رواية نقش بارد الفصل الحادي عشر بقلم فدك فاطمه
أنة ووعـــودك صفينــة بلايا وعدك.
..
- غنـــــوة
المشاعر البشعة و السعيدة دوم تشكل ملامحنة وتغير شكلنة نصير ناس مسحوگين جوة الخزن
الخيبة و الخذلان الحسيتهن بساعة لسمعت صوتة ماكدر اشرحهن ، عقلي وكف من كمية الحزن لبية
ضليت اتصفن بالحياطين ماعندي القوة اتحرك
حسيت بوقتهة بغصة تشبه خنگة الموت كل جسمي
صار تراب و طاقتي انتهت طحت بين وحوش ماترحم
ما قاهرني غير الايام الحلوة اتذكر شلون جنت بيهة
اتمنى ارجع لذاك الوكت لا اضل يمة ولا اصدك بي
ليكتل هي كمية مشاعري و صدقي لتقابلت بجذبة هدمتني جذب واحد يعرف لأعيشة چن حبال الدنيا كلهة ملتفة على رگبتي و خانگتني وصل بية القهر
رفعت ادية و دعيت عليه و شكد احترك گلبي وراهة
تندمت لان ماحب ادعي على الناس بس والله حرام لصار وياي ليش همة مو مثلنة نخاف نزعل غيرنة
گمت لازمة الحايط تعبت والله تعبت من البجي عيوني راحن و راسي يابة الوجع الي بي ما اكدر اتحملة يسطر حتى نوم ماكدر انام يروح و يرجع
وكفت على المغسلة فتحت الماي بارد توضيت رجعت صليت بس حتى يرتاح گلبي الساعة بتلاثة
انتظرت صلاة الصبح هم صليتهة و تمددت بمكاني
نكرني و سداه يعني مايجي ، علوان ما راح يعوفني هنا لوحدي هذة جسام ليل و نهار يراقب البيت جنت
عبالي خايفين علية طلعو خايفين مني لا اجيب زلم للبيت بساعتهة من سمعت حجايتهم هو و علوان
روحي احترگت من القهر لهاي الدرجة مايثقون بية
شسويت اني بحياتي و يصير هيج اشو جبتهة عذاب بعــذاب لا حصــلت أم و لا أب و اخواني حاديــن سجاجينهم علية كل ناسي و اهلي يطالبون بموتي
فترة ركود مريت بيها منتظرة ليصير خل يصير استغربت علوان ساكت عني ولا يجي بس جسام يمر
من اسألة يگول مشغول گلبي مامرتاح متضايقة
لحد ما لحيت عليه الة اعرفة وين ليش ماكو خابرة و حاجيتة عرفتة مبطل من شغلة و لاگي شغل بالشطرة صارلة مدة هناك كل اسبوعين ينزل مرة للبيت
وراهة بكم يوم اجو ثنينهم خفت هواي من شفتهم
اذا علوان عرف بأتصالنة بدلهم و مبين ما يرجع خاف يرجعني لأعمامي و يسلمني الهم ضليت محتارة افتر بالبيت و اعصر بأدية كلش تعبت روحي
وكفت يم الشباك همة بمسافة عني يسولفون ما اسمع شي يتهامسون ورة شوية صاح علوان علية
نهبطت طلعت اطكطك ركبي ماتشيلني عيني على ايدة اتصور بهاي الايد يكتلني لو بالثانية يشيل اسلاح و يرميني من خوف جانت هاي تصوراتي
لحد ما رفع موبايل جسام گبالي عگدت حواجبي
مستغربة اخذتة بي صور لأوراق ماكدرت اتهجة
و اقراهن الموبايل يهتز بيدي
رفعت عيوني مستغربة:شنو هذة
علوان:عقد الزواج و التحاليل و داهم الشفية
گلبي صار يدك سريع أگلب بيهن صورة للعقد و صور للتحاليل هواي صور مختلفة اكو بيهن مكتوب بالانگليزي بس كدرت اقرة اسمي عليهن هذة لعرفتة
دموعي صارت تصب رفعت راسي الة احجي بعتب:مو گتلك مريضة و سالم زوجني والله ماجذبت بحرف ليش ظلمتني شتسوة لو وگفت وياي غير انتم
ربيتوني و عشت عدكم ما اسوي غلط
دار عيونة مرتبك مايخليهن بعيني مسحت دموعي رجعت الموبايل ايدي تهتز و گلبي مثلهة يدك قوي
حجة جسام ياخذ الجهاز منة :خل ارسلهن الي و اسحبهن حتى نسكت جدي و اعمامي تفض السالفة و نرجعهة گلهم جنت ضامهة اني بعد ما اوصل ذاك اليوم حسين مارتاحيتلة خاف يطلعون سالفة جديدة
علوان: هاي هي مثل ماتگول تسلم تعبتك وياي
جسام:ماكو تعب ياريت مرة ثانية ماتستعجل
هز راسة ترخص جسام و طلع مشيت للبيت علوان وراي فتح الثلاجة طلع ماي شرب منة خلاه فوك السنك تنهد يفرك وجهة بضوجة
علوان: ترجعين ليسألج وين جنتي گليلهم يم عمتي زهرة
عكدت حواجبي عمتي زهرة عايشة بالناصرية ماعدنة ولد ولا بنات بس هي و رجلهة عايشين سوة
غنوة:خاف هي مخابرتهم لو سائلين
علوان: لا محد مخليهة ابالة اني خابرتهة و فهمتهة
راح اصعد اسبوع و من انزل امر عليج نروح للبيت
غنوة: و الباقي الناس لحجت علية شلون
رد بنتر: اندري شلون اجيبهم واحد واحد و افهمهم
سكتت اعصر بأدية سوة كعد بالهول سويتلة عشة
بيومهة بات هنا و الصبح راح لشطرة لشغلة ، ضليت
لوحدي فكرة تاخذني و فكرة تجيبني بس ماكدر أنكر راحتي من شفت الصور احس حمل طاح من جتفي
مرت فترة الاسبوع لميت الغراض الموجودة ضليت
منتظرة علوان لحد ما رجع طلعت وياه جان مأجر
سيارة گبل من الباب و صعدت مدنكة خايفة مادري
ليش معصب يحجي بنتر و زهگة خلق كلساع زامخ
رجعنة للبيت نخمش گلبي اشوف اعمامي و ولدهم بباب بيتنة نزل علوان اجة لجهتي دفع كروة للولد من الجامة ، و نزلني لبدت بسدة لازمة ذراعة بخوف
عيونهم تخزر بية مشيت وياه دخلني للبيت بس دخلني الحوش رحت اركض جوة لا واحد منهم يلحكني جنت حيل خايفة لهدأني شوية شوفة الجهال تلگوني فرحانين كعدت بالمطبخ حضنتهم
حجت غفران واكفة بصفي: الحمدلله على السلامة
ما رديت نزلت عيوني عنها ولا چني اشوفهة بووست الجهال و گمت للغرفة اخذت هدوم فتت للحمام روحي طالعة و مختنگة اريد بس اخلي راسي وانام
طلعت مقهورة على شعري لصار ينكت نكت يجي بيدي خصل ، طبيت للغرفة ادور على مشط عيني
للباب غفران واكفة لازمة عباتهة مرتكية عليه
حجت هي تلبسهة
غفران: رايحة لبيت جدج اغسل وياهن الفرشات
و البيت
غنوة:شسويلج
غفران:ديري بالج على زيون نايم بالغرفة اذا كعد ريگي و سوي غدة خاف علوان يجي
غنوة:لو اسكت ابنج لو اسوي غدة تردين اخذي وياج
غفران:رايحة اشتغل يدولبتي
غنوة: معلية بي
تأففت رجعت للغرفة كعدتة طلعت تنتر ووجهة مگلوب رحت قفلت باب الغرفة مديت فراشي نمت
لا غدة ولا صخام بوجهة مانسيت حجيهة علية تسوي روحهة حبابة و هي بالخفية تذم بية و تتهم
ماكعدت الة العصر كلش وحدي فزيت عظامي توجعني من نومة الگاع ضليت مددة عيني على البنكة تريد توگف مبين توهة طافية الكهرباء رمشت بتعب اريد اگوم بس ماعندي طاقة اگابلهم و شوفهم
وخرت الغطة گمت ادور شال لبستة طلعت اسمع الجداري تتراگع بالمطبخ و علوان برة يصيح على غفران و الجهال ، طبيت اريد افتح الثلاجة لگيت
بيهة قفل و رزة قافلينهة التفتت للقارورة فارغة
حجت غفران تتخوصر كدامي:مو كتلج سوي غدة اخوج تعبان حال الضيم حالة رجع يريدلة لگمة ياكلهة ماكو
غنوة: اخذتني نومة
غفران:غيررر كتلج گومي ما تكدرين تخلين الغدة و راهة ترجعين تنامين
غنوة:لا ماكدر
خزرتني عيونهة كل عين شوسعة ططززتهن عفتهة رجعت للغرفة شيسون يضربوني صار عادي عندي
زهگت روحي و مليت تعبانة حيل ماكدر اتحرك
لليل صاحوني على العشة اكلت شوية شربت ماي
گمت ادور على حبابة راس بلكي يهيد شوية لكيت كبسول شربت اي شي اريد ارتاح من الوجع مالتة
صادفت هاي الفترة بداية رجب جنت اصومة هسة ابد مابية حيل واني من غير هاي و هاي صايمة غفران تقفل الثلاجة و الاكل بس بالوجبات حتى الماي عينهة وراه تريدني احجي و اسوي مشكلة
طلعن ثنينهن نفس الخباثة بس صفية جانت تحجي گبالي و غفران مسوية روحهة تحبني هي تضحك علية كل فترة اسمعهة تخابر صفية عود كاعدة بغرفتهة و تسمعني كومة حجية يسم سم من تطلع
تضحك بوجهي وصل بيهة النفاق توكف تتشاقى
و تسولف هي گبلهة تذم و تحجي حتى الواحد يحتار شيحجي وياهة من كد ما تضحك بوجهي احس كلشي جانت تگولة و كل تصرفاتهة هي اوهام مني
عيشتني بقلق
ثاني نزلة لعلوان هي يم اهلهة تروح و تخلي جهالهة مايعذبوني بس اگلهم زعلت يكعدون عاقلين و خطية يساعدوني كل واحد يلزملة شغلة عني يسويها
بيهة بالليل كاعدة بالغرفة اخيط بوجه الدوشك غاسلتة و رجعت اسوي بي يمي نرجس تسولف علية
صاحهة ابوها راحت شوية اجتني تركض گالتلي ابوي يريدج عفت الي بيدي اخذت شالي طلعت للهول
كاعد على الدرج بصفة سجى بنتة اكبر من نرجس بسنة تبجي للوجه احمر مصبوغ صبغ من كد الدموع باوعتلهم مستغربة هو عيونة علية بغضب
جر ردانهة رافعهة توسعت عيوني اشوفهة زرگة حجة بعصبية: ليشش تسوييين بيهة هيج مخلينج تديرين بالج عليهم لو تخليهم يخدمونج
غنوة:انيي؟ لا والله مامسوية بيهة هيج ولا ضاربتهة من الصبح يمي جنة نلعب
حجة يحرك بيدهة :هاييي شنييي ياهو لطاگهة
غنوة: والله مادري
علوان: والله لو شفتج كاتلة واحد منهم الة اموتج نوب حتى الجهال ما خلصانين شعدج ثار وياهم
عيوني غورگن احلفلة ما رافعة ايدي عليهم حجة و رزلني اخذهم لغرفتة احترك گلبي من الصار الليل
كلة ابجي و مكسور خاطري من حجايتة
ضلت غفران بسوالفهة تكتل الجهال و تشمرهة براسي حتى صارو مايكعدون يمي توديهم يعوفوني
ويمشون للحوش لو للشارع بس من يجي علوان
تطلع خباثتهة تضل تتشكى مني و من تصرفاتي
من يروح ترجع تسولف و تضحك ولا جنهة مسوية شي من احجيلهة عن شي سوتة ماتسمع تغير الموضوع ، سكتت عنهة هي تالي لو تخبلني
لو تشردني لان هاي التصرفات مو من وحدة صاحية
جنت انظف بالحوش و هي تفرش المدات جوة الليلة تريد تسوي مجلس يصادف ذكرى وفاة السيدة زينب (ع) و متعودة هنا كل البيوت يسون
تضل الملاية تفتر من بيت لبيت و النسوان وياهة
كملنة التنظيف رجعنة نسوي التوزيعات هي مددت بالمطبخ ظهرها يوجعها حامل كل شوية تتذكر تضل
لازمة ظهرها و تلهب ، مرات ترجع طبيعية تنسى
ماتعاجزت من الشغل اليوم ولا ضجت سويت التوزيعات عضر و كيك اخليهن بجيس كملت كبستين عصير و كارتونات كيك خليتهن بسلات علة جهة ، رحت اسوي العشة كملتة تعشينة من وكت
لثمانية اجتنة الملاية و بيت اعمامي كلهم يمنة يمرن مني مايسلمن حتى الي اسلم عليهة ماترد كلهن گرايبنة و الغربة الجيران نظراتهم علية بينهن
يتشاورن ، بس عمتي ام هلال سلمت عليهة فرحت
بشوفتي كعدت يمي هي بالباب مال الهول و تسمع
الملاية مدت ايدهة تمسح على ظهري تواسيني
شكد نقهرت بيومهة من حجي النسوان و نظراتهن
وزعنة و بدت النسوان تطلع وكفت بالباب ادور شحاطة عمتي نطيتهة الهة رفعت راسي اعدل بالبردة شفت القابلة علياء واكفة و صفية يمهة
صارت عيني بعينهة شكد ردت احاجيهة علة السوتة
بس تراجعت خاف تخزيني ماعدهن مانع يصيحن
و يطلعني الغلطانة محد راح يصدك بية و يردهن
عفتهن بعد هنة و ربهن يجي يوم يطلع الحگ ليقهر
من يوگفن عيني عينك يضحكن علية اعصابي تنهار
تمنيت عدي واحد يدافعلي و اشتكيلة بساعتهة
شكد احتاجيت أم لو اخوات يردن الحجاية عني
ورة ما فضت الهوسة غفران كطت عباتهة راحت هم
ضل البيت كلة هوسة عصاير تارسين بيهة الفراشات
خلص المجلس و كسرن خاطري بسوالفهن والله ولا الم الهوسة ولا تنظف وراهن طبهن مرض يمرضهن
حجيتهة بقهر ادفر بالمدات و المهن نوب عفتهن لان حلفت بعد رحت سبحت خليت مخدتي بالغرفة
تمددت اباوع للسگف كل سوية اگلب على جهة
رفعت ايدي اتلمس جتفي بقهر شكد احاول امنع روحي ما افكر بي بس جذب ولا اكدر انساه ما اسامح
بس هم گلبي بوجعني مسحت على صدري بضيق
گمت ماريد افكر بي ولا ابجي عليه اني لمستاهلة ينبجي علية لسواه بية لا يتسولف ولا يمعقل يابة
القهر العشتة ورة ذيج الليلة و الحيرة لخلتني تايهة
بشوارع ماعرفهة الحجي السمعتة و الكسرة ما تسولف ولا اكدر انساهة وين ما جان من كل گلبي اريدة يضوگ هاي الحيرة لحرتهة و العذاب لشفتة
استغفرت كاعدة بالحوش بيدي دولكة ماي شربت خليتة على جهة نفتح الباب دخلت نرجس تركض
وكفت يمي تلهث نطيتهة ماي شربت حلكهة يابس
غنوة:شبيج جاية مفرفحة
نرجس:امي ودتني تگول خل تخبز العجينة اذا مختمرة باجر ابوي يروح لشغلة يكعد من الفجر
غنوة: روحي گليلهة عمة نايمة
نرجس:لااا عمة حبابة والله تكتلني اذا رجعت
تأففت هاي سالفة جديدة گمت شفت العجينة شنگتهة واخذت الصينية طلعت برة التنور ورة
البيت وكفت اخبز اسمع صوت ضحك من برة
وسوالف نزيت من مكاني من نشمرت حجارة بنص البيت باوعتلهة مستغربة طلعت الخبزة من التنور
صحت نرجس اجتني تركض گتلهة تشوف ياهو ليشمر على البيت طلعت شوية رجعتلي تگول ولد كبار ، سكتت لا يسمعون صوتي كملت الخبز شلتهن
هي اجت وراي بيدها الحجارة و ورقة شمرتهة يم الباب و اجت لازمة الورقة تجر بثوبي تريدني اشوف
التفتت مستغربة ورقة فارغة بيهة بس رقم مكتوب
غنوة:ختولي شمريهة
شمرتهة وراهة راحت للغرفة تلعب اخذتهة شعلت الطباخ حرگتهة ذبيت الرماد بالسنك راح وية الماي
كملت شغلي رجعت للغرفة من التعب نمت لثاني يوم غفران حادة سنونهة البارحة ضالة تشتغل ما
نظفت البيت رجعت لگتة بوهستة فزيت بالليل على اصوات مراگع الجداري بس ماگمت ضليت نايمة
الظهر علوان بس واصل هناك مخابرهة اجت جابت الموبايل اخذتة مستغربة رديت عليه طاحلي بذاك
الحجي و الرزايل كل كلمة منة سجين بگلبي سكتت
رجعتلهة الموبايل تباوعلي بشفقة تمسح على ايدي
اخذت نفس زفرتة عفت الجدرية فوك الطباخ رفعت
ايدي خنگتهة من رگبتهة توسعت عيونهة بصدمة
حجيت و اعصابي فلتت: كافي تحجين علية و ترجعين تسوين روحج حبابة والله اكتلج و ما اخاف
سوي لتسوينة كبال عيني لا تصيرين بالوجه مراية
و بالگفة سلاية
دفعت ايدي تحجي بنتر:وخررري شبيج گطعتي الهوة عني ياعلي استر شجاج تخبلني علية تسودنتي
دفعتهة لا يفلت لساني ة احجيلي كلمة و ترجع علية
ضلت تنگث بروحهة و تدردم عفتهة كملت الغدة
تغدينة و نرجس وياي تغسل المواعين و تلم التمن
الطايح نظفت السنك شلتهن الهة تروح تذبهن
خلص شهر رجب و تبعة شعبان مدري شلون عايشة
گلبي ورم من المشاكل من جهة ثانية بس يروح علوان تضل الشباب ورة البيت يومية مسويلهم لمة
غلست ماحجيت بس اگل لغفران تروح تطلع سالفة
علية تگول هي تجيبهم مو بعيدة عنها تسويهة تذب
الحجاية بحلگ صفية و يشرني على الحبل
صرت ما اطلع للحوش اخذت شغل البيت كلة خليتهة هي تنظف البرة مرات تتعاجز لو تضل نايمة
وديت الجهال سحبولي التنور و القنينة خليتهن كبال
باب الهول حتى خاف تگول علية شي من اروح اخبز
بيت جدي مسوين مولد و جهال كلهة تتصايح بالشارع و مخبوصين غفران حالهة من حالهم تحب
هاي السوالف گالتلي اروح الهم بالبيت لمت الجهال
ورة العشة بعدني اغسل بالمواعين هي مشت الهم
فتحت الماي غسلت ادية من الزاهي رحت للغرفة
اخذت العباة و شال بيدي البس بي نفتح الباب اجت
نرجس تضحك لابسة نعال علوان اطول منهة نزعتة
نرجس:گلت لأمي رايحة اجيب انعالي مارضت خليتهة طبت لبيت جدي اجيييتج ركض حبابة عمة تعاي ويانة
حضنت وجهة بيدي بوستهة رديت :هو جاية همزين رحعتيلي اروح وياج
لبست العباة طلعنة سوة لازمة ايدهة تسولف وياي
وصلت هناك ما سلمت بس على جدتي و عمتي كعدت بالهول ماتحركت كلهة هناك و البنات يسون
بالكيك و مخليات الطاولات عليهن حلويات و ورد
اجت غفران تضحك طالعة من الغرفة تفاجئت من شافتني كعدت يمي مستغربة تباوع لنرجس بخزر
غفران:كملتي اماعينج
هزيت راسي رجعت گالت:بسرعة كملتي غير تونة لميناهن و اجينة
غنوة: بسرعة كملتهن شيرادلهن هنة خمسة
غفران:والسنك و الهول لمتروس خبز
غنوة:كملتهن
حجت عمتي تمسح على رجلي: نادرة غنوة هل كملت شغلتهة و اجت
ابتسمت غفران كوة عليهة ضليت كاعدة بين الهوسة و الصياح الجهال كل شوية متعاركين احتفلو و جدتي خلت الكيكة گبالهة يگول دهينة تكطع و توزع بماعين و امة محمد كلهة ملتمة يمهة
خلت عمتي ماعون گبالي تشكرت منهة اكلت شوية
گمت اشوف نرجس نطيتة الهة من الباب جان جسام
واكف يسولف وية حسين يردون يكبرون الحديقة
رجعت لعمتي كعدت بصفهة حجيتلهة بهمس عن الشباب ليوگفون حتى تگل لجسام عليهم هواي مصخوهة خاف تجيني حجاية ما عايزة صدك بس گتلهة طلعت صاحتة شفتهة واكفة برة سولفتلة
رجعنة وصلنة هو باب البيت مفتوح على حيلة دخل
ويانة غفران تتلفت بالبيت نطتة ماي شرب گالهة اريد و راح فتح الثلاجة يشوف شبيهة ياكل عافتة
مشت بسرعة رحت وراهة دخلت لغرفتهة دخلت
يمهة لحد ما سمعنة صوت الباب نسد طلعت
نكت بالغرفة يمي الجهال ضلو يصيحون للوحدة همة هوستهم گابة راسي نسطر سطر من الدوخة
صحت عليهم معصبة من كد ما يحبوني حتى ما
يخافون يضلون يضحكون يفترون علية مسوين
شدة ياورد اني منا الدنيا طالعة من عيني بدون وعي
كعدت ابحي من شافوني هيج سكتو يمسحون دموعي ضميت وجهي بين ادية اعصر براسي نمت
و نرجس ضلت تدلك بي و تعصر بگصتي نمت الفجر
بين الصاحية و النايمة اسمع واحد يصيح بأسمي فزيت الضوة بعيني بسرعة تحسست منة غمضت
جانت غفران واكفة شايلة ابنها الصغير تندس بية
كعدت مستغربة : ها شبيج
حجت تلتفت: ولج هذة رجال برة يگول اني رجل غنوة وينهة
فكيت عيوني مصدومة گمت اتعثر بالبطانية طلعت
كلهة منومة و هدوء اوصل للباب و ارجع محتارة
غفران:امشيي لزلمة امشي
رديت الهة ما مصدگة:هو گالج هيج
غفران:اي والله وعيت على دكة الباب عبالي علوان رجع طلعلي هذة
غنوة:خلي الجهال يطلعون يشوفونة خاف يجذب
غفران:دطلعي شوفي اكو وحدة ماتعرف رجلهة
عدلت الشال رحت فتحت الباب مديت راسي دموعي بسرعة صبن و گلبي يرجف اشوفة واكف گبالي مرتكي على الحايط عينة بالگاع من فتحت الباب رفع راسة الي ضليت اباوعلة مامصدگة لشوفة
حجيت برجفة:دـ.دلهم
عگد حواجبة يباوعلي يتمايز وجهي مركز بية تحرك وصل للباب مديت ايدي لزمت زندة بس اريد اصدك خاف حلم أيست يجي بيوم من الايام هيج فجأة رجع
لزم ايدي نزلهة خلاهة بجفة حجة بهدوء:شلونج
ضحكت بقهر سحبتهة اباوع للبيت ارجع اباوعلة يمة نار اشتعلت بگلبي من شفتة ماعرف شسوي
مسحت دموعي خليت عيني بعينة حتى يشوف شلوني هو نفسة ماتغير جلف و بارد مايحس
غنوة:المن رجعت
دلهم: اخذج لمي غراضج و تعاي
غنوة:شنو
دلهم: شبيج صحصحي روحي جيبي لتحتاجينة خل نمشي وراي طريق
غنوة:ياهو لگالك اريد ارجع وياك
دلهم: عود بعدين عاتبي و احجي حل نروح السيارة مو الي اريد ارجعهة للزلمة
رديت محترگ گلبي منة:انعل ابوك لابو الزلمة لابو لتروح وياك انتتتة شنو من بشر ماعندك احساس لا مستحة راجع تتأمر امشيي منا ولي منين ما اجيت ارجع لا اريدك لا اريد شوفتك
رگعت الباب بوجهة ادية ترجف كل جسمي مثلهة كعدت رجلية ما شالتني احس نار گبت براسي من الحرگة دمي فار نسحنت سحن من شفتة
دك الباب يحجي برود: افتحي خل نتفاهم نرجع وكتهة نتصافة يالله تنتظرج هنا
رجعت راسي على الباب كدامي غفران تأشرلي اگوم اطلعلة هاي من كل عقلهة اروح شلون اثق بي بعد
دلهم:غنووة تسمعينييي
حجت غفران بهمس يمي:گومي شبيج الزلمة متاني روحي وياه مو زين اجاج
هزيت راسي برفض بعدهة تحجي وياي سمعنة صوت من برة صاح : يولدد شعدك لازم الباب
ضليت اتصنت يمعتة رد عليه: شعليك حبيي
جسام: شلون شعلية وانتة واگف باب بيت عمي من غبشة الله شعدك لازك هنا
دلهم: توكل حبيبي الشغلة المالك خبز بيهة لا توصللهة
جسام: شو خل ادقق بوجهك ها انتة الشفية نسيبهم
دلهم: استغر الله ربي
ندك الباب حجة جسام بصوت عالي:ياهيي اهنا افتحييي الباب غنووة
وخرت فتحتة غفران صايرة بس الباب هو دخل نص من جتفة مد راسة لازم اطار الباب عينة علية وكفت
اعدل بشالي ماكدر الزمة من الرجفة و التوتر
جسام: هذة جاي يريدج
غنوة: ما اروح خل يجي علوان و بعدين يتفاهمون سوة
جسام: يعني اشحتة
غنوة:اي خل يروح
سمعت ضحكة دلهم من ورة الباب بس طلع جسام و سداه ماكو ثواني تكاتلو و السب و الشتم صار بفلس
دلهم مغتاض منة و هو يستهزء بي ورة سوايتة وياي
نردم واحد منهم بالباب هزاه هز سمعنة اصوات من الشارع و ولد عمي البقية التمو كلهة تصيح من جهة اصواتهم عالية اباوع وية غفران من زرف الباب صار
الشارع ترابة همة بعدهم واحد لازم الثاني ناس
تريد تفرق بينهم اجة حسين كتف ادين جسام
من ورة سحبة بعيد عن دلهم بس ابتعد شوية كدر يتحرك اجة دلهم طگاه كلة براسة همة كلهم دارو عليه گوة حايزوهم و وخرهم عن بعض ندفر الباب
دخلو حسين و جسام الي فانيلتة مشككة وجهة كل دم عود هو وياه ولد عمي ثنين جا دلهم شني حالة
وكفو على الحوض يغسلون و يسبون بدلهم ضليت ساكتة اعصر بأدية و غفران تگرص بزندي و تحجي
هسة تصير سالفة جر و عر و فضحتينة بين الوادم
خليتي الزلم تتكاون سكتت عنهة طبيت جوة غسلت
رحت للغرفة روحي ممرودة محتارة افتر بمكاني خايفة والله ماريد ارجعلة روحي جازة منة و كارهتة
كل خوفي من علوان يستثگل گعدتي و يرجعني الة
ولا جن الكتلة و العركة اثرت بي بالليل رجع هالمرة
لبيت عمي رايح لجدي الحمدلله تبرة مني گالة معلية ذاك اخوهة و احجي وياه من اجت عمتي ام هلال گالت هيج اجيت اروح لجدي ابوسة من راسة
ثاني يوم اجتني الظهر نرجس تركض بيدهة علاكة
جابتهة كعدت يمي فتحتهة كلهة حلويات و عصاير
دارت عليهة سجى حجت بصياح:ولججج بگتي فلوس من كنتور امييي
هزت راسهة ردت:لا والله رجال نطاهن الي حتى گالي هاي لغنوة وديهة
سحبت العلاگة الثانية جانت ببطن ذيج اشوفة موبايل ابيض من ذني اللمس بس صغير مشتغل
يدك موجود اسمة بالشاشة بس ماكو صوت صامت
ضليت لازمتة بين الارد و بين الماريد اسمع شي منة
سديتة گلت لنرجس تطفي ضلت دايسة علة دكمة
بالصفحة لحد ما صارت الشاشة سودة و طفت
رجعتة للعلاگة نطيتهة حجيت :امشي شوفي وينة الرجال رجعيلة الموبايل گليلة عمتي تگول لو يطلع نخل براسة ما احاجي
هزت راسهة اخذتة ضمت الحلويات يمي باوعتلهن مكشمة شمرتهن جوة الكنتور جان ابو الرجلين بي مسافة عن الگاع صفگت ادية بقهر و غميتهن استغفر الله نعمة الله غيري ما محصلهة شجاني
شوية رجعتلي تعبانة هو بيدهة و مشغلة خلتة بحضني گالت تلهث :يگول غلط عليج نسيت شكال هم گال خل ترد
غنوة:ولججج سجى تعاي هنا سججى
اجتني تركض هاي وكحة اكثر من اختها خليتة بيدهة حجيت اعلمهة: خل نرجس تدليج بالرجال راوي الة و اخذي المبايل و ركضي ركض ترة هو سريع ركضي و شمري بالنهر خوش
هزت راسهة مكيفة بس تريد تطلع للشارع راحن سوة صدك شامراتة و راجعات يتمضحكن مكيفات
بالليل صادف باجر رمضان كلهة سهرانة اجتنة صفية
بس شوفتهة كرهتني بكل البيت سلمت على غفران
كعدت بالهول البنات راحن جابلهة ماي تگابلن
حشن بية لمن ملن كل شوية تگلهة جاينة رمضان ذيج تنفض بثوبهة تحجي محترك گلبهة مني
كعدت بالغرفة يم الباب اتسمع الهن صوتهن عالي
غفران: والله شلعت گلبي شغلهة مرعبل گوة اسخرهة لشغلة ماتگول لو على النص و تعوفهة وانة حامل اركض ركض
صفية: إمداج مابيج خير توليهة تگرص خل تگوم جانت ترجف رجوف مني شبيج يحضي
غفران:شسوي ماريد تكرهني هم رجلهة رد يريدهة ماتفعل تولي وياه
صفية:اي برد برد سمعت من مرت خلف گالتلي ولد
عمومتهة متعاركين وياه و صايرة مذابح
غفران:خزتنة من غبشة الله بالسبعة همة تكاتلو جيب لحايزهم و محد هنا بس انة و البنات
صفية:كش برة و بعيد هوة هذة حظ البـ***" يلعبن و الزلم تتكاتل عليهن مزين اجاهة تتمضيك ست غيوة نهجم بيتهة
گمت طلعت گبالهن سكتن عود مايردن اسمع هنة صوتهن يدلي التايه طلعت برة البنات يلعبن بالحوش غفران طردتهن حتى مايسمعن حجيـهن
عدلت البلوكة كعدت بالجهة الثانية مخلية راسي على الحايط مغمضة شسوي مادري هسة صفية
تترس راس غفران علية هي تروح تسمع علوان خو ما يخليني هنا اكلي حصة خبز اكيد يرجعني الة
مر اسبوع داهم اجة من نگرة و زاوية من حضي الاگشر ضحك على نرجس لعب بعقلهة صارت صاحبتة خلتني اروح وياهة نجيب الديباج من
الحايط وين ما سحبتة نسحب من ورة حيل صعد
دلهم طفر ببيتنة خلاني اشيط من القهر يهدد و يرزل
دفعتة اخذت حجار من الگاع اشمر عليه عمياوي
لحد ما طلع صوتنة و سمع غفران اجت عافني رجعت للبيت اركض طلعت حرگتي بنرجس كتلتهة
گامت تبجي و زعلت ضلت بغرفة اهلهة توبتهة من الطلعة كل ما اشوفهة بالباب اطببهة جوة للبيت
مرن اسبوعين خلصن واجة علوان ورة الغدة گبل نام بالليل ماصدكت غفران كعدتلة حجت كلشي
هو ساكت و يهز براسة اباوعلة و اطكطك بصابعي ادعي بگلبي كون ما يسمع منهة و يرجعني هيج يرخصني گبال دلهم ما يضل الي كرامة كدامة
ثاني يوم بالليلاجة دلهم دك الباب طلعتلة نرجس
نوب رجعت تركض لعلوان تكعدة عَند مايگوم ضل
نايم يطرد بيهم رجعو گالولة ابوي يگول نايم ضميت ضحكتي مكيفة لان ماحجة وياه كون يضل هيج دوم نايم ولا يطلع لان هذة دلهم يفر العقل
علوان استراحتة اربع أيام مرن كلهن هو بالبيت كل ما يجي دلهم مايطلعلة اضل افتر يومية خايفة بليلتهة اجة دك الباب هواي جايب عمي عمار وياه
علوان مرتاك بالهول كدامة تشيرب لو ابوه يجي هم
مايگوم يطلعلة دخل عمي تعارك وياه رزلة ما رد
عيشوني بقلق ثنينهم ساعاتهم مو سوة على لحظة
و يطيحوني بمصيبة و سالفة من بدة رمضان لهسة
علعلو گلبي حتى تعبت بالصيام و راسي نفجر من تفكير و القلق منا الجوع بالنهار اضل الطم منة
اخر يوم لعلوان هنا الفجر يروح كعدت اسوي سحور
كملتة واكفة احضر بالستكاين اجتني نرجس تسحل بية تريد اطلع وياهة تخاف تروح لتواليت عفتهن
طلعت وياهة واكفة منتظرة لحد ما طلعت تغسل من الحوض برة عاطت طايحة بمكانهة گمزتني
وين ما ردت التفتت صارت عيني بعينة مالحگت
سحلني ساد حلگي جراني ورة البيت ادفع بي
اريدة يتحرك مايتزحزح من مكانة حجة بهمس يم أذني :لو محترمين نفسكم جان ماسويت هيج اجيتج من الباب صار يومية رايح راد ما تطلعين الي
صرت ادفع بي اريد اخلص روحي فوك الباب الورة طلعني لا حجاب لا عباة بطرگ الدشداشة صار بسد
الشجر الورة بيتنة دفعني عليهن صام حلگي عيونة
مطززة علية و يخوزر يريد يكتلني مو يرجعني
حجة خانگ صوتي : ورب البيت غنوة اخذج هيج تجرجر صيري خوش مرة راح ادك بابكم ويطلع اخوج و تجين وياي لا والله اسويلي بيكم سالفة كافي مصختوهة جلبب عدج رايح راد يومية
مديت ادية ادفع بيدة ماكدر اتحرك لزم جفوفي سوة فتحت حلگي عضيتة ببطن ايدة نكمشت ملامحة
متوجع ماعفتة لحد ما سحبهة ينكث بيهة
دفعتة من صدرة ابجي و اطك بي : لو تموت ما اريدك بعد ولا ارجع احرگ روحي و العباس ماخليك توصلني بعد ماحبببك ولا اريدك و القرأن يابة كارهتك والله العظيم ما تحرك شعرة مني كلك نسيتك ما تأملت جيتك بس حتى اخلص روحي من تهمهم و حجيهم لو انتة بعد شعرة ماتهز مني
لزم ادية طبگهن ورة ظهري يحجي كاز على سنونة: كاافييي ادري حگج تزعلييين ما ابرء روحي غلطان و عفتج عمدة و ادري بيج عد اهلجج شبعان من هاي السوالف لا تضلين تنعثلين علية عدي كومة شغل تلبسين تجين وياي وراهة عود اراضيج
غنوة:انتتتتة شنووو من بشر تشوف بعينكك لو لا تشوف شصار بية من وراك شگلت لربك من عفتني بحيرتي هااا ما فكرت ما أنبك ضميرك راجعلي مترهي يردني اروح وياه
رفع راسي عاصر وجهي بيدة حجة بصوت هادئ و ناصي:غناوي أهدي امشي لبيتكم خل أخوج يجيني
اخذج من ايدة و كتهة نتصافة سوة بينة شتردين اني حاضر اسمعي مني و اسمع منج
غنوة:لانحجي وياي هيج عبالك تلعب بعقلي لشفتة من وراك مو مال اسكت عنة بكلمتين حلوات افهمم ماثق بيك بعد شلون اروح وياككك واني ما مأمنة
وخر يفرك بوجهة مسحت دموعي التفتت الي دنك
شالني على جتفة عطت لازمتة لا اطيح سد حلگي
اطگ على ظهرة امعش شعرة بس اريدة يعوفني
ولا جنة قصص وروايات عراقية كرار صلاح مشة بين الزرع تختل احتاريت بروحي نوب حتى ما لابسة حجابي هذة شايلني و يمشي مامهتم
نزلني يم السيارة طابگهة يم النهر بعدني مافاكة حلگي حسيت بزة بخاصرتي نزلت عيوني توسعت
لازم سلاحة مخلي ببطني رفعت راسي الة مصدومة
فتح باب السيارة حجة :دخلي والله اذا مشيتي اخذة و اروح افرغة براس ليطلع وراجج يالله صعدي
اصتكيت من الخوف من نظراتة دفعني للسيارة نزع فاليتنة شمرهة علية ندار صعد بجهة السايق اول ما گعد فتحت الباب نزلت رجلي سحبني گبل لا اطلع
رجلي برة السيارة نلوت عطت بصوت مكتوم
سحبني لحد كشنة مد روحة من فوگي صعد رجلي
سد الباب حرك السيارة دفعتة محترك گلبي مبهذلة
دلهم:خلي الفانيلة على راسج راح نمر من السيطرة
اخذتهة لميت شعري و خليتهة فوگة عيني على طريق ابن عمي بهاي السيطرة بس نمر اصيحلة عليه تخلي يرجعني لبيتنة اگللهم هددني بسلاحة
دقايق مشت السيارة و گفهة رجع بك نزل على طريق ترابي مشة منة التفتت الة اريد اخنگة من القهر مد ايدة للجكمجة طلع موبايلات يسوق ويطر بيهن لحد ما لگة ليريدة اتصل مخلي بين الكشنات
حجة اول ما نفتح الخط:هذة انة دلهم اخذت غنوة راجعين لبيتنة
علوان:يا گ***" شلووون تاخـ***"
ماخلاه يكمل كلمتة سداه گبل الموبايل عينة على الطريق وكف على جهة بسرعة فك الم بايل طلع الخط كسرة بسنونة ذباه جوة رجلة رجع يسوق
درت وجهي للطريق ظلمة بس ضوة السيارة مشة هواي ثنينة ساكتين شكد جان عدي حجي بگلبي بس من شفتة كرهت حتى اعاتبة و اتعب روحي من اجة بارد ولا جنة يتأمر عبالة بس هو بالدنيا مامتهم
مد ايدة طخت برجلي دفعتهة باوعلي برود اخذ باكيتة ضل يدخن جكارة ورة الثانية لحد ما وصلنة
طبگ السيارة يم بيت صغير اول مرة اشوفة كل ابالي يرجع لذلك البيت وكف السيارة نزل اشرلي
نزلت جا المن ضالة رحت وراه فتح الباب دخل مشيت وراه فتحلي باب الهول دخل شمر غراضة بالگاع شمرت القميص هم عليه كعدت يم الباب
البيت هدوء و احنة ساكتين يمشي و يتحرك گبالي من اشوفة روحي تطلع اتمنى اشرب دمة بهاي اللحظة ، لميت رجلية كعدت اهز بيهة بقلة صبر
طلع من وحدة من الغرف بيدة مخدتين شمر وحدة علية و وحدة خلاهة بالگاع نزع الفانيلة التعلاگة
البنطرون درت وجهي متقرفة من برودة و هدوئة
دلهم:من اكعد نتفاهم نامي اذا تردين
غنوة:نومة بلا گعدة ان شاء الله
دار وجهة للحايط نايم على بطنة بس صوت البنكة ينسمع هي اطكطك ضليت على گعدتي لحد ما سمعت صوت الاذان گمت ادور ماي اخذت بطل
فوك الدرج محطوط طلعت للحوش توضيت صليت
هو بعدة نايم زحفت يم راسة سحبت الموبايل توني
رجعت كمش ايدي عاصرهة نزيت خايفة اخذة خلاه
جوة المخدة رجع نام صفگت ادية غميتة رجعت لمكاني احوس طلعت برة ماريد اكعد يمة نمت بالمطبخ احجي وية روحي كون ما اغط بالنوم و افز اول ما يكعد من الجوع و السهر نمت للتسعة اصبح
كعدت ممرودة بطني من الجوع البارحة ما اكلت هواي و ماتسحرت لا شاربة ماي جسمي كلة تعبان
ضليت مددة اتلمس برودة الكاشي جواي اتگلب
ماصدگت أذن الظهر بية مابية گمت صليت اباوع عليه نايم ضليت اوصل يومة و ارجع شبي هذة ميت
خليت التربة صليت كملت ، صليت ركعتين بصوت عالي لحد ما تحرك فز يتگلب سكتت عنة عايفتة
كعد العصر وجهة يتلاطم واني روحي مخلوبة من جوع كوة فاتحة عيني ثنينة سكتنة محد الة خلق يحجي طلع وية الاذان رجع ورة فترة جايب فطور
عزت علية نفسي اكل منة خلاه بالهول جاب ماي و بطل لبن يمة كلاص مشة غسل برة رجع كعد ياكل
حجيت اخزر بي: ماريدك رجعني لهلي
دلهم: همة اهلج ما بيهم خير مايردن رجعتج
غنوة: هاي حجاية تگلياهة تعايرني بهلي
دلهم:ما جذبت اني و انتي نعرف اهلج مايردونج
غنوة:معليك اهلي و اني اعرف بيهم طلگني خل كلمن يروح بدربة
دلهم: مو هسة بعدين
سحبت نفس زفرتة كوة صابرة احجي وياه رديت اهدي بروحي:شنو بعدين شتريد مني
دلهم:ماتجين تاكلين مو صايمة
غنوة:معلييييك بية عسى ما اموت من الجوع ما الك علاقة لاتبدل السالفة گلي شتريد
دلهم: حرام ماتكسرين صيامج تعاي اكلي
غنوة: انتة تعرف الله حتى تعرف حلالة و حرامة
دلهم:انتي تعرفينة تعاي افطري
غنوة: و علي افطر راسك بهاي الثلجة انتتتة شنييي من رجااال ماتشوف حالييي عبالك العب وياه دشوفني الدنيا طافية بعيني باوعلي صاير بية تعبانة و الله العظيم گلبي ورم من ورة السويتة ماتخاف الله
راجعلي تلزگ بحاگك تبيع الحجاية بيع علية ما اشاقة ولا اريد اعاتبك بس اريد تعوووفني رجعني لهلي و طلگ بلكي هاي السواية تشفعلك
رفع البطل مال اللبن صب بالگلاص يباوعلي برود ولا چنة شرب مد الي :هاج افطري
طكيت على رجلية محترك دمي التفتت محتارة اريد اطلع حرگة گلبيي بس شلون مادري نار مشتعلة اعصابي تلفتت گمت اريد اطلع هي گومة هي طيحة
دخت لزمت الحايط كاعدة رفع راسة الي حجة:الله على كيفج المن تعذبين بروحج عايزة تعاي اكلي وراهة سوي لتردينة
غنوة:اسكت لاتحاجيني معليك بية
دلهم: تعاي اكلي و اخليج تخابرين اهلج يالله
غنوة:المن مخابرتهم خاطفني شني ولي عني كوة علية اباوع عليك خاف اكل و تقيء
دلهم:بكيفج انتي الخسرانة تضلين هيج باجر تتخربطين غصباً ما عليج تفطرين
درت وجهي متجاهلتة كمل عشة خلة الباقي بصفي كام طالع حجيت اصيحة:تعااال راح اكل بس خليني اخابر علوان
دلهم: تخابرين ليش لا
غنوة:وين احنة حتى اگلة خاف اغمض و افتح لنك شارد و عايفني افر بأذني
اتصل عليه سمة المنطقة الاحنة بيهة مد الي الموبايل حاجيتة حصلت دك رزايل گتلة وين احنة سديتة رجعت الموبايل الة اخذة خلاه بجيبة
سحبت السفري مال الكباب سويت لفة اكلتهة حسيت روحي ردتلي شربت ماي گمت غسلت اباوعلة صافنة ايدي على خدي هو بالحوش لازم الموبايل و سجينة بيدة يخابر و يخفر بالحايط
رجعت للبيت تمددت لافة رجلية ببطن الدشادشة
ضليت ساكتة عنة حاجاني ما رديت وصل يمي عصر وجهي بيدة عينة بعيني يحاجيني و مغلسة عنة
طگت روحة خلة و مشة طول هاي الفترة موبايلة بيدة وين مر الوكت يالله اجة خلة مخدتة هو على المدة يم الحايط و اني علة الثانية بنهاية الغرفة
متمددة ايدة جوة راسة المحة كل شوية يباوعلي حجة ورة فترة :عينج شبيهة صغيرة تختلف عن الثانية
رفعت عيوني الة انترست دموع صرت ما اشوفة مارديت شگلة اخوي طكاني وعماهة هم يلزمهة علية غمضت درت وجهي للحايط خانگة البجية
اسمعة يتنهد لو يزفر اريد اخلي ادية برگبتة و خنگة كلش حاقدة عليه من اتذكر شلون حاجيتة وسد الموبايل اموت من القهر اتگلب مسحت عيوني ماريد ابجي شوية شوية اختفى صوتة التفتت الة
نايم ضليت حذرة منة حركت ايدي گبالة ماكو رد گمت محتارة امشي للغرفة لگيت جنطة فرغتهة
قميص عريض لبستة فوك هدومي و فانيلة على راسي لميت شعري و شديتهة ارجع بكرامتي ولا اتاني ابد ما منتظرة شي منة كل وعودة جذب
طلعت اتلفتت جريت بوتينة كاعدة بباب المطبخ البس هو نايم بالهول لبست واحد شديت القيطان
والثاني توني خليتة برجلي أشد بي جمدت ايدي
ماكدر اتحرك اسمع صوتة من الهول يوصلني يغني
ـ صغيـــر بعدك رايح ويـــن
مايرحمـــوك الصياديـــن
صغيـــر بعدك رايح وين
شكرا لزيارتكم عالم روايات سكيرهوم
