رواية نقش بارد الفصل العاشر بقلم فدك فاطمه
لا ولك
لا لا اعلـــة بختـــك
مانـــي سالوفـــة صرت بيـن الطوايف
ياحـــريمة
ياحريــــمة
.
.
غنوة
رجعت خطوة ليورة اباوعلهم بخوف لبدت بظهر غفران الي مخلية ايدهة على زند صفية تريد تسكتهة ماتسكت
حجت تباوعلي بحقد: ان جان تجذبوني عندي ليشهد القابلة علياء هي فحصتهة گالت حامل
گلبي احس نبضة صار ضعيف من الرعب عيون جدي علية و عمي عمار واكف بالباب مال الهول
توة داخل و مرتة تحجيلة الصاير بهمس حجيت اترجة غفران تدافعلي:فدوة سكتيهة والله مو حامل حبابة احجي اي شي
ردت تعض بيدهة:شگول هي خلت شي ما حجتة
تحركت لازمتهة تباوع لجدي: كافي ام حسين شجاج البت متزوجة و سالم مزوجها هو گال لعلوان
ردت تسكتهة:لا تجذبيني غفيرة علوان عبالة ميتة
و سالم گال ذبحتهة شني طلعت من گبرهة واجتنة
ب
س هي شردت من سالم و استحة يگل لعلوان تالي مات من الهم و تفكير
غنوة:كافيي صفية اني ماجنت حامل و كلشي صار غلط و سالم بنفسة زوجني
صفية: رجلج وينة اذا مزوجج لو رحتي هتي و لعبتي بذيلج و رجعتي رادة وياهة صفطة فلوس الله اعلم منيلهة باعت روحهة للمايستحون
توسعت عيوني وجهي صار نار من القهر عطت محترگ گلبي:لاتتهمينيييي سالم زوجني لدلهم
و العقد صار بحضورة و الفلوس بعت حلقتي حتى ارجع جان ماعندي و نطيتهن لعلوان
ردت بسخرية: اي ضلي جذبي انتي گايلة بعضمة لسانج لغفران الفلوس فلوس حرام و هي دكت علية محتارة تگول مدري البت صدك لاعبة و جايبتهن
التفتت لغفران مبهوتة وكفت ساكتة تعصر بأديهة صرت بنص هدومي كدامهم شكد طعنن بية و حجن
جدي واكف يباوعلنة بغضب و يسمع لصفية يهز راسة هي تجيب حجي وتترس أذنة بيه عيني عليهة
ماحس الة بكفخة علة راسي عطت مدنكة ضامتة
بين ادية الوجع مشة بكل راسي
صفية :اييي حيل وياهة موتت اخوها و يتمت جهالة الزلمة من قهرة و فشلتة خلة راسة و مات جايتني تتبختر بت الفارسية شووفهة عمييي شوفهة بعين گوية واكفة اخخ يا وجع گلبي عليك يسالم جان ربح ابوك من امهة حتى انتة تربح
رد جدي بغضب:خابرنييي علووان خابرة طيح الله حضة على هاي العملة ضام سواد وجهة اختة وساكت ماعندة غيرة الدثو
غنوة: يارب بكسرة خاطري وگلبي اشوف بيج يوم يبجي حتى ليكرهونج عليج
توسعت عيونهة لطمت على صدرهة عاطت:تدعيين علييية العايبة تدعين علية موتي زلمتي هسة تدعين
ولج اليوم حتى الميتين مايطلعونج من ايدي
مدت ايدهة تريد تلزمني صرت بظهر البنات هي بس وصلت كلهن وخرن جرتني من شعري ماكدر ادافع
اضخم مني ضليت اهومش بأدية كلهة تصيح صارت
رادن يوخرنهة عني ماكدرن لازمة شعري تعت بي صرت اصرخ من وجع راسي احس فص عيني راح
يطلع من مكانة اريدهة بس تعوفة تخبلت من الوجع
ادفع بأدبهة اخرمش لحد ما دخلو ولد عمي جروهة
جدي عاط بيهة و يرزل لان ماسمعت كلامة و وخرت
ضميت وجهي بين ادية اعصر بگصتي اريد بس يهدء
بجيت مفرفحة من وجع الضرب اعض بأيدي عمي
يكفخ بية و يشتمني البيت كلة گب صياح و عرك
وخر عني گومني علوان دخلني للغرفة تدفع نزويت على روحي بكوسر الغرفة اسمع صوت عمتي نوفة
ام هلال تحجي وياي تريد ترفع راسي من رجلي
رفعتة ابجي من الوجع غسلت وجهي تحجي بهمس تسمي تغسل ايدهة دم يكت من خشمي خلت الشال عليه طفرت خايفة من صارت ضربة على الباب قوية مثل واحد طك بي صوت الزلم برة عالي
نوفة: الله يستر يارب بجاه وجهك الكريم كون تهدة النفوس لا يزيغهم الشيطان ياعلي احضر ياعلي
لزمت ايدهة احجي بتوسل:عمة والله مامسوية شي حجي القابلة كلة جذب و هو .. هو سوالي عملية
و عقدنة والله سالم موجود عقدنة
نوف:سودة علية ياعمة ولج غير تجين و عقد الزواج عدج اوراق شي تسكتينهم بي ، جا رجلج وين راح و عافج
رديت الطم على رجلية بحرگة: مادري ماددري الاوراق ماكو كلهن عدة و اخذهن و العقد عدة بس بس ايي عصام عصام رجل اختة يدري بينة متزوجين و اجو لبيتنة گليلهم يخابرونة هسة هو يشهد اني ما اجذب والله امة هي لباعت الحلقة مالتي بس خابروه
نوف: اهدي هسة يجي هلال اخلي يخابرة حتى لو يجيبة هنا ، هسة انتي نامي خلي الدم يوگف عمت عيني شجابج لهاي السالفة
هزيت راسي برفض حاضنة روحي ارعش من الخوف
صوتهم عالي ساعة يلومون علوان ساعة يشتموني
كل واحد يصيح بجهة ماكو غير غسل العار و ذبح
گامت عمتي فتحت الباب هي صارت مدافع خلة عمي عمار ايدة بجتفهة دفعهة بعيد طب للغرفة
حجة يلف شماغة على ايدة:جلببة تردين تكسرين عينة ان جان اخوتج مابيهم زلمة يغسل عارج انة اغسلنة و انظف الدم الوصخ لبيج
حجت عمتي نوفة لازمتة:اسمعني فدوة لعينك البت تحلف سالم مزوجها و اكو من صفحة رجلهة زلمة يدري بزواجهم خابروه هسة يطلع الحك
ابو عمار:الحگ كتلهة لهاي النجسة جيبهة عمار جيبهة هنا اشرب من دمهة بت ال***" جرهة الي تريدد تفضحني تالي العمر
رديت برجفة اباوعلة بتوسل:عمي والله و القرأن متزوجة و سالم زوجني و شهد بس خابرو عصام بلكت سمع عنهم شي اخت دلهم تشهد على زواجنة
نوفة: سمعت البت فدوة لگلبك لاتظلمهة الظلم ظلمات يوم القيامة لا تستعجل دكو على الزلمة سألو خل يجي بلكي يعرف ناسهم لشهد على الزواج
هي تحجي همة بعدهم يصيحون علوان واكف گبال الباب اديه ورة ظهرة منحني و عيونة علية بغضب
ندفع الباب دخل جسام ردة حجة يلزم جتف ابوه:گول يالله يابة لا تسوي شي تشيل ذنبهة خل ندور على الزلمة نسأل
رد عليه بحرگة دم:شتسأل تريدد تصخم وجهنة الببت لاعبة بشرفهة تروح تسأل الغربة تريد تخزينة لو سالم مزوجهة عليمن طك ومات الة شردت منة مات من الهم
مسح على وجهة بزهگة حجة:استغفر الله يابة بس اهدي لا تمشي ورة حجي النسوان خل نسمع منهة
و نسأل عن الزلمة اذا صاير مثل ماتگول يعني هي ماجذبت اذا لا وكتهة لكل حادث حديث
رد عمي يباوعلي بتهديد: حررررف واحد جذب انة ذباحج
وكف جسام بمسافة عني التفتت لابوه يسكتة رجع يباوعلي رغم هدوئة حسيتة كتلة مال غضب بس لازم روحة ما سب ولا طگاني
جسام:سولفيلي كلشي بالتفصيل من طلعتي وية سالم لحد ما اجيتينة
باوعتلة برعب حلكي يابس من الخوف ادية بحضني و يرعشن افك حلكي اريد اطلع الكلمة ماكدر سنوني تصتك واحد بواحد
حجت عمتي تمسح على ظهري:احجي يمة لا تسكتين الحك ماينظم گولي
عصرت الثوب بقوة ما اباوع بعيونة حجيتلة كلشي من لمن القابلة كالتلهم و العقد لحد ما اجيت كل ما اتذكرة ينعصر گلبي بوجع
حجة يسألني بهدوء: البانزينخانة تعرفينهة وين شلون صايرة علة ياجهة وين مكانهة
هزيت راسي بنفي:من طلعت من بيتنة لحد ما دخلت لبيتة ماتذكر من طريق شي ماخلوني اباوع جنت مدنكة والله ماعرف بس اندل بيتنة و بيت اختة و ارقامهم
جسام: اوصفيلي شكلة شلونة ملامحة اسمة الكامل شنو شني عشيرتة نروح نسأل عنة بالمنطقة
بللت شفتي اريد اتذكر:اسمة دلهم عزيز ماعرف سمعت من الشرطة گالو اسم ابوه و عشيرتة ماعرفهة بس عصام رجل اختة اكيد يعرفهم اندل بيتهم روحلة هسة هو يگلك حتى الحلقة امة لباعتهة والله الحلقة مالتي و بعتهة ما جبت الفلوس مثل ما گالت صفية
گام التفت على عمي حجة بكل هدوء و سهولة:هاي نحلت بعد عليمن تتصايحون و اذبح و اصلخ نروح للزلمة و للمنطقة نسأل عن الرجال اذا اكو واحد بهيج موصفات فضت راحت
لف عمي سبحتة على ايدة يباوعلة ما عاجبة ولا مقتنع حجة بحدة:روح انتة واحد من الولد وياك سألو بالليل اذا ما رجعت بخبر اكيد انة اموتها
لزمت طرف اتراكة التفت الي مستغربة حجيت اريد ابرء روحي: المستشفى لسويت بيهة عملية اعرف اسمهة دكتورة اطياف هي سوتلي عملية
جسام:نطيني العنوان بيوتهم و ارقامهم نروح و باجر ناخذج للمستشفى نشوف الدكتورة
هزيت راسي ادعي بداخلي تنحل نطيتة العنوان و الارقام طلع اخذ واحد من الولد وياه هم تعاركو بالباب عمامي ما يصدگون و جسام مايرضى ابوه يسوي هيج
ضميت وجهي بين ادية گلبي يدك قوي حتى صدري يوجعني امسح دموعي و حرگة بداخلي على دلهم
لحد الليل طلعت روحي من الخوف منا لمن سمعت
صوت سيارتهم دخلو وكفت بالباب مال الغرفة اتصنت على حجيهم صوتهم عالي مسموع و جدي يسألهم مستهزء جنة يدري كلشي ما راح يلگون
حجة حسام اشوف بس جتفة من الباب :رحنة للمنطقة و سألنة الجيران مثل ما گالت الزلمة هناك عايش هي هم جانت هناك همة مساعدينهة ماخذينهة للمستشفى من صايرة مشكلة مادري شنو ناس هاجمة على بيتة مبين هو مو خوش ولد گالو بعد مارجع
خلف:ايي وشلگيت بالبيت جبتنة عقد و رقة نعرف بيهة صدگهة من جذبهة
رد ايدة تمسح على اطار الباب: ماكو البيت مفتوح و بيبانة تهف بالهوة و حياطين مكسرة مادخلنة رحنة لبيت نسيبة على ساس گال جانت يمة هو وصلهة
حسين: بس ما اكد الزواج گال شفتهة مرة ببيت دلهم اخو مرتة و بس اختة ماتدري بالزواج ولا گايلتلة صدفة شايفينهة هناك
حجاهة حسين مرتكي على الباب يمسح لحيتة رجع كمل: الولد موجود و البيت مثل ماكالت بس الزواج محد يدري بي و الفلوس يگول هي اجت بيدهة ذني
طلعت بسرعة مبهوتة وكفت گبالي الصدمة لاجمتني حجيت عيوني عليه: الحلقة والله هي امة باعتهة نطيتهة الهة شلوونن يگول الفلوس عدي والله جذااب و زواجنة حوراء عرفت بي و دلهم حجالهة ضلت هواي بالبيت عايشة يمنة
تجاهلني و حجة عمي خلف مستند بأيدة على رجلة: من رحت لنسيبهم ماشفت اختة و سألتهة
جسام:الرجال مرتة شاردة وية اخوها
خلف:ها أها هاي السالفة مصخمة وجهة وياه و من اجتة عافهة وشرد خايف لو همة نصابة ، على حجي مرت المرحوم البت شاردة منة رايحة لل***" لكاسرهة لو سالم مزوجهة جان ما مات من القهر
مسحت صفحة وجهي بحركة اتلفت بينهم محتارة شسوي محد وياي حتى من عرفو دلهم موجود نكرو الزواج الة عقد يالله يصدكون ماعندي منين اجيبة
دموعي تهمل اباوعلهم ضايعة گام علوان جراني لغرفتة ملخني بين اديه ضامة راسي و مل الضرب فوك ظهري كسرني مرد روحي مرد
مرت ايام شوفوني الموت ما موتوني ليقهر صفية طاشة السالفة بكل القرية صرت علج بحلوگهم الصغير و الجبير يحجي علية و يطعن
جدي ورة ما طلعت السالفة طرد علوان من البيت رجعنة لبيتنة وهم يومية طلابة لشفعلي شي واحد
عملية الورم من رحت وية علوان و جسام هناك
للمستشفى سألنة عن الدكتورة شافتني بسرعة عرفتني من شكلي حجتلهم نفس لحجتة لدلهم
بين المصدگين و شاكين بس هزو روسهم و طلعو
مشيت وياهم علوان يجرجر بية ردت بس يشوف عيني شبيهة ما رضى توسلتةبي شكد صاح علية بنص الناس صرت هلكدني من الفشلة
رجعت للبيت ساكتة ردت اعاتبهم على ظلمهم الي بس ماكو حجي يفيد همة سالفة العار معشعشة براسهم مايصدگون بهاي السوالف مال تكيس
عدهك بس المتزوجة تتمرض هيج امراض
مر اليوم عيون علوان علية يباوعلي بترقب توترت خفت ضليت كاعدة بالغرفة اعصر بأدية و مرعوبة
تعشينة لگمة ما مرت بحلگي اريد ابلع ماكدر گلبي مقبوض احس حجارة صايرة بنص صدري من الثگل
كعدت برة دموعي تصب ادعي كون تعدي هاي الليلة على خير بس مامتطمنة لسكوتهم هيج فجأة
انود من القهر حاضنة رجلية لصدري بية كسرة شكدهة بس الله يعرفها مهضومة من الصار زعلانة
ليش عافني ، ما سأل نفسة شنو راح يصير بية
فزيت على صوت علوان يصيحني گمت متخرذلة واكف باب المطبخ نطاني قميصة خلاه بأيدي عيونة علية حادة و حقودة
حجة بنتر:اغسليي
هزيت راسي رحت غسلتة جففتة شريتة على الحبل
اسمع صوت همس بين غفران و بينة هي تحجي مبهوتة لازمة ايدة اباوعلهم من بعيد واكفين بنهاية الحوش كل شوية يلتفتون علية ادنك خايفة
دخلت للغرفة واكفة گبال الشباك رجلية ميتات بايدة ماكدر ارفع ايد حليت شعري امسح على رگبتي
كعدت ابجي خانكة صوتي بأيدي على حلگي
جزة وكت العشاوة صارت الساعة بالوحدة وكفت باب المطبخ عيني على البساط بالهول فوك منة استكان الجاي بي نص نطيتة لعلوان شرب نصة
على وكفتي صار ضوة طلع علوان من غرفتة لابس تراك و فانيلة تعلاكة خلة موبايلة بجيبة عيونة علية
حجة هالمرة بهدوء: جيبي القميص
گلبي طاح ببطني رجلية ثبتن بالگاع عيوني شاخصة عليه حبل الموت التف على رگبتي كلشي بية جمد
حجيت شفتي ترجف اباوعلة بتوسل :راح تذبحنـي
ضل ساكت عيونة عليه عصرت اطار الباب قوي بين ادية اباوعلة بتوسل عيوني مغورگة متروسة دمع
ركضت لازمة ايدة ابوسهة احجي بغصة:فدوة صدگني والقرآن وروح ابوي ماغلطت كلشي مثل ما گالتة الدكتورة و سالم هو زوجني هو اخذ فلوس زواجي من دلهم ، علوان دخيل الله صدگني اني ماغلطانة وين جنت اطلع گبالكم الباب ما واصلتة
لزم راسي بين اديه ضاغط عليه قوي حجة صاغط على سنونة: اذا صدگتج انة هاي العرب شيسكتهة ما اكدر ارفع عيني بعيون الوادم الاكلت وجهي عمي لمن لحمي و دمي حجاهة و فشلني ماتنظف سمعتج ماتنظف
غنوة:هوو منووو لسوة بية هيج انتوو لشمرتوني و سالم باعني برخص لو من ساعتهة موديني لدكتور
ما جان هذة حاليي والله ما اسامحكم
سكت عيونة ثابتة بعيوني مشة طالع برة شوية ورجع لابس قميصة حجة يأشرلي:لبسي و تعاي
طحت من الخوف ارعش جسمي كلة يختض بس دموعي تجري اريد انطق بلكي اخلي يلين و يصدك
ما كدرت لساني نشل و عيوني متوسعة
شفت طرف ثوب غفران وكفت بصفي حجت بتوسل:علوان لاتسوي هيج لاتضيع روحك عوفهم همة يسوون ليردونة
حجة يتجاهل حجيهة:لبسيهة حجاب و عباة السيارة على جية
گمتني سحل ماكدر امشي استسلمت كلشي بية سكن خلت الشال على راسي عدلتة التفتت للكنتور
تدور بالخانات على عباة و علوان يصيح من برة
حجت تدفع جتفي:امشيي العباة مشرورة على الحبل برة اخذيهة
تدفع بية اني ماكدر امشي لموتي الفكرة اتعس من استيعابي عثرت بعتبة الباب سحبتني من ايدي طلعت عيني ما شلتهة عن الگاع روحي ممرودة
اخذني علوان يجرجر بية شمر العباة فوك راسي
لازمني طلعني من الباب الورة جهة الگاع و الزرع
ادوس على الشتل حافية و رجلي تغوص بالگاع الماي ترس عباتي كل سوية زالگة لو ما ايدة لازمتني
وگف وراي يعبرني مجرة السگي من بعيد اشوف ضوة سيارة گبل لا نوصلهن حسيت رجلة طكت رجلي من ورة عثرت و لزمني
حجة بصوت ناصي و بجدية: لاتحجين اصعدج بالسيارة لاتفكين حلگج اوكفهم بنص الدرب بس انزل انزلي ركضي لاتوكفين جسام يتانيج روحي ويا
درت الة عيوني متوسعة هو خازرني عيونة تلمع بالضوة صارت حركتة اقسى عاصر زندي و يدفع بية
شفت عمي عمار و حسين ابن عمي خلف واكفين
يباوعولي بنظرات غليضة بين الحقد و الغضب دفعني علوان للسيارة صعدت روحي راحت واني اتلمس السلاح فوك الكشن كعد بصفي علوان
ايدة جوة عباتي لازم ايدي يعصر بيهة وية كل كلمة من عمي عمار ، اني مصدومة من الحجاه كل ضني اتخايل من خوفي صرت اوهوس لان وجهة مو مال واحد يساعدني ليش غير راية ليش حجة هيج
عمار: كفو منك عمي لا تتخرذل مثل المرحوم عدك بنيات و السمجة الوصخة توصخ الماي
حسين: احنة نطلعك لاتخاف هي سالفة الشرف يتهاونون عليهة بالقانون
عمار:اي بوية قوي گلبك و اغسل عارك مو زلمة ليسكت عن عوجة نسوانة
حجيت بروح مسلوبة: انة وياك نوگف بيوم الحساب كل كلمة حجيتهة ما اسامحك عليهة حوبتي اتمنى حوبتي ماتتعداك
توجعت من ايد علوان خازرني بعصبية مالحگت اسوي شي الة روحي شايغة من ضربني عمي بكفة ايدة براسي عطت صوتي عالي ملة السيارة
دنكت من الوجع ادك على رجلية هو يسب و يغلط لان دعيت عليهه حجة كلام ما ينسمع يكزبر لجلد
صار هدوء بالسيارة ماكدر ارفع راسي للشارع الضوة
يوجع عيوني ضليت لازمتة مدنكة شوية شوية خف الوجع بس حركة السيارة تخلي صداع يروح و يجي
مسافة طويلة مشينة نزلت السيارة بگيعان و طريق ترابي كل شوية طسة و تتهزهز قوي نزيت من عصر
ايدي التفت الة عافهة لحظات تغيرت ملامحة
لازم بطنة يدك على الكشن حجة بصوت مهتز:اووكف حسييين وكفهة
عصر جتفة التفت الة مستغرب وگف السيارة نزل علوان يمشي بعيد همة يباوعولة مستغربين منة
خليت ايدي على الباب فتحتة اجة يلزمني عمي مالحك ركضت عكس السيارة بين الكصب و الزرع
امشي ظلمة مادري وين ادوس حافية كل شوية ساحكة على شي يغمت روحي صوتهم وراي عالي
ركضت لحد ما رجلي وحدهة نعكفت من يم الركبة
اجيت اطيح من التعب گمت گوة علية لابدة بسد الگصب ابعدة بأدية و خشونتة تجرح خدي
نعتت ايدي بقوة و نسد حلگي نسحت ادفر و ابحث بالگاع اريد اخلص روحي من الزمني هو مايوگف
دقايق بس روحي انتهت بيهن
حجة بصوت ناصي كلش: كافيي ششش جَسـام انة لاتتحركين الكصب يتحرك ويانة
كعدني بعدة ايدة عني لميت روحي بخوف بسرعة لزم ايدي خازرني مايريد اقل حركة ولا صوت موقف
صعب مر علية من مر الضوة بصفي و صوت عمي
صار ترس أذني يمشي ويدورون علية
بحيث الكصب من يحركة بيدة يحرك المكان الي بصفي ضليت ادعي ايدي على گلبي چن صوت دكاتة يسمعونة من كد ما خايفة العرك صار يصب
ابتعدو و نجريت بيد جسام اخذني تختل الدرب كلة
صعدني بالسيارة دار صعد بمكان السايق و شغلهة
حجة بأمر:راسج خلي جوة الكشن لا ترفعينة
رديت برجفة:من من ادنك عيني توجعني
جسام :تحملي
دنگت كوة علية ماكو لحظات سمعت صوت رجال غريب نفتح الباب صعدن ثنين نسوان يمي و هو
صعد بمكان السايق و جسام يم الجامة مالتي
حجة مرتكي عليهة: راح ترجع السيارة و تتصادفون ديري بالج يلمحونج انة ماشي و الاگيكم بغير منطقة
هزيت راسي بفهم وخر خلة السيارة تمشي ضليت مدنكة روحي تلوب من القهر اعصر بأدية خايفة
ضميت وجهي بالعباة صدك ردت السيارة وشفت عمي واكف يم سيارتة المفتوحة و يمة حسين متخوصر و علوان يفتر فوك حولهم ما يوكف
صرت بسدهن همة بالجهة ثانية عيونة مركزة للسيارة دكلة هورن الزلمة لان يباوع على النسوان لوياه دنك دار وجهة مرت السيارة منهم و مشت
هواي مشينة اشوف ورانة سيارة وين ما نلوف هي ويانة لحد ما وكف بمنطقة كلهة ظلمة و شارع بي بيوت و ثاني مقابلة كلة نخل و زرع و كاع فارغة
وكف السيارة و وگفت الثانية نزل منهة جسام النسوان هم نزلن اجة مدنك مايباوع الهن وصل يمنة طالس الولد
حجة يحضنة:مشكور حبيبي ما انساهة الك
رد عليه بمودة:تدلل جسام ما سويت شي
جسام:حبيبي
ضلو يسولفون بعدين صعد السيارة و هنة وياه مشن ابد ما حجن ولا كلمة من حجيهم عرفتهن من اهل صاحبة حتى السيطرة ماتوكفة و يطلع مناك
بدون مايشوفة عمي لو واحد من الولد اكو سيطرة كلش يم شارع الرئيسي بسمافة عن القرية هم بيها واحد من ولد عمي أذا مر حسام وانة وياه يعرفون
فتح باب البيت اشرلي ادخل وكفت اعصر بأدية رديت برجفة:و عـ.. علوان
جسام:يجيج بس مو اليوم لاتخافين هو وصاني احمدي ربج طلعناج بس لا ترتاحين هواي انطيج مهلة لحد ما يجي رجلج اذا صدك عدة عقد تبين كعدتج يمة حلال وكتهة نرجعج اذا جذب اني بنفسي انحرج فوتييي يالله
غنوة:اني ما جذبت ولا بحرف ما شمرني للموت الة اهلي اذا رجع او لا اني گبال رب العالمين بريئة ماتهموني كلكم
دفع الباب اشرلي اطب ما تحركت خايفة حجة يشمر المفتاح علية: محد هنا اني راح اكعد بالسيارة تعاي
اخذتة أيدي ترعش مشيت للباب هو بسرعة وخر راح للسيارة دخلت قفلتة اتلفت البيت بي كهرباء الگلوبات مشتعلة حوش صغير و باب بالواجهة
دخلت هول واسع اكو كم باب مبين غرف كلهة مسدودة مشيت عليهن وحدة وحدة فارغات تأكدت من البيت يالله كعدت تعبانة مددت رجلية
تمددت على صفحتي ابجي بدون صوت ماعندي قوة اكوم اغسل ضليت هيج لحد ما طلع الضوة
ندك الباب فزيت رحتلة مدلي علاكة بيهة خبز حار وقوطية كيمر وياهن بطل ماي اخذتهن رجعت قفلت الباب مشيت خليتهن بالكاع
ادور بعيوني على الحمام لكيتة برة كلشي ذكرني بذاك البيت و گلبي اشتعل نار اغسل و دموعي تطيح
غسلت وجهي و رجلية شفت روحي كلي تراب وصخ
نفضت ثوبي مسحتة و سبحت رجعت عليهن طلعت
توضيت صليت الصبح و ركعتين لوجه الله كعدت
اكلت شوية بس اسد جوعي شربت ماي ، ضليت اتصفن بالحياطين و بالي ما يهدئ كل شوية الذكريات تتجمع براسي تخليني اگب بنار القهر
خلص اليوم و اجة الليل ضليت لوحدي البيبان مسددة نايمة فوك الگاع صافنة قصص وروايات عراقية كرار صلاح علة السكف دموعي تجري بيا ذنب سويت بية هيج شلون كدرت اريد افهم
والله تعلقت بيك تعلمت على وجودك وياي انتظرك و احسب الساعات لنگعد بيهن سوة نطيتك كلشي
وثقت بيك و أمنتك هيج كسرة ما جانت ابالي
كلت اذا كلش يوديني لهلي يحجيلهم و يطلگني ارجع
بعينهم بريئة و صفحتي نظيفة مو ترجعني مكسورة و بسواد الوجه تاخذ كلشي وياك تعوفني اتصفن
شنو لحدك تسوي هيج ، شكو بحياتك ماعرفة بس العتب علية اني غبية غير اسمك ما اعرفة شلون أمنتك وانتة جنت واضح من اول لحظة
من ذاك اليوم لصرت كبالك ارجف و خايفة دليت سالم علية بدم بارد و ضمير ميت توسلتك بعيوني
ما اهتميت سلمتني بيدة
اشتريتني برخص التراب لا الك نية تصوني ولا تحبني
جنت تريد تلبي رغباتك و تعيش لحظات لنفسك لبستلي قناع الحماية خليتني ماشوف غيرك بعيوني
فضلت اهلي عليك كم مرة لزمت ايدك گتلك اضل يمك انكر رجعتي اتوسلك ما توديني الهم تالي شسويت شمرتني هيج شمرة افتر بالشوارع ضايعة
شنو العذر لعدك و اعذرك ، شنو لمنعك عن الجية
مجبور لو هاي روحي المتعلقة بيك تطلع اعذار
مسحت دموعي گلبت للجهة الثانية اون من وجع راسي اعصر بصابعي اعضعض بيدي گعدت ما متحملة الوجع يطر الراس الجهة اليسرى منة
طلعت برة اغسل شربت ماي ردت بس يهيد علية
بجيت الوب عيني شلون واحد يريد يطلعهة من مكانهة من اهد ضربة علوان على راسي هي انتهت
للصبح جزعت طلعت روحي من الوجع صرت ادك على راسي ماغمضت عيني ماصدگت اجة جسام
كتلة على دوة جابلي من سيارتة شربت شوية صار احسن بس النعاس بعيوني منه راسي دايخ
مرت فترة الريوك و الغدة لحد العصر ندك الباب فتحتة تراجعت خطوات ليورة خايفة منصبة عيني
دخل علوان سد الباب راح للبيت مشيت بسرعة وراه
اخذت ماي بارد بي شوية ثلج توة جايبة جسام نطيتة
الة اخذة تعبان مبين جاي من الشغل لهنا وجهة اسود من حر الشمس شربة كلة مرتكي على الحايط
اباوعلة و دموعي تصب سداه شمر البطل تقربت طحت بحضنة ابجي بصوت عالي اصرخ بقهر
لماني بحضنة يعصر بزندي بين اديه دنكت ابوس ايدة سحبها مايرضى رفع راسي
حجة بجدية: هاي مهلة غنوة دست على روحي وماشيت جسام اريد ابرئ سالم المات من قهرة اذا حجي الدكتورة صح و اجة الزلمة جاب العقد وطلع كلشي مثل ما حجيتي وكتهة اعتبري روحج طلعتي منهة اذا ما اجة و ضلت صفحتج سودة گبال ناسنة تعرفين شراح يصير بوكتهة
هزيت راسي بفهم مسحت دموعي حجيت برجفة: والله ماجذبت بكلمة انة لو غلطانة مارديت بس ضليت بالشوارع وين اروح رجعتلكم
علوان:لاخر لحظة جنت وية عمي مخلي ايدي بيدة بس جسام ثناني عن الاريدة راح لبيت هذة عصام و جرجرة عرف بيدج حلقة مبيوعة حمدي ربج جسام موجود
غنوة: انتة اخوي المفروض توكف وياي هاي الوكفة انتم ربيتوني و كبرت كبالك ما امد راسي من باب البيت خليتو صفية تسود عقولكم و صدكتوهة
دار وجهة ساكت ايدة بعدهة على راسي ضل فترة مشة بالليل جسام جاب ثلاجة صغيرة خلة بيهة اكل اكو طباخ بس ماكو غاز جاب دبة غاز خلاهة
كعدت بهذة البيت الصغير ماتحرك خطوة عنة وحدي بين افكاري و قهري گلبي من وجع ورم
عيوني راحن من البجي على كلشي تصب و تطيح
بين فترة و فترة يجيني علوان بس مو هواي خاف يحسون ليلة ادعي يبين حتى لو خبر عن دلهم همة كل مايجون ما يخلوني ارتاح روحي و حياتي نربطت بخبر منة يأكد زواجي يجي يوكف كبالهم و يحلها
كرهتة اسمة و صوتة حتى ملامح وجهة التارسة افكاري حقدي غلب كلشي كل يوم اباوع بالمراية اشوف عيوني صغرن و عيني اليسرى صار ييهة مثل الفص احمر دم متجمع يم فص العين صاير واضح
مغوشة ما اشوف بيها ، وجهي ضعف العظم صار يبين شعري يطيح بيدي خصل تنشلع شلع ، غير
وجع راسي و روحي لمنتهية مابية ولا قطرة دم
كلشي بية انتهى و الصار حلم مادري شلون عشتة
چني جنت غارگة بدنيا حلوة و اجت اديهم و طلقهم فززني من هاي الجذبة و چن العذاب نكتب علية
لزمت الباب اوكف رخت ايدي گوة عنت روحي كمت فتحتة دخل علوان خلة علاليك بالباب طب جوة من الشمس شلتهن وراه خليتهن بالمطبخ اخذتلة ماي
يجي بس مايحجي سكتة مرات يتغدة هنا من يطلع يهددنني خل يگضي هذة الشهر اذا مارد اموت هو بنفسة يموتني بطني تصير دومامات من الخوف
احسبهن يوم يوم ساعة ساعة كل ما يخلص تخلص روحي وياه ياريت الساعات تطول و بالهم يطول وياهة ، لو يجي وين انتة ذمة برگبتك كسرتي
طلع علوان عيني لمحت جسام متانيه كبال الباب
سولفو شوية على وكفتهم وراهة صعد و مشة قفلت
الباب طبيت جوة اشوف العلاليك مسواك خليتة بالثلاجة الاكل ضال اكل كوة علية نفسيتي مسودودة
المن اكل و تاليتي ميتة أيست من جيتة ولا ضليت ادعي مات كل امل بية كل يوم يمر اكرها من كل گلبي مالة عذر لا والله على هاي السواية مال عذر
حجيهم صدك هو جذاب راد يتونس لگاني على كد ايدة وين اكو رجال يحصل مرة بالحلال بستين الف و سبعين تفاليس ما وراهة اهل حتة لو موتها محد يگلة ليش بيا ذنب
هزيت ايدي اضحك على روحي وين جنت عايشة و راسمة احلام و حب و خرابيط و الكتاب باين من عنوانة حجي حلو و معسول ، ارضى بأبسط شي
لا تعبتة ولا حسبلي حساب مادوخت راسة
رحت طلعت هدوم من هدومي القديمة جابهة علوان مشيت سبحت مشطت شعري ليكت كت خصل من طولة تطيح صار خفيف كلشي
وكفت كبال المراية اريد اشوف عيني بلكي خفت
رغم بعدها مغوشة لمحت طرف من الوشم علية
وخرت ياخة الثوب صار كدامي كزبر جلدي
من تذكرت شلون سواه خنگتني العبرة بجيت افرك بي ما يروح لزمت المشط اشخط بجلدي هو يابس
و المشط مسنن صار شخوط و اللحم تزلغ
الدم نبر منة استهترت كل ما يجي صوتة ابالي و حجية ايدي تعبت طحت بالگاع و نغزات جتفي من الجرح توجعني بس مو مثل وجع گلبي
دكيت عليه بقبضة ايدي ملخت روحي ابجي و اصرخ حرگة بگلبي ماعرف شلون اطلعهة كلهة كسرتني كلهة تريدمي اموت ليش شبية
ضليت كاعدة رجلية ماتن مابيهن يعينني اسمع الاذان ابجي بالزايد خلص گوة علية كمت مكسورة
توضيت وصليت ضليت نايمة خدي على التربة
لنص الليل يالله گمت اكلت كعدت برة بالحوش اباوع للسمة اللعاب نارية طك و يطلع ضواها
كلشي صار باهت بعيني ما يفرحني ولا يهمني
ياريتني ارجع لگبل همي بس اكنس و اطبخ و انام
شكد فرحت من طلعت من بيتنة و صرت ببيتة و عشت ايام مرتاحة من صخرة صفية و صياحهة
هسة ذيج الايام ارحم بهواي من كلشي صار
رجعت للبيت نمت و صار هذة روتيني محبوسة بالبيت انام و اكعد احسب هذة اخر يوم الية ما اكملة هنا كل ما يجي علوان اشوف الموت يلوح كبالي
مر اسبوع على اخر مرة اجة خفت مادري شبيهم ماكو گلبي نار من القلق وراهة بيوم ندك الباب قوي
طلعت اباوع من الزروف شفت جسام
حاجيتة من ورة الباب سألتة بقلق:علوان وينة ماكو
جسام:عدة شغل هواي باجر يجي هذة مسواك الج
فتحت الباب اخذتة توني اريد اسدة لزمة بيدة خفت رجعت ليورة اباوعلة مرتبكة دخل سد الباب عيونة علية لميت الشال اعدلة على راسي
خلة ايدة بجيبة طلع منهة ورقة مطبكة مداهة الي اخذتهة مستغربة فتحتها عيوني توسعت لازمتهة
حجيت اراويهة الة:اييي هذة اي هذة دلهم
رد عيونة علية :بس هذة اسمة مو دلهم اسمة ثابت
رمشت مامستوعبة اباوع للصورة ارجع اباوعلة حجيت اعصرهة بصابعي: والله هو دلهم هذة ما اجذب والله
جسام: بطلاع الروح لكيتلة صورة دورنة وراه ناس تكول اسمة دلهم و كم واحد سألناهم من اماكنة الجاي يروحلهة يگولون صَعب اسمة و ساعة ثابت كل شوية اسم و راي يختلف ماعرفنة ياهو ليحجي صح ياهو الغلطان
غنوة:دـ..دلهم هذة اسمة و احتة تصيحلة بي
جسام: شايفة جنسية اوراقة مستمسكات سألتة عن اهلة ناسة منين هو
هزيت راسي باوعلي بحركة رد بنتر:شتعرررفين ماتگليليييي حتى اسممة يجوز جذب شلون لعب بعقل سالم و عقد عليج شلون سوالج عملية بدون اوارقج لو مزورهن شمسوي شلون مشاهة كلشي الزمة راس خيط مايوصلني لاي شي الة
غنوة: هو شاف سالم من راد يكتلني و حجة وياه قنعة و عقدنة بالجامع وماعرف عنة اي شي بس اكو واحد صاحبة اسمة صفوان اعرفة حافضة رقمة
جسام:صلاوات توج يالله تحجين ماگلتلي من البداية
غنوة:خفت هم يجذب و تتهموني بشي ثاني
حجة يطلع موبايلة :ردي الرقم
رديتة الة بس ملخبطة برقمين ماعرف اذا هنة صح لو غيرهن كتبة اتصل اول رقم ردت عليه بنية اعتذر و سداه ثاني رقم ما رد
ضل هواي يتصل بي اشرلي يريد ماي رحت جبتلة
رجعت نطيتة الة الموبايل بصفة كاعد على البلوكة بالحوش اخذة يفتح البطل
فصل الاتصال و رجع اتصل مرة ثانية جمدت ايدي أذني صفرت اول ما سمعت الصوت من رد عليه
جسام:صفـــوان وياي؟
رد بهدوء:وياك جاســر منو انتة
هزيت راسي اشر للموبايل دموعي تصب اخذتة من ايدة لزمتة مفرفحة احجي: دلهم هاييي انييي وينك
غنوة وياك حباب ارجع وين رحت
فصل الاتصال بس سمع اسمي رجع دك عليه جاسر فصلة طلع خارج الخدمة متت من القهر ضليت ادك على رجلية
غنوة: والله هو والعباس هذة صوتة دلهم اعرفة من يحجي هو ليش سوة هيج ليش سداه فدوة اتصل بي
جسام : ماكو يطلع خارج الخدمة ، بعد اكو ارقام حافضتهن الة
هزيت راسي لا كاعدة بنص الحوش گلبي نار تسعر بي سمعني عرفني ما رد ، عافني مو مجبور كلشي جان بأرادتة و بوعية ضحك علية لعب بمشاعري
شكرا لزيارتكم عالم روايات سكيرهوم
