رواية قصة خلف كامله جميع الفصول بقلم جمانه السعيدي
اني خلف مواليد ٧٣ اسرتي تتكون من أخوان ثنيين وخوات ثنيين
اكبر واحد اخوي ياسر وبعدين البنات وبعدين اخوي
حسن وأخير شي اني
ليش سموني خلف مااعرف
يمكن لان اجيت بلاخير يعني يعني اجيت بلخلف
المهم احنا عائله أصولها من الريف
بس عايشين باولايه باحدا الاقضيه من محافظات الجنوب
اني مخلص متوسطه
من بعدها التحقت بلجيش العراقي بعد انتهاء حرب ايران
يعني ماكان اكو حرب خلصت خدمه عسكريه الي هي ٣ سنوات
من بعدها اتسرحت
وبديت اشتغل شغل اهلي شغل اهلي الي هوووو
نربي حلال
ونبيع
هاي الشغله متوارثينها اب عن جد
جمانه السعيدي
خل احجيلكم شويه عن طفولتي
طبعا طفولتي كانت عاديه جدا يعني عندي قطعتين ملابس بس حالي حال باقي الجهال
والعب بلشارع شويه
مرات اطلع وياا اخوي الجبير بلحلال نسرح
ناخذ الحلال نطلع بي بااماكن بيهن ثيل عاكول
حتى يأكلن ونرجعهن
عدنا محصار حلال بصف بيتنا
رغم اني الزغير بس ماكنت مدلل
امي موهلكد علاقتها بيه مرات احسها ما تحبني
حتى ابوي
مااحسه فرحان بوجودي دائما يتامر عليه
ويضربني مايحن عليه ليش مااعرف
اما اخوي حسن كان يكرهني كره مو طبيعي
يموت مني هم ليش مااعرف
اي فرصه تصير كدامه حتى يضربني ابد ما يفوت هيج فرصه يغلط عليه يحرض ابوي عليه
من يشوفني ابجي يفرح
لو اهلي مدلليني اكثر منه
اكول غيره بلعكس هو مدلل اكثر مني امي تحبه تموت علي
بس اني علاقة امي بيه عابره
او يمكن اني جنت هيج احس بوقتها مااعرف
جمانه السعيدي
اكثر واحد يحبني واحبه ويدور خاطري
اخوي الجبير ياسر
هذا فعلا اخ حقيقي
وين مايروح ياخذني وياا حتى حسن لا يضربني
وحتى مايبقون يتامرون عليه
واي اكل اي اكل حتلو لفه زغيره لا زم يتقاسمها وياي
واي فلوس يحصلها ينطيني منها
واذا واحد حجا عليه
ما يقبل اني بليل ماانام بصف امي مثل الجهال العاديين
لا انام بصف ياسر
احسه يحبني اكثر من اهلي كلهم
يخاف عليه يعلمني الصح من الغلط
هاي كانت نبذه عن حياتي من جنت زغير
بعد ما تسرحت من الجيش ابوي مات
واخوي ياسر صار الكل بلكل
اما حسن اكثر واحد يخلق مشاكل بلبيت بعد ما مات ابوي يريد هو الي يتحكم بلبيت
مو ياسر رغم هو ابد ماعنده خبره ولا شاطر مثل ياسر
طلب ياخذ حصته من الحلال
رغم احنا لا مقسمين الورث ولا عدنا نيه نقسم الحلال
بقا يتعارك ويانا كل يوم
امي بسببه صار عدها ضغط وسكر يخلق المشكله من جوه الكاع فد نحس
يبقى ياخذ السالفه ويجيبها منا لمن ياخذ الي يريده
وما اله علاقه بلكل
اهم شي مصلحته يقدمها على اي واحد
حسن...يمتى تنطوني حصتي من الحلال
ياسر...ليش تأخذ حصتك احنا مقصرين وياك بشي
حسن...عجيب شنو مقصرين هاي حصتي
ملكي اني اتصرف بيها بكيفي
مااربد اصرف على الببت منها اريد استثمرها
بكيفي
ياسر....وين تخليه حصتك
حسن...اخذ نص من المحصار واعزل بي حصتي
ياسر...ليش هيج احنا شكد وتريد تعزل منا
حسن... بكيفي انت وخلف تلعبون بلفلوس لعب اني شمدريني شضامين عليه
ياسر...شضامين عليك اكعد الصبح واطلع ويانا وشوف بعينك
حسن....اريد حصتي انت شنو وصي عليه
اني جبير واعرف مصلحتي زين
ياسر...باجر اطلع حصتنا وحصت خواتك واطلع حصتك
حسن...خواتي مالهن حصه
ازوجن وراحن شنو بعد نطي تعبنا للنسيب
كاعد بيته وساكت وتجي حصه على الجاهز
ياسر..مايصير هيج الهن حصه ولازم ياخذنها
حسن...انطيهن من حصتك اني اريد حصتي كامله
بدون نقص جمانه السعيدي
خلف...انت شنو ما تفهم
ليش تريد تاكل حصتهن
من ابوي جان موجود ماحجيت ولا فتحت حلكك
حسن.. انت اسكت لا تدخل ماعليك انت مابقى غير خليف يعلمني
خلف...وليش مااعلمك اذا ماتعرف نعلمك
حسن...اسكت لا ابتلي بيك
خلف...قررنا ننطي حصته ونخلص من هاي المشكله
هذا ارعن وخبيث
ولله لو تشوفون اخلاق ياسر ابد ما تكولون هذا اخو وطالع هو وياا من نفس البطن
حتى خواتي كلش فقيرات وبسيطات وحنينات
عيالهن بس يحمدون بيهن
قسمنا الحلال وطلعنا حصته بقا يفاصل ويانا
ولا عبالك خوانه
يريد اكثر من حصته
ياسر ما يحب المشاكل ويخاف على امي
انطا اكثر من حصته بس يريد يخلص من شره
حسن بعد ماأخذ حصته جاب بلوك واخذ نص المحصار بنا حايط بلوك ارتفاع متر
حتى يفصل حلاله عن حلالنا
عبالكم هيج انتهت المشكله لا
يعوف حلاله ياكل من الجت والعلف الي نشتري
ما يقبل يشتري علف للحلال
ياكل ويشرب بلبيت ومايدفع ربع
المسواك كله على ياسر
ياسر ساكت يكول زحمه نتعارك على المسواك لو العلف كدام الناس احنا ناس معروفين
هسه شتكول الناس مات ابوهم وكامو يتعاركون
كل يوم يطلع شغله لمن لعب نفسنا فد مره
قررت امي ازوج ياسر لان هو ااجبير
تخاف تموت وهي ماشايفه اطفاله
بدت رحلة البحث امي عدها موصفات خاصه حتى تختار العروسه
كون حلوه وصبوره وتتحمل العيال لان راح تكون الجنه الأولى بلبيت
وتعرف بلحلال
تنضف مكانه وتنطي علف
بقت ادور فتره منا لمن حصلت عروس زينه
وبيها كل الموصفات المطلوبه
بنيه معرفه النا من بعيد
ابوها يشتغل بلحلال مثلنا
يتيمه عدها اخت ازغر منها
امهن ميته وابوهن مزوج وعندا اربع اولاد من زوجته الجديده
البنات شابعات ضيم من زوجت ابوهن
اول ما حجا ياسر وياا ابو البنبه راسا قبل
طبعا ياسر ماشايفه خطبها على السمعه الطيبه وبس
