رواية بيوت الصفيح كامله جميع الفصول بقلم زهراء السراي
.
حين كانت أمي
كنا على قيد الحياة
أما بعدها فالموت
.
.
صِبى
____________________
الطفولة
ذكرياتنا الأولى
هناك في اللامكان
نركض بسرعة
بين سيارات الزبالة
ونتسابق ويا الريح
خفيفين بخفة طفولتنا الضايعة الطايرة
وية ريح المستقبل العاتي
رضا يبتسملي
-لتلمين غراض اني ألم بدالج
رووووحي گعدي
ويركض يسابق فرقد
بينما رضا يدير بالة عليه
آني أدير بالي على فرقد كأنه
أثمن أشيائي
اسمعة يصيحيلي
وهو ضايع بين أكوام الزبالة
ركضتله
-صباوي تعاااااااي خوش غراض
ركضت لمكانه اللي گاعد بي
بأيدة الهزيلة يگلب يباوع للگاع
گونية مشگوگة كلهة قراصات
واطواگ شعر وجواريب بنات
وألعاب ودفاتر رسم
-لا مااروح الم وياك ونرجع سووووه
-شبيج ولج فشلة من الولد اختي الاصغر مني تدير بالها عليه
-خليني يمك فرفور
جر گصيبتي يضحك
-ولج عيب صار عمري ١٦ وانتِ تصيحين فرفور
-اي غير احبك
ضحك وباس خدي حيل
-يلة ظلي بس شوفي ذاك تل التراب روحي
گعدي علي واني اكمل واصيحج
مشيت مسافة وصاح
-تعاي ولج اخذي الغراض لا ينگروهن الولد
رجعتلة راكضة اخذت الغراض ورحت گعدت غصباً عليه
وأباوعله بيدة عود يبحث بأكوام الزبالة عن فافون نحاس
اي شي ممكن يجيب فلوس
يتشاقه هو ورضا
وكل شوية يتصارعون بين اكوام
الأكياس والاوساخ رضا جيرانا
عمرة ١٨ من طفولتي هو ويانه
مثل الظل من نوگع نحتاجة
من نجوع نلگا هو مثلنة عايش ببيوت التنك
وعندة امه وخواته اربعة وابو ميت
هو القايم بواجبهم
واني عندي اخوتي فرقد
وغِنى والصغيرة مُنى
اعمارنة بالتسلسل
فرقد ١٦ اني ١٣ غِنى ١٢ مُنى ٦ سنوات نعيش بمنطقة كاملة بيوتهة من تنك ماعدنة أحلام بعيدة
أحلامنا يومية او آنية
حلمنا كل يوم بيومة
ان ناكل ونشرب وننطي
مصرف لأبويه
اخذني النعاس وسندت نفسي
على حجارة جبيرة
وغفيت بحلم شفاف وردي
ببيت حلو بي أمي تتمشى بثوب حلو
ومُنى متعلگة بأطرافهة تلعب
واني متمددة وهي تمسح على راسي بهدوء
فزيت على صوت رضا يهمسلي
-صباوي گعدي ارجعج للبيت
گعدت عدلت نفسي
-لا أنتظر فرقد ونروح سويه
-ولج نتأخر بعد سيارات بلدية المنصور تجي
وتعرفين شنلگع بيهن ناس طاگة
أشكال ألوان تطلع نتاخر للمغرب يلا عيني
باوعت فرقد ماكو
فزيت واگفة
تحركت ماشية ويا وهو يعدل بشعره
بعد مارفع اللثام اللي يتلثم بي
وبينت شواربة ولحيتة الخفيفة الشگرة
وعيونة الزرگة التلمع ويا ضوه الشمس
ابتسمت
-لو تصير ممثل احسنلك
-المثلنا مايتحلم ياحلوة
عدل طرف ضفيرتي منزلها على ظهري ومشينا
لمنطقتنا
جدول مياه آسنة ومجاري عملاق يمر ورة بيتنة
صاير بظهر البيت يم شباك غرفتي
او بالأصح المربع الصغير الأسمي غرفتي اني وأخواتي
الصغار
وباب ثانية بصف باب الغرفة نعبرلها من الجدول
عن طريق جذع نخلة جبير مسوي مثل جسر صغير
مرات يعبر رضا علي يدگ الشباك على كيف
ينطيني لو نستلاية لو جيس جبس
لو شغلة حلوة لاگيها قراصة
طوگ وردة يجيبها اليه
والباب الأمامية تواجه المنطقة
البيت كلة عبارة عن غرفة لأبوي وخالتي زوجتة وفسحة بالنص ينام بيهة فرقد ومطبخ صغير حيل
البيت حرفياً وفعلياً مبني
من التنك المليان تراب ومسفط على شكل جدران
وسقوف التنك والجينكو والحديد
من احجي ويا فرقد وأگلة ليش منعدل البيت
يضحك ويگلي هذا ماوجدنا عليه آباوءنا ويسكتني بمزح
امشي وسرحانة بحياتنا وگفني صوت رضا
-وين سرحت الحلوة
ابتسمت
-بالعبرة شلون راح أعبر
-لا متعبرين الجذع مناك دخلي من الباب
-لا ادخل منا بس أدخل من الباب خالتي تلاگيني
ومتخلي شي بيدي متاخذة
-أخاف عليج ولج لا توگعين
-انت عبرني
احس روحه ردت لصدره وتنفس حيل ضحك
حك شعرة اللي تطاير ويا نسمات الهوى
واخذ الگونية عبرهة وصلهة للباب الخلفي
ورجعلي
لزم ايدي وگفني عالجذع
امتدت ايده بخفة لخصري لازم ثوبي
منا ومنا ومبتعد عني شوية ويمشيني
لحد ماوصلت الباب
-يلة ياحلوة أني أروح لفرقد بعد
جر ضفيرتي شويه وهو يضحك وراح
دفعت الباب على كيف وهو صاير لزگ بصف باب
غرفتنا
اللي تسميهة غِنى گن الدجاج
دخلت والتقت عيني بعين خالتي
-هااااااا وصلج العينتين
-منو قصدج
-رضا
-اي فرقد وصى گاله وصلها
باوعتلي وعينها عالگونية البيدي
اللي مليانة لربعها غراض
-وهاااااي شنو
دفعت الگونية وراي
-هاي لأخواتي بيهة شغلات بنات
هزت ايدهة مستهزأة
-دجييييييبي اخواتها شحلوها بحلگها الحجاية
جيبي خل نجيبلنة شي للبيت
سحبت الگونية
وطلعت للفسحة اللي يسموهة هول
طشرتها بالگاع وگامت تلگط
بعلاگة على جهة وحدة وحدة
لحد ماصفتنا على كم شغلة النا
-هاج اخذيهن ذني كافي
-والبيدج
-ابيعهن واجيب اكل ابوج اليوم اجا المايتسمى
فلاح واخذة وطلع معناتها يرجع مفول شرب ويدور مشاكل على كل شي
اسوي اكل عالأقل ألصم حلگة الجايف
-اي بالله اذا حلگه جايف ليش اخذتي
خلت ايدها على خصرها ووگفت مستعدة
للمعركة اليومية المعتادة
-والله جبرتني مرحومة امي لخاطر امجن من ماتت
علمود مناوي
خالتي مرت ابويه وبشكل غريب جانت تحب
مُنى لأن ربتها على ايدها
ومُنى تسميها يمه
باوعتلي شافتني ضايجة حسيتها انقهرت
-اخذي منهن اذا تردين
-لا خالة مااريد بس اذا تگدرين من تبيعيهن
جيبي ربع لحم سوي كباب عروگ
هم ثواب لأمي وهم علمود فرقد يحبه
ماگالت شي بس
التفتت لغِنى رافعة حاجبها معاجبها الكلام
غِنى رغم عمرهة ١٢ لكن عايشة عمر اكبر من عمرها
وشالعة گلبي بالعناد ويا خالتي وابوي
ولسان ترادد فرقد
وهو سودة عليه يجي تعبان ماله حتى خلگ
يحجي بس يتخبل من يلگاها مخلية
حمرة لو سوالف كبار
وهي تلهي نفسها بالعطلة
مااكذب من اگول احنة شطار وصراحة اني بالذات دافع شطارتي هو
لخاطر تعب فرقد أدرس وأنجح
اني رحت للثاني
وهي للأول
وراح نسجل مُنى
بس فرقد لحد الثالث نجح منة وگعد السنة
الجاية ميداوم يگول اشتغل
احاول الگة شغل زين غير سالفة
الزبالة
اجتني تتمشى
-هاااه شجايبين من الزبالة
باوعتلهة صفح
-لتغثين فرقد من يجي لخاطرج نبش الگاع
نبش وطلع هالغراض
اختنگ صوتها واني اعرفها حنينة
وماتتحمل بس لابسة قناع القوة تقنعنا بي
-اي مااحاجي
اخذتهن ودخلت للغرفة راكضة
طبگت الباب الجينكو أصدر صوت قوي
صاحت خالتي
-غنيوووووة وكسر بيدج طرشتي أذاني
گعدت ارتب بالبيت وانظفه قدر الأمكان
اني ممخليته ارتب بي اكنسه وارشه
وابخره حتى فرقد يرجع لمكان نضيف
وياكل وينام
خلصت وسمعت خالتي تصيح
-صِبى اني رايحة ابيع الغراض وأرجع
بس وصلت الباب صاحت مُنى
-يمممممه اروح وياج
صاحتلها
-يلة غسلي وجهج وتعاي
غسلتلهة ولبست نعالها وطلعت
راكضة برة
من راحو طلعت غِنى شعرها ممشطته
بستوتة عالية ومخلية قراصات منا ومنا
ذهبيات يلمعن
طالعة تخبل هي أساساً معانيهة حلوة
بيضة وناعمة جسمها حلو وشعرها بي لمحة شگار
وعيونهة شهل
-شنو رأيج
-تخبلين
تحركت گدامي تريد تطلع
-ها ووووين وين رايحة
-ضايجة راح أروح
لبيت رضا اشوف فاطمة
-گعدي راح تجي خالتي وتسويلج سالفة
-طزززززززززززز
گالتهة وطلعت وسدت الباب
گعدت لوحدي من تعبي تمددت
وخليت راسي على مخدة فرقد بالهول
ورجعت لسنيني الحلوة وية أمي
وهي تدللنا على بساطة العيشة
والماكو وسوالف أبويه وشربه وعربدته
تذكرتهة بآخر مرة من كتلنا الجوع يومين
ابوية مختفي وية فلاح
واني وفرقد و غِنى صغار وهي حامل بمُنى
وكل شي ماعدنا
لبست عباتهة وطلعت وتأخرت ساعتين
ورجعت تعبانة وبيدهة علاگة سودة جبيرة
جانت متلثمة وتلهث ودموعها
تلالي بعينها
فتحت العلاگة بيهة سطل
والسطل متروس تمن مطبوخ وفوگا لحم وتبسي
وخبز وخضرة
صبتا بصينية جبيرة
-يلة يابعد أهلي يلا اكلو فدوة لهالوجوه الحلوة
تمسح على وجهنا اني عمري ٨ سنوات والشفته
من أبويه وضيمة علمني وفهمني وقواني
-يمة منين جبتي هذا الأكل
ماجاوبتني وگامت
لحگها فرقد وهو المفضل عدها تموت علي
لأن مؤدب ويحبها عبالك أخته
اسمعة يهمس وياهة همس بالمطبخ
-حبيبتي يمة منين جبتي الأكل
-لاتبجي ولا تتعصب ولا تزعل
-يممممممة مو گتلج اطلع اشتغل
-وأخليك ويا السايبين وتضيع دروسك
وشطارتك لا والله عساني ماعشت يابعد امك
-احجيلي يمه
-فدوة لا تزعل مني انت مو ابني انت اخوي ووليدي ودنيتي بروح جدك لا تزعل
-وروح جدي ماازعل
-مشيت لذيج الجهة الراقية من المناطق شفت
اكو عزة قائم تلثمت وطلبت الأكل وماقصرو گالو هو ثواب اقرو الفاتحة لأبنة وليد شاب ميت بحادث
ضرب فرقد جبينه
-ليششش يايمة ليش تبيعين ماي وجهج
-ولك ماشافوني ولك يمة تموتون من الجوع
وابوكم ماكو منة ضنه مادام طلع ويه فلاح
تسحبت تاركتهم من سمعت صوت الباب انفتح بقوة
واندفع ودخل ابوية يرعد
-يعني طررررررشان مو ادگ بالباب
دخل عصبي بدون كلام
صاح
-فريقد تعااااااال
-ها يابة
-هاااااااااك ذني تروح لطنان گلة ابوي يريد المعلوم
ركضت امي ناحيته
-ابننننننني مايروح لطنان واني گتلك لا تودي وتجر
رجلة للشرب والكبسلة خلي الوووووولد
وروح انت لو ودي صاحبك العااار يجيبلك
مو راح يشاركك بالسم
بدون كلام ركض ضربها
ووگعت ليوره
فرقد دمة حامي دفع ابوي حيل
ابوي بدون كلام تولى ضرب
امي گامت تبجي
-كاااااااافي يروح يروووووووح عوووووفه ولك
لا يموت جوة ايدك
واحنة نعيط علة صوت المطر عالتنك
وصبت الدنيا غيوم ومطر غضبها
وگف فرقد يباوع لأبوية بغضب
-امششششي ولك يلا
-خل يوگف المطر
شمر ابوي قمصلته العسكرية
ناحية فرقد
-البس هاي وولي
لبسهة فرقد ونزلت على رجلي
بسبب كبرها وعرضها
طلع وامي تبجي
تسللت اني من الباب الوره وعبرت الجذع
راكضة بالمطر اصيح
-فرررقد انتظرررني
دار وجهة وركضلي
-ولج تنگعتي وووووين رايحة
-ارررروح وياك
بدون كلام فتح القمصلة
ودخلني ويا تحتها
حضنت بطنة اضحك
-ارووووح احميك وادير بالي عليك
كفخني مسكتني
ومشينة لبيت طنان بيت تنك معفن وريحة
الشرب واصلة لراس الشارع
دگ فرقد الباب طلع طنان ببشرته السمرة
وأسنانة الصفر وريحته الكريهة
-هااااه شكو
بصق فرقد بالگاع
وباوعلة والمطر محاوطنا
-ابوي يريد زقوم
سلمة الفلوس دخل طنان وطلع بعدها
بيدة بطل لافها بعلاگة
-گلة اليوم الوجبة قوية تزرررف المعدة
خل يمزمز وياكل
مشينة جوة المطر نقفز وتتساقط طفولتنة
وأحلاماً تباعاً عالأرض
وصلنة للبيت
دخلنة امي واگفة بروح رايحة ووجها أصفر اشرتلنا
-روحو للغرفة جوة هو يتزقنب بالهول اكلو يمه
لا يشوف الأكل ويلغفه
راح فرقد سلمة البطل ووخر گاله
-يگول نعلان خل ياكل زين الوجبة تزرف المعدة
-ابن الزماااال احجي عدل
هز ايدة فرقد ومشى
لحگة ابوووي يصيح
-أبن القندرة شووووو گايم تنتر نترررر
ضربة على ظهرة
فرقد ويا الضربة فقد وعيه گاطع النفس وامي
تلطم توجهت لفرقد ماصحى
بقت تدگ على وجهة
-ولك ابننننننك مات ولك
توجهتله بكل قوتها تضرب بي على وجهه وصدره
بكل ماعندة من حيل وغضب دفرها
وگعت للگاع
وصرخت على صرختها فز فرقد گاعد ووجه
أصفر مابي حياة
مشة لأمي بالگوة
گومناهة اني ويا وهي تمشي
جفت مي ودم جواها
صرخت متوجعة
واني وفرقد مو فاهمين شي
صاحت بي
-جييييييب امي لو منتهى راااااح اجيب بالسابع گووووم
-للقير
رد هالرد الحقير عليها
خلة البطل گدامة بالگاع
وگام للثلاجة اللي شبه تشتغل فتحها
فارغة
ركض لغرفتنا دفر الباب
واجة جايب الصينية مال الاكل و غِنى تبجي عالاكل
صرخت امي
-ولك راح امووووت
ماحاجاها
مشت وياية وهي توجهني
شاورتني على كيف
-تركضين لأم رضا گليلهة الأمانة امي تريدهة
وخل تجي وياج
ركضت بسرعة والمطر نگعني جبتها واجيت
دخلنة أمي بالغرفة دگيت الباب عليها
صاحت
-جاي أبدل يمة هسة اجي
طلعت
امي وجهة صاير اصصصفر
همست لأم رضا
-خية ام رضا جاي أنزف نگعت
-بدلتي
-ماالحگ الدم اخذني
باوعت أمي هي وام رضا
وابوية سلطن عالشرب وبلع صينية
الاكل
سحبت امي غِنى وخلتها بيد فرقد
-اخذهة يمة وروح يم رضا على ما ارجع
قرب راسة وباسهة من ايدها
-يمة انتظرج
باستة ومشت هي وام رضا واني
-ها خية وين اخذج
-للمستشفى بعد اختج
ماااااگدر
اجرت ام رضا تكسي ورحنا
بنص الطريق امي بجت
وحضنتني
-يمة بعد امج بالج على اخوانج ودير بالج
على فرقد
مافهمت سبب وصيتها عبالي لأن
راح تجيب
دخلنة المستشفى اخذوها
لصالة الولادة
ساعتين والممرضات ميخلن ام رضا تدخل يمها
وراهة اجن يركضن
-عيوني المرية الوياج وضعهة حرج وتنزف
راح ندخلهة عمليات
دخلوهة عملية طارئة بدون حتى توقيع
ابوية
ورة ساعة طلعت دكتورة بوجه متأسف حزين
والقت على مسامعنة الخبر اللي راح يغير
مفهوم الحياة بعيوننا
-البقاء لله النزف قوي وماسيطرنا علي
عاطت ام رضا واني فهمت بهالعمر فهمت
ان أمي خلاص راحت
ارتفع صوت صراخ خالة
وسحبتني من ايدي راكضة
للشارع اخذت تكسي لبيت بيبي
ام امي
اني اعيط وابجي وهي ويايه
وصلنة ووگع الخبر على مسمع بيبي
مثل ماتوگع الصاعقة
امي حبيبة بيبي وعزيزتها
صرخت تحشم الناس وزلم منطقتهم اللي تبعد
شوية عن منطقتنة نفس الفقر
والتنك
واجو الزلم جيرانا راحو ويانه
اجراءات وركض مافهمت شي
الى أن سلمونة امي
وانحملت بتابوت بعد ماخالتي منتهى
جابت ابوية وجاب ويا اوراق امي
حتى نشيلها من المستشفى
كل شي مر مثل لمح البصر
وشالو أمي وشالو وياهة حنية العالم
كلة
وفقد بيتنا البسيط الضوة
وحل محلة ظلام الألم
فرقد جان مثل المجنون يبجي
ويصيح على ابويه
-انت كتلتها يااااابه انت مووووتاها
وابوي منزل راسه وساكت
واندفنت امي بمقبرة قريبة ابويه
حتى بهاي أسترخص ومادفنها بالنجف
وانتهى كل شي بعد ماجابت ام رضا
الطفلة من المستشفى
طفلة ناعمة صغيرة مريضة
تولت رعايتها خالتي منتهى
لافيهة بقطن ويرادلهة حليب خاص
ام رضا الله يوفقها جابت كمية من
هالحليب
وگالت ان هالفلوس مال الحليب جانو
أمانة امي يمها
وللأمانة خالة منتهى ماقصرت برعايتها
للطفلة اللي سمتهة مُنى
وأستمرت ويانة مرة تاخذها يمهم ومرة
هي تبقى يمنة الى أن تمت امي شهرين
على وفاتها بيبي گعدت بأبويه وقررت تزوجه
هو وخالتي لخاطرنا
خالتي منتهى بالعمر أصغر من أمي وجربت
حظهة بالزواج بس جانت متخلف والرجال
بزع من المشاكل بينهة وبين اهلة وطلگها
وتزوج ابوية وخالتي
صح معتنية بمنى وحبتهة بس مرات تعاركنة
اني وفرقد وغِنى عصبية وماتتحمل
لكن اني عندي صبر مثل امي
ومشيت أموري وياها بالسكتة
بس غِنى لا تتعارك وتغلط
وتضرب
ؤاستمرينا هاي سنين وكبرنة وبقى
مكان امي فارغ بگلبنة وبحياتنا
غطيت بذكرياتي ونسيت البيت
الى أن أرتفع صوت خالتي
-گعدددددي يالمسعدة ابوج
اجة مفول صخام ويتطوطح
فزيت جايبة لحم ربع ومخضر هي
سوت كباب وشوربة عدس واني اساعدها
ورحت للغرفة احظر ملابس فرقد خليتهن على جهة
وركضت للباب طالعة من شفت غِنى بعدهة
ماجاية
صحت طفل من الشارع
صاحهة الية
اجت تتململ وتتضجور
-راح يجي فرقد
-واني شمسويه
-تدرين بي يضوج اذا تطلعين
-والله ياالله
دخلت للبيت وهي واگفة نكشت
شعر مُنى بخباثة
عاطت مُنى
-يييييمة غِنى ضربتني
-كسسسر بأيدها
تغسل ملابس ابوية وتحجي على غِنى
بس ظلمت الدنيا دخل فرقد
عينة مني
-تعاي صباوي
-الله يساعدك
انزع بحذائه وهو متمدد مابي حيل
همسلي على كيف
-اكو فلوس بالجيب مال القميص
ضميهن وية العندج
اخذتهن ودخلت للغرفة
حاجيت غِنى
-طلعي اخذي ملابس فرقد محظرتهن يمج
باوعتلي صفح وهزت ايدها
طلعت واني بسرعة
فتحت البوفية طلعت القوطية اللي اجمعله بيها
مسويلهة فتحة بقاعدة البوفية محد يندلها خليت الفلوس قفلتها ورجعت الغراض هو مو مبلغ جبير مبلغ
صغير بس يارب ينفعه يريد يشوفله
دراجة لو شي حتى من يدور شغل بمكان مرتب يستخدمها
طلعت راجعة يمة صبيتلة
ه اكل شلون ماكان
ونام على وجهة حتى ماغسل
بللتي وصلة بمي مسحت وجهة وعيونة
الغايصات بنص وجهة من التعب
اجة وقت نومتنه و مُنى تاكل گلبي
-يمتة تجيبولي ملابس للمدرسة
-بعدهة العطلة ممخلصة وبعدنا ممسجليج
-صِبى اريد صدرية مثل البدلة تفتتتتر مثل الأميرات
-تتدللين
گوة اقتنعت ونامت
واني مثل العادة النوم طاير من عيني
وهالشغلة صارت عندي من وفاة أمي
الأرق لوجه الصبح يلة اگدر اغفى
حسيت بتكتكة عالشباك
عرفتة رضا مشيت
واگف عالحافة مال الشباك
ومتمسك بي
-عرفتج گاعدة هاج هاي نستلة وموطة اكلي قبل لا تموع
-ليييش متعب نفسك رضا
ابتسم وهو يباوع
-دخلي جوة اكلي ياتعب هذا
اني اناطر الليل يجي حتى اجيبلج شي
گالهة وطفر للجذع عبر وهو يغني
مسحت على گلبي الطفولي اللي يدگ
من يشوف عيونه الحلوة
ودخلت
اجاني صوت غِنى
-جيبي نص النستلة
شمرتهة الهة وگعدت بفراشي
لسانهة طويل وفاهمة كل شي
همست
-هذا رضيوي الفگر يحبج
-احترمي نفسج شنو فگر
-انجبي حبابة صِبى الفگر ويا الفگر ما يتلاگون
لا تلزگين بي طلعي من ضيم وضعف الحال
سكتت وتمددت بفراشي اكلت
الحلويات وبقيت للصبح يلة نمت
كم ساعة وگعدت على صوت ابويه يصيح
وعالگة بينة وبين خالتي
-بت الفگووووور ريوگ ماكو
-اسكتتتتتت اليسمعك يصدگ بيت
بي زلمة ومابي اكل ولك فرقد طفل وجاي يحاول يدبر العيشة
واني احف للنسوان ومرة ينطني فلوس ومرة
لا وانت ظال وية فلاح الساقط بالبارات والشرب استررررجل واشتغل
ماسمعت بس صوت عيطة خالتي
ركضت لگيتهه لازمة خشمها وعيونها تذب نار وغضب وابوية يفشر ويغلط ويعدد بسيئاتها
-عاگرررررررر ومعنسة وامج شمرتج شمر عليه
تمسح الدم من خشمهة وتحجي
-اسوه رااااااسك ولك قبلت بفگررك لخاطر الجهال
-اييييييي من حنيتج عليهم
-مييييخالف ابقى احسن منك ياگ**د
رجع شال كسرة حجارة من جانب الحايط وشمرهة
ناحيتنة اجت بنص راسي
عطت وعيني غوشت والدم اخذني وهو يصيح
-شووووووفي صلافتج وولسانج ضربت البنية
وهي عاطت وجرت حجابهة تسد
الجرح
اجت على الصوت غِنى وركضت برة
دقايق وطبت ام رضا راكضة
-امششششي سودة بوجهي ولج منتهى عينها
راح تطير
جرتني هي وخالتي وطلعن للشارع
سيارة اخذتنا للمستوصف
عقموها وخيطوها شگ بجبيني وحاجبي
رجعوني دايخة
لگيت ابوي طالع والبنات منتظرات
عيني منهم والهضمة كاتلتني
ابوي اذانة هوووايه مااتذكر يوم
نمنة مرتاحين دائما صياح وغلط وفشار
وتجاوز
مأذينه ومأذي نفسه ومعيشنة بقلق
انطتني خالتي مسكن ونمت
واخذتني النومة للمغرب على
صوت فرقد گعدت
-شسوووووالها
-ماسوالهة جان قاصدني
-بس وگعت بيها
مشيتلة وراسي ملفوف
-مابية شي جرح صغير
باسني وخلاني جوة جناحه
-مابيج شي شلون مابيج وراسج مفتوح فتح
-ميخالف اسكت فدوة
-لا والله مااسكت خل يجي وأتفاهم ويا
بقة فرقد ياكل بروحة اكل لحد ماصارت ب١٢ يلة اجه
ابوية بيدة بطلة ويغني
وگف فرقد وهو دخل
-هااااه متجمعين الحبربشية
-ليش ضارب صِبى
-اكل خ**ة ولك تحاسبني
-ياااااااابة ترة الدنيا ساحگتني سحگ
ومامخليني عايش هنا ومگابلك غير اخوووواتي
فلا تخليني اخربط وياك وانت ابووووي ززززحمة اعلمك
تقدم يريد يضرب فرقد
دفعة ليورة
-كاااااافي يابة كافي ترريد شرب وعربدة
وباررررات اطلع منا وهيج هيج انت بس بالأسم
أبو عمرك لا حنيت ولا داريت ولا احترمت واحد من عدنة
-انجببببببببب نغ***** شو طولان لسانك
-طوووولته الدنيا بووووية تعبتني والله
ماتستحي من تشوف تعبي وادية المشگگة
واني ادور بالمقالع والزبايل حتى احصل فلوس
وانت تاخذهن تشرب وتشرب فلاح
الگ****د
بزززززززعت والله ورووووح العزيزة بزعت
ركض ابوي بكل قوتة دفرة وهو يصيح
-العززززززيزة والعززززيزة الله ياخذك
وياهة ويلحگگ بيهة ويخلصني من منييييتك
نغ***ل لاحگني على هالمجعة الأشربهة أريح
راسي من الضيم
وگف فرقد منتفض
-يااااااااا ضيم بوووية اووووعى لزمانك جبناها وياك
جبحات وجووووع وتعب واني من شفت هالدنيا
بديت اطلع اشتغل
ششفنة من ابوووووتك والله عااااااار علية
اسميك ابووووووووي
انهارت اعصاب ابوي بعد اخر كلمة
وتوجه راكض ملخني تملخ لأن صرت گدامة
حتى مايضرب فرقد ابجي وادفع بي
وفرقد تخبل يريد يتعارك ويا
واني ادفع بيهم
الكفخات كلهة وگعت بيه
والعياط مال اخواتي هرج البيت
وابوية حتى الضماد وگعة من
عيني اخذني الدم وترس وجهي وعيني
توقف ابوية من صاحت خالتي
-الله واكبر ملخت البنية تملخ فتحت خياطاتا
ابتعد واخذ بطلة وطلع بره
وفرقد يرجف
واني احاول بكل قوة متبقية عندي
اخفف عنة
امسح بالدم واضحك
-شبيك مااحس بشي والله
-امشششي خل اخذج للمستشفى
-حظر تجوال مابية شي وروح امي
غوشت عيني واني أحجي ويا
واستندت علي ووگعت للگاع
حضني ورفعني ويا
مشاني لفراشي
-شو باوعيلي
اباوعلة وجهة ماخذة التعب
وحول عيونة خطوط من الشمس
مسح الدم من وجهي
سحبت ايدة بستها وحضنتها
سند راسه
على راسي وبجة بهدوء
يهمسلي
-مابيدي حيلة جان اخذتجن وطلعت منا
والله بس تشوفين الدنيا
تلطم بينة تلطم
بقة گاعد يمي وتمدد
راسة يم راسي
الى أن غفى ونام
غطيته وگمت غسلت ولفيت راسي
واختفى ابوي مثل كل مرة يسوي
بيهة كارثة يختفي من البيت
كم يوم
ثلث أيام وبين يدور فلوس
وتعارك وية خالتي عدهة تراجي صغار ذهب
ملبستهن لمُنى
اخذهن بعد جدال وطلع من البيت وهي
تدعي علي
-رييييتك مارجعت ولا شفناك عساك ماتهنيت
وكالعادة رجع منشنش وبطلة جوه ابطة
يشرب بالهول
وفرقد يبزع وتلعب نفسه
يصعد على سگف البيت ينام
وهيج خلصت العطلة
وبدة الدوام وحلم مُنى بالصدرية
مال الأميرات تحقق خالتي مدري
منين جابتهة ألهة
اما آني وغِنى فلبسنا صداري العام
شلون ماكان
اباوع لوجهي بالمراية
الأثر فوگ عيني وبجبيني وااااضح
بسبب اللي سوا ابوية وانفتح الخياط
طلعت اني و غِنى للدوام
وخالتي اخذت مُنى لأن اول يوم
دوام
المدرسة عالم ثاني بنات انيقات
وتطور ملحوظ تلفوناتهن السرية اللي يدخلنهة
بالسر وتباهيهن بأهلهن بفلوسهن
وبكل شي
اني هادئة واگعد عالجانب لوحدي ابددد
مااختلطت بوحدة ابد
أما غِنى من أول أيام جمعت البنات حواليهة
بسوالفها وشيطنتها
صادقت نص المدرسة
وكسبت المدرسات بلسانها
اني مرتاحة لأن أشوفها مرتاحة
هنا محد يعرفنة منين جايين
ولا يسأل شنو خلفية حياتنا ولا بيتنا
ولا نشأتنا
وركضت أشهر الدراسة ركض و غِنى
گامت تجيب وياهة فلوس للبيت
مرة مرتين ماگدرت اسكت لزمتها
اسألهة اخاف من هاي الدنيا كل شي يصير
-منين تجيبين فلوس
-معليج صِبى
-لاتخليني اروح أسأل بصفج خاف تبوگين
باوعتلي صفح وگامت لجنطتها فتحتهة
وطشرت الدفاتر تشوفني
-باوووووعي مو تشوفيني دائما ارسم واكتب
هاي مو لنفسي للبنات
الدفتر كلة ارسمة ب٥ آلاف
اريييييد اجمع اشتري صدرية ابدل بيهة
فهمتي يالفهييييمة
دفعتني وگعدت بالگاع تگلب بالدفاتر وترسم
تركتهة راسي داير ودايخة
هالبنية حقهة والله
تريد وتشوف البنات يجن اشكال اللبس
والمصرف
فرقد مامقصر ينطينة الف دينار
واني مااخذ منها اخليهن الها
بس تشوف وتريد
اما مُنى فخالتي مامخليتها
تقريهة تكتبهة تشتريلهة اذا صار عدهة كم فلس
عايشة طفولة عادية تقريباً
والأيام طوت أيام ودخلنة ٢٠٠٩ وخلصت السنة الدراسية
بنجاحنغ
واستمرت الحياة مثل مانعرفهل
وفرقد حبيبي مستمر يسعى ويشتغل لخاطرنة
واني گلبي بعدة يلعب من يروح
للشغل اركض ورا
وانتظرة تحت رفضه القاطع
بس مااگدر
احس أرتاح من أشوفة گدامي
ورضا مثل ماهو سند وقت التعب
وحماية وقت الحاجة
لازال شباكي يندگ كل كم يوم
شايلي بيدة شي يفرح گلبي المتعب
عصرية كلش طلعت وراه
گاعدة اباوعلهم من بعيد
يلمون وايرات ترسو الگواني
وتوجهولي
-لييييش جاية ولج صِبى
-مااگدر اصبر بالبيت لحد ماتجي فرفور
كفخني كالعادة
وبعدين يجر راسي جوة كتفة ونمشي
اسحب ويا بالگونية
ثگيلة وهو يسولف وية رضا
-مابقى شي واشتري الدراجة
-واني هم وياك ونترك هالشغل الأغبر
بغداد واسعة نشوفلنة مطعم شي شغل
نظيف وراتبة ثابت شگلت
-هي هاي فكرتي
-تشلعت أصابعنا من الزبالة من خر*** بيهة من شغلة
-يمعووود هالشغلة عبرتنا سنين خلتني اوكل خواتي بدون منية من أحد
وصلنة البيت سحب فرقد الگونية دخلهة
واني اريد ادخل سحب ايدي رضا بسرعة
وخلة بيهة فد شي
دخلت للغرفة بسرعة
فتحتهة گلادة صغيرة فضة بيها
حرف R وحرفي S
بنصهن قلب ياقوت أحمر
بست الگلادة وابتسمت على الاعتراف بالحب الغير
معلن بس احساس واحد يحس
بالثاني
فتحت خانتي من البوفية وضميتها لبقية الهدايا
القديمة من طفولتي قراصات وورد بلاستك لعابات
صغار بس هالمرة الهدية مصنوعة خصيصاً النا
احنة الأثنين
بستهة وخليتها بالعلبة وضميتها
طلعت لگيت فرقد يسبح
غِنى تحوس ورايه وهاي من بدت العطلة
لهسه
-فدوووة گلي لفرقد يجيبلي واحد
-مايقبل
-مو هو وخالتي عدهم
-اي مضطرين لازم اكو تلفون بالبيت وشفتي
شلونة صرصور رايحة روحه بس يگول ألو
-اني عندي فلووووس شبيج
والله جمعتهن من البنات بالدوام
اگدر اجيب تلفون عنكبوت
وبي كاميرا
لمعت عيونها وهي تحجي
ماادري انقهر عليهة من هالوقت وتقلباتة لو اخاف عليهة
-ميخالف راح احاجي فرقد
وصدگ طلع من الحمام وحجيتلة
بقة صافن شوية وصاحلهة
-تعاي غنيييوة تعاي
-هااااا فرقووودي
-لواگتج أعرفهة دخليلي بالنظيف
-حباب والله عندي فلوس
نطت خالتي من يمها
-منيلج ولج
-من المدرسة صِبى تدري وانت شفتيني
اكتب للبنات وارسملهن واسويلهن اعمال للفنية
وحصلتهن
باوعلهة فرقد مقهور جرها گعدها يمه
-ليش تتعبين عيونج بالكتابة للبنات
ضحكت بس عيونها وقهرهن واضحات
-شبيك هذا يسمو بزنس هم دوام وهم فايدة
وشفت نجحت ودرجاتي حلوة يعني ماقصرت
-اني موافق
-ايييييي
-بس بشرط بدون خط
باوعتلة صفنت وبعدين گالتله
-هاي هي بس المهم بي كاميرا
-شگد عندج
تقربت منة شاورتة
كفخهة وضحك
-والله شيطانة خوش مبلغ
باجر نطلع اني ورضا لباب الشرجي نجيبلج
باستة وگمزت جابتلة الفلوس
خلاهن بجيبه
وتمدد بتعب
-لا تسوين اكل صباوي راح انام تعبان
نام فرقد وغِنى تفتر فرحانة
بيومهة ابوية مختفي مثل عادته
وية فلاح نمت كالعادة بوقت الفجر
وگعدت على صوت غِنى
-صِبى گعدي خل نگعد فرقد يروح
گمت وياهة سويتلة بيضة وجاي وحضرت ملابسة وگعدتة
دخل سبح وطلع لبس تشيرت وبنطرون
صار يخبل
اباوعلة بودي اشيلة هيج واخلي بنص گلبي
وأقفل علي
باوعلي وغمز
-ها طالع حلو
-تخبل
كفشني وطلع لرضا
للظهر رجع و غِنى تگمز
-كافي تگمزين تعاي جبتلج
التلفون
ركضتلة باستة فتح العلاگة طلعلها تلفون عنكبوت بكارتونة وويا مدالية مشتري ونشرات تتعلگ بي
وفتح علاگة ثانية
اشرلي
-باوعي اني مااعرف بالموديلات مال البنات بس رضا يعرف
هذا تراك الج بمناسبة النجاح
وهذا لغنى وهذا لمناوي
وهذا شال لخالتي خطيه هم تعبانة ويا منى
سحبت كف ايدة ابوسها مثل كل مرة
-ليش ياعيوني والله لو مشتريلك شي لنفسك
غمزلي
-هاج ذني ضميهن وية الفلوس مابقى شي واشتري
الدراجة
-يارب
دخلت خالتي من برة وياها منى صحتلهةدا
-خالة هذا شال جابة الج فرقد
اخذتة وحاجته
-يخليك لأخواتك وتجيب ان شاء الله
مناوي غسلت ولبست تراكها
غِنى كذلك بس اني لليل من نامو
دخلت سبحت ولبستة صح بسيط وسعرة
مايتجاوز الخمس الاف بس اشوفه بعيني اثمن
شي
فاتحة شعري امشطه الساعة بحدود ثلاثة بالليل
ضوة الغرفة خافت وهدوء
وبس صوت الصراصر يدوي من الجدول الگبالنة
اندگت الشباك عرفتة هو
توجهت للشباك فتحتة
انكت بشعري من المي
تناثرت القطرات على وجهة ابتسم
وضوة الگمر عاكس علي
-مثل ماتخيلت هاللون عليج
-اختيارك
-اي
-كلش حلو
مد ايدة بعد خصلات شعري من وجهي
-صِبى
-ها
-احبج آني
هزيت راسي مبتسمة
-ادري بيج بعدج صغيرة
بس عقلج الجبير هذا مخليني واگع
على وجهي
ضحكت وهو يباوعلي
-ليش ماتلبسين الگلادة
-خاف ينتبهون ومااريد اعرض نفسي واعرضك
للحجي
-شيلي حرفي ولبسي حرفج
-لا خليهن مجتمعات
-وعد يا صِبى لا أصوغلج نجمة من السما
واخذج لحضني بس ربنا يوفقني
ادعيلي دائما صباوي
-ماتنزل من دعواتي لا انت ولا فرقد
-شايفة دعوة الأم ساعة الفجرية
شگد دافية وحنينة
هاي انت دعوة أمي اللي كل مااطلع الصبح
تگلي ينطيك ويرضيك
واني الله انطاني ورضاني وقانع وواگع
على وجهيييي وياج
سحب ايدي باسهة وتحرك وهو يأشرلي على گلبة
دخلت لفراشي امشط بشعري
وصوت غِنى الهامس فزعني
-بعدج مجلبة بالفگر ولج باوعي فوگ
سكتت واني گلبي راضي تمام الرضا وقانع بي
من طفولتي ولهسه هو حوالية مثل الگمر
يضوي الدرب من أتعب
نمت براحة
وتتابعت الأيام راكضة
دخلنة السنة الدراسية الجديدة
بفرحة بعد ماراحت خالتي
اشترت قماش جديد
وگعدت يم الخياطة خيطتلنا صداري جديدة
ومن سألناهة عالفلوس گالت
هدية اجن واني ادري بيهن من فرقد
بس ميگول يدري بية مااقبل علموده
ودخلت الثالث مرحلة حاسمة
ومفصلية وصعبة
ذبيت نفسي عالقراية رغم
سوء ضرفنة بسبب ابويه وعمايله
ومشاكلة
ويا امتحانات نصف السنة ودخولنة سنة ٢٠١٠ اجاني فرقد بيوم امتحان الرياضيات فرحان
-هاج هاي اخر دفعة فلوس بااااجر
اطلع اشتري دراجة
گرصني من خشمي ممازح وطلع
مانمت بيومهة اراجع رياضيات
وية الفجر اندگت الشباك
طليت علي مبتسمة
-هاااا ياحلوة اليوم اهم يوم مو
-شوية صعب لأن ماداخلة لا خصوصي لا شي بس
ميخالف يعدي
-هاج صباوي
مدلي ايدة بيهة ٢٥ الف
-شسوي بيهن
-وجهج رايح اكلي بيهن بالدوام وتقوي
خلصانة من السهر والقراية
وفوگها مراجعتج لأخواتج قبل امتحانج
هلكانة
-والله مااخذهن انت تطلعهن بالگوة واني
اجي اكل بيهن عالحاظر
-تاكلين بيهن هني وعافية يلة ولج
اني طافي اناملي ساعة
قبل لا اطلع اني وفرقد نشتري
دراجات
سديت الشباك واخذتلي غفوة وگعدني
منبه تلفون غِنى
فزيت لبست وگعدت فرقد
-يلة فرفور اگعد
-لا ولج مابية حيل خليهة للعصر
بدربج دگي الباب وخل يبلغون رضا
طلعت بوجهي دگيت الباب عليهم
طلعت امة بوجهة البشوش
-صباح العافية
-صباح الهنا خالة گلي لرضا للعصر يلا يرحون هو وفرقد
سلمت وطلعت لدوامي
امتحنت وطلعت فرحانة
اشتريت حلويات للبنات ورجعت ماشية
عبرت منطقة المدرسةودخلت منطقتنة وترابها ووصاختها
اشوف هوسة ببابنا
رجفت رجلية وماحملني عالمشي
بية مابية وصلت وأسمع الهوسة
وصياح ابوية وصوتة السكران
-أذبحهههة اليووووم طلعهة فريفر الگ**د انت طلعت عينها
دخلت راكضة فرقد واگف عالباب مال الغرفة اللي
اصلا بدفعة وحدة يتفلش
وصوت غِنى مفرفحة تعيط
-انت مووووو ابو والله حاشى الأبوة منك حرررررامي وسكيييييير
-ولج الگح*****ة مو ادخل اشگج بالنص
دفعة فرقد وهو صاح
-تتكاثروووون علية ولد القنادر
جريتة واني اتوسل
-يابة فدوة الناس انفضحنا
-انتتتتتم فضيحة أصلا انت واخوتج
خالتي تجر بي وهو يهد وينثني
الى أن دخل رضا وواحد جيرانا
طلعو بره
-شبيييج بس فهميني مو گتلج من يسكرلا تتقربيله
-ولج ممحاجيته بس باگ تلفووووني
بجت وغطت وجها
-ميستحي بايعة لبيت بلبل الحرامي
رحت عليهم
يگلي هاي هي هو باع واحنا اشترينا
ومدري المن بايعي ولج بي صورنا
اني وياج ومناوي وبنات ام رضا ميستحي
صاح فرقد
-تعاي صِبى
طلعت ويا للهول
-طلعيلي فلوس خل ارجع التلفون
-بس دراجتك
دخلت ببطن الخانة طلعت فلوس ورجعتله راح ساعة يلة رجع
غِنى من البجي هلكت وغطت راسها نامت
دخل وجهة يضحك
مد ايده جر اللحاف عنها
-هاي شنو شو صرتي طماطة
مسحت دموعها وهو طلع التلفون
فزت حضنته ودفنت راسها بصدره
-والله ماعاش اليبجيج ياتلفون يابطيخ ووخري ترستي هدومي دموع ووصخ
مسحت دموعهة وهو گام
-فرفور
-انجبي صبيوة
-اروحلك فدوة
نكش شعري مثل كل مرة اغازله بيها ويستحي
وطلع بره
هاليوم ابوية مااجة والدراجة تأجل موضوعها
فترة علما ترجع الفلوس تكمل
وخلصت الأمتحانات وعطلت
اسبوعين ووراهن اخذنة ثلث أيام
غياب عالواهس
آخر يوم اجاني فرقد يركض بملابسه المتربة
-صباوي الفلوس بعد اخوووج
-وين رايح عيوني
-ولد عندة محل دراجات تعرف علي رضا
وراح نروح گال حتى لو يبقن كم فلس
ميخالف بعدين نسددهن
انطيتة الفلوس عصرية طلع راكض دارلي وجهة مبتسم وفرحان واسمع صوت رضا يستعجله
-يلة يمعود حتى نرجع من وكت
طلع وعدى المغرب والساعة بحدود ال٩ بالليل
تأخر واني أفتر برة احس گلبي مقبوض ومامرتاحة
بعز تفكيري انهبدت الباب هبد
فتحت الباب وصار بوجهي رضا
گلبي أنعصر واني أسمعه يردد بصوت رايح وعيون حمرة
-راااااح .....................
