رواية فصلية الضابط ( كاملة جميع الفصول ) بقلم زينب نور

   اعرفكم بالبدايه عن بطلة القصه 

اسمي قطرالندى من مواليد /1994/ طولي 160- وزني 68- حنطاويه تاركه المدرسه رسبت بصف ثالث متوسط وتركت جنت ماكلش احبها الدراسه ابتدت قصتي من /2011/ 

...... جنت كاعده بغرفتي ارتب بكنتوري انتبهة لساعه شفته صارت بـ12ـ اذكرت اني عاجنه ولازم اخبز كمت عسريع مفزوعه ابوي على جيه من السوك وخواني يجون من شغلهم واني بعدني ما خابزه جنت مرتاحه لان مرت وسام هيه الي تخبز بس لان ما موجوده فلازم اني اخبز اخذاني الوقت لملمت الملابس ولغرفه الجانت فوضى وطلعت بسرعه اخذت العجين وكعدت اشنگ وأمي من المطبخ تصيح عليه

:- وين جنتي ولج ابوج وخوانج على جيه هسه يجون جوعانين ويردون غدا

شكول الهم الخاتون مالها مزاج اليوم تخبز من وكت

اني اسمعها وساكته ما رديت عليها صرت اسرع اكثر لان ابويه بس تفوته جوعه راسه يوجعه وعنده ضغط وسكر شلت العجين وطلعت لترك فتحت الغاز وشغلت التنور وبديت اخبز وسمعت صوت السياره اجو ابويه وخواني عالسريع خلصت الخبز ودخلت للبيت خليته بلمطبخ ودخلت للحمام سبحت وطلعت بديت اساعد امي انحضر بالغدا

  جانت طابخه مركة باميه وتمن عنبر الريحه تموت جووع دخل حسام هذا صديقي مو بس اخويه دفعني من راسي گالي

حسام :- ها العوبه التوحه وين جنتي وبشنو ملتهيه ما خابزه من وقت مو گطعني الجوع

ندى :- سوده عليه والله نسيت التهيت بملابسي هسه عالسريع جايبتلكم الاكل بس روح اطلع منا كاعد اتكفخ بيه ترى اصيح الابويه عليك

كفخني على راسي وضحك گالي

حسام :- بله خلي انشوفج من تزوجين مو اطلعين حيلج يم رجيلج ويمنه فاهيه وعوبه

ضربته بوكس على بطنه ضحك 

حسام:- عود جبتلج وياي حلويات الفاهيه بس بعد ما انطيجياهن ما تستاهلين 

اني فدفرحت بوسته بخده وبديت اتلوك اله حته ياخذني البيت صديقتي ايمان لان صار فتره مامشاوفين ومشتاقتلها هيه صديقتي الوحيده من الطفوله سوه بس عرفني كالي 

حسام:- لا تتلوكين ما اخذج لو تبوسين اديه مالي خلك اليوم  

دفعته وشلت الصينيه وطلعت لصاله خليت صينية الأكل

طلع ابويه من الغرفه مخلص صلاه شافني ابتسم باسني وطبطب على ضهري گالي 

:-هلا بعزيزة ابوها وروحه 

كعدنه نآكل ومستفكدين جهال وسام جانو خابصين البيت كل يوم 

وحشه بدونهم شوكت يرجعون من بيت جدهم 

انتبهت ايسولفون ابيناتهم ابويه وخواني بموضوع ما فاهمته شنو 

اسمعهم واكل بهدوئ

صفنت عليهم عندي اني عندي اخوان ثنين واخوات ثنين

...وسام الجبير عمره 28 متزوج زهور بنت عمتي وعنده اثنين اطفال مؤمل ونرجس وحالياً زهور حامل بالطفل الثالث وبيها بنت راحت عند اهلها ترتاح هالفتره 

.. اما حسام عمره 26 بعده ما متزوج امي عالطول اتلح علي اتريد اتزوجه 

بنت خالتي اسمها فاطمه 

وهوه ميقبل عنده حبيبه 

لان فديوم سولفلي 

كالي اني احب بنيه جانت وياي بالجامعه وهيج حلوه وهيج تحبني واحبها بس ميقبل يكول منو هاي البنيه وليش ميخطبها من يفتحون ويا موضوع الزواج بسرعه يسد الموضوع ويكوم ميقبل يحجي اي شي يخص الزواج ليش منعرف

.... وعندي اخوات اثنين متزوجات بغير محافضه الي هنه تبارك وضحى

ما انشوفهن اهوايه 

اشهر يله يجن نشوفهن

طبعاً هن متزوجات اخوان وبنفس البيت من اقارب ابويه

..... اما اني عندي ابن عمي الوسطاني اسمه تقي كلش ايحبني من الطفوله

بس اني ما احبه من صغرنه واني اسمعهم يكولون اهلي واهله

  قطرالندى لتقي وتقي القطرالندى بس مااهتم للي اسمعه لان ما احبه واعرف ابويه ميجبرني على شي وخاصتاً الزواج 

بس تقي كل مره يشوفني بيها لازم ايذبله حجايه لو يتغزل واني ما اباوعله اصلاً مطنشته 

لان مو هو هذا فارس احلامي الراسمته بمخيلتي ومستحيل اقبل بي ويجوني اهوايه خطابه 

بس تقي يخرب الخطبه واجه عمي ابو هشام خطبني مرتين وابويه ميقبل ينطيني يكول بعدها صغيره مومال رجال وعيال ومسؤليه ايخاف عليه من الهوى وعلى طول اسمعه ايكول هاي بزر الكعده هاي العزيزه دائماً اسمع منه هاي الكلمات الي يطيباً الخاطر ايشوفني بعدني طفله واني عمري صار 18 سنه ومدللني وميخلي شي بنفسي 

حبيبي ابويه كلش حنين ويخاف علينه

..... فزيت من صفنتي على صوت امي كالتلي 

                                            

              

                    

:- كومي يمه شيلي المواعين وسوي جاي لبوج 

كمت شلت الصينيه وخليت القوري على الطباخ وغسلت المواعين اخذت الجاي ورحت انطي الابويه لكيته داخل الغرفته من طبيعتي ادك الباب قبل لا ادخل استحي افوت هيج شلت ايدي ادك الباب وجان اسمع صوت امي تسولف ويا تكوله

:- وشلون بله تخلص هاي السالفه 

كلشي ولا ولدي يصير بيهم شي احمد ذوله عيوني الي اشوف بيهن

وابويه يتآفآف ويكولها

:- خلي انشوف شلون تخلص هل سالفة الكشره ااخ يا سوالف حسام وطلايبه الما تخلص 

دكيت الباب ودخلت هم سكتو انطيتهم الجاي وطلعت والافكار كامت تضارب براسي شصاير وليش ابويه هلكد خايف وامي تكول كلشي ولا ولدي يصير بيهم شي شمسوين؟ وقبل لا ادخل غرفتي شفت حسام طلع يركض وبيده اسلاح طلعه من غرفته وسام ويا وتليفون على اذانه جان يحجي بعصبيه ويه منو ما اعرف

اني شفته ولخوف ثلج مطارفي رحت الغرفة امي وابويه حته ما دكيت الباب دخلت عليهم مفزوعه 

:- يابه الحك حسام شايل اسلاح وطلع يركض من البيت وسام ويا

ابويه ابسرعه طلع وراهم يركض ويصيح عليهم بس ما يسمعون اله صعدو السياره وحركو بكل سرعته

وابويه لحكهم ضلينه بلبيت اني وامي بس امي حلكها يابس من الخوف

وبس اتردد بأسم أهل البيت تنخاهم كون مايصير شي عليهم ويرجعون بسلامه

واني واكفه بالطرمه خايفه وادعي ياربي كون ماكوشي ويرجعون مابيهم شي من اشوف حال امي وخوفها عليهم يزيد خوفي ضلينه على هل الحال الحد الساعه ـ 4 ـ وماكو اي خبر عنهم نتصل عليهم ماكو واحد منهم يجاوب شصاير ياربي كلوبنه راح توكف شويه ودك موبايل أمي شفت المتصل مرت عمي الجبير ابو حازم 

جاوبتها امي 

اباوع الامي انخطف لونها 

وعاطت وتكولها يعني مات 

وهسه وسام وحسام وينهم يمكم 

ابوهم ويين 

اني من سمعت اخواني مابيهم شي ضليت اشكر من ربي بس منو المات ومنو الي قتله ابين ما امي خلصت المكالمه 

الف فكره ابراسي سئلتها

:- يمه سولفي وكفتي گلبي 

گالت:- ولج تصخمنه وتعزينه ولج خوانج وين اضمهم راح يكتلونهم ولك يمه حسام ليش هيج تسوي شنو الخلاك هيج تسوي ولك مومال سجن انته وضلت تلوم على روحها وبحسام 

واني بس ابجي كمت جبتلها ماي شربتها غسلت وجها ودخل ابويه يلهث كال وينه الحيوان رجع هنا 

كلناله لا محد اجه

دقايق وما نحس اله صوت الهوسه والسيارات وصوت الشرطه بالباب ايدكون بي بقوه وصوت اعياط قوي

طلع الهم ابويه واني وامي انباوع من شباك المطبخ على الباب دخلو الشرطه يردون ايفتشون البيت 

وامي سحبتني ودخلتني للغرفه لبسنه عبايات وضلينه واكفين ننتظر يخلصون تفتيش الخوف سيطر عليه من الصوت القوي تارسين البيت ويركعون بالاغراض واشوف ابويه واكف يم الضابط يحجي ويا وحيله مهدود مبين من ملامح وجه

اباوع الى أمي ترجف وتريدهم بس يطلعون حتى تطلع تفتهم من ابويه زين شصاير وينهم حسام اوسام

من اتأكدو ما موجودين

طلعو اسمعهم ايكولون لضابط سيدي ماكو احد ماموجود

وحسيت بصوت رجليهم طلعو وراحت الهوسه 

طلعو لشارع اخذو ابويه وياهم وراحو

اجونه عمامي من عرفو الشرطه اجت واخذت ابويه وياهم لحكوهم للمركز وامي ضلت اتلوب مثل التطلگ اتحير شتسوي اخير شي نفذ صبرها 

كالت رايحه البيت عمج افتهم منهم زين لبست عبايتها وراحت البيت عمي ابو حازم الجبير بلكي تعرف اخبار عنهم الان منعرف وين هسه وسام وحسام وشلونهم متأذاين لا منعرف

احس كلشي صار مثل الحلم واكول لا ياربي دخيلك قبل ساعات ملتمين وماكو شي شصار وخله حسام يقتله انسان

بقيت الوحدي بالبيت 

منتظرتهم بالكي واحد منهم يرجع للبيت حيل خفت الوحدي على هل حال لمن صاراليل

رجعت امي وجها مخطوف وراها بشويه دخلوا ابويه ويا وسام وعمامي وياهم دخلو للاستقبال ويحجون بصوت عالي اسمعهم ايكولون عم المقتول ضابط ورتبته عاليه ومانكدر انسوي شي غير ناخذ شيخ عشيرتنه ونروح الهم 

ناخذ من جبيرهم عطوه خاف ايقتلون واحد من ولدنه  

واسمع صوت ابويه ايصيح بكل صوته على وسام 

شلون ما وكف حسام من اخذ السلاح ولعرفته حسام حالياً مختفي بس منعرف وين خاتل وبيا بيت

و وسام ايحاول ايهدء ابويه 

كعد ايسولفله يابه والله الصوج مو بحسام هذاك الحقير الله ينعله وهو ميت هو الي استفز حسام وصار فتره يتعرضله ويوصله حجي متعمد هاي صار لا سنه ولا سنتين بس جان حسام ساكت ميكول الحد ما اجه وسولفلي ولحد البارحه من دعم سيارتنه جان متعمد راد يموتنه بس ربك ستر ونزلنه علي هوه ويا اخو ما اعرف ابن عمه 

هم مثله عفطي عاد نزلنه عليهم وكسرناهم واجينه الك وسولفنالك كلشي بس الضاهر ما تابو من ضرب البارحه ورادو ينتقمون من عدنه بغير طريقه

وليوم خابرني ابو علاء جارنه بالسوك گالي الحك محلكم اتفلش اكو جماعه جاين املثمين كسروالمحل مالتكم وشردو 

عرفناهم اني وحسام منو لان ماعدنه عداوه ويه احد غيرالسكير ضرغام الله يلعنه

ومن عرف حسام ركض اخذ اسلاحه وطلع واني ورا اريد الزمه ما اكدرله تعرف بسوادين حسام انت.

ومن وصلنه المنطقتهم شفناهم هستوهم ابراس الفرع راجعين

عاد هجمنه عليهم هو او ويا اثنين من جماعته 

وحسام ما مثل الفقد علي ولضاهر متحمله اهوايه

وهو نرفزه بكلام حيل ايغث 

سحب اسلاحه 

وحطله طلقه بصدره 

والله يستاهل الموت بس ياحيف حسام يتعاقب بسببه ابن الحرام 

گاله عمي ابو هشام هوه منين يعرفه وشنو علاقته ابنت عم ضرغام 

جاوبه وسام

:- جانت تدرس ويا بالجامعه ومتعارفين وبينهم علاقه حب وراد يخطبها بس ضرغام يصير ابن عمها وعناد بحسام يعىق بينهم علاقه ويحبون بعض

راح وخطبها غصب وهي متريده 

وصار ايهددها لو تقبل بي

لو يقتل حسام وبده يتعرض الحسام ويهدد بي ويكوله حجي موزين عن بنت عمه واعرضه هلحقير غيره سز 

وابويه منزل راسه يسمع الوسام ويهز ابراسه ورجله تهتز بقلق 

من كمل وسام كلامه

ابويه راد يوكف بس ما سيطر 

ما حسينه غير وكع للگاع مغمي علي ركضناله كولنه مفزوعين ونعيط شاله وسام وطلع للسياره وعمامي ويا طلعو اخذو للمستشفى...........

الفصل الثاني من هنا