رواية جذبني فمك البني الفصل الثاني عشر 12 بقلم عبير إدريس

طلعت من غرفته ورحت لغرفتنه فتحت الباب لكيتها متغطايه لحد راسها رفعت البطانية حيل فزت وكع الموبايل من ايدها ، نصت رادت تاخذه دفعته برجلي ليغاد عنها ودنكت اخذته ، كامت تريد تاخذه مني خليته ورايه..

سيلين : تليفوني اريده..

ايفين : اي اعرف جيبيه شويه وانطياج..

سيلين : شضامه عليه؟

ايفين : ماضامه جيبي سيلين الله عليج لتسوين هيج..

سيلين : احجي لا املخج شمسويه ..

حجيتها من بين اسناني..

ضلت مصره ممسويه شي ، ردت افتحه واشوف شبيه علمود اوديه اله خوما اروح واخذ بيدي دليل فضيحه اختي ، لزمته توني اريد افتحه وسمعته يكول ..

ادهم : تأخرتي انه وين دزيتج..

انهبطت خليت ايدي على كلبي وغضمت عيني .

سيلين : بسم الله الرحمن الرحيم والله اخترعت ياعمو..

اشررلي بيده يعني جيبيه..

سيلين : عمو اني اشوفه واذا مسويه غلط احاسبها..

نتر ..

ادهم : كتلج جيبيه وتعالو ورايه..

تقدمت خليته بيده وراح يمشي برهاوه خطوات ثكيله ومتزنه ، واني لزمت ايد اختي وعصرتها حيل همست ..

سيلين : عليج الله شمسويه خوما شي يفشل..

سكتت مجاوبت هزيت راسي بقهر مراضيه عليها ..

دخلنه وكفنه كباله وهو كاعد وره الميز خال عكوس ايده على الميز وشابك كفوف ايده واصبعه الابهام يمرره براحه على اسفل لحيته ..

تخيلت روحي واكفه كدام مدير مدرسه او ضابط تحقيق هلمره نضراته اللي تتوزع بيني وبين اختي وترتني بالزايد يباوعلنه ومضيق عينه ، ساعه يباوع على حركات ادينه لو على وجهنا خبلني ..

سيلين : ليوين نضل هيج واكفين ؟

ادهم : حسب ؟

سيلين : حسب شنو؟

ادهم : تحجون الحقيقه او تكذبون عليه..

سيلين : اني ماعندي شي ضامته لو خايفه منه..

ادهم: واضح..

سيلين : يعني شنو تستهزء لو تحجي صدك..

ادهم : ماكو بقاموسي شي اسمه استهزاء انتي بشر حالج حالي على شنو استهزء..

سيلين : العفو مو قصدي بس حجيك يدل على هيج شي..

ادهم : جان قصدي انتي كتاب مفتوح مبين ماعندج شي ..

جريت نفس بعمق شويه ارتاحيت..

ادهم : تعاي ايفين تقربي..

تقربت وخطواتها ترجف..

ادهم : تردين موبايلج..

ايفين : هذا موبايل سيلين مو موبايلي..

ادهم : اعرف..

التفتت عليه وحده صفنت بوجه الخ هذا شمدريه

سكتنه.

ادهم : مكتيلي ترديه.

هزت راسها ب اي..

مدلها الموبايل واخذته فاتت على البرامج وبحركه سريعه سحبه منها شوكت كام شوكت اخذه صفني على خفه ايده وذكاءه خلاها تدخل على البرنامج المراسله منه حتى ميدوخ روحه ويدور..

ضل يكلب وعاقج حاجبه ملامحه تغيرت وجها صار احمر دم.. سد الموبايل وخلاه على الميز بثكل ...

صفن عليها خلاها تطب بنص هدومها من الفشله..

ادهم : انه صح ماصار هواي من جيت وزوجتي مريضه والمفروض مني التهي بيها وما افكر بشي ثاني غيرها ولا اخلي شي يشغلني عنها بس مادام اكو بنات ..

ركز على كلمه بناات..

ادهم : لازم اخذ حذر اذا قبل جنت حذر مره هسه صرت الف مره ليش ؟؟؟

لان انتو مسؤولين مني واذا صار شي عليكم انه الاتحاسب ، لا عم ولا ام ولا غيرهم صح لو انه غلطان..

سكتنه محد جاوب مدنكين راسنه وهو يحجي..

ادهم : انه ماحب اخليكم بهيج موقف ولا جنت اتمنى تعارفنه من البدايه يكون بمشكله جان يعجبني اتعرف عليكم بطريقه ارقى من هاي ، طبعا انه ما اقصد سيلين بالكلام لان من جيت لحد الان صوتها ماسمعته ومرات انسى هيه موجوده ، اللي لفت انتباهي انتي ايفين كم موقف صار من جيت لسه ، ما احاسبج على لبس او على شغلات ثانيه انتي حره بيها بس الاشياء التمس شرفي انه ما ارضاها ...

هسه تكولين انه مامحسوبه عليك وما الك حق تحاسبني ، بس اكلج لا انه مسؤال عنج وبمثابه اخوج الكبير ، اذا عندج اخ ميفتش بموبايلج ميدور وراج وانتي بعمر مراهقه ..

اكيد يدور ويفتش مو شك باخلاقج لكن من باب الحرص نصيحتي الج..

شال الموبايل بيده وحجه..

ادهم : هذا الجهاز عباره عن خدعه كل الكلام الينكتب بداخله يختلف عن الحقيقه مليار مره ، فتحي عقلج زين كل اليندزلج عباره عن خدع وتمويه للعقل حتى تنجرفين خلف مشاعر مو حقيقه تنكتب من ناس عايشين خلف شاشاتهم كلشي متعرفين عنهم غير بس الاسم وهاي اذا جان اسمهم حقيقي، النت ومواقع التواصل عباره عن عوالم افتراضيه بعيده كل البعد عن الحقيقه ، ماكو حب حقيقي بيها كلها مشاعر مستهلكه ...

سيلين : عمو صح كلامك وان شاءالله بعد متنعاد بس انت شنو شفت بالموبايل اريد اشوف..

ادهم : مسحته مو مهم تعرفين المهم تحافظين على اختج اكثر ...

ايفين : بس والله هو يحبني واني ماعندي شي ...

حجتها وبجت..

حجه بصوت جوهري وعالي..

ادهم : شعرفتي عنه وعرفتيه يحبج من تريدين ترتبطين برجل حقيقي مو رجال كيبورد صدكيني راح تحتاجين اشهر بل سنوات يلا تكتشفين جزء من شخصيته ، الرجل عباره عن كائن غامض ذاك من ذاك اللي يفضح روحه ويخليج تعرفين حقيقته واكو يموت ويندفن سره وياه ومتعرفيه ،

وهاي انتي اذا معاشرته بالحقيقه ، فما بالج اذا جان رجل كيبورد وكتها يرادلج عمر فوك عمرج وهم ما تستو

عبين شخصيته لان هو عباره عن وهم شخصيه خياليه احتمال الصور الدازها الج صور تابعه لشخص ثاني ، اعرف بيج حبابه وراح تسمعين الكلام وانه عندي ثقه بيج ....

سكتت وضلت تبجي.

سيلين : عمو محتاج شي لو نروح..

ادهم : انتي ضلي يمي وخلي ايفين تروح تغسل..

طلعت وسدت الباب واني ضليت واكفه اشرلي اكعد على الكرسي رحت كعدت...

ادهم : مزعلتي مني انه ماقصدتج بالكلام..

دنكت راسي والعب باضافري..

همس..

ادهم : رفعي راسج احاجيج..

بجيت متحملت..

ادهم : جنت قاسي وياها بالكلام بس صديكني لمصلحتها احجي..

سيلين : المن جانت تراسل؟؟

ادهم : مو مهم المن المهم جانت تراسل وتدز صور وهذا الشي غلط ويمسي اخلاقكم ثنينكم وحتى عمتكم هم لان انتو محسوبين علينه..

سيلين : عمو شسوي والله تعبتني واني ماكدر احاجيها مريضه واخاف عليها تنقهر واعرف هواي هملتها هاي الفتره لان جنت ملتهيه ويه عمه.

ادهم : فدوة لعقلج الجبير وانه ممنونج ، واريد اطلب منج طلب اعتبريه عربون صداقه بينه..

سيلين : شنو ؟

ادهم : لا على كلشي تبجين وترجفين هاي الحياه كبيره وكدامج ايام صعبه بعدج بدايه مشوارج وبما انو ماكو ام واب على راسج فمسؤليتج ومسؤليه اختج تقع على عاتقج صح انه وياكم وياكم ومستحيل اتخلى بيوم عن بنات وضاح الله يرحمه وكفاته حلوة ويايه خصوصا بزواجي من ياسه بس انتي عليج الهم الاكبر لان انتي اختها انه ما متواجد اربع وعشرين ساعه اريدج اقوه من هيج مو من حجايه بجيتي..

سيلين : تعبناك وانت بيا حال وان شاءالله اقوي نفسي اكثر شكرا على النصيحه..

ادهم : ماكو داعي تشكريني هذا واجبي...

سيلين : بس سؤال شنو الشي الخلاك تشك بيها..

ادهم : شفتها تطك صور وتدز وبعدين تضحك بخجل عرفت لولد بس سكتت ما حبيت احرجها بعدين دخلت لغرفتكم ولكيت موبايلج ردت افتحه بعدين عفته لان مو حلوه بحقج افتح موبايلج ...

سيلين : لا زين سويت لو مو انت جان اختي ضاعت اروح اكمل شغلي لو عندك شي بعد..

ادهم : ماعندي سلامتج و لتسوين اكل وصيت من بره..

سيلين : ليش راح اسوي هسه..

ادهم : كتلج وصيت غاويه تعب انتي.

سيلين : عاشت ايدك بس بعد لتوصي .

جاوبني مستغرب

ادهم : ليش..

سيلين : اكل البيت انظف واصلا عمه ما انطيها منه راح اسويلها غير شي..

صفن بوجهي بحيث خجلت ونصيت هو انتبه على نفسه ..

كال..

ادهم : فاتتني عاشت ايدج نبهتيني..

سيلين : وايدك شكرا من رخصتك ..

ادهم : هلا..

طلعت وجهي يريد يطك من القهر ركضت لغرفتنه لكيتها كاعده وتبجي صفنت عليها شسويلها اكتلهة ميفيد تزيد بالغلط اصادقها تستغفلني حرت ياربي وهيه جبيره مو مال اضربها ترجع تتجاوز عليه واني ما اتحمل ...

سيلين : زين من هيج سويتي حلوه وكفتنه كدام رجال غريب وخليتيني اسبح خجل لج بشنو قصرت وياج شو اكلج يمج شغل ما اخليج تشتغلين حتى بيت عمي ياما وياما شلت عنج سوالفج المكسره واتعاقب بدالج ياما بجيت من حجيهم وجان لازم انتي اللي تتحاسبين مو اني بس خفت عليج تتأذين انتي ليش متخافين عليه ليششش.

ايفين : متتكرر والله..

سيلين : لتحلفين مليت من حلفانج وجذبج مليت اغطي عليج مليت اشيل ذنب مو ذنبي كافي ايفين رحمي بحالي والله حرام الدتسويه بيه ..

ايفين : باعي كتلج ما اسويها بعد بس رجعيلي الموبايل.

سيلين : لو تموتين متلزمين موبايلي بيدج وبعدين منو هذا الدازتله صورج ..

دنكت راسها عطت بيها بصوت ناصي..

سيلين : احجيييييي ويامن راح تموتيني..

ايفين : اسامه..

سيلين : يا اسامه عزه بعينج خاف..

ايفين : اي هو..

هنا متحملت بعد لزمتها وكتلتها اضرب وادعي على ماما وعلى تربيتها الصكط بس تعرف تخلف وتشمر محسبت حساب لهذا اليوم..

بجيت وكعدت بالكاع..

سيلين : وينك بابا تعال وشوف حالي شديصير بيه تعال شوف بنتك اخذت حيلي لا ضلت عندي عافيه ولا ضل كلب يتحمل..

اجتي كعدت يمي تمسح بدموعي وتبوس بيه..

ايفين : والله ماعيدها والله..

سيلين : شالج الله لتحلفين كتلج وبعدين شجابج على هالجلب هذا لج صورج وراد يفضحج ويخزيج وحتى هددني شلون ترجعين تأمنين بيه شلوون نذله هسه تحجيلي كلشي لو والقران اخابر عمي فرات اشوفه يرضه بسوالفج..

ايفين : يحبني وصار اكثر من مره يراسلج وانتي متدرين بعدين اني حجيت وياه كتله اني ايفين ودزيتله صوره لان مصدك بيه عباله انتي ..

سيلين : جنتي لابسه هدوم لو تصلختي ودزيتيها..

ايفين : لا والله لابسه...

سيلين : كتلج عوفي الحلفان مو راح تخربين حياتنه فوك ماهيه خربانه وباعي بس امج تحن وتدز علينه اخذج واروح لو اعرف اكعد بنص النار ولا اضل هنا اختنكت ماضل بيه حيل يوميه عمو صايحني ومتفشله من وراج..

نصت راسها وسكتت محجت شي..

سيلين : لعد انتي صدك بأرادتج من طكلج صور...

ايفين : باعي ما احلف لان انتي متقبلين بس وروح بابا جنت مابيه حيل اقاومه وتعبانه وصدك جبرني.

سيلين : لعد شلون رجعتي امنتي بيه مو راح اتخبل ..

ايفين : اني غلطت وبعد متنعاد وبعدين ضايجه وضليت اسولف وياه..

كرصتها من زندها حيل..

سيلين : ل

ج ضايجه شنو شو بيت شكبره وغرفه مال اوادم كاعده بيها وتلفزيون عندج وتليفوني بيدج وايمن كم مره اخذج فرفرج ويه مريم وبعدين خلصت الاوادم ضل اسامه بس تكضين وكت وياه ، ولج احنه كوه طلعنه من ذاك البيت وخلصنه من الحيه البيه تردين ترجعيله برجلج هذا الفراغ هيج سوه بيج والثول مالتج كومي من وجهي لا ابتلي بيج..

رادت تحجي سديت اذني ..

سيلين : بس كتلج سكتيييييي سدي حلكج ..

كمت مددت راسي راد ينفجر ومادري بنفسي نمت نسيت اكل عمه ونسيت دواها مضل عقل براسي للعصر يلا كعدت فتحت عيني باوعت الدنيا صايره العصر ضليت افتح واسد بعيني اني وين مرات واحد يكعد من النوم ناسي كلشي وهسه اني هيج ...

كمت كعدت وفركت عيني تذكرت الصار كله خليت ايدي على وجهي ردت ابجي بس تذكرت كلامه من يكلي اطلب منج طلب اريدج قويه ومتبجين بسرعه ...

مسحت وجهي وكمت طلعت بره باوعت غرفه عمه فارغه عطت بعلو صوتي ..

سيلين : عمممممممه ولكم عمه وين اخذتوها عزه بعيني عمه ماتت ..

كما اضرب على وجهي وركضت لباب الهول اريد اطلع اجوي ادهم وايمن يركضون وصلو يمي وجهم مخطوف ..

ايمن : شكو شبيج سيلين..

اباوع عليه وعلى عمو وعيوني تكت دموع وجسمي كله يرجف من شفتهم هيج كلت يعني مابيها شي كعدت على ركباتي وارجف...تقرب عمو ادهم وكنبص كبالي..

ادهم : شبيج حلمانه لو اخترعتي ؟

رفعت راسي باوعت بوجها جان مليان قلق..

حجيت بصوره متقطعه وأأشر بيدي.

سيلين : رحت للغرفه وشفت عمه ماكو وعبالي...

سكتت محجيت هو فهم عليه.

ادهم : انه طلعتها تشم هوى الجو حلو بالحديقه واختنكت بالغرفه..

سيلين : اي صح بس اني متعلمه اطلع من غرفتي واروح كبل عليها الكاها متمدده لهذا اخترعت..

ادهم : كومي غسلي وجهج وتعاي بره كعدي يمنه..

سيلين : اي اي هسه اجي..

كمت على كيفي وهو ضل على كعدته يباوعلي مشيت افرك بوجهي انهبطت هبطه تسوه عمري الفات والجاي..

رحت غسلت وطلعت لكيتهم كاعدين كلهم رحت كبل لعمه حضنتها وبستها همست بأذني...

ياسة : الولد وراج حبيبتي لتدنكين ..

رفعت نفسي وكعدت بصفها وهاي اول مره واحد ينبهني على هيج شي شكد جنت ادنك امسح واشتغل كدام ولد عمامي مافد يوم واحد نبهني حتى كدام رجل امي ، اعتبره هذا درس الي ماعرف نصيحه وجتي بالوقت الضائع ...

كاعدين بس الهم مغيم على وجهنا وكلمن وجها يحجي القهر العايشه..

مريم جانت كاعده بحضن ابوها شاورته ابتسم وكللها..

ادهم : يلا مو تدلليين..

حجاها وكام شايلها.

ياسة : ها وين ماخذتك ضرتي..

ادهم : معليكم بينه عدنه مشوار صغير نكمله ونرجع شتكولين بابا.

مريم : صح ...

حجتها وضحكت طلعت اسنانها المكسرة..

طلعو وره شويه طبت مريم تركض وصلت يمي شاورتني بس الكل سمع وضحكو عليها..

مريم : بابا يكول خل تجي سيلين ويانه ..

سيلين : ههههه عليمن شاورتيني الكل سمع ..

مريم : يلا كومي حبابه تأخرنه..

سيلين : انتي كتيله مو هاي سوالفج..

مريم : لا والله بابا كال..

باوعت لعمه ابتسمت بتعب...

ياسة : كومي حبيبتي هسه يجون روحي شمي هوة صارلج هواي مطالعه..

سيلين : ماشي..

كمت دخلت جوة لبست بنطرون وضليت بتيشيرت البيت لبست فوكاه ترواكه خفيفه كلش جان بدايه شهر الثالث بس اني من النوع ابرد ما اتحمل..

طلعت لازمه مريم بيدي اشرتلهم باي وطلعنه اول مافتحت باب البيت باوعلي عمو عقج حاجبه ورجع دار وجها باوع ليكدام رحت فتحت الباب الاماميه صعدت مريم توني اسد الباب حتى اصعد ليورة كال..

ادهم : صعدي يمها وخليها بحضنح..

هزيت راسي ب اي نزلتها صعدت ورجعت كعدتها بحضني مشت السيارة ومريم تسولف وهو يجاوبها عفيه خلك ميفوت سؤال ويجاوب اجوبه احسها تنمي شخصيه الطفل كأنما يحجي ويه بنيه شابه وتفهم ..ضلينه نفتر واستحي اسأله وين رايحين ...

ادهم : مريومه شكد عمرج؟

مريم : عمري اربعه اله شهرين..

ضحكنه ثنينه ..

ادهم: منو كلج على عمرج ..

مريم: ماما كالت ابوج سافر وهيه حامل بيه ثمانيه شهر..

ادهم: ثمن شهور مو شهر زين بابا..

مريم : زين وانت رحت اربع سنوات ..

ادهم : اي

مريم : اي هاهيه..

سيلين : دوختوني شلون هيج حسبتوها.

ادهم : عفتها حامل نهايه شهر السابع وسافرت جانت نهايه سنه اتذكر ٢٩ / ١٢ لهذا اخذت شهرين من السنه الجديده يعني عمرها اربع سنوات اله شهرين حسابها صحيح بنتي..

سيلين : بعد عمه شلون متنطي بالمضبوط ..

ادهم : رهيبه بالرياضيات شكد تمنيت تكمل بس ماعدهة واهس ..

سيلين: مو كلشي نتمناه نحصله.

ادهم : هاي معليها بالاماني هاي شغله تخص المثابره اكو انسان طموح يحب يوصل واكو لا يكتفي بالقليل وياسه من هذا النوع ..

سيلين : هم صح..

سكتت وره شويه سألته مريم..

مريم : بابا واني شوكت اسجل مدرسه..

ادهم : بعدلج سنتين واسجلج ..

مريم : وشوكت البس حجاب..

ادهم : من يصير عمرج تسع سنوات احجبج..

مريم : بس اني احب شعري طالع حلو البس قراصات..

ادهم : كلشي حلو بحياتنه لازم نحافظ عليه ولان شعرج حلو ضميه لليستاهلج ميصير الناس الغربه تشوف شعرج..

مريم : ي

عني حتى البنات..

ادهم : لا البنات عادي بس اذا رجال غريب ميصير لازم لو اخوج لو ابوج لو عمج غيرهم حرام ..

مريم : فهمت...

وكف السياره كدام سوبر ماركت كال هسه اجي وراح..

سيلين: مريومه اسألج سؤال واذا كذبتي عليه بعد ماحبج ولا انام يمج من تخافين..

مريم : ماجذب عليج اني والله..

سيلين : لتحلفين مصدكتج بس كليلي انتي وبابا متفقين تسولفون كدامي على سالفه الحجاب واذا كذبتي ترحين للنار .

نصت راسها وسكتت..

سيلين : هاا شو سكتي..

مريم : بابا يكول اليفتن حرام ويكول ماحبج اذا حجيتي اسرارنه وانتي تكولين اروح للنار..

سيلين : هاهيه عرفت لتفتنين عفيه عليج اليفتن مو حلو ..

هزت راسها فرحانه لان منطت بأبوها بس عرفت يريد يوصلي رساله من خلال بنته بخصوص حجابي ورادني اطلع وياه ديشوفني البس حجاب من اطلع وانزعه بلبيت لو حتى بره نازعته ...

رجع جايب كم شغله فتح الجنطه خلاهن بيها واجه صعد..

مريم : بابا تأخرت شوكت تشتريلي لعبه تره مفتنت..

جان يشغل بالسياره باوعلها مصدوم ورجع باوعلي اني غلست سويت روحي ممنتبهة عليهم ضليت اباوع من الجامه وصلنه يم محل يبيع العاب.. صف السياره والتفتلي..

ادهم : تنزلين ويانه..

سيلين : لا مابيه حيل..

ادهم : جبتج حتى تغيرين جو وتنسين الخرعه ..

سيلين : غيرت جو مو اله انزل من السياره.

ادهم : براحتج..

نزل واني فتحت الباب لمريم نزلت واجه اخذها لزمها من ايدها وراحو لمحل الالعاب ، ضليت اباوع شلون ملاعيب حلوة لعبه احلا من الثانيه عيني اجتي على لعابه كلش عجبتني عيوني نطت عليها بسرعه تذكرت اللعابه الجابها بابا جانت نايلون وشكد فرحنه بيها بوقتها يمكن لو جايبلي من هاي جان وكف كلبي ، صوته قطع صفنتي ..

ادهم : ياهو عجبتج هاي لو هاي ..

باوعت عليه شايل لعابتين وحده احلا من الثانيه..

ضحكت وغرغرت عيوني بالدموع..

سيلين : شمدريك عجبتني..

ادهم : معليج شمدريني جاوبني هاي لو هاي ..

اشرت على وحده خلاها بحضني شكبرها والثانيه فتح الباب الوره خلاها على الكشن ورجع للمحل ومريومه بعدها ممختاره..

ماعرف ليش حسيت اتجاها احساس ابوي حسيته والدي حتى خوفه عليه وعلى اختي نصائحه النه رغم مصار هواي من رجع بس ويانه ويانه كاعد يقوم سلوكنه بطريقه حلو ومتجرح بس مشكلتي اني حساسه زياده عن اللزوم ...

اجوي ومريم متبين من الالعاب الشايلتها ..

اخذ منها الالعاب خلاهن ليوره ونطيته اللعابه مالتي هم خلاها يمهن وصعد مريم كعدت بحضني..

رجعنه الطريق كله ساكتين وصلنه صف السياره ونزلنه اني و مريم نتسابق ناخذ العابنه هيه اخذت العابها واني اخذت لعابتي ولعابه ايفين ..اللي يشوفني ميكول عمرها عشرين سنه ..

دخلنه للبيت الحديقه فارغه داخلين جوة يمكن برد الجو لان الدنيا غوربت دخلت كبل لغرفه عمه لكيتها متمدده ويمهة ايفين نطيتها لعابتها اخذتها وضحكت ..

ايفين : هاي الي..

سيلين : اي عمو جابها..

ايفين : صدك يعني الي..

سيلين : شبيج الج الج هههه..

فرحت بيها كلش وفرحتها نستني زعلي منها وبنفس الوقت حسيت عمو راد يفرحها وهاي اللعابه جانت بمثابه تطيب خاطر الها ..

انداريت على عمه ياسه عيونها مدمعه..

سيلين : شفتي عمه بنات اخوج رجعن صغار..

ياسة : الله يجازيها لامج الجانت تصرف بس على نفسها وملذاتها معرفت بيوم تعوف نفسها وتشريلكم لعبه تفرحكم بيها لو ملابس..

جريت نفس..

سيلين : عمه البلكلب بالكلب ماريد اطلعه خليني ساكته..

ياسه : سكتي احسن لان اني هم انقهر لعد وين مريم..

سيلين : هيه وعمو بسطو بنص الهول..

ياسة : صيحيها اريد اشوف شنو جابت..

رحت صحتها عمو ادهم رفع راسه وكال...

ادهم :هسه نجي اخذي راحتج..

سيلين : تمام ...

رحت لغرفتي نيمت لعابتي على الجربايه وبدلت ملابسي ورحت للمطبخ اسوي عشا ..

طلعت لحم مثروم حتى اسوي كباب وطلعت عدس اسوي شوربه بعدني اباوع بالثلاجه شطلع سمعت صوته ورايه..

ادهم : معلاك جبت بالمجمده واكو همبركر هم اذا تحبين سوي..

سيلين : يعني اضم الاكل الطلعته..

ادهم : براحتج سوي اليعجبج بس وياه نشوي معلاك علمود ياسه..

سيلين : ماشي ..

ادهم : اصلي واجي اساعدج..

طبيت بنص هدومي من هيج كال..

سيلين : لا عمو وحدي اسوي شعندي بسرعه اكمل..

مجاوبني فات للحمام توضى وراح يصلي الحمام قريب على المطبخ ...

طلعت المعلاك خليته بطاسه وفتحت البوري عليه علمود يحل وخليت الطاوه على النار وبلشت اكلي ، كملت البورك وكليت الطماطه ، داسوي بالزلاطه اجه..

رفعت راسي شفته مشله ردنه واتجه للسنك اخذ السجينه والتخته وبلش يكصكص بيه..

سيلين : قبل الله..

ادهم : منا ومنكم ..

سيلين : عمو اني اسوي ليش جيت..

ادهم : تره اعرف مو عبالج..

سيلين : بس اني داسوي ليش تعب نفسك وتزفر ايدك..

التفتلي.

ادهم : اربع سنوات عشت وحدي وجنت اخدم نفسي بنفسي يعني عادي اذا سويت اكل لزوجتي مابيها شي..

سيلين : براحتك..

سكتت ورجعت اثرم ، هدوء بس صوت طكه السجاجين بالتخته هم اني اثرم وهم هو....

شوه المعلاك واني حض

رت الصينيه رتبت بيها الاكل كمل شوي فرغ المعلاك من الشياش خلاهن بماعون وجواهن خبز عيني تفتر على خفه ايده شلون يتحرك ويشتغل.

سيلين : مو هواي سويت..

ادهم : سويت للكل لو ناس تاكل وناس تشتم الريحه..

ضحكت ...

ادهم : ضحكه خير ان شاءالله ..

حجاها وملامحه نفسهة لا ضحك لا ابتسم شكله جدي كلش..

سكتت اخذ الصينيه واني اخذت الخبز ورحت وراه خله الاكل على الطبله وكعد بصف عمه واني رحت صحت ايفين وجبت كراسي ثنين الي ولمريم واجتي ايفين جابت كرسي الها كعدنه ناكل تذكرت ايمن..

سيلين : ايمن وين علمود ادزله اكل..

ادهم : يتأخر احتمال يتعشى بره ..

حجاها وسوه لفه لعمه وخلاها بيدها تاكل على كيفها وهو يضل منتظر شوكت تكمل علمود ينطيها الثانيه.

ياسة : اكل انت هم..

ادهم : معليج مني كملي وبعدين اكل..

تعشينه وشلت المواعين رحت غسلتهن ورجعت لغرفتهم لكيتهم سادين الباب رحت لغرفتي علكت التلفزيون وتمددت ..

ضليت متمدده لحد ما نمت ثاني يوم الصبح كعدت على صوت هوسه وحجي هاي شنو منو جاي..

كمت طلعت لاكتني ايفين الوجه احمر وفرحانه ..

سيلين : شكو خير..

ايفين : ولج هذا شنو فهد اله يطك بالكاع..

سيلين : عزة بعينج يافهد هذا..

ايفين : اخو عمو ادهم ولج نسخه مستنخسه منه بس الفرق هذا مبين عصبي من فات لسه مغضب ..

سيلين : ليش شوكت كعدتي حتى من فات لسه.

ايفين : ولج اجوي من السبعه وجانو بره يتريكون وانتي نايمه..

سيلين : وشكعدج من السبعه..

ايفين : كعدت على صوتهم ..

سيلين : واني شلون مكعدت عجيب..

ايفين : شمدريني المهم معلينه هذا فهد يخبل شلون بيه..

سيلين : باعي اذا سويتي شي العب بيج طوووووبه خوش..

ايفين : خوووش خوووش..

عفتها وطلعت تذكرت سالفه الحجاب طبيت يم عمه حتى اخذ منها شال لكيت يمها مره جبيره وبنات ثنين مشافيتهم سلمت ورحت فتحت الكنتور اخذت شال وطلعت رحت للمطبخ غسلت المواعين مال ريوك وحميت الجاي فات واحد للمطبخ كال السلام عليكم..

التفتت باوعت هذا صدك يشبه عمو ادهم بس طبره بحاجبه واضخم بعد..

ارتبكت معرفت حتى اجاوبه..

فهد : شنو انتي خرسه ؟

سيلين : نعم..

فهد : لا الحمد لله طلعتي تحجين ..

بهاي الاثناء دخل عمو ادهم باوعلي ابتسم عرفت على الشال اشرلي بصبعه يعني اوك او عاشت ايدج..

فهد : ذني منين جايبهن متكلي عبالك شاشه hd من الوضوح..

ادهم : بنات وضاح شبيك..

فهد : وضاح اخو ياسه..

ادهم : اي الله يرحمه..

فهد : الف رحمه ونور تنزل على قبره على هالخلفه هاي..

ضربه على كتفه شاوره وطلعو وفهد ضل كاسر ركبته عليه لحد ما اختفو من كدامي..

أصعب الألم.. أن ترسم الضحكة على شفاهك وداخلك ينتحب و أن تجامل من حولك بالفرح والحزن يبني حضاره في صدرك ....

___________

طلعو من المطبخ واني رجعت اكمل غسل مواعين نظفت المطبخ اجتي الحجيه الجانت يم عمه..

ام ادهم : انتي سيلين مو ؟

التفتت عليها ابتسمت ..

سيلين : اي خاله..

ام ادهم : اي ماشاءالله صايرات نسوان ..

ضحكت ..

سيلين : كلكم تفاجأتو من شفتونه ..

ام ادهم : مو تغييير قوي ، امج شلونها وينها ما شفتها..

ضليت اتبلعم شنو ميدرون احنه هنا باقين لو خاف عدهم خبر عمه كايلتلهم ، حرت شنو اجاوب كلت اسكت احسن..

ام ادهم : شنو امج مجايه وياكم..

سيلين : لحظه خاله بس اروح لعمه يمكن صاحتني..

ام ادهم : بس ما سمعتها صاحت.

سيلين: لا صاحت هسه اجي..

رحت اركض لغرفه عمه فتت جفت لكيتها بحضن عمو نايمه ضربت كصتي حيل ردت اطلع صاحني عمو التفتت عليه..

همس ببرود ..

ادهم : محتاجه شي؟

سيلين : بس هذا شسمه ..

ادهم : شنو احجي .

سيلين : ردت اسأل عمه بس لكيتها نايمه.

ادهم : بخصوص؟

سيلين : امك سألتني على ماما واني ماعرف انتو شنو مفهميها لهذا معرفت شجاوبها..

ابتسم وهز راسه

ادهم : الحجيه سألتني وسألت ياسه ورجعت تتأكد منج كليلها احنه باقين هنا لان عمه ياسة محتاجتنه فضت راحت .

سيلين : وعلى ماما شكول؟..

ادهم : كليلها تجينه بين فتره وفتره تشوف عمه وتسأل علينه وتروح..

سيلين : ها شكرا واسفه عمو لان دخلت بدون ما ادك الباب عبالي انت ماموجود..

محجه شي ردت اطلع صاح..

ادهم : سيلين..

التفتت

سيلين : نعم..

ادهم : حلو الحجاب عليج.

سيلين : شكرا..

ابتسمت وطلعت سديت الباب ورحت للمطبخ لكيتها رايحه وين ماعرف تنفست الصعداء ...

باوعت اكو سمج ني على الميز يمكن اليوم يشوون سمج على الغده بس وين بره هنا ، المن اسأل علمود اسويه توني فتحت الثلاجه اريد اشرب مي سمعت صوت واحد يتحمحم ورايه التفتت لكيته فهد هذا اليوم حالف ميعوفني..

سيلين : محتاج شي؟

فهد : لا بس ضوجه وين اروح كلت اجي يمج..

همست..

سيلين : شهالميانه..

فهد : نعم ؟

سيلين : شربت مي وكلت الحمدلله..

فهد : ها بالعافيه.

مجاوبته اخذت وحده من السمجات وخليتها جوة المي غسلتها وخليتها بالمصفي ملحتها واخذت الثانيه وهكذا لحد اخر وحده ، اجه وكف يمي قريب كلش بينه شبرين..اني ابتعدت ليغاد .

فهد : شو باعيلي..

رفعت وجهي مستغربه جرئته..

سيلين : شكو؟

فهد : شنو انتي حولة ؟

من كال هيج اجتني الضحكه شكله يضحك مو مال تصنيف ابد..

ابتسم وكال..

فهد : تدوم تدوم ان شاءالله.

كحيت وسكتت..

فهد: مكتيلي عندج حول ولادي..

رجعت ضحكت..

هو يباوع لوجهي مركز شكد صلف..

سيلين : انت شبيك فايت حامي ساعه خرسه ساعه حوله شسالفه.

فهد : ماعرف والله بس اكو خلل بعيونج ماعرف لان كبار مدري لان السواد جبير لو نعسانه مطفيه شنو منايمه زين تسهرين هواي.

سيلين : شنو انت هم تدرس علم نفس؟

ضحك..

فهد : لا عيني هذا اختصاص عمج الله يبعدنا بس ليش سألتي.

سيلين : مو كاعد تحجي حسب الملامح وبكيفك تستنتج.

فهد : لا بس اكو شي غريب بعينج وصار عندي فضول اسأل..

سيلين : هاي يسموها العيون الناعسه ولان بؤبؤ عيني كبير يبين عندي حول بس اني ماعندي كل ما بالامر السواد اكبر من البياض..

فهد : بس سبحان الله شكد حلو اول مره اشوف هيج شي..

سكتت رجعت اشتغل والصراحه ضجت لان نطيته عين بس هو اسلوبه يضحك..

راح فتح الثلاجه ومدري شطلع اسمعه بس ناطيته ضهري..

لهناك اجه ادهم فات..

ادهم : ها سيلين شو انتي دتشوين..

التفتت عليه لكيته يباوع على فهد وخازره وذاك يضحك..

ادهم : روح لأبوي يدور عليك.

فهد : خوما صاحوني بسماعه الجامع..

ادهم : شو تستهزء انت..

فهد : غير انت تكول ابوك يدورك شنو ضايع ويدورني..

ادهم : يسأل عليك عمي غلطنه ميصير..

فهد : دكتور وتغلط شخليت النه لعد..

ادهم : يلا تيسر ولتضل تحومي على السمج..

فهد : تعرف بيه احب السمج.

ادهم : اي ادري بيك ..

الغاز بينهم بس عرفت يقصدوني..

طلع فهد واجه ادهم يمي..

ادهم : علكتي الفرن..

سيلين : لا ماعرف..

ادهم : لعد شلون جنتو تشوون من جنت مسافر..

سيلين : اصيح ايمن يعلكه لان اخاف منه..

ادهم : ها ماشي انطيني الجداحه..

نطيته الجداحه وراح علكه.

ادهم : علكت الجوه ومن تستوي صيحيني اعلك الفوك.

سيلين : اوك.

ادهم : محتاجه شي وين البنات ليش وحدج تشتغلين..

سيلين : ماعرف مشفتهم اصلا.

سكت وطلع من المطبخ وره شويه رجع..

ادهم : رايحين ويه الوالده للكاظم يزورون ...

سيلين : اي براحتهم..

هز راسه و طلع من المطبخ واني رجعت اشتغل نكعت تمن كلت اسوي تمن احمر وشعريه واشوف شنو بعد ..

اجتي ايفين للمطبخ هيه وتراكسودها والشعر يتطاير..خزرتها..

سيلين : شنو هذا لبسج خرب بيج..

ايفين : شكو اول مره تشوفيني هيج لابسه..

سيلين: تره عدنه خطار مو وحدنه بلبيت وابنهم عيونه زايغه شويه ثكلي لتجيبيلي حجاي

ه اني مناقصه..

ايفين : اني صوجي جيت اساعدج..

سيلين: ماريد تساعدين روحي رجعي لغرفتج وممنوع تطلعين منها.

ايفين : اي اي ..

عوجت حلكها وراحت ميعجبها من احجي وياها ...

جريت نفس ورجعت اشتغل ، كملت كم شغله ورحت لعمه دكيت الباب صاحت تعاي..

سيلين : ها عمه تاكلين ويانه لو اسويلج غير شي..

ياسة : قطعه سمج صغيره وهاهيه..

سيلين : ها خوش.

ياسة : تعاي اكلج..

رحت يمها..

سيلين : ها عمه..

ياسه : عينج على اختج من فهد تره هذا طبعه شلايتي لا مثل ادهم ولا ايمن يختلف ابن سوك وكضه عمره عايش باللواته واحد مينغلب ابد ولا ينعرف بشنو يفكر فديري بالج عليها واني اعرف بيج شنو لهذا ميحتاج اوصيج..

سيلين : اي عمه مبين بدون متحجين..

ياسه : كم يوم ويرحون بهاي الايام شويه راح تتقيدون..

سيلين : عادي عمه بيت ابنهم واذا بقو احنه نلتزم..

ياسة : فدوة لعقلج لو تدرين ادهم شكد يمدح بيج يكول كلش مؤدبه وحبابه..

سيلين : شكرا ههه..

ياسه : هههه قابل اني كلت هو كال..

سيلين : اي عود انتي كليله سيلين تكول شكرا.

ياسه : ماشي..

سيلين : وين مريم اليوم لا ريكتها لا سبحتها.

ياسة : اخذنها عماتها وياهن وراحن يزورن..

سيلين : شلون بيهم حيل جايين من طريق بعيد ويطلعون.

ياسة : قويات مو مثلنه بس شكل نتعب بساع هههه..

سيلين : هم صدك.

ضليت كاعده يمها شويه وكمت طلعت رحت للمطبخ اشوف الاكل اجه ايمن طب للمطبخ باوعتله شايل سله مليانه ملابس..

سيلين : شنو ذني وصخات؟؟

ايمن : لا عيني عمج سفرني..

سيلين : عمو ادهم..

ايمن : اي ..

سيلين : شلون سفرك..

ايمن: كلي طلع كل غراضك وشنو تحتاج وانزل بغرفه البنات وهنه يصعدن بدالك بين ما اهلي يرجعون..

سيلين : هاا يعني هسه احنه نروح بالسويت مالتك

ايمن : عليج نور...

سيلين : وشوكت نروح.

ايمن : هسه .

سيلين : مو كاعد اسوي بالغده..

ايمن : معليه هاي تعاليم عمج كومي يلا طبقيها بحذافيرها..

سيلين : ههههه يلا رايحه..

رحت لغرفتنه لكيت ايفين كاعده..

سيلين : كومي طلعي ملابسج.

ايفين : لش؟

سيلين : بلا ليش بعدين افهمج يلا كومي..

كامت تطلع بالهدوم وتأفأف.

سيلين : افونه حبيبتي ليش تضوجين من احجي وياج..

ايفين: مادري مرات تحجين بنتر

سيلين : والله تعبانه يعني متعرفيني شكد احبج ..

ايفين : العفو خاف ضوجتج..

كمت حضنتها وهيه هم مدت ايدها حاوطتني وحضنتني.

سيلين : عمو يكول كعدو بمكان ايمن بين ميروحون اهله..

ايفين : اي ماشي..

اخذنه ملابسنه وطلعنه لكيت ايمن واكف بره الغرفه..

ايمن : ادري سفره عدكم اخذو كم قطعه مطلعين الكنتور كله شنو..

سيلين : ايمن لتخبلني انت كلت طلعو ملابسكم..

ايمن : اي بس ماكلت كلهن وبعدين تره همه يومين بالزايد رايحين يعني ميحتاج هلكد ملابس اله اذا ناوين تاخذون مكاني للأبد..

سيلين : والله صح كلامك احنه شبينه اخذنه هلكد لحظه ارجعهن واخذ كم قطعه..

ايمن : تعاي تعاي هم اكعد انتظر بعد ايدي راحت.

سيلين : وانت شكو واكف بالباب وشايلهن تعال خليهن هنا واني راح اخلي ملابسنه هيج بعدين اسفطهن ..

ايمن : يلا بسرعه عندي كومه شغل اريد وحده تجي ويايه..

سيلين : وين؟

ايمن: اجيب كم شغله من السوبر ماركت عمج رادهن..

سيلين : نروح اني وياك مثل كل مره نجيب بسرعه ونرجع وهم محتاجه شغلات لعمه ..

ايمن : يلا بسرعه لتتأخرين..

سيلين : ماشي.

اخذت كم قطعه وطلعنه صعدنه فوك للسويت مال ايمن جان الباب مفتوح دخلنه ملابسنه واني بدلت لبست بلوز على البنطرون بس شويه بيه طول يعني يستر ولفيت الشال على راسي ونزلت لكيت ايمن واكف بالطرمه ويمه فهد.

سيلين : كملت..

ايمن : يلا نروح..

فهد : وين رايحين.

ايمن : للسوبر ماركت نجيب كم شغله وصاني ادهم عليها وهيه تجيب لياسة..

فهد : خوش لعد اجي وياكم ضايج..

ايمن : امشي يلا..

طلعنه همه صعدو ليكدام توني اريد اصعد سمعت صوت باب البيت انفتح التفتت ادهم واكف بالباب ومغضب ..

ادهم : ايمن انزل رايدك بشغله وفهد تعال انت هم..

نزلو راحو يمه ماعرف شنو حجه وياهم واجه يمي همس ..

ادهم : صعدي ليكدام ..

رحت صعدت وهو صعد انداريت باوعتهم ثنينهم واكفين بالباب وعينهم علينه ماعرف خجلت حسيت فشلهم او عرفو لان اني وياهم نزلهم ..

الفصل الثالث عشر من هنا