رواية نهوة عمامي الفصل الثاني عشر بقلم مرج البحر
كالت اني زعلانه عليج
سارة اني بقيت صافنه ما اعرف شنو اكول وزوج رنا كال
هوب هوب عليمن صافنه
اني ضحكت وكتله. لا بس استغربت من كلام شيرين كالت لا حبيبتي اتشاقه وياج كتلها كولي ليش زعلانه كالت لان جيتج خلصتيها يم رنا ما شفناج ولا تعرفت عليج زين بس اني اول ما شفتج حبيتج والله حسيتج قريبه عليه ولا كن اول مره اشوفج رنا كالت هيه سراوي محبوبه طيبه وكلبها ابيض زوج رنا كال اي كلش محبوبه لان خلصت الكرزات كلها
ها عينك على الكرزات هاك بعد ما اريد مو لان انته جايبها وكمنه نضحك وصارت احلى سهره وثاني يوم الصبح ودعناهم ورجعنه للبيت وبعد مدة سيف عرض البيت للبيع لان منطقه بعيده وكال نشتري بيت قريب على اهلي وبقه البيت اكثر من سنه معروض للبيع واني بهاي الفتره كمت اراجع على مود الحمل لان نريد بنيه
وراجعت دكتوره وفاء بالكوت وسوتلي تحاليل وكالت عندج خربطه كلش قويه بالهرمونات وانطتني علاج واستمريت على المراجعه ستت اشهر وصار الحمل وبيوم ما رحت وحللت وعرفت حامل جان يوم عقد قران اخي سالم والتمت الاقارب ورحنه لبيت العروس واني جانت مهمتي التصوير بالكاميرا وتم العقد ودخل سالم على العروس وجانت كلش حلوه وصارت فقرة الكيك وتلبيس الذهب واني عايفه الكامره واصور بالتليفون لحد ما حصلت عيطه من امي ههههههه كالت والله خوش مصوره عايفه الكامره وتصور بلتليفون وعلى مود التصوير عادو اللقطات والعروس اسمها عبير لان خجلانه تحلفت بيه وكالت ولج اني اريد بس نخلص وانتي من وراج راح نعيد ههه طبعن الكلام بس بيني وبينها كتلها اسفه ما نتبهت وغمزت لاخوي وهوه ضحك ولن اني المصوره ما خذت صوره وي العرسان وقبل ما نرجع للبيت كتلهم بصوت عالي اكلكم انتم قشمرتوني شنو بس انتم اخذتو صور وي العرسان واني محد كال تعاي اني اصور بمكانج وانتي صوري وياهم وسويت حركة الزعلانه وكلت ل سالم روح حتى الكامره ما انطيكياها لن بس انتم شبعتو صور واني لا وصار الكل يضحك واختي لارا كالت غير انتي المصوره وين اكو مصوره تصور نفسها وي العرسان كتلها ما بعد زعلت منكم كالت ولا يهمج تعاي اني اصورج وصورتنه لارا وكتلهم عقوبه الكم راح اخذ الكيكه واروح والكل يضحك وخلصت الحفله ورجعنه لبيت اهلي
وبعد فتره من دخلت بشهر الرابع رحت للدكتوره وسوتلي سونار وكالت ماما بيج بنيه اني كلش فرحت لن اريد بنيه بس الدكتوره كالت الطفله كلش صغيره لان الجاره مالتها ملتهبه وما جاي تتغذه زين كتلها السبب كالت من تسمم الدم الصار عندج كتلها بس صار اكثر من ثلاث سنوات كالت اي يبقى يأثر على الحمل بس على العموم لا تخافين استمري على العلاج وأن شاء الله خير وشهر وترجعيلي كتلها تمام وفاتت ايام ودخلت بشهر الخامس وصار عرس اخي سالم واهلي ذبحو بقرات ثنين من غير الخرفان لن ابن شيخ واني ما رحت بلزفه لن ما لازم اتحرك هواي وصار العرس كلش حلو ومن خلص العشاء اني كعدت على التخم واتامر على البنات خواتي وبنات عمي وهنه يطكن من القهر لن ما اشتغل وياهن وكل ساع وحده كالت اي عمي حضوض ناس تكرب وناس كاعده واني اضحك عليهن وصار احلى يوم لن ملتمين وفاتت اشهر ودخلت بشهر التاسع اليه اسبوع وبليل حسيت بالم خفيف يجي ويروح وخابرت أمي وكتلها خاف اخابرج نص الليل مو يضل بالج شو عندي الم كالت تعاي هسه كتلها لا اذا زاد الالم اجيكم وفاتت الليله سلامات وثاني يوم العصر كلت لسيف خل اروح للدكتوره اشوف وضع الطفله كال روحي وصلني سيف لبيت اهلي طبيت بس رسل وعبير نسوان اخواني سلمت عليهن وكتلهن امي وين مرت عمي عزام وين رسل كالت راحو لبغداد كتلها يا شلون يرحن مو يدرن بيه اني اطلك رسل كالت حتى عمي عزام كاللهن لا ترحن خاف سارة تطلك وانتن مو يمها كتلها هسه اخابرهن واتعارك وياهن والله شني يعوفني ويرحن رسل كالت غير خالج ابو حيدر جاي من لبنان مو تدرين جان يعالج هناك وخابرت على امي وكتلها شلون ترحين وتعوفيني كالت هسه مو يكول اليوم انتي تجيبين كتلها لا والله واذا ما اجيب اليوم شلون ترحين كالت هسه انتي روحي للدكتوره وشوفي شنو تكلج واذا عندج ولاده هسه اجر سياره واجي كتلها تمام ورحت للدكتوره وفحصتني وكالت اي عندج ولاده لازم اليوم تولدين لن ماي الطفل خالص وكالت هسه تروحين كدامي للمستشفى لن الطفل تعبان خاف يحتاج خدج
وخلال فترة الحمل من عرفنه انه ابنيه اني وسيف نتعارك على الاسم سيف رادها رياحين واني ردتها ميامين ومن اني بالعيادة سألتني الدكتوره شنو حيكون الاسم كتلها بعدنه ما متفقين لن ابوها يريد رياحين واني ميامين الدكتوره كالت اثنينهم حلوات وسوتلي تحفيز ولاده وتشكرت منها وطلعت بسرعه خابرت امي وكتلها هسه تجين كالت هنا بغداد مطر زخ ما نكدر نطلع
كالت خابري على اختج امل ومرت عمج علياء يرحن وياج واني خابرت كرار ابن خالج بي تسكت الدنيا اجيج كتلها تمام وصدك خابرت على امل كالت اي ادري امي خابرتني وكالتلي لا تخافين احنه يمج ما نعوفج حتى لو اماهاتنه مو هنا اني امج لو نسيتي انتي مو جنتي تصيحيلي ماما من جنتي زغيره يالله صيري سباعيه وروحي للبيت حضري روحج واني بس اصلي المغرب اجيج كتلها تمام وكالتلي ارجعي مشي لا تصعدين سياره حتى شويه تسهل الولاده ورجعت مريت على بيت جدي وشفت بيبيتي ام ابوي ومن شافتني اتوجع وابجي من الالم صارت تبجي وياي وكلت لعلياء تروحين وياي انتي وامل كالت اي وبيبيتي كالت اطفالج وين خليتيهم جيبيهم يمي كتلها لا بقو يم مرت سليم ومرت سالم ورحنه اني وعلياء لبيت اهلي ولكيت عمي عزام كاعد ومن شافني خابر على مرته وضل يصيح عليها لن راحن وصار المغرب ورحنه للمستشفى ودخلنه صالت الولادة واول ما دخلت شفت وحده كاعده بالكاع وتلطم لن جاي تطلك اني من شفتها ركضت وطلعت من الغرفه وامل تركض وراي شايفين من الاطفال يلعبون ركيضان اني صرت هيج والله حتى الالم راح وامل تركض وتصيح عليه واني نزلت الدرج وطلعت للشارع والله ما ادري شصار بيه من شفتها وامل لزمتني ورجعتني وكالت هاي شبيج شنو اول مره تطلكين كتلها والله من هاي التلطم بعد ما اطب للغرفه كالت بس خل الدكتوره تشوفج ونطلع انتي شبيج مره تطلك ليش تخبلتي من شفتيها كتلها طبي انتي وشوفيها بعدها لو اخذوها طبت امل وكالت تعاي ماكو رايحه لغير غرفه وطبيت وفحصتني الدكتوره وشافت دكات قلب الطفله وكالت ما كو صوت يمكن الطفله ميته ببطنج كتلها فدوه دكتوره العصر اني يم دكتوره ميساء الطفله ما بيها شي كالت ها انتي مراجعت دكتوره ميساء كتلها اي كالت خابرت ووصت عليج امل كالتلها خاف من الهبطه هسه من دخلنه وجانت وحده تعيط وتصرخ وهيه خافت وشرده الدكتوره كالت روحي ارتاحي نص ساعه وارجعي عليه ورحنه لغير غرفه وامال شربتني عصير كالت حتى الهبطه تروح منج
وخلصت النص ساعه ورجعت للدكتوره وشافت دكات قلب الطفله وطلع صوت امل كالت لن جنتي خايفه وركضتي هسه تمام وفحصتني الدكتوره وكالت ارجعو هسه للبيت لن بعدها يا دوب عدها توسع اصبع ونص وكالت لامل شربيها هيل وخل تتحرك مو تكعد لو تنام والصبح تعالو واحنه رجعنه وامل فورتلي مي وهيل واني كمت املخ بروحي كوه كوه صارت الساعه بلوحده بليل كلت لامل بعد ما اكدر راح اموت والله ما ابقه للصبح ذني بس يردن يخلصن مني يكللج للصبح ورجعنه للمستشفى وما لكينه الدكتوره طالعه بس القابله موجوده وتروح علياء وتنطيها فلوس حتى تهتم بيه ولتلاثه الصبح وي اذان الفجر وجان يوم جمعه صارت ولادتي وشرفت ست الحسن والجمال بس شنو طلع وزنها اقل الكيلو حتى القابله من شافتها كالت هاي هل زغرها ورتي تموتين من وراها جانت ولادتج كلش صعبه بس اني ما رتج تخافين وما حجيت بس اني كلت لاختج اذا بقت بعد نص ساعه احولها عمليه بس الحمد لله الله سهل ومن طلعت الجاره القابله تعجبت من شكلها وريحتها تكتل والقابله كالت والله صار 33 سنه اني قابله اول مره اشوف هيج جاره مريضه كتلها اي ادري حتى الدكتوره عرفتها من اني بشهر الرابع وبقيت اكثر من ثلاث ساعات واجت السستر وكالت شنو اسميها على مود البيان حتى يومين ويكمل اني كتلها ميامين وامل صاحت بيه وكالت شنو ميامين هذا منين جبتي ولج رتي تموتين وما خلينه امام يعتب علينه من كد ما توسلنه بيهم وهسه تردين تسمينها ميامين وكالت سميها زينب كتلها لا بت جنان زينب وبت شيماء زينب اني اريد اسم مميز كالت رقيه كتلها بتج رقيه وبت هديل رقيه وبت علياء رقيه كالت انتي سميها بس على اسماء اهل البيت كتلها اسميها فاطمة كالت اي هذا الاسم الحلو وسميناها فاطمة ورجعنه للبيت ونمت والساعه بلخمسه الصبح امي يمي رجعت من بغداد
وصادف يوم ولادة فاطمة 2017/1/5 يوم جمعه واول ما اجت امي من بغداد كالت كومي للحمام خل اسبحج كتلها ما لا تحاجيني والله ليش عفتيني ورحتي وانتي تدرين اني عندي ولادة كالت والله حسبالي بعدج انتي غير هستوج الج اسبوع بالتاسع كتلها اي اني حتي يوسف ومؤمل اسبوع واجيبهم واجت باستني من راسي وكالت ميخالف البنات ما قصرن كتلها اي والله ابد ما قصرن شوفي ادين امل موتتها من العض انجلبت عليها هههه وامل سولفت لامي وكالتلها والله وصلت الموت حتى القابله اجت تحولها عمليه بس الله سهل وولدة وامي اخذت الطفله وسبحتها وبعدين اني دخلت للحمام وكلت لامي ما اكدر اوكف وامي خلت كرسي واني كعدت وهيه سبحتني وقت الضهر رجع سيف من المحل هو وياسين وطب ياسين سلم عليه وتحمدلي بالسلامه وكال شنو سميتوها كتله فاطمة سيف ضل صافن وكال شنو كتله اي فاطمة كال مو اني رتيها ميامين كتله اجه قرار من الجهات العليا كال منو امج مو وياج كتله لا امي الثالثه لن اني اصيح لمرت عمي عزام ماما كال منو كتله امل وهو ضحك وكالها
عفيه عليج سويتي حل وسط لن لو هيه مسميتها جا سبتني سبايه واني ضحكت وكتله
لا تفرح اني سميتها
وبليل فاطمة كامت تتستفرغ مي لونه اخضر واني من شفتها تخبلت عليها وامي كالت لا تخافين ما بيها شي هذا من مي البطن وباجر العصر اخذها للدكتور وثاني يوم امي اخذتها وراحت اني ما اكدر اتحرك بقيت بلبيت بس بالي يمها وكل ساع اتصل على امي وكالت بعد موعدني ما واصل واتاخرت اكثر من ساعتين واني ميتة خوف على الطفله واجت امي وكالت لا تخافين ما بيها شي مو كتلج هذا مي البطن وحتى الدكتور هم خلاها تتسفرغ يمه ونضف معدتها وانطاني هذا العلاج وكال اسبوع وتتوقفون ويوم الثالث من الولادة بيتنه نباع وسيف اخذ مهله شهر على ما اصير زينه حتى ننتقل🫣🫣🫣🫣
ولان البيت باسمي لازم اروح اتنازل وخامس يوم الرجال الشترى البيت خابر سيف وكال لازم ام البيت هسه تجي تسوي موافقت البيع على مود اسوي معاملت الطابو وسيف كلي روحي كتله شلون اروح والطفله واني كوه اتحرك كال اوصلج بلسياره بس انطي الموافقه وارجعي واخذني سيف للمحكمه سويت الموافقه ورجعنه رحنه على الطابو ووقعت على المعامله وابو الطابو كال بعد هم نحتازج كتله ما اكدر اتاخر لن عندي طفله عمرها خمس ايام كال روحي وباجر تعاي كتله تمام ورجعت للبيت وبس وصلت رجعو خابروني لازم هسه احضر لن لاكين علىى ساس امي مطلوبه للدوله فلوس مال قرض على عماره ورجعت للمحكمه وياي اخي سالم واخذت مستمسكات امي كلهن وصارت طويله وكل ساع طب منا واطلع منا واني ميته تعب ودخلت على القاضي وسولفتله وكتله سيدي والله امي ما عدها عماره ولا ماخذه قرض كال لازم احولكم لبغداد لن نفوس امج بغداد كتله على بختك والله اني هستوني والده وبنتي عمرها خمس ايام كال تمام باجر روحو للكوت ومناك سووها كتله تمام سيف ضل يلطم ويصيح بس اني حضي مسجل البيت لو بتليت كتله انته شنو من بشر لخاطر الله هيه امي تطلع طب شو الناس كلها تحلف بيها وفعلن امي مره فقيره كلش والله احنه بناتها مو مثلها الله يشهد على شرف امي وفقاريتها
ورجعنه للبيت اهلي وكلت لامي على الشى الصار وكتلها لازم باجر من الصبح اروح لطابو الكوت ومعصومه شلون وهيه ترضع على صدري وامي كالت اروح العصر واجيبلها ممه وحليب كتلها لاتجيبين حليب بس ممه كالت شنو كتلها اي حتى لو تنطيها مي وشكر بس لا تنطيها حليب ما اريدها تعوف صدري
وراحت امي وجابت بس ممه وثاني يوم الصبح كعدت من وكت ورضعت فاطمة وشبعتها وراحنه اني وياسين والولد الي اشترى البيت طلعنه من السابعه صباحاً وصلنه ودخلنه للدائره وكل ساعه محولينه على غرفه شكل لحد ما دخلنه على غرفه الحاسبه ودخلو بيانات امي وطلع تشابه بلاسماء الثلاثه الاولى وكملنه المعامله ورجعنه الساعه بالاربعه العصر واني كلبي مثل النار على فاطمة ومن وصلت بيت اهلي لكيت امي مسبحتها ونايمه وكلت لامي هم انطيتيها مي وشكر كالت اي مره وحده ونامت رحت ردت اكعدها امي ما قبلت كالت روحي طبي للحمام وسبحي وبعدين ارضعيها لن مو زين عليها لن انتي تعبانه ورحت سبحت ورجعت كعدتها ورضعت وخليتها يم امي واني رحت نمت وثاني يوم رجعنه لدائرة الطابو وتنازلت على البيت وكلت للولد ان شاء الله شايفين كل الخير على عتبته لن هيه فعلن عتبت خير ورجعت وبعد اسبوعين صار عرس ابن عمي حاكم اخو رسل واهلي كلهم راحو اني ما رحت لن نفسه امي كالت مو زين عليه وصار عمر فاطمة عشرين يوم رحت للبيت وكمت الم بالغراض والولد الي اشترى البيت ابو الايجار طارده فستعجلو على البيت يردون نفرغه ونقلنه الغراض مالتنه نص يم بيت اهلي ونص يم بيت عمي حميد ورحنه كعدنه يمهم على ما نلكه بيت بس اني اكثر ايامي يم اهلي ولكينه بيت نفس شارع وي بيت عمي حميد فرق بيتين عنهم وكعدنه بي وصار عمر فاطمة شهر ونص من نتقلنه لهذا البيت ويوسف صار صف ثالث ابتدائي ومؤمل روضه
واستمرت حياتنه روتنيه وصارت مشكله بين حماتي نجلاء ورجلها لاكيها تخابر وطلكها واجت كعدت يمي اول ايام زينه وبعدين نكلبت حيه والله كم مره توصل للطلاك اني وسيف بسببها وبقت يمنه ستت اشهر واجو عليها ناس خطبوها وشكد تعبت وياها من اشترت نيشان ومن صارت المشيه من غير الهدايه الشتريتهن الها وكل هذا وهيه تسوي مشاكل بيني وبين سيف مره من المرات صادف رمضان كالت سارة اريد كيك كتلها من عيوني وسويتلها قالبين وسويت فطور وكملت كلشي وطفيت الجدوره بقه بس التمر طلعته اسويه وصاحتني عمتي اقبال تريدني اضربها ابره طبعن اني اعرف اضرب ابر هههه وكتلهاونجلاء بس كملي التمر على ما اجي ورحت تقريبن عشر دقائق ورجعت لكيت سيف صاير نار كتله شكو سلامات شبيك كال....
شكرا لزيارتكم عالم روايات سكيرهوم
