رواية منيفة الفصل العاشر بقلم فاطمه النعيمي
عطايا الرحمن
اياك ان تطلب من الله كما تطلب من البشر
فالبشر لو ملكوا الدنيا كلها لن يملكوا كرم الرحمن
فاذا طلبت من الله فاطلب كل ماتتمنى وتريد
واعلم انك تطلب من رب كريم عظيم
لاحدود لكرمه وعطاياه وقوته
كان حاتم جالسا يستمع لمنيفة التي كانت تسرد لحاتم
كل ماحصل معها
وكلما وصلت لنقطة تحول
كان يعتقد حاتم ان هذا اعجب ماحصل لمنيفة وكلما استمرت بالحديث كان يسمع الاعجب والاعجب
بالنسبة لرجل قروي هاديء الطباع
عاشق للطبيعة ولتلك للمراة التي تتحدث وهو يستمع بقلبه قبل اذنيه
وبين لحظة واخرى يسأل نفسه
اتراني احلم ام هذا حقيقي
اتراني مت وانا معها في الجنة
رغم انه كان يسمعها بدقة ويسألها بين فقرة واخرى وتتفاعل معه لكن...
سنوات الحرمان التي حفرت في عمق قلبه اخاديد القهر واللوعة تذكره كل لحظة ان ما يراه ويسمعه
ماهو الا وهم من تلك الاوهام التي كان يتغذى عليها طوال سنين عمره الخمس واربعون عام الماضية
كانت منيفة تتحدث حين طُرق الباب
ودخل عبدالله وقال
-يمة العشا صار جاهز تحبين نفرغ الاچل ونتعشى لو ننتظركم تخلصون حچي
قالت وقد نهضت
- لابالله نروح انتعشى سالفتي طويلة والعشا حضر
يلا يحاتم نروح نتعشى وأشوفك الصالة والغرف
وانطلق عبدالله الى المطبخ كي يساعد امينة اخته وأم عدنان التي اصرت ان تطبخ العشاء بنفسها
وحاتم ومنيفة دخلو صالة البيت
ونظر حوله متعجبا وهو يقول
-اشحلات هالمچان يامنيفة
اثارينا محنا عايشين
قالت منيفة
- هاي يسموها صالة وبعضهم يسموها هول
وهي تشبه غرفة العيال عدنا بالجرية يعني العيلة كلهم يگعدون بيها سوا ياكلون ويشربون
ومرات ينامون بيها
وهذني الغرف هاي غرفة حازم وعبدالله
وهاي غرفتي اني وحسنة وذيچ غرفة چبيرة فارغة جان عندي نية اسويها لعبدالله ايتجوز بيها
بس عبدالله ماگبل وهية هسع فارغة
وهذا المخزن وذنيچ جوا الدرج
المغاسل يعني الحمام والمرافق وباب يطلع لي ورا البيت
تعال نگعد هينا حتى انتعشى
كانت امينة قد فرشت فراش على الارض على شكل مربع
في وسط الصالة
وجاء حازم وسلم على حاتم وقام بفرش السفرة
في وسط المربع
وبدأ الجميع بنقل اطباق الطعام الموصلي الذي لايشبه اي طعام في العالم
من حيث الجودة واللغذة والثراء
كانت أم عدنان قد عملت الكبب الموصلية الكبيرة التي يطلقون عليها اسم كبة الدق
والتي لم يكن يعرفها عرب القرى
وجائت أم عدنان وامينة وسلمو على حاتم وجلس الجميع ياكلون مع بعض
كان يردد حاتم بأستمرار
-يا ماشاء الله على هالخير وهالريحة الطيبة
اثاري اشكثر آكو خير بهل دنيا نحنا مانعرفو عدنا فلوس چثير بس شنو فايدة الفلوس بليا معرفة
كانت منيفة طول الوقت اثناء العشاء تعرف حاتم على اسرتها وتصف كل واحد منهم بصفة جميلة حتى وصلت لحازم وقالت
-هذا عاد حازم
حازم الي خلاني اقرر الهزيمة عبنو تعدى على حواوين ماعدهن لاحيل ولاگوة يدافعون عن انفسهم
حازم الي سمم ابكرات ابوه
رد حازم وقال بحزم وقوة
-هسع وبعد الي ايتعدا عليا وعلى اهلي غير اشگو نصين لو ابوية
قال حاتم مشجعا
-عفية ابوي عفية عيلة بيها رجال مثلك ماتنظام بعون الله
وضحك الجميع
ثم قالت منيفة
-وهاذي ام عدنان اختي وصديقتي وعمة بنتي
انطيتها بنتي لابنها عدنان عبنهم يستاهلون مني كل الخير
وهاي سنة بنتي عدها چنها ابيتي
رد حاتم وقال
-حي الله الاصيلة عفية عليچ والنعم منچ خيتي أم عدنان
رحبت به أم عدنان واكدت له ان الله زرع في قلبها حب منيفة وابنائها وتشعر دائما انهم اسرتها
فأم عدنان عربية من الريف وتحن لابناء ديرتها
ومهما عاشت المراة العربية مع الحضير ومهما تعلمت منهم لابد ما تخرج أمراة من حضير الموصل تسمعها بعض الكلمات الجارحة تشعرها بغربتها
لهذا كان ولاء أم عدنان لمنيفة ليس من باب الانسانية فقط بل لانها من ابناء جلدتها
ولأنها فعلا شعرت ان منيفة اختها فعلا
وكم اخٍ في الحياة لم تلده امك
وانتهى العشاء ونهضت منيفة ودخلت غرفة الضيوف يتبعها حاتم
وجلسوا واستأنفت منيفة حديثها قائلة
..................
راحت ام عدنان مع ابنها
على بنتها لميعة
واحنا طبخنا الغدا وتغدينا ونظفنا البيت ماخلينا عليه عايز وآني مستغربة اشلون حرمة شافتني البارحة أمنت بيا على بيتها وراحت وعافتني بالبيت
وگلت لروحي هاي الحرمة لسعها شايلة طبايعنا الاصيلة الي جابتها معاها من الجرية نحنا الي مانعرف نقفل باب بس بالليل
لسعها مثل گبل مثل كل اهل القرى الي يفك بابو للضيف
ويعاملو چن الضيف گاعد ابيتو
ولچ عليا يا أم عدنان عهد الله اني احفظچ واحفظلچ هالمعروف طول عمري
والدنيا دوارة وها الا بيوم تحتاجيني
ورجعو العصر
گالت أم عدنان
لميعة تكول خل يجون ويگعدون ابيت الحارس
ووصيتها تگول لصانعتها تروح تغسل البيت ويفرشوه بالغراض الزايدة العدهم
بس بنتي كالت البيت مفروش يمة بس يحتاج تنظيف وراح اخلي فضيلة تروح تنظفو وتكدر تجي أم عبدالله
باجر تگعد بالبيت
اني ياحاتم بوكتها طرت من الفرح وماعرفت اشلون اجازي هالحرمة هاذي
وكضينا ذاك اليوم هم عدهم
وعبدالله وحازم نظفولهم الحديقة وعبدالله گصگص الاغصان اليابسة بشجارهم
وصارت الحديقة چثير حلوة
وبالليل عبدالله وحازم ناموا مع عدنان برا بالحديقة
ثاني يوم بعدما تريگنا وعزلنا البيت الي خبصناه للحرمة
وركبنا بالسيارة كلنا
واخذنا عدنان لمزرعة اختو الي بطارف الموصل بالساحل الايسر
ماشاء الله ياحاتم
مزرعة چبيرة مليانة اشچار وبيت الحارس بعيد عن بيت لميعة بنت أم عدنان
يعني نحنا راح نعيش مرتاحين بعيدين عن اهل البيت
يعني بيت الحارس صاير يم باب المزرعة وبيت لميعة صاير بنص المزرعة يعني تمشيلك يجي خمس دقايق ويمكن اكثر من بيتنا لبيت لميعة
لمن وصلت السيارة لبيت لميعة
نزلت البنية علينا تركض من ذاك الگصر الچبير
وتلگتنا بالهلا والمرحبا مثل أمها واحسن بعد
وراحت معانا للبيت الي راح نگعد بيه
ولمن شفت البيت ماصدكت انو هالبيت راح يصير ليا
چان بنص الشجر
والأشجار مغلگة عليه عبالك بالجنة
وصحيح هو صاير يم باب المزرعة بس ماشفناه لمن فتنا من گد ما حواليه اشجار
فتنا وگعدنا أبيتنا چان باااارد وحلو
چانت غرفة بيها قريولتين وعليهن فراش حلو ونظيف
والغرفة الثانية بيها قنبات مثل هذني بس عتيگات
وعراض يكدرون الولد ينامون عليهن
والمطبخ بيه طباخ وميز وغرضان مطبخ
كعدنا واستقرينا
چانت المزرعة شوية بعيدة عن المدينة
بس مو ابعد من جريتنا تل النمل عن درب الشام
وچان البيت بارد مو مثل جريتنا مدري عبن مليان اشجار مدري عبن عالمي ولو جريتنا هم عالمي بس يمكن عبنها جردة مابيها اشجار
والصحيح مدري ليش ربعنا ماچانو يزرعون اشجار بييوتهم
المهم
ثاني يوم جت الصانعة علينا چان اسمها فضيلة
وكالت
-أم مهند تكول تعالو عالغدا
ورحنا ياحاتم اش احچيلك على ذاك الغدا
صحيح نحنا ابيت اهلي جنا اكرام ونقدم للناس الي يجونا انت اتذكر هالشي
بس هما غير شكل
نحنا جنا نذبح الذبيحة ونگصبها ونسلگها ونحطها فوگ الخبز أو البرغل ونقدمها
هما لاااااا
هما چانو مسوين اچل اشكال والوان
ذاك الأچل الطيب بحياتي ما ماچلة منو
اول نوبة بعمري اضوگ العروگ الموصلية
ياحاتم شي مثل الحلم طعمها ضل جوا لساني جم يوم
الصانعة سوت سفرتين سفرة بغرفة الخطار لعبدالله وحازم وعدنان
ابو مهند ماچان موجود چان مسافر
وسفرة ليا ولبناتي ولأمها گعدنا عالكراسي واچلنا على ميز چبير ايخبل خبال بصالة بيتهم
ولمن گمنا دا نرجع لبيتنا شيلتني اچل يكفينا يومين
سألها حاتم
يعني مثل هاي الصالة الي أجلنا بيها
ردت منيفة وقالت
-لااااااا ياحاتم ذيچ صالة غير شكل ذيچ چبيرة ومزينة ومليانة اثاث من خشب احمر راح يجي يوم وتشوفها ان شاء الله
حاتم-زين عجل كملي ياعيون ابوية
منيفة- وبعد اسبوع اخذتلي خرزة
وطلعت امشي من المزرعة للشارع العام يبعد يمجن ساعة مشي
سألها حاتم
-خرزة شنو
ردت منيفة
بعدين اسولفلك بس خلي أحجيلك اش صار واشلون
انصدمت صدمة عمري
حاتم -كملي كملي عسى ماحچى غيرچ
منيفة- ومر رجال بسيارتو من يمي ووكف كلي
- خيتي تريدين اوصلچ لمكان گلتلو وصلني للكراج
او لدرب السيارات الي تروح لباب الطوب
گلي اصعدي اني رايح لباب الطوب
وصعدت بالحوض الورا
سألني الرجل وگال
وين ساكنة گلتلو بمزرعة أبو محمد التاجر نحنا الحراس الجديدين عندو
كال حياكم الله أبو محمد خوش زلمة وابنو بعد احسن منو توفى الله يرحمو گبل ست شهور
وهسة ابنو گاعد بالمزرعة ابو مهند والنعم منو
ناس محترمين وللهم سمعة طيبة
ايدت گلامو وسكتت
بس اني حسيت گلبي ارتاح
چنت خايفة لايصير شي
وأگع بيد ناس ماتخاف الله
لكن الحمد لله كل الناس الي صارو بطريجي خوش ناس
نزلت لباب الطوب
ورحت للصياغين وفتت على اول صايغ
وگلت للصايغ عندي خرزة اريد ابيعها
گلي وينها
طلعتها من طارف ملفعي چنت عاكدة عليها زين
وانطيتو هيا
شافها وفك حلگو ايدحگ عليها
ورفع راسو عليا
گلي منين جبتيها ؟
كلتلو لكيتها
هي ومعاه ست اخرزات انوب مثلها
كضبها وجاب مكبرة حطهة يم عينو وگام يدحگ عليها
وصاح ولد چان يشتغل عندو
وگلو
-روح صيح عمك نكتل خلي يجي
وگام يوزنها ويرجع يدحگ عليها ويفحصها
اني حسيت ان الخرزة هاي ثمينة
وسبحان الله لمن شفتهن جت براسي انطيهن لحسنة تلعب بيهن
بس بعدين گلت لو ماللهن قيمة فلا حطوهن مع الذهب
أكيد للهن قيمة
والا ليش محطوطات مع الذهب يعني هنا يجوز للهن قيمة مثل الذهب ايجوز من ذني الخرزات الي يحطوهن بالذهب
ولهل سبب گلت اشوفهن للصياغ
مادام هنا مع الذهب ماراح احد يفهم بيهن مثل الصايغ
رد حاتم وقال
-ذهب ايش وخرز ايش يمنيفة ترى ماضل عندي صبر
ضحكت منيفة وقالت
-والله حگگ بس خل اكملك سالفة الخرزة واش صار بيا
وبعدين اسلوفلك كلشي
سكت حاتم على مضض وقال
-زين كملي
منيفة - وجا رجل طويل اطرگ=رشيق كالحصان
هيچ مثلك سلم علينا
وسأل الصايغ خير اشعندك؟
الصايغ راسا انطاه الخرزة وگلو
-بالله مو صحيح أشنو رايگ نكتل
نكتل ماگال بس كلمتين
گال
- اي صحيح هو هذا
اندار عليا الصايغ وگلي
-الخرزات الباقية كلهن مثل هاي الخرزة
گلت اي بالله نفسها
گال اريدهن كلهن
گلتلو شنو من خرز هذا
گلي بزجر
انتي اشلچ بهل سوالف
واذا عرفتي او ما عرفتي اشعليكي
انتي جاية تبيعين خرزات عدكي
بيعيهن واخذي حقهم وروحي استفادي من الفلوس
واني اريد الخرزات كلهن
وراح انطيچ خوش سعر بيهن
كلتلو بيش راح تحسب الخرزة
گلي انتي بيش رايدتهن؟
گلتلو
اني معرف أشنهو من خرز حتى اعرف اطلب للهن سعر بس انت انطيني سعر واشوف اذا يناسبني لو لا
گال انطيچ بيهن كلهن خمسميت دينار
انجنيت بيني وبين نفسي شنو خمسميت دينار ليش شنو من شي هالخرزات
بس مابينت هالشي
لكني لمن دحگت على وجه هذا الي اسمو نكتل
واگف يمو
شفتو فاگ حلگو عبالگ متعجب من صاحب المحل مو مصدگ بس سكت
گلتلو
انطيني خرزتي وخل اشاور ابني واردلك خبر
گلي خلي الخرزة عندي وهسة اسلمكي الخمسمية
وايمت ماتجين جيبيلي الباقيات
گلبي جفل
وگلت لنفسي وانت وين اتعرفني حتى تنطيني خمسمية بلچي مارجعت
ليش الخمسمية هين هين ذني خمسميت دينار يعني اني گبل جم يوم بعت ذهبي بحدعش دنار ونص
وتسوگت بدينار ونص
واشتريت البگرا بتسع دنانير وهسع عندي دينار
يعني مثقال الذهب بدينارين ونص
گلت لنفس عجل هي الخرزة الوحدة بخمس مية ويمچن اكثر عجل الخرزات طلعن اغلى من الذهب
رديت عليه
وگلتلو لا خوية انطيني الخرزة ما ابيع الا اشاور ابني واذا گبل اجيبهن واجي اسلمك هنا وتسلمني الفلوس
اخاف أموت ويضلن فلوسك بذمتي
واندارت على نكتل كلتلو مو صحيح
هز براسو يعني صحيح بس ماحچا ولا كلمة
بس حسيتو ارتاح هذا نكتل
اخذت الخرزة بس انطاني هية وايدو مچلبة بيها
وحطيتها بطارف ملفعي وعگدت عليها عگدتين
وطلعت من المحل
والصايغ يوصيني ديري بالچ تضعينها وانا
اسطندركي =انتظركي غدا
وما مشيت عشر اخطا
الا واشوف نكتل بوجهي يگلي انطيچ بكل خرزة ستمية دينار وبيعيهن ليا
گلتلو مابعد ابيع الا اعرف شنهو من شي هذا الخرز
گلي هذا ياقوت احمر نقي وحر واني اريدو
وانطيچ بكل خرزة ستميت دينار
كلتلو ارجع واشاور ابني وارجع عليك
لمن جيت دا امشي
گلي اذا تجيبيهم صحيح
انطيچ سبعمية بكل وحدة
انداريت عليه
وگلتلو انت من كل عگلگ؟!!!!!
گلي اي والله واني هذا محلي
بس بصلاة محمد عليچ
ماتبيعيهم لغيري
گلتلو ان شاء الله أذا لك نصيب بيهن تاخذهن
ومشيت واني براسي الف سالفة واحاجي روحي
-شنو ستمية شنو سبعمية
عجل يولي يمنيفة چنتي تريدين تنطيهن لحسنة تلعب بيهن خرز
ونوبة فكرت لو بس انهن مزروفات =مثقوبات..چان لضمتهن مع الگرنفل ولبستهن لأمينة
ونوبة گلت لو بس مزروفات احطهن بلبة=قلادة عواشة اذا لضمتلها گرنفل
يولي يمنيفة صحيح الي مايعرف الصگر يشويه
عجل يولي يمنيفة الخرزات طلعن اغلى من الذهب
بچثيييير
رد حاتم يسألها متعجبا وقال
-منيفة شنهو من خرز هذا ووين لكيتيه؟
ترى اني مابعد اكدر اتحمل اتاني احچيلي السالفة شنو
ابتسمت وقالت
-اوووه يا حاتم
اني ردت احجيلك اش صار بسالفة الخرز
وبعدين
أحچيلك السالفة من بدايتها
واسولفلك على عجايب ربك
بس انت ماضل عندك صبر
اسمع ...
وحدثته عن قصة تلك الصرة وكيف وجدتها وكيف اخفتها وكيف فكرت بالهرب معتمدة على تلك الليرات فقط فاذا بها تعثر على كنز عظيم كانت زاهدة به كثيرا
رد عليها قائلا
-سبحان الله غير عجيبة هالسالفة
اي يابعد روحي كملي
تذكرت منيفة جلساتها القديمة مع حاتم ايام زمان حين تتوقف ويقول لها
أي يبعد روحي كملي
فابتسمت وقالت
-طلعت من ذيچ العوجة=زقاق ضيق
وفتت عليمين
ورحت لصايغ صاير بطارف السوك
الصايغ الي بعتلو ذهبي گبلها بچم يوم
وگلتلو عندي هاي الخرزة
من الياقوت الاحمر الحر والنقي
حچيت مثلما حچى نكتل حت بنفس لسانهم هما المواصلة
اول ماشافها وگف على رجليه وراح جاب المكبرة وگعد يدحگ عليها وگام وزنها
گلي بيش تريديها كلتلو بالف دينار
صفن بوجهي مشوااار
اشو رد وگال انطيچ تسعمية
گلتلو عندي مثلها ست خرزات
صرخ بوجهي وگلي
دگولي والله
گلتلو والله العظيم بس اني اريد عليهن كلهن سبعتالاف
گلي موافق
بس بالله عليچ ماتبيعيهن لاي احد غيري
گلتلو اشاور ابني واذا گبل اجيبهن باچر وأجي
گلي زين اني هم حتى احضر فلوسهن عبن ماعندي هيچ مبلغ
وطلعت واني فكري يودي ويجيب
اخذت خرزتي وطلعت
وگلت لنفسي
والله فلا ابيعهن الا اشاور ام عدنان
بس ماراح أگللها عندي سبع اخرزات
راح اگوللها بس ثلاثة وما اجيب طاري المحبس والليرات
ابد
علمتني عيشيتي بتل النمل ما اطلع كل العندي لو تقوم القيامة حت لأمي
خل بس اعرف اگضب الدرب وافهم
شنو السالفة وبعدين اتصرف
يعني اني طلبت الف دينار
وما مصدگة راح يگبل
اشو گبل وهم يوصيني ما ابيعهن بس لوا
هذا يعني
ان الخرزات يجيبن اكثر من هالسعر بچثير
ومريت على باب الطوب=سوق قديم في الموصل..
وتسوگت مسواك للبيت واخذت تكسي ورجعت للمزرعة
وصحيح لميعة ماخلتني محتاجة شي
بس الويلاد چانو مشتهين شوية حلويات اخذتلهم وهم چنت محتاجة چم غرض اشتريتهن
ورا يومين جت أم عدنان على بنتها
ومرت عليا اتطمن علينا
وگعدت وحچيتلها عن الخرزات
وعلى الي سووه الصياغين
شفتها انجنت وگالت لاتصدكينهم ذولة
سگمانية=صيادين..وشافولهم صيدة ديري بالچ
ترى يجوز يجيبن اكثر من هالسعر
ابدا ماتبيعيهن هشكل
هسع اني احچي مع نسيبي محمد
بعد چم ساعة يجي من السفر
وگامت راحت لبنتها
والمغرب جت ام عدنان ومعاها
رجل افندي وچثير مرتب وگلي
-كل الهلا بيكم اني محمد زوج لميعة
وهي حچتلي على نزلتكم عدنا
وعمتي أم عدنان حچتلي عن الخرزات اكدر اشوفهن؟
گلتلو اي نعم
ورحت جبتلو ثلث خرزات وجيت
وحطيتهن بيدو
چان اكو كراسي من خشب جدام باب بيتنا وكعدنا كلنا جوا اشچار العنب
وشاف
الخرزات وگام يگلب بيهن
وشالهن ورجعهن ليا
گلي اليوم بالليل تعالي على بيتنا وجيبيهن معاچ
عندي خوي=صديق...
جوهرجي مو صايغ هذا تاجر مجوهرات
راح ادز عليه يجي يشوف هذني الخرزات
وشيگول عليهن كلامو صحيح
اذا گال عليهن ياقوت صحيح
اني اشتريهن منچ واشگد يگول سعرهن اني ادفعلچ
وگامو راحو
وجت أمينة وعبدالله يسألوني منين جبتي ذني الخرزات
وگعدت سولفتلهم مثلما سولفت لأم عدنان
يعني اني لگيت صرار وعبالي رصاص ولمن فكيتو لكيت بيه ثلث اخرزات وبس
وسولفتلهم عن الي صار معايا بسوگ الصاغة گبل يومين
ردت امينة وگالت
هسع عرفت انتي على شنو چنتي معتمدة لمن گلتي ميخالف تنحل
اثاري ضامتلچ ضميمة
رد عبدالله وگال معگولة يايمة هالخرزات
يجيبن ثلتالاف والله ما مصدك
هنا صحيح چثير حلوات بس مو بهيچ سعر
يعني اغلى من الذهب بالف قاط
...........
وبالليل شلت الثلث خرزات
ورحنا اني وعبدالله على بيت التاجر محمد
وچانو كلهم گاعدين بصالة بيتهم
واكو رجل افندي گاعد بنصهم
وسلمنا وگعدنا والرجل كلي اختي انطيني الخرزات افحصهن
لمن انطيتو الخرزات وشافهن وفحصهن وحدة وحدة
وطلع من چنطة سودا چانت يم رجليه
ميزان ووزنهن ثلاثتهن ورجع وزن وحدة وحدة
وطلع شي من الچنطة ماعرفتو شنو
بس مثل شي يقيس بيه حجم الخرزة چنها فخة
المهم بالاخير
گلي هذا ياقوت نقي بدرجة كبيرة ونادر حيل
ومگصوص گص املس يعني ممكن يتفصل باي طريقة الواحد يريدها لهل سبب نسميه ياقوت حر
وحجم الخرزة كبير يعني اذا انگصت من النص
تصير شذرتين وممكن تنگص گص سداسي أو ثماني
وهذا الياقوت غالي حيل الخرزة الوحدة حقها الفين دينار
وكل خرزة اذا انگصت سداسي او ثماني تصير حگ الوحدة اكثر من خمستالاف دينار ويمكن اكثر
بس هي هشكل وبهل صورة ماتجيب اكثر من الفين
عبن الي يگصها هم ياخذ الفين دينار
حگ الگص
اني ضليت بس ادحگ عليهم
شنو هالحچي
الخرزة الوحدة تجيبلها حضن ليرات
بس گلبي صار ايدك دك ايريد يطلع من حلگي
لكن خطر ابالي انشدو واذا چان اللون اخضر اشكد ايصير حگها بس سكتت
عبن چان ابالي شي ثاني للمحبس
وغرگت بافكاري ووعيت والرجال يسالني
تبيعين الياقوت؟
گلتلو اي بالله ابيع
رد محمد رجل لميعة وگال للرجل
- اني اشتريه بيش ما يصير
گلتلو اني اريد اشتري سيارات
تشتغل بنقل الناس
گلي تقصدين تكسيات؟
گلتلو اي بس اريد اشغلهن على القرى
گال محمد
اني راح اخلي ولد يشتغل عندي يمشيلچ بالشغلة
ومايصير خاطرچ الا طيب
گلتلو بيش التكسي
گلي حسب نوع السيارة
گلتلو من هذني الكبار الي بطنها فضي=واسع
وجبيرة وتشيل خمس اشخاص
مثل سيارة استاد=استاذ.... عدنان
گلي هاي شوفر
ب٨٠٠ دينار واذا نظيفة مو ماشية چثير توصل للألف
وبعت الخرزات الثلاثة
للتاجر محمد رجل لميعة بنت ام عدنان
وگام طلع مشوار
ورجع جايبلي الفلوس كلها وسلمني هنا وگضبت الفلوس بديا ادحگ عليهن وما مصدگة نفسي
وطلع الجواهرجي جيس من قديفة احمر ولف كل ياقوته بگطن وحطهن بالچيس وناوشهن لمحمد وگلو الف مبارك عليك هذني احسن من الفلوس
بيني وبين نفسي كلت اني هم راح الف الخرزات بگطن
وطلع ورقة وگال اختي لازم توقعين عليها انچ بعتي
هذا الياقوت بشهادة الحضور للاخ محمد
واخذ محمد الورقة وقراها
وگالي وقعي هاي ورقة بيع وشرا
گلتلهم اني معرف اوقع
گال الرجل تعالي ابصمي
ورحت وبصمت
ورجعت
شلت من الفلوس الف دينار وانطيت خمستالاف للتاجر محمد
وكلتلو اشتريلي بكل هذني الفلوس سيارات تكسي
گلي اذا تسمعين مني لاتسوين هالشي
كلتلو ليش گال اشتري بيت اول شي
والله اني لو تضلين عندي طول عمرچ ابد ماعندي مانع بس البيت مال والسيارة بيت نار
حتى الله لايقدر وصار شي تكدرين تعوضين خسارتچ بحگ البيت
اخذيلچ بيت اول شي
والبيوت يم بيت عمتي أم عدنان بالفين وبثلت الاف احسن بيت
گلتلو الله وايدكم اندار على عدنان وكلو
تشتريلها بيت قريب عليكم واني راح اخذ الفين ونص اشتري بيهن سيارات بلكي نكدر نحصل ثلث سيارات
وانت اشتري البيت
وأثثو شوف اش يعوز البيت تشتريه مادام انت معطل واش يزيد من الفلوس رجعو لأم عبدالله اذا الباقي يجيب سيارة هم نشتري سيارة
وبعد اقل من شهر
صار عندي ثلث تكسيات وبيتي هذا
وبلشنا نشتغل
ويومية يجيني وارد السيارات
بعد أقل من سنة مع الفلوس العندي
اشتريت تكسي انوب
وبعد ست اشهر اشتريت تكسي انوب صارن خمس تكسيات
وعشنا مرتاحين ماچلين شاربين لابسين حياتنا مستقرة
وألم فلوس
واهم شي
جانت اخباركم تصلني يوم بيوم
بعد سنة جتني أم عدنان وخطبت امينة لابنها عدنان وسالت بنتي ورضت
وزوجت أمينة
بس لمن صار المگاطع على مهر امينة
فهمت ان المواصلة يزوجون بناتهم بلا سياگ=مهر
يعني أهل العريس ايجهزون البنية وياخذونها
گلت لأم عدنان والله لو تريدين عيوني انطيچ هنا بلا حسافة وحت لو چانوا المواصلة ياخذون مهر للبنية اني الا انطيچ هية بلاش وزا اني اجهزها على حسابي
والحرمة چثير حمدت ربها ان البنية گبلت
وهاي سنة عدهم..
ماگبل عدنان حت يخليها اتخلف وگاعد يعلمها قراية وكتابة وگللها ماتخلفين الا تتعلمين....
والاطفال يشغلونچ عن الدراسة..
وأمو چثير مكيفة على أمينة
تگول
-أمينة جمال واخلاق وشطارة وحيية چثير تستحي
والمرا الحيية مكسب،،
والحمد لله اجعل عدنان هم صار ابني..
غير يموت علينا ويركض ورانا
سعى معايا حتى اسجل حازم وحسنة بالمدرسة
وعبدالله يركض ورا السواق والسيارات ويعاوني بجمع الفلوس
أول هدف عندي اني اجمع حگ الياقوتات الثلاثة وارجع اشتريهن من محمد رجل لميعة
اريد اضمهن سند لولدي عبن هذني اليقاوتات هنا الي عزني بالغربة وخلني اصير مثل ذولة الملاكة=اصحاب المال
وعگبها
مايضل عليا بس ازوج عبدالله وهو ماراد ايتجوز هسع
گال خليها بعد فترة خلي نشوف اش نسوي
وآني متأكدة بس گلبو ايدگ لبنية
هو راح يجي ويگلي زوجيني وآني مالحيت عليه
وگبل اسبوع گعدت مع عبدالله وحجيتلو عن يمين اني حلفتو بذيچ الليلة الي لكيت بيهن الليرات والياقوت
الصحيح اني لمن شفت الليرات نويت الهزيمة بس ردت سبب يقنعني يكون اكبر من حچي الناس واكبر من حرماني من شوفة أمي عبني چنت اعرف نقطتين
اول نقطة اعرف راح انحرم من أمي
والنقطة الثانية چنت اظن زيدان مثل كل العرب لمن حرمتو تسوي شي ضد العُرف
ايطلگها ويخلي عارها على اهلها مثلما اتعرف
وگلت لنفسي اذا انهزمت راح ايطلگني
و اذا طلگني اصير حرة...
ولمن صارت كل هالسوالف براسي جا ابالي
اني احلف يمين
وحچيت لعبدالله على اليمين الي حلفتو
وأول ما سمع عبدالله
گال
- اني بنفسي راح انفذ هذا اليمين
تعرف يحاتم شنو چان هذا اليمين
سألها حاتم وعلى وجهه علامات الاستفهام
حيث يصبح وجهه وجه طفل صغير
وقال
- شنو هاليمين
قالت
-اني أذا الله خلصني من زيدان
اخطبك لنفسي بنفسي
وعاد اني اعرف انت ماتجوزت
واتذكر انك حلفت يمين لو اني لو ما اتجوز
سكت حاتم وتسمرت عيناه على منيفة
كأنه في صدمة من جائت له الدنيا كلها دفعة واحدة
بعد حرمان طويل
ان يعرف اين منيفة
وان يعرف انها بخير
وان يعرف انها بحالة جيدة من الغنى
وان تخطبه لنفسها
هذا كله لم يكن حتى يجرأ ان يحلم به
وقال
-ياكبر حظك يحاتم ياكبر حظك
انك تعيش لهل يوم الي تشوف بيه منيفة
وتعرف انها عايشة وعايشة بخير
وتخطبك لنفسها ياكبر حظك يحاتم
ريت حاتم يروح فدوة لطرف ثوبچ يابعد روح حاتم
واني موافگ وتحت امرچ
ضحكت منيفة تلك الضحكة الجميلة
التي كانت تذيب قلب حاتم
وقالت
-حاتم هم تريد عرس وصفگة وهلاهل
قال حاتم
-اي بالله اريد عرس واني اسويه ولازم بالجرية
وترى اني عندي فلوس چثيرة
هاي سنين واني اشتغل واجمع فلوس
بس اني ردت اعرف اش گال عبدالله
قالت منيفة
-عاد خلي اكملك السالفة
عبدالله گلي
-والله ويمين الله ماطلبتي غير حگچ
والله الأم الي ماعافتنا
وضلت سنين تركض علينا
ومدللتنا وماخلتنا جوا الادين
وصبرت على نار مايصبر عليها بشر
الأم الي ماكو بجسمها شبر ومابيه ضربة لو طعنة
ومع هذا ماعافتنا
يلو تطلبين عيوني اقسم بذات الله انطيج هنا واني اضحك والعب
واني معاچ وآني بنفسي اروح اجيب خالي حاتم
واش تريدون يجرالكم انتي عين وهو عين
ليش اني زغير ييمة لمن جانت تجي جدتي وتجيب فلوس وتنطيج هنا وتگلچ هذني من حاتم
وسنين مو سنة وسنتين خالي حاتم يصرف عليا ويربيني وابوية يمي ما حط لكمة خبز باثمي
شتريدين يجرالچ وعلى عيني وعلى راسي
أنتي وخالي حاتم
اني اروح اجيبو واجي
گلتلو
-لا لا انت ماتروح ادري كبرت وصار عندك لحية وشوارب بس اخاف احد يعرفك
وهم اني اخاف على حاتم من الفرح
اريدو يجي ومايعرف شي الا يصلنا
گلي عبدالله
- اني اخلي صبحي ايجبو
گلتلو وصي صبحي يكون حذر
ولاتورطنا ويصل الحجي لعمك دحام
وخفت لا يگلگ صبحي تعال بلا مايگلگ ليش
وماتچي يعني
اشلون راح تصدگ شخص انت ماتعرفو
ردت ادزلك شي يخليك تفهم وتجي بلا مايگلگ
صبحي كلشي
رحت للعطارين واشتريت بيبون وحطيتو بچيس وانطاه عبدالله لصبحي
ووصاه يوصلو لكا بلا مايگلگ شي
وانت عاد تعرف باجي السالفة
قال حاتم
-واني أگول اشبيه هالسايق اينصي صوتو ويسولف معايا
وخايف
ردت منيفة وقالت
-اي نعم اني وصيت عبدالله ايوصيه مايگلگ اي شي
ماريد احد يعرف اني موجودة.....
بس عاد ياحاتم
اشلون راح نسوي عرسنا بالجرية وآني ماريد احد يعرف اني موجودة بس چم سنة انوب
رد حاتم وقال
-ليش ؟
يعني انتي خايفة من شنو؟
بعدين ليش خايفة من دحام؟
قالت
-ديدة عيشة الله يرحمها گالت
غبي فرحتچ حتى لاتتكدر
وتصير دموعچ سيول تغرگچ
اخاف احد يگدر عيشتي ويخليني عشرين سنة انوب بالمرار
وماضل بالعمر عشرين سنة انوب.....
كان حاتم ينظر لها وهو يفكر بكل الاحتمالات ولم يجد سبب لخوفها او مبرر للأختفاء
فقال
-منيفة زيدان ومات منو ضل يخوفچ
محد لوا حگ عليچ
ترى صارلي ساعة افكر
بالسنة الي ضاعت من عمرنا وانتي گاعدة هينا
ومادزيتيلي خبر،
قالت له بحذر وخوف
-عبنك =لأنك....ماعشت مع هذيچ الملة...
وما تعرفهم،
آني يحاتم عشت مع زيدان واهلو عشرين سنة
وآني اعرفهم واحد واحد،،
واعرفهم زين واعرف دحام يمكن اكثر مايعرف دحام نفسو........
دحام يحاتم شرس وفطين=نبيه....
مو مثل زيدان .....
ويعرف مصلحتو زين......
اني اخاف ياخذ مني حازم وحسنة
هو مايگدر يسوي شي لعبدالله ولأمينة
عبدالله زلمة وأمينة تجوزت وخلصو منو
بس حازم وحسنة لسع زغار وأخاف عليهم
واني من لمن مات زيدان هاي سنة ،،
افكر ادزلكم خبر لو لا
اجابها حاتم مؤيدا وقال
-صدگتي وهو لو مو دحام ماچان اصلا صرتي للهم
اي نعم دحام يگدر يگلب الحگ باطل والباطل حگ
اي بالله دحام يگدر ياخذ حازم وحسنة
عبن بالعُرف هو عمهم وهو الچبير
والعربي يكيف=يفرح....يجيه صبي وصبية يخدموه وبس تكبر البنت يزوجها وياكل سياگها=مهرها....
اي بالله حگچ
قالت منيفة
-لهل سبب صارلي سنة افكر ومنين ما أجيبها
ماتجي وماضل عندي حل
غير اجيبگ من هناك بوگة=سرقة.....
ما اخلي احد يعرف بيا الا اجوز حسنة وحسنة بعدها زغيرة
يعني ينرادلها عشر سنين انوب اذا ما اكثر
واني يحاتم ماضل بيا صبر
تدري هالسنة الراحت گبال العشرين سنة كلها
الي عشتها
مع ذيج الملة
___________
وصمت الاثنان لحظات ثم قال حاتم مبتسما
-من زغري واني احبچ وماچنت ادري ليش
وصحيح چنت مصدك
الي يگول ان الحب مالوا اسباب
يعني يجي الحب بليا سبب
بس هالحجي ابدن مو صحيح
يمنيفة
الحب مايصير لوحدو ومايجي بليا اسباب
الحب چثير اسباب زغيرة وناعمة تسويه وينولد ويكبر وأبد مايشيب ولا يشيخ.....
چثير اسباب خلتني احبچ
امچ عمتي الي چانت
دايما بضهري حت ضد ابنها وبنتها
أبوج عمي احمد الله يرحمو
الي چان يحبني نوبات حت چنت احس يحبني اكثر من ذنون
وحت ذنون صحيح نغار من بعض
بس ذنون لمن چنت اتكاون=اتعارك....مع جهال الجرية
ايصير بضهري ويساندني مثل أخ
صحيح اني جيت لبيتكم واني صبي
بس عمري الصحيح بدا معاكم
أمي وابوية چانو دايم متذابحين
سبحان الله
ماشفت العيلة وحياة العيلة الا معاكم
تدرين؟.....
نوبة چنا گاعدين اني وعمتي بجنة منيفة
وندحگ=ننظر.....لجريتكم
وعمتي سألتني گالت
-حاتم شنهو اكثر شي حبيتو بمنيفة؟
گلتلها
-اني حبيت منيفة كلها مثلما ماهي
حبيت اهلها وبيتها وهدومها
حبيت حت زعلها
لمن تزعل وتصيح عليا...
اتذكرين يعمة لمن نوبة چنا انحلب النعاج=الأغنام....
اني اگضبلها النعجة وهي تحلبها
وذنون چان يگضبلچ
وفلتت النعجة من ايدي ورجعت لي ورا وداست بجدر الحليب وگالت منيفة وهي تصيح عليا بزعل
-انت وين صافن هذيان راح الحليب وگضبت الجدر وكبتو=سكبته على الارض....
وهي تحچي عليا
-مدري اشبيك
ضيعت الحليبات من ورا صفناتك
ماتبطل هالصفنات الا طيحت حظنا
وراحن الحليبات،
اني بوكتها چنت مستغرب اشلون ايكاون الرجل حرمتو
يعني اشلون تصير المشاكل بينهم
وهي متعصبة وتحچي مقهورة عالحليب الي انكب
واني صافن اشلون ارد عليها وشرد حتى انتكاون=نتعارك
وهي ضلت ادردم= تتمتم....
وآني مارديت عليها وگضبتلها باجي=باقي.... النعاج واني ساكت
وهي تحلب وادردم تدرين اش چنت احس يعمة؟
چنت احس اكو وجه لمنيفة
ماجنت شايفو
وهسع واني گاضبلها النعجة ادحگ عليها
واريد اشوف شنو الجمال الي بهذا الوجه الزعلان
يعني يعمة ماجا ابالي ادور على شي ماحلو بوجه منيفة بساعة زعلها لااااا
چنت ادور على الجمال الي بوجهها وهي زعلانة
هههههههههههه
لگيت خشمها وروس خدودها يصيرن حمر لمن تزعل
وعيونها يصيرن ايدورن علأمان
يعني هي زعلانة وتصيح وتحجي عليا
بس عيونها خايفة عليا لا ازعل
تدرين يعمة اش تمنيت بساعتها
تمنيت بس احضنها من كد ما گلبي چان ميت عليها
بكل اشكالها بكل الوانها بكل حالتها..
بوكتها انتي رديتي عليها وگلتي
-اسكتي عاد اش صار ؟
مالنا نصيب بالحليبات وراحن
وهذيان ذنون هم صافن وكل شوية ترجع
النعجة عليا وتريد ادوس بجدري الي جعد احلب بيه
بس آني اشگف =ادفع.... النعجة عن الجدر....
اشو آني مازعلت عليه وهاذي غلطتچ انتي
لاتزتين غلطچ براس حاتم....
چان انتي شگفتي عن جدرچ،،
تدرين يمنيفة عمتي اش ردت عليا واني بذاك القهر
وانتي بذاك الضيم؟
گالت ياكبر حظ منيفة بحبك لها يحاتم
يكبر حظها
وياكبر حظك بهل الحب
قالت منيفة وعيناها تضحكان وهما مغرورقتان بالدموع
-الحمد لله الي رزگني حبك يحاتم
وهذا الشي الي خلاني گوية=قوية....
صملة= صامدة.... وگفت بوجه كلشي صار وما انكسرت
بس عاد اني عندي طلب اريدو منك
ومحد يگدر ايسويه بس انت
اجابها حاتم بكل حب ولهفة قائلا
-انتي مني ماتطلبين
انتي تأمريني امر واني انفذ
وگلبي طاير من الفرح
گولي يعيون ابوية ويكل هلي........
شكرا لزيارتكم عالم روايات سكيرهوم
