رواية جسر الذكريات الفصل الحادي عشر بقلم مريم الحيالي
للعلم لحد الأن احنه انكول الخالتي ماما عيود ... ابد منگول خالة... حتى اخواني
#جسر_الذكريات..........#بارت١١
رغم حلاوة الذكريات الآتية
الا انها حزينة... ودفعنا من الهم بها عمراً
...................................................
مريم: من مات جدي نفس الحزن والقهر صح هو جان مريض ... موته متوقع لأن تعبان ورجال جبير ... بس امي خالاتي خوالي انقهروا ...
مر 6 اشهر على وفاة جدي صادف شهر العاشر ...وبهذا الشهر هو عيد ميلادي امي بعدها لابسة اسود ... اهل ابويه عندهم الاسود حرام ميلبسون حتى ابوية ميقبل ... بس امي لبست
فأمي كلتلة الابوية عيد ميلاد مريم بقالة ايام انسوي؟؟
دريد: اي شكو بيها سوي ...
علية: بيناتنا انسوي ... مو حفلة وهيج شي ...
كامت امي سوت كيكه ... وتحضيرات.. وشربت رنا ...وامي راحت جابتلي كيكة جاهزة هم .... عمتي غصون ابد متفاركنة بالشهر ٣ مرات او اكثر هي يمنه شهد صارت صديقتي كلش بيناتنا اني وياها... 12 يوم
امي كالت العمتي ... وبيبي هي مقيمة يمنة على طول تجي... واجتي خالتي حسنه هم .... وامي لبستني بدلة سودة👇🏼( هاي صورتي بعيد الميلاد)
قبلت شسوي المهم عيد ميلاد .... صار عمري اهنا
6سنوات... اني واختي هاجر بيناتنا سنه مكضيها مكافش من الروس... بس بعدين عادي انضل نلعب
طفولة جميلة بمعنى الكلمة ... الحمدلله مدللين من قبل امي وابوية ... مرت الاشهر ... وصرت بالمدرسة اول سنه الي
الحمدلله شاطرة لأن اني مداومة روضة قبل ...بسرعة احفظ وانتبه ... الا هاااااجر مشيبة امي... متلفظ الاحرف وبالگوة تتهجه ... وامي اتصير اعصاب من وراها
وابن خالتي هيثم واخواني ناصبين عليها لأن متعرف اتكول اسمة ... يجينه خطار
هيثم: هلا بهجورة ... شلونج
هاجر: زينة ...هيسم انت شلونك
هيثم: يضحك من كل قلبة وايكلها.... شو بلا كولي هيثم
هاجر: هيسم ....
وصافي وابراهيم وهيثم خربانين ضحك عليها... ابويه قلبة طيب الى ابعد الحدود هيثم ابن خالتي سميرة بديالى كاعدين ... اجه البغداد قدم صناعة على عنوان السكن مالتنا وابويه قبل معارض
اتكعدنة امي الصبح... اتبدللنة وانروح للمدرسة
اثناء الدرس ... يندك باب الصف
المعلمة: اتفضل
حارس المدرسة: السلام عليكم ست اكو اهنا طالبة اسمها مريم دريد؟
المعلمة: اي عندي خير منو ايريدها ؟
حارس المدرسة: هاي لفات جابتهن امها الها والاختها
المعلمة: تعالي مريم اخذيهن
مريم: كمت اخذتهن ... لفتين الي ولفتين الهاجر... وشربت رنا والكصبه وياهن ... اللفات مال كبة تمن وحارات الله الريحه ملت الصف
امي يومية من انروح للمدرسة تجي اتجيبلنة اللفات تنطيهن للحارس مال المدرسة وهو ايجيبهن النا .. وبالفرصة من نطلع انطي لفات هاجر
بهاي الفترة ابوية كال الامي على فكرة....
دريد: علية شنو رأيج اذا ازرع واطور من شغلي ... صارلي سنين اني محاسب.. خلي ازرع وهم وارد يجي من الزرع زين
علية: اي شكو بيها بس كون تكدر وتنجح ... لان الزرع مو سهل ...والماعندة خبرة بيها حرامات يخسر
دريد: لا ان شاء الله ابدي بنوع واحد وشوية شوية ... الحد ميكبر الشغل
علية: بيها الخير... بلكت الله ايسهل
.... والله وابوية نفذ الفكرة ... وزرع طماطة .. بس للأسف الزرع خسر مو مثل مجان محسب ببالة ... بس ابوية ما آيس وكال اجرب مرة ثانية .. مو من اول مرة ايصير واني ماعندي خبرة
جرب وهالمرة زرع بتيته .... وجانت نهاية ال2002
الحد مكمل الزرع وطلع ... صار السقوط الغير متوقع
بليلة ويوم شنت الغارات علينا ... بسبب القصف
طلعتنا امي وختلتنا جوة الدرج ... خافت علينه من القصف
طلعتنا جوة الدرج مال العمارة... احنه وجوارينة بيت ام علاء ... العمارة انكلبت الكل خايف من صوت الغارات والقصف
عدت هاي الليله على خير .. بس الشغل وكف وبغداد شبه ساقطة... والمي والكهرباء انگطعن ... وللأسف مرة ثانية ابوية خسر الزرع مالته ... كعد من العلوة لأن منو يكدر يطلع وحرب
وابو الايجار ابو علي حباب خوش رجال .. بس ولدة كبروا وكاموا ايطالبون ابوية بالايجار ورادو زيادة..
كلها اللتمت على ابوية... جنه خير من الله ومنهتم وابوية شايل الكل على راسة... وللأسف خسارة ابوية هواي اثرت على وضعنا....
قررنة انروح لديالى... يم خالاتي اهناك على اساس ائمن وبعدهم ممحتلين كل المحافظات... ابوية ما اجه ويانه بعدين لحكنا.... حظرنه الغراض وامي لمت ملابسنة
واجانه قادر ابن خالتي العصر .. بسيارتة واخذنة ...والطرق اغلبها مسدودة بالگوة لگينه طريق
بس صار ويانة شي مو متوقع... بنص الطريق وعطلت سيارة قادر ...
علية: ها ولك قادر شو وكفت سيارتك
قادر: والله خالتي شو خنجرت اني ادري شبيها
..... ايشغل بيها متشتغل نزل خلالها مي ... وفتحها وماكو .. جان ايكول ...
قادر: يلا نزلن دفعن حتى اشغلها ... بس هو شنو بهذا الوضع وايحشش واينكت ويضحك .. ولا عبالك احنه بنص الطريق والدنيا راح اتضلم ... وحرب عالكة
نزلنا دفعنا ويا والله واشتغلت... الحد ما وصلنا ديالى بالشافعات ... بحيث وصلنا بليل كلش
خالاتي استقبلونا ... ورحنا كعدنا بيت خالتي ليلى...
عندهم... دجاج .... وكلاب وحلال وبرة هيج مزرعة كلها خضار اتخبل .... بليل نتجمع وانروح نلعب طوبة
...بقينا بديالى هواي ... بس نسمع بالاخبار بغداد حواسم.. وسقطت اخذوها الامريكان كلام انواع واشكال ... ابوية كال خلي نرجع لتنباگ شقتنا...
رجعنا البغداد فتنا واني وهاجر انباوع من الجامة مصدومين ... الشوارع مكسرة البنايات اغلبهن واكعات
انباوع من الجامه عالامريكان صاعدين عالدبابات ... وكلهم سوود وضخام ... وصلنا للشقه الحمدلله على حالها... بس امي وهديل نظفوها ... ورتبو الغراض
مرت الايام ورجعنا الحياتنا الطبيعية ... اتأقلمنا يعني هاهيه العراق صار بلد محتل .. للأسف الشديد انباوع على بلدنا اينهبوا وما باليد حيلة ... رجع ابوية الشغله ... ورجعنا المدارسنه ... وابراهيم افندي
يومية شكوى عليه.. يتعارك بالمدرسة ... وايدزون على امي... ياريت يتعارك ويه الطلاب ... لا يتعارك ويه الاستاذ مالته... وامي اتروح وتتعذر واتحل السالفة وترجع
..... صارت طائفية ... والسيدية كاتل ومكتول... ابن عم ابوية عمو هشام اخو عمو نزار... طلع السوريا مباشرة ورى السقوط ... دخلت الموبايلات للعراق بس ابوية اشترى موبايل ... 1100 بوقتها اشترى
وبقى على تواصل بيهم ... الحد ما قنعوا ابوية هو وعمو سرمد هم اخو عمو نزار ... المهم بقى على تواصل وياهم الحد مخلوا ببالة انو نطلع من العراق
وكالولة تعال سوريا بيها شغل... واكثر شغلهم بالخضرة وانت عندك خبرة ومن هالسوالف... الحد ما ابوية اقتنع واجه على امي ....
دريد: خابرت على هشام وسرمد واتفقت وياهم ...راح ايشوفولي شغل...وانصفي اهنا وانسافر
علية: دريد كل عقلك تحجي شنعرف اهناك ... شلون اتريدنا انبيع الاول والتالي وانروح
دريد: غير اكلج الولد اهناك وراح يلگولي شغل.. وحتى كالو انأجرلك شقة وانأثثها تجي بس تكعد
علية: وهيج بهاي السهولة ... ما اطلع دريد مو خوش خطوة شلون هيج انجازف
دريد: ماكو كل مجازفة الولد كبروا والطائفية عالكة ... من ايروحون للمدرسة الحد ميجون ايدي على قلبي ... لينخطفون... وخسرت شغلي ماعندي ادفع ايجار بعد خلي انروح سوريا ارخص
علية: انت مخطط ومتفق ... شحجي بعد
...... والله وصدك امي مكدرت اتغير قرار ابوية... وبدت امي اتبيع بالغراض ... وباعت كل حيواناتها هم ... وصفينا كلشي بس الفراش والهدوم كلشي مبقى
والتقاعد مال ابوية... ابوية سوى وكالة الخالي كريم... وكلة كل شهر استلمة ودزلنيا بالحوالة هو والحصة... بيبي تبجي واحنه مقهورين
نهاية سنه دراسية للأسف راحت علينا... وهديل جان عندها امتحانات اخر السنه وزاري سادس تجارة... واتوسلت بابوية بس تبقى تمتحن وما قبل كلها بعدين امتحني
نبجي متعودين جوارينا واصدقائنا وعيشتنا ... انولدنا واتربينا بالسيدية ... الجوارين كلها تبجي علينا ... ماعدى شكم منافق وايغار كيف على طلعتنا
ائجرلنا ابوية سيارة جمسي... رغم طريق الانبار وسوريا مو آمن ... بس ابوية بقى مصر على قراره
جانت خطوة صعبة ... لأن حياتنا كلها اتوقفت على هاي السفرة
واولها مستقبلنا دراستنا ...راحت سنه كاملة علينا ...مجرد امتحانات بس نمتحن انكمل ... ابوية مقبل ننتظر ...
لمينا الغراض اجتي السيارة ب٥ الفجر... اصدقاء صافي وابراهيم كلهم متجمعين بالساحة وجوارينا ... ديسلمون علينا.... ودموع وبجي كلنا وخصوصاً ابراهيم متعلم ...
..... اتحركت السيارة وودعنا العراااق
بالطريق وجان تلحكنة السلابة... اتشاهدنا على رواحتنا.. بس الله سخرلنا السايق مالتنا وجان خوش ولد كلش وشاطر... وكدر ايضيعهم ..وفات بطريق صحراوي يلا كدرنا نجتازهم... كلنا هاهية ذبحونا
وصلنا سوريا... المغرب اتخبل خضار وجبال ... عالم ثاني بس ... للأسف ملگينة نفس مجان ابوية متوقع
ولا مثل مگال عمو هشام ... رحنا لکينه لا مأجرين شقه ...ولا لاگين شغل الابوية
رحنا للسيدة زينب ... لگينا عمو هشام ينتظرنا... اجرنا فندق وكعدنا تعبانين الطريق طويل... امي انقهرت ومگدرت تحجي شتكول احنه عفنا الاول والتالي واجينا
....كعدنا بالفندق ...وثاني يوم اجونه بيت عمو هشام وعائلته وعمو سرمد وعائلته ... واندز غدة لو عشة من برة ونلتم كلنا ... رحنا الجرمانه اني وامي وابوية
حتى اندور على شقة اهناك بس السايق الي جابنه كال الابوية...
سايق الجمسي: غلط تگعد اهنا انت عندك بنات .. جرمانه مو مال عوائل
دريد: لازم الگالي سكن شلون لعد خوما اخلص فلوسي عالفنادق
سايق الجمسي: دور بالمناطق القريبة ... بس جرمانة متفيدك والله
.... اني جعت كتله الابوية ... اشترالي لحم بعجين بلحم الجمل ... بس فد طيبة وانوب حارة اكلت اثنين
طلعنا المنطقة جانت ريفية وزراعية ... بس امي مقبلت وكلتله تعبانه المنطقة ما اكعد اهنا.... رجعنا للفندق
ثالث يوم من جيتنا السوريا لگينا شقة مفروشة ..بمنطقة اسمها زملكا البلد.... حارات حلوة وهيج شي ... ابو الشقة عندة شقتين بهاي المنطقة وحدة احنه اخذناها ..... والثانية اخذوها بيت عمو هشام واجوي قريب علينا... لان جانوا كاعدين بمنطقة المزرعة بنص دمشق...
اجرنا وكعدنا ... بس تعبنا هواي.. ابوية مقبلوا ايشغلوا لأن بالنسبة الهم جبير... وبقى على امل بأن يلكا شغل
امي من جنه بالعراق هي اتخيط عندها مكينة .... فأشتغلت بمعمل مال خياطة هي وهاجر اختي
لأن فلوسنا راح تخلص اذا نبقى بدون شغل
جوانا جوارين سوريين بيت ام حسن اسمهم... كلش حبابين
ووكفوا ويانه هواي نسيبهم زوج بنتهم جان يشتغل
ايسوي يدات مال بوب حديد ... شغل صافي وابراهيم ويا ... وحتى مرات الشغل ايجيبوا للبيت احنه وامي هم انسوي وياهم وثاني يوم يأخذوا
....اتبهذلنا ابد مرتاحينا ... والولد ايونون ويبجون عالعراق ايخابروهم جماعتهم ابراهيم يگلب الدنيا ويبقى ايلح خلي نرجع...
بيبي اتخابر علينا وتبجي على امي... وامي هم تبجي...حتى خوالي سوو جواز الها حتى تجينا
لأن هي متعودة علينا وين تگدر بدون امي
يجون بيت عمو هشام مرات نطلع... رحنا الجبل قاسيون ... رحنا المنطقة المالكي
الحديقة تشريين .... حديقة العباسيين الحمدلله طلعنا ... بس رغم هذا ممرتاحين لأن دنصرف بالفلوس العدنا ... بقينا 4 اشهر
وتالي بليلة ويوم هم قررنا نرجع حتى مگلنا الاحد راح نرجع بسرعة بليل حجزنا ورجعنا...
وصلنا للعراف افييييش ياريحه بغداد
بس رجعنا مكسورين مخذولين خسرانين .. لا غراض لا شغل لا بيت ... طلعنا بوجهنا البيت جدي بحيث اتفاجئوا بجيتنا لأن احنه مكلنا الأحد راجعين
بيبي وخوالي فرحوا بينا واستقبلونا ... بيت جدي هذا بيت الحنيه ايلم الصغير والجبير ... كعدنا يمهم فترة طويلة خالي كريم جان طالع مأجر بيت يمهم
كعدنا بغرفتهم القديمة ... الحد ما خوالي لكولنا بيت يمهم مرجعنا للسيدية ابوية ميكدر على ايجاراتها غالية وهو ماعندة شغل...
خالي علي هو الي دفع ايجار بيتنا... وأسس البواري مال البيت كله ... واشترولنا الغراض الاساسية ...وخالاتي هم يمنا ويه امي معافوها
الحد ما ابوية خابر على جماعته القديمين الي ويا بالعلوة وكاللهم اريد ارجع ... وقبلوا.. ايحبون ابوية
وصارلة عمر هو وياهم ... رجع ابوية للعلوة الحمدلله احوالنا اتعدلت ورجعنا وكفنا على حيلنا
امي كامت اتسوي لبلبي الاخوية مصطفى ...وايبيع ويه حمادة ابن خالي عالشارع
.....واني دگيت رجل الا اتسويلي جدر وابيع ... عاندت وامي مقصرت سوتلي جدر لبلبي وكعدت بباب بيتنا ابيع
وهديل اتخبلت تحجي علية... واني لامة المنطقة يمي ابيعلهم لبلبي
بعدين رجعنا للمدرسة بس فايتتنا سنه بس اني وهاجر رجعنا .... هديل مرجعت....
الوضع مو زين نهاية ال2006 والطائفية عالگة ... وابراهيم ومصطفى معلگين بالسيدية يومية ايروحون على جماعتهم وابوية خطية يبقى واكفلهم عالشارع الحد ميجون ايخاف عليهم
مرت الايام وخلص رمضان... الي جان كله لمة وسوالف وضحك.... واهم شي بين ناسنا واهلنا
اجه العيد الصغير ...اجوي خالاتي يمنه وبيت عمتي ...وشعر شهد كوشة ثخين وعكش امي ابد متحب تكسر بخاطرها... بحيث ايد امي تتعب من اتشسورة الها بس اتسويلهيا .... اتكول حتى متنقهر
تگعد امي اتشسور شعر شهد... واني اتگصلي كذلة الي
طبعاً شعري بالگوة يلا طول كضيته كله ولادي من اني واصغيرة ..
...من ورى صافي وابراهيم ... لان يومية رايحين جايين للسيدية ... راحت امي ودورت على شقة اهناك... وكالت الابوية خلي نرجع
لأن ابوية رجع الشغله الحمدلله... والله وشلنا ورجعنا للسيدية .... بس للأسف ماكو شي يكمل ... اوول ما كعدنا ... مرتاحينا
.... والشي الفاجئنا ابوية عمره وحياته ميشتكي من مرض ابد ...حباية ميشرب كوة .... على غفلة وگع
رجلة توجعا يشكي منها ... ووجها اصفر اكله قل امي اتباوع عليه وميته قهر ...انوب الجثث والكتل بالشوارع وحضر تجوال ... وضع مأساوي بشكل
علية: شو دريد شنية شو باوعلي شبيك اتون هي فلاونزا شجاك هيج وكعتك ... مو انطيتك حبوب مهودت شوية
دريد: رجلية خشب واكفات موتتني من الوجع
علية: شنو سالفتك وين اوديك الشارع مسدود .. شلون بية ياالله
يومين بقى على هاي الوضعية ابوية تعبان .. فد مرة امي خابرت على عمي نضال وكلتله...
نضال: جيبي وتعالي علية اهنا احنه ناخذة.. منگدر انطب للسيدية
علية: شلون اجيبة ميخلون احد يطلع ولا احد ايطب... ودريد فد مرة حالته ...صار يومين انتهى فد مرة
.... جوارينا عندها سيارة كامت وطلعته من السيدية بس امي راحت ويا ... بالگوة يلا وصلوا للمستشفى
ومناك امي اخذته وراحت البيت عمي مرجعت ... بس احنه بالبيت بقينا والجوارين اتروح وتجي علينا
عمي نضال وعمو سرمد اخذوا ابوية للمستشفى مال الكندي... بنفس اليوم الي اخذوا راحوا لگوا صاير انفجار والدنيا مكلوبة بالجرحى والموتى.... مستقبلوا
كاموا عمامي رجعوا ابوية كالوا غير يوم ناخذة... بصعوبة ايروحون ويجون وضع بغداد مو زين من الانفجارات والكتل ...
....ابوية حالتة اتسوء .... السكر يصعد وينزل عندة ويدخل غيبوبة عبالهم نايم ... بس هو غيبوبة مؤقتة يدخل ويرجع يصحى ... اثاري اصلاً مشكل عندة سكر ومندري
.... وبنفس الوقت عمو نزار هم مريض ونايم بنفس المستشفى بالكندي ايراجع بي اخوه عمو قتيبه وبنته ... وما اللتقى بأبوية ابد لأن هو هم مريض
يوم 5/28 اتصلت عليهم هديل تسأل على ابوية وكالت الامي خلي احجي ويا ... بس الصدمة جانت
ابوية معرف هديل تحجي ويا وهو ميعرفها... كمنه نبجي ابوية شلون وصل الهاي الحاله خلال ايام بس وهو جان كلشي مابي ...
امي كلتلها باجر راح اجيبة واجي ... كامت هديل نظفت الشقة كلها ...وحظرتله فراش ... وحتى طبخ طبخت كالت خاف اللتهي وما الحك ...
.... بنفس هذا اليوم الصبح ابوية متخربط وماخذي للمستشفى... بس منتهي عمو سرمد خاله بحظنة بالسيارة وفاقد يحجون ويا ماكو...
وصلوا للمستشفى نزلوا ابوية ووكع ...دخلوا للمستشفى...طلعت كلياتة اثنينهم واكفات
والسكر صاعد ... وسكتة قلبية
يوم 29/5/2007
اتصلت امي علينا وشالته هديل
هديل: هلو يوم شنو انتظركم شو اتأخرتوا
علية: حضريلي المستمسكات مال ابوج كلهن
هديل: ليش شكو ...راح اتنيموا مستشفى
علية: مات ابوج هديل ماااات
