رواية جسر الذكريات الفصل الثاني عشر بقلم مريم الحيالي
يا خيمة بيتنا.. وفياية غطانة
وسوالف شيب راسة.. اتسولف ربانة
بأيام الصغر ما ننجرع وكحين
يطگنة ولو بجينة.. يبجي ويانة
وانة ازغير ..وخاطر تحترمني الناس
أجي الكنتور ابوي ..اللبس بقمصانة
للشاعر: علي المنصوري
.......................................................
هديل: شنو مات ماما شبيج ... مو گلتي اليوم ايودوا
علية: هديل لتعبيني حضريهن ... هسه يجي رأفت عليهن ... ياخذهن
هديل: انصدمت شنو مات ابوية مات... والله كلشي مابي هو اتمرض بس مو حالته توصل للموت
ابراااااااااااااهيييييييييييييييم ... ابويييية مااااااات
رحت اركض الشباك المطبخ ... الولد كاعدين جوة بالعمارة... واحجي وابجي من الشباك
مصطفى ابرااااهيم تعالوا
ابوووووية ماااااات ... اباوع عليهم اجوي ايركضون همه وجماعتهم ... والجيران اللتموا علينه
مريم: صافنه على هديل هاي شبيها شدتحجي ... وهاجر تبجي وهديل تبجي الجيران وحدة ورى الخ يجن ...
كمت ابجي ... عمري ١١ سنة اهنا ماعرف شنو موت
ولا اعرف شنو الوضع الي راح انعيشة ... وشراح ايصير بينه
بقينة نبجي ... وكلساع الموبايل ايدك على هديل ...كالت البيت جدي كلهم عرفوا
والوضع مو زين طائفية محد يطلع من البيت صعبة العالم اتخاف .... بهيج وضع شلوون
وامي مندري بوضعها ماكو مو يمنا ...
هديل خابرت على بيبي وخالتي حسنه للعصر اجوي يمنه وخالتي عياط ولطم وبيبي تبجي... واجه حاتم ابن خالي
حاتم: هديل حضريلي المستمسكات خلي اوديهن العمتي بسرعة
هديل: امي كالت راح يجي رأفت ياخذهن
حاتم: ميكدر بابا ميدخلوا السيطرة عالگة بالشارع... اني اطلع عالباج مالتي
..... كامت هديل انطت المستمسكات الحاتم ابن خالي وراح ايوديهن البيت عمي .. وبيبي وخالتي بقوا بايتين يمنا والجوارين هم معافونا
وعمو نزار اهنا مريض ونايم مستشفى ...وابوية راح النفس المستشفى الي هو بيها بس مالتقوا لأن ابوية بباب المستشفى وكع ...ومات
ثاني يوم رحنه كلنا احنه وبيبي وخالتي واخواني
طلعنا البيت عمي نضال بالإمين.. اهناك الفاتحة يمه
وصلنا لگينا الجادر منصووب ... اهنا بعد غصباً علينا انصدك ابوية ماكو بعد مموجود
فتنا لگينه امي حالتها حاله ... اتلگتنا حضن وبجي
وعمتي غصون جانت حامل ... وحيل متأذية على ابوية اتحبه ..كلهم حتى عمامي
لأن موتت ابوية فجأة محد متوقعها خلال اسبوع اتمرض ومات ...
امي اتباوع علينه وتبجي اصغار كلنا اكبرنا هديل عمرها ٢١ سنة ... صعبة عليها ... تبجي وجان اتگول
علية:اليوم الابوحمل وشال
ويتم بناته وعاف العيال
فرگه الولي ياناس كتال... شلوووون بيه يايممممة
وبيبي اتجاوبها وتبجي... وترجع امي اتكمل
فركت الولي منهو اليحمله
يخلي بوسط الگلب عله
يبچن بناتك ياهو يگله.... ياهديييل يا يممممممة
بجت الكل ... واحنه نبجي
يبجن عليك ورايداتك
حنين الابو يلحلوه ذاتك
واليوم البنات مفاركاتك.... ولج يممممة شلون بيه
يا ابو هديل يا عيني
..... سودة علية امي منتهية جانت ... ابوية ايحبها وداراها عمر هو مدللها ...وحتى هي كلش اتحب ابوية ... علاقتهم كلش حلوة جانت
اجوي اهل مرت عمي اخوها وولد اختها همه لزموا الفاتحه... عمي عمران الي بديالى ما اجه مگدر بسبب الوضع ... وعمي محمد اصلا طالع خارج العراق من التسعينات ... بس الباقين لا حضروا
3 ايام الجادر منصوووب انواع الاگل وكله ذبايح
ابد مقصروا ... وبالثالث الامة انگلبت ... الجوارين كلها اجتي
وثالث يوم الفاتحة اجتي الجدورة مال الاكل من بيت اخت مرت عمي ... الدولمة والطرشانة ...
والكبة كلها مسويتها والله وجايبتها ... الاكل ايخبل
هلگد ما ابوية نفسيتة طيبة
خلصت الفاتحه بليل كعدنا .. امي كالت العمي
علية: نضال كفيتوا ووفيتوا مقصرتوا بس باجر ان شاء الله اخذ البنات والولد وارجع
نضال: انتظري يا ام هديل للسبعة وروحي ارتاحي انتي هم مريضه .. ابقي يمنه
علية: لا والله ماكدر وعيب العالم اهناك تجيني هم واسوي فاتحه ببيتي واسوي عزة مو كلها كدرت تجي الهنا
نضال: على راحتج يابة ... بس عندي موضوع وياج
كلت بعدين افاتحج بي .. بس هسه الوقت مناسب
لأن دتروحون
علية: كول نضال خوما اكو شي؟
نضال: لا كل خير ان شاء الله... علية منا وهيج الأيجار علينه احنه انشيلة والتقاعد مال دريد
يبقى مصرف الكم ... وشتحتاجون احنه موجودين
علية: متقصرون رحم الله والديكم ... ماريد اكلفكم
والتقاعد ايكفينة ان شاء الله
نضال: لا ان شاء الله كل شهر يوصل الايجار اليمكم
علية: اشكركم متقصرون والله... وكفتكم هاي والفاتحه كلها صارت يمك متنسي
نضال: دريد هذا علية شننسى من عندة..
.... كاموا يبجون ... صدك ابوية شينسي من عندة
الخير ابو گلب الحنين
رجعنا والجوارين بدت تجي واتروح ... امي تعبت
وضعنا اختلف .. تقاعد ابوية لازم امي تمشي بي يلا اتحوله بأسمها يرادلة معاملة طويلة
مرت الأيام وصارت الاربعين ... كعدنه الصبح ملگينة امي خابرناها بالمقبرة رايحة الابوية ... مندري بيها
ومن اجتي طبخت غدة ووزعته ثواب ...
مريم: هاجر مبقى شي للدوام ...
هاجر: اي وشتريدين يعني
مريم: هالسنة اني سادس ... ووضعنا شلون وامي ماعندها يرادلنا ملابس للمدرسة
هاجر: مريم مو وكتج واللبسي مال العام واسكتي
الله كريم عود بعدين امي تشتريلنا
.... سكتت لأن وفاة ابوية كلش اثر بينا ...مصطفى اخوية اشتغل بالمحطة مال غسل... شوية كام ايساعد امي
ابراهيم طالب جان ايداوم بالصناعة ... امي كلتله كمل بلكت عالشهادة تتعين
مشت الايام صعبة علينا والاصعب الي اجانة ...
علية: ابو الايجار خابر ايريد الشقة مالته ... لازم نطلع منها
ابراهيم: هاي شنو ليش ايريدها ايجار وانطينا
علية: مادري ماما ... مالي خلگ اخذ وانطي ويا ..كتلة اصبرلنا بين منلکة ونطلع ... كال بس هالشهر كدامكم
مصطفى: ووين نلگة الوضع زفت ماما وشو هي كلها اتهجرت وديطلعون شيصخم بيها يجي يكعد اهنا بهالوضع هذا
علية: اني هم ماريدها ختولي مو خوش فالها بس كعدنا بيها ابوك اتمرض ... طلعت من نفسي وصوا الولد بلكت يلگولنا ليكدام شوية
.... والله وصدك بقينا اندور الحد ملگينة شقة طابق ثاني .. ٣ غرف نفس المجمع مالتنا ... بس منطقتنا كلها اتهجرت ونصهم طلعوا الكاعدين ينعدون عالاصابع الوضع يتدهور يوم عن يوم
حضرنا الغراض ونقلناها بالعربانة لأن قريبة علينا .. الولد ايشيلون بالغراض وجان نسمع عيطة هاجر
هاجر: يمه يمه يمه مسلحييييين راح ايكتلون الولد
عزززة نزلوا عليهم
مريم: لج شبييييييج يا مسلحين ... انباوع من الشباك ونلگة سيارة طابگة عالولد ... والاسلحة بخصرهم
.... طبعاً بهالوقت الكتل بالشوارع والنبي الجثث تبقى ايام تاگلها الجلاب انمووت قهر انباوع عليها
الحد ميجون المغاوير جانو بوقتها ايشيلوهم بسيارتهم وايروحون ...
انباوع من فوك ... حجوا وية الولد وراحوا نزلنا نركض
هاجر: عززززة كل عقلكم شلون توكفون وتحجون وياهم
ابراهيم: خرب هبل گلت هاهية انعلسنه... قطرة دم مبقى بية
هاجر: شرادوا انت مخبل غير تنهزمون
ابراهيم: شننهزم يمعودة ... سألوا انتو منين وشكاعد اتسوون ... كتلة دنشيل هاي غراضنا ولكينة شقه
بقوا يستفسرون وراحوا
...... متنه خوف والنبي شنو هذول وهيج عادي يفترون لا صداد ولا رداد ... كملنة الغراض نقلناهن
وبقينة انرتب ...الحد مكعدنه واستقرينا
بس الوضع فد نوب صايرة طائفية ...وانواع الاحزاب تفتر بالعمارات امي خافت عالولد ... وكالت لازم نطلع منا
هديل: يمة اتبهذلنا هستونه شلنا وين انروح
علية: مادري يوم اخاف على اخوتج على ساعة ايكتلوهم شلون بيه... السيدية صايرة هيمة كلها طلعت محد بقى
هديل: ووين انروح ... البيت جدي منكدر منطقتهم هم مو زينه
علية: لا خلي انروح البيت عمكم نزار...منطقتهم احسن شوية
مريم: والله وصدك هم حملنا وشلنا رحنه البيت عمو نزار... اعز صديق واخ الابوية الصديق الوفي
بس خطية تعبان ومريض ... وموتت ابوية كلش قاهرته لأن مكدر ايشوفة ولا يحضر بفاتحته
لأن هو جان نايم مستشفى وحتى ميدري بابوية مريض ... خافوا عليه ومگلوله دريد مريض
وطبعاً خوالي هم كل شهر كاموا ايدزولنا... معافوا امي ابد همه وبيبي ..وحتى مسواك اتجيب بيبي من تجينه ابد معافتنا
رحنا البيت عمو نزار ... استقبلونا وكعدنا بس امي ام الخير وروحها عزيزة ...جانت هي تتسوك تملي الثلاجة والمجمدة ...حتى الحصة كل فترة اتروح تستلمها واتجيبها...
اتكول ماريد انصير ثكيلين عليهم ... عمو نزار ميقبل الشاهد لله ويحجي بس امي لا تطلع وتتسوك حتى الريوك اتجيبة
بحيث طول ما احنه يمهم كاعدين كل الصرف علينا احنه ... مخليناهم ايصرفون شي الحد ملگينة بيت يمهم وكعدنا
هديل: اتبهذلنا والله شلون انضل هيج يومية شايلين
مصطفى: غير امج مو كاعدين وساكتين ... انكتلنا يومنا هذا شنسوي يعني
ابراهيم: مرتااح بالطلقات والهجوم اليومية ايصير علينا ... مرتاح هواية
هاجر: هسه دكافي بلكت نبقى كاعدين اهنا بعد منشيل الحد ميتعدل الوضع ونرجع
مريم: بس هيهات تكمل ويانة من مات ابوية صدك انذلينه متنا ... على حظنا وايدخلون الامريكان
على غفلة ونلگاهم ايكمزون من السطوح امي اتخبلت
لمينة ملابسنا ورجعنه البيت عمو نزار... صدك متحملنا بعد لأن راح ايصيرلنا شهر احنه من بيت البيت ... هديل كامت تبجي مادري شبيها كاعدة بحديقة بيت عمو نزار وتبجي .... انباوع عليها جان ايروحلها عمو نزار وايگلها....
نزار: شبيج هدولة حبيبتي ليش تبجين
هديل: تعبت عمو اتبهذلنا امي حايرة بينا في سبيل ميصيرلنا شي يومية ناقلتنا المكان
نزار: عيب هذا الحجي بيتكم هذا بيت ابوج هديل ... گلبي يوجعني ترى لتأذي اكثر انتي هم... بنت الغالي والله غالي
هديل: ادري بيك عمو والله بس مو سهلة غراضنا كلها اتكسرت من ورى النقل احنه اتبهذلنا
نزار: ميخالف بابا اتهون هذا بيتكم ابقوا بي كاعدين شگد متريدون ... شنسى من دريد اني اجتني ايام ربع ماعندي واروحله ينطيني ميقصر ويايه
لو اروح واكله ماعندي كروة ... ايشيل مصرف وينطيني هواااي ساعدني ووگف وياية ... صداقتي وايامي ويا شلون انساها
نزار: كومي بابا انتي الجبيرة صيري قوية ... خليج عون وسند الامج هي تتقوى بيكم... انوب اتشوفكم هيج منهارين
هديل: اشكرك عمو والله ان شاء الله هسه بس اغسل وجهي وادخل ....
....اجه عمو نزار عافها واجه يمنا ايحاول ايغير الجو علينا يضحك وايسولف ... بس امي خطية مبين عليها ومتحملت وكالت حضروا نفسكم نرجع للسيدية بشقتنا ونكعد... والكاتبة الله ايصير
هاجر: عزززة ماما مداصدك راح نرجع
مريم:دكومي ولج حضري لتغيير رأييها من ورى الامير وليام والامير هاري... طاح حظنة
علية: انتي ليش ادبسز ولج ... لعد ايصير شي بأخوتج احسن
مريم: رحت بستها .... لا ماما والله اتشاقة بس خلي نرجع طگت روحي
....والله ولمينة الغراض ورجعنا ... بقينة كاعدين اتأقلمنا ويه الوضع... والولد ميتأخرون وميطلعون المكان اينزلون جوة يم جماعتهم وايصعدون
مرت الاشهر....وكرايب امي خطبوا هديل خابر خالي كريم على امي وگلها
كريم: هلا عليه شلونج بناتج شلونهن
علية: هلا ابو مثنى الحمدلله انتو شلونكم انتصار شلون صارت بشرني ... مداكدر اجيكم انت ادرى بالوضع
كريم: الحمدلله مرة هيج ومرة هيج تاخذ
علاج والله كريم... علية خابرتج على موضوع
علية: اي كول خير ان شاء الله
كريم: محمود ابن عمي فاضل ... اتعرفي خابرني خطبوا هديل الابنهم عمر ... شتگولين تنطين ؟
علية: كريم السنة مال دريد بعدها مطالعة... واني حتى محمود ما اتذكرة ومشايفته صارلي هواية ..وشلون عرفوا اني عندي ابنيه وين شايفين هديل همه؟
كريم: مو مرة حاجين بيها بعرس جاسم تتذكررين ..وقبل فترة خاطبيلة بنت عمة بس متشاكلين بيناتهم وخربان العرس حتى غرفة النوم جايبيها
علية: حيييل عرس جاسم صارلة سنين شذكرهم بعد.... هاي شنو خاطب انوب والله يا كريم مادري شگلك اجيكم ان شاء الله ونحجي مو مال تليفون
.... هلا امي وين تقبل وانوب هديل وخطوبة وزواج ...لو بيديها تعدم الي خاطب ... امي اهم شي عندها احنه ومتنطي الاي احد هواي خطبوا هديل وترفض متقبل تنطيها معقولة هالمرة اتوافق؟؟
مريم: اني مرة جنت اسوق بايسكل بالشارع ... ووكعت وايدي صار بيها فطر وجبسوها.. بس بقت اي ثكل اي شي ايأثر بيها...
اهنا جان المي ينگطع وانزل اجيب مي من البوري الاسالة الجوة فأيدي بقت اتون علية واخذتني امي وهم جبسوها ... كالولها الفطر ميطيب اقل ثكل شي يرجع ... رجعنه للبيت وهديل كالت
هديل: ماما خابر عليج واحد ايكول اني ابن عم امج ..كتله اختي مريم ايدها مكسورة وودتها للدكتور مموجودة ...
علية: ابو العريس هذا عيني ... وشيريد
هديل: مادري كتلة من تجي امي اتخابرك
مريم: امي غلست ...بس لليل خابرتها بيبي اتقنع بيها واصلا خالي كريم كايللهم احنه موافقين بدون حتى مينتظر رأي امي لو هديل
والله ورحنه البيت جدي واجوي شافوا هديل وشافتهم همه مكملين كلشي شو ذولة خلال اسبوع گطعوا مهر شيخ ومحكمة وحددو العرس ... امي بقت امام الامر الواقع شتگول بعد بس رفضت العرس
علية: شوف ابو مثنى السنة مال دريد بعدها مطالعة... ما اسوي كلشي اني لا حفلة ولا عرس شعندهم مستعجلين شو منطونة مجال
كريم: ميخالف علية خليها اتروح شعندج مكعدتها بعد والقسمة زينة ونعرفة وابن عمنه شتريدين بعد... واذا عالعرس ماكو اني اخابر محمود وابلغة
مريم: والله خابرهم خالي وكللهم وقبلوا كالوا ناخذها من الصالون واحنه اهناك انسويلها عرس ...
مريم: ماما كملتوا جهاز شو يومية طالعين وباقين احنه بدون غدة شسالفتكم
علية: مريم والنبي اذا متسكتين اطلع حرگتي بيج
مريم: اهوووو هديل وراح تتزوح راح توكف الدنيا عند امي شحيخلصنا بعد
علية: شو دكومي من يمي لو اكطعج هسه ...
مريم: امي مقهورة وين جانت تتمنى القسم الزينة النا وخصوصاً هديل هواي خطبوها وجانت اتكول اذا مو قسمة زينة وعرس بقاعة ما انطيها
الحمدلله مو كلشي نتمنى ايصير اجه يوم العرس ... كعدنة الصبح لكينة امي وهديل ماكو رايحات للصالون ومناك جايين ماخذيها ورايحين ... حتى امي مرايحة وياهم
بحيث هديل رايحة وحدها ... عبالك فصلية
مريم: شو امي اتأخرت هاجر ما اجتي صار المغرب والدنيا ثلج راح تمطر
هاجر: شمدريني كتلها خلي اروح وياكم مقبلت ... وانوب متقبل اتجيبلنه موبايل اتبقي يمنا
مريم: انسولف اني وهاجر جان تندك الباب فتحناها وانشوف امي منتهية من البجي گبل فاتت بدون متحجي... واني وهاجر وحدة اتباوع عالخ .. بعدنا مكاعدين جان تندك الباب وتجي خالة سهاد جوارينة
خالة سهاد: ياااا ام هديل شجاج خلي الابنية اتروح بفالها مو زين هيج تبجين شسالفتج
علية: بلا هو هذا عرس راحت وحدها عبالك فصلية ...شجاني وقبلت بس كليلي شجاني وانربط اللساني وماحجيت
خالة سهاد: قسمتها ام هديل شتسوين صارت بعد كلتيلها بليل اتخابرج ... نتطمن عليها
علية: اي وصيتها وانطيتها جنطتها بيها موبايلها ... استحي اخابرها هسه گلبي نار شيصبرني لليل
خالة سهاد: كولي يالله ان شاء الله ماكو شي والله..
مريم: بقت خالة سهاد يمنه معافتنا والله وصدك لليل وخابرتنا هديل حجت وياها امي وراحت.... ٣ ايام ورحنالها كلنا
طلعت هديل لابسه اتراكسود ... بقت اتسولفلنا على عرسها
علية: من رحتي منا بالزفة وين اخذتوا صور افتريتوا لو گبل للبيت
هديل: گبل للبيت يوم وما اخذنا صور لأن بيت عمه خربوا العرس .. خابروا على امه وكالولهم ابونه مات
وجذب طلع بس رادوا ايخربون العرس
وبسرعة رجعونا للبيت كلشي مفتهمت ... ولا صور ولا شي
مريم: اهنا امي انفجرت رادت تنزل اتغردلهم بالگوة هديل وخالة سهاد لزموها ... انقهرت حييل وحقها
خطية هديل لا عرس مثل الاوادم ولا شي وفوكاها خربانة الزفة وحتى صور مماخذين ... بقينا للضهر اتغدينة ورجعنا
هاجر: ماما هاي راح اتضلين كولساع مخابرة على هديل حتى عيب من رجلها
مريم: عبالك ماعندها غير بنات بعد هاهيه نستنا
علية: بلا متنجبن واتگومن من يمي سوالفجن تافها... وانتي زموو كومي فتحي الغسالة غسلي ملابس
مريم: عندي امتحان والله رايحة اقرأ... وطكيتها بركضة للغرفة غير الجو ثلج يا ملابس
هاجر: خليها ببالج ما اغسلهن اني خاف عبالج
مريم: اني اغسلهن باجر بس اسكتي ... لتحركين علوش علينا
.... والله ومرت الايام ويومية امي باليوم الف مرة اتخابر هديل ويبقون ايسولفون
مريم: كعدت الصبح على صوت موبايل امي ايدك بس شو متشيله ..
ماما
مااااااما
مااااااامااااااااا.... شنو امي وين ... رحت شفته هديل دتخابر
مريم: الوووو ... متكوليلي شبيج من الصبح
هديل: الووو ... كبر طمج دسلمي شبيج ...امي وين ؟
مريم: مادري شو اصيح عليها ماكو يمكن نزلت اتجيب صمون ... شلونج شخبارج
هديل: الحمدلله من تجي امي خلي اتخابرني
مريم: خوما اكو شي من الصبح داكه شعندج
هديل :ماكو شي من تجي امي خابروني
مريم: ديلا ماشي راحت هديل ... رجعت اتمددت باردة وبعد وكت ...انفتح الباب واجتي امي خطية فدوة العينها جايبة صمون وريوك ... ومتسوكة
علية: ها ماما كاعدة ... دكومي غسلي شعندج بعد
مريم: كمت اخذت الغراض منها ... شنو ماما اصيح عليج ماكو خوفتيني غير اتكولين من اتطلعين
علية: وين رحت يمة جبت ريوك ...
مريم: خابرت عليج هديل المزعجة من الصبح اتدك من وراها كعدت ... اتكول خلي امي اتخابرني
علية: لج اختج هاي اختج ليش متحجين عدل ولج ... جيبي التليفون امشي خلي اشوف شبيها
مريم: امشي وادردم ... هسه اني ناكرتها بس اكو واحد ايدك هيج وقت ... جبت التليفون انطيتها
ورحت للحمام اغسل واسمع امي اتكووول
علية: يااااا صلوااات صدك ولج اتأكدتي يعني
الحمدلله الف الحمدلله ارتاحي هديل ولتضلين صاعدة نازلة
مريم: شكو سالمين وين تصعد وتنزل كملت ورحت لأمي ... ها يوم شكو شبيها
علية: ولج اختج حااااااامل
