رواية جذبني فمك البني الفصل العاشر 10 بقلم عبير إدريس

طلعنه من الغرفه وخليناهم يحجون براحتهم كلت خاف يتقيدون لان احنه موجودين او احتمال هو ماعنده خبر بوجودنه وعمه تستحي تحجي بموضوعنه واحنه موجودين ..

كعدنه بالهول وره تقريبا نص ساعه طلع ايمن صاح ياالله ...

سيلين : تعال كاعدين..

فات مدنك راسه وبيده الحاسبه كبل طلع بره ...

سيلين : هاي شلون سالفه خطيه وين راح يروح..

ايفين : نسأل عمه اكيد عدها غرف زايده ناخذ وحده ونكعد بيها من هو موجود علمود ليتقيد بينه..

سيلين : استحي احجي وياها اذا تريد هيه تكول..

ايفين : ادري عمتج قابل غريبه.

سيلين : سكتي هسه وتعاي نروح يمها خاف تحتاج شي..

ايفين : يلا..

كمنه رحنه يم عمه شافتنه مسحت عيونها..

سيلين : ها شو باجيه..

ياسة : كل ما احجي وياه اخذلي ساعه ابجي..

سيلين : اي ليش ياعيني ؟

ياسة : حنيته هواي ما اتحملها مرات ضميري يأنبني لان كاعد اكذب عليه وعيوني بعيونه..

سيلين : اووف عمه غير انتي تره الموضوع جبير واحتمال يزعل منج اذا عرف..

ياسة : مو مهم اهم شي عندي يكمل ومن يرجع شيسوي خلي يسوي قابله.

ايفين : جنكم بلابل حب...

سيلين : نطق ابو الهول..

ايفين : عمه شوفيها شلون تحجي..

ياسة : يلا حبيبتي شنو يعني اختج تتشاقه وياج..

اشرتلها بحواجبي يعني فشلتج حسيتها ضاجت مني كمت وكفت وراها وحضنتها بستها وهمست بأذنها ..

سيلين : لا اني عندي غيرج ولا انتي عندج غيري لتزعلين مني ولج...

ربتت على كف ايدي الجان على جهة كلبها وطبعت بوسه رقيقه على اصبعي اني هم جريت ايدها بستها سحبتها وكامت حضنتني وبجت وعمه هم بجت ويانه على الواهس...

اندك الباب وخرت ايفين ورحت فتحته ايمن واكف والوجه مخطوف اول مشافني صاح شبيها ياسه.

سيلين : مابيها هياتها كاعده ..

ايمن : لعد ليش تبجون خبلتوني..

سيلين : ههههه ماكو شي بس احنه عائله غاوين نكد تعلم علينه منا ورايح..

مد راسه وحجه ويه عمه بعتب.

ايمن : ياسه هاي سالفه تسويها بيه صدك جذب..

ياسة : شسوي بجن كدامي وبجيت وياهن ما اتحمل متعرفني ..

ايمن : اوووف ياحسين جنت بوحده صرت ب ٣ الله يعين كلبي منا لمن يرجع ادهم واخلص.

ياسة : هيج ضايج من عدنه ..

ايمن : لا بس ورمتي كلبي بس تبجين واجني بنات اخوج زادن الطين بله..

ضحكنه على سوالفه مبين ضحوك ومرح يحب يتشاقه بس بنفس الوكت ثكيل ورزن مو ملطلط...

ايمن : بهاي المناسبه التعيسه راح اجيب لحم ونشوي بره على المنقله شتكولون بنات...

يحجي ويباوع علينه مبتسم..

ياسة : يعني على الغده ..

ايمن : اي نشوي و نتغده بره الجو حلو ..

ياسة : يلا بكيفك اذا عاجبك جيب..

ايمن : انه كلشي يعجبني انتو تحبوه لو لا..

ايفين : اني ماحب اللحم..

جان مبتسم اختفت الابتسامه وركز على ايفين حجه جد...

ايمن : شنو يعجبج اجيب..

ايفين : اذا تكه دجاج بيها مجال معلاك ميخالف بس اللحم لا..

سيلين : ولج ..

ايمن : عوفيها شسالفه قابل تاكل شي متحبه احنه هنا ماعدنه شي جبر بكيف الواحد..

ياسه : هاهيه جيب وياك معلاك لافونه تستاهل واحنه راح نحضر المنقله والفحم بين متجي..

ايمن : شو احنه انتي معليج تكعدين على صفحه وتتفرجين اذا تردين لو اكلج نكمل يلا لان مو زين عليج الدخان والجو الملوث..

ياسه : مرضوني واني مابيه شي..

رفع ايده وباوع ليفوك صاح .

ايمن : من حلكج لباب السما كون تحاليلج نظيفه ونرتاح..

ابتسمت عمه وهو ترخص وراح ...

سيلين : عمه بين ميرجع خليني اشتغل حبابه..

ياسة : لج اليوم جيتي انطي صبر ارتاحي سبحي عود تلحكين على الشغل..

سيلين : عمه اكمل كم غرفه اليوم وافوت اسبح وباجر اكمل البقيه تمام..

ياسه : براحتج انتي عاجبج تشتغلين..

سيلين : اي والله عاجبني البيت يسوي واهس بشنو ابلش يلا ..

ياسة : بلشي بمكتب ادهم الكتب مالته بالكارتونات ومكدرت ارتبهن بالمكتبه وعلى كيفج فدوة خاف ينشك كتاب لو توكع تحفيه من ايدج تره بكلشي مستعز خصوصا شغلاته من جان صغير تره يخبلنه اذا انكسر شي..

سيلين : وانتي عفتي البيت كله انطيتيني غرفته ابلش بيها..

ياسة : اريد اشوفه الغرفه من يتصل خاف بيها نقص..

سيلين : مممم انتي تعرفين شنو يحب واثثتي على هالاساس لو هو نفس الاثاث جبتوه..

ياسة : لا نفسه جبناه لان هو اختاره بعنايه واني ضفت كم شغله ماعرف اذا تعجبه او لا...

سيلين : اتذكر السويت مالتج جان يجنن حرامات عفتيه..

ياسة : ماكو شي يسوه ينكال عليه حرامات بس العافيه تستاهل واحد يكول عليها حرامات وبعدين شسوي بيه حلو وممتراحه ودك مشاكل..

سيلين : لو بس اعرف ليش هيج يتصرفون وياج انتي بالذات..

ياسة : امه تكوم وتكعد تكول مو من مستواه هاي بعد ام وعقليتها شسوي عوفج مني وروحي رتبي المكتب فدوة علمود باجر من يتصل افتح كامره واشوفه..

سيلين : تدللي ولو راح افوت وايدي على كلبي ماحب اشتغل بغرفه ولد وخصوصا اذا بيها شغلات عزيزه اكوم اشتغل وايدي على كلبي..

ياسة : شدعوه ادهم حباب بس يضوج اذا صار شي بغراضه..

سيلين : يلا راح اروح واحا

ول على كيفي اشتغل واطلع بأقل الخسائر..

ياسة : اي فدوة وباعي المنور بصف المطبخ تلكين ادوات التنظيف كلها..

سيلين : هذا هو حبيبتي يلا راح اترك يمج افونه على ما اكمل واجيكم .. ...

ياسة : عاشت ايدج مقدما..

سيلين : بعدني مسويت شي من اكمل عود كوليها ههههه..

ياسه : رشوه هاي شبيج..

سيلين : ماحب الرشاوي ههههه...

ضحكت وطلعت سديت الباب عليهم ورحت للمنور جبت الغراض ودخلت لغرفه المكتب مالته خليت الادوات بالكاع ورحت فتحت البرده ...

باوعت على الاثاث والالوان عباره عن خليط بين العصرية والماضي ، اخذتلي فره اباوع على اثاثه المكتبي شلون مختاره بعنايه وتأني ، كلشي بيه يدل على فخامة الاختيار ..

بلشت افتح الكارتونات واطلع كتاب كتاب امسحه بوصله ناشفه واخليه على الميز ، كتبه اغلبها بالانكليزي جنت اباوع كتاب كتاب بعدين تعبت وتأخرت هواي ، كمت اسفط بالمكتبه حسب الالوان مال الكتب الابيض وحد والاسود وحد والرمادي وحد وهيج كملت كل الكتب وصلت للكارتونات البيها تحفيات هم طلعتهن امسح وارتب كل وحده بمكان اني مو كلش اعرف بذوق الترتيب مال الاثاث لان كضينه عمرنه بغرفه بيها كنتور خشب وفراشات بالكاع ، وبعدين حتى الكنتور محضينه بيه ، لهذا رتبت حسب اللي اشوفه بنضري مناسب ...

مسحت الارضيه وعلكت البنكه علمود ينشف المسح طلعت اريد ابلش بغير مكان لكيت ايمن بالمطبخ واكف يكصكص باللحم ويمه ايفين تثرد سوالف وهو ساكت بس امم وامم ميحجي تخبلت ..

سيلين : ايفين تعاي ويايه ساعديني..

شافتني اختفت الابتسامه من على وجها واجتي خليت الغراض بالكاع وسحبتها طلعنه بره بالحديقه..

سيلين : شعندج واكفه يمه وشجنتي تحجين.

ايفين : اجه للغرفه كال جبت الاكل راح اسويه واني كتله اجي اساعدك...

سيلين : ولج منو صخم وجهج تتبرعين بكيفج مو راح تخبليني انتي شعليج بيه لو يريد مساعده جان كلج ، سمعيني الولد مبين ثكيل ومو مال سوالف لواكه جوزي وثكلي

ايفين : والله محجيت شي بس سألته انت شنو مكمل..

سيلين : لا يا الله وانتي شكو شعليج منه شكو تدخلين منو كلج هو يحب يحجي عن نفسه للغربه..

ايفين : بس تدرين طلع خريج تربية قسم تاريخ..

كتفت ايدي واباوعلها..

سيلين : اي معرفتي عمره شكد يحب لا..

ايفين : اي عرفت مواليد ٨٦ ومتعين بمحافظتهم وهسه لان عطله اجه هنا من يبدي الدوام يروح لبيتهم وكال اذا ضلت عمه مريضه احتمال ينقل هنا..

سيلين : حلوو وبعد شعرفتي بله ..

اني جنت احجي مفوره اريد اكطعها وهيه تحجي والابتسامه مرسومه على وجها ذايبه اختي ذايبه..

ايفين : هاهيه وانتي اجيتي مخليتيني اسأل بعد..

سيلين : خوما حجيتي شي يخص حياتنه..

دنكت راسها مقهوره .

ايفين : لا بس سألني شمكمله كتله ثاني متوسط ..

سيلين : رفعي راسج على شنو ضايجه غير جنتي مريضه..

ايفين : اي بس اني اخجل واحد يسألني واكوله ممكمله..

سيلين : ان شاءالله تستقر حياتنه وتكملين بس فدوة لعينج لتحجين وياه بعد حبابه لخاطري اذا تحبيني سمعي كلامي..

ايفين : والله متجاوزت حدودي شبيج..

سيلين : اعرف بس يبقى غريب واي تصرف من عدنه محسوب علينه..

ايفين : هاهيه بعد ما احجي وياه..

لعبت بشعرها بيدي كفشته..

سيلين : يلا روحي يم عمه واني راح اكمل ..

راحت واني هم رحت للهول بلشت امسح بالجام ، فات ايمن وبيده صينيه بيها اللحم والمعلاك مسويه شياش فات مدنك ويمشي سريع ... كملت الهول ورحت انظف غرفه عمه ، لكيتها كاعده تسولف ويه مريومه من طبيت رفعت راسها..

ياسه : عمه عوفي تعبتي ..

سيلين : بس غرفتج والباقي باجر ..

ياسة : والله تتعبين..

سيلين : لا ماكو تعب ، عمه سؤال ..

ياسة : كولي.

سيلين : ايمن شكد مؤدب تدرين يفوت ميرفع راسه ..

ياسة : همه هيج متربين حتى من تزوجت وين يلا قوت علاقتنه بس بنفس الوقت مو نحسين طبعهم حلو لاميها من كلها..

سيلين : الله يحفظهم منو عندج بعد غير ايمن..

ياسة : فهد اصغر من ادهم بسنه والباقي بنات..

سيلين : هاا فهد اللي لازم شغل ابوه..

ياسة : اي عفيه هو.

سيلين : وكم بنيه..

ياسة : اربعه ..

سيلين : حبابات..

ياسة : اي والله زينات بس جان فهد مأذيني وامه البقيه كلهم حبابين ...

سيلين : الله يهديهم ...

ياسة : عيوني شوفي ايمن خاف محتاج شي..

سيلين : اي هسه اروح..

طلعت رحت يمه لكيته مكمل شوي اللحم وباقي المعلاك..

سيلين : الله يساعدك تعبناك..

جان يهفي على المنقله بالكارتونه من سمع صوتي رفع راسه مبتسم .

ايمن : ماكو اي تعب مسويت شي..

سيلين : اساعدك..

ايمن : لا ماعندي شي بس اذا تكدرين جيبي بصل وطماطه نسيتهن..

سيلين : ماشي..

رحت جبتهن وخليتهن بشياش ، شافني اخذهن مني من الطرف الثاني وخلاهن على المنقله..

ايمن : عاشت ايدج هاهيه روحي تصير بيج ريحه شوي..

سيلين : يمعود هسه واذا عود واحد يغسل..

هز راسه مبتسم واستمر يهفي ويكلب بالشياش.

سيلين : نتغده هنا لو جوه..

ايمن : هنا خلي ياسه تضربها شمس شويه.

سيلين : اي هم صدك ..

ايمن : هسه اكمل وبعدين

نطلعها..

سيلين : ماشي لعد اذا متحتاجني حروح يمها ..

ايمن : اي اي ..

مشيت ياربي هذا شبيه مرتبك اللي يشوفه يكول لا شايف بنات ولا داخل كليه ومختلط مدري هو مؤدب زياده عن اللزوم مدري تعلمت على ولد عمي لهذا مستغربه وضع هالولد رغم اكبر مني بخمس سنوات والاحترام موجود ضحكت على نفسي لان مستغربه و ممتعلمه على هيج اسلوب وهيج تعامل..

رجعت يم عمه وره شويه طلعنه كلنا تغدينه ...

بليل نطتنه غرفه وطلبت من ايمن يجيب النه اسره وكنتور ، ثاني يوم راح جاب مثل ما وصته مقصر الولد ابد شدوهن العمال وطلعو كعدنه اني واختي نرتب بيهن بحيث يوم كامل مطلعنه من فرحتنه وعمه اجتي يمنه كعدت ...

مرت ٣ ايام وطلع التحليل مال عمه راح ايمن جابهن والصدمه جانت الورم خبيث ...

كعدنه نقنع بيها تروح طبيب علمود تتعالج وهيه عاندت متروح وركبت راسها نحجي نريد ابد متقبل اي نقاش اخر شي ايمن خابر على اخته الكبيره وحجالها ثاني يوم اجتي مبينه بنيه حبابه بس ضايمهة الضيم مبين التعب على وجها ولابسه اسود دخلت يم عمه بالغرفه وسدو الباب ، ضليت ادعي كون تكدر تقنع عمه تتعالج..

طلعت البنيه وراحت لايمن جان بره بالحديقه وكفت يمه وضلو يحجون اني دخلت يم عمه لكيتها تبجي..

سيلين : عمه حبيبتي ليش متقبلين ترحين للطبيب تره هاي حياتج مو مال عناد..

ياسة : ماروح لتلحون عليه ما اريد اكضي اخر ايام عمري بين المستشفيات والاطباء.

سيلين : ليش متفاوله على روحج بلكت تطيبين..

ياسة : ليش نضحك على نفسنه من اسمه مرض خبيث يعني ميروح ومعروفه نهايتي شنو خلوني اشبع من بنتي ومرتاحه بيتي ماريد انام بفراش مال مستشفيات افهموني ولتلحون عليه..

سكتت لان حسيتها منهاره طلبت مني اطلع واطفي الضوه ، اخذت مريومه وطلعت ، لكيت حماتها وايمن كاعدين بالهول كعدت يمهم حجت البنيه.

_ انتي بت وضاح مو ..

سيلين : اي .

_ اني اخت ادهم اسمي نرمان..

سيلين : اهلا وسهلا بيج تشرفت..

نرمان : الي الشرف حبيبتي ، شفتي عمتج شلون متقبل تروح تتعالج..

جريت نفس بحسره..

سيلين : مكاعد تتقبل الفكره اصلا واني كلش خايفه عليها وكلبي نار ..

نرمان : لازم نبلغ اخوانها لو ادهم شلون نضل ساكتين..

ايمن : متقبل ادهم يعرف وتنهار اذا خالفناها وهيه اصلا موزين عليها حركه الدم كالو لازم ابد متنغث وتجنبو الانفعالات وياها لان تأثر على حالتها الصحيه..

سيلين : والحل شنسوي ؟

ايمن : نتصل على واحد من عمامج ونشوف رأييه..

سيلين : خابر عمو فرات حباب وشويه علاقته زينه بعمه بلكت يكدر يأثر عليها..

ايمن: عندج رقمه؟

سيلين : اي عندي هسه اجيب الموبايل وانطيكياه..

رحت للغرفه جبت موبايلي ورديتله الرقم ..

اتصل وكام طلع بره ، ثاني يوم اجوي عمو فرات وعمو محمود حجو هواي ويه عمه وجانو حيل مقهورين على حالتها ونفس العناد مقبلت ابد تروح ..

مرت سنه كامله وعمه راكبه راسها متقبل تتعالج ورجعنه خابرنه على عمامي اجوي واجتي نرمان هم حجو وياها عاندت اخر شي جبروها تروح طبيب مختص بحالتهة ،

طلعو ساعه اربعه العصر رجعو بثمانيه بليل الوجوه متتفسر ، طببوها للغرفه وضل عمو فرات يمها وطلعنه كلنا كعدنه بالهول ، الألم مبين على وجوهنا متحملت سألت نرمان....

سيلين : عفيه شنو كال الطبيب ؟

نرمان : لازم نبلش علاج من باجر لان المرض متقدم واي تأخير مو بصالحها ..

سيلين : شلون قهر يعني اكو امل تتعالج..

نرمان : بيد ربج يحي العظام وهيه رميم..

سيلين : يارب خير

حجيتها وبجيت .

نرمان : لزمو نفسكم كدامها يرادلها قوه وقوتها تاخذها من عدكم ابد لتضعفون ولا تبجون وضروري نبلغ ادهم..

محمود : شيسوي اذا اجه عوفيه الرجال يكل ويرجع..

نرمان : شلون يصير والله غلط الدتسوووه ادهم اذا سمع يتخبل عليكم..

محمود : هاي رغبتها هيه هيج تريد ..

نرمان : المفروض هيه تطلب من عدنه نبلغه على الاقل تشبع منه تستمد قوتها من زوجها ...

سيلين : واني هذا رأيي..

هزت راسها ضايجه ، كلنا منعرف شنسوي ،

ثاني يوم راح عمو محمود وراحت نرمان ضل عمو فرات وايمن ، وبلشت عمه بالعلاج اسبوعيا ياخذوها للمستشفى تاخذ جرعه وترجع تأن من الالم ...راح عمو فرات وضل ايمن ياخذها خطيه الولد حتى دوامه عافه اخذ اجازة بدون راتب ....

وبيوم رجعت تبجي من الألم اكثر من كل مره رحت كعدت يمها لزمت ايدي عصرتها حيل..

ياسة : ولج عمه لحكيني متت من الالم..

سيلين : سوده عليه عمه شبيدي عليج ياعيني..

احجي وياها واحاول اضم دموعي علمود لتحس بخطوره الوضع ولو هيه تعرف ذكيه..

عمو ادهم كل ما يتصل يحجي وياه ايمن يكله نايمه لو بالحمام لو بالسوك اخر شي سمعته صاح ب ايمن..

ادهم : انه مو غبي جاي احس ياسه بيها شي عليش متقبل تحاجيني هسه تودي الحاسبه يمها عسما بالحمام .

ايمن : بس.

قاطعه..ونتر بيه.

ادهم : كتلك بسرعه يلا منتظر..

اشرلي ايمن بيده يعني روحي انطيها خبر..

دخلت يمها.

سيلين : عمه عمو ادهم يريد يشوفج وصار عصبي..

ياسة : شلون يشوفني متكليلي وهذا شعري نصه انهل

س..

سيلين : عمه لبسي حجاب خطيه كلبه مفور عليج..

ياسه : جيبي وطفي الضوه حتى مينتبه على ملامحي ..

سيلين : تمام ..

رحت جبت الربطه لبستها وطفيت الضوة ورحت لايمن

اشرتله تعال ، فات كدامي للغرفه راد يعلك الضوه لزمته من طرف ردنه واشرتله لا..

هز راسه متفهم خله الحاسبه كدامها وطلع اني ضليت واكفه على صفحه..

اول ماشاف وجها جر حسرة..

ياسة : شلونك ادهم...

ادهم: موزين ليش حارمتني من شوفتج صار كم يوم الوب عليج..

ياسة: مشغوله بلبيت واطلع يوميه اشتري حاجه اريد اكمل واستقر.

ادهم : على كيفج يايابه قابل راح يطير السوك ، صحتج اهم عندي لتعبين نفسج..

جريت حسره كلت لو تدري بحبيبتك شبيها وشكد باقيلها جان شسويت...

ادهم : علكي الضوه اريد اشوفج ليش طافيته..

ياسة : مريومه نايمه بس اعلكه تفز..

بدة يتغزل بيها طلعت وسديت الباب خجلت ادري انت كبل تجيت ههههه..

طبيت لغرفتي باوعت بالمرايا وجهي انصبغ احمر دم هههه كل شويه اتذكر كلامه وافشل شكد عيب خرب...

ثاني يوم كعدت على صوت هوسه بره رحت لغرفه عمه اسألها شنو السالفه..

سيلين عمه شنو هاي الهوسه..

ياسة : عمج من عرف انتو موجودات يمي خابر ايمن وكله ابني سويت الك فوك وطلع درج مفصول ولتوصل للبيت اله عندك حاجه ضروريه وطلب مني اني اوصل الاكل اله مقبل انتو تحتكون بيه وبسبب مرضي وعلاجي التهه ايمن و تأخر البناء هسه يلا بلش بيه ..

سيلين : يافدوة لغيرته ولشهامته والله حبيته لعمو اكثر من قبل ..

ياسة : انتي شايفه منه ادهم ملاك ورب العالمين دزة الي متشوفين كلبي مينطيني اوجعه وهو بالغربه ماريد يقلق عليه لان اعرفه يموت اذا عرف وبنفس اليوم يرجع.

سيلين : عمه شنو هذا حبكم عجيب..

ياسه : اوووف سيلين تعرفين من شنو خايفه .

سيلين : من شنو ؟

ياسة : اذا متت وراد يتزوج يمكن روحي تنذبح الف مره ..

خليت ايدي على حلكها..

سيلين : عمه لتحجين هيج فدوة رحتلج.

ياسه : تخيلي تجي وحده تاخذه وتعيش وياه وتنام بحضنه ويدفيها ويتغزل بيها وتربي بنتي وتاخذ بيتي اللي تعبت بيه يمكن تكولين عمتي انانيه بس اني شنو شفت منه بعدني متهنيت وجفتني المرض.

سيلين : عمه انتي ليش هيج متفاوله على نفسج تره حرام الدتسويه...

ياسه : اني اعرف بنفسي مريضه من قبل سنتين من جبت مريم الدكتوره شكت عندي ورم على الرحم وطلبت مني تحاليل وسونار واني خفت وتماهلت ...

سيلين : ليش سكتي اذا تدرين من قبل سنتين صدك تحجين عمه انتي ام العقل هيج تسوين بروحج وبزوجج احتمال جانت حالتج بسيطه وبسبب اهمالج تأزمت..

ياسة : ماحب الاطباء ولا احب العلاج ...

سيلين : بالعكس لازم تتعالجين وتقاومين المرض حتى متجي وحده تاخذ بيتج ورجلج وبنتج منج..

ياسه : هاي سنه الحياه لازم يتزوج بس هضيمه سيلين اني يوميه اموت الف موته من اتذكر وحده تاخذ مكاني بكلبه..

سيلين : عفيه عمه لتحجين هيج مو كطعتي كلبي ..

ياسه : حقي لو مو حقي احجي ضميرج رجلج يحبج ويباوع على حلكج من تحجين ويتمنى رضاج ويوفرلج كل سبل الراحه وفجئه تعوفيه وترحين لعالم ثاني غير هذا العالم مو بأرادتج مجبوره تتركين كلشي وتالي ...

خلت ايدها على عيونها وشهكت تبجي وتناشغ ...

سيلين : كافي بعد لتحجين.

تقربت يمها ونيمتها على صدري وكمت امسد على شعرها لحد منامت..

متت بيومها حتى نفسيتي نسدت عن الاكل وعن الحياه كلها. ضليت مكابلتها وكاعده من اشوف بنتها تفتر وتلعب دموعي تنزل من وحدهن عليها وعلى عمتي اللي ماشافت الخير من وره العيون والنفس حركها حرك..

وهيج مشت الايام غرفه عمه تحولت لغرفه مصغره من المستشفى واني كمت انام يمها وانقسمت ٣ اقسام ايد عليها وايد على مريم وايد على البيت ..

ايمن يساعدني هواي وايفين خفايف ما اكدر اضغط عليها زايد بسبب حالتها ..

من يخابر عمو عمه تلبس شي على راسها ومن يطلب منها تنزعه علمود يشوف شعرها تكله مبلل بارده وكل يوم حجه شكل وعذر شكل بحيث خلصت الحجج وخلصت الاعذار ..

وبيوم طكت روحه واسمعه يصيح..

ادهم : بيج شي لتكذبين ياسه احجي شضامه عليه تعرفيني كلش زين اقراج من ملامحج وتره مغلس عليج بمزاجي..

ياسة : مابيه والله ليش تلح..

ادهم : نزعي الكلو اريد اشوف شعرج .

ياسه : لونه محلو صبغته وانت لان تحب لون شعري القديم كمت اغطيه واله ينزل الصبغ يلا اشوفه الك ،حباب لتلح عليه وتحرجني ...

ادهم : ليش صبغتيه مو تدرين انه احب لونه..

ياسه : عجبني اغير ومحبيته لهذا ماريدك تشوفني بيه.

سكت بس حسيته ممصدك بيها...

سدته وكامت تبجي..

ياسة : يعرف بيه كاعد اكذب يعرف والله ..

غطت وجها بيدها وتبجي..

سيلين : كليله ليش تكذبين ياعمه اول تالي راح يعرف .

ياسة : ضلت بس هاي السنه يكمل ويرجع..

سيلين : ادري سنه تضلين تكذبين عليه واحنه نضل كل يوم عذر شكل..

ياسة : اريده يكمل ويرجع علمود ميسافر مره ثانيه..

سيلين : عمه انتي كل همج الدراسه خلي يرجع وضعج مو مال تماطلين بلكت يسفرج بره يجوز عدهم علاج احسن من هنا .

لزمت راسها وكامت تبجي..

ي

اسه : طلعي وطفي الضوه ...

طلعت وسديت الباب حيل انقهرت عليها رحت كعدت بره بالحديقه وره شويه طب ايمن ، شافني سلم وصعد للسويت مالته ....

ورة شويه نزل كعد يمي..

ايمن : تدرين حاله عمتج ابد مو زينه ويمكن متطول ايام بالزايد اشهر..

مكدرت اجاوبه ضليت ابجي بسكوت..

ايمن : اليوم ادهم حجه ويايه وكال ضامين عليه شي كلكم متفقين على جذبه وحده وكلبه حاس ياسة بيها شي ، لهذا حجز وعكب باجر راجع..

سيلين : يعني عمو راح يعوف دراسته ويرجع..

ايمن : ضلت بس سنة وكال اجلتها وراح يرجع ..

سيلين : شكد ذكي عمو حس بيها تكذب عليه..

ايمن : اي يعرف ادهم متفوته فايته...

سكتنه وره شويه كال.

ايمن : اكلج انتي ليش متقدمين حرامات هاي ثاني سنه راحت عليج..

سيلين : شلون اقدم واعوف عمه ماكدر اله يستقر وضعها عود التفت لنفسي..

ايمن: خطيه الله يبارك بيج ويوفقج بس هذا مستقبلج..

سيلين : شكرا تسلم يوفق الجميع يارب شسوي عمتي اهم..

سكتنه بعدين سألته.

سيلين : سؤال بس لتعتبره تدخل.

ايمن : كولي ..

سيلين : ليش من تحجون ب عمو ادهم تهابوه كلش وكأنما جاي من كوكب ثاني ..

ضحك دار وجها ورجع باوعلي وره شويه كال...

ايمن : ادهم من اول ما اجه للدنيا غريب ولحد ما كبر يختلف عنه اختلاف جذري..

عكدت حاجبي ..

سيلين : شلون يعني يختلف قابل مخلوق من نار واحنه من طين ههه..

ايمن : لا باعي اول ما اجه للدنيا والدتي تكول مبجه ضل يباوع بعيون الجده والدتي حجت لابويه ضحك كال الها هذا رجال مو طفل،،،

بعدها من كبر كام يسأل اسئله غريبه ويفر عقل ابويه من دخل مدرسه جان متفوق على الطلاب بحيث يحل مسأله المدرس بعده مشارحها لهذا سوو عبور من الخامس للأول متوسط يسموه تسريع دخل مدرسه مال متميزين ومن كمل سادس اعدادي طلع معدل قوي وجان اباله يقدم على اختصاص هو يحبه على الرغم معدله يقبله هندسه بذاك الوقت بس راد يدرس علم نفس ودرس بالخارج اربع سنوات وراها قدم ماستر كمل و رجع تزوج ياسه ورجع سافر يكمل دكتوراه اول سنه سافر بيها مكدر يقدم السنه البعدها قدم خلص سنتين وضلت سنه ..

سيلين : حلو هههه..

لهناك وطلعت عمه عاطت ...

ياسه : شنو ادهم يرجع منو كله يأجل ادري اني صبرت وتحملت تالي يرجع والله ميرجع اكلب الدنيا .

ثنينه وكفنه لحيلنه انصدمنه طلعت سامعه كلشي ...

راح ايمن يمها يهدي بيها وهيه تبجي وتفرفح..

ياسة : هسه تتصل بيه بسرعه اريد احجي وياه..

ايمن : اي هذا هو راح اتصل بس لتعصبين مو زين عليج..

اباوع ايدها ترجف كعدت على الكرسي بالحديقه وايمن اتصل على ادهم بس صوت بدون كامره ..

حجت وياه اسمعها تكله.

ياسه : اذا رجعت مجايب شهادتك انسى ياسه.اي احجي صدك كتلك انساني اني متحملت ٣ سنوات علمود ترجع ايد وره وايد كدام كمل يلا ترجع...

ضلت تحجي وياه وتتوسل وتبجي ساعه يلا كدرت تقنعه..

ومرت الايام وعمه صارت ورقه من الضعف اكلها المرض اكل ومن عمو يطلب يشوفها كامره متقبل تتحجج عليه وراها كمنه نكله النت ضعيف واول ما نفتح كامره نطفي الشبكه وهيج مرت الايام تمرمرنه على ما خلصت السنه ...

واليوم موعد رجوع عمو ادهم من السفر وكلنا منتضرين جيته اله عمه تتمنى ميرجع ويشوفها بهذا الحال لان تخاف من رده فعله اذا عرف بيها تكذب عليه..

شكرا لزيارتكم عالم روايات سكيرهوم