رواية جذبني فمك البني الفصل الحادي عشر 11 بقلم عبير إدريس

كلنا منتظرين جية عمو ادهم من السفر ، تمنيت اشوف لهفة عمة ياسة من تشوفه شتسوي بس القاهرني شلون راح يشوفها بهذا الحال وهيه ضمت عليه مرضها رغم جان شاك بيها شي لكن رفضها واصرارها على موقفها وضحكتها اللي مافاركت وجها لحظة وحده كدرت تسيطر على الموقف وتقنع الجبل العدها بأن هيه مابيها شي...

دك جرس الباب ، عمة شهكت وكامت تبجي مدري دموع فرح راح تلتقي بمحبوبها اللي غاب عنها اربع سنوات لو دموع حزن لان خبزتها بالدنيا راح تنتهي مجرد اشهر وتروح يم رب كريم تكول اني يمكن ضيفة بأي وقت استعدو لفراقي وتخليني اكمز من القهر...

ردت افتح الباب اصرت هيه تفتحه مثل كل مرة هيه تستقبله بس من تذكرت وضعها مدت ايدها الترجف على شعرها صاحت..

ياسه : لج سيلين لج عمه شلون راح يشوفني هيج..

سيلين : عمه لو مهدلية بالموضوع خاف ينصدم خطيه والله ...

تفرك بديها وتباوعلي متوسله بنضراتها يعني شلون شسوي ..

سيلين : عمه اهدي الله عليج على كيفج ان شاءالله تنحل وهسه نفهمة قبل لا يدخلج..

هزت راسها ب اي وترجف مثل السعفه راحت مددت لان تعبت...

طلعت اني بره لكيت باب الشارع مفتوح وايفين شايله مريم و واكفه بالطرمه ..

وكفت يمها منتضرين دخول عمو ادهم ..

فتح الباب ايمن وفات ، عمو ادهم جان واكف وتحيطه مجموعة من جنط السفر دخل وذب الجنطة الجان شايلها على جتافه بالكاع وفات مبتسم ، ايمن طلع يدخل الجنط وهو نزع نضارته الشمسية فتح ايده لبنته ويباوعلها بلهفة صاح..

ادهم : مريومه حبيبة ابوها...

نزلت من ايد ايفين وركضت لحضنه عبالك صارلها سنين عايشة وياه مو بس على النت شايفته..

حضنها بكل قوته غمض عيونه وكام يهمس بأذنها ماعرف شنو بس هيه جانت تضحك وضحكتها ترن با ارجاء المكان ، حسيت حب قوي وعميق بينهم شكد حلوين فدوه، ، باسها ونزلها من ايده...

رفع رسه بأتجاهي وباوعلي بنظره غريبه وعقج حاجبه ، اشر بيده البيها نظارة عليه وباوع على ايمن سأله بتعجب .

ادهم : هاي سيلين ؟؟؟

ايمن : اي سيلين ..

ادهم : وذيج الوراها ايفين مو...

ابتسم ايمن وكاله اي..

ضحك واجه تقدم وصل يمي وكال..

ادهم : هاي شنو ولج عفتج صغيره شلون هيج كبرتي ..

ابتسمت بخجل ..

سيلين : عمو هو منو يضل على حاله كلنا نكبر .

قدم شفته الجوه للأمام بحركه تعجب وكال..

ادهم : مممم بس والله تعجبت ..

سيلين : هسه اللي يشوفك صارلك سنين مشايفني هو انت مصارلك اربع سنوات من سافرت .

ادهم : اي صح بس جنتي صغيره ولتنسين انه شايفج مرة وحده من توفه والدج الله يرحمه جنتي دوم تتختلين من اجي..

سيلين :ههههه اني مجنت احب اختلط هواي وبعدين لتنسى البنيه بسرعه تكبر ، وعفيه لتذكرني بذيج الايام خليني ناسيتها..

ادهم : ههههههه وانه عجزت مو بله..

سيلين : لا بعدك شاب عين الله عليك ليش شكد عمرك هسه؟

ادهم : عمري نهايه الثلاثين .

ضحك ايمن وكال...

ايمن : منين نهايه الثلاثين ، جذب توه ٣٣ سنة لو ٣٢ بس هو يحب يكبر بروحه من جان صغر ابد مينطي رقم حقيقي كله يزيد خمس سنوات وفوك ..

ضحكت...

سيلين : بعدك عمو صغير ليش تكبر بروحك ..

ادهم : شكلي هيج مبين ياهو يشوفني يكلي انت شكد عمرك اكللهم ٣٣ يكول مبين اكبر لهذا تفاديآ للأشكالات اني كبرت عمري مو احسن.

سيلين : لا والله اصلا انصدمت من كلت نهايه الثلاثين لان مبين اصغر..

ضحك ..

ادهم : ها زين..

ادهم : وبعدين مبين صايره احداث هواي ورايه لازم اعرفها كلها..

سيلين : اذا قصدك بيت جدي انسة ما احجيلك اي شي..

ادهم :نشوف بعدين تحجيلي لو لا...

رجع التفت على ايفين ...

ادهم : انتي شلونج نفس شكلج مثل ماعفتج لكيتج..

ايفين : ههههه اي صح ممتغيره هواي ..

ابتسم وكال..

ادهم : لعد وين ياستي ؟

صفنه واحد بوجه الثاني اني وايمن وبين علينه الارتباك هو بسرعه تغيرت ملامح وجها عكد حاجبه والتفت لأيمن ..وايمن ارتبك حك راسه وكال..

ايمن : اليوم كعدت من الصبح تنتظرك وانت تأخرت هواي تالي نعست ونامت.

ادهم : ياسة تدري بيه راح ارجع وتنام شضامين عليه انتو وينها..

سيلين : هاي راح نضل واكفين هنا تره تعبت ادخلو جوه نكعد ونسولف براحتنه وهم تشوف عمة...

هز راسه ودخل جوه اجه ايمن يمي همس..

ايمن : بنات اي شي يصير لتدخلون تره ميقبل معليكم شيسوي ميسوي متنعرف رده فعله شنو من يشوفها اكيد راح ينصدم ويتصرف تصرفات احتمال متعجبكم..

سيلين : لا معلينة راح نروح نحضر الغده وياربي تعدي على خير.

ايمن : يارب يارب..

صحت ايفين علمود تجي ويايه للمطبخ دخلنه و بلشنة نحضر بالغده ، اني وايفين من يوم اللي اجينه لبيت عمه استلمنه كلشي حتى الطبخ ، لان عمه مرضها ميسمح تسوي اي شي او تتحرك براحتها وحتى مريومه اني ملتزمتها ، ماكو ثواني وسمعنه صوت عمو ادهم عالي كام يصيح ..

ايفين : اكلج بس لا عرف بمرضها..

سيلين : اكيد شاف جهاز الاوكسجين والعلاجات وغيرها اذا غرفه نومهم تحولت لمستشفى الله يعينه شلون صدمه ..

ايفين : سكتي هاي شنو يمكن عم

ه كاعد تبجي..

سيلين : معلينه احنه ، همه بينهم يحلوها جوزي من سوالفج ..

ايفين : شمسويه قابل.

سيلين : تحبين تتسمعين واني ميعجبني هيج..

ايفين : وشنو قابل رحت يمهم وتسمعت مو واكفه يمج..

سيلين : صح واكفه يمي بس بالج يمهم عيب ايفين اني مو اضل اعلم بيج وعمرج صار ١٨سنه تره مو صغيره..

ايفين : سكتت يلا ...

خلت ايدها على حلكها ..

سيلين : اي هيج اريدج يلا ساعديني نصب الغده.

كملنه كلشي وضل بس ننقل الاكل انتضرت شويه يهدأ الوضع ، مديت راسي من باب المطبخ باوعت على غرفتهم شويه وطلع عمو ادهم من الغرفه شايط من الغضب صاير نار كبره ، صاح على ايمن بصوت يرجف ، اجاه ايمن وكف كباله...

عاط بيه تعال ورايه طلع وركع باب البيت وراه وتبعه ايمن...

دخلت على عمه لكيتها كاعده على الجربايه وخاله ايدها على راسها وتبجي بحركه رحت كعدت يمها..

سيلين : على كيفج عيني لازم تكون رده فعله هيج وشيسوي عذريه اكيد مصدوم...

ياسة : عمج زعل مني وعاف البيت وطلع كال ارجع منين ماجيت..

سيلين : اكيد زعل لان ضميتي مرضج عنه ...

هزت راسها ب اي ومسحت خشمها بالكلينس.

ياسة : يكلي شلون تضمين عليه هيج شي وتتصرفين بكيفج ، المفروض عندي علم بكلشي جان سفرتج للخارج شفت حل لمرضج تخبل جن جنونه من جر الربطه وشاف شعري واكع..

سيلين : عمه حقه صدمه تره ، وانتي المفروض منج تمهديله شويه شويه مو هيج تصدميه..

ياسة : ولج شلون اكله وهو بالغربه ويدرس اكيد راح يعوف مستقبله وكلشي ويرجع خالي اليدين ..

سيلين : اكيد جان شاف حل لو تصرف بس السويتيه غلط ياما كتلج عمه لتضمين عليه صارحيه بس مسمعتي كلامي..

ياسة : يكلي هسه يلا عرفت ليش جنتي تتهربين تفتحين كامره لو من اريد اشوفج بلا حجاب تتحججين بلون الشعر ضل يسب بروحه ويحجي عليه كلبه فرفح كام يفرك بصدره تعب وطلع ..

سيلين : بعده ممستوعب الموضوع انطيه وقت يدرك حجم المصيبه ويرجعلج من وحده تلكيه كلبه نار عليج..

مسحت دموعها وكالت..

ياسة : وين راح ؟

سيلين : ماعرف طلع هو و ايمن..

ياسة : بس لا يصير بيه شي..

سيلين : ميصير ان شاءالله لتخلين ابالج افكار سوده مددي ارتاحي...

رحت يمها كومتها ومددتها على الجربايه ، باوعت بالكاع الربطه مشمورة شافتني عيني عليها كالت..

ياسة : مد ايده راد يشوف شعري شطوله صاير واخترع من شافني لج سيلين لو شايفه صفنته شلون بهت بوجهي بعد ميعرف شيسوي كام يضرب على راسه ..

سيلين : لا اله الا الله ، الحمدلله على كل حال..

كمت اقره ايات على راسها وامسد الها وهيه تبجي وتشهنك اخر شي نامت ، وره شويه اجتي ايفين طبت..

ايفين : اكلج هاي مريم مكاعد تسكت تبجي تريد عمه ..

اشرتلها بصبعي اشششش...

كمت من يم عمه غطيتها وطلعت سديت الباب والتفتت على ايفين..

سيلين : شبيج يمعوده صوتج ليش هيج عالي..

ايفين : شمدريني نايمه عبالي دتسولفون..

سيلين : بجت لحد ما تعبت تالي نامت.

ايفين : وهسه وينهم وين راحو نصب غده لا..

سيلين : ياغده منو بعد اله نفس ياكل اذا تردين انتي اكلي واني اغدي مريم...

ايفين : ماريد عود وياكم اكل.

سيلين : براحتج..

رحت اخذت مريم غديتها وغسلت الها وبدلت ملابسها ونامت بغرفتنه رحت على عمه اريد اصبلها غده لكيتها بعدها نايمه عفتها خاف تكعد تتذكر وترجع تبجي.

وره ساعتين كعدت صاحتني رحت يمها ..

سيلين : عمه اصبلج غده تتغدين..

ياسة: لا ماريد

سيلين : شلون متردين عندج علاج كومه.

ياسة : اجه.

جريت نفس وزفرته.

سيلين : اني وين احجي وانتي وين اكلها تغدي عندج علاج تسألني على عمو.

ياسة : لتداهريني احجي اجه لو لا..

سيلين : لا ما اجه هو وين يروح عدكم احد بغداد..

ياسة : لا اخذ تقاريري الطبيه وطلع..

سيلين : يااا لعد راح للطبيب لو احتمال يشوف طبيب ثاني غير هذا..

ياسة : ماعرف هسه اني كلشي ما اريد بس كون مابيه شي..

سيلين : عمه والله مابيه قابل طفل.

ياسة : متعرفيه انتي اذا تأذه شيصير بيه وشلون يتدمر..

سيلين : حيرة والله واحد ميعرف شيحجي وشلون يصبركم..

سكتت وساد الهدوء بس انفاس عمه المضطربه تنسمع..

لليل سمعت صوت سيارة فاتت للكراج..

ياسة : هذا ايمن اجه صوت السياره كومي فدوة بلكت وياه ادهم لو يعرف وينه.

سيلين : هسه رايحه اشوف..

ياسة : سيلين كليله عمه تريدك وكلشي ما اكلت ولا اخذت علاج واذا متجي متاكل..

سيلين : ماشي اذا موجود اصيحه..

طلعت للهول باوعت من الشباك لكيته كاعد على بنيد السيارة وايده على راسي ويمه ايمن متخوصر ويباوعله..

وره شويه اجه فات بدون ميسلم ولا يباوع ، راح كبل للمكتب وسد الباب فات ايمن سألته..

سيلين : هاا ايمن وين رحتو وشصار...

ايمن : مصار شي رحنه لاكثر من طبيب وكلهم نفس الحجي ومن سمع ما باقيلها اشهر كام يدك على راسه موتني قهر..

سيلين : الله يساعدكلبه والله احنه ندري وميتين قهر عاد هو تفاجئ بالموضوع..

ايمن : سيلين اريد منج شغله فدوه..

سيلين : كول..

ايمن : اخويه وضعه تعبان كلش ونفسيته زفت خاف يحجي ينتر بيكم لتزعلون

منه لان مو بيده وهو مو هيج بس الصارله مو قليل وراح يبدي يطلع حركته بينه سواء بقصد او بدون قصد ..

سيلين : ميخالف يطلعهة بينه ولا بعمه ..

ايمن : اي والله ..

لهناك وسمعنه صوت كزاز من غرفه المكتب راح ايمن يركض لكه الباب مقفول دكه حيل..

ايمن : ادهم افتح الباب ادهم ..

رحت يمه ..

سيلين : عوفه يجوز محتاج يطلع البداخله احسن من ما يكبت ..

ايمن : والله ردت اكله على كلشي بس خفت ياسة تزعل مني لو تدرين شسوه بيه من طلعنه سواني دوشك مال رزايل وفوكاها يكلي بعد ما أأمن بيك وثقتي انعدمت بيكم كلكم..

سيلين : حقة شكد كتلكم كلوله خطيه ميصير شلون انصدم صدمه زين مصار بيه شي..

ايمن : شسوي متكليلي الف مره حجيت وياها وفهمتها لازم يعرف وهيه مصره على رأييها يمعوده انتي شفتي شسوت على العلاج سنه كامله نتوسل بيها اله شافت روحها تعبت من الالم يلا قبلت..

سيلين : حقها تخاف وهو شلون علاج الله يخليك شو دمرها ألم وتعب وتغير شكلها كله وحتى شعرها وكع هذا انتقام مو علاج..

ايمن : الله يكفينا الشر ويشافيها والله دمار للاعصاب مو علاج...

سيلين : متعشي لو اسويلك..

ايمن : كلشي ماماكل الله وكيلج فرني بغداد كلها وكل شويه عايط بيه ومرزلني عاد اكله خل ننزل ناكل غير يخلي راسي جوه التاير..

سيلين : هههه والله ضحكتني ...

ايمن : باعي اروح اسبح بين متسوين الاكل لان خست ..

سيلين : تمام .

راح طلع واني رحت للمطبخ وره شويه فات ادهم كام يفتح بالكاونترات ويسدهن حيل اخاف اسأله شتريد ليعيط بيه اخر شي لكه شاش ومعقم اخذهن وطلع ، باوعت ايده لافها بالكلينس يمكن مشكوكه ..

كملت العشا وخليته على الميز ، ورحت لغرفه المكتب .

دكيت الباب مجاوبني رجعت دكيتهة مره ثانيه جاوبني بنتر ...

ادهم : منووو..

سيلين : اني عمو ممكن ادخل.

ادهم : تعاي..

دخلت لكيته كاعد على القنفه ومدد رجله على الطبله الكدامه بيده جكارة يلتهمها بشغف ، كأنما هاي الجكارة هيه اللي راح تطفي النار المشتعلة بداخله مرجع راسه ليورة وينفخ بالدخان ..ايده الثانيه ملفوفه بالشاش.

شكله مو مال واحد يفتح وياه موضوع بس كلت احاول اجرب حضي ..

سيلين : عمو.

ساكت ميحجي بس الدخان يتطاير فوك راسه..

سيلين : عمو ممكن احجي وياك دقيقة.

جاوبني بشرود ..

ادهم : شعندج ؟

كعدت يمه بهدوء اخاف اتحرك اصلا ..

سيلين : عمو انت بخير..

جاوبني وهو مغمض عينه وتفاحه ادم تصعد وتنزل بأنتضام..

ادهم : بنص الخير..

سيلين : اعرف السمعته جان صدمه الك ، بس عمة الها اسبابها صدكني متقصد تكذب عليك..

جر نفس طويل وبعدها صفنه اطول ، يمكن طولت ربع ساعه يلا جاوبني..

ادهم : انتي بعدج صغيره ومتعرفين الحياه ويمكن ما مارة بأي تجربه لهذا اللي راح اكوله الج يمكن تستغربيه شويه بس احاول اوصله الج بطريقة تفهميها وتقدرين شعوري ورده فعلي..

ابتسمت بتعب ، كلت بكلبي انت شمدريك شنو شفت وشنو عشت حتى تحكم عليه ...

سيلين : اسمعك..

ادهم : اهم السبل لنجاح كل علاقة ، هو الاحترام والتقدير وعلى رأسهن الصدق ، من تضم عليه مرضها وتتصرف بعدم مبالاه من اسألها عن حالها واحوالها ،تكلي زينه وانه متأكد بيها شي واعرف بيها تكذب عليه وضامه شي جبير رغم شكي ورغم اسئلتي المتكرره ترجع تكرر الكذبه عليه وين قيمه الحياه الزوجيه اذا انبنت على الكذب ٣ سنوات هيه مريضه ومتحجي ليش ماكالت ليشششش جان كدرت اسوي شي اسفرها للخارج واعالجها يم احسن الاطباء ليش حرمتني منها ..

ضرب ايده بيده القنة حيل ...وكام يستغفر ..

سيلين : سفرك وانشغالك بالعمل والدراسه هو اللي منعها تصارحك بمرضها..

نتر بعصبيه..

ادهم : طز بدراستي وبشغلي والدنيا كلها يصير اخويه هو يحير بيها بالاطباء وانه ما ادري عنها يصير انه بالخارج اتونس ومرتي تصارع المرض وحدها ، نار بكلبي تسعر من اتذكر شلون انام واكل وحياتي عايشها طول بعرض وزوجتي حبيبتي هنا تصارع المرض ..

سيلين : عمو حقك تاخذ موقف وتعصب بس تره عمه ياسه مريضه وتعرف بطبعها شكد حساسه والله من طلعت لحد الان هيه بس تبجي وتره موزين عليها البجي ولا المغثه الاطباء مانعين عنها البجي والانفعال فدوة عمو روح راضيها تره هيه بحاجتك تريد تشكيلك همها وتعبها من المرض ..

كمت وكفت مشيت للباب ورجعت التفتت عليه ،،، صاير عباره عن انسان مقيد بالشكوك والاحباط والقلق ، فتحت الباب اريد اطلع ، حجه بضيق وصوت مخنوك..

ادهم : شكد بعدلها ..

جاوبته بنبره هادئة وحزينه..

سيلين : الدكتور كال حسبه اشهر...

جاوب بصوت يرجف..

ادهم : جذب ماكو هيج شي انه اخذها لاكبر الاطباء واعالجها هنا اكيد غلطانين بالتقارير اي مو صحيح حبيبتي مابيها شي ياسه قويه والله وهسه تشوفين حتى الاطباء اللي رحتلهم اليوم هم ما مقتنع بحجيهم ..

رجعت للغرفه وكفت قريب منه وحجيت بهدوء..

سيلين : عمو لتخاف كلشي راح يكون بخير والله كلبي بارد..

ابتسم وعيونه غرغرت بالدموع جاوبني بصوت ضعيف..

ادهم : اعتذر عن انفعالاتي الظهر وهسه ، انه طبعي موهيج وصارت بوج

هكم اعتذريلي من اختج هم تره والله اعصابي تعبانه ..

سيلين : لتشيل هم احنه مثل اخواتك جان كلت بناتك بس لا بعدك صغير هههه ، المهم هسه عمتي بأمانتك جانت بأمانتنه وهسه انت اجيت ، الله يعينك ويصبرك القادم اصعب وياريت نكدر نتجاوزه بدون خسارات..

ادهم : راح احجز الها واسفرها للخارج واعيد كل التحاليل ، وبأذن الله يطلع احساسي صح وتعيش ياسه بخير وعافيه..

سيلين : الله كريم ياربي خير ، هسه تروح لعمه لو تضل هنا واني انام يمها..

عقج حاجبه مستغرب..

ادهم : ليش تنامين يمها..

سيلين : عمو انت اكيد ممستوعب حالتها ويمكن مشفت الاجهزه اليمها تره عمه تختنك هواي ولازم واحد يسهر عليها للصبح لحظه ما اكدر انام واعوفها..

صفن بوجهي نزل رجله من الطبله وكام مشه بأتجاهي وعبرني طلع من الغرفه واتجه لغرفه عمتي ...

دخل وسد الباب ضليت كاعده بالهول منتظره يطلع علمود ادخل اني حافظه موعد علاجها وكلشي على ايدي زين شلون هسه ادك الباب لو خاف نايمين ، كلت انتظر ساعه اذا مطلع ادك الباب شسوي لعد..

انتظرت وهم مطلع كمت مشيت لبابهم وكفت متردده ادكها لا طلعت مريومه من غرفتها تفرك بعيونها..

مريم : سيلين حمام...

رحت يمها شلتها وبستها بخدها..

سيلين : يا روح سيلين امشي اوديج ، جوعانه ...

مريم : لا اكلت ويه ايفي..

سيلين : بالعافيه ..

وديتها للحمام وغسلت الها ورجعتها لفراشها انداريت اروح جرت ايدي.

مريم : نامي يمي اخاف.

سيلين : مو ماما اريد انطيها دوه..

مريم : حبابه اخاف انام..

سيلين : يلا سويلي مكان علمود انام يمج ..

فتحت اللحاف ودخلت تمددت يمها جرت ايدي ونامت عليها ضليت العب بشعرها غمضت بس ماعرف نامت لو لا وبالي كله يم عمه ..نعست كلش خفت لا انام ويروح العلاج على عمه ..

نامت وكمت على كيفي تسحبت وطلعت من الغرفه دكيت الباب على كيفي طلع عمو عيونه حمر دم ويجر بخشمه مثل المنشول...

كح وتحمحم..

ادهم :كولي سيلين محتاجه شي..

سيلين : عمو علاج عمه راح وقته قبل ساعه لازم انطيه الها..

ادهم : نطيتها ..

سيلين : شلون عرفته ..

ادهم : قريت الاوقات مال علاج مايرادلها شي..

سيلين : صح اسفه لعد كعدتك من النوم..

ادهم : مانايم اصلا ..

سيلين : تروح تنام واني انام يم عمه..

ادهم : لالا روحي انتي ارتاحي وانه انام يمها..

سيلين : ماشي تصبح على خير واي شي تحتاج دك الباب بسرعه اكعد..

ادهم : متقصرين عاشت ايدج..

سيلين : وايدك..

رحت لغرفتي وهو فات وسد الباب ..

ثاني يوم كعدت على صوت الغساله معلوكه كمت فازه بس لا هاي عمه كامت ركضت للحمام لكيت عمو ادهم شايل ملابسه المغسولات ويخليهن بالسله ورجع يخلي ملابس بالغساله..

سيلين : هاي ليش انت تغسلهن جان كعدتني..

رفع راسه مبتسم بتعب ..

ادهم : صباح الخير..

سيلين : اسفه نسيت اصبح عليك بس ليش انت تغسل ملابس لعد احنه مو هنا ليش مصحتنه..

ادهم : باعي اكلج شغله ، اول شي هذا بيتكم اتصرفو بيه مثل ما تحبون واخذو راحتكم على الاخير بس ما اقبل تتعبون انه عندي ايد واكدر اشيل نفسي اي شي يخصني ويخص زوجتي وبنتي انه اتكفل بيه واذا حبيتي تساعدين عمتج براحتج بس ملابسي وشغلاتي انه اتكفل بيهن..

سيلين : عمو ميصير ليش هيج تسوي شنو غريبه اني عنكم ليش تقهرني..

ادهم : يابه جايين هنا تخدموني ميصير انه ما ارضاها عليكم..

سيلين : اني قابله انت ليش ضايج.

ادهم : وانه ما ارضى شلون بهيج حاله حليها انتي.

سيلين : وشلون اذا عندك شغل دوام ..

ادهم : كاعد مكابلكم لا شغل ولا عمل من اشوف ياسه تصير زينه عود ذاك الوكت امارس حياتي بشكل طبيعي..

سيلين : براحتك بس اذا تحتاج شي..

قاطعني..

ادهم : اجي عليج..

ابتسمت وهزيت راسي ب اي..

ردت اطلع التفتت عليه..

سيلين : عمو تريكت..

ادهم : من زمان انه و عمتج ..

سيلين : الف عافيه..

ادهم : الله يعافيج..

عفته ورحت لغرفه عمه لكيتها كاعده ..

سيلين : صباح الخير اليوم الوجه مورد..

ضحكت وكالت..

ياسة : صالحني وللصبح سهران عليه..

رحت يمها تمددت وحضنتها..

سيلين : ماكو مثل حب عمو لو تشوفيه شلون يرجف عليج البارحه خطيه كلش قهرني.

ياسة : الليل كله يشهنك ويبجي عباله نايمه ومادري بيه ومن سألته الصبح ليش تبجي يكلي نايم وين باجي يتهيألج..

سيلين : فدوة لكلبه بس عمه ليش ميقبل اغسل ملابسه والله قهرني.

ياسة : عوفيه براحته هو ميقبل يكلف احد بشي يخصه واذا احتاج شي هو يكلج..

سيلين : شكو بيها شنو يعني اذا اني غسلتهن..

ياسة: هاي نفسيته هيج ..

سيلين : اليوم تريكتي بدوني عيني من لكه احبابه نسى اصحابه..

ياسة : غصبني على الاكل لو تشوفيه لكمه يبوس ويخليها بحلكي ولكمه يهدد ومخنزر خربت ضحك...

سيلين :فدوة الله يحفظكم ..

ياسة : خايفه يتعلق بيه ازيد وتالي اعوفه وينكسر ..

سيلين : عمه اروحلج فدوه شيلي من راسج سالفه الفراك مو متت..

ياسة : سكتت لتضوجين..

اندك الباب كمت كعدت عدل ، فات عمو ..

ادهم : ياسه صار كم يوم ما متسوكين.

ياسة : قبل اربع ايام طلعو ايمن

وسيلين تسوكو ..

ادهم : هاا بس اغلب المسواك خلصان راح اطلع اجيب كم شغله واجي..

ياسة : اخذ سيلين وياك..

عقج حاجبه وكال..

ادهم : عليش خليها مرتاحه..

ياسة : مو تعرف شنو احتاج ..

نتر

ادهم : كتبولي كلشي بالقائمه وانه اجيبه شنو ماخذ بنيه شابه بنص السوك انتي شايفتهم شلونهم..

ياسة : هاهيه براحتك بس لتضوج..

طلع واني رحت سجلت كلشي بقائمه ونطيتها اله ...

اخذها وطلع ، كمت نظفت البيت ومريم ايفين حارت بيها لان مدالحك ...

وره ساعتين رجع عمو جايب كومه مسواك طلعت علمود ادخل المسواك وياه شافني واشرلي بيده وكال..

ادهم : عوفيهن انه وايمن ندخلهن..

سيلين : عمو شنو السالفه تره دائما اشليهن ويه ايمن.

ادهم : البنيه ميصير تشيل ثكل موزين عليج روحي فوتي يابه..

صفت بوجها، وهو شال علاكتين كبار دخلهن جوه ورجع طلع وكف يم درج ايمن صاح..

ادهم : ولك كافي نوم يالدثو اكعد..

ضحكت اندار عليه ابتسم..

ادهم : والله عبالي دستي على وصواصه شنو هاي ضحكتج ههههه.

خربت ضحك وهو كام يضحك على ضحكتي ويهز بيده..

ادهم : استغفر الله ربي ...

نزل ايمن يعدل بشعره المخربط وعيونه منفوخه مال نوم..

ايمن : شكو شكو خبصتني ادري متكول واحد نايم..

ادهم : نايم شوف ساعتك لا هيه دنيا الصبح لا هيه وقت قيلوله ساعه ١٢ ونص متكول عدنه مريض ومحتاج رعايه عايف البيت على البنات ماصدكت اجيت وشلت ايدك..

ايمن : شبيك ضايج مني من جيت لسه تره زوجتك ماقبلت احجي وانه احترمت رغبتها شسوي يعني..

ادهم : كافي وامشي شيل باقي الغراض اروح انام ساعه علمود اخذ ياسة العصر للطبيب ..

سيلين : نام عمو انت البارحه ما نايم..

التفتلي رفع تك حاجب وصفن بوجهي عرفت جفصت.

سيلين : اااا يعني قصدي هاي شسموه..

ايمن : احجيها للدره مو موتيني..

شايل المسواك ويمشي ويذب بالحجي...

سيلين : قصدي عمه كالت ..

حجيتها دفعه وحده. عفتهم وطبيت جوه ، هذا شبيه ليش هيج باوعلي خرب معرفت افسر نضرته يعني ليش تدخلين لو خاف عباله فتت عليهم لو جنت اتسنط مادري شنو يقصد ليش ضاج من هيج كلت ، بعد لازم احسب حساب للحجايه من احجيها شو بكلشي يخلي انه شصار يعني..

رحت للمطبخ كمت اصفي بالمسواك ، طلعت اللحم خليته على النار سلكته سويت تمن ومركه ولعمه سويتلها تشريب بدون دهن ..

كملت نصيت النار ورحت للغرفه طلعت ملابس وعلكتهن بالحمام رجعت رحت لمريم حضرتلها ملابس وطلعت ردت افوت للحمام لكيت الباب مسدود عرفت اكو واحد رجعت لغرفتي كعدت وره شويه سمعت صوت باب عمه انسد كمت رحت للحمام ردت اعلك ملابس مريم لكيت ملابسي مغطايه بالخاولي الجان معلك ..

استغربت هاي منو غطاهن ، سبحت مريم وبدلت الها وطلعتها ورجعت سبحت وبدلت وطلعت لكيت عمو كاعد يصب غده ردت اكله ليش مصحتني بعدين تذكرت كلامه كلمن يشيل مسؤليته عفت ورحت للغرفه ..

ايفين : تره جعت..

سيلين : اكلج ميصير اربع وعشرين ساعه لازمه موبايلي تدرين مرات يعجبني اشوفلي شي باليوتيوب والكاه طافي شحنه على الاقل شحنيه من تكملين..

ايفين : اي وين اروح ضوجه وطاكه روحي..

سيلين : اذا انتي اربعه وعشرين ساعه ساكنه الغرفه اكيد تضوجين ..

ايفين : هسه شنو منتغده..

سيلين : هسه اصب لايمن وبعدين اصب النه ..

ايفين : اي خوش..

طلعت رحت للمطبخ صبيت لايمن مثل كل مره وخليته على الميز ، احتاجيت حمام رحت ، من رجعت لكيت الصينيه ماكو كلت جوز اجه اخذها ، رحت صبيت النه لكيت الصينيه الماكلين بيها عمو وعمه غاسلهن ومرجيهن على الكاونتر ضحكت يعني هيه مواعين شكو بيها اذا خلاهن اني اغسلهن شلون يفكر مادري..

صبيت ورحت لغرفتنه لكيت ايفين ماكو خليت الاكل بالكاع وطلعت وصلت للهول صار عمو ادهم بوجهي ، ضايج روحه طافر والغضب ينفض من وجها..

خفت اسأله شبيه تعديته ردت اطلع كال..

ادهم : انه من فصلت اخوي عنكم ردت تاخذون راحتكم ومنعته من طبت بيت اخوه صح لو غلطان..

التفتت عليه..

سيلين : صح ليش شصاير..

نتر باعصاب..

ادهم : اذا صح اختج شعدها يمه فووووووك

سيلين : ايفين فوك؟؟

حجيتها وفتحت حلكي مستغربه.

ادهم : اختج فوك صعدي شوفيها وعينج عليها منا وجاي..

صرت بنص هدومي شكول عليج ايفين خرب بحضي لازم تفشلني وياه..

طلعت للطرمه وصعدت فوك لكيت الباب مفتوح طبيت للهول لكيتها كاعده على قنفه وهو كاعد على القنفه الثانيه يتغده..

نترت بيها .

سيلين : وينج صار كومه ادور عليج..

ايفين : ها جبت الغده لايمن..

سيلين : وانتي شعليج مو دائما هو ينزل ياخذه.

ايمن : على كيفج سيلين تره مصار شي شكو بيها انه مثل اخوها..

سيلين : ماكو هيج شي من وين اجيت اخوها ..

عاف الاكل وبهت بوجهي..

سيلين : اي لتباوع هيج احنه ماعدنه اخ واصلا ضلتنه هنا اكبر خطأ بس حضنه الاغبر هيج خلانه بالبيوت..

حجيتها وبجيت متحملت نضرات عمو عبالك اني المسويه الذنب ..

ايمن : يابه هذا بيتكم واحنه خطار بيه ليش هيج تحجين..

سيلين : تسلم بس عفيه اختي اذا صعدت لتنطيها مجال ..

ايفين : شبيج سيلين .

سيلين : انجبي انتي

وامشي كدامي..

نزلت كدامي واني اريد انزل ماكدر ايدي ورجلي يرجفن من الاعصاب..

ايمن صاح..

ايمن : سيلين تره انتو مثل خواتي الله شاهد ماعندي نضره وصخه لو نيه سوء وياكم ..

التفتت عليه وكتله.

سيلين : حجيك صح واني اعرفك انت شنو صار سنتين عايشين سوه بس الناس مترحم ..

ايمن : صح عاشت ايدج على حرصج بخصوص اختج.

هزيت راسي ونزلت رحت بوجتي للغرفه لكيتها كاعده تغدي مريم ..

نترت بيها ورفعت اصبعي اهدد..

سيلين : هلمره صارت مره ثانيه اخابر على عمامج يجون ياخذوج ويزوجوج لواحد عار من ولدهم وتعرفين بيه ما اتشاقه..

دارت وجها معاجبها الحجي مدتت وخليت ايدي على عيني ..

مشت الايام تشبه بعضها ، بالاسبوع مرتين عمو ادهم ياخذ عمه للمستشفى تاخذ العلاج ويرجعون وتضل يوم كامل تون من الالم بيوم الي يرحون يرجع عمو اعصاب يتعارك ويه روحه احنه ندخل للغرفه منحجي اي شي ولا نطلع يمهم ...

مره من المرات اسمعه يحجي ويه ايمن بالحديقه الخلفيه جنت اغسل مواعين والشباك مفتوح بس البرده مسدوده.

ادهم : راح اموت بالله الكريم لو تشوفها شلون تتوجع من الألم احس الاه مالتها تضرب بعقلي شلون وين اوديها دزيت التقارير مالتها للخارج ونفس الحجي وكالو السفر مو من صالحها لك انه عاجز واصعب شي على الانسان من يحس روحه عاجز اتجاه احبابه مثل الورده كاعد تذبل كدامي وانه مابيدي شي اسويلها شسوي فهمني..

ايمن : الله يعينك ياخوي بس شتسوي هذا امر الله وانت انسان مؤمن والمؤمن مبتلا هذا اختبار الك ولصبرك

ادهم : صح بس والله لو جان اختباري بمالي بصحتي بكلشي املكه ولا بزوجتي انت متعرف انه من جيت لسه ما نايم ولا عارف طعم الراحه راح انجن بالقران...

ايمن : شلون فهمني تضل هيج ..

وره شويه سمعته صاح..

ايمن : لتضرب براسك يمعود صدك جذب ادهم شجاك لخاطر الله .

سمعته يبجي ويكله عوفني عوفني معليك بيه..

ايمن : اول تالي ادهم يبجي..

ادهم : اي ابجي عليها لك هاي قطعه من كلبي شلون راح افاركها شلوووون فهمني ..

كمت ابجي حتى المواعين عفتهن على النص ورحت يم عمه كلبي مفرفح عليها شافتني ابجي انهبطت خطيه..

ياسة : شبيج حبيبتي منو مضوجج..

سيلين : مابيه عمه مابيه ماعرف شنو فات بعيني ودمعت..

ياسة : كومي غسليها موزين تضلين تفركين بيها..

سيلين : عوفج مني شلون صرتي..

ياسة : زينه نفس حالي..

سيلين : الالم ماخف شويه..

ياسة : احسن الحمدلله على كل حال .

سيلين : الحمدلله اني اروح انام خاف ييجي عمو للغرفه ويلكاني كاعده.

ياسة : براحتج حبيبتي بس راح اكلج شغله اوعديني متضوجين..

سيلين : خير عمه كولي واكيد ما اضوج منج..

ياسة : فدوه لحبيبتي العاقله باعي عمه صار اكثر من مره عمج من يدخل للحمام يلكه ملابسكم الدخليه معلكه لو من يريد يغسل الملابس يلكاهن بالغساله وكاعد ينحرج انتو احتمال ما منتبهين او مو ابالكم بس اذا كدرتي من تدخلون اذا معلكات غطوهن بشي واذا وصخات جمعوهن بسله وخلوهن بغرفتكم على ما تغسليهن..

وجهي صار احمر دم والعرك كام يصبصب من وجهي..

سيلين : اي صح حقه اني شلون فاتتني ، والله عمه ماضلي عقل براسي..

ياسة : اعرفج حبيبتي ما متقصده بس اني مثل امج واعلمج..

سيلين : حبيبتي واني استقبل كلشي منج بممنونيه..

ياسة : الله يحفظج حبيبتي وعينج على اختج..

سيلين : كبال عيني لتخافين تصبحين على خير..

ياسة : وانتي من اهله..

طلعت والعن بغبائي يعني هو ذاك اليوم مغطيهن بالخاولي ، يعني يكلي انتبهي منا وجاي واني عبرتها للسالفه وضليت اعيد الغلط الى ان دخل عمه ..كل يوم انحرج ازيد من قبل واحس روحي ثكيله وكارهه روحي..

وبيوم صاحني عمو جان بالمكتب مالته واني جنت اشتغل بالمطبخ رحت دخلت للغرفه لكيته واكف يم البرده خال ايده بجيب التراكسود وناطيني ظهره..

سيلين : ها عمو صحتني..

التفتت عليه وعاقد حاجبه..

ادهم : راح تستغربين من اللي اكوله بس بعدين افهمج ليش هيج فكرت ، باعي روحي لايفين وجري من ايدها الموبايل بدون متمسح شي وجيبيه...

سيلين : زين ليش ؟؟

ادهم : انتي تعرفين شي وانه ابالي شي روحي سحبيه منها وتعالي..

هزيت راسي وطلعت افور شبيها اختي شمسويه هلمره ..

الفصل الثاني عشر من هنا 

شكرا لزيارتكم عالم روايات سكيرهوم