رواية أعظم خيانة ( كاملة جميع الفصول) بقلم الزهيريه

لعل الله يدبرها لك بافضل 

مما تتخيل 

ريماس/ الحياة صدف ودائماً الصدفة تلعب دور وسبحان الله دور الصدفه تقلب حياة الانسان اما تعاسة واما سعادة وهاي الصدفة صارت ويه ابويه من چان متواعد ويه زوجة خالي الليلة الچان متواعد بيها ويه زوجة خالي هو طفر على بيت جدو اهل امي وشاءت الصدف في ذاك اليوم چانوا اعضاء من حزب البعث يفترون بالمنطقه على الهاربين من الجيش ومن سوء حظ ابويه شافوا من طفر على بيت جدو اهل امي وهمه طافرين ورا وبوقتها صايره هوسه بالحديقه وزوجة خالي چانت بالصاله تراقب وچانت تريد ابويه يطفر على الحديقه حتى تگله على رجعت خالي للبيت ويروح لهذا من طالعه للگراج طافرين أعضاء الحزب البعث وره ابويه عبالهم افرار من الجيش ونهزم لهذا من المفاجأه لزوجة خالي باقيه تعيط والناس كلها طالعه من بيوتها تشوف صاير في بيت ام حمزه الي همه بيت جدو اهل امي 

يعني بين قوسين ما شافوهم من باگوا شافوهم من تقاسموا طول ذيچ الفتره ماكو احد شاف ابويه من يطفر على بيت جدو اهل امي لكن زوجة خالي فضحته وبوقتها حتى بيت جدو اهل امي گاعدين من النوم ومن ضمنهم خالو وبوقتها اعضاء الحزب مطلعين ابويه بچلاليق والكفخات ورايح وياهم خالو واكو ناس من الجوارين رايحين ويا خالو لان الناس تعرف جدو أبو ابويه والناس تحبه وتحترمه والمفاجأه انه بالفرقه عارفين إنه ابويه مكمل الخدمه العسكريه ومسرح انه الناس گامت تسأله انه شيسوي بنص الليل طافر على بيت ام حمزه 

وبنفس الوقت جاي جدو للفرقه الحزبيه ومطلع أبويه وثاني يوم بده الملامز والمغامز على بيت بيبي ام حمزه وراح خالو خبر عمامه من كثر الحچي الصار بالمنطقه وراحوا على بيت جدو اهل ابويه وطلبوا منه يحول لبيت بيبي ام حمزه 

جدو ابو ابويه فقير مادياً عرف إذا يحول لبيت بيبي ام حمزه معناها فصل وهو ما عنده وبوقتها جدو لازم ابويه وكاتله كتله بالصونده يريد يعرف ليش ابويه طافر على بيت ام حمزه لان ما معقوله طافر دى يبوگ منهم وهمه أصلاً حالتهم تعبانه كلش وابويه چان راح يجلط جدو من گال انه چان يطفر على زوجة خالو وعنده علاقه بيها تخبل جدو ومن خلال سؤاله عن بيت بيبي ام حمزه عرف عدها بنات 2 وحده عمرها 13 سنه وحده عمرها 11 سنه 

وجدو ما انتظر يحولون لبيت بيبي اخذ ناس خيره من المنطقه ومن ضمنهم المختار وخطب البنيه الچبيره لابويه حتى يسدون حلگ الناس وبنفس الوقت اهل امي ما يحگون ابويه واهله عشائرياً 

واهل أمي كذلك حتى يسدون حلگ العالم وافقوا انه ينطون آمي واسمها أنوار لابويه وبنفس الوقت امي نفضحت بالمنطقه على انه سلام الي هو ابويه وهو كل سلام ما عنده چان رفيج امي ويطفر عليها حياطين 

وبوقتها امي چانت بالأول متوسط ما قابله تزوج وتعوف المدرسه وبوقتها زوجة خالي گايمه تبچي وتگول لخالو من اطلع للسوگ تگول حماتچ سلام يطفر عليها الحيطان وخالو لازم امي موتها كتل ورايح ذاب كتبها بالتنور وحارگهن ومبلغ امي انه راح يلتحق للجيش ومن يرجع تكون انوار مزوجه سلام 

راح خالو للجيش وجدو أبويه مبلغ بيبي ام حمزه انه هو ما عنده يشتري غرفه نوم ولا عرس يسوي ويشترولها بس ملابس وياخذوها بعقد سيد وبالفعل هذا الصار وما مر على طفرة ابويه لبيت بيبي ام حمزه غير 5 ايام حتى اخذوا أنوار الي هي امي لبيت جدو ابو سلام وصارت زوجه لسلام الي هو ابويه وبدت معاناة انوار في بيت جدو ابو سلام 

اول معاناة امي هي ابويه چان يعاملها أسوء معامله من ضرب وصرف ما يصرف عليها لان حمد لله عطال بطال بس چان يمارس حقه وياها بالليل اما بنهار حال الظيم حالها لان تطلع ويه بيبي ام ابويه تنظف وياها المدرسه لان جدو چان حارس وبيبي فراشه بالمدرسه وهي مره چبيره بالعمر ما بيها حيل تنظف بس متمسكين بالحراسه وتنظيف المدرسه لكون البيت الگاعدين بي ما يدفعون ايجار لان وين يرحون ما عدهم مكان يگعدون بي

لهذا امي چانت تموت تعب وعذاب ومن تشكي لبيبي ام حمزه تگللها يمه اگعدي واسكتي اتحملي الچنه حماله والعيال عياله ما يعرفون كل بشر اله طاقه يعني واحد شگد راح يتحمل إلا ما يوم من الضغط العليه ينفجر وساعتها نوگع بالمحظور ونگعد نلوم نفسنه 

وما ننسى زوجة خالي بعد ما أبويه ازوج امي الطريق صار سهل عليها لان هذا سهل عليها الموضوع وصار ابويه عادي يدخل ويطلع لبيت بيبي ام حمزه بحكم هو نسيبهم وكذلك زوجة خالي بثينه صارت عادي تجي لبيت جدو ابو سلام 

واستمر الوضع سنه كامله بعد هاي السنه امي صارت حامل بيه وساعة الگشره لو ما حبلانه بيه احسن المهم لكون بيت جدو ابو سلام حالتهم فقيره وبحكم أبويه واحد دايح مو گد المسؤوليه امي طول مدة الحمل يخلون الها مغذي لكون ما تتغذى عدل 

وحمدلله اهل امي كذلك حالتهم ما تسر لا عدو ولا حبيب المهم امي هي عدها سوء تغذيه ولما وصلت لشهر التاسع بالحمل اني كذلك هم عندي سوء تغذيه ولدتني يم قابله وبسبب سوء التغذيه الولاده كلش صعبه عليها وصار عدها نزيف لهذا ما گدرت بعد مباشرتاً حولوها للمستشفى وحالتها خطره اما اني خلوني بالخدج اليوم تموت وباچر تموت بس مشيئة رب العالمين فوق كل شيء 

امي گدروا يسيطرون على النزف وتعدت الخطر بعد ايام طلعت من المستشفى واني كذلك رب العالمين كتبلي عمر وطلعوني من المستشفى وسبحان الله أكثر الرجال من يكون اعوج بحياته من يصير عنده طفل تتعدل أحواله وأخلاقه إلا سلام بقى نفس اخلاقه الزفت ويه امي ودائماً يعيرها انه جابت بنيه في حين هو لا صارف على امي او عليه وإستمر الوضع إلى حين صار عمري سنتين ونص 

وامي صار عمرها 17 إلا كم شهر وهي گد ما شافت عذاب من أبويه ما تحبه ولا تهتم شيسوي أصلاً يعني ما تغار عليه او تضوج من شوفه ما مهتم الها لا عادي عدها لان ما شافت منه شي حلو هي تحب عمها وعمتها ام وابو سلام وحتى أخواته تحبهم ومثل أخواتها وللامانه عمها وعمتها يحبوها وهي صيحلهم يمه ويابه وتعودت عليهم وعلى سلام زوجها بحيث حتى من يضربها صارت ما تروح لاهلها وبيوم مع اقتراب موسم الدراسه مديرة المدرسة اخذت جدو وعمامي وياها للصفوف حتى يشتغلون بالرحلات يعني الي مكسوره خشبه منه او طالع منه بسمار يصلحوا 

وامي وبيبي ينظفن بقية الصفوف واني چنت نايمه فهي راجعه للبيت حتى شوفني گعدت لو لا من راجعه شايفه ابويه وزوجة خالو بعلاقه كأنهم مزوجين هي تخبلت گايمه صيح وابويه گبل ساحبها عليه ومخلي ايده على حلگها حتى يسكتها وطلب من زوجة خالو بثينه انه اجيب حبل او اي شي حتى يخنگها بي بس هي ما تعرف منين جيب حبل او اي شي بوقتها ابويه طالب من امي انه تسكت او يذبحها وهي مأشره براسها انه تسكت وبس مبتعد عنها دافعه ابويه وطالعه تركض للشارع وبثينه زوجة خالو وابويه طالعين يركضون وراها ولكون خايفه ومشتته ومذهوله من دى تركض ما انتبهت انه هي متجه نحو الشارع العام ولا انتبهت للسيارات تمر بكل سرعتها كل هدفها انه تنهزم من بثينه وسلام لان يركضون وراها 

بعدها ما عبرت الشارع اجاها لوري محمل حصوه وضربها بحيث من قوة الضربه نشمرت على الرصيف 

بيان / اكو مثل يگول لا تخافون من بنت الخير لو تصير چنتكم، خافوا من بنت الفگر لو الي شافت الخير عدكم وهذا المثل ينطبق حرفياً على امي لانه في بيت ابوها ما شايفه الخير الشافته يم ابويه مرات أتعجب شلون ابويه ضابط بالجيش وهو شخصيته ضعيفه يم امي وحتى ما يحاسبها ولا يگللها على عينچ حاجب وهذا يسموا (الحب الاعمى) اني يوم رجعت من ساحة الطوبه وسمعت امي وجدو يحچون ما فهمت على منو همه دى يحچون وامي من انتبهت عليه تفاجأت وعاطت بيه بنفس الوقت بصوت عالي 

سميه / بيان مره ثانيه من اشوف يمي ضيوف لا تجي يمي روح لغرفتك يله ولي على غرفتك بعد ما اريد اشوف خلقتك قريبه عليه 

بيان / اسف امي اجيت اسلم على جدو 

بوقتها انسحبت واني بداخلي غصة لإنه فشلتني گدام جدو 

مر هذا الموقف ويه امي حدود 5 ايام واجى ابويه أجازه من الجيش سلم عليه وعلى اختي أغاريد ومن سلم على امي جاوبته من وره خشمها 

سامي / شبيچ اكو احد مضايقچ من الأولاد 

حنان / لا ما بيه شي لكن أريدك بموضوع 

سامي / احچي واطلبي شنو تردين 

حنان / لا مو هنا تعال للغرفه 

بيان / راحوا امي وابويه لغرفتهم وبعدها بحدود ربع ساعه صوتهم صار عالي واسمع امي تگول 

حنان / يعني شنو تعوف ابويه بمحنته انت معارفك هوايه ساعده 

سامي / سمي الامور بمسميتها ابوچ مو بمحنه ابوچ قمرچي وحرامي ومرتشي شسويله يعني 

حنان / ادخل انت هواي عندك معارف بالدوله توسط اله واسطاتك هواي وبعدين لا تگول ابوچ حرامي هو طلع عند نقص ما يعرف منين اجه هذا النقص 

سامي / لا يعرف منين يجي هذا النقص ابوچ قمرچي القمار يهجم بيت اكبر واحد وبعدين شلون أروح ادور على واسطه اله هسه گبل يوصل الخبر لرئيس اركان الجيش ووزير الدفاع على الضابط سامي يستر على عمه ابو زوجته المرتشي الحرامي القمرچي لا حنان اني معليه بي المفروض هسه من سمعت منچ هذا الحچي اروح ابلغ عليه بس راح اسوي روحي ما ادري 

حنان / المفروض منك ساعده لان سووا عليه جرد وقبل لا يبلغون عليه ساعده انت نسيبه 

سامي / تحلمين اني ما أساعد هيچ نماذج هاي ينافي الأخلاق واني أقسمت بالكليه العسكريه انه ما اخون بلدي واذا ساعدت ابوچ يعني اخون الله والوطن 

حنان / عيني لا صير ادور وطنيات براسي قسم بالله إذا ما ساعدت ابويه بعد ما ابقى بالبيت واخذ ويايه اطفالي 

سامي / حنان استهدي بالرحمن تخربين بيتچ بيدچ 

حنان / اني گتلك شنو اريد وانت بعد بكيفك 

بيان / هذا الكلام الي دار بين امي وابويه حرفياً 

وبعدها كل الوقت امي مشاكل ويه ابويه بحيث تحول البيت الى جحيم ومن شافت ابويه ما منه أمل انه يساعد أبوها قررت تعوف البيت وتروح لبيت ابوها ومن رادت تاخذنه وياها أغاريد اختي قبلت تروح ويه امي اني ما قبلت اروح وياها وبقيت ويه ابويه وبوقتها ضربتني على راسي بكل قوتها وطلعت هي واختي أغاريد قبل ما تطلع من البيت هي تگول لأبويه 

حنان / اروح اشوف حياتي ويه واحد يقدر جمالي مو واحد زنجي لو تموت ما ارجع إلا طلگني 

بيان / راحت امي وبكلامها كأنه أبويه ما چان متوقع قرارها ولامست عنده الوتر الحساس  

وما كان باقي غير يومين ويلتحق للجيش وهاي اليومين چانت كفيله ان تجنن ابويه لانه امي ابد ما اتصلت بي ابد وحتى لو بالكذب تسأل عليه وقبل ماكو موبايل چان يتصل بيها على التليفون الأرضي بس ترفض تحچي ويا ومصممه على الطلاگ 

وبعدها انتهى اليومين وچان لازم يلتحق أبويه للجيش لهذا اتصل على بيبي تجي تبقى يمي لانه اني رفضت اروح يم امي ومرت الايام ومر تقريباً اسبوعين على التحاق ابويه للجيش وصل تبليغ من المحكمه انه حنان رافعه قضيه طلاگ ضد أبويه استلمت بيبي التبليغ وابويه چان كل يوم يتصل بينه اني وبيبي يطمئن علينه 

وهاي المره من اتصل بلغته بيبي بالتبليغ الوصل من المحكمه وبالفعل بعدها ب 3 ايام اجى أبويه بس شنو مهموم ما يعرف شنو يسوي وبوقتها بيبي سألته شنو سبب الخلاف وهو كأنه يريد يفرغ همه وقهره حچى كل شي لبيبي وهي بدورها شجعته انه ما يوگف ويه ابو امي وانه يكون گد القسم والامانه كونه ضابط 

هذا الكلام حلو بس شلون بأبويه وهو يعشق امي لهذا قرر ياخذني ويا على بيت جدو اهل امي بحجة بيان يريد يشوفها حتى هو يحچي ويه امي وبالفعل رحنه لبيت جدو ومن دگينه الباب فتح الباب جدو 

وسبحان الله مرات نسأل نفسنه نگول على شخص هذا منين جاب هاي القباحه وقلة الأدب وهذا ينطبق على امي چانت كلش قبيحه بعد ما شفت جدو شلون يحچي ويه أبويه عرفت أمي طبق الاصل من ابوها بالقباحه وقلة الأدب والجحود 

سامي / اني جبت بيان يريد يشوف امه 

جدو / واحنه ما نريد نشوف خلقتك ولا خلقة بيان اخذه وروح منا ترى اگدر اروح اشتكي عليك بالفرقه الحزبيه واگول الضابط سامي مستغل رتبته ويتهجم على بيتي 

سامي / عمي اريد احچي ويه حنان احنه عدنه اطفال بينه لا تهدم بيتها بيدها الاطفال يظلون مشتتين بينه 

جدو / الك عين تحچي وتريدها ترجع وياك وانت تريد تسجن ابوها وتشوه سمعته 

سامي / عمي اني ما الي دخل كل واحد يحصد الزرعه 

بيان / وبوقتها ظل جدو يحچي على ابويه اشكال الكلام وعفنا يحچي ورجعنه لبيتنه وبهذا تصرف جدو سد كل المنافذ على أبويه في انه يشوف امي او يحچي وياها ومرت الايام وبين دوام ابويه والبيت اجى موعد المحكمه بيومها أبويه اخذني ويا حتى يستعطف امي بيه وبصراحه اني كل ما اذكر تصرف أبويه أتعجب يعني هي بالكذب ما تسال عني حتى بالتلفون من طلعت إلى يوم المحكمه معقوله راح يرق گلبها على بيان وترجع 

المهم رحنه من الصبح للمحكمه واجتي امي في ذلك الوقت چانت موديل الكوستم ابو الكتافيات اجتي امي لابسه كوستم وردي واسود كلش حلو عليها وهي حلوه ابويه ظل صافن عليها لكن بعدها راح يمها وطلب منها يحچي وياها ولكن جدو چان جاي وياها ما قبل تحچي ويا وبعد إلحاح ابويه وتوسلاته بامي قبلت تنطي 5 دقايق يحچي وياها شنو يريد منها 

وامي وابويه ابتعدوا من جدو واني أبويه چان لازم ايدي لهذا يمشي ويمشيني ويا وابويه بده كلامه ويا امي 

سامي / حنان اني ما اگدر بدونچ شتأمرين اني حاضر انفذ كل طلباتچ