رواية نهوة عمامي الفصل الحادي عشر بقلم مرج البحر
سارة: اني نايمه وحسيت شي وكع عليه اني صرخت وصارت عندي الم كلش قوي كمت شربت مسكن ونمت كلت الصبح اروح للدكتوره ومن كعدت ثاني يوم الصبح ما بيه شي ما رحت للدكتوره اني جنت لابسه وقف من السيد على مود ما يطيح الحمل لان اني عندي تابعه تصير مع كل حمل المهم
فات كم يوم وكمت تطلع ريحه مو طيبه من حلكي وصارت عندي افرازات مهبليه مثل بثل الجاي كلت لسيف خل اروح للدكتوره اشوف وضع الطفل كال
روحي ورحت العصر للدكتوره وسوتلي سونار وكالت ماما الطفل ميت صار اكثر من اسبوعين كتلها دكتوره خل اتاكد راح اروح لدكتور فاضل ابو السونار كالت روحي وكتبتلي تحويل مستعجل حتى بسرعه ادخل على الدكتور ودخلت وسوالي سونار كال اي بابا الطفل ميت ارجعي على الدكتور ه خل تكتبلج علاج حتى يوكع
لان الطفل ممرود كال ليش هيج
ابن حماتي وكع عليه واني نايمه بليل
أي مبين الطفل كلش ممرود
ورجعت للدكتوره وكتبتلي علاج وكالت تستمرين عليه واسبوع وارجعيلي كتلها تمام ورجعت للبيت واجه سيف من المحل وسولفتله
اي من نومج انتي ما تنامين اله على ضهرج
غير هيه الدكتوره تكلي انام على ضهري حتى الطفل يثبت وكام يصيح وكال اريد عشه
اي هسه اسويلك بس اسكت انت ما تشوفني اني بيا حال والله راح اموت من القهر وطلعت روحي من البجي وكلت خل انزع الوقف مال السيد بعد على شنو لابسته وبس نزعته واخذت من العلاج لان قبل الطعام واني متت من الالم وغركت بالدم ركضت للحمام وبقيت انزف كلش قوي شايفين الذبيحه اول ما تنذبح دمها شلون قوي اني نفسها والله وصحت على سيف كتله الحكلي راح اموت كال
شسوي ما تكليلي
اركض صيح جارتنه ام ليلى وراح واجت ام ليلى وشافتني كامت تدك على خدودها هيه مره جبيره بلعمر كتلها خاله فدوه لحكيني راح اموت والله صاحت على سيف كالتله خل ناخذها للمستشفى اذا تبقه هيج تصفر دم واخذتني للغرفه وغيرت ملابسي وكتلها خاله كمت ما اشوف كالت هسه نروح للمستشفى لا تخافين ورحنه وبلطريق سيف كال خل نمر على اهلج خاف يصير شي عليج واني بس ابجي واصيح ما اشوف والله كمت ما اشوف ورحنه على اهلي وسيف نزل وصاح امي واجت من شافتني وكتلها ما اشوف تخبلت ورحنه للمستشفى ودخلنه صالت الولادة والدكتوره شافتني راسن كالت لازم عملية كرداش لان حتى عندج بداية تسمم بالدم لان الطفل صار اكثر من اسبوعين ميت وأن شاء الله خير اني اول مره خفت ما قبلت اسوي عمليه وكلت لامي تخابر على بت عم ابوي دكتوره رجاء
وامي خابرت على دكتوره رجاء وسولفتلها ورجاء كالت لازم عملية كرداش لان عدها تسمم بالدم وذني السسترات ال بلمستشفى كامن يحجن ويكولن اي احنه حيوانات ما نفتهم تخابر على بت عمها ودخلني صالت العمليات واجت الدكتور جانت متدربه من اهل الناصريه وسوتلي عملية الكرداش بس بدون بنج والله شفت الموت بعيوني من الالم والله مثل الذبيحه بين اديهن وما بنجني واكو وحده سستر اسمها اخلاص هاي الكامت تحجي من خابرت على رجاء ملخت اديه من التزرف على اساس تشكل كانونه وبقيت اكثر من ساعه بلعمليه وبعدين خلوني بغير غرفه وانطوني مغذي والدكتوره كالت لامي عدها العافيه أن شاء الله بس تخلص المغذي تكدرون تطلعون للبيت وطلعنه للبيت وامي باتت يمنه وثاني يوم رحنه لبيت اهلي وبقيت يمهم اكثر من اسبوعين واني بقيت اسبوع ما اشوف لان نزفت هواي والدكتوره كالت ما يصير نديرلها دم هيه عدها تسمم بالدم بس تستمر على العلاج وبعد يومين امي اخذتني للدكتور ابو العيون وكال هذا الشيء طبيعي لا تخافون لان نزفت هواي صارت ما تشوف بس يرجع نضرها بعد كم يوم أن شاء الله والله ما انسه هذا الشيء الصار بيه ولا انسه دموع ابوي وعمي عزام عليه من شافو حالتي
واجني عليه يم اهلي عمتي اقبال وبتها جنان وتحمدلي بالسلامه وبعدين من امي حجت وكالت هذا الصار بيها من ورى ابنج واكع عليها مارد الطفل ببطنها جنان كالت لا شني من ورى ابني اني مو بقيت يمهم وسالتها وكالت لا صرت زينه وحتى ما قبلت تروح للدكتوره اني كتلها اي صح اني كتلج راح لالم بس هوه السبب يعني طفل عمره اربعة اشهر شلون يرمرد ويطيح ووصله وصله كالت لا ليش ما وكت من اول يوم من طاح عليج ابني كتلها لن الرحم ما مفتوح وحتي صار عندي تسمم بالدم لان باقي ميت وكامت تريد تروح كتلها هسه اني خذت راسج لو راس ابنج بس هذا الصار قابل اجذب عليج
وفاتت ايام وحياتنه روتنيه ما بيها شي بس سيف ما يعوف سوالف النسوان ودائما عرك اني وياه وبقيت اكثر من ستت اشهر اراجع على مود التسمم الصار عندي والدكتوره كالت لازم بعد ما تسوون طفل اقل شيء سنه ونص او سنتين حتي دمج ينضف وبهاي الفتره خطبنه بيت عمي حاكم لاخويه سليم وبيوم المهر مالتهم يوسف جان صف ثاني ابتدائي وهو ما يحب يغيب وكتله اروح اخذلك اجازه كام يبجي لا ما اريد اجازه اريد اداوم كتله شلون غير لازم نروح الصبح من وكت حتى نساعد بيبي وخالاتك يارا ولارا وامل كلهم يجون وهو بس يبجي كتله خلاص لا تبجي بطلت ما نروح هسه اخابر بيبي واكلها كام يبجي بلزايد لا اني اريد اروح للحفله وهم اريد اداوم كتله شلون كلي دوامك ضهري وقت الحفله العصر ما نلحك اذا تريد دوام معناتها ما نروح للحفله كال لا اخذيلي اجازه وكال والدروس شلون اعرفها كتله اني اتفق وي معلمتك ست اطياف وهيه تخابرني وتكول على الدروس وقنع ورحنه لبيت اهلي ولتمو اقاربنه كلهم ورحنه لبيت العروس وجانت لابسه فستان كلش حلو طبعا ذوق اختي يارا
وبعدها تم العقد وصارت حفله كلش حلوه ورجعنه لبيت اهلي وطبخنه عشه للاقارب البقو وبعد العشه رجعت للبيت وفاتت ايام واهلي يحضرون لعرس سليم وصارت مشكله لان خوال البنيه يردونها لان عمي حاكم مطلك مرته الي هيه ام رسل وهمه رسل واخوانها رابين يم خوالهم وخوال رسل دزو ناس على اهلي يهددون بيهم حتى يعوفون رسل وكالو احنه الرباناها ونريدها لولدنه بس هيه رسل ما تريدهم واهلي ما قبلو يعوفونها واستعجلو بالعرس مالتهم وخوال رسل دزو خبر بن راح يسوون العرس فاتحه واهلي من سمعو هيج سوو العرس ببغداد يم بيت خواتي يارا ولارا وصادفت امتحانات اخر السنه ل يوسف اني رحت بس يوم الزفه بيوم الحنه ما كدرت اروح وصار العرس كلش حلو بمنطقة الشعب وثاني يوم العرس اخوي سليم تخربط وكام يتقيه فاركضو بي للمستشفى ابوي ورجل لارا ومسويله تحاليل ومشكليله مغذي ورجعو للبيت وابوي كال تحاليله نضيفه بس الدكتور يكول احتمال من التعب وبقه اخوي سليم مريض اكثر من اسبوع وحتى ما كادر يقرب على رسل لحد ما بيوم العاشر امي واختي لارا اخذوهم للامام الكاظم سلام الله عليه واحد الشيوخ الموجودين بلامام شايف امي واختي يبجن وسائلهن ومسولفاتله على سليم وشلون تخربط ثاني يوم العرس وهوه سال سليم كاله هم تقربت على مرتك
سليم لا
ماخذهم على غير واحد وماخذلهم خيره والشيخ كال لسليم انت هم ماكل شي من احد بيوم العرس سليم جاوب وكال اي ما ادري منو خله بحلكي جكليته من اني اركص بس ما شفت منو والشيخ كام يقرء على سليم ومرته وبنفس اليوم كدر يقرب عليها
وثاني يوم امي وسليم ومرته رجعو للكوت واهلي سوو عزيمه كلش كبيره على سلامت سليم
وفاتت ايام وسحر جارتي شالو من بيتهم ونزلو بمكانهم ابن عمتي روشه اسمه سلمان وسويتلهم غده ودزيته الهم للبيت مرته كلش حبابه اسمها انتصار وعدهم اربعه اطفال ثلاث ولد وبنيه وصرنه اكثر من خوات اني وياها وعشنه ايام حلوه طول عمري ما انساها وصار على نزول بيت سلمان يمنه اكثر من سنتين وانتصار صارت حامل وكملت فترة الحمل مالتها وجابت بنت وسموها فاطمه وكلش حلوه ومن صار عمر فاطمه خمس اشهر انتصار تمرضت صارت تشكي من كلياتها وصار سلمان يفتر بيها من دكتور لدكتور وبقت مريضه ثلاث اشهر والدكتور قرر يسويلها عملية غسل كله ودخلت مستشفى بقيت اسبوع وقبل العمليه بيوم توفت وجانت وفاتها مثل الصدمه اليه
وجانت وفات انتصار من اصعب الايام التمر عليه وخاصتنه اني جنت احسها اختي وجانت دائما تنصحني وتعلمي على امور الحياة لن هيه اكبر مني واني كمت لا اكل ولا اشرب وخاصتنه من اشوف اطفالها ابنها الكبير مصطفى جان ثالث متوسط من توفت وبتها طيبه جانت اول ابتدائي وعلي جان ثالث ابتدائي ومحمد خامس ابتدائي وفاطمه عمرها ثمان اشهر والله من اباوع عليهم اموت ميت موته وفاتت ايام الفاتحه وإني كمت حتى للبيت ما اكدر اطب ابقه بلطرمه لحد ما يرجع سيف من المحل كمت احس بيها موجوده وياي لن جنه اكثر الوكت نخلصه سوه وبيوم التاسع من وفاتها سلمان رجع الاطفال للبيت لان الفاتحه صارت بيت اهل انتصار ومن رجعو الاطفال تعلقو بيه كلش بحيث طيبه كامت ما تنام اله اني يمها وفاطمه اخذوها اهلي ربوها وفاتت ايام وبيبيتي ام امي توفت وكلش انقهرنه عليها لن جانت كلش تحبنه والفاتحه كانت بغداد بالامين الثانيه ورحنه للفاتحه اني وسيف وعمي حميد
ورجعنه نفس اليوم لان مؤمل جان عندي مريض كلش ما كدرت ابقه وامي جانت متاثره على بيبيتي لن صار فتره ما شايفتها لن امي جانت ملتهيه بسالفة اخي سليم وبعدين وفاة انتصار وبقت تلوم نفسها لن ما راحت وشافت بيبيتي وبعد وفات بيبيتي بخمس اشهر صار زواج امير ابن خالي بس محد حضر عرسه لن كل عوالنه حزانه على انتصار وبيبيتي وبعد العرس بشهر رحنه اني وسيف واجبناهم وبقينه يمهم اربعة ايام بس اني ما بقيت بيت خالي شهاب رحت يم بيت بتهم رنا ما اعرف احس بنفسي ثكيله على امير لان احس نظراته غير شي ما اعرف اوصفهن محبه او كره او غضب او حزن وحتى صارت مشكله بين امير ومرته وكام يصيح عليها حسيت هذا الشي من وراي بس اني الله شاهد عليه من تزوجت بعد امير صار مثل اخواني والله واي شي ما بقه بكلبي من ناحيته
لهذا السبب بقيت بيت رنا وبليل قبل ما نرجع للكوت اجه امير هو ومرته لبيت رنا ورنا كالت ما دام راح ترحون خل نسهر اليوم سيف ما قبل يبقى كاعد كال اذا اسهر ما اكدر اسوق فرشتله رنا بلستقبال واحنه بقينه سهرانين اني ورنا وزوجها وامير ومرته وكرار اخو علي واخوي سالم لان هو جان ويانه وجنه نسولف ونضحك وزوجة امير اسمها شيرين كالت سارة اني زعلت عليج....
شكرا لزيارتكم عالم روايات سكيرهوم
