رواية بنات الملا كامله جميع الفصول بقلم رغد الموالي
السلام عليكم أحبتي
طاب مساؤكم بكل خير
أعود لكم مع رواية جديدة ذات الطابع الإجتماعي تبتدأ بالحياة القديمه ثم تتدرج الى سنواتنا هذه...
رحلتنا في بنات الملا ستكون شيقة
رواية تجمع البساطة في الحياة المعيشية وحب الفطرة
والمأساوية والصراع والحب والفقدان...
رواية ذات طابع مغاير تماماً لما كتبت رغد الموالي من روايات سابقة
نرجو منكم دعم الرواية ونشرها على مواقع التواصل الإجتماعي كي تأخذ الرواية استحقاقها
محبين روايات رغد الموالي
نتمنى لكم قراءة ممتعه.
.....................
ميححانة ميحانة
ميحانة ميحانة
غابت شمسنا الحلو ما جانا
غابت شمسنا الحلو ما جانا
حيك
حيك بابا حيك
الف رحمة على ابيك
هذوله العذبوني
هذوله المرمروني
و على جسر المسيب سيبوني
على جسر المسيب سيبوني
ريحة الشاي والهيل معطره المكان الي يكعد بي دائما الحجي ابو عبد المجيب والي هي الگهوه يوميه يجي ويكعد يسولف وي شياب المنطقه وصوت ناظم الغزالي بالراديو يطرب القلب
سالفه تبدي وسالفه تخلص مثل حال هالناس يوم ينولد طفل ويوم يموت واحد ثاني
حجي شعبان رجال بنهاية عمره حدبت ظهره السنين وصار يتكأ على عصا تساعده يروح ويجي من البيت للكهوه ومرات من البيت للجامع
كان رجل ضعيف البنيه نوعا ما ووجها بدت تطوي السنين عليه صفحاتها لحد ما صار متجعد وكل وحده من هاي التجاعيد تحس الها سالفه وقصه وروايه غير السنوات الي وكعت شعر راسه وصار شعره الي هو اليشماغ الي يلفه مثل العمامه على راسه وي لبس الدشداشه البيضه واليلك فوكاه ونظارته الي ميكدر يشوف اذا مو هي
شعبان جان اله احترامه بين الناس بسبب مساعدته الهم
تعلم شغل العطاره من هو وصغير من والده عبد القادر لكن شعبان ابو عبد المجيب دخل وي شغله شغل ثاني وهي العرّافه صار يكتب حجابات للناس
الي تجي بنتها متفززه او تبجي ومتسكت ابد
بده يكتبلهم حجابات وينصحهم يشيلوه وراح تخلص من الي تعاني منه
او ينطيهم بخورات ومي الورد الي مقري عليه ايات من القرآن او يستخير خيره من القران الكريم
الي تريد تتزوج تستخير حجي شعبان والي يريد يفتح شغل جديد يستخير يم حجي شعبان
والي اموره متعكره وحياته مماشيه صح يشكي لحجي شعبان وينصحه
حجي شعبان كان اله 6 اولاد
عبد المجيب
عبد الودود
عبد الملك
عبد اللطيف
عبد الرحمن
عبد الرحيم
رغم ما امهم زهيه ولدتهم وماتت وهم صغار ربو من دون ام ابوهم حجي شعبان من حبه لزهيه ماتزوج بقه محافظ على ذكراها بقلبه وبذاكرته
لهسبب فتح العطاره من ضمن البيت حديقة البيت سواها على شكل محل بابها على الشارع وصار يشتغل على باب الله وولده يمه عبد المجيب هو اكبرهم وتعلم شغل العطاره من ابوه لكن كان مولع بشغله الثاني والي هو العرّافه
شعبان انتبه على ابنه ياشغله يحب بالضبط
شعبان... وليدي عيب كل مايجيني احد انت تعوف العطاره وتكعد يمي
عبد المجيب... يابه حلوه يعني اشوفك تعرف كلشي عنهم
شعبان... لهذا السبب داكلك لا تكعد يمي
عبد المجيب... صار يابه
شعبان... كوم شوف اخوك عبد اللطيف وعبد الودود رجعو من مدرستهم
صار يابه صار
راح عبد المجيب يشوف اخوته وشعبان الي معارض على فكرة الدراسه بس مسجلهم لان جان الامر بهذاك الوكت لازم يتعلمون وميصير يبقه الجهل وتبقه الناس متعرف تقره وتكتب
صار يحجي وي نفسه
هاي منين طلعتلنه سالفة المدارس نوب تعال شوفهم رجعو لا وبدللهم ولبسهم وطلعهم
اشو هيانه صرنه بهذا عمرنه عرفنه نقره القران ونتهجه من الملا والكتاب يادراسه يااهالسوالف هاي
والله وكت نوب تعال سجلهم ودرسهم شحيطلعووون مدكلولييييي
جان كل يوم عبد الودود وعبد اللطيف يرحون للمدسه ويرجعون وشعبان ساكت وقابل بحكم القوي على الضعيف بس عبد المجيب جان هو الي يساعد ابوه ويهتم ب أخوته الصغار عبد الرحمن وعبد الرحيم
مشت السنين وولد حجي شعبان سنه عن سنه يكبرون وتكبر وياهم المسؤوليات
صار حجي شعبان يعلمهم يعتمدون على نفسهم
عبد المجيب لزم العطاره وصار حجي شعبان يتفرغ لشغله الثاني والي هو العرافه وعبد المجيب يمه بالعطاره ويساعده اخوه عبد الودود
وعبد اللطيف صار يشتغل بصناعة الفخار
رغم عمره صغير بس هالشي ميمشي عند حجي شعبان
عبد الرحمن وعبد الرحيم جانو صغار
مهمتهم يكعدون يم العطاره ويبيعون عسليه وطبعا جان عبد الرحمن الي علساس جبير ويفتهم اكبر من عبد الرحيم
حجي شعبان وشوفته ولده شلون يحومون حواليه ويشتغلون ويعتمدون على نفسهم هالشي فرحه هواي
لهسبب بده يعلم عبد المجيب شغله الثاني والي هو العرّافه
لحد ما صار عبد المجيب الكل بالكل بالشغل لدرجة ابوه شعبان باأخر أيامه صار يتردد للگهاوي واكتفى با الاستخاره للناس اما الحجابات وهالامور الي بيها كتابه صار يدزهم لعبد المجيب لان شعبان كبر
وصارت متعته كعدت الشياب وصوت ناظم الغزالي وميحانه.....
ب اخر كل يوم يمر الليل شعبان ابوهم يسبقهم للبيت ويروح يفرش لولده على السرير الكصب بطرمة البيت جان البيت من طين والدنيا صيف وحاره ومو الكل عدها كهرباء بس الاغنياء والوجهاء عدهم كهرباء لهسبب جان يروح ابوهم يشغل الفانوس ويفرشلهم ويحضرلهم العشاء لو محروك اصبعه
لو باميه ثريد ومن هالامور الاكلات المتعارف عليها قبل بهذاك الوكت
ولما ولده يجون يلكون ابوهم يستقبلهم ب الهلا
عبد الرحيم جان اصغرهم وجان ماينام اذا مو بحضن شعبان الصغير والمدلل بين اخوته
صحيح جانت قبل الحياة على بساطتها والناس فقيرة حال بس جانت البركه بالدنيا موجوده
تلكي كل واحد قانع بلي الله قاسمه اله ولام اولاده وساد باب بيته وكاعد
الليل جان يمر جنه عليهم برودة الليل ونسمة الهوى
الي تعم بالمكان خصوصا لما الحياطين من الطين والارضيه الي من الطين يرش عليها ماي
تصير تنطي رائحه طيبه ريحة تراب ومي
جانو يعدون كم نجمه فوك بيتهم
حجي شعبان جان يعلمهم
هذني النجمات السبعه بنات نعش
وهذني العگرب
وهذني الدب القطبي
ورسومات بالنجوم اغلب البحاره يعرفوها ويعرفون لشنو ترمز
من خلال رحلاتهم بالبحر يركزون بالسماء
عبد المجيب.... يابه ليش هذني النجمات اسمهم بنات؟ وليش بنات نعش سموهم يعني هم صدك بنات؟
شعبان.... سموهم بنات نعش حسب مايكولون وراهم قصه هذول
عبد المجيب... شنو قصتهم
شعبان.... جان ابو هالنجمات رجال اسمه نعش
عنده سبع بنات
بيوم نقتل ابوهم والي قتله رجل يسمى سهيل
لما عرفو بناته بمقتل ابوهم قسمو انو ياخذون بثار ابوهم اربعه من البنات شالو نعش ابوهم وتلاثه صارو ينوحون عليه
اما سهيل ف نهزم للجنوب الشرقي
البنات راحو للجهة الشماليه يدورون على سهيل الي قتل ابوهم فبقو يدورون ومالكو
العرب بهذاك الوكت لما شافو النجمات هذه بالسماء بشكل مربع اربع نجمات وكأنهم يحملون نعش وراهم تلاث نجمات وبالجهة الشماليه سموهم بنات نعش
وبالجهة الجنوبيه الشرقيه اكو نجم يظهر كم شهر بالسنه وراها يختفي سموه العرب نجم سهيل
واعتقدو سابقا ان هذوله بنات نعش والنجم المضيء نجم سهيل وهذني النجووم لو مهما زادت سرعتهم حتى يلتقون مراح يلتقون
فلا بنات نعش اخذو بثار ابوهم ولا ارتاحو من طلب الثار
عبد المجيب.... وشوكت يطلع نجم سهيل شوكت نكدر نشوفه
شعبان... يظهر بنهاية شهر الثامن ويختفي بنهاية شهر الثالث نجم مضيء وجميل العرب كانو يستبشرون بهذا النجم رغم كان من المفترض يتعاطفون مع قصة بنات نعش
عبد الودود.... ياب شوكت صارت هاي القصه؟
شعبان... يكولون عمر نجم سهيل 25 مليون سنه
ويكولون عمر هذا النجم صغير مقارنة بالنجوم الكبيره بالعمر
ف يعني ممكن يكون مضى على القصه 25 مليون سنه
بقو ولد حجي شعبان واحد صافن بوجه الثاني من غرابة الي سمعوه شوكت نخلق الكون لعد؟ وشلون؟ ٠ وهل احنه اخر الجيل لو اكو بعدنه اجيااااااااال؟؟
الايام والسنين صارت تمررر والي جانو اطفال صارو كبار
عبد المجيب صار رجال وقرر ابوه شعبان يزوجه
خطبله بنت عمه بسعاد
عبد المجيب بوكتها جان حيل فرحان لان شايفها لبنت عمه بسعاد بوكتها حسد نفسه واعتبر روحه من المحظوظين لان زواجته تختلف شايفها للبنيه الي راح يتزوجها
خطبوله بسعاد وبدت ام بسعاد تجهز للعرس
حجي شعبان اشتراله غرفه مرتبه على كد الحال
جانت مستعمله بس ودوها يم النجار رتبها الهم
اشترو الدوشك ومخاد الي تكون وحده وطويله
ولحاف متوسط قماش ستن بسعاد بوكتها رادته احمر لان عروسه
حظرو للعرس وجابو الي يكدرون عليه والباقي كملو الخالات والبيبيه
كم وحده من خالاتها جابولها قطع قماش
وبيبتها جابتلها كحل مكه وديرم
وسوولها حنه لمة نسوان بينهم بسعاد جانت حيل فرحانه وجانت تكتم فرحتها لحد ثاني يوم الزفه
زفوها وراحت لبيت عبد المجيب ومن هنا بدت حياتهم وقصتهم
عبد المجيب... هله وكل الهلا نورتي يابعد جبدي وهله
بسعاد... دنكت بخجل وابتسمت
عبد المجيب.... الحمد لله صرتي الي بسعاد تدرين انه احبج من زمان بس ماجنت اكول خاف ابوي وابوج تصير عداوه بينهم ويكله ابنك حب بتي
بسعاد... صدك
صدك جنت تحبني عبد المجيب
عبد المجيب.... اي وبعد هسه احبج وراح احبج بعد اكثر اني ما ممصدك انتي صرتي مرتي
بسعاد... اني هم مامصدكه الحمد لله
مشت الايام بسعاد تأخرت بحملها جان كل شهر يمر وهي مو حامل الوجوه تغيم وهي تبقه خايفه بس لاعبد المجيب يمل ويتزوج عليها
وراها بسنه شعبان قرر يزوج عبد الودود وخطبله جيرانهم وزوجه الها وبشهرها صارت حامل
وشتغلت مكايد نسوان الحمى
نعيمه... عبد الودود جيبلي وياك دارسين اريد اسوي خبز مريس ابنك خبلني بعده مااجه للدنيا عاجبه خبز مريس
عبد الودود... اي بعيني لك يدلل حبيب ابوووه
نعيمه.... وياك جيب حرمل هم يراد نبخر نتجفه شر الحساد والي عينهم متوكع للكاع
عبد الودود ارتبك بنظراته ومارد وطلع
دخلت غرفتها بسعاد تبجي مداتسلم من لسان نعيمه
وكلما يجي عبد المجيب يحس بيها ويعرفها هي اليوم بجت واكو احد مضايقها
مرت الشهور وكبرت بطن نعيمه وصارت بشهرها السادس جانت بالسطوح تشر الملابس ولما داتنزل من الدرج عثرت وكعت من الدرج
وعلى اثرها خسرت طفلها وذبته
نعيمه.... بدموووع وانهيار اعصاب.... يمه ابنيييي
مات ابنيييييي عبد الودوددد ابنيييي
عبد الودود.... ربج ماكاتبله خبزه بهذه الدنيا كولي يالله
بسعاد... الله يعوضكم لتضوجين
باوعتلها نعيمه بغضب وتهجمت عليها بالكلام.... كله منججج انتييي انتي السبب عينج عليه حاسدتنيييي
يالعاكر يلي ماتخلفين عينج عليه
شعبان... نتر بيها وحجه... اششش شنو هالحجي هذا مو عيب تحجين هيج وي مرت حماج طيح الله حظج
بسعاد مباشرة غادرت المكان وطلعت مخنوكه وتبجي واجه وراها عبد المجيب
عبد المجيب... لاتنقهرين منها عوفيها هاي متدري شداتخربط
بسعاد.... من اول يوم حملت بي وهي كلشي يصير تعلكه بخانتي وعبالك بس هي صارت حامل بالدنيه
عبد المجيب... عوفج منها تولي هاي اخلاقها تعبانه
بسعاد... بدموع... دكلي هسه رجلج يتزوج عليج انتي معرفتي تخلفيله جاهل حالج حال النسوان
عبد المجيب... عوفج منها لاتهتمين الها
بسعاد... عبد المجيب ولو تزوجت اني شلون بيه
عبد المجيب... اني مااتزوج انتي فد الي وماتصيرلي مره غيرج
بعدين انتي صغيره اخذتج يمكن لانج صغيرة عمر يابسبوستي
... اتبسمت بسعاد ودنكت
عبد المجيب... ها اييي هيج اضحكي خل تبين رصعاتج يمن فدوه اروح لهل الرصعات
بسعاد... هسه اكوم شلون اسويلك سكان جاي وهم سويت كعك
عبد المجيب... مو كتلج لاتسوين بعد معجنات المن تسوين لهاي الي تحجي عليج
بسعاد... ولايغزر بعينها حملها كله تتنسه على حلويات ومعجنات واسويلها رغم الجوله صايره دخن وداتعبني بالطبخ
عبد المجيب... باجر اطلع للسوك واجيبلج جوله جديده ولايهمج
مشت الايام ونعيمه من نظراتها بينت شكد متندمه على كلامها الجارح الي جانت تأذي بي بسعاد
بسعاد طيبه وعلى نياتها وبطبعها ماعدها غل وحقد على احد
بيوم بسعاد واكفه تطبخ لكن ماتحملت ريحة الطبخ طلعت بره تتقيأ من ريحة الطبخ
مرتين وتلاثه صار وياها نفس الموضوع لحد ما صاحت الجده واجت فحصتها والبشاره جانت وياها ابتسامه
الف مبروك بنتي انتي حامل
من فرحتها بسعاد كمزت على الجده وصارت تبوس بيدها وبراسها
وماصدكت شوكت تشوف عبد المجيب وتكله
ولما اجه عبد المجيب وياه ابوه شعبان بشرتهم والفرحه تغمرها
ومن شدة فرحه عبد المجيب دمعت عيونه وسجد لرب العالمين شكر على فضله عليهم
مرت الشهور وكبرت بطن بسعاد وعبد المجيب يعد اللحضات والساعات والايام والشهور الي راح ينور لبيتهم اول طفل
نعيمه رجعت صارت حامل مره ثانيه وكضتها نوم بيت اهلها خايفه على طفلها
والشغل ومسؤوليات البيت وابو عبد المجيب واخوته
كلها على بسعاد الي جانت تقدم كلشي الهم بحب ومن دون منيه عكس نعيمه
لهسبب كلها جانت تحبها وبمثابة ام الهم حتى بيوم الي يشتغلون زين يجيبولها شي من السوك ويفرحوها هذا اشترالها قطعة قماش
وبيوم جمعو من يومياتهم وجابولها جرغد وجلاب ذهب ونطوها لعبد المجيب يقدمها لمرته هديه
عبد المجيب.... هاي اخوتي لمو بيناتهم ورادو يفرحوج بسعاد
بسعاد... بفرحه... الله هاي شكد حلوه والله نفسي بيها من زمان بس هاي غاليه ليش كلفتو نفسكم
عبد اللطيف... احنه اخت وام ماعدنه وانتي صرتيلنه ام واخت بسعاد ومانلكه احسن منج
بسعاد... اشكركم كلكم خجلتوني وحتى مااعرف شنو اكللكم
عبد الودود.... انتي بس كدام نعيمه لاتكلين من تشوفج كليلها اشترالياها عبد المجيب
بسعاد... ماشي تآمر
عبد الرحمن.... والله لو مشتغل زين جان بعد وياها قطعة قماش جان هسه وي الجرغد وكلها تصير جديده
بسعاد... حضمه لهذا مال اعراس او طهور اتكشخ بيها كدام نسوان المحله
شعبان.... ههههههه والله يابسعاد سوالفج مثل سوالف عمتج زهيه هم جانت مثلج تضمها للحاجه الزينه وتكلي اتكشخ بيها كدام نسوان المحله
بسعاد... كل النسوان هيج عمو
شعبان.... الله يستر عليج وعلى نسوان امة محمد بنيتي
وتكأ على عصاه وراح لغرفته
صاير يتعب حيله مو مثل قبل وكلها صارت تلاحظ هالشي وتسكت
جانت مطر ورعد وبسعاد بشهرها التاسع
الليل كله مانامت تلوب من الوجع
كتمت وجعها ومارادت احد يكعد وةيحير وي حيرتها والمها
لحد ما فجرر صار والوجع زاد حست بصوت شعبان يتحمحم توه كعد من النوم بعد ماخلص اذان الفجر
تفاجئ اول ماشاف بسعاد تلوب على كرويته كاعده وتعض بالمخده
شعبان... شبيج بنتي
بسعاد... عمو حموت وجع قوي... وتعصر بعيونها من الالم
شعبان... وين عبد المجيب
بسعاد.... نايم ماكعدته حجييييي
ااااااااااااخ وكمشت ظهرها
شعبان... تكأ على عصاه وخفف مشيته رغم هو كوه يمشي وراح يدك باب غرفة عبد المجيب
ياب وليديييي عبددد
اكعد مريتك حتولد
بسرعه فتح الباب عبد المجيب كول ياب
شعبان... مريتك وليدي عبد الحك الها
عبد المجيب.... بسرعه اجه اروح اجيب الجده بسعاد
بسعاد.... بتعب وتعرق وتتكلم بتعب ونفاذ قوه...
اي عبد مدااتحمل
صار..... صار بسعاد
شعبان توجه للمطبخ شويه وطلع شايل كوب وقدمه الها
شعبان... هاج بنتي اشربي هذا
بسعاد... ش ش شنو هذا عمووو
شعبان.... شاي اوراق التوت شربي يسهل عليج الولاده بنتي جنت حاسب حسابج حتولدين هالشهر وجبت من العطاره للحوش شويه
اخذته وشربته وبعد مرور وقت اجه عبد المجيب وياه الجده ومساعده وياها
ودخلو بسعاد للغرفه وصارو يولدوها
مر وقت بعدها صوت الحفيد الاول صرخ بالبيت حجي شعبان وعبد المجيب واحد باوع للثاني بفرح مثل الي مامصدكين
شويه وطلعت المساعده وبيدها الطفل
مبارك بنيه تخبل جنها كمر
شعبان... اتبسم وسم بالله واخذها بيده الاثنين
بسم الله الرحمن الرحيم
ماشاء الله بنيه حلوه كمر على امها
عبد المجيب... صدك تشبه بسعاد حلوه
شويه وطلعت الجده
هاي مريتك جيبتها بس شنو اريدك تداريها هالجم يوم منا جايبه وبارده خل تدفه زين كلش كلش زين
لايستبرد حليبها ويندار بالبنيه تتمرض عود بنيتكم
هم
سويلها لكمه تسند حيلها بي يمه
عبد المجيب... صار حجيه صار
راح عبد المجيب يم بسعاد واجن حجي شعبان وكعدو يمها وهي شكد تعبانه بس كلها شوك ولهفه والفرحه تارسه وجهها ببنيتها
بسعاد... شحتسميها عبد المجيب
عبد المجيب... شتسميها يابه
شعبان... زمان جانت امك كل ماتحبل.وتجيب اكللها هالمره تجينه جواهر حيل احب هالاسم
عبد المجيب... هاهيه يابه نسميها جواهر
وصارت بنت عبد المجيب الاولى اسمها جواهر مدللة البيت وكل عمامها يحبوها
مرت الشهور وكبرت شويه. جواهر
وزاد تعلق عمامها بيها ياهو الي يجي من عماما من للشغل مشتريلها شي
بيوم عبد الرحيم اجه وجايب وياها اسوارات بخرز ابيض واسود
عبد المجيب... صدك هاي ولا لبسنالها منها لجواهر
عبد الرحيم... اي شفت بنت صديقي ملبسيها منها عاد كلت لاابوها الا تدليني منين جبتها و رحنه سويه وجبتلها لجوجو حبيبة عمها
بسعاد.... تعيش وتجيبلها رحومي عاشت ايدك
عبد الرحيم... لاتبقون تتشكروني تحسسوني مسوي فد انجاز هي معاضد ام شحم ولحم جبتلها شجايب قابل
بسعاد... عاشت ايدك
وي الكم شهر الي مضت نعيمه جابت ولد هم
وهم كلهم فرحو بي وسمو حيدر لكن بقه حبهم الاكبر لجواهر
دلعهم لجواهر هداياهم هم الها هالشي خله نعيمه
تحس بالغيره وصارت على طول تسوي مشاكل وي بسعاد رغم بسعاد تكبر عقلها وماترد عليها الا ماندر
كانت نعيمه كل الوقت بغرفتها ماتطلع منها الا وي جيت الولد من الشغل وكل التنظيف والطبخ على بسعاد
الايام والشهور مرت وهنا حجي شعبان قرر يزوج عبد اللطيف
وراحو خطبوله بنت عمه جميله
بأسبوع واحد رتبو كلشي وتزوجو
جميله جانت فقيره وصغيره ومن اول يوم الها بالبيت كعدت وتشتغل وتساعدهم عكس نعيمه
بسعاد.... انتي بعدج ماصارلج 7 ايام على زواجج خل تكضي هالسبع ايام وعود ساعدينه
جميله... والله مامتعوده اكعد اني وبعدين شكو بيها واذا عروس
بسعاد... لا عبد اللطيف هسه يجي وهم لازم يشوفج متكشخه ومتزوكه روحي حطي زواكه لاتبقين هيج
جميله... ماادري بسعاد اني حيل استحي منه
بسعاد.... هي كل العرايس بداية زواجهم يستحون بمرور الوقت تتعودون واحد على الثاني
جميله.... ماادري واللله حيل استحي
بسعاد... روحي بغرفتج هسه لاتخلين الرجال يملج من اولها
جميله... صار
اجت نعيمه وي حلت الولد من شغلهم لكت بسعاد تشوي لحم ومحضره صينيه بيها فواكه وخضراوات وخبز
نعيمه... هاي لمنو
بسعاد... للعرسان
نعيمه... متطلع من غرفتها تسوي هي انتي شكو
بسعاد.... اني كتلها روحي لغرفتج
نعيمه... هه والله يالله
باوعتلها بسعاد وراحت تودي الصينيه بعد مااستوى اللحم
بعد يومين ندكت الباب وراحت بسعاد فتحت الباب
تفضل منو
عبد اللطيف موجود
منو اكله؟
كليله شهاب
راحت بسعاد وكالت لعبد اللطيف
شهاب جان صديق مقرب كلش من عبد اللطيف
مثل الاخوان شغلهم سويه طباتهم وطلعاتهم......!
بعد مرور 5 سنوات.....
نعيمه صارو عدها 4 جهال
وجميله 2 جهال
وبسعاد بقت على جواهر لكن بعد هذه ال خمس سنوات بسعاد صارت حامل وهنا الفرحه رجعت عمت بالبيت بحمل بسعاد
حملت وجابت دره وجانت تشبه امها بالضبط مثل جواهر
كانت ملامح بسعاد عيون صفر وجه ابيض وشعر طويل اشقر والبنتين طلعو يشبهون امهم.....
( ومن هنا راح نبدي نذكر ولادة وحده وحده من بنات الملا ونتحول في الحلقات القادمه لقصصهم)
