رواية قصة وجدان ( كاملة جميع الفصول ) بقلم انين الليل

انا وجدان بنيه فتحت عيني ع الدنيا سنة 94 ما اعرف بذاك الوقت شنو شعورهم من اجيت للدنيا المهم عرفت

شي انو سكان الكره الارضيه زادو واحد

ابويه اسمه سعدي

امي اسمها نجاة همه اقارب من بعيد

اخواني هشام مواليده 91

رامي الي ماما حملت بي بعد ولادة هشام بشهرين مواليده 92

بعدين اني

واخويه علي الزغير مواليده 2002

نسكن بغداد بيت ملك كلش كبير ومنطقه راقيه

ابويه ضابط وامي ربة بيت 

خلي انطيكم وصف عني اني ماخذه شي من امي وشي من ابويه

امي حلوه ما اعرف ليش يشبهوها باليابانيات هي عيونها شفايفها كبار لونهن وردي رگبتها طويله وشعرها

( كيرلي ) لون بشرتها بيضه وبللشمس تكلب وردي خفيف كانت شابه حلوه ونازكه

ابويه طويل وعيونه كبار حلوات واسمر حنطي جثل عبالك من ذوله الي يلعبون رياضة عضلات واله هيبه ابين الناس او

اني كنت هالشكل اشوفه

انولدت واني بحلكي ملعقه ذهب

لكن بعمري ما حسيت بهذا الشي ولا عشته

الي ما يعرفنه كان يشوفنه عائله مثاليه ويمكن كانو ايحسدونه لكن بمجرد ما يتعرف علينه راح ايغير نظرته اتجاهنه

والاحداث راح تتوالى

ا

/////////////////////////////////

اتحملوني يمكن اضوجكم

من وعيت بعمر اربع سنين او اكثر شويه واني اشوف الخوف والحزن بوجه ماما بمجرد ما يدخل ابويه للبيت

اباوع الها وهيه ترجف مثل السعفه

اما اخواني فالضحكه تغيب عن وجههم كانما الي دخل للبيت هو سفاح او جلاد الكل يخاف منه بس اني اروح إتلگا

رغم امي تلزمني لكن اروح واحضنه مرات يخليني بحضنه ويبوسني ومرات يصير يضرب بيه راشديات

واني مره ابچي ومره اسكت من هو يطلب مني هذا الشي بحيث اضحك والدمعه بعيني

كان ابويه قاسي بمعنى الكلمه ومتناقض يعني مرات يكعدنا بحضنه ويبوس بينه ويطلعنه لكن اكثر المرات عصبي

وما يريد يشوف احد

ودووم يعتدي على امي بالضرب بس مو اي ضرب لا ضرب مبرح كان يضربها ويخلي بوجهها كدمات

زرك وحمر ويطلع من خشمها او من حلگها دم وهو ولا يهتم

وكنت اشوفها من يضربها تصرخ وتتوسل وتستنجد لكن هو ما يتركها اله بعد ان يغمى عليها وتصحى

من بحدها تكوم تغسل وجهها وتلبي اوامره وكان شيىا لم يكن

واحنه نختل بالغرفه خايفين ونباوع ونبچي حتى ساعات وهو كامشها يعيط علينه ويكول

- تعال لك هشام اتفل عليها اضربها رامي جيب النعال واضربها هاي مو مال احترام هاي كلبه وانا حاويها ابيتي

مجبور بس وين تروح اول وتالي اشمرها شمرة الجلب بالشارع

وحتى اني يعيطلي // تعالي ولج اذا بيوم اتضربج لو تصيح عليج بالنعال على حلگها

وما نعرف شنو سبب هذا الشي وليش امي ما ترد علي او ليش ما اتعوفه وتروح الاهلها او حتى تشتكي علي

وليش بابا هالشكل كان تصرفاته ويه امي وبعد ما تنتهي هاي المعركه كان بابا يلبس ويتانق ويطلع وهو يغني

ويرجع بالليل وهو يعتذر ونسمعه شلون مرات يبچي ويتأسف لكن ثاني يوم ينعاد نفس السيناريو

كنت انا بالنسبه الاخوتي المدللى لان بابا دووم ايكلي

- امشي وانتي رافعه راسج ابوج بطل وسبع وانتي مو بنت شخص اعتيادي لا انتي بنت (ويرفع باديناته)

انتي بت واحد من اتشوفه الزلم اكبر شارب ايظل يرجف منه

- اي واحد يسحكلج على طرف رجال او مره اخذي حيفج منه لا. اتركين حقج طالبي بي واخذي

من حلك السبع لان بهاي الدنيا محد بحال احد كلمن يكول ياروحي الاخ ينكر اخو والولد ينكر ابو

كلمن ايكول ياروحي اهم شي ما تعوفين حقج

بوقتها زرع عندي التكبر والغرور والشراسه وبنفس الوقت الانطواء والكره

امي كانت بمجرد ما يروح بابا للدوام تكعد وتعلمنا عكس ما هو علمنه كانت دائما اتكلمنا عن مخافة الله

وعلمتنا شلون لازم نكون واحد يحب الثاني ونكون متواضعيين وهذا الشي ننسا او نتناسا بمجرد ما يجي بابا

نرجع ذولاك احنه اولاد سعدي الي نخاف منه والي لازم نمشي باوامره وشنو يريد انكله صار بدون مناقشه

ما نرتاح وشويه نجر نفس اله من يروح للدائره مالته كان مرات يغيب عن البيت اسبوعين ويجي اسبوع

ومرات لا يروح تلث تيام ويجي يومين يعني دوامه ما مستقر وهواي مرات يروح ايفادات حسب كلامه الغير

محافظه ما تتصورون فرحتنا وهو بعيد عنا من يجي للبيت داىما يجون ويه مرافقين اثنين كان ايمشيهم بمجرد

ما يوصل ومن تنتهي اجازته يخابرهم يجوله

من يروح للدوام ثاني يوم امي اتبدل النه وتطلعنه تنطينه من الفلوس الي ايخليهن لحتياجات البيت

ورغم طلعتنا وياها بسيطه عكس بابا الي ياخذنه للمولات ويشتريلنه كلشي غالي ومطاعم راقيه لكن ابد

ما نحس براحه ولا بحب وكله بسبب ظلمه الامي

الي ما نعرف شنو سببه

خلي اسولف الكم على بيتنا هو كبير طابقين بي كراج وحديقه وصالتين وحده خارجيه مع استقبال كبيرجدا

للضيوف الي ما اشوف يزورونه الا قلييل كولش يعني لا تستغربون اذا اكللكم انو سنوات مرت محد اجه ولا زارنه

احد يعني اشوف هذا البناء مبالغ بي

والصاله الثانيه داخليه كبيره وبيها تلث غرف جوا ومطبخ كبير ومأ ثث

وفوك صاله بيها خمس غرف وحمامات اثنين ومخزن كلش كبير وكل بيتنا اماثث

والمنطقه حلوه هادئه وراقيه ومثل ما تعرفون المناطق الراقيه محد يسال ع الثاني

ولا جار يدخل على جار او يمكن بس احنه هالشكل الناس ما تجينه ولا تسال علينه لان اساسا احنه منطويين

على نفسنا وياويلنه اذا اجه وشاف واحد من اخوتي بره يكفر بي من الضرب ناهيكم عن الفشاير والغلط

ابن الزفره

ابن القندره

ابن ال...

لذلك احنه ما ندخل على جار ولا نسال على احد ولو هسه صارت كل المناطق هالشكل بسبب وجود حلقات التواصل

من نقالات واجهزه الكترونيه والنت الموجود بكل بيت وبرامج التواصل

كانو بس جوارينه بيت ام احسان اسمها خاله (خوله ) هاي صديقة امي وتعتبرها اكثر من الاخت وهي بس الي

تجينه للبيت وما اتذكر بيوم ابوي شافها او التقى بيها عدنا بالبيت اله وهو يرحب بيها ومرات هواي يجي

زوجها الي يشتغل موظف بااحدى الوزارات داىما يجي على بابا ويكعدون بالساعات

خاله خوله عدها تلث اطفال

احسان ومنار ومحمد وهي مره كلش حبابه وياما سمعت امي اتوصيها

• خوله ذمه برگبتج اذا فد يوم وجدان احتاجت شي او التجاتلج وما ساعدتيها راح. ازعل عليج

وهي تبتسم //. شنو هالحچي هذا

امي // ما تعرفين الوكت شضام النه

ام احسان // ان شالله بس الخير

•. مي خالف خوله اوصيج تديرين بالج على وجد

امي دووم تسميني (وجد ) مو ( وجدان ) تگول اسم طويل ومو مال عمرج

احنه عايشين وكل شي موجود عدنا لكن بسبب قساوة ابونه انولد عدنا شي وهو الانانيه يعني اي احد ما يهتم للثاني

وهذا الشي ابونه زرعه عدنا من خلال تصرفه ويانه دائما من يسمعنا نحچي ويه امي ما يقبل انسميها

ماما ايگلنه سموها نجاة لا شنو اتثقفوها وتسموها نجاة سموها (انجيه ) واذا اتسموها ( انجيه الك...)

ايلوك الها اكثر

وهيج ابوي سحك على كرامة امي كدامنه وما خلى الها اي احترام وما نعرف السبب

اتصورو اذا اريد منها شي وهيه ما لبته وابوي كان موجود اروح اگله وهو يلزمني من ايدي ويگلي

اتفلي عليها وانا بعقل الجاهل اسوي هذا الشي

ناهيكم عن اخواني هشام ورامي اسمعهم حتى يسبوها ويغلطون عليها وهيه تحجي وياهم وتردعهم لكن همه يزيدون

بين قوسين عايشين حياة فوضويه بداخل بيتنا

ما اگدر اعرف سبب مقدار الكره الي ابوي ايكنه الامي وشنو السبب الي خله امي تبقى ويا

ضوجتكم بهاي المقدمه مو لكن ردت اوضح جانب من الشي الي عشته

خلي نتعرف على ابوي گلت هو ضابط ورتبه الي اعرفه هو ثاني واحد بعد عمي (بدر ) الله يرحمه والي طبعا

هو متوفي قبل لا اني اجي للحياة اصلا متوفي يمكن قبل حتى ما يصيرون اخواني

واعرف عندي عم اخر اسمه ( عاصف )وعم اسمه (مهدي ) وذوله ما كنت اعرفهم من كان ابوي موجود يمكن مرتين

شفت عمو عاصف اجانه للبيت وهو صاحني وسلم عليه حتى ما باسني وبعد ما شفته

جدي وبيبي اهل ابويه ما شايفتهم واتذكر من اتوفى جدي بسنة 2005 ورحنه للفاتحه كانو بغير محافظه

وسكنهم بمنطقه ريفيه لكن بيوتهم حلوه وهاي اول مره اشوف بيبي امه البابا اما جدي ف ابد ما شفته

من اجه خبر وفاة جدي ابويه رجع من الدائره وكال الامي

• بسرعه البسي وحضري الجهال وخلي نروح ابويه مات

امي نشغت وضربت على خدها وبسرعه لبست ثوب اسود وخلت شال على راسها ولبست عباية اسلاميه ابويه بوقتها

خزرها وكلها //. لج البسي عباية راس ما رايحين البيت ابوج

 

رغم اني زغيره بس عندي احساس انو بابا ابد ما مهتم الوفاة جدي الله يرحمه

وطلعنه ويانه الحرس والطريق كله واحنه ساكتين وبس ابويه يوصي باامي

• لو شيصير ولا تفكيين حلگج ولا تحجيين ادخلي عيطي وابجي وبعدين شوفيلج مكان انتي وبتج اگعدي بي واسكتي

وانتم ( دار على اخواني ) تبقون وياي ممنوع تحجون ويه اي احد بس من اني اكللكم

الكل رد بدون نقاش حاضر

نزل من الشارع الرئيسي الى شارع ترابي لكن بصراحه ما بي تراب بس بوقتها ما كان امبلط والمروج الخضره على الجانبين

وصل المنطقتهم وما اسولف الكم شگد شفت سيارات رايحه جايه للفاتحه وبيارق على سيارت اكثرها بيك اب

لو الچوادر المنصوبات وهذا الشي اتذكره لحد هاي اللحظه لان اتعجبت واني اگول

هشام شوف شكد ناس واعلام شنو هاي

ابويه رد // ولج لا تاشرين

نزلنه واشر الامي تدخل من باب دخلنه وشفنه شكد نساء داخل بيتهم وامي سوت نفس ما كال ابويه دخلت وهي تبچي

ومحد وكفت واتلگتها وكانما ميعرفوها

بس بيبي ام كريم والي هي تصير عمة امي يعني اخت ابوها واسمها (هديه ) وهاي متزوجه عم ابويه

امي لزمتني وكعدت واني اسمع الملايات واشوف اللطم والعياط وامي كاعده بزاويه وبس بيبي هديه وبتها شيماء

وزوجة ابنها يجن يمها وحتى من خلو العشا احنه ما جابو يمنه صينيه لو ما خاله شيماء اتداركت الامر وجابت صينيه

خلتها كدام امي

وبيومها بقيت ما اكلت الى ان بيبي گالت الخاله // روحي دوريلها خاشوكه

وحده من النساء كالت // هو المفطح ياكلونه بخاشوكه

بيبي ردت //هاي البنيه ما تعرف تاكل ابايدها

• شني ما شايفه

• اي ما شايفه وحتى من ابوها يسوي عزيمه امها تخليلها بصحن زغير

امي صارت تاكل بدون ما ترد

بليلتها لمن نامت الناس وخاله شيماء جابت النه فراشات بالصاله اجت بيبي هديه البيبي ام ابويه وكالت الها

• ام بدر سعدي يريد يجي يسلم عليج

  بيبي فزت عبالك انلدغت وردت بنتر // ابد لا يجي ولا يوصل انا ما عدي ولد اسمه سعدي

  بيبي هديه //. شتحچين انتي هذا اب...

   بيبي قاطعتها //. اسس ام كريم گليله لا يجي ومن الصبح ياخذ مرته وفروخه ويرد المكانه زين مني وما طلعت

طردته كدام الناس وطردت مرته بس بلعتها وسكتت الخاطر عيون المرحوم ما ردت الناس تحچي

بيبي هديه // مرته شعليها انتم وابنكم لا الها بالشغله لا ناقه ولاجمل

بيبي // خوش هذا هو وصل كثر الله خيره ياخذ مرته وجهاله ويمشي الله يسلم الموجودين كفو او وفو

امي ما ردت اتمددت ودارت وجهها وثاني يووم من غبشه گعدتني امي ورجعنا البغداد ويه ابويه واحنه من كد ما خايفين

من عنده يمكن حتى نفس ما اتنفسنا

  وصلنه وابوي راح للحمام سبح ودخل الغرفته نام وما كعد اله ثاني يوم وامي يمنه تخاف تروح يمه الى ان هو طلع

وكال الامي صبيلي اكل

وصبتله وگعد ياكل بشهيه مفتوحه وبعدها جابتله چاي سال // هم احد اجه

امي // لا

تستمر القصة أدناه

   باوع الهشام //. اسمع اذا تطلع المغرب تجيب صمون واحد يسالك يمته اجيتو گله هس تونه وصلنه مفهوم

   هشام هز راسه وبليل استقبل المعزين ابيتنه وهو لابس دشداشه وبين شگد متاثر وحزين الوفاة جدي

بيت جدي اهل امي نفس الشي ما يجونه ولا امي تروح الهم ولا حتى تخابرهم ساكنين بالبصره ومن انا عمري

ست سنوات اتوفى جدي ابوها الامي اسمه عبد الحميد واخذنا ابويه اني وامي واخوتي والطريق كله تبچي بدون صوت

وبابا مره يشغل اغاني مره يسمع اخبار مره هو يغني وهي ساكته وقبل ما نوصل فهمها الصبح يدز عليها وترجع

  وكللها //. ما اريد اتدزيلي وحده من حبايبج الله يخليك خليها ما شفناها ادز عليج راسا تجيين بدون تاخير

اكتفت هزت راسها بدون ما تحچي ويا ا

وصلنه الضحى وامي فقدت صارت تعيط وتضرب على وجهها وبيبي الي هيه امها اتگللها

• المن اجيتي راد يشوفج عينه بقت مفتوحه لان ما شافج

بعدها النسوان لزمن امي بعد ان داخت وگعدنها وجابن ماي وصارت بيبي وخالاتي يبچن وهنه ايباعن الامي

  وبعيونهن عتب وبيبي بوستني وخلتني بحضنها

امي مره تبچي مره تسكت وخالتي الكبيره الي اسمها نظيمه زمخت على امي بعد ما طلعت النسوان وبقن بس الاقارب

  وهي اتكلها // وين السانج صايره خرسه كله خوف من سعدي النسوان ايسألن بيج وانتي ما تحچيين

امي بقت ساكته اتقربن عليها خالاتي اثنينهن وهنه ايگللها // نجاة شبيج شجرالج ليش هالشكل حتى صديقاتج ما سولفتي

وياهن ليش كل هذا

امي بس تبجي ومدنگه وخالتي الثانيه اسمها غنيه گالت // كله من رجلج ابوي اتوفه وهو يصيح اب اسمج وبس يريد يشوفج

ويكول اريد اشوف نجاة وانتي صار اكثر من سنتين ما جايه واتمرض ودزينه خبر وانتي ما اجيتي كله منه ابوي

مات من قهرج وبقت شوفتج حسره بگلبه

امي رفعت راسها وگالت // لا مو كله من سعدي كله من ناظم لو نسيتو كله من ابوي وايمن حتى كله من ابوي وامي

انتو الي حرمتوني اشوف ابويه

الكل سكت وامي اخذتني وحضنتني ونمنا والصبح رجعنا البغداد وبالطريق ابوي سالني شنو حجو ويه امج وانا على

جهلي وتملقي اله بسبب خوفي منه سولفتله كل شي

وهو الطريق كله صار يستهزا ويتشفى بيها طبعا هذا الشي بعدين عرفته

واسمعه يحچي على خالتي نظيمه // هم عدها السان وتحچي مو جابتها البتها وهيه ما مكمله ست تشهر

لو الثانيه العايقه الدايحه ام الزلم والمستشفيات لو رجلها السگط ايكلي ليش ما جبت ام هشام خطيه ابوها بس

راد ايشوفها

ومن گتله ما عندي مجال گلي لو مخابرني وجاي ماخذها هو هم عوزي يجيج رجل غنيه الگرن وياخذج

امي ساكته وابوي يعير بيها // وهذا الزمال بس شافني شرد ما اعرف وين ضم روحه امدااني شبيه اتقشمرت بهيج

نسابه زباله بس شنسوي الفاس وگع بالراس

كنت بيني وبين نفسي اشوف ابويه من خلال كلامه وتصرفاته تصرفات واحد همجي الى ابعد الحدود

امي بس دموعها ينزلن على خدها وابوي يكهكه بصوت عالي ويگلها

• على شنو تبچيين كلنه نموت رجال چبير ومخرف شنو تردينه يبقى تحنطونه ياالله اسكتي خلي نسمع الاغنيه ونتسلطن

   ابوي يضحك وهي ساكته وبس دموع وهاي السلبيه خلتها تخسر وتخسر هواي

كنت ما اسمع كلامها واتلوك الابوي بس حتى من يصير عصبي ويصير يعيط ويغلط ومن يضرب امي واخواني

اني ما يضربني

فشنو يگلي اسوي مثلا من يجي بحاله مو طبيعيه يصيحني ويكلي اغلطي على هاي الك.... وياشر على امي واني اغلط

ومرات هو عادي ما بي شي ويكلي اتفلي عليها او اضربيها اني هم اسوي كل هذا الشي بس حتى ما يضربني او يسبني

او حتى يفشر عليه

بيوم اجت منار صديقتي الوحيده بت خاله ام احسان اجتي مرت عليه نطلع سوا نروح للمدرسه من يم بيتنا او بيتهم

مدرستنا قريبه فنروح نتمشى لو اني امر لو هي تمر كنت بصف رابع ابتداىي

بدلت وامي خلت مصرفي ع الكاونتر سالتها ماما وين مصرفي فهي ما سمعتني حجيت بصوت عالي

= وج نجاة وين مصرفي ما تسمعين انطرشتي

امي اجت وبعيونها عتب وكالت // هذا ع الكاونتر

اخذته وسط ذهول منار الي طول ما احنه بالطريق هي ما تحجي وياي مو نفس يوميه

احاجيها وكوه ترد عليه وحتى من كعدنا بنفس الرحله هيه ما تحجي وياي بالفرصه سالتها

= شبيج منار ليش ما تحجيين وياي

• الصدوك اتعجبت منج وجدان

= لويش شسويتلج اني

• شلون هيج تحچين ويه امج وتسميها بااسمها وتگوليلها وج متعرفين هذا الشي ما يصير

ابتسمت = بس امي قابله واحنه كولياتنا هالشكل دا نسميها

هزت راسها // لا لا وجدان ميصير حرام

ابتسمت = لعد لو تشوفين اخواني حتى ايسبوها

فتحت عيونها متفاجئه وسالتني //. وانتي وجدان

=. اني شنو

انتي اتسبيها الخاله

هزيت راسي (نعم )

ورجعنا للبيت ومنار ساكته متحچي وياي ثاني يوم داومنا وكانت ثاني حصه اسلاميه واجتنا المعلمه وصارت اتقرينه

بالايه الموجوده بالكتاب

وبعدها صارت تسولف النه عن قدرة الله في خلقه وكيف الله سبحانه وتعالى خلق الكون والسماوات والارض وقادر على

كل شي

منار رفعت ايدها وسالت المعلمه

• ست الله يقبل اذا زمخنا على امهاتنا او نسميهن باسمهن او نتلفظ عليهن كلام مو زين

المعلمه استغربت من سوال منار الي ردت عليها // امس واني راجعه من المدرسه شفت مره لازمه بايدها

ولد ازغر مني وياها بنتها بگدي سمعتهم دا يسبون ابامهم لهيج سالتج

بدت المعلمه تشرح دور الام وشلون تتعب بتربيتنا من اول ما تحملنه الى ان نكبر مستشهده بالايه الكريمه

(وحملته وهنا على وهن وفصاله في عامين ) وصارت تبين النه

عقاب رب العالمين بعاق الوالدين خصوصا الام وشنو الله راح يسوي بينه اذا كلنه كلمة اف

وصارت تصور النه الجنه والنار وتنطينه قصص على عقوق الوالدين وانو احنه بيوم من الايام هماتين نصير امهات

وراح نشوف مقدار التعب وشگد هنتحمل من اجل ان نربي ابناءنا

وگالت كلمه دائما استذكرها // اتصورو انو احنه هسه نموت ونروح للقبر وحيدين بس عملنه واهم اعمالنه

برنا بوالدينه خصوصا امهاتنه

اذا احنه عاقين ب امنه ومتعبيها شلون راح يكون عذاب الله النه

بهاي اللحظه حسيت برجفه وخوف بگلبي واجت صورة امي ابالي وكيف ابوي ايعاملها واحنه شلون نسمع كلامه

ونتجاوز عليها

وصارت المعلمه تسمع الكلام من بعض الطالبات منهن وحده راسا من وگفت بچت وكالت

• ست اني يتيمه ما عندي ام وابويه. هو الي داير باله علينه اتمنى ترجع امي راحت المعلمه حضنتها وكالت الها

• ان شاالله امج بالجنه وما تريد تشوف دموعج لا لازم تنجحين بحياتج حتى امج تفرح ودائما اقريلها سورة الفاتحه

حتى هي ترضى عنج والله سبحانه وتعالى هم يرضى عنج ويوفقج

والثانيه كالت // ست اني امي مطلقه وابويه متزوج ومرت ابويه كلش ماذيتني

وثالثه گالت // ست امي وابويه موجودين بس دائما همه يتعاركون بس بعدين يتصالحون ودايرين بالهم علينه

بعدين المعلمه گالت كلمه ( بنات الام نعمه حافظو عليها واحمدو الله انو عدنا امهات يحبونه ويلبونه احتياجاتنا )

والي امها ما موجوده خلي دائما تعتبرها مسافره وتريد من ترجع تلكانه احسن ناس حتى تفرح وتفتخر بينه

بنات لا تصدكون انو اكو ام تكره جهالها والدليل شكد اكو امهات متعذبات لكن صابرات ومن يسالوهن ليش ما تعوفي الزوجج ليش ما تتطلگين هي ترد باقيه الخاطير جهالي بعد مثل هالشكل امهات نجازيهن باان ما نسمع كلامهن او نعصيهن

الدوام كله وانا استذكر كلام المعلمه صدكوني احتقرت نفسي على زغر سني وبيومها من رجعت اصلا ما اتغديت

ورحت نمت وانا يتهيالي الموت والقبر وعذاب الله بيومها اتذكرت شكد هي تحبنا وعرفت انو امي بقت ويه ابويه

الخاطيرنه

خفت واتندمت وقررت بعد ما احجي على امي ولا انفذ طلبات ابوي اذا طلب مني ان اشتمها حتى لو يضربني اتحمل

وقررت اصلي واتحجب

والعصر من كعدت شفتها بالمطبخ ما حاچيتها من خجلي وكفت هي باوعتلي وابتسمت

ها حبيبتي گعدتي

هزيت راسي هي سالتني اخليلج غدا

جاوبتها =. لا بس اريد ( ودنگت )

لزمتني من اكتافي وبنفس ابتسامتها // حبيبتي شرايده گولي شبيج ماما يروحي

انملت عيوني دموعي واني اسمع هدوئها ورقتها = ماما اريد اتحجب

هي ابتسمت باستغراب // تتحجبين

هزيت راسي = اي اريد اتحجب

حضنتني وكالت //. اي عفيه ببنيتي الله يرضى عليج

   حضنتني وبوستني من سمعت دعائها اهتز كل كياني يعني امي ما ضايجه مني ودعت الله يرضى عليه حضنتها وسط ذهولها

  وبيومها رحت اتوضييت وصليت وقريت قرآن وثاني يوم من رحت للدوام رحت محجبه وسط ذهول منار

ومن اجه ابوي وشافني اصلي هو من بحده ما صار يطلب مني الاشياء والكلام الي اگوله عن امي

وصرت من يجي ابقى بغرفتي بحجة الدراسه ومن يجي سكران اسوي روحي نايمه

حتى اخواني صارو اكثر هدوء

وبقينه هالشكل عايشين كلمن ابحده ومن يجي ابوي نحاول نتحاشا واي شي يگول علي نسوي بدون مناقشه

واخواني كبرو واشوف ابوي من يجي مرات يحاسبهم وتوصل ويا حد الضرب ودائما يگول

طلعتولي على ناظم السگط

1

ما اتذكر شفت ابوي وامي متصافيين او بيوم گاعدين ويسولفون ويضحكون وحتى لو صار هذا الشي فاابوي بسرعه

يگلبها الى عياط وفشاير ومسبه

رغم امي انسانه نظيفه للغايه ومرتبه وام بيت وقبل ما يجي ابوي اشوفها شلون تهتم بنفسها وتحضر كل الطبخات

الي يحبها لكن ما اعرف الكره شنو سببه الي ايكنه ابوي الامي الي اشوفها يوم بعد يوم وهي متغيره وتعبانه

مره ضربها بقساوه بحيث غابت عن الوعي وحركها عباله ماتت عافها وطلع

صرت ابجي عليها واحجي وياها = ماما اگعدي حبابه اكعدي الخاطري

واجه هشام وشاف امي واكعه وخشمها ينزف واني صرت اعيط واحچي

=. ليش هالشكل تخلي يضربها ليش ما توكف بوجهه لك هاي امنه

بقى ساكت حاچيته واني اضربه بصدره

=. تخاف هشام مو تخاف يضربك بس ما تخاف على امك الي جابتك وتعبت ما تخاف

عليها يضربها وتموت انت واحد جبان تخاف من ابوك ما تخاف من الله وعقابه

هشام صار يغسل بوجهها ويضرب على خدها ضربات بسيطه يحاول ايصحيها فتحت عيونها بعد ان اتنفست

حاجاها هشام بقهر // راح اخذج للمستشفى وهناك گولي هو ضربني وخلي نفضحه وشيريد يسوي خلي يسوي

المهم ينفضح

واخذها هشام واني رحت وياها لكن امي من سالوها گالت انو هيه داخت او وگعت من الدرج

وبيومها زعلنه عليها ولمناها وصارت تبچي وتگول

• ما اريد اخسركم انتو الي طلعت بيكم من الدنيا

 

خجلنه منها لان احنه ما نقل حقاره عن ابونه ومن يومها هشام اتبدل صار ايحن على امي وما يرفع صوته عليها

ولا يغلط ولا يسب لكن مرات من يصير عصبي يرجع الوضعه السابق بس بسرعه يتندم ويجي يتاسف منها

وبنفس اليوم ابويه رجع تالي ليل وهو حتى مشيته ما متزنه وصار يعتذر من امي وانو هو نفسه ما يعرف ليش

هالشكل سوا وياها وحتى صار يبچي وامي قبلت اعتذاره وثاني يوم ابوي رجع نفس عصبيته وتصرفاته الجنونيه

ومن داومت اني ومنار سولفت الها على الي صار وهيه مسولفه الامها الي اجت وصارت

تحچي على امي وعلى سلبيتها وسالتها // ليش ما تتطلگيين ؟

امي جاوبتها //ومن اتطلك وين اروح ؟

خاله ام احسان جاوبتها // روحي الاهلج نجاة

  دنكت وجاوبتها بحزن // همه وين اهلي

   • لعد عوفيهم واعتمدي على نفسج

امي وهيه تمسح دموعها جاوبت // انا من تزوجت سعدي طلكت الدنيا عبالي يخليني برنسيسه

تالي سعدي حتى اسمي نساني ايا هسه لو تطلعيني الهذا السوك الي يمنه اتيه ما اندل ارجع

ام احسان // روحي الاهلج العمامج الاخوتج خليهم ايوگفونه عد حده

امي ردت // تتصورين لو عدي اهل وظهر ممكن انسند عليهم بقيت عد هذا الظالم ؟

ام احسان //ابو احسان يگول سعدي خوش رجال اكيد اكو سبب لكل هذا الي انتي بي

امي تحسرت // المشكله انا نفسي ما اعرف السبب

ام احسان // تدرين نجاة شگد صار اعرفج بس ولا يوم سالتج على قصتج سولفي وفضفضي يمكن اساعدج

امي اتنفست بعمق // بشنو تساعديني خوله انا نفسي ما اعرف ليش هالشكل صار بيه

• بس نجاة ما معقوله انتي اهلج موجودين ولا مره شفت واحد منهم زارج ولا مر بيج يعني ما معقوله ما يجون

للزياره ما يشتاقون البتهم وانتي حامله كل هالمرار من رجلج وساكته وصابره لويش على مود ايش

امي // اهلي يجون البغداد العمتي هديه ام كريم ومرات اذا هو مو اهنا اروح اشوفهم

ام احسان //. بس لويش نجاة لويش هالشكل

امي عضت شفتها وهزت راسها وكالت // كل واحد وحظه وانا هذا حظي

ام احسان // بس خلي ابالج يمكن بيوم ما يسيطر على نفسه ويضربج ضربه يجوز ايشلج منو الج فهميني

وانتي تكولين حتى اولادج ما يحترمونج

هزت راسها // هو خلاهم ما يحترموني

ام احسان // بسبب سلبيتج نجاة واحد مثل هذا اعوفله البيت واذا على جهالج همه بعينهم شافو شيسوي بيج

تره حتى لو تعوفيهم لو هو ياخذهم ابد ما يعذرونه وراح يكونون بصفج

امي باوعت الها // يمكن لان عندج اهل يخافون عليج لكن انا ما عندي

• لاتحچيين هالشكل تره محد مگطوع من شجره شنو ماعندج اخوان اخوات ام عمام

• امي مريضه وعايشه بتقاعد ابوي واعرف هسه اخذو منها

• منو اخذه ؟

  • اكيد اخواني

• زين لعد ما دام اخوانج موجودين روحي اشكيلهم

• ياريتهم ما صارو ياريت امي بس جايبتهم ميتين ولا محسوبين علينه زلم

ام احسان // والله دادا اني من خوفي عليج نجاة اذا قبل انتي دا تتحملين الضرب والاهانه هسه انتي كبرتي وبعد

ما تكدرين والدليل امس من ضربج انتي فقدتي

امي باانكسار // يعني لو عندي اهل ينشد بيهم الظهر عبالج ابقى لا وداعتج بس شسوي كلمن وحظه

• زين ليش ما ترحين لعيالج

• تقصدين اهله

هزت راسها // اي اهله روحي واحچيلهم

• همه اهله بالاساس ما يردونه واساسا ابو مات وهوغاضب علي

• عمتج حموينج

• عمتي اذا اسلم عليها ما ترد عليه السلام وحمويني واحد متوفي واثنين ما يجونه بس واحد قبل فتره اجانه

ولو تشوفين من طلع سعدي ذب كل الحرگه بيه كسرني اتكسر

• لويش ؟

• ما ادري مع العلم هو الرجال مجرد اتغدا وكعد ويا ساعه وراح وبعدها انگلب علينه شيطان رجيم

• ادري نجاة ما گعدتي ويا ما سالتي شبي ما بي

• هو ما يگعد ويانه واصلا من يجي يخلصها عياط وغلط ويضربني وانوب يطلع يجي تالي ليل ...

•انتي تحبينه

امي ابتسمت ابتسامه باهته وهزت ايدها // انتي هم اتصدگيين بعد اكو حب

  ام احسان // انتي معجبتني نجاة اذا ما تحبينه واهله ما يردونه واكيد ما يردؤج وجهالج خلاهم ما يحترموج وابو مات

غاضب علي انتي شكو باقيه عنده

اتنفست // مضطره

•ليش

• گتلج لان ما عندي ظهر

• بس انتي الج حصه من ورث ابوج

امي هزت ايدها //• ياورث هذا خوله لويش اتهيجيين جروح هيه باالاساس ما طايبه

تستمر القصة أدناه

• ما اگول اله الله يساعدج

امي باوعت الخاله ام احسان //. خوله اعيدها عليج كل مره اذا يصير بيه شي من تلجأ الچ وجدان لا تسدين بابج بوجهها

ام احسان فتحت عيونها // انتي شتحجيين اسم الله عليج عمرج طويل الله يخليج الها انتي نجاة مو ضعيفه انتي جبل وهذا

الي تتحملينه كله بميزان حسناتج

•. انتي كلتيها كبرت وما اتحمل فهذوله ولد ما ينخاف عليهم بس هاي بنيه ضلع قاصر

- لا تحچيين هالشكل نجاة الله يهدي

بعد الي صار الامي ابوي شويه غير اسلوبه يعني ما صار يضربها ولا يسبها بس كان دائما عصبي وقبل ما يروح

للدوام يطلع يتسوك ويملي المجمده والثلاجه ويخلي عد امي مصرف الاحتياجات البيت

وينطينه الكل واحد مصرفه بايده

  وهذا الشي يسوي من زمان واستمرينه على هذا الوضع

  كان بابا يجي مجاز واحنه مثل كل مره نحاول نكون بعيدين عنه ومشت حياتنا تقريبا كل واحد ابحده وعدنا احلى شي

من ابوي يروح نتمنى يبقى بالدوام وما يجينه وهذا الشي نتمنا لكن ما نگوله البعض

اجه مجاز العصر سلمنه علي وهو كال الامي حضريلي الحمام

هزت راسها وراحت بسرعه ورجع باوع النه اريد انام تعبان ما اسمع نفس

  

الكل انسحب الغرفته بالليل كعد كنت اني جوه العب ويا علي بالغرفه الزغيره امي صبت العشا وحاجتني

روحي صيحي اخوانج

لان من يجي ابوي وانصب العشا والغدا لازم كلنه نتجمع وناكل ويا صعدت صحت هشام ورحت الغرفة رامي

  الي كان نايم ندهته فتح عيونه بتعب وحاچيته = رامي انزل اتعشى

هو باوعلي وگلي // روحي ما اشتهي

  = بس ابويه م...

  قاطعني بعصبيه // انعل ابوج لا ابو الخلفج روحي ما اريد زقنبوت

نزلت وشفت هشام گاعد ما ردت تصير مشكله لان اعرف ابويه راح يضربه الرامي ويخلي الصوج باامي

بابا سالني //. وين اخوج

جاوبتهم =دا يگول شبعان ما اشتهي

ابوي سال امي // شبي ابنج

هزت راسها // ما بي شي

جاوبها باستهزاء// متأكده خاتون

جاوبت =. بابا هو قبل شويه اكل

•. خاتونه بتج اتكول اكل وانتي اتگليلي ما بي شي ما ادري بيش ملتهيه برنسيسه نجاة بحيث ابنها ياكل

وما تدري بي ياالله اتسممو

اكلنه بعد هاي المقدمه وابوي راح غسل وامي تشاور بهشام // يووم اخوك ما عاجبني

- شبي ؟

• ما تشوفه من ابوك يروح للدوام يطلع من البيت وما يرجع اله نص الليل

سمعت ابوي ايگللها // وين الجاي

  فزت بسرعه صبته واخذته اله للغرفه ورجعت اتكله // يووم هشام اگعد ويا لا يسمع ابوك وما نعرف شنو يسوي

هشام // تره حقه رامي من يطلع لان مل من هذا السجن

امي بصوت ناصي // اسكت لا يسمعك ابوك شنو يووم انا مقصره اشو من ابوكم يروح ما اخلي بنفسكم شي المصرف

الي يخلي للبيت انطي الكم

فوك مصرفكم حتى تطلعون وتتونسون مو ذاك اليوم حتى ما رحت للطبيب لان انت احتاجيت فلوس

هشام // صحيح ماما واحنه ما ناكرين هذا الشي بس ابوي ما جاي يفهم انو احنه كبرنه باقي ابجبروته اواوامره الي ما تنتهي

- - مي خالف يووم ما راح نبقى هالشكل اكيد راح يتغير كل شي بيوم من الايام هسه هو هالوكت صار هادي شويه

هشام // وراويش صار هادئ وجاي نتستر منه

وفعلا مثل ما كالت امي لازم يتغير شي بيوم من الايام ومرات يتغير كل شي ونعيش بشكل ما متوقعينه

مرت الايام وابوي نفس ماهو عصبي والسان وصخ وما يتفاهم ومرات ايده والضرب وامي باقيه بسلبيتها

لكن صرنا اني وهشام قريبين منها اكثر ونجحنا

هشام راح للسادس

واني ثاني

ورامي نجح للخامس لكن بلدفعات امي راحت لاداره واتوسلت بيهم ينجحونه بدون ما يعرف ابويه

  من نجح هشام وابوي شاف درجاته سجله دورات صيفيه ونقله المدرسه ثانيه الها سمعتها ومدرسيها اكفاء

   اما رامي ف ابوي رزله وحتى لوى اذاناته عبالك طفل زغير وگله

   وانت حمار شد حيلك وانجح وكافي اتسخت ماكو ابطلك واشغلك حمال حتى الظهر ما اخليك تلفي ع البيت

صار هشام يداوم بالدورات وامي تحتار شتسويله اكل وعصائر وفواكه اما رامي فبمجرد ما بابا يرجع للدوام هو يطلع وما يلفي

للبيت اله بالليل وامي تحرك بااعصابها ومن يجي اتساله انت وين كنت يجاوبها بعصبيه

وين هنوب انتي بمكان هولاكو كنت ويه اصدقاىي

امي بس مو يوميه

ما يرد عليها يصعد ويروح الغرفته وما ينزل يتعشى ويروح يمه علاوي الي متعلق بي هواي

واجه بابا من الدوام كنه بشهر الثامن ونفس كل مره هشام يقرا ورامي بس يشوفه يبقى بالبيت ما يطلع

وكلنه نتحاشا وامي مثل الساعه تتحرك بدون كلل او ملل وهو بس يحجي ويقلد ويرزل اب امي الي ساكته

وما ترد علي

بقى ابوي اسبوع وبعدها التحق ولازم كلنه نكون واگفيين ونودعه وهو ينطينه مصرفنه

بيومها وزع مصروفنا ومن وصل الي حضني حييل وباسني //. بس ارجع اخذج البيت جدج تتعرفين عليهم

هزيت راسي وانا مبتسمه وهو باسني بخدي وحضني ومن وصل يم هشام كله

• هاك هذا مصروفك وراح اخلي يم امك فلوس يجوز تحتاج ملازم شغلات اطلبهن منها

هشام // تسلم بابا

• دير بالك ع البيت وعلى امك واختك

 

وانطى الرامي مصرف وهو يبتسم بوجهه // هاك هذني الك شنو تريد اشتري بيهن

وبعدها انطى الامي فلوس وگللها // ديري بالج على نفسج وعلى وجد حبيبة ابوها

وباس امي براسها كلنه استغربنه من تصرف ابويه الي كللها // تدرين راح اشتاق الكم

امي فتحت عيونها باستغراب لان هاي يمكن اول مره هالشكل يحچي وياها

• ابو هشام وين رايح كلها اسبوعين وترجع بالسلامه

• كولي ان شاالله

راح ابوي وصل للباب ورجع باسني وباس علي وهو ايوصي اب امي // ما اوصيج على وجدان وعلاوي

  لزمني من خدي // وانتي ياشيخه وجدان ديري بالج على نفسج ودروسج وعلى امج ومو تنسين صلاتج اصلا انتي

احسن من ابوج وهذوله الزمايل اخوانج تذكرين الله وتصلين

ابتسمت وبسته بخده وانا احس انو بعد ما راح اشوف ابوي

وراح ابوي المقرهم اب اطراف بغداد وهو تقريبا كل ما يروح يتصل بهشام لان امي الحد هاي اللحظه ما خاللها تلفون

وهاي اله اكثر من ست تيام من راح رامي يطلع وما يرجع اله نص الليل ومن امي تحجي ويا ايگللها

اريد اشم هوا مختنك

وهشام يجي من الدوره وامي اتكله على رامي يجاوبها //. شسويله ياماما اني عندي دورات اريد اطلع معدل

• اي بس احجي ويه اخوك والله من يدري ابوك ايموته

•. ان شاالله

•. وانت هشام هم قلل طلعاتك لاتنسى انت سادس وعدك دراسه

•. وين طالع ماما يم احسان وانتي توصيني على شغلات للبيت

خلي اگللكم شي ابوي من يلتحق كلنه نجر نفس وناخذ راحتنه يعني الاولاد يطلعون ويتاخرون بره واني مرتاحه ما

اسمع عياطه ومسبته الامي وضربها واكيد امي هماتين ترتاح وعلاوي يلعب طوبه بره ويه الجهال ويرجع

اني ويا نلعب بلي

بيومها هشام جاب صمون وامي سوت النه عشا بعدها گال الامي

• راح اصعد اقرا لان باچر عندي امتحان وهذا رامي من يجي انطيني خبر اريده

- ليش شكو

• ما كو شي رايده بشغله

- ان شاالله

 

صعد هشام يمكن ثلث ساعه ونزل هشام من فوك يركض امي سالته

• شكو هشام

  • ماكو شي

• هشام گلي

ما انتظرنه يحجي لان بلحظه السيارت العسكريه ملت الشارع امي صارت ترجف وهي تسال بهشام // هشام شكو

جاوبنه وهو يبچي // ابويه يوم ابويه

- - شبي

- - ابوي انقتل

الفصل الثاني من هنا