوبت دموعها سبقنها بيبي ردت //. ما بيدج شي وكبلج احنه ما بيدنا شي سلمنه امرنا ال الله

تستمر القصة أدناه

رغم احس ابيبي ما تريد امي لكن هالمره حسيت بكلامها بي حنيه وامي ما جاوبت ردت عليها سعاد

امشينه يمه ما تشوفينها ما ترد

ام كرار //. هاي شنو منج سعاد هي المره بيا حال

• وانا شكلت وانتي كمزتي من مكانج شني احنه كاتلين ابنها

بيبي ردت // كافي وامشنه هم ياالله

اتقربت مني عمه امل الي يسمونها ام غانم وعمه يسمونها انصاف هذني اخوات ابويه بس ما كنت اعرفهن لان متزوجات

وحتى من اجن بفاتحة ابويه ما دزن عليه ولا سلمن ولا احد عرفني بيهن لكن شفتهن شلون انقهرن على امي بحادثة

رامي حسيت بيهن يحبن امي مو مثل سعاد

ويحچن وياها //. نجاة سلمي امرج ال الله وديري بالج على نفسج وابنيتج وابنج

امل //. عمام هشام ما يعوفونه مو عبالج عاصف ساكت تره يركض منا ومنا ما مخلي شي ما سوا

امي ساكته واصلا مو ويانه

الكل راح وبقى عمي يريد يعرف شنو مصير هشام خصوصا من اجه البيبي حتى تروح وصار ايوصيها تاخذ علاجها

بيبي سالته // يمته تجي

:: الله كريم يمه اشوف هاي المصيبه شلون تخلص

اهنا امي انتبهت وردت //. عاصف خويه ظل اهنا شوفلي هشام لاتعوفه ما النه احد الله وانت

هز راسه ورد :: عيني خير

بيبي اتقربت من امي //. نجاة ديري بالج على بنيتج ووليدج محد بقالهم الراح راح وان شاالله عاصف ما يعوف هشام

هذا لو شما يصير ابنه وانتي بتنه واحنا ما نتبرى لا منج ولا منهم بس انتي اصبري وصيري سباعيه وسلمي امرج ال الله

  وانا جيتي لهنا كلها على مودج انتي مو على مود ابني شدي حيلج يابتي والله يساعدج بس بالاول ساعدي روحج الخاطر

ذوله شوفيهم بس فاكيين عيونهم (وتاشر علينه )

امي هدات من سمعت كلام بيبي وهزت راسها وكالت // ان شاالله

بيبي دنكت على امي باستها بخدها وهي اتكول وتبجي // الله يساعدج الله يصبرج

وراحو بيت جدي وبقى بس عمو عاصف الي ثاني يوم راح للمحامي هو وامي الي ما تنتبه الاي شي وكانها

بعالم ثاني ما تنتبه بس من تعرف بشغلة هشام توكف وتلبس عبايتها رغم عمي ما وافق تروح بس هي اتوسلت بي

حتى تعرف شنو راح يصير وهي تكله //. عاصف اروح وياكم

مدنك وجاوبها بحزن :: وين ترحين خلي نشوف بالاول شني ما شني

كامت وهي تعدل بعباتها //. لا لا اروح وياكم

  وطلعت وهي بالكوه تمشي وغابو اكثر من ساعتين وبيومها رجعت امي شبه المنهاره وهي تمشي بتعب رجعت

ساكته ما تحجي وبس عيونها تدمع

اما اكلها فيقتصر على شويه خبزه تغمسها بالچاي وطبعا هذا اكلها بعد ان عمي يصير يحجي عليها ويكللها

:: لازم اتشدين حيلج وان شالله ابنج يطلع وهو ما علي شي

وهي ترد علي // مو سمعته للمحامي يكول وضعه صعب

:: ما عليج بي راح اشوف محامي احسن منه وشيريد انطي باجر اخذ كريم واروح ع المحامي الي نعته صاحبه

ونشوف شيگول

امي // اي حتى انا اروح وياكم

:: دامج تردين ترحين ويانه شدي حيلج واكلي

تستمر القصة أدناه

غمضت عيونها واتنفست بعمق وشفايفها يرجفن عمي كلي :: روحي جيبيلها اي شي تاكله

بس امي جاوبتني :: جيبيلي شويه خبزه وچاي

باوعتالعمي الي هز راسه رحت جبتلها شويه خبزه خليت بيها جبنه وكوب جاي وانطيتها الامي هي فتحت الخبزه

وشالت الجبن واكلت شويه منها وشربت كوب الجاي

وثاني يوم اجه عمو كريم ابن عمتها الامي وراح هو وعاصف وامي راحت وياهم بقيت بالبيت انا وعلي اباوع للبيت

والحاله الي وصلنه الها رحت الغرفتي طلعت كتبي الي عايفتهن من فتره صرت اباوع الهن بدون ان افتح كتاب

اندك الباب رحت افتحه شفت منار جايتنه

هلو وجد (باوستني )

هلو منار

شفت اخوها واكف بالباب كلي / / شلونج وجدان

هزيت راسي = الحمد لله

شدي حيلج الله كريم

= شكرا على الله

  • وجدان احنه اهل وهشام اكثر من اخوي واي شي تحتاجينه بس اطلبي من منار

   = الله يخليك

احس بنفسي مكسوره واريد اي شي ينسيني الي مريت بي لكن ... خصوصا وانا اشوف حال امي

دخلت منار وصارت تواسيني وعيونها ما بطلت دموع وهي تكول

- اني بكل صلاة وخصوصا الفجر اصلي ادعي الهشام الله يطلعه من هاي الشده

اصير ابچي وياها وهيه تكلي /= لا تخافيين خلي ايمانج باالله ان شاء الله يطلع وننسى كل هذا الي. صار

باوعت الها = تتصورين اكدر انسى

• حاولي وجد حاولي

= تدرين اكثر شي حزينه علي منو

• الله يرحمه الرامي هو غلط

  = لا مو رامي ولا هشام ولاحتى ابويه اني حزينه على حاال امي هاي المسكينه

  - الله يساعدها بس وجد ليش خالاتج ولا وحده بقت يمها شنو السبب

   هزيت راسي = ما اعرف ولا سالتها

• امي تگول من زمان متعاركين ابوج وخالج

  = يجوز ما اعرف

  خلت ايدها فوك كتفي وهي تحاول ان تحبس دموعها // ان شاالله يطلع هشام يارب الخاطر خاله نجاة

   اتنفست بعمق = ليش من يطلع هشام راح نفرح او ننسى

     مسحت دموعها بايدها // • حتى لو اقلها واحد يبقى ما نخسرهم اثنينهم

    رفعت. اديه = ان شاالله

بقت منار يمي وصارت ترتب بالبيت وهي تكلي // لازم تنظفين البيت وترتبينه اكيد ناس تجيكم اعرف انتي ما الج

خلك بس لازم وجدان لازم نعيش ونتحمل وندرس وناكل واهم شي لا تتركين الدراسه

اتحسرت = يادراسه منار ظرفي مال دراسه

• مي خالف اتحملي وان شاالله شده وتزول التزمي بصلاتج والدعاء وان شالله كل الي مريتو بي يصير ذكرى

= ان شاالله

بقت يمي اكثر من ساعتين بعدها راحت البيتهم وبقيت انا وعلي الي من يوم الحادث ما صار يحچي وهذا الشي ما انتبهت

اله هسه باوعتله = علووش حبيبي احچي لا تسكت

انملت عيونه دموع وصار يشهك حضنته وصرت ابچي ويا واگله

= تدري انت هسه رجال البيت

لكن علي بقى ساكت وبس صوت شهكته ودكات گلبه المتسارعه اسمعهن

درته الوجهي وهزيته من اكتافه = علووش حبيبي اعرف بيك مصدوم من الي شفته كلنه مصدوميين بس انت

لازم تحچي لا تبقى ساكت

  بقى ساكت ما جاوبني حضنته وطبطبت على ظهره وحجيت ويه نفسي =. لازم اراجع بي طبيب

تستمر القصة أدناه

واجت امي هي وعمي عاصف وابن عمتها كريم وانا اشوف امي تعبانه وكعدت على الارض الي ما مفروشه

وعمي عاصف كللها

:: ام هشام اتوكلي على الله باجر المحامي يشوفه ويخبرنه خلي عينج بعين الله

امي ساكته لمن ما كريم خابر على زوجته.وكلها //جيبي امي وتعالي البيت سعدي

نص ساعه واجو ويه كرار وصارت بيبي هديه تنعى وتبچي وامي بس دموع ينزلن من عيونها وانا واكفه

على صفحه وابچي عمي عاصف دز على عشا وزوجه كريم صبته بصينيه للرياجيل وراحت يمهم بيبي هديه للديوان

واحنه هم جابت صينيه بالصاله.وامي كاعده وام كرار تتوسل بيها تاكل بس هي ما قبلت بس تهز. راسها بدون كلام

اجه عمو عاصف وجايب بايده لفه زغيرونه وكللها

:: ام هشام ما احلفج بروح الماتو احلفج باالله ان تاخذيها وتاكليها ومثل ما كتلج خلي عينج بعين الله

باوعلي :: وانتي بابا اكعدي واكلي

امي اخذت اللفه وعضت لگمه وصارت تلووج بيها يمكن ما كدرت تبلع اللگمه الي قضمتها وبعدها رحت سويت چاي

وصبيته وهمه يحجون ويسولفون لمن ما صارت الساعه ب 11. راحو وكريم ايكللها

•خويه نروح للمحامي باچر العصر

امي ساكته بس هزت راسها وبيبي گلت الها // نجاة يمه على كيفج ويه روحج

امي كالعاده من يوم وفاة رامي نايمه بالكاع وبدون مخده ولا غطه متكرفسه عبالك طفل ونايمه بالصاله

و وما فاد توسلي بيها تنام على الفراش بس هي قافله واعرف بعد شويه تطفر تصعد الغرفة رامي وبعدهاتنزل الغرفتها

رحت للديوان دكيت الباب فتحلي عاصف متفاجئ :: هاا بابا اكو شي

هزيت راسي ودموعي غلبتني سالني :: امج وين

نايمه بالكاع ما تقبل لا تخلي مخده جوه راسها ولا فراش جواها

هز راسه وهو يكول :: لا حول ولا قوة الا باالله العلي العظيم استغفر الله الله يكون بعونها

  ابتسم بحزن :: مي خالف بابا خليها هسه بلكي من تروح تشوف اخوج شويه ترتاح

= عمو

:: ها عمو كولي

=علووش اقصد علي

::شبي

=من يوم الحادث مدا يحچى

عكف وجهه :: شلون يعني

  = يعني ما حجى ولا كلمه

:: شني ؟

هزيت راسي = اي اليوم انتبهتله وردت منه يحچي بقى بس يشهك وگلبه يدك حييل

صفك ايد باايدوهو يردد ::لا آله الا الله استغفر الله

= عمو خلي ناخذه للطبيب

هز راسه :: ان شاالله يابه عكب باچر بحيل الله اخذه واعرضه على طبيب

=تصبح على خير

:: اجمعين

درت وجهي سمعت صوته يكلي :: وجد

باوعتله گلي :: اسبوع الجاي تداوميين مفهوم

= عمو الوضع مو ماال دوام

:: مي خالف بابا

= خلي اطمن على علووش وهاي امي المسكينه ما اعوفها ابحدها

::يعني شنو

= اترك هاي السنه مو اله اداوم

::هذا شلون حجي

= عمو صير انت بمكاني امي من اروح للمدرسه منو يبقى يمها اترك السنه وسنة الجايه بلكي متحسنه ظروفنه

هسه اني اهم شي عندي علووش الله يخليك عمو

::ان شاالله روحي نامي

وثاني يوم كعدت الفجر وصليت ودعيت الله ان يهدي امي رجعت اتمددت غفيت شويه وكعدت مفزوعه لان الي صار يجيني

كابوس اكعد مفزوعه وعركانه باوعت للساعه شفتها سبعه وثلث رحت للمطبخ سويت الجاي وسلكت بيض

واريد اطلع اجيب صمون من الفرن لمن ما سمعت صوت عمو وهو يكلي باستغراب

تستمر القصة أدناه

:: اوگفي وين رايحه ؟

باوعتله = راح اجيب صمون

::ارجعي انا اروح اجيب

= لا مي خالف هياته الفرن

::حتى لو انتي لا تطلعين

جاوبته وانا عيني بالگاع = هشام هو الي يتسوك النه

اختنكت بالعبره وعمي رد :: الله كريم بابا فوتي ادخلي

= والفلوس ؟

فتح الباب وطلع وانا رجعت للمطبخ وعيوني تجري دموع على اخوي الي انسجن وهو توه شاب اجه عاصف وجايب

صمون واجبان وكيمر وطبقة بيض

:... هاج بابا خليهن بالثلاجه وعلاليك الصمون خليهن بالفريز وصبيلنه ريوك

اخذتهن وسويت مثل ما گلي وبديت اصب بالريوك اخذتله الصينيه بالاستقبال اخذها مني وكلي ::امج وين

= توني فتحت عليها الباب شفتها غافيه بس

ما سيطرت على نفسي راسا نزلن دموعي سالني :: ليش تبچيين

= عمو امي نايمه ع الكاع لا فراش جواها ولا مخده

هز راسه واتنفس بعمق :: مي خالف عمو بلكي اليوم من نروح للمحامي ويسويلنه مواجهه وتشوف هشام بلكي شويه تهدأ

زدت بالبجي وصرت اشهك = واني هماتين رايده اشوفه الهشام

::ان شاالله كومي اغسلي وجهج وتعالي اكلي ياالله بابا

رحت غسلت وجهي واجيت اكلت شويه حتى هو هم ما اكل بعدها كلي

:: اليوم من نرجع من المحامي احتمال اروح اشوف اهلنه وارجع

ما اعرف على شنو يحچي سكتت وما جاوبته صار يدخن وبعدها بشويه سمعت امي كعدت وصارت تبجي حييل وتكله

• ليش هشام ليش يمه ليش كتلت اخوك ولك يمه كل شي حملت الخاطيركم كل شي تالي هالشكل اتجازوني

يووم رامي شسويت بيه ياشبابك يمه الي راح حرامات ولكم يمه خبلتوني خلص صبري بعد ما اكدر وين

انطي وجهي وشلون اتصرف هشام يمه هشاااام تعال شوفني شووف حالي

رحت يمها وصرت ابجي وياها حضنتها صارت تحجي //. هشام ما فكرت بهاي (اتاشر عليه ) ما فكرت بيه

وك يمه ارجعلي ما اتحمل فراكك

صرت اجاوبها ماما = عفيه اسكتي عفيه حبيبتي

ردت عليه بكسره وهي تكلي // اويلي عليج يمه لا اب ولا اخ شلون بيج شراح يصير بيج

اجانه صوت عمو وهو يكللها :: افه عليج ام هشام وانا وين رحت ومهدي واولادنا كلنه سندها من بعد رب العالمين

:: الله يخليج الها والعلاوي هذا الصار ان شاالله الله يفرجها وهشام يطلع انتي بس اصبري والله كريم

  ردت بدون ما تباوعله // شيصبرني وانا اثنين دفنت بيوم واحد واحد بالنجف والثاني بالسجن

  :: اصبري ام هشام ما بعد الشده اله الفرج

   • الله كريم عيني بعين الله

  ::والنعم باالله ياالله استهدي بالرحمن وكومي غسلي واكلي شويه حتى نروح نشوف المحامي

   حاجاني :: گومي بابا جيبي الامج شي تاكله

  هزت راسها :: لا ما اريد ما اشتهي

  :: چا اذا ما تاكلين بروح ابوي اروح ابحدي للمحامي ومناك اروح الاهلي اذا انتي ما تساعدين نفسج وتشدين حيلج

شلون راح تتخطين االصار

امي يمكن استحت ما ردت جواب وراحت غسلت وانا جبتلها صمون وبيضتين سلك وكوب جاي

هي اكلت بيضه بدون صمونه وشربت جاي حضنتها ورحت العمي اكله امي اكلت بيضه دخلت علي بالديوان لكيته

متمدد وخال ايده على عيونه وايده الثانيه بيها جگاره واشوف دموعه نازلات شفت عمي يبجي حس بيه كعد وهو يمسح

بدموعه انا كتله

= عمو امي اكلت بيضه

هز راسه وكلي :: جيبيلي جاي

رحت واني متفاجئه من الي شفته لان اعرف بيهم مستحيل واحد بيهم يبجي هذوله گلوبهم مثل الصخر

وصرت اتساءل ليش عمو يبجي معقوله هويحبنا معقوله عنده كلب مو مثل ابويه اااه يابابا شگد ظلمتها وقهرتها الامي

ولا فد يوم حسستنه بحنيتك على الرغم انت دووم تبوسني ومدللني

اخذتله الجاي وطلعت من يمه رحت للمطبخ اجه وراي كلي

:: انا رايح شويه وارجع حاولي تخلين امج (اتنفس ورفع راسه ) حضريلها ملابس وخليها تسبح

هزيت راسي رجع كلي :: لا تسويين اي شي

   سالته = شنو يعني ؟

:: يعني لا تطبخيين انا اجيب وياي غدا

  ابتسمت = ومنو گلك اني اعرف اطبخ

  :: ها چا هذا الناكله ياهو يطبخه

= خاله ام احسان

  :: اه يوميه

  = اي عمو غدا وعشا تطبخه ابيتها وتجيبه النه

:: الله يطيها العافيه خوش مره

  = اي صديقة ماما من زمان

باوعتله وسالته = عمو

  :: ها عمو

  = ليش بيبي وخالاتي وخوالي ما يجونه

:: بابا دربهم بعيد شيجيبهم وبيبيتج مره چبيره ما تكدر ع السفر

هزيت راسي = لا عمو انتو متعاركين ويه خوالي من زماان

رفع حواجبه يااستغراب :: وانتي ياهو كلج

= سمعت امي مره تحچي انتو تعاركتو ويه خالي ناظم وراد جدي الي هو ابوك يطلك امي بس

انت ما قبلت وهماتين ابويه ما قبل

:: ها وما كالت امج ليش تعاركنه ويه خالج ناظم

رفعت اكتافي = ما اعرف ما گالت

:: بابا هاي العركه من زمان واحنه ما بيناتنا شي بس همه خوالج مشغولين وعدهم عوايل ما يكدرون يجون

وانتي ما عليج بهيج اموور

  = اسفه عمو اني مدا اقصد

هز راسه :: خوش ريكي اخوج وديري بالج على امج

هزيت راسي مشى خطوتين رجع كلي ::شوفي امج وين

  = بالغرفه

:: روحي اتاكديلي خاف صاعده فووك

رحت ورجعت هزيتله راسي اتقرب من الغرفه وكلها

:: ام هشام انا رايح عدي شغله مهمه شويه وارجع نتغدا ونصلي ونتاني كريم ونروح للمحامي

طلع بدون ما يسمع ردها طلع وانا بقيت بالمطبخ احضر ريوك العلووش اندك الباب عرفتها خاله ام احسان فتحت الباب

صباح الخير

= صباح النور هلا خاله

منو عدكم

= محد توه عمو عاصف طلع

شفته وين راح ؟

=ما اعرف بس. كال شويه طالع وارجع وكلي لا تطبخيين راح اجيب غدا وياي

هسه انتو شتاكلون امج وين

:: بالغرفه وعمي كلي حضريلها الحمام وراح يجي يصلي ويتغدا ويرحون للمحامي

هزت ايدها // اي هسه اروح واحاجيها اكلج اكلت شي

= اي اكلت بيضه وشربت چاي

هزت راسها // خلي اروح اشوفها

دخلت ام احسان وانا اخذت ريوك العلاوي باوعتله وابتسمت = هااك حبيبي هذا ريوكك اكل عمو جاب كيمر عرب

من الي انت تحبه

تريك علاوي واشوف الحزن بعيونه فتحتله التلفزيون على البلي وكتله = العب علووش

هو باوعلي انا هزيت راسي وابتسمت وحضنته = ما العب وياك اله اسمع صوتك تكلي اكعدي العبي وياي

شنو قابل العب ويه نفسي

تستمر القصة أدناه

باوعلي وشمر اليده وصار يبجي بس هالمره بصوت مسموع حضنته وانا احجي ويا = علووش حبيبي احجي

لكن هو بس دكات كلبه وشهكته لزمته من اكتافه وصرت اباوع بعيونه واحچي

= تدري علي هسه انت. رجال البيت تدري لو لا احجي علي احچي لا تاذيني اني محد بقالي بس انت

حضنته اكثر وصرت ابجي = علي اني وامي ما بقالنه احد بس انت احجي اي شي بس لاتبقى ساكت

انتبهت مسحت دموعي وانا اسمع ام احسان // وجد تعالي جيبي صابونه جديده الامج

طلعت يمكن فرحت لكن سرعان ما تلاشت فرحتي واني اسمع امي ترد عليها وهي تضرب على وجهها

• ترديني اغسل بصابون وشامبو ورامي جوه التراب وهشام مسجون

امي دخلت للحمام وام احسان اجتني وهيه تكول // الله يساعدج ياوجد

صرت ابجي وام احسان تكلي // اسكتي خاله ما عولنه امج تدخل تذب على روحها شويه ماي اسكتي وسلمي امرج ال الله

بقيت ساكته وام احسان يمي الى ان شفت امي طلعت من الحمام لابسه دشداشه سوده نشفت شعرها ولفته بالشكاله بدون ما تمشطه وكعدت بالغرفه راحت ام احسان وره شويه كالت // وجد جيبيلي جاي

اخذت الها استكان جاي وكلاص ماي وهي تسولف على امي

• نجاة سمي بالرحمن وصلي وادعي ربج يفك سجن ابنج

برطمت وهزت راسها ام احسان استردفت // اي انتي ام ادعي الله يفك سجنه ويرحم رامي برحمته الواسعه

بقت خاله ام احسان تسولف على امي ادري تريد اتطلعها من الي هيه بي لكن بنفس الوقت امي فاصله عن الجميع

بعدين خاله ام احسان وكفت وگالت // ياالله اني لازم اروح (باوعتلي ) ما يحتاج اكلج خاله وجد اي شي تردي بس رمشي عليه

وانتي دادا نجاة كومي اتوضي واذكري الله

امي رفعت راسها وكالت // لا آله الا الله

من طلعت خاله ام احسان انا لحگتها وكتلها // خاله ما اعرف شلون اشغل الغساله

باوعتلي وابتسمت // تحچيين صدوك

= اي خاله ما اعرف

• تعالي وياي اعلمج عليها ما يراد الها شي

ورجعت ام احسان وعلمتني شلون اشغلها وفهمتني اهم شي ما اخلي البياضات ويه الملابس الملونه بعدين كلتلي

دشداشة امج اغسليها بايدج

صفنت بوجهها ردت عليه // سوده وخاف تذب صبغ وتخرب باقي الهدوم

هزيت راسي وهي گالت // راح اروح واي شي تحتاجينه اتصلي عليه بس انتي منين تتصلين

   سالتني //. وين نقال هشام

   هزيت راسي =. ما اعرف

    اتحسرت /. من يجي عمج اسالي عنه حتى اذا راحو للمحامي تتصلين عليه لو اجي يمج لو ادزلج منار ما اخليج ابحدج

= شكرا خاله

• ولا تخلصينها بس بواچي انتبهي النفسج والاخوج وامج

بلعت ريكي ما جاوبتها هي كالت // ديري بالج اني اسد الباب وراي

رحت للغرفه اشوف امي لكيتها اتصلي اني هماتين اتوضيت وصرت اصلي

بعد ما كملت هم رجعت للغرفه شفتها كاعده ع السجاده رافعه اديها وتبچي عرفتها تدعي الهشام الله يفك سجنه

والرامي الله يرحمه

اندك الباب عرفته هذا عمو عاصف رحت فتحت الباب شفته هو انطاني علاكتين وكلي :: هاج اخذيهن للمطبخ

اخذتهن خليتهن ع ميز الطعام اجه عمو كلي

:: مره ثانيه من يندك الباب گولي منو واتاكدي من الجاي ياالله تفتحيين

عرفته ضايج لان فتحت الباب بسرعه جاوبته = منو يجينه هو بس انت لذلك فتحت الباب

نفخ :: مي خالف بابا للامان

هزيت راسي سالني :: منو اجاكم

= بس خاله ام احسان اجت بقت يم ماما وهس توها راحت

:: وامج

دخلت للحمام وس...

هو قاطعني :: مفهوم مفهوم ياالله خلينه غدا ورانه روحه

شفته راح للديوان فتحت العلاكيك جايب دجاج ولحم وتمن ومقبلات وياهن مرك

رحت دخلت للديوان شفته ينزع بدشداشته وما منتبه الي رجعت حسبت من الواحد للخمسين دكيت الباب

:: ادخلي بابا

= عمو شنو اخليلك لحم لو دجاج

:: اي شي نعمه بس خلي اصلي

  = مو توك تگلي صبي غدا

:: اي بويه كلت بس اصلي بساع

= زين لعد بس ما گتلي شنو اصبلك

:: شتخليلي خلي انا اكل اي شي

هزيت راسي ورحت شفت علووش يلعب بلي كتله

= علووش عمو جاب دجاج شوي تتغدا ويا

ما جاوبني وكأن الكلام ما يعني

ورحت الامي سالتها = ماما اجيبلج تاكلين

ما ردت عليه اكتفت تهز راسها بالنفي

رحت للمطبخ خليت صحن تمن ونص دجاجه وصبيت صحن ثاني خليت بي لحم خليتهن بصينيه وياهن مرك ومقبلات وخبز

واخذتها العمو لگيته يلم بسجادة الصلا خليت الصينيه گباله هو باوع الها وكلي

  :: يوااش شنو هذا

= غداك

  :: انا اكل كل هاذ

= رحت العلووش ما قبل يجي يتغدا

:: وامج

= امي بس هزت راسها

:: وين هسه هي

= بغرفتها

كام رحت ورا. دخل للصاله وفات الغرفة علووش بدون ما يحجي ويا شاله واخذه للديوان وقبلها مر بالمغسله

غسل اديناته وهو يكله :: كافي لعب وصير رجال وتعال اكل ويه عمك

اخذه للديوان نزله وسط ذهول علي هو باوعلي كلي :: شبيج مصفنه روحي جيبيلنه ماي وتعاي اتغدي ويانه

  = ها عمو مو

:: مو شنو هذا الاكل عبالج كله اكله روحي ومره ثانيه سوي ويه الغدا شنينه

باوعتله باستفهام هو ابتسم :: يعني سوي لبن وبردي وجيبي