رواية جسر الذكريات الفصل العاشر بقلم مريم الحيالي
ولادة مصطفى(صافي) 1989/7/8
علية: اخذوني للمستشفى ... وجنت فد مرة على ولادة فوتوني للصالة وكالعادة طلوگة اصطناعية
يلا جبت..
اجاني ولد ثاني الحمدلله... تعبت حييل وكلت هاهيه بعد عالشفته وصعوبة جيابتي وحملي ... ما احمل بعد لو مادري شيصير
( هاي شنو ماما .. لعد واحنه منو جابنه 🤨)
طلعت للبيت واهلي يمي ميعوفوني .. وكريمة اختي مو بس اخت صديقتي وشريکة اسراري ... وبكلشي هي وياية بالصغيرة والجبيرة
مرت الاشهر وقررنه انسوي حفلة طهور المصطفى.. مصطفى حلوو وابيض ايخبل وشعرة ثخين .. ابراهيم بالاربعين وطهرنا لأن اتمرض وكلشي مسويتله ..
فگلت صافي اسويلة حفله ... حجيت وية دريد ...وقررنا الحفله اتكون بيتنا بالشقة
.. وكلها اجتي وخالي هو طهرة ... واستبرق ابن ام استبرق .. ضرب طلقاات
والله والحفله صارت اتخبل ... اخواني وخواتي ودريد واهله وجابولة مزيقة ... اتخبل صارت
هديل وصافي وابراهيم....
مرت السنين وكبروا الولد وكل سنه اني اسويلهم عيد ميلادهم سوية لأن فرق يوم هو واخو... فصار يوم 7/7 هو عيد ميلاد صافي وابراهيم...
والجوارين اتعرفت عليهم وكلهم احبهم وايحبوني ودجاجاتي كثرن ... ووزاتي صارت 5 وزات
والمنطقة كلها عرفتني وام استبرق 24 ساعه هي يمي ابد متعوفني ... وزوجها طلع يعرف ابو هديل صديقة من ايام شارع الرشيد
واهنا دخلنا سنه ال94 البلد حصار ومو زين العالم ميته جووع .. ابو هديل طلع تقاعد واشتغل محاسب بالعلوة الحمدلله شغل خير من الله... جانت هديل بالروضة ايجيب صناديك التفاح والبرتقال وايوديهن للمديرة اتوزعهن للطلاب الوياها وايوصي المديرة ايكلها لتكولين الهديل ابوج جابه ماريدها تتكبر عالطلاب اتكلهم بابا جابهن... وابو الشقة ابو علي ايكله ابيعلك الشقه وانطيني اقساط... بس دريد قافل ميقبل والسبب........
علية: يعني هاي فرصة دريد ليش نبقى بالايجار دخذها وسدد على كيفك
دريد: ما اخذ شي دين علية يوم عندي ويوم ماكو منين ادفع ليش اخلي نفسي بهيج موقف
علية: الحمدلله احسن من غيرنا دريد دخذها شبيك مدام الله هادي علينه لابو علي وهو كلك انطيكياها
دريد: ملك ما اشتري ابد ... سدي هذا الموضوع
علية: اييي غير اعرف ليش .. شنو نبقى عمرنا كله بالايجار
دريد: الله كريم ... ابد ماشتري ملك .. لأن بالمستقبل الورث ايسوي مشاكل وايفرق العائلة ما اريد يتفرقون ولدج من ورى فلوس
علية: صدك تحجي شنو هالتفكير هذا ليش اسم الله يتفرقون ... هي شقه مشاكليش الي اتصير عليها
دريد: سدي الموضوع علية ...
علية: عفته لأن صار اكثر من مرة احجي ويا وماكو فايدة.. مخلي بباله هاي السالفه على انو الورث ايفرق العائلة ... ومقهورة لأن الفرصة متتعوض
.... اليوم اجتني امي واختي بيداء يمي ... دريد ايحبها ويحترمها ويدري بيها وبمرضها ... من يرجع من العلوة محمل المسواك والفواكة ايطب للغرفة ايخليهن يمها ...
ايكلها يلا عمه عزليلج منهن حتى عليه تغسلهن الج واتضمهن على صفحه
يدري بيها تتنگس من كلشي ... يعني بس اتشك بنفسها لو تلزم شي گبل لازم اتطب تسبح .. ومن اتخلص اتصيحني وافتحلها باب الحمام متلزم اليدة مالته
ونعالها (تكرمون) اتخلي شويه بعيد عن فراشها
ويا ويل الجهال اذا واحد منهم لزمة لو داس عليه
اتضل تحجي واتكلي يمه شيلي.. شطفي نعالي
امي صارلها سنين على هذا مرضها والوهواس ايزيد مينقص ومتستنظف بس يمي ويم خواتي .. تعزللها فواكه الها اخذهن اغسلهن واخليهن بسله وحدها بالثلاجة الها ... ومرات اتكوم هي اتسوي الغدة بيدها اني بس اصب
كاعدين نتغدة ... وجان امي اتكول ...
حجية سهام: علية شنو الابنيه اتضل وحدها دسويلج بعد وياها يمه بلكت تطلع ابنيه حتى اتكعدين بعد
علية: يوم تحجين صدك عوفي هالسالفه مو كدامج اني اوصل الموت من اجيب ابد كافي بعد
دريد: اي والله عمه اني هم ببالي ... قنعيها
علية: خوب انت اتكيف ... ابد لحد ايجيبلي سيرة الحمل هذول ٣ والحمدلله والشكر كافي
حجية سهام: هو شنية انتي كافي الابنية خطية تبقى وحدها ... جيبيلها اخت
علية: وما اجتي ابنيه شلون .. هم احمل بعد
يوم اتغدي هسه والله كريم عود عوفوا هاي السالفه
امي فتحت عليه باب مو خوش .. وكريمة هم اتلح
وأهله هم كلها على هالموضوع هذا سوي اخت الهديل ... ليش تبقى وحدها
والله واقتنعت وصارت السالفه صدك ... وحللت ورى فترة وطلعت حامل...
علية: عيني دريد حامل ... يلا اكيد مرتاح ومكيف مووو صار التريدوا ... صدك ضايجة لأن اتعذب هواي بالجيابة ميحسون بيه ابد
دريد: مكيف ويضحك... الف مبروك الحمدلله نعمه هاي
علية: كلت الامي وفرحوا عبالك ماعندي خلفه... جوارينه ام حسام يمي وهم حامل .. سبحان الله سوة .... ام حسام وام استبرق حييل قريبات علية ويمي كاعدات على طول عبالك اهل جورة نقية وحلوة لا قال و لا قلت ولا ابد ناكل ونشرب سوة
مرت الاشهر ... وهالمرة مجبت لا طبيعي ولا حتى طلوگة اصطناعيه ... حولوني عملية ... هذا الي جنت اكول عليه ورفضت اجيب طفل بعد لأن اني ادري بنفسي صحتي مو زينه حولتني الدكتورة عمليه
كالت ماعندج ولادة متجيبين ومو زين الاصطناعي ضغط حمل عندج ... جبت عملية والله وجان تجيني ابنيه ... سماها دريد
هاجر... 1995/8/5
مدبدبة وسمينه جبتها عكس اختها واخوانها وسمرة جنها هندية تشبه دريد ... سبحان الله
والله وامي ابتلت بيه خطيه يمي واتساعدني بيها عملية تعبتني ومكدرت اكوم ... الحمدلله زينة صحتها .. وكلت هاهيه التوبة هاي اجتي اخت الهديل كافي بعد على هالضيم الشفته
.... مرت الايام ...وكبرت هاجر ويم امي اتداري بيها ويايه وام حسام جابت ولد ومن تنزل يمي اترضع هاجر ويه ابنها كالت الا اخليهم ايصيرون اخوة بالرضاعه .... والله وصدك هواي رضعتها كل ما تنزل يمي اذا اني ملتهيه لو عندي شي وهاجر تبجي
ام حسام اتشيلها واترضعها
... امي كل فترة اتروح الاختي سميرة بديالى...واحنه هم ويه دريد هواي رايحين حمويني الكبار اتزوجوا بقه عمران گلي عليه شوفيلي مرة ... والله وصار فترة ادورلة
امي كالت رايحه لأختج تجين ... كلت الدريد وگلي روحي اخذت جهالي ورحنه والله واهناك سميرة گلتلي ....
سميرة: ولج بنات حماية خوش بنات وحبابات ليش متشوفيلج وحدة منهن العمران
علية: هااا وينطون ايقبلون ..شو همه الا ولد عمهن
سميرة: لا قاسم ايحب دريد معليج العصر انروحلهم وشوفيهن ... والتعجبج كوليلي عليها شكو بيها وهنه فقيرات ونادرات
علية: اي شكو بيها وعمران هم حباب والله يشتغل خياط .. ووصاني من شوكت گلي دوريلي ... بلكت جيتنه سبب وهيج وصدك ايقبلون
احنه نحجي وجان يحجي قاسم زوج سميرة گلي...
ابو قادر: ام هديل سمعت اتدورين على مرة العمران صح هالكلام
علية: اي والله ابو قادر خطيه مو صغير هو وانت تعرف اخوان دريد كلهم فقرة ... وهالكاعدة ادور
ابو قادر: ليش متاخذين وحدة من بنات ولي والله نادرات وحبابات وينطي ..ولي ايحب دريد معليج واني هم احجي ويا
علية: والله واتشرف هسه سميرة هم كلتلي انروح ان شاء الله العصر واشوفهن وايصير خير... والله والعصر رحنالهم واجني ناعمات البنات بس زينات حلوات وفقيرات ... عجبتني سعدية الصغيرة
علية: سميرة شنو رأيج بسعدية حبابه مبينه ...
وحلوة
سميرة: اي هاي الها حلك ياكل وميحجي.. والله وزين مختاريتي من نرجع نحجي ويه ابو قادر وايصير خير
علية: رجعنه وكلناله لابو قادر وكيف والله .. وامي هم قبلت كالت اي بنات ولي حبابات ..كلتلهم خلي ارجع واكول الدريد والعمران وايصير خير
بقينه ٥ ايام ورجعت ... كاعدين بليل اكشرلهم برتقال وحجيت ... اكلك دريد لكيت مرة العمران
دريد: هااا ياالله منين هاي
علية: بنت ولي اخو ابو قادر سعدية ..من رحت شفتها حبابه وصغيرة وحلوة خوش ابنيه... شتكول عمران تقبل اخذلك مناك لو لا ؟
دريد: اي ليش لعد ميقبل والنعم من بيت ابو قادر واخوانه .. والله وخوش نسب
عمران: دوكف دريد خلي انشوفها ... نحجي وياها هيج گبل
دريد: اي من انروح ونحجي شوفها .. متلگه مثلهم وهمه مينطون غربة الا ولد عم علمود ايعرفونه قابلين .. مو تدري بيهم
علية: فد يوم عندك فراغ وانروح صبحيه البيت سميرة ودريد ويانه ونحجي ويه ابو قادر وشوفها
.... والله ورحنه الديالى وحجه وياهم دريد ورحنه البيت الابنيه وشافها عمران وقبل ... مكال شي وهمه حاجي وياهم ابو قادر وممعترضين ... كايلين مدام لابو هديل منحجي كبعوا واخذوا
...والله وحددو موعد للعرس وخالاته ودريد ساعدو بفلوس العرس ولموله... دريد معافهم ابد لاخوانه من صغار والي هسه ايريدهم بس يستقرون وايكعدون.. وراح يتزوج يمنه بالشقه حضرتله الغرفة.... وندفتله فراش رحت جبت النداف للبيت ندفهن كلهن وسويتله لحفان ... وخيطتهن وفرشت غرفته كلها ...
والحمدلله اتزوج عمران وصدك سعدية حبابه وفقيرة ماشفت منها اذية ويايه ويايه مينسمعلها صوت ... حملت اول اشهر من زواجها ووكع خطيه ...
....ورى فترة عمران لگاله شغل بمعمل بديالى واجه حجه ويه دريد وكله راح اروح اهناك اشتغل واكعد ... وقبل دريد كله اذا ترتاح وايفيدك رووح... ميعترض على شي الهم
عمران : دريد تتذكر من رجعت متأخر بليل ورزلتني
دريد: هاي شنو شذكرك بيها صارلها كووومة
عمران: ضحكت بصوت وكتله .... مو غير اتزوجت وكبرت وانت هم بعدك اذا نتأخر متقبل واتضل تحجي .... سعدية مرة رجعت بليل ورى ال١ ولكيت دريد ايروح ويرجع بالممر ينتظرني خطيه ومن شافني رزلني ذيج الرزالة التعجبج
علية: جان يشتغل خياط للبدلات مال الرفاق .. وجاي عليه المسؤل مال الامن مال السيدية وهو عمران ...كايلة اني ماعرفك وانت منو وضايج من عندة
بس بعدين عازمة على جاي ...وموصي الاستخبارات الليليه محد ايوكفه اذا يتأخر
دريد: وهو ماشاء الله من اول يوم انطوا الاذن اتأخر
عمران: دريد ايكلي ...ولك دماغ سز بيش الساعة هسه اذا اركعك عجل احد ايكلي ليش....
علية: ايسولف ويضحك ودريد يادوب يبتسم هو هيج من يومة ميضحك هواي ابد... ثكيل كلش
مرت الايام وشال عمران ... وغصون يمي وهم انخطبت ...عن طريق وحدة وياها بوظيفتها ...ودريد قبل وانطاها مبقى شي على زواجها
مرت الايام واتزوجت غصون وطلعت حامل واجتي گلتلي وفرحانه بيها الحمدلله... بس الي خرب هالفرحه هاي من اني طلعت حامل
...يبوووووووووو
علية: ما ابقي هذا الحمل ما ابقيييييييي.... ماخذة حذري اني شلووووون صار شلوووووون ... صرت اعصاب
دريد: اتخبلتي انتي شبيج ... استغفري ربج يا مرة
غيرج يتحسرون
علية: دريد لتخبلني انت المفروض اتخاف علية صدك تحجي مو تدري بحملي وولادتي شلون صعبه ... كمت ابجي انقهرت وحلفت ما ابقي لازم انزل الطفل
حجية سهام: وروح حسين يا علية اذا نزلتي ... لا اعرفج ولا ادخل بيتج بعد
دريد: اي مو هي بكيفها اتذبة ... شحدها
علية: همه يحجون واني صايرة اعصاب ... رحت للدكتورة وكلتلها ماريدة اريد اذبة ... شو هاي الثانية هم اتخبلت وحرام ومو زين عليج والطفل داخل بشهر الثالث ووين جنتي ... ومن هالحجي طلعت مقهورة ماريد هذا الطفل شلون بيه وهاجر بعدها عمرها اشهر مو جبيرة ....
..... ودريد زعلان عليه ... فوكاها انوب ... وامي رجعت لكيتها رايحه مموجودة ... يعني هم زعلانه
شسوي بالنهاية قررت ابقي ... هاي عطية رب العالمين واله بيها حكمه وارادة شسوي
(اكتب وميته قهر ليش هيج ماما ... متريديني)
مرت الاشهر ووصلت شهر الثامن واني وغصون واختي حسنه ومرت اخويه حسن ومرت اخويه كريم كلنه بنفس الشهر وكلنه مابيناتنا غير ايام....
علية: اكلج يوم شخبار حسن شو صار فترة مجايين هم مخابرتهم
حجية سهام: والله يا يمه گلبي نار علية كاعد بتلفات الدنيا.. وهالكول للولد خابرتوا سألتوا عليه ايكولون منحصله
علية: ذيج المرة من اجوي جان عبالك مريض بس ميحجي ... وسألتها العتماد اتكول يتعب بالدوام وهو عندة ضغط ضل بالي عليه
.... كعدت وية دريد يطلع الفجر للعلوة ... وراه ما ارجع انام بعد اضل كاعدة.. كمت اريد اطلع للدجاجات واندكت الباب ... يااا يا ستار منو جاينه ب٦ الصبح فتحته ... بس ياريتني مفتحتها خبر مفجع ومو متوقع صدمة
حاتم: صباح الخير عمه .. شلونج
علية: هلا بيك عمه .. ها ولك احجي وجهك ميبشر بخير ... شنو جدك بي شي
حاتم: عمه خابرو علينه خالي حسن .. انطاج عمرة
علية: يبوووووووووووووووووووووو
....................هديل
امي حامل اهنا باشهرها الاخيرة ... وخالي مابي شي يعني الخبر صدمة ... امي اخذت الولد وراحت وكلتلي روحي لابوج كليله
طلعت اني وحاتم ابن خالي رحت للعلوة لابوية من شافني استغرب ... وخاف
دريد: هديل بابا شجابج شكو صاير شي
هديل: بابا خالو حسن مات ... ابويه انصدم وفتح عيونه بصدمة ... لأن يعني ممتوقعين ... اجه ابوية ويانه وطلعنه للشهداء البيت جدي
لكينه خوالي رايحين ايجيبوا... لان خالي كاعد بالاسكندرية لأن هو ايداوم بالتصنيع العسكري ودوامه بين الحله وكربلاء وصاعد عندة الضغط... وانفجار بالدماغ صاير عندة ومتوفي هيج على غفله ... زوجته اتكول صارله ٣ ايام تعبان
جابوا خالي للبيت ... وبيبي لحد الان هي تلطم وتبجي على خالي حسين امي اتكول شهيد .. ودائما تاخذ امي لو وحدة من خالاتي واتروح للنجف عليه
انوب هسه خالي حسن وبعدة صغير وزوجته حامل... وكلشي مابي على غفلة ايخابرون ايكولون مات
هي شافت التابوت ودك ولطم هي وخالاتي وامي.... بيبي طلعت حافية بالشارع واتكطع بشعرها واتصيح
ياحسن يا يمممممممه
ياحسين يايمممممممه
ولطم وخالتي سميرة شكت دشداشتها منظر مينسي قهر كلش قهر ... راح ابويه وياهم .. وابويه هو الفات للمغيسل وغسله ايحب خالي ايحب خوالي كلهم وهمه ايحبوا.... غسله وراحوا دفنوا يم خالي حسين
ورجعوا من النجف حالتهم حاله ... فاتوا ايعيطن وايلطمن بيبي تكسر الگلب فقدت اتكطع بشعرها...
بس الصدمة خالتي كريمة ماكوو.. لان خالتي طلعوا من بغداد وراحوا سكنوا بكركوك... وماعرف اذا كالولها لو لا لأن مخبوصين ومحد انتبه انو هي مموجودة .... رحت الامي وكلتلها
هديل: ماما خالتي كريمة ماكو ... تدري لو لا هم احد خابرها
علية: اي ولج ناسيتها اني .. امشي روحي لابوج بلا خلي ايخابر عليهم
هديل: رحت كتله لابويه .. وكلي خابرت ابراهيم زوجها وكتله من اول يوم بس مادري ليش ما اجوي ... طبعاً العشيرة مال امي كلها اجتي اول مرة اشوف هيج فاتحه انکلبت الدنيا كلها مقهورة على خالي... اليوم الثالث مال الفاتحه وابن عمه محمود هو الي راح يقراله لأن هو مداح ويقرأ ذكر ... للظهر ونسمع العياط بالشارع ...
فات خالي جاسم وولد خالي شايلين خالتي كريمة بطرك الدشداشة والشال متخربطة ... انصدمنة وانخبصنا بيها ... خالي كال عيطت بنص الشارع ووكعت
بالگوة يلا كعدت ومن گعدت ... دك ولطم وعياط وبجي وليش متگولولي. ... لج يووووم ادفنوه ومااشوفه
اويلي عليييييك يا ابو هدى يا خوييييه ... وبجي تبجي خالتي صوتها حنين كلش حنين من اتنعي عبالك ملا
ضلت اتنعي وتبجي ... واتكول يا ابو هدى يا خوية
وبيبي حالها مينوصف بالحجي ابد اتخبلت على خوالي كلش خطيه ...
علية: كريمة ليش ما اجيتي دريد كال من اول يوم مخابر على ابراهيم وكايلة
خالتي اتسولف ... كالت ابراهيم زوجها جايها كايللها خلي انروح البغداد... ومقابله كايلتله شعندي شصاير ... خلي اتقرب ولادة علية واروح حتى ابقى يمها... اتكول هو ايلح كومي ام راوية خلي انروح البغداد متريدين اتشوفين اهلج
هي شاكة بالموضوع مخابرة على جوارينه ممجاوبة .. راجعه مخابرة على اهل اعتماد زوجة خالو حسن ... كايلتلهم ادك على اهلي ماكو اعتماد حسن وينهم .. اتكول همه كالولي غير بفاتحه اخوج حسن شنو وينهم ... وهي متخبله طالعه تركض بالشارع بطرك الدشداشة والشال صاعدة تكسي من كركوك البغداد گبل ... وعمو ابراهيم يركض وراها حتى ممنتظرته
ومن واصله شايفة الجادر وشاكة ثوبها بالشارع ... ومتخربطة واجوي فوتوها ... واتگابلت هي وبيبي نعي وبجي ولطم ... خالي حسن وفاته صدمة ... والجوارين كلها تبجي عليه
اجه يوم السبعة وبعدها الدنيا مگلوبة امي تعبت لأن حامل بشهرها تقريباً... للعصر وصار ولادة عند خالتي حسنه ومرت خالو كريم ... خالتي جابت عمر ... ومرت خالي جابت طه ...
خلصت الفاتحه والحزن مخيم على بيتنا ... وبيت جدي بيبي منتهيه ومن مات خالي حسن اتأذت بعد اكثر وتگعد تبجي واتنعي .... يايمة ياحسين... ويا يمة يا حسن ..
واجتي كعدت يمنه مرجعت بعد امي اتداريها اتمرضت لأن .... ومنا امي حامل هم تعبانه ومقهورة على خالي
طلعت الاربعين مال خالي .. وامي اتحددت عمليتها راحت للمستشفى ووياها خالتي كريمة لأن مرجعت الكركوك بقت يمنا ... وجابت امي اجتنا اخت ثانيه وهاجر جانت بعدها صغيرة وخالتي بيداء حايرة بيها
اجتي مريم للدنيا.... 1996/10/10(كاتبتكم الوردة)
امي جابت عملية ومو سهله جانت وللأسف صار عندها فتق من ولدت مريم .... وراها ب١٢ يوم عمتي غصون جابت شهد... وراها ب١٠ ايام مرت خالي حسن جابت دنيا ... تقهر جابت وخالي حتى ملحك ايشوف بنته ... بس لا اعتراض على كتبة رب العالمين
امي بقت حايرة بمريم ناعمه ... وهاجر بقت يم خالتي بيداء وام حسام جوارينه اترضعها ... بيبي على وضعها مريضه وكل اسبوع هي بالنجف واتروح اتبات مترجع تبقى يم قبور خوالي ......
بعد مرور وقت من الزمن
............ ماما شوكت انروح للعرس ... ديلا عاد خلي انبدل
علية: اصبري ليش مستعجله ... تعالي بدلي الخواتج علما اكمل ...
هديل: اليوم عرس قادر ابن خالتي سميرة .... مر على وفاة خالي حسن ٣ سنوات ... الحمدلله خالاتي زينات ... بس بيبي بعدها لابسة اسود وكل اسبوع هي بالنجف گوة قنعوها اليوم تحظر بالزفة مال قادر ...
قادر امي زوجته كل الفلوس عليها هي الي جهزته ... وسوتله العرس ..وحجزتلة بفندق السدير... والمصور علي جيكور... بوقتها جان معروف وغالي ...وايام حصار ... العالم اتعجبت على عرس قادر ابن خالتي
هذا قادر بعرسهم ... وامي الي حاظنها خالي جاسم.. ام القميص البنفسجي... امي اتموت على خالي جاسم
لأن هو الصغير...
.... رحنه للعرس جان حلوووو وزفة ومزيقة ... اول فرحة النا من بعد موت خالي ... لان خالتي ماما عيود انخطبت وبيبي مقبلت حتى ايهلهلون بخطوبتها ... علمود خالي... وسوينه الخطبة مالتها ببيتنا ...
واحنه كمنه انصيح الخالتي ماما عيود لأن اتأخرت يلا صار عندها اطفال فگمنة انصيحلها ماما عيود
مر ٦ اشهر وصار عرس خالي جاسم ... وامي وبيبي راحوا لصليخ البيت بيبي نبيها ... جان ابن خاله امي متزوج وبيبي نبيها كالت البيبيتي.. جنتي عندها خوات مو اتدورين الجاسم مرة ... خطبي وحدة منهن وحلوات
راحت امي وبيبي على اهل الابنيه لأن هم كرايبهم ... مادري شتصير منهم ... شافتهم وامي عجبتها ... ورجعت شوفوا صورتها الخالي وقبل ...
وصار العرس ... وجانت انتصار مرت قادر حامل ٦ اشهر بعرس خالي ... وصار حلووو بالحنه جابوا مطرب شعبي ودك ورگص ... ومحمود ابن خاله امي ايصير وابن عمها ... زوجتة خطبتني الابنها الجبير عمر ..هيج مجرد حجي.. هو جنه اني وعبير بنت خالي واسراء ... بس هي من شافتني يعني كالت اريد بنت علية
...... بس امي مقبلت ... كالتلها بعدها صغيرة.. خلص العرس مال خالي جان كلش حلووو ... وكل الگرايب حاضرة ... رجعنا للبيت
ومرت الأيام واجه العيد .. وكل عيد متعودين الجمعة مال العائلة يمنه ببيتنا ... اول يوم ابوية ايروح الصبح للمقبرة وحدة ايزور اهله... ويرجع
اجوي بيت عمو لؤي وعمو نضال وعمو نزار وعائلته ... وخالات ابوية وعمتي غصون كلهم اهل ابوية يلتمون يمنه اول يوم العيد ... وامي اتحير شتطبخ .. ايموتون على اكلها .. واني اساعدها
الدولمة ..وكبة جريش سلك... وكبة تمن تگلا.. وبرياني ودجاج تگلا ... وفاصولياء
والحلويات... درايفل ابو الجلي جان الا صيت .. وحلاوة شعرية .. حتى كيك اتسوي ... واكيد الكليجة .. صواني انلف وياها.. وابراهيم وصافي ياخذوها للفرن مال الصمون يشووها
وابويه وعمامي ايلعبون طاولي من بقلاوة
ودائماً عمو لؤي هو الي ايجيب البقلاوة ... وابويه وعمو نزار نفس صداقتهم واقوى ابد متغيروا
ونوگف كلنا حتى ابوية ينطينة عيديات ... وعمتي غصون ..كل عقلها اتريد من ابوية عيدية .. وابويه ايداهرها.... واحنه نضحك
غصون: دريد وروووح ابوية تنطيني عيدية .. يلا جيب
دريد: عيب كبرتي وعندج جهال ... وبعدج اتدورين عيدية
غصون: يااا دريد عود صدك متنطيني .. ازعل عليك والله
دريد: ماكو انطي بس البناتج .. انتي كبرتي ما الج عيديه بعد
... وعمتي كل عقلها تحجي ... وبالاخير ابوية يستسلم وينطيها عيديه ... وينطي للكل صغار وكبار
..واني اكوم اسويلهم كاكاو... ويبقون يحجون ويتذكرون ايام قبل ... ومرات ابويه وعمامي يحجون مصلاوي واحنه انضل نضحك ... ويتشاقون
للعصر ايروحون ... وتجيني صديقتي ميسم اتعايدني ... وثاني يوم انروح البيت جدي يم بيبي كلنا خالاتي وخوالي نلتم يمها
..... ابراهيم اخوية جاب طيور وقفص وخلاهن بالحديقة .. الفوكانه طابق ثالث جوارينه عندة بس بنات ... ابوية من البداية جان مقابل عالطيور
ابراهيم يومية ايطيرهن ...وهنه يوكفن عالبالكون مالته .. وجان تعلك واتصير مشكلة ونزل ابو سارة على ابوية يشتكي ... وابوية ضل يحجي على ابراهيم
.... وخلا ايبيع كل الطيور ... وامي مقبلت كلتله خيولي شنسويله بس ابوية كلها عيب وحقه وهو عندة بس بنات ومن هالحجي
كام يبجي ابراهيم لأن باع الطيور كلهن ... وامي انقهرت ابراهيم وضاج ... غير فد شي عندها امي كلش اتحب ابراهيم
مرت الاشهر صرنة بسنه ال٢٠٠١ ... ومرة كعدنة الصبح وجان يجينه خبر وفاة جدي ابو امي ....
جدي حنين وحباب وايحب امي بس خطية اتمرض صار بي سكر.. ورجلة صار بيها گنگري وبقت اسراء بنت خالتي وهيثم اخوها ايدارون بي لأن همه عايشين يمهم... بيت جدي جان لامنه كلنا ... وكل الاحفاد ايكبرون وايعيشون بي انحب بيبي كلش وهي هم اتحبنه .....
جانت امي مرات اذا تلتهي ومتروح .. ايجيبه خالي كريم بالسيارة بس مينزل ميگدر.. وامي تطلعله اتسلم عليه وتاخذله الركية والعنب وتنطي .. امي حنينه كلش على خوالي وحتى همه ايحبوها .. وايحبون ابوية
مات جدي ... ورحنه للفاتحه وابوية بوكتها مسواك الفاتحه كله صار عليه ... اتلث ايام الفاتحه واكف وياهم
.... مرت السنوات ووصلنا ال٢٠٠٣... اهنا اترك القلم الاختي مريم.....
