رواية نقش بارد كامله جميع الفصول بقلم فدك فاطمه
" بأسمه تعالى "
#نقـــش بارد
#بقـــلم : فــدك فاطمـــة
.
لا عاد الصَبر
يَلجم مُصب العِين ،
ولامَثل الخَلك بِـ دموعنة
انمَثل طالت
والعُمر شيخَلصةه مِن يطول
مِن غَم العُمر مِن يَنكضي تعَلعل
.
.
بــــــداية
.
.
.
كَــرصاصة طائـشة
خرجت من فوهة بندقية صدئة
لم يُمسكها قاتل محترف
بل يدٌ أنهكها الغل وشحذها اليُتم
وأطلقها الغدر قبل أن تطلق هي رصاصة
لم تبلغ صدر الضحيةلكنها استقرت
في صدري منذ أن صرت "دلهم"
أنا بقايا رجل
نُبش عني الحقد كما تُنبش الجثث القديمة
تلك التي لا يتحلل فيها سوى اللحم
ويبقى العظم شاهداً...
على خيانة، على وجع على وصيّة لم تُكتَب
لكنها حُفرت في الذاكرة مثل
نقشٍ أكديّ في حجر صلد
أهلاً بكم في الحارات التي لا تُضيء شوارعها سوى نيران الانتقام...
أهلاً بكم في البانزين خانة، حيث يختبئ الشيطان في الزيت، ويُهرّب خطاياه بين غالونٍ وآخر.
أهلاً بكم في "نقش بارد"... حيث لا يُباع الوقود فقط، بل تُباع النوايا، والناس، والمصائر
.
.
القادسيـــه
12 /رمـــضان
دلــهم
صوت الباب المزعج ليخلي اسناني تصتك بكره عبر حدود الصمت المخيم على الدربونة شغلت الدراجة الي لو ما حاجتي الهة تودع بأقرب مزبلة بدون ندم عليهة
حركت اعبر الشوارع الفارغة و أمر بين السيارات
القليلة حتى وصلت للبانزينخانة ركيت دراجتي
عدلت تراكي واني نازل دخلت من الباب
اباوع لساعة بيدي بالخمسة الشمس بدت توه يبين قرصها بس الحرارة ما تتشاقة نفضت تشيرتي عني بضوجة و كره لهذا المكان و كل واحد بي مضطر اشوفة
جيكت المضخات ريحة البازين النفاذة تختلط وية رطوبة الگاع تخلي المعدة تگلب دخلت اول سيارة كعدت على جهة عيني على العامل الي وگفت گبالة
من اول ما دخلت عقلي بدة يحسب ساعات الدوام يمتة اطلع مكره و مجبور اوگف هنا رفعت عيني للسيارة وگفت گبالة
فتح الجامة حجة بنبرة متعالية:اترسها فول
دلهم:عطلانة المضخة
تأفف شمر محفظتة اضطر يحرك السيارة يرجع بگ حتى يوگف گبال مضخة الثانية السيارة الوراه سايقها استغرب
حجة عينة علية:حبيبي بانزين محسن اترسها فول بدون زحمة عليك
گمت اخذت المضخة بيدي كاره ريحة البانزين ترستها اخذت الفلوس دخلتهن يجيبي بعد ما حسبتهن
مر الوقت الشمس ارتفعت كلشي يضغط على صدري ريحة البانزين و الگاز و عوادم السيارات
تجمعت بريتي لوثت حتى انفاسي
مثل ما تلوثت حياتي بوصاخة ذاك الحوت نعمان
صار كلشي يضغط على عقلي يجرني لنقطة مابيهة رجعة
جن الدنيا رسمت طريقها وحددت حياتي بحوادث
وكوارث قبل الفطور بساعات ازدحمت المحطة
مالحگت استراح ضليت واكف
التكاسي والكيات والسيارات الخاصة صار سرةطويل من البوابة للمضخة وگفة 12 ساعة خلت التعب يطلع بنهاية ذروة الشغل
علة صوت الاذان انتشر بالاجواء و الازدحام بعدة
خلصت فترة شغلي جيكت شكد صرفت شكل ضل
حسبت الفلوس سلمتهن اخذت يوميتي
طلعت الشوارع ضجت بالناس ريحة الاكل ريحة الفحم لينبعث من المطاعم وگفت گبال بسطية حجي جابر رفع راسة الي
عيونة تبث حقد و غل من اخر مرة تعاركت ويةابنة بعدة محمل علية باوعتلة بطرف عيني لواريد خليتك تفر بأذانك ماتلگة مكان بيع بي
اخذت علاگة الفواكه منة شمرت الفلوس مانتظرت يحسبهن تحركت بعجلة اسابق الوقت وصلت يم بيت اسراء اختي
بوسط السوگ بيت صاير بين محلين دگيت الباب انتظرت طلعلي ابنها كرار گعدت اگبالة اخذ وجهة بيدي ابوسة
دلهم:شلونك خال
كرار:زين
دلهم:امك وين
كرار :امي تصلي تعال خالي تفضل
خليت العلاگة بيدة بالي غاب وية صوت الرسالة لرنت بجهازي حركتة ادخلة للبيت:هاك حبيبي سلملي على امك
اخذهة ساكت مثل عادتة مخلوس مشيت عيني
على الموبايل دخلت للحساب بدون اسم مفهوم
الرسالة جانت" موجود اجيك على وشم"
دلهم" وين انتة و منين "
" وياك ساجر اريد وشم على طول ذراعي دلوني عليك گالو تجيبة بأحترافية"
دلهم" ودي صورتة تعال بالوحدة لهذا العنوان "
تأملت الرسمة تستاهل تنرسم مشيت مسافة
نص ساعة نزلت من الشارع العام دخلت المنطقة
فتحت الباب بتعب
دخلت للحمام اطرد ريحة البانزين من على جلدي
راسي يفتر من جوع سديت الماي لبست نص ملابسي توجهت للمطبخ
طلعت منة بطاوة طماطمة لاجعة سديت بيهة جوعي وقت الموبايل ضليت اراقب السگف لا اني نايم و مخلي راسي يرتاح لا گادر اسكت الهوسة البيه
گمت سحبت صورة الوشم عدلتة حتى يناسب
الجلد الخطوط الزايدة المالهة داعي صورة لساعات
وياهن ورد و سوالف ثانية
ساعات مرن وحدة ورة ثانية فتحت عيوني على صوت دگة الباب القوية گمت فتحتة صار گبالي ثنين مراهقين من شكلهم واضح العمر ياتحت الـ 17 سنة يا اكثر بسنة خليت الباب مفتوح توجهت جوة
دلهم :أدخــل
دخلو بخطوات مترددة الرسالة خلتني اتصور شخص عمرة يوازي عمري مشو وراي فتحت الغرفةالاخيرة شغلت الگلوب
دلهم: اگعد هنا على ما اجهز الابر
سحبت الكرسي اشرلة گعد عينة تفتر بالمكان صديقة اخذ الكرسي اليم الباب استغلت بسرعة جهزتهن اخذت الورق
سحبت الكرسي اگعد گبالة مد ايدة متردد لصقت الورق لحدما انقل الحبر على الجلد صار بلون بنفسجي و خطوط باهتة
دلهم: ورة النقش هذا شكلة اذا مايعجبك اخذ صاحبك و اطلع
ساجر:لا لا حلو طارق تعال شوفة
دلهم:ملون لو اسود
ساجر:ها
دلهم: اسود؟
ساجر:اي اي اسود
جهزتة على ما تناقش هو و صاحبة رجعت انتظرهم
بملل ريح ايدة على المسند بيضة ماكو شعر ما احتاجيت احلقة
دلهم: خلي 75 هنا
رمشت بصدمة:شگد
زفرت نفسي بضيق قلصت عيوني خلاني اعيد الحجي الف مرة مد ايدة بجيبة بتوتر طلع فلوسة
حجة بهمس:طارق عدك كروة نرجع بيهة
طارق:عدي بس مو هواي 75
ساجر: يستاهل وشمي مميز
خلة الفلوس مسحت ايدة بمعقم بلشت اشتغل نز من اول ما لمستة الابرة و تسلل الالم لأيدة و ضرب اعصابة اريدة رجفت
دلهم:اذا سحبت ايدك اطردك
هز راسة بخنوع سكن تبدلت ملامحة وية كل غرزة من الابرة مرت الساعات حتى كملتة رسمت اخر الخطوط و التفاصيل
دلهم:لاتلمسة هواي راح يضل حساس حتى يتأقلم وية الجلد لاتغسلة خلي مرطب اي شي
باوع بأنبهار يمد ايدة يخاف يلمسة شمرت المكينة گمت افتح الباب ريحة الدم بعدها تتسل لأنفاسي من غرس الابرة
دلهم: اطلع
توتر گام بتلافت سديت الباب ورة ما مشو رجع لبيت لسكونة نظفت الادوات نمت شكم ساعة لحد الخمسة رجعت لنفس الروتين و روحة الصبح
اليوم عكس وياي جان حار من اولة الدراجة حسيتهة راح تعطل بس وصلتني للمحطة وگفتهة بديت شغلي
للتسعة شفت من بعيد حمادة طالب سادس اليوم اول امتحان الة ركة بايسكلة على الحايط دخل سلم مر للمحل اشترة
اجاني ماد ايدة :شلوونك حبيبي
رجعت المصخة لمكانهة متجاهل ايدة
الممدودة : شتريد حمادة
حمادة:اجيت ابشرك الاسألة فووول
دلهم: مو جديد كل الاسألة من الكتاب البيدك
حمادة: الامتحان الجاي فيزياء تقريني
رديت برفض قاطع:لا
باوعلي بضوجة عدة عزت نفس بس مو علية رجع بخطواتة اخذ بايسكلة و مشة راجع لبيتهم ورة ساعتين حسيت اعصابي هدئت المالگيتلهة
متنفس عدا حمادة
طلعت الموبايل رسالتة رجعت لشغلي الساعة بتلاثة اجة من بعيد شفتة يضحك فولت السيارة الگبالي اخذت الفلوس
بهاي الاثناء وصلني حجة يرفع الكتابة: ادري بيك ماتردي وهم ادري تعبان و ازاحمك بس تعرفني ماكدر حتى ادرس خصوصي اريد معدل
دلهم:اگعد هناك لاتلغي زايد مو امك اني
حمادة:على راسي
گعدت على الرصيف حرارة الشمس تخلي الگاع تفور و الرطوبة و البوخة تصعد ماكدر اعوف مكاني هنا لا اكدر اعوف الشغل ادخلة جوة
تحركت مستغل فرصة ماكو سيارة يم المضخة غطيت الخاولي بسطل الماي عصرتة انفظة شمرتة على راسة اغطي من حرورة الشمس هذا اذا تمرض تضيع عليه امتحاناتة
فتحت الكتاب فصل المتسعة حجة صاد من الشمس: اعرف الفصلين الاولى نبدي من ثالث
عبرتهن شرحتلة اول موضوع عفتة من السيارة وگفت گبالنة ضلهة صار علينة گمت فولتهة
اخذت الفلوس رجعت گعدت اخليهن بجيبي
شرحتلة الفصل كامل لتهيت بي حتى مر الوكت
حجة يسد الكتاب:ليش ترفض بعدين تصيحني تريد تلعب بكرامتي ترة ارجع لان احترمك انتة مثل اخوي
دلهم:ترجع علمود مصلحتك
حمادة:افا عليك اني مصلحچي
دلهم: اخذ كتبك ولي يالله نشفت ريگي
گام يضحك اخذت كتبة مشة لبيتهم الي
عبور الشارع بمنطقة زراعية حمادة يتيم
الاب و عايش وية امة و اختة الصغيرة
ملامحة مرسوم عليها عمر غير عمرة
و مسؤلية مو مثل بقية الشباب فرق بين
هموم حمادة الي يثگل ظهرة هم امة
خلص الشغل بطلعتي سمعت صوت يصيحني
التفتت اشغل الدرجة اجة وصلني فحطان يلهث
مد العلاگة البيدة :هذا فطور من الوالدة الك
ترددت اخذة استخطيت امة جنت جوعان
مو مال ارجع و اطبخ اخذتة شكرني على
تدريسي بدل لا اشكرة
دلهم: باجر من تجي غطي راسك بشي البس شفقة مو ترگعك الشمس و احتار بيك يروح علية يوم شغل
حمادة:خايف علية لو على الشغل
دلهم: العشرين أغلى منك
رد بضحكة:مقبولة يالله ما أخرك انتة تعبان بـ.
مشيت بدون ما اسمعة يحجي هواي ينرفزني
وصلت للبيت نزلت ورة ما غسلت بدلت هدومي
كعدت افتح الاكل
علبتين وحدة بيهة بتيتة تگلاه بصفها زلاطة
و ثانية تمر و فواكه وياهن بكل لبن گرصتين خبز
اجن بوكتهن
من رفعت الخبز جانت ورقة مطوية مكتوب بيهة بخط اعرفة خط حمادة " اليــوم شفت صاحبك جلال
جان بالسـوك مدري شبي يتلفف وراه و مخبوص"
فائدة ثانية من حمادة ماينسى الوجوه لتمر عليه
اي شخص يوگف وياي تلقائيا ينخزن وجهة بذاكرتة
يكدر يعرفة و يقرة وجوه البشر اكثر من كتبة
اخذت جهازي اتصلت على جلال من اول رنة فتح صوتة مو نفسة المتعود علية : ها دلهم
دلهم:شعـدك بالسوك اليوم يمتة رجعت
جلال:رجعت الفجر صارت عدي كم شغلة
بالبيت رحت گضيتهة بالسوك جنت راح امرلك ورة الفطور
دلهم: وينك خلص الفطور
جلال: اني بعدني اخذلي ساعة هيج اجي
دلهم: بالتسعة تعال
غلقت الموبايل شك بداخلي استقر ناحية جلال
كملت اكلي نظفت الاكدر عليه بالبيت اخذت
المفتاح داخل الرف
دخلت للغرفة انتظر اليوم الي اهدم بي جدرانهة
وگفت گبال صورتة عدوي بالدنيا حتى النفس
ما ارتاح بي وانتة تشم وياي نفس الهوة
غمضت عيوني بثگل تعب رجع علية يجلد ذاكرتي لذاك اليوم صوتة بعدة يتردد بأذني تضحيتة لخلت العائلة تنهدم و تتفكك
بالتسعة ونص انتظرت جلال براس الشارع وكفت سيارتة الصفرة گبالي صفارهة يغث مادري شجابرة يضل بيهة
فتحت الباب دخلت حجة يلتفت الي:شلونك
دلهم:زين .. ليش رجعت بدون ما اگلك
جلال:الاهل اعتازوني بالبيت
دلهم:همم الاهل
رد مستغرب:اي شبيك
دلهم:اول مرة تسويهة صاير شي
هز راسة بنفي:لا ابد كلشي تمام
غمصت عيوني شكوكي تراود خيالي هاي الضربة القاضية هاي الصار سنين اخططلهة شهر واحد واوصل للاريدة
ادخل بينة و بين مصالحة مثل ماتدخل الابرة
بالجلد ابث سمي مثل ماتبث الحبر و تطبع
جلال: وشم جديد
صحاني من افكاري صوتة درت وجهي للشارع
حجيت افكك الوضع: جديد
جلال:جسمك صار مايبين الاعرفة تاجر المخدرات مايتعاطى
دلهم:من يصير مثلي راح يتعاطى
رد بضحكة: تخرب التجارة
دلهم:ماتخرب عد اليحترفها
هز راسة عيوني تراقبة مو جلال الاعرفة بي شي اليوم يحجي بحذر مرتبك يحاول يفتح موضوع
شلون ما جان بس حتى ما نضل ساكتين
طبك السيارة گبال الگهوة ريحة الدخان و الجاي
مختلطة بالجو حارة مو مال نگعد بكهوة بس
سايرتة
نزلنة يم ركن الباشا سلمنة على الشباب اخذنة
طاولة متكترة نزل جلال ناركيلة و استكانين جاي
مر منة يوسف توة طالع وية جماعتة خلة الشطرنج
على طاولتنة حجة : شلونكم شباب
جلال:هلة حبيبي
يوسف:لعبة على النص تكملهة وياي دلهم
دلهم: ماعندي وكت اضيعة بخسارتك
يوسف: وخر جلال اليوم الة اخسرة
سحب الكرسي من الطاولة الثانية بعد ما رفض جلال يگوم صوت صريرة خلة عقلي يفز وية الذكرة رغم وجهي الجامد جنت احاول اعبر ذاك اليوم
فتح الشطرنج وزع البنادق عيني على الرقعة الي بالابيض و اسود بيا جهة راح اخلي جلال صديق العمر اغمض عيني و اغض الطرف
يوسف :هسـة شوف اليـوم الة اخسرك
انـي جنـت راسـم أبالي اللعبة مو بالشطرنج اللعبـة بجلال يا أما تصيب يا أما تخيب ما انكـر بداخل گلبي تمنيتها تخيب هواي
بس عقلي رحع يشتغل رفعت عيوني الة اريد
استلذ واني اشوفة شلون يتوتر وية سوالف النية
دلهم:الشطرنج لعبة جنود .. كل جندي يجي يوم ينطفي جراغة(ضواه)
يوسف مافهم ابتسم رجع يلعب بس وجه جلال تغير تحرك بعدم راحة خلة رجل الكرسي تطلع صوت
دلهم: اكو يعرفون مكانتهم و اكو بيهم عبالهم صارو ملوك
لمحت جلال بطرف عيني اعصابة توترت نزل استكان الجاي مسح لحيتة بأرتباك و تأفف رجع
اخذ القمجي من الطاولة
يوسف: صاير كلة حكم دلهم منين قاريهة
دلهم: تعلمتها من الدنيا
يوسف مد ايدة حرك الجندي خلاه بمكان مكشوف رديت اني اطلعة: الجندي اليخسر ظهرة يندعس
جلال رفع عيوني الي قريت بيهة الخوف و الرهبة
عرفتة خان بس شلون ضبطت اعصابي ماريد اكسر الطاولة على راسة
اذا خرب تعــب السنيـن الراحت
جلال ما أضمنلة يعيش يوم وراهة
حجة يوسف بعد حركة صح منة :تريدها طويلة او نفضها
دلهم:لاتستعجل حصانك راح يطيح
خليت الوزير بحركة مكشوف و يوسف تحمس
خلة ابالة بس الفوز هجم يستغل الفرصة
حجة جلال بضحكة:هاي غلطة مبتدئ دلهم
دلهم:لا والله هاي يسمونها صنعة شاطر مو غلطة
سحبت الحصان نقلة مزدوجة مسكت وزيرة
بحركة مباغتة وجه يوسف صار يختلف
بعد خطوتين، حاصرت ملكه بثلاث زوايا
دلهم: كلشي بالدنيا تحيطه من ثلاث جهات يختنق
يوسف: شلون!
دلهم: ركز وزيرك اتسرع حصانك غشيم والفيل ذابل لعبتها على طمعك دايماً العجلة تفضح نيتك
رد جلال بتوتر: والله ما توقعتها
رفعت عيني الة اقرة الخوف : ليركض گدام يغفل عن ليراقبة يطيح بتهلكة
شمرت الملك بحضنة رديت اوخر التوتر عنة:كش ملك نارگيتلك و جايك على يوسف
يوسف:دومك تضل خسيس
دلهم:شاطر ليش تخلي راسك براسي اكسرة
يوسف:هوووب خلينة صحبان
التفت وراه للميز صاح : عدووول ثنين جاي هنا شباااب جايكم على دلهم بمناسبة فوزة
غمصت عيني بصبر من سوالفة ضحك يوخر
الرقعة يمد راسة :عدك لو انطيك
دلهم:حطهن بـ***""
ضحك بصوت عالي غمز خلاني اضحك بدون تردد اجة عادل بيدة صينية الجاي وخرت استكاني البرد
خليت الحار بمكانة
حجة يوسف يلتفت لجلال:ساكت ابو شباب شعدك
جلال: والله مشاكل شوية
يوسف:مشاكل البيت لو الجيب
جلال:الثنين
رد مثل عادتة يخلي ايدة على صدرة:افا عليك اني موجود شكد تأمرني
جلال:تسلم يوسف مو شغلة فلوس تندفع شوية متضايگ من الشغل
يوسف: والله حگك شغلتك مو خوش سايق و مگضيهة بالگراج
عادل:احسن مايگضيهة بالبانزينخانة
يوسف:دنجب هسة انتة عدك ربع فلوسة هذا
دلهم:خليت عينك
رد يمد ايدة :بالله شني هذا وشم جديد بشكد وشمتة وين اريد واحد
دلهم:ماعندك فلوسة
ضحك يدفع ايدي علية شربت اخر كمعة بالاستكان
اخذت غراضي گمت احرك الكرسي بدون ما اخلي يطلع صوتة ليحفر عقلي
باوعت لجلال التايه بفكارة:تروح
جلال:اي يالله وراي طلعة اودعناكم شباب
يوسف: الله وياكم حبيبي
طلعنة جلال ماخلة مكان للهدوء بينة سوالف بكلشي
مشاكل البيت مشاكل الكراج ماجنت مركز ويا بكد
ما مركز بفكاري
اول ما نزلني للبيت رفعت جهاز اسمع صوتة واني انزل هدومي من علية رد : أمرني يابة
دلهم: تروح ورة جلال
سمعت طگة جداحة وراهة رد : جلال ما غيرة
دلهم: اي اريدك تصير ضلة تخيط روحك بي خياط
صفوان: ليش گام يلعب بذيلة
دلهم: كلشي وارد
صفوان:اذا لزمتة انحرة
دلهم:لا بس ولي ليصير اني افرغ جمجمتة
سديتة منة ردت اراسل جلال أسالة عليها تراجعت
خلي اليوم ضغطت عليه هواي شمرت الجهاز
دخلت للغرفة سحبت الورق
طشرت الاقلام افرغ افكاري بيهة ماريد انقض على جلال و اخسرة گبل لا اتاكد اذا فعلا لاعب بذيلة لو بس مشكلة طايح بيهة مثل عادتة
ثاني يوم جان ثگيل مزاجي مو بمكانة بسبب سالفة جلال اجاني حمادة الصبح قريتة متجاهل رسالتة
هو هم ماحجة ما تدخل
وراهة بيومين جنت واكف يم المضخة اصلحهة ورة ما شفت بيهة كسر العرگ يصب من گصتي و شمس عالية تدك بالراس
حسيت سيارة وكفت وراي دك هورن رديت بدون ما التفت الة:المضخة عطلانة
صفوان:وصاحبها
التفت الة الشمس ضاربة بعيني:يشتغل
صفوان: خيانة هم تشتغل
عگدت حواجبي عقلي ربط كلشي بمكانة
عيني على صفوان جدية ملامحة اكدتلي الافكر بي صح جلال خان
دلهم: مرلي بالعشرة اخليك وشم
صفوان: المرة تريدني نظيف مايعجبها لمرگع
دلهم: بمكان ماتشوفة
ضحك بصوت عالي حرك سيارتة لغير مضخة
نزلت عيني للگاع عصرت الصبانة بين اصابعي
افرغ بيهة كل الغضب
خوف على كل البنيتة يتهدم شي بداخلي أيد
افكاري جلال اني كتالة اذا سحب كلشي سويتة
بهاي السنوات اخنگة
خلص اليوم رجعت للبيت اسبق كلشي كدامي
وصلت ما اشتهي العسل غيرت هدومي كعدت
بالغرفة گبال صورتة لعاشت وياي سنين
طلعت موبايلي راسلت جلال"لتعرفها وين وصلت"
ضلت الرسالة معلگة جلال متصل بس مايرد
لا يدخل حتى يطلع عندي مقروءه عفتة
انتظرت صفوان اجاني على الوقت دخل مخلي مواعين السفري بينة عينة علية نظراتة ما تبشر بخير
حجة يشمر صورة كدامي: شهد ماتت
غمضت عيني گمت ادك ايد بايد من القهر
تعب سنين تعب عمري و سهري ردت بس باب ادخل منة ماصدكت حصلتة
دلهم:قسمم بالله الة أذوبة تذويب
صفوان:خلي ايدك نظيفة
دلهم:ما أتسمى بأسمي اذا ماخليتة بجفن
و قريت عليه
حسيت النار تاكل بصدري ضربت الخشب بقبصتي ماسوت شي ولا فرغت شوية من الحسيتة بساعتها صورة شهد ميتة تثبت البنيتة تهدم گبل حتى ما ابدي
سحبت أنفاسي بثگل و صدري ضاگ جلال خاني الصديق الامنتة على روحي هيج طعنة ماتوقعتهة
صفوان: احجي ويا اعرف اسبابة
دلهم:ابن الكلب اسباااب شنوو انعل ابووو لابو اسبابة الگ***' الـ***'" قسم بالله و بهذا الشهر جلال اذا ما رجفتة من خوف مثل النسوان اعتب علية
سحبت الكرسي مگابل المبردة الهوة يضرب وجهي ما يطفي ناري صفوان سكت لان يدري حجية بدون فايدة
رفعت موبايلي اتصل على جلال رد بعد مدة:ها دلهم عذرني توني راجع لگيت مراسلني
دلهم: اي اريدك بالبيت تكدر تجي
جلال:ليش صاير شي
دلهم: احنة مانلتقي الة يصير شي صار هواي ما حاجين عن البينة
جلال:ماتخليهة لباجر امرلك للمحطة هسة تعبـ..
دلهم:انتظرك هناك
سديتة رجعت راسي الكرسي جنت اريد احاول الزم اعصابي بس ماكدر مو اليوم و بهذا الوضع
دلهم:كلشي بنحسم الليلة اليوم جلال اجفنة
مرت ساعة اكثر ندك الباب گام صفوان بهدوء طلع من الباب ثاني حتى مايشوفة جلال گمت فتحت الباب اشرتلة يدخل
نظراتة بيهن قلق و توجس حجة يمر مني :صاير شي
سديت الباب قفلتة: عظي وشم لريد اوشمة
رد بضحكة:ترد تاخذ رأيي
اريد اخذ روحك فتحتلة الباب الثاني أشرلة و المكينة بيدي : لا جلدي نترس اجة دور جلدك
رد يرفع الردن:عوف المكينة تعال اوشمة
بزندي لا الوالدة تشوفة
رجعتهة بدون ماخليهة بنص رگبتة و افطسة هسة
سحبت الكرسي امثل البرود عكس النار البداخلي
خلة ايدة على مسند مسحتهة بمعقم سحبت الورقة
ضغطتها بقوة حتى تثبت رفعتهة اتلمس العبارة
"𒅆𒁄"
حجة مستغرب:هاي شني
دلهم: لغة سومرية
جلال:فشورة
رفعت حاجبي ضحك يزم شفتة مستعد للألم نقشتة
على ايدة خليت الجل درت اخذ كلنس مسحتة اباوع لأيدة أثر الابرة بعدة احمر
سحبت الكرسي اگابل وجهة عيني بعينة:شهد وين
جفل رمشت مايستوعب حجة بصوت
مرتبك: موجودة
دلهم:ويــن
جلال: بالشركة موجودة بس نقلونهة لغير مكان تدري بي فتح بعد افرع
دلهم:مـــكان لو گــبر
تجمد عينة بعيني وجهة اصفر ليشوفة يگول الروح نسحبت منة مديت ايدي بجيبي فتحت ايدة ادگهة براحتها حتى اوعيه من صدمتة
دلهم:صفوان بظهرك من يومين شافك شلون تخيط و تخربط لوحدك
وگف وحهة اصفر عرف بروحة نلگف عيونة شابحة بخوف نظرة على الصورة لبيهة شهد مقتولة
جلال:دلهم اقسم الك الصار غير اني مالي ايد ماتثق بية انيي صاحبك هواي ناس تريد تلعب علينة
دلهم:صاحبيي؟ هاييي منو شلون لزموها شلون وصلت هنا وانتة تضحك و تشرب جاي
گبل لا يرد ايد صفوان جان اسرع داهمة
بضربة على رگبتة خلتة يطيح شالة على جتفة
طلعة گبالي تمشيت للمغسلة مسحت الحبر مني
طلعت ورة صفوان جلال شامرة بالخانة الورة تحرك
لمحطة بأطراف المدينة ماكو شي مخليني صاحي غير الغضب الجاي يزحف بعروگي
نزلنة نسحل بجلال شمرة كدامي فرغ الماي على وجهة شهگ صاحي بس الخوف متلبس بي سحبت جكارة من جيبي
طكة الجداحة خلت عينة تصير بعيني وضعة تخربط رجف عرگ عيونة تدور بالمكان ريحة الدم بعدة تسلل لنفسنة و نميز حدتة
دلهم:جلال انتة حي مو لان تستاهل لان اني اريد
حجة بصوت يرجف:دلهم اسمعني حقك حقك بس والله يشهد الله مو بقصد
دلهم:ماريد قصدك جنت اريدك تصل نظيف
جلال:اقسملك بالله وروحهة لأمي زل لساني گبال محمود هددني جنت اجمع فلوس حتى اسكتة
دلهم: زل لسانك لككك گ****" زل لساااانك حگي التعبت عليه وصلت لحلگ الحوت رجعتي اميال ليورة زل لساااانك و تريد تسكتة و شهد ماتتت
جلال:نجيب غيرهة أمنلهة مكان تدخل وياهم من جديد
كفختة غبائة يصفني دفرتة بحرگة : تدخلها مو همة غمان مثلك فتحت عينهم بعد شيسدهة
صوت السلسلة خلاه يرجف گام يرجع بخطواتة ليورة لزمة صفوان جتف اديه ورة ظهرة مثبتة گدامي
جلال:دلهم ... والله بس ... بس اسمحلي احجي .. الغلط مني ... اسف اعتذر خربت عليك...افهم انتة خسرت هواي ..صدك والله مو بقصد
خرست صوتة دم اتطشر على تشيرتي من ضربتة و السنسلة طبعت حلقاتها على خدة بهت ما استوعب الضربة الثانية لوصلتة گبل لايصحى من الاولى
الثالــة
الرابعـــة
الخامســـة والوراهة و الوراهة
كلهة ما بردت گلبي دمة الفاض ما خلة ناري تهدئ
اريد اذبحة ادري ذبحة جلال ماترجع لراح ماترجع لنهدم
تيهة صفوان طاح بالگاع على وجهة بس عيونة شابحة مد ايدة يخلي اصبعين فوك نبض رگبتة
صفوان: عايــش
جنت اريد اگلة لا مــات و موتني وياه وجهة نصبغ دم
شگيت جفنة اليسار و مردت فكة وجهة مايبين نصة
ورم و نصه وجه قديم لولد چنت أظن صاحبي
حليت السلسلة شمرتهة فوك صدرة عيني على صفوان: جفنة و اشمرة بس خلي يضل عايش لايموت
صفوان:خاف يغرد من يصحى
دلهم:اطم عينة
مشيت عايف الباقي عليه دم جلال لازك بيدي
كرهني بروحي رجعت للبيت كلشي بهت و برد
عقلي تعب و جسمي مو اقل منة
ارجع للصفـــر
بسبب زلة لسان من جــلال
نعمان شيوصلني الة من ياجحر ادخلة و اخنگة
شلون رجعت لنفس السؤال روحي تعبت ماعندي طاقة ارجع أبني و اخطط من جديد
متمـدد علة الزولية عيوني ثابتة علة السگف كلشي يرجع بذاكرتي يخلي النار تشعل بگلبي و طيف الايام
الفاتت بعدة يراود خيالي
رفعت ايدي سحبت الجهاز رسالة من صفوان فتحتهة صورة لجلال بالجفن بس راسة طالع شامرة يم الدكة مال باب بيتة
دلهم"عاشت ايدك"
صفوان"تريد اسمعك صريخ اهلة"
ضحكت على حقارتة عفت الجهاز بصفي ماتذكر شوكت زارني النوم بس من فزيت بعدة ثگل الليل
على صدري
حاولت انام بس صوت المنبه يدك براسي كلشي بجسمي رافض يگوم عدة عقلي چلبت بطرف الفراش نهضت اسمع عظامي تطكطك
متوني توجعني و ايدي ماكدر افك اصابعي بسبب ضربي لجلال لبارحة طكطكت اصابعي گمت مجبور
فوك خنگتي راح اشم ريحة البانزين
صوت الجامع يوصلني مادري اذا يأذن لو يقرة قرءان غسلت وجهي بدلت طلعت بيدي النگبة حركت الدرجة متوجه البانزينخانة
كل ما اقرب يتوضحلي صوت القارئ الناس تطلع من الجامع واضح مأذن من زمان ركنت بمسافة عنة توضيت صليت
كلهة تباوعلي هذة الرياء على اصولة ايدي من جتفي لصابعي كلهة وشم جم ذنب حامل فوگهة سوايتي بجلال البارحة
اكيد اهلة نخبصو عليه بس ماكدر اتغاضى عن فعلتة خرب علية كلشي اتصال من صفوان وگفني مالحگت ارد قطع ركبت الدراجة
اباوع لخانة محادثتة يكتب فترة ظهرت رسالتة "جلال بالعناية كلياتة خربت "
دلهم"تبرعلة بكليتك جا المن مخليهة "
صفوان" شعلية اني الضربتة لو انتة"
دلهم" هو منتهي من الشرب صارلة سنين يدك بطالة شگلولهم"
صفوان "صاير عدة فشل بس تلاحگو يتنفس بعدة "
خـرب روحة صدك عار مايموت شغلت الدراجة رحت البانزينخانة الفجر الشفت المسائي طلعو گعدت بمكاني صافن للفراغ
عقلي يرجعلي احداث البارحة بشكل متكرر يضغط على اعصابي قصص وروايات عراقية كرار صلاح كلشي راح من ايدي احس بتعب عقلي
تلف من التفكير و التخطيط
لحظة راودتني فكرة اروح لنعمان اقتلة شيصير خل يصير بس موتة رحيمة هيج مايستاهلهة اريد اشوفة
يتعذب اتلذلذ بتعذيبة
مرت الساعات جوة شمس الصيف تطك بالراس الحرارة تطلع من الگاع بوخة و ريحة البانزين و صوت السيارات
اني بوسطهة بس اريد اتشتت عن افكاري تمشيت لفلينة الماي طلعت بطل فرغتة على راسي عسى يبرد علية شوية
خليت الخاولي يتبلل دنگت عيني بشاشة الموبايل الساعة بـ12 استغربت حمادة ما اجة اليوم امتحانة
غلست عنة شو وين خانس
خلص الشغل رجعت للبيت مرن يومين گوة جرعتهن اتصفن بالحياطين صادف خميس الظهر
جنت كاعد جوة القمرية
تأففت من رسائل صفوان فتحتة كزيت على سنوني بقهر و غل گدامي رسالتة شكيت بروحي ماعرف اقرة لو رضوان يجذب
دلهم" شتحجي انتة"
صفوان"والله مات هسة طلعوه "
دلهم " شرطة تحقيق دير بالك لايلزمونك"
صفوان " شعلية اني رايح لخطيبتي تطكني إبرة خبط انشلت "
رجعت بالدردشة اراجع افكاري جلال مات صوتة رجع يتردد بعقلي ايام و شهور امتدت لسنوات
كل ثانية تطكفخ عقلي بذكرة
لحد اخر لحظة عيونة تتوسلني بس اني حذرتة گتلة اي زلمة منك اموتك هو غبي عبالة احشش ويا أثول مالزم لسانة ضل يخرط خرطت روحة
صفوان"تروح للفاتحة"
سديت جهاز كاره استفزاز صفوان الي ماريد احس بالذنب يستاهل محد گالة خوني لو لازم لسانة حتى لو مصارحني على الاقل اتلافة الموضوع
گمت من دخلت السيارات رجعت لشغلي افكاري تحترك مثل مايحترك البانزين و يطلع دخان اسود من عوادم السيارات
كلشي حسبته كل تفصيلة رتّبتها بعقل بكل خبثي كل حركة كل خطوة وبالنهاية شنو ضل كلشي فرغ راح وية الهوة
عفت كلشي على النص طلعت راجع للبيت حضرت ملابس وگفت مستند على المغسلة اباوع للمراية جلال راح اوگف بفاتحتة
مات منــي
لو من الشــرب
لو من الاثنيـــن
ليهمني محد يدري صفوان اذا زل لسانة اضيع بس ماكدرلة هذة داهية يقرة الوجوه مثل الكتب اي نظرة غلط مني يلگفهة
رشگت الماي بارد اصحصح من الدوخة لزمت راسي
توضيت وصليت خابرني صفوان طلعنة ورة الصلاة
متوجهين لمنطقة جلال
اصدقاءة و ناسة و جادر منصوب ناس تروح و ترجع سلمت على ابوه و ثنين من اعمامة گعدنة بالجادر
صوت القرءان و سوالف جانبية سؤال يتردد شلــون مـات الجواب يجي من ابوه حادث تعارض وراه نقلوه للمستشفى
يستحي يگول ابنة جان سكير ، يخاف يحجي عن حالتة لوصل بيهة لبيتهم التفت لصفوان مضيق عيوني عليه
تقرب حجة بهمس " حسابي يوصل بالليل "
دلهم" ابوه شبي مخلوس"
حرك شفتة ليجوة بمعنى مايدري و غمز استغفرت راح يخبلني هذة گتلة لاتدخل حركت ايدي بشعري عيني على باب الجادر
دخلو يوسف و عادل اخذو بخاطر اهلة اجو ناحيتي گمت حضني عادي يدك على ظهري : البقية بحياتك دلهم جلال صاحبنة مثل ماهو صاحبك الله يرحمة جان نعمة الاخو و الصديق
دلهم: حياتك الباقية حبيبي
حضنت عادل وراه كعدت بصف صفوان همة من جهة ثانية اتجنب اباوع لعينهم رغم ادري عيوني ما تفضحني اني ماقتلت جلال هو مريض
قنعت روحي صدكت حجي ابوه حادث و مات لقنت عقلي هاي الكلمات حتى ليسألني اجاوبة حتى ضميري يسكت
يوسف: هو غير رجع لبيتة شلون وصل لطريق بغداد شعدة و رجع
عادل: من خابرتة الصبح گالي طلعت من بغداد راجع لهلي و الظهر سيارتة مرت من شارعنة
رمشت ببطئ عيونهم علية ينتظرون الجواب اني صديق جلال الاقرب الة تنهدت اشبك اصابعي سوة
دلهم: العصر خابرتة اتطمن اذا وصل گالي نجتمع بالگهوة ورة الفطور طلعتلي شغلة بالبانزينخانة رحت خابروني الصبح گالو بالعناية
يوسف:اي رحت للمستشفى ماشفتك
دلهم: طلعت من وكت ابن اختي مريض مريتلة ضليت هناك
يوسف: سلامتة
دلهم:الله يسلمك
گام صفوان سلم على اهل جلال طلع محد يعرفة ضليت للعصر طلعت منهم المكان بدة يخنگني
رجعت للبيت نظفت غرفة الوشم
دورت خاف ضال اثر من جلال هنا لحد الفطور طكيتلي بيضة اكلتهة عيني بالموبايل طلبين للوشم
محتاج فلوس
گتلهم تعالو گمت للغرفة اجهز الطبع و الصور اتأملة عيوني خاملة يحتاج هواي شغل كعدت احسب الساعات
للعشرة ندك الباب غلست جنت متفق وياه يجي بالتسعة كرر الدك مرتين اتصل على موبايلي تجاهلتة كملت اتابع
ارد على تعليقات معارف جلال ورة مانشرت صورتة
تأملت ملامحة حرمات راح جان هواي فايدني هو الجسر بيني و بين اخبار نعمان
بنيت خطة وياه بلشنة گبل سنتين ماشين صح گدرنة نلزم كذا شغلة على نعمان الكلب لجان غسيل الاموال لعبتة لو بس مستمرين
جان لزمت عليه هواي وثائق جنت محتاج بس مفتاح احرك بي الساحة مالتهم برمشة عين جلال طير كلشي من ايدي
الغلط نصة مني ماجنت دارس الوضع من كل الجوانب مامخلي خطة احتياط غلطة جلال كلفتني هواي بدون ما اكدر ارجع مرة ثانية
الندم بعيني يلوح جزئ على موت جلال و باقي على ثقتي بي مسحت وجهي بنرفزة عصرت ادية بندم
خسرت هواي ما اضن اكدر اصلح شي
مشت الايام عادية روتين يخنگني مربطة أدية ماكدر اسوي شي احس طيف جلال يتخاطف گبال عيني ارجع اقنع روحي مات من الشرب
هواي معلومات تجيني من رضوان بس ماكدر اسوي بيهة شي بدون فايدة لا اريد احتك بنعمان لو اراويه وجهي مو بعيدة عليه يصفيني
خلص شهر رمضان ركيت راسي گبالي حايط عليه صور و قصاصات خطوط و خطط كلهة راحت مهب الريح مابيهة فايدة
لزمت طرف الطاولة طلعت كراتين جمعت بيهة كلشي اوراق و ملفات اريد اخذ فترة اراجع حساباتي
ما دام ثنينة نشم الهوة اني وذاك الگ***"
ركنت الكراتين صلت بس صورة نعمان متوسطة الحايط اخخ يا وجهة شكد خسرني هدم بيت فوك راسي اخذ اعز انسان علية
تنبهت على صوت الباب يدك طلعت من الغرفة اذا نفسة هذة ضرغام ابو وشم النمر الة ادك الوشم بعينة جزعني بملحتة
فتحت الباب صارت بوجهي أسراء و أبنها دخلت تضحك مثل عادتهة بوستني حجت : شلونك حبيبي
دلهم:هلة خوية تفضلي
حركت ايدي بشعر كرار اسد الباب بالايد الثانية اتبع خطواتهة دخلت للبيت تباوعلة بنظرة فاحصة و ملامح مشمأزة
اسراء:شني هاي دلهم بيتك شكد وصخ
حكيت شعري بملل:مامرتب تشوفينة هيج
اسراء:لا والله وصخ
دلهم: متعاركة مو
دارت عيونهة بعيد فتحت الثلاجة:مامتعشين هم طابخ
دلهم: عصام وينة ليش مادخل وياج
تنهدت من عيونهة مبين باجية فتحت الموبايل طفرت لازمة ايدي:لاتتصل عليه فدوة
دلهم: ضربج
هزت راسهة بنفي:لا لا ما ضربني
اخذت الموبايل من ايدي خلتة بعيد عني دخلت كدامي تبعتهة اباوع لمشيتهة لتعرج بيهة قفلت غرفة الوشم و الغرفة الثانية
دلهم: ارفعي اردانج
دنگت ساكتة طلعت الموبايل نطتة لكرار دخلتة لغرفتي التفت تقابلني بنظراتهة الخايفة و المتوسلة
اشرتلهة بأمر رفعت ردنهة قابلتني أثار الضرب
مديت ايدي بجيبي اتأمل ايدهة الزرگة براسي اتخيل شكد راح اعذب عصام على هاي فعلتة توجهت للمطبخ اخذت الموبايل و السويج
لحگتني تركض و الدموع تنزل على خدهة تمسكت بأيدي توگفني :ابوس ايدك دلهم عوفة والله مو قصدة عصب اني راددتة الغلط مني
تكتفت بصبر گدامهة: اي شلون الغلط منج خل اسمع
أسراء :ارجع فدوة لاتروح
دلهم:لو تحجين لو اطلع اجنزة هسة
أسراء: من أمة هي تسوي مشاكل انتة تعرف شكد هو مايقصر علينة صارلة اسبوع يشتغل بمعمل الطحين صايم و يدك شغل من صبح لليل بس علمود يشتريلينة ملابس العيد اجة العصر والله لو تشوفة يكسر الخاطر من تعب مشتري جاي يفرحنة وامة حجت سممتة خلتة يشيط للسمة و عصب
دلهم:وضربج
اسراء:الصبح يهدئ و يجي تحملني بس الليلة
زفرت انفاسي بتعب مسحت على وجهي : انتي مامثگلة علية تردين البيت اخذي شگد تضلين عسة ما سنة ما اعزة عليج مشكلتي عصبية عصام لماتهدئ بس من ايمد ايدة عليج هاي ثاني مرة تسكتيني وحق الله أسراء اذا ما كسرتهة اني مو دلهم
أسراء:لا بغلاة ابوي عليك لاتسويلة شي دلهم لخاطري فدوة اروحلك عوفة اني اتفاهم ويا بعد مايضرب والله اذا كررهة اجيك بس لا تروحلة هسة ابوس ايدك
دلهم:فوتي يالله ارتاحي قفلي الباب
أسراء:ما تروح الة
هزيت راسي اباوع للجگارة احترگت بين اصابعي طفيتهة بالحايط طلعت راد الباب وراي براسي نية ضرب عصام و تكسيرة بس زعل اسراء ثگيل
ركبت الدراجة توجهت لبيتهم ركنتهة بيدي الموبايل ادور بالارقام ماكو رقمة مسحتة من اخر مرة تعاركنة سديت الجهاز
نزلت دكيت الباب اكثر من مرة لحد ما طلع شافني ملت عيونة نظرة الخجل :هلة دلهم
دلهم:هلة بيك
عصام:تفضل
دلهم:ما جاي اتفضل تعال برة نحجي
طلع تبعتة وكف على جهة حجة بأسف :اعتذر حقك ارضى كلشي تسوي عصبت و ضربتهة
دلهم:اسمعني زين سكتت عن الاولى لا عبالك اعديلك هاي متفهم حالتك ادري بظرفك بس عصبيتك مو مبرر تخليك تمد ايدك على اختي مرة ثانية ترفع ايدك اقسم بالله العظيم اجيك بالليل لا تشوفني لا تدافع عن نفسك اكسرك تكسير
عصام:حقك شما تسوي اني غلطان اذا نعادت مسموح بكلشي تسوي
دلهم:أسراء عزيزة واني صابر عليك لان ظروفك مرة
شد حيلك عصبيتك ما تطلعهة بمرتك
هز راسة بقهر تنهد عيني راحت لجهة الباب امة واكفة عجوز بس اصحى منة عيونهة تشرح كمية الغل و الحسد الشايلتة
عفتة خلصت كم شغلة رجعت للبيت لاگتني اسراء تمتر الحوش روحة و رجعة تعصر بأديهة من دخلت قابلتني بلهفة و خوف
أسراء:ضربتة
دلهم:لو اعرف ليش هلكد مستعرة علمودة
أسراء:غير زوجي احبة
مديت علاگة خليتهة بيدهة حجت تفتحهة:شنو هاي بقلاوة بس لا ضربت عصام و اجيتني تحتفل
دلهم:گتلج ما اضربة الزن هذة شلة داعي بعد
اسراء:اعتذر لحيت هواي شبيك تنتر بية بعد ما اجي ولا اوصل
دلهم:شگد تزنين
عفتهة تلغي دخلت لغرفة الوشم اصفي افكاري من اشوف اسراء تلتم علية هواي شغلات اتذكر سنوات فارگتهة و فاگدهة
سحبت الورق اركز بالقلم الي بيدي رسمت هواي حاولت اشرح افكاري بس بالنهاية لگيتني اصف ارقام و اطبعها
شلت الصورة اثبتهة باطن اصبعي الوسطى اسمع من برة صوت الموبايل مشتغل بي اليوتيوب و صوت أسراء واضح بدت تنظف
ثبتت النقش الجان عبارة عن وقت " 12:05" نقشتة اختلط صوت المكينة و دك الحبر وية صوت المكناسة لتحتك بالگاع
كل ما اباوع لايدي يرجعلي هذة الشعور القذر نقشت وكت موتت جلال على جلدي حتى يصير درس ما اثق بأي بشر بعد ولا أرخي
فزيت على صوت دكة الباب رفعت راسي بأرهاق و رگبتي متشنجة المكينة بيدي اخر نغزة ابرة مخلفة دم جامد گمت ابعدهن عني
فتحت الباب قابلتني أسراء بوجهة البشوش :عيـدك مبارك حبيبي أشوفك عريس
دلهم: انتي بألف خير عوفي العرس هاي السوالف مالنة خلقهة
ابتعدت عن حضني ورة ما بوست راسهة مثل ما متعودة دنگت بوست كرار خليت بيدة عيدينة
حجت متوترة تعصر أصابعهة: عصام برة كاعد على الدكة بالحديقة
دلهم: گتلج ما اسويلة شي لاتضلين تفكرين
أسراء:اعرف بس خف شوية لاتخلي وجهك ثگيل لخاطري
تجاهلتهة فتت للحمام غسلت وجهي ارتكيت على المغسلة احس بثگل يغلف گلبي حنين لأيام جلال
شوفة اسراء كفخة اجتني على الراس
عصرت عيوني اطرد افكاري ماشديت على ايدة گتلة اشتغل وياي هو راد فلوس شغلة مايكفي فوك الشرب لماخذلة جهة بأسعارة جنت ادفعلة كلشي سواه الي مدفوع
فتحت الباب اطلع من قوقعة افكاري مريت بالمطبخ اخذت الجاي من ايدهة طلعت لعصام عايدتة واضح توتر عليه و خجل من ضربة لاسراء
مرت فترة الصبح بوجودهم وراهة رجعت لبيتهة ويا
سديت الباب بطلعتهم ركيت راسي عليه اكعد وراه
الجهاز يرن رقم صفوان بدة يسببلي أزمة
شلتة اجاني صوتة الفكاهي :ها شبيك خانس ابو الدراهم عيدك مبارك ينعاد عليك بأحسن من هاي الايام
دلهم:علينا و عليك
صفوان: مختفي
دلهم: شوفتك ماتعجبني
صفوان: خايف مني لكك گ***"
تأففت من صوتة العالي خليت جهاز قريب علية عيني على الطباخ أسراء حضرت الغدة و مشت
دلهم:تعال تغدة يمي
حجة بضحكة:تريد تموتني ولك خايف اسحب السجادة من جوة رجليك
دلهم: اعثرك بيهة
صفوان: لاصدك عزيمة خوة لو الك نية بيهة
دلهم: غدة عادي تريد تجي تتزغب تعال
صفوان:افتحلي الشباك حبيبي اجيتك
فتت لغرفتي طكيت حديدة الشباك لگيتة مرتكي على الحايط بيدة جهازة لوحلي بي نطيتة ظهري راجع للبيت اسمع خطواتة وراي
كعدنة بالمطبخ نزلت الجداري اكلنة بهدوء نظراتة
بين الشاك و المافاهم تتبع حركتي مركز يحاول يفهم و يقرة نظراتي
حجة يطك الخاشوگة بحافة الجدرية: شبيك شو وجهك مدري شلونة
تنهدت امسح على وجهي عفت البيدي : جلال موتة خانگني
صفوان: شنو اجتك لرجفة مال اول جريمة
دلهم: مو بايعهة مثلك عدي ضمير
ضحك بصوت عالي يشيل سطل الماي رشگة على وجهي خلة الماي يصب من شعري يبلل هدومي
صفوان: ضحكتني ابوالدراهم وينة ضميرك بالله انزع راويني
نزعت التشيرت امسح شعري أجبر روحي ما اجاري بفكاهتة التافهة استمر يضحك گام يغسل رجع قابلني مخلي اديه على خاصرتة
حجة بجدية :تعرف المقولة لتگول اذا ضليت تباوع للحفر راح تسحبك الهة دير بالك دلهم انتة ماقتلتة لجلال انتة فقط سرعت بموتة هو گ****" مات متعفن من الشرب و البلاوي لياخذهة لاتضل تهم و تفتح على روحك باب ماينسد
دلهم: وجعتة بضربي الة
صفوان: ضربتك خفيفة اني اشهد على برائتك
دلهم:هواي طمنت افكاري
صفوان:دگوم صبلنة استكان جاي
طكطكت رگبتي گمت شديت ايدي ضربتة بخاصرتة نطعن وجهة متوجع لزم بطنة طاح گدامي ايدة الثانية شاد بيهة تراكي منحني
دلهم:توجع
رد وجهة احمر يأشر بيدة:لا
دلهم:وية الدليل
دفعت ايدة رجعت لغرفتي اجة وراي يطكطك بصابعة غير رأية تمدد على الكرسي الجلد يخلي رجل على رجل اشر بيدة
صفوان: لاتغلس اريد بغشيشي
دلهم: ماعندي مستعجل عليهن
صفوان: اي والله اريد اشتري خاتم للخطيبة
حكيت شعري احسبهة التفت الة يباوعلي بخبث :شگد تريد
صفوان:شدة
دلهم:مو گاعد على بنك الخلفوك
صفوان:الك مهلة اسبوع دبرهن
دلهم:يومين يصيرن عندك
صفوان:كفو ابوالدراهم
ثاني يوم العيد اصرو الشباب اطلع وياهم ما عاندت هواي احتاج ابعد عن كأبة البيت بين الونسة و السوالف كل شوية يطوف ابالي افكار الماضي و احداثة
رجعت لبيتي بديت اكثف شغلي اطلع للبانزينخانة و بالليل اشتغل وشوم اي عرض يجي ما اخذة بمزاجي جنت كلشي اسوي محتاج فلوس
اخر طلب نقش حسيتة غريب شككت بصاحبة بالليل ندك الباب فتحتة رفعت حاجبي من صار بوجهي ثنين بنات من الاخير بايعاتهة
: هلــو راسلناك علمود وشم انتة صَعب مو ؟
دلهم:لا
ردت مستغربة:هذة العنوان صحيح
دلهم:ما اوشم بنات
: ماكو فرق لاتسوي عنصرية احنة اجينة ليش تردنة
دلهم: ماعندي سبب ادخلج بي لبيتي
:انطيك ضعف السعر
دلهم: الله وياج
سديتة بوجهة احك لحيتي مستغرب اكو بنات يوشمن هيج وقت يجن عادي ندك الباب مرة ثانية
تجاهلتهة
مرت الايام علية مثل ما هي بنفس الروتين شغل و افكار و معلومات تجيني بس عقلي تلف من التفكير
وين ما اخليها احسهة ماترهم
سنة وفوگ اني بنفس المكان ماعندي الطاقة ابدي بأي شي جديد بعد ايام من التسخيت بالبانزينخانة حسيتهم راح يطردوني
سلمت شعدي مفاتيح طلعت بكرامتي رجعت للبيت خابرت صفوان يدورلي شغل بأي مكان اسخت و اطكطك بي اشغل عقلي عن افكاري
اشتغلت وية عصام بمعمل الطحين لعبت روحي ظهري نمرد مامجبور اتحمل ساعتين عفتهم وراهة اشتغلت بمحل و مليت من كعدة
مادري الخلل بية تعودت على الضجة مال المحطة ضطريت اشتغل بوحدة بعيدة عن المناطق السكنية على الخط السريع تعبت بس اتونس بي
وگفت باب البانزينخانة الجو بعدة خيط الفجر ما طرة اضطريت ابات هنا حتى احصل فوك يوميتي
فتحت البطل مزعوج ارش الماي على شعري
راح اضطريت أضل لصلاة الظهر شيحمل النعاس والتعب
بطرف عيني لمحت ضل نعكس من ضوة لگلوب الباهت استغفرت منو ليجي هيج وكت هزيت راسي يمكن بزونة لو طير مر نعكس ضلة
تحركت اريد مكان اتمدد بي ارتاح شوية مر بأذني صوت بجي غمضت عيني استغفرالله شجاني اتخايل تالي عمري نسطرت من نعاس
جذبت الصوت بالبداية بس تأكدت ما اتخيل من تبعة صوت نشغات لشخص يبجي تنكتم مرة و تنسمع مرة تحركت ببطئ اتقرب من التانكيات
خطوات وگفت گبال الهيئة الماصدگتهة عيني
رفعت عيونها الي توسعت عيوني اقابل نظراتهة المفزوعة
عيون متوسعة برعب و دموع تارستهة حالهة مبهذل التراب مغطيهة ترجف مثل السعفة تنتفض من مكانها
الشعر احمر طايح على جتفهة و العيون زرگ لونهة بارز بعتمة الليل دموعها تطيح وهي تنتفض بمكانهة خايفة واضح الرعب مرسوم على وجهة
اديهة ترجف مغطية حلگهة رغم محاولتهة ماكدرت تخفي صوت شهگاتهة عگدت حواجبي تقربت خطوة خلتهة تفز تلملم عباتهة عليهة
گبل لا اسأل و استفسر تردد صوت قلق بالمكان يحجي بهمس و خوف يصيح مبين يدور عليهة جفلت برعب ضمت روحهة بين التانكيات
عفتها رحت لوسط المحطة قابلني رجال متوسط بالعمر يلهث الغضب مرسوم على ملامحة بس ماخفة القلق و التوتر الجان بي
دلهم:على شنو تدور
اتلفت حولة رد بتوتر :بـ..بانزين سيارتي وگفت على الشارع اريدلهة دبة تبيعون
حجيت أشر على جهة تانكي:اذا تدور على بنيـة هناك لابدة بين التانكيات
