رواية المجنون العاقل الفصل التاسع بقلم جمانه السعيدي
بكر.... بعد رجوعي للدوام من بعد سقوط النظام
بدت الاحزاب والناس ادور مناصب
واكثر شي الناس الي انضهدت بعهد صدام بدت تبرز
وتحاول تاخذ مناصب
باعتبار هاي الناس انظلمت بلحكم السابق
رغم اني بعتقادي كل الناس كانت مضلومه بلحكم السابق
كل واحد انظلم شكل
الي عاش تجربت الحرب وفقد عقله اوفقد اطرافه
والي مات وعاف عائله كلها أيتام من بعده
والي انسجن ضلم
الفئه الوحيده الي كانت عايشه حياة الرفاهية بذاك الوكت هي الفئه القريبه من العائله الحاكمه ذوله اكثر ناس كانو مستفيدين من حكم النظام
بعد رجوعي للدوام تقريبا بعد سنه
اجاني صلاح
صلاح...ليش ماتقدم اوارقك
بكر..اي اواراق
صلاح...يمعود الناس كامت تفكر بلمناصب وانت كاعد
بكر.. شلون يعني مافهمت
صلاح...قدم اوارقك انت بزمن النظام مو تخلفت عن واجبك وانسجنت وتبهذلت تعتبر انت كنت معارض القرارات الحكم السابق
اي قدم اوارقك راح تأخذ منصب احسن من هذا
شبيك فاهي الناس وين وانت وين
قدم اوارقك واني اشهد وياك
شهد على كلشي صار وياك
جمانه السعيدي
بكر.....قنعني صلاح امشي وأقدم أوراقي وخصوصا ان بكل فترة خدمتي ما ترقيت بسبب السجن
جماعتي وين واني وين اني استحق اخذ مكان احسن من هذا المكان
فعلا قدمت اوارقي وبدت امشي بيهن
بعد فتره حصلت منصب احسن من مكاني وراتبي صار اكثر
خمس سنوات لاخ صعدت اكثر
اشتريت سياره حديثه وبيت وعفت بيت اهلي الأخوي هو وعائلته
شويه شويه ادرج واصعد الحد ما وصلت مكانه ممتازه
مكانه ابد ماكنت احلم اوصل الها
والشغل اخذ كل وقتي
الحد سنة الفين وعشره هنا عمري صار ٤٠ سنه او اكثر شويه
بيوم واني داخل دائرة الجوازات دوامي المتعود علي
الصبح واني جاي للدوام
سمعتهم يصيحون بلاسماء اسماء الناس الي مقدمه على جوازات اوجايه اجدد جوازاتها
واني امشي سمعت شهد حمدان عليوي شهد حمدان عليوي
راسا وكفت بمكاني اولا الاسم شدني
ثانيا نفس الاسم الثلاثي
وكفت بقيت اباوع
منتضر اشوف منو صاحبت هذا الاسم
هي شهد نفسها لو غيرها
عبالك تبسمرت بمكاني عيوني ادور على شهد
كلبي يكول هي راح تطلع شهد نفسها هي مو غيرها
وكفت وحده تعرفون المكان هوسه
واكثر من وحده واكفه
وكفت وصاحت نعم
وكع الجزان دنكت اتشيله واني بعدني منتضر تعدل وكفتها حتى اشوف وجها
هي لو موهي بعد كل هذا العمر ممكن ارجع التقي بيها مره ثانيه
معقوله الصدفه تجمعنا من جديد بعد كل هاي السنيين
شالت الجزان وحجت وياا مره جبيره كاعده بصفها
التفت عدلت عبابته واجت
جمانه السعيدي
اني واكف بلنص منا كراسي ومنا كراسي يكعدون عليهن المراجعين اني واكف بلنص بس بلبدايه
يعني يم اول كرسي وهي كاعده بلاخير
الضباط الي يشتغلون صايره مكاتبهم وراي
اجت تمشي بتجاهي وابد مارفعت عينها عليه
هي شهد شهد نفسها حلوه نفس ماكانت ما متغير منها شي
يمكن شويه كبرانه بس اني اشوفها نفسها
كلبي كام يدك على السريع فاتت من يمي وابد ما انتبهت
اجا واحد من الضباط هااا سيدي اكو شي
بكر...لا ماكو شي
التفتت شفتها واكفه يم مكتب واحد من الضباط واطلع اواراق من جنطتها
رحت وكفت يم الضابط الي هي واكفه كباله
بس قربت على الضابط وكف على حيله
...تفضل سيدي
بكر...شنو هاي المعامله البيدك كلت ذني الكلمتين ورفعت عيني راسا اجت عيني بعينها
كبل دنكت وعدلت عباتها
الضابط....سيدي هذا الجواز بي غلط بلاسم وجاي نحاول نصلح المشكله
بكر...شنو الغلط اشوف
اخذت جواز شهد بايدي
الضابط...لا سيدي الغلط مو بجواز شهد الغلط بجواز الحجيه اسمها حسنه شميط هليل
كاتبين حسنه شبيط هليل
شهد...هاي ثاني مره نرجع الحجيه مريضه واريد ناخذها الايران تسوي عمليه لعيونها
بكر... باوعت على الحجيه مو ام شهد اني اعرف ام شهد كلش زين قررت اسئلها حتى اعرف هاي منو
بكر...هاي امج
شهد....لا عمتي
بكر...مااعرف ليش حسيت كلبي انقبض من كالت عمتي
استغفر الله هاي شبيك بكر
اكيد مزوجه قابل منتضرتك
بكر...وين ابنها سكتت بعدين كلت زوجج
شهد... انقتل بلطائفيه الي صارت بعد سقوط النظام
بكر...فرحت من سمعتها كالت هيج
طبعا حرام عليه بس قابل بكيفي مجاي اكدر اسيطر على مشاعري
جمانه السعيدي
بكر...ضابط منير خلص هاي المشكله بأسرع وقت ممكن
تفضلي اخت شهد وياي للمكتب جيبي هاي الحجيه وياج وتعاي
مشيت كدامها ودخلت للمكتب باوعت الشكلي بلمرايه
طلعت معطر خليت كعدت على المكتب
وهي راحت جابت العجوز
واجت وراي
شهد.... الف رحمه على والديك شبعنا ضيم من ورا هذا الجواز
بكر...استريحي اجيبلكم ريوك جاي
شهد...لا شكرا بس لو تخلص شغلة الجواز بسرعه
بكر...اطمني راح تخلص اليوم
بكر...انتم منا من بغداد لان لهجتج مو مثل لهجت اهل بغداد
شهد...لا اني من محافظات الجنوب بس عيالي منا من بغداد
بكر...شلونج حجيه محتاجه شي
الحجيه...لا رحمله والديك
بكر...ماعده ولد غير زوجج الله يرحمه
شهد...لا بس زوجي ماعدها غيره هلكد ما بجت علي عيونها عمن
بكر..حقها تعمى الابن عزيز
بكر...عندج اطفال
شهد....لا ماعندي لان زواجنا ماطول غير ٣ سنوات
وزوجي راح بعد اني ماكدرت اعوف امه وحدها
ولا عندي مكان اخذها اله
بقينا اني وياها عايشين سوا
بكر...شلون عايشين
شهد. الحجيه عدها راتب وعايشين منه
بكر......احجي وياها واكول هلكد اني متغير ماعرفتني شهد
حتى بعد هذا الحديث المطول بينا
احس نفسي مرتاح نفسيا واني جاي احجي وياها
جمانه السعيدي
بكر...اريد اسئلج انتم منيين من الجنوب
شهد...من .....
بكر....يمكن اني اعرفكم
شهد...اذا اكلك اني من شفتك عبالك اعرفك من زمان
يمكن ما تصدك بيه لو تكول جاي تتلوك علمود معاملتها
بكر...لا بلعكس حشاج من التلوك
انت مو بت ابو حسين
صفنت بوجهي بقت تباوع متفاجئه
شهد...يااا تحجي صدك الله عليك ابو ي الله يرحمه
ابو حسين
انت منيين تعرفنا
بكر....مااذكر ابوج مات الله يرحمه رجال خير
شهد....اي ابوي مات سنة الالفين وامي لحكته سنة الفين وخمسه
واخواني ازوجو وباعو البيت وكلمن اخذ حصته
ما تشوفني باقيه يم عمتي
بكر...ليش ما تزوجين
شهد...بعد هذا العمر وهاي المسكينه وين تروح مالها احد غير رب العالمين واني
شهد...ماكتلي منيين تعرف ابوي
بكر...لا هيج معرفه قديمه
شهد...اي ولله ابوي جان كلبه طيب ويحب يساعد كل الناس
بكر........من رخصتج دقيقه
بكر...طلعت برا لضابط منير
بس شافني وكف
بكر...هااا كملت جواز الحجيه
منير...شويه واكملها
بكر...خلي يمك من يخلص جيبه اليه بس مو كدام شهد والحجيه
منير...ليش اكو شي
بكر...نفذ وخلص
رجعت للغرفه
بكر....الجواز محتاج يروح الدائرة الجنسيه حتى يتصلح الاسم تكدرون ترحون واني ادزه الكم للبيت
شهد...يااا مانكدر ناخذه ويانه تعبت من الجيه والروحه
بكر...باجر يجيكم للبيت اخذيها كلمه مني
بس اريد عنوانكم ورقم تليفونج علمود اكدر اتواصل وياج
شهد...اي ميخالف اني هسه انطيك رقم تليفوني
وعنوانه بس فدوه باجر حتى نلحك نسافر
بكر...باجر الجواز عندج جان كتلج انتضري بس خاف تتاخرين والحجيه تعبانه
الحجيه...اي ولله من الصبح اجينا وبعد مااكدر
بكر...روحي حجيه ارتاح وجواز يجيج للبيت
طلعن شهد والحجيه ودزيت وياهن العامل يأجرلهن سياره
مااعرف اوصف احساسي كنت اعتقد كبرت وبعد هاي السوالف مااقرب عليها
اليوم احس نفسي رجعت مراهق
رجعت النفس اليوم الي شفت بي شهد اول مره
